ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠬᠣᠶᠠᠷ ᠂ ᠳᠣᠯᠣᠭᠠᠨ ᠲᠠᠮᠢᠷ ᠰᠤᠯᠠᠳᠠᠵᠠᠢ Оройгүй сүм – Арван хоёр ᠂ Долоон тамир сулджээ- Oroigui sum 12
706ᠠᠷᠪᠠᠨ ᠬᠣᠶᠠᠷ ᠂ ᠳᠣᠯᠣᠭᠠᠨ ᠲᠠᠮᠢᠷ ᠰᠤᠯᠠᠳᠠᠵᠠᠢ
ᠰᠦᠬᠡ ᠦᠭᠡᠢ ᠰᠢᠪᠠᠭᠤ ᠡᠭᠦᠷ ᠢ᠋ᠶ᠋ᠡᠨ ᠪᠠᠷᠢᠬᠤ ᠨᠢ ᠭᠠᠢᠬᠠᠯ
ᠨᠢᠳᠦ ᠦᠭᠡᠢ ᠰᠢᠷᠭᠤᠯᠵᠢ ᠨᠦᠬᠡ ᠪᠡᠨ ᠣᠯᠬᠤ ᠨᠢ ᠭᠠᠢᠬᠠᠯ
ᠵᠣᠯᠢᠭ ᠲᠤ᠌ ᠭᠠᠷᠭᠠᠭᠰᠠᠨ᠂ ᠰᠦᠨᠡᠰᠦ ᠳᠠᠭᠤᠳᠠᠭᠰᠠᠨ ᠵᠠᠩ ᠦᠢᠯᠡ ᠶ᠋ᠢᠨ ᠬᠦᠴᠦᠨ ᠳ᠋ᠤ᠌ ᠵᠠᠯᠠᠭᠤ ᠭᠡᠰᠦᠯ ᠦ᠋ᠨ ᠪᠡᠶᠡ ᠵᠠᠰᠠᠷᠠᠨ ᠡᠳᠡᠭᠡᠷᠡᠨᠡ ᠭᠡᠵᠦ ᠭᠠᠪᠵᠤ ᠯᠥᠨᠳᠥᠭᠵᠦᠨᠡᠢ ᠱᠠᠪᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠢᠲᠡᠭᠡᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠪᠦᠬᠦᠨ ᠲᠠᠯᠠᠭᠠᠷ ᠥᠩᠭᠡᠷᠡᠵᠡᠢ᠃ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠪᠡᠶᠡ ᠰᠠᠢᠵᠢᠷᠠᠭᠰᠠᠨ ᠦᠭᠡᠢ᠃ ᠬᠡᠳᠦᠨ ᠬᠣᠨᠣᠭ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠯᠥᠨᠳᠥᠭᠵᠦᠨᠡᠢ ᠯᠠᠮᠠᠳᠠᠨ ᠰᠦᠨᠡᠰᠦ ᠶᠢ ᠳᠠᠬᠢᠨ ᠳᠠᠭᠤᠳᠠᠬᠤ ᠭᠡᠵᠦ ᠰᠢᠢᠲᠦᠭᠰᠡᠨ ᠪᠣᠯᠪᠠᠴᠤ ᠭᠡᠰᠦᠯ ᠳ᠋ᠦ᠍ ᠮᠥᠩᠭᠥ ᠪᠠᠢᠭᠰᠠᠨ ᠦᠭᠡᠢ᠂ ᠶᠠᠮᠠᠷ ᠨᠢᠭᠡᠨ ᠳᠤᠷᠠ ᠪᠤᠯᠢᠶᠠᠮᠠᠷ ᠬᠤᠪᠴᠠᠰᠤ᠂ ᠡᠳ᠋ᠯᠡᠯ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ ᠴᠦ᠍ ᠲᠡᠭᠦᠨ ᠦ᠌ ᠪᠡᠶᠡ ᠰᠠᠢᠵᠢᠷᠠᠬᠤ ᠨᠠᠢᠳᠠᠪᠤᠷᠢ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ 《ᠰᠦᠨᠡᠰᠦ ᠶ᠋ᠢ ᠳᠠᠬᠢᠨ ᠳᠠᠭᠤᠳᠠᠭᠠᠳ ᠡᠭᠡᠵᠦ ᠢᠷᠡᠬᠦ ᠦᠭᠡᠢ ᠪᠣᠯ ᠨᠢᠭᠡᠨ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠴᠦ᠍ ᠮᠢᠨᠦ ᠲᠤᠬᠠᠢ ᠡᠯᠳᠡᠪ ᠶᠠᠭᠤᠮᠠ ᠪᠣᠳᠣᠵᠤ ᠮᠠᠭᠠᠳ ᠦᠭᠡᠢ᠃ ᠡᠢᠮᠦ ᠳ᠋ᠦ᠍ ᠰᠡᠷᠡᠮᠵᠢᠯᠡᠪᠡᠯ ᠲᠠᠭᠠᠷᠠᠨᠠ᠃ ᠬᠣᠯᠠ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠤᠴᠢᠷ ᠰᠦᠨᠡᠰᠦ ᠨᠢ ᠠᠷᠤ ᠭᠡᠷ ᠲᠦ᠍ ᠪᠡᠨ ᠣᠳᠣ ᠳ᠋ᠤ᠌ ᠲᠥᠭᠡᠷᠢᠭᠰᠡᠨ ᠬᠡᠷᠡᠭ》 ᠭᠡᠵᠦ ᠪᠣᠳᠣᠵᠠᠢ᠃
– ᠬᠡᠲᠦᠷᠬᠡᠢ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠵᠣᠷᠢᠵᠤ ᠢᠷᠡᠭᠰᠡᠨ ᠦ᠌ ᠤᠴᠢᠷ ᠰᠦᠨᠡᠰᠦ ᠨᠢ ᠨᠤᠲᠤᠭ ᠣᠷᠣᠨ ᠤ᠋ ᠵᠥᠭ ᠡᠭᠡᠨ ᠭᠦᠶᠦᠵᠦ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠠᠭᠤᠯᠠ ᠬᠠᠳᠠᠨᠠ ᠲᠥᠭᠡᠷᠢᠵᠡᠢ᠃ ᠡᠢᠮᠦ ᠬᠡᠷᠡᠭ ᠲᠦ᠍ ᠳᠠᠬᠢᠨ ᠰᠦᠨᠡᠰᠦ ᠳᠠᠭᠤᠳᠠᠭᠠᠳ ᠴᠤ᠌ ᠨᠡᠮᠡᠷᠢ ᠦᠭᠡᠢ ᠪᠣᠯᠪᠠ ᠤᠤ᠃ ᠭᠡᠪᠡᠴᠦ ᠡᠪᠡᠳᠴᠢᠲᠡᠨ ᠦ᠌ ᠰᠦᠵᠢᠭ ᠮᠡᠳᠡᠨᠡ ᠬᠡᠮᠡᠨ ᠯᠥᠨᠳᠥᠭᠵᠦᠨᠡᠢ ᠭᠠᠪᠵᠤ ᠠᠢᠯᠠᠳᠤᠯᠠ᠃
《ᠢᠷᠡᠪᠡ! ᠢᠷᠡᠪᠡ !ᠢᠷᠡᠪᠡ !》 ᠭᠡᠵᠦ ᠥᠴᠥᠭᠡᠳᠦᠷ ᠰᠥᠨᠢ ᠬᠠᠰᠬᠢᠷᠤᠯᠳᠤᠵᠤ ᠪᠠᠢᠭᠰᠠᠨ ᠬᠤᠸᠠᠷᠠᠭ ᠤ᠋ᠳ ᠤ᠋ᠨ ᠰᠡᠳᠬᠢᠯ ᠭᠠᠩᠰᠠᠷᠠᠨ ᠳᠣᠩᠰᠣᠯᠵᠠᠢ᠂ 《ᠢᠷᠡᠭᠡ ᠦᠭᠡᠢ ᠶᠦᠮ ᠪᠠᠢᠵᠤ ᠳᠠ?》 ᠭᠡᠵᠦ ᠲᠡᠳᠡ ᠭᠠᠢᠬᠠᠨ ᠪᠣᠳᠣᠪᠠ᠃
– ᠮᠠᠩᠪᠠ ᠶ᠋ᠢᠨ ᠳ᠋ᠠᠴᠠᠩ ᠤ᠋ᠨ ᠮᠠᠷᠠᠮᠪᠠ ᠫᠦᠷᠪᠦᠳᠣᠨᠣᠢ ᠳ᠋ᠤ᠌ ᠯᠠ ᠥᠭᠴᠦ ᠰᠡᠭᠦᠯᠴᠢ ᠶᠢᠨ ᠭᠣᠷᠢᠳᠠᠯᠭᠠ ᠪᠠᠨ ᠪᠠᠷᠠᠬᠤ ᠠ᠋ᠴᠠ ᠶᠠᠭᠠᠬᠢᠬᠤᠪ ᠭᠡᠵᠦ ᠯᠥᠨᠳᠥᠭᠵᠦᠨᠡᠢ ᠬᠡᠯᠡᠵᠡᠢ᠃
ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠱᠠᠪᠢ ᠨᠠᠷ ᠨᠢ ᠨᠢᠭᠡ ᠵᠢᠩᠳᠠᠭᠠᠨ ᠤ ᠨᠥᠬᠥᠷ ᠢᠶᠡᠨ ᠡᠳᠡᠭᠡᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠶᠠᠭᠤ ᠴᠤ᠌ ᠬᠢᠬᠦ ᠳ᠋ᠦ᠍ ᠪᠡᠯᠡᠬᠡᠨ ᠪᠠᠢᠭᠰᠠᠨ ᠲᠤᠯᠠ ᠮᠠᠩᠪᠠ ᠶ᠋ᠢᠨ ᠳ᠋ᠠᠴᠠᠩ ᠤᠷᠤᠭᠤ ᠶᠠᠪᠤᠴᠠᠭᠠᠵᠠᠢ᠃
– ᠨᠠᠳᠠ ᠨᠠᠢᠳᠠᠵᠤ ᠯᠠ ᠪᠠᠢᠭᠠ ᠶᠤᠮ ᠪᠣᠯ ᠠᠪᠤᠭᠠᠳ ᠯᠠ ᠢᠷᠡ! ᠯᠥᠨᠳᠥᠭᠵᠦᠨᠡᠢ ᠭᠠᠪᠵᠤ ᠠᠷᠭᠠᠯᠠᠵᠤ ᠴᠢᠳᠠᠭᠠ ᠦᠭᠡᠢ ᠪᠣᠯ ᠲᠡᠷᠡ ᠲᠠᠢ ᠲᠡᠷᠡ ᠦᠭᠡᠢ ᠭᠠᠢ ᠳ᠋ᠤ᠌ ᠭᠠᠷᠤᠭᠰᠠᠨ ᠠᠮᠢ ᠪᠠᠢᠬᠤ ᠨᠢ ᠯᠡ ᠳᠡ᠃ ᠭᠣᠷᠢ ᠪᠠᠨ ᠲᠠᠰᠤᠯᠵᠤ᠂ ᠬᠣᠴᠢ ᠪᠠᠨ ᠪᠠᠷᠠᠶᠠ ᠭᠡᠵᠦ ᠰᠠᠨᠠᠵᠠᠭᠠᠵᠤ ᠪᠠᠢᠭᠠ ᠪᠣᠯ ᠠᠪᠤᠭᠠᠳ ᠯᠠ ᠢᠷᠡ᠃ ᠬᠠᠷᠢᠨ ᠪᠢ ᠶᠠᠪᠤᠵᠤ ᠣᠴᠢᠵᠤ ᠡᠮᠨᠡᠵᠦ ᠴᠢᠳᠠᠬᠤ ᠦᠭᠡᠢ ᠰᠢᠦ᠃ ᠮᠢᠨᠦ ᠭᠡᠷ ᠦ᠋ᠨ ᠢᠯᠡᠭᠦᠦ ᠭᠣᠩᠬᠣᠨ ᠳ᠋ᠤ᠌ ᠬᠡᠪᠲᠡᠨᠡ ᠪᠢᠵᠡ ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠬᠡᠯᠡᠬᠦ ᠳ᠋ᠦ᠍ ᠬᠤᠸᠠᠷᠠᠭ ᠤ᠋ᠳ ᠴᠥᠮ ᠯᠡ ᠵᠦᠪᠰᠢᠶᠡᠷᠠᠵᠤ ᠡᠯᠵᠢᠭᠡ ᠬᠥᠯᠯᠡᠭᠰᠡᠨ ᠲᠡᠷᠭᠡ ᠣᠯᠵᠤ ᠠᠪᠤᠭᠠᠳ ᠰᠠᠩᠵᠢ ᠭᠡᠰᠦᠯ ᠢ᠋ ᠠᠪᠬᠤ ᠪᠠᠷ ᠢᠷᠡᠵᠡᠢ᠃ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠬᠤ ᠡᠰᠡᠬᠦ ᠪᠡᠨ ᠰᠠᠩᠵᠢ ᠰᠢᠢᠳᠴᠦ ᠶᠠᠳᠠᠪᠠ᠃
– ᠠᠪᠤ᠂ ᠡᠵᠢ ᠮᠠᠨᠢ ᠶᠠᠭᠤ ᠭᠡᠬᠦ ᠪᠠᠢᠭᠰᠠᠨ ᠪᠣᠯ ᠠ᠋! ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠠᠷᠠᠢᠬᠢᠨ ᠳᠤᠤᠭᠠᠷᠪᠠ᠃
– ᠲᠡᠳᠡ ᠶᠠᠭᠤ ᠭᠡᠬᠦ ᠪᠣᠢ? ᠬᠠᠭᠠᠰ ᠵᠢᠯ ᠰᠢᠬᠠᠮ ᠶᠠᠪᠤᠵᠤ ᠪᠠᠢᠵᠤ ᠬᠡᠯᠡ ᠬᠦᠷᠭᠡᠨᠡ ᠰᠢᠦ ᠳᠡ᠃ ᠬᠡᠯᠡ ᠬᠦᠷᠭᠡᠭᠡᠳ ᠴᠦ᠍ ᠲᠡᠳᠡ ᠡᠴᠦᠰ ᠦ᠋ᠨ ᠭᠣᠷᠢᠳᠠᠯᠭᠠ ᠪᠦᠬᠦᠨ ᠢ᠋ ᠯᠡ ᠬᠢ ᠭᠡᠨᠡ ᠪᠢᠵᠡ ᠳᠡ᠃ ᠡᠴᠦᠰ ᠦᠨ ᠭᠣᠷᠢᠳᠠᠯᠭᠠ ᠪᠣᠯ ᠣᠳᠣ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠪᠠᠢᠨᠠ ᠭᠡᠵᠦ ᠨᠥᠬᠥᠳ ᠨᠢ ᠢᠳᠬᠠᠭᠠᠳ ᠰᠠᠩᠵᠢ ᠭᠡᠰᠦᠯ ᠢ᠋ ᠡᠯᠵᠢᠭᠡᠨ ᠲᠡᠷᠭᠡᠨ ᠦ᠌ ᠬᠠᠲᠠᠭᠤ ᠳᠠᠨᠽᠠᠨ ᠳᠣᠲᠣᠷᠠ ᠬᠡᠪᠲᠡᠭᠦᠯᠦᠨ ᠠᠪᠴᠤ ᠣᠳᠤᠯᠠ᠃ ᠵᠠᠮ ᠤ᠋ᠨ ᠵᠠᠭᠤᠷᠠ ᠨᠥᠬᠥᠳ ᠨᠢ ᠰᠠᠩᠵᠢ ᠳ᠋ᠤ᠌᠂
– ᠵᠠ ᠴᠢ ᠮᠠᠷᠠᠮᠪᠠ ᠳ᠋ᠤ᠌ ᠰᠦᠵᠢᠭᠯᠡᠪᠡᠯ ᠵᠣᠬᠢᠨᠠ᠃ ᠥᠭᠡᠷᠡ ᠠᠪᠤᠷᠠᠯ ᠪᠠᠢᠬᠤ ᠦᠭᠡᠢ᠃ ᠭᠠᠭᠴᠠᠬᠠᠨ ᠲᠠ ᠯᠠ ᠠᠮᠢ ᠨᠠᠰᠤ ᠶ᠋ᠢ ᠮᠢᠨᠢ ᠠᠪᠤᠷᠠᠵᠤ ᠥᠭᠭᠦᠭᠡᠴᠢ ᠭᠡᠵᠦ ᠯᠡ ᠭᠤᠶᠤᠭᠠᠳ ᠪᠠᠢ᠃ ᠥᠪᠡᠷ ᠲᠦ᠍ ᠨᠢ ᠢᠲᠡᠭᠡᠭᠰᠡᠨ ᠬᠦᠮᠦᠨ ᠢ᠋ ᠡᠳᠡᠭᠡᠭᠡᠭᠡᠳ ᠯᠡ ᠥᠭᠳᠡᠭ ᠮᠠᠷᠠᠮᠪᠠ ᠪᠠᠢᠭᠠ ᠶᠤᠮ᠃ ᠶᠠᠭᠤ ᠬᠢ ᠭᠡᠰᠡᠨ ᠢ ᠨᠢ ᠯᠠ ᠬᠢᠭᠡᠳ ᠪᠠᠢ᠃ ᠦᠭᠡᠨ ᠡᠴᠡ ᠨᠢ ᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠵᠠᠬᠢᠵᠠᠭᠠᠯᠠ᠃
ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠰᠢᠪᠡᠷ ᠲᠠᠭᠠᠵᠠᠨ ᠤ᠋ ᠪᠠᠨ ᠬᠠᠵᠠᠭᠤ ᠶ᠋ᠢᠨ ᠭᠣᠩᠬᠣᠨ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠢ᠋ ᠬᠡᠪᠲᠡᠭᠦᠯᠦᠯᠡ᠃ ᠨᠥᠬᠥᠳ ᠲᠦ᠍ ᠨᠢ ᠲᠡᠷᠡ ᠬᠡᠯᠡᠬᠦ ᠳ᠋ᠡᠭᠡᠨ᠂
– ᠬᠠᠶᠠ ᠢᠷᠡᠵᠦ ᠳᠣᠷᠣᠢᠲᠠᠭᠰᠠᠨ ᠨᠥᠬᠥᠷ ᠢ᠋ ᠪᠡᠨ ᠬᠣᠭᠣᠯᠠᠯᠠᠵᠤ ᠪᠠᠢᠭᠠᠷᠠᠢ᠃ ᠪᠢ ᠬᠥᠭᠰᠢᠨ ᠠᠮᠢᠲᠠᠨ᠂ ᠪᠤᠰᠤᠳ ᠢ᠋ ᠪᠠᠢᠲᠤᠭᠠᠢ ᠥᠪᠡᠷ ᠢ᠋ ᠪᠡᠨ ᠠᠳᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠪᠡ᠃
– ᠳᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠨᠥᠬᠥᠳ ᠨᠢ ᠠᠮᠠᠯᠠᠬᠤ ᠳ᠋ᠤ᠌᠄
– ᠲᠡᠭᠡᠬᠦ ᠳ᠋ᠡᠭᠡᠨ ᠥᠨᠵᠢᠭᠡᠳ ᠭᠠᠭᠴᠠ ᠢᠷᠡᠵᠦ ᠪᠠᠢ᠃ ᠡᠳᠦᠷ ᠪᠦᠷᠢ ᠡᠭᠦᠪᠡᠷ ᠦᠢᠮᠡᠯᠳᠦᠭᠡᠳ ᠨᠡᠮᠡᠷᠢ ᠦᠭᠡᠢ ᠰᠢᠦ ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠᠲᠠᠨ ᠬᠡᠯᠡᠪᠡ᠃
ᠨᠥᠬᠥᠳ ᠢ᠋ ᠨᠢ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠡᠪᠡᠳᠴᠢᠲᠡᠨ ᠤ ᠰᠤᠳᠠᠰᠤ ᠶᠢ ᠪᠠᠷᠢᠬᠤ ᠪᠠᠷ ᠰᠢᠢᠳᠦᠭᠡᠳ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠡᠮᠦᠨᠡ ᠢᠷᠡᠵᠦ ᠨᠠᠮᠬᠠᠨ ᠬᠠᠨᠵᠤ ᠰᠠᠨᠳᠠᠢᠯᠠᠨ ᠰᠠᠭᠤᠭᠠᠳ᠄
– ᠬᠡᠵᠢᠶᠡ ᠡᠪᠡᠳᠦᠭᠡ ᠪᠣᠢ? ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠠᠰᠠᠭᠤᠪᠠ᠃
– ᠨᠤᠮᠨᠡᠢ ᠰᠠᠬᠢᠵᠤ ᠡᠬᠢᠨ ᠦ᠌ ᠬᠣᠶᠠᠷ ᠢ᠋ ᠳᠠᠭᠤᠰᠬᠠᠭᠠᠳ ᠪᠠᠢᠲᠠᠯᠠ ᠡᠪᠡᠳᠴᠦ ᠡᠬᠢᠯᠡᠭᠡᠳ ᠨᠠᠢ᠍ᠮᠠᠳᠡᠬᠢ ᠨᠤᠮᠨᠡᠢ ᠶ᠋ᠢ ᠳᠡᠢᠯᠦᠭᠰᠡᠨ ᠦᠭᠡᠢ ᠤᠬᠠᠭᠠᠨ ᠠᠯᠳᠠᠭᠰᠠᠨ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠲᠦᠪᠡᠳ ᠬᠡᠯᠡ ᠪᠡᠷ ᠬᠢᠴᠢᠶᠡᠩᠭᠦᠢᠯᠡᠨ ᠬᠡᠯᠡᠪᠡ᠃
– ᠬᠥᠰᠢ ᠴᠢ ᠴᠢᠨᠢ ᠲᠥᠪᠡᠳ ᠢ᠋ᠶ᠋ᠡᠷ ᠰᠠᠢᠬᠠᠨ ᠶᠠᠷᠢᠵᠤ ᠪᠠᠢᠬᠤ ᠴᠢᠪ? ᠲᠡᠭᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠬᠠᠳᠠᠭ ᠵᠢᠩᠳᠠᠭᠠᠨ ᠳ᠋ᠤ᠌ ᠰᠠᠭᠤᠳᠠᠭ ᠪᠢᠯᠡ᠃ ᠲᠥᠪᠡᠳ ᠲᠦ᠍ ᠢᠷᠡᠭᠡᠳ ᠤᠲᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠭᠠᠢᠬᠠᠯᠠ᠃
– ᠬᠠᠭᠠᠰ ᠵᠢᠯ ᠭᠠᠷᠤᠢᠬᠠᠨ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠠᠷᠠᠢ ᠶᠠᠳᠠᠨ ᠬᠡᠯᠡᠪᠡ᠃ ᠰᠢᠨᠠᠯᠭᠠᠨ ᠳ᠋ᠠᠭᠠᠨ ᠳᠡᠢᠯᠳᠡᠭᠡᠳ ᠦᠭᠡ ᠴᠦ᠍ ᠬᠡᠯᠡᠵᠦ ᠴᠢᠳᠠᠮᠠᠷ ᠦᠭᠡᠢ ᠪᠠᠢᠯᠠ᠃
– ᠲᠡᠭᠡᠪᠡᠯ ᠴᠢ ᠲᠥᠪᠡᠳ ᠬᠡᠯᠡ ᠰᠠᠢᠨ ᠰᠤᠷᠴᠠᠢ᠃ ᠣᠪᠣᠭᠠ ᠳᠣᠷᠢᠭᠤᠨ ᠰᠡᠢᠷᠡᠭ ᠤᠬᠠᠭᠠᠨ ᠲᠠᠢ ᠬᠤᠸᠠᠷᠠᠭ ᠪᠠᠢᠬᠤ ᠨᠢ ᠠ᠋! ᠲᠡᠭᠡᠪᠡᠯ ᠴᠢᠮᠠᠶ᠋ᠢ ᠡᠳᠡᠭᠡᠭᠡᠵᠦ ᠠᠪᠤᠪᠠᠯ ᠵᠣᠬᠢᠨᠠ᠃ ᠪᠤᠷᠬᠠᠨ ᠳ᠋ᠤ᠌ ᠰᠠᠢᠨ ᠱᠠᠪᠢ ᠬᠡᠷᠡᠭᠲᠡᠢ ᠭᠡᠵᠦ ᠮᠠᠷᠠᠮᠪᠠ ᠬᠡᠯᠡᠭᠡᠳ ᠭᠡᠰᠦᠯ ᠦ᠋ᠨ ᠰᠤᠳᠠᠰᠤ ᠶ᠋ᠢ ᠠᠳᠬᠤᠨ ᠶᠠᠭᠤᠮᠠ ᠴᠢᠩᠨᠠᠬᠤ ᠮᠡᠲᠦ ᠰᠠᠭᠤᠬᠤ ᠵᠠᠭᠤᠷᠠ ᠰᠠᠩᠵᠢ ᠶ᠋ᠢᠨ ᠵᠢᠰᠦ ᠴᠢᠷᠠᠢ ᠶ᠋ᠢ ᠤᠳᠠᠲᠠᠯᠠ ᠠᠵᠢᠭᠯᠠᠪᠠ᠃
– ᠺᠠᠢᠪ ᠵᠤᠨᠠᠢ ᠶ᠋ᠢᠨ ᠲᠠᠶᠢᠭ ᠢ᠋ᠶ᠋ᠠᠷ (ᠰᠤᠳᠤᠷ) ᠪᠣᠯ ᠰᠤᠳᠠᠰᠤᠨ ᠤ᠋ ᠴᠣᠬᠢᠯᠲᠠ ᠲᠠᠪᠢᠨ ᠨᠠᠢ᠍ᠮᠠᠨ ᠶᠠᠩᠵᠤ᠃ᠨᠢᠭᠡ ᠠᠮᠢᠰᠬᠤᠭᠠᠨ ᠤ᠋ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠲᠠᠪᠤᠨ ᠤᠳᠠᠭᠠ ᠴᠣᠬᠢᠯᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠭᠡᠨᠡᠳᠲᠡ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠭᠠᠭᠴᠠᠭᠠᠷ ᠶᠠᠷᠢᠪᠠ᠃ ᠰᠠᠩᠵᠢ ᠭᠡᠰᠦᠯ ᠭᠠᠢᠬᠠᠵᠤ ᠥᠪᠡᠷ ᠲᠦ᠍ ᠨᠢ ᠬᠡᠯᠡᠵᠦ ᠪᠠᠶᠢᠭᠠ ᠶᠤᠮ ᠭᠡᠵᠦ ᠪᠣᠳᠣᠭᠠᠳ ᠲᠣᠭᠲᠠᠭᠠᠵᠤ ᠠᠪᠤᠯᠠ᠃
ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠪᠤᠰᠤᠳ ᠢ᠋ ᠡᠮᠴᠢᠯᠡᠬᠦ ᠦᠶᠡ ᠳ᠋ᠡᠭᠡᠨ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠪᠠᠨ ᠡᠷᠳᠡᠮ ᠢ᠋ ᠰᠢᠯᠭᠠᠵᠤ᠂ ᠠᠮᠠᠨ ᠳ᠋ᠠᠭᠠᠨ ᠶᠤᠮ ᠤᠤ ᠶᠡᠷᠦ ᠨᠢ ᠴᠢᠩᠭᠠ ᠳᠠᠭᠤ ᠪᠠᠷ ᠳᠠᠪᠲᠠᠨ ᠤᠩᠰᠢᠵᠤ ᠰᠤᠷᠴᠢᠬᠠᠭᠰᠠᠨ ᠬᠥᠮᠦᠨ ᠪᠠᠢᠵᠠᠢ᠃ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠲᠡᠷᠡ ᠵᠠᠩᠰᠢᠯ ᠢ᠋ᠶ᠋ᠠᠨ ᠶᠡᠬᠡ ᠬᠡᠷᠡᠭᠲᠡᠢ ᠵᠥᠪ ᠶᠦᠮ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠪᠠ᠃ ᠮᠠᠷᠲᠠᠭᠰᠠᠨ ᠢ᠋ᠶ᠋ᠠᠨ ᠦᠷᠭᠦᠯᠵᠢ ᠰᠠᠨᠠᠵᠤ ᠪᠠᠢᠬᠤ ᠳ᠋ᠤ᠌ ᠬᠡᠷᠡᠭᠲᠡᠢ᠃ ᠪᠠᠰᠠ ᠡᠪᠡᠳᠴᠢᠲᠡᠨ ᠨᠦᠭᠦᠳ ᠴᠦ᠍ ᠶᠠᠷᠢᠶᠠ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠦ᠌ ᠶᠡᠬᠡ ᠡᠷᠳᠡᠮ ᠳ᠋ᠦ᠍ ᠰᠢᠲᠦᠨ ᠪᠢᠰᠢᠷᠡᠬᠦ ᠤᠴᠢᠷᠲᠠᠢ ᠵᠦᠢᠯ ᠭᠡᠵᠦ ᠲᠡᠷᠡ ᠪᠣᠳᠣᠳᠠᠭ ᠪᠠᠢᠵᠠᠢ᠃
ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠰᠠᠩᠵᠢ ᠶᠢ ᠬᠡᠯᠡ ᠪᠡᠨ ᠭᠠᠷᠭᠠ ᠭᠡᠵᠦ ᠲᠤᠰᠢᠶᠠᠭᠠᠳ᠂
– ᠬᠡᠯᠡ ᠨᠢ ᠴᠦ᠍ ᠵᠦᠭᠡᠷ ᠯᠡ ᠪᠠᠢᠨᠠ᠃ ᠬᠣᠣᠷ ᠲᠠᠢ ᠶᠤᠮ ᠢᠳᠡᠭᠰᠡᠨ ᠪᠣᠯ ᠬᠠᠷᠠ ᠬᠥᠬᠡ ᠪᠣᠯᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠢᠳᠡᠭᠰᠡᠨ ᠶᠠᠭᠤᠮᠠᠨ ᠠ᠋ᠴᠠ ᠪᠠᠨ ᠪᠣᠯᠤᠭᠠ ᠦᠭᠡᠢ ᠪᠠᠢᠨᠠ ᠭᠡᠪᠡ᠃
– ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ᠂ ᠪᠠᠷᠠᠭᠤᠨ ᠵᠡᠭᠦᠨ ᠢ᠋ᠶ᠋ᠡᠨ ᠡᠷᠭᠢᠯᠳᠦᠭᠦᠯᠦᠭᠲᠦᠨ ᠭᠡᠵᠦ ᠮᠠᠷᠠᠮᠪᠠ ᠱᠠᠭᠠᠷᠳᠠᠯᠠ᠃ ᠰᠠᠩᠵᠢ ᠲᠡᠭᠦᠨ ᠦ᠌ ᠳᠤᠷᠠ ᠶ᠋ᠢ ᠳᠠᠭᠠᠭᠤᠯᠤᠯᠠ᠃
– ᠨᠢᠳᠦ ᠨᠢ ᠴᠦ᠍ ᠪᠠᠰᠠ ᠯᠠ ᠵᠦᠭᠡᠷ ᠪᠠᠢᠨᠠ᠃ ᠥᠩᠭᠡ ᠨᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠃ ᠨᠢᠭᠡ ᠴᠦ᠍ ᠰᠤᠳᠠᠰᠤ ᠤᠯᠠᠢᠭᠠ ᠦᠭᠡᠢ ᠪᠠᠢᠨᠠ ᠭᠡᠪᠡ᠃
ᠳᠠᠬᠢᠨ ᠪᠠᠰᠠ ᠰᠤᠳᠠᠰᠤ ᠶ᠋ᠢ ᠨᠢ ᠪᠠᠷᠢᠵᠤ ᠦᠵᠡᠪᠡ᠃
– ᠳᠣᠯᠣᠭᠠᠨ ᠲᠠᠮᠢᠷ ᠴᠢᠨᠢ ᠳᠣᠣᠷᠠᠳᠠᠨ ᠰᠤᠯᠠᠳᠠᠵᠠᠢ᠃ ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠪᠢ ᠴᠢᠮᠡ ᠳ᠋ᠦ᠍ ᠲᠤᠷᠰᠢᠵᠤ ᠨᠢᠭᠡ ᠶᠠᠭᠤᠮᠠ ᠥᠭᠭᠦᠭᠡᠳ ᠦᠵᠡᠨᠡ᠃ ᠴᠢ ᠡᠨᠳᠡ ᠪᠡᠨ ᠥᠭᠡᠷᠡ ᠶᠠᠭᠤ ᠴᠤ᠌ ᠪᠣᠳᠣᠯ ᠦᠭᠡᠢ ᠬᠡᠪᠲᠡᠵᠦ ᠪᠠᠢ! ᠭᠡᠵᠦ ᠬᠡᠯᠡᠭᠡᠳ ᠮᠠᠷᠠᠮᠪᠠ ᠭᠠᠷᠴᠤ ᠣᠳᠴᠠᠢ᠃
《ᠳᠣᠯᠣᠭᠠᠨ ᠲᠠᠮᠢᠷ ᠳᠣᠣᠷᠠᠳᠠᠨᠠ ᠭᠡᠵᠦ ᠶᠠᠭᠤ ᠶ᠋ᠢ ᠬᠡᠯᠡᠭᠡᠳ ᠪᠠᠢᠭᠠ ᠶᠤᠮ ᠪᠣᠯ ᠡ ? ᠬᠠᠮᠤᠭ ᠶᠠᠭᠤᠮᠠ ᠮᠢᠨᠢ ᠮᠠᠭᠤᠳᠠᠨ ᠳᠣᠷᠣᠢᠲᠠᠭᠰᠠᠨ ᠬᠡᠷᠡᠭ ᠪᠠᠢᠬᠠ ᠳ᠋ᠠ!》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠭᠡᠶᠦᠷᠡᠨ ᠪᠣᠳᠣᠵᠤ ᠪᠠᠢᠯᠠ᠃ ᠬᠣᠳᠣᠭᠣᠳᠣ ᠨᠢ ᠪᠠᠵᠠᠯᠠᠨ᠂ ᠪᠡᠶᠡ ᠨᠢ ᠲᠠᠮᠢᠷᠳᠠᠵᠤ ᠦᠶᠡ ᠦᠶᠡ ᠳᠠᠭᠤ ᠠᠯᠳᠠᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠳᠣᠯᠣᠭᠠᠨ ᠲᠠᠮᠢᠷ ᠭᠡᠳᠡᠭ ᠳᠣᠷᠣᠢᠲᠠᠭᠰᠠᠨ ᠨᠢ ᠦᠨᠡᠨ ᠪᠢᠵᠡ ᠳᠡ ᠭᠡᠵᠦ ᠲᠡᠷᠡ ᠢᠲᠡᠭᠡᠯᠡ᠃ᠣᠷᠣᠢᠬᠠᠨ ᠮᠠᠷᠠᠮᠪᠠ ᠣᠷᠣᠵᠤ ᠢᠷᠡᠭᠡᠳ ᠲᠣᠮᠣ ᠪᠠᠭᠪᠤᠷ ᠲᠠᠢ ᠱᠥᠯᠥ ᠰᠢᠭ ᠶᠠᠭᠤᠮᠠ ᠥᠭᠭᠦᠯᠡ᠃
– ᠵᠠ ᠴᠢ ᠲᠣᠭᠠᠯᠠᠭᠠᠳ ᠪᠠᠯᠭᠤᠭᠠᠳ ᠪᠠᠢᠭᠠᠷᠠᠢ᠃ ᠶᠠᠭ ᠯᠠ ᠳᠥᠴᠢᠨ ᠬᠣᠶᠠᠷ ᠪᠠᠯᠭᠤᠭᠠᠳ ᠯᠠ ᠪᠣᠯᠢᠨᠠ ᠰᠢᠦ ! ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠪᠠᠯᠭᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠮᠠᠷᠠᠮᠪᠠ ᠵᠢᠭᠠᠪᠤᠷᠢᠯᠠᠪᠠ᠃ ᠨᠢᠯᠤᠭᠤᠨ ᠠᠮᠲᠠ ᠲᠠᠢ ᠱᠥᠯᠥ ᠰᠢᠭ ᠶᠠᠭᠤᠮᠠ ᠪᠠᠢᠯᠠ᠃ ᠰᠠᠩᠵᠢ ᠭᠡᠰᠦᠯ ᠲᠣᠭᠠᠯᠠᠨ ᠵᠠᠯᠭᠢᠯᠠᠵᠤ ᠡᠬᠢᠯᠡᠪᠡ᠃ᠪᠦᠯᠢᠶᠡᠬᠡᠨ ᠨᠢᠯᠤᠭᠤᠨ ᠱᠥᠯᠥ ᠲᠤᠯᠠ ᠪᠥᠭᠡᠯᠵᠢᠰᠦ ᠴᠢᠳᠬᠤᠵᠤ ᠪᠠᠢᠪᠠᠴᠤ ᠲᠡᠰᠦᠭᠡᠳ ᠯᠡ ᠪᠠᠯᠭᠤᠭᠠᠳ ᠪᠠᠢᠪᠠ᠃ ᠮᠠᠷᠠᠮᠪᠠ ᠪᠠᠰᠠ ᠡᠷᠬᠡ ᠪᠡᠷ ᠢᠮᠡᠷᠦᠨ ᠲᠣᠭᠠᠴᠠᠭᠠᠯᠠᠵᠤ ᠰᠠᠭᠤᠬᠤ ᠵᠠᠭᠤᠷᠠ᠄
– ᠳᠥᠴᠢᠨ ᠬᠣᠶᠠᠷ ᠪᠠᠯᠭᠤ ᠶᠠᠭᠤᠮᠠ ᠤᠤᠭᠤᠬᠤ ᠳ᠋ᠤ᠌ ᠬᠥᠮᠦᠨ ᠦ᠌ ᠬᠣᠳᠣᠭᠣᠳᠣ ᠭᠤᠷᠪᠠ ᠬᠤᠪᠢᠶᠠᠭᠰᠠᠨ ᠤ᠋ ᠬᠣᠶᠠᠷ ᠲᠠᠭᠠᠨ ᠬᠦᠷᠲᠡᠯᠡ ᠳᠦᠭᠦᠷᠳᠡᠭ ᠶᠦᠮ᠃ ᠨᠥᠭᠥᠭᠡ ᠬᠣᠭᠣᠰᠣᠨ ᠵᠠᠢ ᠳ᠋ᠤ᠌ ᠨᠢ ᠰᠢᠩᠭᠡᠨ ᠬᠣᠯᠢᠯᠳᠤᠨ ᠪᠣᠯᠪᠠᠰᠤᠷᠠᠵᠤ ᠴᠢᠯᠥᠭᠡᠲᠡᠢ ᠡᠷᠭᠢᠯᠳᠦᠬᠦ ᠤᠴᠢᠷᠲᠠᠢ᠃ ᠲᠡᠭᠡᠭᠡᠳ ᠪᠡᠶᠡ᠂ ᠠᠷᠠᠰᠤ᠂ ᠴᠢᠰᠤ᠂ ᠶᠠᠰᠤ᠂ ᠲᠠᠷᠢᠬᠢ᠂ᠬᠣᠳᠣᠭᠣᠳᠣ ᠶ᠋ᠢ ᠴᠢᠨᠢ ᠲᠡᠵᠢᠭᠡᠵᠦ ᠥᠭᠭᠦᠨᠡ ᠭᠡᠵᠦ ᠶᠠᠷᠢᠵᠤ ᠪᠠᠢᠯᠠ᠃ ᠰᠠᠩᠵᠢ ᠭᠡᠰᠦᠯ ᠲᠡᠭᠦᠨ ᠢ ᠪᠦᠳᠡᠭᠢᠬᠡᠨ ᠲᠣᠭᠲᠠᠭᠠᠵᠤ ᠠᠪᠤᠯᠠ᠃ ᠶᠠᠭᠤᠮᠠ ᠶ᠋ᠢ ᠨᠢᠭᠡ ᠯᠡ ᠰᠣᠨᠣᠰᠪᠠᠯ ᠪᠦᠷᠢᠨ ᠲᠣᠭᠲᠠᠭᠠᠳᠠᠭ ᠲᠡᠢᠮᠦ ᠰᠣᠨᠢᠨ ᠤᠬᠠᠭᠠᠨ ᠲᠠᠢ ᠪᠣᠯᠬᠣᠷ ᠭᠡᠰᠦᠯ ᠰᠠᠩᠵᠢ ᠠᠯᠢᠪᠠ ᠶᠠᠭᠤᠮᠠ ᠶ᠋ᠢ ᠴᠡᠭᠡᠵᠢᠯᠡᠬᠦ ᠭᠡᠵᠦ ᠵᠣᠪᠠᠳᠠᠭ ᠦᠭᠡᠢ ᠪᠠᠢᠯᠠ᠃
– ᠳᠥᠴᠢᠨ ᠬᠣᠶᠠᠷ ᠪᠣᠯᠤᠯᠠ᠃ ᠣᠳᠣ ᠪᠣᠯᠢ᠂ ᠪᠠᠭᠪᠤᠷ ᠢ᠋ᠶ᠋ᠠᠨ ᠨᠡᠰᠢ ᠨᠢ ᠥᠭ ᠭᠡᠵᠦ ᠮᠠᠷᠠᠮᠪᠠ ᠬᠡᠯᠡᠬᠦ ᠳ᠋ᠦ᠍ ᠰᠠᠩᠵᠢ ᠨᠢᠯᠤᠭᠤᠨ ᠱᠥᠯᠦᠨ ᠡᠴᠡ ᠰᠠᠯᠵᠤ ᠰᠠᠶᠢ ᠠᠮᠤᠷᠪᠠ᠃
– ᠣᠳᠣ ᠤᠨᠲᠠ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠪᠠᠢᠳᠠᠯ ᠶᠠᠩᠵᠤ ᠨᠢ ᠮᠡᠳᠡᠭᠳᠡᠨᠡ ᠭᠡᠵᠦ ᠬᠡᠯᠡᠭᠡᠳ ᠮᠠᠷᠠᠮᠪᠠ ᠶᠠᠪᠤᠪᠠ᠃
ᠮᠠᠷᠠᠮᠪᠠ ᠶ᠋ᠢᠨ ᠶᠠᠷᠢᠶᠠ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠰᠣᠨᠢᠭᠤᠴᠢ ᠵᠠᠩ ᠢ᠋ ᠬᠥᠳᠡᠯᠭᠡᠪᠡ᠂《ᠣᠲᠠᠴᠢ ᠶᠢᠨ ᠤᠬᠠᠭᠠᠨ ᠢ᠋ ᠮᠡᠳᠡᠵᠦ ᠠᠪᠤᠪᠠᠯ ᠰᠣᠨᠢᠨ ᠶᠤᠮ ᠤᠤ ᠳᠠ᠃ ᠡᠨᠡ ᠮᠠᠷᠠᠮᠪᠠ ᠳ᠋ᠤ᠌ ᠭᠡᠷ ᠦ᠋ᠨ ᠱᠠᠪᠢ ᠣᠷᠣᠶᠠ ᠪᠠᠢᠵᠠ》 ᠭᠡᠵᠦ ᠭᠡᠰᠦᠯ ᠪᠣᠳᠣᠵᠤ ᠪᠠᠢᠭᠠᠳ ᠡᠪᠡᠳᠴᠢᠨ᠂ ᠨᠣᠢᠷ ᠬᠣᠶᠠᠷ ᠲᠠᠭᠠᠨ ᠳᠡᠢᠯᠦᠭᠳᠡᠨ ᠵᠡᠭᠦᠷᠮᠡᠭᠯᠡᠵᠦ ᠡᠬᠢᠯᠡᠪᠡ᠃
᠁ ᠮᠠᠷᠭᠠᠰᠢ ᠥᠷᠯᠥᠭᠡ ᠭᠡᠰᠦᠯ ᠦ᠋ᠨ ᠪᠡᠶᠡ ᠠᠷᠠᠢ ᠳᠡᠭᠡᠷᠡᠳᠡᠭᠡᠳ ᠪᠠᠢᠭᠠ ᠨᠢ ᠮᠡᠳᠡᠭᠳᠡᠪᠡ᠂ ᠲᠡᠭᠦᠨ ᠦ᠌ ᠤᠬᠠᠭᠠᠨ ᠨᠢ ᠠᠷᠠᠢ ᠰᠠᠷᠠᠭᠤᠯ ᠪᠣᠯᠵᠠᠢ᠃ ᠭᠡᠪᠡᠴᠦ ᠡᠯᠢᠭᠡᠨ ᠲᠠᠯᠠ ᠳ᠋ᠤ᠌ ᠨᠢ ᠡᠪᠬᠡᠷᠡᠨ ᠡᠪᠡᠳᠦᠭᠦᠯᠳᠡᠭ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠪᠠᠢᠯᠠ᠃ ᠰᠠᠩᠵᠢ ᠶ᠋ᠢᠨ ᠨᠢᠳᠦ ᠠᠷᠠᠢ ᠳᠡᠭᠡᠷᠡᠳᠡᠨ ᠰᠡᠷᠭᠦᠭᠰᠡᠨ ᠢ᠋ ᠮᠠᠷᠠᠮᠪᠠ ᠫᠦᠷᠪᠦᠳᠣᠨᠣᠢ ᠦᠵᠡᠭᠡᠳ ᠰᠡᠳᠬᠢᠯ ᠨᠢ ᠤᠷᠮᠠᠰᠢᠵᠠᠢ᠃
– ᠠᠷᠠᠢ ᠳᠡᠭᠡᠷᠡᠳᠡᠭᠡ ᠦᠦ? ᠵᠠ ᠠᠯᠢᠪ ᠰᠤᠳᠠᠰᠤ ᠪᠠᠨ ᠥᠭ! ᠭᠡᠵᠦ ᠮᠠᠷᠠᠮᠪᠠ ᠠᠰᠠᠭᠤᠬᠤ ᠵᠠᠭᠤᠷᠠ ᠭᠡᠰᠦᠯ ᠦ᠋ᠨ ᠰᠤᠳᠠᠰᠤ ᠶ᠋ᠢ ᠪᠠᠷᠢᠵᠤ ᠦᠵᠡᠭᠡᠳ ᠳᠤᠬᠤ ᠪᠠᠨ ᠦᠷᠴᠢᠢᠯᠭᠡᠵᠦ᠄
– ᠪᠠᠰᠠ ᠯᠠ ᠲᠡᠳᠦᠢ ᠰᠠᠢᠨ ᠪᠤᠰᠤ ᠪᠠᠢᠨᠠ᠃ ᠶᠡᠷᠦ ᠨᠢ ᠴᠢᠮᠠ ᠲᠠᠢ ᠬᠠᠮᠲᠤ ᠲᠥᠷᠥᠭᠰᠡᠨ ᠭᠤᠷᠪᠠᠨ ᠡᠪᠡᠳᠴᠢᠨ ᠦ ᠨᠢᠭᠡ ᠪᠣᠯᠤᠯᠲᠠᠢ᠃ ᠬᠥᠮᠦᠨ ᠲᠥᠷᠥᠬᠦ ᠳ᠋ᠡᠭᠡᠨ ᠭᠤᠷᠪᠠᠨ ᠡᠪᠡᠳᠴᠢᠨ ᠲᠡᠭᠡᠭᠡᠵᠦ ᠢᠷᠡᠳᠡᠭ ᠶᠦᠮ᠃ ᠯᠦᠨᠳ᠋ᠡᠭᠡ᠂ ᠪᠠᠳᠬᠠᠨ᠂ ᠰᠤᠮ ᠭᠡᠵᠦ᠃ ᠡᠨᠡ ᠴᠢᠨᠢ ᠬᠡᠢ᠂ ᠴᠢᠰᠤ᠂ ᠰᠢᠷᠠ ᠤᠰᠤ ᠭᠤᠷᠪᠠ ᠶ᠋ᠢᠨ ᠡᠪᠡᠳᠴᠢᠨ᠃ ᠬᠡᠢ ᠶ᠋ᠢ ᠪᠣᠯ ᠳᠠᠷᠤᠭᠤᠯᠵᠤ ᠡᠮᠴᠢᠯᠡᠬᠦ ᠳ᠋ᠦ᠍ ᠡᠳᠡᠭᠡᠨᠡ᠃ ᠰᠢᠷᠠ ᠤᠰᠤ ᠶ᠋ᠢ ᠪᠣᠯ ᠪᠠᠷᠢᠵᠤ ᠡᠮᠴᠢᠯᠡᠵᠦ ᠪᠣᠯᠤᠨᠠ᠃ ᠴᠢᠰᠤ ᠪᠣᠯ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠪᠦᠷᠢᠳᠦᠭᠦᠯᠦᠭᠰᠡᠨ ᠦᠨᠳᠦᠰᠦᠨ ᠡᠰᠢ ᠲᠤᠯᠠ ᠲᠡᠢᠮᠦ ᠠᠮᠠᠷᠬᠠᠨ ᠦᠯᠦ ᠡᠳᠡᠭᠡᠷᠡᠨᠡ᠃ ᠶᠡᠷᠦ ᠨᠢ ᠴᠢᠮᠠ ᠳ᠋ᠤ᠌ ᠴᠢᠰᠤᠨ ᠤ᠋ ᠲᠥᠷᠥᠯ ᠡᠪᠡᠳᠴᠢᠨ ᠣᠷᠢᠶᠠᠵᠤ ᠪᠣᠢ ᠪᠣᠯᠤᠯᠲᠠᠢ᠃ ᠵᠠ ᠪᠢ ᠬᠤᠷᠠᠯ ᠨᠣᠮ ᠳ᠋ᠤ᠌ ᠶᠠᠪᠤᠵᠤ ᠢᠷᠡᠭᠡᠳ ᠨᠢᠭᠡ ᠰᠠᠢᠨ ᠦᠵᠡᠶᠡ ᠳᠡ᠃ ᠴᠢ ᠲᠡᠷᠡ ᠨᠢᠭᠡ ᠬᠥᠲᠥᠪᠴᠢᠨ ᠳᠦ ᠵᠠᠪᠰᠠᠩ ᠢ᠋ ᠪᠡᠨ ᠠᠪᠤᠭᠠᠳ ᠲᠠᠯᠪᠢᠭᠰᠠᠨ ᠪᠠᠢᠭᠠᠷᠠᠢ᠃ ᠲᠡᠷᠡ ᠪᠣᠯᠲᠠᠯᠠ ᠶᠠᠭᠤᠮᠠ ᠬᠡᠯᠡᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠮᠠᠷᠠᠮᠪᠠ ᠵᠠᠬᠢᠪᠠ᠃
ᠭᠡᠰᠦᠯ ᠰᠠᠩᠵᠢ ᠶᠡᠬᠡ ᠦᠳᠡ ᠬᠦᠷᠲᠡᠯᠡ ᠭᠠᠭᠴᠠᠭᠠᠷ ᠭᠡᠶᠦᠷᠡᠵᠦ ᠳᠡᠪᠡᠩ ᠳᠡᠯᠡᠬᠡᠢ ᠶ᠋ᠢᠨ ᠶᠠᠭᠤᠮᠠ ᠪᠣᠳᠣᠯᠠ᠃ ᠪᠤᠷᠬᠠᠨ ᠤ᠋ ᠣᠷᠣᠨ ᠲᠥᠪᠡᠳ ᠭᠠᠵᠠᠷ ᠲᠤ᠌ ᠶᠠᠭᠤᠮᠠ ᠪᠦᠬᠦᠨ ᠤᠴᠢᠷᠲᠠᠢ᠂ ᠰᠦᠮᠡ ᠪᠣᠯᠭᠠᠨ ᠬᠤᠲᠤᠭ ᠲᠠᠢ ᠭᠡᠵᠦ ᠨᠤᠲᠤᠭ ᠤ᠋ᠨ ᠬᠢᠨᠢ ᠯᠠᠮᠠ ᠨᠠᠷ ᠢᠲᠡᠭᠡᠳᠡᠭ᠂ ᠲᠡᠭᠡᠵᠦ ᠶᠠᠷᠢᠳᠠᠭ ᠢ᠋ ᠣᠯᠠᠨ ᠳᠠᠬᠢᠨ ᠰᠣᠨᠣᠰᠴᠠᠢ᠃ ᠣᠳᠣ ᠲᠡᠷᠡ ᠤᠴᠢᠷᠲᠠᠢ᠂ ᠬᠤᠲᠤᠭᠲᠠᠢ᠂ ᠠᠷᠢᠭᠤᠨ ᠶᠠᠭᠤᠮᠠᠰ ᠤ᠋ᠨ ᠬᠦᠷᠢᠶᠡᠯᠡᠯ ᠳᠤᠮᠳᠠ ᠭᠡᠰᠦᠯ ᠰᠠᠩᠵᠢ ᠠᠵᠤ ᠲᠥᠷᠦᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠠᠮᠢ ᠨᠠᠰᠤ ᠪᠠᠨ ᠠᠯᠳᠠᠬᠤᠶᠠ ᠲᠡᠢᠮᠦ ᠴᠦ᠍ ᠬᠡᠴᠡᠭᠦᠦ ᠪᠢᠰᠢ ᠶᠦᠮ ᠰᠢᠭ ᠰᠠᠨᠠᠭᠳᠠᠪᠠ᠃ ᠵᠥᠪ ᠵᠦᠭᠡᠷ ᠪᠠᠢᠲᠠᠯᠠ ᠬᠡᠪ ᠭᠡᠨᠡᠳᠲᠡ ᠡᠪᠡᠳᠴᠢᠨ ᠬᠦᠷᠦᠭᠰᠡᠨ᠃ ᠨᠡᠷᠡᠲᠡᠢ ᠲᠣᠮᠣ ᠭᠠᠪᠵᠤ ᠯᠥᠨᠳᠥᠭᠵᠦᠨᠡᠢ ᠥᠪᠡᠷ ᠢ᠋ᠶ᠋ᠡᠨ ᠭᠦᠷᠢᠮ ᠪᠠᠭᠤᠯᠭᠠᠵᠤ᠂ ᠮᠡᠩᠭᠡᠨ ᠵᠠᠰᠠᠯ ᠬᠢᠭᠰᠡᠨ᠃ ᠳᠠᠷᠠᠭᠠ ᠨᠢ ᠵᠣᠯᠢᠭ ᠭᠠᠷᠭᠠᠵᠤ᠂ ᠰᠦᠨᠡᠰᠦ ᠳᠠᠭᠤᠳᠠᠭᠰᠠᠨ᠃ ᠲᠡᠭᠡᠭᠡᠳ ᠲᠤᠰᠠ ᠪᠣᠯᠤᠭᠠ ᠦᠭᠡᠢ᠃ ᠣᠳᠣ ᠡᠨᠡ ᠮᠠᠷᠠᠮᠪᠠ ᠪᠠᠰᠠ ᠯᠠ ᠭᠠᠪᠢᠲᠠᠢ ᠰᠠᠢᠨ ᠦᠷᠡ ᠳ᠋ᠦ᠋ᠩ ᠳ᠋ᠦ᠍ ᠬᠦᠷᠭᠡᠵᠦ ᠴᠢᠳᠠᠯ ᠦᠭᠡᠢ ᠲᠥᠷᠥᠯ ᠠᠷᠠᠯᠵᠢᠪᠠᠯ ᠶᠠᠭᠤᠲᠠᠢ ᠬᠡᠴᠡᠭᠦᠦ ᠪᠢᠯᠡ ᠭᠡᠬᠦᠴᠢᠯᠡᠨ ᠲᠦᠮᠡᠨ ᠪᠣᠳᠣᠯ ᠳ᠋ᠤ᠌ ᠲᠡᠷᠡ ᠡᠵᠡᠯᠡᠭᠳᠡᠵᠡᠢ᠃
᠁ ᠦᠳᠡ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠠᠷᠠᠮᠪᠠ ᠢᠷᠡᠪᠡ᠃ ᠲᠡᠷᠡ ᠵᠠᠮᠫᠣᠷ ᠲᠠᠢ ᠵᠠᠮᠪᠠᠭᠠ ᠭᠤᠯᠢᠷ᠂ ᠪᠣᠢᠫᠣᠷ ᠲᠠᠢ ᠰᠠᠩ ᠤ᠋ᠨ ᠠᠷᠴᠠ ᠬᠣᠶᠠᠷ ᠠᠪᠴᠢᠷᠠᠵᠠᠢ᠃ ᠵᠠᠮᠪᠠᠭᠠ ᠶ᠋ᠢ ᠢᠳᠡᠵᠦ᠂ ᠪᠣᠢᠫᠣᠷ ᠲᠤ᠌ ᠠᠷᠴᠠ ᠤᠩᠭᠤᠳᠬᠠᠬᠤ ᠠᠵᠢ᠃
– ᠵᠠᠮᠪᠠᠭᠠ ᠭᠤᠯᠢᠷ ᠢᠳᠡᠭᠡᠳ ᠦᠵᠡ᠃ ᠲᠡᠭᠡᠭᠡᠳ ᠪᠠᠢᠳᠠᠯ ᠢ᠋ ᠴᠢᠨᠢ ᠬᠠᠷᠠᠶᠠ ᠭᠡᠵᠦ ᠮᠠᠷᠠᠮᠪᠠ ᠵᠠᠮᠫᠣᠷ ᠲᠠᠢ ᠭᠤᠯᠢᠷ᠂ ᠠᠶᠠᠭᠠ ᠲᠠᠢ ᠳᠥᠬᠥᠭᠦᠯᠵᠦ ᠥᠭᠭᠦᠭᠡᠳ ᠥᠪᠡᠷ ᠢ᠋ᠶ᠋ᠠᠨ ᠡᠪᠡᠳᠴᠢᠲᠡᠨ ᠦ᠌ ᠵᠠᠪᠰᠠᠩ ᠢ ᠰᠢᠨᠵᠢᠬᠦ ᠪᠡᠷ ᠰᠠᠭᠤᠯᠠ᠃ ᠳᠣᠯᠣᠭᠠᠨ ᠲᠠᠮᠢᠷ ᠳᠣᠷᠣᠢᠲᠠᠬᠤ ᠳ᠋ᠤ᠌ ᠶᠠᠭᠤ ᠨᠥᠯᠥᠭᠡᠯᠡᠳᠡᠭ ᠢ ᠮᠠᠷᠠᠮᠪᠠ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃
– ᠲᠥᠷᠥᠯᠬᠢ ᠶ᠋ᠢᠨ ᠭᠤᠷᠪᠠᠨ ᠡᠪᠡᠳᠴᠢᠨ ᠡᠴᠡ ᠥᠭᠡᠷᠡ ᠨᠡᠮᠡᠭᠦᠦ ᠶᠠᠭᠤᠮᠠ ᠪᠠᠢᠬᠤ ᠰᠢᠭ᠋ ᠪᠣᠢ ᠳᠠ᠃ ᠵᠠ ᠪᠠᠢᠵᠠ᠂ ᠳᠥᠷᠪᠡᠨ ᠵᠠᠭᠤᠨ ᠳᠥᠷᠪᠡᠨ ᠦᠨᠳᠦᠰᠦᠨ ᠡᠪᠡᠳᠴᠢᠨ ᠪᠣᠢ᠃ ᠮᠢᠩᠭᠠ ᠬᠣᠶᠠᠷ ᠵᠠᠭᠤᠨ ᠲᠠᠪᠢᠨ ᠳᠠᠢᠪᠤᠷᠢ ᠡᠪᠡᠳᠴᠢᠨ ᠪᠣᠢ᠃ ᠲᠡᠳᠡᠨ ᠦ᠌ ᠠᠯᠢ ᠨᠢ ᠪᠠᠢᠵᠤ ᠲᠠᠭᠠᠷᠬᠤ ᠪᠣᠢ? ᠭᠡᠵᠦ ᠮᠠᠷᠠᠮᠪᠠ ᠥᠪᠡᠷᠲᠡᠭᠡᠨ ᠶᠠᠷᠢᠵᠤ ᠪᠠᠶᠢᠯᠠ ᠪᠠᠢᠯᠠ᠃ ᠰᠠᠩᠵᠢ ᠭᠡᠰᠦᠯ ᠲᠡᠷᠡ ᠦᠭᠡ ᠶ᠋ᠢ ᠮᠥᠨ ᠯᠡ ᠲᠣᠭᠲᠠᠭᠠᠵᠤ ᠠᠪᠤᠯᠠ᠃ ᠰᠣᠨᠣᠰᠤᠭᠰᠠᠨ ᠪᠣᠯᠭᠠᠨ ᠡᠷᠳᠡᠮ ᠭᠡᠵᠦ ᠲᠡᠷᠡ ᠪᠣᠳᠣᠳᠠᠭ ᠶᠤᠮ᠃
– ᠵᠠ ᠪᠠᠢᠵᠠ᠃ ᠲᠡᠷᠡ ᠣᠯᠠᠨ ᠡᠪᠡᠳᠴᠢᠨ᠂ ᠡᠮᠭᠡᠭ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠨ ᠵᠠᠭᠤᠨ ᠨᠢᠭᠡᠨ ᠡᠪᠡᠳᠴᠢᠨ ᠴᠢᠳᠬᠥᠷ ᠰᠢᠮᠨᠤ ᠶ᠋ᠢᠨ ᠬᠣᠣᠷᠯᠠᠯ ᠠ᠋ᠴᠠ ᠡᠭᠦᠰᠳᠡᠭ᠃ ᠰᠡᠳᠬᠢᠯ ᠢ᠋ᠶ᠋ᠡᠷ ᠲᠡᠷᠡ ᠵᠠᠰᠠᠷᠠᠬᠤ ᠶᠣᠰᠣᠲᠠᠢ᠃ ᠭᠡᠲᠡᠯᠡ ᠡᠨᠡ ᠬᠤᠸᠠᠷᠠᠭ ᠲᠤ᠌ ᠭᠦᠷᠢᠮ ᠤᠩᠰᠢᠵᠤ ᠮᠡᠩᠭᠡᠨ ᠵᠠᠰᠠᠯ᠂ ᠰᠦᠨᠡᠰᠦ ᠳᠠᠭᠤᠳᠠᠬᠤ ᠬᠦᠷᠲᠡᠯᠡ ᠵᠠᠩ ᠦᠢᠯᠡ ᠬᠢᠭᠰᠡᠨ ᠭᠡᠰᠡᠨ᠃ ᠲᠡᠷᠡ ᠲᠤᠰᠠ ᠪᠣᠯᠤᠭᠠ ᠦᠭᠡᠢ᠃ ᠲᠡᠭᠡᠬᠦᠯᠡᠷ ᠴᠢᠳᠬᠥᠷ ᠦ᠋ᠨ ᠬᠣᠣᠷᠯᠠᠯ ᠪᠢᠰᠢ ᠪᠠᠢᠵᠠᠢ᠃ ᠨᠢᠭᠡᠨ ᠵᠠᠭᠤᠨ ᠨᠢᠭᠡᠨ ᠡᠪᠡᠳᠴᠢᠨ ᠢ᠋ ᠬᠣᠭᠣᠯᠠ ᠪᠠᠷ ᠵᠠᠰᠠᠯ ᠬᠢᠵᠦ ᠡᠳᠡᠭᠡᠭᠡᠨᠡ᠃ ᠡᠨᠡ ᠬᠤᠸᠠᠷᠠᠭ ᠨᠤᠮᠨᠡᠢ ᠰᠠᠬᠢᠭᠰᠠᠨ ᠪᠣᠯᠬᠣᠷ ᠬᠣᠭᠣᠯᠠᠨ ᠵᠠᠰᠠᠯ ᠶᠠᠭᠤᠨ ᠤ᠋ ᠬᠡᠷᠡᠭ᠃ ᠨᠢᠭᠡᠨ ᠵᠠᠭᠤᠨ ᠨᠢᠭᠡᠨ ᠡᠪᠡᠳᠴᠢᠨ ᡀᠠᠩᠲ᠋ᠠᠪᠴᠢᠮᠪᠠ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ ᠡᠳᠡᠭᠡᠷᠡᠳᠡᠭ ᠪᠣᠢ᠃ ᠵᠠ ᠲᠡᠷᠡ ᠯᠠ ᠠᠩᠵᠠᠭᠠᠨ ᠳᠤ ᠣᠷᠣᠯᠳᠤᠪᠠᠯ ᠶᠠᠮᠠᠷ ᠪᠣᠢ? ᠭᠡᠵᠦ ᠮᠠᠷᠠᠮᠪᠠ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷᠲᠡᠭᠡᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
– ᠴᠢᠨᠦ ᠶᠠᠭ ᠬᠠᠮᠢᠭᠠ ᠡᠪᠡᠳᠦᠭᠡᠳ ᠪᠠᠢᠨᠠ? ᠭᠡᠵᠦ ᠠᠰᠠᠭᠤᠯᠠ᠃ ᠰᠠᠩᠵᠢ ᠭᠡᠳᠡᠰᠦᠨ ᠲᠤᠰᠢᠶᠠ ᠪᠠᠨ ᠵᠢᠭᠠᠵᠤ᠄
– ᠡᠨᠡ ᠬᠠᠪᠢ ᠳ᠋ᠤ᠌ ᠪᠠᠵᠠᠯᠠᠳᠠᠭ ᠭᠡᠪᠡ᠃
– ᠠ ᠲᠡᠭᠡᠵᠦ ᠲᠠᠭᠠᠷᠠᠨᠠ᠃ ᠭᠤᠷᠪᠠᠨ ᠬᠦᠷᠳᠦᠨ ᠦ᠌ ᠳᠤᠮᠳᠠᠬᠢ ᠪᠠᠢᠵᠤ ᠳᠠ? ᠭᠡᠵᠦ ᠮᠠᠷᠠᠮᠪᠠ ᠨᠤᠬᠤᠴᠠᠲᠠᠢᠬᠠᠨ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ᠂ ᠪᠣᠰᠴᠤ ᠢᠷᠡᠭᠡᠳ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠬᠣᠳᠣᠭᠣᠳᠣᠨ ᠲᠤᠰᠢᠶᠠ ᠳᠠᠷᠤᠵᠤ ᠦᠵᠡᠭᠡᠳ᠄
– ᠡᠪᠡᠳᠴᠦ ᠪᠠᠢᠨᠠ ᠤᠤ?ᠭᠡᠪᠡ᠃
– ᠦᠭᠡᠢ᠃ ᠳᠣᠲᠣᠷᠠ ᠪᠠᠨ ᠯᠠ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃
– ᠠ ᠲᠡᠢᠮᠦ ᠤᠤ? ᠳᠤᠮᠳᠠ ᠬᠢᠷᠢ ᠳ᠋ᠦ᠍ ᠪᠠᠢᠵᠤ ᠮᠡᠳᠡᠨᠡ᠃
– ᠭᠤᠷᠪᠠᠨ ᠬᠦᠷᠳᠦ ᠭᠡᠵᠦ ᠶᠠᠭᠤ ᠶ᠋ᠢ ᠬᠡᠯᠡᠨᠡ ᠪᠣᠢ?
– ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠭᠤᠷᠪᠠᠨ ᠬᠦᠷᠳ᠋ᠦ ᠡᠷᠭᠢᠵᠦ ᠪᠠᠢᠳᠠᠭ᠃ ᠡᠬᠢᠨ ᠦ᠌ ᠬᠦᠷᠳ᠋ᠦ ᠬᠣᠭᠣᠯᠠᠢ ᠡᠴᠡ ᠳᠡᠭᠡᠭᠰᠢ᠂ ᠳᠤᠮᠳᠠ ᠬᠦᠷᠳ᠋ᠦ ᠭᠡᠳᠡᠰᠦ ᠬᠣᠳᠣᠭᠣᠳᠣ ᠬᠦᠢᠰᠦ ᠣᠷᠴᠢᠮ᠂ ᠳᠤᠤᠷᠠᠳᠤ ᠬᠦᠷᠳᠦ ᠲᠡᠭᠦᠨ ᠡᠴᠡ ᠳᠣᠲᠣᠭᠰᠢ ᠡᠷᠭᠢᠯᠳᠦᠵᠦ ᠪᠠᠢᠳᠠᠭ᠃ ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠᠨ ᠬᠠᠭᠤᠷᠠᠢ ᠪᠣᠯᠤᠭᠠᠳ ᠴᠢᠰᠤᠨ ᠰᠤᠳᠠᠰᠤ ᠡᠨᠡ ᠭᠤᠷᠪᠠᠨ ᠬᠦᠷᠳᠦᠨ ᠳ᠋ᠦ᠍ ᠵᠠᠩᠭᠢᠯᠠᠭᠳᠠᠭᠰᠠᠨ ᠪᠠᠢᠳᠠᠭ ᠶᠤᠮ᠃ ᠪᠠᠰᠠ ᠭᠣᠣᠯ ᠴᠢᠰᠤ ᠵᠥᠭᠡᠭᠡᠭᠴᠢ ᠠᠷᠪᠠᠨ ᠬᠣᠶᠠᠷ ᠰᠤᠳᠠᠰᠤ ᠪᠣᠢ᠃ ᠲᠡᠷᠡ ᠭᠤᠷᠪᠠᠨ ᠬᠦᠷᠳᠦᠨ ᠦ᠌ ᠠᠯᠢ ᠨᠢᠭᠡ ᠨᠢ ᠵᠣᠭᠰᠣᠪᠠᠯ ᠡᠪᠡᠳᠴᠢᠨ ᠬᠦᠷᠦᠨᠡ᠃ ᠡᠳᠡᠭᠡᠬᠦ ᠳ᠋ᠦ᠍ ᠪᠠᠰᠠ ᠪᠡᠷᠬᠡ᠃ ᠶᠡᠷᠦ ᠨᠢ ᠬᠡᠵᠢᠶᠡ ᠴᠦ᠍᠂ ᠶᠠᠭᠠᠬᠢᠪᠠᠴᠤ ᠡᠳᠡᠭᠡᠷᠡᠰᠢ ᠦᠭᠡᠢ ᠡᠪᠡᠳᠴᠢᠨ ᠨᠢᠭᠡᠨ ᠵᠠᠭᠤᠨ ᠨᠢᠭᠡ ᠪᠤᠢ ᠭᠡᠳᠡᠭ᠃ ᠴᠢᠮᠠ ᠳ᠋ᠤ᠌ ᠡᠢᠮᠦ ᠵᠠᠯᠠᠭᠤ ᠬᠥᠮᠦᠨ ᠳ᠋ᠦ᠍ ᠡᠳᠡᠭᠡᠷᠡᠰᠢ ᠦᠭᠡᠢ ᠵᠠᠭᠤᠨ ᠨᠡᠷᠡ ᠶ᠋ᠢᠨ ᠠᠯᠢ ᠨᠢᠭᠡ ᠲᠤᠰᠤᠭᠰᠠᠨ ᠪᠠᠢᠵᠤ ᠶᠠᠭᠠᠬᠢᠪᠠᠴᠤ ᠲᠠᠭᠠᠷᠠᠬᠤ ᠦᠭᠡᠢ ᠭᠡᠵᠦ ᠮᠠᠷᠠᠮᠪᠠ ᠶᠠᠷᠢᠯᠠ᠃ ᠲᠡᠭᠡᠭᠡᠳ ᠰᠠᠩᠵᠢ ᠭᠡᠰᠦᠯ ᠦᠨ ᠬᠦᠢᠰᠦᠨ ᠳᠡᠭᠡᠷᠡ ᠳᠠᠷᠤᠵᠤ᠂ ᠠᠯᠠᠭᠠ ᠪᠠᠨ ᠡᠷᠭᠢᠭᠦᠯᠦᠨ ᠢᠯᠠᠵᠤ ᠬᠡᠰᠡᠭ ᠴᠢᠩᠨᠠᠯᠠ᠃ ᠰᠠᠩᠵᠢ ᠳ᠋ᠤ᠌ ᠶᠠᠭᠤ ᠴᠦ᠍ ᠮᠡᠳᠡᠷᠡᠭᠳᠡᠭᠰᠡᠨ ᠦᠭᠡᠢ᠃
– ᠵᠠ ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠳᠤᠮᠳᠠ ᠬᠦᠷᠳᠦᠨ ᠦ᠌ ᠬᠠᠪᠢ ᠳ᠋ᠤ᠌ ᠭᠠᠵᠢᠭ ᠭᠠᠷᠴᠢᠬᠠᠭᠰᠠᠨ ᠪᠣᠯᠤᠯᠲᠠᠢ᠃ ᠬᠦᠴᠦ ᠪᠡᠷ ᠢᠳᠡᠭᠴᠢ ᠶ᠋ᠢᠨ ᠲᠥᠷᠥᠯ ᠦ᠋ᠨ ᠬᠡᠳᠦᠨ ᠲᠤᠩ ᠡᠮ ᠥᠭᠭᠦᠭᠡᠳ ᠦᠵᠡᠶᠡ᠃ ᠲᠡᠷᠡ ᠬᠦᠷᠳ᠋ᠦ ᠰᠤᠯᠠᠷᠠᠭᠰᠠᠨ ᠪᠣᠯ ᠠᠶᠠᠨᠳᠠᠭᠠᠨ ᠬᠥᠯᠥᠰᠥ ᠴᠢᠨᠢ ᠴᠢᠬᠠᠷᠠᠵᠤ ᠪᠡᠷᠬᠡ ᠪᠣᠯᠤᠨᠠ᠃ ᠲᠡᠷᠡ ᠭᠦᠷᠳ᠋ᠦ ᠶᠡᠷᠦ ᠶ᠋ᠢᠨ ᠪᠠᠢᠭᠠ ᠪᠣᠯ ᠶᠠᠭᠤ ᠴᠤ᠌ ᠮᠡᠳᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠢᠳᠬᠠᠨ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠮᠠᠩᠬᠠᠭ ᠢᠶᠠᠨ ᠠᠭᠤᠳᠠᠯᠠᠵᠤ ᠪᠣᠷᠣ ᠴᠠᠭᠠᠰᠤᠨ ᠳ᠋ᠤ᠌ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠵᠤ ᠢᠷᠡᠭᠡᠳ ᠲᠤᠩ ᠤ᠋ᠨ ᠬᠠᠯᠪᠠᠭᠠ ᠪᠠᠷ ᠨᠢᠭᠡ ᠬᠣᠶᠠᠷ ᠬᠤᠳᠬᠤᠨ ᠠᠶᠠᠭᠠᠨ ᠳ᠋ᠤ᠌ ᠬᠢᠵᠦ᠂ ᠱᠥᠯᠥ ᠪᠡᠷ ᠳᠠᠷᠤᠭᠤᠯᠵᠤ ᠤᠤᠭᠤᠬᠤ ᠶ᠋ᠢ ᠵᠢᠭᠠᠪᠤᠷᠢᠯᠠᠪᠠ᠃
ᠮᠠᠷᠠᠮᠪᠠ ᠡᠮ ᠢᠶᠡᠨ ᠤᠤᠭᠤᠯᠭᠠᠵᠤ ᠬᠣᠢᠨᠠ ᠠ᠋ᠴᠠ ᠨᠢ ᠱᠥᠯᠥ ᠪᠡᠷ ᠳᠠᠷᠤᠭᠤᠯᠪᠠ᠃ ᠥᠴᠥᠭᠡᠳᠦᠷ ᠦᠨ ᠬᠣᠭᠣᠯᠠᠨ ᠤ᠋ ᠱᠥᠯᠥ ᠲᠤᠯᠠ ᠪᠠᠭᠠᠬᠠᠨ ᠬᠠᠯᠠᠭᠠᠵᠤ ᠥᠭᠪᠡ᠃
– ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠪᠠᠢᠴᠠ ᠶ᠋ᠢ ᠨᠢ ᠬᠠᠷᠠᠶᠠ᠃ ᠮᠠᠷᠭᠠᠰᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠦᠵᠡᠶᠡ᠃ ᠲᠡᠷᠡ ᠲᠠᠢ ᠲᠡᠷᠡ ᠦᠭᠡᠢ ᠰᠡᠭᠦᠯᠴᠢ ᠶ᠋ᠢᠨ ᠨᠠᠢᠳᠠᠯᠭᠠ ᠬᠠᠢᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠠᠷᠠᠬᠤ ᠶᠠᠭᠤ ᠪᠠᠢᠨᠠ ᠭᠡᠵᠦ ᠮᠠᠷᠠᠮᠪᠠ ᠬᠡᠯᠡᠭᠡᠳ ᠪᠣᠰᠴᠤ ᠶᠠᠪᠤᠪᠠ᠃ ᠳᠠᠬᠢᠭᠠᠳ ᠯᠠ ᠰᠠᠩᠵᠢ ᠭᠡᠰᠦᠯ ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠢ᠋ᠶ᠋ᠠᠨ ᠬᠠᠷᠠᠩᠭᠤᠢ ᠠᠯᠤᠰ ᠢ᠋ ᠰᠢᠷᠲᠡᠨ ᠭᠠᠪ ᠭᠠᠭᠴᠠᠭᠠᠷ ᠦᠯᠡᠳᠡᠪᠡ᠃ ᠠᠯᠤᠰ ᠬᠣᠯᠠ ᠶ᠋ᠢᠨ ᠰᠦᠷᠯᠢᠭ ᠠᠭᠤᠯᠠᠰ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠬᠠᠷᠠ ᠠᠵᠢᠷᠭᠠ ᠶᠢᠨ ᠨᠢᠷᠤᠭᠤ ᠰᠦᠨᠳᠡᠷᠯᠡᠨ ᠴᠡᠩᠬᠡᠷᠯᠡᠵᠦ ᠳᠠᠭᠤᠳᠠᠨ ᠳᠠᠯᠠᠯᠬᠤ ᠰᠢᠭ᠋ ᠪᠣᠯᠵᠤ ᠨᠢᠯᠪᠤᠰᠤ ᠨᠢ ᠪᠥᠮᠪᠥᠷᠢᠯᠡ᠃
᠁ ᠮᠠᠷᠭᠠᠰᠢ ᠨᠢ ᠮᠠᠷᠠᠮᠪᠠ ᠳᠠᠬᠢᠭᠠᠳ ᠯᠠ ᠢᠷᠡᠵᠦ ᠰᠤᠳᠠᠰᠤ ᠪᠠᠷᠢᠪᠠ᠃ ᠳᠠᠬᠢᠭᠠᠳ ᠯᠠ᠄
– ᠺᠠᠢᠪ ᠵᠤᠨᠠᠢ ᠶ᠋ᠢᠨ ᠲᠠᠶᠢᠭ ᠲᠤ᠌ ᠰᠤᠳᠠᠰᠤᠨ ᠤ᠋ ᠴᠣᠬᠢᠯᠲᠠ ᠲᠠᠪᠢᠨ ᠨᠠᠢ᠍ᠮᠠᠨ ᠶᠠᠩᠵᠤ ᠭᠡᠰᠡᠨ ᠪᠢᠯᠡ᠃ ᠬᠥᠮᠦᠨ ᠦ᠌ ᠨᠢᠭᠡᠨ ᠠᠮᠢᠰᠬᠤᠭᠠᠨ ᠤ᠋ ᠬᠣᠭᠣᠷᠣᠨᠳᠣ ᠲᠠᠪᠤᠨ ᠤᠳᠠᠭᠠ ᠰᠤᠳᠠᠰᠤ ᠯᠤᠭᠰᠢᠨᠠ ᠭᠡᠳᠡᠭ ᠪᠢᠯᠡ ᠭᠡᠵᠦ ᠲᠡᠷᠡ ᠠᠮᠠᠨ ᠳ᠋ᠠᠭᠠᠨ ᠶᠠᠷᠢᠪᠠ᠃《ᠴᠢᠰᠤ ᠰᠡᠯᠭᠦᠬᠦ ᠪᠣᠯᠤᠨ ᠬᠠᠭᠤᠷᠠᠢ ᠰᠤᠳᠠᠰᠤ ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠ ᠪᠢᠯᠡ᠃ ᠲᠡᠭᠦᠨ ᠡᠴᠡ ᠠᠯᠢᠨ ᠳ᠋ᠤ᠌ ᠨᠢ ᠵᠡᠳᠬᠡᠷ ᠣᠷᠣᠵᠤ ᠪᠣᠢ》 ᠭᠡᠵᠦ ᠲᠡᠷᠡ ᠪᠠᠰᠠ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃《ᠬᠡᠷᠪᠡ ᠡᠨᠡ ᠮᠠᠷᠠᠮᠪᠠ ᠳ᠋ᠤ᠌ ᠨᠢᠭᠡ ᠰᠠᠷᠠ ᠣᠷᠴᠢᠮ ᠬᠤᠭᠤᠴᠠᠭᠠ ᠪᠠᠷ ᠠᠨᠠᠭᠠᠯᠭᠠᠪᠠᠯ ᠣᠲᠠᠴᠢ ᠶ᠋ᠢᠨ ᠤᠬᠠᠭᠠᠨ ᠰᠤᠷᠴᠤ ᠪᠣᠯᠬᠤ ᠶᠤᠮ ᠪᠠᠢᠨᠠ᠃ ᠳᠠᠩᠴᠤ ᠪᠡᠶᠡ ᠮᠠᠭᠤᠳᠠᠭᠠᠳ ᠭᠣᠷᠢ ᠦᠭᠡᠢ 》ᠭᠡᠵᠦ ᠭᠡᠰᠦᠯ ᠪᠣᠳᠣᠯᠠ᠃
– ᠵᠠ᠂ ᠬᠦ᠌ ᠴᠢᠨᠦ ᠲᠠᠪᠤᠨ ᠴᠤᠯᠤ ᠶ᠋ᠢᠨ ᠨᠢᠭᠡᠨ ᠨᠢ ᠰᠤᠯᠠᠳᠠᠭᠰᠠᠨ ᠶᠤᠮ ᠪᠣᠯᠪᠠ ᠤᠤ ᠳᠠ᠃ ᠲᠡᠢᠮᠦ ᠠᠪᠠᠰᠤ ᠡᠯᠢᠭᠡᠯᠡᠵᠦ ᠦᠵᠡᠬᠦ ᠦᠭᠡᠢ ᠪᠣᠯ ᠭᠣᠷᠢ ᠦᠭᠡᠢ ᠪᠠᠢᠬᠤ ᠪᠠᠨ ᠭᠡᠵᠦ ᠮᠠᠷᠠᠮᠪᠠ ᠳᠠᠬᠢᠭᠠᠳ ᠯᠠ ᠶᠠᠷᠢᠪᠠ᠃ ᠲᠠᠪᠤᠨ ᠴᠤᠯᠤ ᠭᠡᠵᠦ ᠶᠠᠭᠤ ᠶ᠋ᠢ ᠬᠡᠯᠡᠵᠦ ᠪᠠᠢᠭᠠ ᠶ᠋ᠢ ᠭᠡᠰᠦᠯ ᠭᠠᠳᠠᠷᠯᠠᠵᠤ 《ᠮᠠᠭᠤᠳᠠᠭᠰᠠᠨ ᠪᠣᠯ ᠡᠯᠢᠭᠡ ᠯᠠ ᠪᠠᠢᠬᠤ ᠳᠠ᠃ ᠲᠡᠷᠡ ᠲᠤᠰᠢᠶᠠ ᠯᠠ ᠡᠪ ᠦᠭᠡᠢᠷᠬᠡᠭᠡᠳ ᠪᠠᠢᠨᠠ》 ᠭᠡᠵᠦ ᠪᠣᠳᠣᠪᠠ᠃
– ᠲᠠᠪᠤᠨ ᠴᠤᠯᠤ ᠪᠣᠯᠪᠠᠰᠤ ᠵᠢᠷᠦᠬᠡ᠂ ᠡᠯᠢᠭᠡ᠂ ᠠᠭᠤᠰᠬᠢ᠂ ᠪᠥᠭᠡᠷᠡ᠂ ᠳᠡᠯᠢᠭᠦᠦ ᠡᠨᠡ ᠬᠡᠳᠦ ᠪᠢᠯᠡ᠃ ᠵᠢᠷᠦᠬᠡ ᠲᠡᠶᠢᠮᠦ ᠴᠦ᠍ ᠠᠮᠠᠷ ᠰᠤᠯᠠᠳᠠᠬᠤ ᠦᠭᠡᠢ᠃ ᠬᠠᠷᠢᠨ ᠪᠥᠭᠡᠷᠡ᠂ ᠡᠯᠢᠭᠡ ᠬᠣᠶᠠᠷ ᠬᠡᠪᠡᠷᠡᠭ ᠭᠠᠢᠬᠠᠯ ᠶᠤᠮ ᠳ᠋ᠠᠭ᠃ ᠱᠠᠵᠤᠤᠲ ᠶᠤᠮ ᠤᠤ ᠵᠠᠵᠤᠤᠲ ᠲᠦ᠍ ᠦᠵᠡᠳᠡᠭ ᠬᠡᠷᠡᠭ ᠭᠡᠵᠦ ᠮᠠᠷᠠᠮᠪᠠ ᠳᠠᠬᠢᠨ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠪᠠ᠃ ᠱᠠᠵᠤᠤᠲ ᠲᠦ᠍ ᠪᠣᠯ ᠪᠡᠶᠡ ᠡᠷᠬᠡᠲᠡᠨ ᠰᠢᠨᠵᠢᠬᠦ᠂ ᠵᠠᠵᠤᠤᠲ ᠲᠦ᠍ ᠪᠣᠯ ᠡᠮᠭᠡᠭ ᠰᠤᠳᠤᠯᠬᠤ ᠤᠬᠠᠭᠠᠨ ᠶᠤᠮ᠃ ᠮᠥᠨ ᠮᠠᠨᠠᠵᠣᠤᠲ ᠪᠤᠶᠤ ᠶᠠᠰᠤ ᠪᠠᠷᠢᠬᠤ᠂ ᠴᠢᠮᠡᠶᠢᠵᠢᠲ ᠪᠤᠶᠤ ᠡᠮ ᠪᠠᠷᠢᠬᠤ᠂ ᡀᠠᠨᠭᠲ᠋ᠠᠪᠴᠢᠮᠪᠠ ᠪᠤᠶᠤ ᠳᠣᠲᠣᠷᠠ ᠶ᠋ᠢᠨ ᠡᠷᠬᠡᠲᠡᠨ ᠠᠨᠠᠭᠠᠬᠤ ᠡᠢᠮᠦ ᠲᠠᠪᠤᠨ ᠠᠢᠮᠠᠭ ᠲᠤ ᠰᠠᠪᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠣᠲᠠᠴᠢ ᠶ᠋ᠢᠨ ᠡᠷᠳᠡᠮ ᠪᠦᠷᠢᠳᠳᠡᠭ ᠪᠠᠢᠯᠠ᠃ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠡᠳᠡᠭᠡᠷ ᠢ᠋ ᠮᠡᠳᠡᠬᠦ ᠪᠣᠯᠪᠠᠴᠤ ᠡᠮ ᠪᠠᠷᠢᠬᠤ ᠶ᠋ᠢᠨ ᠤᠬᠠᠭᠠᠨ ᠢ᠋ ᠭᠣᠣᠯᠴᠢᠯᠠᠨ ᠲᠡᠩᠨᠡᠵᠡᠢ᠃ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ
– ᠨᠢᠭᠡ ᠡᠮ ᠥᠭᠭᠦᠭᠡᠳ ᠶᠠᠪᠤᠨᠠ᠃ ᠥᠨᠥᠳᠥᠷ ᠲᠦ᠍ ᠪᠡᠨ ᠬᠠᠷᠠᠭᠠᠳ ᠪᠣᠯᠬᠤ ᠦᠭᠡᠢ ᠪᠣᠯ ᠡᠯᠢᠭᠡᠯᠡᠨᠡ᠃ ᠴᠢᠮᠠ ᠳᠤ ᠢᠮᠠᠭᠠ ᠬᠤᠳᠠᠯᠳᠤᠵᠤ ᠠᠪᠬᠤ ᠮᠥᠩᠭᠥ ᠪᠣᠢ ᠤᠤ? ᠭᠡᠵᠦ ᠰᠠᠩᠵᠢ ᠠ᠋ᠴᠠ ᠠᠰᠠᠭᠤᠬᠤ ᠳ᠋ᠤ᠌ ᠭᠡᠰᠦᠯ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃
– ᠨᠠᠳᠠ ᠪᠠᠰᠠ ᠮᠥᠩᠭᠥ ᠶᠠᠭᠤ ᠪᠠᠵᠠᠭᠠᠬᠤ ᠪᠢᠯᠡ᠃ ᠡᠯᠢᠭᠡᠯᠡᠬᠦ ᠳ᠋ᠦ᠍ ᠵᠠᠪᠠᠯ ᠠᠮᠢᠳᠤ ᠢᠮᠠᠭᠠ ᠶᠤᠮ ᠤᠤ ᠬᠣᠨᠢ ᠬᠡᠷᠡᠭᠲᠡᠢ᠃ ᠵᠠ ᠴᠢ ᠤᠬᠠᠭᠠᠨ ᠰᠡᠢᠯᠵᠦ ᠪᠠᠢᠭᠠᠷᠠᠢ᠃ ᠬᠠᠯᠬᠠ ᠮᠢᠴᠠᠩ ᠳ᠋ᠤ᠌ ᠴᠢᠮᠠ ᠳᠤ ᠲᠠᠨᠢᠯ ᠪᠠᠢᠬᠤ ᠦᠭᠡᠢ ᠶᠦᠮ ᠦᠦ? ᠭᠡᠵᠦ ᠮᠠᠷᠠᠮᠪᠠ ᠯᠠᠪᠯᠠᠪᠠ᠃ ᠰᠠᠩᠵᠢ᠄
– ᠪᠠᠷᠤᠭ ᠪᠠᠢᠬᠤ ᠦᠭᠡᠢ᠃ ᠬᠠᠷᠢᠨ ᠮᠠᠨ ᠤ᠋ ᠵᠢᠩᠳᠠᠭᠠᠨ ᠤ ᠮᠣᠩᠭᠣᠯ᠂ ᠲᠣᠷᠭᠤᠳ ᠨᠡᠷ ᠲᠦ᠍ ᠲᠠᠨᠢᠯ ᠪᠠᠶᠢᠵᠤ ᠮᠠᠭᠠᠳ ᠦᠭᠡᠢ᠃ ᠲᠡᠳᠡᠨ ᠢ᠋ ᠢᠷᠡᠬᠦ ᠪᠡᠷ ᠪᠢ ᠭᠤᠶᠤᠭᠠ ᠭᠡᠪᠡ᠃
– ᠯᠠᠭᠰᠣᠣ! ᠯᠠᠭᠰᠣᠣ! ᠵᠠ ᠡᠭᠦᠨ ᠢ᠋ ᠤᠤᠭᠤᠴᠢᠬᠠ! ᠨᠥᠭᠡᠨᠡ ᠣᠷᠣᠰᠢᠭᠴᠢ ᠠ᠋ᠴᠠ ᠵᠠᠯᠠᠭᠰᠠᠨ ᠡᠮ! ᠭᠡᠵᠦ ᠫᠦᠷᠪᠦᠳᠣᠨᠣᠢ ᠬᠡᠯᠡᠭᠡᠳ ᠮᠠᠩᠬᠠᠭ ᠢ᠋ᠶ᠋ᠠᠨ ᠠᠭᠤᠳᠠᠯᠤᠨ ᠡᠮ ᠬᠠᠢᠬᠤ ᠵᠠᠭᠤᠷᠠ ᠪᠠᠰᠠ ᠯᠠ ᠭᠠᠭᠴᠠᠭᠠᠷ ᠶᠠᠷᠢᠭᠰᠠᠨ ᠨᠢ᠄
– ᠴᠢᠮᠠ ᠳ᠋ᠤ᠌ ᠪᠢ ᠥᠴᠥᠭᠡᠳᠦᠷ ᠬᠦᠴᠦ ᠪᠡᠷ ᠢᠳᠡᠭᠴᠢᠳ ᠡᠴᠡ ᠠᠪᠤᠭᠰᠠᠨ ᠡᠮ ᠥᠭᠭᠦᠭᠰᠡᠨ᠃ ᠡᠳᠡᠭᠡᠷᠡᠭᠰᠡᠨ ᠦᠭᠡᠢ᠃ ᠭᠡᠪᠡᠴᠦ ᠬᠣᠭᠣᠰᠣᠨ ᠪᠢᠰᠢ᠃ ᠴᠢᠨᠦ ᠤᠬᠠᠭᠠᠨ ᠳᠡᠭᠡᠷᠡᠳᠡᠵᠡᠢ᠃ ᠥᠨᠥᠳᠥᠷ ᠨᠥᠭᠡᠨᠡ ᠣᠷᠣᠰᠢᠭᠴᠢᠳ ᠠ᠋ᠴᠠ ᠵᠠᠯᠠᠭᠰᠠᠨ ᠡᠮ ᠥᠭᠭᠦᠨᠡ ᠭᠡᠬᠦ ᠳ᠋ᠦ᠍ ᠰᠠᠩᠵᠢ᠄
– ᠨᠥᠭᠡᠨᠡ ᠣᠷᠣᠰᠢᠭᠴᠢᠳ ᠠ᠋ᠴᠠ ᠵᠠᠯᠠᠭᠰᠠᠨ ᠭᠡᠵᠦ ᠶᠠᠭᠤᠨ ᠡᠮ ᠪᠣᠢ? ᠭᠡᠪᠡᠯ ᠮᠠᠷᠠᠮᠪᠠ᠄
– ᠨᠢᠭᠡ ᠡᠮ ᠨᠠᠢᠷᠠᠭᠤᠯᠬᠤ ᠳ᠋ᠤ᠌ ᠵᠢᠷᠠᠭᠠᠳ ᠬᠣᠯᠢᠴᠠ ᠣᠷᠣᠨᠠ᠃ ᠤᠷᠳᠤᠨ ᠤ ᠪᠦᠬᠦᠢᠯᠡ ᠪᠡᠶᠡ ᠮᠠᠬᠠᠪᠣᠳ ᠢ᠋ ᠣᠷᠣᠯᠴᠠᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠡᠮ ᠦ᠋ᠨ ᠴᠢᠨᠠᠷ ᠲᠠᠢ ᠶᠠᠭᠤᠮᠠ ᠶᠡᠷᠦ ᠳ᠋ᠡᠭᠡᠨ ᠵᠢᠷᠭᠤᠭᠠᠨ ᠵᠠᠭᠤᠨ ᠠᠷᠪᠠᠨ ᠬᠣᠶᠠᠷ ᠶᠠᠩᠵᠤ ᠪᠣᠢ᠃ ᠲᠡᠭᠦᠨ ᠡᠴᠡ᠂ ᠵᠢᠱ᠌ᠢᠶᠡᠯᠡᠪᠡᠯ᠂
– ᠴᠢᠯᠠᠭᠤᠨ ᠤ᠋ ᠲᠥᠷᠥᠯ 34 ᠪᠣᠢ
– ᠰᠢᠷᠤᠢ ᠶᠢᠨ ᠵᠦᠢᠯ 12
– ᠳᠠᠪᠤᠰᠤ ᠱᠡᠦ ᠬᠤᠵᠢᠷ ᠤ᠋ᠨ ᠶᠠᠭᠤᠮᠠ 110
– ᠡᠪᠡᠰᠦᠨ ᠡᠮ 133
– ᠵᠢᠭᠦᠷᠲᠡᠨ ᠡᠴᠡ 17
– ᠬᠢᠮᠤᠰᠤᠲᠤ ᠠᠷᠢᠶᠠᠲᠠᠨ ᠠ᠋ᠴᠠ 13
– ᠬᠦᠴᠢ ᠪᠡᠷ ᠢᠳᠡᠭᠴᠢ ᠡᠴᠡ 11
– ᠬᠥᠮᠦᠨ ᠡᠵᠡᠯᠡᠭᠰᠡᠨ ᠡᠴᠡ 12
– ᠨᠥᠭᠡᠨᠡ ᠣᠷᠣᠰᠢᠭᠴᠢ ᠠ᠋ᠴᠠ 10
– ᠨᠣᠢᠲᠠᠨ ᠤ᠋ ᠠᠢᠮᠠᠭ ᠠ᠋ᠴᠠ 8
– ᠪᠤᠰᠤᠳ ᠠᠮᠢᠲᠠᠨ ᠠ᠋ᠴᠠ 100 ᠵᠦᠢᠯ ᠡᠮ ᠦ᠋ᠨ ᠶᠠᠭᠤᠮᠠᠰ ᠠᠪᠳᠠᠭ ᠪᠣᠯᠤᠨᠠ ᠭᠡᠵᠦ ᠶᠠᠷᠢᠪᠠ᠃
– ᠶᠠᠭᠠᠬᠢᠭ᠌ᠰᠠᠨ ᠰᠣᠨᠢᠨ ᠶᠠᠭᠤᠮᠠ ᠪᠣᠢ? ᠲᠠ ᠶᠠᠭᠠᠬᠢᠭ᠌ᠰᠠᠨ ᠶᠡᠬᠡ ᠶ᠋ᠢ ᠮᠡᠳᠡᠨᠡ ᠪᠣᠢ? ᠬᠦᠴᠦ ᠪᠡᠷ ᠢᠳᠡᠭᠴᠢ᠂ ᠬᠥᠮᠥᠨ ᠡᠵᠡᠯᠡᠭᠰᠡᠨ᠂ ᠨᠥᠭᠡᠨᠡ ᠣᠷᠣᠰᠢᠭᠴᠢ ᠭᠡᠵᠦ ᠶᠠᠭᠤ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ ? ᠭᠡᠮᠡᠨ ᠰᠠᠩᠵᠢ ᠠᠰᠠᠭᠤᠯᠠ᠃ ᠫᠦᠷᠪᠦᠳᠣᠨᠣᠢ ᠪᠠᠶᠠᠷᠯᠠᠨ᠄
– ᠦᠭᠡᠢ ᠶᠡᠷᠦ᠂ ᠠᠮᠢ ᠨᠠᠭᠠᠨᠠ᠂ ᠲᠠᠮᠤ ᠴᠠᠭᠠᠨᠠ ᠪᠠᠢᠵᠤ ᠪᠠᠢᠵᠤ ᠪᠠᠰᠠ ᠰᠣᠨᠢᠭᠤᠴᠢ ᠡᠷᠡ ᠡ ᠴᠢ᠃ ᠵᠥᠪ᠂ ᠪᠤᠷᠬᠠᠨ ᠪᠠᠭᠰᠢ ᠮᠠᠷᠭᠠᠰᠢ ᠦᠬᠦᠬᠦ ᠪᠡᠨ ᠮᠡᠳᠡᠵᠦ ᠪᠠᠢᠪᠠᠴᠤ ᠥᠨᠥ ᠰᠤᠷ ᠭᠡᠵᠦ ᠠᠢᠯᠠᠳᠤᠭᠰᠠᠨ ᠶᠤᠮ!ᠴᠢ ᠤᠤᠯ ᠨᠢ ᠡᠳᠡᠭᠡᠷᠡᠪᠡᠯ ᠬᠡᠷᠡᠭᠲᠡᠢ ᠰᠣᠨᠢᠭᠤᠴᠢ ᠬᠥᠮᠥᠨ ᠶᠦᠮ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠄
– ᠴᠢ ᠰᠣᠨᠣᠰ! ᠬᠦᠴᠦ ᠪᠡᠷ ᠢᠳᠡᠭᠴᠢ ᠭᠡᠳᠡᠭ ᠪᠣᠯ ᠴᠢᠨᠣᠠ᠂ ᠨᠣᠬᠠᠢ᠂ ᠴᠥᠭᠡᠪᠦᠷᠢ ᠮᠡᠲᠦᠰ ᠪᠣᠯᠤᠨᠠ᠃ ᠬᠥᠮᠦᠨ ᠡᠵᠡᠯᠡᠭᠰᠡᠨ ᠭᠡᠳᠡᠭ ᠴᠢᠨᠢ ᠭᠡᠷ ᠦ᠋ᠨ ᠲᠡᠵᠢᠭᠡᠪᠦᠷᠢ ᠠᠮᠢᠲᠠᠳ ᠢ᠋ ᠬᠡᠯᠡᠨᠡ᠃ ᠨᠥᠭᠡᠨᠡ ᠣᠷᠣᠰᠢᠭᠴᠢ ᠨᠢ ᠵᠤᠷᠠᠮᠠ᠂ ᠲᠠᠷᠪᠠᠭᠠ᠂ ᠥᠳᠥ ᠬᠣᠷᠣᠬᠠᠢ ᠪᠢᠰᠢ ᠦᠦ᠃ ᠵᠠ ᠴᠢᠮᠠ ᠳ᠋ᠤ᠌ ᠴᠥᠮ ᠢ᠋ ᠶᠠᠷᠢᠬᠤ ᠵᠠᠪ ᠠᠯᠠᠭᠠ᠂ ᠪᠢ ᠶᠠᠪᠤᠶᠠ ᠳᠠ ᠭᠡᠪᠡ᠃
– ᠪᠠᠭᠰᠢ ᠮᠠᠷᠠᠮᠪᠠ ᠡ᠂ ᠲᠠ ᠨᠠᠮᠠᠶ᠋ᠢ ᠡᠳᠡᠭᠡᠷᠡᠬᠦ ᠳ᠋ᠦ᠍ ᠨᠠᠳᠠ ᠳ᠋ᠤ᠌ ᠡᠨᠡ ᠣᠲᠠᠴᠢ ᠶ᠋ᠢᠨ ᠤᠬᠠᠭᠠᠨ ᠢ᠋ ᠵᠢᠭᠠᠵᠤ ᠥᠭᠬᠦ ᠠᠵᠢᠶᠠᠮᠤ? ᠭᠡᠵᠦ ᠰᠠᠩᠵᠢ ᠳᠣᠷᠣᠢ ᠳᠠᠭᠤ ᠪᠠᠷ ᠭᠤᠶᠤᠯᠠ᠃ ᠫᠦᠷᠪᠦᠳᠣᠨᠣᠢ᠄
– ᠠᠮᠠᠨ ᠤ᠋ ᠪᠡᠯᠭᠡ ᠭᠡᠵᠦ᠂ ᠴᠢ ᠴᠢᠨᠢ ᠣᠪᠣᠭᠠ ᠥᠭᠡᠳᠡᠷᠡᠭ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠶᠦᠮ᠃ ᠡᠳᠡᠭᠡᠷᠡᠪᠡᠯ ᠪᠢ ᠴᠢᠨᠦ ᠭᠡᠷ ᠦ᠋ᠨ ᠪᠠᠭᠰᠢ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠶᠠ ᠬᠡᠮᠡᠪᠡ᠃
᠁ ᠦᠳᠡ ᠡᠴᠡ ᠬᠣᠢᠰᠢ ᠲᠠᠪᠤᠨ ᠴᠤᠯᠤ ᠶ᠋ᠢ ᠰᠢᠨᠵᠢᠬᠦ ᠡᠯᠢᠭᠡᠯᠡᠬᠦ ᠳᠣᠮ ᠬᠢᠬᠦ ᠪᠡᠷ ᠪᠣᠯᠵᠠᠢ᠃ ᠰᠠᠩᠵᠢ ᠭᠡᠰᠦᠯ ᠪᠡᠶᠡ ᠪᠡᠨ ᠴᠢᠩᠨᠠᠨ ᠬᠡᠪᠲᠡᠬᠦ ᠳ᠋ᠡᠭᠡᠨ ᠶᠢᠷᠲᠢᠨᠴᠦ ᠶ᠋ᠢᠨ ᠲᠤᠬᠠᠢ ᠪᠢᠰᠢᠯᠭᠠᠨ ᠪᠣᠳᠣᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠪᠤᠷᠬᠠᠨ ᠤ᠋ ᠨᠣᠮ ᠰᠤᠷᠬᠤ ᠭᠡᠵᠦ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠢᠷᠡᠭᠡᠳ ᠲᠡᠷᠡ ᠬᠦᠰᠡᠯ ᠳ᠋ᠡᠭᠡᠨ ᠬᠥᠷᠥᠯ ᠦᠭᠡᠢ ᠵᠠᠩᠴᠢ ᠠᠷᠠᠯᠵᠢᠪᠠᠯ ᠬᠤᠸᠠᠷᠠᠭ ᠪᠣᠯᠤᠭᠰᠠᠨ ᠬᠡᠷᠡᠭ ᠶᠠᠭᠤ ᠪᠢᠯᠡ ᠭᠡᠵᠦ ᠳᠠᠬᠢᠭᠠᠳ ᠯᠠ ᠬᠠᠷᠠᠮᠰᠠᠨ ᠪᠣᠳᠣᠯᠠ᠃ ᠯᠠᠮᠠ ᠬᠥᠮᠦᠨ ᠨᠠᠰᠤᠨ ᠡᠴᠦᠰ ᠪᠣᠯᠬᠤ ᠶ᠋ᠢ ᠵᠠᠩᠴᠢ ᠠᠷᠠᠯᠵᠢᠨᠠ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ ᠲᠡᠷᠡ ᠲᠣᠭᠲᠠᠭᠠᠵᠤ ᠠᠪᠴᠠᠢ᠃ ᠥᠪᠡᠷ ᠢ᠋ ᠪᠡᠨ ᠠᠪᠤᠷᠠᠬᠤ ᠲᠤᠬᠠᠢ ᠣᠯᠠᠨ ᠶᠠᠭᠤᠮᠠ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠪᠠ᠃ ᠨᠢᠭᠡᠨ ᠵᠠᠭᠤᠨ ᠨᠢᠭᠡᠨ ᠡᠪᠡᠳᠴᠢᠨ ᠣᠭᠲᠣ ᠦᠯᠦ ᠡᠳᠡᠭᠡᠷᠡᠳᠡᠭ ᠭᠡᠵᠦ ᠬᠡᠯᠡᠭᠰᠡᠨ᠂ ᠲᠡᠭᠦᠨ ᠦ᠌ ᠨᠢ ᠨᠢᠭᠡ ᠯᠡ ᠲᠤᠰᠠᠴᠢᠬᠠᠭᠠ ᠦᠭᠡᠢ ᠪᠣᠯ ᠪᠤᠰᠤᠳ ᠨᠢ ᠠᠷᠭᠠᠯᠠᠵᠤ ᠪᠣᠯᠬᠤ ᠪᠠᠢᠬᠤ ᠬᠡᠮᠡᠨ ᠭᠣᠷᠢᠳᠠᠵᠤ ᠪᠠᠢᠯᠠ᠃ ᠰᠠᠶᠢᠬᠠᠨ ᠯᠠ ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠡᠳᠦᠷ ᠥᠩᠭᠡᠷᠡᠳᠡᠭ ᠰᠡᠨ᠃ ᠣᠳᠣ ᠡᠪᠡᠳᠴᠢᠨ ᠳ᠋ᠦ᠍ ᠰᠢᠨᠠᠯᠤᠭᠰᠠᠨ ᠲᠡᠭᠦᠨ ᠳ᠋ᠦ᠍ ᠡᠳᠦᠷ ᠴᠦ᠍ ᠥᠩᠭᠡᠷᠡᠬᠦ ᠦᠭᠡᠢ ᠪᠣᠯᠵᠠᠢ᠃
《ᠲᠡᠷᠡ ᠲᠠᠪᠤᠨ ᠴᠤᠯᠤ ᠰᠢᠨᠵᠢᠨᠡ ᠭᠡᠳᠡᠭ ᠢ᠋ᠶ᠋ᠡᠨ ᠯᠡ ᠬᠢᠭᠡᠰᠡᠢ᠃ ᠶᠠᠭᠤ ᠪᠠᠢᠳᠠᠭ ᠶᠤᠮ ᠪᠤᠯ ᠳᠠ !》ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠬᠦᠰᠡᠨ ᠬᠦᠯᠢᠶᠡᠵᠦ ᠪᠠᠢᠯᠠ᠃
ᠦᠳᠡ ᠡᠴᠡ ᠬᠣᠢᠰᠢ ᠮᠠᠷᠠᠮᠪᠠᠲᠠᠨ ᠠᠭᠠᠬᠢᠯᠠᠭᠰᠠᠭᠠᠷ ᠣᠷᠣᠵᠤ ᠢᠷᠡᠯᠡ᠃ ᠴᠠᠭᠠᠨᠠ ᠠ᠋ᠴᠠ ᠨᠢ ᠨᠢᠭᠡᠨ ᠵᠢᠩᠳᠠᠭᠠᠨ ᠤ ᠨᠥᠬᠥᠳ ᠳᠠᠭᠠᠵᠠᠢ᠃ ᠫᠦᠷᠪᠦᠳᠣᠨᠣᠶ ᠄
– ᠨᠥᠬᠥᠳ ᠴᠢᠨᠢ ᠮᠥᠩᠭᠥ ᠴᠤᠭᠯᠠᠭᠤᠯᠵᠤ ᠭᠠᠭᠴᠠ ᠬᠠᠷᠠ ᠢᠮᠠᠭᠠ ᠣᠯᠵᠠᠢ᠃ ᠣᠳᠣ ᠡᠭᠦᠨ ᠢ ᠭᠠᠷᠭᠠᠵᠤ ᠴᠢᠨᠦ ᠲᠠᠪᠤᠨ ᠴᠤᠯᠤ ᠶ᠋ᠢ ᠰᠢᠨᠵᠢᠯᠡᠰᠦᠭᠡᠢ ᠭᠡᠵᠦ ᠬᠡᠯᠡᠭᠡᠳ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠳ᠋ᠦ᠍ ᠨᠢ ᠬᠠᠨᠳᠤᠵᠤ᠄
– ᠵᠠ ᠨᠠᠭᠠᠳᠤ ᠢᠮᠠᠭᠠ ᠶ᠋ᠢ ᠪᠡᠨ ᠴᠠᠭᠠᠱᠢ ᠬᠠᠷᠠᠭᠤᠯᠤᠭᠠᠳ ᠣᠷᠭᠢ ᠭᠡᠵᠦ ᠳᠠᠭᠠᠭᠠᠯᠭᠠᠯᠠ᠃ ᠲᠡᠷᠡ ᠳᠠᠷᠤᠢ ᠨᠥᠬᠥᠳ ᠨᠢ ᠬᠠᠷᠠ ᠢᠮᠠᠭᠠ ᠶ᠋ᠢ ᠨᠢᠳᠦᠯᠡᠵᠦ ᠡᠬᠢᠯᠡᠪᠡ᠃ ᠮᠠᠷᠠᠮᠪᠠ ᠥᠪᠡᠷ ᠢ᠋ᠶ᠋ᠡᠨ ᠰᠠᠩᠵᠢ ᠭᠡᠰᠦᠯ ᠢ᠋ ᠨᠢᠴᠦᠭᠦᠯᠡᠨ ᠥᠭᠡᠳᠡ ᠨᠢ ᠬᠠᠷᠠᠭᠤᠯᠤᠨ ᠬᠡᠪᠲᠡᠭᠦᠯᠦᠯᠡ᠃ ᠲᠡᠭᠡᠭᠡᠳ ᠬᠤᠸᠠᠷᠠᠭ ᠤ᠋ᠳ ᠢ ᠳᠠᠭᠤᠳᠠᠵᠤ᠂
– ᠮᠢᠨᠦ ᠳᠠᠭᠤᠳᠠᠭᠰᠠᠨ ᠳᠡᠰ ᠳᠠᠷᠠᠭᠠ ᠪᠠᠷ ᠢᠮᠠᠭᠠᠨ ᠤ᠋ ᠳᠣᠲᠣᠷᠠ ᠭᠡᠳᠡᠰᠦᠨ ᠡᠴᠡ ᠲᠠᠪᠤᠨ ᠴᠤᠯᠤ ᠶᠢ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠨᠢ ᠠᠪᠴᠤ ᠢᠷᠡᠭᠡᠷᠡᠢ᠃ ᠵᠠ ᠡᠬᠢᠯᠡᠭᠡᠳ ᠡᠯᠢᠭᠡ ᠠᠪᠤᠭᠠᠳ ᠢᠷᠡ ᠭᠡᠪᠡ᠃ ᠴᠢᠰᠤ ᠱᠦᠭᠦᠷᠡᠭᠰᠡᠨ ᠬᠠᠯᠠᠭᠤᠨ ᠡᠯᠢᠭᠡ ᠶ᠋ᠢ ᠲᠡᠳᠡ ᠣᠷᠣᠭᠤᠯᠵᠤ ᠢᠷᠡᠯᠡ᠃ ᠮᠠᠷᠠᠮᠪᠠ ᠲᠡᠭᠦᠨ ᠢ᠋ ᠠᠪᠴᠤ ᠰᠠᠩᠵᠢ ᠭᠡᠰᠦᠯ ᠦᠨ ᠡᠯᠢᠭᠡᠨ ᠲᠤᠰᠢᠶᠠ ᠨᠠᠭᠠᠯᠳᠤᠭᠤᠯᠤᠨ ᠲᠠᠯᠪᠢᠯᠠ᠃
– ᠠᠭᠤᠰᠬᠢ! ᠭᠡᠵᠦ ᠮᠠᠷᠠᠮᠪᠠ ᠳᠠᠭᠤᠳᠠᠪᠠ᠃ ᠠᠭᠤᠰᠬᠢ ᠠᠪᠴᠤ ᠦᠭᠬᠦᠯᠡ᠃ ᠲᠡᠭᠦᠨ ᠢ᠋ ᠪᠠᠰᠠ ᠯᠠ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠠᠭᠤᠰᠬᠢᠨ ᠲᠤᠰᠢᠶᠠ ᠨᠠᠭᠠᠯᠳᠤᠭᠤᠯᠤᠨ ᠲᠠᠯᠪᠢᠯᠠ᠃
– ᠳᠡᠯᠢᠭᠦᠦ! ᠭᠡᠵᠦ ᠮᠠᠷᠠᠮᠪᠠ ᠬᠠᠰᠬᠢᠷᠪᠠ᠃ ᠳᠡᠯᠢᠭᠦᠦ ᠶ᠋ᠢ ᠦᠭᠬᠦᠯᠡ᠃ ᠲᠡᠷᠡ ᠮᠡᠲᠦ ᠪᠡᠷ ᠲᠠᠪᠤᠨ ᠴᠤᠯᠤ ᠶ᠋ᠢ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠠᠪᠴᠤ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠡᠯᠢᠭᠡᠨ ᠲᠠᠯᠠ ᠳ᠋ᠤ᠌ ᠲᠤᠰ ᠪᠦᠷᠢ ᠶ᠋ᠢᠨ ᠲᠠᠭᠠᠷᠠᠬᠤ ᠡᠷᠬᠡᠲᠡᠨ ᠲᠤᠰᠢᠶᠠ ᠨᠠᠭᠠᠯᠳᠤᠭᠤᠯᠵᠤ ᠲᠠᠯᠪᠢᠭᠠᠳ ᠳᠡᠭᠡᠭᠦᠷ ᠨᠢ ᠢᠮᠠᠭᠠᠨ ᠤ᠋ ᠰᠡᠮᠡᠵᠡ ᠪᠡᠷ ᠬᠤᠴᠢᠭᠠᠳ ᠠᠷᠠᠰᠤ ᠪᠠᠷ ᠪᠦᠲᠡᠭᠡᠯᠡ᠃ ᠢᠮᠠᠭᠠᠨ ᠤ᠋ ᠡᠪᠴᠢᠭᠦᠨ ᠦ᠌ ᠬᠡᠷᠰᠡᠩ ᠢ᠋ ᠠᠷᠠᠰᠤ ᠲᠠᠢ ᠨᠢ ᠬᠡᠰᠡᠭᠯᠡᠨ ᠠᠪᠴᠤ ᠥᠭᠡᠳᠡ ᠨᠢ ᠬᠠᠷᠠᠭᠤᠯᠤᠨ ᠱᠠᠯᠠᠨ ᠳᠡᠭᠡᠷᠡ ᠲᠠᠯᠪᠢᠯᠠ᠃
– ᠵᠠ ᠡᠨᠡ ᠬᠡᠷᠰᠡᠩ ᠲᠡᠢ ᠠᠷᠠᠰᠤ ᠶ᠋ᠢ ᠰᠠᠢᠨ ᠬᠠᠷᠠᠵᠤ ᠪᠠᠢ᠃ ᠬᠡᠷᠰᠡᠩ ᠪᠣᠯ ᠠᠮᠢᠲᠠᠨ ᠤ᠋ ᠪᠡᠶᠡ ᠶᠢᠨ ᠬᠠᠮᠤᠭ ᠤ᠋ᠨ ᠮᠡᠳᠡᠷᠡᠮᠡᠲᠡᠭᠡᠢ ᠮᠢᠬᠠ ᠪᠣᠯᠤᠨᠠ᠃ ᠪᠠᠰᠠ ᠬᠠᠮᠤᠭ ᠤ᠋ᠨ ᠰᠢᠮᠡᠷᠬᠡᠦ ᠮᠢᠬᠠ ᠮᠥᠨ᠃ᠡᠢᠮᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠬᠦᠷᠦᠬᠦ ᠳ᠋ᠦ᠍ ᠡᠪᠡᠳᠴᠢᠲᠡᠨ ᠦ᠌ ᠪᠡᠶᠡ ᠳ᠋ᠦ᠍ ᠨᠠᠭᠠᠭᠰᠠᠨ ᠲᠠᠪᠤᠨ ᠴᠤᠯᠤ ᠪᠠᠰᠠ ᠨᠢᠭᠡᠨ ᠵᠡᠷᠭᠡ ᠬᠦᠷᠦᠨᠡ᠃ ᠬᠡᠷᠰᠡᠩ ᠢ᠋ ᠬᠦᠷᠦᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠳᠣᠲᠣᠷ ᠮᠢᠬᠠ ᠶ᠋ᠢ ᠠᠪᠴᠤ ᠦᠵᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠮᠠᠷᠠᠮᠪᠠ ᠵᠢᠭᠠᠪᠤᠷᠢᠯᠠᠪᠠ᠃ ᠬᠡᠷᠰᠡᠩ ᠲᠡᠢ ᠠᠷᠠᠰᠤ ᠨᠢ ᠴᠠᠭ ᠬᠡᠮᠵᠢᠬᠦ ᠪᠠᠷᠢᠮᠵᠢᠶᠠ ᠠᠵᠢ᠃ ᠬᠡᠷᠰᠡᠩ ᠢ᠋ ᠬᠥᠷᠥᠬᠦ ᠳ᠋ᠦ᠍ ᠯᠠᠮᠠ᠄
– ᠴᠠᠭ ᠪᠣᠯᠤᠯᠠ᠃ ᠣᠳᠣ ᠲᠠᠪᠤᠨ ᠴᠤᠯᠤ ᠬᠥᠷᠥᠵᠡᠢ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠭᠠᠦᠯᠢᠨ ᠲᠦᠮᠫᠡᠨ ᠲᠡᠢ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠲᠠᠪᠤᠨ ᠴᠤᠯᠤ ᠶ᠋ᠢ ᠠᠪᠴᠤ ᠳᠡᠰ ᠳᠡᠰ ᠢ᠋ᠶ᠋ᠡᠷ ᠬᠢᠪᠡ᠃ ᠡᠯᠢᠭᠡ᠂ ᠵᠢᠷᠦᠬᠡ ᠲᠡᠷᠢᠭᠦᠲᠡᠨ ᠢ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠨᠠᠰᠢ ᠴᠠᠰᠢ ᠡᠷᠭᠢᠭᠦᠯᠦᠨ ᠮᠠᠷᠠᠮᠪᠠ ᠦᠵᠡᠬᠦ ᠵᠠᠭᠤᠷᠠ᠄
– ᠡᠪᠡᠳᠴᠢᠲᠡᠨ ᠦ᠌ ᠲᠠᠪᠤᠨ ᠴᠤᠯᠤ ᠶ᠋ᠢᠨ ᠠᠯᠢ ᠨᠢᠭᠡ ᠨᠢ ᠭᠡᠮᠲᠦᠭᠰᠡᠨ ᠪᠣᠯ ᠳᠡᠭᠡᠷᠡ ᠨᠢ ᠲᠠᠯᠪᠢᠭ᠌ᠰᠠᠨ ᠮᠠᠯ ᠤ᠋ᠨ ᠲᠠᠪᠤᠨ ᠴᠤᠯᠤ ᠳ᠋ᠤ᠌ ᠲᠡᠮᠳᠡᠭ ᠮᠡᠳᠡᠭᠳᠡᠳᠡᠭ ᠶᠦᠮ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠶᠠᠷᠢᠵᠤ ᠲᠦᠮᠫᠡᠨ ᠲᠡᠢ ᠶᠢ ᠬᠤᠳᠬᠤᠨ ᠬᠥᠷᠪᠡᠭᠦᠯᠵᠦ᠂ ᠨᠤᠬᠤᠴᠠᠲᠠᠢ ᠦᠵᠡᠭᠰᠡᠭᠡᠷ ᠪᠠᠢᠯᠠ᠃ ᠤᠳᠠᠲᠠᠯᠠ ᠰᠢᠨᠵᠢᠪᠡ᠃ ᠭᠡᠪᠡᠴᠦ ᠲᠡᠷᠡ ᠭᠡᠬᠦ ᠲᠡᠮᠳᠡᠭ ᠣᠯᠤᠭᠰᠠᠨ ᠦᠭᠡᠢ᠃
– ᠮᠥᠨ ᠬᠠᠴᠢᠨ ᠶᠤᠮ ᠳᠠ᠃ ᠶᠡᠷᠦ ᠳ᠋ᠡᠭᠡᠨ ᠲᠡᠷᠡ ᠭᠡᠬᠦ ᠲᠡᠮᠳᠡᠭ ᠣᠯᠳᠠᠬᠤ ᠦᠭᠡᠢ ᠪᠠᠢᠨᠠ᠃ ᠲᠠᠪᠤᠨ ᠴᠤᠯᠤ ᠳ᠋ᠤᠨᠢ ᠶᠠᠮᠠᠷᠪᠠ ᠭᠡᠮ ᠰᠠᠭᠤᠭᠠ ᠦᠭᠡᠢ ᠪᠣᠯᠤᠯᠲᠠᠢ ᠭᠡᠵᠦ ᠮᠠᠷᠠᠮᠪᠠ ᠦᠭᠡᠯᠡᠵᠦ ᠰᠠᠭᠤᠯᠠ᠃ᠡᠯᠢᠭᠡᠯᠡᠬᠦ ᠲᠣᠮ ᠨᠢ ᠲᠡᠢᠨ ᠬᠦ᠌ ᠦᠷᠡ ᠳ᠋ᠦᠩ ᠦᠭᠡᠢ ᠪᠣᠯᠬᠤ ᠠᠶᠠᠰᠲᠠᠢ ᠳ᠋ᠤ᠌ ᠮᠠᠷᠠᠮᠪᠠ ᠪᠠᠭᠠ ᠵᠡᠷᠭᠡ ᠪᠥᠱᠥᠭᠦᠷᠬᠡᠵᠦ᠄
– ᠲᠡᠭᠡᠪᠡᠯ ᠣᠳᠣ ᠡᠨᠡ ᠡᠪᠡᠳᠴᠢᠲᠡᠨ ᠦ᠌ ᠪᠡᠶᠡ ᠶ᠋ᠢᠨ ᠲᠠᠪᠤᠨ ᠣᠨᠢᠰᠣ ᠨᠢ ᠭᠡᠮᠲᠦᠭᠰᠡᠨ ᠬᠡᠷᠡᠭ ᠪᠠᠢᠵᠤ ᠳ᠋ᠡ᠃ ᠭᠣᠣᠯ ᠣᠨᠢᠰᠣ ᠮᠤᠯᠲᠤᠷᠠᠪᠠᠯ ᠦᠬᠦᠵᠦ ᠴᠦ᠍ ᠪᠣᠯᠤᠨᠠ᠃ ᠮᠠᠷᠭᠠᠰᠢ ᠪᠢ ᠴᠢᠨᠦ ᠲᠠᠪᠤᠨ ᠣᠨᠢᠰᠤ ᠶ᠋ᠢ ᠰᠢᠨᠵᠢᠵᠦ ᠦᠵᠡᠬᠦ ᠡᠴᠡ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠥᠨᠥᠳᠥᠷ ᠴᠦ᠍ ᠣᠷᠣᠢᠳᠠᠯᠠ᠃ ᠵᠢᠩᠳᠠᠭᠠᠨ ᠤ᠋ ᠬᠢᠨᠢ ᠢᠮᠠᠭᠠᠨ ᠤ᠋ ᠮᠢᠬᠠ ᠪᠠᠷ ᠨᠥᠬᠥᠷ ᠲᠦ᠍ ᠪᠡᠨ ᠬᠣᠭᠣᠯᠠ ᠬᠢᠵᠦ ᠥᠭ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠬᠤᠷᠴᠠ ᠶᠠᠭᠤᠮᠠ ᠬᠡᠷᠡᠭ ᠦᠭᠡᠢ ᠭᠡᠵᠦ ᠬᠡᠯᠡᠪᠡ᠃ ᠨᠥᠬᠥᠳ ᠨᠢ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠨᠢᠴᠦᠭᠦᠨ ᠪᠡᠶᠡᠨᠡ ᠪᠢᠯᠳᠠᠭᠰᠠᠨ ᠴᠢᠰᠤ ᠶᠢ ᠠᠷᠢᠯᠭᠠᠵᠤ᠂ ᠬᠤᠪᠴᠠᠰᠤ ᠶ᠋ᠢ ᠨᠢ ᠡᠮᠦᠰᠬᠡᠵᠦ ᠣᠷᠣᠨ ᠳ᠋ᠤ᠌ ᠨᠢ ᠬᠡᠪᠲᠡᠭᠦᠯᠪᠡ᠃
ᠮᠠᠷᠠᠮᠪᠠ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠨ《ᠶᠠᠮᠠᠷ ᠵᠣᠯᠢᠭ ᠤ᠋ᠨ ᠪᠤᠭ ᠰᠦᠭᠯᠡᠵᠦ ᠣᠷᠬᠢᠭᠠ ᠪᠣᠢ? ᠶᠡᠷᠦ ᠳ᠋ᠡᠭᠡᠨ ᠮᠡᠳᠡᠬᠦ ᠪᠠᠷᠢᠮᠵᠢᠶᠠ ᠠᠯᠠᠭᠠ᠃ ᠬᠤᠮ᠂ ᠬᠤᠮ᠂ ᠬᠤᠮ》ᠭᠡᠵᠦ ᠵᠥᠭᠡᠯᠭᠡ ᠣᠷᠬᠢᠪᠠ᠃《ᠤᠤᠯ ᠨᠢ ᠶᠡᠬᠡ ᠯᠡ ᠶᠠᠳᠠᠷᠠᠵᠤ ᠰᠤᠯᠠᠳᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠪᠠᠢᠬᠤ ᠶᠤᠮ᠃ ᠲᠠᠮᠢᠷᠳᠠᠭᠰᠠᠨ ᠬᠥᠮᠦᠨ ᠢ᠋ ᠴᠦ᠍ ᠬᠣᠭᠣᠯᠠ ᠪᠠᠷ ᠡᠮᠨᠡᠪᠡᠯ ᠳᠡᠭᠡᠷᠡ ᠰᠠᠨ᠃ ᠡᠭᠦᠨ ᠢ᠋ ᠡᠳᠡᠭᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯ ᠨᠡᠷᠡ ᠳ᠋ᠦ᠍ ᠮᠠᠭᠤ ᠪᠣᠯᠤᠨᠠ᠃ ᠬᠠᠮᠤᠭ ᠠᠷᠭᠠ ᠰᠢᠷᠭᠡ ᠪᠠᠨ ᠪᠠᠷᠠᠯᠠ ᠭᠡᠵᠦ ᠦᠦ ᠪᠢ᠃ ᠰᠡᠵᠢᠭ ᠢ᠋ᠶ᠋ᠡᠷ ᠵᠠᠰᠠᠷᠠᠬᠤ ᠦᠭᠡᠢ ᠨᠢ ᠡ!》ᠭᠡᠵᠦ ᠮᠠᠷᠠᠮᠪᠠ ᠳᠣᠲᠣᠷᠠ ᠪᠠᠨ ᠪᠣᠳᠣᠪᠠᠴᠤ ᠲᠡᠭᠦᠨ ᠢ᠋ᠶ᠋ᠡᠨ ᠢᠯᠡ ᠬᠡᠯᠡᠭᠰᠡᠨ ᠦᠭᠡᠢ᠃