ᠠᠭᠤᠯᠠᠨ ᠳᠤ ᠶᠠᠪᠤᠭᠠᠳ ᠠᠷᠭᠠᠯ ᠴᠤ ᠦᠭᠡᠢ ᠤᠷᠪᠠᠵᠤ ᠢᠷᠡᠭᠡᠳ ᠠᠷᠤᠭ ᠴᠤ ᠦᠭᠡᠢ-ᠮᠣᠩᠭᠣᠯ ᠬᠡᠪᠰᠢᠭᠰᠡᠨ ᠦᠭᠡ ᠶ᠋ᠢᠨ ᠦᠯᠢᠭᠡᠷ01
509ᠠᠭᠤᠯᠠᠨ ᠳᠤ ᠶᠠᠪᠤᠭᠠᠳ ᠠᠷᠭᠠᠯ ᠴᠤ ᠦᠭᠡᠢ ᠤᠷᠪᠠᠵᠤ ᠢᠷᠡᠭᠡᠳ ᠠᠷᠤᠭ ᠴᠤ ᠦᠭᠡᠢ
ᠮᠣᠩᠭᠣᠯ ᠬᠡᠪᠰᠢᠭᠰᠡᠨ ᠦᠭᠡ ᠶ᠋ᠢᠨ ᠦᠯᠢᠭᠡᠷ (1)
ᠨᠠᠮᠵᠢᠯ
ᠠᠭᠤᠯᠠᠨ ᠳᠤ ᠶᠠᠪᠤᠭᠠᠳ ᠠᠷᠭᠠᠯ ᠴᠤ ᠦᠭᠡᠢ
ᠤᠷᠪᠠᠵᠤ ᠢᠷᠡᠭᠡᠳ ᠠᠷᠤᠭ ᠴᠤ ᠦᠭᠡᠢ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠂ ᠨᠢᠭᠡ ᠠᠯᠵᠠᠭᠤ ᠡᠷᠡ ᠪᠠᠢᠭᠰᠠᠨ ᠭᠡᠨᠡ᠃ ᠠᠷᠭᠠᠯ ᠲᠦᠯᠡᠰᠢ ᠠᠳᠬᠤ ᠶᠢᠨ ᠴᠢᠨᠡᠭᠡ ᠴᠦ᠍ ᠦᠭᠡᠢ ᠪᠣᠯᠴᠢᠬᠠᠭᠠᠳ ᠣᠷᠣᠢ ᠶᠢᠨ ᠬᠣᠭᠣᠯᠠ ᠪᠠᠨ ᠴᠤ ᠪᠣᠯᠭᠣᠬᠤ ᠠᠷᠭᠠ ᠦᠭᠡᠢ ᠪᠠᠢᠬᠤ ᠳᠤ ᠡᠨᠡ ᠡᠷᠡ ᠲᠠᠩᠭᠠᠢᠵᠤ ᠬᠡᠪᠲᠡᠭᠡᠳ ᠯᠡ ᠪᠠᠢᠯᠠ ᠭᠡᠨᠡ᠃ ᠡᠭᠦᠨ ᠳᠦ ᠡᠬᠡᠨᠡᠷ ᠨᠢ ᠰᠠᠨᠳᠤᠷᠴᠤ᠄
— ᠠᠷᠭᠠᠯ ᠲᠦᠯᠡᠰᠢ ᠵᠢᠭᠠᠬᠠᠨ ᠲᠡᠭᠦᠭᠡᠳ ᠢᠷᠡ᠂ ᠢᠩᠭᠢᠵᠦ ᠲᠠᠩᠭᠠᠢᠵᠤ ᠬᠡᠪᠲᠡᠵᠦ᠂ ᠠᠩᠭᠠᠢᠵᠤ ᠢᠳᠡᠭᠡᠳ ᠬᠡᠨ ᠪᠢᠳᠡᠨ ᠳᠦ ᠬᠣᠭᠣᠯᠠ ᠠᠪᠴᠢᠷᠠᠵᠤ ᠥᠭᠬᠦ ᠪᠣᠢ? ᠭᠡᠵᠦ ᠬᠡᠯᠡ ᠠᠮᠠ ᠲᠠᠲᠠᠭᠠᠳ ᠠᠮᠤᠷ ᠪᠠᠢᠯᠭᠠᠬᠤ ᠦᠭᠡᠢ ᠪᠣᠯᠬᠤ ᠳᠤ ᠠᠯᠵᠠᠭᠤ ᠡᠷᠡ ᠰᠠᠶᠢ ᠡᠪᠰᠢᠶᠡᠵᠦ ᠰᠤᠨᠢᠶᠠᠭᠰᠠᠭᠠᠷ ᠪᠣᠰᠤᠭᠠᠳ ᠠᠷᠤᠭ ᠢᠶᠠᠨ ᠠᠪᠴᠤ ᠡᠭᠦᠷᠦᠭᠡᠳ ᠠᠷᠤ ᠶᠢᠨ ᠠᠭᠤᠯᠠᠨ ᠳᠠᠭᠠᠨ ᠭᠠᠷᠤᠯᠠ᠃
ᠠᠯᠵᠠᠭᠤ ᠡᠷᠡ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠤᠭᠠᠳ ᠠᠭᠤᠯᠠᠨ ᠳᠤ ᠭᠠᠷᠤᠮᠠᠭᠴᠠ ᠠᠷᠭᠠᠯ ᠲᠡᠭᠦᠬᠦ ᠰᠠᠨᠠᠭᠠ ᠦᠭᠡᠢ ᠪᠣᠯᠵᠤ ᠬᠠᠳᠠᠨ ᠡᠩᠭᠡᠷ ᠦᠨ ᠨᠠᠷᠠᠨ ᠡᠭᠡᠪᠦᠷ ᠲᠦ ᠯᠠᠪᠲᠠᠢᠵᠤ ᠰᠠᠭᠤᠭᠰᠠᠭᠠᠷ ᠤᠨᠲᠠᠴᠢᠬᠠᠵᠠᠢ᠃
ᠬᠠᠨᠲᠠᠯᠠ ᠤᠨᠲᠠᠭᠠᠳ ᠵᠡᠭᠦᠳᠦᠨ ᠡᠴᠡ ᠪᠡᠨ ᠰᠡᠷᠢᠭᠡᠳ ᠦᠵᠡᠬᠦ ᠳᠦ ᠨᠠᠷᠠ ᠰᠢᠩᠭᠡᠬᠦ ᠰᠢᠬᠠᠭᠰᠠᠨ ᠲᠤᠯᠠ ᠠᠯᠵᠠᠭᠤ ᠡᠷᠡ ᠠᠷᠭᠠᠯ ᠲᠡᠭᠦᠬᠦ ᠪᠡᠨ ᠰᠠᠨᠠᠵᠤ ᠨᠡᠰᠢ ᠴᠠᠰᠢ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠠᠷᠭᠠᠯ ᠲᠦᠯᠡᠭᠡ ᠣᠯᠤᠭᠰᠠᠨ ᠦᠭᠡᠢ᠃ ᠲᠩᠷᠢ ᠬᠠᠷᠠᠩᠭᠤᠢᠯᠠᠬᠤ ᠰᠢᠬᠠᠭᠰᠠᠨ ᠲᠤᠯᠠ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠠᠷ ᠠᠭᠤᠯᠠ ᠬᠠᠳᠠ ᠶᠢ ᠰᠦᠯᠵᠢᠨ ᠠᠯᠬᠤᠬᠤ ᠳᠠᠭᠠᠨ ᠬᠠᠯᠲᠤᠷᠢᠵᠤ ᠤᠨᠠᠭᠠᠳ ᠠᠷᠤᠭ ᠢᠶᠠᠨ ᠪᠠᠯᠪᠠᠯᠴᠢᠬᠠᠵᠠᠢ᠃
ᠠᠷᠭᠠᠯ ᠣᠯᠵᠤ ᠲᠡᠭᠦᠭᠰᠡᠨ ᠦᠭᠡᠢ ᠮᠥᠷᠲᠡᠭᠡᠨ ᠠᠷᠤᠭ ᠢᠶᠠᠨ ᠴᠤ ᠰᠦᠢᠳᠬᠡᠭᠰᠡᠨ ᠡᠴᠡ ᠤᠷᠮᠠ ᠮᠠᠭᠤᠲᠠᠢ ᠭᠡᠷ ᠲᠡᠭᠡᠨ ᠬᠦᠷᠬᠦ ᠳᠦ ᠠᠷᠭᠠᠯ ᠠᠪᠴᠢᠷᠠᠬᠤ ᠶᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠡᠬᠡᠨᠡᠷ ᠨᠢ ᠠᠭᠤᠷᠯᠠᠵᠤ᠄
— ᠠᠪᠴᠤ ᠶᠠᠪᠤᠭᠰᠠᠨ ᠠᠷᠤᠭ ᠴᠢᠨᠢ ᠶᠠᠭᠠᠬᠢᠴᠢᠬᠠᠪᠠ? ᠠᠪᠴᠢᠷᠠᠭᠰᠠᠨ ᠠᠷᠭᠠᠯ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠵᠠᠩᠨᠠᠭᠰᠠᠨ ᠳᠤ ᠠᠯᠵᠠᠭᠤ ᠡᠷᠡ᠄
— ᠠᠭᠤᠯᠠᠨ ᠳᠤ ᠶᠠᠪᠤᠭᠠᠳ ᠠᠷᠭᠠᠯ ᠴᠤ ᠣᠯᠤᠭᠰᠠᠨ ᠦᠭᠡᠢ᠂ ᠤᠷᠪᠠᠵᠤ ᠢᠷᠡᠬᠦ ᠳᠡᠭᠡᠨ ᠠᠷᠤᠭ ᠢᠶᠠᠨ ᠴᠤ ᠡᠪᠳᠡᠯᠡᠴᠢᠬᠡᠵᠡᠢ ᠭᠡᠵᠦ ᠳᠦᠳᠦᠨᠡᠭᠰᠡᠨ ᠭᠡᠨᠡ᠃
ᠢᠩᠭᠢᠭᠡᠳ 《 ᠠᠭᠤᠯᠠᠨ ᠳᠤ ᠶᠠᠪᠤᠭᠠᠳ ᠠᠷᠭᠠᠯ ᠴᠤ ᠦᠭᠡᠢ᠂ ᠤᠷᠪᠠᠵᠤ ᠢᠷᠡᠭᠡᠳ ᠠᠷᠤᠭ ᠴᠤ ᠦᠭᠡᠢ》 ᠭᠡᠳᠡᠭ ᠦᠭᠡ ᠡᠭᠦᠰᠴᠡᠢ᠃ ᠬᠣᠵᠢᠮ ᠨᠢ ᠬᠥᠮᠦᠰ ᠡᠨᠡ ᠦᠭᠡ ᠪᠡᠷ ᠵᠣᠷᠢᠭᠰᠠᠨ ᠶᠠᠪᠤᠳᠠᠯ ᠨᠢ ᠪᠦᠲᠦᠭᠰᠡᠨ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠮ ᠭᠡᠳᠡᠷᠭᠦ ᠬᠣᠬᠢᠷᠠᠯ ᠠᠮᠰᠠᠭᠰᠠᠨ ᠪᠦᠲᠦᠯ ᠦᠭᠡᠢ ᠠᠵᠢᠯᠯᠠᠭᠠ ᠶᠢ ᠰᠢᠭᠦᠮᠵᠢᠯᠡᠨ ᠢᠯᠡᠳᠬᠡᠳᠡᠭ ᠪᠣᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠠᠴᠢ᠄ ᠰᠢᠷᠠᠨᠤᠳ ᠨᠠᠷᠠᠰᠤ
ᠦᠰᠦᠭ ᠬᠢᠨᠠᠭᠴᠢ᠄ ᠮᠣᠩᠭᠤᠯᠬᠦᠦ