ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠳᠥᠴᠢᠨ ᠨᠠᠢ᠍ᠮᠠᠳᠤᠭᠠᠷ ᠪᠦᠯᠦᠭ > Хөх судар - Инжинаш < Дөчин наймдугаар бүлэг >
320ᠳᠥᠷᠪᠡᠨ ᠬᠠᠷᠢ ᠲᠠᠪᠤᠨ ᠥᠩᠭᠡ ᠤᠯᠤᠰ ᠢ᠋ ᠠᠷᠪᠠᠨ ᠠᠩᠭᠢ ᠬᠤᠪᠢᠶᠠᠵᠤ ᠦᠯᠡᠳᠡᠭᠡᠪᠡ
ᠭᠤᠷᠪᠠᠨ ᠬᠦᠩ ᠵᠢᠷᠭᠤᠭᠠᠨ ᠴᠢᠩ ᠰᠠᠢᠳ ᠢ᠋ ᠶᠢᠰᠦᠨ ᠥᠷᠯᠥᠭ ᠬᠤᠷᠢᠮᠯᠠᠵᠤ ᠥᠭᠦᠯᠡᠯᠳᠦᠪᠡ
ᠤᠯᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠣᠨ᠂ ᠰᠥᠩ ᠤᠯᠤᠰ ᠤ᠋ᠨ
ᠨᠢᠩᠽᠦ᠋ᠩ ᠦ᠋ᠨ ᠵᠢᠶᠠ ᠳ᠋ᠢᠩ ᠦ᠋ᠨ ᠶᠢᠰᠦᠳᠦᠭᠡᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠢᠤᠸᠠᠨᠽᠦ᠋ᠩ ᠦ᠋ᠨ ᠵᠧᠨ ᠢᠦ ᠶ᠋ᠢᠨ
ᠳᠥᠷᠪᠡᠳᠦᠭᠡᠷ ᠣᠨ᠂ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠡᠨᠡ ᠵᠢᠯ ᠲᠠᠪᠢᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠡᠢ ᠂ ᠡᠨᠡ ᠪᠦᠯᠦᠭ ᠡᠴᠡ ᠬᠣᠢᠰᠢ
ᠮᠣᠩᠭᠣᠯ ᠤ᠋ᠨ ᠬᠡᠷᠡᠭ ᠮᠠᠰᠢ ᠣᠯᠠᠨ ᠪᠣᠯᠤᠭᠰᠠᠨ ᠲᠤᠯᠠ ᠤᠷᠢᠳᠠ ᠠᠳᠠᠯᠢ ᠨᠠᠷᠢᠪᠴᠢᠯᠠᠨ ᠲᠣᠭᠠᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠ᠃
ᠳᠥᠷᠪᠡᠨ ᠬᠠᠷᠢ ᠲᠠᠪᠤᠨ ᠥᠩᠭᠡ ᠤᠯᠤᠰ ᠢ᠋ ᠠᠷᠪᠠᠨ ᠠᠩᠭᠢ ᠬᠤᠪᠢᠶᠠᠵᠤ ᠦᠯᠡᠳᠡᠭᠡᠪᠡ
ᠭᠤᠷᠪᠠᠨ ᠬᠦᠩ ᠵᠢᠷᠭᠤᠭᠠᠨ ᠴᠢᠩ ᠰᠠᠢᠳ ᠢ᠋ ᠶᠢᠰᠦᠨ ᠥᠷᠯᠥᠭ ᠬᠤᠷᠢᠮᠯᠠᠵᠤ ᠥᠭᠦᠯᠡᠯᠳᠦᠪᠡ
ᠲᠡᠨᠳᠡᠴᠡ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠪᠠᠷᠰ ᠴᠠᠭ ᠲᠤᠷ ᠬᠠᠭᠠᠨ ᠳᠡᠭᠡᠭᠰᠢᠯᠡᠬᠦᠶᠡ᠂
ᠲᠦᠮᠡᠨ ᠤᠯᠤᠰ ᠲᠥᠷᠥ ᠳᠦᠭᠦᠷᠡᠩ ᠬᠤᠷᠠᠵᠤ ᠮᠥᠷᠭᠥᠷᠡ ᠢᠷᠡᠪᠡ᠂
ᠲᠥᠪ ᠵᠠᠭᠤᠨ ᠲᠦᠰᠢᠮᠡᠯ ᠬᠤᠨᠳᠠᠭᠠ ᠶ᠋ᠢ ᠶᠡᠨᠳᠡᠷ ᠦ᠋ᠨ ᠳᠣᠣᠷᠠ ᠪᠠᠷᠢᠪᠠ᠂
ᠲᠥᠷᠥ ᠶ᠋ᠢᠨ ᠰᠢᠪᠠᠭᠠ ᠵᠠᠯᠭᠠᠯᠳᠤᠨ ᠬᠠᠰᠬᠢᠷᠴᠤ ᠥᠩᠭᠡᠷᠡᠨ ᠭᠠᠷᠴᠤ ᠡᠴᠢᠬᠦᠶᠡ
ᠲᠦᠰᠢᠮᠡᠯ ᠲᠦᠰᠢᠶᠡ ᠸᠠᠩ ᠰᠠᠢᠳ ᠤ᠋ᠳ ᠬᠡᠳᠦᠢᠨᠡᠢ ᠴᠢᠭᠤᠯᠤᠨ ᠢᠷᠡᠪᠡ᠃
ᠠᠯᠲᠠᠨ ᠤ᠋ ᠵᠤᠯᠠ ᠬᠢᠯᠢᠰ ᠭᠠᠯᠢᠰ ᠳᠥᠷᠪᠡᠨ ᠵᠦᠭ ᠡᠴᠡ ᠬᠤᠷᠠᠵᠤ
ᠠᠭᠠᠷᠤ ᠬᠦᠵᠢᠰ ᠦ᠋ᠨ ᠦᠨᠦᠷ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠶ᠋ᠢ ᠳᠣᠭᠳᠣᠯᠤᠭᠤᠯᠤᠮᠤᠢ᠂
ᠠᠷᠴᠢᠵᠤ ᠡᠯᠡᠭᠰᠡᠨ ᠬᠠᠰ ᠶᠡᠨᠳᠡᠷ ᠲᠣᠷ ᠲᠠᠵᠢ ᠮᠠᠩᠨᠤᠭ ᠮᠢᠷᠠᠯᠵᠠᠵᠤ
ᠠᠷᠢᠯᠭᠠᠵᠤ ᠱᠦᠭᠦᠷᠳᠡᠭᠰᠡᠨ ᠭᠡᠷᠡᠯᠲᠦ ᠭᠠᠵᠠᠷᠠ ᠰᠠᠢᠳ ᠲᠦᠰᠢᠮᠡᠳ ᠬᠤᠷᠠᠯᠴᠠᠮᠤᠢ᠂
ᠠᠯᠭᠤᠷ ᠮᠡᠳᠡᠭᠡᠴᠢᠯᠡᠬᠦ ᠲᠠᠪᠤᠳᠤᠭᠠᠷ ᠰᠢᠪᠠᠭᠠ ᠱᠣᠪᠨᠠᠨ ᠬᠦᠷᠴᠦ ᠢᠷᠡᠮᠡᠭᠴᠡ
ᠠᠯᠲᠠᠨ ᠵᠦᠩ ᠬᠠᠰ ᠴᠢᠩ ᠬᠠᠮᠲᠤ ᠪᠠᠷ ᠳᠠᠭᠤᠨ ᠭᠠᠷᠭᠠᠭᠠᠳ᠂
ᠠᠯᠤᠰ ᠬᠣᠯᠠ ᠬᠦᠷᠡᠯ ᠬᠡᠩᠭᠡᠷᠭᠡ ᠶᠡᠬᠡ ᠬᠠᠷᠰᠢ ᠳ᠋ᠤᠷ ᠬᠥᠩᠭᠡᠷᠢᠰᠦᠨ
ᠠᠯᠢ ᠪᠠᠷ ᠲᠡᠭᠷᠢ ᠶ᠋ᠢᠨ ᠬᠥᠭᠵᠢᠮ ᠶᠢᠰᠦᠨ ᠳᠠᠪᠬᠤᠷ ᠲᠤᠷ ᠡᠬᠢᠯᠡᠮᠦᠢ
ᠬᠠᠭᠠᠨ ᠤ᠋ ᠲᠠᠰᠢᠭᠤᠷ ᠭᠤᠷᠪᠠᠨᠲᠠ ᠳᠠᠭᠤᠷᠢᠰᠴᠤ ᠢᠪ ᠴᠢᠪ ᠪᠣᠯᠣᠮᠠᠭᠴᠠ
ᠬᠠᠩᠭᠢᠨᠠᠨ ᠴᠢᠩᠭᠢᠨᠠᠨ ᠪᠢᠯᠠᠷ ᠪᠢᠰᠬᠢᠭᠦᠷ ᠣᠷᠳᠣᠨ ᠳᠦᠭᠦᠷᠡᠩ ᠳᠠᠭᠤᠷᠢᠰᠤᠨ᠂
ᠬᠠᠷᠠᠩᠭᠤᠢ ᠭᠠᠵᠠᠷᠠ ᠣᠳᠣᠨ ᠵᠡᠷᠭᠡᠯᠡᠵᠦ ᠯᠤᠤ ᠶ᠋ᠢᠨ ᠭᠡᠷᠡᠯ ᠭᠡᠢᠮᠡᠭᠴᠡ
ᠬᠠᠮᠤᠭ ᠢ᠋ ᠡᠵᠡᠯᠡᠭᠰᠡᠨ ᠪᠣᠭᠳᠠ ᠬᠠᠭᠠᠨ ᠵᠠᠯᠠᠷᠠᠨ ᠪᠠᠭᠤᠵᠤ ᠭᠠᠷᠪᠠ᠂
ᠣᠯᠠᠨ ᠲᠦᠰᠢᠮᠡᠳ ᠲᠦᠰᠢᠶᠡ ᠬᠡᠪᠴᠢᠶᠡᠨ ᠲᠡᠮᠳᠡᠭ ᠢ᠋ ᠳᠠᠭᠠᠵᠤ
ᠤᠷᠤᠭ᠍ᠰᠢ ᠰᠥᠭᠥᠳᠴᠦ ᠮᠥᠷᠭᠥᠵᠦ ᠶᠣᠰᠣᠯᠠᠬᠤᠶᠠ ᠢᠮᠡᠭᠡ ᠴᠢᠮᠡᠭᠡ ᠦᠭᠡᠢ᠂
ᠤᠷᠲᠤ ᠬᠣᠢᠲᠤ ᠭᠤᠷᠪᠠ ᠭᠤᠷᠪᠠᠨ ᠶᠢᠰᠦᠨ ᠵᠡᠷᠭᠡ ᠶᠣᠰᠣᠯᠠᠨ ᠮᠥᠷᠭᠥᠭᠡᠳ
ᠤᠷᠲᠤ ᠥᠯᠵᠡᠢᠲᠦ ᠲᠦᠮᠡᠨ ᠨᠠᠰᠤᠲᠤ ᠲᠦᠮᠡᠨ ᠨᠠᠰᠤᠲᠤ ᠬᠡᠮᠡᠪᠡ᠃
ᠬᠠᠭᠠᠨ ᠤ᠋ ᠭᠡᠭᠡᠨ ᠳᠠᠭᠠᠯᠳᠤᠭᠠ ᠵᠠᠯᠠᠷᠠᠨ ᠭᠠᠷᠴᠤ ᠨᠠᠢ᠍ᠮᠠᠨ ᠰᠢᠮᠡ ᠲᠠᠪᠤᠨ ᠠᠮᠲᠠᠨ ᠳ᠋ᠤᠷ ᠪᠦᠷᠢᠳᠬᠡᠨ ᠡᠷᠭᠦᠵᠦ ᠶᠣᠰᠣᠯᠠᠨ ᠮᠥᠷᠭᠥᠵᠦ᠂ ᠡᠭᠡᠨ ᠣᠷᠣᠵᠤ ᠢᠷᠡᠭᠡᠳ ᠲᠠᠢᠬᠡᠦ ᠳ᠋ᠦ᠍ᠷ ᠪᠡᠯᠭᠡᠯᠡᠨ ᠮᠥᠷᠭᠥᠵᠦ᠂ ᠰᠠᠶᠢ ᠶᠡᠬᠡ ᠬᠠᠷᠰᠢ ᠳ᠋ᠤᠷ ᠲᠦᠮᠡᠨ ᠤᠯᠤᠰ ᠢ᠋ ᠴᠠᠭᠠᠯᠠᠬᠤ ᠥᠷᠯᠥᠭᠡ ᠶ᠋ᠢᠨ ᠶᠣᠰᠣᠭᠠᠷ ᠪᠠᠶᠠᠰᠬᠤᠯᠠᠩ ᠤ᠋ᠨ ᠬᠤᠷᠢᠮ ᠬᠤᠷᠢᠮᠯᠠᠬᠤᠶᠠ᠂ ᠤᠯᠠᠭᠠᠨ ᠨᠠᠷᠠᠨ ᠵᠡᠭᠦᠨ ᠣᠭᠲᠠᠷᠭᠤᠢ ᠳ᠋ᠤᠷ ᠮᠠᠨᠨᠳᠤᠮᠠᠭᠴᠠ ᠤᠯᠤᠰ ᠤ᠋ᠨ ᠡᠵᠡᠨ ᠳᠣᠲᠣᠭᠠᠳᠤ ᠣᠷᠳᠣᠨᠠ ᠵᠠᠯᠠᠷᠠᠭᠠᠳ ᠣᠯᠠᠨ ᠲᠦᠰᠢᠮᠡᠳ ᠲᠥᠷᠥ ᠡᠴᠡ ᠪᠠᠭᠤᠵᠤ ᠤᠰᠤᠨ ᠤᠷᠤᠰᠴᠤ ᠡᠭᠦᠯᠡᠨ ᠨᠡᠭᠦᠬᠦ ᠠᠳᠠᠯᠢ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠲᠠᠷᠬᠠᠯᠴᠠᠵᠤ᠂ ᠥᠪᠡᠷ ᠥᠪᠡᠷ ᠦ᠋ᠨ ᠭᠡᠷ ᠦ᠋ᠨ ᠶᠠᠪᠤᠳᠠᠯ ᠢ᠋ ᠲᠡᠭᠦᠰᠬᠡᠵᠦ᠂ ᠯᠤᠤ ᠴᠠᠭ ᠲᠤᠷ ᠡᠷᠭᠦᠮᠵᠢᠯᠡᠬᠦ ᠬᠤᠷᠢᠮ ᠤ᠋ᠨ ᠵᠦᠩ ᠬᠡᠩᠭᠡᠷᠭᠡ ᠳᠠᠭᠤᠷᠢᠰᠴᠤ ᠵᠠᠭᠤᠨ ᠲᠦᠰᠢᠮᠡᠳ ᠯᠤᠤ ᠶ᠋ᠢᠨ ᠬᠠᠷᠰᠢ ᠳ᠋ᠤᠷ ᠭᠠᠷᠴᠤ ᠪᠣᠭᠳᠠ ᠡᠵᠡᠨ ᠡᠷᠳᠡᠨᠢ ᠶ᠋ᠢᠨ ᠰᠠᠭᠤᠷᠢᠨ ᠳ᠋ᠤᠷ ᠵᠠᠯᠠᠷᠠᠨ ᠰᠠᠭᠤᠵᠤ᠂ ᠵᠠᠭᠤᠨ ᠲᠦᠰᠢᠮᠡᠳ ᠮᠥᠷᠭᠥᠵᠦ ᠳᠠᠭᠤᠰᠤᠭᠰᠠᠨ ᠬᠣᠢᠨᠠ᠂ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ :《ᠣᠷᠴᠢᠯᠠᠩ ᠤ᠋ᠨ ᠬᠣᠭᠣᠷᠣᠨᠳᠣ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠬᠣᠴᠢ ᠦᠭᠡᠢ ᠣᠢᠷᠠ ᠢᠨᠠᠭ ᠬᠡᠮᠡᠭᠴᠢ ᠡᠴᠢᠭᠡ ᠡᠬᠡ ᠲᠣᠯᠣᠭᠠᠢ ᠲᠡᠷᠢᠭᠦᠨ᠂ ᠠᠬᠠ ᠳᠡᠭᠦᠦ ᠬᠡᠮᠡᠭᠴᠢ ᠭᠠᠷ ᠬᠥᠯ᠂ ᠡᠮᠡ ᠦᠷᠡ ᠬᠡᠮᠡᠭᠴᠢ ᠳᠡᠪᠡᠯ ᠬᠤᠪᠴᠠᠳ᠂ ᠰᠠᠢᠳ ᠲᠦᠰᠢᠮᠡᠳ ᠬᠡᠮᠡᠭᠴᠢ ᠬᠤᠶᠠᠭ ᠳᠤᠭᠤᠯᠠᠭᠠ ᠵᠠᠷ ᠵᠡᠪᠰᠡᠭ ᠮᠡᠲᠦ ᠪᠤᠶᠤ᠃ ᠡᠨᠡ ᠡᠳᠦᠷ ᠪᠢ ᠬᠥᠮᠦᠨ ᠦ᠌ ᠡᠰᠢ ᠶ᠋ᠢᠨ ᠶᠣᠰᠣ ᠪᠠᠷ ᠡᠬᠢᠯᠡᠨ ᠢᠯᠭᠠᠰᠤᠭᠠᠢ : ᠲᠡᠷᠢᠭᠦᠨ ᠳ᠋ᠦ᠍ᠷ ᠮᠢᠨᠦ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠪᠠᠢᠳᠠᠯ ᠳᠦᠷᠰᠦ ᠶ᠋ᠢ ᠠᠯᠲᠠᠨ ᠢ᠋ᠶ᠋ᠠᠷ ᠪᠦᠲᠦᠭᠡᠵᠦ ᠲᠡᠢ ᠮᠢᠶᠣᠤ ᠳ᠋ᠤᠷ ᠳᠠᠬᠢ᠂ ᠵᠢᠴᠢ ᠮᠢᠨᠦ ᠡᠬᠡ ᠲᠠᠢᠬᠡᠦ ᠨᠠᠰᠤᠨ ᠰᠡᠭᠦᠳᠡᠷ ᠳᠠᠯᠠᠨ ᠳᠣᠯᠣᠭᠠᠨ ᠳ᠋ᠤᠷ ᠬᠦᠷᠴᠦ ᠰᠡᠭᠦᠳᠡᠷ ᠮᠠᠰᠢ ᠥᠨᠳᠥᠷ ᠪᠣᠯᠤᠭᠰᠠᠨ ᠲᠤᠯᠠ ᠶᠡᠬᠡ ᠬᠦᠦ ᠡᠴᠡ ᠰᠢᠷᠠ ᠠᠯᠲᠠᠨ ᠮᠢᠩᠭᠠᠨ ᠯᠠᠩ᠂ ᠴᠠᠭᠠᠨ ᠮᠥᠩᠭᠥᠨ ᠲᠦᠮᠡᠨ ᠯᠠᠩ᠂ ᠵᠣᠳᠣᠩ ᠪᠥᠰ ᠠᠷᠪᠠᠨ ᠲᠦᠮᠡᠨ ᠬᠡᠰᠡᠭ᠂ ᠮᠢᠨᠦ ᠬᠠᠷᠢᠶᠠᠲᠤ ᠨᠠᠢ᠍ᠮᠠᠨ ᠵᠠᠭᠤᠨ ᠶᠡᠷᠡᠨ ᠬᠣᠶᠠᠷ ᠬᠣᠲᠠ ᠪᠠᠯᠭᠠᠳ ᠤ᠋ᠨ ᠰᠠᠩ ᠬᠥᠮᠥᠷᠭᠡ ᠶ᠋ᠢ ᠨᠡᠭᠡᠭᠡᠵᠦ ᠭᠠᠷᠭᠠᠨ᠂ ᠮᠢᠨᠦ ᠬᠠᠷᠢᠶᠠᠲᠤ ᠤᠯᠤᠰ ᠤ᠋ᠨ ᠵᠢᠷᠠᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢ ᠳ᠋ᠦ᠍ᠷ ᠳᠠᠩ ᠬᠤᠪᠢ᠂ ᠳᠠᠯᠠᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢ ᠳ᠋ᠦ᠍ᠷ ᠳᠠᠪᠬᠤᠷ ᠬᠤᠪᠢ᠂ ᠨᠠᠶᠠᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢ ᠳ᠋ᠦ᠍ᠷ ᠭᠤᠷᠪᠠᠨ ᠬᠤᠪᠢ᠂ ᠶᠡᠷᠡᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢ ᠳ᠋ᠦ᠍ᠷ ᠳᠥᠷᠪᠡᠨ ᠬᠤᠪᠢ᠂ ᠵᠠᠭᠤᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢᠳᠡ ᠲᠠᠪᠤᠨ ᠬᠤᠪᠢ᠂ ᠨᠢᠭᠡᠨ ᠵᠠᠭᠤᠨ ᠠᠷᠪᠠᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢᠳᠡ ᠶ᠋ᠢ ᠨᠠᠳᠠ ᠳ᠋ᠤᠷ ᠪᠠᠷᠠᠳᠠᠭᠤᠯ᠂ ᠥᠪᠡᠷᠮᠢᠴᠡ ᠱᠠᠩᠨᠠᠮᠤᠢ᠃ ᠨᠢᠭᠡᠨ ᠵᠠᠭᠤᠨ ᠬᠣᠷᠢᠨ ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢᠳᠡ ᠶ᠋ᠢ ᠣᠯᠤᠮᠠᠭᠴᠠ ᠤᠷᠢᠳᠠ ᠤᠯᠤᠰ ᠤ᠋ᠨ ᠭᠦᠸᠧ ᠯᠤᠤ ᠴᠣᠯᠠ ᠡᠷᠭᠦᠵᠦ᠂ ᠲᠠᠶᠠᠭ ᠲᠤᠯᠤᠭᠤᠯᠤᠨ ᠨᠠᠳᠠ ᠳ᠋ᠤᠷ ᠪᠠᠷᠠᠳᠠᠭᠤᠯ᠂ ᠥᠪᠡᠷᠡ ᠡᠷᠭᠦᠮᠵᠢᠯᠡᠯ ᠪᠣᠢ᠃ ᠬᠡᠷᠪᠡ ᠡᠭᠦᠨ ᠡᠴᠡ ᠳᠠᠪᠠᠭ᠍ᠰᠠᠳ ᠠᠪᠠᠰᠤ ᠴᠥᠮ ᠰᠡᠦᠬᠡ ᠳ᠋ᠦ᠍ᠷ ᠰᠠᠭᠤᠯᠭᠠᠨ ᠳᠠᠮᠨᠠᠨ ᠢᠷᠡᠭᠦᠯᠵᠦ ᠪᠠᠷᠠᠳᠠᠭᠤᠯ᠂ ᠠᠩᠭᠢᠳᠠ ᠢᠯᠭᠠᠯ ᠪᠣᠢ᠃ ᠡᠨᠡ ᠬᠦ᠌ ᠨᠢᠭᠡᠨ ᠨᠢᠭᠡᠨ ᠬᠤᠪᠢ ᠳ᠋ᠤᠷ ᠨᠢᠭᠡᠨ ᠯᠠᠩ ᠮᠥᠩᠭᠥ ᠨᠢᠭᠡᠨ ᠲᠣᠯᠣᠭᠠᠢ ᠪᠥᠰ ᠠᠷᠪᠠᠨ ᠰᠠᠭᠤᠯᠠᠭᠠ ᠠᠮᠤ ᠶ᠋ᠢ ᠬᠡᠮᠵᠢᠶᠡ ᠪᠣᠯᠭᠠ᠂ ᠨᠠᠶᠠᠨ ᠨᠠᠰᠤᠨ ᠭᠠᠷᠤᠭᠰᠠᠨ ᠳ᠋ᠤᠷ ᠰᠢᠷᠠ ᠠᠯᠲᠠᠨ ᠨᠢᠭᠡᠨ ᠴᠢᠨ ᠨᠡᠮᠡᠵᠦ ᠥᠭ᠂ ᠡᠭᠦᠨ ᠦ᠌ ᠳᠣᠲᠣᠷᠠ ᠬᠡᠷᠪᠡ ᠬᠣᠪᠳᠣᠭ ᠠᠷᠠᠳ ᠨᠠᠰᠤ ᠥᠰᠬᠡᠵᠦ ᠬᠡᠰᠢᠭ ᠢ᠋ ᠮᠡᠬᠡᠯᠡᠭᠴᠢᠳ ᠠᠬᠤ ᠪᠣᠯᠵᠣᠰᠢ ᠦᠭᠡᠢ᠂ ᠡᠷᠬᠡᠪᠰᠢ ᠲᠡᠭᠦᠨ ᠦ᠌ ᠲᠥᠷᠥᠯ ᠲᠥᠷᠥᠭᠰᠡᠳ ᠤᠷᠤᠭ ᠰᠠᠳᠤᠨ ᠠᠢᠯ ᠠᠢᠮᠠᠭ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠠ᠋ᠴᠠ ᠬᠢᠨᠠᠨ ᠪᠠᠢᠴᠠᠭᠠᠵᠤ ᠲᠣᠳᠣᠷᠬᠠᠢᠯᠠ᠃ ᠡᠢᠨ ᠠᠲᠠᠯᠠ ᠪᠠᠰᠠ ᠮᠡᠬᠡᠯᠡᠭᠴᠢᠳ ᠭᠠᠷᠴᠤ ᠪᠠᠢᠴᠠᠭᠠᠨ ᠭᠠᠷᠬᠤᠯᠠ ᠬᠦᠨᠳᠦ ᠶᠠᠯᠠ ᠤᠨᠠᠭᠠᠮᠤᠢ᠃ ᠡᠳᠡᠭᠡᠷ ᠱᠠᠩ ᠢ᠋ ᠤᠯᠤᠰ ᠤ᠋ᠨ ᠲᠠᠪᠤᠨ ᠥᠲᠡᠭᠦᠰ ᠭᠦᠸᠧ ᠯᠤᠤ ᠶ᠋ᠢ ᠳᠥᠷᠪᠡᠨ ᠵᠦᠭ ᠭᠠᠷᠭᠠᠨ ᠨᠢᠭᠡᠨ ᠢᠨᠦ ᠦᠯᠡᠳᠡᠵᠦ ᠳᠤᠮᠳᠠᠳᠤ ᠶ᠋ᠢ ᠪᠠᠢᠴᠠᠭᠠᠯᠭᠠ᠂ ᠪᠠᠰᠠ ᠲᠠᠪᠤᠨ ᠶᠡᠬᠡ ᠬᠠᠷᠭᠢᠰ ᠠ᠋ᠴᠠ ᠪᠤᠰᠤ ᠶᠠᠯᠠᠲᠠᠨ ᠢ᠋ ᠬᠡᠯᠲᠦᠷᠢᠭᠦᠯᠵᠦ ᠨᠢᠭᠡᠨ ᠵᠡᠷᠭᠡ ᠬᠥᠩᠭᠡᠷᠡᠭᠦᠯᠡ᠃ ᠡᠢᠮᠦ ᠥᠷᠯᠥᠭ ᠢ᠋ ᠵᠠᠷᠯᠠ᠂ ᠡᠨᠡ ᠢᠨᠦ ᠮᠢᠨᠦ ᠡᠴᠢᠭᠡ ᠡᠬᠡ ᠳ᠋ᠦ᠍ᠷ ᠬᠠᠷᠢᠭᠤᠯᠠᠬᠤ ᠠᠨᠤ ᠪᠣᠯᠠᠢ᠃ ᠵᠢᠴᠢ ᠳ᠋ᠦ᠍ᠷ ᠮᠢᠨᠦ ᠪᠡᠶᠡ ᠮᠥᠨ ᠬᠥᠭᠰᠢᠷᠡᠬᠦ ᠶ᠋ᠢᠨ ᠮᠥᠷ ᠲᠦ᠍ᠷ ᠣᠷᠣᠵᠤ ᠲᠠᠪᠢᠨ ᠲᠠᠪᠤᠨ ᠨᠠᠰᠤᠯᠠᠪᠠ᠃ ᠬᠡᠳᠦᠢᠪᠡᠷ ᠰᠥᠩ᠂ ᠠᠯᠲᠠᠨ ᠬᠣᠶᠠᠷ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠭᠡᠳᠦᠢ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠨᠢᠭᠡᠨᠡ ᠨᠡᠢᠭᠡᠮ ᠪᠣᠯᠤᠭᠠᠳᠤᠢ ᠪᠣᠯᠪᠠᠴᠤ ᠵᠦᠩ ᠶᠤᠸᠠᠨ ᠤ᠋ ᠬᠠᠭᠠᠰ ᠪᠠ ᠠᠷᠤ ᠭᠠᠵᠠᠷ ᠪᠠᠷᠠᠭᠤᠨ ᠵᠣᠪᠬᠢᠰ ᠵᠡᠭᠦᠨ ᠵᠠᠬᠠ ᠨᠡᠢᠲᠡ ᠮᠥᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠬᠠᠭᠠᠰ ᠢ᠋ ᠡᠵᠡᠯᠡᠪᠡ᠃ ᠶᠠᠮᠪᠠᠷᠪᠠ ᠬᠡᠷᠡᠭ ᠢ᠋ ᠬᠢᠨᠠᠨ ᠡᠰᠡ ᠪᠣᠳᠣᠪᠠᠰᠤ ᠦᠯᠦ ᠪᠣᠯᠤᠮᠤᠢ ᠃ ᠪᠢ ᠡᠳᠦᠭᠡ ᠨᠢᠳᠦ ᠣᠷᠬᠢᠨ ᠰᠠᠨᠠᠭᠠᠨ ᠲᠠᠯᠪᠢᠵᠤ᠂ ᠰᠥᠩ᠂ ᠯᠢᠶᠣᠤ᠂ ᠠᠯᠲᠠᠨ ᠡᠳᠡᠭᠡᠷ ᠤᠯᠤᠰ ᠣᠨᠴᠠ ᠨᠢᠭᠡᠨ ᠲᠥᠷᠥ ᠪᠡᠨ ᠰᠠᠨᠠᠮᠤᠢ ᠭᠡᠮᠡᠨ ᠨᠢᠭᠡᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠡᠷᠭᠦᠮᠵᠢᠯᠡᠵᠦ ᠬᠠᠭᠠᠨ ᠪᠣᠯᠭᠠᠪᠠᠰᠤ ᠪᠤᠰᠤ ᠶ᠋ᠢ ᠠᠨᠤ ᠬᠣᠷᠢᠵᠤ᠂ ᠡᠰᠡᠬᠦᠯᠡ ᠬᠣᠭᠣᠰᠣᠨ ᠨᠡᠷᠡ ᠶ᠋ᠢᠨ ᠲᠡᠳᠦᠢ ᠸᠠᠩ ᠾᠧᠦ ᠡᠷᠭᠦᠮᠵᠢᠯᠡᠵᠦ ᠬᠣᠷᠢᠭᠠᠳ ᠲᠡᠭᠦᠨ ᠦ᠌ ᠥᠪᠡᠷᠡ ᠬᠤᠪᠢᠯᠤᠯ ᠪᠣᠯᠤᠨ ᠤᠷᠪᠠᠵᠤ ᠲᠡᠮᠡᠴᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠬᠤ ᠬᠡᠮᠡᠮᠦᠢ᠃ ᠮᠢᠨᠦ ᠦᠵᠡᠬᠦᠢ ᠳ᠋ᠦ᠍ᠷ ᠲᠡᠳᠡᠭᠡᠷ ᠴᠥᠮ ᠪᠡᠶᠡ ᠪᠡᠨ ᠮᠡᠬᠡᠯᠡᠨ ᠰᠠᠨᠠᠭᠠ ᠪᠠᠨ ᠬᠠᠭᠤᠷᠤᠭᠰᠠᠨ ᠬᠡᠷᠡᠭ᠂ ᠪᠢ ᠤᠭ ᠠ᠋ᠴᠠ ᠮᠥᠨ ᠡᠭᠡᠯ ᠬᠥᠮᠦᠨ ᠪᠥᠭᠡᠳ ᠡᠳᠦᠭᠡ ᠡᠷᠭᠢᠨ ᠡᠨᠡ ᠰᠠᠭᠤᠷᠢᠨ ᠢ᠋ ᠪᠦᠲᠦᠭᠡᠪᠡ᠂ ᠬᠡᠷᠪᠡ ᠬᠠᠭᠠᠨ ᠰᠠᠭᠤᠬᠤ ᠪᠤᠶᠠᠨ ᠠᠪᠠᠰᠤ ᠰᠤᠯᠠ ᠢᠷᠭᠡᠨ ᠪᠣᠯᠪᠠᠴᠤ ᠬᠠᠯᠬᠠᠯᠠᠨ ᠦᠯᠦ ᠴᠢᠳᠠᠮᠤᠢ᠃ ᠦᠨᠡᠬᠡᠷ ᠬᠠᠭᠠᠨ ᠰᠠᠭᠤᠨ ᠬᠠᠮᠤᠭ ᠢ᠋ ᠬᠠᠮᠠᠭᠠᠯᠠᠨ ᠴᠢᠳᠠᠬᠤ ᠪᠤᠶᠠᠨ ᠦᠭᠡᠢ ᠪᠣᠯᠪᠠᠰᠤ ᠬᠠᠭᠠᠨ ᠰᠠᠭᠤᠪᠠᠴᠤ ᠡᠴᠦᠰ ᠲᠦ᠍ᠷ ᠠᠯᠳᠠᠬᠤ ᠪᠣᠯᠠᠢ᠃ ᠪᠢ ᠡᠳᠦᠭᠡ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠶ᠋ᠢ ᠪᠦᠲᠦᠭᠡᠵᠦ ᠡᠳᠦᠢ ᠪᠣᠯᠪᠠ᠂ ᠣᠷᠴᠢᠯᠠᠩ ᠤ᠋ᠨ ᠶᠣᠰᠣᠨ ᠢ᠋ᠶ᠋ᠠᠷ ᠬᠡᠳᠦᠢ ᠬᠤᠪᠢᠶᠠᠨ ᠲᠣᠭᠲᠠᠭᠠᠪᠠᠴᠤ ᠤᠯᠠᠷᠢᠵᠤ ᠶᠠᠪᠤᠬᠤ ᠠᠨᠤ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠᠨ ᠢ᠋ ᠥᠪᠡᠷ ᠥᠪᠡᠷ ᠦ᠋ᠨ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠶᠠᠪᠤᠬᠤ ᠪᠣᠯᠠᠢ᠃ ᠪᠢ ᠲᠦᠮᠡᠨ ᠣᠨ ᠳᠠᠭᠠᠵᠤ ᠪᠣᠯᠬᠤ ᠶᠣᠰᠣ ᠪᠣᠢ ᠤᠤ ? ᠲᠡᠢᠨ ᠬᠦ᠌ ᠮᠢᠨᠦ ᠦᠷᠡ ᠠᠴᠢ᠂ ᠲᠦᠰᠢᠮᠡᠳ ᠰᠠᠢᠳ ᠤ᠋ᠨ ᠦᠷᠡᠰ ᠤᠳᠠᠲᠠᠯᠠ ᠵᠣᠭᠰᠣᠯᠲᠠ ᠲᠠᠢ ᠶ᠋ᠢ ᠪᠣᠳᠣᠪᠠᠰᠤ ᠪᠠᠬᠠᠨ ᠴᠤ᠌ ᠥᠪᠡᠷᠡ ᠠᠷᠭᠠ ᠦᠭᠡᠢ᠃ ᠲᠡᠢᠨ ᠬᠦ᠌ ᠬᠡᠴᠢᠨᠡᠨ ᠵᠢᠯ ᠪᠣᠳᠣᠭᠰᠠᠭᠠᠷ ᠨᠢᠳᠤᠨᠤᠨ ᠵᠢᠯ ᠡᠨᠡ ᠳ᠋ᠠᠢᠳᠦ᠋ ᠶ᠋ᠢ ᠣᠯᠵᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠣᠷᠣᠪ ᠴᠣᠷᠣᠪ ᠤ᠋ᠨ ᠭᠠᠰᠢᠭᠤᠨ ᠢ᠋ ᠦᠵᠡᠭᠡᠳ ᠬᠠᠷᠢᠨ ᠨᠢᠭᠡᠨ ᠠᠷᠭᠠ ᠣᠯᠪᠠ ᠂ ᠡᠳᠦᠭᠡ ᠨᠠᠳᠠ ᠳ᠋ᠤᠷ ᠳᠥᠷᠪᠡᠨ ᠳᠡᠭᠦᠦ᠂ ᠳᠥᠷᠪᠡᠨ ᠬᠥᠪᠡᠭᠦᠨ᠂ ᠨᠢᠭᠡᠨ ᠬᠦᠷᠭᠡᠨ ᠳᠡᠭᠦᠦ᠂ ᠨᠢᠭᠡᠨ ᠲᠥᠷᠥᠭᠰᠡᠨ ᠬᠦᠷᠭᠡᠨ᠂ ᠡᠨᠡ ᠠᠷᠪᠠᠨ ᠡᠰᠢ ᠡᠴᠡ ᠭᠠᠳᠠᠨᠠ ᠪᠠᠰᠠ ᠮᠢᠨᠦ ᠳᠥᠷᠪᠡᠨ ᠬᠦᠯᠦᠭ ᠵᠢᠷᠭᠤᠭᠠᠨ ᠰᠠᠢᠳ ᠤ᠋ᠨ ᠶᠢᠰᠦᠨ ᠥᠷᠯᠥᠭ ᠪᠣᠢ᠂ ᠡᠳᠡᠭᠡᠷ ᠢ᠋ ᠬᠠᠷᠢᠯᠴᠠᠨ ᠬᠣᠯᠠ ᠠᠯᠤᠰᠯᠠᠭᠤᠯᠤᠨ ᠭᠠᠵᠠᠷ ᠭᠠᠵᠠᠷ ᠢ᠋ ᠡᠵᠡᠯᠡᠭᠦᠯᠦᠨ ᠬᠤᠪᠢ ᠬᠣᠪᠢᠨ ᠳ᠋ᠤᠷ ᠰᠠᠨᠠᠭᠠᠨ ᠢ᠋ ᠬᠠᠨᠲᠠᠯᠠ ᠬᠠᠨ ᠡᠷᠭᠦᠮᠵᠢᠯᠡᠪᠡᠰᠦ ᠶᠠᠭᠤᠨ ᠤ᠋ ᠲᠡᠮᠡᠴᠡᠯ ᠪᠣᠢ ? ᠦᠨᠡᠬᠡᠷ ᠲᠡᠮᠡᠴᠡᠯ ᠠᠪᠠᠴᠤ ᠴᠥᠮ ᠮᠢᠨᠦ ᠦᠷᠡ ᠠᠴᠢᠷ ᠲᠤᠯᠠ ᠴᠢᠳᠠᠯᠲᠠᠨ ᠠᠨᠤ ᠬᠠᠭᠠᠨ ᠰᠠᠭᠤᠮᠤᠢ ᠶᠠ᠃ ᠡᠨᠡ ᠦᠭᠡ ᠬᠡᠳᠦᠢ ᠶᠣᠰᠣ ᠬᠠᠤᠯᠢ ᠴᠠᠭᠠᠵᠠ ᠳᠦᠷᠢᠮ ᠳ᠋ᠦ᠍ᠷ ᠬᠠᠷᠰᠢᠬᠤ ᠮᠡᠲᠦ ᠪᠣᠯᠪᠠᠴᠤ ᠡᠴᠦᠰ ᠲᠦ᠍ᠷ ᠡᠭᠦᠨᠴᠡ ᠮᠥᠨ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠠᠢ᠃ ᠠᠷᠪᠠᠨ ᠡᠰᠢ ᠦᠷᠡᠰ ᠰᠠᠯᠠᠭᠠ ᠪᠠ ᠶᠢᠰᠦᠨ ᠡᠩ ᠦ᠋ᠨ ᠭᠠᠪᠢᠶᠠᠲᠤ ᠦᠨᠳᠦᠰᠦᠨ ᠦ᠌ ᠨᠢᠭᠡᠨ ᠢᠨᠦ ᠮᠠᠨᠳᠤᠪᠠᠰᠤ ᠮᠢᠨᠦ ᠪᠡᠶᠡ ᠮᠠᠨᠳᠤᠬᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠤᠰᠤ ᠤᠤ ? 》ᠭᠡᠮᠡᠨ ᠴᠢᠨ ᠸᠠᠩ ᠪᠡᠯᠭᠦᠳᠡᠢ ᠶ᠋ᠢ ᠳᠠᠭᠤᠳᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ :《ᠬᠣᠶᠠᠳᠤᠭᠠᠷ ᠳᠡᠭᠦᠦ ᠸᠠᠩ ᠴᠢ᠂ ᠠᠯᠲᠠᠨ ᠲᠥᠷᠥ ᠶ᠋ᠢ ᠪᠦᠲᠦᠭᠡᠬᠦ ᠶ᠋ᠢᠨ ᠲᠤᠯᠠ ᠠᠷᠤ ᠨᠢᠷᠤᠭᠤ ᠪᠠᠨ ᠴᠠᠪᠴᠢᠲᠠᠯᠠ ᠡᠰᠡ ᠲᠡᠪᠴᠢᠨ ᠠᠯᠢᠪᠠ ᠪᠠᠢᠯᠳᠤᠭᠠᠨᠠ ᠦᠬᠦᠨ ᠵᠢᠳᠬᠦᠵᠦ᠂ ᠠᠬᠠ ᠪᠠᠨ ᠨᠠᠮᠠᠢ ᠬᠠᠮᠠᠭᠠᠯᠠᠨ ᠶᠠᠪᠤᠭᠰᠠᠭᠠᠷ ᠡᠳᠦᠭᠡ ᠪᠣᠯᠪᠠ᠃ ᠠᠬᠠ ᠴᠢᠨᠦ ᠪᠢ ᠮᠥᠨ ᠬᠥᠭᠰᠢᠷᠡᠬᠦ ᠶ᠋ᠢᠨ ᠮᠥᠷ ᠲᠣᠷ ᠣᠷᠣᠬᠤ ᠰᠢᠬᠠᠪᠠ᠃ ᠲᠡᠢᠨ ᠬᠦ᠌ ᠲᠠᠨ ᠤ᠋ ᠥᠪᠡᠷ ᠥᠪᠡᠷ ᠦ᠋ᠨ ᠵᠣᠭᠰᠣᠯᠲᠠ ᠶ᠋ᠢ ᠣᠯᠭᠣᠭᠤᠯᠤᠶᠠ᠂ ᠮᠢᠨᠦ ᠡᠨᠡ ᠮᠡᠲᠦ ᠡᠷᠬᠢᠮ ᠥᠨᠳᠥᠷ ᠪᠣᠯᠤᠭᠰᠠᠨ ᠠᠨᠤ ᠲᠥᠷᠥᠭᠰᠡᠨ ᠡᠴᠡ ᠳᠥᠷᠪᠡᠨ ᠳᠡᠭᠦᠦ ᠲᠦᠪᠡᠭᠳᠡᠭᠰᠡᠨ ᠡᠴᠡ ᠳᠥᠷᠪᠡᠨ ᠬᠦᠯᠦᠭ᠂ ᠲᠦᠭᠰᠢᠯᠳᠦ ᠡᠴᠡ ᠵᠢᠷᠭᠤᠭᠠᠨ ᠰᠠᠢᠳ ᠲᠥᠷᠥ ᠳ᠋ᠦ᠍ᠷ ᠡᠴᠡ ᠶᠢᠰᠦᠨ ᠡᠩ ᠦ᠋ᠨ ᠪᠦᠭᠦᠳᠡᠭᠡᠷ ᠦ᠋ᠨ ᠦᠬᠦᠨ ᠵᠢᠳᠬᠦᠭᠰᠡᠨ ᠡᠴᠡ ᠪᠦᠲᠦᠭᠡᠵᠦ᠂ ᠮᠡᠬᠦᠰ ᠬᠥᠮᠦᠨ ᠪᠢ ᠡᠨᠡ ᠡᠳᠦᠷ ᠵᠣᠭᠰᠣᠯᠲᠠ ᠪᠠᠨ ᠣᠯᠤᠭᠰᠠᠨ ᠲᠤᠯᠠ ᠣᠳᠣ ᠲᠠᠨ ᠤ᠋ ᠵᠣᠭᠰᠣᠯᠲᠠ ᠣᠷᠣᠰᠢᠯᠲᠠ ᠶ᠋ᠢ ᠵᠢᠭᠠᠬᠤ ᠴᠠᠭ ᠪᠣᠯᠪᠠ ! 》 ᠭᠡᠮᠡᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠷ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠦ : ᠬᠣᠶᠠᠳᠤᠭᠠᠷ ᠳᠡᠭᠦᠦ ᠴᠢᠨ ᠸᠠᠩ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠤᠮᠠᠢ ᠭᠠᠵᠠᠷ᠂ ᠰᠢᠭᠦᠰᠡᠩᠬᠢ ᠭᠠᠵᠠᠷ᠂ ᠡᠨᠡ ᠬᠣᠶᠠᠷ ᠭᠠᠵᠠᠷ ᠤ᠋ᠨ ᠬᠣᠶᠠᠷ ᠲᠦᠮᠡᠨ ᠡᠷᠦᠬᠡ ᠶ᠋ᠢ ᠡᠵᠡᠯᠡᠭᠦᠯᠵᠦ ᠤᠮᠠᠢ ᠶ᠋ᠢᠨ ᠬᠠᠨ ᠭᠡᠮᠡᠨ ᠡᠷᠭᠦᠵᠦ᠂ ᠭᠡᠷ ᠦ᠋ᠨ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃ ᠭᠤᠷᠪᠠᠳᠤᠭᠠᠷ ᠳᠡᠭᠦᠦ ᠴᠢᠨ ᠸᠠᠩ ᠬᠠᠪᠤᠲᠤ ᠬᠠᠰᠠᠷ ᠲᠤᠷ ᠬᠣᠷᠴᠢᠨ ᠤ᠋ ᠭᠠᠵᠠᠷ᠂ ᠯᠠᠤᠰᠠᠽᠢᠨ ᠤ᠋ ᠭᠠᠵᠠᠷ – ᠡᠨᠡ ᠬᠣᠶᠠᠷ ᠭᠠᠵᠠᠷ ᠤ᠋ᠨ ᠬᠣᠶᠠᠷ ᠲᠦᠮᠡᠨ ᠮᠢᠩᠭᠠᠨ ᠢᠰᠷᠢ ᠶ᠋ᠢᠨ ᠠᠷᠪᠠᠨ ᠠᠢᠮᠠᠭ ᠢ᠋ ᠡᠵᠡᠯᠡᠭᠦᠯᠦᠨ ᠬᠣᠷᠴᠢᠨ ᠤ᠋ ᠬᠠᠨ ᠭᠡᠮᠡᠨ ᠡᠷᠭᠦᠵᠦ᠂ ᠭᠡᠷ ᠦ᠋ᠨ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃ ᠳᠥᠷᠪᠡᠳᠦᠭᠡᠷ ᠳᠡᠭᠦᠦ ᠴᠢᠨ ᠸᠠᠩ ᠣᠢᠲᠤ ᠤᠴᠢᠭ ᠲᠤ᠌ ᠣᠩᠨᠢᠭᠤᠳ ᠭᠡᠭᠡᠲᠡᠢ᠂ ᠪᠠᠯᠴᠣᠳᠠᠨ᠂ ᠬᠠᠷᠠ ᠴᠡᠷᠢᠭ ᠡᠳᠡᠭᠡᠷ ᠳᠥᠷᠪᠡᠨ ᠪᠠᠭᠠ ᠭᠠᠵᠠᠷ ᠤ᠋ᠨ ᠬᠣᠶᠠᠷ ᠲᠦᠮᠡᠨ ᠨᠤᠲᠤᠭ ᠠᠷᠪᠠᠨ ᠠᠩᠭᠢ ᠠᠢᠮᠠᠭ ᠢ᠋ ᠡᠵᠡᠯᠡᠭᠦᠯᠵᠦ᠂ ᠬᠠᠯᠬᠠ ᠶ᠋ᠢᠨ ᠬᠠᠨ ᠭᠡᠮᠡᠨ ᠡᠷᠭᠦᠵᠦ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃ ᠲᠠᠪᠤᠳᠤᠭᠠᠷ ᠳᠡᠭᠦᠦ ᠴᠢᠨ ᠸᠠᠩ ᠤᠷᠠᠨ ᠭᠠᠴᠤᠭ ᠲᠤᠷ ᠬᠡᠷᠡᠢᠳ ᠬᠠᠯᠬᠠ ᠮᠤᠩ ᠤ᠋ᠨ ᠵᠡᠷᠭᠡ ᠭᠤᠷᠪᠠᠨ ᠪᠠᠭᠠ ᠭᠠᠵᠠᠷ ᠤ᠋ᠨ ᠬᠣᠶᠠᠷ ᠲᠦᠮᠡᠨ ᠡᠷᠦᠬᠡ ᠶ᠋ᠢ ᠡᠵᠡᠯᠡᠭᠦᠯᠦᠨ ᠬᠡᠷᠡᠢᠳ ᠦ᠋ᠨ ᠬᠠᠨ ᠭᠡᠮᠡᠨ ᠡᠷᠭᠦᠵᠦ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃
ᠲᠡᠳᠦᠢ ᠲᠠᠢᠽᠢ ᠨᠠᠷ ᠢ᠋ ᠳᠠᠭᠤᠳᠠᠬᠤᠶᠠ ᠨᠡᠢᠲᠡ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠭᠠᠷᠪᠠ : ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ ᠪᠦᠷᠲᠡᠭᠡᠯᠵᠢᠨ ᠬᠠᠲᠤᠨ ᠤ᠋ ᠪᠡᠶᠡ ᠡᠴᠡ ᠮᠡᠨᠳᠦᠯᠡᠭᠰᠡᠨ ᠵᠣᠴᠢ᠂ ᠴᠠᠭᠠᠲᠠᠢ᠂ ᠥᠭᠡᠳᠡᠢ᠂ ᠲᠣᠯᠢ ᠳᠥᠷᠪᠡᠨ ᠡᠴᠡ ᠳᠣᠷᠣᠭ᠍ᠰᠢ ᠭᠤᠷᠪᠠᠨ ᠬᠥᠪᠡᠭᠦᠨ ᠲᠥᠷᠥᠪᠡ᠂ ᠪᠠᠷᠠᠭᠤᠨ ᠣᠷᠳᠣᠨ ᠤ᠋ ᠬᠦᠢ ᠹᠧᠢ ᠭᠣᠣᠯ ᠤ᠋ᠨ ᠰᠠᠷᠠᠨ ᠬᠠᠲᠤᠨ ᠠ᠋ᠴᠠ ᠲᠠᠪᠤᠳᠤᠭᠠᠷ ᠲᠠᠢᠽᠢ ᠭᠢᠯᠭᠦᠷᠡᠯ᠂ ᠵᠡᠭᠦᠨ ᠣᠷᠳᠣᠨ ᠤ᠋ ᠬᠦᠢ ᠹᠧᠢ ᠵᠢᠰᠦᠲᠦ ᠬᠠᠲᠤᠨ ᠠ᠋ᠴᠠ ᠵᠢᠷᠭᠤᠳᠤᠭᠠᠷ ᠲᠠᠢᠽᠢ ᠵᠣᠷᠴᠠ᠂ ᠮᠥᠨ ᠬᠦ᠌ ᠵᠡᠭᠦᠨ ᠣᠷᠳᠣᠨ ᠤ᠋ ᠳᠡᠳ᠋ ᠬᠦᠢ ᠹᠧᠢ ᠵᠢᠰᠦᠯᠢᠭ ᠬᠠᠲᠤᠨ ᠠ᠋ᠴᠠ ᠳᠣᠯᠣᠳᠤᠭᠠᠷ ᠲᠠᠢᠽᠢ ᠵᠤᠷᠴᠢᠲᠠᠢ ᠡᠨᠡ ᠭᠤᠷᠪᠠᠨ ᠲᠠᠢᠽᠢ ᠴᠥᠮ ᠠᠷᠪᠠᠨ ᠬᠡᠳᠦᠨ ᠨᠠᠰᠤ ᠲᠠᠢ ᠲᠤᠯᠠ ᠡᠷᠭᠦᠮᠵᠢᠯᠡᠭᠡᠳᠦᠢ᠃ ᠲᠠᠪᠤᠳᠤᠭᠠᠷ ᠲᠠᠢᠽᠢ ᠭᠢᠯᠬᠦᠷᠡᠯ ᠦ᠋ᠨ ᠲᠥᠷᠥᠭᠰᠡᠨ ᠢᠨᠦ ᠠᠰᠤᠷᠤ ᠰᠠᠢᠬᠠᠨ᠂ ᠠᠯᠲᠠᠨ ᠰᠤᠪᠤᠳ ᠮᠡᠲᠦ ᠭᠢᠯᠭᠦᠷᠡᠮᠡ ᠭᠡᠷᠡᠯᠲᠡᠢ ᠲᠤᠯᠠ ᠨᠡᠷᠡ ᠶ᠋ᠢ ᠭᠢᠯᠬᠦᠷᠡᠯ ᠬᠡᠮᠡᠪᠡ᠃ ᠵᠢᠷᠭᠤᠳᠤᠭᠠᠷ ᠲᠠᠢᠽᠢ ᠶ᠋ᠢ ᠮᠡᠨᠳᠦᠯᠡᠬᠦᠢ ᠳ᠋ᠦ᠍ᠷ ᠵᠣᠷᠴᠢᠨ ᠠᠢᠮᠠᠭ ᠳᠠᠭᠠᠭᠰᠠᠨ ᠲᠤᠯᠠ ᠨᠡᠷᠡ ᠶ᠋ᠢ ᠵᠤᠷᠴᠠ ᠬᠡᠮᠡᠪᠡ᠃ ᠳᠣᠯᠣᠳᠤᠭᠠᠷ ᠲᠠᠢᠽᠢ ᠶ᠋ᠢ ᠮᠡᠨᠳᠦᠯᠡᠬᠦᠢ ᠳ᠋ᠦ᠍ᠷ ᠵᠣᠷᠴᠢᠲᠠᠢ ᠠᠢᠮᠠᠭ ᠢ᠋ ᠳᠠᠭᠠᠭᠤᠯᠤᠭᠰᠠᠨ ᠳ᠋ᠤᠷ ᠲᠣᠬᠢᠶᠠᠯᠳᠤᠭᠰᠠᠨ ᠲᠤᠯᠠ ᠨᠡᠷᠡ ᠶ᠋ᠢ ᠵᠣᠷᠴᠢᠲᠠᠢ ᠬᠡᠮᠡᠭᠰᠡᠨ ᠠᠵᠤᠭᠤ᠃ ᠡᠨᠡ ᠪᠦᠷᠢ ᠲᠠᠢᠽᠦ ᠶ᠋ᠢᠨ ᠦᠷᠡᠰ ᠬᠣᠢᠨᠠ ᠢᠯᠡᠷᠡᠭᠰᠡᠨ ᠦᠭᠡᠢ᠂ ᠯᠠᠪ ᠬᠣᠢᠨᠠ ᠬᠣᠯᠠ ᠤᠯᠤᠰ ᠲᠤᠷ ᠡᠷᠭᠦᠮᠵᠢᠯᠡᠭᠰᠡᠨ ᠪᠣᠢ ᠶᠠ᠃ ᠲᠡᠳᠦᠢ ᠶᠡᠬᠡ ᠲᠠᠢᠽᠢ ᠴᠢᠨ ᠸᠠᠩ ᠵᠣᠴᠢ ᠶ᠋ᠢ ᠬᠣᠢᠲᠤ ᠳᠣᠬ᠍ᠮᠣᠭ ᠤ᠋ᠨ ᠶᠡᠬᠡ ᠤᠯᠤᠰ ᠲᠤᠷ ᠬᠠᠭᠠᠨ ᠰᠠᠭᠤᠯᠭᠠᠵᠤ ᠂ ᠨᠤᠲᠤᠭ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃ ᠬᠣᠶᠠᠳᠤᠭᠠᠷ ᠲᠠᠢᠽᠢ ᠴᠢᠨ ᠸᠠᠩ ᠴᠠᠭᠠᠲᠠᠢ ᠴᠡᠷᠢᠭ ᠲᠦ᠍ᠷ ᠪᠣᠯᠪᠠᠰᠤᠨ ᠲᠤᠯᠠ ᠪᠠᠷᠠᠭᠤᠨ ᠰᠢ ᠢᠦᠢ ᠤᠯᠤᠰ ᠴᠠᠭᠠᠨ ᠮᠠᠯᠠᠭᠠᠢᠲᠤ ᠬᠣᠲᠣᠩ ᠤᠯᠤᠰ ᠤ᠋ᠨ ᠨᠡᠢᠲᠡ ᠳ᠋ᠦ᠍ᠷ ᠬᠠᠭᠠᠨ ᠰᠠᠭᠤᠯᠭᠠᠵᠤ ᠨᠤᠲᠤᠭ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ ᠃ ᠭᠤᠷᠪᠠᠳᠤᠭᠠᠷ ᠲᠠᠢᠽᠢ ᠴᠢᠨ ᠸᠠᠩ ᠥᠭᠡᠳᠡᠢ ᠣᠶᠤᠨ ᠮᠠᠲᠠᠯ ᠭᠦᠨ ᠬᠣᠯᠠ ᠲᠤᠯᠠ ᠡᠮᠦᠨᠡ ᠣᠯᠠᠨ ᠬᠢᠲᠠᠳ ᠤ᠋ᠨ ᠳᠤᠮᠳᠠᠳᠤ ᠣᠷᠣᠨ ᠢ᠋ ᠡᠵᠡᠯᠡᠭᠦᠯᠵᠦ ᠬᠠᠭᠠᠨ ᠰᠠᠭᠤᠯᠭᠠᠨ᠂ ᠡᠨᠡ ᠭᠠᠵᠠᠷ ᠢ᠋ ᠨᠤᠲᠤᠭ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃ ᠳᠥᠷᠪᠡᠳᠦᠭᠡᠷ ᠲᠠᠢᠽᠢ ᠲᠣᠯᠢ ᠴᠢᠬᠡᠴᠢ ᠪᠠᠭᠠᠲᠤᠷ ᠲᠤᠯᠠ ᠬᠠᠭᠤᠴᠢᠨ ᠳᠥᠴᠢᠨ ᠲᠦᠮᠡᠨ ᠬᠥᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠡᠵᠡᠯᠡᠭᠦᠯᠬᠦ ᠬᠠᠭᠠᠨ ᠪᠣᠯᠭᠠᠨ᠂ ᠤᠭ ᠨᠤᠲᠤᠭ ᠭᠣᠯᠣᠮᠲᠠ ᠪᠠᠨ ᠰᠠᠬᠢᠵᠤ ᠮᠣᠩᠭᠣᠯ ᠣᠷᠣᠨ ᠢ᠋ ᠨᠤᠲᠤᠭ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ ① ᠃ ᠪᠠᠰᠠ ᠳᠡᠭᠦᠦ ᠬᠦᠷᠭᠡᠨ ᠵᠢᠶᠦ᠋ᠨ ᠸᠠᠩ ᠹᠦ ᠮᠠ᠋ ᠪᠣᠲ᠋ᠤ ᠳ᠋ᠤᠷ ᠢᠵᠢᠯᠵᠢ᠂ ᠮᠢᠵᠢᠯᠵᠢ ᠂ ᠴᠠᠢᠯᠵᠢ ᠭᠤᠷᠪᠠᠨ ᠤᠯᠤᠰ ᠲᠤᠷ ᠬᠠᠭᠠᠨ ᠪᠣᠯᠭᠠᠨ ᠡᠷᠭᠦᠵᠦ ᠂ ᠨᠤᠲᠤᠭ ᠬᠥᠷᠥᠩᠭᠡ ᠪᠣᠯᠭᠠᠨ ᠥᠭᠪᠡ᠃ ᠥᠪᠡᠷ ᠦ᠋ᠨ ᠬᠦᠷᠭᠡᠨ ᠹᠦ ᠮᠠ᠋ ᠴᠡᠴᠡᠭ ᠲᠣᠷ ᠬᠠᠷᠯᠢᠭᠤᠳ᠂ ᠬᠠᠷᠠᠴᠢᠨ᠂ ᠮᠣᠩᠭᠣᠷ ᠡᠨᠡ ᠭᠤᠷᠪᠠᠨ ᠤᠯᠤᠰ ᠢ᠋ ᠥᠭᠴᠦ ᠬᠠᠭᠠᠨ ᠪᠣᠯᠭᠠᠨ ᠨᠤᠲᠤᠭ ᠬᠥᠷᠥᠩᠭᠡ ᠥᠭᠪᠡ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠤᠯᠤᠰ ᠤ᠋ᠨ ᠲᠠᠪᠤᠨ ᠥᠲᠡᠭᠦᠰ᠂ ᠲᠠᠪᠤᠨ ᠲᠠᠢᠰᠢ᠂ ᠳᠥᠷᠪᠡᠨ ᠬᠦᠯᠦᠭ᠂ ᠵᠢᠷᠭᠤᠭᠠᠨ ᠰᠠᠢᠳ᠂ ᠶᠢᠰᠦᠨ ᠡᠩ ᠨᠡᠢᠲᠡ ᠬᠥᠮᠦᠨ ᠪᠦᠷᠢ ᠳ᠋ᠦ᠍ᠷ ᠨᠢᠭᠡ ᠨᠢᠭᠡᠨ ᠠᠢᠮᠠᠭ ᠢ᠋ ᠥᠭᠴᠦ ᠡᠵᠡᠨ ᠪᠣᠯᠭᠠᠭᠠᠳ ᠨᠤᠲᠤᠭ ᠬᠥᠷᠥᠩᠭᠡ ᠪᠣᠯᠭᠠᠵᠤ ᠥᠭᠪᠡ ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠣᠵᠢᠮ ᠳᠠᠭᠠᠭᠰᠠᠨ ᠭᠠᠪᠢᠶᠠᠲᠠᠨ ᠢ᠋ ᠮᠣᠵᠢ ᠶ᠋ᠢᠨ ᠨᠣᠶᠠᠨ ᠪᠠ ᠵᠠᠭᠤᠨ ᠤ᠋ ᠨᠣᠶᠠᠨ᠂ ᠮᠢᠩᠭᠠᠨ ᠤ᠋ ᠨᠣᠶᠠᠨ᠂ ᠲᠦᠮᠡᠨ ᠦ᠌ ᠨᠣᠶᠠᠨ ᠳ᠋ᠤᠷ ᠬᠦᠷᠲᠡᠯᠡ ᠡᠷᠭᠦᠵᠦ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠢ᠋ᠶ᠋ᠡᠷ ᠡᠷᠭᠦᠮᠵᠢᠯᠡᠨ ᠪᠠᠷᠠᠭᠰᠠᠨ ᠤ᠋ ᠬᠣᠢᠨᠠ ᠶᠡᠬᠡ ᠲᠠᠢᠽᠢ ᠵᠣᠴᠢ᠂ ᠳᠥᠷᠪᠡᠳᠦᠭᠡᠷ ᠲᠠᠢᠽᠢ ᠲᠣᠯᠢ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ: 《 ᠲᠠ ᠬᠣᠶᠠᠭᠤᠯᠠ ᠳ᠋ᠤᠷ ᠬᠣᠢᠲᠤ ᠭᠠᠵᠠᠷ ᠬᠦᠷᠲᠡᠪᠡ ᠭᠡᠮᠡᠨ ᠪᠢᠲᠡᠭᠡᠢ ᠥᠪᠡᠷᠡ ᠲᠡᠮᠡᠴᠡ ᠂ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠬᠥᠨᠥᠭᠡᠯ ᠴᠥᠭᠡᠨ᠂ ᠬᠣᠣᠷ ᠭᠦᠶᠦᠬᠡᠨ᠂ ᠬᠣᠵᠢᠮ ᠤ᠋ᠨ ᠡᠳᠦᠷ ᠤᠳᠠᠭᠠᠨ ᠤᠷᠲᠤ ᠠᠨᠤ ᠮᠥᠨ ᠬᠦ᠌ ᠬᠣᠢᠲᠤ ᠭᠠᠵᠠᠷ ᠪᠣᠯᠠᠢ ! 》 ᠬᠡᠮᠡᠪᠡ᠃ ᠵᠠᠭᠤᠨ ᠲᠦᠰᠢᠮᠡᠳ 《ᠲᠦᠮᠡᠨ ᠨᠠᠰᠤᠲᠤ ! 》 ᠭᠡᠮᠡᠨ ᠣᠯᠠᠨᠲᠠ ᠳᠠᠭᠤᠳᠠᠯᠴᠠᠨ ᠮᠥᠷᠭᠥᠵᠦ ᠶᠡᠬᠡ ᠬᠤᠷᠢᠮ ᠳ᠋ᠤᠷ ᠰᠠᠭᠤᠯᠴᠠᠨ ᠬᠤᠷᠢᠮᠯᠠᠬᠤᠶᠠ ᠂ ᠬᠠᠭᠠᠨ ᠳᠡᠭᠦᠦ ᠨᠠᠷ ᠬᠡᠦᠬᠡᠳ ᠤᠷᠤᠭ ᠰᠠᠳᠤᠨ ᠰᠠᠢᠳ ᠲᠦᠰᠢᠮᠡᠳ ᠤᠯᠤᠰ ᠠᠯᠪᠠᠲᠤ ᠳ᠋ᠤᠷ ᠢ᠋ᠶ᠋ᠠᠨ ᠰᠤᠷᠭᠠᠵᠤ ᠡᠢᠨ ᠵᠠᠷᠯᠢᠭ ᠪᠣᠯᠤᠷᠤᠨ :
ᠤᠬᠠᠭᠠᠨᠲᠠᠨ ᠢ᠋ ᠲᠠᠷᠬᠠᠭᠠᠵᠤ ᠤᠷᠠᠨ ᠠᠷᠬᠠ ᠪᠠᠷ ᠬᠤᠷᠢᠶᠠᠭᠰᠠᠨ ᠳ᠋ᠤᠷ
ᠣᠯᠠᠨ ᠢ᠋ ᠡᠵᠡᠯᠡᠨ ᠨᠡᠢᠲᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠶᠡᠬᠡ ᠬᠠᠭᠠᠨ ᠪᠣᠯᠪᠠᠢ᠂
ᠠᠷᠭᠠ ᠪᠢᠯᠢᠭ ᠢ᠋ ᠮᠡᠳᠡᠪᠡᠰᠦ ᠪᠡᠷᠬᠡ ᠬᠦᠴᠦᠲᠡᠨ ᠢ᠋ ᠡᠷᠬᠡ ᠪᠡᠷ ᠪᠣᠯᠭᠠᠬᠤᠶᠠ ᠬᠢᠯᠪᠠᠷ
ᠠᠴᠢ ᠵᠢᠷᠤᠮ ᠢ᠋ ᠣᠯᠪᠠᠰᠤ ᠠᠷᠭᠠ ᠪᠢᠯᠢᠭᠲᠡᠨ ᠢ᠋ ᠡᠷᠬᠡ ᠪᠡᠷ ᠪᠣᠯᠭᠠᠬᠤᠶᠠ ᠬᠢᠯᠪᠠᠷ᠃
ᠪᠡᠶᠡ ᠪᠠᠭᠠᠲᠤᠷ ᠪᠣᠯᠪᠠᠰᠤ ᠨᠢᠭᠡᠬᠡᠨ ᠦᠶᠡ ᠶ᠋ᠢᠨ ᠪᠠᠭᠠᠲᠤᠷ ᠪᠤᠶᠤ
ᠪᠢᠯᠢᠭ ᠪᠠᠭᠠᠲᠤᠷ ᠪᠣᠯᠪᠠᠰᠤ ᠲᠦᠮᠡᠨ ᠣᠨ ᠤ᠋ ᠪᠠᠭᠠᠲᠤᠷ ᠪᠤᠶᠤ᠂
ᠠᠮᠢᠲᠠᠨ ᠬᠥᠮᠦᠨ ᠬᠡᠳᠦᠢ ᠣᠯᠠᠨ ᠪᠣᠯᠪᠠᠴᠤ ᠠᠢᠯᠠᠳᠤᠨ ᠮᠡᠳᠡᠭᠴᠢ ᠴᠥᠭᠡᠬᠡᠨ
ᠠᠮᠢᠳᠤ ᠬᠥᠮᠦᠨ ᠬᠡᠳᠦᠢ ᠣᠯᠠᠨ ᠪᠣᠯᠪᠠᠴᠤ ᠠᠶᠠᠯᠭᠤᠯᠠᠨ ᠲᠥᠰᠦᠭᠡᠯᠡᠭᠴᠢ ᠴᠥᠭᠡᠬᠡᠨ᠃
ᠲᠥᠬᠥᠭᠡ ᠦᠭᠡᠢ ᠲᠦᠭ ᠲᠦᠮᠡᠨ ᠴᠡᠷᠢᠭ ᠮᠣᠷᠢᠨ ᠠ᠋ᠴᠠ
ᠲᠥᠷᠥ ᠶᠣᠰᠣ ᠶ᠋ᠢ ᠮᠡᠳᠡᠬᠦ ᠨᠢᠭᠡᠬᠡᠨ ᠮᠡᠷᠭᠡᠨ ᠬᠥᠮᠦᠨ ᠳᠡᠭᠡᠷᠡ᠂
ᠡᠷᠡ ᠬᠥᠮᠦᠨ ᠪᠡᠶᠡ ᠪᠡᠨ ᠡᠳ᠋ ᠢ᠋ᠶ᠋ᠡᠷ ᠴᠢᠮᠡᠬᠦ ᠡᠴᠡ ᠡᠷᠳᠡᠮ ᠢ᠋ᠶ᠋ᠡᠷ ᠴᠢᠮᠡ
ᠡᠬᠡᠨᠡᠷ ᠬᠥᠮᠦᠨ ᠪᠡᠶᠡ ᠪᠡᠨ ᠥᠩᠭᠡ ᠪᠡᠷ ᠴᠢᠮᠡᠬᠦ ᠡᠴᠡ ᠣᠶᠤᠨ ᠢ᠋ᠶ᠋ᠠᠷ ᠴᠢᠮᠡ᠃
ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠬᠥᠲᠥᠯ
ᠥᠷᠭᠡᠨ ᠳᠠᠯᠠᠢ ᠶ᠋ᠢᠨ ᠣᠯᠣᠮ ᠦᠭᠡᠢ ᠶ᠋ᠢ ᠬᠣᠯᠠ ᠭᠡᠮᠡᠨ ᠪᠢᠲᠡᠭᠡᠢ ᠰᠢᠨᠲᠠᠷᠠ᠂
ᠬᠦᠨᠳᠦ ᠭᠡᠮᠡᠨ ᠪᠢᠲᠡᠭᠡᠢ ᠴᠥᠭᠡ ᠬᠥᠳᠡᠯᠭᠡᠬᠦ ᠠᠷᠭᠠ ᠶ᠋ᠢ ᠪᠣᠳᠣ
ᠬᠥᠩᠭᠡᠨ ᠭᠡᠮᠡᠨ ᠪᠢᠲᠡᠭᠡᠢ ᠪᠠᠰᠤᠮᠵᠢᠯᠠ ᠥᠪᠡᠷ ᠦ᠋ᠨ ᠴᠢᠨᠡᠭᠡ ᠪᠡᠨ ᠳᠠᠩᠰᠠ᠃
ᠳᠠᠪᠠᠰᠢ ᠦᠭᠡᠢ ᠳᠠᠪᠠᠭᠠᠨ ᠪᠣᠢ ᠭᠡᠮᠡᠨ ᠰᠡᠳᠬᠢᠵᠦ ᠬᠡᠷᠬᠢᠨ ᠳᠠᠪᠠᠶᠠ ᠭᠡᠮᠡᠨ ᠪᠦᠦ ᠰᠢᠨᠲᠠᠷᠠ
ᠭᠡᠲᠦᠯᠦᠰᠢ ᠦᠭᠡᠢ ᠮᠥᠷᠡᠨ ᠢ᠋ ᠬᠡᠷᠬᠢᠨ ᠭᠡᠲᠦᠯᠦᠶᠡ ᠭᠡᠮᠡᠨ ᠪᠦᠦ ᠰᠡᠳᠬᠢ᠂
ᠳᠠᠪᠠᠬᠤ ᠭᠡᠲᠦᠯᠬᠦ ᠶ᠋ᠢ ᠡᠭᠦᠷᠢᠳᠡ ᠪᠣᠳᠣᠪᠠᠰᠤ ᠠᠷᠭᠠ ᠶ᠋ᠢ ᠠᠨᠤ ᠣᠯᠤᠮᠤᠢ
ᠡᠰᠡᠷᠭᠦ ᠬᠥᠳᠡᠭᠡᠰᠬᠦ ᠶ᠋ᠢ ᠤᠷᠲᠤᠳᠠ ᠰᠡᠳᠬᠢᠪᠡᠰᠦ ᠤᠬᠠᠭᠠᠨ ᠳ᠋ᠤᠷ ᠠᠨᠤ ᠣᠷᠣᠮᠤᠢ᠃
ᠨᠢᠭᠡᠨ ᠰᠡᠳᠬᠢᠯᠳᠦ ᠡᠷᠡ ᠬᠡᠮᠡᠭᠴᠢ ᠡᠷᠡ ᠪᠤᠰᠤ ᠡᠷᠳᠡᠨᠢ ᠬᠡᠮᠡᠭᠳᠡᠵᠦᠬᠦᠢ
ᠬᠣᠶᠠᠷ ᠰᠡᠳᠬᠢᠯᠳᠦ ᠡᠷᠡ ᠶ᠋ᠢ ᠡᠷᠡ ᠪᠤᠰᠤ ᠡᠬᠡᠨᠡᠷ ᠬᠡᠮᠡᠮᠦᠢ᠂
ᠨᠢᠭᠡᠨ ᠰᠡᠳᠬᠢᠯᠳᠦ ᠡᠬᠡᠨᠡᠷ ᠬᠡᠮᠡᠭᠴᠢ ᠡᠬᠡᠨᠡᠷ ᠪᠤᠰᠤ ᠡᠷᠡ ᠬᠡᠮᠡᠭᠳᠡᠵᠦᠬᠦᠢ
ᠬᠣᠶᠠᠷ ᠰᠡᠳᠬᠢᠯᠳᠦ ᠡᠬᠡᠨᠡᠷ ᠢ᠋ ᠡᠬᠡᠨᠡᠷ ᠪᠤᠰᠤ ᠠᠯᠪᠢᠨ ᠪᠤᠶᠤ᠂
ᠥᠪᠡᠷ ᠦ᠋ᠨ ᠪᠤᠷᠤᠭᠤ ᠶ᠋ᠢ ᠪᠤᠰᠤᠳ ᠠ᠋ᠴᠠ ᠠᠰᠠᠭᠤᠵᠤ ᠮᠡᠳᠡᠭᠳᠡᠬᠦᠢ
ᠰᠡᠳᠬᠢᠯ ᠦ᠋ᠨ ᠣᠰᠣᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠰᠢᠨᠵᠢᠵᠦ ᠭᠡᠮᠰᠢᠭᠳᠡᠬᠦᠢ᠂
ᠰᠤᠮᠤᠨ ᠤ᠋ ᠮᠡᠰᠡ ᠬᠡᠳᠦᠢ ᠲᠡᠭᠰᠢ ᠰᠢᠳᠤᠷᠭᠤ ᠪᠣᠯᠪᠠᠴᠤ ᠥᠳᠥ ᠦᠭᠡᠢ ᠦᠯᠦ ᠪᠣᠯᠬᠤᠢ
ᠨᠤᠮᠤ ᠶ᠋ᠢᠨ ᠠᠷᠠᠯ ᠬᠡᠳᠦᠢ ᠬᠠᠲᠠᠭᠤ ᠬᠦᠴᠦᠲᠡᠢ ᠪᠣᠯᠪᠠᠴᠤ ᠬᠥᠪᠴᠢ ᠦᠭᠡᠢ ᠦᠯᠦ ᠪᠣᠯᠬᠤᠢ
ᠬᠥᠮᠦᠨ ᠬᠡᠳᠦᠢ ᠪᠠᠭᠠᠲᠤᠷ ᠬᠦᠴᠦᠲᠡᠢ ᠲᠦᠷᠦᠪᠡᠴᠦ ᠵᠡᠪᠰᠡᠭ ᠦᠭᠡᠢ ᠦᠯᠦ ᠪᠣᠯᠤᠮᠤᠢ
ᠬᠥᠪᠡᠭᠦᠨ ᠬᠡᠳᠦᠢ ᠰᠡᠴᠡᠨ ᠰᠡᠷᠭᠦᠯᠡᠩ ᠪᠣᠯᠪᠠᠴᠤ ᠰᠤᠷᠭᠠᠯ ᠦᠭᠡᠢ ᠦᠯᠦ ᠪᠣᠯᠤᠮᠤᠢ᠂
ᠰᠡᠳᠬᠢᠯ ᠬᠡᠮᠡᠭᠴᠢ ᠪᠡᠶᠡ ᠶ᠋ᠢᠨ ᠡᠵᠡᠨ ᠰᠡᠳᠬᠢᠯ ᠮᠤᠩᠬᠠᠷᠠᠪᠠᠰᠤ ᠪᠡᠶᠡ ᠳᠠᠷᠤᠢ ᠬᠡᠪᠲᠡᠮᠦᠢ
ᠡᠵᠡᠨ ᠬᠡᠮᠡᠭᠴᠢ ᠤᠯᠤᠰ ᠤ᠋ᠨ ᠬᠠᠭᠠᠨ ᠡᠵᠡᠨ ᠲᠠᠰᠢᠶᠠᠷᠠᠪᠠᠰᠤ ᠤᠯᠤᠰ ᠳᠠᠷᠤᠢ ᠮᠥᠬᠥᠮᠦᠢ᠃
ᠨᠣᠢᠷ ᠬᠡᠮᠡᠭᠴᠢ ᠪᠡᠶᠡ ᠶ᠋ᠢ ᠲᠡᠵᠢᠭᠡᠬᠦ ᠪᠥᠭᠡᠲᠡᠯᠡ ᠤᠮᠳᠠᠵᠤ ᠬᠡᠲᠦᠷᠡᠪᠡᠰᠦ ᠡᠪᠡᠳᠴᠢᠨ ᠪᠣᠯᠤᠮᠤᠢ
ᠵᠢᠷᠭᠠᠯ ᠬᠡᠮᠡᠭᠴᠢ ᠬᠥᠮᠦᠨ ᠦ᠌ ᠡᠷᠢᠯᠲᠡ ᠪᠥᠭᠡᠲᠡᠯᠡ ᠵᠢᠷᠭᠠᠵᠤ ᠬᠡᠲᠦᠷᠡᠪᠡᠰᠦ ᠵᠣᠪᠠᠯᠠᠩ ᠢᠷᠡᠮᠦᠢ᠂
ᠮᠠᠭᠤ ᠶ᠋ᠢ ᠤᠵᠢᠳᠯᠠᠬᠤ ᠳ᠋ᠤᠷ ᠰᠡᠳᠬᠢᠯ ᠢ᠋ᠶ᠋ᠡᠨ ᠮᠤᠰᠬᠢᠵᠦ ᠬᠡᠷᠬᠢᠪᠡᠴᠦ ᠪᠢᠲᠡᠭᠡᠢ ᠦᠢᠯᠡᠳ
ᠰᠠᠢᠨ ᠢ᠋ ᠰᠤᠷᠬᠤᠢ ᠳ᠋ᠤᠷ ᠵᠣᠷᠢᠭ ᠢ᠋ᠶ᠋ᠠᠨ ᠴᠢᠩᠭᠠᠳᠬᠠᠨ ᠣᠨᠴᠠ ᠪᠦᠲᠦᠭᠡᠨ ᠵᠣᠭᠰᠣ᠂
ᠬᠥᠮᠦᠨ ᠬᠡᠳᠦᠢ ᠰᠡᠴᠡᠨ ᠲᠦᠷᠦᠪᠡᠴᠦ ᠰᠤᠷᠲᠠᠯ ᠦᠭᠡᠢ ᠪᠡᠷ ᠦᠯᠦ ᠪᠣᠯᠤᠮᠤᠢ᠂
ᠬᠦᠯᠦᠭ ᠬᠡᠳᠦᠢ ᠬᠤᠷᠳᠤᠨ ᠲᠦᠷᠦᠪᠡᠴᠦ ᠣᠨᠣᠯ ᠦᠭᠡᠢ ᠪᠡᠷ ᠦᠯᠦ ᠮᠡᠳᠡᠮᠦᠢ !
– – – –
① ᠡᠳᠦᠭᠡ ᠠᠷᠤ ᠥᠪᠥᠷ ᠦ᠋ᠨ ᠭᠠᠵᠠᠷ ᠴᠥᠮ ᠿᠦᠢᠽᠦ᠋ᠩ ᠲᠣᠯᠢ ᠬᠠᠭᠠᠨ ᠡᠪᠦᠭᠡ ᠶ᠋ᠢᠨ ᠥᠮᠴᠢ ᠪᠣᠯᠠᠢ᠃ ᠠᠶᠠ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠡᠪᠦᠭᠡ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠮᠤᠩᠳᠠᠴᠢ ᠲᠡᠷᠡ ᠮᠡᠲᠦ ᠬᠤᠪᠢᠶᠠᠨ ᠥᠭᠭᠦᠭᠰᠡᠨ ᠢ᠋ᠶ᠋ᠡᠷ ᠬᠣᠵᠢᠮ ᠮᠢᠩ ᠤᠯᠤᠰ ᠲᠤᠷ ᠲᠥᠷᠥ ᠪᠡᠨ ᠠᠪᠲᠠᠭᠠᠳ ᠳᠤᠲᠠᠭᠠᠨ ᠢᠷᠡᠵᠦ ᠮᠣᠩᠭᠣᠯ ᠭᠠᠵᠠᠷ ᠠᠮᠢᠳᠤᠷᠠᠪᠠ᠃ ᠬᠡᠷᠪᠡ ᠪᠠᠰᠠ ᠥᠪᠡᠷᠡ ᠤᠯᠤᠰ ᠮᠡᠲᠦ ᠨᠢᠭᠡᠨ ᠬᠥᠮᠦᠨ ᠳ᠋ᠦ᠍ᠷ ᠥᠭᠭᠦᠭᠰᠡᠨ ᠪᠥᠭᠡᠰᠦ᠂ ᠡᠳᠦᠭᠡᠬᠢ ᠶ᠋ᠢᠨ ᠲᠠᠢᠵᠢ ᠨᠠᠷ ᠣᠳᠣ ᠬᠠᠮᠢᠭᠠ ᠣᠷᠣᠰᠢᠵᠤ ᠬᠡᠷᠬᠡᠨ ᠠᠮᠢᠳᠤᠷᠠᠬᠤ ᠪᠣᠢ ᠦᠨᠡᠬᠡᠷ ᠪᠣᠭᠳᠠ ᠬᠥᠮᠦᠨ ᠦ᠌ ᠥᠴᠦᠬᠡᠨ ᠲᠡᠳᠦᠢ ᠶᠠᠪᠤᠳᠠᠯ ᠴᠤ᠌ ᠮᠢᠩᠭᠠᠨ ᠣᠨ ᠤ᠋ ᠲᠤᠰᠠ ᠪᠣᠯᠤᠮᠤᠢ᠃
ᠬᠡᠮᠡᠭᠡᠳ ᠪᠠᠰᠠ ᠲᠠᠢᠽᠢ ᠨᠠᠷ ᠠ᠋ᠴᠠ ᠠᠰᠠᠭᠤᠷᠤᠨ :《ᠬᠥᠮᠦᠨ ᠦ᠌ ᠬᠤᠷᠢᠮ ᠤ᠋ᠨ ᠳᠡᠭᠡᠳᠦ ᠬᠤᠷᠢᠮ ᠠᠯᠢ ᠪᠣᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠲᠠᠢ ᠠᠢᠯᠠᠳᠬᠠᠷᠤᠨ : 《 ᠬᠠᠭᠤᠴᠢᠨ ᠵᠢᠯ ᠬᠣᠭᠣᠰᠣᠷᠠᠨ ᠬᠣᠴᠣᠷᠴᠤ ᠰᠢᠨᠡ ᠵᠢᠯ ᠰᠢᠯᠵᠢᠵᠦ ᠢᠷᠡᠬᠦᠢ ᠳ᠋ᠦ᠍ᠷ ᠰᠠᠢᠨ ᠪᠡᠯᠭᠡᠲᠦ ᠥᠯᠵᠡᠢᠲᠦ ᠬᠤᠷᠢᠮ ᠭᠡᠮᠡᠨ ᠬᠤᠷᠢᠮᠯᠠᠭᠴᠢ ᠡᠨᠡ ᠳᠠᠷᠤᠢ ᠬᠤᠷᠢᠮ ᠤ᠋ᠨ ᠳᠡᠭᠡᠳᠦ ᠬᠤᠷᠢᠮ ᠪᠣᠢ ᠶᠠ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠮᠦᠰᠢᠶᠡᠵᠦ ᠠᠢᠯᠠᠳᠤᠷᠤᠨ : 《ᠨᠢᠷᠠᠢ ᠠ᠋ᠴᠠ ᠡᠰᠡ ᠤᠨᠠᠨ ᠨᠡᠷᠡ ᠡᠰᠡ ᠥᠭᠭᠦᠭᠡᠳ ᠬᠡᠪᠡᠯᠢ ᠡᠴᠡ ᠡᠰᠡ ᠤᠨᠠᠭᠠᠳ ᠭᠡᠭᠡᠬᠡᠨ ᠢ᠋ ᠡᠰᠡ ᠦᠵᠡᠪᠡᠰᠦ ᠬᠡᠨ ᠦ᠌ ᠰᠢᠨᠡ ᠰᠢᠨᠡᠯᠡᠬᠦ᠂ ᠬᠡᠨ ᠦ᠌ ᠨᠡᠷᠡ ᠨᠡᠷᠡᠯᠡᠬᠦ᠂ ᠡᠭᠦᠰᠦᠭᠰᠡᠨ ᠡᠴᠢᠭᠡ ᠪᠡᠨ ᠣᠯᠵᠤ᠂ ᠡᠷᠬᠢᠯᠡᠭᠰᠡᠨ ᠡᠬᠡ ᠪᠡᠨ ᠲᠠᠨᠢᠭ᠍ᠰᠠᠨ ᠲᠡᠷᠡ ᠢᠨᠦ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠳᠡᠭᠡᠳᠦ ᠵᠢᠷᠭᠠᠯ ᠳᠡᠭᠡᠳᠦ ᠪᠠᠶᠠᠷ ᠪᠣᠯᠠᠢ ! ᠡᠭᠦᠨ ᠡᠴᠡ ᠬᠣᠵᠢᠮ ᠲᠠ ᠪᠠᠷ ᠡᠴᠢᠭᠡ ᠡᠴᠡ ᠡᠳᠦᠵᠦ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠡᠳᠦᠷ ᠲᠣᠷ ᠪᠠᠶᠠᠰᠬᠤᠯᠠᠩ ᠤ᠋ᠨ ᠶᠣᠰᠣ ᠪᠠᠷ ᠲᠠᠢᠵᠤ ᠲᠠᠪᠢᠭ᠍ᠯᠠᠨ ᠬᠤᠷᠢᠮᠯᠠᠨ ᠵᠢᠷᠭᠠᠪᠠᠰᠤ ᠵᠣᠬᠢᠮᠤᠢ᠃ ᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠤᠴᠢᠷ ᠰᠢᠯᠲᠠᠭᠠᠨ ᠭᠦᠨ ᠪᠣᠯᠠᠢ !》ᠬᠡᠮᠡᠪᠡ᠃ ᠵᠠᠭᠤᠨ ᠲᠦᠰᠢᠮᠡᠳ ᠭᠠᠢᠬᠠᠨ ᠮᠥᠷᠭᠥᠪᠡ᠃ ᠬᠠᠭᠠᠨ ᠵᠠᠭᠤᠨ ᠲᠦᠰᠢᠮᠡᠳ ᠢ᠋ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠠᠢᠯᠠᠳᠬᠠ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠢ ᠴᠠᠭᠠᠲᠠᠢ ᠠᠢᠯᠠᠳᠬᠠᠷᠤᠨ : 《ᠪᠠᠭᠤᠯᠭᠠᠳᠤᠢ ᠮᠣᠳᠣᠨ ᠳ᠋ᠤᠷ ᠬᠤᠷᠴᠠ ᠬᠢᠷᠥᠭᠡ ᠬᠡᠷᠡᠭᠲᠡᠢ᠂ ᠪᠠᠭᠤᠵᠤ ᠤᠨᠠᠭᠰᠠᠨ ᠮᠣᠳᠣᠨ ᠳ᠋ᠤᠷ ᠤᠷᠠᠨ ᠮᠣᠳᠣᠴᠢ ᠬᠡᠷᠡᠭᠲᠡᠢ᠃ ᠪᠠᠢᠭᠤᠯᠤᠭᠠᠳᠤᠢ ᠲᠥᠷᠥ ᠳ᠋ᠦ᠍ᠷ ᠪᠠᠭᠠᠲᠤᠷ ᠵᠠᠩᠵᠤᠨ ᠬᠡᠷᠡᠭᠲᠡᠢ᠂ ᠪᠠᠢᠭᠤᠯᠵᠤ ᠪᠦᠲᠦᠭᠰᠡᠨ ᠲᠥᠷᠥ ᠳ᠋ᠦ᠍ᠷ ᠪᠠᠭᠰᠢᠯᠠᠬᠤ ᠮᠡᠷᠭᠡᠳ ᠬᠡᠷᠡᠭᠲᠡᠢ᠃ ᠡᠯᠳᠡᠪ ᠶᠣᠰᠣ ᠶ᠋ᠢ ᠮᠡᠳᠡᠨ ᠪᠥᠭᠡᠲᠡᠯᠡ ᠡᠰᠡ ᠬᠡᠯᠡᠬᠦ ᠰᠡᠴᠡᠨ ᠡᠴᠡ ᠡᠳᠦᠢ ᠲᠡᠳᠦᠢ ᠥᠩᠭᠡᠷᠡᠭᠰᠡᠨ ᠢ᠋ᠶ᠋ᠡᠨ ᠲᠠᠢᠯᠤᠨ ᠬᠡᠯᠡᠭᠴᠢ ᠮᠤᠩᠬᠠᠭ ᠳᠡᠭᠡᠷᠡ᠃ ᠡᠷᠳᠡᠨᠢ ᠪᠢᠯᠬᠠᠮᠠᠯ ᠠᠯᠤᠰ ᠶᠡᠬᠡ ᠳᠠᠯᠠᠢ ᠠ᠋ᠴᠠ ᠡᠭᠦᠳᠡᠨ ᠦ᠌ ᠭᠠᠳᠠᠨᠠᠬᠢ ᠥᠴᠦᠬᠡᠨ ᠬᠤᠳᠳᠤᠭ ᠤ᠋ᠨ ᠤᠰᠤ ᠳᠡᠭᠡᠷᠡ᠃ ᠡᠷᠳᠡᠮ ᠴᠢᠳᠠᠯ ᠪᠦᠷᠢᠳᠦᠭᠰᠡᠨ ᠪᠥᠭᠡᠲᠡᠯᠡ ᠡᠰᠡ ᠬᠡᠯᠡᠬᠦ ᠮᠡᠷᠭᠡᠨ ᠡᠴᠡ ᠡᠨᠳᠡ ᠲᠡᠨᠳᠡ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠭᠴᠢ ᠮᠤᠩᠬᠠᠭ ᠳᠡᠭᠡᠷᠡ᠃ ᠡᠷᠬᠢᠮ ᠤᠴᠠᠷᠠᠯ ᠳ᠋ᠤᠷ ᠡᠳ᠋ ᠲᠠᠸᠠᠷ ᠢ᠋ ᠬᠡᠷᠡᠭᠯᠡᠭᠴᠢ ᠪᠠᠶᠠᠨ ᠠ᠋ᠴᠠ ᠡᠭᠦᠷᠢᠳᠡ ᠴᠠᠭ ᠲᠤᠷ ᠲᠡᠩᠴᠡᠭᠦᠯᠦᠨ ᠶᠠᠪᠤᠭᠴᠢ ᠦᠭᠡᠢᠭᠦᠦ ᠳᠡᠭᠡᠷᠡ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠥᠭᠡᠳᠡᠢ ᠠᠢᠯᠠᠳᠬᠠᠷᠤᠨ : 《ᠬᠥᠮᠦᠨ ᠲᠥᠷᠥᠯᠬᠢᠳᠡᠨᠡ ᠵᠢᠷᠭᠤᠭᠠᠨ ᠵᠦᠢᠯ ᠦ᠋ᠨ ᠭᠡᠮᠰᠢᠯ ᠠᠮᠤᠢ᠂ ᠶᠠᠭᠤᠨ ? ᠬᠡᠮᠡᠪᠡᠰᠦ : ᠡᠷᠳᠡᠮ ᠴᠢᠳᠠᠯ ᠢ᠋ ᠬᠢᠴᠢᠶᠡᠨ ᠡᠰᠡ ᠰᠤᠷᠪᠠᠰᠤ ᠬᠡᠷᠡᠭᠯᠡᠬᠦ ᠴᠠᠭ ᠲᠤᠷ ᠭᠡᠮᠰᠢᠮᠦᠢ᠃ ᠡᠷᠡᠭᠦᠯ ᠪᠡᠶᠡ ᠪᠡᠨ ᠡᠰᠡ ᠬᠢᠴᠢᠶᠡᠨ ᠰᠤᠪᠢᠯᠠᠪᠠᠰᠤ ᠡᠪᠡᠳᠦᠭᠰᠡᠨ ᠴᠠᠭ ᠲᠤᠷ ᠭᠡᠮᠰᠢᠮᠦᠢ᠃ ᠨᠣᠶᠠᠨ ᠪᠣᠯᠵᠤ ᠠᠷᠢᠭᠤᠨ ᠡᠰᠡ ᠶᠠᠪᠤᠪᠠᠰᠤ ᠪᠠᠭᠤᠷᠠᠭᠰᠠᠨ ᠴᠠᠭ ᠲᠤ᠌ ᠭᠡᠮᠰᠢᠮᠦᠢ᠃ ᠪᠠᠶᠠᠨ ᠪᠣᠯᠤᠭᠠᠳ ᠵᠢᠷᠭᠠᠵᠤ ᠡᠰᠡ ᠴᠢᠳᠠᠪᠠᠰᠤ ᠦᠭᠡᠢᠭᠦᠷᠡᠭᠰᠡᠨ ᠴᠠᠭ ᠲᠤ᠌ ᠭᠡᠮᠰᠢᠮᠦᠢ᠃ ᠳᠡᠷᠡᠰᠦᠨᠡ ᠰᠣᠭᠲᠣᠭᠠᠳ ᠴᠡᠭᠡᠷᠯᠡᠨ ᠡᠰᠡ ᠴᠢᠳᠠᠪᠠᠰᠤ ᠰᠡᠷᠭᠦᠭᠰᠡᠨ ᠴᠠᠭ ᠲᠤ᠌ ᠭᠡᠮᠰᠢᠮᠦᠢ᠃ ᠦᠭᠡ ᠣᠯᠠᠨ ᠬᠡᠯᠡᠭᠡᠳ ᠬᠣᠣᠷ ᠢ᠋ ᠢᠳᠡᠭᠰᠡᠨ ᠴᠠᠭ ᠲᠤᠷ ᠭᠡᠮᠰᠢᠮᠦᠢ᠃ ᠮᠡᠷᠭᠡᠳ ᠰᠠᠢᠳ ᠡᠨᠡ ᠵᠢᠷᠭᠤᠭᠠᠨ ᠢ᠋ ᠪᠡᠶᠡ ᠡᠴᠡ ᠡᠰᠡ ᠬᠠᠭᠠᠴᠠᠭᠤᠯᠪᠠᠰᠤ ᠵᠣᠬᠢᠬᠤ ᠮᠡᠲᠦ᠃ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠪᠠᠰᠠ ᠭᠤᠷᠪᠠᠨ ᠬᠥᠭᠡᠷᠦᠬᠦᠢ ᠪᠣᠢ : ᠤᠷᠢᠳᠠ ᠡᠷᠭᠢᠨ ᠬᠣᠢᠨᠠ ᠪᠠᠭᠤᠷᠠᠪᠠᠰᠤ ᠬᠥᠭᠡᠷᠦᠬᠦᠢ᠂ ᠤᠷᠢᠳᠠ ᠪᠠᠶᠠᠨ ᠬᠣᠢᠨᠠ ᠶᠠᠳᠠᠭᠤᠷᠠᠪᠠᠰᠤ ᠬᠥᠭᠡᠷᠦᠬᠦᠢ᠂ ᠣᠯᠠᠨ ᠮᠤᠩᠬᠠᠭ ᠲᠤᠷ ᠭᠠᠭᠴᠠ ᠰᠡᠴᠡᠨ ᠬᠥᠭᠡᠷᠦᠬᠦᠢ᠂ ᠬᠤᠷᠪᠠᠯᠵᠢᠭᠠᠨᠠ ᠶ᠋ᠢᠨ ᠵᠤᠯᠵᠠᠭᠠ ᠰᠢᠨᠡ ᠳᠡᠭᠳᠡᠵᠦ ᠶᠠᠪᠤᠬᠤᠶᠠ ᠬᠤᠯᠤᠭᠠᠨᠠ ᠪᠠᠷᠢᠵᠤ ᠢᠳᠡᠭᠡᠳ ᠲᠡᠷᠡ ᠣᠮᠣᠭ ᠢ᠋ᠶ᠋ᠠᠷ ᠠᠯᠠᠭᠳᠠᠭᠠ ᠳ᠋ᠤᠷ ᠮᠢᠷᠢᠶᠠᠭᠰᠠᠭᠠᠷ ᠮᠢᠭᠤᠢ ᠳ᠋ᠤᠷ ᠪᠠᠷᠢᠭ᠍ᠳᠠᠨ ᠢᠳᠡᠭᠳᠡᠪᠡ᠂ ᠡᠨᠡ ᠭᠤᠷᠪᠠᠨ ᠴᠥᠮ ᠬᠥᠭᠡᠷᠦᠬᠦᠢᠯᠡᠯᠲᠡᠢ ① 》᠃ ᠬᠠᠭᠠᠨ ᠥᠴᠦᠬᠡᠨ ᠮᠦᠰᠢᠶᠡᠵᠦ ᠲᠡᠷᠢᠭᠦᠨ ᠳᠣᠬᠢᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ : 《ᠰᠡᠴᠡᠨ ᠰᠠᠢᠳ ᠤᠯᠤᠰ ᠤ᠋ᠨ ᠡᠷᠳᠡᠨᠢ ᠂ ᠮᠡᠷᠭᠡᠨ ᠡᠮᠡ ᠭᠡᠷ ᠦ᠋ᠨ ᠡᠷᠳᠡᠨᠢ ᠂ ᠪᠠᠭᠠᠲᠤᠷ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠡᠷᠳᠡᠨᠢ ᠂ ᠪᠠᠭᠲᠠᠭᠠᠮᠵᠢᠲᠤ ᠬᠥᠪᠡᠭᠦᠨ ᠭᠡᠷ ᠦ᠋ᠨ ᠡᠷᠳᠡᠨᠢ᠂ ᠦᠢᠯᠡᠰ ᠬᠡᠳᠦᠢ ᠥᠴᠦᠬᠡᠨ ᠪᠣᠯᠪᠠᠴᠤ ᠡᠰᠡ ᠡᠭᠦᠰᠬᠡᠪᠡᠰᠦ ᠦᠯᠦ ᠪᠦᠲᠦᠵᠦ᠂ ᠦᠷᠡ ᠬᠡᠳᠦᠢ ᠰᠠᠢᠨ ᠲᠥᠷᠥᠪᠡᠴᠦ ᠡᠰᠡ ᠰᠤᠷᠪᠠᠰᠤ ᠦᠯᠦ ᠮᠡᠷᠭᠡᠰᠢᠵᠦ᠂ ᠬᠥᠮᠦᠨ ᠦ᠌ ᠬᠦᠨᠳᠦᠯᠡᠭᠳᠡᠬᠦ ᠬᠥᠩᠭᠡᠯᠡᠭᠳᠡᠬᠦ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠦ᠍ᠷ ᠪᠣᠢ᠂ ᠬᠦᠷᠳᠦᠨ ᠢ᠋ ᠡᠷᠭᠢᠭᠦᠯᠬᠦ ᠵᠣᠭᠰᠣᠭᠠᠬᠤ ᠮᠠᠨ ᠤ᠋ ᠭᠠᠷ ᠲᠤᠷ ᠠᠮᠤᠢ᠂ ᠲᠠᠷᠭᠤᠨ ᠮᠣᠷᠢᠨ ᠢ᠋ ᠡᠰᠡ ᠲᠡᠵᠢᠭᠡᠬᠦᠯᠡ ᠶᠠᠭᠠᠬᠢᠨ ᠦᠯᠦ ᠲᠤᠷᠠᠮᠤᠢ ? ᠲᠠᠪᠠᠲᠠᠢ ᠨᠥᠬᠥᠷ ᠡᠰᠡ ᠰᠡᠩᠬᠡᠷᠡᠭᠦᠯᠦᠯᠡ ᠬᠡᠷᠬᠢᠨ ᠣᠯᠵᠤ ᠮᠡᠳᠡᠮᠦᠢ ? ᠲᠠᠭᠠᠯᠠᠮᠵᠢᠲᠤ ᠬᠥᠪᠡᠭᠦᠨ ᠢ᠋ ᠡᠰᠡ ᠰᠤᠷᠭᠠᠬᠤᠯᠠ ᠶᠠᠭᠠᠬᠢᠨ ᠦᠯᠦ ᠵᠠᠢᠳᠠᠮᠤᠢ ? ᠲᠡᠪᠡᠷᠢᠭᠰᠡᠨ ᠡᠮᠡ ᠪᠡᠨ ᠡᠰᠡ ᠰᠤᠪᠢᠬᠤᠯᠠ ᠬᠡᠷᠬᠢᠨ ᠡᠰᠡ ᠰᠠᠮᠠᠭᠤᠷᠠᠮᠤᠢ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠶᠤᠲᠤ ᠰᠡᠴᠡᠨ ᠡᠨᠡ ᠬᠣᠭᠣᠷᠣᠨᠳᠣ ᠦᠭᠡ ᠭᠠᠷᠭᠠᠨ ᠬᠡᠯᠡᠯᠴᠡᠵᠦ ᠣᠯᠠᠨ ᠰᠠᠢᠳ ᠤ᠋ᠨ ᠦᠭᠡᠰ ᠢ᠋ ᠡᠳᠦᠵᠦ ᠭᠠᠷᠭᠠᠨ ᠬᠠᠷᠢᠯᠴᠠᠨ ᠬᠡᠯᠡᠯᠴᠡᠭᠦᠯᠵᠦ ᠪᠠᠢᠲᠠᠯᠠ ᠬᠠᠭᠠᠨ 《 ᠮᠢᠨᠦ ᠴᠢᠬᠢᠨ ᠦ᠌ ᠰᠣᠨᠣᠰᠬᠠᠯ ᠰᠡᠳᠬᠢᠯ ᠦ᠋ᠨ ᠬᠢᠴᠢᠶᠡᠯ ᠪᠣᠯᠭᠠ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠶᠤᠲᠤ ᠰᠡᠴᠡᠨ ᠵᠠᠷᠯᠢᠭ ᠢ᠋ ᠳᠠᠭᠠᠵᠤ ᠡᠢᠨ ᠠᠢᠯᠠᠳᠬᠠᠷᠤᠨ :
ᠬᠠᠮᠤᠭ ᠠᠮᠢᠲᠠᠨ ᠵᠢᠷᠭᠠᠷᠤᠨ ᠬᠠᠭᠠᠨ ᠡᠵᠡᠨ ᠦ᠌ ᠬᠠᠮᠠᠭᠠᠯᠠᠯ ᠳ᠋ᠤᠷ ᠪᠤᠶᠤ
ᠬᠠᠲᠤᠭᠲᠠᠢ ᠬᠥᠮᠦᠨ ᠵᠢᠷᠭᠠᠷᠤᠨ ᠬᠠᠢᠷᠠᠲᠤ ᠡᠷᠡ ᠶ᠋ᠢᠨ ᠰᠠᠢᠨ ᠳ᠋ᠤᠷ ᠪᠤᠶᠤ᠂
ᠬᠠᠷᠠᠴᠤᠰ ᠠᠯᠪᠠᠲᠤ ᠠᠷᠢᠬᠢᠳᠠᠷᠤᠨ ᠬᠠᠭᠠᠨ ᠡᠵᠡᠨ ᠦ᠌ ᠬᠠᠢᠷᠠ ᠳ᠋ᠤᠷ ᠪᠤᠶᠤ
ᠬᠠᠰ ᠲᠥᠷᠥ ᠡᠩᠬᠡᠵᠢᠷᠦᠨ ᠬᠠᠮᠲᠤ ᠪᠦᠭᠦᠳᠡᠭᠡᠷ ᠦ᠋ᠨ ᠪᠠᠶᠠᠷ ᠲᠤᠷ ᠪᠤᠶᠤ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠶᠤᠨ ᠭᠤᠸᠠ ᠡᠢᠨ ᠠᠢᠯᠠᠳᠬᠠᠷᠤᠨ :
ᠬᠠᠷᠠ ᠳᠡᠷᠡᠰᠦᠨ ᠭᠡᠳᠡᠰᠦᠨ ᠳ᠋ᠦ᠍ᠷ ᠣᠷᠣᠪᠠᠰᠤ ᠬᠠᠭᠠᠨ ᠤ᠋ ᠴᠠᠭᠠᠵᠠ ᠶ᠋ᠢ ᠬᠦᠯᠢᠶᠡᠬᠦ ᠪᠤᠶᠤ
ᠬᠠᠲᠠᠭᠤ ᠵᠠᠰᠠᠭ ᠲᠤᠷ ᠭᠡᠨᠡᠳᠲᠡ ᠲᠣᠷᠭᠠᠭᠳᠠᠪᠠᠰᠤ ᠬᠠᠮᠤᠭ ᠪᠦᠬᠦᠨ ᠦ᠌ ᠡᠯᠡᠭ ᠪᠤᠶᠤ᠂
ᠬᠠᠷᠠᠩᠭᠤᠢ ᠶ᠋ᠢᠨ ᠬᠤᠯᠤᠭᠠᠨᠠ ᠢᠳᠡᠰᠢ ᠳ᠋ᠦ᠍ᠷ ᠴᠠᠳᠪᠠᠴᠤ ᠭᠠᠷᠬᠤ ᠪᠠᠨ ᠤᠮᠠᠷᠲᠠᠵᠤ
ᠬᠠᠲᠠᠷᠢᠨ ᠢᠷᠡᠬᠦ ᠮᠢᠭᠤᠢ ᠳ᠋ᠤᠷ ᠪᠠᠷᠢᠭ᠍ᠳᠠᠪᠠᠰᠤ ᠬᠠᠢᠷᠠᠬᠠᠨ ᠪᠡᠶᠡ ᠪᠡᠷ ᠢᠳᠡᠰᠢ ᠪᠣᠯᠤᠮᠤᠢ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠵᠠᠯᠭᠠᠵᠤ ᠠᠢᠯᠠᠳᠬᠠᠷᠤᠨ :
ᠬᠠᠷᠠ ᠭᠥᠷᠥᠭᠡᠰᠦ ᠬᠠᠳᠠ ᠯᠤᠭᠠ ᠲᠡᠮᠡᠴᠡᠪᠡᠰᠦ ᠪᠡᠶᠡ ᠢᠨᠦ ᠪᠠᠯᠪᠠᠷᠠᠶᠤ
ᠬᠠᠷᠠᠴᠤ ᠬᠥᠮᠦᠨ ᠬᠠᠭᠠᠨ ᠯᠤᠭᠠ ᠲᠡᠮᠡᠴᠡᠪᠡᠰᠦ ᠲᠣᠯᠣᠭᠠᠢ ᠶᠤᠭᠠᠨ ᠣᠭᠲᠣᠯᠤᠭᠳᠠᠶᠤ᠂
ᠬᠠᠪᠲᠠᠰᠤ ᠮᠡᠨᠡᠬᠡᠢ ᠬᠢᠰᠤᠭᠠ ᠯᠤᠭᠠ ᠲᠡᠮᠡᠴᠡᠪᠡᠰᠦ ᠪᠡᠶᠡ ᠶᠦ᠍ᠭᠡᠨ ᠬᠠᠪᠴᠢᠭᠳᠠᠶᠤ
ᠬᠠᠷᠢ ᠤᠯᠤᠰ ᠬᠠᠭᠠᠨ ᠯᠤᠭᠠ ᠬᠠᠯᠳᠠᠪᠠᠰᠤ ᠤᠯᠤᠰ ᠠᠨᠤ ᠡᠪᠳᠡᠷᠡᠶᠦ᠂
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠰᠢ ᠲᠣᠷᠭᠠᠨ ᠰᠢᠷᠠ ᠠᠢᠯᠠᠳᠬᠠᠷᠤᠨ :
ᠨᠣᠬᠠᠢ ᠭᠥᠯᠥᠭᠡᠯᠡᠬᠦᠢ ᠳ᠋ᠦ᠍ᠷ ᠴᠥᠭᠡᠨ ᠪᠣᠯᠪᠠᠴᠤ ᠭᠤᠷᠪᠠ ᠲᠠᠪᠤ ᠪᠥᠭᠡᠲᠡᠯᠡ
ᠨᠣᠮᠣᠬᠠᠨ ᠦᠭᠡᠢ ᠬᠠᠷᠢᠯᠴᠠᠨ ᠵᠠᠭᠤᠯᠳᠤᠵᠤ ᠨᠢᠭᠡᠨᠡ ᠦᠯᠦ ᠨᠡᠢᠯᠡᠯᠴᠡᠮᠦᠢ᠂
ᠬᠣᠨᠢ ᠠᠳᠤᠭᠤᠯᠬᠤᠢ ᠳ᠋ᠤᠷ ᠣᠯᠠᠨ ᠪᠣᠯᠪᠠᠴᠤ ᠨᠢᠭᠡᠨ ᠭᠠᠵᠠᠷᠠ ᠪᠥᠭᠡᠲᠡᠯᠡ
ᠬᠤᠷᠠᠯᠠᠯ ᠦᠭᠡᠢ ᠨᠢᠭᠡᠨᠡ ᠡᠶᠡᠳᠡᠵᠦ ᠮᠢᠩᠭᠠᠨ ᠲᠦᠮᠡᠨ ᠢ᠋ᠶ᠋ᠡᠷ ᠰᠦᠷᠦᠭᠯᠡᠮᠦᠢ᠃
ᠤᠯᠤᠰ ᠤ᠋ᠨ ᠡᠮᠦᠨᠡ ᠳᠠᠢᠰᠤᠨ ᠯᠤᠭᠠ ᠲᠡᠮᠡᠴᠡᠬᠦᠢ ᠳ᠋ᠦ᠍ᠷ ᠠᠪᠠ ᠶ᠋ᠢᠨ ᠨᠣᠬᠠᠢ ᠮᠡᠲᠦ ᠭᠦᠶᠦᠯᠳᠦᠵᠦ
ᠣᠷᠳᠣᠨᠠ ᠡᠭᠡᠵᠦ ᠲᠥᠷᠥ ᠶ᠋ᠢ ᠰᠠᠬᠢᠬᠤᠢ ᠳ᠋ᠤᠷ ᠲᠠᠯᠠ ᠶ᠋ᠢᠨ ᠬᠣᠨᠢ ᠮᠡᠲᠦ ᠰᠦᠷᠦᠭᠯᠡᠶᠡ᠂
ᠡᠵᠡᠨ ᠦ᠌ ᠭᠡᠭᠡᠨ ᠢ᠋ ᠬᠠᠮᠠᠭᠠᠯᠠᠨ ᠶᠠᠪᠤᠬᠤᠢ ᠳ᠋ᠤᠷ ᠭᠡᠷ ᠦ᠋ᠨ ᠨᠣᠬᠠᠢ ᠮᠡᠲᠦ ᠰᠠᠬᠢᠵᠤ
ᠡᠭᠡᠵᠦ ᠡᠷᠢᠨ ᠴᠠᠭᠠᠵᠠ ᠶ᠋ᠢ ᠰᠠᠬᠢᠬᠤᠢ ᠳ᠋ᠤᠷ ᠰᠢᠪᠡᠭᠡ ᠶ᠋ᠢᠨ ᠬᠣᠨᠢ ᠮᠡᠲᠦ ᠰᠠᠭᠤᠯᠴᠠᠶᠠ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠰᠢ ᠲᠠᠢ ᠰᠡᠴᠡᠨ ᠡᠢᠨ ᠠᠢᠯᠠᠳᠬᠠᠷᠤᠨ :
ᠨᠣᠬᠠᠢ ᠮᠡᠲᠦ ᠨᠥᠬᠥᠷ ᠢ᠋ ᠣᠯᠬᠤᠶᠠ ᠪᠡᠷᠬᠡ
ᠨᠣᠮᠣᠢ ᠶᠠᠳᠠᠩᠭᠢ ᠳ᠋ᠤᠷ ᠲᠡᠵᠢᠭᠡᠭᠳᠡᠪᠡᠴᠦ ᠪᠠᠶᠠᠨ ᠡᠯᠪᠡᠭ ᠢ᠋ ᠦᠯᠦ ᠳᠠᠭᠠᠮᠤᠢ᠂
ᠬᠠᠷᠠᠴᠤᠰ ᠠᠯᠪᠠᠲᠤ ᠳ᠋ᠤᠷ ᠲᠡᠵᠢᠭᠡᠭᠳᠡᠪᠡᠴᠦ ᠬᠠᠳ ᠨᠣᠶᠠᠳ ᠢ᠋ ᠦᠯᠦ ᠳᠠᠭᠠᠮᠤᠢ
ᠬᠠᠳᠠᠨ ᠵᠣᠷᠢᠭ᠍ᠲᠠᠨ ᠪᠣᠯᠤᠭᠠᠳ ᠨᠣᠬᠠᠢ ᠳ᠋ᠤᠷ ᠡᠰᠡ ᠬᠦᠷᠪᠡᠰᠦ ᠪᠤᠯᠬᠤᠢ ᠤᠤ ?
ᠠᠷᠪᠠᠨ ᠪᠡᠶᠡ ᠨᠢᠭᠡᠨ ᠲᠣᠯᠣᠭᠠᠢᠲᠤ ᠵᠢᠭᠠᠰᠤ ᠠᠮᠢᠳᠤᠷᠠᠬᠤᠢ ᠳ᠋ᠤᠷ ᠮᠠᠰᠢ ᠬᠢᠯᠪᠠᠷ ②
ᠶᠢᠰᠦᠨ ᠲᠣᠯᠣᠭᠠᠢ ᠨᠢᠭᠡᠨ ᠪᠡᠶᠡᠲᠦ ᠰᠢᠪᠠᠭᠤ③ ᠠᠮᠢᠳᠤᠷᠠᠬᠤᠢ ᠳ᠋ᠤᠷ ᠮᠠᠰᠢ ᠪᠡᠷᠬᠡ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠵᠥᠪᠰᠢᠶᠡᠪ᠃ ᠲᠡᠳᠦᠢ ᠲᠠᠢᠪᠤᠤ ᠮᠤᠬᠤᠯᠢ ᠶ᠋ᠢᠨ ᠳᠡᠪᠡᠯ ᠲᠣᠰᠣᠳᠠᠭᠰᠠᠨ ᠳ᠋ᠤᠷ ᠳᠠᠬᠢᠨ ᠳᠠᠬᠢᠨ ᠠᠷᠴᠢᠬᠤᠢ ᠳ᠋ᠤᠷ ᠪᠤᠭᠤᠷᠵᠢ ᠢᠨᠢᠶᠡᠨ ᠮᠤᠬᠤᠯᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ : 《ᠲᠣᠰᠣᠲᠤ ᠬᠤᠷᠢᠮ ᠴᠢᠰᠤᠲᠤ ᠪᠤᠯᠠᠭᠠ᠂ ᠡᠵᠡᠨ ᠢᠨᠦ ᠴᠢᠬᠤᠯᠠ᠂ ᠡᠳ᠋ ᠬᠡᠮᠡᠭᠴᠢ ᠬᠡᠪᠡᠷᠡᠭ᠂ ᠲᠡᠭᠦᠨ ᠢ᠋ ᠳᠡᠮᠡᠢᠯᠡ ᠠᠷᠴᠢᠵᠤ ᠰᠢᠮᠰᠢᠷᠡᠬᠦ ᠢᠨᠤ ᠶᠠᠭᠤᠨ ？ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠪᠤᠤ ᠮᠤᠬᠤᠯᠢ ᠢᠨᠢᠶᠡᠨ ᠬᠠᠷᠢᠭᠤ ᠥᠴᠢᠷᠦᠨ :《ᠲᠥᠷᠥᠭᠰᠡᠨ ᠪᠡᠶᠡ ᠦᠬᠦᠵᠦ᠂ ᠦᠬᠦᠨ ᠦᠬᠦᠲᠡᠯᠡ ᠴᠢᠷᠮᠠᠢᠲᠤᠭᠠᠢ᠂ ᠡᠭᠦᠳᠦᠭᠰᠡᠨ ᠡᠳ᠋ ᠡᠯᠡᠵᠦ ᠡᠯᠡᠨ ᠡᠯᠡᠲᠡᠯᠡ ᠬᠠᠢᠷᠠᠯᠠᠭᠳᠠᠬᠤᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ᠂ ᠬᠠᠭᠠᠨ ᠤ᠋ ᠭᠡᠭᠡᠨ ᠪᠡᠶᠡᠰᠦᠨ ᠮᠦᠰᠢᠶᠡᠵᠦ ᠬᠣᠶᠠᠷ ᠲᠠᠢᠪᠤᠤ ᠶ᠋ᠢ ᠴᠥᠮ ᠵᠥᠪᠰᠢᠶᠡᠨ ᠰᠠᠢᠰᠢᠶᠠᠪᠠ᠃ ᠲᠠᠢᠰᠢ ᠥᠷᠯᠥᠭ ᠨᠣᠶᠠᠨ᠂ ᠪᠠᠶᠠᠨ ᠨᠣᠶᠠᠨ ᠬᠠᠷᠢᠯᠴᠠᠨ ᠣᠢᠷᠠ ᠰᠠᠭᠤᠵᠤ ᠬᠠᠭᠠᠨ ᠤ᠋ ᠬᠡᠰᠢᠭ ᠢ᠋ ᠭᠥᠷᠳᠡᠬᠦᠢ ᠳ᠋ᠦ᠍ᠷ ᠬᠠᠭᠠᠨ ᠡᠩ ᠦ᠋ᠨ ᠡᠳᠦᠷ ᠲᠡᠷᠡ ᠬᠣᠶᠠᠷ ᠤ᠋ᠨ ᠰᠠᠢᠬᠠᠨ ᠢ᠋ ᠮᠡᠳᠡᠵᠦ ᠵᠠᠷᠯᠢᠭ ᠪᠣᠯᠵᠤ ᠠᠰᠠᠭᠤᠷᠤᠨ : 《ᠲᠠ ᠬᠣᠶᠠᠭᠤᠯᠠ ᠰᠠᠢᠨ ᠠᠬᠠ ᠳᠡᠭᠦᠦ ᠭᠡᠮᠡᠨ ᠶᠠᠪᠤᠬᠤ ᠠᠨᠤ ᠡᠨᠡ ᠠᠬᠠ ᠳᠡᠭᠦᠦ ᠬᠡᠮᠡᠬᠦ ᠶᠣᠰᠣᠨ ᠢ᠋ ᠨᠠᠳᠠ ᠳ᠋ᠤᠷ ᠠᠢᠯᠠᠳᠬᠠ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠭᠤᠯᠠ ᠶᠠᠭᠠᠷᠠᠨ ᠠᠢᠯᠠᠳᠬᠠᠷᠤᠨ :
ᠦᠭᠡᠢᠭᠦᠦ ᠥᠴᠦᠭᠦᠬᠡᠨ ᠦᠶᠡ ᠳ᠋ᠦ᠍ᠷ ᠥᠲᠡᠭᠦᠰ ᠨᠢᠯᠬᠠ ᠪᠠᠨ ᠲᠡᠳᠬᠦᠯᠴᠡᠨ
ᠥᠨᠳᠥᠷ ᠡᠷᠬᠢᠮ ᠪᠣᠯᠤᠭᠰᠠᠨ ᠳ᠋ᠤᠷ ᠦᠭᠡ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠨᠡᠪᠲᠡᠷᠡᠯᠴᠡᠨ᠂
ᠥᠷᠯᠥᠭᠡ ᠦᠳᠡᠰᠢ ᠶ᠋ᠢᠨ ᠵᠠᠪᠰᠠᠷ ᠲᠤᠷ ᠲᠡᠭᠦᠨ ᠦ᠌ ᠠᠯᠳᠠᠰᠢ ᠶ᠋ᠢ ᠰᠠᠨᠠᠭᠠᠯᠵᠠᠭᠤᠯᠤᠨ
ᠥᠪᠡᠷ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠦ᠍ᠷ ᠬᠠᠷᠢᠯᠴᠠᠨ ᠪᠠᠭ᠍ᠰᠢ ᠪᠣᠯᠤᠯᠴᠠᠮᠤᠢ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠤ᠋ ᠭᠡᠭᠡᠨ ᠮᠠᠰᠢᠳᠠ ᠵᠥᠪᠰᠢᠶᠡᠵᠦ᠂ ᠭᠦᠸᠧ ᠯᠤᠤ ᠴᠣᠢᠴᠣᠯᠢ ᠠ᠋ᠴᠠ ᠵᠠᠷᠯᠢᠭ ᠪᠣᠯᠵᠤ ᠠᠰᠠᠭᠤᠷᠤᠨ : 《ᠬᠥᠭᠰᠢᠨ ᠬᠥᠮᠦᠨ ᠶᠠᠭᠤᠨ ᠳ᠋ᠤᠷ ᠭᠠᠭᠴᠠ ᠵᠠᠯᠠᠭᠤᠰ ᠤ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠤᠨ ᠳ᠋ᠤᠷ ᠦᠯᠦ ᠥᠭᠦᠯᠡᠮᠦᠢ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠣᠢᠴᠣᠯᠢ ᠶᠠᠭᠠᠷᠠᠨ ᠰᠥᠭᠥᠳᠴᠦ ᠠᠢᠯᠠᠳᠬᠠᠷᠤᠨ :
ᠬᠤᠷᠴᠠ ᠬᠢᠲᠤᠭᠠ ᠮᠣᠬᠣᠷᠠᠪᠠᠰᠤ ᠣᠭᠲᠣᠯᠵᠤ ᠦᠯᠦ ᠳᠠᠭᠠᠭᠠᠵᠤ
ᠬᠤᠷᠳᠤᠨ ᠬᠦᠯᠦᠭ ᠬᠥᠭᠰᠢᠷᠡᠪᠡᠰᠦ ᠬᠣᠭᠣᠰᠣᠨ ᠳᠣᠪᠲᠣᠯᠵᠤ ᠦᠯᠦ ᠴᠢᠳᠠᠬᠤ᠂
ᠬᠦᠴᠦᠲᠦ ᠡᠷᠡᠰ ᠬᠥᠭᠰᠢᠷᠡᠪᠡᠰᠦ ᠬᠣᠭᠣᠰᠣᠨ ᠨᠡᠷᠡ ᠪᠣᠯᠤᠶᠤ
ᠬᠥᠪᠴᠢᠨ ᠰᠠᠢᠳ ᠬᠥᠭᠰᠢᠷᠡᠭᠰᠡᠨ ᠲᠤᠯᠠ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠴᠢᠩᠨᠠᠮᠤᠢ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠪᠡᠶᠡᠰᠦᠨ ᠮᠦᠰᠢᠶᠡᠵᠦ᠂ ᠴᠠᠭᠠᠨ ᠬᠠᠭᠠᠨ ᠠ᠋ᠴᠠ ᠠᠰᠠᠭᠤᠷᠤᠨ :《ᠲᠠᠢᠰᠢ ᠴᠢ ᠮᠥᠨ ᠬᠡᠳᠦᠨ ᠦᠭᠡᠰ ᠬᠡᠯᠡᠵᠦ ᠣᠯᠠᠨ ᠳ᠋ᠤᠷ ᠶᠠᠭᠤᠨ ᠳ᠋ᠤᠷ ᠰᠤᠷᠭᠠᠯ ᠦᠯᠦ ᠪᠣᠯᠭᠠᠮᠤᠢ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠶᠠᠭᠠᠷᠠᠨ ᠰᠥᠭᠥᠳᠴᠦ ᠠᠢᠯᠠᠳᠬᠠᠷᠤᠨ :
ᠬᠤᠪᠴᠠᠳ ᠤ᠋ᠨ ᠰᠠᠢᠨ ᠬᠤᠶᠠᠭ ᠪᠥᠭᠡᠲᠡᠯᠡ
ᠬᠤᠷᠢᠮ ᠳ᠋ᠤᠷ ᠡᠮᠦᠰᠪᠡᠰᠦ ᠵᠣᠬᠢᠬᠤ ᠦᠭᠡᠢ᠂
ᠦᠭᠡᠰ ᠦ᠋ᠨ ᠡᠷᠬᠢᠮ ᠲᠤᠩᠬᠠᠭ ᠪᠥᠭᠡᠲᠡᠯᠡ
ᠲᠥᠷᠥ ᠳ᠋ᠦ᠍ᠷ ᠨᠠᠭᠠᠪᠠᠰᠤ ᠵᠣᠬᠢᠰ ᠦᠭᠡᠢ᠃
ᠬᠠᠢᠷᠠ ᠬᠡᠳᠦᠢ ᠭᠦᠨ ᠪᠣᠯᠪᠠᠴᠤ
ᠬᠠᠭᠠᠨ ᠡᠵᠡᠨ ᠢ᠋ ᠬᠢᠴᠢᠶᠡᠩᠭᠦᠢᠯᠡᠮᠦᠢ᠂
ᠥᠷᠥᠰᠢᠶᠡᠯ ᠬᠡᠳᠦᠢ ᠦᠯᠡᠮᠵᠢ ᠪᠣᠯᠪᠠᠴᠤ
ᠦᠨᠡᠨ ᠡᠵᠡᠨ ᠡᠴᠡ ᠪᠡᠨ ᠰᠢᠷᠪᠡᠭᠡᠲᠦᠮᠦᠢ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ 《ᠰᠢᠳᠤᠷᠭᠤ ᠰᠠᠢᠳ ᠤ᠋ᠨ ᠦᠭᠡ ᠮᠥᠨ !》ᠭᠡᠮᠡᠨ᠂ ᠯᠢᠳᠠᠷ ᠰᠡᠴᠡᠨ ᠡᠴᠡ ᠵᠠᠷᠯᠢᠭ ᠪᠣᠯᠤᠨ ᠠᠰᠠᠭᠤᠭᠰᠠᠨᠠ ᠯᠢᠳᠠᠷ ᠰᠡᠴᠡᠨ ᠰᠥᠭᠥᠳᠴᠦ ᠠᠢᠯᠠᠳᠬᠠᠷᠤᠨ :
ᠬᠠᠯᠲᠤᠷᠢᠰᠢ ᠦᠭᠡᠢ ᠬᠦᠯᠦᠭ
ᠬᠢᠵᠠᠭᠠᠯᠠᠰᠢ ᠦᠭᠡᠢ ᠮᠡᠷᠭᠡᠨ ᠬᠡᠮᠡᠭᠴᠢ ᠡᠨᠡ ᠬᠣᠶᠠᠷ ᠶᠠᠭᠤᠨ ᠪᠣᠢ ?
ᠦᠬᠦᠬᠦ ᠶ᠋ᠢ ᠤᠮᠠᠷᠲᠠᠨ ᠦᠨᠡᠨ ᠲᠥᠷᠥ ᠳ᠋ᠦ᠍ᠷ ᠵᠢᠳᠬᠦᠭᠴᠢ
ᠬᠠᠯᠲᠤᠷᠢᠰᠢ ᠦᠭᠡᠢ ᠬᠦᠯᠦᠭ᠂
ᠥᠪᠡᠷ ᠦ᠋ᠨ ᠪᠤᠷᠤᠭᠤ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠡᠷᠢᠭᠴᠢ
ᠬᠢᠵᠠᠭᠠᠷ ᠦᠭᠡᠢ ᠮᠡᠷᠭᠡᠨ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠲᠡᠷᠢᠭᠦᠨ ᠳᠣᠬᠢᠵᠤ ᠮᠥᠨ ᠮᠥᠨ ᠭᠡᠮᠡᠨ ᠰᠠᠢᠰᠢᠶᠠᠵᠤ ᠣᠯᠠᠨ ᠳ᠋ᠤᠷ ᠵᠠᠷᠯᠢᠭ ᠪᠣᠯᠤᠷᠤᠨ :
ᠰᠠᠢᠨ ᠨᠥᠬᠥᠷ ᠦ᠋ᠨ ᠰᠢᠷᠦᠭᠦᠨ ᠢ᠋ ᠰᠥᠰᠥᠯᠡᠵᠦ ᠳᠠᠭᠠᠭᠠᠳ
ᠰᠠᠯᠤᠭᠰᠠᠨ ᠤ᠋ ᠬᠣᠢᠨᠠ ᠰᠡᠳᠬᠢᠯ ᠢ᠋ ᠢᠨᠤ ᠪᠣᠳᠣᠪᠠᠰᠤ
ᠡᠨᠡ ᠴᠣᠬᠣᠮ ᠠᠬᠠ ᠳᠡᠭᠦᠦ ᠨᠥᠬᠥᠷ ᠬᠠᠨᠢ ᠶ᠋ᠢᠨ ᠦᠨᠡᠨ ᠶᠣᠰᠣ ᠮᠥᠨ᠃
ᠲᠥᠷᠥ ᠶ᠋ᠢᠨ ᠶᠣᠰᠣ ᠲᠥᠪ ᠪᠣᠯᠪᠠᠰᠤ ᠲᠦᠮᠡᠨ ᠬᠥᠮᠦᠨ ᠪᠢᠰᠢᠷᠡᠮᠦᠢ᠃
ᠲᠥᠷᠥᠭᠰᠡᠨ ᠡᠯᠢᠭᠡ ᠢᠨᠠᠭ ᠪᠣᠯᠪᠠᠰᠤ ᠲᠦᠪᠡᠭᠳᠡᠭᠰᠡᠨ ᠨᠥᠬᠥᠷ ᠪᠢᠰᠢᠷᠡᠮᠦᠢ᠃
ᠡᠵᠡᠨ ᠰᠠᠢᠳ ᠮᠡᠷᠭᠡᠨ ᠪᠣᠯᠪᠠᠰᠤ ᠡᠩᠭᠡᠷ ᠨᠡᠢᠲᠡ ᠪᠢᠰᠢᠷᠡᠮᠦᠢ᠃
ᠡᠴᠢᠭᠡ ᠬᠥᠪᠡᠭᠦᠨ ᠡᠯᠪᠡᠷᠢᠯᠲᠦ ᠪᠣᠯᠪᠠᠰᠤ ᠡᠯᠡ ᠪᠦᠭᠦᠳᠡᠭᠡᠷ ᠪᠢᠰᠢᠷᠡᠮᠦᠢ᠃
ᠠᠬᠠ ᠳᠡᠭᠦᠦ ᠠᠮᠠᠷᠠᠭ ᠪᠣᠯᠪᠠᠰᠤ ᠠᠯᠢᠪᠠ ᠬᠥᠮᠦᠨ ᠪᠢᠰᠢᠷᠡᠮᠦᠢ᠃
ᠠᠴᠢ ᠦᠷᠡ ᠲᠠᠬᠢᠮᠳᠠᠭᠤ ᠪᠣᠯᠪᠠᠰᠤ ᠠᠯᠤᠰ ᠬᠣᠯᠠ ᠪᠢᠰᠢᠷᠡᠮᠦᠢ᠃
ᠠᠪᠤᠭᠰᠠᠨ ᠡᠮᠡ ᠡᠶᠡᠯᠰᠡᠭ ᠪᠣᠯᠪᠠᠰᠤ ᠠᠢᠯ ᠭᠠᠴᠠᠬᠠ ᠳ᠋ᠠᠭᠠᠨ ᠪᠢᠰᠢᠷᠡᠮᠦᠢ᠂
ᠠᠮᠠᠷᠠᠭᠯᠠᠭᠰᠠᠨ ᠨᠥᠬᠥᠷ ᠪᠠᠲᠤ ᠪᠣᠯᠪᠠᠰᠤ ᠠᠰᠢᠳᠠ ᠪᠤᠰᠤᠳ ᠪᠢᠰᠢᠷᠡᠮᠦᠢ᠃
ᠭᠡᠮᠡᠨ ᠵᠠᠷᠯᠢᠭ ᠪᠣᠯᠵᠤ᠂ ᠣᠯᠠᠨ ᠲᠦᠰᠢᠮᠡᠳ ᠬᠠᠷᠢᠯᠴᠠᠨ ᠬᠡᠯᠡᠯᠴᠡᠵᠦ ᠬᠠᠭᠠᠨ ᠳ᠋ᠤᠷ ᠲᠤᠰᠠᠲᠤ᠂ ᠲᠥᠷᠥ ᠳ᠋ᠦ᠍ᠷ ᠬᠡᠷᠡᠭᠲᠦ ᠦᠭᠡᠰ ᠢ᠋ ᠰᠢᠭᠦᠮᠵᠢᠯᠡᠨ ᠬᠡᠯᠡᠯᠴᠡᠵᠦ ᠨᠢᠭᠡᠨ ᠡᠳᠦᠷ ᠬᠤᠷᠢᠮᠯᠠᠵᠤ ᠲᠠᠷᠬᠠᠯᠴᠠᠪᠠ᠃ ᠳᠠᠷᠠᠭᠠ ᠪᠠᠷ ᠬᠡᠳᠦ ᠬᠡᠳᠦᠨ ᠡᠳᠦᠷ ᠡᠷᠭᠦᠮᠵᠢᠯᠡᠬᠦ ᠱᠠᠩᠨᠠᠬᠤ ᠬᠤᠷᠢᠮ ᠬᠤᠷᠢᠮᠯᠠᠵᠤ᠂ ᠴᠠᠭᠠᠨ ᠰᠠᠷᠠ ᠥᠩᠭᠡᠷᠡᠭᠰᠡᠨᠡ᠂ ᠳᠠᠷᠠᠭᠠ ᠬᠣᠶᠠᠷ ᠨᠤᠭᠤᠯᠪᠤᠷᠢ ᠳᠣᠪᠲᠣᠯᠭᠠᠨ ᠠᠢᠯᠠᠳᠬᠠᠪᠠ᠃ ᠨᠢᠭᠡᠨ ᠨᠤᠭᠤᠯᠪᠤᠷᠢ ᠠᠨᠤ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠯᠢᠶᠣᠤ ᠸᠠᠩ ᠶᠧ ᠯᠢᠦᠢ ᠯᠢᠦ ᠭᠧ ᠶ᠋ᠢᠨ ᠵᠢᠷᠤᠮ ᠦᠭᠡᠢ ᠳᠥᠷᠪᠡᠨ ᠲᠦᠰᠢᠮᠡᠯ – ᠴᠢᠨᠣᠠ᠂ ᠵᠢᠨᠱᠠᠨ᠂ ᠴᠢᠩ ᠭᠧᠦ᠂ ᠲᠦᠩ ᠬᠦ᠌ ᠢᠦᠢ ᠳᠥᠷᠪᠡᠭᠦᠯᠡ ᠨᠢᠭᠡᠳᠦᠭᠡᠳ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠰᠤᠯᠠ ᠢᠷᠭᠡᠨ ᠢ᠋ ᠮᠡᠬᠡᠯᠡᠨ ᠶᠧ ᠯᠢᠦᠢ ᠯᠢᠦ ᠭᠧ ᠮᠣᠩᠭᠣᠯ ᠳ᠋ᠤᠷ ᠦᠬᠦᠬᠦ ᠳ᠋ᠡᠭᠡᠨ ᠶᠠᠰᠢᠪᠦ᠋ ᠶ᠋ᠢ ᠬᠠᠭᠠᠨ ᠰᠠᠭᠤᠯᠭᠠ ᠭᠡᠮᠡᠨ ᠭᠡᠷᠢᠶᠡᠰᠦᠯᠡᠪᠡ ᠬᠡᠮᠡᠵᠦ ᠬᠠᠭᠤᠷᠮᠠᠭ ᠲᠤᠩᠬᠠᠭᠯᠠᠭᠠᠳ ᠶᠠᠰᠢᠪᠦ᠋ ᠶ᠋ᠢ ᠴᠧᠨ ᠵᠧᠦ ᠬᠣᠲᠠᠨ ᠳ᠋ᠤᠷ ᠬᠠᠭᠠᠨ ᠰᠠᠭᠤᠯᠭᠠᠭᠠᠳ ᠤᠯᠤᠰ ᠤ᠋ᠨ ᠨᠡᠷᠡ ᠶ᠋ᠢ ᠶᠡᠬᠡ ᠯᠢᠶᠣᠤ ᠭᠡᠮᠡᠨ ᠨᠡᠷᠡᠢᠳᠦᠭᠡᠳ ᠲᠢᠶᠠᠨ ᠸᠧᠢ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠶᠧ ᠯᠢᠦᠢ ᠯᠢᠦ ᠭᠧ ᠶ᠋ᠢᠨ ᠠᠬᠠ ᠶᠧ ᠯᠢᠦᠢ ᠳᠦ ᠯᠡ ᠶ᠋ᠢ ᠰᠢᠳᠤᠷᠭᠤ ᠲᠤᠯᠠ ᠲᠣᠯᠣᠭᠠᠢ ᠳᠠᠷᠤᠵᠤ ᠫᠢᠩ ᠵᠠᠩ ᠵᠧᠩ ᠱᠢ ᠲᠦᠰᠢᠮᠡᠯ ᠪᠣᠯᠭᠠᠵᠤ᠂ ᠵᠠᠭᠤᠨ ᠲᠤᠰᠢᠮᠡᠳ ᠦ᠋ᠨ ᠵᠡᠷᠭᠡ ᠶ᠋ᠢ ᠢᠯᠭᠠᠨ ᠰᠠᠯᠭᠠᠨ ᠳᠡᠰ ᠳᠠᠷᠠᠭᠠᠯᠠᠨ ᠲᠠᠯᠪᠢᠵᠤ᠂ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠯᠠᠪ ᠵᠦᠭᠡᠷ ᠦᠯᠦ ᠲᠠᠯᠪᠢᠬᠤ ᠶ᠋ᠢ ᠮᠡᠳᠡᠬᠦ ᠲᠤᠯᠠ ᠲᠤᠯᠬᠤ ᠪᠠ ᠰᠠᠬᠢᠬᠤ ᠶ᠋ᠢ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠰᠢᠨᠡ ᠡᠵᠡᠨ ᠲᠦᠰᠢᠮᠡᠯ ᠦ᠋ᠨ ᠰᠡᠳᠬᠢᠯ ᠵᠥᠷᠢᠯᠴᠡᠪᠡ᠃ ᠡᠵᠡᠨ ᠢᠨᠦ ᠶᠠᠰᠢᠪᠦ᠋ ᠮᠣᠩᠭᠣᠯ ᠢ᠋ ᠤᠭᠲᠤᠨ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠮᠦᠢ᠃ ᠲᠦᠰᠢᠮᠡᠯ ᠴᠢᠨᠣᠠ ᠪᠥᠭᠡᠰᠦ ᠵᠠᠢᠯᠠᠨ ᠪᠠᠢᠵᠤ ᠠᠷᠭᠠ ᠶ᠋ᠢ ᠦᠵᠡᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠶᠠᠰᠢᠪᠦ᠋ ᠦᠯᠦ ᠬᠦᠯᠢᠶᠡᠨ ᠠᠭᠤᠷᠯᠠᠵᠤ ᠴᠢᠨᠣᠠ᠂ ᠴᠢᠩ ᠭᠧᠦ ᠬᠣᠶᠠᠷ ᠢ᠋ ᠪᠠᠭᠤᠷᠠᠭᠤᠯᠤᠨ ᠬᠥᠭᠡᠭᠡᠭᠡᠳ ᠴᠡᠷᠢᠭ ᠠᠪᠴᠤ ᠢ ᠵᠧᠦ᠂ ᠭᠤᠸᠠᠩ ᠨᠢᠩ ᠦ᠋ᠨ ᠵᠡᠷᠭᠡ ᠬᠣᠲᠠ ᠶ᠋ᠢ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠳ᠋ᠤᠷ ᠴᠢᠩ ᠭᠧᠦ ᠠᠯᠲᠠᠨ ᠤᠯᠤᠰ ᠲᠤᠷ ᠣᠷᠣᠵᠤ ᠳᠠᠭᠠᠪᠠ᠃ ᠴᠢᠨᠣᠠ ᠰᠤᠯᠠ ᠢᠷᠭᠡᠨ ᠯᠦ᠍ᠭᠡ ᠵᠥᠪᠯᠡᠵᠦ ᠶᠠᠰᠢᠪᠦ᠋ ᠶ᠋ᠢ ᠴᠡᠷᠢᠭ ᠪᠦᠭᠭᠦᠵᠦ ᠰᠢᠭᠤᠳ ᠪᠠᠷᠢᠵᠤ ᠠᠯᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠣᠷᠣᠵᠤ ᠬᠠᠭᠠᠨ ᠰᠠᠭᠤᠭᠰᠠᠨ ᠡᠨᠡ ᠨᠢᠭᠡᠨ ᠬᠡᠷᠡᠭ᠃ ᠬᠣᠶᠠᠳᠤᠭᠠᠷ ᠨᠤᠭᠤᠯᠪᠤᠷᠢ ᠠᠨᠤ ᠶ᠋ᠢᠨ ᠵᠧᠦ ᠶ᠋ᠢᠨ ᠵᠠᠩ ᡁᠢ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠴᠡᠷᠢᠭ ᠵᠢᠭᠡᠯᠡᠨ ᠢᠷᠡᠵᠦ᠂ ᠶ᠋ᠢᠨ ᠵᠧᠦ ᠬᠣᠲᠠᠨ ᠢ᠋ ᠳᠠᠬᠢᠨ ᠪᠤᠯᠢᠶᠠᠨ ᠠᠪᠴᠤ ᠡᠵᠡᠯᠡᠭᠡᠳ ᠲᠤᠯᠬᠤ ᠶ᠋ᠢ ᠪᠡᠯᠡᠳᠴᠦ ᠬᠢᠵᠠᠭᠠᠷ ᠢ᠋ ᠰᠠᠮᠠᠭᠤᠷᠠᠭᠤᠯᠬᠤ ᠡᠨᠡ ᠨᠢᠭᠡᠨ ᠬᠡᠷᠡᠭ᠃ ᠡᠢᠮᠦ ᠬᠣᠶᠠᠷ ᠠᠩᠭᠢ ᠲᠤᠯᠠ ᠬᠠᠭᠠᠨ ᠤ᠋ ᠭᠡᠭᠡᠨ ᠠᠵᠢᠨᠠᠢ ᠮᠡᠷᠭᠡᠨ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠳ᠋ᠤᠷ : 《ᠠᠯᠤᠬᠠ᠂ ᠰᠦᠬᠡ᠂ ᠤᠨᠵᠢᠭᠠᠢ᠂ ᠰᠤᠨᠵᠢᠭᠠᠢ᠂ ᠪᠣᠯᠢᠬ᠍ᠲᠤ ᠪᠠᠷᠰ᠂ ᠰᠢᠯᠢᠭᠲᠦ ᠪᠠᠷᠰ᠂ ᠬᠣᠪᠤᠯᠠᠢ᠂ ᠱᠤᠪᠤᠯᠠᠢ ᠨᠠᠢ᠍ᠮᠠᠨ ᠵᠠᠩᠵᠤᠨ ᠢ᠋ ᠲᠤᠰᠢᠶᠠᠨ ᠠᠷᠪᠠᠨ ᠵᠠᠩᠵᠤᠨ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠲᠤᠰᠢᠶᠠᠵᠤ᠂ ᠶᠧ ᠯᠢᠦᠢ ᠯᠢᠦ ᠭᠧ ᠶ᠋ᠢ ᠳᠠᠭᠠᠭᠤᠯᠤᠨ᠂ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠭᠠᠵᠠᠷ ᠢ᠋ ᠠᠪᠴᠤ ᠥᠭᠭᠦᠭᠡᠳ ᠤᠷᠪᠠᠭᠰᠠᠨ ᠬᠤᠯᠠᠭᠠᠢ ᠶ᠋ᠢ ᠦᠨᠳᠦᠰᠦᠨ ᠢ᠋ᠶ᠋ᠡᠷ ᠱᠦᠭᠦᠷᠳᠡᠨ ᠠᠷᠢᠯᠭᠠ᠃ ᠵᠢᠴᠢ ᠶ᠋ᠢᠨ ᠵᠧᠦ ᠶ᠋ᠢᠨ ᠵᠠᠩ ᡁᠢ ᠶ᠋ᠢ ᠨᠠᠮᠤᠷ ᠯᠢᠦ ᠱᠢ ᠶ᠋ᠢᠨ ᠦᠯᠡᠭᠰᠡᠨ ᠢ᠋ ᠳᠠᠢᠯᠠᠬᠤᠢ ᠳ᠋ᠤᠷ ᠬᠠᠮᠲᠤ ᠱᠦᠭᠦᠷᠳᠡᠨ ᠠᠷᠢᠯᠭᠠ᠃ ᠪᠢ ᠡᠨᠡ ᠵᠢᠯ ᠲᠥᠯᠭᠡᠯᠡᠨ ᠦᠵᠡᠬᠦᠯᠡ ᠮᠠᠨ ᠤ᠋ ᠴᠡᠷᠢᠭ ᠡᠨᠡ ᠵᠢᠯ ᠠᠯᠲᠠᠨ ᠤᠯᠤᠰ ᠲᠤᠷ ᠣᠷᠣᠪᠠᠴᠤ ᠳᠡᠮᠡᠢ ᠠᠰᠢᠭ᠋ ᠦᠭᠡᠢ᠂ ᠲᠡᠢᠨ ᠬᠦ᠌ ᠬᠠᠭᠤᠴᠢᠨ ᠤᠯᠤᠰ ᠢ᠋ ᠲᠡᠭᠰᠢᠯᠡᠪᠡᠰᠦ ᠳᠡᠭᠡᠷᠡ ᠮᠡᠲᠦ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠠᠢᠯᠠᠳᠬᠠᠷᠤᠨ : 《ᠠᠯᠲᠠᠨ ᠤᠯᠤᠰ ᠢ᠋ ᠰᠤᠯᠠ ᠲᠠᠯᠪᠢᠵᠤ ᠦᠯᠦ ᠪᠣᠯᠤᠮᠤᠢ᠂ ᠬᠡᠳᠦᠢ ᠠᠰᠢᠭ᠋ ᠦᠭᠡᠢ ᠪᠣᠯᠪᠠᠴᠤ ᠳᠠᠢᠯᠠᠬᠤ ᠶ᠋ᠢ ᠵᠣᠭᠰᠣᠵᠤ ᠪᠣᠯᠬᠤ ᠦᠭᠡᠢ᠂ ᠪᠠᠢᠳᠠᠯ ᠢ᠋ ᠦᠵᠡᠵᠦ ᠲᠣᠭᠲᠠᠭᠠᠮᠤ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠵᠥᠪᠰᠢᠶᠡᠵᠦ ᠰᠡᠷᠭᠡᠢᠯᠡ ᠭᠡᠮᠡᠨ ᠲᠣᠭᠲᠠᠭᠠᠪᠠ᠃
ᠲᠡᠳᠦᠢ ᠶᠧ ᠯᠢᠦᠢ ᠯᠢᠦ ᠭᠧ ᠬᠠᠭᠠᠨ ᠤ᠋ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠴᠡᠷᠢᠭ ᠯᠦ᠍ᠭᠡ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠵᠦᠭ ᠣᠷᠣᠪᠠ ᠃ ᠬᠥᠪᠡᠭᠦᠨ ᠰᠢᠦᠸᠠᠢ ᠱᠧ ᠶ᠋ᠢ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠪᠠᠷᠢᠭᠤᠯᠤᠨ ᠦᠯᠡᠳᠡᠭᠡᠵᠦ᠂ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠴᠤ ᠡᠴᠢᠪᠡ᠃ ᠮᠤᠬᠤᠯᠢ ᠮᠥᠨ ᠣᠯᠠᠨ ᠵᠠᠩᠵᠤᠨ ᠢ᠋ ᠲᠡᠭᠰᠢᠯᠡᠵᠦ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠡᠮᠦᠨᠡ ᠵᠦᠭ ᠣᠷᠣᠪᠠ᠃ ᠡᠨᠡ ᠵᠠᠪ ᠲᠤᠷ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠴᠢᠨᠣᠠ ᠶᠡᠬᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠶᠠᠷᠠ ᠶ᠋ᠢ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠪᠣᠯᠭᠠᠨ᠂ ᠶᠡᠬᠡ ᠴᠡᠷᠢᠭ ᠢ᠋ ᠬᠣᠶᠠᠷ ᠬᠠᠭᠠᠰ ᠪᠣᠯᠭᠠᠵᠤ᠂ ᠬᠣᠶᠠᠷ ᠬᠣᠰᠢᠭᠤ ᠵᠣᠬᠢᠶᠠᠭᠠᠳ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠬᠠ ᠭᠠᠢ ᠵᠧᠦ᠂ ᠪᠦᠦ ᠵᠧᠦ ᠬᠣᠶᠠᠷ ᠬᠣᠲᠠ ᠶ᠋ᠢ ᠬᠠᠯᠳᠠᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠡᠷᠡᠮ ᠦ᠋ᠨ ᠣᠢᠷᠠ ᠶ᠋ᠢ ᠲᠠᠪᠴᠢᠯᠠᠬᠤᠢ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠭᠠᠢ ᠵᠧᠦ ᠶ᠋ᠢ ᠰᠠᠬᠢᠭ᠍ᠰᠠᠨ ᠵᠠᠩᠵᠤᠨ ᠵᠦᠩ ᠵᠢᠶᠠ ᠡᠦ᠂ ᠪᠢᠶᠠᠨ ᠴᠧ ᠩ ᠭᠧᠦ ᠬᠣᠶᠠᠭᠤᠯᠠ ᠭᠠᠢ ᠵᠧᠦ᠂ ᠪᠦᠦ ᠵᠧᠦ ᠶ᠋ᠢᠨ ᠬᠣᠶᠠᠷ ᠬᠣᠲᠠ ᠶ᠋ᠢᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠴᠢᠨᠣᠠ ᠶ᠋ᠢᠨ ᠬᠥᠪᠡᠭᠦᠨ ᠶᠠᠷᠠ ᠶ᠋ᠢᠨ ᠴᠡᠷᠢᠭ ᠢ᠋ ᠰᠥᠨᠢ ᠭᠡᠨᠡᠳᠲᠡ ᠳᠠᠷᠤᠨ ᠪᠠᠢᠯᠳᠤᠭᠰᠠᠨ ᠳ᠋ᠤᠷ ᠶᠠᠷᠠ ᠶ᠋ᠢᠨ ᠴᠡᠷᠢᠭ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ ᠪᠤᠷᠤᠭᠤᠯᠠᠬᠤᠢ ᠳ᠋ᠤᠷ ᠴᠢᠨᠣᠠ ᠶ᠋ᠢᠨ ᠴᠡᠷᠢᠭ ᠤᠭ᠍ᠲᠤᠨ ᠢᠷᠭᠡᠨ ᠦ᠌ ᠠᠷᠤ ᠪᠠᠷ ᠣᠷᠣᠵᠤ ᠪᠠᠢᠯᠳᠤᠭᠰᠠᠨᠠ᠂ ᠴᠢᠨᠣᠠ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠰᠠᠮᠠᠭᠤᠷᠠᠨ ᠳᠤᠲᠠᠭᠠᠬᠤᠢ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠢ᠋ ᠳᠠᠷᠤᠭᠠᠳ ᠶᠡᠬᠡᠳᠡ ᠲᠠᠢᠯᠵᠤ ᠡᠭᠡᠲᠡᠯᠡ ᠶᠧ ᠯᠢᠦᠢ ᠯᠢᠦ ᠭᠧ ᠶ᠋ᠢᠨ ᠭᠤᠶᠤᠵᠤ ᠠᠪᠠᠴᠢᠭ᠍ᠰᠠᠨ ᠮᠣᠩᠭᠣᠯ ᠤ᠋ᠨ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠮᠥᠨ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠬᠦᠷᠴᠦ ᠯᠢᠶᠣᠤ ᠳ᠋ᠦᠩ ᠢ᠋ ᠳᠠᠷᠤᠨ ᠣᠷᠣᠭᠰᠠᠨᠠ᠂ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠣᠯᠠᠨ ᠢᠷᠭᠡᠨ ᠶᠧ ᠯᠢᠦᠢ ᠯᠢᠦ ᠭᠧ ᠦᠬᠦᠭᠰᠡᠨ ᠦᠭᠡᠢ ᠪᠥᠭᠡᠲᠡᠯᠡ ᠦᠬᠦᠪᠡ ᠭᠡᠮᠡᠨ ᠮᠡᠬᠡᠯᠡᠨ ᠬᠥᠳᠡᠯᠭᠡᠭᠰᠡᠨ ᠢ᠋ ᠰᠠᠶᠢ ᠮᠡᠳᠡᠵᠦ᠂ ᠶᠡᠬᠡᠯᠡ ᠠᠶᠤᠯᠳᠤᠨ ᠤᠭᠲᠤᠨ ᠳᠠᠭᠠᠭᠰᠠᠨ ᠠᠨᠤ ᠮᠠᠰᠢ ᠣᠯᠠᠨ᠃ ᠨᠡᠩ ᠪᠠᠰᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠬᠡᠲᠦᠷᠬᠡᠢ ᠴᠢᠭᠢᠷᠠᠭ ᠲᠤᠯᠠ ᠬᠦᠷᠦᠭᠰᠡᠨ ᠡᠯᠡ ᠭᠠᠵᠠᠷ ᠲᠤᠷ ᠶᠠᠪᠤᠬᠤ ᠠᠨᠤ ᠬᠣᠭᠣᠰᠣᠨ ᠭᠠᠵᠠᠷ ᠮᠡᠲᠦ᠂ ᠶᠠᠰᠢᠪᠦ᠋ ᠶ᠋ᠢᠨ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠢ ᠵᠧᠦ᠂ ᠭᠤᠸᠠᠩ ᠨᠢᠩ ᠦ᠋ᠨ ᠬᠣᠲᠠᠨ ᠢ᠋ ᠴᠥᠮ ᠡᠭᠡᠭᠦᠯᠦᠨ ᠠᠪᠴᠤ ᠢᠷᠭᠡᠨ ᠢ᠋ ᠠᠨᠤ ᠯᠢᠨ ᠬᠤᠸᠠᠩ ᠹᠦ ᠬᠣᠲᠠᠨ ᠳ᠋ᠤᠷ ᠨᠡᠭᠦᠯᠭᠡᠨ ᠰᠠᠭᠤᠯᠭᠠᠵᠤ᠂ ᠲᠡᠭᠦᠨ ᠦ᠌ ᠲᠥᠷᠥᠭᠰᠡᠨ ᠠᠬᠠ ᠶᠧ ᠯᠢᠦᠢ ᠳᠦ ᠯᠡ᠂ ᠡᠮᠡ ᠶᠣᠣ ᠯᠢ ᠱᠢ᠂ ᠬᠣᠶᠠᠷ ᠪᠠᠭᠠ ᠬᠥᠪᠡᠭᠦᠨ᠂ ᠬᠣᠶᠠᠷ ᠮᠢᠩᠭᠠᠨ ᠢᠯᠡᠭᠦᠦ ᠡᠷᠦᠬᠡ ᠠᠮᠠ ᠭᠡᠷ ᠢᠷᠭᠡᠨ ᠢ᠋ ᠢᠨᠦ ᠴᠥᠮ ᠣᠯᠵᠤ ᠠᠪᠤᠭᠠᠳ ᠯᠢᠨ ᠬᠤᠸᠠᠩ ᠹᠦ ᠬᠣᠲᠠᠨ ᠳ᠋ᠤᠷ ᠰᠠᠭᠤᠯᠭᠠᠭᠠᠳ ᠳᠠᠬᠢᠨ ᠴᠢᠨᠣᠠ ᠶ᠋ᠢᠨ ᠴᠡᠷᠢᠭ ᠢ᠋ ᠨᠡᠬᠡᠨ ᠣᠷᠣᠬᠤᠶᠠ᠂ ᠴᠢᠨᠣᠠ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠪᠠᠭᠠᠲᠤᠷ ᠬᠡᠴᠡᠭᠦᠦ ᠶ᠋ᠢ ᠮᠡᠳᠡᠬᠦ ᠲᠤᠯᠠ ᠡᠮᠡ ᠦᠷᠡ ᠪᠡᠨ ᠴᠥᠮ ᠣᠷᠬᠢᠵᠤ ᠳᠤᠲᠠᠭᠠᠨ ᠡᠴᠢᠬᠦᠢ ᠳ᠋ᠦ᠍ᠷ ᠲᠡᠭᠦᠨ ᠦ᠌ ᠡᠮᠡ ᠦᠷᠡ ᠶ᠋ᠢ ᠬᠤᠷᠢᠶᠠᠮᠵᠢᠯᠠᠨ ᠠᠪᠴᠤ ᠪᠠᠰᠠ ᠨᠡᠬᠡᠵᠦ ᠡᠴᠢᠬᠦᠶᠡ ᠴᠢᠨᠣᠠ ᠰᠢᠬᠠᠮᠳᠠᠵᠤ ᠶ᠋ᠢᠨ ᠱᠧ᠂ ᠱᠠᠨ ᠱᠧ᠂ ᠲᠦᠩ ᠬᠦ᠌ ᠢᠦᠢ ᠨᠠᠷ ᠢ᠋ ᠠᠪᠴᠤ ᠰᠣᠯᠣᠩᠭᠣᠰ ᠤᠯᠤᠰ ᠲᠤᠷ ᠳᠤᠲᠠᠭᠠᠨ ᠡᠴᠢᠬᠦᠶᠡ ᠵᠠᠮ ᠳ᠋ᠤᠷ ᠡᠮᠡ ᠦᠷᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠬᠣᠷᠣᠰᠤᠨ ᠳᠡᠷᠭᠡᠳᠡᠬᠢ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠦᠯᠦ ᠲᠠᠭᠠᠯᠠᠨ ᠰᠡᠪ ᠡᠷᠢᠬᠦᠢ ᠳ᠋ᠦ᠍ᠷ ᠦ᠋ᠨ ᠱᠧ ᠡᠭᠦᠨ ᠦ᠌ ᠪᠠᠢᠳᠠᠯ ᠰᠠᠢᠨ ᠦᠭᠡᠢ ᠭᠡᠮᠡᠨ ᠰᠥᠨᠢ ᠱᠠᠨ ᠱᠧ᠂ ᠲᠦᠩ ᠬᠦ᠌ ᠢᠦᠢ ᠯᠦ᠍ᠭᠡ ᠵᠥᠪᠯᠡᠵᠦ᠂ ᠴᠢᠨᠣᠠ ᠶ᠋ᠢ ᠡᠴᠢᠭᠡ ᠬᠥᠪᠡᠭᠦᠨ ᠲᠡᠢ ᠴᠠᠪᠴᠢᠨ ᠠᠯᠠᠭᠠᠳ᠂ ᠤ᠋ᠨ ᠱᠧ ᠣᠷᠣᠨ ᠳ᠋ᠤᠷ ᠰᠠᠭᠤᠵᠤ ᠪᠡᠶᠡ ᠪᠡᠨ ᠭᠦᠸᠧ ᠸᠠᠩ ᠭᠡᠮᠡᠨ ᠡᠷᠭᠦᠵᠦ᠂ ᠣᠨ ᠢ᠋ ᠲᠢᠶᠠᠨ ᠳᠧ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠭᠡᠮᠡᠨ ᠨᠡᠷᠡᠯᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠲᠦᠩ ᠬᠦ᠌ ᠢᠦᠢ ᠳᠠᠷᠤᠢ ᠣᠷᠣᠵᠤ : 《ᠴᠢ ᠡᠵᠡᠨ ᠢ᠋ ᠠᠯᠠᠭᠰᠠᠨ ᠲᠤᠯᠠ ᠪᠢ ᠪᠠᠰᠠ ᠴᠢᠮᠠᠢ ᠠᠯᠠᠮᠤᠢ᠃ 》ᠭᠡᠮᠡᠨ ᠪᠠᠷᠢᠵᠤ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ᠂ ᠣᠯᠠᠨ ᠢ᠋ ᠡᠵᠡᠯᠡᠨ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠᠨ ᠬᠥᠮᠦᠨ ᠢ᠋ ᠰᠡᠷᠡᠮᠵᠢᠯᠡᠨ ᠬᠢᠴᠢᠶᠡᠬᠦᠢ ᠳ᠋ᠦ᠍ᠷ ᠪᠠᠢᠳᠠᠯ ᠳᠦᠷᠰᠦ ᠢᠯᠡᠷᠡᠭᠰᠡᠨ ᠳ᠋ᠦ᠍ᠷ ᠱᠠᠨ ᠱᠧ ᠲᠡᠭᠦᠨ ᠦ᠌ ᠠᠷᠭᠠ ᠪᠠᠨ ᠪᠣᠳᠣᠨ ᠣᠯᠬᠤ ᠶ᠋ᠢᠨ ᠤᠷᠢᠳᠠ ᠴᠡᠷᠢᠭ ᠦ᠋ᠨ ᠲᠠᠯᠠᠪᠤᠷ ᠲᠤᠷ ᠬᠣᠢᠨᠠ ᠠ᠋ᠴᠠ ᠨᠢᠭᠡᠨᠲᠡ ᠴᠠᠪᠴᠢᠵᠤ ᠤᠨᠠᠭᠠᠭᠠᠳ ᠣᠯᠠᠨ ᠴᠡᠷᠢᠭ ᠢ᠋ ᠲᠡᠭᠰᠢᠯᠡᠨ ᠵᠠᠷᠤᠲᠠᠯᠠ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠱᠠᠨ ᠱᠧ ᠮᠣᠩᠭᠣᠯ ᠤ᠋ᠨ ᠬᠡᠴᠡᠭᠦᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠤᠭᠲᠤᠨ ᠪᠠᠢᠯᠳᠤᠭᠰᠠᠨ ᠳ᠋ᠤᠷ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠨᠢᠭᠡᠨᠲᠡ ᠬᠡᠩᠭᠡᠷᠭᠡ ᠳᠡᠯᠡᠳᠦᠮᠡᠭᠴᠡ ᠭᠠᠷᠴᠤ ᠱᠠᠨ ᠱᠧ ᠶ᠋ᠢ ᠠᠮᠢᠳᠤ ᠪᠠᠷᠢᠵᠤ ᠣᠯᠠᠨ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠨ ᠣᠷᠣᠵᠤ᠂ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠣᠯᠠᠨ ᠬᠣᠲᠠ ᠪᠠᠯᠭᠠᠳ ᠵᠧᠦ ᠵᠢᠶᠦ᠋ᠨ ᠢ᠋ ᠲᠣᠭᠣᠷᠢᠨ ᠲᠣᠭᠲᠠᠭᠠᠪᠠ᠃ ᠳᠠᠷᠤᠢ ᠱᠠᠨ ᠱᠧ ᠶ᠋ᠢᠨ ᠳᠡᠭᠦᠦ ᠱᠠᠨ ᠱᠧᠨ ᠦ᠌ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠠᠪᠴᠤ ᠰᠣᠯᠣᠩᠭᠣᠰ ᠤᠯᠤᠰ ᠲᠤᠷ ᠣᠷᠣᠪᠠ᠃
ᠲᠡᠳᠦᠢ ᠳᠡᠢᠯᠦᠭᠰᠡᠨ ᠮᠡᠳᠡᠭᠡ ᠶ᠋ᠢ ᠤᠯᠠᠭᠠᠨ ᠳᠠᠯᠪᠠᠭᠠ ᠳᠣᠪᠲᠣᠯᠭᠠᠨ ᠵᠠᠷᠤᠵᠤ ᠠᠢᠯᠠᠳᠬᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠸᠠᠩ ᠵᠢᠢ ᠭᠡᠨᠡᠳᠲᠡ ᠤᠷᠪᠠᠵᠤ ᠰᠢᠩ ᠵᠦᠩ ᠹᠦ ᠶ᠋ᠢ ᠡᠵᠡᠯᠡᠵᠦ᠂ ᠣᠯᠠᠨ ᠬᠢᠲᠠᠳ ᠤ᠋ᠨ ᠰᠡᠳᠬᠢᠯ ᠢ᠋ ᠬᠡᠯᠡᠯᠴᠡᠨ ᠤᠷᠪᠠᠭᠤᠯᠤᠭᠰᠠᠨ ᠳ᠋ᠤᠷ ᠠᠮᠤ ᠡᠪᠡᠰᠦ ᠴᠤᠭᠯᠠᠭᠤᠯᠬᠤ ᠶ᠋ᠢ ᠵᠡᠷᠭᠡᠯᠡᠳᠡᠭᠡ ᠭᠠᠵᠠᠷ ᠠ᠋ᠴᠠ ᠳᠣᠪᠲᠣᠯᠭᠠᠨ ᠠᠢᠯᠠᠳᠭᠠᠭ᠍ᠰᠠᠨᠠ ᠬᠠᠭᠠᠨ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠳᠡᠢᠯᠦᠭᠰᠡᠨ ᠴᠡᠷᠢᠭ ᠢ᠋ ᠮᠥᠨ ᠯᠢᠶᠣᠤ ᠳ᠋ᠦᠩ ᠳ᠋ᠦ᠍ᠷ ᠬᠦᠯᠢᠶᠡᠵᠦ᠂ ᠮᠥᠨ ᠦ᠌ ᠵᠧᠦ ᠶ᠋ᠢ ᠳᠠᠢᠯᠠᠬᠤᠢ ᠳ᠋ᠤᠷ ᠪᠡᠯᠡᠳ᠂ ᠮᠤᠬᠤᠯᠢ ᠪᠠᠷᠠᠭᠤᠨ ᠬᠣᠢᠲᠤ ᠰᠢᠶᠠ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠬᠦᠷᠦᠭᠰᠡᠨ ᠲᠤᠯᠠ ᠣᠢᠷᠠ ᠪᠠᠷ ᠰᠢᠩ ᠵᠦᠩ ᠹᠦ ᠶ᠋ᠢ ᠡᠵᠡᠯᠡᠨ ᠤᠷᠪᠠᠭᠰᠠᠨ ᠸᠠᠩ ᠶ᠋ᠢᠢ ᠶ᠋ᠢ ᠪᠠᠷᠢᠵᠤ ᠠᠷᠢᠯᠭᠠ᠂ ᠡᠮᠦᠨᠡ ᠵᠦᠭ ᠪᠠᠭᠠ ᠵᠠᠩᠵᠤᠨ ᠨᠠᠷ ᠠ᠋ᠴᠠ ᠨᠠᠢ᠍ᠮᠠᠨ ᠵᠠᠩᠵᠤᠨ ᠠᠮᠠᠯᠠᠵᠤ ᠴᠡᠷᠢᠭ ᠥᠭᠴᠦ ᠲᠦᠩ ᠭᠤᠸᠠᠨ ᠤ᠋ ᠵᠦᠭ ᠣᠷᠣᠭᠤᠯᠵᠤ ᠤᠷᠢᠳᠠ ᠵᠠᠮ ᠨᠡᠭᠡᠭᠡᠯᠭᠡ ᠭᠡᠮᠡᠨ ᠬᠠᠭᠤᠯᠤᠨ ᠪᠠᠭᠤᠯᠭᠠᠭᠰᠠᠨ ᠳ᠋ᠤᠷ ᠵᠠᠷᠯᠢᠭ ᠲᠤᠰ ᠲᠤᠰ ᠲᠤᠷ ᠳᠣᠪᠲᠣᠯᠤᠨ ᠡᠴᠢᠪᠡ᠃
ᠲᠡᠳᠦᠢ ᠮᠤᠬᠤᠯᠢ ᠬᠠᠪᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠳ᠋ᠤᠷ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠳᠠᠭᠠᠷᠢᠨ ᠠᠪᠴᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠰᠤᠭᠠᠢ ᠭᠡᠮᠡᠨ ᠰᠢᠶᠠ ᠤᠯᠤᠰ ᠤ᠋ᠨ ᠪᠠᠭᠠ ᠡᠵᠡᠨ ᠯᠢ ᠠᠨ ᠰᠢᠦᠢ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠦᠰᠢᠮᠡᠯ ᠫᠦ᠍ ᠰᠢᠶᠠᠨ ᠸᠠᠨ ᠨᠦ᠍ ᠯᠦ᠍ᠭᠡ ᠨᠠᠢᠷᠠᠯᠳᠤᠨ ᠶᠠᠪᠤᠭᠰᠠᠭᠠᠷ ᠲᠡᠭᠦᠨ ᠦ᠌ ᠥᠳᠥᠭᠡᠬᠦ ᠦᠭᠡᠰ ᠬᠠᠳᠬᠤᠬᠤ ᠰᠠᠨᠠᠭᠠᠨ ᠢ᠋ ᠡᠳᠦᠷ ᠤᠳᠠᠭᠠᠨ ᠰᠣᠨᠣᠰᠤᠭᠰᠠᠭᠠᠷ ᠤᠷᠢᠳᠤ ᠶ᠋ᠢᠨ ᠵᠢᠷᠤᠮ ᠢ᠋ ᠤᠮᠠᠷᠲᠠᠨ ᠲᠡᠭᠦᠨ ᠯᠦ᠍ᠭᠡ ᠨᠡᠢᠯᠡᠵᠦ᠂ ᠮᠣᠩᠭᠣᠯ ᠤᠯᠤᠰ ᠠ᠋ᠴᠠ ᠤᠷᠪᠠᠬᠤ ᠶ᠋ᠢ ᠵᠥᠪᠳᠡᠵᠦ ᠲᠣᠭᠲᠠᠭᠠᠳ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠨ ᠲᠡᠭᠦᠨ ᠦ᠌ ᠴᠡᠷᠢᠭ ᠢ᠋ ᠵᠠᠷᠯᠠᠬᠤᠢ ᠳ᠋ᠤᠷ ᠤᠷᠪᠠᠨ ᠵᠠᠪᠳᠤᠭᠠᠳᠤᠢ ᠲᠤᠯᠠ ᠠᠷᠭᠠ ᠦᠭᠡᠢ ᠮᠠᠭᠤ ᠬᠥᠭᠰᠢᠨ ᠶᠠᠳᠠᠭᠤᠯᠢᠭ᠋ ᠴᠡᠷᠢᠭ ᠢ᠋ ᠥᠭᠴᠦ ᠪᠡᠶᠡ ᠪᠡᠷ ᠢᠷᠡᠵᠦ ᠥᠪᠡᠷ ᠦ᠋ᠨ ᠵᠦᠳᠡᠭᠦᠷᠢ ᠶ᠋ᠢ ᠲᠣᠭᠠᠴᠢᠬᠤᠢ ᠳ᠋ᠤᠷ ᠮᠤᠬᠤᠯᠢ ᠲᠡᠭᠦᠨ ᠦ᠌ ᠪᠠᠢᠳᠠᠯ ᠢ᠋ ᠬᠡᠳᠦᠢᠨᠡᠢ ᠦᠵᠡᠵᠦ ᠭᠠᠷᠤᠭᠠᠳ ᠰᠢᠳᠠᠷ ᠲᠦᠰᠢᠮᠡᠳ ᠲᠣᠷ ᠥᠭᠦᠯᠡᠷᠦᠨ : 《ᠡᠨᠡ ᠬᠥᠮᠦᠨ ᠮᠠᠭᠤ ᠪᠣᠯᠪᠠ᠂ ᠯᠠᠪ ᠤᠷᠪᠠᠬᠤ ᠰᠡᠳᠬᠢᠯ ᠪᠠᠷᠢᠵᠤᠬᠤᠢ᠃ ᠭᠠᠭᠴᠠ ᠭᠡᠷᠡᠴᠢᠯᠡᠬᠦ ᠬᠥᠮᠦᠨ ᠦᠭᠡᠢ ᠲᠤᠯᠠ ᠡᠨᠡ ᠤᠳᠠᠭᠠ ᠪᠠᠷᠢᠵᠤ ᠦᠯᠦ ᠪᠣᠯᠤᠮᠤᠢ᠃ ᠬᠡᠵᠢᠶᠡ ᠶᠠᠯᠠ ᠢᠯᠡᠷᠡᠬᠦ ᠶ᠋ᠢ ᠬᠦᠯᠢᠶᠡᠬᠦ ᠪᠣᠢ ᠶᠠ !》ᠭᠡᠮᠡᠨ ᠦᠯᠦ ᠮᠡᠳᠡᠭᠴᠢ ᠪᠡᠷ ᠰᠠᠢᠰᠢᠶᠠᠨ ᠰᠠᠢᠨ ᠦᠭᠡ ᠪᠡᠷ ᠲᠣᠬᠣᠷᠤᠭᠤᠯᠤᠨ᠂ ᠣᠯᠠᠨ ᠴᠡᠷᠢᠭ ᠢ᠋ ᠢᠨᠦ ᠪᠠᠢᠴᠠᠭᠠᠵᠤ ᠪᠠᠢᠲᠠᠯᠠ ᠳᠠᠭᠠᠯᠳᠤᠭᠠ ᠸᠠᠩ ᠵᠢᠢ ᠤᠷᠪᠠᠵᠤ᠂ ᠰᠢᠩ ᠵᠦᠩ ᠹᠦ ᠶ᠋ᠢ ᠡᠵᠡᠯᠡᠭᠰᠡᠨ ᠳ᠋ᠦ᠍ᠷ ᠯᠠᠪ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠨᠠᠮᠠᠶ᠋ᠢ ᠦᠯᠡᠳᠡᠭᠡᠮᠦᠢ ᠭᠡᠮᠡᠨ ᠪᠣᠳᠣᠵᠤ ᠠᠲᠠᠯᠠ ᠦᠨᠡᠬᠡᠷ ᠲᠡᠭᠦᠨ ᠦ᠌ ᠪᠡᠶᠡ ᠰᠢᠩ ᠵᠦᠩ ᠹᠦ ᠶ᠋ᠢ ᠠᠷᠢᠯᠭᠠᠵᠤ ᠪᠤᠰᠤ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠬᠤᠪᠢᠶᠠᠨ ᠡᠮᠦᠨᠡ ᠵᠦᠭ ᠣᠷᠣᠵᠤ ᠪᠠᠢᠳᠠᠯ ᠢ᠋ ᠦᠵᠡᠭᠦᠯ ᠬᠡᠮᠡᠵᠦᠬᠦᠢ᠃
– – – –
① ᠡᠨᠡ ᠶᠠᠮᠪᠠᠷ ᠤᠴᠢᠷ ᠢ᠋ ᠡᠰᠡ ᠮᠡᠳᠡᠪᠡ᠂ ᠰᠤᠳᠤᠷ ᠤ᠋ᠨ ᠶᠣᠰᠣᠭᠠᠷ ᠪᠢᠴᠢᠪᠡ᠃
② ᠡᠨᠡ ᠠᠷᠪᠠᠨ ᠪᠡᠶᠡᠲᠦ ᠨᠢᠭᠡᠨ ᠲᠣᠯᠣᠭᠠᠢᠲᠦ ᠵᠢᠭᠠᠰᠤ《ᠱᠠᠨ ᠬᠠᠢ ᠵᠢᠨᠭ ᠪᠢᠴᠢᠭ 》 ᠲᠤ ᠪᠠᠢᠬᠤ ᠶᠢ ᠦᠵᠡᠪᠡ᠃ ᠲᠡᠷᠡ ᠵᠢᠭᠠᠰᠤ ᠶᠢᠨ ᠪᠠᠢᠬᠤ ᠭᠠᠵᠠᠷ ᠡᠯᠡ ᠤᠴᠢᠷ ᠰᠢᠯᠲᠠᠭᠠᠨ ᠲᠡᠭᠦᠨ ᠳ᠋ᠤᠷ ᠪᠣᠢ᠃
③ ᠡᠨᠡ ᠶᠢᠰᠦᠨ ᠲᠣᠯᠣᠭᠠᠢᠲᠦ ᠰᠢᠪᠠᠭᠤ《ᠱᠠᠨ ᠬᠠᠢ ᠵᠢᠨᠭ 》 ᠪᠠ 《 ᠸᠠᠨ ᠪᠣᠣ ᠴᠢᠤᠸᠠᠨ ᠪᠢᠴᠢᠭ 》 ᠲᠣᠷ ᠴᠥᠮ ᠠᠵᠤᠭᠤ᠃
ᠲᠡᠳᠦᠢ ᠮᠤᠬᠤᠯᠢ᠂ ᠳᠠᠢᠰᠤᠨᠳᠠᠷᠤᠭᠴᠢ᠂ ᠪᠤᠯᠤ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠨ ᠵᠢᠴᠢ ᠣᠯᠠᠨ ᠵᠠᠩᠵᠤᠨ ᠨᠠᠷ ᠢ᠋ ᠬᠤᠷᠢᠶᠠᠵᠤ᠂ ᠬᠡᠨ ᠢᠨᠦ ᠡᠮᠦᠨᠡ ᠵᠦᠭ ᠡᠴᠢᠬᠦ ᠳᠤᠷᠠᠲᠠᠢ ? ᠬᠡᠨ ᠢᠨᠦ ᠨᠠᠮᠠᠢ ᠳᠠᠭᠠᠵᠤ ᠬᠣᠢᠲᠤ ᠵᠦᠭ ᠴᠡᠷᠢᠭ ᠣᠷᠣᠬᠤ ᠳᠤᠷᠠᠲᠠᠢ? ᠭᠡᠮᠡᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦ᠌ ᠬᠥᠪᠡᠭᠦᠨ ᠰᠠᠯᠵᠢᠩ᠂ ᠸᠠᠢᠵᠢᠩ᠂ ᠪᠤᠭᠤᠷᠤᠯ ᠤ᠋ᠨ ᠬᠥᠪᠡᠭᠦᠨ ᠤᠬᠠᠭᠠᠨᠲᠠᠢ᠂ ᠪᠤᠳᠣᠯᠠᠩ᠂ ᠤᠷᠲᠤ ᠪᠣᠳᠣᠯᠭᠠᠲᠤ ᠶ᠋ᠢᠨ ᠬᠥᠪᠡᠭᠦᠨ ᠰᠠᠢᠨ ᠮᠣᠬᠣ – ᠡᠨᠡ ᠲᠠᠪᠤᠨ ᠵᠠᠯᠠᠭᠤ ᠵᠠᠩᠵᠤᠨ ᠶᠠᠭᠠᠷᠠᠨ ᠭᠠᠷᠴᠤ : 《ᠲᠦᠩ ᠭᠤᠸᠠᠨ ᠢ᠋ ᠠᠪᠬᠤ ᠶ᠋ᠢ ᠪᠢᠳᠡ ᠬᠦᠰᠡᠮᠦᠢ ! ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠪᠠᠶᠠᠷᠯᠠᠨ ᠳᠠᠷᠤᠢ ᠳᠠᠢᠰᠤᠨᠳᠠᠷᠤᠭᠴᠢ ᠳ᠋ᠤᠷ ᠲᠤᠰᠢᠶᠠᠨ ᠥᠭᠴᠦ : 《ᠬᠢᠴᠢᠶᠡᠨ ᠶᠠᠪᠤ᠂ ᠳᠠᠭᠠᠯᠳᠤᠭᠠ ᠪᠢ ᠬᠥᠷᠥᠮᠦᠢ᠃ 》 ᠭᠡᠮᠡᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠢᠯᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠰᠢᠩ ᠵᠦᠩ ᠹᠦ ᠬᠣᠲᠠ ᠶ᠋ᠢ ᠠᠪᠬᠤ ᠠᠷᠭᠠ ᠶ᠋ᠢ ᠬᠠᠷᠠᠬᠠᠨ ᠪᠣᠳᠣᠵᠤ ᠪᠠᠢᠲᠠᠯᠠ ᠰᠠᠨᠠᠮᠰᠠᠷ ᠦᠭᠡᠢ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠠᠯᠳᠠᠭᠱᠠᠭᠠ ᠳ᠋ᠠᠢᠳᠦ᠋ ᠡᠴᠡ ᠡᠮᠡ ᠦᠷᠡ ᠪᠡᠨ ᠠᠪᠴᠤ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠨᠤᠲᠤᠭ ᠢ᠋ ᠴᠠᠭᠳᠠᠬᠤ ᠵᠢᠰᠢᠶᠡᠨ ᠳ᠋ᠦ᠍ᠷ ᠡᠴᠢᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠶ᠋ᠢᠨ ᠡᠨᠳᠡ ᠪᠠᠢᠬᠤᠢ ᠳ᠋ᠤᠷ ᠲᠣᠬᠢᠶᠠᠯᠳᠤᠵᠤ ᠵᠣᠯᠭᠠᠷᠠ ᠢᠷᠡᠭᠰᠡᠨᠡ᠂ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠠᠯᠳᠠᠭᠱᠠᠭᠠ ᠶ᠋ᠢ ᠬᠤᠷᠢᠮᠯᠠᠵᠤ ᠰᠥᠨᠢ ᠴᠢᠬᠢᠨ ᠳ᠋ᠦ᠍ᠷ ᠬᠡᠳᠦᠨ ᠦᠭᠡ ᠰᠤᠷᠭᠠᠭᠰᠠᠨ ᠳ᠋ᠤᠷ ᠠᠯᠳᠠᠭᠱᠠᠭᠠ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠡᠴᠢᠪᠡ᠃
ᠲᠡᠳᠦᠢ ᠮᠤᠬᠤᠯᠢ ᠶᠡᠬᠡ ᠴᠡᠷᠢᠭ ᠢ᠋ ᠭᠤᠷᠪᠠᠨ ᠠᠩᠭᠢ ᠰᠠᠯᠭᠠᠵᠤ᠂ ᠨᠢᠭᠡᠨ ᠠᠩᠭᠢ ᠲᠦᠳᠡ ᠵᠠᠮ ᠢ᠋ᠶ᠋ᠠᠷ ᠪᠠᠢ ᠯᠠᠩ ᠾᠧ ᠮᠥᠷᠡᠨ ᠦ᠌ ᠶᠡᠬᠡ ᠵᠠᠮ ᠢ᠋ᠶ᠋ᠡᠷ ᠣᠷᠣᠵᠤ᠂ ᠨᠢᠭᠡᠨ ᠠᠩᠭᠢ ᠶ᠋ᠢ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠵᠡᠭᠦᠨ ᠬᠣᠢᠲᠤ ᠵᠠᠮ ᠢ᠋ᠶ᠋ᠠᠷ ᠣᠷᠣᠵᠤ᠂ ᠨᠢᠭᠡᠨ ᠠᠩᠭᠢ ᠶ᠋ᠢ ᠲᠦᠳᠡ ᠵᠠᠮ ᠢ᠋ᠶ᠋ᠠᠷ ᠰᠢᠩ ᠵᠦᠩ ᠹᠦ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠲᠤ ᠴᠧᠩ ᠯᠦᠩ ᠰᠢᠩ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠣᠷᠣᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠭᠤᠷᠪᠠᠨ ᠵᠦᠭ ᠡᠴᠡ ᠬᠠᠪᠴᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠰᠢᠩ ᠵᠦᠩ ᠹᠦ ᠶ᠋ᠢᠨ ᠲᠣᠭᠣᠷᠢᠭ᠍ᠰᠠᠨ ᠣᠯᠠᠨ ᠢᠷᠭᠡᠨ ᠦ᠌ ᠥᠬᠢᠳ ᠡᠮᠡᠰ ᠰᠢᠩ ᠵᠦᠩ ᠹᠦ ᠳ᠋ᠦ᠍ᠷ ᠠᠮᠢ ᠰᠢᠷᠭᠤᠷᠠ ᠢᠷᠡᠭᠰᠡᠨᠡ᠂ ᠸᠠᠩ ᠵᠢᠢ ᠬᠠᠷᠠᠬᠠᠨ ᠬᠥᠮᠦᠨ ᠬᠡᠷᠡᠭᠯᠡᠬᠦ ᠦᠶᠡ ᠲᠤᠯᠠ ᠴᠥᠮ ᠬᠣᠲᠠᠨ ᠳ᠋ᠤᠷ ᠣᠷᠣᠭᠤᠯᠵᠤ ᠡᠷᠡᠰ ᠢ᠋ ᠢᠨᠤ ᠰᠣᠩᠭᠣᠵᠤ ᠬᠣᠲᠠ ᠰᠠᠬᠢᠭᠤᠯᠬᠤᠢ ᠳ᠋ᠤᠷ ᠤᠳᠠᠯ ᠦᠭᠡᠢ ᠮᠣᠩᠭᠣᠯ ᠤ᠋ᠨ ᠭᠤᠷᠪᠠᠨ ᠵᠠᠮ ᠤ᠋ᠨ ᠴᠡᠷᠢᠭ ᠦ᠋ᠳ ᠬᠦᠷᠴᠦ ᠢᠷᠡᠪᠡ᠃ ᠰᠢᠩ ᠵᠦᠭ ᠹᠦ ᠬᠣᠲᠠᠨ ᠢ᠋ ᠲᠥᠭᠥᠷᠢᠭᠯᠡᠨ ᠬᠠᠭᠠᠵᠤ᠂ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠡᠮᠦᠨᠡ ᠬᠠᠭᠠᠯᠭᠠ ᠶ᠋ᠢᠨ ᠳᠣᠣᠷᠠ ᠢᠷᠡᠵᠦ ᠸᠠᠩ ᠵᠢᠢ ᠡᠴᠡ ᠤᠴᠢᠷ ᠢ᠋ ᠠᠰᠠᠭᠤᠰᠤᠭᠠᠢ ᠭᠡᠮᠡᠨ ᠳᠠᠭᠤᠳᠠᠭᠰᠠᠨ ᠳ᠋ᠤᠷ ᠸᠠᠩ ᠵᠢᠢ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠭᠠᠷᠪᠠ᠃ ᠮᠤᠬᠤᠯᠢ ᠠᠭᠤᠷᠯᠠᠨ ᠤᠴᠢᠷ ᠢ᠋ ᠠᠰᠠᠭᠤᠬᠤᠢ ᠳ᠋ᠤᠷ ᠸᠠᠩ ᠶ᠋ᠢᠢ ᠥᠭᠦᠯᠡᠷᠦᠨ : 《ᠪᠢ ᠲᠠᠨ ᠤ᠋ ᠲᠦᠰᠢᠮᠡᠯ ᠪᠤᠰᠤ ᠪᠣᠯᠠᠢ᠂ ᠶᠠᠭᠤᠨ ᠳ᠋ᠤᠷ ᠨᠠᠮᠠᠶ᠋ᠢ ᠤᠷᠪᠠᠪᠠ ᠬᠡᠮᠡᠮᠦᠢ ? ᠡᠨᠡ ᠭᠠᠵᠠᠷ ᠪᠠᠰᠠ ᠲᠠᠨ ᠤ᠋ ᠭᠠᠵᠠᠷ ᠪᠤᠰᠤ ᠪᠣᠯᠠᠢ ᠂ ᠶᠠᠭᠤᠨ ᠳ᠋ᠤᠷ ᠪᠤᠯᠢᠶᠠᠪᠠ ᠬᠡᠮᠡᠮᠦᠢ ?》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠶᠡᠬᠡᠯᠡ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠮᠠᠲᠠᠯ ᠦᠭᠡᠢ ᠣᠶᠤᠨ ᠥᠴᠦᠬᠡᠨ ᠬᠢᠲᠠᠳ᠂ ᠮᠠᠨ ᠤ᠋ ᠲᠡᠭᠷᠢ ᠶ᠋ᠢᠨ ᠴᠡᠷᠢᠭ ᠢ᠋ ᠬᠡᠷᠬᠢᠨ ᠪᠠᠰᠤᠮᠵᠢᠯᠠᠨ ᠴᠢᠳᠠᠬᠤ ? ᠴᠢᠮᠠᠶ᠋ᠢ ᠡᠳᠦᠭᠡ ᠨᠢᠭᠡᠬᠡᠨ ᠦᠭᠡ ᠪᠡᠷ ᠪᠠᠷᠢᠭᠤᠯᠰᠤᠭᠠᠢ !》 ᠭᠡᠮᠡᠨ《 ᠪᠡᠷᠢ 》 ᠭᠡᠮᠡᠨ ᠨᠢᠭᠡᠨᠲᠡ ᠵᠠᠩᠳᠠᠭᠰᠠᠨ ᠳ᠋ᠤᠷ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠵᠡᠪᠰᠡᠭ ᠬᠥᠳᠡᠯᠵᠦ ᠬᠥᠮᠦᠨ ᠦ᠌ ᠦᠢᠮᠡᠯᠳᠦᠭᠡᠨ ᠭᠠᠷᠴᠤ ᠬᠣᠲᠠᠨ ᠤ᠋ ᠳᠣᠣᠷᠠ ᠴᠡᠷᠢᠭ ᠢ᠋ ᠤᠭᠲᠤᠬᠤ ᠬᠠᠭᠠᠯᠭᠠ ᠶ᠋ᠢ ᠴᠠᠢᠲᠠᠯᠠ ᠨᠡᠭᠡᠭᠡᠵᠦ ᠮᠤᠬᠤᠯᠢ ᠠᠯᠠᠨ ᠣᠷᠣᠲᠠᠯᠠ ᠬᠣᠲᠠᠨ ᠤ᠋ ᠠᠰᠠᠷ ᠠ᠋ᠴᠠ ᠠᠯᠳᠠᠭᠱᠠᠭᠠ ᠶ᠋ᠢᠨ ᠬᠣᠶᠠᠷ ᠡᠮᠡ – ᠰᠣᠯᠤᠩᠭᠤᠸᠠ᠂ ᠰᠠᠢᠬᠠᠨ ᠬᠦᠷᠢ ᠬᠣᠶᠠᠭᠤᠯᠠ ᠸᠠᠩ ᠶ᠋ᠢᠢ ᠶ᠋ᠢ ᠪᠠᠷᠢᠵᠤ ᠬᠦᠯᠢᠭᠡᠳ ᠬᠣᠷᠢᠭᠠᠳ ᠴᠡᠷᠢᠭ ᠲᠦᠯᠬᠢᠨ ᠠᠪᠴᠤ ᠢᠷᠡᠪᠡ᠃ ᠠᠯᠲᠠᠨᠱᠠᠭᠠ ᠳᠥᠷᠪᠡᠨ ᠰᠤᠯᠠ ᠵᠠᠩᠵᠤᠨ ᠢ᠋ ᠴᠠᠪᠴᠢᠨ ᠠᠯᠠᠪᠠ᠃
ᠲᠡᠳᠦᠢ ᠮᠤᠬᠤᠯᠢ ᠴᠡᠷᠢᠭ ᠢ᠋ ᠵᠠᠷᠯᠠᠨ ᠢᠷᠭᠡᠨ ᠢ᠋ ᠲᠣᠭᠲᠠᠭᠠᠵᠤ ᠶᠠᠮᠤᠨ ᠳ᠋ᠤᠷ ᠰᠠᠭᠤᠵᠤ᠂ ᠦᠵᠡᠰᠡ ᠠᠯᠲᠠᠨᠱᠠᠭᠠ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠣᠢᠲᠤ ᠭᠠᠵᠠᠷ ᠢ᠋ ᠴᠠᠭᠳᠠᠷᠠ ᠡᠴᠢᠬᠦ ᠪᠡᠷ ᠡᠮᠡ ᠦᠷᠡ ᠪᠡᠨ ᠠᠪᠴᠤ ᠶᠠᠪᠤᠬᠤ ᠵᠠᠮ ᠳ᠋ᠤᠷ ᠮᠤᠬᠤᠯᠢ ᠳ᠋ᠤᠷ ᠤᠴᠠᠷᠠᠨ᠂ ᠲᠡᠭᠦᠨ ᠦ᠌ ᠵᠠᠬᠢᠶᠠ ᠪᠠᠷ ᠰᠢᠩ ᠵᠦᠩ ᠹᠦ ᠶ᠋ᠢᠨ ᠰᠤᠯᠠ ᠢᠷᠬᠡᠴᠦᠳ ᠯᠦ᠍ᠭᠡ ᠬᠣᠯᠢᠯᠴᠠᠨ ᠬᠣᠲᠠᠨ ᠳ᠋ᠤᠷ ᠣᠷᠣᠭᠠᠳ ᠴᠥᠮ ᠡᠷᠡ ᠬᠥᠮᠦᠨ ᠦ᠌ ᠶᠠᠩᠵᠤ ᠪᠠᠷ ᠴᠢᠮᠡᠵᠦ ᠡᠮᠦᠨᠡ ᠬᠠᠭᠠᠯᠭᠠ ᠶ᠋ᠢ ᠰᠠᠬᠢᠵᠤ᠂ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠡᠴᠢᠬᠦ ᠶ᠋ᠢ ᠬᠦᠯᠢᠶᠡᠨ ᠬᠠᠭᠠᠯᠭᠠ ᠶ᠋ᠢ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠲᠤᠯᠠ ᠡᠨᠡ ᠭᠠᠪᠢᠶᠠ ᠳ᠋ᠤᠷ ᠢ᠋ᠶ᠋ᠠᠨ ᠪᠠᠶᠠᠷᠯᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠲᠡᠷᠢᠭᠦᠯᠡᠨ ᠬᠣᠷᠢ ᠭᠤᠴᠢᠨ ᠳᠠᠭᠠᠭᠰᠠᠳ ᠨᠠᠷ ᠢ᠋ ᠠᠪᠴᠤ ᠪᠠᠷᠢᠭ᠍ᠰᠠᠨ ᠸᠠᠩ ᠶ᠋ᠢᠢ ᠶ᠋ᠢ ᠮᠤᠬᠤᠯᠢ ᠶ᠋ᠢᠨ ᠡᠮᠦᠨᠡ ᠠᠪᠠᠴᠢᠭ᠍ᠰᠠᠨ ᠳ᠋ᠤᠷ ᠮᠤᠬᠤᠯᠢ ᠶᠡᠬᠡ ᠶᠠᠮᠤᠨ ᠳ᠋ᠤᠷ ᠰᠠᠭᠤᠵᠤ ᠸᠠᠩ ᠵᠢᠢ ᠶ᠋ᠢᠨ ᠭᠡᠷ ᠡᠷᠦᠬᠡ ᠶ᠋ᠢ ᠡᠷᠢᠨ ᠪᠠᠷᠢᠭᠤᠯᠵᠤ᠂ ᠬᠣᠷᠢᠭᠠᠳ ᠡᠬᠡᠨᠡᠷ ᠢ᠋ ᠴᠥᠮ ᠶᠡᠨᠳᠡᠷ ᠦ᠋ᠨ ᠳᠣᠣᠷᠠ ᠰᠥᠭᠥᠳᠬᠡᠭᠡᠳ ᠬᠣᠶᠠᠷ ᠰᠠᠢᠬᠠᠨ ᠬᠥᠮᠦᠨ ᠸᠠᠩ ᠵᠢᠢ ᠶ᠋ᠢ ᠲᠦᠯᠬᠢᠯᠡᠨ ᠠᠴᠢᠷᠠᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠶᠠᠭᠠᠷᠠᠨ ᠰᠠᠭᠤᠭᠰᠠᠨ ᠣᠷᠣᠨ ᠠ᠋ᠴᠠ ᠥᠨᠳᠡᠢᠵᠦ ᠶᠣᠰᠣᠯᠠᠨ ᠥᠭᠦᠯᠡᠷᠦᠨ :《ᠰᠠᠢᠨ ᠡᠷᠡ ᠬᠠᠭᠤᠴᠢᠨ ᠨᠥᠬᠥᠷ ᠰᠠᠢᠨ ᠤᠤ ? 》 ᠬᠡᠮᠡᠭᠡᠳ ᠪᠠᠰᠠ ᠥᠭᠦᠯᠡᠷᠦᠨ : 《ᠹᠦ ᠮᠠ᠋ ᠲᠠᠪᠤᠨᠠᠩ ᠴᠢᠮᠠᠶ᠋ᠢ ᠬᠡᠳᠦᠢᠨᠡᠢ ᠠᠯᠠ ᠭᠡᠮᠡᠨ ᠨᠠᠳᠠ ᠳ᠋ᠤᠷ ᠬᠡᠳᠦᠨ ᠤᠳᠠᠭᠠ ᠮᠡᠳᠡᠭᠦᠯᠲᠡᠯᠡ ᠪᠢ ᠡᠰᠡ ᠢᠲᠡᠭᠡᠪᠡ᠃ ᠡᠨᠡ ᠡᠳᠦᠷ ᠶᠠᠯᠠ ᠴᠣᠬᠣᠮ ᠢᠯᠡᠷᠡᠪᠡ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠸᠠᠩ ᠵᠢᠢ ᠮᠥᠨ ᠬᠦ᠌ ᠤᠭ ᠬᠡᠪ ᠢ᠋ᠶ᠋ᠡᠷ ᠣᠮᠣᠷᠬᠠᠨ ᠠᠭᠠᠰᠢᠯᠠᠵᠤ : 《ᠪᠢ ᠠᠯᠲᠠᠨ ᠤ᠋ ᠬᠥᠮᠦᠨ ᠲᠤᠯᠠ ᠠᠯᠲᠠᠨ ᠤ᠋ ᠬᠣᠲᠠ ᠪᠠᠨ ᠬᠠᠮᠠᠭᠠᠯᠠᠪᠠ᠃ 》ᠭᠡᠮᠡᠨ ᠶᠡᠬᠡ ᠦᠭᠡ ᠬᠡᠯᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠰᠡᠬᠦᠢᠵᠦ ᠪᠠᠢᠬᠤ ᠭᠤᠷᠪᠠᠨ ᠴᠠᠭᠠᠨ ᠰᠤᠪᠤᠷᠭᠠ ᠶ᠋ᠢ ᠵᠢᠭᠠᠵᠤ ᠠᠰᠠᠭᠤᠷᠤᠨ : 《ᠡᠨᠡ ᠭᠤᠷᠪᠠᠨ ᠴᠠᠭᠠᠨ ᠰᠤᠪᠤᠷᠭᠠ ᠬᠡᠨ ᠦ᠌ ᠬᠢ ᠪᠣᠢ ? 》 ᠸᠠᠩ ᠶ᠋ᠢᠢ ᠥᠭᠦᠯᠡᠷᠦᠨ : 《ᠳᠠᠩ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠪᠠᠷᠢᠪᠠ 》 ᠬᠡᠮᠡᠮᠦᠢ᠃ ᠮᠤᠬᠤᠯᠢ ᠥᠭᠦᠯᠡᠷᠦᠨ : 《ᠲᠡᠢᠮᠦ ᠪᠥᠭᠡᠳ ᠬᠡᠷᠬᠢᠨ ᠠᠯᠲᠠᠨ ᠤ᠋ ᠪᠣᠯᠪᠠ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠠᠩ ᠵᠢᠢ ᠮᠥᠨ ᠬᠦ᠌ ᠬᠡᠬᠦᠯᠵᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠴᠢ ᠡᠮᠦᠨᠡ ᠭᠠᠵᠠᠷ ᠪᠢᠴᠢᠭ ᠰᠤᠷᠤᠯᠴᠠᠭᠠᠳ ᠬᠢᠲᠠᠳ ᠵᠠᠩᠵᠤᠨ ᠤ᠋ ᠨᠡᠷᠡ ᠶ᠋ᠢ ᠬᠡᠲᠦᠷᠬᠡᠶᠡ ᠭᠤᠲᠤᠭᠠᠨᠠᠮ᠂ ᠨᠡᠩᠳᠡ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠭᠰᠠᠨ ᠠᠨᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠣᠬᠣᠮ ᠬᠤᠯᠠᠭᠠᠢ ᠪᠣᠯᠪᠠ᠃ ᠪᠡᠶᠡ ᠳ᠋ᠦ᠍ᠷ ᠰᠠᠬᠠᠯ ᠦᠰᠦ ᠠᠬᠤ ᠪᠥᠭᠡᠲᠡᠯᠡ ᠣ ᠡᠩᠭᠡᠰᠬᠡᠲᠦ ᠡᠬᠡᠨᠡᠷ ᠲᠣᠷ ᠪᠠᠷᠢᠭ᠍ᠳᠠᠭᠠᠳ ᠪᠠᠰᠠ ᠶᠠᠭᠤᠨ ᠳᠡᠮᠡᠢᠯᠡ ᠣᠩᠭᠣᠯᠵᠠᠮᠤᠢ ? ᠠᠩᠬᠠ ᠤᠳᠠᠭᠠ ᠡᠰᠡ ᠠᠯᠠᠭᠰᠠᠨ ᠠᠨᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠢᠳᠤᠷᠭᠤ ᠲᠦᠰᠢᠮᠡᠯ ᠢ᠋ ᠡᠰᠡ ᠠᠯᠠᠭᠰᠠᠨ ᠪᠣᠯᠠᠢ᠃ ᠡᠨᠡ ᠤᠳᠠᠭᠠ ᠡᠷᠬᠡᠪᠰᠢ ᠠᠯᠠᠬᠤ ᠠᠨᠤ ᠬᠣᠶᠠᠷ ᠤᠯᠤᠰ ᠤ᠋ᠨ ᠬᠤᠢᠬᠤᠷ ᠬᠤᠯᠠᠭᠠᠢ ᠶ᠋ᠢ ᠠᠯᠠᠬᠤ ᠪᠣᠯᠠᠢ᠃ ᠲᠡᠷᠡ ᠮᠡᠲᠦ ᠠᠭᠠᠰᠢᠯᠠᠵᠤ ᠬᠡᠨ ᠢ᠋ ᠮᠡᠬᠡᠯᠡᠬᠦ ᠪᠣᠢ ? 》 ᠭᠡᠮᠡᠨ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠢ᠋ ᠨᠢᠭᠡᠨᠲᠡ ᠵᠠᠩᠳᠠᠭᠰᠠᠨ ᠳ᠋ᠤᠷ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠪᠠᠷᠰ ᠢᠷᠪᠢᠰ ᠮᠡᠲᠦ ᠴᠡᠷᠢᠭ ᠦ᠋ᠨ ᠠᠷᠠᠳ ᠤᠷᠤᠭ᠍ᠰᠢ ᠣᠷᠣᠵᠤ ᠸᠠᠩ ᠵᠢᠢ ᠶ᠋ᠢᠨ ᠱᠠᠬᠠ ᠶ᠋ᠢ ᠢᠰᠬᠦᠯᠦᠨ ᠰᠥᠭᠥᠳᠬᠡᠪᠡ᠃ ᠸᠠᠩ ᠶ᠋ᠢᠢ ᠳ᠋ᠦ᠍ᠷ ᠲᠣᠯᠣᠭᠠᠢ ᠳᠦᠭᠦᠷᠡᠩ ᠴᠡᠴᠡᠭ ᠬᠠᠳᠬᠤᠭᠤᠯᠤᠨ᠂ ᠨᠢᠭᠤᠷ ᠲᠤᠷ ᠣ ᠡᠩᠭᠡᠰᠬᠡ ᠪᠢᠯᠳᠠᠵᠤ ᠬᠣᠶᠠᠷ ᠴᠢᠬᠢ ᠳ᠋ᠦ᠍ᠷ ᠰᠦᠢᠬᠡ ᠵᠡᠭᠦᠯᠭᠡᠨ᠂ ᠪᠡᠶᠡ ᠳ᠋ᠦ᠍ᠷ ᠡᠬᠡᠨᠡᠷ ᠳᠡᠪᠡᠯ ᠨᠥᠮᠥᠷᠭᠡᠨ᠂ ᠲᠡᠭᠦᠨ ᠦ᠌ ᠬᠤᠶᠠᠭ ᠳᠤᠭᠤᠯᠠᠭᠠ ᠪᠠ ᠮᠣᠷᠢ ᠵᠡᠪᠰᠡᠭ ᠢ᠋ ᠰᠣᠯᠤᠩᠭᠤᠸᠠ ᠰᠠᠢᠬᠠᠨ ᠬᠦᠷᠢ ᠬᠣᠶᠠᠷ ᠤ᠋ᠨ ᠰᠢᠳᠠᠷ ᠡᠬᠡᠨᠡᠷ ᠲᠣᠷ ᠪᠠᠷᠢᠭᠤᠯᠵᠤ ᠣᠯᠠᠨ ᠳ᠋ᠤᠷ ᠴᠡᠭᠡᠷ ᠦᠵᠡᠭᠦᠯᠦᠨ᠂ ᠸᠠᠩ ᠶ᠋ᠢᠢ ᠶ᠋ᠢ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠴᠢᠷᠦᠨ ᠭᠠᠷᠭᠠᠵᠤ᠂ ᠬᠣᠲᠠᠨ ᠢ᠋ ᠪᠤᠷᠤᠭᠤ ᠪᠠᠷ ᠭᠤᠷᠪᠠᠨᠲᠠ ᠲᠣᠭᠣᠷᠢᠭᠤᠯᠵᠤ《ᠬᠣᠶᠠᠷ ᠰᠡᠳᠬᠢᠯᠲᠦ ᠬᠤᠶᠠᠯᠢ ᠡᠬᠡᠨᠡᠷ ᠢ᠋ ᠡᠨᠡ ᠡᠳᠦᠷ ᠴᠠᠭᠠᠵᠠᠯᠠᠮᠤᠢ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠰᠢᠩ ᠵᠦᠩ ᠹᠦ ᠶ᠋ᠢᠨ ᠬᠣᠲᠠᠯᠠᠭᠠᠷ ᠢᠷᠭᠡᠨ ᠡᠰᠡ ᠢᠨᠢᠶᠡᠯᠴᠡᠭᠰᠡᠨ ᠢ᠋ᠶ᠋ᠡᠷ ᠦᠭᠡᠢ᠃ ᠬᠠᠤᠯᠢᠴᠢᠳ ᠳᠠᠷᠤᠢ ᠰᠡᠯᠡᠮᠡ ᠰᠤᠭᠤᠯᠤᠨ ᠲᠣᠯᠣᠭᠠᠢ ᠶ᠋ᠢ ᠴᠠᠪᠴᠢᠨ ᠠᠪᠴᠤ ᠤᠯᠠᠭᠠᠨ ᠲᠤᠭ ᠯᠤᠭᠠ ᠳᠣᠪᠲᠣᠯᠭᠠ ᠠᠯᠲᠠᠨᠱᠠᠭᠠ ᠨᠥᠬᠥᠷ ᠡᠮᠡ ᠶ᠋ᠢᠨ ᠭᠠᠪᠢᠶᠠ ᠶ᠋ᠢ ᠲᠣᠳᠣᠷᠬᠠᠢᠯᠠᠨ ᠭᠠᠷᠭᠠᠵᠤ ᠠᠢᠯᠠᠳᠬᠠᠨ ᠶᠠᠪᠤᠭᠤᠯᠪᠠ᠃ ᠮᠤᠬᠤᠯᠢ ᠲᠡᠨᠳᠡ ᠲᠦᠷ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠵᠦ ᠴᠡᠷᠢᠭ ᠢ᠋ ᠠᠮᠤᠭᠤᠯᠤᠨ ᠰᠠᠭᠤᠮᠤᠢ᠃
ᠲᠡᠨᠳᠡᠴᠡ ᠲᠦᠩ ᠭᠤᠸᠠᠨ ᠤ᠋ ᠵᠦᠭ ᠣᠷᠣᠭᠰᠠᠨ ᠳᠠᠢᠰᠣᠨᠳᠠᠷᠤᠭᠴᠢ ᠶ᠋ᠢᠨ ᠴᠡᠷᠢᠭ᠂ ᠰᠢᠶᠠ ᠤᠯᠤᠰ ᠤ᠋ᠨ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠰᠢᠶᠠ ᠤᠯᠤᠰ ᠤ᠋ᠨ ᠭᠤᠸᠠᠨ ᠵᠦᠩ ᠦ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠵᠤ ᠂ ᠲᠦᠩ ᠭᠤᠸᠠᠨ ᠪᠣᠭᠣᠮᠲᠠ ᠶ᠋ᠢᠨ ᠵᠦᠭ ᠣᠷᠣᠬᠤᠶᠠ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠢ ᠨᠠᠨ ᠵᠢᠶᠦ᠋ᠨ ᠬᠣᠲᠠᠨ ᠢ᠋ ᠳᠠᠭᠠᠷᠢᠨ ᠭᠠᠷᠬᠤᠢ ᠳ᠋ᠤᠷ ᠬᠣᠲᠠ ᠶ᠋ᠢ ᠰᠠᠬᠢᠭ᠍ᠰᠠᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠵᠤᠨ ᠹᠦ ᠯᠦ᠍ ᠬᠤ᠌ ᠨᠡᠷᠡᠲᠦ ᠵᠢᠶ᠋ᠸ ᠳᠦ ᠱᠢ ᠲᠦᠰᠢᠮᠡᠯ ᠬᠣᠲᠠ ᠪᠠᠨ ᠣᠷᠬᠢᠵᠤ ᠪᠤᠷᠤᠭᠤᠯᠠᠨ ᠶᠠᠪᠤᠵᠤ᠂ ᠰᠠᠶᠢ ᠲᠦᠩ ᠭᠤᠸᠠᠨ ᠪᠣᠭᠣᠮᠲᠠᠨ ᠳ᠋ᠤᠷ ᠣᠷᠣᠬᠤ ᠰᠢᠬᠠᠲᠠᠯᠠ ᠪᠣᠭᠣᠮᠲᠠ ᠶ᠋ᠢᠨ ᠭᠠᠳᠠᠨᠠ ᠪᠦᠭᠭᠦᠭᠰᠡᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ – ᠰᠡᠯᠵᠢᠩ ᠂ ᠸᠠᠢᠵᠢᠩ᠂ ᠤᠨᠵᠢᠭᠠᠢ᠂ ᠰᠤᠨᠵᠢᠭᠠᠢ᠂ ᠤᠬᠠᠭᠠᠨᠲᠠᠢ᠂ ᠪᠤᠳᠣᠯᠠᠩ ᠨᠠᠷ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠭᠠᠳ ᠨᠢᠭᠡᠨᠲᠡ ᠬᠠᠰᠬᠢᠷᠤᠨ ᠣᠷᠣᠵᠤ ᠹᠦ ᠯᠦ᠍ ᠬᠤ᠌ ᠶ᠋ᠢ ᠠᠮᠢᠳᠤ ᠪᠠᠷᠢᠵᠤ ᠠᠪᠤᠭᠠᠳ ᠬᠠᠭᠠᠯᠭᠠᠨ ᠤ᠋ ᠪᠠᠭᠠ ᠵᠠᠩᠵᠤᠨ ᠨᠠᠷ ᠢ᠋ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠳᠠᠭᠤᠳᠠᠵᠤ ᠹᠦ ᠯᠦ᠍ ᠬᠤ᠌ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠠᠪᠤᠮᠤᠢ ᠭᠡᠮᠡᠨ ᠬᠦᠵᠦᠭᠦᠨ ᠳ᠋ᠦ᠍ᠷ ᠢᠯᠳᠦ ᠲᠤᠯᠭᠠᠨ ᠬᠠᠭᠠᠯᠭᠠ ᠨᠡᠭᠡᠭᠡᠪᠡᠰᠦ ᠹᠦ ᠯᠦ᠍ ᠬᠤ᠌ ᠶ᠋ᠢ ᠲᠠᠯᠪᠢᠮᠤᠢ᠂ ᠡᠰᠡ ᠨᠡᠭᠡᠭᠡᠪᠡᠰᠦ ᠠᠯᠠᠮᠤᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠹᠦ ᠯᠦ᠍ ᠬᠤ᠌ ᠰᠠᠨᠳᠤᠷᠤᠨ ᠬᠣᠲᠠ ᠰᠠᠬᠢᠭ᠍ᠰᠠᠨ ᠵᠠᠩᠵᠤᠨ ᠨᠠᠷ ᠢ᠋ ᠵᠠᠭᠤᠨ ᠵᠦᠢᠯ ᠢ᠋ᠶ᠋ᠡᠷ ᠭᠤᠶᠤᠨ《ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠵᠦ ᠮᠢᠨᠦ ᠠᠮᠢᠨ ᠭᠠᠷᠤᠮᠠᠭᠴᠠ ᠲᠠᠨ ᠳ᠋ᠤ᠌ ᠶᠠᠯᠠ ᠦᠭᠡᠢ ᠳᠡᠭᠡᠷᠡ ᠯᠠᠪ ᠳᠡᠭᠡᠭᠰᠢ ᠠᠢᠯᠠᠳᠬᠠᠨ ᠱᠠᠩ ᠭᠠᠪᠢᠶᠠ ᠣᠯᠭᠣᠭᠤᠯᠰᠤᠭᠠᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠷᠢᠶᠠᠲᠤ ᠣᠯᠠᠨ ᠵᠠᠩᠵᠤᠨ ᠨᠠᠷ ᠲᠡᠭᠦᠨ ᠦ᠌ ᠦᠭᠡ ᠡᠴᠡ ᠳᠠᠪᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠥᠭᠡᠳ ᠬᠠᠭᠠᠯᠭᠠ ᠶ᠋ᠢᠨ ᠡᠵᠡᠨ ᠳ᠋ᠦ᠍ᠷ ᠶᠠᠯᠠ ᠦᠭᠡᠢ ᠬᠡᠮᠡᠬᠦ ᠲᠤᠯᠠ ᠬᠠᠭᠠᠯᠭᠠ ᠨᠡᠭᠡᠭᠡᠵᠦ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠢ᠋ ᠣᠷᠣᠭᠤᠯᠪᠠ᠃ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠤᠭ ᠠ᠋ᠴᠠ ᠬᠠᠭᠠᠯᠭᠠ ᠨᠡᠭᠡᠭᠡᠪᠡᠰᠦ ᠹᠦ ᠯᠦ᠍ ᠬᠤ᠌ ᠶ᠋ᠢ ᠲᠠᠯᠪᠢᠮᠤᠢ ᠭᠡᠮᠡᠨ ᠬᠡᠯᠡᠭᠰᠡᠨ ᠲᠤᠯᠠ ᠡᠳᠦᠭᠡ ᠬᠠᠭᠠᠯᠭᠠ ᠳ᠋ᠤᠷ ᠣᠷᠣᠵᠤ ᠶᠠᠮᠤᠨ ᠳ᠋ᠤᠷ ᠰᠠᠭᠤᠨ ᠹᠦ ᠯᠦ᠍ ᠬᠤ᠌ ᠶ᠋ᠢ ᠲᠠᠯᠪᠢᠬᠤ ᠶ᠋ᠢ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠣᠯᠠᠨ ᠪᠠᠭᠠ ᠵᠠᠩᠵᠤᠨ ᠨᠠᠷ ᠠᠯᠠᠰᠤᠭᠠᠢ ᠬᠡᠮᠡᠮᠦᠢ᠃ ᠮᠤᠬᠤᠯᠢ ᠶ᠋ᠢᠨ ᠬᠥᠪᠡᠭᠦᠨ ᠪᠤᠯᠤ ᠭᠠᠷᠴᠤ ᠳᠠᠢᠰᠤᠨᠳᠠᠷᠤᠭᠴᠢ ᠳ᠋ᠤᠷ ᠮᠡᠳᠡᠭᠦᠯᠷᠦᠨ : 《ᠮᠠᠨ ᠤ᠋ ᠠᠯᠲᠠᠨ ᠤᠯᠤᠰ ᠢ᠋ ᠳᠠᠢᠯᠠᠬᠤ ᠠᠨᠤ ᠤᠯᠤᠰ ᠢ᠋ ᠣᠯᠬᠤ ᠶ᠋ᠢ ᠬᠢᠴᠢᠶᠡᠬᠦ ᠪᠣᠢ ᠶᠠ᠂ ᠨᠢᠭᠡᠨ ᠬᠥᠮᠦᠨ ᠢ᠋ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠶᠠᠭᠤᠨ ᠪᠣᠯᠬᠤ? ᠠᠯᠲᠠᠨ ᠤᠯᠤᠰ ᠮᠠᠨ ᠤ᠋ ᠮᠣᠩᠭᠣᠯ ᠢ᠋ ᠪᠠᠲᠤ ᠦᠭᠡᠢ ᠭᠡᠮᠡᠨ ᠪᠠᠰᠤᠮᠵᠢᠯᠠᠨ ᠰᠠᠶᠢ ᠡᠨᠡ ᠮᠡᠲᠦ ᠤᠷᠪᠠᠬᠤ ᠪᠣᠯᠠᠢ᠃ ᠲᠡᠷᠡ ᠨᠢᠭᠡᠨ ᠮᠠᠭᠤ ᠶ᠋ᠢ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠲᠤᠰᠠ ᠪᠣᠯᠬᠤ ᠶᠠᠭᠤᠨ ? ᠬᠠᠷᠢᠨ ᠲᠡᠷᠡ ᠨᠢᠭᠡᠨ ᠢ᠋ ᠡᠰᠡ ᠠᠯᠠᠭᠰᠠᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠦᠮᠡᠨ ᠢᠷᠭᠡᠨ ᠳ᠋ᠦ᠍ᠷ ᠪᠠᠲᠤ ᠪᠠᠨ ᠮᠡᠳᠡᠭᠳᠡᠮᠦᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠳᠠᠢᠰᠤᠨᠳᠠᠷᠤᠭᠴᠢ ᠮᠥᠨ ᠭᠡᠮᠡᠨ ᠹᠦ ᠯᠦ᠍ ᠬᠤ᠌ ᠶ᠋ᠢ ᠲᠠᠯᠪᠢᠨ ᠬᠤᠷᠢᠮᠯᠠᠵᠤ ᠂ ᠳᠡᠪᠡᠯ ᠡᠮᠦᠰᠬᠡᠨ ᠦᠳᠡᠵᠦ ᠢᠯᠡᠭᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠪᠠᠭᠠ ᠵᠠᠩᠵᠤᠨ ᠨᠠᠷ ᠲᠠᠴᠢᠶᠠᠳᠠᠨ ᠸᠠᠢᠵᠢᠩ ᠬᠦᠷᠢᠶᠡ ᠶ᠋ᠢᠨ ᠡᠭᠦᠳᠡᠨ ᠭᠠᠳᠠᠨᠠ ᠭᠡᠨᠡᠳᠲᠡ ᠲᠣᠰᠴᠤ ᠠᠪᠤᠭᠰᠠᠨ ᠳ᠋ᠤᠷ ᠹᠦ ᠯᠦ᠍ ᠬᠤ᠌ ᠶᠡᠬᠡᠯᠡ ᠠᠶᠤᠨ ᠪᠠᠷᠬᠢᠷᠠᠨ ᠳᠤᠲᠠᠭᠠᠵᠤ ᠶᠠᠪᠤᠪᠠ᠃ ᠵᠢᠴᠢ ᠣᠯᠠᠨ ᠴᠡᠷᠢᠭ ᠮᠣᠩᠭᠣᠯ ᠤ᠋ᠨ ᠦᠭᠡ ᠦᠨᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠦᠯᠦ ᠤᠬᠤᠷᠢᠬᠤᠢ ᠳ᠋ᠤᠷ ᠪᠢᠰᠢᠷᠡᠨ ᠳᠠᠭᠠᠪᠠ᠃ ᠲᠡᠳᠦᠢ ᠴᠡᠷᠢᠭ ᠲᠦᠩ ᠭᠤᠸᠠᠨ ᠪᠣᠭᠣᠮᠲᠠ ᠶ᠋ᠢ ᠭᠠᠯ ᠲᠠᠯᠪᠢᠨ ᠰᠢᠲᠠᠭᠠᠵᠤ᠂ ᠴᠢᠯᠠᠭᠤ ᠲᠣᠭᠣᠰᠬᠠ ᠶ᠋ᠢ ᠬᠠᠭᠠᠰ ᠰᠠᠷᠠ ᠡᠪᠳᠡᠭᠦᠯᠵᠦ ᠲᠡᠭᠰᠢ ᠭᠠᠵᠠᠷ ᠠᠳᠠᠯᠢ ᠪᠣᠯᠭᠠᠭᠠᠳ ᠳᠠᠬᠢᠨ ᠡᠮᠦᠨᠡᠰᠢ ᠳᠠᠷᠤᠨ ᠣᠷᠣᠵᠤ ᠰᠦ᠍ ᠵᠧᠦ ᠶ᠋ᠢᠨ ᠬᠠᠷᠢᠶᠠᠲᠤ ᠭᠠᠵᠠᠷ ᠤ᠋ᠨ ᠬᠣᠲᠠ ᠪᠠᠯᠭᠠᠳ ᠢ᠋ ᠪᠠᠢᠯᠳᠤᠨ ᠠᠪᠬᠤᠢ ᠳ᠋ᠤᠷ ᠮᠣᠩᠭᠣᠯ ᠤ᠋ᠨ ᠰᠦᠷ ᠲᠡᠭᠷᠢ ᠶ᠋ᠢᠨ ᠳᠠᠭᠤᠨ ᠮᠡᠲᠦ ᠨᠢᠭᠡᠨ ᠬᠥᠮᠦᠨ ᠠᠷᠪᠠᠨ ᠢ᠋ ᠳᠠᠢᠯᠠᠬᠤ ᠲᠤᠯᠠ ᠠᠯᠠᠬᠤ ᠠᠭᠤᠷ ᠴᠡᠷᠢᠭ ᠦ᠋ᠨ ᠲᠣᠭᠣᠰᠣᠨ ᠠᠭᠤᠯᠠ ᠮᠥᠷᠡᠨᠡ ᠳᠡᠭᠳᠡᠪᠡ᠃
ᠲᠡᠨᠳᠡᠴᠡ ᠮᠤᠬᠤᠯᠢ ᠬᠠᠭᠠᠨ ᠤ᠋ ᠬᠠᠷᠢᠭᠤ ᠵᠠᠷᠯᠢᠭ ᠢ᠋ ᠣᠯᠵᠤ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠡᠮᠦᠨᠡ ᠵᠦᠭ ᠣᠷᠣᠵᠤ ᠢᠷᠡᠪᠡ᠃ ᠲᠦᠩ ᠭᠤᠸᠠᠨ ᠢ᠋ ᠡᠮᠦᠨᠡ ᠴᠡᠷᠢᠭ ᠠᠷᠪᠠᠨ ᠰᠠᠷᠠ ᠳ᠋ᠤ᠌ ᠨᠢᠭᠡᠨᠲᠡ ᠡᠪᠳᠡᠭᠰᠡᠨ ᠲᠤᠯᠠ ᠬᠣᠭᠣᠰᠣᠨ ᠭᠠᠵᠠᠷ ᠮᠡᠲᠦ ᠶᠠᠪᠤᠵᠤ᠂ ᠠᠯᠲᠠᠨ ᠤᠯᠤᠰ ᠲᠤᠷ ᠳᠠᠪᠰᠢᠨ ᠨᠠᠮᠨᠠᠵᠤ ᠣᠷᠣᠵᠤ ᠢᠷᠡᠪᠡ᠃ ᠡᠳᠡᠭᠡᠷ ᠮᠡᠳᠡᠭᠡ ᠶ᠋ᠢ ᠬᠡᠳᠦᠢᠨᠡᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠢᠦᠢ ᠱᠢ ᠲᠠᠢᠰᠢ ᠭᠠᠷᠴᠤ ᠬᠡᠯᠡᠭᠰᠡᠨ ᠢᠨᠦ : 《ᠲᠦᠩ ᠭᠤᠸᠠᠨ ᠡᠪᠳᠡᠷᠡᠵᠦ᠂ ᠮᠣᠩᠭᠣᠯ ᠬᠦᠨᠳᠦ ᠭᠠᠵᠠᠷ ᠭᠦᠨᠡ ᠣᠷᠣᠪᠠ᠃ ᠡᠳᠦᠭᠡ ᠮᠠᠨ ᠤ᠋ ᠨᠡᠢᠰᠯᠡᠯ ᠳ᠋ᠦ᠍ᠷ ᠬᠡᠲᠦᠷᠬᠡᠢ ᠪᠡᠯᠡᠳᠦᠭᠰᠡᠨ ᠲᠤᠯᠠ ᠲᠡᠳᠡ ᠢᠷᠡᠵᠦ ᠬᠠᠭᠠᠬᠤ ᠦᠭᠡᠢ ᠪᠡᠷ ᠾᠧ ᠩᠠᠩ ᠤ᠋ᠨ ᠬᠠᠷᠢᠶᠠᠲᠤ ᠵᠧᠦ ᠰᠢᠶᠠᠨ ᠢ᠋ ᠴᠥᠮ ᠪᠠᠢᠯᠳᠤᠨ ᠠᠪᠴᠤ ᠪᠢᠶᠠᠨ ᠵᠢᠩ ᠢ᠋ ᠲᠣᠭᠣᠷᠢᠨ ᠵᠧᠦ ᠰᠢᠶᠠᠨ ᠬᠣᠲᠠ ᠪᠠᠯᠭᠠᠳ ᠢ᠋ ᠠᠪᠤᠭᠰᠠᠨ ᠠᠨᠤ ᠵᠦᠩᠳᠦ᠋ ᠶ᠋ᠢ ᠠᠪᠤᠭᠰᠠᠨ ᠵᠣᠪᠠᠯᠠᠩ ᠨᠢᠳᠦᠨ ᠦ᠌ ᠡᠮᠦᠨᠡ ᠬᠦᠷᠴᠦ ᠢᠷᠡᠪᠡ᠃ ᠲᠡᠢᠨ ᠬᠦ᠌ ᠰᠠᠬᠢᠭ᠍ᠰᠠᠨ ᠰᠠᠢᠳ ᠲᠦᠰᠢᠮᠡᠳ᠂ ᠵᠠᠭᠤᠨ ᠣᠪᠣᠭᠲᠠᠨ ᠨᠡᠩᠳᠡ ᠦᠬᠦᠨ ᠠᠶᠤᠯᠴᠠᠮᠤᠢ᠃ ᠬᠦᠰᠡᠬᠦ ᠢᠨᠦ ᠬᠠᠭᠠᠨ ᠱᠧ ᠵᠢᠢ ᠶ᠋ᠢ ᠴᠢᠭᠢᠷᠠᠭ ᠪᠣᠯᠭᠠᠨ ᠴᠡᠷᠢᠭ ᠢ᠋ ᠳᠡᠪᠰᠢᠭᠦᠯᠵᠦ᠂ ᠮᠣᠩᠭᠣᠯ ᠢ᠋ ᠬᠥᠭᠡᠭᠡᠵᠦ ᠲᠦᠩ ᠭᠤᠸᠠᠨ ᠢ᠋ ᠰᠡᠯᠪᠢᠨ ᠪᠠᠷᠢᠵᠤ᠂ ᠪᠠᠲᠤᠯᠠᠨ ᠰᠠᠬᠢᠭᠤᠯᠵᠤ᠂ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠡᠯ ᠯᠢ ᠪᠤ᠌ ᠰᠦᠨ ᠢ᠋ ᠳᠠᠬᠢᠨ ᠬᠡᠷᠡᠭᠯᠡᠵᠦ᠂ ᠨᠡᠢᠰᠯᠡᠯ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠪᠠᠢᠯᠳᠤᠵᠤ ᠲᠥᠰᠦᠭᠡᠯᠡᠬᠦ ᠪᠠᠭᠠᠲᠤᠷ ᠬᠦᠴᠦᠲᠡᠨ ᠢ᠋ ᠰᠢᠯᠭᠠᠨ ᠠᠪᠴᠤ ᠠᠷᠪᠠᠭᠠᠳ ᠵᠠᠩᠵᠤᠨ ᠢ᠋ ᠪᠠᠢᠭᠤᠯᠵᠤ ᠠᠯᠢᠪᠠᠰᠤ ᠳ᠋ᠤᠷ ᠬᠠᠪᠰᠤᠷᠤᠭᠤᠯᠤᠨ ᠰᠢᠯᠭᠠᠳᠠᠭ ᠴᠡᠷᠢᠭ ᠢ᠋ ᠬᠦᠨᠳᠦ ᠱᠠᠩ ᠢ᠋ᠶ᠋ᠠᠷ ᠬᠥᠳᠡᠯᠭᠡᠨ ᠠᠪᠴᠤ ᠲᠣᠭᠣᠷᠢᠨ ᠪᠠᠢᠴᠠᠭᠠᠨ ᠪᠥᠭᠡᠳ ᠨᠢᠭᠡᠨᠲᠡᠭᠡᠭᠦᠷ ᠪᠠᠢᠯᠳᠤᠵᠤ ᠨᠢᠭᠡᠨᠲᠡᠭᠡᠭᠦᠷ ᠰᠠᠬᠢᠪᠠᠰᠤ᠂ ᠠᠯᠳᠠᠭᠰᠠᠨ ᠾᠧ ᠪᠧᠢ ᠶ᠋ᠢᠨ ᠭᠠᠵᠠᠷ ᠢ᠋ ᠳᠠᠬᠢᠨ ᠡᠭᠡᠭᠦᠯᠦᠨ ᠣᠯᠵᠤ᠂ ᠱᠧ ᠶ᠋ᠢᠢ ᠮᠥᠨ ᠮᠠᠨᠳᠤᠵᠤ ᠪᠣᠯᠬᠤ ᠪᠣᠯᠠᠢ ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠸᠠᠨ ᠶᠠᠨ ᠰᠢᠶᠦ᠋ᠨ ᠠᠢᠯᠠᠳᠬᠠᠭᠰᠠᠨ ᠢ᠋ ᠵᠥᠪᠰᠢᠶᠡᠨ ᠴᠡᠷᠢᠭ ᠦ᠋ᠨ ᠲᠦᠰᠢᠮᠡᠳ ᠳᠠᠭᠠᠵᠤ ᠶᠠᠪᠤ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠱᠠᠩ ᠱᠤ᠌ ᠱᠧᠩ ᠪᠥᠭᠡᠳ ᠫᠢᠩ ᠵᠠᠩ ᠵᠧᠩ ᠱᠢ ᠲᠦᠰᠢᠮᠡᠯ ᠬᠠᠪᠰᠤᠷᠤᠭᠰᠠᠨ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠵᠣ᠌ ᠬᠤ᠌ ᠭᠣᠣ ᠴᠢ ᠵᠡᠷᠭᠡ ᠡᠴᠡ ᠭᠠᠷᠴᠤ ᠠᠢᠯᠠᠳᠬᠠᠷᠤᠨ : 《ᠢᠦᠢ ᠱᠢ ᠲᠠᠢᠰᠢ ᠲᠦᠰᠢᠮᠡᠯ ᠪᠢᠷ ᠦ᠋ᠨ ᠳᠣᠣᠷᠠ ᠵᠠᠩᠵᠤᠨ ᠪᠠᠭᠤᠯᠭᠠᠨ᠂ ᠴᠠᠭᠠᠰᠤᠨ ᠤ᠋ ᠳᠡᠭᠡᠷᠡ ᠴᠡᠷᠢᠭ ᠵᠢᠭ᠍ᠰᠠᠭᠠᠨ ᠬᠣᠭᠣᠰᠣᠨ ᠦᠭᠡ ᠶ᠋ᠢ ᠲᠥᠰᠦᠭᠡᠯᠡᠬᠦ ᠪᠣᠢ ᠶᠠ᠃ ᠡᠩ ᠦ᠋ᠨ ᠡᠳᠦᠷ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤᠷ ᠶᠠᠪᠤᠵᠤ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠢ᠋ ᠥᠴᠦᠬᠡᠨ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃ ᠪᠠᠢᠯᠳᠤᠬᠤ ᠰᠠᠬᠢᠬᠤ ᠶ᠋ᠢᠨ ᠤᠴᠢᠷ ᠢ᠋ ᠤᠬᠠᠬᠤ ᠦᠭᠡᠢ᠂ ᠭᠠᠭᠴᠠ ᠬᠣᠭᠣᠰᠣᠨ ᠠᠮᠠ ᠪᠠᠷ ᠭᠠᠪᠢᠶᠠ ᠪᠠᠢᠭᠤᠯᠬᠤ ᠶ᠋ᠢ ᠮᠡᠳᠡᠬᠦ ᠪᠣᠢ ᠶᠠ ᠃ ᠬᠠᠷᠠᠬᠠᠨ ᠠᠮᠢ ᠪᠠᠨ ᠴᠦᠯᠡᠵᠦ ᠦᠬᠦᠨ ᠵᠢᠳᠬᠦᠬᠦ ᠶ᠋ᠢ ᠲᠡᠷᠡ ᠦᠯᠦ ᠦᠢᠯᠡᠳᠦᠮᠦᠢ᠃ ᠤᠭ ᠠ᠋ᠴᠠ ᠪᠢᠴᠢᠭ ᠦ᠋ᠨ ᠰᠠᠢᠳ ᠡᠷᠬᠡ ᠡᠷᠬᠢᠮ ᠢ᠋ ᠡᠳ᠋ᠯᠡᠵᠦ᠂ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠨᠠᠷ ᠢ᠋ ᠨᠣᠬᠠᠢ ᠭᠠᠬᠠᠢ ᠠᠳᠠᠯᠢ ᠦᠵᠡᠭᠰᠡᠭᠡᠷ ᠴᠡᠷᠢᠭ ᠦ᠋ᠨ ᠡᠷᠬᠢᠮ ᠥᠨᠳᠥᠷ ᠴᠥᠮ ᠢ᠋ ᠬᠠᠰᠤᠭᠠᠳ ᠣᠳᠣ ᠴᠣᠬᠣᠮ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠴᠡᠷᠢᠭ ᠳᠠᠢᠴᠢᠯᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠵᠤᠬᠤᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠮᠠᠨ ᠤ᠋ ᠤᠯᠤᠰ ᠲᠥᠷᠥ ᠡᠨᠡ ᠮᠡᠲᠦ ᠪᠣᠯᠤᠭᠰᠠᠨ ᠪᠣᠯᠠᠢ᠃ ᠭᠠᠭᠴᠠ ᠵᠡᠭᠦᠨ ᠢ᠋ ᠬᠢᠴᠢᠶᠡᠪᠡᠰᠦ ᠪᠠᠷᠠᠭᠤᠨ ᠠᠨᠤ ᠣᠰᠣᠯᠳᠠᠮᠤᠢ᠃ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠢ᠋ ᠬᠢᠴᠢᠶᠡᠪᠡᠰᠦ ᠵᠡᠭᠦᠨ ᠢᠨᠦ ᠣᠰᠣᠯᠳᠠᠮᠤᠢ᠃ ᠡᠵᠡᠨ ᠵᠠᠷᠤᠬᠤᠢ ᠳ᠋ᠤᠷ ᠪᠢᠳᠡ ᠣᠨᠴᠠ ᠬᠣᠭᠣᠰᠣᠨ ᠦᠭᠡ ᠪᠡᠷ ᠭᠣᠣᠳᠠᠵᠤ᠂ ᠰᠢᠯᠦᠭ ᠳᠠᠭᠤᠯᠠᠯ ᠢ᠋ᠶ᠋ᠠᠷ ᠴᠢᠮᠡᠭᠯᠡᠵᠦ᠂ ᠡᠵᠡᠨ ᠢ᠋ ᠭᠦᠨ ᠴᠡᠩᠭᠡᠯ ᠳ᠋ᠦ᠍ᠷ ᠤᠳᠤᠷᠢᠳᠤᠮᠤᠢ᠃ ᠤᠯᠤᠰ ᠵᠣᠪᠠᠬᠤᠢ ᠳ᠋ᠤᠷ ᠬᠣᠭᠣᠰᠣᠨ ᠦᠭᠡ ᠪᠡᠷ ᠴᠡᠷᠢᠭ ᠪᠣᠯᠭᠠᠨ ᠴᠠᠯᠴᠢᠮᠤᠢ᠂ ᠤᠯᠤᠰ ᠮᠥᠬᠥᠪᠡᠰᠦ ᠴᠡᠷᠢᠭ ᠦ᠋ᠨ ᠬᠠᠷᠢᠶᠠᠲᠤ ᠴᠥᠮ ᠦᠬᠦᠵᠦ ᠪᠠᠷᠠᠮᠤᠢ᠃ ᠪᠢᠴᠢᠭ ᠦ᠋ᠨ ᠬᠠᠷᠢᠶᠠᠲᠤ ᠬᠣᠲᠠᠨ ᠢ᠋ ᠡᠷᠭᠦᠵᠦ ᠰᠠᠢᠨ ᠳ᠋ᠤᠷ ᠣᠷᠣᠮᠤᠢ᠃ ᠵᠦᠩᠳᠦ᠋ ᠮᠥᠨ ᠲᠡᠷᠡ ᠶᠣᠰᠣ ᠪᠤᠰᠤ ᠤᠤ ? ᠡᠳᠦᠭᠡ ᠡᠵᠡᠨ ᠦ᠌ ᠡᠮᠦᠨᠡ ᠲᠡᠳᠡᠭᠡᠷ ᠴᠥᠮ ᠰᠠᠢᠨ ᠬᠥᠮᠦᠨ ᠪᠣᠯᠵᠤ᠂ ᠮᠠᠨ ᠢ᠋ ᠴᠥᠮ ᠨᠣᠬᠠᠢ ᠭᠠᠬᠠᠢ ᠳ᠋ᠤᠷ ᠠᠳᠠᠯᠢ ᠵᠠᠷᠤᠬᠤ ᠠᠨᠤ ᠶᠠᠭᠤᠲᠠᠢ ᠮᠤᠩᠬᠠᠭ ? ᠡᠵᠡᠨ ᠦ᠌ ᠬᠡᠰᠢᠭ ᠢ᠋ ᠦᠶᠡ ᠤᠯᠠᠷᠢᠨ ᠬᠦᠷᠲᠡᠭᠡᠳ ᠨᠢᠭᠡᠨ ᠰᠤᠮᠤ ᠶ᠋ᠢ ᠬᠠᠷᠢᠭᠤᠯᠠᠨ ᠴᠢᠳᠠᠬᠤ ᠦᠭᠡᠢ ᠪᠥᠭᠡᠳ ᠡᠳᠦᠭᠡ ᠬᠣᠭᠣᠰᠣᠨ ᠦᠭᠡᠰ ᠶᠡᠬᠡ ᠶᠣᠰᠣ ᠬᠡᠯᠡᠵᠦ ᠶᠡᠬᠡᠯᠡ ᠪᠠᠶᠠᠷᠯᠠᠬᠤ ᠶ᠋ᠢ ᠬᠡᠨ ᠦᠯᠦ ᠴᠢᠳᠠᠬᠤ ? 》ᠭᠡᠮᠡᠨ ᠭᠠᠭᠴᠠ ᠪᠢᠶᠠᠨ ᠵᠢᠩ ᠢ᠋ ᠬᠠᠮᠠᠭᠠᠯᠠᠨ ᠰᠠᠬᠢᠬᠤ ᠪᠣᠢ ᠶᠠ᠂ ᠭᠠᠳᠠᠭ᠍ᠰᠢ ᠭᠠᠷᠬᠤ ᠦᠭᠡᠢ ᠳ᠋ᠦ᠍ᠷ ᠬᠠᠭᠠᠨ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠳ ᠢ᠋ ᠭᠠᠷᠭᠠᠵᠤ ᠬᠡᠯᠡᠯᠴᠡᠭᠦᠯᠦᠨ ᠡᠶᠡᠳᠡᠭᠦᠯᠬᠦ ᠢᠨᠦ ᠡᠷᠬᠢᠮ ᠭᠡᠮᠡᠨ ᠤᠷᠤᠭ᠍ᠰᠢ ᠣᠷᠣᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠪᠠᠰᠠ ᠬᠦᠷᠴᠦ ᠢᠷᠡᠭᠡᠳ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠡᠳᠦᠷ ᠢᠷᠡᠬᠦᠶᠡ ᠤᠷᠤᠭᠰᠢᠯᠠᠬᠤ ᠲᠤᠯᠠ ᠰᠠᠬᠢᠭ᠍ᠰᠠᠨ ᠵᠧᠦ ᠵᠢᠶᠦ᠋ᠨ ᠴᠥᠮ ᠡᠪᠳᠡᠷᠡᠨ ᠬᠣᠬᠢᠷᠠᠪᠠ᠃ ᠳᠠᠬᠢᠨ ᠠᠪᠴᠤ ᠨᠢᠭᠡᠨᠲᠡ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠡᠷᠲᠡᠨ ᠡᠴᠡ ᠴᠡᠷᠢᠭ ᠢ᠋ ᠣᠮᠲᠣᠭᠠᠢᠯᠠᠨ᠂ ᠪᠢᠴᠢᠭ ᠢ᠋ ᠡᠷᠬᠢᠯᠡᠭᠰᠡᠨ ᠬᠠᠤᠯᠢ ᠶᠣᠰᠣ ᠳ᠋ᠠᠭᠠᠨ ᠶᠡᠬᠡᠯᠡ ᠭᠡᠮᠰᠢᠪᠡ᠃ ᠬᠡᠷᠬᠢᠨ ᠭᠡᠮᠰᠢᠪᠡᠴᠦ ᠪᠠᠭᠠᠲᠤᠷ ᠡᠷᠡᠰ ᠨᠢᠭᠡᠨᠲᠡ ᠳᠤᠲᠠᠭᠠᠭᠠᠳ ᠪᠢᠴᠢᠭ ᠦ᠋ᠨ ᠰᠠᠢᠳ ᠶᠠᠮᠤᠨ ᠬᠠᠭᠠᠯᠭᠠ ᠳ᠋ᠤᠷ ᠫᠢᠭ ᠳᠦᠭᠦᠷᠴᠦᠬᠦᠢ᠃ ᠬᠠᠭᠠᠨ ᠨᠢᠳᠦ ᠪᠦᠯᠲᠡᠯᠵᠡᠨ ᠤᠷᠤᠭᠤᠯ ᠶᠠᠪᠠᠭᠠᠨᠠᠬᠤ ᠠ᠋ᠴᠠ ᠥᠪᠡᠷᠡ ᠴᠢᠳᠠᠯ ᠦᠭᠡᠢ ᠪᠣᠯᠪᠠᠢ᠃ ᠣᠳᠣ ᠭᠠᠭᠴᠠ ᠮᠣᠩᠭᠣᠯ ᠢ᠋ ᠰᠠᠢᠨ ᠦᠭᠡ ᠪᠡᠷ ᠬᠠᠭᠤᠷᠤᠨ ᠮᠡᠬᠡᠯᠡᠵᠦ ᠠᠯᠠᠯᠳᠤᠬᠤ ᠦᠭᠡᠢ ᠪᠡᠷ ᠳᠠᠭᠠᠬᠤ ᠪᠠᠨ ᠪᠡᠯᠡᠳᠬᠡᠪᠡ᠃ ᠡᠭᠦᠨᠴᠡ ᠠᠯᠲᠠᠨ ᠤᠯᠤᠰ ᠰᠢᠷᠪᠥᠰᠥ ᠰᠤᠨᠵᠤ ᠲᠠᠮᠢᠷ ᠲᠠᠰᠤᠷᠠᠨ ᠳᠣᠷᠣᠢᠲᠠᠨ ᠪᠠᠭᠤᠷᠠᠪᠠ᠃
ᠲᠡᠳᠦᠢ ᠮᠤᠬᠤᠯᠢ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠳᠠᠢᠰᠤᠨᠳᠠᠷᠤᠭᠴᠢ ᠶ᠋ᠢᠨ ᠴᠡᠷᠢᠭ ᠲᠦᠩ ᠭᠤᠸᠠᠨ ᠢ᠋ ᠨᠡᠪᠲᠡᠯᠦᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠢᠶᠠᠨ ᠵᠢᠩ ᠢ᠋ ᠲᠣᠭᠣᠷᠢᠨ ᠵᠧᠦ ᠰᠢᠶᠠᠨ ᠬᠣᠲᠠ ᠪᠠᠯᠭᠠᠳ ᠢ᠋ ᠪᠠᠢᠯᠳᠤᠨ ᠠᠪᠬᠤᠢ ᠳ᠋ᠤᠷ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠬᠦᠨᠳᠦ ᠱᠠᠩ ᠲᠠᠯᠪᠢᠵᠤ᠂ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠨ ᠪᠠᠰᠠ ᠨᠢᠭᠡᠨᠲᠡᠭᠡᠭᠦᠷ ᠪᠢᠶᠠᠨ ᠵᠢᠩ ᠢ᠋ ᠡᠪᠳᠡᠬᠦ ᠠᠷᠭᠠ ᠶ᠋ᠢ ᠵᠥᠪᠯᠡᠨ ᠪᠣᠳᠣᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠡᠳᠦᠨ ᠮᠣᠵᠢ ᠶ᠋ᠢᠨ ᠴᠡᠷᠢᠭ ᠴᠥᠮ ᠪᠢᠶᠠᠨ ᠵᠢᠩ ᠳ᠋ᠦ᠍ᠷ ᠬᠤᠷᠠᠨ ᠴᠤᠭᠯᠠᠭᠰᠠᠨ ᠲᠤᠯᠠ ᠡᠪᠳᠡᠬᠦᠢ ᠳ᠋ᠦ᠍ᠷ ᠪᠡᠷᠬᠡ ᠪᠣᠯᠬᠤᠢ ᠳ᠋ᠤᠷ ᠭᠡᠨᠡᠳᠲᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠴᠡᠷᠢᠭ ᠡᠭᠡᠭᠲᠦᠨ᠂ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠳ᠋ᠤᠷ ᠡᠮᠦᠨᠡ ᠴᠡᠷᠢᠭ ᠮᠠᠭᠤ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠶᠡᠬᠡᠯᠡ ᠰᠢᠬᠠᠮᠳᠠᠪᠠ᠃ ᠵᠠᠷᠯᠢᠭ ᠠ᠋ᠴᠠ ᠵᠥᠷᠢᠴᠡᠰᠦᠭᠡᠢ ᠬᠡᠮᠡᠬᠦᠯᠡ ᠲᠦᠰᠢᠮᠡᠯ ᠦ᠋ᠨ ᠶᠣᠰᠣ ᠪᠤᠰᠤ᠂ ᠡᠭᠡᠰᠦᠭᠡᠢ ᠬᠡᠮᠡᠬᠦᠯᠡ ᠬᠠᠷᠠᠬᠠᠨ ᠠᠪᠤᠭᠰᠠᠨ ᠬᠣᠲᠠ ᠪᠠᠯᠭᠠᠳ ᠢ᠋ ᠬᠠᠢᠷᠠᠯᠠᠬᠤ ᠲᠤᠯᠠ ᠠᠷᠭᠠ ᠵᠠᠪᠬᠠᠷᠠᠨ ᠴᠡᠷᠢᠭ ᠢ᠋ ᠦᠯᠡᠳᠡᠭᠡᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠲᠣᠪᠳᠣᠯᠠᠨ ᠢᠷᠡᠬᠦᠢ ᠳ᠋ᠦ᠍ᠷ ᠶᠡᠬᠡ ᠴᠡᠷᠢᠭ ᠢ᠋ ᠳᠠᠢᠰᠤᠨᠳᠠᠷᠤᠭᠴᠢ᠂ ᠪᠤᠯᠤ ᠬᠣᠶᠠᠭᠤᠯᠠ ᠳ᠋ᠤᠷ ᠴᠢᠩᠳᠠ ᠴᠠᠭᠠᠵᠠᠯᠠᠨ ᠲᠤᠰᠢᠶᠠᠵᠤ᠂ ᠠᠪᠤᠭᠰᠠᠨ ᠬᠣᠲᠠᠳ ᠢ᠋ ᠪᠠᠲᠤᠳᠠ ᠰᠠᠭᠢᠭᠤᠯᠤᠭᠠᠳ ᠮᠤᠬᠤᠯᠢ ᠳ᠋ᠠᠢᠳᠦ᠋ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠭᠠᠭᠴᠠᠭᠠᠷ ᠢᠷᠡᠭᠰᠡᠨ ᠢ᠋ ᠰᠣᠨᠣᠰᠴᠤ ᠤᠴᠢᠷ ᠢ᠋ ᠠᠰᠠᠭᠤᠨ ᠨᠡᠩ ᠴᠢᠬᠤᠯᠳᠠᠵᠤ ᠬᠤᠷᠳᠤᠨ ᠳᠠᠭᠤᠳᠠᠭᠤᠯ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠦᠭᠡᠢ ᠠᠢᠯᠠᠳᠬᠠᠷᠤᠨ :《ᠡᠰᠡ ᠳᠠᠷᠤᠭᠳᠠᠪᠠᠰᠤ ᠮᠡᠷᠭᠡᠨ ᠪᠣᠯᠬᠤ ᠦᠭᠡᠢ ᠂ ᠬᠡᠷᠪᠡ ᠮᠢᠨᠦ ᠴᠠᠭᠠᠵᠠ ᠶ᠋ᠢ ᠰᠠᠬᠢᠪᠠᠰᠤ ᠪᠠᠲᠤ ᠪᠣᠯᠤᠮᠤᠢ᠂ ᠬᠡᠷᠪᠡ ᠳᠠᠷᠤᠭᠳᠠᠪᠠᠰᠤ ᠮᠡᠷᠭᠡᠨ ᠪᠣᠯᠤᠮᠤᠢ᠂ ᠮᠠᠨ ᠤ᠋ ᠬᠣᠲᠠ ᠬᠡᠷᠬᠢᠪᠡᠴᠦ ᠦᠯᠦ ᠠᠪᠲᠠᠮᠤᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠭᠠᠨ ᠤ᠋ ᠳᠣᠲᠣᠷᠠ ᠤᠬᠠᠮᠵᠢᠯᠠᠭᠠᠳ ᠳᠠᠷᠤᠢ ᠤᠯᠤᠰ ᠤ᠋ᠨ ᠠᠮᠤᠷ ᠴᠡᠷᠢᠭ ᠪᠠ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠴᠡᠷᠢᠭ ᠢ᠋ ᠠᠪᠴᠤ ᠶ᠋ᠢᠨ ᠵᠧᠦ ᠶ᠋ᠢᠨ ᠵᠠᠩ ᡁᠢ ᠶ᠋ᠢ ᠲᠠᠢᠯᠠᠭᠤᠯᠬᠤᠢ ᠳ᠋ᠤᠷ ᠮᠤᠬᠤᠯᠢ ᠬᠠᠭᠠᠨ ᠤ᠋ ᠪᠣᠯᠪᠠᠰᠤᠨ ᠴᠡᠷᠢᠭ ᠢ᠋ ᠠᠪᠴᠤ ᠶ᠋ᠢᠨ ᠵᠧᠦ ᠶ᠋ᠢᠨ ᠣᠢᠷᠠ ᠰᠢᠬᠠᠵᠤ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠡᠷ ᠠᠪᠰᠤᠭᠠᠢ ᠭᠡᠮᠡᠨ ᠯᠢᠶᠣᠤ ᠰᠢ ᠱᠠᠨ ᠹᠦ ᠬᠡᠮᠡᠬᠦ ᠭᠠᠵᠠᠷ ᠢ᠋ ᠠᠪᠤᠭᠤᠯᠤᠷᠠ ᠢᠯᠡᠭᠡᠬᠦᠢ ᠳ᠋ᠦ᠍ᠷ ᠴᠡᠷᠢᠭ ᠲᠦ᠍ᠷ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠴᠢ ᠯᠢᠶᠣᠤ ᠰᠢ ᠶ᠋ᠢᠨ ᠬᠤᠯᠠᠭᠠᠢ ᠶ᠋ᠢ ᠲᠦᠷᠭᠡᠨᠡ ᠪᠠᠢᠯᠳᠤ᠂ ᠲᠡᠷᠡ ᠵᠠᠩ ᡁᠢ ᠶ᠋ᠢᠨ ᠢᠨᠠᠭ ᠤᠷᠤᠭ ᠲᠤᠯᠠ ᠵᠠᠩ ᡁᠢ ᠯᠠᠪ ᠥᠮᠥᠭᠯᠡᠷᠡ ᠡᠴᠢᠮᠦᠢ᠃ ᠲᠡᠷᠡ ᠡᠴᠢᠬᠦᠢ ᠳ᠋ᠦ᠍ᠷ ᠪᠢ ᠴᠡᠷᠢᠭ ᠠᠪᠴᠤ ᠡᠭᠡᠬᠦ ᠵᠠᠮ ᠢ᠋ ᠲᠠᠰᠤᠯᠤᠨ ᠪᠠᠢᠯᠳᠤᠪᠠᠰᠤ ᠨᠢᠭᠡᠨ ᠤᠳᠠᠭᠠ ᠳ᠋ᠤᠷ ᠳᠠᠷᠤᠢ ᠠᠷᠢᠯᠭᠠᠵᠤ ᠪᠣᠯᠤᠮᠤᠢ ! 》ᠭᠡᠮᠡᠨ ᠶᠠᠪᠤᠭᠤᠯᠪᠠ ᠃ ᠵᠢᠴᠢ ᠮᠣᠩᠭᠣᠯ ᠪᠤᠬᠠ ᠶ᠋ᠢᠨ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠵᠦᠩ ᠳᠡ ᠰᠢᠶᠠᠨ ᠤ᠋ ᠪᠠᠷᠠᠭᠤᠨ ᠳ᠋ᠤ᠌ ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠡᠴᠦᠰ ᠪᠦᠭᠭᠦᠭᠦᠯᠵᠦ᠂ ᠯᠢᠶᠣᠤ ᠰᠢ ᠭᠠᠵᠠᠷ ᠤ᠋ᠨ ᠴᠡᠷᠢᠭ ᠢ᠋ ᠬᠠᠭᠠᠪᠠᠰᠤ ᠵᠠᠩ ᡁᠢ ᠪᠠᠰᠠ ᠲᠡᠩᠭᠦᠷᠡᠭᠦᠯᠦᠷᠡ ᠢᠷᠡᠬᠦ ᠪᠣᠯᠠᠢ᠂ ᠲᠡᠭᠦᠨ ᠦ᠌ ᠡᠭᠡᠬᠦ ᠵᠠᠮ ᠢ᠋ ᠳᠠᠰᠤᠯ ᠭᠡᠮᠡᠨ ᠶᠠᠪᠤᠭᠤᠯᠪᠠ᠃
ᠲᠡᠳᠦᠢ ᠮᠤᠬᠤᠯᠢ ᠰᠥᠨᠢ ᠳᠦᠯᠢᠨ ᠰᠢᠯᠭᠠᠳᠠᠭ ᠴᠡᠷᠢᠭ ᠢ᠋ ᠠᠪᠴᠤ ᠬᠦᠯᠢᠶᠡᠬᠦᠶᠡ ᠦᠨᠡᠬᠡᠷ ᠯᠢᠶᠣᠤ ᠰᠢ ᠶ᠋ᠢ ᠪᠠᠢᠯᠳᠤᠵᠤ᠂ ᠵᠠᠩ ᡁᠢ ᠥᠮᠥᠭᠯᠡᠷᠡ ᠡᠴᠢᠭᠰᠡᠨ ᠢ᠋ ᠮᠣᠩᠭᠣᠯ ᠪᠤᠬᠠ ᠡᠭᠡᠬᠦ ᠵᠠᠮ ᠢ᠋ ᠲᠠᠰᠤᠯᠵᠤ ᠶᠠᠭᠠᠷᠠᠨ ᠮᠡᠳᠡᠭᠦᠯᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠳᠣᠪᠲᠣᠯᠤᠨ ᠱᠠᠨ ᠱᠦᠢ ᠣᠰᠤᠨᠠ ᠬᠦᠷᠴᠦ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠢ᠋ ᠪᠠᠢᠯᠳᠤᠬᠤᠢ ᠳ᠋ᠤᠷ ᠮᠣᠩᠭᠣᠯ ᠪᠤᠬᠠ ᠬᠣᠢᠨᠠ ᠠ᠋ᠴᠠ ᠠᠨᠤ ᠬᠠᠪᠴᠢᠨ ᠪᠠᠢᠯᠳᠤᠵᠤ ᠶᠡᠬᠡᠯᠡ ᠳᠠᠷᠤᠭᠠᠳ ᠮᠣᠩᠭᠣᠯ ᠪᠤᠬᠠ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤ ᠲᠠᠢ ᠬᠠᠷᠠᠬᠠᠨ ᠠᠭᠤᠷᠮᠠᠭ ᠴᠠᠭ ᠲᠤᠯᠠ ᠡᠷᠬᠡᠪᠰᠢ ᠵᠠᠩ ᡁᠢ ᠶ᠋ᠢ ᠪᠠᠷᠢᠵᠤ ᠠᠯᠠᠰᠤᠭᠠᠢ ᠭᠡᠮᠡᠨ ᠨᠡᠪᠲᠡᠯᠦᠨ ᠣᠷᠣᠵᠤ ᠬᠥᠯ ᠭᠠᠷ ᠲᠤᠷ ᠳᠠᠭᠠᠷᠢᠭᠳᠠᠨ ᠬᠥᠮᠦᠨ ᠮᠣᠷᠢᠨ ᠴᠥᠮ ᠥᠩᠬᠥᠷᠢᠨ ᠤᠨᠠᠮᠤᠢ᠃
ᠲᠡᠳᠦᠢ ᠵᠠᠩ ᡁᠢ ᠰᠠᠢᠨ ᠮᠣᠷᠢᠨ ᠳ᠋ᠤᠷ ᠡᠷᠳᠦᠵᠦ ᠶ᠋ᠢᠨ ᠵᠧᠦ ᠳ᠋ᠦ᠍ᠷ ᠳᠤᠲᠠᠭᠠᠨ ᠬᠠᠭᠠᠯᠭᠠ ᠳᠠᠷᠤᠵᠤ ᠭᠠᠷᠬᠤ ᠦᠭᠡᠢ ᠳ᠋ᠦ᠍ᠷ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠨᠡᠬᠡᠨ ᠢᠷᠡᠵᠦ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠪᠠᠢᠯᠳᠤᠪᠠᠴᠤ ᠬᠣᠲᠠ ᠪᠠᠨ ᠠᠪᠲᠠᠬᠤ ᠦᠭᠡᠢ ᠳ᠋ᠦ᠍ᠷ ᠬᠣᠲᠠ ᠶ᠋ᠢ ᠲᠣᠭᠣᠷᠢᠨ ᠬᠠᠭᠠᠵᠤ ᠲᠠᠢ ᠪᠠᠢᠭᠤᠯᠵᠤ᠂ ᠶ᠋ᠢᠨ ᠵᠢᠦ ᠶ᠋ᠢᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠳ᠋ᠤᠷ ᠱᠠᠨ ᠱᠦᠢ ᠭᠣᠣᠯ ① ᠤ᠋ᠨ ᠤᠰᠤᠨ ᠪᠣᠢ ᠲᠤᠯᠠ ᠤᠭᠤᠲᠠ ᠳ᠋ᠤᠷ ᠡᠯᠡᠰᠦ ᠳᠦᠭᠦᠷᠭᠡᠵᠦ ᠳᠡᠭᠲᠡᠷ ᠴᠣᠭᠴᠠᠯᠠᠨ ᠬᠤᠷᠴᠠ ᠰᠤᠮᠤ ᠬᠠᠷᠪᠤᠭᠤᠯᠵᠤ ᠨᠢᠭᠡᠨ ᠰᠠᠷᠠ ᠪᠣᠯᠤᠭᠰᠠᠨ ᠦᠭᠡᠢ ᠵᠠᠩ ᡁᠢ ᠶ᠋ᠢᠨ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠭᠣᠣ ᠢ ᠣᠯᠠᠨ ᠯᠤᠭᠠ ᠵᠥᠪᠯᠡᠵᠦ᠂ ᠵᠠᠩ ᡁᠢ ᠶ᠋ᠢ ᠪᠠᠷᠢᠵᠤ ᠬᠠᠭᠠᠯᠭᠠ ᠨᠡᠭᠡᠭᠡᠵᠦ ᠳᠠᠭᠠᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠭᠣᠣ ᠢ ᠶ᠋ᠢ ᠠᠷᠭᠠ ᠦᠭᠡᠢ ᠱᠠᠩᠨᠠᠵᠤ ᠂ ᠵᠠᠩ ᡁᠢ ᠶ᠋ᠢ ᠬᠠᠭᠠᠨ ᠳ᠋ᠤᠷ ᠬᠦᠷᠭᠡᠵᠦ ᠡᠴᠢᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠵᠠᠩ ᡁᠢ ᠶ᠋ᠢ ᠠᠯᠠᠵᠤ᠂ ᠸᠠᠩ ᠶ᠋ᠢᠢ᠂ ᠵᠠᠩ ᠭᠧ᠂ ᠵᠠᠩ ᡁᠢ ᠡᠨᠡ ᠭᠤᠷᠪᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤᠷ ᠶᠠᠯᠠ ᠪᠢᠴᠢᠵᠦ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠲᠣᠭᠣᠷᠢᠭᠤᠯᠪᠠ᠃ ᠡᠨᠡ ᠵᠠᠪᠰᠠᠷ ᠰᠦ᠍ ᠵᠧᠦ ᠶ᠋ᠢᠨ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠡᠴᠡ ᠸᠠᠢᠵᠢᠩ ᠭᠡᠨᠡᠳᠲᠡ ᠬᠡᠲᠦᠷᠬᠡᠢ ᠭᠠᠪᠢᠶᠠ ᠪᠠᠢᠭᠤᠯᠰᠤᠭᠠᠢ ᠭᠡᠮᠡᠨ ᠣᠯᠠᠨ ᠬᠣᠷᠢᠶᠠ ᠠ᠋ᠴᠠ ᠨᠢᠭᠤᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠢᠶᠠᠨ ᠵᠢᠩ ᠦ᠋ᠨ ᠬᠣᠲᠠᠨ ᠢ᠋ ᠬᠤᠯᠠᠭᠤᠵᠤ ᠳᠠᠪᠠᠷᠠ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠤᠨ ᠡᠴᠢᠬᠦᠢ ᠳ᠋ᠦ᠍ᠷ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠰᠢᠦᠢ ᠲᠢᠩ ᠬᠡᠮᠡᠭᠴᠢ ᠨᠢᠭᠡᠨ ᠵᠠᠩᠵᠤᠨ ᠮᠡᠳᠡᠭᠡᠳ ᠪᠢᠶᠠᠨ ᠵᠢᠩ ᠬᠣᠲᠠ ᠶ᠋ᠢᠨ ᠣᠢᠷᠠ ᠴᠡᠷᠢᠭ ᠭᠠᠷᠴᠤ ᠪᠠᠢᠯᠳᠤᠵᠤ᠂ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ ᠬᠣᠶᠠᠷ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠠᠪᠲᠠᠵᠤ ᠲᠡᠭᠦᠨ ᠦ᠌ ᠵᠡᠭᠦᠨ ᠭᠠᠷ ᠤ᠋ᠨ ᠢᠳᠠᠮ ᠬᠤᠷᠤᠭᠤ ᠲᠠᠰᠤᠷᠠᠨ᠂ ᠳᠣᠣᠷᠠᠲᠤ ᠨᠢᠭᠡᠨ ᠰᠢᠳᠦ ᠰᠤᠮᠤᠨ ᠳ᠋ᠤᠷ ᠠᠪᠲᠠᠵᠤᠬᠦᠢ᠃ ᠸᠠᠢᠵᠢᠩ ᠶᠡᠬᠡᠯᠡ ᠭᠡᠮᠰᠢᠨ ᠳᠠᠷᠤᠭᠳᠠᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠰᠥᠨᠢ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠲᠣᠪ ᠳᠤᠭᠤᠢ ᠠᠲᠠᠯᠠ᠂ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠵᠠᠬᠢᠶᠠ ᠶ᠋ᠢ ᠬᠦᠯᠢᠶᠡᠭᠰᠡᠨ ᠳᠠᠢᠰᠤᠨᠳᠠᠷᠤᠭᠴᠢ᠂ ᠪᠤᠯᠤ ᠨᠠᠷ ᠬᠡᠳᠦᠢ ᠮᠡᠳᠡᠪᠡᠴᠦ ᠦᠯᠦ ᠮᠡᠳᠡᠭᠴᠢ ᠪᠣᠯᠵᠤ ᠶᠤᠸᠠᠨᠱᠤᠸᠠᠢ ᠶ᠋ᠢ ᠬᠦᠯᠢᠶᠡᠪᠡ᠃ ᠡᠨᠡ ᠵᠠᠪᠰᠠᠷ ᠲᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠫᠦ᠍ ᠰᠢᠶᠠᠨ ᠸᠠᠨ ᠨᠦ᠍ ᠬᠡᠮᠡᠭᠴᠢ ᠲᠠᠢᠱᠸᠦ ᠲᠦᠰᠢᠮᠡᠯ ᠰᠢᠶᠠ ᠤᠯᠤᠰ ᠤ᠋ᠨ ᠯᠢ ᠽᠦᠨ ᠰᠢᠦᠢ ᠶ᠋ᠢ ᠬᠡᠯᠡᠯᠴᠡᠨ ᠣᠯᠵᠤ᠂ ᠪᠠᠰᠠ ᠨᠠᠷᠢᠨ ᠠᠷᠭᠠ ᠬᠡᠷᠡᠭᠯᠡᠨ ᠮᠣᠩᠭᠣᠯ ᠤᠯᠤᠰ ᠲᠤᠷ ᠢᠷᠡᠵᠦ ᠳᠠᠭᠠᠭᠰᠠᠨ ᠳ᠋ᠤᠷ ᠬᠠᠭᠠᠨ ᠲᠡᠷᠡ ᠫᠦ᠍ ᠰᠢᠶᠠᠨ ᠸᠠᠨ ᠨᠣ ᠶ᠋ᠢᠨ ᠬᠥᠮᠦᠨ ᠢ᠋ ᠦᠵᠡᠪᠡᠰᠦ᠂ ᠨᠢᠳᠦ ᠰᠠᠳᠤᠷ ᠤᠷᠤᠭᠤᠯ ᠨᠢᠮᠭᠡᠨ ᠮᠠᠰᠢ ᠬᠤᠷᠢᠴᠠᠯᠳᠤ ᠬᠥᠮᠦᠨ ᠲᠤᠯᠠ ᠬᠥᠪᠡᠭᠦᠨ ᠢ᠋ ᠢᠨᠦ ᠦᠯᠡᠳᠡᠭᠡᠨ ᠳᠡᠨᠵᠢ ᠳᠠᠷᠤᠭᠤᠯᠪᠠ᠃ ᠡᠨᠡ ᠫᠦ᠍ ᠰᠢᠶᠠᠨ ᠸᠠᠨ ᠨᠥ᠍ ᠬᠡᠮᠡᠭᠴᠢ ᠪᠠᠰᠠ ᠨᠢᠭᠡᠨ ᠬᠠᠪᠲᠠᠭᠠᠢ ᠶᠠᠭᠤᠮᠠ᠂ ᠡᠨᠡ ᠬᠥᠪᠡᠭᠦᠨ ᠢᠨᠦ ᠲᠡᠭᠦᠨ ᠦ᠌ ᠤᠷᠢᠳᠤ ᠡᠮᠡ ᠡᠴᠡ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠨᠡᠷᠡ ᠲᠡᠢ ᠬᠦ᠌᠂ ᠪᠠᠢᠨ ᠪᠠᠢᠨ ᠲᠠᠴᠢᠶᠠᠳᠠᠭᠤᠯᠬᠤᠢ ᠳ᠋ᠤᠷ ᠡᠳᠦᠭᠡ ᠭᠡᠨᠡᠳᠲᠡ ᠲᠣᠬᠢᠶᠠᠯ ᠪᠣᠯᠤᠭᠰᠠᠨ ᠳ᠋ᠤᠷ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠳᠤᠷᠠᠲᠠᠶᠠ ᠦᠯᠡᠳᠡᠭᠡᠨ ᠥᠭᠴᠦ ᠬᠠᠷᠢᠭᠠᠳ ᠳᠠᠷᠤᠢ ᠤᠷᠪᠠᠵᠤ ᠪᠡᠶᠡ ᠪᠡᠨ ᠰᠢ ᠰᠢᠶᠨ ᠸᠠᠩ ᠭᠡᠮᠡᠨ ᠡᠷᠭᠦᠵᠦ᠂ ᠤᠯᠤᠰ ᠢ᠋ᠶ᠋ᠠᠨ ᠳᠣᠷᠣᠨᠠ ᠰᠢᠶᠨ ᠭᠡᠮᠡᠨ ᠨᠡᠷᠡᠢᠳᠴᠦ ᠵᠢᠶᠠ ᠶᠤᠸᠠᠨ ᠤ᠋ ᠲᠡᠷᠢᠭᠦᠨ ᠣᠨ ᠬᠡᠮᠡᠪᠡ᠂ ᠡᠭᠦᠨ ᠳ᠋ᠦ᠍ᠷ ᠬᠠᠭᠠᠨ ᠬᠠᠷᠠᠬᠠᠨ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠮᠤᠬᠤᠯᠢ ᠯᠤᠭᠠ ᠵᠥᠪᠯᠡᠵᠦ ᠡᠮᠦᠨᠡᠲᠦ ᠴᠡᠷᠢᠭ ᠢ᠋ ᠡᠭᠡᠭᠦᠯᠵᠦ ᠵᠠᠷᠯᠠᠪᠠ᠂ ᠳᠠᠷᠠᠭᠠ ᠬᠡᠷᠬᠢᠬᠦ ᠶ᠋ᠢ ᠳᠣᠣᠷᠠᠲᠤ ᠳᠡᠪᠲᠡᠷ ᠲᠣᠷ ᠦᠵᠡᠭᠳᠡᠬᠦᠢ᠃
– – – –
① ᠡᠳᠦᠭᠡᠬᠢ ᠵᠢᠶᠣᠤ ᠯᠠᠩ ᠮᠥᠷᠡᠨ ᠮᠥᠨ᠃
ᠰᠤᠳᠤᠷᠴᠢ ᠲᠠᠢᠵᠢ ᠢᠨᠵᠠᠨᠨᠠᠰᠢ ᠶ᠋ᠢᠨ ᠰᠤᠯᠠ ᠰᠢᠯᠦᠭ ᠢᠨᠦ :
ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠳᠡᠭᠦᠦ ᠨᠠᠷ ᠬᠡᠦᠬᠡᠳ ᠲᠣᠷ ᠥᠮᠴᠢ ᠬᠤᠪᠢᠶᠠᠨ ᠡᠵᠡᠯᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ
ᠳᠡᠭᠡᠷᠡᠬᠢ ᠮᠣᠩᠭᠣᠯ ᠳ᠋ᠤᠷ ᠡᠳᠦᠭᠡ ᠰᠠᠶᠢ ᠨᠢᠭᠡᠨ ᠠᠮᠢᠳᠤᠷᠠᠯ ᠦᠯᠡᠭᠰᠡᠨ ᠪᠤᠶᠤ᠂
ᠳᠡᠮᠡᠢᠯᠡ ᠰᠡᠷᠭᠡᠢᠯᠡᠨ ᠲᠥᠷᠥᠭᠰᠡᠨ ᠵᠠᠭᠤᠷᠠ ᠶ᠋ᠢ ᠬᠣᠷᠢᠵᠤ ᠳᠠᠷᠤᠯᠠᠭᠰᠠᠨ ᠪᠥᠭᠡᠰᠦ
ᠳᠡᠢᠯᠦᠭᠰᠡᠨ ᠮᠣᠩᠭᠣᠯ ᠮᠥᠬᠥᠭᠰᠡᠨ ᠳᠠᠷᠤᠢ ᠦᠨᠳᠦᠰᠦᠨ ᠳᠠᠷᠤᠢ ᠬᠡᠢᠰᠬᠦ ᠪᠤᠶᠤ !