ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ <ᠭᠤᠴᠢᠨ ᠨᠢᠭᠡᠳᠦᠭᠡᠷ ᠪᠦᠯᠦᠭ > Хөх судар - Инжинаш <Гучин нэгдүгээр бүлэг >
264ᠵᠢᠨᠦᠩ ᠮᠤᠬᠤᠯᠢ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠪᠡᠷ ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠡᠪᠳᠡᠪᠡ
ᠲᠠᠢᠽᠤ ᠪᠣᠭᠳᠠ ᠭᠤᠷᠪᠠᠨ ᠬᠤᠨᠳᠠᠭᠠ ᠳᠡᠷᠡᠰᠦᠨ ᠢ᠋ᠶ᠋ᠡᠷ ᠶᠢᠰᠦᠨ ᠠᠢᠮᠠᠭ ᠢ᠋ ᠳᠠᠭᠠᠭᠤᠯᠪᠠ
ᠭᠤᠴᠢᠨ ᠨᠢᠭᠡᠳᠦᠭᠡᠷ ᠪᠦᠯᠦᠭ
ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠤ᠋ ᠵᠢᠶᠠ ᠲᠠᠢ ᠶ᠋ᠢᠨ ᠲᠡᠷᠢᠭᠦᠨ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋
ᠲᠠᠢ ᠾᠧ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠂ ᠴᠠᠭᠠᠭᠴᠢᠨ ᠲᠠᠬᠢᠶᠠ ᠵᠢᠯ᠂ ᠲᠠᠢᠽᠦ ᠳᠥᠴᠢᠨ ᠰᠡᠭᠦᠳᠡᠷ ᠲᠡᠢ
ᠵᠢᠨᠦᠩ ᠮᠤᠬᠤᠯᠢ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠪᠡᠷ ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠡᠪᠳᠡᠪᠡ
ᠲᠠᠢᠽᠦ ᠪᠣᠭᠳᠠ ᠭᠤᠷᠪᠠᠨ ᠬᠤᠨᠳᠠᠭᠠ ᠳᠡᠷᠡᠰᠦᠨ ᠢ᠋ᠶ᠋ᠡᠷ ᠶᠢᠰᠦᠨ ᠠᠢᠮᠠᠭ ᠢ᠋ ᠳᠠᠭᠠᠭᠤᠯᠪᠠ
ᠵᠢᠴᠢ ᠥᠭᠦᠯᠡᠬᠦ ᠢᠨᠦ᠂ ᠮᠤᠬᠤᠯᠢ ᠭᠠᠷᠴᠤ ᠢᠷᠡᠪᠡᠰᠦ ᠱᠠᠯᠵᠢᠲᠠᠢ ᠶ᠋ᠢᠨ ᠳᠥᠴᠢᠭᠡᠳ ᠬᠥᠮᠦᠨ ᠡᠴᠡ ᠨᠢᠭᠡᠨ ᠢᠨᠦ ᠠᠯᠳᠠᠭᠤᠯᠤᠨ ᠭᠠᠷᠴᠤ ᠴᠡᠷᠢᠭ ᠦ᠋ᠨ ᠮᠣᠷᠢᠨ ᠠ᠋ᠴᠠ ᠨᠢᠭᠡᠨ ᠢ᠋ ᠰᠢᠭᠦᠷᠡᠨ ᠤᠨᠤᠵᠤ ᠳᠤᠲᠠᠭᠠᠪᠠ ᠬᠡᠮᠡᠬᠦ ᠶ᠋ᠢ ᠰᠣᠨᠣᠰᠴᠤ ᠮᠥᠨ ᠨᠡᠭᠡᠭᠦᠯᠦᠭᠰᠡᠨ ᠦᠭᠡᠢ᠃
ᠲᠡᠨᠳᠡᠴᠡ ᠲᠠᠢᠶᠠᠩ ᠬᠠᠭᠠᠨ ᠪᠧᠲ᠋ᠠ᠋ ᠤᠯᠤᠰ ᠠ᠋ᠴᠠ ᠳᠤᠲᠠᠭᠠᠨ ᠢᠷᠡᠭᠰᠡᠨ ᠴᠡᠷᠢᠭ ᠢ᠋ ᠣᠷᠣᠭᠤᠯᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠭᠠᠳᠤ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠲᠡᠷᠡ ᠬᠥᠮᠦᠨ ᠰᠢᠷᠣᠢ ᠶ᠋ᠢᠨ ᠭᠢᠨᠳᠠᠨ ᠠ᠋ᠴᠠ ᠭᠠᠷᠴᠤ ᠢᠷᠡᠮᠡᠭᠴᠡ ᠳᠤᠲᠠᠭᠠᠨ ᠢᠷᠡᠭᠰᠡᠨ ᠲᠤᠯᠠ ᠠᠯᠢᠪᠠ ᠵᠦᠢᠯ ᠢ᠋ ᠡᠰᠡ ᠮᠡᠳᠡᠮᠦᠢ᠃ ᠭᠠᠭᠴᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠯᠮᠠ᠂ ᠮᠤᠬᠤᠯᠢ ᠶ᠋ᠢᠨ ᠡᠳ᠋ ᠢ᠋ ᠠᠪᠴᠤ ᠤᠷᠪᠠᠭᠠᠳ ᠲᠡᠭᠦᠨ ᠦ᠌ ᠳᠡᠭᠦᠦ ᠶ᠋ᠢ ᠠᠯᠠᠮᠤᠢ ᠭᠡᠮᠡᠨ ᠡᠭᠡᠭᠦᠯᠦᠭᠰᠡᠨ ᠢ᠋ ᠮᠡᠳᠡᠭᠦᠯᠦᠭᠡᠳ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠮᠣᠷᠢᠨ ᠤ᠋ ᠬᠦᠴᠦᠨ ᠢ᠋ ᠮᠠᠰᠢ ᠡᠴᠡᠩᠭᠢᠷ ᠢ᠋ ᠮᠡᠳᠡᠮᠦᠢ᠃ ᠲᠠᠢᠶᠠᠩ ᠬᠠᠭᠠᠨ ᠲᠡᠭᠦᠨ ᠦ᠌ ᠤᠨᠤᠵᠤ ᠢᠷᠡᠭᠰᠡᠨ ᠮᠣᠷᠢᠨ ᠢ᠋ ᠦᠵᠡᠵᠦ ᠣᠯᠠᠨ ᠯᠤᠭᠠ ᠪᠠᠨ ᠵᠥᠪᠯᠡᠨ ᠥᠭᠦᠯᠡᠷᠦᠨ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠮᠣᠷᠢᠨ ᠮᠠᠰᠢ ᠲᠤᠷᠠᠵᠤᠬᠤᠢ᠃ ᠪᠢᠳᠡ ᠪᠡᠷᠬᠡ ᠬᠠᠪᠴᠢᠯ ᠭᠠᠵᠠᠷ ᠢ᠋ ᠦᠵᠡᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠮᠡᠬᠡᠯᠡᠨ ᠣᠷᠣᠭᠤᠯᠵᠤ ᠬᠠᠭᠠᠵᠤ ᠬᠠᠲᠠᠭᠠᠨ ᠠᠯᠠᠪᠠᠰᠤ᠂ ᠡᠨᠡ ᠴᠡᠷᠢᠭ ᠢ᠋ ᠯᠠᠪ ᠲᠠᠢᠯᠵᠤ ᠪᠣᠯᠤᠮᠤᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠣᠯᠠᠰᠤᠪᠴᠢ᠂ ᠴᠢᠦᠢ ᠴᠦ᠍ ᠯᠢᠦᠢ᠂ ᠴᠢᠦᠢ ᠱᠢ ᠯᠢ ᠭᠤᠷᠪᠠᠨ ᠵᠠᠩᠵᠤᠨ ᠭᠠᠷᠴᠤ ᠮᠡᠳᠡᠭᠦᠯᠦᠷᠦᠨ : 《ᠡᠳᠦᠭᠡ ᠮᠠᠨ ᠤ᠋ ᠴᠡᠷᠢᠭ ᠬᠣᠷᠢᠨ ᠲᠦᠮᠡᠨ ᠦ᠌ ᠣᠯᠠᠨ᠂ ᠬᠦᠨᠡᠰᠦ ᠰᠦᠢᠳᠬᠡᠯ ᠮᠠᠰᠢ ᠬᠦᠨᠳᠦ᠂ ᠴᠡᠷᠢᠭ ᠢ᠋ ᠲᠠᠢᠯᠠᠬᠤᠢ ᠳ᠋ᠤᠷ ᠲᠦᠷᠭᠡᠨ ᠢ᠋ ᠡᠷᠢᠮᠦᠢ᠂ ᠤᠳᠠᠪᠠᠰᠤ ᠠᠰᠢᠭ᠋ ᠦᠭᠡᠢ᠃ ᠡᠳᠦᠭᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠣᠨᠴᠠ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ ᠪᠤᠰᠤᠳ ᠤ᠋ᠨ ᠴᠡᠷᠢᠭ ᠢ᠋ ᠭᠡᠨᠡᠳᠡᠭᠦᠯᠦᠮᠦᠢ᠃ ᠲᠡᠭᠦᠨ ᠦ᠌ ᠠᠷᠭᠠ ᠶ᠋ᠢ ᠭᠠᠷᠭᠠᠨ ᠭᠠᠵᠠᠷ ᠢ᠋ ᠰᠢᠨᠵᠢᠵᠦ ᠣᠯᠬᠤ ᠶ᠋ᠢᠨ ᠤᠷᠢᠳ ᠪᠠᠢᠯᠳᠤᠵᠤ ᠳᠠᠷᠤᠪᠠᠰᠤ ᠵᠣᠬᠢᠮᠤᠢ ! 》ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠵᠥᠪᠰᠢᠶᠡᠷᠡᠭᠰᠡᠨ ᠪᠣᠯᠪᠠᠴᠤ ᠪᠠᠰᠠ ᠬᠡᠳᠦᠨ ᠡᠳᠦᠷ ᠲᠦᠲᠡᠭᠡᠯᠵᠢᠨ ᠲᠠᠰᠤᠯᠬᠤ ᠦᠭᠡᠢ ᠳ᠋ᠦ᠍ᠷ ᠵᠠᠩᠵᠤᠨ ᠬᠤᠯᠠᠰᠤᠪᠴᠢ ᠶᠡᠬᠡᠯᠡ ᠴᠢᠬᠤᠯᠳᠠᠨ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠣᠷᠣᠵᠤ ᠠᠢᠯᠠᠳᠬᠠᠷᠤᠨ : 《ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠸᠠᠩ ᠡᠵᠡᠨ ᠳᠠᠢᠰᠤᠨ ᠯᠤᠭᠠ ᠪᠠᠢᠯᠳᠤᠬᠤᠶᠠ᠂ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠠᠷᠤ ᠪᠠ ᠮᠣᠷᠢᠨ ᠤ᠋ ᠰᠡᠭᠦᠯ ᠢ᠋ ᠴᠢᠨᠠᠳᠤ ᠳᠠᠢᠰᠤᠨᠠ ᠥᠴᠦᠬᠡᠨ ᠴᠦ᠍ ᠦᠵᠡᠭᠦᠯᠬᠦ ᠦᠭᠡᠢ ᠪᠡᠷ ᠰᠢᠭᠤᠳ ᠣᠭᠴᠣ ᠲᠠᠰᠤ ᠪᠠᠷ ᠮᠡᠬᠡᠯᠡᠨ ᠣᠷᠣᠵᠤ ᠪᠠᠢᠯᠳᠤᠭᠠᠳ ᠴᠢᠨᠠᠳᠤᠰ ᠤ᠋ᠨ ᠳᠠᠢᠰᠤᠨ ᠤ᠋ ᠰᠦᠷ ᠢ᠋ ᠳᠠᠷᠤᠳᠠᠭ ᠪᠥᠯᠥᠭᠡ᠃ ᠬᠠᠭᠠᠨ ᠦᠨᠡᠬᠡᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠴᠡ ᠡᠨᠡ ᠮᠡᠲᠦ ᠠᠶᠤᠪᠠᠰᠤ ᠤᠭ ᠠ᠋ᠴᠠ ᠮᠥᠩᠭᠥᠯᠵᠢ ᠨᠠᠷ ᠤ᠋ᠨ ᠠᠢᠯᠠᠳᠬᠠᠭᠰᠠᠨ ᠢ᠋ᠶ᠋ᠠᠷ ᠬᠠᠭᠠᠨ ᠤᠯᠤᠰ ᠲᠤᠷ ᠬᠣᠴᠣᠷᠤᠭᠠᠳ ᠬᠠᠷᠢᠨ ᠬᠠᠲᠤᠨ ᠢ᠋ᠶ᠋ᠠᠷ ᠴᠡᠷᠢᠭ ᠠᠪᠤᠭᠤᠯᠤᠨ ᠢᠷᠡᠭᠰᠡᠨ ᠪᠥᠭᠡᠰᠦ ᠳᠡᠭᠡᠷᠡ ᠦᠭᠡᠢ ᠦᠦ ? ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠮᠠᠰᠢ ᠢᠴᠢᠩᠭᠦᠷᠡᠨ ᠲᠠᠴᠢᠶᠠᠳᠠᠭᠠᠳ : 《ᠮᠠᠷᠭᠠᠲᠠ ᠳᠠᠷᠤᠢ ᠬᠠᠷᠢᠯᠴᠠᠨ ᠲᠤᠯᠭᠠᠯᠴᠠᠬᠤ ᠪᠢᠴᠢᠭ ᠢᠯᠡᠭᠡ᠂ ᠪᠢ ᠪᠡᠶᠡ ᠪᠡᠷ ᠭᠠᠷᠴᠤ ᠬᠠᠳᠬᠤᠯᠳᠤᠮᠤᠢ ! 》 ᠭᠡᠮᠡᠨ ᠵᠠᠷᠯᠠᠪᠠ᠃ ᠡᠭᠦᠨᠡ ᠬᠤᠯᠠᠰᠤᠪᠴᠢ ᠪᠠᠶᠠᠷᠯᠠᠵᠤ ᠠᠢᠯᠠᠳᠬᠠᠷᠤᠨ : 《ᠲᠦᠰᠢᠮᠡᠯ ᠪᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠦᠨᠳᠦᠰᠦᠨ ᠢ᠋ ᠨᠢᠭᠡᠨᠲᠡ ᠲᠤᠷᠰᠢᠵᠤ ᠣᠯᠪᠠ᠃ ᠲᠡᠳᠡᠨ ᠦ᠌ ᠬᠤᠢᠬᠤᠷ ᠠᠷᠭᠠ ᠶ᠋ᠢ ᠲᠣᠭᠲᠠᠬᠤᠢ ᠶ᠋ᠢᠨ ᠤᠷᠢᠳ ᠭᠡᠨᠡᠳᠲᠡ ᠪᠠᠢᠯᠳᠤᠪᠠᠰᠤ ᠯᠠᠪ ᠳᠡᠢᠯᠦᠮᠦᠢ᠃ 》ᠭᠡᠮᠡᠨ ᠭᠠᠷᠴᠤ ᠢᠷᠡᠨ ᠮᠥᠨ ᠬᠦ᠌ ᠢᠳᠡᠷ ᠳᠣᠪᠣ ᠪᠠᠷ ᠪᠠᠢᠯᠳᠤᠬᠤ ᠪᠢᠴᠢᠭ ᠢ᠋ ᠢᠯᠡᠭᠡᠪᠡ᠃ ᠢᠳᠡᠷ ᠳᠣᠪᠣ ᠨᠢᠭᠡᠨᠲᠡ ᠪᠠᠢᠯᠳᠤᠬᠤ ᠪᠢᠴᠢᠭ ᠢ᠋ ᠬᠦᠷᠭᠡᠵᠦ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠢᠳᠡᠵᠦ᠂ ᠱᠠᠩ ᠬᠡᠰᠢᠭ ᠢ᠋ ᠣᠯᠵᠤ ᠢᠷᠡᠭᠡᠳ ᠦᠨᠡᠨ ᠤᠴᠢᠷ ᠢ᠋ ᠲᠠᠢᠶᠠᠩ ᠬᠠᠭᠠᠨ ᠳ᠋ᠤᠷ ᠪᠦᠷᠢᠨᠡ ᠮᠡᠳᠡᠭᠦᠯᠪᠡ᠃ ᠲᠠᠢᠶᠠᠩ ᠬᠠᠭᠠᠨ ᠮᠥᠨ ᠬᠡᠷᠡᠭ ᠪᠣᠯᠭᠠᠨ ᠠᠭᠤᠷᠯᠠᠭᠰᠠᠨ ᠦᠭᠡᠢ᠂ ᠬᠡᠪ ᠢ᠋ᠶ᠋ᠡᠷ ᠬᠣᠰᠢᠭᠤᠴᠢ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠯᠡᠭᠡᠪᠡ᠃ ᠵᠢᠴᠢ ᠵᠡᠯᠮᠡ᠂ ᠲᠡᠢᠨ ᠰᠠᠩ ᠨᠠᠷ ᠮᠤᠬᠤᠯᠢ ᠶ᠋ᠢᠨ ᠪᠢᠴᠢᠭ ᠪᠡᠯᠡᠭ ᠢ᠋ ᠠᠪᠴᠤ ᠶᠠᠪᠤᠨ᠂ ᠭᠤᠷᠪᠠᠨ ᠬᠣᠨᠣᠭ ᠲᠤᠷ ᠴᠢᠪᠬᠢᠲᠡᠯᠡ ᠵᠡᠯᠮᠡ ᠭᠡᠷ ᠲᠡᠭᠡᠨ ᠬᠦᠷᠦᠭᠰᠡᠨ ᠲᠤᠯᠠ ᠪᠢᠴᠢᠭ ᠢ᠋ ᠨᠡᠭᠡᠭᠡᠵᠦ ᠦᠵᠡᠪᠡᠰᠦ ᠦᠭᠡ ᠢᠨᠦ: 《 ᠵᠠᠯᠮᠠ ᠴᠢ ᠭᠡᠷ ᠡᠷᠦᠬᠡ ᠪᠡᠨ ᠪᠦᠷᠢᠨ ᠢ᠋ᠶ᠋ᠡᠷ ᠠᠪᠴᠤ ᠮᠢᠨᠦ ᠳᠡᠭᠦᠦ ᠲᠡᠢᠨ ᠰᠠᠩ ᠢ᠋ ᠠᠯᠠᠮᠤᠢ ᠭᠡᠮᠡᠨ ᠠᠶᠤᠯᠭᠠᠵᠤ ᠡᠭᠡᠭᠦᠯᠦᠭᠡᠳ ᠨᠠᠢ᠍ᠮᠠᠨ ᠤᠯᠤᠰ ᠲᠤᠷ ᠤᠷᠭᠤᠨ ᠣᠴᠢᠵᠤ᠂ ᠤᠷᠢᠲᠠᠨ ᠪᠦᠲᠦᠨᠡ ᠶ᠋ᠢᠨ ᠢᠯᠠᠭᠤᠭᠰᠠᠨᠠ ᠤᠴᠠᠷᠠᠵᠤ ᠮᠢᠨᠦ ᠪᠢᠴᠢᠭ ᠢ᠋ ᠦᠵᠡᠭᠦᠯᠵᠦ᠂ ᠬᠠᠮᠲᠤ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠡᠴᠢᠵᠦ ᠡᠳᠡᠭᠡᠷ ᠡᠳ᠋ ᠢ᠋ ᠵᠠᠮᠤᠬᠠ ᠲᠡᠷᠢᠭᠦᠯᠡᠨ ᠡᠳ᠋ ᠲᠣᠷ ᠬᠣᠪᠳᠣᠭ ᠲᠦᠰᠢᠮᠡᠳ ᠢ᠋ ᠬᠢᠨᠠᠨ ᠦᠵᠡᠵᠦ ᠰᠦᠢᠳᠬᠡᠭᠡᠳ ᠢᠲᠡᠭᠡᠯ ᠳ᠋ᠦ᠍ᠷ ᠣᠷᠣᠵᠤ᠂ ᠭᠡᠷ ᠦ᠋ᠨ ᠠᠮᠠᠨ ᠢ᠋ᠶ᠋ᠠᠨ ᠨᠠᠢ᠍ᠮᠠᠨ ᠳ᠋ᠤᠷ ᠰᠠᠭᠤᠯᠭᠠᠭᠠᠳ ᠲᠠᠢᠶᠠᠩ ᠬᠠᠭᠠᠨ ᠢ᠋ ᠰᠢᠭᠤᠳ ᠪᠠᠢᠯᠳᠤᠬᠤ ᠠᠷᠭᠠ ᠪᠠᠷ ᠶᠠᠪᠤ᠂ ᠣᠯᠠᠨ ᠳ᠋ᠤᠷ ᠠᠯᠳᠠᠷᠰᠢᠭᠤᠯᠬᠤᠢ ᠳ᠋ᠤᠷ ᠢ᠋ᠶ᠋ᠠᠨ ᠮᠥᠩᠭᠥᠯᠵᠢ ᠪᠠ ᠳ᠋ᠠᠳᠠᠳᠤᠩᠭᠠ ᠨᠠᠷ ᠲᠤᠷ ᠮᠥᠨ ᠶᠣᠰᠣᠭᠠᠷ ᠨᠢᠭᠡᠨ ᠬᠤᠪᠢ ᠠᠰᠢᠭ᠋ ᠥᠭᠪᠡ ᠭᠡᠵᠦ ᠬᠤᠳᠠᠯ ᠢ᠋ᠶ᠋ᠠᠷ ᠠᠯᠳᠠᠷᠰᠢᠭᠤᠯ᠃ ᠡᠢᠨ ᠪᠣᠯᠪᠠᠰᠤ ᠲᠡᠳᠡᠨ ᠢ᠋ ᠲᠠᠢᠶᠠᠩ ᠬᠠᠭᠠᠨ ᠰᠡᠵᠢᠭᠯᠡᠵᠦ ᠦᠭᠡ ᠶ᠋ᠢ ᠦᠯᠦ ᠠᠪᠤᠮᠤᠢ᠃ ᠲᠡᠳᠡ ᠬᠡᠷᠪᠡ ᠲᠠᠢᠶᠠᠩ ᠬᠠᠭᠠᠨ ᠢ᠋ ᠬᠣᠷᠢᠭ᠍ᠯᠠᠨ ᠡᠰᠡ ᠵᠣᠭᠰᠣᠭᠠᠪᠠᠰᠤ ᠴᠡᠷᠢᠭ ᠢ᠋ ᠡᠪᠳᠡᠬᠦᠢ ᠳ᠋ᠦ᠍ᠷ ᠮᠠᠰᠢ ᠬᠢᠯᠪᠠᠷ᠂ ᠨᠡᠩ ᠪᠠᠰᠠ ᠴᠡᠷᠢᠭ ᠦ᠋ᠨ ᠭᠠᠵᠠᠷ ᠬᠦᠷᠪᠡᠰᠦ ᠲᠥᠷᠭᠡᠨᠡ ᠪᠠᠢᠯᠳᠤᠬᠤ ᠶ᠋ᠢ ᠡᠷᠬᠢᠯᠡ᠂ ᠬᠡᠷᠪᠡ ᠤᠳᠠᠪᠠᠰᠤ ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠠᠰᠢᠭ᠋ ᠦᠭᠡᠢ ᠪᠣᠯᠤᠮᠤᠢ᠃ ᠶᠡᠬᠡ ᠭᠠᠪᠢᠶᠠ ᠪᠣᠯᠠᠢ᠂ ᠪᠢᠲᠡᠭᠡᠢ ᠣᠮᠲᠣᠭᠠᠢᠯᠠ ᠰᠠᠢᠲᠤᠷ ᠨᠠᠷᠢᠪᠴᠢᠯᠠ ! 》 ᠬᠡᠮᠡᠵᠦᠬᠦᠢ᠃ ᠲᠡᠳᠦᠢ ᠵᠠᠯᠮᠠ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠳᠠᠷᠤᠢ ᠭᠡᠷ ᠦ᠋ᠨ ᠬᠣᠲᠠᠯᠠᠭᠠᠷ ᠢ᠋ ᠠᠪᠴᠤ ᠪᠦᠲᠦᠨᠡ ᠶ᠋ᠢᠨ ᠵᠦᠭ ᠡᠴᠢᠬᠦᠶᠡ ᠵᠠᠮ ᠳ᠋ᠤᠷ ᠮᠤᠬᠤᠯᠢ ᠶ᠋ᠢᠨ ᠳᠡᠭᠦᠦ ᠶ᠋ᠢ ᠪᠠᠷᠢᠵᠤ ᠬᠦᠯᠢᠭᠰᠡᠨᠡ ᠲᠡᠢᠨ ᠰᠠᠩ ᠶᠡᠬᠡᠯᠡ ᠰᠣᠴᠢᠵᠤ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠵᠡᠯᠮᠡ ᠥᠭᠦᠯᠡᠷᠦᠨ: 《ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠨ ᠪᠢᠳᠡᠨ ᠦ᠌ ᠶᠢᠰᠦᠨ ᠲᠦᠰᠢᠮᠡᠯ ᠪᠥᠭᠡᠲᠡᠯᠡ ᠲᠡᠷᠡ ᠭᠠᠭᠴᠠ ᠴᠢᠨᠦ ᠠᠬᠠ ᠶ᠋ᠢ ᠡᠷᠬᠢᠯᠡᠬᠦ ᠲᠤᠯᠠ ᠦᠯᠡᠭᠰᠡᠨ ᠪᠢᠳᠡ ᠨᠠᠢ᠍ᠮᠠᠭᠤᠯᠠ ᠴᠥᠮ ᠤᠷᠪᠠᠬᠤ ᠪᠠᠷ ᠲᠣᠭᠲᠠᠪᠠ᠃ ᠴᠢᠮᠠᠢ ᠣᠳᠣ ᠠᠯᠠᠭᠠᠳ ᠨᠠᠢ᠍ᠮᠠᠨ ᠳ᠋ᠤᠷ ᠳᠠᠭᠠᠮᠤᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠢᠨ ᠰᠠᠩ ᠳᠣᠲᠣᠷᠠ ᠪᠠᠨ ᠡᠨᠡ ᠯᠠᠪ ᠮᠢᠨᠦ ᠠᠬᠠ ᠶ᠋ᠢᠨ ᠠᠷᠭᠠ᠂ ᠪᠢ ᠠᠶᠤᠪᠠᠰᠤ ᠪᠠᠷᠠᠪᠠ ᠭᠡᠮᠡᠨ ᠣᠯᠠᠨ ᠤ᠋ ᠡᠮᠦᠨᠡ ᠵᠠᠭᠤᠨ ᠵᠦᠢᠯ ᠢ᠋ᠶ᠋ᠡᠷ ᠭᠤᠶᠤᠬᠤᠢ ᠳ᠋ᠤᠷ ᠵᠡᠯᠮᠡ ᠰᠠᠶᠢ ᠲᠠᠯᠪᠢᠨ ᠭᠠᠷᠭᠠᠭᠠᠳ ᠡᠮᠡ ᠦᠷᠡ ᠪᠡᠨ ᠠᠪᠴᠤ ᠨᠠᠢ᠍ᠮᠠᠨ ᠤ᠋ ᠵᠦᠭ ᠢᠷᠡᠬᠦᠢ ᠳ᠋ᠦ᠍ᠷ ᠵᠠᠮ ᠳ᠋ᠠᠭᠠᠨ ᠨᠠᠢ᠍ᠮᠠᠨ ᠤ᠋ ᠣᠯᠠᠨᠠ : ᠪᠧᠲ᠋ᠠ᠋ ᠤᠯᠤᠰ ᠠ᠋ᠴᠠ ᠤᠷᠪᠠᠵᠤ ᠨᠠᠢ᠍ᠮᠠᠨ ᠤ᠋ ᠲᠠᠢᠰᠢ ᠲᠠᠢᠪᠤᠤ ᠮᠥᠩᠭᠥᠯᠵᠢ ᠳ᠋ᠠᠳᠠᠳᠤᠩᠭᠠ ᠨᠠᠷ ᠲᠤᠷ ᠶᠢᠰᠦᠨ ᠵᠦᠢᠯ ᠦ᠋ᠨ ᠲᠠᠰᠤᠷᠬᠠᠢ ᠡᠷᠳᠡᠨᠢ ᠬᠦᠷᠭᠡᠵᠦ ᠳᠠᠭᠠᠮᠤᠢ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠤᠭᠰᠠᠭᠠᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠢᠷᠡᠪᠡᠰᠦ ᠴᠢᠪᠬᠢᠲᠡᠯᠡ ᠪᠦᠲᠦᠨᠡ ᠶ᠋ᠢᠨ ᠢᠯᠠᠭᠤᠭᠰᠠᠨ ᠪᠠᠰᠠ ᠢᠷᠡᠭᠰᠡᠨ ᠲᠤᠯᠠ ᠳᠠᠷᠤᠢ ᠲᠡᠭᠦᠨ ᠯᠦ᠍ᠭᠡ ᠵᠥᠪᠯᠡᠵᠦ ᠵᠠᠮᠤᠬᠠ ᠳ᠋ᠤᠷ ᠤᠴᠠᠷᠠᠵᠤ ᠮᠢᠩᠭᠠᠨ ᠯᠠᠩ ᠮᠥᠩᠭᠥ ᠪᠠᠷᠢᠵᠤ : 《 ᠪᠧᠲ᠋ᠠ᠋ ᠶ᠋ᠢᠨ ᠡᠵᠡᠨ ᠲᠡᠮᠦᠵᠢᠨ ᠣᠨᠴᠠ ᠲᠡᠭᠦᠨ ᠦ᠌ ᠵᠢᠨᠦᠩ ᠡᠴᠡ ᠪᠤᠰᠤ ᠶ᠋ᠢ ᠬᠦᠨᠳᠦ ᠦᠵᠡᠬᠦ ᠦᠭᠡᠢ ᠲᠤᠯᠠ ᠪᠢ ᠲᠡᠭᠦᠨ ᠳ᠋ᠦ᠍ᠷ ᠱᠠᠩᠨᠠᠭᠰᠠᠨ ᠶᠠᠭᠤᠮᠠ ᠶ᠋ᠢ ᠮᠡᠬᠡᠯᠡᠨ ᠠᠪᠴᠤ ᠡᠮᠡ ᠦᠷᠡ ᠪᠡᠨ ᠠᠪᠤᠨ ᠡᠨᠳᠡ ᠳᠠᠭᠠᠷᠠ ᠢᠷᠡᠪᠡ᠃ ᠬᠡᠷᠪᠡ ᠦᠨᠡᠬᠡᠷ ᠪᠠᠭᠲᠠᠭᠠᠬᠤ ᠪᠣᠯᠪᠠᠰᠤ ᠮᠠᠨ ᠤ᠋ ᠨᠥᠬᠥᠭᠡ ᠦᠯᠡᠳᠡᠭᠰᠡᠨ ᠳᠣᠯᠣᠭᠠᠨ ᠬᠤᠷᠰᠢᠶᠠ ᠨᠠᠷ ᠮᠥᠨ ᠡᠨᠡ ᠤᠳᠠᠭᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠳ᠋ᠤᠷ ᠴᠢᠳᠠᠪᠠᠰᠤ ᠲᠡᠮᠦᠵᠢᠨ ᠪᠠ ᠵᠢᠨᠦᠩ ᠬᠣᠶᠠᠭᠤᠯᠠ ᠶ᠋ᠢ ᠪᠠᠷᠢᠵᠤ ᠳᠠᠭᠠᠰᠤᠭᠠᠢ ᠬᠡᠮᠡᠮᠦᠢ᠃ ᠠᠳᠠᠭ ᠲᠠᠭᠠᠨ ᠶᠡᠬᠡ ᠴᠡᠷᠢᠭ ᠬᠦᠷᠦᠮᠡᠭᠴᠡ ᠪᠠᠢᠯᠳᠤᠭᠴᠢ ᠪᠣᠯᠤᠨ ᠳᠠᠭᠠᠰᠤᠭᠠᠢ ᠬᠡᠮᠡᠮᠦᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠪᠠᠰᠠ ᠨᠢᠭᠡᠨ ᠰᠠᠨᠠᠭᠠᠨ ᠣᠷᠣᠵᠤ ᠰᠠᠨᠠᠷᠤᠨ : 《ᠡᠭᠦᠨ ᠢ᠋ ᠡᠳᠡᠭᠡᠷ ᠢ᠋ ᠳᠡᠭᠡᠭᠰᠢ ᠨᠡᠪᠲᠡᠷᠡᠭᠦᠯᠪᠡᠰᠦ᠂ ᠬᠣᠵᠢᠮ ᠴᠡᠷᠢᠭ ᠳᠡᠢᠯᠪᠡᠰᠦ ᠴᠥᠮ ᠡᠨᠡ ᠵᠡᠯᠮᠡ ᠶ᠋ᠢᠨ ᠭᠠᠪᠢᠶᠠ ᠪᠣᠯᠤᠮᠤᠢ᠂ ᠡᠭᠦᠨ ᠢ᠋ ᠴᠢᠦᠢ ᠴᠦ᠍ ᠯᠢᠦᠢ ᠂ ᠴᠢᠦᠢ ᠱᠢ ᠯᠢ᠂ ᠬᠣᠯᠠᠰᠤᠪᠴᠢ ᠨᠠᠷ ᠯᠤᠭᠠ ᠵᠥᠪᠯᠡᠵᠦ ᠡᠨᠡ ᠭᠠᠪᠢᠶᠠ ᠶ᠋ᠢ ᠪᠢᠳᠡ ᠠᠪᠰᠤᠭᠠᠢ ! 》 ᠭᠡᠮᠡᠨ ᠰᠥᠨᠢ ᠡᠳᠡ ᠭᠤᠷᠪᠠᠭᠤᠯᠠ ᠶ᠋ᠢ ᠥᠪᠡᠷ ᠦ᠋ᠨ ᠪᠠᠭᠤᠳᠠᠯ ᠳ᠋ᠠᠭᠠᠨ ᠵᠠᠯᠠᠵᠤ ᠡᠳᠡᠭᠡᠷ ᠤᠴᠢᠷ ᠢ᠋ ᠪᠦᠷᠢᠨᠡ ᠬᠡᠯᠡᠵᠦ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠴᠢᠦᠢ ᠴᠦ᠍ ᠯᠢᠦᠢ ᠪᠠᠰᠠ ᠨᠢᠭᠡᠨ ᠨᠢᠭᠤᠴᠠ ᠠᠷᠭᠠ ᠣᠯᠵᠤ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠬᠡᠷᠡᠭᠯᠡᠰᠦᠭᠡᠢ ᠬᠡᠮᠡᠪᠡ᠂ ᠶᠠᠮᠪᠠᠷ ᠰᠠᠨᠠᠭᠠ ᠬᠡᠮᠡᠪᠡᠰᠦ: ᠴᠢᠦᠢ ᠴᠦ᠍ ᠯᠢᠦᠢ ᠤᠭ ᠠ᠋ᠴᠠ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠡᠴᠢᠭᠡ ᠬᠥᠪᠡᠭᠦᠨ ᠦ᠌ ᠶᠡᠬᠡ ᠬᠠᠭᠠᠨ ᠰᠠᠭᠤᠷᠢᠨ ᠡᠵᠡᠯᠡᠬᠦᠢ ᠳ᠋ᠦ᠍ᠷ ᠮᠠᠰᠢ ᠠᠮᠤᠷ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠥᠭᠡ᠃ ᠡᠳᠦᠭᠡ ᠡᠳᠡᠨ ᠦ᠌ ᠡᠨᠡ ᠵᠥᠪᠯᠡᠯ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠢ᠋ ᠥᠳᠥᠭᠡᠵᠦ ᠰᠠᠮᠠᠭᠤᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠴᠢᠯᠥᠭᠡ ᠦᠵᠡᠵᠦ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠰᠠᠭᠤᠷᠢ ᠶ᠋ᠢ ᠪᠤᠯᠢᠶᠠᠰᠤᠭᠠᠢ ᠭᠡᠮᠡᠨ ᠪᠣᠳᠣᠭᠠᠳ ᠳᠠᠷᠤᠢ ᠲᠡᠳᠡᠨ ᠦ᠌ ᠵᠥᠪᠯᠡᠯ ᠢ᠋ ᠦᠵᠡᠬᠦᠶᠡ ᠵᠠᠮᠤᠬᠠ ᠥᠭᠦᠯᠡᠷᠦᠨ: 《ᠡᠳᠦᠭᠡ ᠵᠡᠯᠮᠡ ᠶ᠋ᠢᠨ ᠬᠡᠯᠡᠬᠦ ᠪᠡᠷ ᠪᠧᠲ᠋ᠠ᠋ ᠶ᠋ᠢᠨ ᠶᠢᠰᠦᠨ ᠡᠩ ᠦ᠋ᠨ ᠲᠦᠰᠢᠮᠡᠳ ᠡᠴᠡ ᠮᠤᠬᠤᠯᠢ ᠶ᠋ᠢ ᠭᠠᠷᠭᠠᠪᠠᠰᠤ ᠪᠤᠰᠤ ᠠᠨᠤ ᠴᠥᠮ ᠰᠡᠳᠬᠢᠯ ᠬᠠᠵᠠᠢᠵᠤᠬᠤᠢ᠃ ᠡᠳᠦᠭᠡ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠬᠠᠭᠠᠨ ᠡᠵᠡᠨ ᠢ᠋ ᠰᠠᠢᠲᠤᠷ ᠰᠢᠪᠲᠠᠵᠤ ᠴᠣᠬᠢᠨ ᠪᠠᠢᠯᠳᠤᠪᠠᠰᠤ ᠬᠤᠢᠬᠤᠷ ᠠᠷᠭᠠᠲᠤ ᠮᠤᠬᠤᠯᠢ ᠶ᠋ᠢᠨ ᠠᠷᠭᠠ ᠬᠡᠷᠡᠭᠯᠡᠨ ᠵᠠᠪᠳᠤᠬᠤ ᠶ᠋ᠢᠨ ᠤᠷᠢᠳ ᠳᠠᠷᠤᠭᠠᠳ ᠳᠠᠬᠢᠨ ᠦᠯᠡᠭᠰᠡᠨ ᠳᠣᠯᠣᠭᠠᠨ ᠡᠩ ᠦ᠋ᠨ ᠲᠦᠰᠢᠮᠡᠳ ᠢ᠋ ᠣᠷᠣᠭᠤᠯᠤᠨ ᠠᠪᠴᠤ ᠬᠠᠭᠠᠨ ᠡᠵᠡᠨ ᠳ᠋ᠦ᠍ᠷ ᠤᠴᠠᠷᠠᠭᠤᠯᠤᠯ ᠦᠭᠡᠢ ᠪᠡᠷ ᠴᠥᠮ ᠠᠯᠠᠪᠠᠰᠤ᠂ ᠡᠨᠡ ᠶᠡᠬᠡ ᠭᠠᠪᠢᠶᠠ ᠴᠥᠮ ᠮᠠᠨ ᠤ᠋ ᠪᠣᠯᠤᠮᠤᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠦᠭᠦᠳᠡᠭᠡᠷ ᠪᠠᠶᠠᠰᠤᠯᠴᠠᠨ ᠵᠡᠯᠮᠡ ᠶ᠋ᠢ ᠳᠠᠭᠤᠳᠠᠨ ᠤᠴᠠᠷᠠᠭᠰᠠᠨᠠ᠂ ᠵᠠᠯᠮᠠ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠶ᠋ᠢ ᠴᠢᠦᠢ ᠴᠦ᠍ ᠯᠢᠦᠢ᠂ ᠴᠢᠦᠢ ᠱᠢ ᠯᠢ᠂ ᠬᠣᠯᠠᠰᠤᠪᠴᠢ ᠳ᠋ᠤᠷ ᠪᠠᠷᠢᠵᠤ : 《ᠪᠢᠳᠡ ᠨᠢᠭᠡᠨ ᠠᠳᠠᠯᠢ ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠨ ᠶᠢᠰᠦᠨ ᠲᠦᠰᠢᠮᠡᠯ ᠪᠥᠭᠡᠲᠡᠯᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠣᠨᠴᠠ ᠮᠤᠬᠤᠯᠢ ᠭᠠᠭᠴᠠᠭᠠᠷ ᠢ᠋ ᠡᠷᠭᠦᠵᠦ᠂ ᠪᠤᠰᠤ ᠶ᠋ᠢ ᠠᠨᠤ ᠨᠢᠳᠦᠨ ᠳ᠋ᠡᠭᠡᠨ ᠬᠠᠪᠴᠢᠬᠤ ᠦᠭᠡᠢ᠂ ᠡᠳᠦᠭᠡ ᠶᠡᠬᠡ ᠤᠯᠤᠰ ᠤ᠋ᠨ ᠬᠣᠷᠢᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠰᠣᠨᠣᠰᠴᠤ ᠵᠠᠩᠵᠤᠨ ᠴᠡᠷᠢᠭ ᠴᠥᠮ ᠠᠶᠤᠯᠳᠤᠮᠤᠢ᠃ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠲᠦᠷᠭᠡᠯᠡᠪᠡᠰᠦ ᠵᠣᠬᠢᠮᠤᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠦᠭᠦᠳᠡᠭᠡᠷ ᠪᠠᠶᠠᠷᠯᠠᠨ ᠵᠥᠪᠯᠡᠨ ᠲᠣᠭᠲᠠᠪᠠ᠃ ᠲᠡᠳᠦᠢ ᠵᠠᠮᠤᠬᠠ ᠬᠡᠷᠡᠭ ᠪᠦᠲᠦᠭᠰᠡᠨ ᠬᠣᠢᠨᠠ ᠵᠡᠯᠮᠡ ᠶ᠋ᠢ ᠮᠥᠨ ᠠᠯᠠᠵᠤ ᠭᠠᠪᠢᠶᠠ ᠶ᠋ᠢ ᠪᠤᠯᠢᠶᠠᠰᠤᠭᠠᠢ ᠭᠡᠮᠡᠨ ᠲᠠᠢᠶᠠᠩ ᠬᠠᠭᠠᠨ ᠠ᠋ᠴᠠ ᠨᠢᠭᠤᠵᠤ ᠡᠰᠡ ᠮᠡᠳᠡᠭᠦᠯᠪᠡᠢ᠃
ᠲᠡᠨᠳᠡᠴᠡ ᠬᠣᠶᠠᠷ ᠡᠲᠡᠭᠡᠳ ᠮᠠᠷᠭᠠᠲᠠ ᠪᠠᠢᠯᠳᠤᠬᠤᠢ ᠶ᠋ᠢᠨ ᠲᠤᠯᠠ ᠴᠡᠷᠢᠭ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠨ ᠪᠡᠯᠡᠳᠬᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠤᠷᠢᠳᠤ ᠵᠢᠯ ᠬᠡᠷᠡᠢᠳ ᠠᠢᠮᠠᠭ ᠠ᠋ᠴᠠ ᠲᠠᠢᠽᠦ ᠶ᠋ᠢᠨ ᠲᠥᠷᠥᠯ ᠠᠷᠳᠠ᠂ ᠬᠤᠰᠠᠭᠤᠷ᠂ ᠳᠡᠯᠵᠢᠲᠠᠢ ᠭᠤᠷᠪᠠᠭᠤᠯᠠ ᠶ᠋ᠢ ᠬᠤᠯᠠᠭᠤᠵᠤ ᠡᠯᠰᠡᠷᠡ ᠡᠴᠢᠭᠰᠡᠨ ᠣᠯᠣᠩᠬᠤ᠂ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠶ᠋ᠢ ᠪᠡᠶᠡ ᠶ᠋ᠢᠨ ᠣᠢᠷᠠ ᠠᠪᠴᠤ ᠶᠠᠪᠤᠬᠤ ᠲᠤᠯᠠ ᠲᠡᠳᠡ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠵᠤ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠲᠠ ᠬᠣᠶᠠᠭᠤᠯᠠ ᠶ᠋ᠢ ᠡᠳᠦᠭᠡ ᠬᠡᠷᠡᠭᠯᠡᠵᠦ ᠭᠠᠪᠢᠶᠠ ᠪᠦᠲᠦᠭᠡᠯᠭᠡᠬᠦ ᠶ᠋ᠢᠨ ᠨᠢᠭᠡᠨ ᠵᠠᠮ ᠪᠣᠢ᠂ ᠮᠢᠨᠦ ᠤᠷᠢᠳᠤ ᠡᠳᠦᠷ ᠦ᠋ᠨ ᠠᠯᠠᠭᠰᠠᠨ ᠦᠭᠡᠢ ᠬᠡᠰᠢᠭ ᠪᠠ ᠡᠳᠦᠭᠡ ᠬᠡᠳᠦᠢᠴᠢᠨᠡᠭᠡᠨ ᠡᠳᠦᠷ ᠬᠠᠢᠷᠠᠯᠠᠨ ᠶᠠᠪᠤᠭᠰᠠᠨ ᠢ᠋ ᠪᠣᠳᠣᠪᠠᠰᠤ ᠲᠠ ᠬᠣᠶᠠᠭᠤᠯᠠ ᠳ᠋ᠤᠷ ᠨᠢᠭᠡᠨ ᠨᠠᠷᠢᠨ ᠠᠷᠭᠠ ᠰᠤᠷᠭᠠᠵᠤ ᠬᠡᠷᠡᠭᠯᠡᠰᠦᠭᠡᠢ᠃ ᠲᠠ ᠬᠢᠴᠢᠶᠡᠨ ᠵᠢᠳᠬᠦᠵᠦ ᠦᠨᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠶᠠᠪᠤᠮᠤᠢ ᠤᠤ ᠦᠭᠡᠢ ᠦᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠷ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠮᠥᠷᠭᠥᠨ ᠥᠭᠦᠯᠡᠷᠦᠨ : 《ᠵᠢᠨᠦᠩ ᠡᠵᠡᠨ ᠦ᠌ ᠲᠡᠭᠷᠢ ᠭᠠᠵᠠᠷ ᠮᠡᠲᠦ ᠶᠡᠬᠡ ᠬᠡᠰᠢᠭ ᠢ᠋ ᠬᠠᠷᠠᠬᠠᠨ ᠬᠠᠷᠢᠭᠤᠯᠬᠤ ᠭᠠᠵᠠᠷ ᠢ᠋ ᠣᠯᠬᠤ ᠦᠭᠡᠢ ᠪᠦᠬᠦᠢ ᠳ᠋ᠦ᠍ᠷ ᠬᠡᠷᠪᠡ ᠨᠢᠭᠡᠨ ᠵᠦᠢᠯ ᠢ᠋ ᠲᠤᠰᠢᠶᠠᠪᠠᠰᠤ ᠡᠷᠬᠡᠪᠰᠢ ᠠᠮᠢ ᠪᠠᠨ ᠲᠠᠯᠪᠢᠵᠤ ᠦᠬᠦᠨ ᠵᠢᠳᠬᠦᠨ ᠭᠠᠪᠢᠶᠠ ᠪᠦᠲᠦᠭᠡᠶᠡ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠥᠭᠦᠯᠡᠷᠦᠨ : 《ᠡᠳᠦᠭᠡ ᠵᠠᠮᠤᠬᠠ ᠶ᠋ᠢᠨ ᠬᠤᠷᠢᠶᠠᠭᠰᠠᠨ ᠤᠯᠤᠰ ᠪᠠᠭᠠ ᠠᠢᠮᠠᠭ ᠪᠣᠯᠬᠤ ᠱᠠᠯᠵᠢᠲᠠᠢ ᠠᠢᠮᠠᠭ ᠪᠣᠯᠬᠤ ᠳᠥᠴᠢᠭᠡᠳ ᠬᠥᠮᠦᠨ ᠢ᠋ ᠡᠳᠦᠭᠡ ᠪᠢ ᠬᠡᠷᠡᠭᠯᠡᠰᠦᠭᠡᠢ ᠭᠡᠮᠡᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠᠪᠴᠤ ᠢᠷᠡᠪᠡ᠃ ᠲᠠ ᠬᠣᠶᠠᠭᠤᠯᠠ ᠳ᠋ᠤᠷ ᠡᠨᠡ ᠳᠥᠴᠢᠭᠡᠳ ᠬᠥᠮᠦᠨ ᠢ᠋ ᠠᠯᠠᠲᠤᠭᠠᠢ ᠭᠡᠮᠡᠨ ᠲᠤᠰᠢᠶᠠᠰᠤᠭᠠᠢ᠂ ᠲᠠ ᠬᠣᠶᠠᠭᠤᠯᠠ ᠨᠠᠳᠠ ᠠ᠋ᠴᠠ ᠦᠬᠦᠨ ᠭᠤᠶᠤᠵᠤ ᠲᠡᠳᠡᠨ ᠦ᠌ ᠠᠮᠢᠨ ᠢ᠋ ᠠᠪᠤᠷᠠ᠂ ᠲᠡᠢᠨ ᠪᠣᠯᠪᠠᠰᠤ ᠲᠡᠷᠡ ᠳᠥᠴᠢᠭᠡᠳ ᠬᠥᠮᠦᠨ ᠢ᠋ ᠲᠠ ᠬᠣᠶᠠᠭᠤᠯᠠ ᠳ᠋ᠤᠷ ᠵᠠᠬᠢᠷᠤᠭᠤᠯᠵᠤ ᠨᠠᠢ᠍ᠮᠠᠨ ᠤ᠋ ᠵᠠᠮᠤᠬᠠ ᠶ᠋ᠢᠨ ᠳᠣᠣᠷᠠ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠤᠷᠪᠠᠭᠰᠠᠨ ᠢ᠋ᠶ᠋ᠠᠷ ᠢᠯᠡᠭᠡᠪᠡᠰᠦ᠂ ᠲᠡᠨᠳᠡ ᠵᠠᠮᠤᠬᠠ ᠶ᠋ᠢᠨ ᠳᠣᠣᠷᠠ ᠪᠠᠰᠠ ᠮᠠᠨ ᠤ᠋ ᠵᠠᠯᠮᠠ ᠪᠣᠢ᠃ ᠲᠡᠭᠦᠨ ᠳ᠋ᠦ᠍ᠷ ᠲᠠ ᠬᠣᠶᠠᠭᠤᠯᠠ ᠮᠢᠨᠦ ᠪᠢᠴᠢᠭ ᠢ᠋ ᠥᠭᠭᠦᠭᠡᠳ ᠲᠡᠭᠦᠨ ᠯᠦ᠋ᠭᠡ ᠵᠠᠮᠤᠬᠠ ᠶ᠋ᠢ ᠳᠠᠭᠠᠵᠤ ᠶᠠᠪᠤᠭᠲᠤᠨ᠂ ᠵᠠᠮᠤᠬᠠ ᠴᠡᠷᠢᠭ ᠳᠠᠷᠤᠭᠳᠠᠨ ᠳᠤᠲᠠᠭᠠᠵᠤ᠂ ᠬᠡᠷᠪᠡ ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠬᠠᠭᠠᠭᠳᠠᠪᠠᠰᠤ᠂ ᠵᠠᠮᠤᠬᠠ ᠶ᠋ᠢ ᠰᠢᠭᠤᠳ ᠠᠮᠢᠳᠤ ᠪᠠᠷᠢᠭᠠᠳ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠣᠷᠣᠭᠲᠤᠨ᠃ ᠡᠨᠡ ᠢᠨᠦ ᠮᠠᠰᠢ ᠴᠢᠬᠤᠯᠠ ᠬᠡᠷᠡᠭ᠃ ᠡᠨᠡ ᠳᠥᠴᠢᠨ ᠬᠥᠮᠦᠨ ᠦ᠌ ᠠᠮᠢᠨ ᠢ᠋ ᠴᠢ ᠠᠪᠤᠷᠠᠪᠠᠰᠤ ᠴᠢᠮᠠ ᠳ᠋ᠤᠷ ᠦᠨᠡᠨ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠬᠦ ᠪᠤᠰᠤ ᠤᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠭᠤᠯᠠ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠡᠷᠭᠦᠵᠦ ᠬᠡᠷᠡᠭᠯᠡᠬᠦ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠳᠠᠷᠤᠢ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠪᠠᠷ ᠱᠠᠯᠵᠢᠲᠠᠢ ᠠ᠋ᠴᠠ ᠪᠠᠷᠢᠭ᠍ᠰᠠᠨ ᠳᠥᠴᠢᠭᠡᠳ ᠬᠥᠮᠦᠨ ᠢ᠋ ᠭᠠᠷᠭᠠᠵᠤ ᠠᠯᠠᠬᠤ ᠲᠠᠯᠠᠪᠤᠷ ᠲᠤᠷ ᠠᠪᠠᠴᠢᠵᠤᠬᠤᠢ᠃ ᠲᠡᠷᠡ ᠳᠥᠴᠢᠭᠡᠳ ᠬᠥᠮᠦᠨ ᠶᠡᠬᠡᠯᠡ ᠤᠬᠢᠯᠠᠨ ᠡᠨᠡᠯᠬᠦᠶᠡ ᠣᠯᠣᠩᠬᠤ ᠭᠣᠣᠷᠬᠢ ᠥᠭᠦᠯᠡᠷᠦᠨ : 《ᠡᠳᠦᠭᠡ ᠲᠠᠨ ᠳ᠋ᠤᠷ ᠪᠠᠰᠠ ᠨᠢᠭᠡᠨ ᠭᠠᠪᠢᠶᠠ ᠪᠠᠢᠭᠤᠯᠬᠤ ᠵᠠᠪᠰᠢᠶᠠᠨ ᠪᠣᠢ᠃ ᠲᠠᠨ ᠤ᠋ ᠠᠮᠢᠨ ᠢ᠋ ᠪᠢᠳᠡ ᠵᠢᠨᠦᠩ ᠡᠴᠡ ᠭᠤᠶᠤᠵᠤ ᠭᠡᠯᠳᠦᠷᠢᠭᠦᠯᠪᠡᠰᠦ ᠲᠠ ᠳᠥᠴᠢᠭᠦᠯᠡ ᠦᠬᠦᠨ ᠵᠢᠳᠬᠦᠮᠦᠢ ᠦᠦ ᠦᠭᠡᠢ ᠦᠦ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠣᠯᠠᠨ ᠢ᠋ᠶ᠋ᠠᠷ ᠤᠬᠢᠯᠠᠨ ᠮᠥᠷᠭᠥᠵᠦ ᠥᠭᠦᠯᠡᠷᠦᠨ : 《ᠬᠠᠯᠠᠭᠤᠨ ᠠᠮᠢᠨ ᠢ᠋ ᠮᠢᠨᠦ ᠠᠪᠤᠷᠠᠵᠤ ᠪᠠᠢᠲᠠᠯᠠ ᠬᠠᠮᠤᠭ ᠬᠦᠴᠦᠨ ᠢ᠋ᠶ᠋ᠡᠨ ᠦᠯᠦ ᠥᠭᠬᠦ ᠶᠣᠰᠣ ᠪᠣᠢ ᠤᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ : 《ᠲᠡᠢᠨ ᠪᠣᠯᠪᠠᠰᠤ ᠵᠢᠨᠦᠩ ᠡᠴᠡ ᠭᠣᠶᠣᠰᠤᠭᠠᠢ᠃ 》ᠬᠡᠮᠡᠭᠡᠳ ᠡᠭᠡᠨ ᠣᠷᠣᠵᠤ ᠵᠢᠨᠦᠩ ᠳ᠋ᠦ᠍ᠷ ᠲᠣᠯᠣᠭᠠᠢ ᠪᠠᠨ ᠬᠠᠪᠤᠳᠲᠠᠯᠠ ᠮᠥᠷᠭᠥᠵᠦ ᠭᠤᠶᠤᠭᠰᠠᠨ ᠳ᠋ᠤᠷ ᠵᠢᠨᠦᠩ ᠵᠥᠪᠰᠢᠶᠡᠷᠡᠵᠦ᠂ ᠱᠠᠯᠵᠢᠲᠠᠢ ᠶ᠋ᠢᠨ ᠳᠥᠴᠢᠨ ᠴᠡᠷᠢᠭ ᠢ᠋ ᠡᠭᠡᠭᠦᠯᠦᠨ ᠣᠷᠣᠭᠤᠯᠵᠤ ᠠᠰᠠᠭᠤᠷᠤᠨ : 《ᠲᠠ ᠳᠥᠴᠢᠭᠦᠯᠡ ᠶ᠋ᠢᠨ ᠠᠮᠢᠨ ᠢ᠋ ᠡᠨᠡ ᠬᠣᠶᠠᠷ ᠭᠣᠶᠣᠬᠤᠢ ᠳ᠋ᠤᠷ ᠪᠢ ᠲᠡᠭᠦᠨ ᠦ᠌ ᠭᠤᠶᠤᠭᠰᠠᠨ ᠶᠣᠰᠣᠭᠠᠷ ᠬᠡᠯᠲᠦᠷᠢᠭᠦᠯᠵᠦ᠂ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠶ᠋ᠢᠨ ᠳᠣᠣᠷᠠ ᠲᠤᠰᠢᠶᠠᠵᠤ᠂ ᠲᠠᠨ ᠢ᠋ ᠨᠢᠭᠡᠨ ᠬᠡᠷᠡᠭ ᠲᠦ᠍ᠷ ᠵᠠᠷᠤᠰᠤᠭᠠᠢ ᠬᠡᠮᠡᠮᠦᠢ᠃ ᠲᠠ ᠠᠮᠢ ᠬᠡᠯᠲᠦᠷᠢᠭᠦᠯᠦᠭᠰᠡᠨ ᠠᠴᠢ ᠶ᠋ᠢ ᠮᠢᠨᠦ ᠪᠣᠳᠣᠨ ᠡᠨᠡ ᠬᠣᠶᠠᠭᠤᠯᠠ ᠶ᠋ᠢᠨ ᠠᠴᠢ ᠶ᠋ᠢ ᠰᠠᠨᠠᠵᠤ ᠴᠢᠷᠮᠠᠢᠨ ᠵᠢᠳᠬᠦᠬᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠳᠥᠴᠢᠭᠦᠯᠡ ᠶᠡᠬᠡᠯᠡ ᠪᠠᠶᠠᠷᠯᠠᠨ : 《ᠠᠮᠢ ᠪᠡᠶᠡ ᠪᠡᠨ ᠲᠠᠯᠪᠢᠵᠤ ᠵᠢᠳᠬᠦᠶᠡ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠲᠡᠳᠡᠨ ᠦ᠌ ᠬᠦᠯᠢᠶᠡᠰᠦᠨ ᠢ᠋ ᠲᠠᠯᠪᠢᠭᠤᠯᠵᠤ᠂ ᠪᠠᠰᠠ ᠪᠤᠳᠠᠬᠠ ᠳᠠᠷᠠᠰᠤ ᠱᠠᠩᠨᠠᠭᠰᠠᠨ ᠳ᠋ᠤᠷ ᠳᠥᠴᠢᠭᠦᠯᠡ ᠦᠬᠦᠲᠡᠯᠡ ᠪᠠᠶᠠᠷᠯᠠᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠠᠬᠤᠢ ᠶ᠋ᠢ ᠵᠥᠪᠯᠡᠬᠦᠶᠡ᠂ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠥᠭᠦᠯᠡᠷᠦᠨ : 《ᠵᠢᠨᠦᠩ ᠡᠵᠡᠨ ᠦ᠌ ᠡᠨᠡ ᠬᠡᠰᠢᠭ ᠲᠣᠷ ᠲᠠ ᠨᠢᠭᠡᠨ ᠢᠲᠡᠭᠡᠯ ᠦᠭᠪᠡᠰᠦ ᠵᠣᠬᠢᠮᠤᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠦᠭᠦᠳᠡᠭᠡᠷ ᠪᠠᠶᠠᠷᠯᠠᠨ ᠢᠷᠡᠵᠦ᠂ ᠵᠢᠨᠦᠩ ᠦ᠋ᠨ ᠡᠮᠦᠨᠡ ᠴᠢᠰᠤ ᠭᠠᠷᠭᠠᠨ ᠲᠠᠩᠭᠠᠷᠢᠭ᠍ᠯᠠᠵᠤ ᠮᠥᠷᠭᠥᠭᠰᠡᠨᠡ᠂ ᠮᠤᠬᠤᠯᠢ ᠶᠡᠬᠡᠯᠡ ᠪᠡᠶᠡᠰᠦᠨ ᠴᠥᠮ ᠬᠦᠨᠳᠦᠳᠡ ᠱᠠᠩᠨᠠᠵᠤ : 《ᠲᠠ ᠲᠡᠢᠮᠦ ᠪᠣᠯᠪᠠᠰᠤ ᠣᠯᠣᠩᠬᠤ ᠭᠣᠣᠷᠬᠢ ᠨᠠᠷ ᠤ᠋ᠨ ᠠᠷᠭᠠ ᠶ᠋ᠢ ᠳᠠᠭᠠᠵᠤ ᠶᠠᠪᠤ ! 》ᠭᠡᠮᠡᠨ ᠭᠠᠷᠭᠠᠪᠠ᠃ ᠮᠥᠨ ᠰᠥᠨᠢ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠡᠨᠡ ᠳᠥᠴᠢᠭᠦᠯᠡ ᠶ᠋ᠢ ᠳᠠᠭᠠᠭᠤᠯᠵᠤ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠤᠷᠭᠤᠨ ᠡᠴᠢᠵᠦ ᠵᠠᠮᠤᠬᠠ ᠳ᠋ᠤᠷ ᠣᠷᠣᠵᠤ ᠥᠭᠪᠡ᠃ ᠵᠠᠮᠤᠬᠠ ᠦᠵᠡᠪᠡᠰᠦ ᠴᠥᠮ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠥᠮᠦᠨ ᠪᠤᠰᠤ᠂ ᠦᠨᠡᠬᠡᠷ ᠲᠡᠷᠢᠭᠦᠯᠡᠭᠰᠡᠨ ᠬᠣᠶᠠᠷ ᠠᠨᠤ ᠬᠡᠷᠡᠢᠳ ᠦ᠋ᠨ ᠬᠥᠮᠦᠨ᠂ ᠪᠤᠰᠤ ᠠᠨᠤ ᠴᠥᠮ ᠱᠠᠯᠵᠢᠲᠠᠢ ᠶ᠋ᠢᠨ ᠬᠥᠮᠦᠨ ᠲᠤᠯᠠ ᠰᠡᠵᠢᠭᠯᠡᠭᠰᠡᠨ ᠦᠭᠡᠢ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠡᠭᠡᠨ ᠠᠬᠤᠭᠤᠯᠪᠠᠢ᠃
ᠲᠡᠳᠦᠢ ᠰᠥᠨᠢ ᠣᠯᠣᠩᠬᠤ ᠂ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠰᠡᠮᠡᠬᠡᠷ ᠵᠠᠯᠮᠠ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ ᠪᠢᠴᠢᠭ ᠢ᠋ ᠲᠤᠰᠢᠶᠠᠪᠠ᠃ ᠵᠠᠯᠮᠠ ᠪᠠᠶᠠᠷᠯᠠᠵᠤ ᠪᠢᠴᠢᠭ ᠢ᠋ ᠦᠵᠡᠪᠡᠰᠦ ᠮᠠᠷᠭᠠᠲᠠ ᠶ᠋ᠢᠨ ᠦᠳᠡ ᠥᠩᠭᠡᠷᠡᠮᠡᠭᠴᠡ ᠲᠠᠢᠶᠠᠩ ᠬᠠᠭᠠᠨ ᠬᠠᠩᠭᠠᠢ ᠠᠭᠤᠯᠠᠨᠠ ᠪᠠᠢᠯᠳᠤᠷᠠ ᠡᠴᠢᠮᠦᠢ᠂ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠪᠦᠲᠦᠨᠡ ᠶ᠋ᠢᠨ ᠢᠯᠠᠭᠤᠭᠰᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠴᠥᠮ ᠮᠠᠨ ᠤ᠋ ᠲᠤᠭ ᠬᠢᠭᠢᠷᠢ ᠬᠠᠯᠠᠨ ᠪᠣᠰᠬᠠᠯᠭᠠᠵᠤ ᠲᠠᠢᠶᠠᠩ ᠬᠠᠭᠠᠨ ᠢ᠋ ᠬᠣᠷᠢᠵᠤ ᠠᠪᠤᠭᠲᠤᠨ᠂ ᠡᠨᠡ ᠰᠥᠨᠢ ᠠᠷᠪᠠᠨ ᠪᠠᠭᠤᠳᠠᠯ ᠲᠤᠭ ᠬᠢᠭᠢᠷᠢ ᠶ᠋ᠢᠨ ᠪᠥᠰ ᠢ᠋ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠤᠯᠠᠭᠠᠨ ᠬᠣᠰᠢᠭᠤ ᠳ᠋ᠤᠷ ᠬᠦᠷᠭᠡᠵᠦ ᠥᠭᠭᠦᠭᠳᠦᠨ᠃ ᠵᠢᠴᠢ ᠳᠣᠯᠣᠭᠠᠨ ᠪᠠᠭᠤᠳᠠᠯ ᠢ᠋ ᠢᠯᠠᠭᠤᠭᠰᠠᠨ ᠳ᠋ᠤᠷ ᠥᠭᠴᠦ ᠦᠯᠡᠭᠰᠡᠨ ᠢ᠋ ᠴᠢ ᠪᠡᠶᠡ ᠳ᠋ᠦ᠍ᠷ ᠠᠪᠴᠤ ᠰᠠᠮᠠᠭᠤᠷᠠᠭᠰᠠᠨ ᠬᠣᠢᠨᠠ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠣᠷᠣᠭᠤᠯᠵᠤ ᠲᠠᠢᠶᠠᠩ ᠬᠠᠭᠠᠨ ᠢ᠋ ᠬᠠᠭᠠᠨᠳᠤᠨ ᠬᠡᠮᠡᠵᠦᠬᠦᠢ᠃ ᠲᠡᠳᠦᠢ ᠵᠠᠯᠮᠠ᠂ ᠣᠯᠣᠩᠬᠤ᠂ ᠭᠣᠣᠷᠬᠢ ᠭᠤᠷᠪᠠᠭᠤᠯᠠ ᠵᠥᠪᠯᠡᠨ ᠲᠣᠭᠲᠠᠵᠤ᠂ ᠬᠥᠮᠦᠨ ᠭᠠᠷᠭᠠᠨ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠤᠯᠠᠭᠠᠨ ᠬᠣᠰᠢᠭᠤ ᠳ᠋ᠤᠷ ᠬᠦᠯᠢᠶᠡᠨ ᠠᠪᠴᠤ ᠢᠯᠠᠭᠤᠭᠰᠠᠨ ᠲᠠᠨᠠ ᠲᠦᠭᠡᠭᠡᠨ ᠥᠭᠪᠡ᠃
ᠵᠢᠴᠢ ᠡᠳᠦᠷ ᠪᠧᠲ᠋ᠠ᠋ ᠨᠠᠢ᠍ᠮᠠᠨ ᠬᠣᠶᠠᠷ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠵᠡᠭᠦᠨ ᠵᠠᠳᠠᠭᠠᠢ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠬᠣᠶᠠᠷ ᠵᠠᠪᠰᠠᠷᠠ ᠶᠡᠬᠡ ᠲᠠᠯᠠ ᠳ᠋ᠤᠷ ᠬᠠᠷᠢᠯᠴᠠᠨ ᠵᠢᠭ᠍ᠰᠠᠭᠠᠯ ᠵᠢᠭ᠍ᠰᠠᠭᠠᠭᠰᠠᠨᠠ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠰᠢᠭᠤᠴᠢ ᠵᠡᠪᠡ ᠫᠣᠯᠭᠤᠳᠠᠢ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠨᠠᠢ᠍ᠮᠠᠨ ᠤ᠋ ᠬᠣᠰᠢᠭᠤᠴᠢ ᠢᠳᠡᠷ ᠳᠣᠪᠣ ᠶ᠋ᠢᠨ ᠴᠡᠷᠢᠭ ᠲᠦ᠍ ᠲᠤᠯᠭᠠᠯᠴᠠᠪᠠ᠃ ᠬᠠᠰᠠᠷ ᠤ᠋ᠨ ᠴᠡᠷᠢᠭ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠲᠦ᠍ᠷ ᠲᠤᠯᠭᠠᠯᠴᠠᠪᠠ᠃ ᠨᠠᠢ᠍ᠮᠠᠨ ᠤ᠋ ᠲᠠᠢᠶᠠᠩ ᠬᠠᠭᠠᠨ ᠦᠵᠡᠪᠡᠰᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠮᠠᠰᠢ ᠰᠢᠩᠭᠡᠨ ᠰᠡᠢᠷᠡᠭ ᠲᠤᠯᠠ ᠢᠳᠡᠷ ᠳᠣᠪᠣ ᠶ᠋ᠢᠨ ᠴᠡᠷᠢᠭ ᠢ᠋ ᠣᠷᠣ ᠭᠡᠮᠡᠨ ᠬᠡᠩᠭᠡᠷᠭᠡ ᠳᠡᠯᠡᠳᠦᠭᠦᠯᠪᠡᠰᠦ᠂ ᠢᠳᠡᠷ ᠳᠣᠪᠣ ᠭᠠᠯᠵᠠᠭᠤ ᠪᠤᠬᠠ ᠮᠡᠲᠦ ᠪᠢᠯᠠᠭᠤ ᠪᠠᠨ ᠡᠷᠭᠢᠭᠦᠯᠦᠨ ᠵᠢᠭ᠍ᠰᠠᠭᠠᠯ ᠤ᠋ᠨ ᠡᠮᠦᠨᠡ ᠭᠠᠷᠴᠤ : 《ᠶᠠᠭᠤᠨ ᠪᠣᠯᠪᠠᠴᠤ ᠡᠵᠡᠨ ᠦ᠌ ᠪᠡᠨ ᠡᠮᠦᠨᠡ ᠦᠬᠦᠰᠦᠭᠡᠢ ! 》ᠭᠡᠮᠡᠨ ᠶᠡᠬᠡᠯᠡ ᠪᠠᠷᠬᠢᠷᠠᠨ ᠢᠷᠡᠬᠦᠶᠡ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠴᠡ ᠫᠤᠯᠭᠤᠳᠠᠢ ᠳ᠋ᠠᠮ ᠢᠯᠳᠦ ᠪᠡᠨ ᠳᠠᠯᠠᠢᠨ ᠭᠠᠷᠴᠤ ᠬᠣᠶᠠᠭᠤᠯᠠ ᠬᠣᠷᠢᠨ ᠤᠳᠠᠭᠠ ᠪᠣᠯᠤᠭᠰᠠᠨ ᠦᠭᠡᠢ ᠫᠣᠯᠭᠤᠳᠠᠢ ᠲᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠵᠢᠭ᠍ᠰᠠᠭᠠᠯ ᠳ᠋ᠤᠷ ᠢ᠋ᠶ᠋ᠠᠨ ᠳᠤᠲᠠᠭᠠᠨ ᠣᠷᠣᠭᠰᠠᠨ ᠳ᠋ᠤᠷ ᠢᠳᠡᠷ ᠳᠣᠪᠣ ᠶᠠᠭᠤ ᠶ᠋ᠢ ᠴᠦ᠍ ᠪᠣᠳᠣᠬᠤ ᠦᠭᠡᠢ᠂ ᠭᠠᠭᠴᠠᠭᠠᠷ ᠳᠣᠪᠲᠣᠯᠤᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠨᠢᠭᠡᠨᠲᠡ ᠠᠯᠠᠨ ᠣᠷᠣᠵᠤ ᠡᠴᠢᠭᠰᠡᠨ ᠳ᠋ᠦ᠍ᠷ ᠳᠣᠣᠷᠠᠬᠢ ᠴᠡᠷᠢᠭ ᠢᠨᠤ ᠶᠠᠭᠠᠷᠠᠨ ᠳ᠋ᠠᠭᠠᠨ ᠡᠴᠢᠬᠦᠢ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠮᠣᠳᠣ ᠲᠣᠭᠰᠢᠵᠤ ᠰᠠᠮᠠᠭᠤᠨ ᠵᠡᠪᠡ ᠪᠡᠷ ᠭᠠᠳᠠᠭ᠍ᠰᠢ ᠬᠠᠷᠪᠤᠬᠤᠢ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ ᠤᠬᠤᠷᠢᠮᠠᠭᠴᠠ ᠪᠧᠲ᠋ᠠ᠋ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠭᠡᠨᠡᠳᠲᠡ ᠤᠬᠤᠷᠢᠪᠠ᠃ ᠡᠭᠦᠨ ᠳ᠋ᠦ᠍ᠷ ᠢᠳᠡᠷ ᠳᠣᠪᠣ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠭᠠᠯᠵᠠᠭᠤ ᠪᠠᠷᠰ ᠮᠡᠲᠦ ᠬᠥᠨᠳᠡᠯᠡᠨ ᠭᠤᠯᠳᠤ ᠨᠥᠷᠢᠯᠡᠨ ᠴᠠᠪᠴᠢᠯᠠᠵᠤ ᠶᠠᠪᠤᠲᠠᠯᠠ ᠭᠡᠨᠡᠳᠲᠡ ᠮᠣᠷᠢᠨ ᠤ᠋ ᠬᠥᠯ ᠳᠡᠭᠡᠰᠦᠨ ᠳ᠋ᠦ᠍ᠷ ᠲᠣᠷᠴᠤ ᠬᠥᠮᠦᠨ ᠮᠣᠷᠢᠲᠠᠢ ᠬᠠᠮᠲᠤ ᠥᠩᠬᠥᠷᠢᠨ ᠤᠨᠠᠭᠰᠠᠨᠠ᠂ ᠪᠧᠲ᠋ᠠ᠋ ᠶ᠋ᠢᠨ ᠴᠡᠷᠢᠭ ᠪᠠᠷᠢᠵᠤ ᠬᠦᠯᠢᠭᠡᠳ ᠴᠡᠷᠢᠭ ᠢ᠋ᠶ᠋ᠡᠨ ᠤᠬᠤᠷᠢᠵᠤ ᠵᠣᠭᠰᠣᠭᠰᠠᠨ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠭᠡᠳᠡᠷᠭᠦ ᠤᠬᠤᠷᠢᠭ᠍ᠰᠠᠨ ᠠᠨᠤ ᠯᠠᠪ ᠢᠳᠡᠷ ᠳᠣᠪᠣ ᠶ᠋ᠢᠨ ᠴᠡᠷᠢᠭ ᠳᠠᠷᠤᠪᠠ ᠭᠡᠮᠡᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠡᠩᠭᠡᠷᠭᠡ ᠶ᠋ᠢ ᠴᠣᠬᠢᠵᠤ ᠬᠣᠯᠠᠰᠤᠪᠴᠢ ᠶᠡᠬᠡ ᠢᠯᠳᠦ ᠪᠡᠨ ᠬᠤᠷᠤᠢᠯᠠᠨ ᠵᠢᠭ᠍ᠰᠠᠭᠠᠯ ᠤ᠋ᠨ ᠡᠮᠦᠨᠡ ᠭᠠᠷᠤᠭᠰᠠᠨᠠ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠠᠭᠠᠯᠭᠠ ᠨᠡᠭᠡᠭᠡᠮᠡᠭᠴᠡ ᠪᠦᠬᠦ ᠪᠡᠯᠭᠦᠳᠡᠢ ᠲᠡᠮᠦᠷ ᠰᠢᠳᠡᠮ ᠢ᠋ᠶ᠋ᠡᠨ ᠡᠷᠭᠢᠭᠦᠯᠦᠨ ᠭᠠᠷᠴᠤ ᠢᠷᠡᠭᠡᠳ ᠬᠤᠯᠠᠰᠤᠪᠴᠢ ᠯᠤᠭᠠ ᠪᠠᠢᠯᠳᠤᠵᠤ ᠭᠤᠴᠢᠨ ᠤᠳᠠᠭᠠ ᠪᠣᠯᠤᠨ ᠭᠡᠨᠡᠳᠲᠡ ᠰᠢᠳᠠᠮ ᠢ᠋ᠶ᠋ᠠᠨ ᠬᠣᠭᠣᠰᠣᠨ ᠭᠠᠵᠠᠷ ᠬᠡᠳᠦᠨᠲᠡ ᠬᠤᠷᠤᠢᠯᠠᠨ ᠮᠣᠷᠢ ᠪᠠᠨ ᠡᠭᠡᠭᠦᠯᠵᠦ ᠵᠢᠭ᠍ᠰᠠᠭᠠᠯ ᠤ᠋ᠨ ᠵᠦᠭ ᠳᠤᠲᠠᠭᠠᠬᠤᠢ ᠳ᠋ᠤᠷ ᠲᠠᠢᠶᠠᠩ ᠬᠠᠭᠠᠨ᠂ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠴᠥᠮ ᠲᠠᠢᠯᠪᠠ ᠭᠡᠮᠡᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠵᠦ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠵᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠦᠭ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠷᠤᠨ ᠣᠷᠣᠭᠰᠠᠨᠠ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠫᠤᠤ ᠳᠠᠭᠤᠷᠢᠰᠴᠤ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠬᠣᠶᠠᠷ ᠬᠠᠭᠠᠷᠠᠵᠤ᠂ ᠴᠥᠮ ᠨᠠᠷᠠᠨ ᠭᠠᠷᠤᠳᠢ ᠶ᠋ᠢᠨ ᠬᠣᠰᠢᠭᠤ ᠶ᠋ᠢᠨ ᠵᠢᠭ᠍ᠰᠠᠭᠠᠯ ᠬᠤᠪᠢᠯᠵᠤ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠣᠶᠠᠷ ᠬᠠᠪᠢᠷᠭᠠ ᠪᠠᠷ ᠰᠢᠪᠲᠤᠯᠤᠨ ᠳᠣᠪᠲᠣᠯᠵᠤ᠂ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠭᠠᠷᠴᠤ ᠰᠢᠭᠤᠳ ᠪᠠᠷᠠᠭᠤᠨ ᠵᠦᠭ ᠳᠤᠲᠠᠭᠠᠨ᠂ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠬᠣᠢᠲᠤ ᠵᠦᠭ ᠡᠴᠢᠬᠦᠶᠡ᠂ ᠲᠠᠢᠶᠠᠩ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠡᠭᠡᠭᠦᠯᠵᠦ ᠦᠵᠡᠪᠡᠰᠦ᠂ ᠲᠡᠷᠡ ᠴᠡᠷᠢᠭ ᠲᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠲᠤᠭ ᠰᠢᠭᠦᠷ ᠪᠠᠢᠬᠤ ᠲᠤᠯᠠ ᠶᠠᠭᠠᠷᠠᠨ ᠡᠭᠡᠵᠦ ᠬᠠᠷᠠᠬᠠᠨ ᠰᠡᠭᠦᠯ ᠢ᠋ ᠢᠨᠤ ᠳᠠᠷᠤᠨ ᠢᠷᠡᠬᠦᠶᠡ᠂ ᠬᠠᠷᠢᠨ ᠬᠡᠳᠦᠢᠨᠡᠢ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠵᠡᠭᠦᠨ ᠪᠡᠶᠡ ᠶ᠋ᠢᠨ ᠵᠡᠪᠡ ᠡᠴᠡ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠲᠡᠮᠳᠡᠭ ᠤᠲᠤᠭᠠ ᠳᠡᠭᠳᠡᠵᠦ᠂ ᠬᠡᠩᠭᠡᠷᠭᠡ ᠬᠠᠷᠠᠩᠭᠠ ᠶ᠋ᠢᠨ ᠳᠠᠭᠤᠨ ᠭᠠᠷᠤᠭᠰᠠᠨᠠ᠂ ᠲᠠᠢᠶᠠᠩ ᠬᠠᠭᠠᠨ ᠶᠠᠭᠠᠷᠠᠨ ᠨᠡᠬᠡᠬᠦ ᠪᠡᠨ ᠵᠣᠭᠰᠣᠵᠤ᠂ ᠬᠠᠷᠠᠬᠠᠨ ᠬᠥᠮᠦᠨ ᠳᠣᠪᠲᠣᠯᠭᠠᠨ ᠦᠵᠡᠬᠦᠯᠭᠦᠢ ᠶ᠋ᠢᠨ ᠵᠠᠪᠰᠠᠷ ᠬᠠᠰᠠᠷ ᠪᠠ ᠵᠡᠪᠡ ᠶ᠋ᠢᠨ ᠴᠡᠷᠢᠭ ᠨᠢᠭᠡᠨᠲᠡ ᠬᠣᠯᠠ ᠡᠴᠢᠵᠦᠬᠦᠢ᠃ ᠲᠡᠢᠨ ᠬᠦ᠌ ᠴᠢᠦᠢ ᠴᠦ᠍ ᠯᠢᠦᠢ ᠥᠭᠦᠯᠡᠷᠦᠨ : 《ᠡᠨᠡ ᠯᠠᠪ ᠮᠤᠬᠤᠯᠢ ᠶ᠋ᠢᠨ ᠰᠡᠵᠢᠭᠯᠡᠭᠦᠯᠬᠦ ᠠᠷᠭᠠ᠂ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠨᠡᠬᠡᠵᠦ ᠪᠠᠢᠯᠳᠤᠪᠠᠰᠤ ᠵᠣᠬᠢᠮᠤᠢ᠂ ᠳᠤᠲᠠᠭᠠᠭᠰᠠᠨ ᠴᠡᠷᠢᠭ ᠢ᠋ ᠰᠡᠵᠢᠭ ᠦᠭᠡᠢ ᠳᠠᠷᠤᠨ ᠠᠯᠠᠪᠠᠰᠤ ᠬᠢᠯᠪᠠᠷ᠃ 》ᠭᠡᠮᠡᠨ ᠨᠡᠬᠡᠬᠦᠢ ᠳ᠋ᠦ᠍ᠷ ᠰᠠᠶᠢ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠵᠡᠭᠦᠨ ᠬᠣᠢᠲᠤ ᠬᠦᠷᠲᠡᠯᠡ ᠮᠥᠨ ᠤᠲᠤᠭᠠ ᠭᠠᠷᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠦᠵᠡᠪᠡᠰᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠨᠢᠭᠡᠨ ᠰᠦᠷᠦᠭ ᠵᠠᠯᠠᠭᠤ ᠵᠠᠩᠵᠤᠨ ᠨᠠᠷ ᠢ᠋ ᠳᠠᠭᠠᠭᠤᠯᠵᠤ ᠭᠠᠷᠴᠤ ᠢᠷᠡᠭᠡᠳ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠬᠡᠳᠦᠨ ᠵᠡᠷᠭᠡ ᠬᠠᠯᠳᠠᠨ ᠪᠠᠢᠯᠳᠤᠵᠤ ᠳᠠᠷᠤᠢ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠵᠦᠭ ᠡᠭᠡᠭᠦᠯᠬᠦᠶᠡ᠂ ᠲᠠᠢᠶᠠᠩ ᠬᠠᠭᠠᠨ ᠶᠡᠬᠡᠯᠡ ᠪᠠᠶᠠᠷᠯᠠᠨ : 《ᠴᠣᠬᠣᠮ ᠪᠡᠶᠡ ᠢᠨᠦ ᠬᠠᠷᠢᠨ ᠡᠨᠳᠡ ᠪᠣᠢ ! 》ᠭᠡᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠮᠤᠰᠬᠢᠨ ᠡᠭᠡᠭᠦᠯᠵᠦ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠢ᠋ ᠬᠥᠭᠡᠭᠡᠵᠦ ᠢᠷᠡᠬᠦᠶᠡ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠬᠦᠷᠢᠶᠡᠨ ᠦ᠌ ᠵᠦᠭ ᠳᠣᠪᠲᠣᠯᠤᠨ ᠳᠤᠲᠠᠭᠠᠵᠤ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠵᠡᠭᠦᠨ ᠡᠮᠦᠨᠡ ᠬᠦᠷᠴᠦ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠬᠣᠢᠭᠤᠷ ᠪᠠᠷᠠᠭᠤᠨᠰᠢ ᠳᠤᠲᠠᠭᠠᠬᠤᠶᠠ᠂ ᠳᠠᠢᠶᠠᠩ ᠬᠠᠭᠠᠨ ᠲᠠᠯᠪᠢᠯ ᠦᠭᠡᠢ ᠱᠠᠭᠠᠷᠳᠠᠨ ᠨᠡᠬᠡᠵᠦ ᠭᠦᠢᠴᠡᠬᠦ ᠰᠢᠬᠠᠲᠠᠯᠠ ᠭᠡᠨᠡᠳᠲᠡ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠤᠯᠠᠭᠠᠨ ᠬᠣᠱᠤᠤᠲᠤ ᠵᠡᠪᠡ ᠡᠴᠡ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠭᠠᠷᠴᠤ ᠢᠷᠡᠭᠡᠳ ᠲᠠᠢᠽᠦ ᠶ᠋ᠢ ᠥᠩᠭᠡᠷᠡᠭᠦᠯᠦᠨ ᠬᠠᠷᠠᠬᠠᠨ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠲᠤᠯᠵᠤ᠂ ᠨᠢᠭᠡᠨ ᠵᠡᠷᠭᠡ ᠲᠤᠯᠤᠯᠴᠠᠨ ᠪᠠᠢᠯᠳᠤᠭᠠᠳ ᠪᠠᠰᠠ ᠳᠤᠲᠠᠭᠠᠵᠤ᠂ ᠲᠠᠢᠽᠦ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠪᠠᠷᠠᠭᠤᠨ ᠵᠦᠭ ᠳᠣᠪᠲᠣᠯᠪᠠ᠃ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠪᠠᠰᠠ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠬᠦᠶᠡ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠰᠢᠭᠤᠳ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠡᠮᠦᠨᠡ ᠶᠡᠬᠡ ᠭᠣᠣᠯ ᠳ᠋ᠤᠷ ᠣᠷᠣᠵᠤ ᠡᠴᠢᠲᠡᠯᠡ ᠲᠠᠢᠶᠠᠩ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ : 《ᠡᠨᠡ ᠯᠠᠪ ᠭᠠᠵᠢᠭᠤ ᠠᠷᠭᠠ ᠬᠡᠷᠡᠭᠯᠡᠪᠡᠢ ᠶᠠ᠂ ᠪᠢᠳᠡ ᠴᠡᠷᠢᠭ ᠢ᠋ᠶ᠋ᠡᠨ ᠡᠭᠡᠭᠦᠯᠵᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠪᠠᠰᠤ ᠶᠠᠮᠪᠠᠷ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠤᠯᠠᠰᠤᠪᠴᠢ᠂ ᠴᠢᠦᠢ ᠴᠦ᠍ ᠯᠢᠦᠢ ᠵᠡᠷᠭᠡ ᠪᠡᠷ ᠥᠭᠦᠯᠡᠷᠦᠨ : 《ᠪᠣᠯᠬᠤ ᠦᠭᠡᠢ᠂ ᠪᠢᠳᠡᠨ ᠦ᠌ ᠴᠡᠷᠢᠭ ᠡᠭᠡᠪᠡᠰᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠯᠠᠪ ᠮᠠᠨ ᠢ᠋ ᠭᠡᠳᠡᠷᠭᠦ ᠳᠠᠷᠤᠷᠠ ᠡᠴᠢᠮᠦᠢ᠂ ᠡᠨᠡ ᠯᠠᠪ ᠭᠣᠣ ᠶ᠋ᠢᠨ ᠬᠣᠢᠲᠤ ᠠᠮᠠ ᠪᠠᠷ ᠭᠠᠷᠴᠤ ᠬᠠᠰᠠᠷ ᠤ᠋ᠨ ᠴᠡᠷᠢᠭ ᠯᠦ᠍ᠭᠡ ᠨᠡᠢᠯᠡᠵᠦ ᠬᠦᠷᠢᠶᠡᠨ ᠳ᠋ᠦ᠍ᠷ ᠡᠭᠡᠮᠦᠢ᠂ ᠲᠡᠭᠦᠨ ᠢ᠋ ᠭᠣᠣᠯ ᠠ᠋ᠴᠠ ᠭᠠᠷᠤᠨ ᠵᠠᠪᠳᠤᠬᠤ ᠶ᠋ᠢᠨ ᠤᠷᠢᠳ ᠳᠠᠷᠤᠪᠠᠰᠤ ᠵᠣᠬᠢᠮᠤᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠰᠡᠳᠬᠢᠯ ᠰᠢᠭᠤᠳᠤᠨ ᠴᠡᠷᠢᠭ ᠢ᠋ ᠱᠠᠭᠠᠷᠳᠠᠨ ᠨᠡᠬᠡᠵᠦ ᠭᠣᠣᠯ ᠤ᠋ᠨ ᠳᠤᠮᠳᠠ ᠬᠦᠷᠲᠡᠯᠡ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠪᠦᠷᠭᠦᠭᠲᠦ ᠳᠣᠪᠣ ᠶ᠋ᠢᠨ ᠳᠡᠭᠡᠷᠡ ᠬᠠᠷᠠᠬᠠᠨ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠪᠠᠢᠷᠢᠯᠠᠨ ᠵᠣᠭᠰᠣᠭᠰᠠᠨ ᠳ᠋ᠤᠷ ᠳᠠᠷᠤᠢ ᠪᠦᠷᠭᠦᠭᠲᠦ ᠳᠣᠪᠣ ᠶ᠋ᠢᠨ ᠵᠦᠭ ᠥᠭᠡᠳᠡᠯᠡᠨ᠂ ᠪᠦᠷᠬᠦᠭᠳᠦ ᠵᠡᠪᠡ ᠶ᠋ᠢᠨ ᠠᠮᠠᠨ ᠢ᠋ ᠣᠷᠣᠵᠤ ᠢᠷᠡᠨ᠂ ᠲᠠᠢᠽᠦ ᠶ᠋ᠢᠨ ᠣᠯᠠᠨ ᠴᠡᠷᠢᠭ ᠳᠣᠪᠣ ᠶ᠋ᠢ ᠳᠠᠭᠠᠵᠤ ᠥᠭᠡᠳᠡᠯᠡᠨ ᠪᠤᠷᠤᠭᠤᠯᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠰᠡᠵᠢᠭᠯᠡᠵᠦ ᠥᠭᠦᠯᠡᠷᠦᠨ : 《ᠡᠳᠡᠨ ᠦ᠌ ᠴᠡᠷᠢᠭ ᠡᠨᠡ ᠮᠤᠬᠤᠷ ᠭᠣᠣᠯ ᠳ᠋ᠤᠷ ᠣᠷᠣᠬᠤ ᠠᠨᠤ ᠯᠠᠪ ᠠᠷᠭᠠ ᠪᠣᠢ᠃ 》ᠬᠡᠮᠡᠲᠡᠯᠡ ᠴᠢᠦᠢ ᠴᠦ᠍ ᠯᠢᠦᠢ ᠥᠭᠦᠯᠡᠷᠦᠨ : 《ᠠᠷᠭᠠ ᠪᠠᠢᠪᠠᠰᠤ ᠲᠡᠭᠦᠨ ᠦ᠌ ᠪᠡᠶᠡ ᠮᠥᠨ ᠵᠡᠪᠡ ᠳ᠋ᠦ᠍ᠷ ᠪᠣᠢ ᠲᠤᠯᠠ ᠵᠡᠪᠡ ᠡᠴᠡ ᠮᠥᠨ ᠬᠡᠷᠬᠢᠨ ᠭᠠᠷᠤᠮᠤᠢ ! 》ᠭᠡᠮᠡᠨ ᠪᠠᠰᠠ ᠳᠣᠪᠲᠣᠯᠤᠨ ᠶᠠᠪᠤᠲᠠᠯᠠ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠬᠠᠪᠢᠷᠭᠠ ᠳ᠋ᠤᠷ ᠪᠠᠢᠷᠢᠯᠠᠨ ᠪᠥᠭᠡᠳ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠢ᠋ ᠬᠣᠶᠠᠷ ᠭᠣᠣᠯ ᠠᠯᠤᠰ ᠦᠵᠡᠮᠡᠭᠴᠡ ᠰᠢᠭᠤᠳ ᠪᠦᠷᠬᠦᠭᠲᠦ ᠭᠣᠣᠯ ᠢ᠋ ᠭᠡᠲᠦᠯᠵᠦ᠂ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠪᠤᠷᠤᠭᠤᠯᠠᠪᠠ᠃ ᠲᠠᠢᠶᠠᠩ ᠬᠠᠭᠠᠨ ᠶᠡᠬᠡᠯᠡ ᠰᠡᠵᠢᠭᠯᠡᠵᠦ ᠬᠠᠷᠠᠬᠠᠨ ᠲᠣᠭᠲᠠᠭᠤᠷᠢ ᠦᠭᠡᠢ ᠪᠠᠢᠲᠠᠯᠠ ᠪᠠᠷᠠᠭᠤᠨ ᠡᠮᠦᠨᠡ ᠶᠡᠬᠡ ᠫᠤᠤ ᠳᠠᠭᠤᠷᠢᠰᠴᠤ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠡᠰᠡᠷᠭᠦᠴᠡᠨ ᠢᠷᠡᠵᠦ ᠪᠠᠢᠯᠳᠤᠬᠤᠢ ᠳ᠋ᠤᠷ ᠲᠡᠷᠢᠭᠦᠯᠡᠭᠰᠡᠨ ᠵᠠᠩᠵᠤᠨ ᠠᠨᠤ ᠪᠢᠴᠢᠬᠠᠨ ᠬᠡᠦᠬᠡᠳ ᠪᠥᠭᠡᠳ ᠴᠥᠮ ᠤᠯᠠᠭᠠᠨ ᠠᠷᠰᠯᠠᠨ ᠤ᠋ ᠲᠤᠭ ᠰᠢᠭᠦᠷ ᠪᠠᠷᠢᠵᠤᠬᠤᠢ᠃ ᠲᠤᠭ ᠲᠤᠷ《ᠲᠠᠢᠽᠢ ᠵᠣᠴᠢ᠂ ᠴᠠᠭᠠᠲᠠᠢ 》ᠭᠡᠮᠡᠨ ᠪᠢᠴᠢᠵᠦᠬᠦᠢ᠃ ᠡᠭᠦᠨᠡ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠰᠠᠶᠢ ᠰᠤᠯᠠ ᠪᠣᠯᠵᠤ᠂ ᠳᠡᠮᠡᠢ ᠠᠷᠭᠠ ᠦᠭᠡᠢ ᠬᠡᠮᠡᠵᠦ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠬᠦᠯᠡ ᠵᠣᠴᠢ ᠴᠠᠭᠠᠲᠠᠢ ᠪᠡᠶᠡ ᠳ᠋ᠦ᠍ᠷ ᠴᠥᠮ ᠮᠥᠩᠭᠥᠨ ᠦ᠌ ᠬᠤᠶᠠᠭ ᠠᠯᠲᠠᠨ ᠤ᠋ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠬᠡᠳᠦᠬᠡᠨ ᠵᠠᠭᠤᠨ ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠵᠤ ᠦᠬᠦᠨ ᠳᠤᠲᠠᠭᠠᠨ ᠭᠣᠣᠯ ᠤ᠋ᠨ ᠥᠭᠡᠳᠡ ᠶᠠᠪᠤᠪᠠ᠃ ᠳᠠᠢᠶᠠᠩ ᠬᠠᠭᠠᠨ ᠶᠠᠭᠠᠷᠠᠨ ᠥᠭᠦᠯᠡᠷᠦᠨ : 《ᠡᠨᠡ ᠲᠡᠮᠦᠵᠢᠨ ᠦ᠌ ᠬᠡᠦᠬᠡᠳ ᠢ᠋ ᠪᠠᠷᠢᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠲᠣᠭᠲᠠᠭᠠᠵᠤ ᠪᠣᠯᠤᠮᠤᠢ ! 》ᠭᠡᠮᠡᠨ ᠨᠡᠬᠡᠬᠦᠶᠡ᠂ ᠲᠡᠷᠡ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠦ᠋ᠨ ᠶᠠᠪᠤᠬᠤ ᠠᠨᠤ ᠮᠠᠰᠢ ᠲᠦᠷᠭᠡᠨ ᠴᠥᠮ ᠠᠪᠠ ᠰᠢᠪᠠᠭᠤᠨᠠ ᠣᠯᠠᠨ ᠶᠠᠪᠤᠭᠰᠠᠨ ᠮᠣᠷᠢ ᠲᠤᠯᠠ ᠬᠠᠷᠠᠬᠠᠨ ᠨᠡᠬᠡᠵᠦ ᠭᠦᠢᠴᠡᠬᠦ ᠦᠭᠡᠢ ᠪᠥᠬᠥᠶᠡ᠂ ᠵᠣᠴᠢ᠂ ᠴᠠᠭᠠᠲᠠᠢ ᠶ᠋ᠢᠨ ᠴᠡᠷᠢᠭ ᠭᠡᠨᠡᠳᠲᠡ ᠳᠠᠯᠪᠠᠭᠠ ᠲᠠᠯᠪᠢᠵᠤ ᠵᠡᠭᠦᠨ ᠨᠠᠷᠢᠨ ᠭᠣᠣᠯ ᠳ᠋ᠤᠷ ᠣᠷᠣᠵᠤ ᠡᠴᠢᠪᠡ᠃ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠨᠠᠷᠢᠨ ᠭᠣᠣᠯ ᠳ᠋ᠤᠷ ᠣᠷᠣᠵᠤ ᠦᠯᠦ ᠪᠣᠯᠬᠤ ᠲᠤᠯᠠ ᠬᠠᠷᠠᠬᠠᠨ ᠵᠣᠭ ᠵᠣᠭᠰᠣᠵᠤ ᠦᠵᠡᠬᠦᠯᠡ ᠪᠦᠷᠬᠦᠭ ᠭᠣᠣᠯ ᠤ᠋ᠨ ᠡᠬᠢᠨ ᠦ᠌ ᠠᠭᠤᠯᠠᠨ ᠤ᠋ ᠬᠠᠪᠠᠷ ᠲᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠨᠢᠭᠡᠨ ᠪᠠᠭ ᠵᠣᠭᠰᠣᠵᠤ᠂ ᠲᠤᠭ ᠲᠤᠷ ᠯᠠᠪᠯᠠᠨ ᠦᠵᠡᠪᠡᠰᠦ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠲᠤᠯᠠ ᠴᠡᠷᠢᠭ ᠢ᠋ ᠴᠢᠩᠳᠠ ᠴᠠᠭᠠᠵᠠᠯᠠᠨ : 《ᠬᠡᠨ ᠬᠥᠮᠦᠨ ᠬᠣᠢᠰᠢᠯᠠᠪᠠᠰᠤ ᠠᠯᠠᠮᠤᠢ᠂ ᠴᠣᠬᠢᠨ ᠭᠠᠷᠴᠤ ᠲᠡᠮᠦᠵᠢᠨ ᠢ᠋ ᠪᠠᠷᠢᠭᠲᠤᠨ ! 》ᠭᠡᠮᠡᠨ ᠳᠣᠪᠲᠣᠯᠭᠠᠨ ᠡᠴᠢᠵᠦ ᠭᠣᠣᠯ ᠤ᠋ᠨ ᠡᠬᠢᠨᠡ ᠬᠦᠷᠲᠡᠯᠡ ᠭᠣᠣ ᠶ᠋ᠢᠨ ᠡᠬᠢᠨ ᠦ᠌ ᠳᠡᠭᠡᠷᠡ ᠨᠢᠭᠡᠨ ᠵᠡᠷᠭᠡ ᠫᠤᠤ ᠳᠠᠭᠤᠷᠢᠰᠴᠤ ᠲᠠᠢᠽᠦ ᠥᠪᠡᠷ ᠢ᠋ᠶ᠋ᠡᠨ ᠶᠡᠬᠡ ᠪᠠᠢᠯᠳᠤᠭᠠᠨ ᠤ᠋ ᠬᠡᠩᠭᠡᠷᠭᠡ ᠶ᠋ᠢ ᠴᠣᠬᠢᠵᠤ᠂ ᠣᠯᠠᠨ ᠴᠡᠷᠢᠭ ᠢ᠋《ᠬᠠᠮᠲᠤ ᠪᠠᠷ ᠠᠯᠠᠨ ᠣᠷᠣ ! 》 ᠭᠡᠮᠡᠨ ᠬᠠᠰᠬᠢᠷᠤᠭᠤᠯᠤᠭᠰᠠᠨ ᠳ᠋ᠤᠷ ᠬᠠᠪᠠᠷ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠨᠢᠭᠡᠨ ᠠᠩᠭᠢ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠨᠢᠳᠦ ᠶ᠋ᠢ ᠴᠢᠴᠢᠮᠡ ᠭᠠᠷᠴᠤ ᠰᠢᠭᠤᠳ ᠪᠠᠷᠰ ᠤ᠋ᠨ ᠰᠢᠲᠦ ᠶ᠋ᠢᠨ ᠬᠢᠭᠢᠷᠢ ᠪᠡᠷ ᠠᠷᠪᠠᠨ ᠬᠣᠶᠠᠷ ᠠᠩᠭᠢ ᠪᠠᠷ ᠡᠰᠡᠷᠭᠦ ᠴᠣᠬᠢᠨ ᠢᠷᠡᠭᠰᠡᠨᠡ᠂ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠬᠠᠷᠠᠬᠠᠨ ᠲᠠᠢᠽᠦ ᠶ᠋ᠢᠨ ᠵᠣᠭᠰᠣᠬᠤ ᠬᠠᠪᠠᠷ ᠢ᠋ ᠬᠠᠷᠠᠵᠤ ᠶᠠᠪᠤᠬᠤ ᠲᠤᠯᠠ ᠭᠡᠨᠡᠳᠲᠡ ᠡᠪᠦᠳᠦᠭ ᠦ᠋ᠨ ᠳᠣᠣᠷᠠ ᠠ᠋ᠴᠠ ᠶᠡᠬᠡ ᠴᠡᠷᠢᠭ ᠭᠠᠷᠤᠭᠰᠠᠨ ᠡᠨᠡ ᠦᠶᠡ ᠳ᠋ᠦ᠍ᠷ ᠵᠠᠮᠤᠬᠠ ᠰᠡᠭᠦᠯ ᠳ᠋ᠦ᠍ᠷ ᠶᠠᠪᠤᠬᠤᠶᠠ ᠪᠤᠰᠤ ᠠᠢᠮᠠᠭ ᠤ᠋ᠳ ᠤ᠋ᠨ ᠡᠵᠡᠨ ᠳ᠋ᠦ᠍ᠷ ᠥᠭᠦᠯᠡᠷᠦᠨ : 《ᠨᠠᠢ᠍ᠮᠠᠨ ᠤ᠋ ᠳᠠᠢᠶᠠᠩ ᠬᠠᠭᠠᠨ ᠬᠣᠷᠢᠨ ᠲᠦᠮᠡᠨ ᠦ᠌ ᠴᠡᠷᠢᠭ ᠢ᠋ᠶ᠋ᠡᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠦᠭ ᠢᠷᠡᠬᠦᠢ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠬᠣᠨᠢᠨ ᠬᠡᠪᠡᠯᠢ ᠶ᠋ᠢᠨ ᠳᠣᠲᠣᠷᠠᠬᠢ ᠵᠤᠯᠪᠤᠳᠠᠰᠤᠨ ᠯᠤᠭᠠ ᠠᠳᠠᠯᠢ ᠲᠣᠯᠣᠭᠠᠢ ᠰᠢᠭᠢᠷᠡ ᠠᠷᠠᠰᠤ ᠡᠯᠢᠭᠡ ᠯᠦ᠍ᠭᠡ ᠨᠡᠢᠲᠡ ᠶ᠋ᠢ ᠦᠯᠡᠳᠡᠭᠡᠯ ᠦᠭᠡᠢ ᠢᠳᠡᠬᠦ ᠪᠡᠷ ᠠᠭᠠᠰᠢᠯᠠᠬᠤ ᠪᠥᠯᠥᠭᠡ᠃ ᠡᠳᠦᠭᠡ ᠪᠢ ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠮᠤᠷ ᠠᠮᠢᠰᠬᠤᠯ ᠢ᠋ ᠰᠢᠨᠵᠢᠯᠡᠪᠡᠰᠦ ᠤᠷᠢᠳᠠᠬᠢ ᠠ᠋ᠴᠠ ᠶᠡᠬᠡᠯᠡ ᠥᠪᠡᠷᠡ ᠪᠣᠯᠵᠤᠬᠤᠢ ! 》ᠭᠡᠮᠡᠨ ᠢᠯᠳᠡᠰᠢ ᠮᠥᠷᠡᠨ ᠦ᠌ ᠮᠠᠢᠯᠵᠢ ᠶ᠋ᠢᠨ ᠲᠣᠳᠣ ᠪᠠ ᠸᠠᠢᠯᠠ ᠶ᠋ᠢᠨ ᠬᠤᠪᠢᠲᠤ ᠬᠤᠸᠠ ᠯᠤᠭᠠ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠣᠢᠨᠠ ᠬᠣᠴᠣᠷᠴᠤ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠦᠵᠡᠬᠦᠯᠡ᠂ ᠠᠭᠤᠯᠠᠨ ᠤ᠋ ᠬᠠᠪᠠᠷ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠠᠯᠤᠬᠠ ᠰᠦᠬᠡ ᠶ᠋ᠢᠨ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠰᠢᠭᠤᠳ ᠴᠣᠬᠢᠨ ᠣᠷᠣᠵᠤ ᠢᠷᠡᠲᠡᠯᠡ ᠠᠭᠤᠯᠠᠨ ᠤ᠋ ᠬᠣᠶᠠᠷ ᠬᠠᠪᠢᠷᠭᠠ ᠠ᠋ᠴᠠ ᠪᠦᠷᠢᠶᠡ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠬᠣᠶᠠᠷ ᠡᠲᠡᠭᠡᠳ ᠡᠴᠡ ᠪᠠᠰᠠ ᠬᠣᠯᠬᠣᠪᠴᠢ ᠨᠤᠮᠤ ᠪᠠᠷ ᠬᠠᠷᠪᠤᠵᠤ ᠠᠯᠠᠨ ᠪᠠᠭᠤᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠰᠣᠴᠢᠮᠠᠭᠠᠢ ᠪᠠᠷ ᠤᠴᠠᠷᠠᠭᠰᠠᠨᠠ ᠬᠠᠷᠠᠬᠠᠨ ᠰᠡᠵᠢᠭᠯᠡᠬᠦᠶᠡ᠂ ᠭᠡᠨᠡᠳᠲᠡ ᠪᠠᠰᠠ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠵᠡᠪᠡ ᠪᠠ ᠭᠣᠣᠯ ᠤ᠋ᠨ ᠡᠷᠭᠢ ᠡᠴᠡ ᠪᠦᠷᠢᠶᠡ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠬᠠᠭᠠᠵᠤ ᠢᠷᠡᠪᠡ᠃ ᠦᠵᠡᠰᠡ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠠᠭᠤᠯᠠᠨ ᠢ᠋ ᠳᠠᠪᠠᠵᠤ ᠬᠦᠷᠴᠦ ᠢᠷᠡᠭᠰᠡᠨ ᠠᠵᠤᠭᠤ᠃
ᠲᠡᠳᠦᠢ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠶᠡᠬᠡᠯᠡ ᠠᠶᠤᠵᠤ ᠰᠡᠵᠢᠭᠯᠡᠬᠦᠶᠡ᠂ ᠳᠠᠢᠶᠠᠩ ᠬᠠᠭᠠᠨ ᠬᠡᠳᠦᠢ ᠠᠷᠭᠠ ᠳ᠋ᠤᠷ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠪᠡᠴᠦ ᠴᠡᠷᠢᠭ ᠢ᠋ ᠭᠤᠷᠪᠠᠨ ᠠᠩᠭᠢ ᠬᠠᠭᠠᠰᠯᠠᠵᠤ᠂ ᠭᠤᠷᠪᠠᠨ ᠵᠦᠭ ᠲᠦ᠍ᠷ ᠲᠤᠯᠬᠤᠢ ᠳ᠋ᠤᠷ ᠬᠥᠮᠦᠨ ᠮᠣᠷᠢ ᠥᠭᠡᠳᠡ ᠪᠠᠢᠯᠳᠤᠬᠤᠢ ᠳ᠋ᠤᠷ ᠪᠡᠷᠬᠡ ᠲᠤᠯᠠ ᠭᠤᠷᠪᠠᠨ ᠡᠲᠡᠭᠡᠳ ᠦ᠋ᠨ ᠪᠠᠢᠯᠳᠤᠨ ᠪᠠᠭᠤᠵᠤ ᠢᠷᠡᠬᠦ ᠢᠨᠦ ᠴᠢᠯᠠᠭᠤ ᠥᠩᠬᠥᠷᠢᠨ ᠠᠭᠤᠯᠠ ᠶᠡᠭᠦᠷᠡᠬᠦ ᠮᠡᠲᠦ ᠲᠤᠯᠠ ᠡᠮᠦᠨᠡ ᠴᠡᠷᠢᠭ ᠦ᠋ᠨ ᠬᠣᠯᠠᠰᠤᠪᠴᠢ᠂ ᠠᠯᠤᠬᠠ ᠯᠤᠭᠠ ᠪᠠᠢᠯᠳᠤᠨ᠂ ᠴᠢᠦᠢ ᠱᠢ ᠯᠢ ᠰᠦᠬᠡ ᠯᠦ᠋ᠭᠡ ᠲᠤᠯᠵᠤ᠂ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠳᠥᠷᠪᠡᠨ ᠵᠠᠩᠵᠤᠨ ᠬᠣᠷᠢᠨ ᠤᠳᠠᠭᠠ ᠵᠥᠷᠢᠴᠡᠯᠳᠦᠨ᠂ ᠠᠯᠤᠬᠠ ᠰᠠᠷᠠᠨ ᠰᠦᠬᠡ ᠪᠡᠨ ᠬᠣᠭᠣᠰᠣᠨ ᠭᠠᠵᠠᠷ ᠬᠡᠳᠦᠨᠲᠡ ᠬᠤᠷᠤᠢᠯᠠᠨ ᠬᠣᠯᠠᠰᠤᠪᠴᠢ ᠶ᠋ᠢᠨ ᠰᠤᠭᠤᠨ ᠳᠣᠣᠭᠤᠷ ᠰᠢᠷᠭᠤᠨ ᠭᠠᠷᠴᠤ ᠭᠡᠨᠡᠳᠲᠡ ᠪᠡᠶᠡ ᠡᠭᠡᠵᠦ ᠬᠤᠯᠠᠰᠤᠪᠴᠢ ᠶ᠋ᠢᠨ ᠠᠷᠤ ᠬᠣᠢᠨᠠ ᠠ᠋ᠴᠠ ᠲᠣᠯᠣᠭᠠᠢ ᠤᠷᠤᠭᠤ ᠨᠢᠭᠡᠨᠲᠡ ᠴᠠᠪᠴᠢᠵᠤ ᠬᠣᠶᠠᠷ ᠠᠩᠭᠢ ᠪᠣᠯᠭᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠴᠢᠦᠢ ᠱᠢ ᠯᠢ ᠶᠡᠬᠡᠯᠡ ᠰᠣᠴᠢᠵᠤ᠂ ᠰᠦᠬᠡ ᠯᠦ᠍ᠭᠡ ᠪᠠᠢᠯᠳᠤᠬᠤᠶᠠ᠂ ᠰᠦᠬᠡ ᠭᠡᠨᠡᠳᠲᠡ ᠡᠮᠡᠭᠡᠯ ᠦ᠋ᠨ ᠠᠷᠤ ᠳ᠋ᠤᠷ ᠲᠠᠩᠭᠠᠢᠨ ᠬᠡᠪᠲᠡᠵᠦ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠴᠢᠦᠢ ᠱᠢ ᠯᠢ ᠶ᠋ᠢᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠮᠡᠭᠴᠡ ᠪᠡᠶᠡ ᠨᠢᠭᠡᠨᠲᠡ ᠤᠷᠪᠠᠵᠤ ᠵᠡᠪᠰᠡᠭ ᠢ᠋ᠶ᠋ᠡᠨ ᠲᠠᠶᠠᠭᠳᠠᠨ ᠴᠢᠦᠢ ᠱᠢ ᠯᠢ ᠶ᠋ᠢᠨ ᠳᠤᠮᠳᠠᠭᠤᠷ ᠲᠡᠪᠡᠷᠢᠭᠡᠳ ᠮᠣᠷᠢ ᠪᠠᠨ ᠨᠢᠭᠡᠨᠲᠡ ᠢᠰᠬᠦᠯᠵᠦ᠂ ᠴᠢᠦᠢ ᠱᠢ ᠯᠢ ᠶ᠋ᠢᠨ ᠮᠣᠷᠢᠨ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠥᠩᠭᠡᠯᠦᠦᠷ ᠥᠭᠡᠳᠡ ᠨᠢᠭᠡᠨᠲᠡ ᠪᠠᠵᠠᠨ ᠠᠳᠬᠤᠵᠤ ᠬᠣᠶᠠᠭᠤᠯᠠ ᠬᠠᠮᠲᠤ ᠮᠣᠷᠢᠨ ᠠ᠋ᠴᠠ ᠥᠩᠬᠥᠷᠢᠨ ᠤᠨᠠᠵᠤ ᠢᠷᠡᠭᠰᠡᠨ ᠢ᠋ ᠠᠯᠤᠬᠠ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠷᠤᠨ ᠣᠷᠣᠵᠤ᠂ ᠴᠢᠦᠢ ᠱᠢ ᠯᠢ ᠶ᠋ᠢ ᠠᠮᠢᠳᠤ ᠪᠠᠷᠢᠪᠠ᠃ ᠲᠠᠢᠶᠠᠩ ᠬᠠᠭᠠᠨ ᠶᠡᠬᠡᠯᠡ ᠴᠢᠬᠤᠯᠳᠠᠵᠤ ᠪᠠᠢᠲᠠᠯᠠ ᠵᠡᠭᠦᠨ ᠮᠥᠷᠥ ᠶ᠋ᠢᠨ ᠵᠡᠭᠦᠨ ᠠᠭᠤᠯᠠᠨ ᠤ᠋ ᠳᠡᠪᠰᠡᠭ ᠲᠣᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠴᠡ ᠪᠦᠬᠦ ᠪᠡᠯᠭᠦᠳᠡᠢ᠂ ᠣᠢᠲᠤ ᠣᠴᠢᠭ ᠬᠣᠶᠠᠭᠤᠯᠠ ᠨᠠᠢ᠍ᠮᠠᠨ ᠤ᠋ ᠰᠥᠷᠦᠯᠬᠡᠭ ᠢ᠋ ᠵᠢᠳᠠᠯᠠᠨ ᠤᠨᠠᠭᠠᠵᠤ᠂ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠷᠤᠨ ᠣᠷᠣᠵᠤ ᠢᠷᠡᠬᠦᠶᠡ᠂ ᠪᠠᠷᠠᠭᠤᠨ ᠮᠥᠷᠥ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠮᠢᠩᠭᠠᠲᠠᠨ ᠭᠠᠯᠵᠠᠭᠤ ᠪᠤᠬᠠ ᠬᠣᠶᠠᠭᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠠᠪᠤᠲᠤ ᠬᠠᠰᠠᠷ᠂ ᠪᠣᠱᠣᠭᠲᠤ ᠪᠤᠲ᠋ᠤ ᠯᠤᠭᠠ ᠪᠠᠢᠯᠳᠤᠬᠤᠶᠠ᠂ ᠮᠢᠩᠭᠠᠲᠠᠨ ᠤ᠋ ᠮᠣᠷᠢᠨ ᠲᠣᠢᠯᠠᠵᠤ ᠣᠢᠴᠢᠭᠰᠠᠨ ᠢ᠋ ᠭᠠᠯᠵᠠᠭᠤ ᠪᠤᠬᠠ ᠬᠠᠮᠠᠭᠠᠯᠠᠨ ᠪᠠᠢᠯᠳᠤᠬᠤᠶᠠ᠂ ᠬᠠᠪᠤᠲᠤ ᠬᠠᠰᠠᠷ ᠭᠠᠯᠵᠠᠭᠤ ᠪᠤᠬᠠ ᠶ᠋ᠢᠨ ᠢᠯᠳᠦ ᠪᠠᠷᠢᠭ᠍ᠰᠠᠨ ᠭᠠᠷ ᠢ᠋ ᠬᠠᠷᠪᠤᠭᠰᠠᠨ ᠳ᠋ᠤᠷ ᠴᠢᠪᠬᠢᠲᠡᠯᠡ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠠᠷᠤ ᠨᠢᠭᠡᠨᠲᠡ ᠣᠨᠣᠭᠳᠠᠵᠤ ᠢᠯᠳᠦᠨ ᠦ᠌ ᠪᠠᠷᠢᠭᠤᠯ ᠳ᠋ᠤᠷ ᠭᠠᠳᠠᠭᠰᠠᠨᠠ᠂ ᠭᠠᠯᠵᠠᠭᠤ ᠪᠤᠬᠠ ᠪᠠᠢᠯᠳᠤᠨ ᠴᠢᠳᠠᠬᠤ ᠦᠭᠡᠢ ᠵᠢᠭ᠍ᠰᠠᠭᠠᠯ ᠤ᠋ᠨ ᠵᠦᠭ ᠳᠤᠲᠠᠭᠠᠨ ᠣᠷᠣᠵᠤ ᠢᠷᠡᠭᠰᠡᠨᠡ᠂ ᠪᠣᠲ᠋ᠣ ᠬᠡᠳᠦᠢᠨᠡᠢ ᠪᠠᠰᠠ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠳᠠᠷᠤᠨ ᠣᠷᠣᠵᠤ ᠢᠷᠡᠪᠡ᠃ ᠲᠠᠢᠶᠠᠩ ᠬᠠᠭᠠᠨ ᠲᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠡᠨ ᠮᠡᠳᠡᠵᠦ ᠬᠠᠷᠠᠬᠠᠨ ᠠᠷᠭᠠ ᠦᠭᠡᠢ ᠪᠥᠬᠥᠶᠡ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠬᠠᠪᠠᠷ ᠤᠷᠤᠭᠤ ᠨᠢᠰᠬᠦ ᠮᠡᠲᠦ ᠴᠣᠬᠢᠨ ᠣᠷᠣᠵᠤ ᠢᠷᠡᠭᠡᠳ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠬᠠᠳᠠ ᠠᠨᠢᠷᠯᠠᠮᠤᠢ᠃ ᠡᠭᠦᠨ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠰᠠᠨᠠᠪᠠᠰᠤ ᠲᠤᠯᠬᠤᠶᠠ ᠪᠡᠷᠬᠡ ᠭᠡᠮᠡᠨ ᠴᠡᠷᠢᠭ ᠢ᠋ ᠡᠭᠡᠭᠦᠯᠵᠦ ᠪᠤᠷᠤᠭᠤᠯᠠᠬᠤᠶᠠ᠂ ᠳᠡᠮᠡᠢ ᠲᠠᠪᠢᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ ᠡᠮᠦᠨᠡᠬᠢ ᠴᠡᠷᠢᠭ ᠵᠣᠭᠰᠣᠪᠠ᠃ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂ ᠡᠮᠦᠨᠡ ᠳᠣᠪᠣ ᠶ᠋ᠢᠨ ᠳᠡᠭᠡᠷᠡ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠪᠣᠢ ᠬᠡᠮᠡᠮᠦᠢ᠃ ᠲᠠᠢᠶᠠᠩ ᠬᠠᠭᠠᠨ ᠴᠠᠭᠠᠵᠠ ᠵᠠᠷᠯᠠᠨ᠂《ᠰᠢᠭᠤᠳ ᠡᠷᠭᠢᠬᠦ ᠢᠨᠦ ᠴᠢᠬᠤᠯᠠ᠂ ᠪᠤᠰᠤ ᠵᠡᠪᠡ ᠳ᠋ᠦ᠍ᠷ ᠪᠢᠲᠡᠭᠡᠢ ᠣᠷᠣ ! 》 ᠬᠡᠮᠡᠲᠡᠯᠡ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠶᠡᠬᠡ ᠭᠣᠣᠯ ᠤ᠋ᠨ ᠠᠮᠠᠨ ᠠ᠋ᠴᠠ ᠴᠢᠯᠠᠭᠤ᠂ ᠲᠡᠮᠦᠷ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠭᠠᠷᠴᠤ ᠬᠠᠪᠴᠢᠨ ᠠᠯᠠᠬᠤᠢ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠬᠣᠶᠠᠷ ᠠᠩᠭᠢ ᠲᠠᠰᠤᠯᠤᠭᠳᠠᠵᠤ᠂ ᠲᠠᠢᠶᠠᠩ ᠬᠠᠭᠠᠨ ᠶᠠᠭᠠᠷᠠᠨ ᠴᠡᠷᠢᠭ ᠢ᠋ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠶᠡᠬᠡ ᠲᠡᠯᠡᠭ ᠢ᠋ ᠬᠥᠨᠳᠡᠯᠡᠨ ᠭᠡᠲᠦᠯᠵᠦ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠶᠡᠬᠡ ᠭᠣᠣᠯ ᠳ᠋ᠤᠷ ᠣᠷᠣᠲᠠᠯᠠ ᠲᠠᠢᠽᠦ ᠶ᠋ᠢᠨ ᠨᠡᠬᠡᠬᠦ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠭᠣᠣᠯ ᠤ᠋ᠨ ᠡᠬᠢ ᠪᠡᠷ ᠳᠠᠷᠤᠵᠤ᠂ ᠬᠣᠢᠲᠤ ᠵᠦᠭ ᠡᠴᠡ ᠳᠠᠷᠤᠨ ᠣᠷᠣᠵᠤ ᠨᠡᠬᠡᠭᠰᠡᠨ ᠳ᠋ᠦ᠍ᠷ ᠡᠮᠦᠨᠡ ᠡᠴᠡ ᠪᠠᠰᠠ ᠠᠩᠬᠠᠨ ᠤ᠋ ᠤᠯᠠᠭᠠᠨ ᠰᠢᠬᠦᠷᠲᠦ ᠴᠡᠷᠢᠭ ᠪᠠᠰᠠ ᠬᠣᠯᠬᠣᠪᠴᠢ ᠨᠤᠮᠤ ᠪᠠᠷ ᠬᠠᠷᠪᠤᠨ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠬᠡᠳᠦᠢᠨᠡᠢ ᠰᠠᠮᠠᠭᠤᠷᠠᠵᠤ᠂ ᠵᠠᠮᠤᠬᠠ ᠪᠠᠰᠠ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠲᠡᠢ ᠬᠣᠢᠨᠠ ᠠᠨᠤ ᠬᠣᠴᠣᠷᠴᠤ ᠠᠭᠤᠯᠠᠨ ᠤ᠋ ᠭᠣᠣᠯ ᠤᠷᠤᠭᠤ ᠳᠤᠲᠠᠭᠠᠨ ᠡᠴᠢᠪᠡ᠃ ᠲᠡᠳᠦᠢ ᠲᠠᠢᠶᠠᠩ ᠬᠠᠭᠠᠨ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠲᠦ᠍ᠷ ᠬᠠᠪᠴᠢᠭ᠍ᠳᠠᠬᠤᠶᠠ ᠬᠣᠢᠨᠠ ᠠ᠋ᠴᠠ ᠴᠢᠯᠠᠭᠤ᠂ ᠲᠡᠮᠦᠷ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠠᠯᠠᠨ ᠢᠷᠡᠬᠦᠶᠡ ᠶᠡᠬᠡᠯᠡ ᠴᠢᠬᠤᠯᠳᠠᠨ᠂ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠳᠣᠪᠲᠣᠯᠬᠤᠢ ᠳ᠋ᠤᠷ ᠭᠡᠨᠡᠳᠲᠡ ᠪᠠᠰᠠ ᠦᠬᠡᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠲᠡᠭᠷᠢ ᠭᠠᠵᠠᠷ ᠳᠣᠯᠭᠢᠰᠴᠤ ᠮᠤᠬᠤᠯᠢ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠳᠠᠷᠤᠨ ᠣᠷᠣᠵᠤ ᠢᠷᠩᠰᠡᠨᠡ᠂ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤᠷ ᠴᠥᠮ ᠳᠠᠢᠰᠤᠨ ᠳ᠋ᠤᠷ ᠳᠠᠷᠤᠭᠳᠠᠵᠤ ᠡᠴᠢᠬᠦ ᠵᠦᠭ ᠦᠭᠡᠢ ᠪᠥᠬᠥᠶᠡ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠠᠪᠤᠨ ᠠᠩᠭᠢ ᠴᠡᠷᠢᠭ ᠡᠬᠢ ᠰᠡᠭᠦᠯ ᠵᠠᠯᠭᠠᠯᠳᠤᠭᠠᠳ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠬᠠᠭᠠᠵᠤ ᠪᠠᠢᠯᠳᠤᠭᠰᠠᠨ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠡᠨᠡ ᠦᠶᠡ ᠳ᠋ᠦ᠍ᠷ ᠶᠡᠬᠡ ᠬᠠᠭᠠᠰ ᠬᠣᠬᠢᠷᠠᠵᠤ ᠪᠤᠲᠠᠷᠠᠯᠳᠤᠭᠰᠠᠨ ᠲᠤᠯᠠ ᠨᠢᠭᠡᠮᠦᠰᠦᠨ ᠰᠥᠰᠥ ᠬᠡᠮᠬᠡᠷᠡᠵᠦ᠂ ᠭᠠᠭᠴᠠ ᠳᠤᠲᠠᠭᠠᠨ ᠭᠠᠷᠬᠤ ᠶ᠋ᠢ ᠡᠷᠢᠬᠦ ᠪᠣᠢ ᠶᠠ᠂ ᠶᠠᠭᠤᠨ ᠤ᠋ ᠡᠰᠡᠷᠭᠦ ᠪᠠᠢᠯᠳᠤᠬᠤ ᠪᠣᠢ!
ᠲᠡᠳᠦᠢ ᠴᠡᠷᠢᠭ ᠨᠡᠢᠲᠡ ᠳᠤᠲᠠᠭᠠᠭᠰᠠᠨ ᠲᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠴᠠᠩ ᠴᠣᠬᠢᠵᠤ ᠳᠥᠷᠪᠡᠨ ᠵᠦᠭ ᠡᠴᠡ ᠴᠠᠷᠴᠠᠬᠠᠢ ᠨᠢᠰᠬᠦ ᠮᠡᠲᠦ ᠰᠠᠮᠠᠭᠤᠨ ᠰᠤᠮᠤ ᠲᠠᠯᠪᠢᠭᠤᠯᠤᠭᠰᠠᠨ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠨᠢᠳᠦ ᠨᠡᠭᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠲᠠᠯᠲᠠᠷᠢᠨ ᠬᠠᠯᠬᠠᠯᠠᠯᠴᠠᠬᠤᠢ ᠳ᠋ᠤᠷ ᠬᠣᠢᠲᠤ ᠠ᠋ᠴᠠ ᠣᠷᠣᠵᠤ ᠢᠷᠡᠭᠡᠳ ᠤᠯᠠᠭᠠᠨ ᠬᠣᠰᠢᠭᠤ ᠶ᠋ᠢᠨ ᠳᠡᠭᠡᠷᠡ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠵᠣᠭᠰᠣᠵᠤ ᠬᠠᠪᠤᠲᠤ ᠬᠠᠰᠠᠷ᠂ ᠴᠤᠤ ᠮᠡᠷᠭᠡᠨ᠂ ᠪᠣᠱᠣᠭᠲᠤ ᠪᠣᠲ᠋ᠣ ᠭᠤᠷᠪᠠᠭᠤᠯᠠ ᠶ᠋ᠢᠨ ᠭᠤᠷᠪᠠᠨ ᠠᠩᠭᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠶ᠋ᠢᠨ ᠴᠡᠷᠢᠭ ᠢ᠋ ᠠᠪᠴᠤ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠰᠢᠷᠠ ᠰᠢᠭᠦᠷ ᠳᠠᠯᠪᠠᠭᠠ ᠶ᠋ᠢᠨ ᠵᠦᠭ ᠬᠠᠷᠪᠤᠬᠤᠢ ᠳ᠋ᠤᠷ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠠᠬᠠ ᠪᠤᠯᠤᠤ ᠸᠠᠩ ᠤ᠋ᠨ ᠮᠥᠷᠥ ᠳ᠋ᠦ᠍ᠷ ᠨᠢᠭᠡᠨ ᠰᠤᠮᠤ ᠲᠣᠰᠴᠤ ᠮᠣᠷᠢᠨ ᠠ᠋ᠴᠠ ᠥᠩᠬᠥᠷᠢᠨ ᠤᠨᠠᠭᠰᠠᠨ ᠢ᠋ ᠴᠢᠦᠢ ᠴᠦ᠍ ᠯᠢᠦᠢ ᠶᠠᠭᠠᠷᠠᠨ ᠲᠡᠳᠬᠦᠵᠦ ᠮᠣᠷᠢᠨ ᠳ᠋ᠤᠷ ᠤᠨᠤᠭᠤᠯᠤᠭᠠᠳ ᠶᠠᠭᠠᠷᠠᠨ ᠥᠭᠦᠯᠡᠷᠦᠨ : 《ᠡᠨᠡ ᠣᠯᠠᠨ ᠴᠡᠷᠢᠭ ᠯᠦ᠍ᠭᠡ ᠵᠢᠭᠤᠷᠠᠯᠳᠤᠪᠠᠰᠤ ᠬᠠᠷᠠᠭᠰᠠᠭᠠᠷ ᠲᠡᠳᠡᠨ ᠦ᠌ ᠵᠡᠪᠡ ᠳ᠋ᠦ᠍ᠷ ᠦᠬᠦᠮᠦᠢ ! 》ᠭᠡᠮᠡᠨ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠢ᠋ ᠠᠪᠴᠤ ᠲᠠᠢᠶᠠᠩ ᠬᠠᠭᠠᠨ ᠯᠤᠭᠠ ᠬᠦᠨᠳᠦ ᠬᠠᠭᠠᠭᠰᠠᠨ ᠭᠠᠵᠠᠷ ᠢ᠋ ᠰᠢᠪᠲᠤᠯᠤᠨ ᠭᠠᠷᠲᠠᠯᠠ ᠳᠠᠢᠶᠠᠩ ᠬᠠᠭᠠᠨ ᠤ᠋ ᠭᠠᠷ ᠤ᠋ᠨ ᠱᠣ ᠳ᠋ᠤᠷ ᠪᠠᠰᠠ ᠨᠢᠭᠡᠨ ᠰᠤᠮᠤ ᠲᠤᠰᠪᠠ᠃ ᠲᠡᠷᠡ ᠶᠡᠬᠡᠯᠡ ᠪᠠᠴᠢᠮᠳᠠᠨ ᠮᠣᠷᠢᠨ ᠢ᠋ ᠲᠠᠰᠢᠭᠤᠷᠳᠠᠨ ᠵᠡᠭᠦᠨ ᠬᠣᠢᠲᠤ ᠵᠦᠭ ᠳᠣᠪᠲᠣᠯᠤᠨ ᠡᠴᠢᠬᠦᠶᠡ᠂ ᠵᠡᠭᠦᠨ ᠶᠡᠬᠡ ᠬᠠᠪᠠᠷ ᠤ᠋ᠨ ᠳᠡᠭᠡᠷᠡ ᠪᠦᠲᠦᠨᠡ ᠶ᠋ᠢᠨ ᠢᠯᠠᠭᠤᠭᠰᠠᠨ ᠤ᠋ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠲᠦ᠍ᠷ ᠬᠡᠳᠦᠢᠨᠡᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠤᠭ ᠬᠢᠭᠢᠷᠢ ᠪᠣᠰᠬᠠᠵᠤ᠂ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠬᠠᠭᠠᠰ ᠴᠡᠷᠢᠭ ᠢ᠋ ᠴᠥᠮ ᠮᠡᠬᠡᠯᠡᠨ ᠳᠠᠭᠠᠭᠤᠯᠵᠤᠬᠤᠢ᠃ ᠲᠠᠢᠶᠠᠩ ᠬᠠᠭᠠᠨ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠬᠥᠯ ᠳᠡᠪᠰᠡᠨ《ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠢᠯᠠᠭᠤᠭᠰᠠᠨᠠ ᠮᠡᠬᠡᠯᠡᠭᠳᠡᠪᠡ ! 》ᠭᠡᠮᠡᠨ ᠪᠠᠰᠠ ᠮᠣᠷᠢ ᠶ᠋ᠢ ᠡᠭᠡᠭᠦᠯᠵᠦ ᠡᠮᠦᠨᠡ ᠵᠦᠭ ᠡᠴᠢᠪᠡᠰᠦ᠂ ᠴᠢᠯᠠᠭᠤ᠂ ᠲᠡᠮᠦᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠵᠤ᠂ ᠨᠢᠭᠡᠨ ᠵᠡᠷᠭᠡ ᠠᠯᠠᠭᠳᠠᠵᠤ ᠶᠡᠬᠡ ᠠᠭᠤᠯᠠ ᠶ᠋ᠢᠨ ᠡᠮᠦᠨᠡᠭᠦᠷ ᠪᠠᠷᠠᠭᠤᠨ ᠵᠦᠭ ᠳᠤᠲᠠᠭᠠᠨ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠬᠣᠷᠢᠭ᠍ᠳᠠᠵᠤ᠂ ᠪᠠᠰᠠ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠳᠤᠲᠠᠭᠠᠨ ᠡᠴᠢᠬᠦᠶᠡ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠᠬᠢ ᠲᠤᠭ ᠳᠠᠯᠪᠠᠭᠠ᠂ ᠰᠢᠬᠦᠷ ᠲᠡᠮᠳᠡᠭ ᠴᠥᠮ ᠤᠨᠠᠭᠰᠠᠨ ᠳ᠋ᠤᠷ ᠶᠡᠬᠡ ᠴᠡᠷᠢᠭ ᠨᠢᠭᠡᠨᠲᠡ ᠨᠢᠳᠦ ᠦᠭᠡᠢ ᠰᠠᠮᠠᠭᠤᠷᠠᠪᠠ᠃ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠮᠤᠬᠤᠯᠢ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠵᠠᠷᠯᠠᠵᠤ : 《ᠲᠠᠢᠶᠠᠩ ᠬᠠᠭᠠᠨ ᠪᠠᠷᠢᠭ᠍ᠳᠠᠪᠠ 》 ᠭᠡᠮᠡᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠪᠠᠷᠬᠢᠷᠠᠭᠰᠠᠨ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠬᠠᠭᠠᠭᠳᠠᠭᠰᠠᠨ ᠣᠯᠠᠨ ᠴᠡᠷᠢᠭ ᠳᠠᠭᠠᠰᠤᠭᠠᠢ ᠭᠡᠮᠡᠨ ᠪᠠᠷᠬᠢᠷᠠᠯᠴᠠᠨ ᠳᠠᠭᠤᠳᠠᠯᠴᠠᠬᠤᠢ ᠳ᠋ᠤᠷ ᠲᠠᠢᠶᠠᠩ ᠬᠠᠭᠠᠨ ᠬᠡᠳᠦᠢᠨᠡᠢ ᠰᠣᠨᠣᠰᠴᠤ ᠬᠥᠯ ᠳᠡᠪᠰᠡᠨ《ᠡᠨᠡ ᠮᠤᠬᠤᠯᠢ ᠶ᠋ᠢᠨ ᠵᠢᠰᠤᠷ ᠠᠷᠭᠠ ᠶᠠᠭᠤᠲᠠᠢ ᠬᠡᠴᠡᠭᠦᠦ ! 》 ᠭᠡᠮᠡᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠨᠢᠭᠡᠨᠲᠡ ᠣᠷᠣᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠡᠳᠦᠨ ᠵᠠᠭᠤᠨ ᠮᠣᠷᠢᠲᠠᠨ ᠢ᠋ ᠠᠪᠴᠤ ᠶᠠᠪᠤᠬᠤᠶᠠ᠂ ᠨᠢᠭᠡᠨ ᠳ᠋ᠦ᠍ᠷ ᠪᠠᠢᠯᠳᠤᠵᠤ ᠬᠥᠮᠦᠨ ᠮᠣᠷᠢ ᠨᠢᠭᠡᠨᠲᠡ ᠴᠤᠴᠠᠭᠰᠠᠨ ᠲᠤᠯᠠ ᠬᠠᠷᠠᠬᠠᠨ ᠠᠭᠤᠯᠠ ᠥᠭᠡᠳᠡ ᠮᠡᠩᠳᠡᠭᠦᠷᠡᠨ ᠶᠠᠪᠤᠬᠤᠢ ᠳ᠋ᠤᠷ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠨᠡᠬᠡᠨ ᠢᠷᠡᠬᠦᠶ᠂ ᠶᠠᠭᠠᠷᠠᠨ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠤᠷᠤᠭᠤ ᠳ᠋ᠤᠷ ᠬᠦᠷᠲᠡᠯᠡ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠶᠡᠬᠡ ᠦᠬᠡᠷ ᠫᠤᠤ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠳᠠᠭᠤᠷᠢᠰᠴᠤ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ ᠨᠠᠷ ᠤ᠋ᠨ ᠨᠠᠢ᠍ᠮᠠᠨ ᠵᠠᠩᠵᠤᠨ ᠤ᠋ ᠮᠢᠩᠭᠠᠨ ᠴᠡᠷᠢᠭ ᠭᠠᠷᠴᠤ ᠲᠥᠭᠥᠷᠢᠭᠯᠡᠨ ᠬᠠᠭᠠᠪᠠ᠃ ᠲᠠᠢᠶᠠᠩ ᠬᠠᠭᠠᠨ ᠦᠵᠡᠪᠡᠰᠦ ᠤᠯᠠᠭᠠᠨ ᠨᠠᠷᠠᠨ ᠪᠠᠷᠠᠭᠤᠨ ᠠᠭᠤᠯᠠᠨ ᠤ᠋ ᠣᠷᠣᠢ ᠳ᠋ᠤᠷ ᠣᠷᠣᠬᠤᠶᠠ ᠨᠢᠭᠡᠨ ᠬᠡᠰᠡᠭ ᠬᠠᠷᠠ ᠠᠭᠤᠷ ᠨᠠᠷᠠᠨ ᠢ᠋ ᠬᠦᠷᠢᠶᠡᠯᠡᠭᠰᠡᠨ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠭᠡᠨᠡᠳᠲᠡ ᠰᠡᠵᠢᠭᠯᠡᠵᠦ : 《ᠡᠨᠡ ᠳᠠᠪᠠᠭᠠᠨ ᠤ᠋ ᠨᠡᠷᠡ ᠶᠠᠭᠤᠨ ? 》ᠭᠡᠮᠡᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠴᠡᠷᠢᠭ ᠦ᠋ᠨ ᠠᠷᠠᠳ ᠮᠡᠳᠡᠭᠦᠯᠦᠷᠦᠨ《ᠡᠨᠡ ᠳᠠᠪᠠᠭᠠᠨ ᠢ᠋ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠨᠠᠷᠠᠨ ᠰᠢᠩᠭᠡᠬᠦ ᠳᠠᠪᠠᠭᠠ ᠬᠡᠮᠡᠮᠦᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠲᠡᠭᠷᠢ ᠶ᠋ᠢ ᠬᠠᠨᠳᠤᠵᠤ ᠤᠷᠲᠤ ᠰᠡᠭᠦᠷᠡᠰᠦ ᠠᠯᠳᠠᠵᠤ ᠥᠭᠦᠯᠡᠷᠦᠨ : 《ᠡᠨᠡ ᠳᠠᠷᠤᠢ ᠮᠢᠨᠦ ᠦᠬᠦᠬᠦ ᠭᠠᠵᠠᠷ ᠠᠵᠤᠭᠤ ! ᠲᠡᠢᠨ ᠪᠣᠯᠪᠠᠴᠤ ᠦᠬᠦᠨ ᠦᠬᠦᠲᠡᠯᠡ ᠪᠠᠢᠯᠳᠤᠬᠤ ᠶ᠋ᠢ ᠪᠠᠢᠵᠤ ᠦᠯᠦ ᠪᠣᠯᠤᠮᠤᠢ ! 》 ᠭᠡᠮᠡᠨ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ ᠢ᠋ ᠨᠠᠢ᠍ᠮᠠᠨ ᠠᠩᠭᠢ ᠰᠠᠯᠭᠠᠵᠤ᠂ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠵᠦᠭ ᠪᠠᠢᠯᠳᠤᠬᠤᠶᠠ᠂ ᠲᠡᠷᠢᠭᠦᠯᠡᠭᠰᠡᠨ ᠴᠡᠷᠢᠭ ᠶᠡᠬᠡᠯᠡ ᠬᠣᠬᠢᠷᠠᠵᠤ᠂ ᠴᠢᠦᠢ ᠴᠦ᠍ ᠯᠢᠦᠢ ᠶᠡᠬᠡᠯᠡ ᠴᠢᠬᠤᠯᠳᠠᠨ ᠥᠭᠦᠯᠡᠷᠦᠨ : 《ᠨᠢᠭᠡᠨᠲᠡ ᠶᠡᠬᠡ ᠴᠡᠷᠢᠭ ᠡᠴᠡ ᠰᠠᠯᠤᠭᠠᠳ ᠡᠳᠦᠭᠡ ᠪᠠᠰᠠ ᠶᠠᠭᠤᠨ ᠢ᠋ ᠪᠠᠢᠯᠳᠤᠬᠤ ᠪᠣᠢ ! 》 ᠭᠡᠮᠡᠨ ᠬᠡᠳᠦ ᠬᠡᠳᠦᠨᠲᠡ ᠬᠡᠯᠡᠬᠦᠶᠡ ᠲᠠᠢᠶᠠᠩ ᠬᠠᠭᠠᠨ ᠥᠭᠦᠯᠡᠷᠦᠨ : 《ᠡᠷᠡ ᠬᠥᠮᠦᠨ ᠳᠤᠲᠠᠭᠠᠵᠤ ᠦᠬᠦᠬᠦ ᠡᠴᠡ ᠲᠤᠯᠵᠤ ᠦᠬᠦᠮᠦᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠦᠢ ᠴᠦ᠍ ᠯᠢᠦᠢ ᠬᠡᠷᠡᠭ ᠴᠢᠬᠤᠯᠠ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠡᠳ ᠡᠢᠨ ᠬᠦ᠌ ᠲᠤᠯᠵᠤ ᠪᠠᠢᠯᠳᠤᠪᠠᠰᠤ ᠡᠴᠦᠰ ᠲᠦ᠍ᠷ ᠴᠥᠮ ᠠᠯᠠᠭᠳᠠᠮᠤᠢ ᠭᠡᠮᠡᠨ ᠳᠠᠢᠶᠠᠩ ᠬᠠᠭᠠᠨ ᠢ᠋ ᠨᠢᠭᠡᠨ ᠢᠯᠳᠦ ᠪᠡᠷ ᠴᠠᠪᠴᠢᠨ ᠤᠨᠠᠭᠠᠵᠤ᠂ ᠴᠡᠷᠢᠭ ᠢ᠋ ᠠᠪᠴᠤ ᠪᠠᠷᠬᠢᠷᠠᠨ ᠥᠭᠦᠯᠡᠷᠦᠨ : 《ᠲᠠᠢᠶᠠᠩ ᠬᠠᠭᠠᠨ ᠨᠢᠭᠡᠨᠲᠡ ᠵᠡᠪᠡ ᠳ᠋ᠦ᠍ᠷ ᠣᠨᠣᠭᠳᠠᠵᠤ ᠦᠬᠦᠪᠡ᠃ ᠬᠡᠭᠦᠷ ᠢ᠋ ᠠᠪᠲᠤᠭᠠᠢ ! ᠪᠢᠳᠡ ᠳᠠᠭᠠᠰᠤᠭᠠᠢ ! 》 ᠬᠡᠮᠡᠭᠰᠡᠨᠡ᠂ ᠳᠥᠷᠪᠡᠨ ᠵᠦᠭ ᠦ᠋ᠨ ᠪᠠᠢᠯᠳᠤᠬᠤ ᠠᠨᠤ ᠨᠠᠮ ᠪᠣᠯᠵᠤ᠂ ᠨᠠᠢ᠍ᠮᠠᠨ ᠤ᠋ ᠦᠯᠡᠭᠰᠡᠨ ᠳᠥᠷᠪᠡᠨ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠠᠭᠤᠯᠠᠨ ᠤ᠋ ᠬᠥᠮᠥᠰᠬᠡ ᠳ᠋ᠦ᠍ᠷ ᠵᠣᠭᠰᠣᠵᠤ᠂ ᠳᠠᠢᠶᠠᠩ ᠬᠠᠭᠠᠨ ᠤ᠋ ᠦᠬᠦᠳᠡᠯ ᠢ᠋ ᠦᠵᠡᠬᠦᠶᠡ᠂ ᠰᠢᠷᠬᠠ ᠠᠨᠤ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠴᠠᠪᠴᠢᠭ᠍ᠰᠠᠨ ᠰᠢᠷᠬᠠ ᠲᠤᠯᠠ ᠲᠡᠭᠦᠨ ᠦ᠌ ᠥᠪᠡᠷ ᠦ᠋ᠨ ᠴᠡᠷᠢᠭ ᠡᠴᠡ ᠭᠡᠮ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠵᠦ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠦᠨ ᠠᠲᠠᠯᠠ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠬᠦᠷᠴᠦ ᠢᠷᠡᠭᠡᠳ ᠪᠤᠯᠤᠤ ᠸᠠᠩ᠂ ᠴᠢᠦᠢ ᠴᠦ᠍ ᠯᠢᠦᠢ ᠨᠠᠷ ᠤ᠋ᠨ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠭᠠᠵᠤ᠂ ᠬᠤᠶᠠᠭ ᠢ᠋ ᠲᠠᠢᠯᠤᠭᠤᠯᠤᠨ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠭᠰᠠᠨ ᠤ᠋ ᠬᠣᠢᠨᠠ ᠰᠠᠶᠢ ᠪᠠᠭᠤᠳᠠᠯᠯᠠᠪᠠ᠃ ᠲᠡᠢᠨ ᠬᠦ᠌ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠠᠷᠪᠠᠨ ᠬᠥᠮᠦᠨ ᠢ᠋ ᠥᠪᠡᠷ ᠦ᠋ᠨ ᠬᠣᠷᠢᠨ ᠬᠥᠮᠦᠨ ᠢ᠋ᠶ᠋ᠡᠷ ᠳᠠᠷᠤᠭᠤᠯᠵᠤ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠬᠠᠮᠲᠤ ᠶ᠋ᠢ ᠳᠠᠭᠠᠭᠤᠯᠤᠭᠰᠠᠨ ᠢ᠋ ᠨᠠᠢ᠍ᠮᠠᠨ ᠤ᠋ ᠦᠯᠡᠭᠰᠡᠨ ᠴᠡᠷᠢᠭ ᠲᠦ᠍ᠷ ᠵᠠᠷᠯᠠᠷᠠ ᠢᠯᠡᠭᠡᠪᠡ ᠃
ᠡᠨᠡ ᠦᠶᠡ ᠳ᠋ᠦ᠍ᠷ ᠪᠦᠷᠦᠢ ᠲᠠᠰᠤᠷᠠᠭᠰᠠᠨ ᠲᠤᠯᠠ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠪᠢᠯᠬᠠᠨ ᠭᠠᠷᠴᠤ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠬᠠᠭᠠᠯᠭᠠᠲᠤ ᠬᠠᠳᠠ ᠶ᠋ᠢᠨ ᠬᠠᠪᠴᠢᠯ ᠵᠠᠮ ᠢ᠋ᠶ᠋ᠠᠷ ᠳᠤᠲᠠᠭᠠᠰᠤᠭᠠᠢ ᠭᠡᠮᠡᠨ ᠭᠠᠷᠤᠭᠰᠠᠨ ᠢ᠋ ᠴᠢᠨᠠᠳᠤ ᠠ᠋ᠴᠠ ᠴᠢᠯᠠᠭᠤ᠂ ᠲᠡᠮᠦᠷ ᠦ᠋ᠨ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠬᠠᠳᠠᠨ ᠬᠠᠷᠪᠤᠭᠰᠠᠨ ᠳ᠋ᠤᠷ ᠥᠪᠡᠷ ᠵᠠᠭᠤᠷᠠ ᠪᠠᠨ ᠭᠢᠰᠬᠢᠯᠳᠦᠨ ᠦᠬᠦᠭᠰᠡᠨ ᠢᠨᠦ ᠲᠣᠭᠠ ᠦᠭᠡᠢ᠃ ᠲᠠᠢᠽᠦ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠢ᠋ ᠡᠯᠰᠡᠨ ᠳᠠᠭᠠᠭᠤᠯᠵᠤ᠂ ᠮᠥᠨ ᠰᠥᠨᠢ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠪᠦᠭᠦᠳᠡᠭᠡᠷ ᠬᠠᠭᠤᠷᠠᠢ ᠢᠳᠡᠰᠢ ᠪᠤᠯᠠᠭ ᠤ᠋ᠨ ᠤᠰᠤᠨ ᠢ᠋ᠶ᠋ᠠᠷ ᠦᠳᠡᠰᠢᠯᠡᠵᠦ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠳᠣᠲᠣᠷᠠ ᠵᠣᠭᠰᠣᠭᠠ ᠪᠠᠷ ᠬᠣᠨᠣᠪᠠ᠃ ᠡᠨᠡ ᠰᠥᠨᠢ ᠪᠤᠯᠤᠤ ᠸᠠᠩ᠂ ᠬᠥᠪᠡᠭᠦᠨ ᠴᠢᠦᠢ ᠴᠦ᠍ ᠯᠢᠦᠢ ᠬᠣᠶᠠᠭᠤᠯᠠ ᠵᠠᠢᠳᠠᠩ ᠮᠣᠷᠢ ᠤᠨᠤᠵᠤ ᠤᠷᠭᠤᠨ ᠭᠠᠷᠪᠠ᠃ ᠵᠢᠴᠢ ᠥᠷᠯᠥᠭᠡ ᠬᠠᠷᠠᠩᠭᠠ ᠴᠣᠬᠢᠵᠤ ᠶᠡᠬᠡ ᠴᠡᠷᠢᠭ ᠢ᠋ ᠬᠤᠷᠢᠶᠠᠵᠤ ᠨᠠᠢ᠍ᠮᠠᠨ ᠤ᠋ ᠳᠠᠭᠠᠭᠰᠠᠨ ᠴᠡᠷᠢᠭ ᠢ᠋ ᠪᠠᠢᠴᠠᠭᠠᠨ ᠦᠵᠡᠪᠡᠰᠦ ᠠᠷᠪᠠᠨ ᠬᠣᠶᠠᠷ ᠲᠦᠮᠡᠨ ᠶᠢᠰᠦᠨ ᠮᠢᠩᠭᠠᠨ ᠢᠯᠡᠭᠦᠦ᠂ ᠲᠡᠢᠨ ᠳ᠋ᠦ᠍ᠷ ᠦᠬᠦᠭᠰᠡᠨ ᠢᠨᠦ ᠬᠣᠶᠠᠷ ᠲᠦᠮᠡᠨ ᠪᠣᠢ᠂ ᠰᠠᠷᠨᠢᠨ ᠤᠷᠭᠤᠭᠰᠠᠨ ᠠᠨᠤ ᠳᠥᠷᠪᠡᠨ ᠲᠦᠮᠡᠨ ᠢᠯᠡᠭᠦᠦ ᠂ ᠡᠭᠦᠨ ᠢ᠋ ᠶᠢᠰᠦᠨ ᠠᠩᠭᠢ ᠰᠠᠯᠭᠠᠨ ᠵᠠᠬᠢᠷᠤᠭᠤᠯᠵᠤ᠂ ᠲᠠᠢᠽᠦ ᠪᠡᠶᠡ ᠪᠡᠷ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠦᠬᠦᠭᠰᠡᠨ ᠨᠠᠷᠠᠨ ᠰᠢᠩᠭᠡᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤᠷ ᠶᠠᠭᠠᠷᠠᠨ ᠢᠷᠡᠵᠦ ᠮᠤᠬᠤᠯᠢ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠪᠠᠭᠤᠲᠠᠯᠠ ᠬᠤᠷᠴᠠ ᠪᠠᠢᠷᠢ ᠨᠠᠷ ᠤ᠋ᠨ ᠳᠥᠷᠪᠡᠨ ᠵᠠᠩᠵᠤᠨ ᠢᠷᠡᠵᠦ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠬᠦᠷᠢᠶᠡ ᠶ᠋ᠢ ᠨᠢᠭᠡᠨᠲᠡ ᠪᠦᠷᠢᠨ ᠢ᠋ᠶ᠋ᠡᠷ ᠡᠵᠡᠯᠡᠭᠰᠡᠨ ᠢ᠋ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ᠂ ᠮᠤᠬᠤᠯᠢ ᠲᠠᠨ ᠶᠡᠬᠡᠯᠡ ᠰᠠᠢᠰᠢᠶᠠᠨ ᠬᠣᠶᠠᠷ ᠬᠦᠷᠢᠶᠡ ᠶ᠋ᠢ ᠨᠡᠢᠯᠡᠭᠦᠯ ᠭᠡᠮᠡᠨ ᠶᠠᠪᠤᠭᠤᠯᠵᠤ᠂ ᠲᠠᠢᠽᠦ ᠪᠠᠰᠠ ᠲᠠᠢᠶᠠᠩ ᠬᠠᠭᠠᠨ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠡᠭᠡᠨ ᠡᠨᠳᠡᠭᠰᠡᠨ ᠢ᠋ ᠰᠣᠨᠣᠰᠴᠤ ᠲᠠᠢᠶᠠᠩ ᠬᠠᠭᠠᠨ ᠯᠤᠭᠠ ᠬᠠᠮᠲᠤ ᠶᠠᠪᠤᠭᠰᠠᠨ ᠳᠥᠷᠪᠡᠨ ᠵᠠᠭᠤᠨ ᠢᠯᠡᠭᠦᠦ ᠴᠡᠷᠢᠭ ᠢ᠋ ᠴᠥᠮ ᠪᠠᠷᠢᠭᠤᠯᠵᠤ ᠶᠡᠬᠡᠯᠡ ᠠᠭᠤᠷᠰᠠᠨ ᠥᠭᠦᠯᠡᠷᠦᠨ : 《ᠲᠠᠨ ᠤ᠋ ᠡᠵᠡᠨ ᠢ᠋ ᠬᠡᠨ ᠠᠯᠠᠪᠠ ? 》 ᠣᠯᠠᠨ ᠴᠡᠷᠢᠭ ᠬᠠᠮᠲᠤ ᠪᠠᠷ ᠤᠬᠢᠯᠠᠨ ᠮᠡᠳᠡᠭᠦᠯᠦᠷᠦᠨ : 《ᠮᠠᠨ ᠤ᠋ ᠡᠵᠡᠨ ᠦ᠌ ᠠᠬᠠ ᠪᠤᠯᠤᠤ ᠸᠠᠩ ᠤ᠋ᠨ ᠬᠥᠪᠡᠭᠦᠨ ᠴᠢᠦᠢ ᠴᠦ᠍ ᠯᠢᠦᠢ ᠶᠡᠬᠡ ᠴᠡᠷᠢᠭ ᠡᠴᠡ ᠠᠪᠤᠨ ᠡᠨᠳᠡ ᠬᠠᠭᠠᠭᠳᠠᠭᠰᠠᠨᠠ ᠮᠠᠨ ᠤ᠋ ᠡᠵᠡᠨ ᠪᠠᠢᠯᠳᠤᠵᠤ ᠦᠬᠦᠮᠦᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠢᠦᠢ ᠴᠦ᠍ ᠯᠢᠦᠢ ᠠᠮᠢᠨ ᠭᠠᠷᠬᠤ ᠶ᠋ᠢ ᠪᠣᠳᠣᠵᠤ ᠡᠵᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠴᠠᠪᠴᠢᠨ ᠤᠨᠠᠭᠠᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠤᠮᠤ ᠳ᠋ᠤᠷ ᠣᠨᠣᠭᠳᠠᠨ ᠦᠬᠦᠪᠡ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠵᠤ᠂ ᠳᠥᠷᠪᠡᠨ ᠵᠦᠭ ᠦ᠋ᠨ ᠴᠡᠷᠢᠭ ᠦ᠋ᠨ ᠪᠠᠢᠯᠳᠤᠬᠤ ᠶ᠋ᠢ ᠵᠣᠭᠰᠣᠭᠠᠨ ᠬᠠᠭᠤᠷᠮᠠᠭᠯᠠᠨ ᠳᠠᠭᠠᠭᠠᠳ ᠰᠥᠨᠢ ᠮᠠᠨ ᠢ᠋ ᠠᠪᠤᠨ ᠤᠷᠭᠤᠮᠤᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠢᠳᠡ ᠤᠷᠭᠤᠪᠠᠴᠤ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠡᠴᠡ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠭᠡᠮᠡᠨ ᠡᠰᠡ ᠡᠴᠢᠬᠦᠢ ᠳ᠋ᠦ᠍ᠷ ᠲᠡᠷᠡ ᠡᠴᠢᠭᠡ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ ᠵᠠᠢᠳᠠᠩ ᠮᠣᠷᠢ ᠤᠨᠤᠵᠤ ᠤᠷᠭᠤᠪᠠ᠃ ᠦᠨᠡᠨ ᠳ᠋ᠦ᠍ᠷ ᠪᠢᠳᠡ ᠡᠵᠡᠨ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠪᠤᠰᠤ᠃ 》 ᠭᠡᠮᠡᠨ ᠥᠴᠢᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠠᠭᠤᠷ ᠰᠠᠶᠢ ᠲᠣᠬᠣᠷᠴᠤ : 《ᠨᠠᠢ᠍ᠮᠠᠨ ᠤ᠋ ᠠᠮᠢᠳᠤ ᠪᠠᠷᠢᠭ᠍ᠳᠠᠭᠰᠠᠨ ᠵᠠᠩᠵᠤᠨ ᠨᠠᠷ ᠪᠠᠢᠪᠠᠰᠤ ᠠᠪᠴᠤ ᠢᠷᠡ ! 》ᠬᠡᠮᠡᠲᠡᠯᠡ ᠵᠡᠪᠡ ᠬᠣᠪᠣᠯᠠᠢ ᠬᠣᠶᠠᠭᠤᠯᠠ ᠢᠳᠡᠷ ᠳᠣᠪᠣ ᠶ᠋ᠢ ᠬᠦᠯᠢᠵᠦ ᠠᠴᠢᠷᠠᠪᠠ᠃ ᠢᠳᠡᠷ ᠳᠣᠪᠣ ᠡᠵᠡᠨ ᠢ᠋ᠶ᠋ᠡᠨ ᠶᠠᠰᠤ ᠶ᠋ᠢ ᠦᠵᠡᠭᠡᠳ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ ᠤᠬᠢᠯᠠᠬᠤ ᠪᠣᠢ ᠶᠠ᠂ ᠲᠠᠢᠽᠦ ᠳ᠋ᠦ᠍ᠷ ᠪᠠᠰᠠ ᠬᠦ᠌ ᠰᠥᠭᠥᠳᠬᠦ ᠦᠭᠡᠢ᠂ ᠳᠠᠭᠠᠯᠳᠤᠭᠠ ᠠᠯᠤᠬᠠ᠂ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠬᠤᠯᠠᠰᠤᠪᠴᠢ ᠶ᠋ᠢᠨ ᠲᠣᠯᠣᠭᠠᠢ ᠪᠠ ᠴᠢᠦᠢ ᠱᠢ ᠯᠢ ᠶ᠋ᠢ ᠠᠪᠴᠤ ᠢᠷᠡᠪᠡ᠃ ᠪᠣᠱᠣᠭᠲᠤ ᠪᠣᠲ᠋ᠣ ᠮᠢᠩᠭᠠᠲᠠᠨ ᠢ᠋ ᠬᠦᠯᠢᠵᠦ ᠠᠴᠢᠷᠠᠨ ᠰᠥᠭᠥᠳᠬᠡᠪᠡ᠃ ᠴᠢᠯᠠᠭᠤ᠂ ᠲᠡᠮᠦᠷ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠭᠠᠯᠵᠠᠭᠤ ᠪᠤᠬᠠ ᠶ᠋ᠢ ᠬᠦᠯᠢᠵᠦ ᠠᠴᠢᠷᠠᠪᠠ᠃ ᠪᠡᠯᠭᠦᠳᠡᠢ ᠬᠡᠷᠡᠢᠳ ᠦ᠋ᠨ ᠦᠯᠡᠭᠰᠡᠨ ᠨᠠᠮ ᠤ᠋ᠨ ᠲᠡᠷᠢᠭᠦᠰ ᠬᠥᠮᠦᠨ ᠠᠯᠢᠶᠠ ᠶ᠋ᠢ ᠲᠦᠯᠬᠢᠨ ᠠᠪᠴᠢᠷᠠᠪᠠ᠃ ᠬᠠᠰᠠᠷ᠂ ᠪᠠᠶᠠᠴᠠᠷ ᠠᠢᠮᠠᠭ ᠤ᠋ᠨ ᠪᠣᠳᠣᠩ ᠢ᠋ ᠬᠦᠯᠢᠵᠦ ᠠᠪᠴᠢᠷᠠᠪᠠ᠃
ᠲᠡᠳᠦᠢ ᠲᠠᠢᠽᠦ᠂ ᠢᠳᠡᠷ ᠳᠣᠪᠣ ᠮᠢᠩᠭᠠᠲᠠᠨ ᠬᠣᠶᠠᠭᠤᠯᠠ ᠶ᠋ᠢᠨ ᠬᠦᠯᠢᠶᠡᠰᠦᠨ ᠢ᠋ ᠲᠠᠢᠯᠵᠤ᠂ ᠲᠡᠭᠦᠨ ᠦ᠌ ᠡᠵᠡᠨ ᠦ᠌ ᠶᠠᠰᠤᠨ ᠢ᠋ ᠠᠨᠤ ᠪᠠᠷᠢᠭᠤᠯᠵᠤ ᠪᠤᠯᠠᠭ ᠤ᠋ᠨ ᠤᠰᠤ ᠪᠠᠷ ᠤᠬᠢᠶᠠᠯᠭᠠᠨ᠂ ᠰᠢᠷᠬᠠ ᠶ᠋ᠢ ᠣᠶᠣᠭᠤᠯᠵᠤ᠂ ᠨᠠᠢ᠍ᠮᠠᠨ ᠤ᠋ ᠳᠠᠭᠠᠭᠰᠠᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠠᠪᠰᠠ ᠶ᠋ᠢ ᠠᠨᠤ ᠠᠴᠢᠷᠠᠭᠤᠯᠵᠤ᠂ ᠡᠭᠡᠨᠡᠭᠲᠡ ᠬᠠᠭᠠᠨ ᠰᠠᠭᠤᠪᠠᠰᠤ ᠠᠪᠰᠠ ᠠ᠋ᠴᠠ ᠦᠯᠦ ᠰᠠᠯᠤᠮᠤᠢ᠃ ᠪᠠᠰᠠ ᠲᠠᠢᠽᠦ ᠥᠪᠡᠷ ᠦ᠋ᠨ ᠬᠥᠰᠬᠡ ᠡᠴᠡ ᠬᠠᠭᠠᠨ ᠤ᠋ ᠮᠠᠯᠠᠭᠠ ᠳᠡᠪᠡᠯ ᠠᠴᠢᠷᠠᠭᠤᠯᠤᠨ ᠡᠮᠦᠰᠬᠡᠵᠦ ᠭᠠᠳᠠᠭᠤᠷ ᠠᠨᠤ ᠳᠠᠢᠶᠠᠩ ᠬᠠᠭᠠᠨ ᠤ᠋ ᠴᠢᠰᠤᠲᠤ ᠳᠡᠪᠡᠯ ᠢ᠋ ᠤᠬᠢᠶᠠᠯᠭᠠᠨ ᠨᠣᠢᠲᠠᠨ ᠢ᠋ᠶ᠋ᠠᠷ ᠬᠠᠭᠠᠨ ᠤ᠋ ᠮᠠᠯᠠᠭᠠ ᠯᠤᠭᠠ ᠡᠮᠦᠰᠬᠡᠨ ᠠᠪᠰᠠ ᠳ᠋ᠤᠷ ᠬᠢᠯᠭᠡᠵᠦ᠂ ᠮᠥᠨ ᠬᠦ᠌ ᠨᠠᠷᠠᠨ ᠰᠢᠩᠭᠡᠬᠦ ᠳᠠᠪᠠᠭᠠᠨ ᠤ᠋ ᠲᠡᠭᠰᠢ ᠭᠠᠵᠠᠷ ᠲᠤᠷ ᠪᠤᠯᠠᠵᠤ ᠳᠡᠭᠡᠷᠡ ᠢᠨᠦ ᠴᠠᠭᠠᠨ ᠴᠢᠯᠠᠭᠤ ᠪᠠᠷ ᠣᠪᠣᠭᠠ ᠪᠣᠰᠬᠠᠯᠭᠠᠨ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠰᠥᠭᠥᠳᠴᠦ ᠠᠷᠢᠬᠢ ᠰᠠᠴᠤᠵᠤ ᠡᠢᠨ ᠥᠭᠦᠯᠡᠷᠦᠨ :
ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠡᠵᠡᠯᠡᠭᠰᠡᠨ ᠨᠠᠷᠠᠨ ᠨᠡᠷᠡᠲᠦ ᠬᠠᠭᠠᠨ ᠴᠢ
ᠨᠠᠮᠤᠷ ᠬᠠᠪᠤᠷ ᠤ᠋ᠨ ᠡᠭᠡᠯᠵᠢᠯᠡᠭᠡᠨ ᠢ᠋ ᠡᠰᠡ ᠬᠢᠨᠠᠭᠰᠠᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ
ᠨᠠᠢᠷᠲᠤ ᠡᠶᠡᠪᠡᠷᠭᠦ ᠲᠡᠮᠦᠵᠢᠨ ᠨᠠᠮᠠᠶ᠋ᠢ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠵᠦ
ᠨᠠᠳᠠ ᠳ᠋ᠤᠷ ᠬᠠᠷᠢᠶᠠᠲᠤ ᠪᠠᠷᠠᠭᠤᠨ ᠵᠣᠪᠬᠢᠰ ᠢ᠋ ᠮᠢᠨᠦ ᠬᠡᠳᠦᠨ ᠵᠡᠷᠭᠡ ᠬᠠᠯᠳᠠᠲᠠᠯᠠ
ᠨᠠᠮ ᠵᠠᠩᠲᠤ ᠳᠡᠭᠦᠦ ᠪᠢ ᠡᠷᠢᠵᠦ ᠡᠰᠡ ᠴᠡᠷᠢᠭᠯᠡᠭᠰᠡᠨ ᠪᠥᠭᠡᠲᠡᠯᠡ
ᠨᠠᠰᠤᠨ ᠳᠤᠮᠳᠠ ᠭᠠᠷᠤᠭᠰᠠᠨ ᠴᠢᠭᠢᠷᠠᠭ ᠠᠬᠠ ᠴᠢ ᠪᠡᠷ
ᠨᠠᠢᠷ ᠦᠭᠡᠢ ᠣᠯᠠᠨ ᠠᠢᠮᠠᠭ ᠢ᠋ ᠬᠡᠮᠵᠢᠶᠡ ᠦᠭᠡᠢ ᠴᠢᠭᠤᠯᠤᠭᠤᠯᠵᠤ
ᠨᠠᠢ᠍ᠮᠠᠨ ᠠᠩᠭᠢ ᠬᠣᠷᠢᠨ ᠲᠦᠮᠡᠨ ᠣᠯᠠᠨ ᠴᠡᠷᠢᠭ ᠲᠦ᠍ᠷ ᠢ᠋ᠶ᠋ᠠᠨ ᠡᠷᠳᠦᠭᠰᠡᠭᠡᠷ
ᠨᠠᠷᠢᠨ ᠬᠣᠣᠷᠲᠤ ᠲᠥᠷᠥᠭᠰᠡᠨ ᠠᠴᠢ ᠴᠢᠢ ᠴᠦ᠍ ᠯᠢᠦᠢ ᠳ᠋ᠦ᠍ᠷ ᠢ᠋ᠶ᠋ᠠᠨ ᠠᠯᠠᠭᠳᠠᠵᠤ
ᠨᠠᠳᠠ ᠪᠠᠷ ᠬᠠᠷᠢᠨ ᠶᠠᠰᠤ ᠪᠠᠨ ᠬᠤᠷᠢᠶᠠᠯᠭᠠᠨ ᠪᠤᠮᠪᠠᠯᠠᠨ ᠳᠠᠢᠯᠭᠠᠮᠤᠢ᠃
ᠨᠠᠢᠲᠠᠢ ᠦᠭᠡᠢ ᠳᠡᠭᠦᠦ ᠪᠢ ᠡᠨᠡ ᠮᠡᠲᠦ ᠬᠦᠨᠳᠦᠯᠡᠬᠦ ᠢᠨᠦ
ᠨᠠᠭᠠᠳᠤᠮ ᠮᠡᠲᠦ ᠬᠠᠭᠤᠷᠮᠠᠭ ᠠᠭᠠᠰᠢ ᠪᠠᠷ ᠬᠠᠭᠤᠷᠬᠤ ᠠᠨᠤ ᠪᠤᠰᠤ᠂
ᠨᠠᠶᠠᠨ ᠲᠦᠮᠡᠨ ᠳ᠋ᠦ᠍ᠷ ᠴᠢᠬᠡᠴᠢ ᠪᠡᠷ ᠬᠠᠭᠠᠨ ᠰᠠᠭᠤᠭᠰᠠᠨ ᠢ᠋ ᠴᠢᠨᠦ ᠰᠠᠨᠠᠵᠤ
ᠨᠠᠷᠢᠨ ᠬᠦᠨᠳᠦ ᠪᠡᠷ ᠪᠤᠮᠪᠠᠯᠠᠨ ᠣᠩᠭᠣᠯᠠᠵᠤ ᠲᠠᠯᠪᠢᠭᠠᠳ
ᠨᠠᠷᠢ ᠲᠠᠬᠢᠯ ᠰᠠᠢᠨ ᠠᠷᠢᠬᠢ ᠪᠠᠷ ᠰᠠᠴᠤᠯᠢ ᠰᠠᠴᠤᠵᠤ ᠳᠠᠬᠢᠭᠠᠳ
ᠨᠠᠰᠤ ᠣᠬᠣᠷ ᠴᠢᠦᠢ ᠴᠦ᠍ ᠯᠢᠦᠢ ᠶ᠋ᠢ ᠠᠯᠠᠵᠤ ᠥᠭᠰᠦᠭᠡᠢ᠃
ᠭᠡᠮᠡᠨ ᠲᠠᠢᠵᠤ ᠪᠠᠷᠠᠭᠠᠳ ᠪᠡᠶᠡ ᠡᠭᠡᠵᠦ ᠵᠢᠨᠦᠩ ᠲᠡᠷᠢᠭᠦᠯᠡᠨ ᠪᠦᠭᠦᠳᠡᠭᠡᠷ ᠲᠦ᠍ ᠡᠢᠨ ᠲᠤᠩᠬᠠᠭᠯᠠᠨ ᠵᠠᠷᠯᠠᠷᠤᠨ : 《ᠡᠭᠦᠨ ᠡᠴᠡ ᠬᠣᠵᠢᠮ ᠮᠢᠨᠦ ᠶᠡᠬᠡ ᠴᠡᠷᠢᠭ ᠡᠯᠡ ᠤᠯᠤᠰ ᠢ᠋ ᠠᠪᠬᠤᠢ ᠳ᠋ᠤᠷ ᠤᠯᠤᠰ ᠤ᠋ᠨ ᠡᠵᠡᠨ ᠢ᠋ ᠢᠨᠦ ᠬᠡᠷᠬᠢᠪᠡᠴᠦ ᠠᠯᠠᠬᠤ ᠳ᠋ᠤᠷ ᠪᠢᠲᠡᠭᠡᠢ ᠬᠦᠷᠭᠦᠯ ! ᠲᠡᠭᠦᠨ ᠦ᠌ ᠤᠯᠤᠰ ᠢᠷᠭᠡᠨ ᠭᠠᠵᠠᠷ ᠣᠷᠣᠨ ᠠᠨᠤ ᠴᠥᠮ ᠮᠠᠨ ᠤ᠋ ᠪᠣᠯᠪᠠᠰᠤ ᠪᠠᠷᠠᠪᠠᠢ᠃ ᠣᠨᠴᠠ ᠲᠡᠷᠡ ᠨᠢᠭᠡᠨ ᠬᠥᠮᠦᠨ ᠢ᠋ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠶᠠᠮᠪᠠᠷ ᠲᠤᠰᠠ ᠪᠣᠯᠬᠤ᠂ ᠡᠰᠡ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠶᠠᠮᠪᠠᠷ ᠬᠣᠣᠷ ᠬᠢᠵᠦ ᠴᠢᠳᠠᠬᠤ ᠪᠣᠢ ! 》ᠬᠡᠮᠡᠪᠡ᠃ ᠲᠠᠢᠽᠦ ᠶ᠋ᠢᠨ ᠡᠨᠡ ᠮᠡᠲᠦ ᠭᠦᠨ ᠬᠣᠯᠠ ᠶ᠋ᠢ ᠬᠢᠲᠠᠳ ᠰᠤᠳᠤᠷᠴᠢ ᠨᠠᠷ ᠣᠨᠴᠠ ᠮᠣᠩᠭᠣᠯ ᠢ᠋ ᠳᠣᠣᠷᠠ ᠦᠵᠡᠵᠦ ᠳᠠᠷᠤᠯᠠᠨ ᠳᠣᠷᠣᠮᠵᠢᠯᠠᠵᠤ ᠮᠠᠭᠤ ᠬᠡᠯᠡᠬᠦ ᠵᠠᠩ ᠢ᠋ᠶ᠋ᠠᠷ ᠠᠳᠬᠠᠭ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠬᠠᠯᠠᠨ ᠴᠢᠳᠠᠬᠤ ᠦᠭᠡᠢ ᠪᠡᠷ ᠮᠣᠩᠭᠣᠯ ᠤ᠋ᠨ ᠰᠡᠪ ᠢ᠋ ᠡᠷᠢᠵᠦ ᠬᠡᠯᠡᠮᠦᠢ ᠭᠡᠮᠡᠨ ᠪᠢᠴᠢᠬᠦᠢ ᠳ᠋ᠡᠭᠡᠨ 《ᠽᠢ ᡁᠢ ᠲᠦᠩ ᠵᠢᠶᠠᠨ ᠭᠠᠩ ᠮᠦ᠍ 》 ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠨᠠᠢ᠍ᠮᠠᠨ ᠢ᠋ ᠮᠥᠬᠥᠭᠡᠭᠰᠡᠨ ᠨᠢᠭᠡᠨ ᠬᠡᠰᠡᠭ ᠲᠣᠷ ᠬᠣᠢᠨᠠ ᠢᠯᠭᠠᠭᠰᠠᠨ ᠠᠨᠤ : ᠲᠡᠮᠦᠵᠢᠨ ᠦ᠌ ᠤᠯᠤᠰ ᠪᠦᠬᠦᠨ ᠢ᠋ ᠡᠨᠡ ᠮᠡᠲᠦ ᠦᠨᠳᠦᠰᠦ ᠦᠭᠡᠢ ᠠᠷᠢᠯᠭᠠᠬᠤ ᠠᠨᠤ ᠶᠠᠭᠤᠲᠠᠢ ᠬᠠᠷᠠᠲᠠᠢ᠂ ᠬᠣᠵᠢᠮ ᠡᠳᠦᠷ ᠪᠤᠰᠤᠳ ᠪᠠᠰᠠ ᠬᠦ᠌ ᠲᠡᠭᠦᠨ ᠢ᠋ ᠲᠡᠷᠡ ᠮᠡᠲᠦ ᠠᠪᠬᠤ ᠪᠣᠯᠠᠢ ᠬᠡᠮᠡᠵᠦᠬᠦᠢ᠃ ᠮᠤᠩᠬᠠᠭ ᠪᠢ ᠪᠣᠳᠣᠪᠠᠰᠤ ᠡᠷᠲᠡᠨ ᠦ᠌ ᠴᠢᠨ ᠱᠢ ᠬᠤᠸᠠᠩ ᠠ᠋ᠴᠠ ᠠᠯᠢ ᠤᠯᠤᠰ ᠲᠥᠷᠥ ᠪᠦᠲᠦᠬᠦᠢ ᠳ᠋ᠦ᠍ᠷ ᠴᠥᠮ ᠨᠢᠭᠡᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠪᠣᠯᠭᠠᠰᠤᠭᠠᠢ ᠭᠡᠮᠡᠨ ᠳᠠᠢᠯᠠᠭᠰᠠᠨ ᠠᠨᠤ᠂ ᠲᠠᠢᠽᠦ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠣᠯᠠᠢ᠃ ᠨᠡᠩ ᠪᠠᠰᠠ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠬᠡᠮᠡᠭᠴᠢ ᠳᠡᠯᠡᠬᠡᠢ ᠳ᠋ᠠᠬᠢᠨ ᠲᠤᠯᠠ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠬᠥᠮᠦᠨ ᠡᠭᠡᠯᠵᠢᠯᠡᠨ ᠰᠠᠭᠤᠬᠤᠢ ᠳ᠋ᠤᠷ ᠠᠯᠢᠨ ᠠᠨᠤ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠪᠤᠯᠢᠶᠠᠨ ᠠᠪᠬᠤᠢ ᠳ᠋ᠤᠷ ᠲᠡᠭᠦᠨ ᠳ᠋ᠦ᠍ᠷ ᠦᠯᠡᠳᠡᠭᠡᠬᠦ ᠪᠣᠢ ᠠᠵᠢ ! ᠡᠨᠡ ᠢᠨᠦ ᠨᠢᠭᠡᠨᠲᠡ ᠲᠣᠭᠲᠠᠭᠠᠭᠰᠠᠨ ᠬᠡᠷᠡᠭ ᠪᠥᠭᠡᠲᠡᠯᠡ ᠮᠣᠩᠭᠣᠯ ᠢᠷᠭᠡᠨ ᠢ᠋ ᠬᠤᠷᠢᠶᠠᠭᠰᠠᠨ ᠳ᠋ᠤᠷ ᠲᠡᠷᠡ ᠮᠡᠲᠦ ᠲᠡᠰᠬᠦ ᠠᠯᠳᠠᠷᠠᠬᠤ ᠵᠡᠷᠭᠡ ᠶ᠋ᠢᠨ ᠦᠭᠡ ᠶ᠋ᠢ ᠬᠡᠯᠡᠵᠦ ᠶᠠᠭᠤ ᠬᠢᠬᠦ ᠪᠣᠢ ! ᠮᠢᠨᠦ ᠰᠣᠨᠣᠰᠤᠭᠰᠠᠨ ᠠᠨᠤ : ᠥᠪᠡᠷᠴᠢᠯᠡᠯ ᠦᠭᠡᠢ ᠬᠥᠮᠦᠨ ᠢ᠋ ᠤᠯᠤᠰ ᠤ᠋ᠨ ᠰᠤᠳᠤᠷᠴᠢ ᠶ᠋ᠢᠨ ᠶᠠᠮᠤᠨᠠ ᠣᠷᠣᠭᠤᠯᠤᠮᠤᠢ ᠬᠡᠮᠡᠯᠦᠭᠡ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠰᠤᠳᠤᠷᠴᠢ ᠬᠥᠮᠦᠨ ᠣᠯᠠᠨ ᠰᠤᠳᠤᠷᠴᠢ ᠨᠠᠷ ᠢ᠋ ᠶᠡᠬᠡᠯᠡ ᠭᠤᠲᠤᠭᠠᠵᠤ ᠬᠠᠯᠠᠭᠤ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠮᠡᠳᠡᠭᠳᠡᠵᠦᠬᠦᠢ᠃ ᠲᠡᠷᠡ ᠵᠠᠰᠠᠨ ᠬᠡᠯᠡᠪᠡᠴᠦ ᠮᠣᠩᠭᠣᠯ ᠵᠦᠩ ᠶᠤᠸᠠᠨ ᠢ᠋ ᠡᠵᠡᠯᠡᠭᠰᠡᠨ ᠦᠭᠡᠢ ᠪᠣᠯᠭᠠᠨ ᠡᠰᠡ ᠴᠢᠳᠠᠭᠰᠠᠨ ᠠᠨᠤ ᠥᠴᠦᠬᠡᠨ ᠳᠡᠭᠡᠷᠡ ᠴᠢᠳᠠᠯ ᠦᠭᠡᠢ ᠪᠥᠭᠡᠳ ᠦᠭᠡ ᠪᠠᠰᠠ ᠡᠰᠡ ᠤᠨᠤᠵᠤᠬᠤᠢ᠃ ᠮᠢᠩ ᠤᠯᠤᠰ ᠰᠠᠭᠤᠵᠤ᠂ ᠴᠢᠩ ᠤᠯᠤᠰ ᠡᠵᠡᠯᠡᠨ ᠡᠨᠡ ᠲᠠᠢᠽᠦ ᠶ᠋ᠢᠨ ᠦᠷᠡᠰ ᠪᠠᠰᠠ ᠴᠤ᠌ ᠨᠢᠭᠡᠨ ᠵᠠᠭᠤᠨ ᠳᠠᠯᠠᠨ ᠢᠯᠡᠭᠦᠦ ᠬᠣᠰᠢᠭᠤ ᠪᠠᠢᠬᠤ ᠠᠨᠤ ᠦᠨᠳᠦᠰᠦᠨ ᠦᠭᠡᠢ ᠡᠵᠡᠯᠡᠭᠰᠡᠨ ᠪᠣᠯᠪᠠᠰᠤ ᠡᠳᠡᠭᠡᠷ ᠢᠨᠦ ᠶᠠᠭᠠᠬᠢᠨ ᠡᠳᠦᠭᠡ ᠪᠣᠯᠲᠠᠯᠠ ᠪᠠᠢᠬᠤ ᠠᠵᠢ᠃
ᠲᠡᠨᠳᠡ ᠡᠴᠡ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠪᠠᠷᠢᠭ᠍ᠳᠠᠭᠰᠠᠨ ᠨᠠᠢ᠍ᠮᠠᠨ ᠤ᠋ ᠬᠠᠳᠠᠨ ᠬᠡᠲᠦᠷᠡᠭᠰᠡᠨ ᠢᠳᠡᠷ ᠳᠣᠪᠣ ᠠ᠋ᠴᠠ ᠲᠡᠷᠢᠭᠦᠯᠡᠨ ᠴᠥᠮ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤᠨ ᠴᠤᠪᠤᠷᠢᠭᠤᠯᠵᠤ ᠪᠢᠰᠢᠷᠡᠨ ᠳᠠᠭᠠᠪᠠ᠃ ᠲᠡᠳᠦᠢ ᠲᠠᠢᠽᠦ ᠣᠯᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠬᠠᠩᠭᠠᠢ ᠠᠭᠤᠯᠠᠨ ᠤ᠋ ᠡᠮᠦᠨᠡ ᠬᠣᠶᠠᠷ ᠬᠦᠷᠢᠶᠡ ᠶ᠋ᠢ ᠨᠡᠢᠯᠡᠭᠦᠯᠦᠨ ᠪᠠᠭᠤᠳᠠᠯᠯᠠᠭᠤᠯᠵᠤ ᠣᠯᠠᠨ ᠴᠡᠷᠢᠭ ᠢ᠋ ᠲᠡᠭᠰᠢᠯᠡᠭᠡᠳ ᠨᠠᠢ᠍ᠮᠠᠨ ᠤ᠋ ᠡᠵᠡᠨ ᠦᠭᠡᠢ ᠴᠡᠷᠢᠭ ᠢ᠋ ᠶᠢᠰᠦᠨ ᠡᠩ ᠦ᠋ᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠠᠩᠭᠢ ᠶ᠋ᠢᠨ ᠨᠢᠭᠡᠨ ᠵᠠᠭᠤᠨ ᠨᠠᠶᠠᠨ ᠪᠠᠭ ᠲᠤᠷ ᠰᠠᠯᠭᠠᠨ ᠵᠠᠬᠢᠷᠤᠭᠤᠯᠵᠤ᠂ ᠰᠠᠶᠢ ᠨᠠᠢ᠍ᠮᠠᠨ ᠤ᠋ ᠵᠦᠭ ᠴᠡᠷᠢᠭ ᠬᠥᠳᠡᠯᠲᠡᠯᠡ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ ᠨᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠨᠠᠢ᠍ᠮᠠᠨ ᠤᠯᠤᠰ ᠠ᠋ᠴᠠ ᠤᠷᠭᠤᠨ ᠭᠠᠷᠴᠤ ᠳᠤᠲᠠᠭᠠᠬᠤ ᠶᠢᠰᠦᠨ ᠮᠢᠩᠭᠠᠨ ᠢᠯᠡᠭᠦᠦ ᠠᠢᠮᠠᠭ ᠪᠦᠷᠢ ᠶ᠋ᠢᠨ ᠴᠡᠷᠢᠭ ᠢ᠋ ᠲᠣᠰᠴᠤ ᠪᠠᠢᠯᠳᠤᠨ ᠳᠠᠷᠤᠭᠠᠳ ᠲᠡᠷᠢᠭᠦᠯᠡᠭᠰᠡᠨ ᠡᠵᠡᠨ ᠬᠠᠳᠠᠷᠠ ᠠᠢᠮᠠᠭ ᠤ᠋ᠨ ᠡᠵᠡᠨ ᠵᠣᠯᠢ᠂ ᠱᠠᠯᠵᠢᠭᠤᠳ ᠠᠢᠮᠠᠭ ᠤ᠋ᠨ ᠡᠵᠡᠨ ᠮᠡᠨᠡᠭ ᠨᠠᠷ ᠢ᠋ ᠪᠠᠷᠢᠵᠤ᠂ ᠦᠯᠡᠭᠰᠡᠨ ᠴᠡᠷᠢᠭ ᠢ᠋ ᠴᠥᠮ ᠳᠠᠭᠠᠭᠤᠯᠵᠤ ᠠᠪᠴᠢᠷᠠᠭᠰᠠᠨ ᠳ᠋ᠤᠷ ᠲᠠᠢᠽᠦ᠂ ᠵᠣᠯᠢ ᠮᠡᠨᠡᠭ ᠨᠠᠷ ᠢ᠋ ᠢᠲᠡᠭᠡᠮᠵᠢ ᠦᠭᠡᠢ ᠭᠡᠮᠡᠨ ᠴᠥᠮ ᠠᠯᠠᠭᠤᠯᠵᠤ᠂ ᠳᠠᠭᠠᠭᠰᠠᠨ ᠴᠡᠷᠢᠭ ᠦ᠋ᠳ ᠢ᠋ ᠪᠠᠢᠴᠠᠭᠠᠨ ᠬᠤᠪᠢᠶᠠᠵᠤ ᠵᠠᠬᠢᠷᠤᠭᠤᠯᠤᠨ᠂ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠨᠠᠢ᠍ᠮᠠᠨ ᠤ᠋ ᠵᠦᠭ ᠣᠷᠣᠵᠤ ᠬᠣᠷᠢᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠤᠭᠲᠤᠨ ᠢᠷᠡᠵᠦ : ᠠᠯᠠᠭ ᠥᠩᠭᠡᠲᠦ ᠶ᠋ᠢᠨ ᠳᠠᠴᠢᠩᠬᠤᠷᠯᠤ ᠯᠤᠭᠠ ᠬᠠᠮᠲᠤ ᠨᠡᠢᠯᠡᠵᠦ ᠨᠠᠢ᠍ᠮᠠᠨ ᠤ᠋ ᠨᠡᠢᠲᠡ ᠶ᠋ᠢ ᠴᠥᠮ ᠬᠤᠷᠢᠶᠠᠮᠵᠢᠯᠠᠵᠤ ᠲᠣᠭᠲᠠᠭᠠᠨ ᠣᠯᠤᠭᠰᠠᠨ ᠪᠠᠶᠠᠷ ᠢ᠋ ᠮᠡᠳᠡᠭᠦᠯᠵᠦᠬᠦᠢ᠃ ᠲᠡᠳᠦᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠰᠠᠭᠠᠲᠠᠯ ᠦᠭᠡᠢ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠤᠯᠤᠰ ᠲᠤᠷ ᠬᠦᠷᠲᠡᠯᠡ ᠸᠠᠩᠬᠦᠪ ᠠᠢᠮᠠᠭ ᠤ᠋ᠨ ᠡᠵᠡᠨ ᠳᠠᠴᠢᠩᠬᠤᠷᠯᠤ ᠣᠯᠠᠨ ᠢ᠋ᠶ᠋ᠠᠷ ᠲᠡᠷᠢᠭᠦᠯᠡᠵᠦ᠂ ᠲᠠᠢᠽᠦ ᠶ᠋ᠢ ᠤᠭᠲᠤᠨ ᠵᠣᠯᠭᠠᠵᠤ ᠪᠠᠶᠠᠷ ᠤ᠋ᠨ ᠠᠷᠢᠬᠢ ᠪᠠᠷᠢᠵᠤ ᠨᠠᠢ᠍ᠮᠠᠨ ᠤ᠋ ᠬᠠᠭᠤᠴᠢᠨ ᠰᠢ ᠯᠢᠶᠣᠤ ᠤᠯᠤᠰ ᠤ᠋ᠨ ᠤᠷᠲᠤ ᠬᠠᠷᠰᠢ ᠳ᠋ᠤᠷ ᠣᠷᠣᠵᠤ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠬᠤᠶᠠ᠂ ᠵᠢᠨᠦᠩ ᠮᠤᠬᠤᠯᠢ ᠳᠠᠢᠶᠠᠩ ᠬᠠᠭᠠᠨ ᠤ᠋ ᠡᠮᠡ ᠦᠷᠡ ᠶ᠋ᠢ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠷᠠᠭᠤᠯᠵᠤ᠂ ᠪᠢᠲᠡᠭᠡᠢ ᠳᠠᠷᠤᠯᠠᠨ ᠳᠠᠪᠴᠢᠯᠠ ᠭᠡᠮᠡᠨ ᠴᠢᠩᠳᠠ ᠴᠠᠭᠠᠵᠠᠯᠠᠪᠠ᠃ ᠡᠨᠡ ᠢᠨᠦ ᠨᠠᠢ᠍ᠮᠠᠨ ᠤ᠋ ᠬᠣᠩᠭᠣᠷ ᠵᠤᠯᠠ᠂ ᠮᠤᠬᠤᠯᠢ ᠶ᠋ᠢ ᠭᠠᠷᠴᠤ ᠢᠷᠡᠬᠦᠢ ᠳ᠋ᠦ᠍ᠷ ᠳᠠᠬᠢᠨ ᠳᠠᠪᠲᠠᠨ ᠤᠬᠢᠯᠠᠨ ᠰᠥᠭᠥᠳᠴᠦ ᠰᠠᠨᠠᠭᠠᠨ ᠳ᠋ᠤᠷ ᠣᠷᠣᠭᠤᠯᠤᠨ ᠭᠤᠶᠤᠭᠰᠠᠨ ᠠᠵᠤᠭᠤ᠃
ᠲᠡᠳᠦᠢ ᠬᠤᠷᠢᠮ ᠤ᠋ᠨ ᠡᠮᠦᠨᠡ ᠮᠤᠬᠤᠯᠢ ᠳᠣᠯᠣᠭᠠᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠰᠢᠭᠢᠳᠬᠡᠭᠡᠷᠢᠲᠦ ᠮᠠᠯᠠᠭᠠ ᠳᠤᠭᠤᠯᠠᠭᠠ ᠶ᠋ᠢ ᠡᠮᠦᠰᠴᠦ ᠵᠠᠯᠮᠠ ᠯᠤᠭᠠ ᠵᠠᠮᠤᠬᠠ ᠶ᠋ᠢ ᠬᠦᠯᠢᠵᠦ ᠠᠪᠴᠢᠷᠠᠪᠠ᠃ ᠲᠠᠢᠽᠦ᠂ ᠵᠠᠮᠤᠬᠠ ᠶ᠋ᠢ ᠦᠵᠡᠮᠡᠭᠴᠡ ᠨᠢᠳᠦᠨ ᠡᠴᠡ ᠭᠠᠯ ᠭᠠᠷᠪᠠ᠃ ᠦᠵᠡᠰᠡ ᠵᠡᠯᠮᠡ᠂ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠬᠠᠮᠲᠤ ᠪᠠᠢᠵᠤ᠂ ᠣᠯᠣᠩᠬᠤ᠂ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠶ᠋ᠢᠨ ᠳᠥᠴᠢᠭᠡᠳ ᠬᠥᠮᠦᠨ ᠢ᠋ ᠣᠯᠵᠤ ᠲᠡᠷᠡ ᠡᠳᠦᠷ ᠦ᠋ᠨ ᠪᠠᠢᠯᠳᠤᠭᠠᠨᠠ᠂ ᠵᠠᠮᠤᠬᠠ ᠢᠯᠳᠡᠰᠢ ᠮᠥᠷᠡᠨ ᠦ᠌ ᠮᠠᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ᠂ ᠸᠠᠢᠯᠠ ᠠᠢᠮᠠᠭ ᠤ᠋ᠨ ᠬᠤᠪᠢᠲᠤ ᠬᠤᠸᠠ ᠭᠤᠷᠪᠠᠭᠤᠯᠠ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠡᠴᠡ ᠰᠠᠯᠵᠤ ᠰᠥᠨᠢ ᠣᠷᠭᠣᠬᠤᠶᠠ ᠴᠢᠯᠠᠭᠤ᠂ ᠲᠡᠮᠦᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠳᠠᠷᠤᠭᠳᠠᠭᠰᠠᠨᠠ ᠲᠠᠰᠢᠷᠠᠮ ᠳ᠋ᠤᠷ ᠵᠠᠮᠤᠬᠠ ᠭᠣᠣᠯ ᠤ᠋ᠨ ᠥᠭᠡᠳᠡ ᠡᠴᠢᠭᠰᠡᠨ ᠶᠡᠬᠡᠯᠡ ᠶᠠᠭᠠᠷᠠᠯᠲᠠᠢ ᠴᠠᠭ ᠲᠤᠯᠠ ᠵᠠᠮᠤᠬᠠ ᠦᠰᠦ ᠪᠡᠨ ᠠᠯᠳᠠᠷᠠᠭᠠᠵᠤ᠂ ᠤᠰᠤᠨ ᠤ᠋ ᠳᠣᠲᠣᠷᠠ ᠪᠠᠰᠠ ᠨᠢᠭᠡᠨ ᠪᠢᠴᠢᠬᠠᠨ ᠲᠣᠯᠣᠭᠠᠢ ᠦᠵᠡᠭᠳᠡᠵᠦ᠂ ᠭᠠᠷ ᠲᠤᠷ ᠪᠠᠷᠢᠭ᠍ᠰᠠᠨ ᠢᠯᠳᠦᠨ ᠦ᠌ ᠦᠵᠦᠭᠦᠷ ᠲᠣᠷ ᠭᠠᠯ ᠭᠠᠷᠴᠤ ᠳᠤᠲᠠᠭᠠᠬᠤᠶᠠ ᠵᠠᠯᠮᠠ ᠲᠡᠷᠢᠭᠦᠯᠡᠵᠦ ᠭᠠᠷ ᠬᠥᠳᠡᠯᠦᠨ ᠪᠠᠷᠢᠵᠤ᠂ ᠠᠷᠲᠠ ᠬᠤᠰᠠᠭᠤᠷ ᠬᠣᠶᠠᠭᠤᠯᠠ ᠶ᠋ᠢ ᠴᠠᠪᠴᠢᠨ ᠠᠯᠠᠭᠠᠳ ᠵᠢᠨᠦᠩ ᠦ᠋ᠨ ᠪᠠᠭᠤᠳᠠᠯ ᠳ᠋ᠤᠷ ᠡᠴᠢᠵᠦ ᠣᠨᠴᠠ ᠡᠨᠡ ᠡᠳᠦᠷ ᠦ᠋ᠨ ᠬᠤᠷᠢᠮ ᠢ᠋ ᠬᠦᠯᠢᠶᠡᠭᠰᠡᠨ ᠠᠵᠤᠭᠤ᠃ ᠲᠡᠢᠨ ᠬᠦ᠌ ᠮᠤᠬᠤᠯᠢ ᠡᠵᠡᠨ ᠦ᠌ ᠱᠠᠩᠨᠠᠭᠰᠠᠨ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠶ᠋ᠢ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠬᠡᠳᠦᠢᠨᠡᠢ ᠬᠣᠷᠢᠶᠠᠨ ᠠᠪᠴᠤ ᠢᠷᠡᠭᠰᠡᠨ ᠠᠵᠤᠭᠤ᠃
ᠲᠡᠳᠦᠢ ᠲᠠᠢᠽᠦ᠂ ᠵᠠᠮᠤᠬᠠ ᠶ᠋ᠢ ᠦᠵᠡᠭᠡᠳ ᠶᠡᠬᠡᠯᠡ ᠬᠢᠯᠢᠩ ᠲᠥᠷᠥᠵᠦ ᠵᠠᠩᠳᠠᠨ ᠥᠭᠦᠯᠡᠷᠦᠨ : 《ᠳᠣᠯᠣᠭᠠᠨ ᠤᠯᠤᠰ ᠲᠤᠷ ᠮᠣᠷᠢ ᠠᠷᠠᠯᠵᠢᠭ᠍ᠰᠠᠨ ᠪᠤᠷᠲᠠᠭ ᠪᠣᠭᠣᠯ᠂ ᠠᠯᠢ ᠤᠯᠤᠰ ᠲᠤᠷ ᠬᠦᠷᠪᠡᠰᠦ ᠠᠯᠢ ᠤᠯᠤᠰ ᠢ᠋ ᠮᠥᠬᠥᠭᠡᠭᠰᠡᠨ ᠥᠯᠵᠡᠢ ᠪᠤᠰᠤ ᠠᠮᠢᠲᠠᠨ ᠴᠢᠨᠦ ᠭᠠᠷ ᠢ᠋ᠶ᠋ᠠᠷ ᠬᠡᠳᠦᠢᠴᠢᠨᠡᠭᠡᠨ ᠠᠢᠮᠠᠭ ᠢ᠋ ᠮᠥᠬᠥᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠡᠭᠡᠭᠦᠯᠵᠦ ᠦᠵᠡᠭᠳᠡᠬᠦᠢ᠂ ᠨᠡᠩ ᠪᠠᠰᠠ ᠬᠡᠷᠡᠢᠳ ᠦ᠋ᠨ ᠸᠠᠩ ᠴᠢᠮᠠ ᠳ᠋ᠤᠷ ᠥᠴᠦᠬᠡᠨ ᠴᠦ᠍ ᠮᠠᠭᠤ ᠦᠭᠡᠢ᠂ ᠠᠮᠢᠨ ᠢ᠋ ᠴᠢᠨᠦ ᠠᠪᠤᠷᠠᠨ ᠲᠡᠵᠢᠭᠡᠭᠰᠡᠨ ᠠᠴᠢᠲᠤ ᠬᠥᠮᠦᠨ ᠢ᠋ ᠴᠢ ᠬᠡᠷᠬᠢᠨ ᠲᠥᠪᠳᠡᠵᠦ ᠴᠠᠪᠴᠢᠨ ᠠᠯᠠᠪᠠ ? ᠪᠠᠰᠠ ᠡᠨᠡ ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠴᠢ ᠥᠳᠥᠭᠡᠵᠦ ᠡᠨᠡ ᠮᠡᠲᠦ ᠳ᠋ᠦ᠍ᠷ ᠬᠦᠷᠭᠡᠭᠡᠳ ᠪᠠᠰᠠ ᠪᠤᠰᠤ ᠤᠯᠤᠰ ᠢ᠋ ᠠᠪᠴᠤ ᠤᠷᠪᠠᠬᠤ ᠠᠨᠤ ᠳᠡᠯᠡᠬᠡᠢ ᠳ᠋ᠠᠭᠢᠨᠠ ᠡᠨᠡ ᠮᠡᠲᠦ ᠵᠠᠯᠢᠬᠠᠢ ᠬᠠᠷᠭᠢᠰ ᠵᠢᠷᠤᠮ ᠦᠭᠡᠢ ᠪᠣᠭᠣᠯ ᠪᠠᠰᠠ ᠪᠣᠢ ᠤᠤ ? 》ᠭᠡᠮᠡᠨ ᠬᠣᠶᠠᠷ ᠴᠢᠬᠢ ᠳ᠋ᠦ᠍ᠷ ᠵᠡᠪᠡ ᠬᠠᠳᠬᠤᠵᠤ᠂ ᠭᠠᠷ ᠬᠥᠯ ᠦ᠋ᠨ ᠬᠤᠷᠤᠭᠤ ᠶ᠋ᠢ ᠴᠥᠮ ᠣᠭᠲᠣᠯᠤᠭᠤᠯᠤᠨ ᠬᠣᠷᠢᠭᠤᠯ ᠲᠡᠷᠭᠡ ᠳ᠋ᠦ᠍ᠷ ᠬᠣᠷᠢᠭᠤᠯᠵᠤ : 《ᠤᠯᠤᠰ ᠲᠤᠷ ᠡᠭᠡᠭᠰᠡᠨ ᠬᠣᠢᠨᠠ ᠾᠧ ᠸᠠᠩ ᠤ᠋ᠨ ᠬᠡᠭᠦᠷ ᠦ᠋ᠨ ᠡᠮᠦᠨᠡ ᠣᠭᠲᠣᠴᠢᠨ ᠠᠯᠠᠬᠤ ᠶ᠋ᠢ ᠬᠦᠯᠢᠶᠡ ! 》 ᠭᠡᠮᠡᠨ ᠠᠴᠢ ᠠᠷᠲᠠ ᠬᠤᠰᠠᠭᠤᠷ ᠬᠣᠶᠠᠷ ᠢ᠋ ᠨᠢᠭᠡᠨᠲᠡ ᠠᠯᠠᠭᠰᠠᠨ ᠲᠤᠯᠠ ᠬᠡᠭᠦᠷ ᠪᠠ ᠲᠣᠯᠣᠭᠠᠢ ᠲᠠᠢ ᠲᠡᠭᠦᠨ ᠦ᠌ ᠡᠪᠦᠭᠡᠳ ᠦ᠋ᠨ ᠬᠡᠭᠦᠷ ᠲᠣᠷ ᠠᠪᠠᠴᠢᠵᠤ ᠣᠷᠣᠰᠢᠭᠤᠯ ᠭᠡᠮᠡᠨ ᠵᠠᠬᠢᠵᠤ᠂ ᠰᠠᠶᠢ ᠣᠯᠠᠨ ᠲᠦᠰᠢᠮᠡᠳ ᠦ᠋ᠨ ᠭᠠᠪᠢᠶᠠ ᠶ᠋ᠢ ᠢᠯᠭᠠᠰᠤᠭᠠᠢ ᠬᠡᠮᠡᠲᠡᠯᠡ ᠸᠠᠩᠭᠦᠪ ᠦ᠋ᠨ ᠲᠠᠴᠢᠩᠬᠤᠷᠯᠤ᠂ ᠲᠠᠪᠢᠨ ᠨᠠᠰᠤ ᠭᠠᠷᠤᠭᠰᠠᠨ ᠨᠢᠭᠡᠨ ᠥᠨᠳᠥᠷ ᠦᠰᠦᠲᠦ ᠬᠥᠮᠦᠨ ᠢ᠋ ᠲᠦᠯᠬᠢᠵᠦ ᠠᠴᠢᠷᠠᠵᠤ ᠰᠥᠭᠥᠳᠬᠡᠨ ᠮᠡᠳᠡᠭᠦᠯᠦᠷᠦᠨ : 《ᠡᠨᠡ ᠪᠣᠯᠪᠠᠰᠤ ᠨᠠᠢ᠍ᠮᠠᠨ ᠤ᠋ ᠸᠧᠢ ᠦ ᠤᠯᠤᠰ ᠤ᠋ᠨ ᠳ᠋ᠠᠳᠠᠲᠤᠩᠭᠠ ᠮᠥᠨ᠂ ᠲᠠᠢᠶᠠᠩ ᠬᠠᠭᠠᠨ ᠡᠭᠦᠨ ᠢ᠋ ᠪᠡᠶᠡ ᠪᠡᠷ ᠵᠠᠯᠠᠨ ᠠᠪᠴᠢᠷᠠᠵᠤ ᠪᠠᠭ᠍ᠰᠢ ᠶ᠋ᠢᠨ ᠶᠣᠰᠣᠭᠠᠷ ᠬᠦᠨᠳᠦᠯᠡᠵᠦ ᠤᠯᠤᠰ ᠤ᠋ᠨ ᠠᠯᠲᠠᠨ ᠲᠠᠮᠠᠭᠠ ᠶ᠋ᠢ ᠡᠭᠦᠨ ᠳ᠋ᠦ᠍ᠷ ᠪᠠᠷᠢᠭᠤᠯᠤᠨ᠂ ᠤᠯᠤᠰ ᠤ᠋ᠨ ᠣᠷᠣᠬᠤ ᠭᠠᠷᠬᠤ ᠪᠠ ᠰᠠᠩ ᠬᠥᠮᠥᠷᠭᠡ ᠶ᠋ᠢ ᠴᠥᠮ ᠡᠭᠦᠨ ᠳ᠋ᠦ᠍ᠷ ᠲᠤᠰᠢᠶᠠᠵᠤ ᠬᠠᠮᠢᠶᠠᠷᠤᠭᠤᠯᠪᠠ᠃ ᠮᠠᠨ ᠤ᠋ ᠴᠡᠷᠢᠭ ᠬᠣᠷᠣᠭᠠ ᠶ᠋ᠢ ᠪᠤᠯᠢᠶᠠᠭᠰᠠᠨ ᠳ᠋ᠤᠷ ᠰᠥᠨᠢ ᠡᠨᠡ ᠠᠯᠲᠠᠨ ᠲᠠᠮᠠᠭᠠ ᠶ᠋ᠢ ᠡᠪᠦᠷᠯᠡᠵᠦ ᠤᠷᠭᠤᠬᠤᠢ ᠳ᠋ᠤᠷ ᠮᠠᠨ ᠤ᠋ ᠴᠡᠷᠢᠭ ᠪᠠᠷᠢᠵᠤ ᠠᠪᠴᠢᠷᠠᠪᠠ᠃ ᠵᠢᠴᠢ ᠡᠨᠡ ᠤᠯᠤᠰ ᠤ᠋ᠨ ᠨᠡᠢᠲᠡ ᠤᠯᠤᠰ ᠠᠯᠪᠠᠲᠤ᠂ ᠬᠢᠲᠠᠳ ᠢᠷᠭᠡᠨ ᠪᠦᠭᠦᠳᠡ ᠶ᠋ᠢᠨ ᠵᠠᠷᠭᠤ ᠵᠠᠭᠠᠯᠢᠬᠠᠢ ᠶ᠋ᠢ ᠢᠯᠭᠠᠭᠴᠢ ᠵᠥᠪᠯᠡᠯ ᠦ᠋ᠨ ᠰᠠᠢᠳ ᠮᠥᠩᠭᠥᠯᠵᠢ᠂ ᠡᠵᠡᠨ ᠦ᠌ ᠴᠡᠷᠢᠭ ᠣᠷᠳᠣᠨ ᠳ᠋ᠤᠷ ᠣᠷᠣᠭᠰᠠᠨ ᠢ᠋ ᠦᠵᠡᠭᠡᠳ ᠲᠡᠳᠡᠨ ᠦ᠌ ᠲᠠᠬᠢᠯᠭᠠ ᠶ᠋ᠢᠨ ᠰᠦᠮᠡ ᠳ᠋ᠦ᠍ᠷ ᠮᠥᠷᠭᠥᠰᠦᠭᠡᠢ ᠭᠡᠮᠡᠨ ᠬᠠᠷᠰᠢ ᠶ᠋ᠢᠨ ᠡᠮᠦᠨᠡ ᠢᠨᠦ ᠰᠥᠭᠥᠳᠴᠦ ᠬᠦᠵᠦᠭᠦᠦ ᠪᠡᠨ ᠣᠭᠲᠣᠯᠵᠤ ᠦᠬᠦᠪᠡ᠃ ᠲᠦᠰᠢᠮᠡᠯ ᠪᠢ ᠦᠵᠡᠪᠡᠰᠦ ᠰᠢᠳᠤᠷᠭᠤ ᠲᠦᠰᠢᠮᠡᠯ ᠲᠤᠯᠠ ᠡᠵᠡᠨ ᠦ᠌ ᠠᠢᠯᠠᠳᠬᠤᠢ ᠶ᠋ᠢ ᠬᠦᠯᠢᠶᠡᠯᠭᠡᠵᠦ ᠬᠡᠭᠦᠷ ᠶᠠᠰᠤ ᠶ᠋ᠢ ᠬᠥᠳᠡᠯᠭᠡᠭᠰᠡᠨ ᠦᠭᠡᠢ ᠰᠠᠬᠢᠵᠤ ᠪᠣᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠰᠣᠴᠢᠨ ᠭᠠᠢᠬᠠᠵᠤ ᠶᠢᠰᠦᠨ ᠡᠩ ᠦ᠋ᠨ ᠣᠯᠠᠨ ᠲᠦᠰᠢᠮᠡᠳ ᠪᠠ ᠳᠡᠭᠦᠦ ᠨᠠᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠴᠥᠮ ᠳᠠᠭᠠᠭᠤᠯᠤᠨ ᠡᠴᠢᠵᠦ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠠᠷᠢᠬᠢ ᠰᠠᠴᠤᠵᠤ ᠡᠨᠡᠷᠢᠩᠭᠦᠢ ᠴᠢᠷᠠᠢ ᠪᠠᠷ ᠡᠢᠨ ᠥᠭᠦᠯᠡᠷᠦᠨ :
ᠬᠠᠢᠷᠠᠬᠠᠨ ᠨᠢᠭᠡᠨ ᠦᠶᠡ ᠶ᠋ᠢᠨ ᠲᠠᠰᠤᠷᠬᠠᠢ ᠰᠢᠳᠤᠷᠭᠤ ᠵᠢᠷᠤᠮᠲᠠᠨ
ᠬᠠᠭᠠᠨ ᠢ᠋ᠶ᠋ᠠᠨ ᠡᠮᠦᠨᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠭᠦᠢᠴᠡᠳᠬᠡᠨ ᠦᠬᠦᠭᠰᠡᠨ ᠢᠨᠦ᠂
ᠬᠠᠮᠤᠭ ᠪᠦᠭᠦᠳᠡ ᠰᠠᠢᠳ ᠲᠦᠰᠢᠮᠡᠳ ᠲᠣᠷ ᠡᠷᠬᠢᠮ ᠪᠣᠯᠤᠭᠰᠠᠨ ᠴᠢ
ᠬᠠᠯᠠᠬᠠᠢ ᠬᠥᠭᠡᠷᠦᠬᠦᠢ ᠲᠠᠬᠢᠮᠳᠠᠭᠤ ᠰᠡᠳᠬᠢᠯᠲᠦ ᠬᠥᠪᠡᠭᠦᠨ ᠡᠴᠡ ᠬᠡᠲᠦᠷᠡᠵᠦᠬᠦᠢ᠃
ᠬᠠᠢᠷᠠᠯᠠᠭᠴᠢ ᠨᠠᠳᠠ ᠳ᠋ᠤᠷ ᠠᠭᠤᠯᠵᠠᠨ ᠤᠴᠠᠷᠠᠵᠤ ᠵᠢᠳᠬᠦᠭᠰᠡᠨ ᠴᠦ᠍ ᠪᠣᠯᠤᠭᠠᠰᠠᠢ ᠴᠢ
ᠬᠠᠰ ᠶᠡᠬᠡ ᠲᠥᠷᠥ ᠶ᠋ᠢᠨ ᠬᠠᠭᠠᠰ ᠮᠥᠷᠥ ᠪᠣᠯᠬᠤ ᠪᠥᠯᠥᠭᠡ᠂
ᠬᠠᠮᠠᠭᠠᠯᠠᠯ ᠢᠳᠬᠠᠭᠴᠢ ᠶ᠋ᠢ ᠦᠯᠦ ᠮᠡᠳᠡᠬᠦ ᠡᠨᠡ ᠤᠯᠤᠰ ᠲᠤᠷ
ᠬᠠᠯᠠᠰᠢᠷᠠᠨ ᠭᠠᠰᠢᠭᠤᠳᠠᠭᠰᠠᠭᠠᠷ ᠦᠬᠦᠭᠰᠡᠨ
ᠬᠠᠯᠠᠰᠢ ᠦᠭᠡᠢ ᠵᠣᠷᠢᠭ᠍ᠲᠤ ᠲᠦᠰᠢᠮᠡᠯ ᠪᠤᠶᠤ !
ᠭᠡᠮᠡᠨ ᠡᠷᠭᠦᠮᠵᠢᠯᠡᠭᠡᠳ《ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠦᠷᠡ ᠠᠴᠢ ᠪᠠᠷ ᠠᠨᠤ ᠬᠤᠷᠢᠶᠠᠮᠵᠢᠯᠠᠭᠤᠯᠵᠤ᠂ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠪᠠᠭᠠ ᠬᠥᠪᠡᠭᠦᠨ ᠮᠥᠩᠭᠥᠨ ᠲᠣᠯᠢ ᠪᠠᠷ ᠠᠷᠢᠬᠢ ᠳᠤᠰᠤᠭᠠᠯᠭᠠᠵᠤ᠂ ᠡᠪᠦᠭᠡᠳ ᠦ᠋ᠨ ᠬᠡᠭᠦᠷ ᠲᠣᠷ ᠢᠨᠦ ᠣᠷᠣᠰᠢᠭᠤᠯᠤᠭᠤᠯᠵᠤ᠂ ᠪᠠᠰᠠ ᠡᠭᠦᠨ ᠦ᠌ ᠳᠦᠷᠰᠦ ᠶ᠋ᠢ ᠰᠢᠷᠣᠢ ᠪᠠᠷ ᠪᠦᠲᠡᠭᠡᠯᠭᠡᠨ᠂ ᠮᠥᠨ ᠡᠨᠳᠡ ᠡᠨᠡ ᠰᠦᠮᠡ ᠳ᠋ᠦ᠍ᠷ ᠲᠡᠭᠦᠨ ᠦ᠌ ᠳᠡᠭᠡᠳᠦ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠳᠡᠷᠭᠡᠳᠡ ᠢᠨᠦ ᠵᠣᠭᠰᠣᠯᠭᠠ᠂ ᠵᠢᠷᠤᠮ ᠠᠨᠤ ᠲᠡᠳᠡᠨ ᠦ᠌ ᠡᠵᠡᠨ ᠳ᠋ᠡᠭᠡᠨ ᠭᠦᠢᠴᠡᠳᠬᠡᠪᠡ᠂ ᠥᠷᠥᠰᠢᠶᠡᠯ ᠢᠨᠦ ᠮᠢᠨᠦ ᠬᠦᠷᠲᠡᠭᠡᠭᠰᠡᠨ ᠪᠣᠯᠲᠤᠭᠠᠢ ! 》 ᠭᠡᠮᠡᠨ ᠣᠷᠳᠣᠨ ᠳ᠋ᠤᠷ ᠡᠭᠡᠵᠦ᠂ ᠳ᠋ᠠᠳᠠᠳᠤᠩᠭᠠ ᠠ᠋ᠴᠠ ᠠᠰᠠᠭᠤᠷᠤᠨ :《ᠲᠠᠨ ᠤ᠋ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠴᠠᠭ ᠢ᠋ ᠰᠥᠷᠴᠦ ᠥᠪᠡᠷ ᠦ᠋ᠨ ᠤᠭᠰᠠᠭᠠ ᠳ᠋ᠤᠷ ᠪᠡᠶᠡ ᠮᠥᠬᠥᠭᠡᠳ ᠤᠯᠤᠰ ᠲᠥᠷᠥ ᠭᠠᠵᠠᠷ ᠣᠷᠣᠨ ᠠᠷᠠᠳ ᠢᠷᠭᠡᠨ ᠨᠠᠷ ᠨᠢᠭᠡᠨᠲᠡ ᠮᠢᠨᠦ ᠪᠣᠯᠤᠭᠰᠠᠨ ᠪᠥᠭᠡᠲᠡᠯᠡ ᠴᠢ ᠭᠠᠭᠴᠠ ᠲᠡᠷᠡ ᠲᠠᠮᠠᠭᠠ ᠶ᠋ᠢ ᠠᠪᠴᠤ ᠬᠠᠮᠢᠭᠠᠰᠢ ᠡᠴᠢᠰᠦᠭᠡᠢ ᠬᠡᠮᠡᠭᠰᠡᠨ ᠪᠣᠢ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠳ᠋ᠠᠳᠠᠳᠤᠩᠭᠠ ᠮᠡᠳᠡᠭᠦᠯᠦᠷᠦᠨ : 《ᠶᠡᠬᠡ ᠥᠷᠥᠰᠢᠶᠡᠯᠲᠦ ᠡᠵᠡᠨ ᠢ᠋ᠶ᠋ᠡᠨ ᠲᠤᠰᠢᠶᠠᠭᠰᠠᠨ ᠢ᠋ ᠠᠮᠢ ᠯᠤᠭᠠ ᠪᠠᠨ ᠬᠣᠯᠪᠣᠨ ᠬᠠᠲᠠᠵᠤ ᠤᠷᠭᠤᠨ ᠭᠠᠷᠴᠤ ᠡᠴᠢᠭᠡᠳ ᠠᠯᠲᠠᠨᠱᠠᠭᠠ ᠨᠡᠷᠡᠲᠦ ᠪᠠᠭᠠ ᠡᠵᠡᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠲᠤᠰᠢᠶᠠᠨ᠂ ᠠᠯᠳᠠᠭᠰᠠᠨ ᠤᠯᠤᠰ ᠢ᠋ ᠳᠠᠬᠢᠨ ᠪᠠᠢᠭᠤᠯᠰᠤᠭᠠᠢ ᠬᠡᠮᠡᠭᠰᠡᠨ ᠪᠥᠯᠥᠭᠡ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠲᠡᠷᠢᠭᠦᠨ ᠳᠣᠬᠢᠵᠤ ᠮᠦᠰᠢᠶᠡᠵᠦ ᠡᠢᠨ ᠵᠠᠬᠢᠷᠤᠨ :
ᠠᠯᠤᠰ ᠬᠣᠯᠠ ᠶᠡᠬᠡ ᠰᠠᠨᠠᠭᠠᠲᠤ ᠰᠠᠢᠳ
ᠠᠳᠠᠪᠠᠰᠢ ᠬᠠᠷᠢᠨ ᠭᠠᠭᠴᠠ ᠰᠡᠳᠬᠢᠯ ᠲᠡᠢ ᠪᠠᠢᠨᠠᠮ᠃
ᠠᠪᠠᠢ ᠬᠠᠷᠢᠨ ᠡᠭᠦᠨ ᠢ᠋ ᠠᠪᠤᠷᠠᠵᠤ ᠪᠣᠯᠬᠤ ᠮᠡᠲᠦ
ᠠᠯᠠᠬᠤ ᠶ᠋ᠢ ᠠᠨᠤ ᠰᠢᠭᠤᠳ ᠬᠡᠯᠲᠦᠷᠢᠭᠦᠯᠲᠦᠭᠡᠢ᠃
ᠭᠡᠮᠡᠨ ᠬᠦᠯᠢᠶᠡᠰᠦᠨ ᠢ᠋ ᠲᠠᠢᠯᠵᠤ᠂ ᠲᠡᠭᠦᠨ ᠡᠴᠡ ᠠᠰᠠᠭᠤᠷᠤᠨ : 《ᠡᠨᠡ ᠲᠠᠮᠠᠭᠠ ᠶ᠋ᠢᠨ ᠬᠡᠷᠡᠭ ᠢᠨᠦ ᠶᠠᠭᠤᠨ ? 》 ᠬᠡᠮᠡᠪᠡᠰᠦ ᠳ᠋ᠠᠳᠠᠳᠤᠩᠭᠠ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ : 《ᠡᠨᠡ ᠲᠠᠮᠠᠭᠠ ᠬᠡᠮᠡᠭᠴᠢ ᠰᠠᠩ ᠬᠥᠮᠥᠷᠭᠡ ᠶ᠋ᠢᠨ ᠡᠳ᠋ ᠠᠭᠤᠷᠠᠰᠤᠨ ᠪᠠ ᠣᠯᠠᠨ ᠤᠯᠤᠰ ᠲᠤᠷ ᠲᠤᠩᠬᠠᠭ ᠵᠠᠷᠯᠠᠬᠤᠢ ᠳ᠋ᠤᠷ ᠰᠠᠢᠨ ᠬᠥᠮᠦᠨ ᠳ᠋ᠦ᠍ᠷ ᠪᠠᠷᠢᠭᠤᠯᠵᠤ ᠢᠲᠡᠭᠡᠯᠲᠡᠢ ᠲᠡᠮᠳᠡᠭ ᠪᠣᠯᠭᠠᠮᠤᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠥᠴᠢᠷᠳ : 《ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠨᠠᠳᠠ ᠳ᠋ᠤᠷ ᠮᠥᠨ ᠬᠦ᠌ ᠠᠳᠠᠯᠢ ᠬᠦᠷᠭᠡᠭᠰᠡᠨ ᠢ᠋ ᠪᠢ ᠬᠥᠮᠦᠨ ᠦ᠌ ᠪᠡᠶᠡ ᠪᠠᠲᠤ ᠦᠭᠡᠢ ᠪᠣᠯᠪᠠᠰᠤ ᠲᠠᠮᠠᠭᠠ ᠲᠡᠮᠳᠡᠭ ᠢ᠋ᠶ᠋ᠡᠷ ᠪᠠᠲᠤ ᠪᠣᠯᠭᠠᠵᠤ ᠪᠣᠯᠤᠮᠤᠢ ᠤᠤ ? ᠭᠡᠮᠡᠨ ᠠᠪᠤᠭᠰᠠᠨ ᠦᠭᠡᠢ᠂ ᠡᠳᠦᠭᠡ ᠦᠵᠡᠰᠡ ᠲᠠᠮᠠᠭᠠ ᠬᠡᠮᠡᠭᠴᠢ ᠡᠵᠡᠨ ᠦ᠌ ᠲᠡᠮᠳᠡᠭ ᠢ᠋ ᠢᠷᠭᠡᠨ ᠳ᠋ᠦ᠍ᠷ ᠦᠵᠡᠭᠦᠯᠬᠦ ᠰᠢᠯᠲᠠᠭᠠᠨ ᠪᠣᠢ ᠶᠠ ! 》 ᠭᠡᠮᠡᠨ ᠲᠡᠳᠦᠢ ᠳ᠋ᠠᠳᠠᠳᠤᠩᠭᠠ ᠶ᠋ᠢ ᠰᠠᠢᠰᠢᠶᠠᠨ ᠳᠡᠷᠭᠡᠳᠡ ᠪᠡᠨ ᠶᠠᠪᠤᠭᠤᠯᠵᠤ᠂ ᠠᠯᠢᠪᠠ ᠵᠠᠷᠯᠠᠬᠤ ᠪᠠ ᠤᠬᠠᠭᠤᠯᠬᠤ ᠲᠤᠩᠬᠠᠭ ᠲᠤᠷ ᠲᠠᠮᠠᠭᠠ ᠳᠠᠷᠤᠬᠤ ᠶ᠋ᠢ ᠴᠥᠮ ᠳ᠋ᠠᠳᠠᠳᠤᠩᠭᠠ ᠳ᠋ᠤᠷ ᠲᠤᠰᠢᠶᠠᠪᠠ᠃ ᠳᠠᠷᠤᠢ ᠵᠠᠬᠢᠶᠠ ᠪᠠᠭᠤᠯᠭᠠᠵᠤ《ᠳᠠᠢᠶᠠᠩ ᠬᠠᠭᠠᠨ ᠤ᠋ ᠭᠡᠷ ᠦ᠋ᠨ ᠠᠮᠠᠨ ᠳ᠋ᠤᠷ ᠬᠡᠷᠡᠢᠳ ᠦ᠋ᠨ ᠠᠢᠮᠠᠭ ᠠ᠋ᠴᠠ ᠬᠣᠶᠠᠷ ᠵᠠᠭᠤᠨ ᠬᠥᠮᠦᠨ ᠥᠭᠴᠦ ᠵᠠᠷᠤᠭᠳᠠᠭᠤᠯ᠂ ᠠᠯᠠᠬᠤ ᠪᠤᠯᠠᠬᠤ ᠪᠤᠯᠢᠶᠠᠬᠤ ᠲᠠᠪᠴᠢᠯᠠᠬᠤᠢ ᠳ᠋ᠤᠷ ᠪᠢᠲᠡᠭᠡᠢ ᠬᠦᠷᠭᠦᠯ᠃ ᠵᠢᠴᠢ ᠨᠠᠢ᠍ᠮᠠᠨ ᠤ᠋ ᠣᠯᠠᠨ ᠴᠡᠷᠢᠭ ᠦ᠋ᠨ ᠳᠤᠷᠠ ᠶ᠋ᠢ ᠠᠰᠠᠭᠤᠵᠤ ᠴᠡᠷᠢᠭ ᠪᠣᠯᠭᠠᠨ ᠠᠯᠪᠠᠨᠠ ᠠᠪ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠡᠨᠡ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠶᠠᠪᠤᠳᠠᠯ ᠳ᠋ᠤᠷ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠪᠠᠶᠠᠷᠯᠠᠯᠴᠠᠨ ᠳᠠᠭᠤᠳᠠᠯᠴᠠᠬᠤ ᠶ᠋ᠢ ᠵᠢᠨᠦᠩ ᠮᠤᠬᠤᠯᠢ ᠪᠡᠶᠡ ᠪᠡᠷ ᠭᠠᠷᠴᠤ ᠰᠣᠨᠣᠰᠤᠨ ᠡᠢᠨ ᠬᠦ᠌ ᠲᠣᠭᠲᠠᠭᠠᠵᠤ ᠪᠣᠯᠬᠤ ᠶ᠋ᠢ ᠮᠡᠳᠡᠭᠡᠳ ᠳᠡᠢᠯᠦᠭᠰᠡᠨ ᠪᠠᠶᠠᠷ ᠤ᠋ᠨ ᠳᠤᠮᠳᠠ ᠡᠳᠦᠷ ᠦ᠋ᠨ ᠬᠤᠷᠢᠮ ᠳ᠋ᠤᠷ ᠡᠵᠡᠨ ᠦ᠌ ᠬᠦᠷᠲᠡᠭᠡᠭᠰᠡᠨ ᠶᠠᠭᠤᠮᠠ ᠶ᠋ᠢ ᠤᠭ ᠬᠡᠪ ᠢ᠋ᠶ᠋ᠡᠷ ᠰᠢᠷᠡᠭᠡᠨ ᠦ᠌ ᠳᠡᠭᠡᠷᠡ ᠳᠠᠮᠨᠠᠭᠤᠯᠵᠤ ᠠᠴᠢᠷᠠᠨ᠂ ᠥᠪᠡᠷ ᠢ᠋ᠶ᠋ᠡᠨ ᠪᠠᠰᠠ ᠨᠢᠭᠡᠨ ᠲᠠᠪᠰᠢ ᠳ᠋ᠤᠷ ᠰᠢᠷᠠ ᠭᠬᠢᠪ ᠢ᠋ᠶ᠋ᠡᠷ ᠪᠠᠭᠯᠠᠭᠰᠠᠨ ᠠᠩᠬᠠ ᠤᠳᠠᠭᠠ ᠬᠡᠷᠡᠢᠳ ᠮᠥᠬᠥᠬᠦᠢ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠪᠠᠷᠢᠭ᠍ᠰᠠᠨ ᠠᠯᠲᠠᠨ ᠰᠢᠷᠬᠡᠭᠲᠦ ᠲᠣᠷᠭᠠᠨ ᠭᠤᠲᠤᠯ ᠢ᠋ ᠠᠪᠴᠢᠷᠠᠵᠤ ᠪᠠᠷᠢᠭ᠍ᠰᠠᠨᠠ᠂ ᠲᠠᠢᠽᠦ ᠮᠠᠰᠢᠳᠠ ᠮᠦᠰᠢᠶᠡᠭᠡᠳ ᠬᠦᠯᠢᠶᠡᠨ ᠠᠪᠴᠤ ᠨᠥᠭᠥᠭᠡ ᠥᠷᠥᠭᠡᠰᠦᠨ ᠢ᠋ ᠠᠴᠢᠷᠠᠭᠤᠯᠤᠨ ᠪᠠᠰᠠ ᠡᠮᠦᠰᠬᠦ ᠦᠭᠡᠢ ᠳ᠋ᠦ᠍ᠷ ᠮᠤᠬᠤᠯᠢ ᠮᠥᠷᠭᠥᠵᠦ ᠣᠳᠣ ᠡᠮᠦᠰᠴᠦ ᠪᠣᠯᠤᠮᠤᠢ ᠭᠡᠮᠡᠨ ᠮᠡᠳᠡᠭᠦᠯᠵᠦ ᠣᠯᠠᠨ ᠲᠦᠰᠢᠮᠡᠳ ᠢ᠋ ᠠᠪᠴᠤ ᠪᠤᠭᠤᠷᠵᠢ ᠮᠤᠬᠤᠯᠢ ᠬᠣᠶᠠᠭᠤᠯᠠ ᠬᠣᠣᠰ ᠬᠤᠨᠳᠠᠭᠠ ᠶ᠋ᠢᠨ ᠠᠷᠢᠬᠢ ᠪᠠᠷᠢᠵᠤ ᠳᠥᠷᠪᠡᠨ ᠳᠡᠭᠦᠦ᠂ ᠳᠥᠷᠪᠡᠨ ᠬᠦᠯᠦᠭ᠂ ᠵᠢᠷᠭᠤᠭᠠᠨ ᠰᠠᠢᠳ ᠶᠢᠰᠦᠨ ᠡᠩ ᠪᠦᠭᠦᠳᠡᠭᠡᠷ ᠪᠡᠯᠭᠡᠯᠡᠷᠦᠨ᠄
ᠡᠷᠲᠡᠨ ᠦ᠌ ᠡᠩ ᠲᠡᠷᠢᠭᠦᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ
ᠡᠷᠡᠯᠬᠡᠭ ᠪᠠᠭᠠᠲᠤᠷ ᠪᠥᠷᠲᠡ ᠴᠢᠨᠣᠠ ᠪᠣᠭᠳᠠ ᠠ᠋ᠴᠠ
ᠡᠨᠡᠷᠢᠯ ᠥᠷᠥᠰᠢᠶᠡᠯ ᠬᠣᠣᠰ ᠪᠦᠷᠢᠳᠦᠭᠰᠡᠨ
ᠡᠵᠡᠨ ᠦ᠌ ᠡᠨᠡ ᠪᠡᠶᠡ ᠡᠷᠳᠡᠨᠢᠲᠦ ᠴᠣᠭᠴᠠ ᠳ᠋ᠤᠷ ᠬᠦᠷᠲᠡᠯᠡ
ᠡᠳᠦᠭᠡᠬᠢ ᠬᠣᠭᠣᠷᠣᠨᠳᠣ ᠬᠣᠷᠢᠨ ᠳᠥᠷᠪᠡᠨ ᠦᠶᠡ ᠪᠣᠯᠵᠤ
ᠡᠷᠬᠡ ᠪᠡᠷ ᠪᠣᠯᠭᠠᠭᠴᠢ ᠡᠵᠡᠨ ᠴᠢᠮᠠᠢ ᠮᠡᠨᠳᠦᠯᠡᠭᠡᠳ
ᠡᠷᠡᠮᠡᠬᠡᠢ ᠰᠥᠷᠭᠡᠦ ᠣᠯᠠᠨ ᠠᠢᠮᠠᠭ ᠤ᠋ᠳ ᠢ᠋ ᠬᠤᠷᠢᠶᠠᠮᠵᠢᠯᠠᠭᠠᠳ
ᠡᠨᠡ ᠡᠳᠦᠷ ᠣᠳᠣ ᠵᠣᠭᠰᠣᠯᠲᠠ ᠶ᠋ᠢ ᠣᠯᠪᠠ᠃
ᠡᠢᠮᠦ ᠶ᠋ᠢᠨ ᠲᠤᠯᠠ ᠡᠷᠳᠡᠨᠢ ᠠᠯᠲᠠᠲᠤ ᠭᠤᠲᠤᠯ ᠢ᠋
ᠡᠷᠭᠦᠨ ᠪᠠᠷᠢᠵᠤ ᠠᠶᠠ ᠪᠦᠭᠦᠳᠡᠭᠡᠷ ᠪᠡᠯᠭᠡᠯᠡᠮᠦᠢ᠃
ᠡᠳᠦᠷ ᠪᠦᠷᠢ ᠡᠮᠦᠰᠬᠦ ᠭᠤᠲᠤᠯ ᠢ᠋ ᠦᠵᠡᠪᠡᠰᠦ᠂
ᠡᠭᠦᠨᠴᠡ ᠣᠳᠣ ᠶᠡᠬᠡ ᠲᠥᠷᠥ ᠶ᠋ᠢ ᠪᠦᠲᠦᠭᠡᠬᠦ ᠶ᠋ᠢ ᠰᠡᠳᠬᠢᠨ
ᠡᠷᠬᠡ ᠳᠤᠷᠠ ᠠᠯᠵᠠᠭᠤ ᠵᠠᠯᠬᠠᠭᠤ ᠶ᠋ᠢ ᠲᠡᠪᠴᠢᠵᠦ᠂
ᠡᠷᠲᠡ ᠮᠠᠨᠠᠭᠠᠷ ᠵᠠᠯᠭᠠᠯᠳᠤᠨ ᠴᠢᠷᠮᠠᠢᠵᠤ ᠵᠢᠳᠬᠦᠭᠰᠡᠭᠡᠷ
ᠡᠷᠳᠡᠨᠢ ᠶ᠋ᠢᠨ ᠲᠥᠷᠥ ᠶ᠋ᠢ ᠡᠷᠬᠡ ᠦᠭᠡᠢ ᠪᠦᠲᠦᠭᠡᠭᠡᠳ
ᠡᠪᠳᠡᠷᠡᠰᠢ ᠦᠭᠡᠢ ᠲᠦᠮᠡᠨ ᠣᠨ ᠮᠠᠨᠳᠤᠲᠤᠭᠠᠢ!
ᠭᠡᠮᠡᠨ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠨ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠵᠤ᠂ ᠡᠳᠦᠭᠡ ᠳᠠᠭᠠᠭᠰᠠᠨ ᠶᠢᠰᠦᠨ ᠠᠢᠮᠠᠭ ᠤᠯᠤᠰ ᠢ᠋ ᠮᠥᠨ ᠴᠥᠮ ᠱᠠᠩᠨᠠᠪᠠ᠂ ᠶᠢᠰᠦᠨ ᠠᠢᠮᠠᠭ ᠤᠯᠤᠰ ᠬᠡᠮᠡᠭᠴᠢ : ᠲᠡᠷᠢᠭᠦᠨ ᠳ᠋ᠦ᠍ᠷ ᠨᠠᠶᠠᠬᠠᠨ ᠠᠢᠮᠠᠭ᠂ ᠬᠣᠶᠠᠷ ᠲᠤ᠌ ᠦᠯᠡᠳᠡᠭᠰᠡᠨ ᠭᠡᠷᠡᠢ᠍ᠢᠳ ᠠᠢᠮᠠᠭ ᠤ᠋ᠨ ᠠᠯᠢᠶᠠ ᠭᠤᠷᠪᠠᠨ ᠳ᠋ᠤᠷ ᠪᠠᠶᠠᠴᠠᠷ ᠠᠢᠮᠠᠭ ᠤ᠋ᠨ ᠪᠣᠳᠣᠩ᠂ ᠳᠥᠷᠪᠡᠨ ᠳ᠋ᠦ᠍ᠷ ᠲᠥᠯᠥᠪᠡᠨ ᠠᠢᠮᠠᠭ ᠤ᠋ᠨ ᠭᠠᠯᠵᠠᠭᠤ ᠪᠤᠬᠠ᠂ ᠲᠠᠪᠤᠨ ᠳ᠋ᠤᠷ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠮᠡᠨᠡᠭ᠂ ᠵᠢᠷᠭᠤᠭᠠ ᠳ᠋ᠤᠷ ᠬᠠᠳᠠᠴᠠᠨ ᠠᠢᠮᠠᠭ ᠤ᠋ᠨ ᠵᠣᠯᠢ᠂ ᠳᠣᠯᠣᠭᠠᠨ ᠳ᠋ᠤᠷ ᠱᠠᠯᠵᠢᠭᠤᠳ ᠠᠢᠮᠠᠭ ᠤ᠋ᠨ ᠮᠠᠨᠢᠷ᠂ ᠨᠠᠢ᠍ᠮᠠᠨ ᠳ᠋ᠤᠷ ᠸᠠᠩᠭᠦᠪ ᠠᠢᠮᠠᠭ ᠤ᠋ᠨ ᠳᠠᠴᠢᠩᠬᠤᠷᠯᠤ᠂ ᠶᠢᠰᠦ ᠳ᠋ᠦ᠍ᠷ ᠪᠦᠲᠦᠨᠡ ᠶ᠋ᠢᠨ ᠢᠯᠠᠭᠤᠭᠰᠠᠨ ᠡᠨᠡ ᠶᠢᠰᠦᠨ ᠠᠢᠮᠠᠭ ᠪᠤᠶᠤ᠃ ᠮᠠᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ᠂ ᠸᠠᠢᠯᠠ ᠠᠢᠮᠠᠭ ᠤ᠋ᠨ ᠡᠵᠡᠨ ᠬᠤᠪᠢᠲᠤ ᠬᠤᠸᠠ ᠡᠨᠡ ᠬᠣᠶᠠᠷ ᠤᠷᠭᠤᠨ ᠭᠠᠷᠴᠤᠬᠤᠢ᠃ ᠡᠭᠦᠨ ᠦ᠌ ᠳᠣᠲᠣᠭᠠᠳᠤ ᠢᠯᠳᠡᠰᠢ ᠮᠥᠷᠡᠨ ᠢᠨᠦ ᠲᠤᠰ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠬᠣᠯᠠ ᠪᠣᠢ᠂ ᠲᠡᠢᠨ ᠬᠦ᠌ ᠡᠨᠡ ᠲᠤᠬᠠᠢ ᠬᠣᠢᠲᠤ ᠭᠠᠵᠠᠷ ᠨᠢᠭᠡᠨ ᠪᠧᠲ᠋ᠠ᠋ ᠤᠯᠤᠰ ᠪᠣᠯᠪᠠ᠂ ᠡᠨᠡ ᠪᠠᠷᠠᠭᠤᠨ ᠯᠢᠶᠣᠤ ᠶ᠋ᠢᠨ ᠨᠠᠢ᠍ᠮᠠᠨ ᠢ᠋ ᠮᠥᠬᠥᠭᠡᠭᠰᠡᠨ ᠢᠨᠦ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠤ᠋ ᠺᠠᠢ ᠰᠢ ᠬᠡᠮᠡᠬᠦ ᠬᠣᠶᠠᠳᠤᠭᠠᠷ ᠣᠨ ᠪᠥᠯᠥᠭᠡ᠃
ᠲᠡᠨᠳᠡᠴᠡ ᠲᠠᠢᠽᠦ ᠶᠡᠬᠡ ᠱᠠᠩ ᠱᠠᠩᠨᠠᠨ ᠣᠯᠠᠨ ᠲᠦᠰᠢᠮᠡᠳ ᠵᠠᠩᠵᠤᠨ ᠨᠠᠷ ᠤ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠢᠯᠭᠠᠨ ᠰᠠᠯᠭᠠᠨ ᠡᠷᠭᠦᠵᠦ ᠬᠥᠬᠢᠭᠦᠯᠬᠦᠶᠡ᠂ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠤᠭ ᠱᠠᠩᠨᠠᠭᠰᠠᠨ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠶ᠋ᠢ ᠵᠦᠢᠯ ᠳᠠᠷᠠᠭᠠᠯᠠᠨ ᠡᠷᠭᠦᠵᠦ ᠮᠡᠳᠡᠭᠦᠯᠦᠷᠦᠨ : 《ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠡᠪᠳᠡᠭᠰᠡᠨ ᠡᠨᠡ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠶ᠋ᠢ ᠡᠵᠡᠨ ᠡᠷᠬᠡᠪᠰᠢ ᠬᠤᠷᠢᠶᠠᠵᠤ᠂ ᠡᠭᠦᠨ ᠢ᠋ᠶ᠋ᠡᠷ ᠶᠡᠬᠡ ᠰᠠᠩ ᠬᠥᠮᠥᠷᠭᠡ ᠶ᠋ᠢᠨ ᠡᠬᠡ ᠪᠡᠯᠡᠭ ᠵᠣᠬᠢᠷᠠᠭᠰᠠᠨ ᠡᠳ᠋ ᠪᠣᠯᠭᠠᠪᠠᠰᠤ ᠵᠣᠬᠢᠮᠤᠢ᠃ ᠡᠵᠡᠨ ᠦᠨᠡᠬᠡᠷ ᠡᠭᠡᠭᠦᠯᠦᠨ ᠡᠰᠡ ᠠᠪᠤᠪᠠᠰᠤ ᠥᠪᠡᠷᠡ ᠵᠣᠯᠢᠵᠤ ᠭᠠᠷᠭᠠᠭᠠᠳ ᠡᠩ ᠪᠦᠷᠢ ᠶ᠋ᠢᠨ ᠲᠦᠰᠢᠮᠡᠳ ᠲᠣᠷ ᠡᠩᠭᠡᠷ ᠨᠡᠢᠲᠡ ᠲᠦᠭᠡᠭᠡᠨ ᠱᠠᠩᠨᠠᠮᠤ ! 》ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠵᠥᠪᠰᠢᠶᠡᠵᠦ ᠣᠶᠤᠲᠤ ᠰᠡᠴᠡᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠬᠣᠶᠠᠭᠤᠯᠠ ᠪᠠᠷ ᠥᠪᠡᠷᠡ ᠵᠣᠯᠢᠭᠤᠯᠵᠤ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠷᠢᠭᠦᠨ ᠭᠠᠪᠢᠶᠠ ᠬᠡᠨ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ :《ᠲᠡᠷᠢᠭᠦᠨ ᠭᠠᠪᠢᠶᠠ ᠪᠤᠭᠤᠷᠵᠢ ᠪᠤᠭᠤᠷᠤᠯ ᠬᠣᠶᠠᠭᠤᠯᠠ – ᠨᠠᠢ᠍ᠮᠠᠨ ᠤ᠋ ᠡᠵᠡᠨ ᠢ᠋ ᠪᠠᠷᠢᠪᠠ᠂ ᠬᠣᠶᠠᠳᠤᠭᠠᠷ ᠭᠠᠪᠢᠶᠠ ᠵᠠᠯᠮᠠ ᠡᠵᠡᠨ ᠦ᠌ ᠥᠰᠲᠦ ᠪᠣᠭᠣᠯ ᠢ᠋ ᠪᠠᠷᠢᠪᠠ᠂ ᠭᠤᠷᠪᠠᠳᠤᠭᠠᠷ ᠭᠠᠪᠢᠶᠠ ᠲᠠᠴᠢᠩᠬᠤᠷᠯᠤ ᠨᠠᠢ᠍ᠮᠠᠨ ᠤ᠋ ᠤᠯᠤᠰ ᠢ᠋ ᠣᠯᠪᠠ᠂ ᠳᠥᠷᠪᠠᠳᠤᠭᠠᠷ ᠭᠠᠪᠢᠶᠠ ᠵᠡᠪᠡ᠂ ᠫᠣᠯᠭᠣᠳᠠᠢ ᠨᠠᠢ᠍ᠮᠠᠨ ᠤ᠋ ᠬᠣᠰᠢᠭᠤᠴᠢ ᠶ᠋ᠢ ᠪᠠᠷᠢᠪᠠ᠂ ᠲᠠᠪᠤᠳᠤᠭᠠᠷ ᠭᠠᠪᠢᠶᠠ ᠠᠯᠤᠬᠠ ᠰᠦᠬᠡ ᠨᠠᠢ᠍ᠮᠠᠨ ᠤ᠋ ᠵᠠᠩᠵᠤᠨ ᠢ᠋ ᠠᠮᠢᠳᠤ ᠪᠠᠷᠢᠪᠠ᠂ ᠵᠢᠷᠭᠤᠳᠤᠭᠠᠷ ᠭᠠᠪᠢᠶᠠ ᠪᠡᠯᠭᠦᠳᠡᠢ ᠨᠠᠢ᠍ᠮᠠᠨ ᠤ᠋ ᠮᠥᠷᠥ ᠶ᠋ᠢᠨ ᠵᠠᠩᠵᠤᠨ ᠢ᠋ ᠪᠠᠷᠢᠪᠠ᠂ ᠳᠣᠯᠣᠳᠤᠭᠠᠷ ᠭᠠᠪᠢᠶᠠ ᠬᠤᠷᠴᠠ ᠪᠠᠢᠷᠢ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠣᠯᠪᠠ᠂ ᠨᠠᠢ᠍ᠮᠠᠳᠤᠭᠠᠷ ᠭᠠᠪᠢᠶᠠ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠨᠠᠷ ᠬᠣᠶᠠᠷ ᠪᠠᠭᠠ ᠤᠯᠤᠰ ᠤ᠋ᠨ ᠡᠵᠡᠳ ᠢ᠋ ᠪᠠᠷᠢᠪᠠ᠂ ᠶᠢᠰᠦᠳᠦᠭᠡᠷ ᠭᠠᠪᠢᠶᠠ ᠴᠢᠯᠠᠭᠤᠨ᠂ ᠲᠡᠮᠦᠷ ᠨᠠᠢ᠍ᠮᠠᠨ ᠤ᠋ ᠨᠥᠬᠥᠷ ᠢ᠋ ᠪᠠᠷᠢᠪᠠ ! 》 ᠭᠡᠮᠡᠨ ᠶᠢᠰᠦᠨ ᠶᠡᠬᠡ ᠭᠠᠪᠢᠶᠠ ᠶ᠋ᠢ ᠲᠣᠭᠠᠴᠢᠨ ᠪᠦᠷᠢᠳᠬᠡᠵᠦ᠂ ᠳᠠᠭᠠᠯᠳᠤᠭᠠ ᠭᠤᠴᠢᠨ ᠵᠢᠷᠭᠤᠭᠠᠨ ᠵᠠᠩᠵᠤᠨ ᠨᠠᠷ ᠬᠢᠭᠡᠳ ᠪᠠᠭᠠ ᠵᠠᠩᠵᠤᠨ ᠨᠤᠭᠤᠳ ᠠᠷᠪᠠᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠲᠦ᠍ᠷ ᠬᠦᠷᠲᠡᠯᠡ ᠶᠡᠬᠡ ᠱᠠᠩ ᠲᠠᠯᠪᠢᠵᠤ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠢᠯᠭᠠᠨ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠬᠦᠦ ᠰᠠᠩ ᠢ᠋ ᠨᠡᠭᠡᠭᠡᠵᠦ ᠣᠯᠠᠨ ᠴᠡᠷᠢᠭ ᠲᠦ᠍ᠷ ᠬᠦᠨᠳᠦᠳᠡ ᠱᠠᠩᠨᠠᠪᠠ᠃
ᠲᠡᠳᠦᠢ ᠡᠨᠡ ᠨᠤᠲᠤᠭ ᠤᠭ ᠠ᠋ᠴᠠ ᠪᠠᠷᠠᠭᠤᠨ ᠯᠢᠶᠣᠤ ᠶ᠋ᠢᠨ ᠶᠡᠬᠡ ᠨᠤᠲᠤᠭ ᠲᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠪᠦᠯᠵᠢᠶᠡᠨ ᠦ᠌ ᠨᠤᠲᠤᠭ ᠪᠣᠯᠭᠠᠨ᠂ ᠲᠠᠢᠽᠦ ᠶᠡᠬᠡ ᠬᠥᠪᠡᠭᠦᠨ ᠵᠣᠴᠢ ᠪᠠᠷ ᠰᠠᠬᠢᠭᠤᠯᠪᠠᠢ᠃ ᠲᠡᠢᠨ ᠬᠦ᠌ ᠨᠠᠢ᠍ᠮᠠᠨ ᠤ᠋ ᠭᠡᠷ ᠡᠷᠦᠬᠡ ᠶ᠋ᠢ ᠡᠨᠳᠡ ᠦᠯᠡᠳᠡᠭᠡᠰᠦᠭᠡᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠥᠪᠯᠡᠯ ᠦ᠋ᠨ ᠰᠠᠢᠳ ᠮᠡᠳᠡᠭᠦᠯᠦᠷᠦᠨ : 《ᠲᠠᠢᠶᠠᠩ ᠬᠠᠭᠠᠨ ᠤ᠋ ᠶᠡᠬᠡ ᠬᠥᠪᠡᠭᠦᠨ ᠠᠯᠳᠠᠱᠠᠭᠠ ᠶ᠋ᠢ ᠬᠤᠷᠢᠶᠠᠭᠠᠳᠤᠢ ᠲᠤᠯᠠ ᠡᠨᠳᠡ ᠦᠯᠡᠳᠡᠭᠡᠵᠦ ᠦᠯᠦ ᠪᠣᠯᠤᠮᠤᠢ᠂ ᠬᠡᠵᠢᠶᠡ ᠠᠯᠲᠠᠨᠱᠠᠭᠠ ᠶ᠋ᠢ ᠳᠠᠭᠠᠭᠤᠯᠵᠤ ᠪᠠᠲᠤ ᠪᠡᠬᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠡᠭᠡᠭᠦᠯᠦᠨ ᠢᠯᠡᠭᠡᠬᠦᠢ ᠳ᠋ᠦ᠍ᠷ ᠦᠯᠦ ᠪᠣᠯᠬᠤ ᠵᠦᠢᠯ ᠦᠭᠡᠢ ᠭᠡᠮᠡᠨ ᠮᠡᠳᠡᠭᠦᠯᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠠᠷᠭᠠ ᠦᠭᠡᠢ ᠨᠠᠢ᠍ᠮᠠᠨ ᠤ᠋ ᠭᠡᠷ ᠡᠷᠦᠬᠡ ᠶ᠋ᠢ ᠨᠡᠭᠦᠯᠭᠡᠨ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠠᠪᠠᠴᠢᠵᠤ ᠰᠠᠭᠤᠯᠭᠠᠬᠤ ᠪᠠᠷ ᠲᠣᠭᠲᠠᠭᠠᠵᠤ᠂ ᠶᠡᠬᠡ ᠦᠬᠡᠷ ᠫᠤᠤ ᠲᠠᠯᠪᠢᠨ ᠨᠤᠲᠤᠭ ᠲᠤᠷ ᠡᠭᠡᠬᠦᠢ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠠᠷᠠᠳ ᠢᠷᠭᠡᠨ ᠨᠢᠳᠦᠨ ᠨᠢᠯᠪᠤᠰᠤᠨ ᠤᠨᠠᠭᠠᠨ ᠮᠥᠷᠭᠥᠵᠦ ᠦᠳᠡᠪᠡ᠃
ᠲᠡᠨᠳᠡᠴᠡ ᠠᠯᠲᠠᠨᠱᠠᠭᠠ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠳ᠋ᠤᠷ ᠡᠪᠡᠳᠴᠢᠨ ᠪᠠᠬᠠᠨ ᠢᠯᠠᠷᠢ ᠪᠣᠯᠵᠤ᠂ ᠢᠳᠡᠷ ᠳᠣᠪᠣ ᠶ᠋ᠢ ᠤᠷᠢᠳᠠ ᠮᠥᠩᠭᠥᠯᠵᠢ ᠳ᠋ᠠᠳᠠᠳᠤᠩᠭᠠ ᠨᠠᠷ ᠲᠤᠷ ᠢᠯᠡᠭᠡᠭᠡᠳ ᠳᠠᠭᠠᠯᠳᠤᠭᠠ ᠬᠥᠯᠥᠰᠥ ᠭᠠᠷᠴᠤ ᠪᠡᠶᠡ ᠪᠡᠨ ᠲᠡᠩᠬᠡᠭᠡ ᠣᠷᠣᠮᠠᠭᠴᠠ ᠬᠠᠲᠠᠭᠤᠵᠢᠨ ᠪᠣᠰᠴᠤ ᠲᠠᠪᠢ ᠵᠢᠷᠠᠨ ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠵᠤ ᠤᠯᠤᠰ ᠤ᠋ᠨ ᠵᠦᠭ ᠶᠠᠪᠤᠬᠤᠶᠠ᠂ ᠨᠠᠢ᠍ᠮᠠᠨ ᠤ᠋ ᠢᠷᠭᠡᠨ ᠶᠡᠬᠡᠯᠡ ᠲᠦᠷᠬᠢᠷᠡᠨ ᠬᠡᠯᠡᠯᠴᠡᠬᠦ ᠢᠨᠦ ᠮᠠᠰᠢ ᠰᠣᠨᠢᠨ ᠳ᠋ᠤᠷ ᠠᠯᠲᠠᠨᠱᠠᠭᠠ ᠶᠡᠬᠡᠯᠡ ᠠᠮᠤᠷ ᠦᠭᠡᠢ ᠪᠣᠯᠵᠤ ᠬᠠᠭᠠᠰ ᠡᠳᠦᠷ ᠶᠠᠪᠤᠭᠰᠠᠨ ᠦᠭᠡᠢ᠂ ᠭᠡᠨᠡᠳᠲᠡ ᠠᠭᠤᠯᠠᠨ ᠤ᠋ ᠵᠡᠪᠡ ᠡᠴᠡ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠭᠠᠷᠪᠠ᠃
ᠡᠭᠦᠨ ᠢ᠋ ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ ᠴᠡᠷᠢᠭ ᠪᠠ ᠠᠯᠲᠠᠨᠱᠠᠭᠠ ᠶ᠋ᠢᠨ ᠠᠮᠢ ᠭᠠᠷᠬᠤ ᠪᠠ ᠦᠭᠡᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠦᠵᠡᠬᠦ ᠮᠡᠷᠭᠡᠳ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠮᠢᠨᠦ ᠡᠬᠡ ᠲᠡᠢ ᠵᠢᠶᠦ᠋ᠨ ᠦ᠌ ᠪᠤᠳᠠᠭᠠ ᠶ᠋ᠢ ᠡᠷᠭᠦᠵᠦ ᠢᠷᠡᠭᠡᠳ ᠵᠤᠯᠠ ᠰᠢᠲᠠᠭᠠᠨ ᠳᠣᠣᠷᠠᠲᠤ ᠳᠡᠪᠲᠡᠷ ᠲᠣᠷ ᠵᠠᠯᠭᠠᠨ ᠪᠢᠴᠢᠭᠰᠡᠨ ᠳ᠋ᠦ᠍ᠷ ᠦᠵᠡᠭᠳᠡᠬᠦᠢ᠃
ᠰᠤᠳᠤᠷᠴᠢ ᠲᠦᠰᠢᠮᠡᠯ ᠦ᠋ᠨ ᠰᠤᠯᠠ ᠰᠢᠯᠦᠭ ᠢᠨᠦ :
ᠪᠠᠢᠯᠳᠤᠭᠠᠨ ᠳ᠋ᠤᠷ ᠠᠯᠠᠭᠳᠠᠭᠰᠠᠨ ᠳᠠᠢᠶᠠᠩ ᠬᠠᠭᠠᠨ ᠢ᠋ ᠪᠠᠭᠠᠲᠤᠷ ᠬᠡᠮᠡᠪᠡᠰᠦ ᠪᠣᠯᠤᠯᠲᠠᠢ
ᠪᠠᠲᠤ ᠪᠠᠷ ᠦᠬᠦᠭᠰᠡᠨ ᠮᠥᠩᠭᠥᠯᠵᠢ ᠲᠦᠰᠢᠮᠡᠯ ᠢ᠋ ᠵᠢᠷᠤᠮᠲᠤ ᠬᠡᠮᠡᠬᠦ ᠪᠤᠶᠤ᠂
ᠪᠠᠷᠢᠭ᠍ᠳᠠᠵᠤ ᠢᠷᠡᠭᠰᠡᠨ ᠳ᠋ᠠᠳᠠᠳᠤᠩᠭᠠ ᠶ᠋ᠢᠨ ᠳᠠᠭᠠᠭᠰᠠᠨ ᠢ᠋ ᠮᠡᠷᠭᠡᠨ ᠬᠡᠮᠡᠵᠦ ᠪᠣᠯᠤᠮᠤᠢ
ᠪᠠᠴᠢᠮᠳᠠᠵᠤ ᠰᠥᠷᠦᠭᠰᠡᠨ ᠴᠢᠦᠢ ᠴᠦ᠍ ᠯᠢᠦᠢ ᠠᠳᠠᠪᠠᠰᠢ ᠵᠢᠭᠰᠢᠭᠦᠷᠢᠲᠡᠢ ᠠᠵᠤᠭᠤ !