ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠭᠤᠷᠪᠠ ᠂ ᠵᠣᠷ ᠦᠭᠡᠢ ᠯᠠᠮᠠ ᠠᠴᠠ ᠵᠣᠪᠠᠭᠰᠠᠨ ᠴᠢᠪᠠᠭᠠᠨᠴᠠ Оройгүй сүм – Арван гурав ᠂ Жоргүй ламаас зовсон чавганц- Oroigui sum 13
770ᠠᠷᠪᠠᠨ ᠭᠤᠷᠪᠠ ᠂ ᠵᠣᠷ ᠦᠭᠡᠢ ᠯᠠᠮᠠ ᠠᠴᠠ ᠵᠣᠪᠠᠭᠰᠠᠨ ᠴᠢᠪᠠᠭᠠᠨᠴᠠ
ᠬᠡᠨ ᠳ᠋ᠦ᠍ ᠡᠷᠳᠡᠮ ᠪᠣᠢ ᠪᠣᠯᠪᠠᠰᠤ ᠲᠡᠭᠦᠨ ᠳ᠋ᠦ᠍ ᠲᠤᠰᠠ ᠪᠤᠢ
ᠬᠡᠨ ᠳ᠋ᠦ᠍ ᠡᠶᠡ ᠪᠣᠢ ᠪᠣᠯᠪᠠᠰᠤ ᠲᠡᠭᠦᠨ ᠳ᠋ᠦ᠍ ᠨᠥᠬᠥᠷ ᠪᠤᠢ
ᠬᠡᠨ ᠳ᠋ᠦ᠍ ᠡᠳ᠋ ᠪᠣᠢ ᠪᠣᠯᠪᠠᠰᠤ ᠲᠡᠭᠦᠨ ᠳ᠋ᠦ᠍ ᠬᠠᠷᠠᠮ ᠪᠤᠢ
ᠣᠲᠠᠴᠢ ᠶ᠋ᠢᠨ ᠶᠡᠬᠡ ᠡᠷᠳᠡᠮ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠪᠠᠰᠠ ᠯᠠ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃ ᠵᠠᠯᠠᠭᠤ ᠭᠡᠰᠦᠯ ᠦ᠋ᠨ ᠪᠡᠶᠡ ᠰᠠᠢᠵᠢᠷᠠᠭᠰᠠᠨ ᠴᠤ᠌ ᠦᠭᠡᠢ᠂ ᠬᠠᠷᠢᠨ ᠲᠡᠭᠦᠨ ᠡᠴᠡ ᠪᠡᠨ ᠳᠣᠤᠷᠠᠳᠠᠭᠰᠠᠨ ᠴᠤ᠌ ᠦᠭᠡᠢ᠂ ᠨᠢᠭᠡᠨ ᠬᠡᠪ ᠲᠤ ᠲᠣᠭᠲᠠᠵᠤ ᠥᠭᠡᠬᠦ ᠴᠤ᠌ ᠪᠢᠰᠢ᠂ ᠪᠤᠯᠴᠢᠷᠬᠠᠢ ᠴᠤ᠌ ᠪᠢᠰᠢ ᠪᠣᠯᠵᠠᠢ᠃ ᠲᠠᠮᠢᠷᠳᠠᠨ ᠶᠠᠳᠠᠷᠴᠤ ᠬᠦᠢᠲᠡᠨ ᠬᠠᠷᠠ ᠬᠥᠯᠥᠰᠥ ᠦᠶᠡ ᠦᠶᠡ ᠴᠤᠪᠤᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠣᠢ ᠤᠬᠠᠭᠠᠨ ᠨᠢ ᠬᠤᠷᠴᠠᠳᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠮᠣᠬᠣᠵᠤ ᠪᠠᠯᠠᠢᠷᠠᠨᠠ᠃ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ᠄
- ᠮᠢᠨᠦ ᠠᠷᠭᠠ ᠰᠢᠷᠭᠡ ᠳᠠᠭᠤᠰᠤᠯᠠ᠃ ᠴᠢᠨᠦ ᠰᠦᠨᠡᠰᠦ ᠠᠢᠬᠤᠪᠲᠤᠷ ᠬᠣᠯᠠ ᠲᠥᠭᠡᠷᠢᠵᠡᠢ᠂ ᠪᠡᠶᠡ ᠴᠢᠨᠢ ᠠᠢᠬᠤᠪᠲᠤᠷ ᠰᠤᠯᠠᠳᠠᠵᠠᠢ᠃ ᠣᠳᠣ ᠨᠠᠳᠠ ᠭᠠᠭᠴᠠ ᠠᠷᠭᠠ ᠪᠠᠢᠨᠠ᠃ ᠲᠡᠭᠦᠨ ᠢ᠋ ᠴᠢ ᠬᠦᠷᠲᠡᠬᠦ ᠤᠤ᠂ ᠠᠯᠢ ᠡᠰᠡᠪᠡᠯ ᠭᠡᠷ ᠲᠦ᠍ ᠪᠡᠨ ᠬᠦᠷᠭᠡᠭᠳᠡᠵᠦ ᠬᠣᠢᠳᠤᠬᠢ ᠪᠠᠨ ᠵᠠᠬᠢᠶᠠᠯᠠᠬᠤ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠠᠷᠠᠢ ᠴᠤ᠌ ᠶᠠᠭᠤᠮᠠ ᠪᠦᠬᠦᠨ ᠬᠡᠷᠡᠭ ᠦᠭᠡᠢ ᠪᠣᠯᠵᠤ᠂ ᠶᠢᠷᠲᠢᠨᠴᠦ ᠶ᠋ᠢ ᠣᠭᠣᠷᠤᠭᠠ ᠦᠭᠡᠢ ᠪᠠᠢᠭᠠ ᠲᠤᠯᠠ ᠮᠠᠷᠠᠮᠪᠠ ᠶ᠋ᠢᠨ ᠲᠡᠷᠡ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠬᠦ ᠶ᠋ᠢ ᠵᠥᠪᠰᠢᠶᠡᠷᠡᠪᠡ᠃
- ᠮᠢᠨᠦ ᠡᠨᠡ ᠠᠷᠭᠠ ᠪᠣᠯ ᠪᠡᠶᠡ ᠰᠡᠳᠬᠢᠯ ᠬᠣᠶᠠᠷ ᠢ᠋ ᠬᠠᠮᠤᠵᠤ ᠬᠡᠯᠡ ᠪᠡᠷ ᠬᠠᠭᠤᠷᠤᠨ ᠡᠪᠳᠡᠬᠦ ᠠᠷᠭᠠ ᠶᠤᠮ᠃ ᠨᠣᠮ ᠤ᠋ᠨ ᠬᠡᠯᠡ ᠪᠡᠷ ᠪᠣᠯ 《ᠬᠤᠮ᠂ ᠬᠤᠮ᠂ ᠬᠤᠮ》 ᠪᠣᠯᠤᠨᠠ᠃ ᠴᠢᠮᠠᠶ᠋ᠢ ᠭᠦᠷᠢᠮ᠂ ᠮᠡᠩᠭᠡᠨ ᠵᠠᠰᠠᠯ᠂ ᠰᠦᠨᠡᠰᠦ ᠳᠠᠭᠤᠳᠠᠯᠭᠠ ᠪᠠᠷ ᠡᠳᠡᠭᠡᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠴᠢᠮᠠᠶ᠋ᠢ ᠪᠠᠰᠠ ᠲᠠᠪᠤᠨ ᠴᠤᠯᠤ᠂ ᠲᠠᠪᠤᠨ ᠣᠨᠢᠰᠣ᠂ ᠭᠤᠷᠪᠠᠨ ᠭᠦᠷᠳᠦ ᠢ᠋ ᠴᠢᠨᠢ ᠰᠢᠨᠵᠢᠵᠦ᠂ ᠬᠦᠴᠦ ᠪᠡᠷ ᠢᠳᠡᠭᠴᠢ᠂ ᠬᠦᠮᠦᠨ ᠡᠵᠡᠯᠡᠭᠰᠡᠨ᠂ ᠨᠥᠭᠡᠨᠡ ᠣᠷᠣᠰᠢᠭᠴᠢ᠂ ᠳᠠᠪᠤᠰᠤ ᠬᠤᠵᠢᠷ᠂ ᠡᠪᠡᠰᠦᠨ ᠡᠮ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠷ ᠠᠨᠠᠭᠠᠵᠤ ᠡᠰᠡ ᠪᠠᠷᠪᠠ᠃ ᠣᠳᠣ ᠪᠣᠳᠣᠬᠤ ᠳ᠋ᠤ᠌ ᠴᠢᠮᠠ ᠳ᠋ᠤ᠌ ᠳᠥᠷᠪᠡᠨ ᠬᠣᠣᠷ ᠤ᠋ᠨ ᠢᠵᠠᠭᠤᠷ ᠰᠢᠩᠭᠡᠵᠡᠢ᠃ ᠲᠡᠷᠡ ᠶᠠᠭᠤᠨ ᠭᠡᠪᠡᠯ ᠰᠠᠨᠠᠭᠠᠨ ᠤ᠋ ᠬᠣᠣᠷ᠂ ᠬᠦᠷᠦᠯᠴᠡᠬᠦ ᠬᠣᠣᠷ᠂ ᠠᠮᠠᠨ ᠤ᠋ ᠠᠭᠤᠷ ᠤ᠋ᠨ ᠬᠣᠣᠷ᠂ ᠦᠵᠡᠬᠦ ᠬᠣᠣᠷ ᠡᠨᠡ ᠳᠥᠷᠪᠡᠭᠦᠯᠡ ᠴᠢᠮᠠ ᠳ᠋ᠤ᠌ ᠬᠦᠷᠴᠡᠢ᠃ ᠲᠡᠭᠡᠬᠦ ᠪᠡᠷ ᠡᠳᠡᠭᠡᠷ ᠢ᠋ ᠬᠣᠷᠢᠶᠠᠨ ᠡᠪᠳᠡᠪᠡᠯ ᠵᠣᠬᠢᠨᠠ᠃ ᠪᠢ ᠴᠢᠮᠡ ᠳ᠋ᠦ᠍ ᠭᠦᠷᠳᠡᠮᠪᠡ ᠵᠠᠯᠠᠵᠤ ᠢᠷᠡᠨᠡ ᠭᠡᠵᠦ ᠫᠦᠷᠪᠦᠳᠤᠨᠤᠢᠲᠠᠨ ᠠᠢᠯᠠᠳᠤᠯᠠ ᠃
ᠰᠠᠩᠵᠢ ᠳᠡᠮᠡᠢ ᠯᠡ ᠲᠣᠯᠣᠭᠠᠢ ᠳᠣᠬᠢᠪᠠ᠃ ᠲᠡᠭᠦᠨ ᠳ᠋ᠦ᠍ ᠦᠨᠡᠮᠰᠢᠭᠰᠡᠨ ᠮᠠᠷᠠᠮᠪᠠ᠄
- ᠴᠢᠮᠠ ᠳ᠋ᠤ᠌ ᠮᠥᠩᠭᠥ ᠪᠠᠢᠬᠤ ᠦᠭᠡᠢ ᠪᠢ ᠮᠡᠳᠡᠵᠦ ᠪᠠᠢᠨᠠ᠃ ᠡᠨᠡ ᠭᠦᠷᠳᠡᠮᠪᠡ ᠨᠤᠭᠦᠳ ᠮᠥᠩᠭᠥ ᠶᠡᠬᠡ ᠨᠡᠬᠡᠳᠡᠭ ᠤᠯᠤᠰ᠃ ᠪᠢ ᠴᠢᠨᠦ ᠡᠷᠭᠦᠯ ᠪᠠᠷᠢᠴᠠ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠲᠠᠭᠠᠭᠠᠨᠠ᠃ ᠡᠳᠡᠭᠡᠷᠡᠳᠡᠭ ᠶᠦᠮ ᠪᠣᠯ ᠴᠢ ᠲᠡᠷᠡ ᠠᠴᠢ ᠶ᠋ᠢ ᠪᠣᠳᠣᠵᠤ ᠬᠠᠷᠢᠭᠤᠯᠤᠨᠠ ᠪᠢᠵᠡ᠃ ᠡᠳᠡᠭᠡᠷᠡᠳᠡᠭ ᠦᠭᠡᠢ ᠶᠦᠮ ᠪᠣᠯ ᠴᠢ ᠵᠠᠩᠴᠢ ᠠᠷᠠᠯᠵᠢᠵᠤ ᠣᠴᠢᠭᠰᠠᠨ ᠬᠣᠷᠸᠠ ᠳ᠋ᠠᠭᠠᠨ ᠮᠢᠨᠦ ᠠᠴᠢ ᠶ᠋ᠢ ᠳᠤᠭᠤᠯᠭᠠᠨᠠ ᠪᠢᠵᠡ᠃ ᠪᠤᠶᠠᠨ ᠪᠣᠯᠤᠨᠠ ᠭᠡᠪᠡ᠃
ᠤᠳᠠᠯ ᠦᠭᠡᠢ ᠭᠦᠷᠳᠡᠮᠪᠡ ᠢᠷᠡᠯᠡ᠃ ᠪᠠᠷᠤᠭᠠᠷ ᠬᠠᠷᠠ ᠬᠥᠬᠡ ᠴᠢᠷᠠᠢ ᠲᠠᠢ᠂ ᠰᠠᠷᠯᠤᠭ ᠤ᠋ᠨ ᠰᠡᠭᠦᠯ ᠰᠢᠭ ᠰᠢᠷᠦᠭᠦᠨ ᠬᠠᠷᠠ ᠦᠰᠦ ᠪᠡᠨ ᠮᠥᠷᠦᠨ ᠳ᠋ᠡᠭᠡᠨ ᠬᠦᠷᠲᠡᠯᠡ ᠤᠷᠭᠤᠭᠤᠯᠤᠭᠰᠠᠨ ᠠᠶᠤᠮᠠᠷ ᠬᠥᠮᠦᠨ ᠠᠵᠢ᠃ ᠲᠡᠷᠡ ᠬᠦᠷᠳᠡᠮ ᠪᠣᠯ ᠳᠣᠭᠰᠢᠳ ᠪᠤᠶᠤ ᠨᠣᠮ ᠤ᠋ᠨ ᠰᠠᠬᠢᠭᠤᠰᠤᠨ ᠪᠣᠯᠬᠤ ᠲᠣᠭᠰᠢᠨ ᠳᠦᠷᠢᠲᠦ ᠪᠤᠷᠬᠠᠳ ᠤᠨ ᠲᠠᠭᠢᠯᠭᠠ ᠰᠦᠯᠳᠡ᠂ ᠶᠣᠰᠣᠯᠠᠯ ᠢ᠋ ᠭᠦᠷᠳᠡᠮᠳᠡᠬᠦ ᠲᠡᠢ ᠬᠣᠣᠰᠯᠠᠨ ᠬᠢᠳᠡᠭ ᠡᠷᠳᠡᠮ ᠲᠡᠢ ᠠᠵᠢ᠃ ᠭᠦᠷᠳᠡᠮᠪᠡ ᠡᠪᠡᠳᠴᠢᠲᠡᠨ ᠤ ᠳᠡᠷᠭᠡᠳᠡ ᠰᠢᠭᠤᠳ ᠯᠠ ᠨᠣᠮᠲᠤ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠡᠬᠢᠯᠡᠯᠡ᠃ ᠵᠣᠳᠪᠠ ᠭᠡᠳᠡᠭ ᠲᠢᠲᠢᠮ ᠮᠠᠯᠠᠭᠠᠢ ᠶ᠋ᠢ ᠶᠡᠬᠡ ᠦᠰᠦᠲᠦ ᠰᠠᠭᠯᠠᠭᠠᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠯᠠ᠃ ᠵᠣᠳᠪᠠ ᠪᠤᠶᠤ ᠲᠢᠲᠢᠮ ᠨᠢ ᠲᠠᠪᠤᠨ ᠲᠠᠯᠠ ᠲᠠᠢ᠂ ᠲᠠᠯᠠ ᠪᠦᠷ ᠳᠡᠭᠡᠷᠡ ᠪᠡᠨ ᠪᠤᠷᠬᠠᠨ ᠤ᠋ ᠵᠢᠷᠤᠭ ᠲᠠᠢ ᠬᠣᠶᠠᠷ ᠬᠠᠴᠠᠷ ᠤᠷᠤᠭᠤ ᠲᠣᠬᠣᠢ ᠬᠢᠷᠢ ᠶ᠋ᠢᠨ ᠤᠷᠲᠤ ᠬᠣᠩᠭᠣᠷᠴᠠᠭ ᠦᠰᠦᠨ ᠤᠨᠵᠢᠯᠭᠠ ᠲᠠᠢ᠂ ᠠᠷᠤ ᠲᠠᠯᠠ ᠤᠷᠤᠭᠤ ᠬᠥᠬᠡ᠂ ᠴᠠᠭᠠᠨ᠂ ᠤᠯᠠᠭᠠᠨ᠂ ᠰᠢᠷᠠ᠂ ᠨᠣᠭᠣᠭᠠᠨ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠳᠠᠷᠵᠢᠨ ᠵᠡᠭᠦᠭᠰᠡᠨ᠂ ᠲᠣᠭᠣᠷᠴᠣᠭ ᠬᠡᠯᠪᠡᠷᠢᠲᠡᠢ ᠮᠠᠯᠠᠭᠠᠢ᠂ ᠣᠷᠣᠢ ᠳ᠋ᠠᠭᠠᠨ ᠸᠠᠴᠢᠷ ᠲᠠᠢ ᠲᠤᠯᠠ ᠶᠡᠬᠡ ᠯᠡ ᠰᠦᠷ ᠲᠡᠢ ᠦᠵᠡᠭᠳᠡᠨᠡ᠃ ᠭᠦᠷᠲᠡᠮ ᠦ᠋ᠨ ᠰᠠᠭᠯᠠᠭᠠᠷ ᠬᠠᠷᠠ ᠦᠰᠦ᠂ ᠵᠤᠳᠪᠠ ᠶᠢᠨ ᠨᠢ ᠲᠣᠷᠭᠠᠮᠰᠤᠭ ᠪᠠᠷᠠᠭᠠᠨ ᠦᠰᠦ ᠬᠣᠶᠠᠷ ᠬᠣᠣᠰᠯᠠᠨ ᠨᠡᠢᠯᠡᠭᠡᠳ ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠠᠩᠭᠠᠰᠪᠠ ᠮᠠᠶᠢᠭ᠍ᠲᠠᠢ ᠪᠣᠯᠵᠠᠢ᠃ ᠲᠠᠪᠤᠨ ᠲᠠᠯᠠ ᠳ᠋ᠤ᠌ ᠨᠢ ᠡᠷᠭᠢᠨ ᠲᠣᠭᠣᠷᠢᠨ ᠵᠢᠷᠤᠭᠰᠠᠨ ᠪᠤᠷᠬᠠᠳ ᠨᠢ ᠪᠢᠷᠤᠤᠵᠠᠨᠠ᠂ ᠠᠭᠵᠠ᠂ ᠷᠠᠳᠨᠠᠰᠠᠮᠪᠤᠤ᠂ ᠠᠪᠢᠳ᠂ ᠠᠮᠠᠭᠠᠰᠠᠳ ᠡᠳᠡᠭᠡᠷ ᠶᠤᠮ᠃ ᠪᠢᠷᠤᠤᠵᠠᠨᠠ ᠶᠢ ᠮᠣᠩᠭᠣᠯᠴᠤᠳ ᠮᠠᠰᠢ ᠭᠡᠢᠬᠦᠯᠦᠨ ᠵᠣᠬᠢᠶᠠᠭᠴᠢ ᠪᠤᠷᠬᠠᠨ ᠭᠡᠬᠦ ᠪᠥᠭᠡᠳ ᠮᠣᠳᠣᠷ ᠨᠢ ᠪᠦᠭᠦᠮᠢᠰᠫᠠᠷᠠ ᠮᠠᠶᠢᠭ᠍ᠲᠠᠢ᠂ ᠬᠥᠬᠡ ᠥᠩᠭᠡ ᠲᠡᠢ᠃ ᠠᠭᠵᠠ ᠶ᠋ᠢ ᠦᠯᠦ ᠬᠥᠳᠡᠯᠦᠭᠴᠢ ᠪᠤᠷᠬᠠᠨ ᠭᠡᠬᠦ ᠡᠴᠡ ᠭᠠᠳᠠᠨᠠ ᠠᠵᠠᠯᠢ ᠮᠣᠳᠣᠷ ᠲᠠᠢ᠂ ᠴᠠᠭᠠᠨ ᠥᠩᠭᠡ ᠲᠡᠢ᠃ ᠠᠪᠢᠳ ᠪᠣᠯ ᠴᠠᠭᠯᠠᠰᠢ ᠦᠭᠡᠢ ᠡᠷᠢᠯᠲᠦ ᠪᠤᠷᠬᠠᠨ᠂ ᠮᠣᠳᠣᠷ ᠨᠢ ᠲᠢᠾᠢᠶᠠᠨᠠ ᠮᠠᠶᠢᠭ᠍ᠲᠠᠢ᠂ ᠤᠯᠠᠭᠠᠨ ᠥᠩᠭᠡ ᠲᠡᠢ᠃ ᠠᠮᠭᠠᠰᠠᠳ ᠪᠤᠷᠬᠠᠨ ᠠᠪᠬᠢᠶᠠ ᠮᠣᠳᠣᠷ ᠲᠠᠢ᠂ ᠨᠣᠭᠣᠭᠠᠨ ᠥᠩᠭᠡ ᠲᠡᠢ᠃ ᠷᠠᠳᠨᠠᠰᠠᠮᠪᠤᠤ ᠪᠣᠯ ᠡᠷᠳᠡᠨᠢ ᠶ᠋ᠢᠨ ᠣᠷᠣᠯ ᠪᠤᠷᠬᠠᠨ᠂ ᠸᠠᠷᠠᠳᠠ ᠮᠤᠲᠤᠷ ᠲᠠᠢ᠂ ᠰᠢᠷᠠ ᠥᠩᠭᠡᠲᠡᠢ ᠠᠵᠢ᠃ ᠪᠦᠬᠦᠮᠢᠰᠫᠠᠷᠠ ᠮᠣᠳᠣᠷ ᠪᠣᠯ ᠭᠠᠵᠠᠷ ᠶᠣᠰᠣᠯᠠᠬᠤ ᠮᠠᠶᠢᠭ᠋᠂ ᠠᠵᠠᠯᠢ ᠮᠣᠳᠣᠷ ᠨᠢ ᠵᠠᠯᠪᠠᠷᠢᠬᠤ᠂ ᠠᠪᠬᠢᠶᠠ ᠨᠢ ᠠᠶᠤᠮᠰᠢᠭ ᠦᠭᠡᠢ ᠶ᠋ᠢ ᠢᠯᠡᠳᠬᠡᠬᠦ᠂ ᠲᠢᠾᠢᠶᠠᠨᠠ ᠨᠢ ᠪᠢᠰᠢᠯᠭᠠᠯ᠂ ᠸᠠᠷᠠᠳᠠ ᠪᠣᠯ ᠥᠭᠯᠢᠭᠡ ᠶ᠋ᠢ ᠢᠯᠡᠷᠬᠡᠢᠯᠡᠬᠦ ᠮᠠᠶᠢᠭ᠋ ᠵᠠᠭᠵᠠᠨ ᠭᠡᠳᠡᠭ ᠢ᠋ ᠰᠠᠩᠵᠢ ᠴᠤᠢᠮᠴᠤᠭ ᠲᠠᠯᠢᠢᠭᠠᠴᠢ ᠪᠠᠭᠰᠢ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠯᠭᠠᠵᠤ ᠮᠡᠳᠡᠵᠦ ᠠᠪᠤᠭᠰᠠᠨ ᠪᠠᠢᠯᠠ᠃ ᠡᠳᠡᠭᠡᠷ ᠲᠠᠪᠤ ᠨᠢ ᠲᠢᠲᠢᠮ ᠢ᠋ ᠴᠢᠮᠡᠬᠦ ᠭᠡᠭᠳᠡᠬᠦ ᠳᠡᠭᠡᠳᠦ ᠪᠤᠷᠬᠠᠳ ᠮᠥᠨ᠃ ᠭᠠᠭᠴᠠᠬᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠤᠶᠤ ᠳᠤᠬᠤᠨ ᠠ᠋ᠴᠠ ᠳᠡᠭᠡᠭᠰᠢ ᠵᠠᠯᠠᠭᠰᠠᠨ ᠪᠠᠢᠪᠠᠯ ᠵᠣᠬᠢᠨᠠ᠃ ᠭᠦᠷᠲᠡᠮ ᠲᠡᠢᠨ ᠬᠦ᠌ ᠵᠣᠳᠪᠠ ᠭᠡᠳᠡᠭ ᠪᠤᠷᠬᠠᠨᠳ᠋ᠤ᠌ ᠲᠢᠲᠢᠮ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠳ᠋ᠠᠭᠠᠨ ᠪᠠᠲᠤ ᠲᠣᠭᠲᠠᠭᠠᠭᠠᠳ ᠲᠣᠲᠢᠭ ᠭᠡᠭᠴᠢ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠡᠳ᠋ ᠢ᠋ᠶ᠋ᠡᠷ ᠣᠶᠣᠭᠰᠠᠨ ᠴᠡᠭᠡᠵᠢᠪᠴᠢ ᠪᠠᠨ ᠡᠮᠦᠰᠪᠡ᠃ ᠳᠠᠷᠠᠭᠠ ᠨᠢ ᠮᠠᠳᠠᠭ ᠭᠡᠳᠡᠭ ᠪᠠᠩᠵᠠᠯ ᠳᠤᠬᠠᠯ ᠢ᠋ᠶ᠋ᠠᠨ᠂ ᠠᠯᠪᠢᠨ ᠰᠡᠯᠡᠮᠡ ᠭᠡᠳᠡᠭ ᠨᠠᠷᠢᠬᠠᠨ ᠰᠢᠯᠤᠭᠤᠨ ᠰᠡᠯᠡᠮᠡ ᠶ᠋ᠢ ᠠᠭᠰᠠᠪᠠ᠃
ᠲᠠᠪᠤᠨ ᠪᠤᠷᠬᠠᠨ ᠵᠢᠷᠤᠭᠰᠠᠨ ᠲᠢᠲᠢᠮ ᠲᠡᠢ᠂ ᠲᠣᠳᠢᠭ ᠢᠶᠠᠷ ᠴᠡᠭᠡᠵᠢᠨ ᠪᠡᠶᠡ ᠶ᠋ᠢ᠂ ᠮᠠᠳᠢᠭ ᠢᠶᠠᠷ ᠪᠥᠭᠰᠡᠨ ᠪᠡᠶᠡ ᠶ᠋ᠢ ᠣᠷᠢᠶᠠᠭᠰᠠᠨ ᠡᠨᠡᠬᠦ ᠰᠦᠷᠯᠢᠭ ᠭᠦᠷᠲᠡᠮ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠰᠡᠳᠬᠢᠯ ᠳᠦ ᠱᠦᠭᠯᠡᠭᠰᠡᠨ ᠨᠠᠶᠠᠨ ᠳᠦᠷᠪᠡᠨ ᠮᠢᠩᠭᠠᠨ ᠨᠢᠭᠦᠯ ᠨᠢᠰᠸᠠᠨᠨᠢᠰ ᠢ᠋ ᠠᠷᠢᠯᠭᠠᠨ ᠲᠣᠨᠢᠯᠭᠠᠬᠤ ᠪᠠᠷ ᠳᠣᠭᠰᠢᠨ ᠨᠣᠮ ᠤᠩᠰᠢᠵᠤ ᠭᠦᠷᠳᠡᠮᠳᠡᠬᠦ ᠠᠵᠢ᠃
ᠨᠠᠶᠠᠨ ᠳᠥᠷᠪᠡᠨ ᠮᠢᠩᠭᠠᠨ ᠨᠢᠭᠦᠯ ᠠᠯᠳᠠᠰ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠲᠠᠪᠤᠨ ᠭᠣᠣᠯ ᠬᠣᠣᠷ ᠪᠣᠢ ᠭᠡᠵᠦ ᠦᠵᠡᠳᠡᠭ ᠶᠦᠮ ᠂ ᠲᠡᠷᠡ ᠨᠢ ᠨᠢᠭᠡ ᠳ᠋ᠦ᠍ ᠮᠤᠩᠬᠠᠭ ᠤ᠋ᠨ ᠬᠣᠣᠷ᠂ ᠲᠡᠭᠦᠨ ᠢ᠋ ᠪᠢᠷᠤᠤᠵᠠᠨᠠ ᠪᠤᠷᠬᠠᠨ ᠳᠠᠷᠤᠨᠠ᠃ ᠬᠣᠶᠠᠷ ᠲᠤ᠌ ᠬᠢᠯᠢᠩᠲᠦ ᠰᠡᠳᠬᠢᠯ᠂ ᠲᠡᠭᠦᠨ ᠢ᠋ ᠠᠭᠵᠠ ᠪᠤᠷᠬᠠᠨ ᠳᠠᠷᠤᠨᠠ᠃ ᠣᠮᠣᠭ ᠤ᠋ᠨ ᠬᠣᠣᠷ ᠢ ᠷᠠᠳᠨᠠᠰᠠᠮᠪᠤᠤ ᠳᠠᠷᠤᠨᠠ᠃ ᠠᠲᠠᠭᠠ ᠶ᠋ᠢ ᠠᠮᠠᠭᠠᠰᠠᠳ ᠳᠠᠷᠤᠨᠠ᠃ ᠲᠠᠴᠢᠶᠠᠩᠭᠤᠢ ᠶ᠋ᠢ ᠠᠪᠢᠳ ᠳᠠᠷᠤᠨᠠ᠃ ᠡᠢᠮᠦ ᠲᠠᠪᠤᠨ ᠬᠣᠣᠷ ᠢ᠋ ᠳᠠᠷᠤᠵᠤ ᠰᠠᠩᠵᠢ ᠭᠡᠰᠦᠯ ᠢ᠋ ᠡᠪᠡᠳᠴᠢᠨ ᠡᠴᠡ ᠠᠪᠤᠷᠠᠬᠤ ᠪᠠᠷ ᠭᠦᠷᠳᠡᠮᠪᠡ ᠪᠠᠭᠤᠵᠤ ᠭᠠᠷᠤᠯᠠ᠃ ᠲᠢᠲᠢᠮ ᠦ᠋ᠨ ᠲᠠᠪᠤᠨ ᠪᠤᠷᠬᠠᠨ ᠤ᠋ ᠮᠠᠭᠲᠠᠭᠠᠯ ᠢ᠋ ᠳᠦᠩᠭᠢᠨᠡᠲᠡᠯᠡ ᠤᠩᠰᠢᠵᠤ᠂ ᠰᠡᠯᠡᠮᠡ ᠪᠡᠨ ᠨᠢᠭᠡ ᠣᠭᠰᠢᠭᠤᠯᠵᠤ ᠨᠢᠭᠡ ᠪᠤᠴᠠᠭᠠᠵᠤ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠵᠡᠭᠦᠨ ᠢ᠋ ᠲᠠᠰᠢᠵᠤ ᠠ᠋᠂ ᠠ᠋᠂ ᠠ᠋ ᠭᠡᠵᠦ ᠬᠠᠰᠬᠢᠷᠤᠨ᠂ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠢ᠋ ᠲᠠᠰᠢᠵᠤ ᠬᠤᠮ᠂ ᠬᠤᠮ᠂ ᠬᠤᠮ ᠭᠡᠵᠦ ᠤᠷᠢᠯᠠᠨᠠ᠃ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠵᠡᠭᠦᠨ ᠢ᠋ ᠲᠠᠰᠢᠬᠤ ᠨᠢ 《ᠶᠡᠭᠦᠳᠬᠡ!》 ᠭᠡᠰᠡᠨ ᠤᠳᠬᠠ ᠪᠥᠭᠡᠳ ᠠ᠋᠂ ᠠ᠋᠂ ᠠ᠋ ᠨᠢ 《 ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢ ᠢᠳᠡᠵᠦ ᠴᠡᠩᠭᠡᠬᠦ 》 ᠬᠡᠮᠡᠭᠰᠡᠨ ᠳᠣᠬᠢᠶᠠ ᠠᠵᠢ᠃ ᠵᠡᠭᠦᠨ ᠭᠠᠷ ᠢᠶᠠᠷ ᠪᠠᠷᠠᠭᠤᠨ ᠢ᠋ ᠲᠠᠰᠢᠬᠤ ᠨᠢ《 ᠪᠦᠷᠢᠮᠦᠰᠦᠨ ᠶᠡᠭᠦᠳᠬᠡ᠂ ᠪᠦᠷᠢᠮᠦᠰᠦᠨ ᠶᠡᠭᠦᠳᠬᠡ 》 ᠭᠡᠰᠡᠨ ᠤᠳᠬᠠ ᠪᠥᠭᠡᠳ ᠬᠤᠮ᠂ ᠬᠤᠮ᠂ ᠬᠤᠮ ᠨᠢ ᠪᠡᠶᠡ᠂ ᠬᠡᠯᠡ᠂ ᠰᠡᠳᠬᠢᠯ ᠭᠤᠷᠪᠠ ᠶ᠋ᠢ ᠬᠤᠷᠢᠶᠠᠵᠤ ᠡᠪᠳᠡᠬᠦ ᠰᠠᠨᠠᠭᠤᠯᠭᠠ ᠦᠭᠡ ᠶᠦᠮ᠃
ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠭᠦᠷᠲᠡᠮ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ ᠲᠡᠭᠦᠨ ᠦ᠌ ᠭᠦᠷᠳᠡᠮᠳᠡᠬᠦ ᠶᠢ ᠠᠵᠢᠭᠯᠠᠵᠤ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠳᠠᠬᠢᠭᠠᠳ ᠯᠠ ᠬᠤᠪᠴᠠᠰᠤ ᠶ᠋ᠢ ᠲᠠᠢᠯᠦᠨ ᠨᠢᠴᠦᠭᠦᠯᠡᠨ ᠡᠬᠢᠯᠡᠪᠡ᠃ ᠭᠦᠷᠲᠡᠮ ᠵᠠᠪᠠᠵᠢ ᠪᠠᠷ ᠢ᠋ᠶ᠋ᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ᠂ ᠨᠢᠭᠤᠷ ᠠᠮᠠ ᠪᠠᠨ ᠲᠠᠲᠠᠪᠠᠯᠵᠠᠭᠤᠯᠤᠨ ᠪᠥᠭᠡᠯᠡᠵᠦ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ ᠰᠡᠯᠡᠮᠡ ᠪᠡᠨ ᠰᠤᠭᠤ ᠲᠡᠳᠡᠨ ᠢᠯᠡ ᠭᠠᠷᠭᠠᠵᠤ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠥᠭᠡᠳᠡ ᠡᠴᠡ ᠣᠢᠷᠠᠲᠤᠨ ᠢᠷᠡᠪᠡ᠃ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ᠄
- ᠪᠢᠲᠡᠭᠡᠢ ᠠᠶᠤ᠃ ᠬᠠᠷᠠ ᠴᠠᠭᠠᠨ ᠤ᠋ ᠵᠠᠪᠰᠠᠷ ᠢ᠋ ᠣᠯᠤᠨᠠ᠃ ᠡᠪᠡᠳᠴᠢᠨ ᠱᠦᠭᠯᠡᠭᠰᠡᠨ ᠡᠴᠡ ᠴᠢᠨᠢ ᠠᠩᠭᠢᠵᠢᠷᠠᠭᠤᠯᠵᠤ ᠦᠭᠭᠦᠨᠡ! ᠪᠢᠲᠡᠭᠡᠢ ᠠᠶᠤ! ᠭᠡᠵᠦ ᠢᠳᠬᠠᠪᠠ᠃
ᠭᠦᠷᠳᠡᠮ ᠨᠠᠷᠢᠬᠠᠨ ᠬᠠᠷᠠ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠡᠯᠢᠭᠡᠨ ᠡᠴᠡ ᠬᠣᠯᠠ ᠦᠭᠡᠢ ᠴᠠᠭᠠᠨ ᠮᠥᠭᠡᠷᠰᠦᠨ ᠦ᠌ ᠲᠤᠰᠢᠶᠠ ᠬᠠᠳᠬᠤᠪᠠ᠃ ᠰᠡᠯᠡᠮᠡ ᠨᠢ ᠨᠡᠪᠲᠡᠷᠡᠨ ᠣᠷᠣᠯᠠ᠃ ᠰᠠᠩᠵᠢ ᠭᠡᠰᠦᠯ ᠤᠬᠠᠭᠠᠨ ᠠᠯᠳᠠᠪᠠ᠃ ᠳᠠᠬᠢᠨ ᠰᠡᠷᠭᠦᠭᠡᠳ ᠬᠠᠷᠠᠪᠠᠯ ᠭᠦᠷᠳᠡᠮ ᠠᠬᠢᠭᠠᠳ ᠯᠠ ᠣᠢᠷᠠᠲᠤᠨ ᠢᠷᠡᠵᠦ ᠪᠠᠷᠠᠭᠤᠨ ᠭᠠᠷ ᠠᠴᠠ ᠨᠢ ᠠᠳᠬᠤᠨ ᠠᠪᠤᠭᠠᠳ ᠪᠤᠯᠴᠢᠩ ᠳᠤᠮᠳᠠᠭᠤᠷ ᠨᠢ ᠮᠥᠨᠥᠬᠡᠨ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠨᠡᠪᠲᠡ ᠬᠠᠳᠬᠤᠪᠠ᠃ᠳᠠᠯᠲᠡᠰᠬᠢᠭᠰᠡᠨ ᠰᠠᠩᠵᠢ ᠭᠡᠰᠦᠯ ᠠᠬᠢᠭᠠᠳ ᠯᠠ ᠤᠬᠠᠭᠠᠨ ᠪᠠᠯᠠᠷᠠᠪᠠ᠃
ᠱᠠᠵᠦᠦᠲ ᠪᠤᠶᠤ ᠡᠷᠬᠡᠲᠡᠨ ᠰᠢᠨᠵᠢᠬᠦ ᠰᠤᠳᠤᠷ ᠲᠤ᠌ ᠵᠢᠭᠠᠭᠰᠠᠨ ᠶᠣᠰᠣᠭᠠᠷ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠬᠠᠷᠠ ᠴᠠᠭᠠᠨ ᠤ᠋ ᠵᠠᠪᠰᠠᠷ ᠴᠠᠭᠠᠨ ᠮᠥᠭᠡᠷᠰᠦᠨ ᠡᠴᠡ ᠲᠤᠤᠷᠠᠠᠬᠨᠠ᠂ ᠪᠠᠰᠠ ᠭᠠᠷ ᠤ᠋ᠨ ᠵᠥᠭᠡᠯᠡᠨ ᠪᠤᠯᠴᠢᠩ ᠳᠤᠮᠳᠠᠭᠤᠷ ᠪᠠᠢᠷᠢᠯᠠᠬᠤ ᠪᠥᠭᠡᠳ ᠨᠡᠪᠲᠡ ᠬᠠᠳᠬᠤᠬᠤ᠂ ᠡᠰᠡᠪᠡᠯ ᠣᠭᠲᠣᠯᠵᠤ ᠪᠣᠯᠳᠠᠭ ᠠᠵᠢ᠃ ᠬᠠᠷᠠ ᠴᠠᠭᠠᠨ ᠤ᠋ ᠵᠠᠪᠰᠠᠷ ᠢ᠋ ᠣᠯᠵᠤ ᠴᠢᠳᠠᠪᠠᠯ ᠪᠡᠶᠡ ᠳ᠋ᠦ᠍ ᠶᠠᠮᠠᠷ ᠴᠤ᠌ ᠬᠣᠣᠷ ᠬᠥᠨᠥᠭᠡᠯ ᠦᠭᠡᠢ ᠪᠡᠷ ᠴᠤᠭᠤ ᠬᠠᠳᠬᠤᠵᠤ ᠪᠣᠯᠳᠠᠭ ᠢ᠋ ᠪᠥᠬᠡ ᠨᠠᠷ᠂ ᠭᠦᠷᠳᠡᠮ ᠨᠦᠭᠦᠳ ᠴᠢᠳᠠᠮᠠᠭ ᠠᠰᠢᠭᠯᠠᠳᠠᠭ ᠶᠤᠮ ᠭᠡᠳᠡᠭ ᠢ ᠬᠥᠭᠡᠷᠦᠬᠦᠢ ᠰᠠᠩᠵᠢ ᠭᠡᠰᠦᠯ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠯᠠ᠃ ᠰᠠᠩᠵᠢ ᠠᠶᠤᠨ ᠰᠦᠷᠳᠡᠭᠰᠡᠨ ᠡᠴᠡ ᠪᠣᠯᠵᠤ ᠠᠷᠠᠢᠬᠢᠨ ᠰᠡᠭᠡᠭᠡ ᠣᠷᠣᠵᠤ᠂ ᠨᠢᠳᠦ ᠪᠡᠨ ᠨᠡᠭᠡᠭᠡᠪᠡᠯ ᠭᠦᠷᠲᠡᠮ ᠨᠢᠭᠡᠨᠲᠡ ᠳᠥᠪᠴᠢᠩᠨᠡᠬᠦ ᠪᠠᠨ ᠪᠣᠯᠢᠵᠤ᠂ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠬᠠᠭᠠᠳ ᠮᠠᠳᠢᠭ ᠢ᠋ᠶ᠋ᠠᠨ ᠲᠠᠢᠯᠵᠤ ᠪᠠᠢᠵᠠᠢ᠃
- ᠵᠦᠭᠡᠷ᠃ ᠣᠳᠣ ᠴᠢᠨᠦ ᠪᠡᠶᠡ ᠡᠴᠡ ᠨᠠᠶᠠᠨ ᠳᠥᠷᠪᠡᠨ ᠮᠢᠩᠭᠠᠨ ᠨᠢᠰᠸᠠᠨᠢᠰ ᠴᠢᠨᠢ ᠵᠠᠢᠯᠠᠭᠠ ᠪᠢᠵᠡ᠃ ᠴᠥᠮ ᠵᠠᠢᠯᠳᠠᠭ ᠦᠭᠡᠢ ᠶᠤᠮ ᠡ ᠭᠡᠬᠦ ᠳ᠋ᠦ᠍ ᠲᠠᠪᠤᠨ ᠭᠣᠣᠯ ᠬᠣᠣᠷ ᠠ᠋ᠴᠠ ᠪᠠᠨ ᠰᠠᠯᠤᠭᠠ ᠪᠢᠵᠠ ᠳᠠ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠡᠳᠡᠭᠡᠨ ᠢᠯᠠᠷᠢᠰᠢᠨᠠ! ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠢᠳᠬᠠᠯᠠ᠃
ᠰᠠᠩᠵᠢ ᠭᠡᠰᠦᠯ ᠳᠡᠮᠡᠢ ᠯᠡ ᠲᠣᠯᠣᠭᠠᠢ ᠳᠣᠬᠢᠪᠠ᠃ 《ᠣᠳᠣ ᠶᠠᠭᠠᠬᠢᠳᠠᠭ ᠪᠣᠯ? ᠡᠯᠳᠡᠪ ᠭᠠᠢ ᠵᠡᠳᠬᠡᠷ ᠡᠴᠡ ᠰᠠᠯᠳᠠᠭ ᠪᠣᠯᠪᠠ ᠤᠤ? ᠪᠢ ᠰᠠᠢ ᠰᠡᠯᠡᠮᠡ ᠪᠡᠷ ᠬᠠᠳᠬᠤᠭᠤᠯᠤᠭᠠᠳ ᠦᠬᠦᠭᠰᠡᠨ ᠦᠭᠡᠢ ᠭᠡᠵᠦ ᠤᠤ? ᠴᠢᠰᠤ ᠴᠤ᠌ ᠭᠠᠷᠤᠭᠠ ᠦᠭᠡᠢ ᠶᠦᠮ ᠪᠠᠢᠬᠤ ᠳᠠ? ᠣᠰᠣᠯᠳᠠᠬᠤ ᠦᠭᠡᠢ ᠯᠡ ᠥᠷᠥᠴᠡ ᠤᠷᠤᠭᠤ ᠰᠡᠯᠡᠮᠡ ᠨᠢ ᠨᠡᠪᠲᠡᠯᠦᠨ ᠣᠷᠣᠭᠰᠠᠨ᠃ ᠪᠠᠰᠠ ᠭᠠᠷ ᠤ᠋ᠨ ᠪᠤᠯᠴᠢᠩ ᠢ᠋ ᠴᠤ᠌ ᠬᠠᠳᠬᠤᠵᠤ ᠪᠠᠢᠭ᠍ᠰᠠᠨ᠃ ᠲᠡᠭᠡᠭᠡᠳ ᠦᠬᠦᠭᠰᠡᠨ ᠦᠭᠡᠢ ᠦᠯᠡᠳᠡᠭᠰᠡᠨ ᠶᠦᠮ ᠤᠤ? ᠡᠨᠡ ᠦᠨᠡᠨ ᠭᠡᠵᠦ ᠤᠤ? ᠭᠡᠮᠡᠨ ᠰᠠᠩᠵᠢ ᠪᠣᠳᠣᠭᠠᠳ ᠥᠷᠥᠴᠡ ᠪᠡᠨ ᠢᠯᠠᠵᠤ ᠦᠵᠡᠪᠡᠯ ᠴᠢᠰᠤ ᠭᠠᠷᠤᠭᠠ ᠦᠭᠡᠢ ᠪᠠᠶᠢᠯᠠ᠃
- ᠭᠦᠷᠳᠡᠮ ᠷᠢᠳᠢ ᠰᠢᠳᠢ ᠲᠡᠢ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠴᠢᠮᠠᠶ᠋ᠢ ᠪᠢᠰᠢ ᠬᠠᠷᠢᠨ ᠴᠢᠮᠠ ᠳ᠋ᠤ᠌ ᠱᠦᠭᠯᠡᠭᠰᠡᠨ ᠨᠢᠰᠪᠠ ᠪᠠᠨᠨᠢᠰ ᠢ᠋ ᠦᠬᠦᠭᠦᠯᠦᠭᠰᠡᠨ ᠶᠦᠮ᠃ ᠣᠳᠣ ᠴᠢ ᠲᠠᠪᠠᠲᠠᠢ ᠠᠮᠠᠷᠠᠭᠠᠳ ᠮᠠᠷᠭᠠᠰᠢ ᠭᠡᠷ ᠲᠦ᠍ ᠪᠡᠨ ᠬᠠᠷᠢ! ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠢᠳᠬᠠᠯᠠ᠃《ᠨᠡᠭᠡᠷᠡᠨ ᠯᠡ ᠢᠳᠡ ᠰᠢᠳᠢ ᠲᠡᠢ ᠰᠡᠯᠡᠮᠡ ᠪᠠᠢᠨᠠ᠃ ᠠᠯᠪᠢᠨ ᠰᠡᠯᠡᠮᠡ ᠭᠡᠳᠡᠭ ᠴᠢᠨᠢ ᠡᠨᠡ ᠪᠠᠢᠵᠠᠢ᠃ ᠢᠯᠳᠦᠴᠢ ᠬᠦᠮᠦᠨ ᠦ᠌ ᠭᠠᠷ ᠲᠤ᠌ ᠦᠬᠦᠭᠡ ᠦᠭᠡᠢ ᠪᠣᠯᠬᠣᠷ ᠮᠠᠷᠠᠮᠪᠠ ᠶ᠋ᠢᠨ ᠬᠡᠯᠡᠳᠡᠭ ᠦᠨᠡᠨ ᠯᠡ ᠪᠠᠢᠵᠤ ᠲᠠᠭᠠᠷᠠᠨᠠ》ᠭᠡᠵᠦ ᠭᠡᠰᠦᠯ ᠪᠣᠳᠣᠯᠠ ᠃
᠁ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠪᠣᠰᠬᠤ ᠳ᠋ᠤ᠌ ᠭᠡᠰᠦᠯ ᠰᠠᠩᠵᠢ ᠶ᠋ᠢᠨ ᠪᠡᠶᠡ ᠰᠠᠢᠵᠢᠷᠠᠭᠰᠠᠨ ᠶᠠᠭᠤᠮᠠ ᠦᠭᠡᠢ ᠬᠠᠭᠤᠴᠢᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠯᠠ᠃ ᠪᠣᠰᠬᠤ ᠭᠡᠬᠦ ᠳ᠋ᠦ᠍ ᠲᠣᠯᠣᠭᠠᠢ ᠡᠷᠭᠢᠨ ᠳᠣᠲᠣᠷᠠ ᠪᠠᠯᠠᠷᠲᠤᠵᠤ᠂ ᠤᠨᠠᠮᠠᠷ ᠪᠣᠯᠤᠨᠠ᠃ ᠰᠠᠭᠤᠬᠤ ᠭᠡᠬᠦ ᠳ᠋ᠦ᠍ ᠮᠥᠨ ᠲᠡᠷᠡᠴᠢᠯᠡᠨ ᠰᠢᠨᠠᠯᠤᠨᠠ᠃ ᠥᠴᠥᠭᠡᠳᠦᠷ ᠦ᠋ᠨ ᠭᠦᠷᠲᠡᠮ ᠳᠦ ᠰᠡᠯᠡᠮᠡ ᠪᠡᠷ ᠬᠠᠳᠬᠤᠭᠤᠯᠤᠭᠰᠠᠨ ᠥᠷᠥᠴᠡᠨ ᠲᠤᠰᠢᠶᠠ ᠨᠢ ᠴᠤ᠌ ᠭᠡᠰᠡᠨ ᠪᠤᠯᠴᠢᠩ ᠳ᠋ᠤ᠌ ᠨᠢ ᠴᠤ᠌ ᠭᠡᠰᠡᠨ ᠦᠯᠦ ᠶᠠᠯᠢᠭ ᠬᠥᠨᠳᠡᠭᠦᠷ ᠪᠠᠢᠯᠠ᠃ ᠦᠨᠡᠬᠡᠷ ᠯᠡ ᠮᠡᠰᠡ ᠬᠦᠷᠦᠭᠰᠡᠨ ᠨᠢ ᠢᠯᠡᠳᠲᠡ ᠠᠵᠢ᠃ ᠭᠡᠪᠡᠴᠦ ᠡᠳᠡᠭᠡᠷᠡᠵᠦ ᠳᠡᠭᠡᠷᠡᠳᠡᠭᠰᠡᠨ ᠶᠠᠭᠤᠮᠠ ᠠᠯᠠᠭᠠ ᠪᠠᠢᠪᠠ᠃
- ᠥᠨᠥᠳᠥᠷ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠴᠢᠨᠢ ᠢᠷᠡᠨᠡ ᠪᠢᠵᠡ᠃ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠵᠤ ᠬᠡᠪᠲᠡᠪᠡᠯ ᠲᠠᠭᠠᠷᠠᠨᠠ᠃ᠪᠢ ᠬᠡᠳᠦ ᠬᠣᠨᠣᠭ ᠤ᠋ᠨ ᠮᠥᠷᠭᠥᠯ ᠢᠶᠠᠷ ᠰᠢᠬᠠᠴᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠬᠤ ᠪᠠᠷ ᠶᠠᠪᠤᠬᠤ ᠪᠣᠯᠣᠯᠠ ᠭᠡᠵᠦ ᠥᠷᠯᠥᠭᠡᠭᠦᠷ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠬᠡᠯᠡᠪᠡ᠃
- ᠲᠡᠭᠡᠶᠡ᠂ ᠲᠡᠭᠡᠶᠡ᠃ ᠬᠠᠷᠢᠨ ᠨᠠᠮᠠᠶ᠋ᠢ ᠡᠳᠡᠭᠡᠷᠡᠬᠦ ᠪᠡᠷ ᠲᠠ ᠨᠠᠳᠠ ᠳ᠋ᠤ᠌ ᠮᠠᠨᠠᠯ ᠤ᠋ᠨ ᠨᠣᠮ ᠵᠢᠭᠠᠵᠤ ᠥᠭᠭᠦᠨᠡ ᠭᠡᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠵᠡ? ᠭᠡᠵᠦ ᠰᠠᠩᠵᠢ ᠳᠣᠷᠣᠢ ᠳᠠᠭᠤ ᠪᠠᠷ ᠠᠰᠠᠭᠤᠯᠠ. 《ᠮᠥᠳᠳᠥᠬᠡᠨ ᠥᠩᠭᠡᠷᠡᠭᠡᠳ ᠥᠭᠬᠦ ᠶ᠋ᠢ ᠰᠠᠨᠠᠬᠤ ᠦᠭᠡᠢ ᠶᠠᠭᠠᠬᠢᠭ᠍ᠰᠠᠨ ᠴᠤ᠌ ᠳᠠᠪᠠᠯᠤᠭᠤᠨ ᠶᠤᠮ ᠪᠣᠢ? ᠶᠡᠷᠦ ᠨᠢ ᠡᠨᠡ ᠦᠬᠡᠷ ᠮᠣᠩᠭᠣᠯᠴᠤᠳ ᠡᠢᠮᠦ ᠯᠡ ᠮᠠᠩᠭᠠᠷ ᠠᠮᠢᠲᠠᠳ ᠰᠢᠦ》 ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠳᠤᠷᠠ ᠦᠭᠡᠢᠴᠡᠨ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ᠶ᠋ᠡᠨ ᠢᠯᠡ ᠭᠠᠷᠭᠠᠭᠰᠠᠨ ᠦᠭᠡᠢ᠃
- ᠵᠠ ᠶᠠᠭᠠᠬᠢᠬᠤᠪ᠂ ᠲᠡᠭᠡᠵᠦ ᠯᠡ ᠦᠵᠡᠶᠡ ᠭᠡᠵᠦ ᠬᠡᠯᠡᠪᠡ᠃
ᠰᠠᠩᠵᠢ ᠲᠡᠭᠦᠨ ᠳ᠋ᠦ᠍ ᠪᠠᠶᠠᠷᠯᠠᠵᠤ᠂ 《ᠠᠰᠢᠭᠦᠢ ᠪᠢ ᠶᠡᠷᠦ ᠨᠢ ᠦᠬᠦᠬᠦ ᠦᠭᠡᠢ ᠯᠡ ᠶᠦᠮ ᠪᠠᠢᠨᠠ᠃ᠮᠠᠷᠠᠮᠪᠠᠲᠠᠨ ᠨᠠᠳᠠ ᠳ᠋ᠤ᠌ ᠣᠲᠠᠴᠢ ᠮᠠᠨᠠᠯ ᠤ᠋ᠨ ᠤᠬᠠᠭᠠᠨ ᠵᠢᠭᠠᠵᠤ ᠥᠭᠬᠦ ᠪᠡᠷ ᠠᠮᠠᠯᠠᠵᠤ ᠪᠠᠢᠬᠤ ᠲᠣ ᠪᠢ ᠶᠠᠭᠠᠬᠢᠵᠤ ᠦᠬᠦᠬᠦ ᠪᠣᠢ? ᠡᠳᠡᠭᠡᠷᠡᠬᠦ ᠪᠠᠢᠬᠠ》 ᠭᠡᠵᠦ ᠭᠣᠷᠢᠳᠠᠯᠭᠠ ᠲᠠᠢ ᠪᠠᠷ ᠪᠣᠳᠣᠯᠠ᠃ ᠲᠡᠷᠡ ᠳᠠᠷᠤᠢ ᠮᠠᠷᠠᠮᠪᠠ ᠭᠠᠷᠴᠤ ᠶᠠᠪᠤᠪᠠ᠃ ᠤᠳᠠᠯ ᠦᠭᠡᠢ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠢᠷᠡᠵᠦ ᠵᠤᠲᠠᠩ ᠠᠪᠴᠢᠷᠠᠵᠤ ᠦᠭᠭᠦᠯᠡ᠃ ᠲᠡᠷᠡ ᠨᠢ ᠠᠮᠠᠨ ᠠ᠋ᠴᠠ ᠪᠤᠴᠠᠭᠠᠳ ᠭᠠᠷᠴᠤ ᠪᠠᠢᠪᠠ᠃
- ᠮᠠᠷᠠᠮᠪᠠ ᠨᠠᠮᠠᠶ᠋ᠢ ᠬᠠᠷᠢ ᠭᠡᠰᠡᠨ᠃ ᠲᠠ ᠨᠠᠷ ᠭᠡᠷ ᠲᠦ᠍ ᠮᠢᠨᠢ ᠬᠦᠷᠭᠡᠭᠡᠳ ᠥᠭᠭᠦᠭᠡᠴᠢ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠭᠤᠶᠤᠯᠠ᠃ ᠨᠥᠬᠥᠳ ᠨᠢ᠂
- ᠮᠠᠷᠠᠮᠪᠠ ᠪᠢᠳᠡᠨ ᠳ᠋ᠦ᠍ ᠬᠡᠯᠡᠭᠰᠡᠨ᠃ ᠲᠡᠭᠡᠭᠡᠳ ᠨᠢᠭᠡ ᠡᠯᠵᠢᠭᠡᠨ ᠲᠡᠷᠭᠡ ᠣᠯᠵᠤ ᠢᠷᠡᠯᠡ᠃ ᠣᠳᠣ ᠶᠠᠪᠤᠬᠤ ᠠ᠋ᠴᠠ ᠶᠠᠭᠠᠬᠢᠬᠤ ᠪᠤᠢ᠃ ᠮᠠᠷᠠᠮᠪᠠ ᠥᠨᠥᠳᠥᠷ ᠰᠢᠬᠠᠴᠠ ᠣᠷᠣᠬᠤ ᠪᠠᠷ ᠶᠠᠪᠤᠬᠤ ᠭᠡᠨᠡ ᠭᠡᠵᠡᠢ᠃ ᠲᠡᠢᠮᠦ ᠠᠷᠭᠠ ᠪᠠᠷ ᠰᠠᠩᠵᠢ ᠠ᠋ᠴᠠ ᠬᠣᠯᠠᠳᠠᠬᠤ ᠶ᠋ᠢ ᠬᠦᠰᠡᠵᠡᠢ᠃
ᠰᠠᠩᠵᠢ ᠭᠡᠰᠦᠯ ᠢ᠋ ᠨᠥᠬᠥᠳ ᠨᠢ ᠡᠯᠵᠢᠭᠡᠨ ᠲᠡᠷᠭᠡᠨ ᠳ᠋ᠦ᠍ ᠬᠡᠪᠲᠡᠭᠦᠯᠵᠦ ᠭᠡᠷ ᠲᠦ᠍ ᠨᠢ ᠬᠦᠷᠭᠡᠵᠦ ᠣᠴᠢᠪᠠ᠃ ᠬᠥᠬᠡᠨᠠᠭᠤᠷ ᠤ᠋ᠨ ᠥᠭᠡᠯᠡᠳ ᠪᠠᠯᠲᠠ ᠨᠤᠲᠤᠭ ᠣᠢᠷᠠᠯᠴᠠᠭᠠ ᠪᠠᠷ ᠢ᠋ᠶ᠋ᠠᠨ ᠰᠠᠩᠵᠢ ᠳ᠋ᠤ᠌ ᠲᠠᠯᠠ ᠥᠭᠳᠡᠭ ᠲᠤᠯᠠ᠄
- ᠪᠢ ᠬᠠᠯᠬᠠ ᠮᠢᠴᠠᠩ (ᠣᠲᠣᠭ) ᠢᠶᠠᠷ ᠶᠠᠪᠤᠯᠠ᠃ ᠨᠢᠭᠡ ᠬᠥᠭᠰᠢᠨ ᠰᠢᠮᠠᠨᠠᠴᠠ ᠲᠠᠢ ᠠᠭᠤᠯᠵᠠᠯᠠ᠃ ᠲᠡᠷᠡ ᠴᠢᠨᠦ ᠪᠡᠶᠡ ᠶ᠋ᠢ ᠦᠵᠡᠵᠦ ᠦᠭᠭᠦᠨᠡ ᠭᠡᠰᠡᠨ᠃ ᠮᠠᠷᠭᠠᠰᠢ ᠢᠷᠡᠬᠦ ᠪᠠᠢᠬᠠ ᠭᠡᠵᠦ ᠶᠠᠷᠢᠯᠠ᠃ ᠰᠠᠩᠵᠢ ᠬᠠᠯᠬᠠ ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠨᠢ ᠪᠠᠭᠠᠬᠠᠨ ᠰᠡᠷᠭᠦᠵᠦ᠄
- ᠬᠠᠯᠬᠠ ᠬᠥᠮᠦᠨ ᠤᠤ? ᠭᠡᠬᠦ ᠳ᠋ᠦ᠍ ᠪᠠᠯᠲᠠ ᠄
- ᠬᠠᠯᠬᠠ ᠪᠠᠢᠬᠠ ! ᠡᠰᠡᠪᠡᠯ ᠁ ᠥᠭᠡᠯᠡᠳ ᠴᠤ᠌ ᠶᠤᠮ ᠤᠤ? ᠵᠠ ᠲᠡᠷᠡ ᠶ᠋ᠢ ᠬᠡᠨ ᠮᠡᠳᠡᠯᠡ᠃ ᠬᠠᠷᠢᠨ ᠰᠢᠮᠠᠨᠠᠴᠠ ᠶ᠋ᠢᠨ ᠰᠠᠬᠢᠯ ᠲᠠᠢ ᠯᠠ ᠬᠥᠮᠦᠨ ᠪᠢᠯᠡ ᠭᠡᠪᠡ᠃
ᠰᠢᠮᠠᠨᠠᠴᠠ ᠶ᠋ᠢᠨ ᠲᠤᠬᠠᠢ ᠰᠣᠨᠣᠰᠬᠤ ᠳ᠋ᠤ᠌ ᠡᠵᠢ ᠶ᠋ᠢ ᠪᠡᠨ ᠡᠷᠭᠢᠨ ᠰᠠᠨᠠᠵᠠᠢ᠃ ᠬᠥᠭᠡᠷᠦᠬᠦᠢ ᠡᠵᠢ ᠨᠢ ᠶᠠᠳᠠᠭᠤ ᠵᠦᠳᠡᠭᠦᠦ ᠪᠦᠰᠡᠭᠦᠢ ᠪᠠᠢᠬᠤ ᠳ᠋ᠠᠭᠠᠨ ᠪᠤᠶᠠᠨᠵᠠᠯᠪᠢᠷᠠᠬᠤ ᠬᠡᠢᠳ ᠦᠨ ᠪᠠᠯᠢᠩ᠂ ᠱᠠᠯᠰᠠᠢ ᠲᠡᠭᠦᠵᠦ ᠢᠳᠡᠵᠦ ᠶᠠᠪᠤᠬᠤ ᠦᠶᠡ ᠳ᠋ᠦ᠍ ᠨᠢᠭᠡ ᠪᠤᠰᠤ ᠤᠳᠠᠭᠠ ᠰᠢᠮᠠᠨᠠᠴᠠ ᠶ᠋ᠢᠨ ᠰᠠᠬᠢᠯ ᠬᠦᠷᠲᠡᠬᠦ ᠲᠤᠬᠠᠢ ᠮᠥᠷᠥᠭᠡᠳᠦᠭᠰᠡᠨ ᠶᠦᠮ ᠭᠡᠳᠡᠭ᠃ ᠲᠡᠷᠡ ᠲᠤᠬᠠᠢ ᠶ᠋ᠢ ᠪᠡᠨ ᠬᠣᠵᠢᠮ ᠰᠠᠩᠵᠢ ᠳ᠋ᠤ᠌ ᠶᠠᠷᠢᠵᠤ《 ᠰᠢᠮᠠᠨᠠᠴᠠ ᠪᠣᠯᠴᠢᠬᠠᠭᠰᠠᠨ ᠪᠣᠯ ᠬᠦᠦ ᠴᠢᠮᠠᠶ᠋ᠢ ᠪᠠᠨ ᠲᠥᠷᠥᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠯᠡ ᠪᠠᠢᠬᠤ ᠪᠠᠢᠵᠤ ᠳᠠ᠃ ᠰᠢᠮᠠᠨᠠᠴᠠ ᠪᠣᠯᠴᠢᠬᠠᠭᠠ ᠦᠭᠡᠢ ᠮᠢᠨᠢ ᠶᠠᠭᠠᠮᠠᠢ᠃ ᠠᠪᠤ ᠴᠢᠨᠢ ᠯᠡ ᠬᠣᠷᠢᠭᠯᠠᠵᠤ ᠠᠪᠤᠷᠠᠭᠰᠠᠨ ᠶᠤᠮ ᠳᠠ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠶᠡᠬᠡ ᠭᠠᠢᠬᠠᠳᠠᠭ ᠰᠠᠨ᠃
- ᠶᠠᠭᠠᠬᠢᠭᠠᠳ? ᠭᠡᠵᠦ ᠰᠠᠩᠵᠢ ᠠᠰᠠᠭᠤᠭᠰᠠᠨ ᠴᠣ ᠤᠳᠠᠭᠠ ᠪᠣᠢ᠃
- ᠶᠠᠭᠠᠬᠢᠬᠤᠪ ᠳᠠ᠂ ᠰᠢᠮᠠᠨᠠᠴᠠ ᠶ᠋ᠢᠨ ᠰᠠᠬᠢᠯ ᠬᠦᠷᠲᠡᠴᠢᠬᠡᠭᠰᠡᠨ ᠬᠥᠮᠦᠨ ᠬᠥᠮᠦᠨ ᠲᠡᠢ ᠰᠠᠭᠤᠬᠤ᠂ ᠬᠡᠦᠬᠡᠳ ᠭᠠᠷᠭᠠᠬᠤ ᠶ᠋ᠢ ᠲᠡᠪᠴᠢᠳᠡᠭ ᠶᠣᠰᠣ ᠲᠠᠢ ᠶᠤᠮ᠃ ᠲᠡᠭᠡᠭᠡᠳ ᠯᠡ ᠲᠡᠷᠡ ᠭᠡᠵᠦ ᠡᠵᠢ ᠨᠢ ᠲᠠᠢᠯᠪᠤᠷᠢᠯᠠᠵᠠᠢ᠃ ᠰᠠᠩᠵᠢ ᠲᠡᠢᠨᠬᠦ ᠣᠢᠯᠠᠭᠠᠭᠰᠠᠨ᠃
ᠬᠣᠵᠢᠮ ᠨᠢ ᠵᠠᠯᠠᠭᠤᠬᠠᠨ ᠵᠠᠷᠢᠮ ᠭᠡᠵᠢᠭᠡ ᠲᠡᠢ ᠨᠠᠷ ᠰᠢᠮᠠᠨᠠᠴᠠ ᠶ᠋ᠢᠨ ᠰᠠᠬᠢᠯ ᠭᠦᠷᠲᠡᠭᠡᠳ ᠥᠰᠥᠭᠡᠢ ᠳᠠᠷᠤᠭᠰᠠᠨ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠪᠡᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠳᠠᠭᠠᠷᠢᠭᠤᠯᠤᠨ᠂ ᠦᠰᠦ ᠪᠡᠨ ᠬᠤᠰᠤᠭᠤᠯᠤᠭᠠᠳ ᠪᠠᠨᠳᠢ ᠨᠠᠷ ᠰᠢᠭ᠋ ᠮᠤᠯᠵᠠᠩ ᠲᠣᠯᠣᠭᠠᠢ ᠲᠠᠢ ᠪᠣᠯᠤᠭᠠᠳ ᠰᠢᠮᠠᠨᠠᠴᠠ ᠶ᠋ᠢᠨ ᠰᠠᠬᠢᠯ ᠬᠦᠷᠲᠡᠵᠦ ᠮᠠᠨᠢ ᠤᠩᠰᠢᠵᠤ᠂ ᠮᠢᠬᠠ ᠶ᠋ᠢ ᠴᠡᠭᠡᠷᠯᠡᠵᠦ᠂ ᠬᠤᠸᠠᠷᠠᠭ ᠤ᠋ᠳ ᠳᠣᠲᠣᠷᠠ ᠲᠠᠨᠢᠭᠳᠠᠬᠤ ᠦᠭᠡᠢ ᠶᠠᠪᠤᠵᠠᠭᠠᠵᠤ ᠪᠠᠢᠬᠤ ᠶ᠋ᠢ ᠴᠤ᠌ ᠰᠠᠩᠵᠢ ᠭᠡᠰᠦᠯ ᠨᠢᠳᠦ ᠪᠡᠷ ᠦᠵᠡᠭᠰᠡᠨ᠃
- ᠰᠢᠮᠠᠨᠠᠴᠠ ᠲᠤᠰᠠ ᠪᠣᠯᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠠᠯᠲᠠ ᠳ᠋ᠦ᠍ ᠢᠲᠡᠭᠡᠯ ᠮᠠᠭᠤᠲᠠᠢᠬᠠᠨ ᠬᠡᠯᠡᠭᠰᠡᠨ ᠳ᠋ᠦ᠍᠂ ᠲᠡᠷᠡ ᠪᠡᠷ ᠭᠡᠰᠦᠯ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠵᠦ᠄
- ᠵᠣᠷ ᠲᠠᠨᠢᠳᠠᠭ ᠦᠭᠡᠢ ᠯᠠᠮᠠ ᠠ᠋ᠴᠠ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠴᠢᠪᠠᠭᠠᠨᠴᠠ ᠳᠡᠭᠡᠷᠡ ᠭᠡᠳᠡᠭ ᠪᠢᠵᠡ ᠳᠡ᠃ ᠶᠠᠭᠠᠬᠢᠬᠤ ᠪᠤᠢ ᠂ ᠦᠵᠡᠭ ! ᠬᠡᠪ᠃
ᠠᠷᠠᠳ ᠤ᠋ᠨ ᠳᠤᠮᠳᠠ ᠬᠡᠯᠡᠯᠴᠡᠳᠡᠭ ᠲᠡᠷᠡ ᠦᠭᠡᠨ ᠳ᠋ᠦ᠍ ᠰᠠᠩᠵᠢ ᠨᠢᠭᠡ ᠶᠡᠬᠡ ᠢᠲᠡᠭᠡᠳᠡᠭ ᠦᠭᠡᠢ ᠪᠠᠢᠯᠠ᠃ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠨᠡᠷᠡ ᠬᠦᠨᠳᠦ᠂ ᠠᠷᠭᠠ ᠪᠢᠯᠢᠭ ᠶᠠᠭᠤᠨ ᠠ᠋ᠴᠠ ᠴᠤ᠌ ᠡᠷᠬᠢᠮ ᠭᠡᠵᠦ ᠯᠠᠪᠲᠠᠢ ᠤᠬᠠᠪᠤᠷᠢᠯᠠᠭᠰᠠᠨ ᠵᠠᠯᠠᠭᠤ ᠭᠡᠰᠦᠯ ᠡᠨᠡ ᠤᠳᠠᠭᠠ ᠴᠤ᠌ ᠲᠡᠷᠡ ᠬᠦ᠌ ᠰᠢᠮᠠᠨᠠᠴᠠ ᠶ᠋ᠢᠨ ᠢᠳᠢ ᠰᠢᠳᠢ ᠳ᠋ᠦ᠍ ᠨᠢᠭᠡ ᠶᠡᠬᠡ ᠪᠢᠰᠢᠷᠡᠭᠰᠡᠨ ᠦᠭᠡᠢ᠃
᠁ ᠮᠠᠷᠭᠠᠰᠢ ᠨᠢ ᠦᠨᠡᠬᠡᠷ ᠨᠢᠭᠡᠨ ᠬᠢᠵᠢᠶᠡᠯᠢ ᠨᠠᠰᠤᠨ ᠤ᠋ ᠰᠢᠮᠠᠨᠠᠴᠠ ᠢᠷᠡᠪᠡ᠃ ᠰᠠᠩᠵᠢ ᠵᠢ ᠬᠠᠷᠠᠮᠠᠭᠴᠠ ᠲᠡᠭᠦᠨ ᠳ᠋ᠦ᠍ ᠥᠷᠥ ᠡᠪᠡᠳᠬᠦ ᠰᠡᠳᠬᠢᠯ ᠲᠥᠷᠦᠵᠡᠢ᠃
- ᠬᠥᠭᠡᠷᠦᠬᠦᠢ ᠠᠮᠢᠲᠠᠨ᠃ ᠡᠨᠡ ᠴᠢᠨᠢ ᠭᠤᠷᠠᠩᠬᠤᠯᠠᠵᠤ ᠳᠣᠲᠣᠷᠠ᠂ ᠭᠠᠳᠠᠨᠠ ᠬᠣᠶᠠᠷ ᠠ᠋ᠴᠠ ᠪᠠᠨ ᠮᠡᠳᠡᠭᠳᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠳᠠ᠃ ᠡᠨᠡᠭᠦᠨ ᠲᠦ᠍ ᠶᠠᠮᠠᠷ ᠴᠤ᠌ ᠭᠦᠷᠢᠮ ᠨᠣᠮ᠂ ᠡᠷᠭᠦᠯ ᠪᠠᠷᠢᠴᠠ ᠬᠡᠷᠡᠭ ᠦᠭᠡᠢ ᠭᠡᠵᠦ ᠲᠡᠷᠡ ᠰᠢᠮᠠᠨᠠᠴᠠ ᠬᠡᠯᠡᠵᠡᠢ᠃ ᠰᠠᠩᠵᠢ ᠲᠡᠷᠡ ᠦᠭᠡᠨ ᠳ᠋ᠦ᠍ ᠶᠡᠬᠡ ᠯᠡ ᠭᠣᠮᠣᠳᠠᠪᠠ᠃ ᠤᠤᠯ ᠤᠴᠢᠷ ᠢ᠋ ᠨᠢ ᠣᠶᠢᠯᠠᠭᠠᠭᠰᠠᠨ ᠦᠭᠡᠢ ᠡᠴᠡ ᠲᠡᠢᠮᠦ ᠪᠣᠯᠵᠠᠢ᠃
- ᠵᠠᠯᠠᠭᠤ ᠪᠠᠨᠳᠢ ᠨᠠᠷ ᠶᠠᠪᠤᠵᠠᠭᠠ! ᠣᠯᠠᠭᠤᠯᠠ ᠪᠠᠨ ᠰᠡᠭ ᠳᠡᠭᠡᠷᠡ ᠣᠪᠣᠭᠠᠷᠠᠳᠠᠭ ᠦᠬᠡᠷ ᠰᠢᠭ ᠶᠠᠭᠤ ᠭᠡᠵᠦ ᠡᠨᠡ ᠳᠣᠷᠣᠢᠳᠠᠭᠰᠠᠨ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠢ᠋ ᠲᠣᠭᠣᠷᠢᠭᠠ ᠪᠣᠢ? ᠪᠢ ᠡᠭᠦᠨ ᠢ᠋ ᠬᠥᠮᠦᠨ ᠪᠣᠯᠭᠠᠪᠠᠯ ᠪᠣᠯᠭᠠᠭᠠᠳ ᠪᠣᠯᠭᠠᠬᠤ ᠦᠭᠡᠢ ᠪᠣᠯ ᠳ᠋ᠤᠨᠵᠤᠨᠫᠠ ᠨᠠᠷ ᠲᠤ᠌ ᠦᠭᠦᠶᠡ ᠭᠡᠵᠦ ᠰᠢᠮᠠᠨᠠᠴᠠ ᠭᠠᠰᠢᠭᠤᠨ ᠦᠭᠡ ᠬᠡᠯᠡᠯᠡ᠃ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠳᠤᠷᠠ ᠦᠭᠡᠢᠴᠡᠯ ᠢᠶᠡᠨ ᠨᠢᠭᠤᠵᠤ ᠶᠠᠳᠠᠨ᠄
- ᠳ᠋ᠤᠨᠵᠤᠨᠫᠠ ᠳ᠋ᠦ᠍ ᠪᠢᠰᠢ ᠪᠢᠳᠡᠨ ᠳ᠋ᠦ᠍ ᠬᠡᠷᠡᠭᠲᠡᠢ ᠬᠥᠮᠦᠨ ᠰᠢᠦ ᠭᠡᠵᠡᠭᠡᠯᠡ᠃ ᠰᠢᠮᠠᠨᠠᠴᠠ ᠠᠭᠤᠷᠯᠠᠵᠤ᠄
- ᠲᠠ ᠨᠠᠷ ᠰᠡᠭ ᠢᠳᠡᠳᠡᠭ ᠶᠦᠮ ᠤᠤ? ᠶᠠᠪᠤᠵᠠᠭᠠ᠂ ᠵᠠᠢᠯᠠᠵᠠᠭᠠ ᠭᠡᠵᠦ ᠲᠥᠪᠡᠳ ᠬᠡᠯᠡ ᠪᠡᠷ ᠬᠠᠰᠬᠢᠷᠤᠯᠠ᠃ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠶᠠᠪᠤᠵᠠᠭᠠᠯᠠ᠃
ᠰᠢᠮᠠᠨᠠᠴᠠ ᠲᠡᠷᠡ ᠳᠠᠷᠤᠢ ᠰᠠᠩᠵᠢ ᠶ᠋ᠢᠨ ᠲᠣᠭᠣᠰᠣ ᠰᠢᠷᠤᠶ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠭᠡᠷ ᠣᠷᠣᠨ ᠢ ᠴᠡᠪᠡᠷᠯᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ ᠭᠡᠰᠦᠯ ᠳᠠᠭᠤ ᠦᠭᠡᠢ ᠯᠡ ᠠᠵᠢᠭᠯᠠᠵᠤ ᠪᠠᠢᠪᠠ᠃
- ᠴᠢ ᠡᠨᠳᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠭᠤᠳᠠᠭ ᠤᠤ? ᠴᠢᠮᠠᠶ᠋ᠢ ᠳ᠋ᠤᠨᠵᠤᠨᠫᠠ ᠳ᠋ᠦ᠍ ᠲᠤᠰᠢᠶᠠᠴᠢᠬᠠᠭᠠᠳ ᠥᠪᠡᠷ ᠢᠶᠡᠨ ᠡᠨᠳᠡ ᠴᠢᠨᠢ ᠰᠠᠭᠤᠳᠠᠭ ᠬᠡᠷᠡᠭ ᠠ᠋! ᠭᠡᠵᠦ ᠰᠢᠮᠠᠨᠠᠴᠠ ᠬᠡᠯᠡᠪᠡ᠃
- ᠲᠡᠭᠡᠵᠦ ᠪᠣᠯᠤᠨᠠ ᠰᠢᠦ᠃ ᠡᠨᠡ ᠬᠠᠰᠢᠶᠠ ᠪᠠᠢᠰᠢᠩ ᠢ᠋ ᠪᠠᠭᠰᠢ ᠮᠠᠨᠢ ᠨᠠᠳᠠ ᠳ᠋ᠤ᠌ ᠠᠪᠴᠤ ᠥᠭᠭᠦᠭᠰᠡᠨ ᠶᠠᠭᠤᠮᠠ᠃ ᠮᠢᠨᠦ ᠬᠥᠷᠥᠩᠭᠡ᠃ ᠪᠢ ᠦᠬᠦᠴᠢᠬᠡᠪᠡᠯ ᠬᠡᠨ ᠦ᠌ ᠴᠤ᠌ ᠪᠢᠰᠢ᠃ ᠲᠡᠭᠡᠬᠦ ᠪᠡᠷ ᠦᠬᠦᠭᠡ ᠦᠭᠡᠢ ᠳᠡᠭᠡᠷᠡ ᠪᠡᠨ ᠡᠵᠡᠨ ᠲᠡᠢ ᠪᠣᠯᠭᠠᠴᠢᠬᠠᠪᠠᠯ ᠲᠠᠯᠢᠢᠭᠠᠴᠢ ᠪᠠᠭᠰᠢ ᠶ᠋ᠢᠨ ᠮᠢᠨᠢ ᠠᠪᠴᠤ ᠦᠭᠭᠦᠭᠰᠡᠨ ᠪᠤᠶᠠᠨ ᠤᠯᠠᠮ ᠳᠡᠯᠭᠡᠷᠡᠨᠡ᠃ ᠬᠣᠭᠣᠰᠣᠨ ᠬᠣᠩᠭᠢᠯ ᠳ᠋ᠤ᠌ ᠨᠢ ᠪᠤᠭ ᠵᠡᠳᠬᠡᠷ᠂ ᠠᠳᠠ ᠠᠯᠪᠢᠨ ᠴᠤᠭᠯᠠᠷᠠᠭᠰᠠᠨ ᠠᠴᠠ ᠰᠢᠮᠠᠨᠠᠴᠠ ᠲᠠ ᠡᠵᠡᠩᠨᠡᠭᠰᠡᠨ ᠨᠢ ᠳᠡᠭᠡᠷᠡ ᠭᠡᠵᠦ ᠰᠠᠩᠵᠢ ᠲᠠᠢᠪᠤᠩ ᠢ᠋ᠶ᠋ᠠᠷ ᠶᠠᠷᠢᠪᠠ᠃ ᠡᠨᠡ ᠭᠠᠰᠢᠭᠤᠨ ᠦᠭᠡᠨ ᠳ᠋ᠦ᠍ ᠰᠢᠮᠠᠨᠠᠴᠠ ᠠᠭᠤᠷᠯᠠᠬᠤ ᠶᠣᠰᠣᠲᠠᠢ ᠪᠠᠢᠲᠠᠯᠠ ᠬᠠᠷᠢᠨ ᠪᠠᠶᠠᠷᠯᠠᠵᠤ᠄
- ᠢᠰᠢ ᠴᠢ ᠴᠢᠨᠢ ᠤᠬᠠᠭᠠᠨ ᠲᠠᠢ ᠪᠠᠨᠳᠢ ᠶᠤᠮ᠃ ᠪᠢ ᠴᠢᠮᠠᠶ᠋ᠢ ᠲᠡᠭᠡᠪᠡᠯ ᠳ᠋ᠤᠨᠵᠤᠨᠫᠠ ᠳ᠋ᠦ᠍ ᠥᠭᠬᠦ ᠦᠭᠡᠢ ᠠ᠋ ᠭᠡᠪᠡ᠃
- ᠪᠢ ᠤᠤᠯ ᠨᠢ ᠪᠠᠨᠳᠢ ᠪᠢᠰᠢ ᠭᠡᠰᠦᠯ ᠶᠤᠮᠰᠠᠨ ᠭᠡᠵᠦ ᠰᠠᠩᠵᠢ ᠪᠠᠰᠠ ᠨᠡᠮᠡᠵᠦ ᠳᠤᠷᠠᠳᠪᠠ᠃
- ᠬᠠᠷᠠᠭᠠᠴᠢ ᠬᠦᠢ! ᠡᠢᠮᠦ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠭᠡᠰᠦᠯ ᠰᠠᠨᠸᠠᠷ ᠬᠦᠷᠲᠡᠭᠡ ᠤᠤ? ᠠᠷᠤ ᠭᠠᠵᠠᠷ ᠯᠠ ᠬᠦᠷᠲᠡᠭᠡ ᠪᠢᠵᠡ ᠳᠡ᠃ ᠡᠨᠡ ᠰᠢᠷᠭᠤᠯᠵᠢ ᠰᠢᠭ᠋ ᠣᠯᠠᠨ ᠯᠠᠮᠠ ᠲᠠᠢ ᠲᠥᠪᠡᠳ ᠲᠦ᠍ ᠵᠠᠯᠠᠭᠤ ᠭᠡᠰᠦᠯ ᠪᠠᠢᠳᠠᠭ ᠦᠭᠡᠢ ᠶᠤᠮ ᠡ ᠭᠡᠵᠦ ᠰᠢᠮᠠᠨᠠᠴᠠ ᠶᠠᠷᠢᠪᠠ᠃ ᠭᠡᠷ ᠣᠷᠣᠨ ᠢ᠋ ᠨᠢ ᠴᠡᠪᠡᠷᠯᠡᠵᠦ᠂ ᠲᠣᠭᠣᠰᠣ ᠰᠢᠷᠣᠢ ᠶ᠋ᠢ ᠠᠷᠢᠯᠭᠠᠨ᠂ ᠬᠣᠭᠰᠢᠯ ᠬᠥᠷᠥᠩᠭᠡ ᠶᠢ ᠵᠠᠰᠠᠵᠤ ᠶᠠᠩᠵᠤᠯᠠᠭᠠᠳ᠂ ᠴᠡᠮᠴᠡᠭᠡᠷ ᠰᠠᠢᠬᠠᠨ ᠪᠣᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠮᠠᠨᠠᠴᠠ ᠰᠠᠩᠵᠢ ᠳ᠋ᠦ᠍ ᠬᠠᠨᠳᠤᠵᠤ᠄
- ᠰᠠᠢᠬᠠᠨ ᠪᠣᠯᠤᠭᠠ ᠪᠢᠵᠡ᠃ ᠡᠪᠡᠳᠴᠢᠨ ᠢ᠋ ᠡᠳᠡᠭᠡᠬᠦ ᠡᠬᠢᠨ ᠦ᠌ ᠲᠣᠮ ᠨᠢ ᠭᠡᠷ ᠣᠷᠣᠨ ᠢ ᠴᠡᠪᠡᠷ ᠴᠡᠮᠴᠡᠭᠡᠷ ᠪᠣᠯᠭᠠᠬᠤ ᠠᠵᠢᠯ ᠶᠤᠮ᠃ ᠣᠳᠣ ᠴᠢ ᠴᠡᠪᠡᠷᠯᠡᠨ ᠲᠥᠪᠬᠢᠨᠡᠭᠦᠯᠦᠭᠰᠡᠨ ᠭᠡᠷ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠠᠮᠢᠳᠤ ᠶᠠᠪᠤᠬᠤ ᠶᠤᠮᠰᠠᠨ ᠭᠡᠵᠦ ᠤᠯᠠᠮ ᠢᠯᠡᠭᠦᠦ ᠭᠦᠰᠡᠵᠦ ᠡᠬᠢᠯᠡᠨᠡ ᠳᠡ᠃ ᠪᠣᠬᠢᠷ ᠭᠡᠷ ᠲᠦ᠍ ᠡᠪᠡᠳᠴᠢᠨ ᠶᠡᠬᠡ ᠱᠦᠭᠯᠡᠳᠡᠭ ᠶᠦᠮ ᠭᠡᠪᠡ᠃
- ᠨᠡᠭᠡᠷᠡᠨ ᠯᠡ ᠰᠠᠢᠬᠠᠨ ᠪᠣᠯᠤᠯᠠ᠃ ᠪᠢ ᠤᠤᠯ ᠨᠢ ᠦᠬᠦᠬᠦ ᠶ᠋ᠢ ᠲᠤᠩ ᠴᠤ᠌ ᠬᠦᠰᠡᠬᠦ ᠦᠭᠡᠢ ᠪᠠᠢᠭᠠ ᠶᠤᠮᠰᠠᠨ ᠭᠡᠵᠦ ᠭᠡᠰᠦᠯ ᠬᠡᠯᠡᠬᠦ ᠳ᠋ᠦ᠍ ᠰᠢᠮᠠᠨᠠᠴᠠ᠄
- ᠣᠳᠣ ᠪᠢ ᠴᠢᠮᠠ ᠳ᠋ᠤ᠌ ᠬᠣᠭᠣᠯᠠ ᠴᠠᠢ ᠬᠢᠵᠦ ᠦᠭᠭᠦᠨᠡ᠃ ᠰᠠᠢᠬᠠᠨ ᠬᠣᠭᠣᠯᠠ ᠴᠠᠢ ᠪᠣᠯ ᠬᠥᠮᠦᠨ ᠦ ᠡᠪᠡᠳᠴᠢᠨ ᠢ᠋ ᠡᠳᠡᠭᠡᠭᠡᠬᠦ ᠳᠠᠷᠠᠭᠠᠬᠢ ᠲᠣᠮ ᠨᠢ ᠪᠣᠯᠤᠨᠠ ᠭᠡᠪᠡ᠃
ᠲᠡᠳᠦᠬᠡᠨ ᠰᠢᠮᠠᠨᠠᠴᠠ ᠲᠣᠭᠣᠭᠠ ᠰᠢᠨᠠᠭᠠ ᠬᠠᠩᠭᠢᠨᠠᠭᠤᠯᠤᠨ ᠭᠠᠯ ᠲᠦᠯᠡᠵᠦ ᠠᠷᠭᠠᠯ᠂ ᠮᠣᠳᠣ ᠬᠣᠶᠠᠷ ᠤ᠋ᠨ ᠬᠣᠯᠢᠮᠠᠭ ᠤᠲᠤᠭᠠ ᠦᠨᠦᠷᠲᠦᠭᠦᠯᠦᠨ ᠬᠣᠭᠣᠯᠠ ᠬᠢᠵᠦ ᠡᠬᠢᠯᠡᠪᠡ᠃
- ᠤᠲᠤᠭᠠ ᠦᠨᠦᠷᠳᠡᠵᠦ ᠠᠪ᠃ ᠡᠨᠡ ᠪᠣᠯ ᠮᠢᠨᠦ ᠡᠬᠢᠨ ᠦ᠌ ᠬᠣᠭᠣᠯᠠ ᠰᠢᠦ᠃ ᠤᠲᠤᠭᠠ ᠲᠠᠢ ᠭᠡᠷ ᠳᠤᠯᠠᠭᠠᠬᠠᠨ ᠭᠡᠳᠡᠭ ᠶᠦᠮ᠃ ᠠᠷᠭᠠᠯ ᠤ᠋ᠨ ᠤᠲᠤᠭᠠᠨ ᠳ᠋ᠤ᠌ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠡᠪᠡᠳᠴᠢᠨ ᠵᠠᠰᠠᠯ ᠠᠪᠳᠠᠭ ᠪᠣᠯᠤᠨᠠ᠃ ᠶᠣᠰᠣᠲᠠᠢ ᠮᠣᠩᠭᠣᠯ ᠬᠥᠮᠦᠨ ᠪᠣᠯ ᠴᠢᠨᠦ ᠪᠠᠯᠢᠩ ᠳ᠋ᠤ᠌ ᠡᠳᠡᠭᠡᠭᠡ ᠦᠭᠡᠢ ᠡᠪᠡᠳᠴᠢᠨ ᠠᠷᠭᠠᠯ ᠤ᠋ᠨ ᠤᠲᠤᠭᠠᠨ ᠳ᠋ᠤ᠌ ᠢᠯᠠᠷᠢᠰᠢᠬᠤ ᠠᠶᠠᠰ ᠣᠷᠣᠬᠤ ᠯᠠ ᠪᠠᠢᠬᠤ᠃ ᠵᠠ ᠮᠠᠭᠤᠰᠠᠢᠨ ᠵᠠᠨᠠᠭ᠂ ᠪᠣᠳᠫᠠ ᠨᠠᠷ ᠪᠣᠯ ᠴᠣ ᠠᠷᠭᠠᠯ ᠤ᠋ᠨ ᠤᠲᠤᠭᠠᠨ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠲᠡᠭᠡᠲᠡᠯᠡ ᠪᠡᠨ ᠰᠠᠢᠵᠢᠷᠠᠨᠠ ᠭᠡᠵᠦ ᠳᠡ᠃ ᠨᠡᠮᠡᠷᠢ ᠦᠭᠡᠢ ᠪᠢᠵᠡ ᠭᠡᠵᠦ ᠰᠢᠮᠠᠨᠠᠴᠠ ᠭᠠᠭᠴᠠᠭᠠᠷ ᠶᠠᠷᠢᠵᠤ ᠪᠠᠢᠯᠠ᠃ ᠰᠠᠩᠵᠢ ᠲᠡᠭᠦᠨ ᠦᠭᠡᠨ ᠳ᠋ᠦ᠍ ᠶᠡᠬᠡ ᠯᠡ ᠪᠢᠰᠢᠷᠡᠨ ᠰᠡᠳᠬᠢᠯ ᠬᠥᠳᠡᠯᠪᠡ᠃
ᠡᠭᠦᠷᠴᠦ ᠢᠷᠡᠭᠰᠡᠨ ᠮᠠᠩᠬᠠᠭ ᠰᠢᠭ᠋ ᠮᠥᠷᠲᠡᠭᠡᠨ ᠳᠡᠷᠡᠭᠡᠷ ᠲᠣᠮᠣ ᠡᠭᠦᠷᠭᠡᠪᠴᠢᠨ ᠡᠴᠡ ᠪᠡᠨ ᠬᠡᠳᠦᠨ ᠰᠣᠩᠭᠢᠨᠠ ᠭᠠᠷᠭᠠᠵᠤ ᠢᠷᠡᠭᠡᠳ ᠲᠡᠷᠡ ᠰᠢᠮᠠᠨᠠᠴᠠ ᠬᠠᠯᠢᠰᠤ ᠶ᠋ᠢ ᠠᠪᠬᠤ ᠵᠠᠭᠤᠷᠠ ᠪᠠᠰᠠ ᠯᠠ᠄
- ᠵᠡᠷᠯᠢᠭ ᠰᠣᠩᠭᠢᠨᠠ ᠶ᠋ᠢᠨ ᠦᠨᠦᠷ ᠪᠣᠯ ᠮᠢᠨᠦ ᠴᠢᠮᠠ ᠳ᠋ᠤ᠌ ᠢᠳᠡᠭᠦᠯᠬᠦ ᠳᠠᠷᠠᠭᠠ ᠶ᠋ᠢᠨ ᠬᠣᠭᠣᠯᠠ ᠮᠥᠨ᠃ ᠰᠣᠩᠭᠢᠨᠠ ᠶ᠋ᠢ ᠦᠨᠦᠷᠯᠡᠭᠲᠦᠨ! ᠲᠡᠭᠡᠪᠡᠯ ᠡᠪᠡᠳᠴᠢᠨ ᠴᠢᠨᠢ ᠬᠠᠭᠠᠴᠠᠨ ᠲᠠᠢᠵᠢᠵᠤ ᠴᠤ᠌ ᠶᠠᠭᠤ ᠮᠠᠭᠠᠳ! ᠭᠡᠵᠦ ᠬᠡᠯᠡᠭᠡᠳ ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠪᠠᠨ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠬᠠᠮᠠᠷ ᠲᠤ ᠣᠢᠷᠠᠲᠤᠭᠤᠯᠪᠠ᠃ ᠭᠡᠰᠦᠯ ᠲᠡᠷᠡ ᠰᠣᠩᠭᠢᠨᠠ ᠶᠢᠨ ᠬᠤᠷᠴᠠ ᠦᠨᠦᠷ ᠲᠦ᠍ ᠲᠣᠯᠣᠭᠠᠢ ᠨᠢ ᠮᠠᠩᠭᠤᠤᠷᠠᠨ ᠮᠠᠩᠰᠢᠭᠤᠷᠠᠬᠤ ᠰᠢᠭ᠋ ᠪᠣᠯᠵᠤ ᠲᠥᠷᠥᠭᠰᠡᠨ ᠨᠤᠲᠤᠭ ᠬᠠᠷᠠ ᠠᠵᠢᠷᠭᠠ ᠶ᠋ᠢᠨ ᠨᠢᠷᠤᠭᠤ ᠪᠡᠨ ᠰᠠᠨᠠᠪᠠ᠃ ᠠᠭᠤᠯᠠ ᠶ᠋ᠢᠨ ᠬᠠᠪᠴᠢᠯ᠂ ᠭᠣᠣᠯ ᠤ᠋ᠨ ᠠᠰᠬᠠ ᠬᠠᠳᠠ ᠪᠠᠷ ᠰᠣᠩᠭᠢᠨᠠ ᠲᠡᠭᠦᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠳᠤᠷᠠᠰᠤᠨ ᠪᠣᠳᠣᠯᠠ᠃ ᠬᠡᠭᠡᠷᠡ ᠶ᠋ᠢᠨ ᠰᠣᠩᠭᠢᠨᠠ ᠬᠣᠯᠢᠵᠤ ᠶᠠᠩᠭᠢᠷ ᠤ᠋ᠨ ᠬᠠᠷᠠ ᠮᠢᠬᠠ ᠪᠠᠷ ᠡᠴᠢᠭᠡ ᠡᠬᠡ ᠨᠢ ᠬᠣᠭᠣᠯᠠ ᠬᠢᠵᠦ ᠥᠭᠭᠦᠭᠰᠡᠨ ᠲᠡᠷᠡ ᠨᠢᠭᠡᠨ ᠨᠠᠮᠤᠷ ᠤ᠋ᠨ ᠶᠠᠪᠤᠳᠠᠯ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠨᠤᠲᠤᠭ ᠤ᠋ᠨ ᠨᠢᠭᠡᠨ ᠠᠩᠴᠢᠨ ᠲᠡᠳᠡᠨ ᠦ᠌ ᠳ᠋ᠦ᠍ ᠠᠢᠯᠴᠢᠯᠠᠨ ᠢᠷᠡᠭᠡᠳ ᠪᠠᠢᠭ᠍ᠰᠠᠨ ᠴᠠᠭ᠃ ᠲᠡᠳᠡᠨ ᠦ᠌ ᠬᠢ ᠳᠠᠷᠬᠠᠨᠲᠣ ᠶᠢᠨ ᠬᠠᠪᠴᠠᠭᠠᠢ ᠳᠤ ᠨᠤᠲᠤᠭᠯᠠᠵᠤ ᠪᠠᠢᠭ᠍ᠰᠠᠨ᠃ ᠠᠩᠴᠢᠨ ᠳ᠋ᠤ᠌ ᠴᠠᠢ ᠬᠢᠵᠦ ᠥᠭᠬᠦ ᠪᠡᠷ ᠰᠢᠷᠡᠮᠦᠨ ᠵᠢᠯᠠᠪᠴᠢ ᠪᠠᠨ ᠲᠤᠯᠭᠠᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠤᠰᠤ ᠬᠢᠭᠰᠡᠨ ᠢ᠋ᠶ᠋ᠡᠨ ᠡᠵᠢ ᠨᠢ ᠳᠠᠭᠤ ᠠᠯᠳᠠᠵᠤ ᠪᠢᠯᠡ᠃
- ᠶᠠᠭᠠᠬᠢᠪᠠ? ᠭᠡᠵᠦ ᠠᠩᠴᠢᠨ ᠢ᠋ ᠠᠰᠠᠭᠤᠬᠤ ᠳ᠋ᠤ᠌ ᠡᠬᠡ ᠨᠢ ᠲᠣᠭᠣᠭᠠ ᠲᠠᠢ ᠤᠰᠤ ᠤᠷᠤᠭᠤ ᠵᠢᠭᠠᠵᠤ ᠳᠠᠭᠤ ᠦᠭᠡᠢ ᠵᠣᠭᠰᠣᠭᠰᠠᠨ᠃ ᠠᠩᠴᠢᠨ ᠲᠣᠭᠣᠭᠠ ᠤᠷᠤᠭᠤ ᠥᠩᠭᠡᠢᠵᠦ ᠬᠠᠷᠠᠭᠠᠳ᠄
- ᠠ ᠳᠠᠮᠰᠢᠭ ᠡ᠃ ᠴᠢ ᠨᠠᠳᠠ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠪᠡ ᠠ᠋! ᠭᠡᠵᠦ ᠬᠡᠯᠡᠬᠦ ᠪᠡᠷ ᠨᠢ ᠰᠠᠩᠵᠢ ᠬᠥᠪᠡᠭᠦᠨ ᠰᠣᠨᠢᠭᠤᠴᠢᠯᠠᠨ ᠲᠣᠭᠣᠭᠠ ᠤᠷᠤᠭᠤ ᠥᠩᠭᠡᠢᠵᠦ ᠬᠠᠷᠠᠪᠠᠯ ᠲᠣᠭᠣᠨᠣᠨ ᠳᠡᠭᠡᠭᠦᠷ ᠥᠩᠭᠡᠢᠭᠰᠡᠨ ᠬᠠᠯᠢᠯ ᠤᠯᠠᠭᠠᠨ ᠬᠠᠳᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠬᠡᠳᠦᠨ ᠶᠠᠩᠭᠢᠷ ᠢᠮᠠᠭᠠ ᠵᠣᠭᠰᠣᠵᠤ ᠪᠠᠢᠬᠤ ᠳᠦᠷᠰᠦ ᠨᠢ ᠲᠣᠭᠣᠭᠠ ᠲᠠᠢ ᠤᠰᠤᠨᠠ ᠲᠣᠰᠴᠤ ᠳᠡᠷᠭᠡᠳᠡ ᠶᠦᠮ ᠰᠢᠭ ᠲᠣᠳᠣᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠭ᠍ᠰᠠᠨ᠃ ᠲᠡᠭᠡᠬᠦ ᠳᠦ ᠠᠩᠴᠢᠨ ᠴᠠᠬᠢᠭᠤᠷ ᠫᠤᠤ ᠪᠠᠨ ᠰᠢᠭᠦᠷᠡᠨ ᠠᠪᠴᠤ ᠬᠣᠲᠠ ᠴᠡᠨᠡᠭ ᠢ᠋ ᠬᠣᠢᠰᠢ ᠲᠠᠲᠠᠩᠭᠤᠲᠠ᠄
- ᠲᠣᠭᠣᠨᠣ ᠪᠠᠷ ᠱᠠᠭᠠᠢᠭᠠᠳ ᠪᠢ ᠨᠢᠭᠡ ᠫᠤᠤᠳᠠᠭᠠᠳ ᠤᠷᠭᠢᠶᠠ᠃ ᠨᠢᠭᠡ ᠶᠠᠩᠭᠢᠷ ᠠᠶᠠᠨᠳᠠᠭᠠᠨ ᠲᠡᠷᠡ ᠤᠯᠠᠭᠠᠨ ᠪᠠᠢᠴᠠᠨ ᠠ᠋ᠴᠠ ᠬᠡᠢᠰᠴᠦ ᠬᠠᠶᠠᠭᠠᠨ ᠳ᠋ᠤ᠌ ᠴᠢᠨᠢ ᠤᠨᠠᠭᠠᠳ ᠢᠷᠡᠨᠡ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠡᠵᠢ ᠨᠢ᠄
- ᠭᠠᠷᠤᠭᠠᠳ ᠭᠠᠳᠠᠨᠠ ᠠ᠋ᠴᠠ ᠫᠤᠤᠳᠠᠭᠠᠴᠢ ᠳᠠ᠃ ᠭᠡᠷ ᠳᠣᠲᠣᠷᠠ ᠠ᠋ᠴᠠ ᠡᠪ ᠦᠭᠡᠢ ᠪᠢᠰᠢ ᠤᠤ? ᠭᠡᠪᠡ᠃ ᠠᠩᠴᠢᠨ ᠭᠤᠶᠤᠭᠰᠠᠨ ᠳᠠᠭᠤ ᠪᠠᠷ᠄
- ᠭᠠᠷᠬᠤ ᠪᠠᠷ ᠦᠷᠭᠦᠭᠡᠳ ᠵᠢᠭᠤᠲᠠᠭᠠᠴᠢᠬᠠᠨᠠ᠃ ᠲᠠᠨ ᠤ᠋ ᠬᠢ ᠶᠠᠮᠠᠷ ᠬᠣᠢᠮᠣᠷ ᠲᠤ᠌ ᠪᠠᠨ ᠪᠤᠷᠬᠠᠨ ᠪᠠᠢᠬᠤ ᠪᠢᠰᠢ᠃ ᠪᠢ ᠫᠤᠤᠳᠠᠭᠠᠳ ᠬᠣᠭᠣᠯᠠ ᠲᠠᠢ ᠪᠣᠯᠭᠠᠭᠠᠳ ᠦᠭᠭᠦᠶᠡ ᠯᠡ ᠳᠡ᠃ ᠲᠣᠭᠣᠨᠣᠨ ᠳᠡᠭᠡᠭᠦᠷ ᠣᠯᠵᠠ ᠥᠩᠭᠡᠢᠵᠦ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠲᠠᠲᠠᠭᠠᠯᠵᠠᠭᠠ ᠪᠣᠢ? ᠭᠡᠬᠦ ᠳ᠋ᠦ᠍ ᠨᠢ᠄
- ᠬᠡᠦᠬᠡᠳ ᠦ᠋ᠳ ᠠᠶᠤᠴᠢᠬᠠᠨᠠ! ᠭᠡᠰᠡᠨ᠃
- ᠳᠡᠭᠦᠦ ᠨᠠᠷ ᠴᠢᠬᠢ ᠪᠡᠨ ᠲᠠᠭᠯᠠᠵᠤ ᠪᠠᠢ! ᠶᠠᠭᠤᠨ ᠳ᠋ᠤ᠌ ᠨᠢ ᠠᠶᠤᠳᠠᠭ ᠪᠢᠯᠡ᠃ ᠵᠠ ᠫᠤᠤᠳᠠᠯᠠ᠃ ᠨᠢᠳᠦ ᠪᠡᠨ ᠠᠨᠢ᠂ ᠴᠢᠬᠢ ᠪᠡᠨ ᠲᠠᠭᠯᠠ ᠭᠡᠮᠡᠭᠴᠡ ᠠᠩᠴᠢᠨ ᠭᠣᠬᠠ ᠪᠠᠨ ᠳᠠᠷᠤᠵᠤ ᠣᠷᠬᠢᠭᠰᠠᠨ ᠨᠢ ᠭᠡᠷ ᠳᠣᠲᠣᠷᠠ ᠫᠦᠩ ᠫᠠᠩ ᠭᠡᠰᠡᠨ ᠠᠶᠤᠮᠠᠷ ᠳᠠᠭᠤ ᠭᠠᠷᠴᠤ ᠳ᠋ᠠᠬᠢ ᠬᠦᠬᠦᠷ ᠦ᠋ᠨ ᠦᠨᠦᠷ ᠬᠠᠩᠬᠤᠯᠤᠨ᠂ ᠬᠡᠦᠬᠡᠳ ᠦ᠋ᠳ ᠠᠶᠤᠵᠤ ᠤᠬᠢᠯᠠᠯᠳᠤᠵᠤ ᠪᠢᠯᠡ᠃ ᠠᠩᠴᠢᠨ ᠬᠠᠷᠢᠨ ᠢᠨᠢᠶᠡᠭᠡᠳ᠄
- ᠲᠡᠷᠡ ᠰᠢᠦ᠃ ᠶᠠᠩᠭᠢᠷ ᠬᠡᠢᠰᠦᠭᠡᠳ ᠠᠢᠰᠤᠢ! ᠭᠡᠵᠦ ᠬᠠᠰᠬᠢᠷᠤᠨ ᠭᠦᠶᠦᠵᠦ ᠭᠠᠷᠤᠭᠰᠠᠨ ᠶᠤᠮᠰᠠᠨ᠃ᠦᠨᠡᠬᠡᠷ ᠭᠡᠷ ᠦ᠋ᠨ ᠨᠢ ᠲᠣᠭᠣᠨᠣ ᠪᠠᠷ ᠴᠤᠬᠤᠢᠮᠠ ᠥᠨᠳᠥᠷ ᠬᠠᠨᠠᠨ ᠬᠠᠳᠠᠨ ᠳᠡᠭᠡᠷᠡ ᠡᠴᠡ ᠨᠢᠭᠡ ᠶᠠᠩᠭᠢᠷ ᠦᠰᠦᠷᠦᠨ ᠳᠣᠭᠣᠭᠰᠢ ᠪᠠᠨ ᠤᠨᠠᠵᠤ ᠢᠷᠡᠭᠡᠳ ᠭᠡᠷ ᠡᠴᠡ ᠬᠣᠯᠠ ᠦᠭᠡᠢ ᠫᠦᠰᠬᠢᠨ ᠣᠢᠴᠢᠵᠤ ᠪᠢᠯᠡ᠃ᠲᠡᠭᠡᠭᠡᠳ ᠵᠡᠷᠯᠢᠭ ᠰᠣᠩᠭᠢᠨᠠ ᠲᠠᠢ ᠬᠣᠯᠢᠭᠰᠠᠨ ᠰᠠᠢᠬᠠᠨ ᠬᠣᠭᠣᠯᠠ ᠬᠢᠵᠦ ᠢᠳᠡᠵᠡᠭᠡᠭᠰᠡᠨ ᠶᠦᠮ᠃ ᠲᠡᠭᠦᠨ ᠢ᠋ ᠰᠠᠩᠵᠢ ᠬᠡᠵᠢᠶᠡ ᠴᠤ᠌ ᠮᠠᠷᠲᠠᠳᠠᠭ ᠦᠭᠡᠢ ᠠᠵᠢ᠃ ᠡᠨᠡ ᠤᠳᠠᠭᠠ ᠰᠣᠩᠭᠢᠨᠠ ᠶ᠋ᠢᠨ ᠦᠨᠦᠷ ᠪᠠᠭᠠ ᠨᠠᠰᠤᠨ ᠤ᠋ ᠨᠢ ᠳᠤᠷᠠᠳᠬᠠᠯ ᠢ᠋ ᠰᠡᠷᠭᠦᠭᠡᠪᠡ᠃
- ᠦᠬᠦᠬᠦ ᠦᠭᠡᠢ ᠯᠡ ᠶᠤᠮᠰᠠᠨ! ᠭᠡᠵᠦ ᠰᠠᠩᠵᠢ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠪᠠ᠃ ᠰᠢᠮᠠᠨᠠᠴᠠ ᠢᠨᠢᠶᠡᠮᠰᠦᠭᠯᠡᠵᠦ᠄
- ᠵᠠ ᠲᠡᠷᠡ ᠳᠠ᠃ ᠴᠢ ᠰᠣᠩᠭᠢᠨᠠ ᠶᠢᠨ ᠦᠨᠦᠷ ᠲᠤ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠪᠠᠢᠲᠦᠭᠠᠢ ᠦᠬᠦᠯ ᠢ᠋ ᠮᠠᠷᠲᠠᠵᠤ ᠡᠬᠢᠯᠡᠭᠡ ᠪᠢᠵᠡ! ᠭᠡᠵᠦ ᠠᠰᠠᠭᠤᠯᠠ᠃ ᠰᠢᠮᠠᠨᠠᠴᠠ ᠳᠠᠢᠨ ᠬᠦ᠌ ᠬᠣᠭᠣᠯᠠ ᠬᠢᠬᠦ ᠵᠠᠭᠤᠷᠠ ᠰᠠᠩᠵᠢ ᠭᠡᠰᠦᠯ ᠡᠴᠡ ᠨᠤᠮᠤᠨᠡᠢ ᠰᠠᠬᠢᠵᠤ ᠪᠠᠢᠭ᠍ᠰᠠᠨ᠂ ᠶᠠᠭᠠᠬᠢᠵᠤ ᠡᠪᠡᠳᠦᠭᠰᠡᠨ᠂ ᠣᠳᠣ ᠶᠠᠮᠠᠷ ᠪᠠᠢᠭᠠ ᠶ᠋ᠢ ᠨᠢᠭᠲᠠᠯᠠᠨ ᠠᠰᠠᠭᠤᠵᠤ ᠠᠪᠴᠠᠢ᠃
- ᠭᠠᠢᠭᠤᠢ ᠪᠢ ᠴᠢᠮᠠ ᠳ᠋ᠤ᠌ ᠬᠣᠭᠣᠯᠠ ᠢᠳᠡᠭᠦᠯᠵᠦ ᠰᠢᠯᠭᠠᠭᠠᠳ ᠳᠠᠷᠠᠭᠠ ᠨᠢ ᠲᠠᠪᠠᠲᠠᠢ ᠤᠨᠲᠠᠭᠤᠯᠬᠤ ᠳᠣᠮ ᠬᠢᠨᠡ᠃ ᠰᠠᠢᠨ ᠨᠣᠢᠷ ᠪᠣᠯ ᠡᠪᠡᠳᠴᠢᠨ ᠢ᠋ ᠡᠳᠡᠭᠡᠭᠡᠬᠦ ᠬᠠᠮᠤᠭ ᠤ᠋ᠨ ᠴᠤᠬᠠᠭ ᠲᠣᠮ ᠤ᠋ᠨ ᠨᠢᠭᠡ ᠭᠡᠵᠦ ᠲᠡᠷᠡ ᠶᠠᠷᠢᠪᠠ᠃ ᠰᠢᠮᠠᠨᠠᠴᠠ ᠤ᠋ᠨ ᠬᠢᠭᠰᠡᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠠᠮᠲᠠᠲᠠᠢ ᠬᠣᠭᠣᠯᠠ ᠶ᠋ᠢ ᠰᠠᠩᠵᠢ ᠢᠳᠡᠵᠦ ᠬᠠᠷᠠ ᠬᠥᠯᠥᠰᠥ ᠨᠢ ᠴᠤᠪᠤᠷᠠᠨ ᠠᠰᠬᠠᠷᠴᠤ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠷᠡ ᠬᠣᠭᠣᠯᠠᠨ ᠠ᠋ᠴᠠ ᠶᠡᠬᠡ ᠢᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠪᠤᠴᠠᠵᠤ ᠭᠠᠷᠬᠤ ᠶ᠋ᠢ ᠵᠠᠪᠳᠤᠨ ᠵᠣᠪᠠᠭᠠᠵᠤ ᠪᠠᠢᠪᠠ᠃ ᠰᠢᠮᠠᠨᠠᠴᠠ ᠲᠡᠭᠦᠨ ᠢ᠋ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠭ᠍ᠰᠠᠨ ᠢᠶᠠᠨ ᠲᠣᠯᠣᠭᠠᠢ ᠰᠡᠭᠰᠦᠷᠴᠦ᠄
- ᠠᠷᠭᠠ ᠦᠭᠡᠢ ᠯᠡ ᠲᠤᠢᠯᠳᠠᠵᠠᠢ᠃ ᠮᠢᠨᠦ ᠲᠠᠭᠠᠮᠠᠭᠯᠠᠵᠤ ᠪᠠᠢᠭ᠍ᠰᠠᠨ ᠮᠥᠨ ᠪᠣᠯᠤᠯᠲᠠᠢ᠃ ᠲᠡᠭᠡᠪᠡᠯ ᠴᠤ᠌ ᠪᠢ ᠠᠷᠭᠠᠯᠠᠨᠠ ᠭᠡᠵᠦ ᠢᠲᠡᠭᠡᠯᠲᠡᠢ ᠬᠡᠯᠡᠪᠡ᠃
- ᠯᠦᠩᠳᠡᠩᠵᠤᠨᠠᠢ ᠭᠠᠪᠵᠢᠲᠠᠨ ᠭᠦᠷᠢᠮ ᠤᠩᠰᠢᠵᠤ᠂ ᠮᠡᠩᠭᠡᠨ ᠵᠠᠰᠠᠯ᠂ ᠰᠦᠨᠡᠰᠦ ᠳᠠᠭᠤᠳᠠᠯᠭᠠ ᠬᠢᠯᠭᠡᠭᠡᠳ ᠪᠠᠷᠠᠭᠠ ᠦᠭᠡᠢ᠃ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠶ᠋ᠢᠨ ᠪᠦᠬᠦ ᠠᠷᠭᠠ ᠲᠤᠰᠠ ᠪᠣᠯᠤᠭᠠ ᠦᠭᠡᠢ᠃ ᠭᠦᠷᠲᠡᠮ ᠪᠠᠭᠤᠯᠭᠠᠭᠠᠳ ᠴᠤ᠌ ᠨᠡᠮᠡᠷᠢ ᠪᠣᠯᠤᠭᠠ ᠦᠭᠡᠢ᠃ ᠲᠡᠢᠮᠦ ᠡᠷᠳᠡᠮᠲᠦ ᠬᠥᠮᠦᠰ ᠦ᠋ᠨ ᠠᠷᠭᠠ ᠰᠢᠷᠭᠡ ᠲᠤᠰᠯᠠᠭᠠ ᠦᠭᠡᠢ ᠶᠦᠮ ᠴᠢᠨᠢ ᠨᠣᠮ ᠦᠭᠡᠢ ᠬᠥᠭᠰᠢᠨ ᠰᠢᠮᠠᠨᠠᠴᠠ ᠤ᠋ᠨ ᠠᠷᠭᠠ ᠴᠤ᠌ ᠳᠠ᠃ ᠶᠡᠬᠡ ᠪᠣᠳᠣᠬᠤ ᠳ᠋ᠠᠭᠠᠨ ᠯᠠ ᠬᠣᠭᠣᠯᠠ᠂ ᠴᠠᠢ ᠪᠠᠷ ᠠᠷᠭᠠᠳᠠᠨᠠ ᠪᠢᠵᠡ ᠳᠡ》 ᠭᠡᠵᠦ ᠰᠠᠩᠵᠢ ᠶ᠋ᠢᠨ ᠲᠣᠯᠣᠭᠠᠢ ᠳᠤ ᠪᠣᠳᠣᠭᠳᠠᠯᠠ᠃ ᠰᠢᠮᠠᠨᠠᠴᠠ ᠡᠭᠦᠷᠭᠡ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠪᠢᠴᠢᠬᠠᠨ ᠪᠣᠢᠳᠠᠩ ᠭᠠᠷᠭᠠᠵᠤ ᠢᠷᠡᠭᠡᠳ ᠬᠠᠳᠤᠭᠰᠠᠨ ᠬᠥᠬᠡ ᠨᠣᠭᠣᠭᠠᠨ ᠡᠪᠡᠰᠦ᠂ ᠪᠤᠷᠴᠠᠭ ᠲᠠᠢ ᠬᠥᠬᠡᠯᠪᠡᠢ ᠬᠣᠩᠭᠣᠷᠴᠠᠭ ᠳᠣᠲᠣᠷᠠ ᠠ᠋ᠴᠠ ᠨᠢ ᠠᠪᠴᠤ ᠰᠠᠩᠵᠢ ᠳ᠋ᠤ᠌ ᠦᠵᠡᠭᠦᠯᠦᠭᠡᠳ᠄
- ᠲᠠᠨᠢᠵᠤ ᠪᠠᠢᠨᠠ ᠤᠤ? ᠴᠠᠬᠢᠯᠳᠠᠭ ᠪᠠᠢᠭᠠ ᠪᠢᠵᠡ! ᠨᠤᠲᠤᠭ ᠤ᠋ᠨ ᠴᠢᠨᠢ ᠴᠠᠬᠢᠯᠳᠠᠭ᠃ ᠵᠠ ᠡᠭᠦᠪᠡᠷ ᠯᠡ ᠰᠢᠷᠬᠠ ᠲᠠᠢ ᠬᠣᠳᠣᠭᠣᠳᠣ ᠶ᠋ᠢ ᠴᠢᠨᠢ ᠡᠮᠨᠡᠨᠡ ᠭᠡᠪᠡ᠃
- ᠬᠣᠳᠣᠭᠣᠳᠣ ᠮᠢᠨᠢ ᠰᠢᠷᠬᠠ ᠲᠠᠢ ᠭᠡᠵᠦ ᠤᠤ ᠳᠠ? ᠭᠡᠮᠡᠨ ᠰᠠᠩᠵᠢ ᠭᠠᠢᠬᠠᠯᠠ᠃ ᠰᠢᠮᠠᠨᠠᠴᠠ᠄
- ᠬᠣᠳᠣᠭᠣᠳᠣ ᠴᠢᠨᠢ ᠠᠢᠬᠤᠪᠲᠤᠷ ᠰᠢᠷᠬᠠᠯᠠᠵᠠᠢ᠃ ᠣᠲᠠᠬᠤ ᠦᠭᠡᠢ ᠴᠢᠰᠤ ᠠᠯᠠᠳᠠᠨᠠ᠃ ᠮᠣᠩᠭᠣᠯ ᠬᠦᠮᠦᠨ ᠮᠢᠬᠠᠰᠠᠵᠤ ᠡᠨᠡ ᠲᠥᠪᠡᠳ ᠭᠠᠵᠠᠷ ᠬᠣᠳᠣᠭᠣᠳᠣᠨ ᠤ᠋ ᠰᠢᠷᠬᠠ ᠣᠯᠳᠠᠭ ᠶᠤᠮ᠃ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠨᠠᠢ᠍ᠮᠠᠨ ᠨᠤᠮᠤᠨᠡᠢ ᠰᠠᠬᠢᠬᠤ ᠳ᠋ᠤ᠌ ᠴᠤ᠌ ᠤᠷᠢᠳᠤ ᠨᠢ ᠮᠢᠬᠠᠰᠠᠭ ᠪᠠᠢᠭ᠍ᠰᠠᠨ ᠬᠥᠮᠦᠨ ᠦ᠌ ᠬᠣᠳᠣᠭᠣᠳᠣᠨ ᠤ᠋ ᠰᠢᠷᠬᠠ ᠭᠠᠭᠠᠷᠠᠵᠤ ᠥᠭᠭᠦᠨᠡ᠃ ᠴᠢ ᠶᠡᠷᠦ ᠨᠢ ᠠᠢᠯ ᠤ᠋ᠨ ᠡᠷᠬᠡ ᠬᠡᠦᠬᠡᠳ ᠪᠠᠢᠭ᠍ᠰᠠᠨ ᠪᠢᠵᠡ ᠳᠡ ᠭᠡᠪᠡ᠃ ᠰᠠᠩᠵᠢ ᠭᠡᠰᠦᠯ ᠲᠣᠯᠣᠭᠠᠢ ᠲᠣᠬᠢᠪᠠ᠃
᠁ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠰᠠᠩᠵᠢ ᠭᠡᠰᠦᠯ ᠢ᠋ ᠰᠢᠮᠠᠨᠠᠴᠠ ᠴᠠᠬᠢᠯᠳᠠᠭ ᠤ᠋ᠨ ᠰᠢᠭᠦᠰᠦ ᠪᠡᠷ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠡᠮᠴᠢᠯᠡᠨ᠂ ᠬᠣᠭᠣᠯᠠ ᠴᠠᠢ ᠪᠠᠷ ᠰᠤᠪᠢᠯᠠᠪᠠ᠃ ᠰᠢᠮᠠᠨᠠᠴᠠ ᠤ᠋ᠨ ᠣᠨᠣᠰᠢ ᠵᠥᠪ ᠴᠤ᠌ ᠪᠠᠢᠭ᠍ᠰᠠᠨ ᠶᠤᠮ ᠤᠤ᠂ ᠡᠰᠡᠪᠡᠯ ᠥᠪᠡᠷ ᠴᠤ᠌ ᠲᠣᠬᠢᠶᠠᠯ ᠪᠣᠯᠤᠭᠰᠠᠨ ᠤᠤ᠂ ᠪᠣᠣ ᠮᠡᠳᠡ᠂ ᠶᠠᠮᠠᠷ ᠴᠤ᠌ ᠠᠲᠤᠭᠠᠢ ᠰᠠᠩᠵᠢ ᠭᠡᠰᠦᠯ ᠬᠥᠯ ᠳᠡᠭᠡᠷᠡ ᠪᠡᠨ ᠪᠣᠰᠪᠠ᠃ ᠰᠢᠮᠠᠨᠠᠴᠠ ᠵᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠭᠡᠳᠡᠭ ᠠᠵᠢ᠃ ᠲᠡᠷᠡ ᠶᠡᠬᠡ ᠠᠮᠠᠨᠴᠢᠷ᠂ ᠴᠠᠢᠯᠭᠠᠨ ᠰᠡᠳᠬᠢᠯ ᠲᠡᠢ᠂ ᠣᠯᠠᠨ ᠭᠠᠵᠠᠷ ᠲᠡᠨᠦᠵᠦ᠂ ᠶᠡᠬᠡ ᠶ᠋ᠢ ᠦᠵᠡᠵᠦ᠂ ᠡᠯᠳᠡᠪ ᠢ᠋ᠶ᠋ᠡᠷ ᠵᠣᠪᠠᠭᠰᠠᠨ ᠠᠮᠢᠲᠠᠨ ᠪᠠᠢᠵᠠᠢ᠃
- ᠡᠮᠡᠭᠡ ᠮᠢᠨᠢ᠂ ᠪᠢ ᠲᠠᠨ ᠤ᠋ ᠠᠴᠢ ᠪᠠᠷ ᠳᠠᠬᠢᠨ ᠰᠡᠭᠡᠯᠡ᠃ ᠶᠡᠬᠡ ᠭᠢᠯᠠᠢᠯᠠ᠃ ᠲᠠ ᠮᠠᠨ ᠤ᠋ ᠬᠢ ᠠᠴᠠ ᠪᠢᠲᠡᠭᠡᠢ ᠶᠠᠪᠤ ! ᠭᠡᠵᠦ ᠰᠠᠩᠵᠢ ᠭᠤᠶᠤᠯᠠ᠃ ᠪᠡᠷᠢᠮᠦᠭ :
- ᠮᠢᠨᠦ ᠠᠴᠢ ᠶᠠᠭᠤ ᠪᠠᠢᠬᠤᠪ᠃ ᠵᠣᠷ ᠦᠭᠡᠢ ᠯᠠᠮᠠ ᠠ᠋ᠴᠠ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠴᠢᠪᠠᠭᠠᠨᠴᠠ ᠭᠡᠳᠡᠭ ᠯᠠ ᠪᠣᠯᠵᠤ ᠪᠠᠢᠨᠠ ᠭᠡᠪᠡ᠃