ᠬᠥᠬᠡᠭᠡ ᠨᠠᠮᠵᠢᠯ ᠮᠣᠩᠭᠣᠯ ᠠᠷᠠᠳ ᠤᠨ ᠦᠯᠢᠭᠡᠷХөхөө Намжил Монгол ардын үлгэр Khukhuu Namjil mongol ardiin ulger
525ᠬᠥᠬᠡᠭᠡ ᠨᠠᠮᠵᠢᠯ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌᠂ ᠮᠣᠩᠭᠣᠯ ᠤ᠋ᠨ ᠵᠡᠭᠦᠨ ᠬᠢᠵᠠᠭᠠᠷ ᠲᠤ᠌ ᠬᠥᠬᠡᠭᠡ ᠨᠠᠮᠵᠢᠯ ᠭᠡᠵᠦ ᠨᠢᠭᠡᠨ ᠰᠠᠢᠨ ᠡᠷᠡ ᠪᠠᠢᠵᠠᠢ ᠃ ᠲᠡᠷᠡ ᠦᠨᠡᠬᠡᠷ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠳᠠᠭᠤᠯᠠᠳᠠᠭ ᠤᠴᠢᠷ ᠠ᠋ᠴᠠ᠂ ᠬᠣᠰᠢᠭᠤ ᠨᠤᠲᠤᠭ ᠲᠠᠭᠠᠨ ᠶᠡᠬᠡᠯᠡ ᠠᠯᠳᠠᠷᠰᠢᠭᠰᠠᠨ ᠪᠠᠢᠨᠠ᠂ ᠭᠡᠲᠡᠯᠡ ᠬᠥᠬᠡᠭᠡ ᠨᠠᠮᠵᠢᠯ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠲᠠᠲᠠᠭᠳᠠᠨ᠂ ᠮᠣᠩᠭᠣᠯ ᠤ᠋ᠨ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠲᠤ᠌ ᠣᠴᠢᠵᠠᠢ᠃ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠳᠠᠭᠤᠯᠠᠳᠠᠭ ᠢ᠋ ᠳᠠᠷᠤᠭᠠ ᠨᠢ ᠨᠢᠭᠡ ᠮᠡᠳᠡᠭᠡᠳ᠂ ᠬᠥᠬᠡᠭᠡ ᠨᠠᠮᠵᠢᠯ ᠢ᠋ᠶ᠋ᠠᠷ ᠠᠵᠢᠯ ᠰᠤᠷᠤᠯᠭᠠ ᠬᠢᠯᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠤᠷᠪᠠᠨ ᠵᠢᠯ ᠰᠢᠬᠠᠮ ᠵᠥᠪᠬᠡᠨ ᠳᠠᠭᠤᠤ ᠳᠠᠭᠤᠯᠠᠭᠰᠠᠭᠠᠷ ᠪᠠᠢᠵᠠᠢ᠃
ᠴᠡᠷᠢᠭ ᠦ᠋ᠨ ᠠᠯᠪᠠ ᠬᠠᠭᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠨᠢᠭᠡᠨ ᠰᠠᠢᠬᠠᠨ ᠭᠦᠩᠵᠦ ᠲᠡᠢ ᠲᠠᠨᠢᠯᠴᠠᠵᠤ ᠭᠡᠨᠡ᠃ ᠬᠥᠬᠡᠭᠡ ᠨᠠᠮᠵᠢᠯ ᠴᠡᠷᠢᠭ ᠡᠴᠡ ᠬᠠᠯᠠᠭᠳᠠᠵᠤ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠠᠮᠠᠷᠠᠭ ᠬᠠᠢᠷᠠᠲᠠᠢ ᠭᠦᠩᠵᠦ ᠨᠢ ᠴᠢᠨᠤᠨ ᠬᠠᠷᠠ ᠭᠡᠳᠡᠭ ᠮᠣᠷᠢ ᠪᠠᠨ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠦᠭᠭᠦᠭᠰᠡᠨ ᠶᠤᠮᠰᠠᠨᠵᠠᠢ᠃
ᠲᠡᠷᠡ ᠴᠢᠨᠤᠨ ᠬᠠᠷᠠ ᠮᠣᠷᠢ ᠪᠣᠯ ᠪᠤᠲᠠᠨ ᠤ᠋ ᠦᠨᠳᠦᠰᠦ ᠶ᠋ᠢ ᠪᠤᠯᠭᠤᠷᠠᠲᠠᠯᠠ᠂ ᠪᠤᠭᠤ ᠴᠢᠯᠠᠭᠤ ᠶ᠋ᠢ ᠪᠤᠲᠠᠷᠠᠲᠠᠯᠠ᠂ ᠡᠷᠡ ᠶ᠋ᠢᠨ ᠴᠢᠯᠠᠭᠤ ᠶ᠋ᠢ ᠳᠡᠯᠪᠡᠷᠡᠲᠡᠯᠡ᠂ ᠳᠡᠪᠡᠯ ᠦ᠋ᠨ ᠬᠠᠪᠠᠭᠠᠰᠤ ᠶ᠋ᠢ ᠬᠠᠭᠵᠠᠷᠠᠲᠠᠯᠠ᠂ ᠬᠠᠳᠠᠨ ᠳ᠋ᠤ᠌ ᠬᠠᠯᠲᠤᠷᠢᠳᠠᠭ ᠦᠭᠡᠢ ᠪᠤᠲᠠᠨ ᠳ᠋ᠤ᠌ ᠪᠦᠳᠦᠷᠢᠳᠡᠭ ᠦᠭᠡᠢ ᠬᠠᠲᠠᠷᠢᠳᠠᠭ᠂ ᠵᠢᠭᠦᠷᠲᠡᠨ ᠰᠢᠪᠠᠭᠤᠳ ᠠ᠋ᠴᠠ ᠳᠤᠲᠠᠭᠤ ᠦᠭᠡᠢ ᠂ ᠵᠡᠭᠡᠷᠡ ᠮᠣᠷᠢ ᠲᠠᠢ ᠵᠦᠢᠷᠯᠡᠰᠢ ᠦᠭᠡᠢ᠂ ᠠᠳᠤᠭᠤᠨ ᠤ᠋ ᠳᠣᠲᠣᠷᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠣᠳᠣᠨ᠂ ᠪᠠᠷᠤᠭ ᠤ᠋ᠨ ᠰᠢᠨᠵᠢ ᠲᠡᠭᠦᠰ ᠪᠦᠷᠢᠳᠦᠭᠰᠡᠨ ᠠᠶᠤᠯᠲᠠᠢ ᠴᠠᠭ ᠲᠤ᠌ ᠨᠢᠰᠦᠨ ᠳᠡᠭᠦᠯᠢᠵᠦ᠂ ᠠᠮᠤᠭᠤᠯᠠᠩ ᠴᠠᠭ ᠲᠤ᠌ ᠠᠯᠬᠤᠭᠠ ᠭᠢᠰᠬᠢᠭᠡ ᠪᠡᠷ ᠶᠠᠪᠤᠳᠠᠭ᠃ ᠳᠡᠯᠳᠡᠨ ᠤᠨᠠᠬᠤ ᠳ᠋ᠤ᠌ ᠡᠵᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠵᠢᠳᠬᠦᠳᠡᠭ᠂ ᠡᠷᠡ ᠬᠥᠮᠦᠨ ᠦ᠌ ᠬᠠᠨᠢ ᠪᠣᠯᠤᠭᠰᠠᠨ ᠡᠢᠮᠦ ᠰᠠᠢᠬᠠᠨ ᠮᠣᠷᠢ ᠶᠤᠮᠰᠠᠨᠵᠠᠢ᠃
ᠬᠥᠬᠡᠭᠡ ᠨᠠᠮᠵᠢᠯ ᠲᠡᠷᠡ ᠮᠣᠷᠢ ᠪᠠᠷ ᠨᠢ ᠶᠠᠪᠤᠵᠤ ᠨᠤᠲᠤᠭ ᠲᠠᠭᠠᠨ ᠢᠷᠡᠬᠦ ᠳ᠋ᠦ᠍ᠨᠢ ᠬᠥᠮᠦᠰ ᠶᠡᠬᠡ ᠰᠣᠨᠢᠷᠬᠠᠨ ᠲᠡᠭᠦᠨ ᠡᠴᠡ ᠥᠭᠡᠷᠡ ᠮᠣᠷᠢ ᠤᠨᠤᠬᠤ ᠦᠭᠡᠢ ᠳ᠋ᠦ᠍ᠨᠢ ᠶᠡᠬᠡ ᠭᠠᠢᠬᠠᠳᠠᠭ ᠪᠠᠢᠵᠠᠢ᠃ ᠬᠥᠬᠡᠭᠡ ᠨᠠᠮᠵᠢᠯ ᠴᠢᠨᠤᠨ ᠬᠠᠷᠠ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠮᠣᠩᠭᠣᠯ ᠤ᠋ᠨ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠲᠤ᠌ ᠨᠢᠰᠦᠨ ᠣᠴᠢᠵᠤ᠂ ᠡᠨᠡᠬᠦ ᠭᠦᠩᠵᠦ ᠲᠡᠢ ᠪᠡᠨ ᠠᠭᠤᠯᠵᠠᠭᠠᠳ ᠥᠷᠯᠥᠭᠡ ᠪᠣᠯᠬᠤ ᠳ᠋ᠤᠨᠢ ᠵᠡᠭᠦᠨ ᠬᠢᠵᠠᠭᠠᠷ ᠲᠤ᠌ ᠢᠷᠡᠵᠦ ᠠᠳᠤᠭᠤ ᠪᠠᠨ ᠲᠠᠭᠤᠭᠰᠠᠭᠠᠷ ᠬᠠᠷᠢᠳᠠᠭ ᠪᠠᠢᠵᠠᠢ ᠭᠡᠨᠡ᠃ ᠢᠩᠭᠢᠭᠰᠡᠭᠡᠷ ᠭᠤᠷᠪᠠᠨ ᠵᠢᠯ ᠪᠣᠯᠤᠭᠰᠠᠨ ᠴᠤ᠌ ᠲᠡᠭᠦᠨ ᠢ᠋ ᠬᠥᠮᠦᠰ ᠪᠦᠷ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠬᠥᠬᠡᠭᠡ ᠨᠠᠮᠵᠢᠯ ᠤ᠋ᠨ ᠬᠢᠨ ᠲᠡᠢ ᠣᠢᠷᠠᠯᠴᠠᠭᠠ ᠨᠢᠭᠡᠨ ᠪᠠᠶᠠᠨ ᠠᠢᠯ ᠪᠠᠢᠯᠠ᠃ ᠲᠡᠷᠡ ᠪᠠᠶᠠᠨ ᠤ᠋ ᠳ᠋ᠤ᠌ ᠡᠭᠡᠯ ᠣᠯᠠᠨ ᠢ᠋ ᠦᠢᠮᠡᠭᠦᠯᠳᠡᠭ᠂ ᠡᠯᠳᠡᠪ ᠬᠣᠶᠠᠷ ᠢ᠋ ᠪᠤᠰᠠᠨᠢᠭᠤᠯᠳᠠᠭ ᠲᠡᠢᠮᠦ ᠰᠦᠷᠡᠬᠡᠢ ᠬᠣᠪᠴᠢ ᠬᠡᠦᠬᠡᠨ ᠪᠠᠢᠵᠠᠢ᠃ ᠲᠡᠷᠡ ᠬᠣᠪᠴᠢ ᠬᠡᠦᠬᠡᠨ ᠴᠢᠨᠤᠨ ᠬᠠᠷᠠ ᠮᠣᠷᠢᠨ ᠤ᠋ ᠡᠭᠡᠯ ᠪᠢᠰᠢ ᠶ᠋ᠢ ᠡᠰᠡ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠤᠴᠢᠷ ᠠ᠋ᠴᠠ ᠬᠥᠬᠡᠭᠡ ᠨᠠᠮᠵᠢᠯ ᠳ᠋ᠤ᠌ ᠬᠣᠣᠷ ᠬᠥᠨᠥᠭᠡᠯ ᠬᠦᠷᠭᠡᠬᠦ ᠭᠡᠵᠦ ᠰᠠᠨᠠᠭᠠᠷᠬᠠᠳᠠᠭ ᠪᠣᠯᠤᠯᠠ᠃ ᠬᠥᠬᠡᠭᠡ ᠨᠠᠮᠵᠢᠯ ᠦᠳᠡᠰᠢ ᠶᠠᠪᠤᠵᠤ ᠠᠮᠠᠷᠠᠭ ᠬᠠᠢᠷᠠᠲᠤ ᠭᠦᠩᠵᠦ ᠲᠡᠢ ᠪᠡᠨ ᠠᠭᠤᠯᠵᠠᠭᠠᠳ᠂ ᠲᠡᠷᠡ ᠰᠥᠨᠢ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠠᠳᠤᠭᠤ ᠪᠠᠨ ᠲᠠᠭᠤᠭᠰᠠᠭᠠᠷ ᠢᠷᠡᠵᠦ᠂ ᠮᠣᠷᠢᠨ ᠤ᠋ ᠪᠠᠨ ᠬᠥᠯᠥᠰᠥ ᠶ᠋ᠢ ᠨᠠᠮᠳᠠᠭᠠᠳ᠂ ᠦᠷ ᠴᠠᠢᠬᠤ ᠳ᠋ᠤ᠌ ᠮᠣᠷᠢ ᠪᠠᠨ ᠲᠠᠯᠪᠢᠭᠠᠳ ᠭᠡᠷ ᠲᠦ᠍ ᠣᠷᠣᠵᠤ ᠠᠮᠠᠷᠠᠨ ᠰᠠᠭᠤᠵᠤ ᠭᠡᠨᠡ᠃ ᠭᠡᠲᠡᠯᠡ ᠨᠥᠭᠦᠭᠡ ᠪᠠᠶᠠᠨ ᠠᠢᠯ ᠤ᠋ᠨ ᠬᠣᠪᠴᠢ ᠬᠡᠦᠬᠡᠨ᠂ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠢ᠋ ᠰᠣᠨᠣᠰᠴᠤ᠂ ᠬᠥᠬᠡᠭᠡ ᠨᠠᠮᠵᠢᠯ ᠤ᠋ᠨ ᠢᠷᠡᠬᠦ ᠶ᠋ᠢ ᠮᠡᠳᠡᠭᠡᠳ᠂ ᠤᠶᠠᠭᠠᠨ ᠳᠡᠭᠡᠷᠡ ᠨᠢ ᠰᠡᠮᠡᠭᠡᠷᠬᠡᠨ ᠣᠴᠢᠪᠠᠯ᠂ ᠰᠠᠢᠬᠠᠨ ᠴᠢᠨᠤᠨ ᠬᠠᠷᠠ ᠮᠣᠷᠢ ᠰᠠᠨᠠᠭᠠ ᠮᠠᠭᠤᠲᠤ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠂ ᠰᠠᠢᠬᠢ ᠢᠷᠡᠭᠰᠡᠨ ᠭᠡᠵᠦ ᠪᠠᠶᠠᠰᠤᠭᠠᠳ᠂ ᠬᠡᠬᠦᠳᠡᠭ ᠴᠡᠭᠡᠵᠢ ᠪᠡᠨ ᠬᠥᠨᠳᠡᠯᠢᠳᠦᠭᠦᠯᠦᠨ᠂ ᠬᠥᠯᠥᠰᠥ ᠲᠡᠢ ᠪᠡᠶᠡ ᠪᠡᠨ ᠰᠢᠯᠡᠭᠡᠨ᠂ ᠭᠠᠵᠠᠷ ᠴᠠᠪᠴᠢᠯᠠᠨ ᠪᠠᠢᠵᠤ᠂ ᠬᠣᠶᠠᠷ ᠰᠤᠭᠤᠨ ᠡᠴᠡ ᠨᠢ ᠡᠷᠴᠢ ᠬᠦᠴᠦ ᠲᠡᠢ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠷᠪᠡᠯᠵᠡᠭᠦᠯᠵᠦ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ ᠨᠥᠭᠦᠭᠡ ᠬᠣᠪᠴᠢ ᠬᠡᠦᠬᠡᠨ ᠭᠦᠶᠦᠨ ᠢᠷᠡᠵᠦ ᠦᠢᠯᠡ ᠶ᠋ᠢᠨ ᠬᠠᠢᠴᠢ ᠶ᠋ᠢ ᠬᠠᠪᠴᠢᠭᠤᠯᠵᠤ ᠢᠷᠡᠭᠡᠳ᠂ ᠴᠢᠨᠤᠨ ᠬᠠᠷᠠ ᠮᠣᠷᠢᠨ ᠤ᠋ ᠵᠢᠭᠦᠷ ᠢ᠋ ᠲᠠᠰᠤ ᠬᠠᠢᠴᠢᠯᠠᠭᠠᠳ ᠬᠠᠶᠠᠴᠢᠬᠠᠵᠠᠢ᠃ ᠰᠠᠢᠬᠠᠨ ᠴᠢᠨᠦᠨ ᠬᠠᠷᠠ ᠮᠣᠷᠢ ᠨᠢ ᠰᠢᠳᠢ ᠵᠢᠭᠦᠷ ᠢ᠋ᠶ᠋ᠡᠨ ᠬᠠᠢᠴᠢᠯᠠᠭᠤᠯᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠤᠳᠠᠯ ᠦᠭᠡᠢ ᠦᠬᠦᠵᠡᠢ᠃
ᠦᠷ ᠴᠠᠢᠬᠤ ᠪᠠᠷ ᠨᠢ ᠮᠣᠷᠢ ᠪᠠᠨ ᠲᠠᠯᠪᠢᠬᠤ ᠭᠡᠵᠦ ᠣᠴᠢᠲᠠᠯᠠ ᠦᠨᠡᠨᠴᠢ ᠨᠥᠬᠥᠷ ᠪᠣᠯᠤᠭᠰᠠᠨ ᠰᠠᠢᠬᠢ ᠮᠥᠷ ᠨᠢ ᠤᠶᠠᠭᠠᠨ ᠳᠡᠭᠡᠷᠡ ᠦᠬᠦᠭᠰᠡᠨ ᠢ᠋ ᠬᠠᠷᠠᠭᠠᠳ᠂ ᠬᠥᠬᠡᠭᠡ ᠨᠠᠮᠵᠢᠯ ᠤ᠋ᠨ ᠳᠣᠲᠣᠷᠠ ᠨᠢ ᠪᠠᠯᠠᠷᠳᠠᠵᠤ ᠭᠠᠰᠢᠭᠤᠳᠠᠯ ᠬᠠᠷᠠᠮᠰᠠᠯ ᠤ᠋ᠨ ᠭᠦᠨ ᠳ᠋ᠦ᠍ ᠣᠷᠣᠵᠠᠢ᠃
ᠬᠥᠬᠡᠭᠡ ᠨᠠᠮᠵᠢᠯ ᠨᠢᠭᠡᠨ ᠡᠳᠦᠷ ᠴᠢᠨᠦᠨ ᠬᠠᠷᠠ ᠮᠣᠷᠢᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠳᠠᠭᠤᠷᠢᠶᠠᠯᠭᠠᠨ᠂ ᠮᠣᠳᠣ ᠪᠠᠷ ᠰᠡᠢᠯᠵᠦ᠂ ᠤᠷᠲᠤ ᠲᠠᠢᠰᠢ ᠪᠥᠬᠡᠯᠡᠨ᠂ ᠨᠢᠭᠤᠷ ᠲᠠᠯᠠ ᠳ᠋ᠤ᠌ ᠨᠢ ᠰᠠᠷᠠ ᠬᠢᠵᠦ᠂ ᠬᠦᠯᠦᠭ ᠰᠠᠢᠬᠢ ᠮᠣᠷᠢᠨ ᠤ᠋ ᠪᠠᠨ ᠰᠢᠷᠢ ᠡᠴᠡ ᠥᠨᠢᠳᠡ ᠶ᠋ᠢᠨ ᠴᠠᠭᠠᠨ ᠰᠢᠷᠠᠯᠠᠵᠤ᠂ ᠮᠢᠨᠳᠠᠰᠤᠨ ᠴᠠᠭᠠᠨ ᠰᠡᠭᠦᠯ ᠡᠴᠡ ᠨᠢ ᠠᠪᠴᠤ᠂ ᠤᠷᠲᠤ ᠲᠠᠢᠰᠢ ᠪᠠᠨ ᠲᠠᠲᠠᠵᠤ᠂ ᠮᠣᠳᠣᠨ ᠤ᠋ ᠳᠠᠪᠠᠷᠬᠠᠢ ᠲᠦᠷᠬᠢᠵᠦ ᠳᠤᠤᠭᠠᠷᠭᠠᠭᠠᠳ ᠂ᠴᠢᠨᠦᠨ ᠬᠠᠷᠠ ᠮᠣᠷᠢᠨ ᠤ᠋ ᠪᠠᠨ ᠢᠨᠴᠠᠭᠠᠬᠤ ᠳᠠᠭᠤ᠂ ᠠᠯᠬᠤᠭᠠ ᠭᠢᠰᠬᠢᠭᠡ᠂ ᠠᠷᠠᠯᠵᠢᠬᠤ ᠭᠠᠳᠠᠷᠢᠭᠠ ᠶ᠋ᠢ ᠨᠢ ᠲᠡᠷᠡ ᠬᠥᠭᠵᠢᠮ ᠳ᠋ᠡᠭᠡᠨ ᠣᠷᠣᠭᠤᠯᠳᠠᠭ ᠪᠣᠯᠵᠠᠢ ᠭᠡᠨᠡ᠃ ᠲᠡᠷᠡ ᠶᠠᠪᠤᠳᠠᠯ ᠠ᠋ᠴᠠ ᠡᠬᠢᠯᠡᠨ ᠮᠣᠷᠢᠨ ᠬᠤᠭᠤᠷ ᠮᠣᠩᠭᠣᠯ ᠳ᠋ᠤ᠌ ᠠᠩᠬᠠ ᠡᠭᠦᠰᠴᠦ ᠭᠠᠷᠤᠭᠰᠠᠨ ᠳᠣᠮᠣᠭ ᠲᠠᠢ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠤᠭᠠᠨᠵᠢᠳ
ᠦᠰᠦᠭ ᠬᠠᠳᠠᠭᠴᠢ᠄ ᠵᠢᠷᠠᠨᠲᠠᠢ
ᠬᠢᠨᠠᠭᠴᠢ᠄ ᠮᠡᠷᠭᠡᠨᠪᠢᠯᠢᠭ