ᠥᠬᠢᠨ ᠳ᠋ᠦ᠍ ᠪᠡᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ– ᠷ᠂ ᠴᠣᠢᠨᠣᠮОхиндоо бичсэн захидал– Р᠂ Чойном-Choinom Ohindo Bichsen Zahidal
1024ᠥᠬᠢᠨ ᠳ᠋ᠦ᠍ ᠪᠡᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ
ᠴᠣᠢᠨᠣᠮ
ᠡᠨᠡ ᠯᠡ ᠨᠠᠰᠤᠨ ᠤ᠋ ᠮᠢᠨᠢ ᠭᠠᠷ ᠪᠢᠴᠢᠮᠡᠯ ᠦ᠋ᠨ
ᠡᠴᠦᠰ ᠲᠦ᠋ᠨᠢ ᠲᠠᠯᠪᠢᠭᠰᠠᠨ ᠴᠠᠭ ᠰᠢᠭ᠋
ᠡᠨᠡ ᠬᠢᠵᠠᠭᠠᠷ ᠦᠭᠡᠢ ᠣᠷᠴᠢᠯᠠᠩ ᠤ᠋ᠨ ᠵᠠᠢ ᠳ᠋ᠤ᠌
ᠡᠰ ᠰᠢᠷᠭᠢᠭ ᠪᠣᠯᠤᠩᠬᠠᠨ ᠦᠯᠡᠳᠡᠬᠦ
ᠡᠷᠡ ᠪᠡᠶᠡ ᠶ᠋ᠢᠨ ᠮᠢᠨᠢ ᠥᠬᠢᠨ ᠬᠡᠯᠲᠡᠷᠬᠡᠢ
ᠡᠷᠳᠡᠨᠢ ᠮᠡᠲᠦ ᠦᠷᠡ ᠮᠢᠨᠢ ᠠ᠋!
ᠤᠨᠤᠭᠠ ᠠᠯᠳᠠᠭᠠ ᠬᠣᠶᠠᠷ ᠠᠯᠠᠭᠯᠠᠬᠤ
ᠣᠷᠴᠢᠯᠠᠩ ᠤ᠋ᠨ ᠳᠠᠩᠰᠠᠨ ᠤ᠋ ᠲᠠᠪᠠᠭ ᠤ᠋ᠨ ᠳᠡᠭᠡᠷᠡ
ᠣᠷᠴᠢᠨ ᠴᠠᠭ ᠪᠢᠳᠡ ᠬᠣᠶᠠᠷ ᠢ᠋
ᠣᠨᠣᠯ ᠤ᠋ᠨ ᠲᠤᠬᠠᠢ ᠲᠠᠢ ᠲᠡᠩᠴᠡᠭᠦᠯᠵᠦ ᠦᠵᠡᠬᠦ
ᠣᠢᠷᠠᠳᠴᠤ ᠪᠣᠢ ᠬᠣᠷᠢᠨ ᠨᠢᠭᠡᠳᠦᠭᠡᠷ ᠵᠠᠭᠤᠨ ᠤ᠋
ᠥᠬᠢᠨ ᠬᠣᠩᠭᠣᠷ ᠦᠷᠡ ᠮᠢᠨᠢ ᠠ᠋!
ᠥᠪᠡᠷ ᠲᠦ᠍ ᠴᠢᠨᠢ ᠵᠣᠷᠢᠭᠤᠯᠵᠤ ᠡᠯᠡ ᠵᠠᠬᠢᠳᠠᠯ ᠢ᠋
ᠥᠴᠦᠬᠡᠨ ᠠᠷᠠᠳ ᠷᠢᠨᠴᠢᠨ ᠦ᠌ ᠴᠣᠢᠨᠣᠮ
ᠡᠪᠦᠭᠡᠷᠡᠵᠦ ᠰᠤᠯᠠᠷᠠᠭᠰᠠᠨ ᠲᠤᠷᠠᠩᠬᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠥᠷᠯᠥᠭᠡ ᠦᠳᠡᠰᠢ ᠶ᠋ᠢᠨ ᠵᠠᠪ ᠲᠤ᠌ ᠪᠢᠴᠢᠯᠡ
ᠤᠨᠲᠠᠷᠠᠬᠤ ᠳᠤᠷᠠᠲᠠᠢ ᠬᠣᠲᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍
ᠤᠩᠰᠢᠬᠤ ᠳᠤᠲᠠᠭᠤ ᠨᠣᠮ ᠤ᠋ᠨ ᠴᠢᠯᠥᠭᠡᠨ ᠳ᠋ᠦ᠍
ᠠᠭᠤᠯᠵᠠᠬᠤ ᠨᠥᠬᠥᠳ ᠪᠢᠰᠢᠯᠭᠠᠬᠤ ᠪᠣᠳᠣᠯ ᠢ᠋
ᠤᠭᠲᠤᠬᠤ ᠦᠳᠡᠬᠦ ᠶ᠋ᠢᠨ ᠵᠠᠪᠰᠠᠷ ᠲᠤ᠌ ᠪᠢᠴᠢᠯᠡ
ᠰᠢᠨᠡ ᠦᠰᠦᠭ ᠦ᠋ᠨ ᠡᠯᠧᠮᠧᠨ᠋ᠲ ᠲᠦ᠍ ᠵᠠᠬᠢᠷᠤᠭᠳᠠᠭᠠ ᠦᠭᠡᠢ
ᠰᠢᠷᠦᠭᠦᠨ ᠬᠠᠲᠠᠭᠤ ᠴᠢᠯᠠᠭᠤᠨ ᠭᠣᠷᠲᠢᠭ ᠰᠢᠭ᠋
ᠡᠨᠡ ᠠᠷᠰᠠᠭᠠᠷ ᠪᠢᠴᠢᠭ ᠢ᠋ ᠤᠩᠰᠢᠬᠤ ᠳ᠋ᠠᠭᠠᠨ ᠴᠢ
ᠡᠴᠢᠭᠡ ᠶ᠋ᠢ ᠪᠡᠨ ᠵᠢᠮᠡᠯᠡᠬᠦ ᠶ᠋ᠢ ᠪᠤᠤ ᠶᠠᠭᠠᠷᠠᠭᠠᠷᠠᠢ
ᠣᠳᠣᠨ ᠵᠢᠮᠡᠯᠡᠯ ᠬᠣᠶᠠᠷ ᠠ᠋ᠴᠠ
ᠣᠷᠴᠢᠯᠠᠩ ᠤ᠋ᠨ ᠬᠥᠮᠦᠨ ᠢᠶᠠᠨ ᠵᠠᠯᠬᠠᠬᠤ ᠴᠠᠭ ᠪᠣᠯᠵᠤ
ᠭᠡᠲᠡᠯᠡ ᠬᠥᠮᠦᠨ ᠬᠥᠮᠦᠨ ᠢᠶᠠᠨ ᠲᠠᠨᠢᠬᠤ
ᠭᠡᠭᠡᠨ ᠦᠶᠡ ᠡᠬᠢᠯᠡᠭᠡ ᠦᠭᠡᠢ ᠪᠠᠢᠨᠠ
ᠵᠢᠷᠦᠬᠡ ᠰᠡᠳᠬᠢᠯ ᠦ᠋ᠨ ᠢᠶᠠᠨ ᠬᠠᠯᠠᠭᠤᠨ ᠭᠣᠣᠯ ᠠ᠋ᠴᠠ
ᠵᠡᠭᠦᠯᠲᠡᠲᠡᠢ ᠶᠠᠪᠤᠳᠠᠭ ᠥᠬᠢᠨ ᠴᠢᠨᠦ ᠪᠡᠨ
ᠵᠢᠰᠦ ᠶ᠋ᠢ ᠬᠠᠷᠠᠯ ᠦᠭᠡᠢ ᠡᠳᠦᠢ ᠪᠣᠯᠲᠠᠯᠠ ᠪᠢ
ᠵᠢᠳᠬᠦᠭᠰᠡᠨ ᠴᠢᠭ ᠲᠡᠭᠡᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠮᠠᠴᠤᠯᠠ
ᠭᠠᠭᠴᠠ ᠮᠣᠳᠣ ᠭᠠᠯ ᠪᠣᠯᠳᠠᠭ ᠦᠭᠡᠢ
ᠭᠠᠭᠴᠠ ᠬᠥᠮᠦᠨ ᠠᠢᠯ ᠪᠣᠯᠳᠠᠭ ᠦᠭᠡᠢ ᠭᠡᠵᠦ
ᠡᠪᠦᠭᠡᠳ ᠦ᠋ᠨ ᠦᠶᠡ ᠶ᠋ᠢᠨ ᠰᠤᠷᠭᠠᠯ ᠪᠠᠢᠳᠠᠭ
ᠥᠨᠥ ᠪᠣᠯᠲᠠᠯᠠ ᠪᠢ ᠠᠢᠯ ᠪᠣᠯᠤᠭᠰᠠᠨ ᠦᠭᠡᠢ
ᠣᠴᠢᠬᠤ ᠵᠠᠮ ᠤ᠋ᠨ ᠢᠶᠠᠨ ᠦᠵᠦᠭᠦᠷ ᠲᠦ᠍ ᠬᠦᠷᠦᠭᠰᠡᠨ ᠦᠭᠡᠢ
ᠣᠷᠭᠢᠯ ᠳᠡᠭᠡᠷᠡ ᠪᠡᠨ ᠲᠤᠭ ᠬᠠᠳᠬᠤᠭᠰᠠᠨ ᠦᠭᠡᠢ
ᠣᠷᠴᠢᠯᠠᠩ ᠠᠭᠤᠳᠠᠮ᠂ ᠪᠢ ᠥᠴᠦᠬᠡᠨ
ᠤᠨᠤᠭᠠ ᠪᠠᠭᠠ᠂ ᠠᠯᠳᠠᠭᠠ ᠶᠡᠬᠡ ᠠ᠋
ᠮᠢᠬᠠ ᠴᠢᠰᠤᠨ ᠤ᠋ ᠲᠠᠰᠤᠷᠬᠠᠢ ᠥᠬᠢᠨ ᠴᠢᠮᠠᠶ᠋ᠢ ᠮᠡᠨᠳᠦᠯᠡᠬᠦ ᠳ᠋ᠦ᠍
ᠮᠠᠨ ᠤ᠋ ᠬᠢ ᠭᠡᠳᠡᠭ ᠠᠢᠯ ᠪᠠᠢᠭᠰᠠᠨ ᠶᠤᠮ
ᠡᠵᠢ ᠠᠪᠤ ᠬᠣᠶᠠᠷ ᠴᠢᠨᠢ ᠪᠡᠶᠡ ᠪᠡᠶᠡ ᠪᠡᠨ ᠣᠢᠯᠠᠭᠠᠭᠠ ᠦᠭᠡᠢ ᠡᠴᠡ
ᠡᠨᠡ ᠠᠢᠯ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ
ᠬᠣᠷᠸᠠ ᠶ᠋ᠢᠨ ᠵᠢᠷᠭᠠᠯ ᠢ᠋ ᠬᠤᠭᠤᠷᠳᠠᠵᠤ ᠪᠠᠢᠭᠰᠠᠨ ᠬᠤᠭᠤᠷ ᠤ᠋ᠨ
ᠬᠣᠶᠠᠷ ᠴᠢᠪᠬᠠᠲᠠᠰᠤᠨ ᠤ᠋ ᠨᠢᠭᠡ ᠨᠢ ᠲᠠᠰᠤ ᠦᠰᠦᠷᠦᠭᠰᠡᠨ ᠶᠦᠮ
ᠬᠣᠯᠠ ᠶ᠋ᠢ ᠵᠣᠷᠢᠭᠰᠠᠭᠠᠷ ᠨᠢᠰᠴᠦ ᠶᠠᠪᠤᠭᠰᠠᠨ ᠰᠢᠪᠠᠭᠤᠨ ᠤ᠋
ᠬᠣᠣᠰ ᠵᠢᠭᠦᠷ ᠦ᠋ᠨ ᠨᠢᠭᠡ ᠨᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠶᠤᠮ
ᠠᠮᠢᠳᠤᠷᠠᠯ ᠤ᠋ᠨ ᠳᠠᠯᠠᠢ ᠳ᠋ᠤ᠌ ᠱᠤᠩᠪᠠᠵᠤ ᠣᠯᠤᠭᠰᠠᠨ
ᠠᠯᠳᠠᠩᠬᠠᠨ ᠰᠤᠪᠤᠳ ᠮᠢᠨᠢ ᠪᠣᠯᠤᠭᠰᠠᠨ
ᠬᠠᠢᠷᠠᠲᠤ ᠶ᠋ᠢ ᠪᠡᠨ ᠪᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ
ᠬᠠᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠰᠡᠳᠬᠢᠯ ᠶᠡᠬᠡᠳᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠡᠮᠵᠡᠭ
ᠬᠠᠨᠢᠯᠠᠵᠤ ᠶᠠᠪᠤᠬᠤ ᠶ᠋ᠢᠨ ᠢᠲᠡᠭᠡᠯ ᠬᠠᠲᠠᠭᠤ ᠲᠣᠰᠤᠮ ᠢ᠋ᠶ᠋ᠠᠨ ᠰᠣᠴᠢᠮᠠᠭ
ᠨᠠᠮ ᠭᠦᠮ ᠥᠷᠥᠭᠡᠨ ᠳ᠋ᠡᠭᠡᠨ ᠤᠬᠢᠯᠠᠨ ᠦᠯᠡᠳᠡᠵᠦ
ᠨᠠᠮᠤᠷ ᠤ᠋ᠨ ᠰᠠᠯᠬᠢᠨ ᠳ᠋ᠤ᠌ ᠤᠢᠳᠤᠨ ᠬᠣᠯᠠᠳᠠᠭᠰᠠᠨ ᠶᠤᠮ᠃
ᠴᠢ ᠨᠠᠮᠠᠶ᠋ᠢ ᠠᠭᠤᠴᠢᠯᠠᠭᠠᠷᠠᠢ! ᠴᠠᠭᠠᠰᠢ ᠳᠠᠬᠢ ᠨᠠᠷᠢᠨ ᠤᠴᠢᠷ ᠨᠠᠴᠢᠷ ᠢ᠋
ᠴᠢᠮᠠ ᠳ᠋ᠤ᠌ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠢ᠂
ᠬᠡᠯᠡᠵᠦ ᠴᠢᠳᠠᠬᠤ ᠴᠣᠷ ᠤ᠋ᠨ ᠭᠠᠭᠴᠠ ᠦᠨᠡᠨ ᠪᠣᠯ
ᠬᠡᠯᠬᠢᠬᠦ ᠰᠢᠯᠦᠭ ᠲᠡᠭᠡᠨ ᠪᠢ ᠳᠡᠩᠳᠡᠭᠦᠦ ᠬᠠᠢᠷᠠᠲᠠᠢ ᠶᠠᠪᠤᠯᠠ
ᠥᠬᠢᠨ ᠴᠢᠮᠠᠶ᠋ᠢ ᠲᠥᠷᠥᠭᠦᠯᠬᠦ ᠭᠡᠵᠦ ᠡᠵᠢ ᠶ᠋ᠢᠨ ᠴᠢᠨᠢ ᠡᠪᠡᠳᠦᠭᠰᠡᠨ ᠰᠢᠭ
ᠣᠶᠤᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠶᠠᠨ ᠪᠢ ᠡᠪᠡᠳᠦᠨ ᠡᠪᠡᠳᠦᠨ ᠪᠠᠢᠵᠤ
ᠪᠡᠶᠡ ᠶ᠋ᠢᠨ ᠴᠢᠰᠤ ᠪᠣᠳᠣᠯ ᠤ᠋ᠨ ᠢᠶᠠᠨ ᠴᠢᠰᠤ ᠶ᠋ᠢ ᠲᠤᠰᠤᠭᠠᠩᠬᠠᠨ
ᠪᠢᠴᠢᠭ ᠦ᠋ᠨ ᠴᠠᠭᠠᠰᠤᠨᠠ ᠰᠢᠯᠦᠭ ᠶᠦ᠍ᠭᠡᠨ ᠲᠥᠷᠥᠭᠦᠯᠵᠦ ᠶᠠᠪᠤᠯᠠ
ᠥᠬᠢᠨ ᠢ᠋ ᠮᠢᠨᠢ ᠥᠨᠦᠴᠢᠷᠡᠭᠦᠯᠦᠭᠰᠡᠨ ᠶᠦᠮ ᠳᠡ ᠭᠡᠵᠦ ᠡᠵᠢ ᠴᠢᠨᠢ
ᠣᠳᠣ ᠪᠣᠯᠲᠠᠯᠠ ᠨᠠᠮᠠᠶ᠋ᠢ ᠵᠢᠮᠡᠯᠡᠵᠦ ᠰᠠᠭᠤᠳᠠᠭ ᠪᠢᠵᠡ
ᠰᠢᠯᠦᠭ ᠢ᠋ ᠮᠢᠨᠢ ᠥᠨᠦᠴᠢᠷᠡᠭᠦᠯᠦᠭᠰᠡᠨ ᠳᠡ ᠭᠡᠵᠦ ᠪᠢ
ᠰᠡᠭᠦᠷᠡᠰᠦ ᠠᠯᠳᠠᠬᠤ ᠬᠠᠶᠠ ᠡᠵᠢ ᠶ᠋ᠢᠨ ᠴᠢᠨᠢ ᠲᠤᠬᠠᠢ ᠪᠣᠳᠣᠳᠠᠭ
ᠭᠡᠪᠡᠴᠦ ᠪᠢ ᠡᠵᠢ ᠳ᠋ᠦ᠍ ᠴᠢᠨᠢ ᠥᠰᠢᠷᠡᠳᠡᠭ ᠦᠭᠡᠢ᠂ ᠥᠷᠦᠪᠳᠦᠳᠡᠭ
ᠭᠡᠮᠰᠢᠵᠦ ᠬᠠᠢᠷᠠᠯᠠᠵᠤ ᠰᠠᠨᠠᠭᠰᠠᠭᠠᠷ ᠶᠠᠪᠤᠳᠠᠭ ᠶᠤᠮ
ᠠᠮᠠ ᠪᠦᠯᠢ ᠮᠢᠨᠢ ᠲᠤᠰ ᠲᠠᠭᠠᠨ ᠴᠤ᠌ ᠲᠡᠷᠡ ᠪᠢᠳᠡ ᠬᠣᠶᠠᠷ
ᠠᠷᠠᠳ ᠲᠦᠮᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠲᠡᠮᠡᠴᠡᠯ ᠪᠦᠲᠦᠭᠡᠯ ᠴᠣᠭ ᠲᠠᠭᠠᠨ
ᠣᠷᠴᠢᠯᠠᠩ ᠠ᠋ᠴᠠ ᠪᠢᠳᠡ ᠥᠪᠡᠷ ᠥᠪᠡᠷ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠪᠤᠴᠠᠪᠠᠴᠤ
ᠥᠬᠢᠨ ᠰᠢᠯᠦᠭ ᠬᠣᠶᠠᠷ ᠢ᠋ᠶ᠋ᠠᠨ ᠬᠣᠢᠴᠢ ᠦᠶᠡ ᠳ᠋ᠡᠭᠡᠨ ᠦᠯᠡᠳᠡᠭᠡᠨᠡ
ᠢᠷᠠᠭᠤ ᠨᠠᠢᠷᠠᠭ ᠲᠠ ᠬᠣᠶᠠᠷ ᠳᠠᠷᠠᠭᠠ ᠶ᠋ᠢᠨ ᠵᠠᠭᠤᠨ ᠳ᠋ᠤ᠌
ᠶᠠᠯᠠ ᠭᠠᠪᠢᠶᠠ ᠬᠣᠶᠠᠷ ᠢ᠋ ᠮᠢᠨᠢ ᠡᠭᠦᠷᠴᠦ ᠣᠴᠢᠬᠤ ᠪᠣᠯᠤᠨᠠ
ᠬᠦᠢᠲᠡᠨ ᠵᠢᠪᠠᠷ᠂ ᠬᠠᠲᠠᠭᠤ ᠵᠠᠮ ᠳ᠋ᠤ᠌ ᠬᠡᠯᠬᠢᠵᠦ ᠶᠠᠪᠤᠭᠰᠠᠨ
ᠬᠦᠰᠡᠯ ᠦ᠋ᠨ ᠳᠠᠭᠤᠤ᠂ ᠬᠠᠢᠷᠠ ᠶ᠋ᠢᠨ ᠥᠴᠢᠭ ᠰᠢᠯᠦᠭ ᠦ᠋ᠳ ᠢ᠋ ᠮᠢᠨᠢ
ᠮᠢᠨᠦ ᠥᠬᠢᠨ ᠴᠢ᠂ ᠴᠢᠨᠦ ᠦᠶᠡ ᠶ᠋ᠢᠨ ᠬᠢᠨ ᠤᠩᠰᠢᠬᠤ ᠳ᠋ᠠᠭᠠᠨ
ᠮᠢᠨᠦ ᠦᠶᠡ ᠶ᠋ᠢ ᠴᠢᠨᠦ ᠨᠢᠳᠦ ᠪᠡᠷ ᠬᠠᠷᠠᠬᠤ ᠪᠣᠯᠤᠨᠠ
ᠨᠠᠢᠷᠠᠭᠴᠢ ᠭᠡᠵᠦ ᠦᠵᠡᠵᠦ ᠨᠠᠳᠠ ᠳ᠋ᠤ᠌ ᠲᠡᠳᠡ ᠲᠠᠯᠠᠷᠬᠠᠪᠠᠯ
ᠨᠠᠮᠠᠶ᠋ᠢ ᠲᠥᠯᠥᠭᠡᠯᠡᠵᠦ ᠥᠬᠢᠨ ᠮᠢᠨᠢ ᠴᠢ ᠪᠠᠶᠠᠷᠯᠠᠭᠠᠷᠠᠢ
ᠠᠯᠳᠠᠭᠰᠠᠨ ᠤᠨᠤᠭᠰᠠᠨ ᠢ᠋ ᠮᠢᠨᠢ ᠰᠢᠭᠦᠨ ᠲᠤᠩᠭᠠᠪᠠᠯ
ᠠᠪᠤ ᠶ᠋ᠢ ᠪᠡᠨ ᠲᠥᠯᠥᠭᠡᠯᠡᠵᠦ ᠢᠷᠦᠭᠡᠯ ᠢ᠋ ᠴᠦ᠍᠂ ᠬᠠᠷᠢᠶᠠᠯ ᠢ᠋ ᠴᠦ᠍ ᠴᠢ ᠭᠥᠷᠳᠡᠭᠡᠷᠡᠢ
ᠬᠡᠷᠪᠡ ᠨᠠᠮᠠᠶ᠋ᠢ ᠰᠠᠢᠨ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠭᠡᠪᠡᠯ ᠪᠤᠤ ᠦᠨᠡᠮᠰᠢᠭᠡᠷᠡᠢ
ᠬᠡᠵᠢᠶᠡ ᠴᠦ᠍ ᠭᠡᠰᠡᠨ ᠶᠠᠭᠤᠮᠠ ᠦᠨᠡᠨ ᠢ᠋ᠶ᠋ᠡᠷ ᠢᠶᠠᠨ ᠨᠢ ᠳᠡᠭᠡᠷᠡ
ᠥᠬᠢᠨ ᠢᠶᠠᠨ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡᠨ ᠨᠢᠯᠬᠠ ᠳ᠋ᠤᠨᠢ
ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠠᠪᠤ ᠰᠠᠢᠨ ᠬᠥᠮᠦᠨ ᠪᠠᠢᠵᠤ ᠪᠣᠯᠬᠤ ᠤᠤ ᠳᠠ
ᠦᠶᠡ ᠶ᠋ᠢᠨ ᠬᠢᠨ ᠳ᠋ᠦ᠍ ᠮᠠᠨᠢ ᠬᠠᠷᠢᠨ ᠰᠠᠢᠨ ᠬᠥᠮᠦᠨ ᠣᠯᠠᠨ ᠪᠠᠢᠭᠰᠠᠨ ᠶᠤᠮ
ᠡᠭᠦᠨ ᠢ᠋ ᠴᠢ ᠨᠠᠳᠠ ᠪᠠᠷ ᠪᠢᠰᠢ ᠪᠤᠰᠤᠳ ᠢ᠋ᠶ᠋ᠠᠷ ᠬᠡᠮᠵᠢᠭᠡᠷᠡᠢ
ᠦᠦᠷ ᠴᠦᠤᠷ ᠢ᠋ᠶ᠋ᠠᠷ ᠴᠢᠮᠠᠶ᠋ᠢ ᠪᠦᠪᠡᠢᠯᠡᠵᠦ ᠰᠠᠭᠤᠭᠰᠠᠨ ᠡᠵᠢ ᠪᠡᠷ ᠢᠶᠠᠨ ᠬᠡᠮᠵᠢᠭᠡᠷᠡᠢ
ᠦᠬᠦᠯ ᠡᠴᠡ ᠴᠢᠮᠠᠶ᠋ᠢ ᠠᠪᠤᠷᠠᠵᠤ ᠶᠠᠪᠤᠭᠰᠠᠨ ᠡᠮᠴᠢ ᠨᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠮᠵᠢᠭᠡᠷᠡᠢ
《 ᠠ》 ᠦᠰᠦᠭ ᠵᠢᠭᠠᠭᠰᠠᠨ ᠪᠠᠭᠰᠢ ᠨᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠮᠵᠢᠭᠡᠷᠡᠢ
ᠠᠮᠲᠠᠲᠠᠨ ᠢ᠋ ᠢᠳᠡᠭᠦᠯᠵᠦ ᠦᠩᠭᠡᠲᠡᠨ ᠢ᠋ ᠡᠮᠦᠰᠬᠡᠵᠦ
ᠠᠪᠤ ᠶ᠋ᠢᠨ ᠴᠢᠨᠢ ᠣᠷᠣᠨ ᠳ᠋ᠤ᠌ ᠠᠪᠤ ᠪᠣᠯᠵᠤ ᠶᠠᠪᠤᠭᠰᠠᠨ
ᠠᠷᠠᠳ ᠲᠦᠮᠡᠨ ᠴᠢᠨᠢ ᠰᠠᠢᠨ ᠬᠥᠮᠦᠰ ᠪᠠᠢᠭᠰᠠᠨ ᠶᠤᠮ ᠰᠢᠦ
ᠡᠴᠢᠭᠡ ᠶ᠋ᠢ ᠴᠢᠨᠢ ᠬᠠᠷᠢᠨ ᠮᠠᠭᠤ ᠡᠷᠡ ᠪᠠᠢᠭᠰᠠᠨ ᠶᠤᠮ ᠭᠡᠪᠡᠯ
ᠡᠰᠡᠷᠭᠦᠴᠡᠬᠦ ᠬᠡᠷᠡᠭ ᠦᠭᠡᠢ᠂ ᠪᠣᠳᠣᠬᠤ ᠬᠡᠷᠡᠭᠲᠡᠢ
ᠪᠢᠲᠡᠭᠡᠢ ᠥᠮᠥᠭᠡᠷᠡᠭᠡᠷᠡᠢ᠂ ᠪᠢᠲᠡᠭᠡᠢ ᠭᠤᠳᠤᠷᠠᠭᠠᠷᠠᠢ ᠮᠢᠨᠦ ᠥᠬᠢᠨ
ᠪᠢ ᠮᠠᠭᠤ ᠡᠷᠡ ᠪᠠᠢᠭᠰᠠᠨ ᠶᠤᠮ᠂ ᠦᠨᠡᠨ ᠠ᠋!
ᠲᠡᠮᠡᠴᠡᠯ ᠦ᠋ᠨ ᠰᠡᠯᠡᠮᠡ ᠢᠳᠡ ᠨᠠᠰᠤᠨ ᠳ᠋ᠠᠭᠠᠨ ᠪᠢ
ᠲᠡᠷᠭᠡᠨ ᠦ᠌ ᠮᠣᠷᠢ ᠰᠢᠭ᠋ ᠮᠥᠷ ᠢ᠋ᠶ᠋ᠡᠷ ᠢᠶᠠᠨ ᠬᠡᠯᠲᠦᠷᠢᠵᠦ
ᠨᠤᠲᠤᠭᠷᠠᠬᠠᠭ ᠦᠵᠡᠯ᠂ ᠡᠷᠳᠡᠮ ᠦᠭᠡᠢ ᠪᠦᠳᠦᠭᠦᠯᠢᠭ ᠦ᠋ᠨ ᠡᠮᠦᠨᠡ
ᠨᠢᠷᠤᠭᠤ ᠪᠥᠬᠥᠢᠵᠦ ᠥᠩᠭᠡᠷᠡᠭᠰᠡᠨ ᠪᠢ ᠮᠠᠭᠤ ᠡᠷᠡ ᠠ᠋!
ᠬᠡᠯᠡᠭᠡᠢᠴᠦᠳ ᠪᠠᠭᠠ ᠶᠠᠰᠤᠲᠠᠨ ᠤ᠋ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠰᠢᠭ
ᠬᠡᠪᠯᠡᠯ᠂ ᠷᠠᠳᠢᠣ᠋᠂ ᠰᠤᠷᠭᠠᠭᠤᠯᠢ ᠶ᠋ᠢ ᠭᠤᠲᠤᠭᠠᠵᠤ
ᠦᠰᠦᠭ ᠪᠢᠴᠢᠭ ᠦ᠋ᠨ ᠢᠶᠠᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠶᠡᠬᠡ ᠰᠣᠶᠣᠯ ᠢ᠋
ᠦᠭᠡᠢᠰᠬᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠡᠮᠡᠴᠡᠵᠦ ᠴᠢᠳᠠᠭᠠ ᠦᠭᠡᠢ ᠪᠢ ᠮᠠᠭᠤ ᠡᠷᠡ ᠠ᠋!
ᠤᠶᠠᠩᠭᠠᠲᠤ ᠬᠥᠭᠵᠢᠮ ᠦ᠋ᠨ ᠣᠷᠣᠨ ᠳ᠋ᠤ᠌ ᠡᠰᠲ᠋ᠷᠡᠲ ᠦ᠋ᠨ ᠬᠠᠨᠢᠶᠠᠯᠭᠠ ᠬᠠᠯᠳᠠᠵᠤ ᠪᠠᠢᠬᠤ ᠳ᠋ᠤ᠌
ᠤᠷᠠᠨ ᠵᠢᠷᠤᠭ ᠤ᠋ᠨ ᠣᠷᠣᠨ ᠳ᠋ᠤ᠌ ᠡᠷᠢᠶᠡᠨ ᠰᠢᠪᠠᠷᠳᠠᠯᠭᠠ ᠳᠡᠯᠭᠡᠷᠡᠵᠦ ᠪᠠᠢᠬᠤ ᠳ᠋ᠤ᠌
ᠤᠳᠬᠠ ᠵᠣᠬᠢᠶᠠᠯ ᠭᠠᠭᠴᠠ ᠬᠡᠪ ᠦ᠋ᠨ ᠨᠣᠮᠯᠠᠯ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌
ᠤᠰᠤ ᠪᠠᠯᠭᠤᠭᠰᠠᠨ ᠮᠡᠲᠦ ᠳᠤᠭᠤᠢ ᠶᠠᠪᠤᠭᠰᠠᠨ ᠪᠢ ᠮᠠᠭᠤ ᠡᠷᠡ ᠬᠥᠮᠦᠨ!
ᠡᠢᠮᠦ ᠡᠷᠡᠴᠦᠳ ᠮᠢᠨᠦ ᠦᠶᠡ ᠳ᠋ᠦ᠍ ᠶᠡᠬᠡ ᠣᠯᠠᠨ ᠪᠠᠢᠯᠠ᠂ ᠥᠬᠢᠨ ᠮᠢᠨᠢ
ᠢᠷᠡᠭᠡᠳᠦᠢ ᠲᠠᠨᠠ ᠡᠭᠦᠨ ᠦ᠌ ᠤᠴᠢᠷ ᠢᠴᠢᠵᠦ ᠪᠠᠢᠨᠠ
ᠮᠢᠨᠦ ᠪᠡᠶᠡ
ᠮᠢᠨᠦ ᠦᠶᠡ᠃
ᠲᠡᠭᠡᠪᠡᠴᠦ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠢᠩᠭᠢᠵᠦ ᠳᠤᠭᠤᠢ ᠪᠠᠢᠭᠰᠠᠨ ᠶᠤᠮ ᠪᠢᠰᠢ ᠠ᠋
ᠲᠡᠪᠴᠢᠶᠡᠷᠢ ᠮᠢᠨᠢ ᠳᠡᠩᠳᠡᠭᠡᠳ ᠠᠯᠳᠠᠩᠬᠠᠨ ᠴᠠᠭ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠶᠤᠮ
ᠵᠡᠪᠰᠡᠭ ᠣᠨᠢᠯᠠᠵᠤ ᠬᠢᠯᠢ ᠥᠩᠭᠡᠢᠭᠰᠡᠨ ᠳᠠᠢᠰᠤᠨ ᠳ᠋ᠠᠭᠠᠨ ᠪᠢᠳᠡ ᠳᠡᠢᠯᠳᠡᠭᠡ ᠦᠭᠡᠢ ᠪᠠᠢᠵᠤ
ᠵᠡᠷᠭᠡᠴᠡᠨ ᠰᠠᠭᠤᠵᠤ ᠬᠤᠨᠳᠠᠭᠠ ᠡᠷᠭᠦᠭᠰᠡᠨ ᠳᠠᠮᠫᠤᠭᠤᠷᠠᠯ ᠳ᠋ᠠᠭᠠᠨ ᠪᠢᠳᠡ ᠳᠡᠢᠯᠲᠡᠭᠰᠡᠨ ᠶᠦᠮ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠶᠠᠳᠠᠭᠤᠷᠠᠯ ᠲᠡᠮᠡᠴᠡᠯ ᠦ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ
ᠬᠥᠷᠥᠩᠭᠡᠲᠦ ᠨᠡᠢᠭᠡᠮ ᠢ᠋ ᠠᠯᠭᠠᠰᠠᠭᠰᠠᠨ ᠤ᠋ ᠮᠠᠨᠢ ᠭᠠᠢ᠂ ᠡᠨᠡ ᠳᠠᠮᠫᠤᠭᠤᠷᠤᠯ
ᠮᠠᠭᠠᠳ ᠦᠭᠡᠢ ᠲᠠ ᠨᠠᠷ ᠲᠠᠢ ᠴᠣᠭ ᠪᠠᠰᠠ ᠬᠡᠯᠡᠭᠡᠢ ᠭᠢᠲ᠋ᠠᠷ ᠪᠠᠯᠪᠠᠵᠤ
ᠮᠠᠢᠯᠠᠬᠤ ᠮᠡᠲᠦ ᠳᠠᠭᠤᠯᠠᠵᠤ᠂ ᠶᠣᠣᠯᠠᠬᠤ ᠮᠡᠲᠦ ᠪᠥᠵᠢᠭᠯᠡᠵᠦ ᠪᠠᠢᠬᠤ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦ ᠪᠣᠢ
ᠴᠠᠭ ᠵᠠᠭᠤᠷᠠ ᠶ᠋ᠢᠨ ᠤᠷᠤᠰᠬᠠᠯ ᠳ᠋ᠤ᠌ ᠲᠠ ᠨᠠᠷ ᠪᠠᠰᠠ ᠲᠠᠢᠯᠳᠠᠵᠤ
ᠴᠠᠰᠤ ᠪᠣᠷᠣᠭᠠᠨ ᠤ᠋ ᠬᠣᠨᠢ ᠮᠠᠯ ᠪᠠᠰᠠ ᠬᠤᠢᠯᠠᠷᠠᠨ ᠳᠠᠪᠬᠢᠬᠤ ᠤᠤ
ᠠᠹᠷᠢᠺᠠ ᠶ᠋ᠢᠨ᠃ ᠫᠢᠷᠠᠮᠢᠳ᠋᠂ ᠹᠠᠺᠰ ᠤ᠋ᠨ ᠬᠥᠰᠢᠶᠡ᠂ ᠢᠨᠺᠣ ᠶ᠋ᠢᠨ ᠳᠤᠭᠠᠩ ᠰᠢᠭ᠋
ᠠᠵᠢᠷᠠᠬᠤ ᠴᠤ᠌ ᠦᠭᠡᠢ ᠵᠣᠭᠰᠣᠬᠤ ᠣᠨ ᠴᠠᠭ ᠢ᠋ ᠲᠤᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠭᠡᠵᠦ ᠦᠦ
ᠪᠠᠢᠭᠠᠯᠢ ᠶ᠋ᠢᠨ ᠭᠠᠯᠪᠠ ᠶ᠋ᠢᠨ ᠬᠠᠭᠠᠨᠴᠢᠯᠠᠯ ᠤ᠋ᠨ ᠡᠮᠦᠨᠡ
ᠪᠠᠰᠠ ᠯᠠ ᠲᠠ ᠨᠠᠷ ᠪᠢᠳᠡᠨ ᠰᠢᠭ ᠲᠣᠯᠣᠭᠠᠢ ᠨᠢ ᠡᠷᠭᠢᠵᠦ
ᠪᠠᠢᠭᠠ ᠪᠠᠨ ᠪᠠᠢᠬᠤ ᠦᠭᠡᠢ ᠭᠡᠵᠦ᠂ ᠪᠠᠢᠬᠤ ᠦᠭᠡᠢ ᠪᠡᠨ ᠮᠠᠷᠲᠠᠵᠤ ᠮᠠᠷᠭᠤᠵᠤ
ᠪᠠᠲᠤᠯᠠᠬᠤ ᠭᠡᠰᠡᠨ ᠢᠶᠠᠨ ᠡᠯᠪᠡᠵᠦ ᠮᠠᠭᠤᠯᠠᠭᠰᠠᠭᠠᠷ ᠥᠩᠭᠡᠷᠡᠬᠦ ᠦᠦ?
ᠥᠪᠡᠷ ᠦ᠋ᠨ ᠢᠶᠠᠨ ᠰᠡᠭᠦᠳᠡᠷ ᠡᠴᠡ ᠠᠶᠤᠭᠰᠠᠨ ᠬᠥᠮᠦᠨ ᠰᠢᠭ
ᠡᠪᠦᠭᠡ ᠲᠡᠦᠬᠡ ᠡᠴᠡ ᠪᠡᠨ ᠪᠠᠰᠠ ᠯᠠ ᠠᠶᠤᠵᠤ
ᠪᠤᠷᠤᠭᠤ ᠪᠦᠬᠦᠨ ᠢ᠋ ᠡᠮᠦᠨᠡᠬᠢ ᠦᠶᠡ ᠤᠷᠤᠭᠤ ᠪᠠᠨ ᠴᠢᠬᠢᠭᠰᠡᠨ
ᠪᠤᠷᠤᠩᠬᠤᠢ ᠡᠳᠦᠷ ᠦ᠋ᠳ ᠦᠷᠭᠦᠯᠵᠢᠯᠡᠬᠦ ᠪᠣᠯᠪᠠ ᠤᠤ
ᠨᠠᠰᠤ ᠪᠠᠷ ᠠᠬᠠᠮᠠᠳ ᠪᠦᠬᠦᠨ ᠢ᠋ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠭᠡᠵᠦ
《 ᠨᠠᠳᠠ ᠠ᠋ᠴᠠ ᠯᠠ ᠰᠣᠶᠣᠯ ᠢᠷᠭᠡᠨᠰᠢᠯ ᠡᠬᠢᠯᠡᠵᠦ ᠪᠠᠢᠨᠠ》 ᠭᠡᠵᠦ
ᠡᠨᠡ ᠦᠶᠡ ᠶ᠋ᠢᠨ ᠮᠢᠨᠢ ᠣᠯᠠᠨ ᠣᠯᠠᠨ ᠵᠠᠯᠠᠭᠤ ᠬᠥᠮᠦᠨ ᠰᠢᠭ
ᠡᠷᠭᠢᠭᠦᠲᠦᠵᠦ ᠲᠠ ᠨᠠᠷ ᠤ᠋ᠨ ᠦᠶᠡ ᠪᠠᠰᠠ ᠠᠯᠳᠠᠬᠤ ᠪᠣᠯᠪᠠ ᠤᠤ
ᠬᠣᠩᠭᠣᠷ ᠥᠬᠢᠨ ᠮᠢᠨᠢ ᠴᠢ ᠮᠡᠳᠡᠲᠦᠭᠡᠢ
ᠬᠣᠷᠢᠨ ᠨᠢᠭᠡᠳᠦᠭᠡᠷ ᠵᠠᠭᠤᠨ ᠤ᠋ ᠲᠠ ᠨᠠᠷ ᠪᠤᠳᠤᠲᠤᠭᠠᠢ!
ᠬᠣᠵᠢᠮ ᠤ᠋ᠨ ᠲᠠ ᠨᠠᠷ ᠤ᠋ᠨ ᠪᠡᠶᠡ ᠬᠤᠪᠴᠠᠰᠤ ᠬᠣᠶᠠᠷ ᠰᠢᠨᠡ ᠪᠣᠯᠬᠤ ᠠ᠋ᠴᠠ
ᠬᠣᠷᠸᠠ᠂ ᠣᠶᠤᠨ ᠬᠣᠶᠠᠷ ᠰᠢᠨᠡ ᠪᠢᠰᠢ ᠰᠢᠦ
ᠡᠷᠭᠢᠬᠦ ᠴᠠᠭ ᠢ᠋ᠶ᠋ᠠᠷ ᠬᠤᠪᠴᠠᠰᠤ ᠵᠠᠭᠪᠤᠷ ᠬᠣᠶᠠᠷ ᠬᠠᠭᠤᠴᠢᠷᠠᠳᠠᠭ
ᠡᠷᠳᠡᠮ ᠴᠢᠳᠠᠯ᠂ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠬᠣᠶᠠᠷ ᠬᠡᠵᠢᠶᠡ ᠴᠦ᠍ ᠬᠠᠭᠤᠴᠢᠷᠠᠳᠠᠭ ᠦᠭᠡᠢ
ᠡᠨᠡ ᠪᠢᠳᠡᠨ ᠦ᠌ ᠦᠶᠡ ᠳ᠋ᠦ᠍ ᠤᠴᠢᠷ ᠢ᠋ ᠨᠢ ᠣᠯᠤᠭᠠ ᠦᠭᠡᠢ ᠣᠯᠠᠨ ᠨᠡᠭᠡᠭᠡᠯᠲᠡ ᠶ᠋ᠢ
ᠡᠷᠲᠡ ᠪᠠᠯᠠᠷ ᠤ᠋ᠨ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦᠯᠡᠳᠡᠭᠡᠭᠰᠡᠨ ᠶᠦᠮ ᠰᠢᠦ
ᠮᠠᠭᠠᠳ ᠦᠭᠡᠢ ᠲᠠ ᠨᠠᠷ ᠤ᠋ᠨ ᠦᠢᠯᠡ ᠪᠡᠨ ᠦᠵᠡᠵᠦ ᠨᠡᠭᠡᠭᠡᠬᠦ ᠵᠠᠷᠢᠮ ᠵᠦᠢᠯ ᠢ᠋
ᠮᠢᠨᠦ ᠦᠶᠡ ᠳ᠋ᠦ᠍ ᠬᠡᠨ ᠨᠢᠭᠡ ᠨᠢ ᠴᠢᠮᠡᠭᠡ ᠦᠭᠡᠢ ᠨᠡᠭᠡᠭᠡᠭᠰᠡᠨ ᠪᠠᠢᠵᠤ ᠪᠣᠯᠤᠨᠠ
ᠭᠠᠭᠴᠠ ᠬᠦ᠌ ᠡᠭᠦᠨ ᠢ᠋ ᠲᠠ ᠨᠠᠷ ᠲᠠᠭᠠᠨ ᠵᠠᠬᠢᠵᠤ
ᠭᠠᠷ ᠢ᠋ ᠴᠢᠨᠢ ᠢᠯᠡ ᠵᠠᠬᠢᠳᠠᠯ ᠢᠶᠠᠨ ᠷᠢᠨᠴᠢᠨ ᠦ᠌ ᠴᠣᠢᠨᠤᠮ ᠠᠳᠬᠤᠪᠠ᠃
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠪᠣᠷᠵᠢᠭᠢᠨ ᠠᠵᠠᠵᠠᠶᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠢᠷᠡᠭᠡᠳᠦᠢ ᠣᠳᠬᠠᠨᠰᠦᠠ᠂ ᠰᠡᠬᠡᠭᠡᠷᠡᠯ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠢᠷᠡᠭᠡᠳᠦᠢ ᠣᠳᠬᠠᠨᠰᠦᠠ᠂ ᠰᠡᠬᠡᠭᠡᠷᠡᠯ