ᠵᠠᠮᠤᠬᠠ ᠶ᠋ᠢᠨ ᠥᠴᠢᠯ-ᠳ ∙ ᠨᠠᠮᠰᠠᠷᠠᠢ (ᠪᠣᠭᠣᠨᠢ ᠥᠭᠦᠯᠡᠯᠭᠡ)Жамухын өчил-Д.Намсрай (богино өгүүллэг)
774ᠵᠠᠮᠤᠬᠠ ᠶ᠋ᠢᠨ ᠥᠴᠢᠯ
ᠳ·ᠨᠠᠮᠰᠠᠷᠠᠢ
ᠨᠠᠢ᠍ᠮᠠᠨ ᠵᠠᠭᠤᠨ ᠤ᠋ ᠲᠡᠷᠲᠡᠭᠡᠬᠢ ᠵᠠᠮᠤᠬᠠ ᠶ᠋ᠢᠨ ᠱᠠᠷᠢᠯ ᠳᠡᠭᠡᠭᠦᠷ ᠥᠨᠥᠳᠥᠷ ᠲᠠᠯᠠ ᠶ᠋ᠢᠨ ᠪᠣᠯᠵᠣᠮᠣᠷ ᠵᠢᠷᠭᠢᠵᠦ ᠡᠬᠡ ᠨᠤᠲᠤᠭ ᠤ᠋ᠨ ᠨᠣᠶᠠᠨ ᠰᠠᠯᠬᠢᠨᠠ ᠭᠣᠳᠣᠢᠭᠰᠠᠨ ᠬᠢᠯᠭᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠭᠠᠰᠢᠭᠤᠳᠠᠯᠲᠠᠶᠠ ᠪᠥᠬᠥᠯᠵᠡᠨᠡ᠃ ᠲᠡᠷᠡ ᠭᠠᠵᠠᠷ ᠤ᠋ᠨ ᠴᠡᠭᠡᠵᠢ ᠶ᠋ᠢ ᠠᠨᠢᠷᠲᠤᠨ ᠴᠢᠩᠨᠠᠪᠠᠰᠤ᠂ ᠮᠣᠩᠭᠣᠯ ᠡᠷᠡᠰ ᠦ᠋ᠨ ᠨᠥᠬᠥᠷᠯᠡᠯ᠂ ᠭᠤᠨᠢᠭᠲᠤ ᠬᠠᠭᠠᠴᠠᠯ ᠤ᠋ᠨ ᠲᠤᠬᠠᠢ ᠡᠮᠭᠡᠨᠢᠯᠲᠦ ᠲᠡᠦᠬᠡ ᠶ᠋ᠢ ᠥᠭᠦᠯᠡᠨᠡ᠁ ᠣᠯᠠᠨ ᠠᠢᠮᠠᠭ ᠤ᠋ᠨ ᠴᠢᠰᠤᠲᠤ ᠲᠡᠮᠡᠴᠡᠯ᠂ ᠲᠠᠯᠠ ᠶ᠋ᠢᠨ ᠢᠵᠠᠭᠤᠷᠲᠠᠨ ᠨᠤᠭᠤᠳ ᠤ᠋ᠨ ᠥᠷᠢᠰᠦᠯᠳᠦᠭᠡᠨ ᠲᠡᠮᠦᠵᠢᠨ ᠦ᠌ ᠢᠯᠠᠯᠲᠠ ᠪᠠᠷ ᠲᠡᠭᠦᠰᠴᠦ ᠪᠠᠢᠭᠰᠠᠨ ᠲᠡᠷᠡ ᠵᠢᠯ᠁ ᠬᠠᠭᠠᠨ ᠵᠠᠮᠤᠬᠠ ᠨᠥᠬᠥᠳ ᠲᠦ᠍ ᠪᠡᠨ ᠪᠠᠷᠢᠭᠳᠠᠭᠠᠳ ᠴᠢᠩᠭᠢᠰ ᠦ᠋ᠨ ᠦᠷᠭᠦᠭᠡᠨᠡ ᠬᠦᠷᠭᠡᠭᠳᠡᠵᠦ ᠢᠷᠡᠪᠡ᠃ ᠪᠣᠭᠳᠠ ᠡᠵᠡᠨ ᠳ᠋ᠦ᠍ ᠪᠡᠨ ᠬᠠᠯᠳᠠᠭᠰᠠᠨ ᠪᠣᠭᠣᠯ ᠢᠷᠭᠡᠨ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠡᠪᠡᠰᠦ ᠨᠣᠭᠣᠭᠠ ᠬᠦᠷᠡᠩᠲᠦᠲᠡᠯᠡ ᠴᠠᠭᠠᠵᠠᠯᠠᠵᠤ᠂ ᠵᠠᠮᠤᠬᠠ ᠶ᠋ᠢ ᠰᠤᠯᠠᠯᠠᠭᠠᠳ ᠥᠭᠦᠯᠡᠪᠡ᠃
— ᠡᠪ ᠡᠶᠡ ᠡᠪᠳᠡᠷᠡᠯᠴᠡᠵᠦ ᠣᠯᠠᠨᠲᠠ ᠪᠤᠳᠤᠯᠢᠭᠰᠠᠨ ᠴᠤ᠌ ᠠᠮᠢ ᠶ᠋ᠢ ᠴᠢᠨᠢ ᠭᠡᠯᠳᠦᠷᠢᠭᠦᠯᠦᠶᠡ ᠬᠠᠭᠠᠨ ᠠᠨᠳᠠ ᠮᠢᠨᠢ! ᠡᠭᠡᠨᠡᠭᠲᠡ ᠨᠥᠬᠥᠷᠯᠡᠯ ᠢ᠋ᠶ᠋ᠡᠨ ᠪᠠᠲᠤᠳᠬᠠᠵᠤ᠂ ᠡᠭᠦᠷᠢᠳᠡ ᠬᠠᠮᠲᠤ ᠲᠦᠰᠢᠯᠴᠡᠨ ᠰᠢᠲᠦᠯᠴᠡᠨ ᠶᠠᠪᠤᠲᠤᠭᠠᠢ ᠴᠢ! ᠭᠡᠮᠡᠨ ᠥᠷᠥᠰᠢᠶᠡᠯ ᠢ᠋ ᠦᠵᠡᠭᠦᠯᠪᠡ᠃ ᠭᠡᠪᠡᠴᠦ ᠨᠠᠰᠤ ᠰᠡᠭᠦᠳᠡᠷ ᠢᠳᠡ ᠳᠤᠮᠳᠠ ᠪᠠᠨ᠂ ᠲᠥᠷᠥᠭᠰᠡᠨ ᠪᠡᠶᠡ ᠶ᠋ᠢᠨ ᠬᠦᠴᠦ ᠴᠢᠳᠠᠯ ᠲᠡᠭᠦᠯᠳᠡᠷᠵᠢᠭᠰᠡᠨ ᠬᠠᠭᠠᠨ ᠵᠠᠮᠤᠬᠠ ᠬᠠᠷᠢᠭᠤ ᠥᠴᠢᠭᠰᠡᠨ ᠨᠢ᠄
— ᠥᠨᠳᠥᠷ ᠶᠡᠬᠡ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠪᠠᠨ ᠴᠢ ᠵᠠᠯᠠᠷᠠᠵᠤ᠂ ᠥᠷᠯᠥᠭ ᠶᠢᠰᠦᠨ ᠵᠠᠩᠵᠤᠨ ᠤ᠋ ᠴᠢᠨᠢ ᠲᠣᠭᠠ ᠪᠦᠷᠢᠨ ᠪᠠᠢᠬᠤ ᠳ᠋ᠤ᠌ ᠪᠢ ᠢᠯᠡᠭᠦᠳᠡᠬᠦ ᠪᠢᠵᠡ ᠠ᠋ ᠠᠨᠳᠠ ᠮᠢᠨᠢ! ᠴᠢᠮᠠ ᠳ᠋ᠤ᠌ ᠵᠠᠢ ᠲᠠᠯᠪᠢᠵᠤ ᠥᠭᠭᠦᠶᠡ!
ᠦᠨᠳᠦᠰᠦ ᠮᠥᠴᠢᠷ ᠪᠥᠬᠡᠲᠡᠢ ᠬᠣᠷᠬᠣᠨᠠᠭ ᠤ᠋ᠨ ᠰᠠᠭᠯᠠᠭᠠᠷ ᠮᠣᠳᠣ ᠰᠢᠭ᠋ ᠴᠡᠴᠡᠭᠯᠡᠨ ᠭᠠᠩᠬᠤᠵᠤ ᠶᠠᠪᠤᠭᠰᠠᠨ ᠶᠤᠮ ᠰᠠᠨ᠁ ᠦᠢᠯᠡ ᠶ᠋ᠢᠨ ᠬᠣᠩᠭᠣᠷ ᠰᠠᠯᠬᠢ ᠶ᠋ᠢ ᠮᠢᠨᠢ ᠶᠠᠮᠠᠷ ᠲᠩᠷᠢ ᠶ᠋ᠢᠨ ᠵᠠᠢᠷᠠᠩ ᠪᠥᠬᠡ ᠬᠥᠭᠡᠷᠭᠡᠳᠡᠭᠰᠡᠨ ᠢ᠋ ᠪᠦᠦ ᠮᠡᠳᠡ᠃ ᠠᠳᠬᠠᠭ ᠰᠠᠨᠠᠭᠠᠲᠤ ᠡᠮᠡ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠨᠢᠴᠤᠭᠰᠠᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠲᠠᠪᠢᠯᠠᠩ ᠵᠠᠶᠠᠭᠠᠨ ᠤ᠋ ᠬᠤᠪᠢ ᠲᠥᠭᠡᠷᠭᠡ ᠳ᠋ᠦ᠍ ᠤᠯᠠᠮ ᠪᠦᠷ ᠰᠢᠬᠠᠭᠳᠠᠭᠰᠠᠭᠠᠷ ᠬᠠᠭᠠᠨ ᠠᠨᠳᠠ ᠴᠢᠨᠦ ᠡᠮᠦᠨᠡ ᠬᠦᠷᠴᠦ ᠢᠷᠡᠯᠡ᠃ ᠠᠨᠳᠠ ᠮᠢᠨᠢ ᠴᠢ ᠪᠣᠯᠭᠣᠭᠠᠭᠲᠤᠨ!᠁
ᠲᠩᠷᠢ ᠳ᠋ᠦ᠍ ᠬᠣᠣᠰ ᠨᠠᠷᠠᠨ ᠮᠠᠨᠳᠤᠪᠠᠯ ᠭᠠᠵᠠᠷ ᠲᠤ᠌ ᠭᠠᠩ ᠪᠣᠯᠵᠤ ᠭᠠᠯ ᠰᠢᠳᠡᠨᠡ᠃ ᠮᠣᠩᠭᠣᠯ ᠳ᠋ᠤ᠌ ᠬᠣᠶᠠᠷ ᠬᠠᠭᠠᠨ ᠪᠠᠢᠪᠠᠯ ᠳᠠᠵᠢᠨ ᠰᠠᠮᠠᠭᠤᠨ ᠲᠠᠰᠤᠷᠠᠬᠤ ᠦᠭᠡᠢ᠃ ᠣᠯᠠᠨ ᠲᠡᠢᠨ ᠳ᠋ᠦ᠍ ᠣᠷᠣᠢᠯᠠᠨ ᠴᠢᠳᠠᠯ ᠬᠦᠴᠦᠨ ᠳ᠋ᠦ᠍ ᠬᠠᠷᠢᠭᠤᠯᠬᠤ ᠡᠷᠳᠦᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠳ᠋ᠤ᠌ ᠴᠢᠨᠦ ᠢᠯᠳᠦᠨ ᠦ᠌ ᠳᠣᠣᠷᠠ ᠶᠠᠪᠤᠵᠤ ᠪᠢ ᠬᠡᠵᠢᠶᠡ ᠴᠤ᠌ ᠴᠢᠳᠠᠬᠤ ᠦᠭᠡᠢ᠃ ᠨᠢᠭᠡᠨᠲᠡ ᠳᠡᠢᠯᠦᠭᠳᠡᠰᠢ ᠦᠭᠡᠢ ᠬᠦᠴᠦ ᠶ᠋ᠢ ᠣᠯᠤᠭᠰᠠᠨ ᠠᠨᠳᠠ ᠴᠢ ᠮᠢᠨᠦ ᠵᠠᠷᠯᠢᠭ ᠤ᠋ᠨ ᠳᠣᠣᠷᠠ ᠶᠠᠪᠤᠬᠤ ᠶ᠋ᠢ ᠪᠠᠰᠠ ᠲᠡᠪᠴᠢᠬᠦ ᠦᠭᠡᠢ᠃ ᠴᠢ ᠪᠣᠯ ᠲᠩᠷᠢ ᠶ᠋ᠢᠨ ᠪᠥᠬᠡ᠂ ᠰᠢᠳᠠᠷ ᠪᠠᠭᠠᠲᠤᠷ ᠤ᠋ᠳ ᠲᠤ᠌ ᠪᠠᠨ ᠲᠡᠳᠬᠦᠭᠳᠡᠭᠰᠡᠨ ᠴᠢᠩᠭᠢᠰ ᠬᠠᠭᠠᠨ᠃ ᠪᠢ ᠴᠢᠮᠠ ᠲᠠᠢ ᠵᠡᠷᠭᠡᠴᠡᠵᠦ ᠡᠷᠭᠦᠭᠳᠡᠭᠰᠡᠨ ᠬᠠᠮᠤᠭ ᠮᠣᠩᠭᠣᠯ ᠢ᠋ ᠵᠠᠬᠢᠷᠤᠭᠰᠠᠨ ᠬᠥᠷ ᠬᠠᠭᠠᠨ ᠵᠠᠮᠤᠬᠠ!᠁
ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠢᠯᠠᠯᠲᠠ ᠶ᠋ᠢᠨ ᠤᠤᠬᠠᠢ ᠪᠠᠷ ᠳᠠᠯᠠᠨ ᠪᠠᠯᠵᠢᠳ ᠲᠤ᠌ ᠴᠢᠮᠠᠶ᠋ᠢ ᠰᠢᠬᠠᠨ ᠰᠠᠨᠳᠤᠷᠭᠠᠵᠤ ᠶᠠᠪᠤᠭᠰᠠᠨ ᠳᠣᠮᠣᠭᠲᠤ ᠲᠡᠷᠡ ᠵᠠᠮᠤᠬᠠ ᠥᠨᠥᠳᠥᠷ ᠬᠠᠭᠠᠨ ᠠᠨᠳᠠ ᠴᠢᠨᠦ ᠲᠥᠯᠥᠭᠡ ᠣᠷᠴᠢᠯᠠᠩ ᠠ᠋ᠴᠠ ᠬᠠᠯᠢᠬᠤ ᠪᠠᠷ ᠰᠢᠢᠳᠦᠯᠡ᠃ ᠴᠢᠮᠠᠲᠤ ᠥᠨᠢ ᠡᠭᠦᠷᠢᠳᠡ ᠢᠲᠡᠭᠡᠭᠳᠡᠬᠦ ᠡᠢᠮᠦ ᠵᠠᠮ ᠢ᠋ ᠰᠣᠩᠭᠣᠯᠠ᠃
ᠳᠡᠭᠡᠷᠡ ᠲᠩᠷᠢ ᠳ᠋ᠦ᠍ ᠨᠠᠷᠠ ᠨᠢᠭᠡᠨ ᠪᠠᠢᠭ!
ᠳᠡᠯᠢᠭᠦᠨ ᠪᠣᠯᠳᠣᠭ ᠢ᠋ ᠭᠡᠢᠭᠦᠯᠬᠦ ᠰᠠᠷᠠ ᠨᠢᠭᠡᠨ ᠪᠠᠢᠭ!
ᠳᠡᠯᠡᠬᠡᠢ ᠭᠠᠵᠠᠷ ᠲᠤ᠌ ᠮᠠᠨᠢ ᠬᠠᠭᠠᠨ ᠪᠠᠰᠠ ᠨᠢᠭᠡᠨ ᠪᠠᠢᠭ!᠁
ᠥᠰᠬᠦ ᠨᠠᠰᠤᠨ ᠳ᠋ᠤ᠌ ᠪᠠᠨ ᠤᠨᠤᠨ ᠮᠥᠷᠡᠨ ᠦ᠌ ᠮᠥᠰᠥᠨ ᠳᠡᠭᠡᠷᠡ ᠱᠠᠭᠠᠯᠴᠠᠨ ᠨᠠᠭᠠᠳᠴᠤ
ᠡᠳᠦᠭᠡ ᠢᠳᠡᠷ ᠴᠠᠭ ᠲᠤ᠌ ᠪᠠᠨ ᠪᠦᠬᠦ ᠮᠣᠩᠭᠣᠯ ᠤ᠋ᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤ᠌ ᠬᠣᠯᠪᠣᠭᠳᠠᠭᠰᠠᠨ ᠴᠢ ᠪᠢᠳᠡ ᠬᠣᠶᠠᠷ ᠨᠢᠭᠡ ᠨᠠᠷᠠᠨ ᠤ᠋ ᠳᠣᠣᠷᠠ ᠪᠠᠭᠲᠠᠬᠤ ᠦᠭᠡᠢ ᠠ᠋᠃ ᠤᠴᠢᠷ ᠡᠢᠮᠦ ᠳ᠋ᠦ᠍᠂ ᠬᠣᠶᠠᠷ ᠶᠡᠬᠡ ᠬᠠᠭᠠᠨ᠂ ᠬᠣᠶᠠᠷ ᠶᠡᠬᠡ ᠪᠠᠭᠠᠲᠤᠷ᠂ ᠬᠣᠶᠠᠷ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠶᠣᠰᠣ ᠪᠠᠷ ᠡᠨᠡ ᠬᠡᠷᠡᠭ ᠢ᠋ ᠨᠢᠭᠡᠨ ᠲᠡᠢᠰᠢ ᠪᠣᠯᠭᠠᠶᠠ᠁ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢᠨ ᠰᠤᠤ ᠠᠯᠳᠠᠷ ᠢ᠋ ᠳᠠᠶᠠᠭᠠᠷ ᠮᠣᠩᠭᠣᠯ ᠮᠡᠳᠡᠨᠡ᠃ ᠡᠨᠡ ᠨᠡᠷᠡ ᠰᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠢᠨᠦ ᠬᠠᠭᠠᠨ ᠠᠯᠳᠠᠷ ᠢ᠋ ᠥᠨᠳᠥᠷ ᠲᠦ᠍ ᠡᠷᠭᠦᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠪᠢ ᠠᠮᠢ ᠪᠠᠨ ᠲᠡᠪᠴᠢᠶᠡ! ᠣᠯᠠᠨ ᠤ᠋ ᠰᠠᠨᠠᠭᠠ ᠪᠦᠦ ᠬᠣᠶᠠᠷᠳᠠᠭ᠃ ᠥᠯᠮᠡᠢ ᠡᠪᠦᠳᠦᠭ ᠳᠣᠣᠷᠠ ᠴᠢᠨᠢ ᠥᠪᠡᠷ ᠢ᠋ ᠪᠡᠨ ᠪᠢ ᠢᠪᠡᠵᠦ ᠥᠭᠭᠦᠶᠡ ᠬᠠᠭᠠᠨ ᠠᠨᠳᠠ ᠮᠢᠨᠢ! ᠴᠢᠨᠦ ᠨᠡᠷᠡ ᠤᠯᠠᠮ ᠠᠤᠭᠠ ᠪᠣᠯᠤᠭ! ᠬᠥᠷ ᠬᠠᠭᠠᠨ ᠵᠠᠮᠤᠬᠠ ᠥᠪᠡᠷ ᠢ᠋ᠶ᠋ᠡᠨ ᠴᠢᠮᠠ ᠳ᠋ᠤ᠌ ᠰᠥᠭᠥᠳᠦᠯᠡ ᠭᠡᠳᠡᠭ ᠢ᠋ ᠳᠤᠭᠤᠯᠤᠭᠠᠳ ᠬᠠᠮᠤᠭ ᠮᠣᠩᠭᠣᠯ᠂ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠴᠢᠨᠦ ᠠᠯᠳᠠᠷ ᠤᠷᠢᠳ ᠬᠣᠵᠢᠳ ᠦᠵᠡᠭᠳᠡᠭᠡ ᠦᠭᠡᠢ ᠪᠡᠷ ᠳᠠᠭᠤᠷᠢᠰᠬᠤ ᠪᠣᠯᠤᠨᠠ᠃
ᠨᠢᠭᠡᠳᠦᠭᠰᠡᠨ ᠶᠡᠬᠡ ᠭᠦᠷᠦᠨ ᠢ᠋ ᠨᠢᠭᠡ ᠭᠠᠷ ᠲᠤ᠌ ᠬᠣᠷᠢᠶᠠᠨ ᠵᠠᠬᠢᠷᠤᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ
ᠨᠢᠭᠡ ᠨᠢ ᠨᠥᠭᠴᠢᠵᠦ᠂ ᠨᠥᠭᠦᠭᠡ ᠨᠢ ᠬᠠᠭᠠᠴᠠᠶᠠ! ᠶᠢᠰᠦᠨ ᠬᠥᠬᠥᠯᠲᠦ ᠴᠠᠭᠠᠨ ᠲᠤᠭ᠂ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠤ᠋ ᠬᠠᠷᠠ ᠰᠦᠯᠳᠡ ᠳ᠋ᠦ᠍ ᠴᠢᠨᠢ ᠬᠣᠶᠠᠭᠤᠯᠠᠨ ᠳ᠋ᠤ᠌ ᠨᠢ ᠰᠥᠭᠥᠳᠦᠨ ᠭᠤᠶᠤᠶᠠ ᠬᠠᠭᠠᠨ ᠠᠨᠳᠠ ᠮᠢᠨᠢ! ᠴᠢ ᠨᠠᠮᠠ ᠶ᠋ᠢ ᠥᠷᠥᠰᠢᠶᠡ! ᠥᠷᠥᠰᠢᠶᠡᠬᠦ ᠳ᠋ᠦ᠍ ᠪᠡᠨ ᠴᠠᠭᠠᠵᠠᠯᠠᠵᠤ ᠥᠷᠥᠰᠢᠶᠡ!᠁ ᠪᠢ ᠴᠢᠮᠠ ᠲᠠᠢ ᠨᠥᠬᠥᠷᠯᠡᠶᠡ! ᠨᠥᠬᠥᠷᠯᠡᠬᠦ ᠳ᠋ᠦ᠍ ᠪᠡᠨ ᠦᠬᠦᠵᠦ ᠨᠥᠬᠥᠷᠯᠡᠶᠡ!᠁
ᠬᠦᠴᠦᠷᠬᠡᠭ ᠭᠦᠷᠦᠨ ᠥᠨᠢ ᠮᠥᠩᠬᠡ ᠣᠷᠣᠰᠢᠬᠤ ᠶ᠋ᠢ ᠪᠡᠯᠭᠡᠳᠡᠵᠦ ᠬᠠᠭᠠᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠤᠭ ᠰᠦᠯᠳᠡ ᠶ᠋ᠢ ᠴᠢᠨᠢ ᠲᠠᠬᠢᠶᠠ!᠁ ᠡᠵᠡᠨᠲᠦ ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠮᠢᠨᠦ ᠡᠷᠭᠦᠬᠦ ᠥᠴᠦᠬᠡᠨ ᠡᠨᠡ ᠬᠤᠪᠢ ᠪᠠᠭᠠᠳᠠᠬᠤ ᠤᠴᠢᠷ ᠦᠭᠡᠢ ᠶ᠋ᠢ ᠲᠩᠷᠢ ᠮᠡᠳᠡᠨᠡ᠃ ᠣᠳᠣ ᠴᠢᠮᠠ ᠶ᠋ᠢ ᠳᠡᠢᠯᠬᠦ ᠬᠦᠴᠦᠲᠡᠨ ᠭᠠᠵᠠᠷ ᠳᠡᠭᠡᠷᠡ ᠦᠭᠡᠢ ᠠ᠋! ᠴᠢᠨᠦ ᠪᠠᠭᠠᠲᠤᠷ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠮᠦᠨᠡ ᠶᠠᠭᠤ ᠴᠤ᠌ ᠳᠠᠰᠤᠨ ᠲᠡᠪᠴᠢᠵᠦ ᠴᠢᠳᠠᠬᠤ ᠦᠭᠡᠢ᠃
ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠬᠠᠳᠬᠤᠯᠳᠤᠬᠤ ᠶ᠋ᠢ ᠰᠠᠨᠠᠭᠠᠷᠬᠠᠪᠠᠯ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠲᠠᠬᠢᠷ ᠰᠡᠯᠡᠮᠡ ᠪᠡᠷ ᠳᠡᠯᠡᠬᠡᠢ ᠳᠠᠢᠳᠤ ᠶ᠋ᠢ ᠨᠤᠮᠤᠯᠠᠨ ᠬᠡᠮᠵᠢᠭᠲᠦᠨ! ᠳᠣᠷᠣᠨᠠ ᠵᠦᠭ ᠲᠦ᠍ ᠨᠠᠷᠠᠨ ᠬᠠᠮᠢᠭᠠ ᠠ᠋ᠴᠠ ᠮᠠᠨᠳᠤᠳᠠᠭ ᠢ᠋ ᠣᠴᠢᠵᠤ ᠦᠵᠡᠭᠲᠦᠨ! ᠥᠷᠥᠨᠡ ᠵᠦᠭ ᠲᠦ᠍ ᠨᠠᠷᠠ ᠬᠠᠮᠢᠭᠠ ᠰᠢᠩᠭᠡᠳᠡᠭ ᠢ᠋ ᠬᠦᠷᠴᠦ ᠮᠡᠳᠡᠭᠲᠦᠨ!
ᠪᠠᠰᠠ᠂ ᠶᠡᠬᠡ ᠲᠥᠷᠥ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠬᠡᠷᠡᠭ ᠢ᠋ ᠡᠮᠡᠰ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠲᠡᠢ ᠬᠤᠳᠬᠤᠯᠳᠤᠨ ᠵᠥᠪᠰᠢᠭᠴᠢ ᠨᠠᠳᠠ ᠪᠠᠷ ᠲᠡᠭᠦᠰᠬᠡᠯ ᠪᠣᠯᠤᠭ! ᠡᠨᠡ ᠮᠥᠴᠡ ᠡᠴᠡ ᠬᠣᠢᠰᠢ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢᠨ ᠠᠯᠳᠠᠷ᠂ ᠤᠷᠪᠠᠨ ᠲᠡᠷᠰᠯᠡᠭᠴᠢ ᠬᠡᠨ ᠢ᠋ ᠴᠤ᠌ ᠪᠣᠯᠪᠠ ᠲᠥᠷᠥ ᠶ᠋ᠢᠨ ᠴᠡᠭᠡᠷᠯᠡᠯ ᠴᠠᠭᠠᠵᠠ ᠦᠯᠦ ᠲᠣᠭᠣᠷᠢᠬᠤ ᠶ᠋ᠢᠨ ᠬᠠᠤᠯᠢ ᠪᠣᠯᠤᠭ! ᠥᠴᠢᠬᠦ ᠥᠴᠢᠯ ᠮᠢᠨᠢ ᠭᠦᠢᠴᠡᠯᠡ᠃ ᠬᠠᠭᠠᠨ ᠠᠨᠳᠠ ᠮᠢᠨᠢ᠂ ᠥᠰᠢᠶᠡ ᠬᠣᠷᠣᠰᠤᠯ ᠪᠤᠴᠠᠯᠤᠭᠰᠠᠨ ᠬᠠᠮᠤᠭ ᠤ᠋ᠨ ᠪᠡᠷᠬᠡ ᠴᠠᠭ ᠲᠤ᠌ ᠴᠤ᠌ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠰᠦ ᠴᠢᠰᠤ ᠦᠭᠡᠢ ᠪᠠᠢᠭᠰᠠᠨ ᠢ᠋ ᠰᠠᠨᠠᠵᠤ ᠴᠢᠰᠤ ᠭᠠᠷᠭᠠᠯ ᠦᠭᠡᠢ ᠪᠡᠷ ᠨᠠᠮᠠ ᠶ᠋ᠢ ᠠᠯᠠᠭᠤᠯᠤᠭᠲᠤᠨ! ᠦᠳᠲᠡᠷ ᠲᠦᠷᠭᠡᠨ ᠲᠣᠨᠢᠯᠭᠠᠭᠲᠤᠨ! ᠲᠡᠦᠬᠡ ᠶ᠋ᠢᠨ ᠬᠦᠷᠳᠦ ᠰᠠᠭᠠᠳ ᠲᠣᠳᠬᠠᠷ ᠦᠭᠡᠢ ᠣᠷᠴᠢᠭ! ᠬᠡᠪᠡᠢ᠃
ᠴᠢᠩᠭᠢᠰ ᠬᠠᠭᠠᠨ ᠬᠡᠰᠡᠭ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠡᠷᠭᠦᠵᠦ ᠰᠢᠳᠠᠷ ᠬᠥᠮᠦᠰ ᠢ᠋ᠶ᠋ᠡᠨ ᠳᠠᠭᠤᠳᠠᠨ ᠵᠠᠷᠯᠢᠭ ᠪᠣᠯᠭᠠᠪᠠ᠃
— ᠬᠠᠭᠠᠨ ᠴᠢᠩᠭᠢᠰ ᠦ᠋ᠨ ᠵᠠᠷᠯᠢᠭ ᠪᠢᠰᠢ ᠭᠡᠳᠡᠭ ᠢ᠋ ᠮᠥᠩᠬᠡ ᠲᠩᠷᠢ ᠰᠣᠶᠣᠷᠬᠠᠲᠤᠭᠠᠢ! ᠪᠠᠭᠠᠲᠤᠷ ᠵᠠᠮᠤᠬᠠ ᠶ᠋ᠢᠨ ᠰᠡᠭᠦᠯᠴᠢ ᠶ᠋ᠢᠨ ᠥᠴᠢᠯ ᠭᠡᠷᠢᠶᠡᠰ ᠢ᠋ ᠪᠡᠶᠡᠯᠡᠭᠦᠯᠵᠦ ᠴᠢᠰᠤ ᠭᠠᠷᠭᠠᠯ ᠦᠭᠡᠢ ᠦᠬᠦᠭᠦᠯᠦᠭᠲᠦᠨ! ᠠᠨᠳᠠ ᠳ᠋ᠤ᠌ ᠪᠠᠨ ᠪᠡᠯᠡᠭᠯᠡᠭᠰᠡᠨ ᠠᠯᠲᠠᠨ ᠪᠦᠰᠡ ᠶ᠋ᠢ ᠮᠢᠨᠢ ᠪᠦᠰᠡᠯᠡᠭᠦᠯᠵᠦ᠁ ᠠᠷᠭᠤᠮᠠᠭ ᠰᠠᠢᠬᠠᠨ ᠬᠦᠯᠦᠭ ᠢ᠋ᠶ᠋ᠡᠷ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢ ᠲᠠᠬᠢᠵᠤ᠂ ᠠᠭᠰᠠᠬᠤ ᠵᠡᠪᠰᠡᠭ ᠬᠤᠶᠠᠭ ᠳᠤᠭᠤᠯᠠᠭᠠ ᠶ᠋ᠢ ᠨᠢ ᠠᠰᠠᠭᠠᠨ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠨ ᠶᠣᠰᠣ ᠪᠠᠷ ᠣᠷᠣᠰᠢᠭᠤᠯᠤᠭᠲᠤᠨ! ᠡᠷᠡ ᠬᠥᠮᠦᠨ ᠨᠥᠬᠥᠷᠯᠡᠬᠦ ᠳ᠋ᠦ᠍ ᠬᠠᠳᠠ ᠴᠢᠯᠠᠭᠤ ᠬᠠᠢᠯᠵᠤ ᠤᠷᠤᠰᠴᠤ ᠴᠤ᠌ ᠪᠣᠯᠳᠠᠭ ᠢ᠋ ᠡᠷᠡ ᠬᠥᠮᠦᠨ ᠡᠪᠳᠡᠷᠡᠬᠦ ᠳ᠋ᠦ᠍ ᠬᠠᠨ ᠲᠩᠷᠢ ᠬᠠᠭᠠᠷᠠᠵᠤ ᠴᠣᠭᠣᠷᠠᠵᠤ ᠴᠤ᠌ ᠪᠣᠯᠳᠠᠭ ᠢ᠋ ᠲᠦᠮᠡᠨ ᠦᠶᠡ ᠰᠠᠨᠠᠲᠤᠭᠠᠢ! ᠡᠢᠨ ᠬᠦ᠌ ᠠᠢᠯᠠᠳᠤᠨ ᠡᠷᠭᠢᠬᠦ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠪᠤ ᠲᠣᠪᠣᠬᠠᠨ ᠪᠤᠭᠤᠷᠤᠯ ᠰᠠᠭᠤᠭᠰᠠᠨ᠂ ᠠᠷᠠᠮᠠᠭ ᠲᠠᠷᠠᠮᠠᠭ ᠰᠠᠬᠠᠯ ᠳᠡᠭᠡᠷᠡ ᠨᠢᠯᠪᠤᠰᠤᠨ ᠳᠤᠰᠤᠯ ᠭᠢᠯᠲᠠᠭᠠᠨᠠᠪᠠ᠃
ᠬᠠᠭᠠᠳ ᠤ᠋ᠨ ᠵᠠᠷᠯᠢᠭ ᠶᠣᠰᠣᠭᠠᠷ ᠪᠣᠯᠵᠤ᠂ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠪᠡ᠃
᠁ ᠨᠠᠢ᠍ᠮᠠᠨ ᠵᠠᠭᠤᠨ ᠤ᠋ ᠲᠡᠷᠲᠡᠭᠡᠬᠢ ᠵᠠᠮᠤᠬᠠ ᠶ᠋ᠢᠨ ᠱᠠᠷᠢᠯ ᠳᠡᠭᠡᠭᠦᠷ ᠡᠬᠡ ᠨᠤᠲᠤᠭ ᠤ᠋ᠨ ᠨᠣᠶᠠᠨ ᠰᠠᠯᠬᠢ ᠭᠤᠨᠢᠭᠲᠠᠢᠬᠠᠨ ᠬᠡᠰᠦᠭᠦᠯᠴᠢᠯᠡᠵᠦ ᠨᠥᠬᠥᠷ ᠦ᠋ᠨ ᠲᠤᠬᠠᠢ ᠦᠭᠡᠰ ᠢ᠋ ᠬᠢᠯᠭᠠᠨᠠ ᠶ᠋ᠢᠨ ᠪᠤᠲᠠᠨ ᠳ᠋ᠤ᠌ ᠰᠢᠪᠡᠨᠡᠨ ᠡᠷᠢᠨ ᠵᠠᠭᠤᠨ ᠳ᠋ᠤ᠌ ᠢᠯᠡᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠥᠬᠡ ᠮᠣᠩᠭᠣᠯ
ᠦᠰᠦᠭ ᠬᠢᠨᠠᠭᠴᠢ᠄ ᠰᠢᠯᠤᠭᠤᠨ ᠪᠠᠭ