ᡂᠢ ᠢᠦᠢ ᠶᠢᠨ ᠪᠠᠢᠯᠳᠤᠭᠠᠨ ( ᠬᠡᠯᠡ ᠪᠢᠴᠢᠭ – ᠳᠣᠯᠣᠳᠤᠭᠠᠷ ᠳᠡᠪᠲᠡᠷ） Чи юйн байлдаан（ Хэл бичиг – Долдугар дэвтэр）
264ᡂᠢ ᠢᠦᠢ ᠶᠢᠨ ᠪᠠᠢᠯᠳᠤᠭᠠᠨ
ᠵᠡᠭᠦᠨ ᠬᠠᠨ ᠤᠯᠤᠰ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠳ᠋ᠦ᠍᠂ ᠼᠤᠤ ᠼᠤᠤ ᠬᠥᠬᠡ ᠮᠥᠷᠡᠨ ᠦ᠌ ᠡᠮᠦᠨᠡ ᠳ᠋ᠡᠬᠢ ᠵᠡᠭᠦᠨ ᠡᠦ ᠤᠯᠤᠰ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠢ᠋ ᠪᠤᠯᠢᠶᠠᠨ ᠡᠵᠡᠯᠡᠷᠡ ᠶᠡᠬᠡ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠡᠮᠦᠨᠡᠰᠢ ᠣᠷᠣᠪᠠ᠃ ᠵᠡᠭᠦᠨ ᠡᠦ ᠤᠯᠤᠰ ᠤ᠋ᠨ ᠵᠧᠦ ᠢᠦᠢ ᠴᠡᠷᠢᠭ ᠵᠠᠩᠵᠤᠨ ᠲᠣᠮᠢᠯᠠᠵᠤ᠂ ᡂᠢ ᠪᠢ ᠳ᠋ᠦ᠍ ᠪᠠᠭᠤᠳᠠᠯᠯᠠᠨ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠲᠡᠢ ᠮᠥᠷᠡᠨ ᠠᠯᠤᠰᠯᠠᠨ ᠡᠰᠡᠷᠭᠦᠯᠡᠵᠦ᠂ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠮᠥᠷᠡᠨ ᠦ᠌ ᠬᠣᠢᠲᠤ ᠡᠷᠭᠢ ᠳ᠋ᠦ᠍᠂ ᠵᠧᠦ ᠢᠦᠢ ᠶ᠋ᠢᠨ ᠴᠡᠷᠢᠭ ᠮᠥᠷᠡᠨ ᠦ᠌ ᠡᠮᠦᠨᠡᠲᠦ ᠡᠷᠭᠢ ᠳ᠋ᠦ᠍ ᠪᠠᠢᠪᠠ᠃
ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠴᠥᠮ ᠤᠮᠠᠷᠠᠲᠤ ᠭᠠᠵᠠᠷ ᠤ᠋ᠨ ᠬᠥᠮᠦᠰ ᠲᠤᠯᠠ ᠣᠩᠭᠣᠴᠠᠨ ᠳ᠋ᠤ᠌ ᠰᠠᠭᠤᠵᠤ ᠳᠠᠰᠤᠭᠠᠳᠤᠢ ᠠᠵᠠᠢ᠃ ᠭᠡᠪᠡᠴᠦ ᠥᠷᠭᠡᠨ ᠮᠥᠷᠡᠨ ᠢ᠋ ᠭᠠᠲᠤᠯᠬᠤ ᠳ᠋ᠤ᠌ ᠡᠷᠬᠡᠪᠰᠢ ᠣᠩᠭᠣᠴᠠᠨ ᠳ᠋ᠤ᠌ ᠰᠠᠭᠤᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ᠃ ᠼᠤᠤ ᠼᠤᠤ ᠮᠠᠰᠢ ᠣᠯᠠᠨ ᠣᠩᠭᠣᠴᠠ ᠶ᠋ᠢ ᠲᠡᠮᠦᠷ ᠭᠢᠨᠵᠢ ᠪᠡᠷ ᠬᠣᠯᠪᠣᠭᠤᠯᠤᠭᠠᠳ ᠳᠡᠭᠡᠷᠡ ᠨᠢ ᠪᠠᠩᠰᠠ ᠳᠡᠪᠢᠰᠴᠦ ᠲᠡᠭᠰᠢ ᠭᠠᠵᠠᠷ ᠠᠳᠠᠯᠢ ᠪᠣᠯᠭᠠᠵᠠᠢ᠃ ᠴᠡᠷᠢᠭ ᠦ᠋ᠳ ᠨᠢ ᠮᠥᠷᠡᠨ ᠳᠡᠭᠡᠷᠡ ᠪᠠᠢᠯᠳᠤᠵᠤ ᠰᠣᠷᠣᠮᠠᠭᠴᠠ ᠼᠤᠤ ᠼᠤᠤ ᠮᠥᠷᠡᠨ ᠢ᠋ ᠭᠠᠲᠤᠯᠤᠨ ᠳᠠᠭᠠᠷᠢᠬᠤ ᠪᠠᠷ ᠬᠦᠯᠢᠶᠡᠵᠦ ᠪᠠᠢᠪᠠ᠃
ᠵᠧᠦ ᠢᠦᠢ ᠶ᠋ᠢᠨ ᠭᠠᠷ ᠳᠣᠣᠷᠠᠬᠢ ᠡᠪᠦᠭᠡᠨ ᠵᠠᠩᠵᠤᠨ ᠬᠤᠸᠠᠩ ᠭᠠᠢ ᠬᠡᠯᠡᠪᠡ᠄《 ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠨᠠᠶᠠᠨ ᠲᠦᠮᠡ᠂ ᠪᠢᠳᠡᠨ ᠦ᠌ ᠴᠡᠷᠢᠭ ᠭᠤᠷᠪᠠᠬᠠᠨ ᠲᠦᠮᠡ᠂ ᠬᠦᠴᠦᠨ ᠮᠠᠰᠢ ᠶᠡᠬᠡ ᠵᠥᠷᠢᠶᠡ ᠲᠡᠢ᠃ ᠲᠡᠳᠡᠨ ᠲᠡᠢ ᠤᠳᠠᠭᠠᠨ ᠪᠠᠢᠯᠳᠤᠪᠠᠯ ᠪᠢᠳᠡᠨ ᠳ᠋ᠦ᠍ ᠠᠰᠢᠭ ᠦᠭᠡᠢ᠃ ᠲᠡᠳᠡ ᠣᠩᠭᠣᠴᠠ ᠪᠠᠨ ᠲᠣᠯᠣᠭᠠᠢ ᠰᠡᠭᠦᠯ ᠢ᠋ ᠨᠢ ᠬᠣᠯᠪᠣᠵᠤ ᠴᠥᠮ ᠢ᠋ ᠦᠷᠭᠦᠯᠵᠢ ᠪᠣᠯᠭᠠᠭᠰᠠᠨ ᠲᠤᠯᠠ ᠭᠠᠭᠴᠠ ᠬᠦ᠌ ᠭᠠᠯ ᠢ᠋ᠶ᠋ᠠᠷ ᠳᠠᠭᠠᠷᠢᠬᠤ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠪᠡᠯ ᠲᠡᠳᠡ ᠳᠤᠲᠠᠭᠠᠪᠠᠴᠤ ᠳᠤᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ》 ᠭᠡᠪᠡ᠃
ᠵᠧᠦ ᠢᠦᠢ ᠬᠡᠯᠡᠭᠰᠡᠨ ᠨᠢ᠄《 ᠡᠨᠡ ᠠᠷᠭᠠ ᠮᠠᠰᠢ ᠰᠠᠢᠨ᠂ ᠭᠡᠪᠡᠴᠦ ᠭᠠᠯ ᠢ᠋ᠶ᠋ᠠᠷ ᠶᠠᠭᠠᠬᠢᠨ ᠳᠠᠭᠠᠷᠢᠬᠤ ᠠᠷᠭᠠ ᠪᠠᠨ ᠰᠠᠢᠲᠤᠷ ᠪᠣᠳᠣᠬᠤ ᠬᠡᠷᠡᠭᠲᠡᠢ 》ᠭᠡᠪᠡ᠃ 《ᠠᠷᠭᠠ ᠤᠬᠠᠭᠠᠨ ᠢ᠋ ᠨᠢᠭᠡᠨᠲᠡ ᠪᠣᠳᠣᠵᠤ ᠭᠠᠷᠭᠠᠪᠠ》 ᠭᠡᠮᠡᠨ ᠬᠤᠸᠠᠩ ᠭᠠᠢ ᠪᠣᠳᠣᠭᠰᠠᠨ ᠠᠷᠭᠠ ᠪᠠᠨ ᠵᠧᠦ ᠢᠦᠢ ᠳ᠋ᠦ᠍ᠷ ᠬᠡᠯᠡᠪᠡᠰᠦ ᠵᠧᠦ ᠢᠦᠢ ᠰᠣᠨᠣᠰᠤᠭᠠᠳ ᠠᠯᠠᠰᠬᠢᠨ ᠪᠠᠶᠠᠷᠯᠠᠵᠤ ᠲᠡᠷᠡ ᠶᠣᠰᠣᠭᠠᠷ ᠬᠢᠲᠦᠭᠡᠢ ᠭᠡᠪᠡ᠃
ᠬᠤᠸᠠᠩ ᠭᠠᠢ᠂ ᠼᠤᠤ ᠼᠤᠤ ᠳ᠋ᠤ᠌ ᠵᠠᠬᠢᠳᠠᠯ ᠪᠢᠴᠢᠵᠦ ᠬᠥᠮᠦᠨ ᠲᠣᠮᠢᠯᠠᠨ ᠬᠦᠷᠭᠡᠭᠦᠯᠪᠡ᠃ ᠵᠠᠬᠢᠳᠠᠯ ᠳ᠋ᠠᠭᠠᠨ᠄ ᠡᠦ ᠤᠯᠤᠰ ᠤ᠋ᠨ ᠴᠡᠷᠢᠭ ᠴᠥᠭᠡᠨ ᠲᠤᠯᠠ ᠨᠠᠶᠠᠨ ᠲᠦᠮᠡᠨ ᠶᠡᠬᠡ ᠴᠡᠷᠢᠭ ᠢ᠋ ᠬᠡᠷᠬᠢᠪᠡᠴᠦ ᠬᠣᠷᠢᠭᠯᠠᠵᠤ ᠳᠡᠢᠯᠬᠦ ᠦᠭᠡᠢ᠃ ᠵᠧᠦ ᠢᠦᠢ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ᠂ ᠥᠨᠳᠡᠭᠡ ᠪᠡᠷ ᠴᠢᠯᠠᠭᠤ ᠴᠣᠬᠢᠬᠤ ᠭᠡᠵᠦ ᠪᠠᠢᠬᠤ ᠲᠤᠯᠠ ᠳᠡᠢᠯᠦᠭᠳᠡᠨᠡ ᠭᠡᠳᠡᠭ ᠢ᠋ ᠬᠡᠨ ᠴᠦ᠍ ᠪᠦᠷ ᠮᠡᠳᠡᠵᠦ ᠪᠣᠢ᠃ ᠮᠢᠨᠦ ᠪᠡᠶᠡ ᠵᠡᠭᠦᠨ ᠡᠦ ᠤᠯᠤᠰ ᠠ᠋ᠴᠠ ᠰᠠᠯᠵᠤ ᠮᠠᠰᠢ ᠣᠯᠠᠨ ᠴᠡᠷᠢᠭ ᠬᠢᠭᠡᠳ ᠬᠦᠨᠡᠰᠦ ᠪᠣᠷᠳᠣᠭᠠ ᠶ᠋ᠢ ᠠᠪᠴᠤ ᠲᠠᠨ ᠳ᠋ᠤ᠌ ᠳᠠᠭᠠᠬᠤ ᠪᠠᠷ ᠣᠴᠢᠨᠠ ᠭᠡᠵᠦ ᠪᠢᠴᠢᠵᠡᠢ᠃
ᠬᠤᠸᠠᠩ ᠭᠠᠢ ᠶ᠋ᠢᠨ ᠵᠠᠬᠢᠳᠠᠯ ᠢ᠋ ᠦᠵᠡᠭᠡᠳ ᠼᠤᠤ ᠼᠤᠤ ᠶᠡᠬᠡᠳᠡ ᠪᠠᠶᠠᠷᠯᠠᠪᠠ᠃
ᠨᠢᠭᠡᠨ ᠡᠳᠦᠷ ᠮᠥᠷᠡᠨ ᠳᠡᠭᠡᠷᠡ ᠵᠡᠭᠦᠨ ᠡᠮᠦᠨᠡ ᠶ᠋ᠢᠨ ᠰᠠᠯᠬᠢᠨ ᠰᠢᠷᠦᠭᠦᠰᠴᠦ ᠠᠭᠤᠯᠠ ᠮᠡᠲᠦ ᠳᠠᠪᠠᠯᠭᠠᠨ ᠪᠣᠰᠤᠨ ᠬᠣᠢᠲᠤ ᠡᠷᠭᠢ ᠤᠷᠤᠭᠤ ᠪᠠᠨ ᠴᠠᠯᠭᠢᠯᠠᠪᠠ᠃ ᠼᠤᠤ ᠼᠤᠤ ᠰᠠᠯᠬᠢᠨ ᠢ᠋ ᠡᠰᠡᠷᠭᠦᠯᠡᠨ ᠪᠠᠷᠠᠯᠠᠨ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠨᠢᠭᠡ ᠬᠤᠶᠠᠭ ᠬᠤᠷᠤᠭᠤ ᠪᠠᠷ ᠵᠢᠭᠠᠵᠤ᠄《 ᠮᠥᠷᠡᠨ ᠦ᠌ ᠡᠮᠦᠨᠡ ᠵᠠᠬᠠ ᠠ᠋ᠴᠠ ᠨᠢᠭᠡᠨ ᠬᠡᠰᠡᠭ ᠳᠠᠷᠪᠠᠭᠤᠯ ᠰᠠᠯᠬᠢᠨ ᠳ᠋ᠤ᠌ ᠫᠦᠩᠬᠦᠢᠵᠦ᠂ ᠨᠠᠭᠠᠰᠢᠯᠠᠬᠤ ᠨᠢ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠵᠤ ᠪᠣᠢ》 ᠬᠡᠮᠡᠪᠡ᠃ ᠼᠤᠤ ᠼᠤᠤ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠪᠠᠰᠤ ᠦᠨᠡᠬᠡᠷ ᠨᠢᠭᠡᠨ ᠠᠩᠭᠢ ᠣᠩᠭᠣᠴᠠ ᠬᠣᠢᠲᠤ ᠡᠷᠭᠢ ᠶ᠋ᠢ ᠴᠢᠭᠯᠡᠨ ᠢᠷᠡᠪᠡ᠃ ᠲᠦᠳᠡᠯ ᠦᠭᠡᠢ ᠮᠥᠷᠡᠨ ᠦ᠌ ᠳᠤᠮᠳᠠ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠣᠩᠭᠣᠴᠠᠨ ᠤ᠋ ᠬᠣᠰᠢᠭᠤ ᠳ᠋ᠤ᠌《 ᠬᠤᠸᠠᠩ》 ᠥᠰᠥᠭᠲᠦ ᠳᠠᠯᠪᠠᠭᠠ ᠡᠯᠭᠦᠵᠦ ᠪᠠᠢᠬᠤ ᠨᠢ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠪᠠ᠃ ᠼᠤᠤ ᠼᠤᠤ ᠢᠨᠢᠶᠡᠵᠦ᠄《 ᠬᠤᠸᠠᠩ ᠭᠠᠢ ᠦᠭᠡ ᠪᠡᠨ ᠮᠡᠯᠵᠢᠭᠰᠡᠨ ᠦᠭᠡᠢ᠂ ᠳᠠᠭᠠᠬᠤ ᠪᠠᠷ ᠢᠷᠡᠪᠡ》 ᠭᠡᠪᠡ᠃
ᠰᠠᠯᠬᠢ ᠤᠷᠤᠭᠤ ᠢᠷᠡᠵᠦ ᠪᠠᠢᠭᠠ ᠣᠩᠭᠣᠴᠠ ᠨᠤᠭᠤᠳ ᠦᠨᠡᠬᠡᠷ ᠬᠤᠸᠠᠩ ᠭᠠᠢ ᠶ᠋ᠢᠨ ᠣᠩᠭᠣᠴᠠ ᠮᠥᠨ ᠪᠠᠢᠪᠠ᠃ ᠨᠡᠢᠲᠡ ᠬᠣᠷᠢᠨ ᠶᠡᠬᠡ ᠣᠩᠭᠣᠴᠠ ᠪᠣᠢ᠃ ᠡᠳᠡᠭᠡᠷ ᠣᠩᠭᠣᠴᠠ ᠶ᠋ᠢ ᠴᠥᠮ ᠣᠷᠬᠢᠭᠤᠯ ᠢ᠋ᠶ᠋ᠠᠷ ᠪᠦᠲᠡᠭᠡᠵᠡᠢ᠃ ᠳᠣᠲᠣᠷᠠ ᠨᠢ ᠰᠠᠭᠤᠭᠰᠠᠨ ᠴᠡᠷᠢᠭ ᠦᠭᠡᠢ᠂ ᠬᠦᠨᠡᠰᠦ ᠪᠣᠷᠳᠣᠭᠠ ᠴᠤ᠌ ᠲᠡᠭᠡᠭᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠵᠡᠭᠡᠰᠦ᠂ ᠬᠠᠭᠤᠷᠠᠢ ᠲᠦᠯᠡᠭᠡ ᠠᠴᠢᠵᠤ ᠳᠡᠭᠡᠷᠡ ᠡᠴᠡ ᠨᠢ ᠱᠣᠣ᠂ ᠬᠦᠬᠦᠷ ᠠᠰᠬᠠᠭᠰᠠᠨ ᠠᠵᠠᠢ᠃ ᠶᠡᠬᠡ ᠣᠩᠭᠣᠴᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠬᠡᠳᠦᠨ ᠵᠠᠪᠢ ᠴᠦᠷᠬᠦᠯᠡᠭᠰᠡᠨ ᠪᠠᠢᠪᠠ᠃
ᠬᠤᠸᠠᠩ ᠭᠠᠢ ᠶ᠋ᠢᠨ ᠣᠩᠭᠣᠴᠠ ᠳᠠᠷᠪᠠᠭᠤᠯ ᠢ᠋ᠶ᠋ᠠᠨ ᠭᠦᠢᠴᠡᠳ ᠳᠡᠯᠭᠡᠵᠦ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠬᠤᠷᠳᠤᠨ ᠣᠷᠣᠭᠰᠢ ᠳᠠᠪᠰᠢᠨᠠ᠃ ᠵᠧᠦ ᠢᠦᠢ ᠴᠡᠷᠢᠭ ᠠᠪᠴᠤ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠪᠠᠢᠪᠠ᠃ ᠲᠡᠷᠲᠡᠭᠡ ᠡᠷᠭᠢ ᠳ᠋ᠡᠬᠢ ᠼᠤᠤ ᠼᠤᠤ ᠵᠥᠪᠬᠡᠨ ᠬᠤᠸᠠᠩ ᠭᠠᠢ ᠶ᠋ᠢ ᠳᠠᠭᠠᠬᠤ ᠪᠠᠷ ᠢᠷᠡᠪᠡ ᠭᠡᠮᠡᠨ ᠪᠠᠶᠠᠷᠯᠠᠭᠰᠠᠨ ᠠ᠋ᠴᠠ ᠪᠢᠰᠢ ᠶᠠᠮᠠᠷ ᠴᠤ᠌ ᠪᠡᠯᠡᠳᠬᠡᠯ ᠦᠭᠡᠢ ᠪᠠᠢᠵᠠᠢ᠃
ᠬᠤᠸᠠᠩ ᠭᠠᠢ ᠶ᠋ᠢᠨ ᠣᠩᠭᠣᠴᠠ ᠼᠤᠤ ᠼᠤᠤ ᠶ᠋ᠢᠨ ᠣᠩᠭᠣᠴᠠᠨ ᠳ᠋ᠤ᠌ ᠬᠣᠶᠠᠷ ᠭᠠᠵᠠᠷ ᠵᠠᠢ ᠲᠠᠢ ᠣᠢᠷᠠᠲᠤᠮᠠᠭᠴᠠ ᠪᠠᠨ ᠴᠡᠷᠢᠭ ᠲᠡᠭᠡᠨ ᠵᠠᠷᠯᠠᠨ ᠬᠣᠷᠢᠨ ᠣᠩᠭᠣᠴᠠ ᠵᠡᠭᠡᠰᠦ ᠪᠡᠨ ᠨᠢᠭᠡᠨ ᠵᠡᠷᠭᠡ ᠨᠣᠴᠣᠭᠠᠵᠤ ᠥᠪᠡᠷᠰᠡᠳ ᠢᠶᠠᠨ ᠵᠠᠪᠢ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠴᠦᠷᠬᠦ ᠶ᠋ᠢ ᠲᠠᠢᠯᠪᠠ᠃ ᠬᠣᠷᠢᠨ ᠣᠩᠭᠣᠴᠠ ᠭᠠᠯ ᠭᠱᠠᠨ ᠵᠠᠭᠤᠷᠠ ᠼᠤᠤ ᠼᠤᠤ ᠶ᠋ᠢᠨ ᠣᠩᠭᠣᠴᠠ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠪᠠ᠃ ᠼᠤᠤ ᠼᠤᠤ ᠶ᠋ᠢᠨ ᠣᠩᠭᠣᠴᠠ ᠨᠢᠭᠡᠨ ᠳᠣᠣᠷᠠ ᠴᠥᠮ ᠭᠠᠯ ᠠᠪᠤᠯᠴᠠᠨ ᠰᠢᠲᠠᠪᠠ᠃ ᠣᠩᠭᠣᠴᠠ ᠶ᠋ᠢ ᠪᠦᠷ ᠲᠡᠮᠦᠷ ᠭᠢᠨᠵᠢ ᠪᠡᠷ ᠬᠣᠯᠪᠣᠵᠤ ᠪᠠᠢᠭᠰᠠᠨ ᠲᠤᠯᠠ ᠰᠠᠯᠵᠤ ᠲᠠᠷᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠭᠠᠯ ᠪᠠᠰᠠ ᠡᠷᠭᠢ ᠳᠡᠭᠡᠷᠡ ᠦᠷᠪᠢᠰᠦᠨ ᠬᠦᠷᠴᠦ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠴᠦ᠍ ᠨᠣᠴᠣᠵᠤ ᠡᠬᠢᠯᠡᠪᠡ᠃
ᠭᠠᠯ ᠤ᠋ᠨ ᠭᠡᠷᠡᠯ ᠭᠠᠵᠠᠷ ᠲᠩᠷᠢ ᠶ᠋ᠢ ᠭᠦᠨ ᠤᠯᠠᠭᠠᠨ ᠪᠣᠯᠭᠠᠵᠤ ᠭᠠᠰᠢᠭᠤᠨ ᠬᠠᠷᠠ ᠤᠲᠤᠭᠠ ᠮᠥᠷᠡᠨ ᠢ᠋ ᠪᠦᠷᠬᠦᠵᠦ᠂ ᠤᠰᠤ ᠡᠷᠭᠢ ᠬᠣᠶᠠᠷ ᠨᠢ ᠢᠯᠭᠠᠷᠠᠨ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠤᠬᠢᠯᠠᠬᠤ ᠳᠠᠭᠤᠨ ᠴᠢᠷᠠᠯᠠᠬᠤ ᠳᠠᠭᠤᠨ ᠬᠤᠳᠬᠤᠯᠳᠤᠨ ᠦᠢᠮᠡᠵᠦ᠂ ᠼᠤᠤ ᠼᠤᠤ ᠶ᠋ᠢᠨ ᠬᠤᠶᠠᠭ ᠠᠭᠲᠠ ᠬᠣᠶᠠᠷ ᠤ᠋ᠨ ᠰᠢᠳᠡᠵᠦ ᠦᠬᠦᠭᠰᠡᠨ ᠨᠢ ᠲᠣᠭᠠ ᠦᠭᠡᠢ᠃
ᠼᠤᠤ ᠼᠤᠤ ᠵᠠᠪᠢ ᠳ᠋ᠤ᠌ ᠰᠠᠭᠤᠨ ᠡᠷᠭᠢ ᠳᠡᠭᠡᠷᠡ ᠳᠤᠲᠠᠭᠠᠨ ᠭᠠᠷᠪᠠ᠃ ᠠᠷᠤ ᠠ᠋ᠴᠠ ᠨᠢ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠭᠠᠵᠠᠷ ᠲᠩᠷᠢ ᠶ᠋ᠢ ᠳᠣᠩᠰᠣᠯᠭᠠᠨ ᠨᠢᠵᠢᠭᠢᠨᠡᠵᠦ᠂ ᠵᠧᠦ ᠢᠦᠢ ᠶ᠋ᠢᠨ ᠴᠡᠷᠢᠭ ᠨᠡᠬᠡᠨ ᠢᠷᠡᠵᠡᠢ᠃ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ᠂ ᠵᠧᠦ ᠢᠦᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠠᠷᠠ ᠪᠠᠷ ᠰᠠᠷᠨᠢᠨ ᠪᠤᠲᠠᠷᠠᠵᠤ ᠬᠤᠶᠠᠭ ᠳᠤᠭᠤᠯᠠᠭᠠ ᠪᠠᠨ ᠭᠡᠭᠡᠨ ᠳᠤᠲᠠᠭᠠᠵᠤ᠂ ᠡᠰᠡᠷᠭᠦᠴᠡᠨ ᠪᠠᠢᠯᠳᠤᠬᠤ ᠰᠡᠳᠬᠢᠯ ᠣᠭᠲᠣᠬᠠᠨ ᠴᠤ᠌ ᠦᠭᠡᠢ᠃ ᠼᠤᠤ ᠼᠤᠤ ᠴᠡᠷᠢᠭ ᠢᠶᠠᠨ ᠳᠠᠭᠠᠭᠤᠯᠤᠨ ᠬᠤᠸᠠ ᠿᠦᠩ ᠳ᠋ᠣᠣ ᠵᠦᠭ ᠪᠤᠷᠤᠭᠤᠯᠠᠪᠠ᠃
※ᠢᠷᠡᠯᠲᠡ ᠄
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠳᠣᠯᠣᠳᠤᠭᠠᠷ ᠳᠡᠪᠲᠡᠷ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1991 ᠣᠨ ᠤ᠋ 3 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1993 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ᠃
ᠦᠨᠡ᠄1.40 ᠲᠥᠭᠥᠷᠢᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠦᠷᠢᠨᠴᠡᠴᠡᠭ
ᠦᠰᠦᠭ ᠬᠢᠨᠠᠭᠴᠢ᠄ ᠳ · ᠣᠶᠤᠨᠴᠡᠴᠡᠭ