ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠨᠢᠭᠡ ᠂ ᠶᠢᠰᠦᠨ ᠮᠡᠩᠭᠡ ᠭᠣᠣᠯᠯᠠᠭᠰᠠᠨ ᠨᠢ Оройгүй сүм – Арван нэг ᠂ Есөн мэнгэ голлосон нь- Oroigui sum 11
780ᠠᠷᠪᠠᠨ ᠨᠢᠭᠡ ᠂ ᠶᠢᠰᠦᠨ ᠮᠡᠩᠭᠡ ᠭᠣᠣᠯᠯᠠᠭᠰᠠᠨ ᠨᠢ
ᠡᠭᠡᠨᠡᠭᠲᠡ ᠪᠠᠲᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠨᠠᠰᠤ ᠬᠡᠪᠡᠷᠡᠭ
ᠡᠭᠦᠷᠢᠳᠡ ᠬᠠᠨᠢᠯᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠠᠮᠠᠷᠠᠭ ᠬᠡᠪᠡᠷᠡᠭ
ᠡᠴᠦᠰ ᠲᠡᠭᠡᠨ ᠪᠠᠷᠠᠭᠳᠠᠬᠤ ᠶ᠋ᠢᠨ ᠲᠤᠯᠠᠳᠠ ᠡᠳ᠋ᠯᠡᠯ ᠬᠡᠪᠡᠷᠡᠭ
ᠮᠠᠴᠠᠭ ᠡᠳᠦᠷ ᠪᠠᠢᠯᠠ᠃ ᠰᠠᠷᠠ ᠪᠦᠷᠢ ᠶ᠋ᠢᠨ ᠨᠠᠢ᠍ᠮᠠᠨ᠂ ᠠᠷᠪᠠᠨ ᠲᠠᠪᠤᠨ ᠭᠤᠴᠢᠨ ᠳ᠋ᠤ᠌ ᠮᠠᠴᠠᠭ ᠡᠳᠦᠷ ᠪᠣᠯᠵᠤ ᠯᠠᠮᠠ ᠨᠠᠷ ᠮᠠᠴᠠᠭ ᠪᠠᠷᠢᠨᠠ᠃ ᠡᠨᠡ ᠨᠢ ᠯᠠᠮᠠ ᠬᠥᠮᠦᠨ ᠦ᠌ ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠵᠢᠷᠤᠮ ᠪᠤᠶᠤ ᠪᠠᠷᠠᠮᠢᠳ ᠤ᠋ᠨ ᠳᠥᠷᠪᠡᠳᠦᠭᠡᠷ ᠳᠦᠷᠢᠮ ᠶᠣᠰᠣᠭᠠᠷ ᠰᠠᠬᠢᠬᠤ ᠤᠴᠢᠷ ᠲᠠᠢ ᠵᠦᠢᠯ᠃ ᠵᠢᠷᠭᠤᠭᠠᠨ ᠭᠣᠣᠯ ᠪᠠᠷᠠᠮᠢᠳ ᠪᠠᠢᠳᠠᠭ ᠤ᠋ᠨ ᠡᠬᠢᠨ ᠦ᠌ ᠬᠢ ᠨᠢ ᠥᠭᠯᠢᠭᠡ ᠪᠠᠷᠠᠮᠢᠳ᠂ ᠳᠠᠷᠠᠭᠠᠬᠢ ᠨᠢ ᠬᠦᠯᠢᠴᠡᠩᠭᠦᠢ ᠪᠠᠷᠠᠮᠢᠳ᠂ ᠭᠤᠷᠪᠠᠳᠠᠬᠢ ᠨᠢ ᠬᠢᠴᠢᠶᠡᠩᠭᠦᠢ ᠪᠠᠷᠠᠮᠢᠳ ᠶᠤᠮ᠃ ᠥᠭᠯᠢᠭᠡᠴᠢ᠂ ᠬᠦᠯᠢᠴᠡᠩᠭᠦᠢ᠂ ᠬᠢᠴᠢᠶᠡᠩᠭᠦᠢ ᠪᠠᠢᠬᠤ ᠶ᠋ᠢᠨ ᠰᠤᠷᠭᠠᠯ ᠮᠥᠨ᠃ ᠮᠠᠴᠠᠭ ᠪᠠᠷᠢᠬᠤ ᠨᠢ ᠳᠥᠷᠪᠡᠳᠦᠭᠡᠷ ᠪᠠᠷᠠᠮᠢᠳ ᠪᠤᠶᠤ ᠱᠠᠭᠱᠠᠪᠠᠳ ᠤ᠋ᠨ ᠶᠣᠰᠣ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠪᠴᠢᠯᠭᠡ ᠶ᠋ᠢᠨ ᠤᠬᠠᠭᠠᠨ ᠶᠤᠮ᠃ ᠯᠠᠮᠠ ᠬᠥᠮᠦᠨ ᠶᠠᠭᠤᠨ ᠤ᠋ ᠤᠷᠢᠳ ᠮᠢᠬᠠ ᠴᠢᠰᠤᠨ ᠳ᠋ᠤ᠌ ᠰᠢᠨᠤᠬᠠᠢ ᠪᠠᠢᠵᠤ ᠪᠣᠯᠳᠠᠭ ᠦᠭᠡᠢ᠃ ᠡᠢᠮᠦ ᠳ᠋ᠦ᠍ ᠮᠠᠴᠠᠭ ᠪᠠᠷᠢᠵᠤ ᠮᠢᠬᠠ ᠢᠳᠡᠬᠦ ᠶ᠋ᠢ ᠴᠡᠭᠡᠷᠯᠡᠳᠡᠭ ᠱᠠᠭᠱᠠᠪᠠᠳ ᠪᠣᠢ ᠪᠣᠯᠵᠠᠢ᠃ ᠱᠠᠭᠱᠠᠪᠠᠳ ᠰᠠᠬᠢᠵᠤ ᠴᠢᠳᠠᠳᠠᠭ ᠯᠠᠮᠠ ᠴᠢᠨᠠᠭᠰᠢᠯᠠᠭᠠᠳ ᠲᠡᠢᠨ ᠬᠢᠵᠦ ᠳᠢᠶᠠᠨᠴᠢᠯᠠᠵᠤ ᠴᠢᠳᠠᠨᠠ᠃ ᠳᠢᠶᠠᠨᠴᠢᠯᠠᠬᠤ ᠨᠢ ᠬᠥᠮᠦᠨ ᠡᠴᠡ ᠬᠣᠯᠠᠳᠠᠵᠤ ᠭᠠᠭᠴᠠᠭᠠᠷ ᠰᠠᠭᠤᠨ ᠪᠢᠰᠢᠯᠭᠠᠯ ᠦᠢᠯᠡᠳᠬᠦ ᠶ᠋ᠢᠨ ᠨᠡᠷᠡ ᠶᠦᠮ᠃ ᠮᠥᠨ ᠲᠡᠷᠡᠴᠢᠯᠡᠨ ᠪᠡᠯᠭᠡ ᠪᠠᠷᠠᠮᠢᠳ ᠪᠤᠶᠤ ᠤᠬᠠᠭᠠᠨ ᠢ᠋ᠶ᠋ᠠᠷ ᠪᠢᠰᠢᠯᠭᠠᠬᠤ ᠶᠣᠰᠣᠨ ᠤ᠋ ᠨᠣᠮ ᠢ᠋ ᠯᠠᠮᠠ ᠬᠥᠮᠦᠨ ᠡᠵᠡᠮᠰᠢᠬᠦ ᠤᠴᠢᠷ ᠲᠠᠢ᠃ ᠡᠢᠮᠦ ᠵᠢᠷᠭᠤᠭᠠᠨ ᠪᠠᠷᠠᠮᠢᠳ ᠤ᠋ᠨ ᠳᠥᠷᠪᠡᠳᠦᠭᠡᠷ ᠢ᠋ ᠰᠠᠬᠢᠬᠤ ᠡᠳᠦᠷ ᠢ᠋ ᠮᠠᠴᠠᠭ ᠪᠠᠷᠢᠬᠤ ᠶᠣᠰᠣ ᠭᠡᠵᠦ ᠯᠠᠮᠠ ᠨᠠᠷ ᠢ᠋ᠶ᠋ᠠᠷ ᠶᠡᠬᠡ ᠯᠡ ᠨᠠᠷᠢᠨ ᠰᠠᠬᠢᠭᠤᠯᠳᠠᠭ ᠪᠣᠯᠠᠢ᠃ ᠰᠠᠩᠵᠢ ᠭᠡᠰᠦᠯ ᠵᠢᠩᠳᠠᠭᠠᠨ ᠤ᠋ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠬᠠᠪᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠡᠳᠦᠷ ᠦ᠋ᠨ ᠮᠠᠴᠠᠭ ᠪᠠᠷᠢᠬᠤ ᠪᠠᠷ ᠮᠠᠨᠢ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠥᠷᠯᠥᠭᠡ ᠣᠷᠣᠵᠠᠭᠠᠯᠠ᠃ ᠪᠠᠭᠰᠢ ᠯᠠᠮᠠ ᠨᠢ ᠲᠡᠳᠡᠨ ᠳ᠋ᠦ᠍ 《ᠮᠠᠨᠢ ᠶ᠋ᠢᠨ ᠴᠤᠢᠭᠤ᠋ 》 ᠭᠡᠳᠡᠭ ᠰᠤᠳᠤᠷ ᠢ᠋ ᠤᠩᠰᠢᠭᠤᠯᠤᠯᠠ᠃ ᠲᠡᠷᠡ ᠰᠤᠳᠤᠷ ᠲᠤ᠌ ᠮᠠᠴᠠᠭ ᠪᠠᠷᠢᠬᠤ ᠪᠤᠶᠤ ᠨᠤᠮᠨᠡᠢ ᠰᠠᠬᠢᠬᠤ ᠵᠢᠷᠤᠮ ᠢ᠋ ᠨᠠᠷᠢᠪᠴᠢᠯᠠᠨ ᠵᠢᠭᠠᠵᠠᠢ᠃ ᠨᠤᠮᠨᠡᠢ ᠰᠠᠬᠢᠬᠤ ᠨᠢ ᠠᠮᠠᠷ ᠦᠭᠡᠢ ᠲᠣᠮᠣ ᠰᠢᠯᠭᠠᠯᠲᠠ ᠭᠡᠳᠡᠭ ᠢ᠋ ᠲᠡᠳᠡᠨ ᠳ᠋ᠦ᠍ ᠣᠢᠯᠠᠭᠠᠭᠤᠯᠵᠤ ᠦᠭᠬᠦᠯᠡ᠃
ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠨᠣᠢᠷ ᠦᠭᠡᠢ᠂ ᠳᠠᠭᠤ ᠱᠤᠭᠤ ᠦᠭᠡᠢ ᠪᠡᠷ ᠮᠠᠨᠢ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠥᠩᠭᠡᠷᠡᠭᠡᠨᠡ᠃ ᠮᠠᠷᠭᠠᠰᠢ ᠨᠢ ᠵᠥᠪᠬᠡᠨ ᠭᠠᠭᠴᠠ ᠤᠳᠠᠭᠠ ᠮᠢᠬᠠ ᠦᠭᠡᠢ ᠬᠣᠭᠣᠯᠠ ᠢᠳᠡᠨᠡ᠃ ᠲᠡᠷᠡ ᠨᠢ ᠵᠣᠷᠪᠠ ᠪᠤᠶᠤ ᠬᠠᠭᠠᠰ ᠮᠠᠴᠠᠭ ᠤ᠋ᠨ ᠡᠳᠦᠷ᠃ ᠲᠡᠭᠦᠨ ᠦ᠌ ᠮᠠᠷᠭᠠᠰᠢ ᠬᠣᠭᠣᠯᠠ ᠢᠳᠡᠬᠦ ᠴᠦ᠍ ᠦᠭᠡᠢ᠂ ᠳᠤᠤᠭᠠᠷᠬᠤ ᠴᠤ᠌ ᠦᠭᠡᠢ᠂ ᠰᠢᠯᠦᠰᠦ ᠪᠡᠨ ᠴᠦ᠍ ᠵᠠᠯᠭᠢᠬᠤ ᠦᠭᠡᠢ ᠥᠩᠭᠡᠷᠡᠬᠦ ᠶᠣᠰᠣᠲᠠᠢ᠃ ᠡᠨᠡ ᠨᠢ ᠵᠢᠩᠬᠢᠨᠢ ᠮᠠᠴᠠᠭ ᠤ᠋ᠨ ᠡᠳᠦᠷ᠃ ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠬᠣᠭᠣᠯᠠᠨ ᠳ᠋ᠤ᠌ ᠡᠷᠭᠢᠨ ᠣᠷᠣᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠮᠢᠬᠠ ᠢᠳᠡᠬᠦ ᠦᠭᠡᠢ᠃ ᠳᠥᠷᠪᠡᠳᠡᠬᠢ ᠡᠳᠦᠷ ᠨᠢ ᠳᠠᠬᠢᠨ ᠮᠠᠴᠠᠭ ᠪᠠᠷᠢᠨᠠ᠃ ᠢᠩᠭᠢᠵᠦ ᠡᠭᠡᠯᠵᠢᠯᠡᠨ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠭᠡᠷ ᠠᠷᠪᠠᠨ ᠵᠢᠷᠭᠤᠭᠠ ᠬᠣᠨᠣᠭ ᠮᠠᠴᠠᠭ ᠪᠠᠷᠢᠵᠤ ᠨᠤᠮᠨᠡᠢ ᠰᠠᠬᠢᠨᠠ᠃ ᠨᠠᠢ᠍ᠮᠠᠨ ᠨᠤᠮᠨᠡᠢ ᠲᠡᠢᠨ ᠬᠦ᠌ ᠥᠩᠭᠡᠷᠡᠪᠡᠯ ᠲᠡᠷᠡ ᠬᠦ᠌ ᠬᠤᠸᠠᠷᠠᠭ ᠤ᠋ᠨ ᠨᠢᠭᠦᠯ ᠴᠡᠪᠡᠷᠯᠡᠭᠳᠡᠨᠡ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠬᠣᠭᠣᠯᠠ ᠢᠳᠡᠭᠰᠡᠨ ᠦ᠌ ᠯᠡ ᠨᠢᠭᠦᠯ ᠦ᠋ᠨ ᠲᠤᠬᠠᠢ ᠳ᠋ᠤ᠌ ᠡᠨᠡ ᠬᠠᠮᠢᠶᠠᠷᠤᠨᠠ᠃ ᠡᠢᠮᠦ ᠳᠦᠷᠢᠮ ᠢ᠋ ᠰᠠᠩᠵᠢ ᠭᠡᠰᠦᠯ ᠠᠩᠬᠠ ᠤᠳᠠᠭᠠ ᠰᠣᠨᠣᠰᠴᠤ ᠪᠠᠢᠭᠠ ᠨᠢ ᠡᠨᠡ᠃ ᠤᠷᠢᠳᠤ ᠨᠢ ᠲᠡᠷᠡ ᠮᠠᠴᠠᠭ ᠪᠠᠷᠢᠬᠤ ᠳ᠋ᠤ᠌ ᠶᠣᠰᠣᠭᠠᠷ ᠨᠢ ᠨᠢᠭᠡ ᠶᠡᠬᠡ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ ᠦᠭᠡᠢ᠃ ᠭᠠᠭᠴᠠᠬᠦ ᠮᠢᠬᠠ ᠦᠭᠡᠢ ᠬᠣᠭᠣᠯᠠ᠂ ᠴᠠᠭᠠᠨ ᠬᠣᠭᠣᠯᠠ ᠢᠳᠡᠬᠦ ᠲᠡᠳᠦᠢ ᠪᠡᠷ ᠬᠢᠵᠠᠭᠠᠷᠯᠠᠭᠳᠠᠵᠤ ᠪᠠᠢᠵᠠᠢ᠃
ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠯᠢᠨᠰᠠᠷᠠᠢ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠭᠡᠭᠴᠢ ᠣᠳᠣ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠨᠣᠮ ᠤ᠋ᠨ ᠪᠠᠭᠰᠢ ᠪᠣᠯᠵᠠᠢ᠃ ᠯᠢᠨᠰᠠᠷᠠᠢ ᠭᠠᠪᠵᠤ ᠪᠣᠯ ᠨᠣᠮ ᠡᠷᠳᠡᠮ᠂ ᠶᠣᠰᠣ ᠵᠠᠢᠭ ᠰᠠᠢᠨ ᠮᠡᠳᠡᠳᠡᠭ᠂ ᠬᠠᠲᠠᠭᠤ ᠭᠠᠷ ᠲᠠᠢ᠂ ᠺᠠᠮᠪᠠ ᠬᠥᠮᠦᠨ ᠶᠦᠮ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠺᠠᠮ ᠨᠤᠲᠤᠭ ᠤ᠋ᠨ ᠭᠠᠷᠤᠯ ᠲᠠᠢ ᠲᠥᠪᠡᠳ ᠬᠥᠮᠦᠨ ᠠᠵᠠᠢ᠃
ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠱᠠᠪᠢ ᠨᠠᠷ ᠲᠤ᠌ ᠪᠠᠨ ᠶᠡᠬᠡ ᠬᠠᠲᠠᠭᠤ᠂ ᠪᠠᠰᠠ ᠴᠤ᠌ ᠰᠤᠷᠭᠠᠬᠤ ᠶᠣᠰᠣᠲᠠᠢ ᠭᠡᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠵᠠᠪᠠᠯ ᠰᠤᠷᠭᠠᠳᠠᠭ ᠬᠥᠮᠦᠨ ᠲᠤᠯᠠ ᠵᠢᠷᠭᠤᠭᠠᠨ ᠪᠠᠷᠠᠮᠢᠳ ᠢ᠋ ᠱᠠᠪᠢ ᠪᠣᠯᠭᠠᠨ ᠳ᠋ᠤ᠌ ᠡᠳᠦᠷ ᠲᠤᠲᠤᠮ ᠤ᠋ᠨ ᠬᠡᠪᠰᠢᠯ ᠪᠣᠯᠭᠠᠬᠤ ᠠ᠋ᠴᠠ ᠨᠠᠰᠢ ᠰᠠᠨᠠᠭᠠ ᠠᠮᠠᠷᠬᠤ ᠦᠭᠡᠢ ᠨᠢ ᠯᠠᠪᠲᠠᠢ᠃ ᠲᠡᠭᠡᠭᠡᠳ ᠯᠡ ᠡᠨᠡ ᠤᠳᠠᠭᠠ ᠱᠠᠭᠱᠠᠪᠠᠳ ᠰᠠᠬᠢᠭᠤᠯᠤᠨ ᠮᠠᠴᠠᠭ ᠪᠠᠷᠢᠭᠤᠯᠬᠤ ᠠᠵᠢᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠭᠠᠷᠳᠠᠨ ᠬᠢᠵᠦ ᠪᠠᠢᠯᠠ᠃ ᠯᠢᠨᠰᠠᠷᠠᠢ ᠭᠠᠪᠵᠤ ᠭᠡᠳᠡᠭ ᠪᠣᠯ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠬᠠᠮᠪᠤ ᠠ᠋ᠴᠠ ᠤᠤᠯ ᠳ᠋ᠠᠴᠠᠩ ᠳ᠋ᠤ᠌ ᠠᠷᠪᠠᠨ ᠵᠢᠯ ᠨᠣᠮ ᠦᠵᠡᠵᠦ ᠪᠠᠢᠵᠤ ᠠᠪᠤᠭᠰᠠᠨ ᠭᠠᠪᠵᠤ ᠶ᠋ᠢᠨ ᠴᠣᠯᠠ ᠲᠠᠢ ᠬᠥᠮᠦᠨ ᠢ᠋ ᠬᠡᠯᠡᠨᠡ᠃ ᠯᠢᠨᠰᠠᠷᠠᠢ ᠭᠠᠪᠵᠤ ᠥᠪᠡᠷ ᠢ᠋ᠶ᠋ᠡᠨ ᠪᠦᠬᠦᠢ ᠯᠡ ᠪᠠᠷᠠᠮᠢᠳ ᠢ᠋ ᠰᠠᠬᠢᠨ ᠥᠩᠭᠡᠷᠡᠭᠰᠡᠨ ᠬᠥᠮᠦᠨ ᠲᠤᠯᠠ ᠱᠠᠪᠢ ᠨᠠᠷ ᠲᠤ᠌ ᠪᠠᠨ ᠮᠥᠨ ᠯᠡ ᠲᠡᠷᠡ ᠵᠠᠮ ᠢ᠋ ᠰᠣᠩᠭᠣᠵᠠᠢ᠃
ᠮᠠᠴᠠᠭ ᠪᠠᠷᠢᠬᠤ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠡᠬᠢᠨ ᠦ᠌ ᠰᠥᠨᠢ ᠴᠥᠮ ᠯᠡ ᠰᠠᠭᠤᠭᠠ ᠪᠠᠷ ᠢ᠋ᠶ᠋ᠠᠨ ᠨᠣᠢᠷ ᠦᠭᠡᠢ᠂ ᠳᠠᠭᠤ ᠱᠤᠤ ᠦᠭᠡᠢ ᠬᠣᠨᠣᠵᠠᠢ᠃ ᠲᠡᠷᠡ ᠨᠢ ᠠᠰᠤᠷᠤ ᠶᠡᠬᠡ ᠲᠡᠪᠴᠢᠶᠡᠷᠢ ᠱᠠᠭᠠᠷᠳᠠᠭᠰᠠᠨ ᠪᠣᠯᠪᠠᠴᠤ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠵᠢᠩᠳᠠᠭᠠᠨ ᠦ᠌ ᠬᠢᠨ ᠲᠡᠢᠮᠦ ᠰᠢᠯᠭᠠᠯᠲᠠ ᠶ᠋ᠢ ᠲᠠᠨᠤᠭ ᠲᠠᠢ ᠳᠠᠪᠠᠵᠠᠢ᠃
᠁ ᠨᠤᠮᠨᠡᠢ ᠰᠠᠬᠢᠬᠤ ᠵᠠᠩ ᠦᠢᠯᠡ ᠶ᠋ᠢᠨ ᠨᠠᠢ᠍ᠮᠠᠨ ᠮᠥᠴᠡᠯᠭᠡ ᠥᠩᠭᠡᠷᠡᠵᠦ ᠰᠡᠭᠦᠯᠴᠢ ᠶ᠋ᠢᠨ ᠡᠳᠦᠷ ᠪᠣᠯᠵᠤ ᠪᠠᠢᠯᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠠᠷᠪᠠᠨ ᠵᠢᠷᠭᠤᠭᠠᠳᠡᠬᠢ ᠡᠳᠦᠷ᠃ ᠡᠨᠡ ᠡᠳᠦᠷ ᠦ᠋ᠳ ᠲᠦ᠍ ᠰᠠᠩᠵᠢ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠬᠠᠴᠢ ᠭᠦᠷᠭᠦᠮ᠂ ᠱᠠᠨᠴᠠᠢ ᠬᠣᠯᠢᠭᠰᠠᠨ ᠤᠰᠤᠨ ᠵᠤᠲᠠᠩ ᠢᠳᠡᠵᠦ ᠪᠠᠢᠯᠠ᠃ ᠬᠣᠶᠠᠷ ᠨᠤᠮᠨᠡᠢ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠪᠡᠶᠡ ᠨᠢᠭᠡ ᠯᠡ ᠡᠪ ᠦᠭᠡᠢᠷᠬᠡᠨ ᠰᠤᠯᠢᠳᠠᠭᠰᠠᠭᠠᠷ᠂ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠶᠡᠬᠡᠬᠡᠨ ᠵᠠᠪᠠᠭᠤᠷᠢ ᠲᠠᠢ ᠪᠣᠯᠤᠭᠰᠠᠨ ᠠᠵᠢ᠃ ᠳᠣᠯᠣᠳᠡᠬᠢ ᠨᠤᠮᠨᠡᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠠᠷᠠ ᠬᠥᠯᠥᠰᠥ ᠨᠢ ᠴᠢᠬᠠᠷᠠᠵᠤ ᠮᠠᠭᠤᠵᠢᠷᠠᠵᠤ ᠤᠨᠠᠮᠠᠷ ᠪᠣᠯᠵᠤ ᠪᠠᠢᠪᠠ᠃ ᠡᠯᠢᠭᠡᠨ ᠳᠡᠭᠡᠷᠡ ᠨᠢ ᠮᠤᠰᠬᠢᠷᠠᠨ ᠡᠪᠡᠳᠴᠦ᠂ ᠪᠡᠶᠡ ᠨᠢ ᠰᠤᠯᠠᠷᠠᠵᠤ᠂ ᠳᠡᠰᠴᠦ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠤ᠌ ᠭᠡᠰᠡᠨ ᠰᠠᠩᠵᠢ ᠭᠡᠰᠦᠯ ᠲᠡᠰᠦᠭᠰᠡᠭᠡᠷ ᠯᠡ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠨᠠᠢᠮᠠᠳᠠᠬᠢ ᠨᠤᠮᠨᠡᠢ ᠲᠡᠭᠦᠰᠬᠡᠯ ᠲᠡᠰᠢ ᠤᠢᠷᠠᠲᠤᠬᠤ ᠦᠶᠡ ᠳ᠋ᠦ᠍ ᠨᠢᠳᠦᠨ ᠳ᠋ᠦ᠍ ᠨᠢ ᠬᠠᠷᠠ ᠨᠣᠭᠣᠭᠠᠨ ᠴᠠᠭᠠᠷᠢᠭ ᠡᠷᠭᠢᠯᠳᠦᠨ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠵᠤ᠂ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠢᠯᠠᠨ᠂ ᠡᠯᠢᠭᠡ ᠪᠡᠷ ᠡᠪᠬᠡᠷᠡᠵᠤ ᠪᠠᠢᠭᠠᠳ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠮᠠᠲᠠᠯ ᠦᠭᠡᠢ ᠮᠠᠭᠤᠵᠢᠷᠠᠨ ᠣᠢᠴᠢᠯᠠ᠃
ᠯᠠᠮᠠ ᠨᠠᠷ ᠲᠡᠪᠡᠳᠡᠨ ᠰᠠᠨᠳᠤᠷᠵᠠᠭᠠᠵᠤ ᠰᠠᠩᠵᠢ ᠶ᠋ᠢ ᠳᠠᠮᠵᠢᠯᠠᠨ ᠡᠷᠭᠦᠵᠦ ᠭᠠᠳᠠᠭᠠ ᠭᠠᠷᠭᠠᠪᠠ᠃ ᠲᠡᠷᠡ ᠳᠠᠷᠤᠢ ᠮᠣᠷᠢᠨ ᠲᠡᠷᠭᠡ ᠪᠡᠷ ᠭᠡᠰᠦᠯ ᠰᠠᠩᠵᠢ ᠶ᠋ᠢ ᠭᠡᠷ ᠲᠦ᠍ ᠨᠢ ᠬᠦᠷᠭᠡᠵᠦ᠂ ᠵᠢᠩᠳᠠᠭᠠᠨ ᠤ᠋ ᠨᠢ ᠨᠥᠬᠥᠳ ᠰᠤᠪᠢᠯᠠᠨ ᠰᠠᠬᠢᠯᠠ᠃ ᠶᠠᠭᠤᠨ ᠤ᠋ ᠤᠷᠢᠳ ᠣᠳᠤᠯᠭᠠ ᠦᠢᠯᠡᠳᠪᠡ᠃ ᠣᠳᠤᠯᠭᠠ ᠶ᠋ᠢᠨ ᠬᠢᠩᠰᠢᠭᠦᠦ ᠤᠲᠤᠭᠠᠨ ᠢ᠋ᠶ᠋ᠠᠷ ᠰᠡᠭᠡᠭᠡ ᠣᠷᠣᠵᠤ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠡᠢ᠃ ᠭᠡᠪᠡᠴᠦ ᠪᠡᠶᠡ ᠨᠢ ᠰᠠᠢᠵᠢᠷᠠᠭᠰᠠᠨ ᠦᠭᠡᠢ᠃ ᠣᠷᠣᠢᠬᠠᠨ ᠲᠠᠰᠢ ᠪᠠᠨ ᠪᠠᠭᠰᠢ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠵᠠᠯᠠᠷᠠᠨ ᠢᠷᠡᠵᠡᠢ᠃
– ᠠᠮᠠᠨ ᠤ᠋ ᠤᠩᠰᠢᠯᠭᠠ ᠴᠢᠨᠢ ᠶᠠᠭᠤ ᠪᠢᠯᠡ? ᠭᠡᠵᠦ ᠲᠡᠷᠡ ᠳᠥᠩᠭᠡᠵᠢ ᠠᠮᠢ ᠭᠣᠣᠯ ᠲᠠᠢ ᠪᠠᠢᠭᠠ ᠰᠠᠩᠵᠢ ᠭᠡᠰᠦᠯ ᠡᠴᠡ ᠠᠰᠠᠭᠤᠯᠠ᠃ ᠭᠡᠰᠦᠯ ᠠᠷᠠᠢ ᠴᠤ᠌ ᠠᠮᠠ ᠨᠡᠭᠡᠭᠡᠵᠦ᠄
– ᠣᠮ ᠨᠠ ᠮᠠ᠋ ᠱᠠᠳ ᠰᠤᠤᠬᠠ! ᠭᠡᠵᠦ ᠳᠤᠤᠭᠠᠷᠤᠯᠠ᠃ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ《ᠵᠢᠷᠤᠬᠠᠢ ᠶ᠋ᠢᠨ ᠯᠢᠲ᠌ᠸ》 ᠨᠡᠭᠡᠭᠡᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ᠄
– ᠠ᠂ ᠬᠠᠪᠤᠷ ᠤ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠷᠢᠸᠠᠳᠢ ᠣᠳᠤᠨᠠ᠂ ᠴᠢᠨ ᠺᠥᠯᠢᠯ ᠳᠣᠬᠢᠶᠠᠨ ᠲᠥᠷᠥᠵᠡᠢ᠃ ᠡᠮᠡ ᠤᠰᠤᠨ ᠭᠠᠬᠠᠢ ᠵᠢᠯ᠃ ᠬᠠᠶᠠᠩᠭᠢᠷᠸᠠ ᠰᠢᠲᠦᠵᠦ ᠶᠠᠪᠤᠬᠤ ᠶᠣᠰᠣᠲᠠᠢ ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠭᠠᠭᠴᠠᠭᠠᠷ ᠶᠠᠷᠢᠯᠠ᠃ ᠲᠡᠭᠡᠭᠡᠳ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠄
– ᠵᠢᠯ ᠦ᠋ᠨ ᠶᠢᠰᠦᠨ ᠨᠢᠳᠦ᠂ ᠦᠬᠡᠷ ᠦ᠋ᠨ ᠶᠢᠰᠦᠨ ᠨᠢᠳᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠪᠠᠢᠨᠠ᠃ ᠤᠤᠯ ᠨᠢ ᠤᠷᠵᠢᠨᠤᠨ ᠯᠠ ᠣᠷᠣᠭᠰᠠᠨ ᠪᠠᠢᠮᠠᠷ ᠶᠤᠮ᠃ ᠲᠡᠭᠡᠬᠦ ᠪᠡᠷ ᠶᠢᠰᠦᠨ ᠨᠢᠳᠦᠨ ᠦ᠌ ᠭᠣᠣᠯᠯᠠᠯᠲᠠ ᠠ᠋ᠴᠠ ᠭᠠᠷᠭᠠᠬᠤ ᠬᠡᠷᠡᠭ ᠲᠡᠢ᠃《ᠮᠡᠩᠭᠡᠨ ᠦ᠌ ᠭᠣᠣᠯ》 ᠤᠩᠰᠢᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ᠃ ᠴᠣᠢᠭ ᠤ᠋ᠨ ᠤᠰᠤ ᠪᠡᠯᠡᠳᠬᠡᠵᠡᠭᠡ! ᠭᠡᠵᠦ ᠰᠠᠩᠵᠢ ᠶ᠋ᠢᠨ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠳ᠋ᠦ᠍ ᠱᠠᠭᠠᠷᠳᠠᠯᠠ᠃
ᠮᠡᠩᠭᠡ ᠭᠣᠣᠯᠯᠠᠬᠤ ᠨᠢ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠢᠰᠦᠨ ᠵᠢᠯ ᠲᠤᠲᠤᠮ ᠨᠢᠭᠡ ᠤᠳᠠᠭᠠ ᠲᠣᠬᠢᠶᠠᠯᠳᠤᠬᠤ ᠭᠠᠢ ᠵᠣᠪᠠᠯᠠᠩ ᠶᠤᠮ ᠭᠡᠮᠡᠨ ᠯᠠᠮᠠ ᠨᠠᠷ ᠦᠵᠡᠳᠡᠭ ᠶᠣᠰᠣᠭᠠᠷ ᠭᠡᠰᠦᠯ ᠰᠠᠩᠵᠢ ᠶ᠋ᠢᠨ ᠬᠣᠶᠠᠳᠠᠬᠢ ᠶᠢᠰᠦ ᠨᠢ ᠲᠣᠬᠢᠶᠠᠵᠠᠢ ᠭᠡᠵᠦ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠪᠣᠳᠣᠭᠰᠠᠨ ᠶᠤᠮ ᠪᠠᠢᠵᠠᠢ᠃ ᠲᠡᠷᠡᠴᠢᠯᠡᠨ ᠠᠷᠪᠠᠨ ᠬᠣᠶᠠᠷ ᠵᠢᠯ ᠲᠤᠲᠤᠮ ᠬᠥᠮᠦᠨ ᠦ᠌ ᠵᠢᠯ ᠦ᠋ᠨ ᠣᠷᠣᠯᠭᠠ ᠲᠣᠬᠢᠶᠠᠨᠠ᠃ ᠨᠠᠢ᠍ᠮᠠᠨ ᠮᠠᠬᠠᠪᠣᠳ ᠪᠤᠶᠤ ᠺᠥᠯᠢᠯ᠂ ᠬᠣᠷᠢᠨ ᠨᠠᠢ᠍ᠮᠠᠨ ᠣᠳᠣᠨ ᠤ᠋ ᠲᠣᠬᠢᠶᠠᠯ ᠢ᠋ ᠵᠢᠷᠤᠬᠠᠢ ᠶ᠋ᠢᠨ ᠨᠣᠮᠣᠨ ᠳ᠋ᠤ᠌ ᠵᠢᠭᠠᠭᠰᠠᠨ ᠢ᠋ᠶ᠋ᠠᠷ ᠲᠣᠭᠠᠴᠠᠭᠠᠯᠠᠨ ᠠᠯᠢᠪᠠ ᠬᠥᠮᠦᠨ ᠦ᠌ ᠨᠡᠷᠡ᠂ ᠤᠨᠤᠬᠤ ᠮᠣᠷᠢ᠂ ᠰᠢᠲᠦᠬᠦ ᠪᠤᠷᠬᠠᠨ᠂ ᠠᠮᠠᠨ ᠤ᠋ ᠤᠩᠰᠢᠯᠭᠠ ᠶ᠋ᠢ ᠲᠣᠳᠣᠷᠬᠠᠢᠯᠠᠨᠠ᠃ ᠲᠡᠷᠡ ᠶᠣᠰᠣᠭᠠᠷ ᠭᠡᠰᠦᠯ ᠰᠠᠩᠵᠢ ᠡᠮᠡ ᠤᠰᠤᠨ ᠭᠠᠬᠠᠢ ᠵᠢᠯ ᠦᠨ ᠬᠠᠪᠤᠷ ᠤ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠷᠢᠸᠠᠳᠢ ᠣᠳᠣ᠂ ᠴᠢᠨ ᠺᠥᠯᠢᠯ ᠳᠣᠬᠢᠶᠠᠨ ᠲᠥᠷᠥᠭᠰᠡᠨ ᠲᠤᠯᠠ ᠬᠠᠶᠠᠩᠭᠢᠷᠸᠠ ᠪᠤᠷᠬᠠᠨ ᠰᠢᠲᠦᠵᠦ᠂ ᠬᠥᠬᠡ ᠪᠣᠷᠣ ᠮᠣᠷᠢ ᠭᠣᠣᠯᠴᠢᠯᠠᠨ ᠤᠨᠤᠵᠤ᠂《ᠣᠮ ᠨᠠ ᠮᠠ᠋ ᠱᠠᠳ ᠰᠤᠤᠬᠠ 》 ᠭᠡᠳᠡᠭ ᠮᠠᠨᠢ ᠶ᠋ᠢ ᠠᠮᠠᠨ ᠤ᠋ ᠤᠩᠰᠢᠯᠭᠠ ᠪᠣᠯᠭᠠᠵᠤ ᠠᠪᠬᠤ ᠶᠣᠰᠣᠲᠠᠢ ᠪᠠᠢᠯᠠ᠃
– ᠮᠡᠩᠭᠡ ᠭᠣᠣᠯᠯᠠᠭᠰᠠᠨ ᠲᠤᠯᠠ ᠤᠩᠰᠢᠯᠭᠠ ᠶ᠋ᠢ ᠵᠠᠭᠤᠨ ᠨᠠᠢ᠍ᠮᠠᠨ ᠪᠦᠯᠦᠭ ᠳᠦᠭᠦᠷᠭᠡᠨ ᠬᠢᠵᠦ᠂ ᠵᠣᠯᠢᠭ ᠭᠠᠷᠭᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠭᠠᠳ ᠴᠤ᠌ ᠲᠡᠰᠬᠦ ᠦᠭᠡᠢ ᠭᠡᠵᠦ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠠᠢᠯᠠᠳᠤᠯᠠ᠃ ᠨᠢᠭᠡᠨ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠦᠭᠡ ᠪᠡᠷ ᠳᠠᠷᠤᠢ ᠬᠥᠳᠡᠯᠵᠦ ᠤᠩᠰᠢᠯᠭᠠ ᠳ᠋ᠤ᠌ ᠪᠡᠯᠡᠳᠬᠡᠵᠦ ᠡᠬᠢᠯᠡᠯᠡ᠃
– ᠵᠣᠯᠢᠭ ᠲᠤ᠌ ᠭᠠᠷᠭᠠᠬᠤ ᠶᠠᠭᠤᠮᠠ ᠶ᠋ᠢ ᠣᠯᠬᠤ ᠳ᠋ᠤ᠌ ᠪᠡᠷᠬᠡ᠃ ᠡᠢᠮᠦ ᠳ᠋ᠦ᠍ ᠪᠡᠯᠡᠨ ᠭᠠᠵᠠᠷ ᠠ᠋ᠴᠠ ᠣᠯᠵᠤ ᠢᠷᠡ᠃ ᠭᠦᠷᠢᠮᠴᠢ ᠫᠠᠭᠪᠠ ᠳ᠋ᠤ᠌ ᠣᠴᠢᠭᠠᠳ ᠬᠡᠯᠡᠪᠡᠯ ᠲᠡᠷᠡ ᠶᠣᠰᠣᠭᠠᠷ ᠨᠢ ᠥᠭᠭᠦᠨᠡ ᠭᠡᠵᠦ ᠭᠠᠪᠵᠤ ᠳᠠᠭᠠᠭᠠᠯᠭᠠᠪᠠ᠃ ᠰᠠᠩᠵᠢ ᠶ᠋ᠢᠨ ᠵᠢᠩᠳᠠᠭᠠᠨ ᠤ᠋ ᠨᠥᠬᠥᠷ᠄
– ᠪᠠᠭᠰᠢ ᠠ᠋᠂ ᠶᠠᠭᠤ ᠠᠪᠴᠢᠷᠠᠬᠤ ᠶᠤᠮ ᠪᠣᠢ? ᠭᠡᠵᠦ ᠭᠠᠢᠬᠠᠯᠠ᠃
– ᠶᠢᠰᠦᠨ ᠠᠭᠤᠯᠠᠨ ᠠ᠋ᠴᠠ ᠠᠪᠤᠭᠰᠠᠨ ᠰᠢᠷᠣᠢ᠂ ᠶᠡᠬᠡ ᠭᠣᠣᠯ ᠤ᠋ᠨ ᠢᠷᠣᠭᠠᠷ ᠠ᠋ᠴᠠ ᠠᠪᠤᠭᠰᠠᠨ ᠡᠯᠡᠰᠦ᠂ ᠬᠥᠮᠦᠨ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠰᠢᠷᠣᠢ᠂ ᠶᠢᠰᠦᠨ ᠬᠠᠷᠠ᠂ ᠶᠢᠰᠦᠨ ᠴᠠᠭᠠᠨ ᠴᠢᠯᠠᠭᠤ᠂ ᠶᠢᠰᠦᠨ ᠡᠷᠯᠢᠭ ᠦ᠋ᠨ ᠵᠢᠷᠤᠭ ᠲᠠᠢ ᠰᠠᠮᠪᠠᠷᠠ ᠡᠢᠮᠦ ᠵᠦᠢᠯᠡᠰ ᠮᠡᠩᠭᠡᠨ ᠵᠠᠰᠠᠯᠭᠠᠨ ᠳ᠋ᠤ᠌ ᠣᠷᠣᠳᠠᠭ ᠶᠤᠮ᠃ ᠪᠢ ᠲᠠ ᠨᠠᠷ ᠲᠤ᠌ ᠠᠯᠢ ᠡᠷᠲᠡ ᠵᠢᠭᠠᠭᠠ ᠪᠢᠵᠡ ᠳᠡ? ᠭᠡᠵᠦ ᠯᠢᠨᠰᠠᠷᠠᠢ ᠭᠠᠪᠵᠤ ᠠᠭᠤᠷᠲᠠᠶᠠ ᠲᠤᠰᠢᠶᠠᠯᠠ᠃ ᠨᠢᠭᠡ ᠱᠠᠪᠢ ᠨᠢ ᠭᠠᠷᠬᠤ ᠪᠠᠷ ᠵᠠᠪᠳᠤᠬᠤ ᠳ᠋ᠤ᠌᠄
– ᠬᠦᠢ ᠠ᠋! ᠫᠠᠭᠪᠠ ᠭᠦᠷᠢᠮᠴᠢ ᠳ᠋ᠦ᠍ ᠬᠡᠯᠡᠭᠡᠷᠡᠢ᠃ ᠴᠦᠮᠡᠷ ᠭᠣᠣᠯ ᠤ᠋ᠨ ᠢᠷᠣᠭᠠᠷ ᠠ᠋ᠴᠠ ᠠᠪᠤᠭᠰᠠᠨ ᠡᠯᠡᠰᠦᠨ ᠡᠴᠡ ᠪᠡᠨ ᠥᠭᠭᠦᠭᠡᠷᠡᠢ᠃ ᠤᠯᠠᠭᠠᠨ ᠥᠩᠭᠡ ᠲᠡᠢ ᠪᠠᠢᠳᠠᠭ ᠶᠤᠮ ᠭᠡᠵᠦ ᠭᠠᠪᠵᠤ ᠨᠡᠮᠡᠵᠦ ᠬᠡᠯᠡᠬᠦ ᠳ᠋ᠦ᠍《ᠴᠦᠮᠡᠷ ᠭᠣᠣᠯ》 ᠭᠡᠰᠡᠨ ᠦᠭᠡ ᠶ᠋ᠢ ᠰᠠᠩᠵᠢ ᠪᠦᠳᠡᠭᠢ ᠰᠣᠨᠣᠰᠤᠭᠠᠳ ᠨᠢᠳᠦᠨ ᠳ᠋ᠦ᠍ ᠨᠢ ᠤᠯᠠᠭᠠᠨ ᠴᠠᠭᠠᠷᠢᠭ ᠡᠷᠭᠢᠯᠳᠦᠨ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠵᠤ ᠳᠠᠬᠢᠭᠠᠳ ᠯᠠ ᠤᠬᠠᠭᠠᠨ ᠠᠯᠳᠠᠯᠠ᠃ ᠵᠡᠭᠦᠳᠦ ᠨᠣᠢᠷ ᠰᠢᠭ᠋ ᠪᠦᠳᠡᠭᠢ ᠶᠠᠭᠤᠮᠠ ᠲᠠᠷᠢᠬᠢᠨ ᠳ᠋ᠤ᠌ ᠨᠢ ᠡᠷᠭᠢᠯᠳᠦᠨᠡ᠃ ᠴᠦᠮᠡᠷ ᠭᠡᠳᠡᠭ ᠨᠢ ᠤᠯᠠᠭᠠᠨ ᠮᠥᠷᠡᠨ ᠬᠡᠮᠡᠬᠦ ᠦᠭᠡ ᠶᠦᠮ᠃ ᠲᠡᠭᠦᠨ ᠢ᠋ ᠮᠣᠩᠭᠣᠯᠴᠤᠳ ᠬᠠᠪᠲᠠᠭᠠᠢ ᠤᠯᠠᠭᠠᠨ ᠮᠥᠷᠡᠨ ᠭᠡᠵᠦ ᠨᠡᠷᠡᠯᠡᠨᠡ᠃ ᠲᠡᠷᠡ ᠭᠣᠣᠯ ᠢ᠋ᠶ᠋ᠠᠷ ᠮᠣᠷᠢᠲᠠᠢ ᠭᠠᠲᠤᠯᠬᠤ ᠶᠤᠮ ᠤᠤ᠂ ᠤᠨᠤᠭᠠ ᠮᠠᠯ ᠣᠢᠴᠢᠬᠤ ᠳ᠋ᠤ᠌ ᠢᠷᠣᠭᠠᠷ ᠤ᠋ᠨ ᠤᠯᠠᠭᠠᠨ ᠡᠯᠡᠰᠦ ᠨᠢ ᠬᠤᠢᠯᠠᠷᠠᠨ ᠪᠣᠰᠴᠤ ᠶᠠᠭ ᠯᠠ ᠴᠢᠰᠤ ᠪᠠᠷ ᠡᠷᠭᠢᠯᠳᠦᠬᠦ ᠰᠢᠭ ᠪᠣᠯᠳᠠᠭ ᠠᠵᠢ᠃ ᡀᠠᠰᠠ ᠣᠷᠣᠬᠤ ᠪᠠᠷ ᠢᠷᠡᠵᠦ ᠶᠠᠪᠤᠬᠤ ᠵᠠᠮ ᠳ᠋ᠤ᠌ ᠬᠠᠪᠲᠠᠭᠠᠢ ᠤᠯᠠᠭᠠᠨ ᠮᠥᠷᠡᠨ ᠦ᠌ ᠡᠷᠭᠢ ᠳᠡᠭᠡᠷᠡ ᠡᠴᠡ ᠥᠯᠵᠡᠢ ᠶ᠋ᠢᠨ ᠮᠣᠷᠢ ᠬᠥᠯ ᠠᠯᠳᠠᠵᠤ ᠤᠰᠤᠨ ᠳ᠋ᠤ᠌ ᠣᠢᠴᠢᠴᠢᠬᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠭᠣᠣᠯ ᠳ᠋ᠤ᠌ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠨ ᠪᠤᠵᠢᠭᠢᠨᠠᠭᠰᠠᠨ ᠤᠯᠠᠪᠤᠷ ᠰᠢᠷᠠ ᠴᠦᠩᠬᠦᠯ ᠭᠠᠷᠴᠤ ᠦᠵᠡᠭᠳᠡᠬᠦ ᠳ᠋ᠦ᠍ ᠰᠠᠩᠵᠢ ᠭᠡᠰᠦᠯ ᠴᠣᠴᠢᠨ ᠠᠶᠤᠵᠤ ᠪᠢᠯᠡ᠃ ᠲᠡᠷᠡ ᠪᠦᠬᠦᠨ ᠭᠡᠰᠦᠯ ᠦ᠋ᠨ ᠪᠦᠷᠬᠦᠭ ᠣᠶᠤᠨ ᠳ᠋ᠤ᠌ ᠳᠠᠬᠢᠨ ᠳᠦᠷᠡᠯᠵᠡᠨ ᠠᠰᠠᠵᠤ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠬᠦ ᠰᠢᠭ ᠪᠣᠯᠵᠠᠢ᠃
– ᠭᠡᠰᠦᠯ ᠦ᠋ᠨ ᠳᠦᠷᠰᠦ ᠶ᠋ᠢ ᠭᠤᠯᠢᠷ ᠢ᠋ᠶ᠋ᠠᠷ ᠦᠢᠯᠡᠳ᠃ ᠬᠤᠪᠴᠠᠰᠤ ᠶ᠋ᠢ ᠨᠢ ᠳᠠᠭᠤᠷᠢᠶᠠᠯᠭᠠᠨ ᠬᠢᠬᠦ ᠶᠣᠰᠣᠲᠠᠢ᠃ ᠬᠠᠷᠠ᠂ ᠴᠠᠭᠠᠨ ᠬᠣᠶᠠᠷ ᠠᠷᠠᠰᠤ ᠬᠡᠷᠡᠭ ᠪᠣᠯᠤᠨᠠ᠃ ᠣᠯᠵᠤ ᠢᠷᠡ ᠭᠡᠵᠦ ᠥᠭᠡᠷᠡ ᠨᠢᠭᠡ ᠱᠠᠪᠢ ᠳ᠋ᠠᠭᠠᠨ ᠭᠠᠪᠵᠤ ᠯᠠᠮᠠᠳᠠᠨ ᠲᠤᠰᠢᠶᠠᠯᠠ᠃ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠪᠤᠰᠤᠳ ᠤᠩᠰᠢᠯᠭᠠ ᠶ᠋ᠢ ᠬᠢᠬᠦ ᠪᠡᠷ ᠰᠠᠭᠤᠯᠠ᠃ ᠨᠢᠳᠦ ᠪᠡᠨ ᠬᠠᠭᠠᠰ ᠠᠨᠢᠭᠠᠳ᠄
– ᠶᠡᠬᠡ ᠮᠠᠬᠠᠷᠠᠨᠽᠠ ᠲᠩᠷᠢ ᠮᠢᠨᠢ ᠠ᠋᠂ ᠸᠢᠷᠢᠲ᠋ᠡᠺᠢ᠂ ᠸᠢᠷᠥᠲ᠋ᠠᠺᠱᠢ᠂ ᠸᠠᠶᠢᠰᠲᠷᠠᠪᠠᠨᠢ ᠲᠩᠷᠢ ᠨᠦ᠍ᠭᠦᠳ ᠮᠢᠨᠢ ᠠ᠋! ᠭᠡᠵᠦ ᠲᠡᠷᠡ ᠤᠩᠰᠢᠯᠭᠠ ᠪᠠᠨ ᠡᠬᠢᠯᠡᠯᠡ᠃ ᠯᠠᠮᠠ ᠶ᠋ᠢᠨ ᠤᠩᠰᠢᠯᠭᠠ ᠨᠡᠯᠢᠶᠡᠳ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠬᠦ ᠬᠣᠭᠣᠷᠣᠨᠳᠣ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ 《ᠮᠡᠩᠭᠡᠨ ᠵᠠᠰᠠᠯ 》 ᠳ᠋ᠤ᠌ ᠪᠡᠯᠡᠳᠬᠡᠵᠦ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠪᠦᠷᠢᠳᠦᠭᠦᠯᠵᠡᠢ᠃
– ᠬᠠᠷᠠ ᠴᠠᠭᠠᠨ ᠬᠣᠶᠠᠷ ᠠᠷᠠᠰᠤ ᠶ᠋ᠢ ᠲᠡᠨᠳᠡ ᠳᠡᠯᠪᠢ᠃ ᠬᠠᠷᠠ ᠠᠷᠠᠰᠤᠨ ᠳᠡᠭᠡᠷᠡ ᠮᠡᠩᠭᠡ ᠭᠣᠣᠯᠯᠠᠭᠴᠢ ᠶ᠋ᠢ ᠰᠠᠭᠤᠯᠭᠠ᠃ ᠡᠮᠦᠨᠡ ᠨᠢ ᠭᠤᠯᠢᠷ ᠵᠣᠯᠢᠶᠠ ᠪᠠᠨ ᠳᠡᠯᠪᠢ ᠭᠡᠵᠦ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠱᠠᠪᠢ ᠨᠠᠷ ᠲᠠᠭᠠᠨ ᠵᠢᠭᠠᠯᠠ᠃
ᠱᠠᠪᠢ ᠨᠠᠷ ᠨᠢ ᠲᠡᠷᠡ ᠶᠣᠰᠣᠭᠠᠷ ᠪᠣᠯᠭᠠᠵᠤ᠂ ᠭᠡᠰᠦᠯ ᠰᠠᠩᠵᠢ ᠶ᠋ᠢ ᠬᠡᠳᠦᠭᠦᠯᠡ ᠪᠡᠨ ᠡᠷᠭᠦᠵᠦ ᠬᠠᠷᠠ ᠢᠮᠠᠭᠠᠨ ᠤ᠋ ᠠᠷᠠᠰᠤᠨ ᠳᠡᠭᠡᠷᠡ ᠠᠷᠠᠢᠬᠠᠨ ᠰᠠᠭᠤᠯᠭᠠᠯᠠ᠃ ᠬᠠᠵᠠᠭᠤ ᠲᠠᠰᠢ ᠪᠠᠨ ᠣᠢᠴᠢᠬᠤ ᠭᠡᠳ ᠪᠠᠢᠬᠤ ᠳ᠋ᠤ᠌ ᠨᠢ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠪᠤᠢᠳᠠᠩ ᠲᠦᠰᠢᠭᠦᠯᠵᠦ ᠲᠣᠭᠲᠠᠭᠠᠪᠠ᠃
ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠡᠮᠦᠨᠡ ᠲᠠᠯᠠ ᠳ᠋ᠠᠭᠠᠨ ᠵᠢᠵᠢᠭᠬᠡᠨ ᠴᠠᠭᠠᠨ ᠢᠰᠡᠭᠡᠢ ᠣᠯᠪᠣᠭ ᠳᠡᠪᠢᠰᠦᠭᠡᠳ ᠮᠡᠩᠭᠡ ᠭᠣᠣᠯᠯᠠᠭᠴᠢ ᠶ᠋ᠢᠨ ᠡᠰᠡᠷᠭᠦ ᠬᠠᠷᠠᠵᠤ ᠰᠠᠭᠤᠯᠠ᠃ ᠴᠠᠭᠠᠨ ᠢᠰᠡᠭᠡᠢ ᠳᠡᠭᠡᠷᠡ ᠪᠡᠨ ᠵᠢᠷᠤᠭᠠᠰᠤ ᠲᠠᠲᠠᠵᠤ ᠡᠬᠢᠯᠡᠪᠡ᠃
– ᠶᠢᠰᠦᠨ ᠠᠭᠤᠯᠠᠨ ᠠ᠋ᠴᠠ ᠠᠪᠤᠭᠰᠠᠨ ᠰᠢᠷᠣᠢ ᠬᠠᠮᠢᠭᠠ ᠪᠠᠢᠨᠠ︖ ᠭᠡᠬᠦ ᠳ᠋ᠦ᠍ ᠱᠠᠪᠢ ᠨᠢ ᠴᠠᠭᠠᠰᠤᠨ ᠳᠡᠭᠡᠷᠡ ᠵᠢᠷᠤᠭᠰᠠᠨ ᠵᠢᠷᠤᠭ ᠤ᠋ᠳ ᠥᠭᠪᠡ᠃
ᠭᠠᠪᠵᠤ ᠲᠡᠭᠦᠨ ᠢ᠋ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠠᠪᠴᠤ ᠢᠰᠡᠭᠡᠢ ᠳᠡᠭᠡᠷᠡᠬᠢ ᠵᠢᠷᠤᠭᠠᠰᠤᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠲᠤᠰ ᠪᠦᠷᠢ ᠪᠠᠢᠷᠢᠯᠠᠭᠤᠯᠪᠠ᠃ ᠪᠦᠭᠦᠳᠡ ᠶᠢᠰᠦᠨ ᠵᠤᠷᠪᠤᠰ᠂ ᠶᠢᠰᠦᠨ ᠵᠢᠷᠤᠭ ᠡᠩᠨᠡᠭᠦᠯᠦᠨ ᠲᠠᠯᠪᠢᠵᠠᠢ᠃
ᠳᠠᠷᠠᠭᠠ ᠨᠢ ᠭᠠᠪᠵᠤ ᠲᠤᠬᠠᠯᠠᠨ ᠰᠠᠭᠤᠵᠤ ᠬᠥᠮᠦᠨ ᠦ᠌ ᠦᠬᠦᠯ ᠦ᠋ᠨ ᠶᠢᠰᠦᠨ ᠰᠢᠯᠲᠠᠭ ᠤ᠋ᠨ ᠲᠤᠬᠠᠢ ᠤᠩᠰᠢᠯᠭᠠ ᠶ᠋ᠢ ᠳᠦᠩᠭᠢᠨᠡᠲᠡᠯᠡ ᠤᠩᠰᠢᠵᠤ ᠭᠠᠷᠤᠯᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠦᠬᠦᠯ ᠦ᠋ᠨ ᠰᠢᠯᠲᠠᠭ ᠨᠢᠭᠡ ᠶ᠋ᠢ ᠤᠩᠰᠢᠭᠠᠳ ᠬᠠᠷᠠ ᠥᠩᠭᠡ ᠲᠡᠢ ᠬᠠᠢᠷᠭᠤ ᠪᠠᠷ ᠭᠤᠯᠢᠷ ᠵᠣᠯᠢᠭ ᠤᠷᠤᠭᠤ ᠠᠭᠤᠷᠲᠠᠶᠠ ᠰᠢᠳᠡᠵᠦ᠄
– ᠦᠬᠦᠯ ᠦ᠋ᠨ ᠬᠠᠷᠠ ᠰᠤᠮᠤ ᠵᠣᠯᠢᠭ ᠢ᠋ ᠤᠨᠤᠬᠤ ᠪᠣᠯᠲᠤᠭᠠᠢ! ᠭᠡᠵᠦ ᠬᠡᠯᠡᠪᠡ᠃ ᠮᠥᠨ ᠴᠠᠭᠠᠨ ᠴᠢᠯᠠᠭᠤᠨ ᠬᠠᠢᠷᠭᠤ ᠪᠠᠷ ᠰᠠᠩᠵᠢ ᠭᠡᠰᠦᠯ ᠤᠷᠤᠭᠤ ᠰᠠᠴᠤᠵᠤ᠄
– ᠠᠮᠢᠳᠤ ᠶ᠋ᠢᠨ ᠴᠠᠭᠠᠨ ᠭᠡᠭᠡ ᠰᠣᠶᠣᠷᠬᠠᠶᠠ ᠭᠡᠪᠡ᠃
ᠲᠡᠷᠡ ᠮᠥᠴᠡ ᠳ᠋ᠦ᠍ ᠡᠪᠡᠳᠴᠢᠲᠡᠨ ᠪᠣᠰᠴᠤ ᠥᠨᠥᠬᠢ ᠶᠢᠰᠦᠨ ᠵᠤᠷᠪᠤᠰ ᠤ᠋ᠨ ᠨᠢᠭᠡ ᠶ᠋ᠢ ᠠᠯᠬᠤᠵᠤ ᠭᠠᠷᠤᠭᠠᠳ᠄
– ᠨᠢᠭᠡ ᠳᠠᠪᠠᠭᠠ ᠳᠠᠪᠠᠵᠤ᠂ ᠨᠢᠭᠡ ᠦᠬᠦᠯ ᠡᠴᠡ ᠭᠠᠷᠪᠠ! ᠭᠡᠵᠦ ᠬᠡᠯᠡᠬᠦ ᠶᠣᠰᠣᠲᠠᠢ ᠪᠠᠢᠯᠠ᠃ ᠭᠡᠪᠡᠴᠦ ᠰᠠᠩᠵᠢ ᠭᠡᠰᠦᠯ ᠲᠡᠭᠡᠬᠦ ᠲᠡᠩᠬᠡᠭᠡ ᠪᠠᠢᠭᠰᠠᠨ ᠦᠭᠡᠢ᠃ ᠨᠥᠬᠥᠳ ᠨᠢ ᠲᠡᠭᠦᠨ ᠢ᠋ ᠡᠷᠭᠦᠵᠦ ᠨᠢᠭᠡ ᠵᠢᠷᠤᠭᠠᠰᠤ ᠳᠠᠪᠠᠭᠤᠯᠤᠭᠠᠳ᠄
– ᠨᠢᠭᠡ ᠳᠠᠪᠠᠭᠠ ᠳᠠᠪᠠᠵᠤ᠂ ᠨᠢᠭᠡ ᠦᠬᠦᠯ ᠡᠴᠡ ᠭᠠᠷᠤᠯᠠ! ᠭᠡᠵᠦ ᠬᠡᠯᠡᠵᠡᠭᠡᠯᠡ᠃ ᠡᠢᠨ ᠬᠦ᠌ ᠦᠬᠦᠯ ᠦ᠋ᠨ ᠳᠠᠪᠠᠭᠠ ᠶ᠋ᠢ ᠶᠢᠰᠦ ᠶ᠋ᠢ ᠨᠢᠭᠡᠪᠦᠷᠢᠴᠢᠯᠡᠨ ᠳᠤᠷᠠᠳᠴᠤ᠂ ᠡᠪᠡᠳᠴᠢᠲᠡᠨ ᠢ᠋ ᠨᠢᠭᠡ ᠨᠢᠭᠡ ᠵᠢᠷᠤᠭᠠᠰᠤ ᠳᠠᠪᠠᠭᠤᠯᠤᠨ ᠰᠠᠭᠤᠯᠭᠠᠵᠤ᠂ ᠶᠢᠰᠦᠨ ᠤᠳᠠᠭᠠ ᠲᠡᠷᠡ ᠬᠦ᠌ ᠦᠢᠯᠡ ᠶ᠋ᠢ ᠳᠠᠪᠲᠠᠨ ᠳᠠᠭᠤᠰᠤᠭᠠᠳ᠄
– ᠶᠢᠰᠦᠨ ᠳᠠᠪᠠᠭᠠ ᠳᠠᠪᠠᠵᠤ ᠶᠢᠰᠦᠨ ᠦᠬᠦᠯ ᠡᠴᠡ ᠭᠠᠷᠤᠯᠠ! ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠡᠰᠡᠷᠭᠦ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠴᠠᠭᠠᠨ ᠠᠷᠠᠰᠤᠨ ᠳᠡᠭᠡᠷᠡ ᠡᠪᠡᠳᠴᠢᠲᠡᠨ ᠢ᠋ ᠡᠷᠭᠦᠵᠦ ᠰᠠᠭᠤᠯᠭᠠᠯᠠ᠃
ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠵᠣᠯᠢᠭ ᠢ᠋ ᠠᠪᠴᠤ ᠮᠡᠩᠭᠡ ᠭᠣᠣᠯᠯᠠᠭᠴᠢ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠠᠷᠠ ᠪᠤᠷᠤᠭᠤ ᠭᠤᠷᠪᠠ ᠳᠠᠬᠢᠨ ᠡᠷᠭᠢᠭᠦᠯᠦᠭᠡᠳ ᠲᠠᠷᠨᠢᠳᠠᠮᠠᠭᠴᠠ᠄
– ᠡᠨᠡ ᠵᠣᠯᠢᠭ ᠤᠷᠤᠭᠤ ᠨᠤᠯᠮᠤ! ᠭᠡᠵᠦ ᠬᠡᠯᠡᠭᠡᠳ ᠵᠣᠯᠢᠭ ᠢ᠋ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠨᠢᠭᠤᠷ ᠲᠤ᠌ ᠣᠢᠷᠠᠲᠤᠭᠤᠯᠤᠨ ᠪᠠᠷᠢᠬᠤ ᠳ᠋ᠤ᠌ ᠭᠡᠰᠦᠯ ᠶᠠᠳᠠᠷᠠᠵᠤ ᠲᠤᠢᠯᠳᠠᠭᠰᠠᠨ ᠠ᠋ᠴᠠ ᠪᠣᠯᠤᠭᠠᠳ ᠨᠤᠯᠮᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠠᠮᠠ ᠨᠢ ᠴᠦ᠍ ᠬᠠᠭᠤᠷᠠᠢᠰᠢᠴᠢᠬᠠᠵᠠᠢ᠃
– ᠭᠤᠷᠪᠠᠨᠲᠠ ᠨᠤᠯᠮᠤᠭᠲᠤᠨ! ᠭᠡᠵᠦ ᠭᠠᠪᠵᠤ ᠴᠢᠩᠭᠠ ᠰᠦᠷᠲᠡᠢ ᠳᠠᠭᠤ ᠪᠠᠷ ᠱᠠᠭᠠᠷᠳᠠᠪᠠ᠃ ᠰᠠᠩᠵᠢ ᠭᠡᠰᠦᠯ ᠶᠠᠭᠤ ᠬᠢᠯᠭᠡᠬᠦ ᠭᠡᠳ ᠪᠠᠢᠭᠠ ᠶ᠋ᠢ ᠠᠷᠠᠢ ᠣᠢᠯᠠᠭᠠᠵᠤ᠂ ᠨᠤᠯᠮᠤᠬᠤ ᠭᠡᠳ ᠪᠠᠰᠠ ᠯᠠ ᠴᠢᠳᠠᠬᠤ ᠦᠭᠡᠢ᠂ ᠳᠡᠮᠡᠢ ᠯᠡ ᠠᠮᠠ ᠪᠠᠨ ᠬᠥᠳᠡᠯᠭᠡᠪᠡ᠃
– ᠲᠠ ᠨᠠᠷ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠡᠴᠡ ᠨᠤᠯᠮᠤᠲᠤᠭᠠᠢ! ᠭᠡᠵᠦ ᠪᠠᠭᠰᠢ ᠭᠠᠪᠵᠢ ᠪᠠᠨ ᠲᠤᠰᠢᠶᠠᠬᠤ ᠳ᠋ᠤ᠌ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠲᠡᠷᠡ ᠵᠣᠯᠢᠭ ᠤᠷᠤᠭᠤ ᠴᠥᠮ ᠯᠡ ᠠᠭᠤᠷᠲᠠᠶᠠ ᠨᠤᠯᠮᠤᠵᠠᠭᠠᠯᠠ᠃
– ᠵᠠ ᠣᠳᠣ ᠭᠠᠷᠭᠠᠭᠠᠳ ᠵᠡᠭᠦᠨ ᠬᠣᠢᠲᠤ ᠵᠦᠭ ᠬᠠᠶᠠᠭᠲᠤᠨ᠂ ᠡᠨᠡ ᠵᠣᠯᠢᠭ ᠢ᠋! ᠭᠡᠵᠦ ᠭᠠᠪᠵᠤ ᠯᠠᠮᠠ ᠬᠡᠯᠡᠬᠦ ᠳ᠋ᠦ᠍ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠲᠡᠭᠦᠨ ᠢ᠋ ᠳᠣᠣᠷᠠ ᠨᠢ ᠭᠦᠢᠴᠡᠳᠬᠡᠪᠡ᠃ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠮᠡᠩᠭᠡᠨ ᠵᠠᠰᠠᠯ ᠢ᠋ ᠳᠠᠭᠤᠰᠬᠠᠵᠤ᠂ ᠡᠪᠡᠳᠴᠢᠲᠡᠨ ᠢ᠋ ᠷᠠᠰᠢᠶᠠᠨ ᠢ᠋ᠶ᠋ᠠᠷ ᠠᠷᠢᠭᠤᠳᠬᠠᠯᠠ᠃ ᠰᠠᠩᠵᠢ ᠡᠭᠦᠨ ᠢ᠋ ᠪᠦᠳᠡᠭᠢ ᠪᠡᠲᠡᠭᠢ ᠣᠢᠯᠠᠭᠠᠪᠠ᠃
ᠭᠡᠰᠦᠯ ᠰᠠᠩᠵᠢ ᠶᠢᠨ ᠵᠢᠩᠳᠠᠭᠠᠨ ᠤ᠋ ᠨᠢ ᠨᠥᠬᠥᠳ ᠵᠤᠲᠠᠩ ᠢ᠋ᠶ᠋ᠠᠷ ᠬᠣᠭᠣᠯᠠᠯᠠᠭᠰᠠᠨ ᠪᠣᠯᠤᠭᠠᠳ ᠣᠷᠣᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠬᠡᠪᠲᠡᠭᠦᠯᠵᠦ ᠬᠡᠰᠡᠭ ᠰᠠᠭᠤᠵᠠᠭᠠᠭᠠᠳ ᠭᠡᠷ ᠭᠡᠷ ᠦ᠋ᠨ ᠵᠦᠭ ᠲᠠᠷᠬᠠᠬᠤ ᠪᠠᠷ ᠪᠣᠰᠪᠠ᠃ ᠲᠡᠳᠡ ᠢᠲᠡᠭᠡᠯ ᠠᠯᠠᠳᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠣᠯᠵᠠᠢ᠃
– ᠣᠳᠣ ᠭᠠᠢᠭᠤᠢ ᠪᠣᠢ᠃ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠡᠯᠳᠡᠪ ᠮᠠᠭᠤ ᠶᠠᠭᠤᠮᠠᠨ ᠠ᠋ᠴᠠ ᠬᠠᠭᠠᠴᠠᠵᠤ ᠮᠠᠷᠭᠠᠰᠢ ᠠ᠋ᠴᠠ ᠴᠡᠪᠡᠷᠯᠡᠭᠳᠡᠨ ᠠᠷᠢᠭᠤᠰᠴᠤ ᠬᠠᠭᠤᠴᠢᠨ ᠪᠠᠢᠳᠠᠯ ᠳ᠋ᠠᠭᠠᠨ ᠳᠠᠬᠢᠨ ᠣᠷᠣᠬᠤ ᠪᠢᠵᠡ ᠭᠡᠵᠦ ᠭᠠᠪᠵᠤ ᠯᠠᠮᠠ ᠯᠥᠨᠳᠥᠩᠵᠤᠨᠠᠢ ᠠᠢᠯᠠᠳᠤᠭᠰᠠᠨ ᠢ᠋ᠶ᠋ᠠᠷ ᠴᠥᠮ ᠯᠡ ᠲᠡᠭᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠰᠠᠢᠨ ᠬᠤᠪᠢ ᠲᠠᠪᠢᠯᠠᠩ ᠳ᠋ᠤ᠌ ᠨᠠᠢᠳᠠᠭᠠᠳ ᠶᠠᠪᠤᠵᠠᠭᠠᠵᠠᠢ᠃ ᠭᠡᠪᠡᠴᠦ ᠰᠠᠩᠵᠢ ᠭᠡᠰᠦᠯ ᠲᠡᠷᠡ ᠰᠥᠨᠢᠵᠢᠨ ᠢ᠋ᠶ᠋ᠡᠨ ᠲᠠᠷᠴᠢᠯᠠᠵᠤ ᠥᠩᠭᠡᠷᠡᠪᠡ᠃ ᠮᠠᠷᠭᠠᠰᠢ ᠨᠢ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠢᠷᠡᠵᠦ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠪᠡᠶᠡ ᠣᠨᠴᠠ ᠮᠠᠭᠤᠳᠠᠭᠰᠠᠨ ᠢ᠋ ᠦᠵᠡᠭᠡᠳ ᠭᠠᠪᠵᠤ ᠪᠠᠭᠰᠢ ᠪᠠᠨ ᠳᠠᠭᠤᠳᠠᠭᠤᠯᠵᠠᠢ᠃ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠳᠠᠷᠤᠢᠬᠠᠨ ᠬᠦᠷᠴᠦ ᠢᠷᠡᠭᠡᠳ᠄
– ᠡᠷᠬᠢᠮ ᠰᠦᠨᠡᠰᠦ ᠨᠢ ᠬᠠᠷᠢᠭᠠ ᠦᠭᠡᠢ ᠯᠡ ᠪᠠᠢᠨᠠ᠃ ᠬᠠᠷᠢᠨ ᠦᠬᠦᠭᠡᠷ ᠦ᠋ᠨ ᠰᠦᠨᠡᠰᠦ ᠨᠢ ᠬᠣᠯᠠ ᠣᠳᠴᠠᠢ! ᠭᠡᠵᠦ ᠬᠡᠯᠡᠪᠡ᠃ ᠡᠨᠡ ᠦᠭᠡᠨ ᠳ᠋ᠦ᠍ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠶᠡᠬᠡ ᠠᠶᠤᠯᠠ᠃ ᠭᠡᠪᠡᠴᠦ ᠰᠠᠩᠵᠢ ᠭᠡᠰᠦᠯ ᠲᠡᠭᠦᠨ ᠢ᠋ ᠬᠠᠭᠠᠰ ᠳᠤᠲᠠᠭᠤ ᠣᠢᠯᠠᠭᠠᠵᠤ ᠪᠠᠢᠯᠠ᠃
– ᠦᠬᠦᠭᠡᠷ ᠦ᠋ᠨ ᠰᠦᠨᠡᠰᠦ ᠨᠢ ᠶᠠᠪᠤᠴᠢᠬᠠᠬᠤ ᠪᠠᠷ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ? ᠭᠡᠵᠦ ᠲᠡᠳᠡ ᠪᠠᠭᠰᠢ ᠠ᠋ᠴᠠ ᠪᠠᠨ ᠠᠰᠠᠭᠤᠬᠤ ᠳ᠋ᠤ᠌᠄
– ᠶᠠᠪᠤᠴᠢᠬᠠᠭᠰᠠᠨ ᠲᠡᠷᠡ ᠰᠦᠨᠡᠰᠦ ᠶ᠋ᠢ ᠳᠠᠭᠤᠳᠠᠬᠤ ᠶᠣᠰᠣᠯᠠᠯ ᠬᠢᠪᠡᠯ ᠲᠠᠭᠠᠷᠠᠨᠠ᠃ ᠲᠠ ᠨᠠᠷ ᠬᠡᠷᠡᠭᠯᠡᠭᠳᠡᠬᠦ ᠶᠠᠭᠤᠮᠠ ᠶ᠋ᠢ ᠪᠡᠯᠡᠳᠬᠡᠵᠡᠭᠡ ᠭᠡᠪᠡ᠃
《 ᠬᠥᠮᠦᠨ ᠳ᠋ᠦ᠍ ᠡᠷᠬᠢᠮ ᠰᠦᠨᠡᠰᠦ᠂ ᠦᠬᠦᠭᠡᠷ ᠦ᠋ᠨ ᠰᠦᠨᠡᠰᠦ ᠭᠡᠵᠦ ᠬᠣᠶᠠᠷ ᠪᠣᠢ᠃ ᠬᠡᠷᠪᠡ ᠦᠬᠦᠭᠡᠷ ᠦ᠋ᠨ ᠰᠦᠨᠡᠰᠦ ᠪᠡᠶᠡ ᠶ᠋ᠢ ᠤᠷᠭᠢᠪᠠᠰᠤ ᠬᠥᠮᠦᠨ ᠦᠬᠦᠮᠦᠢ᠃ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠰᠦᠨᠡᠰᠦ ᠳᠠᠭᠤᠳᠠᠯᠭᠠ ᠬᠢᠪᠡᠯ ᠵᠣᠬᠢᠨᠠ》 ᠭᠡᠵᠦ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠵᠢᠭᠠᠵᠠᠢ᠃ ᠲᠡᠷᠡ ᠶᠣᠰᠣᠭᠠᠷ ᠭᠠᠪᠵᠤ ᠯᠥᠨᠳᠥᠩᠵᠤᠨᠠᠢ ᠭᠡᠰᠦᠯ ᠰᠠᠩᠵᠢ ᠶ᠋ᠢᠨ ᠦᠬᠦᠭᠡᠷ ᠦ᠋ᠨ ᠰᠦᠨᠡᠰᠦ ᠶ᠋ᠢ ᠡᠷᠭᠢᠭᠦᠯᠦᠨ ᠳᠠᠭᠤᠳᠠᠬᠤ ᠵᠠᠩ ᠦᠢᠯᠡ ᠬᠢᠵᠦ ᠡᠴᠦᠰ ᠦ᠋ᠨ ᠤᠳᠠᠭᠠ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠪᠤᠭ ᠴᠢᠳᠬᠥᠷ ᠲᠡᠢ ᠦᠵᠡᠯᠴᠡᠬᠦ ᠪᠡᠷ ᠰᠢᠢᠳᠦᠯᠡ᠃ ᠭᠠᠪᠵᠤ ᠶ᠋ᠢᠨ ᠱᠠᠪᠢ ᠨᠠᠷ᠄
– ᠶᠠᠭᠤ ᠪᠡᠯᠡᠳᠬᠦ ᠪᠣᠢ? ᠭᠡᠵᠦ ᠵᠡᠷᠭᠡ ᠵᠡᠷᠭᠡ ᠠᠰᠠᠭᠤᠯᠠ᠃
– ᠶᠢᠰᠦᠨ ᠡᠷᠯᠢᠭ ᠦ᠋ᠨ ᠶᠠᠷᠭᠠᠴᠢᠨ ᠤ᠋ ᠳᠦᠷᠰᠦ ᠶ᠋ᠢ ᠭᠤᠯᠢᠷ ᠢ᠋ᠶ᠋ᠠᠷ ᠦᠢᠯᠡᠳ᠃ ᠢᠮᠠᠭᠠᠨ ᠤ᠋ ᠴᠣᠬᠣᠷ ᠠᠷᠠᠰᠤ ᠨᠢᠭᠡ ᠶ᠋ᠢ ᠳᠥᠩᠭᠡᠵᠢ ᠪᠡᠶᠡ ᠡᠴᠡ ᠨᠢ ᠬᠠᠭᠤᠯᠤᠨ ᠠᠪᠴᠤ ᠨᠣᠢᠲᠠᠨ ᠢ᠋ᠶ᠋ᠠᠷ ᠨᠢ ᠪᠡᠯᠡᠳ᠃ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠳᠠᠷᠵᠢᠨ ᠣᠯ᠃ ᠪᠠᠰᠠ ᠦᠢᠯᠡ ᠣᠭᠣᠯᠢ᠂ ᠪᠠᠰᠠ ᠯᠠᠩᠲᠤᠤ ᠣᠯᠵᠤ ᠢᠷᠡ! ᠭᠡᠵᠦ ᠪᠠᠭᠰᠢ ᠯᠠᠮᠠ ᠲᠤᠰᠢᠶᠠᠯᠠ᠃ ᠲᠡᠳᠡᠨ ᠦ᠌ ᠬᠠᠭᠠᠰ ᠨᠢ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠭᠠᠭᠠᠯᠭᠠᠭᠰᠠᠨ ᠵᠦᠢᠯ ᠢ᠋ ᠣᠯᠬᠤ ᠪᠠᠷ ᠶᠠᠪᠤᠬᠤ ᠪᠣᠯᠬᠤ ᠳ᠋ᠤ᠌ ᠮᠥᠩᠭᠥᠨ ᠦ᠌ ᠠᠰᠠᠭᠤᠳᠠᠯ ᠳᠡᠭᠳᠡᠪᠡ᠃ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠠᠷᠠᠢᠬᠠᠨ ᠣᠢᠯᠠᠭᠠᠭᠠᠳ ᠭᠡᠯᠦᠩ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠬᠡᠳᠦᠨ ᠯᠠᠩ ᠮᠥᠩᠭᠥ ᠶ᠋ᠢ ᠲᠡᠳᠡᠨ ᠳ᠋ᠦ᠍ ᠵᠢᠭᠠᠵᠤ ᠥᠭᠴᠡᠢ᠃ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠥᠪᠡᠷ ᠢ᠋ᠶ᠋ᠡᠨ ᠰᠦᠨᠡᠰᠦ ᠳᠠᠭᠤᠳᠠᠬᠤ ᠤᠩᠰᠢᠯᠭᠠ ᠳ᠋ᠤ᠌ ᠪᠡᠯᠡᠳᠬᠡᠭᠡᠳ ᠣᠷᠣᠢ ᠡᠷᠭᠢᠵᠦ ᠢᠷᠡᠬᠦ ᠪᠡᠷ ᠶᠠᠪᠤᠯᠠ᠃ ᠤᠴᠢᠷ ᠨᠢ ᠭᠡᠪᠡᠯ ᠰᠦᠨᠡᠰᠦ ᠳᠠᠭᠤᠳᠠᠬᠤ ᠵᠠᠩ ᠦᠢᠯᠡ ᠶ᠋ᠢ ᠰᠥᠨᠢ ᠳᠤᠮᠳᠠ ᠬᠢᠳᠡᠭ ᠠᠵᠠᠢ᠃ ᠡᠷᠯᠢᠭ ᠦ᠋ᠨ ᠶᠢᠰᠦᠨ ᠶᠠᠷᠭᠠᠴᠢᠨ ᠤ᠋ ᠳᠦᠷᠰᠦ ᠶ᠋ᠢ ᠲᠦᠭᠦᠬᠡᠢ ᠭᠤᠯᠢᠷ ᠢ᠋ᠶ᠋ᠠᠷ ᠬᠢᠬᠦ ᠪᠡᠷ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠡᠳᠦᠷᠵᠢᠨ ᠮᠠᠬᠠᠷᠠᠨ ᠤᠷᠤᠯᠳᠤᠵᠤ ᠣᠷᠣᠢ ᠪᠡᠯᠡᠨ ᠪᠣᠯᠭᠠᠵᠠᠢ᠃ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠪᠡᠶᠡ ᠲᠠᠮᠢᠷᠳᠠᠨ ᠳᠣᠷᠣᠢᠲᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠪᠠᠢᠯᠠ᠃
ᠬᠠᠷᠠᠩᠭᠤᠢ ᠪᠣᠯᠬᠤ ᠳ᠋ᠤ᠌ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠢᠷᠡᠪᠡ᠃ ᠲᠡᠷᠡ ᠰᠦᠨᠡᠰᠦ ᠳᠠᠭᠤᠳᠠᠯᠭᠠ ᠶ᠋ᠢᠨ ᠨᠢᠭᠤᠴᠠ ᠨᠣᠮ ᠱᠢᠳᠢᠯ ᠭᠡᠳᠡᠭ ᠪᠢᠴᠢᠬᠠᠨ ᠰᠤᠳᠤᠷ ᠠᠪᠴᠢᠷᠠᠵᠠᠢ᠃ ᠣᠯᠪᠣᠭ ᠳᠡᠪᠢᠰᠦᠭᠦᠯᠦᠨ ᠲᠤᠬᠠᠯᠠᠨ ᠰᠠᠭᠤᠮᠠᠭᠴᠠ᠄
– ᠶᠢᠰᠦᠨ ᠶᠠᠷᠭᠠᠴᠢᠨ ᠤ᠋ ᠰᠦᠭ ᠪᠡᠯᠡᠨ ᠦᠦ? ᠭᠡᠵᠦ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠰᠦᠷᠲᠡᠢ ᠠᠰᠠᠭᠤᠯᠠ᠃ ᠱᠠᠪᠢ ᠨᠠᠷ ᠨᠢ ᠲᠦᠭᠦᠬᠡᠢ ᠭᠤᠯᠢᠷ ᠢ᠋ᠶ᠋ᠠᠷ ᠬᠢᠭᠰᠡᠨ ᠶᠢᠰᠦᠨ ᠰᠦᠭ ᠳᠦᠷᠰᠦ ᠶ᠋ᠢ ᠭᠠᠷᠭᠠᠵᠤ ᠢᠷᠡᠪᠡ᠃ ᠯᠠᠮᠠ ᠲᠣᠯᠣᠭᠠᠢ ᠳᠣᠬᠢᠵᠤ᠄
– ᠲᠦᠭᠦᠬᠡᠢ ᠴᠣᠬᠣᠷ ᠠᠷᠠᠰᠤᠨ ᠲᠤᠯᠤᠮ ᠪᠡᠯᠡᠨ ᠦᠦ? ᠭᠡᠵᠦ ᠳᠠᠬᠢᠨ ᠠᠰᠠᠭᠤᠬᠤ ᠳ᠋ᠤ᠌᠄
– ᠡᠨᠡ ᠪᠠᠢᠨᠠ ᠭᠡᠵᠡᠭᠡᠵᠦ ᠬᠤᠸᠠᠷᠠᠭ ᠤ᠋ᠳ ᠴᠣᠬᠣᠷ ᠢᠮᠠᠭᠠᠨ ᠤ᠋ ᠨᠣᠢᠲᠠᠨ ᠠᠷᠠᠰᠤᠨ ᠲᠤᠯᠤᠮ ᠥᠭᠪᠡ᠃
– ᠲᠡᠭᠡᠪᠡᠯ ᠰᠦᠭ ᠨᠦ᠍ᠭᠦᠳ ᠢ᠋ ᠨᠠᠭᠠᠳᠤ ᠲᠤᠯᠤᠮ ᠳᠣᠲᠣᠷᠠ ᠪᠠᠨ ᠬᠡᠢ᠃ ᠲᠡᠭᠡᠭᠡᠳ ᠤᠷᠲᠤ ᠳᠡᠭᠡᠰᠦ ᠪᠡᠷ ᠠᠮᠠ ᠶ᠋ᠢ ᠨᠢ ᠪᠣᠭᠣᠵᠤ᠂ ᠭᠠᠳᠠᠭᠤᠷ ᠨᠢ ᠶᠢᠰᠦ ᠳᠠᠬᠢᠨ ᠣᠷᠢᠶᠠᠭᠲᠤᠨ! ᠭᠡᠵᠦ ᠭᠠᠪᠵᠤ ᠳᠠᠭᠠᠭᠠᠯᠭᠠᠪᠠ᠃ ᠲᠡᠷᠡ ᠶᠣᠰᠣᠭᠠᠷ ᠪᠣᠯᠭᠠᠯᠠ! ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠨᠢᠭᠤᠴᠠ ᠰᠤᠳᠤᠷ ᠱᠢᠳᠢᠯ ᠭᠡᠭᠴᠢ ᠪᠡᠨ ᠨᠡᠭᠡᠭᠡᠭᠡᠳ ᠤᠩᠰᠢᠯᠭᠠ ᠪᠠᠨ ᠡᠬᠢᠯᠡᠯᠡ᠃ ᠰᠦᠭ ᠲᠡᠢ ᠲᠤᠯᠤᠮ ᠢ᠋ ᠲᠣᠭᠣᠷᠢᠭᠠᠳ ᠶᠢᠰᠦᠨ ᠬᠤᠸᠠᠷᠠᠭ ᠰᠦᠬᠡ᠂ ᠯᠠᠩᠳᠤᠤ᠂ ᠰᠡᠯᠡᠮᠡ ᠲᠡᠷᠢᠭᠦᠲᠡᠨ ᠪᠠᠷᠢᠵᠤ ᠵᠣᠭᠰᠣᠯᠠ᠃ ᠨᠢᠭᠡ ᠨᠢ ᠬᠠᠮᠢᠭᠠ ᠭᠠᠵᠠᠷ ᠠ᠋ᠴᠠ ᠬᠠᠭᠤᠴᠢᠨ ᠴᠠᠬᠢᠭᠤᠷ ᠫᠤᠤ ᠣᠯᠵᠤ ᠢᠷᠡᠵᠡᠢ᠃ ᠲᠡᠳᠡ ᠱᠠᠯᠠᠨ ᠳᠡᠭᠡᠷᠡ ᠪᠣᠭᠣᠳᠠᠯ ᠲᠠᠢ ᠬᠡᠪᠲᠡᠵᠦ ᠪᠠᠢᠭᠠ ᠴᠣᠬᠣᠷ ᠢᠮᠠᠭᠠᠨ ᠤ᠋ ᠠᠷᠠᠰᠤᠨ ᠲᠤᠯᠤᠮ ᠲᠠᠢ ᠭᠤᠯᠢᠷ ᠰᠦᠭ ᠨᠦ᠍ᠭᠦᠳ ᠢ᠋ ᠰᠦᠷᠳᠡᠶᠡ ᠪᠥᠭᠡᠳ ᠵᠠᠨᠤᠯᠲᠠᠶᠠ ᠬᠦᠷᠢᠶᠡᠯᠡᠨ ᠪᠦᠰᠡᠯᠡᠵᠦ ᠪᠠᠢᠬᠤ ᠨᠢ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠴᠡᠵᠡᠢ᠃
ᠱᠢᠲᠢᠯ ᠰᠤᠳᠤᠷ ᠢ᠋ ᠤᠩᠰᠢᠵᠤ ᠳᠠᠭᠤᠰᠬᠤ ᠳ᠋ᠤ᠌ ᠶᠢᠰᠦᠨ ᠬᠤᠸᠠᠷᠠᠭ ᠤ᠋ᠨ ᠨᠢᠭᠡ ᠨᠢ ᠲᠤᠯᠤᠮ ᠲᠠᠢ ᠰᠦᠭ ᠨᠦ᠍ᠭᠦᠳ ᠢ᠋ ᠠᠪᠴᠤ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠬᠠᠶᠠᠭᠠᠳ ᠭᠦᠶᠦᠨ ᠭᠠᠷᠪᠠ᠃ ᠠᠷᠤ ᠠ᠋ᠴᠠ ᠨᠢ ᠪᠤᠰᠤᠳ ᠬᠤᠸᠠᠷᠠᠭ ᠤ᠋ᠳ ᠬᠥᠭᠡᠭᠡᠨ ᠭᠠᠷᠴᠤ ᠭᠠᠪᠵᠤ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠭᠠᠭᠰᠠᠨ ᠶᠣᠰᠣᠭᠠᠷ ᠵᠡᠷᠯᠢᠭ ᠮᠠᠭᠤᠬᠠᠢ ᠪᠠᠷ ᠬᠠᠰᠬᠢᠷᠤᠯᠳᠤᠨ ᠳᠠᠭᠤ ᠱᠤᠤᠭᠢᠶᠠᠨ ᠳᠡᠭᠳᠡᠭᠡᠵᠦ᠂ ᠳᠣᠲᠣᠷᠠ ᠡᠪ ᠥᠭᠡᠢᠷᠬᠡᠮᠡᠷ ᠲᠡᠩᠰᠡᠯᠥᠭᠥᠯᠥᠨ ᠣᠷᠢᠯᠠᠯᠳᠤᠵᠤ ᠪᠠᠢᠰᠢᠩ ᠢ᠋ ᠭᠤᠷᠪᠠᠨᠲᠠ ᠲᠣᠭᠣᠷᠢᠭᠠᠳ ᠣᠬᠢᠨ ᠡᠭᠦᠳᠡᠨ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍ ᠡᠮᠦᠨᠡ ᠡᠴᠡ ᠨᠢ ᠤᠭᠲᠤᠨ ᠴᠠᠬᠢᠭᠤᠷ ᠫᠤᠤ ᠪᠠᠷ ᠲᠩᠷᠢ ᠥᠭᠡᠳᠡ ᠬᠡᠢ ᠫᠤᠤᠳᠠᠵᠤ᠂ ᠤᠯᠠᠩᠭᠠᠰᠤᠨ ᠬᠠᠰᠬᠢᠷᠤᠯᠳᠤᠪᠠ᠃ ᠰᠦᠭ ᠡᠭᠦᠷᠴᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠪᠠᠵᠠᠭᠳᠠᠨ ᠠᠶᠤᠬᠤ ᠳᠦᠷᠢ ᠦᠵᠡᠭᠦᠯᠵᠦ ᠲᠤᠯᠤᠮ ᠤ᠋ᠨ ᠢ᠋ᠶ᠋ᠠᠨ ᠠᠮᠠ ᠶ᠋ᠢ ᠲᠠᠢᠯᠤᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠶᠢᠰᠦᠨ ᠠᠷᠢᠮᠢ ᠶ᠋ᠢ ᠡᠭᠦᠳᠡᠨ ᠳ᠋ᠦ᠍ ᠭᠠᠵᠠᠷ ᠠᠰᠬᠠᠯᠠ᠃ ᠬᠤᠸᠠᠷᠠᠭ ᠤ᠋ᠳ ᠨᠥᠭᠥᠭᠡᠬᠢ ᠭᠤᠯᠢᠷ ᠠᠷᠢᠮᠢ ᠶ᠋ᠢ ᠲᠥᠷᠥᠭᠦᠯᠭᠡ ᠪᠡᠨ ᠬᠠᠷᠠᠵᠤ ᠤᠨᠠᠭᠰᠠᠨ ᠪᠦᠭᠦᠳᠡ ᠶ᠋ᠢ ᠨᠢ ᠠᠯᠤᠬᠠ᠂ ᠯᠠᠩᠲᠤᠤ ᠪᠠᠷ ᠪᠢᠴᠠᠯᠤᠨ ᠴᠣᠬᠢᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠠᠵᠢ᠃ ᠡᠬᠢᠨ ᠦ᠌ ᠤᠳᠠᠭᠠ ᠬᠣᠶᠠᠷᠬᠠᠨ ᠠᠷᠢᠮᠢ ᠳᠦᠷᠦᠭᠦᠯᠭᠡ ᠪᠡᠨ ᠬᠠᠷᠠᠨ ᠦᠢᠴᠢᠵᠡᠢ᠃ ᠲᠡᠭᠦᠨ ᠢ᠋ ᠠᠪᠬᠤ ᠶᠠᠭᠤᠮᠠ ᠦᠭᠡᠢ ᠪᠢᠴᠠ ᠴᠣᠬᠢᠪᠠ᠃ ᠥᠭᠡᠳᠡ ᠪᠡᠨ ᠬᠠᠷᠠᠵᠤ ᠤᠨᠠᠭᠰᠠᠨ ᠪᠣᠯ ᠲᠡᠷᠡ ᠨᠢ ᠳᠠᠬᠢᠭᠠᠳ ᠯᠠ ᠠᠪᠤᠯᠭᠠ ᠱᠠᠭᠠᠷᠳᠠᠵᠤ ᠪᠠᠢᠭᠠ ᠬᠡᠷᠡᠭ ᠭᠡᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃ ᠪᠠᠢᠰᠢᠩ ᠢ᠋ ᠭᠤᠷᠪᠠ ᠲᠣᠭᠣᠷᠢᠨ ᠢᠷᠡᠬᠦ ᠳ᠋ᠦ᠍ ᠪᠠᠰᠠ ᠯᠠ ᠡᠭᠦᠳᠡᠨ ᠳᠡᠭᠡᠷᠡ ᠫᠤᠤ ᠲᠠᠯᠪᠢᠨ ᠤᠭᠲᠤᠯᠠ᠃ ᠲᠤᠯᠤᠮ ᠠ᠋ᠴᠠ ᠰᠦᠭ ᠨᠦ᠍ᠭᠦᠳ ᠢ᠋ ᠳᠠᠬᠢᠨ ᠠᠰᠬᠠᠬᠤ ᠳ᠋ᠤ᠌ ᠲᠠᠪᠤᠨ ᠠᠷᠢᠮᠢ ᠤᠷᠤᠭᠤ ᠪᠠᠨ ᠬᠠᠷᠠᠨ ᠦᠢᠴᠢᠵᠡᠢ᠃ ᠲᠡᠳᠡᠨ ᠢ᠋ ᠪᠠᠰᠠ ᠯᠠ ᠨᠢᠴᠠ ᠴᠣᠬᠢᠯᠠ᠃ ᠣᠳᠣ ᠬᠣᠶᠠᠷᠬᠠᠨ ᠠᠷᠢᠮᠢ ᠥᠭᠡᠳᠡ ᠪᠡᠨ ᠬᠠᠷᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠲᠤᠯᠠ ᠳᠠᠬᠢᠭᠠᠳ ᠯᠠ ᠰᠢᠭᠤᠳᠠᠢᠯᠠᠨ ᠠᠪᠴᠤ ᠶᠠᠪᠤᠯᠠ᠃ ᠪᠠᠢᠰᠢᠩ ᠢ᠋ ᠳᠠᠬᠢᠭᠠᠳ ᠯᠠ ᠭᠤᠷᠪᠠᠨᠲᠠ ᠲᠣᠭᠣᠷᠢᠵᠤ᠂ ᠰᠦᠭ ᠢ᠋ ᠳᠠᠬᠢᠨ ᠭᠠᠵᠠᠷ ᠬᠠᠶᠠᠪᠠᠯ ᠠᠷᠠᠢ ᠬᠢᠵᠦ ᠴᠥᠮ ᠤᠷᠤᠭᠤᠢ ᠪᠠᠨ ᠬᠠᠷᠠᠵᠠᠢ᠃ ᠴᠥᠮ ᠢ᠋ ᠬᠣᠷᠣᠰᠤᠯᠲᠠᠢ ᠪᠠᠷ ᠨᠢᠴᠠᠯᠤᠨ ᠬᠣᠭ ᠪᠣᠯᠭᠠᠯᠠ᠃ ᠭᠤᠯᠢᠷ ᠰᠦᠭ ᠲᠦ᠍ ᠯᠡ ᠬᠠᠮᠤᠭ ᠭᠠᠢ ᠰᠢᠩᠭᠡᠭᠰᠡᠨ ᠮᠡᠲᠦ ᠰᠦᠢᠳ ᠪᠤᠯᠵᠠᠭᠠᠪᠠ᠃
– ᠴᠤᠭᠯᠠᠭᠤᠯᠵᠤ ᠠᠪᠤᠭᠠᠳ ᠬᠣᠯᠠ ᠠᠪᠠᠴᠢᠵᠤ ᠪᠤᠯᠠ! ᠲᠡᠭᠡᠭᠡᠳ ᠬᠠᠷᠠ ᠴᠢᠯᠠᠭᠤ ᠪᠠᠷ ᠳᠡᠭᠡᠷᠡ ᠡᠴᠡ ᠨᠢ ᠳᠠᠷᠤ! ᠭᠡᠵᠦ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠱᠠᠪᠢ ᠨᠠᠷ ᠲᠤ᠌ ᠪᠠᠨ ᠴᠢᠩᠳᠠᠯᠠᠨ ᠲᠤᠰᠢᠶᠠᠯᠠ᠃ ᠱᠠᠪᠢ ᠨᠠᠷ ᠨᠢ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠭᠤᠯᠢᠷ ᠰᠦᠭ ᠨᠦ᠍ᠭᠦᠳ ᠦ᠋ᠨ ᠬᠡᠯᠲᠡᠷᠬᠡᠢ ᠨᠦ᠍ᠭᠦᠳ ᠢ᠋ ᠬᠠᠮᠤᠵᠤ ᠠᠪᠤᠭᠠᠳ ᠬᠣᠯᠠ ᠠᠪᠠᠴᠢᠵᠤ ᠪᠤᠯᠠᠬᠤ ᠪᠠᠷ ᠣᠳᠤᠯᠠ᠃ ᠭᠠᠪᠵᠤ ᠲᠡᠢᠨ ᠬᠦ᠌ ᠡᠷᠭᠢᠵᠦ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡᠯ ᠰᠠᠩᠵᠢ ᠭᠡᠰᠦᠯ ᠥᠭᠡᠳᠡ ᠲᠡᠢ ᠰᠠᠢᠵᠢᠷᠠᠭᠰᠠᠨ ᠶᠠᠭᠤᠮᠠ ᠣᠭᠲᠣ ᠦᠭᠡᠢ᠃ ᠬᠠᠷᠢᠨ ᠴᠤ᠌ ᠳᠣᠷᠣᠢᠲᠠᠬᠤ ᠮᠠᠢᠭ ᠲᠠᠢ ᠬᠠᠷᠠᠭᠳᠠᠯᠠ᠃ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠰᠡᠳᠬᠢᠯ ᠵᠣᠪᠠᠵᠤ 《ᠰᠦᠨᠡᠰᠦ ᠨᠢ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠪᠠᠢᠬᠤ ᠨᠢ ᠠ᠋᠃ ᠲᠥᠭᠡᠷᠢᠵᠡᠢ᠂ ᠶᠠᠩᠵᠤ ᠨᠢ᠃ ᠣᠳᠣ ᠲᠡᠭᠡᠬᠦ ᠪᠡᠷ ᠶᠠᠭᠠᠬᠢᠬᠤ ᠪᠢᠯᠡ》 ᠭᠡᠵᠦ ᠪᠣᠳᠣᠪᠠ᠃ ᠪᠣᠳᠣᠯ ᠳ᠋ᠠᠭᠠᠨ ᠳᠠᠷᠤᠭᠳᠠᠨ ᠪᠦᠷ ᠵᠣᠪᠠᠴᠢᠬᠠᠯᠠ᠃
ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠪᠣᠯ ᠱᠠᠵᠪᠤᠲ ᠤ᠋ᠨ ᠤᠬᠠᠭᠠᠨ ᠳ᠋ᠤ᠌ ᠶᠤᠮ ᠤᠤ ᠯᠾᠠᠩᠲ᠋ᠠᠪᠴᠢᠮᠪᠠ ᠶ᠋ᠢ ᠶᠡᠷᠦ ᠰᠤᠳᠤᠯᠵᠤ ᠶᠠᠪᠤᠭᠠ ᠦᠭᠡᠢ ᠪᠣᠯᠬᠣᠷ ᠡᠪᠡᠳᠴᠢᠨ ᠢ᠋ ᠭᠠᠭᠴᠠᠬᠦ ᠰᠡᠳᠬᠢᠯ ᠦ᠋ᠨ ᠵᠠᠰᠠᠯ ᠢ᠋ᠶ᠋ᠠᠷ ᠠᠨᠠᠭᠠᠬᠤ ᠶ᠋ᠢ ᠪᠣᠳᠣᠳᠠᠭ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠯᠠ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠭᠡᠰᠦᠯ ᠰᠠᠩᠵᠢ ᠶ᠋ᠢ ᠡᠮᠴᠢᠯᠡᠬᠦ ᠶ᠋ᠢ ᠬᠦᠰᠡᠵᠡᠢ᠃ ᠲᠡᠷᠡ ᠨᠢ ᠪᠦᠲᠦᠯ ᠲᠡᠢ ᠶᠠᠭᠤᠮᠠ ᠪᠣᠯᠤᠮᠠᠷ ᠦᠭᠡᠢ ᠪᠠᠢᠪᠠ᠃ ᠱᠠᠪᠢ ᠨᠠᠷ ᠢ᠋ ᠪᠡᠨ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ᠄
– ᠵᠠ ᠬᠡᠦᠬᠡᠳ ᠦ᠋ᠳ ᠠ᠋! ᠰᠦᠨᠡᠰᠦ ᠨᠢ ᠲᠥᠭᠡᠷᠢᠴᠢᠬᠡᠭᠰᠡᠨ ᠪᠣᠯᠤᠯᠲᠠᠢ᠃ ᠲᠡᠭᠡᠬᠦ ᠪᠡᠷ ᠪᠢ ᠳᠠᠬᠢᠨ ᠳᠥᠯᠬᠢᠭᠡᠰᠦ ᠦᠵᠡᠭᠦᠯᠵᠦ ᠵᠡᠳᠬᠡᠷ ᠡᠴᠡ ᠰᠠᠯᠭᠠᠬᠤ ᠠ᠋ᠴᠠ ᠶᠠᠭᠠᠬᠢᠬᠤ ᠪᠣᠢ? ᠲᠠ ᠨᠠᠷ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠳᠠᠷᠵᠢᠨ ᠪᠡᠯᠡᠳᠬᠡᠭᠰᠡᠨ ᠦᠦ? ᠭᠡᠪᠡ᠃ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠳᠠᠷᠵᠢᠨ ᠭᠡᠳᠡᠭ ᠲᠤᠤᠵᠠ ᠶ᠋ᠢ ᠱᠠᠪᠢ ᠨᠠᠷ ᠪᠡᠯᠡᠳᠬᠡᠵᠡᠢ᠃
– ᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠣᠷᠢᠶᠠᠵᠤ ᠭᠠᠳᠠᠭᠰᠢ ᠬᠠᠭᠠᠯᠭᠠ ᠪᠠᠷ ᠭᠠᠷᠭᠠᠨ ᠳᠠᠷᠵᠢᠨ ᠢ᠋ᠶ᠋ᠠᠨ ᠳᠠᠯᠠ! ᠭᠡᠵᠦ ᠪᠠᠭᠰᠢ ᠯᠠᠮᠠ ᠨᠢ ᠵᠢᠭᠠᠪᠤᠷᠢᠯᠠᠪᠠ᠃ ᠲᠡᠷᠡ ᠶᠣᠰᠣᠭᠠᠷ ᠥᠩᠭᠡ ᠶ᠋ᠢᠨ ᠲᠤᠤᠵᠠ ᠶ᠋ᠢᠨ ᠨᠢᠭᠡ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠠᠩᠵᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠷᠢᠶᠠᠵᠤ᠂ ᠨᠥᠬᠥᠭᠡ ᠦᠵᠦᠭᠦᠷ ᠢ᠋ ᠭᠠᠳᠠᠭᠰᠢ ᠭᠠᠷᠭᠠᠯᠠ᠃
ᠯᠥᠨᠳᠥᠩᠵᠤᠨᠠᠢ ᠯᠠᠮᠠ ᠳᠠᠬᠢᠨ ᠤᠩᠰᠢᠯᠭᠠ ᠦᠢᠯᠡᠳᠴᠦ ᠡᠬᠢᠯᠡᠪᠡ᠃ ᠪᠡᠶᠡ ᠡᠴᠡ ᠳᠤᠷᠠ ᠮᠡᠳᠡᠨ ᠵᠠᠢᠯᠠᠵᠤ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠭᠠ ᠰᠦᠨᠡᠰᠦ ᠶ᠋ᠢ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠬᠦ᠂ ᠴᠢᠳᠬᠥᠷ ᠰᠢᠮᠨᠤᠰ ᠤ᠋ᠨ ᠣᠷᠣᠨ ᠢ᠋ ᠵᠦᠬᠡᠨ ᠬᠠᠷᠢᠶᠠᠬᠤ ᠵᠡᠷᠭᠡ ᠪᠡᠷ ᠭᠠᠪᠵᠤ ᠠᠰᠤᠷᠤ ᠰᠦᠷᠲᠡᠢ ᠨᠣᠮ ᠤᠩᠰᠢᠵᠤ ᠪᠠᠢᠯᠠ᠃ ᠲᠡᠷᠡ ᠬᠣᠭᠣᠷᠣᠨᠳᠣ ᠬᠡᠳᠦᠨ ᠬᠤᠸᠠᠷᠠᠭ ᠭᠠᠳᠠᠭᠠ ᠭᠠᠷᠴᠤ ᠰᠢᠪᠠᠷ ᠲᠠᠭᠠᠵᠠ ᠶ᠋ᠢ ᠡᠷᠭᠢᠨ ᠭᠤᠷᠢᠶᠠᠯᠠᠵᠤ᠂ ᠵᠠᠯᠪᠠᠷᠢᠵᠠᠭᠠᠨ᠄
– ᠢᠷᠡ! ᠢᠷᠡ! ᠢᠷᠡ! ᠭᠡᠵᠦ ᠭᠤᠩᠰᠢᠭᠢᠨᠠᠨ ᠴᠢᠷᠠᠢᠯᠠᠵᠠᠭᠠᠵᠤ ᠶᠠᠪᠤᠯᠠ᠃ ᠯᠥᠨᠳᠥᠭ᠍ᠵᠥᠨᠡᠢᠳᠡᠨ ᠤᠩᠰᠢᠯᠭᠠ ᠦᠷᠭᠦᠯᠵᠢᠯᠡᠭᠦᠯᠦᠨ ᠳᠦᠩᠭᠢᠨᠡᠭᠦᠯᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
– ᠢᠷᠡᠭᠡ ᠦᠦ! ᠢᠷᠡᠭᠡ ᠦᠦ? ᠢᠷᠡᠭᠡ ᠦᠦ? ᠭᠡᠵᠦ ᠮᠠᠰᠢ ᠴᠢᠩᠭᠠ ᠪᠠᠷ ᠬᠠᠰᠬᠢᠷᠤᠨ ᠠᠰᠠᠭᠤᠵᠠᠢ᠃ ᠭᠠᠳᠠᠭᠠ ᠪᠠᠢᠰᠢᠩ ᠲᠣᠭᠣᠷᠢᠭᠠᠳ ᠭᠤᠷᠢᠶᠠᠯᠠᠵᠤ ᠶᠠᠪᠤᠭᠰᠠᠨ ᠯᠠᠮᠠ ᠨᠠᠷ ᠲᠡᠭᠦᠨ ᠦ᠌ ᠬᠠᠷᠢᠭᠤ ᠳ᠋ᠤ᠌᠄
– ᠢᠷᠡᠪᠡ ᠠ᠋! ᠢᠷᠡᠪᠡ ᠠ᠋! ᠢᠷᠡᠪᠡ ᠠ᠋! ᠭᠡᠵᠦ ᠭᠤᠷᠪᠠᠨᠲᠠ ᠴᠢᠩᠭᠠ ᠬᠠᠰᠬᠢᠷᠤᠨ ᠬᠠᠷᠢᠭᠤ ᠥᠴᠢᠯᠡ᠃ ᠲᠡᠳᠡᠨ ᠦ᠌ ᠳᠠᠭᠤ ᠭᠠᠰᠠᠯᠬᠤ ᠮᠡᠲᠦ ᠠᠶᠠᠭᠦᠢ ᠰᠣᠨᠣᠰᠳᠠᠪᠠ᠃
ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠡᠮᠦᠨᠡᠬᠢ ᠲᠠᠪᠠᠭ ᠳᠡᠭᠡᠷᠡ ᠪᠡᠨ ᠪᠡᠯᠡᠳᠬᠡᠭᠰᠡᠨ ᠠᠷᠪᠠᠢ ᠠ᠋ᠴᠠ ᠠᠳᠬᠤᠨ ᠠᠪᠴᠤ ᠰᠠᠩᠵᠢ ᠭᠡᠰᠦᠯ ᠤᠷᠤᠭᠤ ᠲᠠᠷᠨᠢᠳᠠᠨ ᠴᠠᠴᠤᠪᠠ᠃ ᠭᠠᠳᠠᠨᠠ ᠠ᠋ᠴᠠ ᠬᠥᠮᠦᠰ ᠣᠷᠣᠵᠤ ᠢᠷᠡᠭᠡᠳ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠲᠤᠤᠵᠠ ᠶ᠋ᠢ ᠡᠪᠬᠡᠵᠦ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠬᠦᠵᠦᠭᠦᠨ ᠡᠴᠡ ᠵᠡᠭᠦᠵᠦ ᠥᠭᠪᠡ᠃
– ᠳᠣᠯᠣᠭᠠ ᠬᠣᠨᠣᠭ ᠳᠠᠷᠵᠢᠨ ᠢ᠋ ᠠᠪᠴᠤ ᠪᠣᠯᠬᠤ ᠦᠭᠡᠢ! ᠭᠡᠵᠦ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ ᠵᠢᠭᠠᠪᠤᠷᠢᠯᠠᠪᠠ᠃ ᠠᠯᠠᠭ ᠡᠷᠢᠶᠡᠨ ᠳᠠᠷᠵᠢᠨ ᠠ᠋ᠴᠠ ᠯᠠ ᠰᠢᠯᠲᠠᠭᠠᠯᠠᠬᠤ ᠶᠤᠮ ᠰᠢᠭ᠋!
ᠰᠥᠨᠢ ᠶᠡᠬᠡ ᠣᠷᠣᠢ ᠪᠣᠯᠤᠭᠰᠠᠨ ᠲᠤᠯᠠ ᠡᠪᠡᠳᠴᠢᠲᠡᠨ ᠢ᠋ ᠮᠥᠨ ᠯᠡ ᠣᠷᠬᠢᠵᠤ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠪᠤᠵᠠᠭᠠᠯᠠ᠃《ᠣᠳᠣ ᠰᠠᠩᠵᠢ ᠶ᠋ᠢᠨ ᠰᠦᠨᠡᠰᠦ ᠠᠷᠭᠠ ᠦᠭᠡᠢ ᠯᠡ ᠨᠢᠭᠡ ᠪᠤᠴᠠᠵᠤ ᠢᠷᠡᠭᠡ ᠪᠢᠵᠡ ᠳᠡ᠃ ᠶᠠᠭᠤ ᠪᠣᠳᠣᠵᠤ ᠶᠠᠪᠤᠵᠤ ᠰᠦᠨᠡᠰᠦ ᠨᠢ ᠵᠠᠢᠯᠠᠨ ᠲᠥᠭᠡᠷᠢᠳᠡᠭ ᠶᠦᠮ ᠪᠣᠢ ᠳᠠ》 ᠭᠡᠵᠦ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠪᠠᠷᠤᠭ ᠢᠵᠢᠯ ᠪᠣᠳᠣᠯ ᠲᠠᠢ ᠪᠠᠢᠯᠠ᠃ ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠳᠠᠩᠰᠠᠯᠠᠵᠤ ᠰᠢᠨᠠᠯᠤᠭᠰᠠᠨ ᠢ᠋ᠶ᠋ᠠᠨ ᠨᠥᠬᠥᠳ ᠲᠦ᠍ ᠪᠡᠨ ᠬᠡᠯᠡᠭᠰᠡᠨ ᠪᠣᠯ ᠲᠡᠳᠡ ᠠᠷᠭᠠ ᠦᠭᠡᠢ ᠯᠡ ᠵᠠᠢᠯᠬᠤ ᠪᠠᠢᠵᠤ ᠭᠡᠵᠦ ᠢᠲᠡᠭᠡᠬᠦ ᠳ᠋ᠦ᠍ ᠬᠦᠷᠬᠦ ᠨᠢ ᠯᠠᠪᠲᠠᠢ ᠪᠢᠯᠡ᠃ ᠨᠤᠮᠨᠡᠢ ᠰᠠᠬᠢᠭᠰᠠᠨ ᠠ᠋ᠴᠠ ᠪᠡᠶᠡ ᠮᠠᠭᠤᠳᠠᠵᠤ ᠰᠦᠨᠡᠰᠦ ᠵᠠᠢᠯᠠᠭᠰᠠᠨ ᠭᠡᠪᠡᠯ ᠲᠡᠳᠡ ᠣᠭᠲᠣ ᠢᠲᠡᠭᠡᠬᠦ ᠦᠭᠡᠢ ᠯᠡ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠦᠨᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠠᠷᠪᠠᠨ ᠵᠢᠷᠭᠤᠭᠠ ᠬᠣᠨᠣᠭ ᠤ᠋ᠨ ᠥᠯᠥᠰᠬᠦᠯᠡᠩ ᠦ᠋ᠨ ᠭᠠᠷ ᠢ᠋ ᠰᠠᠩᠵᠢ ᠭᠡᠰᠦᠯ ᠳᠠᠭᠠᠭᠠᠭᠠ ᠦᠭᠡᠢ ᠴᠦ᠍ ᠶᠦᠮ ᠪᠢᠯᠡ ᠤᠤ᠂ ᠪᠤᠤ ᠮᠡᠳᠡ᠃ ᠶᠠᠮᠠᠷ ᠴᠤ᠌ ᠭᠡᠰᠡᠨ ᠪᠡᠶᠡ ᠶᠡᠬᠡᠬᠡᠨ ᠰᠤᠯᠠᠷᠠᠵᠤ ᠳᠣᠷᠣᠢᠲᠠᠵᠠᠢ᠃ ᠯᠥᠨᠳᠥᠩᠵᠤᠨᠠᠢ ᠭᠠᠪᠵᠤ᠂ ᠱᠠᠪᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠪᠠᠷ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠠᠮᠢ ᠶ᠋ᠢ ᠠᠪᠤᠷᠠᠬᠤ᠂ ᠰᠦᠨᠡᠰᠦ ᠶ᠋ᠢ ᠨᠢ ᠪᠤᠴᠠᠭᠠᠵᠤ ᠳᠠᠭᠤᠳᠠᠬᠤ ᠲᠠᠯᠠ ᠪᠠᠷ ᠴᠢᠳᠠᠬᠤ ᠪᠦᠬᠦᠨ ᠢ᠋ᠶ᠋ᠡᠨ ᠬᠢᠵᠡᠢ᠃ ᠣᠳᠣ ᠭᠠᠭᠴᠠᠬᠠᠨ ᠰᠠᠩᠵᠢ ᠶ᠋ᠢᠨ ᠡᠮᠦᠨᠡ ᠡᠴᠡ ᠬᠡᠨ ᠨᠢᠭᠡᠨ ᠢ᠋ ᠵᠣᠯᠢᠭ ᠲᠤ᠌ ᠭᠠᠷᠭᠠᠬᠤ ᠦᠯᠡᠲᠡᠯᠡ᠃ ᠭᠡᠪᠡᠴᠦ ᠨᠡᠷᠡ ᠠᠯᠳᠠᠷ ᠦᠭᠡᠢ᠂ ᠥᠴᠦᠬᠡᠨ ᠭᠡᠰᠦᠯ ᠦ᠋ᠨ ᠲᠥᠯᠥᠭᠡ ᠬᠡᠨ ᠴᠦ᠍ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠨᠢ ᠲᠣᠳᠣᠷᠬᠠᠢ ᠪᠢᠯᠡ᠃ ᠭᠠᠭᠴᠠᠬᠦ ᠵᠠᠶᠠᠭᠠ ᠮᠡᠳᠡᠭᠰᠡᠨ ᠬᠡᠷᠡᠭ ᠪᠣᠯᠵᠠᠢ᠃