ᠪᠢᠴᠢᠬᠠᠨ ᠰᠠᠮᠵᠠ ᠠ᠋ᠴᠠ ᠴᠢᠨᠢ ᠬᠡᠳᠦᠢ ᠦᠯᠢᠭᠡᠷ ᠭᠠᠷᠬᠤ ᠪᠣᠢ-ᠮᠣᠩᠭᠣᠯ ᠬᠡᠪᠰᠢᠭᠰᠡᠨ ᠦᠭᠡ04
348ᠪᠢᠴᠢᠬᠠᠨ ᠰᠠᠮᠵᠠ ᠠ᠋ᠴᠠ ᠴᠢᠨᠢ ᠬᠡᠳᠦᠢ ᠦᠯᠢᠭᠡᠷ ᠭᠠᠷᠬᠤ ᠪᠣᠢ
ᠮᠣᠩᠭᠣᠯ ᠬᠡᠪᠰᠢᠭᠰᠡᠨ ᠦᠭᠡ ᠶ᠋ᠢᠨ ᠦᠯᠢᠭᠡᠷ (4)
ᠨᠠᠮᠵᠢᠯ
ᠪᠢᠴᠢᠬᠠᠨ ᠰᠠᠮᠵᠠ ᠠ᠋ᠴᠠ ᠴᠢᠨᠢ ᠬᠡᠳᠦᠢ ᠦᠯᠢᠭᠡᠷ ᠭᠠᠷᠬᠤ ᠪᠣᠢ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠨᠢᠭᠡᠨ ᠡᠷᠡ ᠡᠮᠡ ᠬᠣᠶᠠᠭᠤᠯᠠ ᠪᠠᠢᠭᠰᠠᠨ ᠭᠡᠨᠡ᠃ ᠨᠢᠭᠡᠨ ᠡᠳᠦᠷ ᠡᠷᠡ ᠶ᠋ᠢᠨ ᠬᠢᠨᠢ ᠪᠠᠭᠠ ᠶ᠋ᠢᠨ ᠰᠠᠢᠨ ᠨᠠᠢᠵᠠ ᠨᠢ ᠠᠢᠯᠴᠢᠯᠠᠵᠤ ᠢᠷᠡᠪᠡ᠃ ᠡᠨᠡ ᠡᠷᠡ ᠡᠮᠡ ᠬᠣᠶᠠᠭᠤᠯᠠ ᠰᠠᠢᠨ ᠨᠠᠢᠵᠠ ᠪᠠᠨ ᠦᠵᠡᠭᠡᠳ ᠪᠠᠶᠠᠷᠯᠠᠭᠰᠠᠨ ᠪᠣᠯᠪᠠᠴᠤ ᠵᠣᠴᠢᠯᠠᠵᠤ ᠳᠠᠢᠯᠠᠬᠤ ᠶᠠᠭᠤᠮᠠ ᠦᠭᠡᠢ ᠳ᠋ᠡᠭᠡᠨ ᠰᠠᠨᠠᠭᠠ ᠵᠣᠪᠠᠵᠠᠢ᠃ ᠡᠷᠡ ᠨᠢ᠄
— ᠪᠢᠳᠡᠨ ᠦ᠌ ᠨᠢᠭᠡᠨ ᠪᠢᠴᠢᠬᠠᠨ ᠰᠠᠮᠵᠠ ᠪᠠᠢᠬᠤ ᠦᠭᠡᠢ ᠦᠦ? ᠡᠭᠦᠨ ᠢ᠋ ᠠᠯᠠᠭᠠᠳ ᠮᠢᠬᠠ ᠶ᠋ᠢ ᠨᠢ ᠵᠠᠷᠤᠴᠢᠬᠠᠶᠠ ᠭᠡᠪᠡ᠃ ᠡᠬᠡᠨᠡᠷ ᠨᠢ᠄
— ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠰᠠᠢᠨ ᠨᠠᠢᠵᠠ ᠳ᠋ᠠᠭᠠᠨ ᠰᠠᠮᠵᠠᠨ ᠮᠢᠬᠠ ᠢᠳᠡᠭᠦᠯᠪᠡᠯ ᠵᠣᠬᠢᠰ ᠦᠭᠡᠢ᠂ ᠮᠡᠳᠡᠴᠢᠬᠡᠪᠡᠯ ᠶᠠᠭᠤ ᠭᠡᠰᠡᠨ ᠬᠡᠷᠡᠭ ᠪᠣᠢ? ᠭᠡᠵᠦ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠳ᠋ᠦ᠍ ᠡᠷᠡ ᠨᠢ᠄
— ᠪᠢᠳᠡ ᠬᠣᠶᠠᠭᠤᠯᠠ ᠬᠡᠯᠡᠬᠦ ᠦᠭᠡᠢ ᠪᠣᠯ ᠬᠡᠨ ᠮᠡᠳᠡᠬᠦ ᠪᠣᠢ? ᠭᠡᠵᠡᠢ᠃ ᠡᠬᠡᠨᠡᠷ ᠨᠢ᠄
— ᠰᠠᠮᠵᠠ ᠶ᠋ᠢᠨ ᠮᠢᠬᠠ ᠶᠤᠮ ᠴᠢᠨᠢ ᠰᠠᠮᠵᠠ ᠶ᠋ᠢᠨ ᠮᠢᠬᠠ ᠭᠡᠵᠦ ᠬᠡᠯᠡᠬᠦ ᠦᠭᠡᠢ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠣᠢ? ᠭᠡᠬᠦ ᠳ᠋ᠦ᠍ ᠡᠷᠡ ᠨᠢ᠄
ᠬᠣᠭᠣᠯᠠ ᠢᠳᠡᠬᠦ ᠳ᠋ᠦ᠍ ᠪᠢ᠂ ᠪᠢᠳᠡᠨ ᠦ᠌ ᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠤᠴᠢᠷ ᠢ᠋ ᠬᠡᠯᠡᠪᠡᠯ ᠦᠯᠢᠭᠡᠷ ᠰᠢᠦ ᠭᠡᠪᠡᠯ ᠴᠢ ᠰᠠᠮᠵᠠᠨ ᠮᠢᠬᠠ ᠪᠠᠨ ᠨᠡᠮᠡᠵᠦ ᠯᠡ ᠪᠠᠢ ᠭᠡᠬᠦ ᠳ᠋ᠦ᠍ ᠡᠬᠡᠨᠡᠷ ᠨᠢ ᠠᠷᠭᠠ ᠦᠭᠡᠢ ᠵᠥᠪᠰᠢᠶᠡᠷᠡᠪᠡ ᠭᠡᠨᠡ᠃
ᠲᠡᠭᠡᠭᠡᠳ ᠰᠠᠮᠵᠠ ᠪᠠᠨ ᠠᠯᠠᠵᠤ ᠮᠢᠬᠠ ᠪᠠᠷ ᠨᠢ ᠨᠣᠭᠣᠭᠠ ᠬᠢᠵᠦ᠂ ᠵᠣᠴᠢᠨ ᠢ᠋ᠶ᠋ᠠᠨ ᠳᠠᠢᠯᠠᠪᠠ᠃ ᠡᠷᠡ ᠨᠢ ᠬᠠᠨᠵᠤᠨ ᠭᠣᠣᠯ ᠳ᠋ᠠᠭᠠᠨ ᠵᠣᠴᠢᠨ ᠲᠠᠢ ᠪᠠᠨ ᠬᠣᠶᠠᠭᠤᠯᠠ ᠰᠢᠷᠡᠭᠡ ᠬᠠᠪᠴᠢᠨ ᠰᠠᠭᠤᠵᠤ᠂ ᠶᠡᠬᠡ ᠯᠡ ᠯᠠᠷᠵᠢᠶᠠ ᠲᠠᠢ ᠬᠢᠲᠤᠭᠠ ᠡᠷᠭᠢᠭᠦᠯᠵᠦ ᠮᠢᠬᠠ ᠢᠳᠡᠵᠦ᠂ ᠬᠤᠨᠳᠠᠭᠠ ᠡᠷᠭᠦᠨ ᠠᠷᠢᠬᠢ ᠤᠤᠭᠤᠨ ᠰᠠᠭᠤᠪᠠ ᠭᠡᠨᠡ᠃
ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠮᠢᠬᠠ ᠨᠢ ᠪᠠᠷᠠᠭᠰᠠᠨ ᠳ᠋ᠤ᠌ ᠡᠷᠡ ᠨᠢ᠄
— ᠪᠢᠳᠡᠨ ᠦ᠌ ᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠤᠴᠢᠷ ᠢ᠋ ᠬᠡᠯᠡᠪᠡᠯ ᠦᠯᠢᠭᠡᠷ ᠲᠡᠢ ᠰᠢᠦ! ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠡᠬᠡᠨᠡᠷ ᠨᠢ ᠮᠢᠬᠠ ᠪᠠᠨ ᠠᠪᠴᠢᠷᠠᠭᠠᠳ ᠨᠡᠮᠡᠪᠡ᠃ ᠡᠨᠡ ᠶᠠᠩᠵᠤ ᠪᠠᠷ ᠡᠷᠡ ᠨᠢ᠄
— ᠪᠢᠳᠡᠨ ᠦ᠌ ᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠤᠴᠢᠷ ᠢ᠋ ᠬᠡᠯᠡᠪᠡᠯ ᠦᠯᠢᠭᠡᠷ ᠰᠢᠦ! ᠭᠡᠪᠡᠯ ᠡᠬᠡᠨᠡᠷ ᠨᠢ ᠮᠢᠬᠠ ᠪᠠᠨ ᠨᠡᠮᠡᠵᠦ ᠯᠡ ᠪᠠᠢᠪᠠ ᠭᠡᠨᠡ᠃ ᠭᠡᠲᠡᠯᠡ ᠡᠷᠡ ᠨᠢ᠄《ᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠤᠴᠢᠷ ᠢ᠋ ᠬᠡᠯᠡᠪᠡᠯ ᠦᠯᠢᠭᠡᠷ ᠰᠢᠦ!》 ᠭᠡᠵᠦ ᠬᠡᠯᠡᠭᠰᠡᠭᠡᠷ ᠪᠠᠢᠭᠠᠳ 《ᠦᠯᠢᠭᠡᠷ》ᠨᠢ ᠭᠠᠷᠴᠤ ᠢᠷᠡᠬᠦ ᠪᠡᠨ ᠪᠣᠯᠢᠪᠠ ᠭᠡᠨᠡ᠃ ᠡᠷᠡ ᠨᠢ ᠥᠨᠥᠬᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠳᠠᠪᠲᠠᠨ ᠶᠠᠷᠢᠭᠠᠳ ᠪᠠᠢᠬᠤ ᠳ᠋ᠤ᠌ ᠡᠬᠡᠨᠡᠷ ᠨᠢ ᠬᠦᠯᠢᠴᠡᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠭᠠᠳ᠄
— ᠪᠢᠴᠢᠬᠠᠨ ᠰᠠᠮᠵᠠ ᠠ᠋ᠴᠠ ᠴᠢᠨᠢ ᠬᠡᠴᠢᠨᠡᠨ ᠦᠯᠢᠭᠡᠷ ᠭᠠᠷᠳᠠᠭ ᠶᠤᠮ ᠪᠣᠢ? ᠭᠡᠵᠦ ᠪᠠᠷᠬᠢᠷᠠᠪᠠ ᠭᠡᠨᠡ᠃
ᠬᠣᠵᠢᠮ ᠨᠢ ᠬᠥᠮᠦᠰ ᠲᠤᠰ ᠦᠯᠢᠭᠡᠷ ᠢ᠋ ᠦᠨᠳᠦᠰᠦᠯᠡᠵᠦ 《ᠪᠢᠴᠢᠬᠠᠨ ᠰᠠᠮᠵᠠ ᠠ᠋ᠴᠠ ᠴᠢᠨᠢ ᠬᠡᠳᠦᠢ ᠦᠯᠢᠭᠡᠷ ᠭᠠᠷᠬᠤ ᠪᠣᠢ》 ᠭᠡᠬᠦ ᠬᠡᠪᠰᠢᠭᠰᠡᠨ ᠦᠭᠡ ᠵᠣᠬᠢᠶᠠᠵᠤ ᠬᠡᠷᠡᠭᠯᠡᠬᠦ ᠪᠣᠯᠪᠠ᠃ ᠡᠭᠦᠪᠡᠷ ᠥᠪᠡᠷ ᠦ᠋ᠨ ᠴᠢᠳᠠᠯ ᠲᠡᠩᠬᠡᠭᠡ ᠪᠡᠨ ᠮᠡᠳᠡᠬᠦ ᠦᠭᠡᠢ ᠪᠡᠷ ᠴᠤᠤᠷᠬᠠᠵᠤ ᠣᠷᠬᠢᠭᠠᠳ ᠪᠠᠢᠳᠠᠭ ᠬᠥᠮᠦᠰ ᠢ᠋ ᠶᠥᠭᠡᠳᠡᠨ ᠳᠦᠷᠰᠦᠯᠡᠬᠦ ᠪᠣᠯᠵᠠᠢ᠃ ᠪᠠᠰᠠ ᠵᠠᠷᠢᠮ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠠᠷ ᠳᠤᠲᠠᠮᠠᠭ᠂ ᠳᠡᠮᠡᠢ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠬᠥᠩᠭᠡᠮᠰᠦᠭᠯᠡᠬᠦ ᠵᠠᠩ ᠲᠠᠢ ᠬᠥᠮᠦᠰ ᠢ᠋ ᠳᠦᠷᠰᠦᠯᠡᠬᠦ ᠳ᠋ᠦ᠍ ᠴᠦ᠍ ᠡᠭᠦᠨ ᠢ᠋ ᠬᠡᠷᠡᠭᠯᠡᠳᠡᠭ ᠪᠣᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠢᠷᠠᠨᠤᠳ· ᠨᠠᠷᠠᠰᠤ
ᠦᠰᠦᠭ ᠬᠢᠨᠠᠭᠴᠢ᠄ ᠮᠤᠩᠭᠤᠯᠬᠦᠦ