ᠪᠠᠭᠪᠠᠬᠠᠢ ᠬᠢᠭᠡᠳ ᠷᠠᠳᠠᠷ ( ᠬᠡᠯᠡ ᠪᠢᠴᠢᠭ – ᠳᠣᠯᠣᠳᠤᠭᠠᠷ ᠳᠡᠪᠲᠡᠷ） Багваахай хийгээд радар（ Хэл бичиг – Долдугар дэвтэр）
294ᠪᠠᠭᠪᠠᠬᠠᠢ ᠬᠢᠭᠡᠳ ᠷᠠᠳᠠᠷ
ᠣᠳᠣᠨ ᠮᠡᠴᠢᠳ ᠮᠢᠷᠠᠯᠵᠠᠭᠰᠠᠨ ᠲᠤᠩᠭᠠᠯᠠᠭ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠳ᠋ᠤ᠌ ᠤᠯᠠᠭᠠᠨ ᠨᠣᠭᠣᠭᠠᠨ ᠬᠣᠶᠠᠷ ᠭᠡᠷᠡᠯ ᠬᠢᠯᠠᠯᠵᠠᠭᠰᠠᠭᠠᠷ ᠣᠢᠷᠠᠳᠴᠤ ᠢᠷᠡᠪᠡ᠃ ᠵᠠᠯᠭᠠᠭᠠᠳ ᠬᠦᠩᠭᠢᠨᠡᠨ ᠨᠦᠷᠵᠢᠭᠢᠨᠡᠬᠦ ᠳᠠᠭᠤᠨ ᠰᠣᠨᠣᠰᠳᠠᠪᠠ᠂ ᠰᠥᠨᠢ ᠶ᠋ᠢᠨ ᠠᠶᠠᠨ ᠤ᠋ ᠨᠢᠰᠬᠡᠯ ᠶᠦ᠍ᠮ ᠪᠠᠢᠨᠠ᠃
ᠬᠠᠷᠠᠩᠭᠤᠢ ᠰᠥᠨᠢ ᠨᠢᠰᠬᠡᠯ ᠶᠠᠭᠠᠬᠢᠭᠠᠳ ᠠᠶᠤᠯ ᠦᠭᠡᠢ ᠨᠢᠰᠴᠦ ᠴᠢᠳᠠᠳᠠᠭ ᠶᠤᠮ ᠪᠣᠢ? ᠬᠥᠮᠦᠰ ᠤᠤᠯ ᠨᠢ ᠪᠠᠭᠪᠠᠬᠠᠢ ᠠ᠋ᠴᠠ ᠰᠡᠷᠡᠯᠲᠡ ᠣᠯᠵᠤ ᠠᠶᠤᠯ ᠦᠭᠡᠢ ᠨᠢᠰᠬᠦ ᠠᠷᠭᠠ ᠡᠭᠦᠳᠦᠭᠰᠡᠨ ᠪᠠᠢᠵᠠᠢ᠃
ᠪᠠᠭᠪᠠᠬᠠᠢ ᠪᠣᠯ ᠰᠥᠨᠢ ᠭᠠᠷᠴᠤ ᠡᠷᠪᠡᠬᠡᠢ ᠪᠤᠶᠤ ᠪᠠᠲᠠᠭᠠᠨᠠ ᠠᠩᠨᠠᠳᠠᠭ ᠠᠮᠢᠲᠠᠨ ᠶᠤᠮ᠃ ᠪᠠᠭᠪᠠᠬᠠᠢ ᠶᠠᠭᠠᠬᠢᠵᠤ ᠨᠢᠰᠦᠭᠰᠡᠨ ᠴᠦ᠍ ᠶᠠᠭᠤᠮᠠᠨ ᠳ᠋ᠤ᠌ ᠶᠡᠷᠦ ᠮᠥᠷᠭᠥᠳᠡᠭ ᠦᠭᠡᠢ᠂ ᠬᠠᠮᠤᠭ ᠤ᠋ᠨ ᠨᠠᠷᠢᠨ ᠴᠠᠬᠢᠯᠭᠠᠨ ᠤᠲᠠᠰᠤᠨ ᠠ᠋ᠴᠠ ᠴᠤ᠌ ᠮᠠᠰᠢ ᠬᠤᠷᠴᠠ ᠰᠡᠷᠭᠡᠭ ᠢ᠋ᠶ᠋ᠡᠷ ᠵᠠᠢᠯᠠᠵᠤ ᠭᠠᠷᠴᠤ ᠴᠢᠳᠠᠨᠠ᠃ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠴᠢᠳᠠᠳᠠᠭ ᠶᠤᠮ ᠪᠣᠢ?
ᠡᠨᠡ ᠠᠰᠠᠭᠤᠳᠠᠯ ᠢ᠋ ᠲᠣᠳᠣᠯᠠᠬᠤ ᠶ᠋ᠢᠨ ᠲᠤᠯᠠ ᠡᠷᠳᠡᠮᠲᠡᠳ ᠵᠠᠭᠤ ᠭᠠᠷᠤᠢ ᠵᠢᠯ ᠦ᠋ᠨ ᠡᠮᠦᠨᠡ ᠲᠤᠷᠰᠢᠯᠲᠠ ᠬᠢᠵᠦ ᠦᠵᠡᠵᠡᠢ᠃ ᠫᠠᠳ ᠬᠠᠷᠠᠩᠭᠤᠢ ᠲᠠᠰᠤᠯᠭᠠ ᠳ᠋ᠤ᠌ ᠮᠠᠰᠢ ᠣᠯᠠᠨ ᠳᠡᠭᠡᠰᠦ ᠶ᠋ᠢ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠰᠦᠯᠵᠢᠵᠦ ᠲᠠᠲᠠᠭᠠᠳ᠂ ᠳᠡᠭᠡᠰᠦᠨ ᠳ᠋ᠡᠭᠡᠨ ᠣᠯᠠᠨ ᠬᠤᠩᠬᠠ ᠳᠡᠭᠦᠵᠢᠯᠡᠪᠡ᠃ ᠲᠡᠭᠡᠭᠡᠳ ᠪᠠᠭᠪᠠᠬᠠᠢ ᠶ᠋ᠢᠨ ᠨᠢᠳᠦ ᠶ᠋ᠢ ᠨᠢ ᠪᠦᠲᠡᠭᠡᠵᠦ ᠨᠢᠰᠬᠡᠪᠡ᠃ ᠪᠠᠭᠪᠠᠬᠠᠢ ᠬᠡᠳᠦᠨ ᠴᠠᠭ ᠨᠢᠰᠦᠭᠰᠡᠨ ᠪᠣᠯᠪᠠᠴᠤ ᠬᠤᠩᠬᠠ ᠶ᠋ᠢ ᠶᠡᠷᠦ ᠳᠤᠤᠭᠠᠷᠭᠠᠭᠰᠠᠨ ᠦᠭᠡᠢ᠃ ᠡᠷᠳᠡᠮᠲᠡᠳ ᠳᠠᠬᠢᠭᠠᠳ ᠪᠠᠰᠠ ᠬᠣᠶᠠᠷ ᠤᠳᠠᠭᠠ ᠲᠤᠷᠰᠢᠯᠲᠠ ᠬᠢᠯᠡ᠃ ᠨᠢᠭᠡ ᠤᠳᠠᠭᠠ ᠪᠠᠭᠪᠠᠬᠠᠢ ᠶ᠋ᠢᠨ ᠴᠢᠬᠢ ᠶ᠋ᠢ ᠪᠥᠭᠯᠡᠵᠦ᠂ ᠨᠢᠭᠡ ᠤᠳᠠᠭᠠ ᠨᠢ ᠪᠠᠭᠪᠠᠬᠠᠢ ᠶ᠋ᠢᠨ ᠠᠮᠠ ᠶ᠋ᠢ ᠲᠠᠭᠯᠠᠭᠠᠳ ᠭᠡᠷ ᠳᠣᠲᠣᠷᠠ ᠨᠢᠰᠬᠡᠪᠡ᠃ ᠪᠠᠭᠪᠠᠬᠠᠢ ᠶᠠᠭ ᠲᠣᠯᠣᠭᠠᠢ ᠦᠭᠡᠢ ᠢᠯᠠᠭᠠ ᠰᠢᠭ᠋ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠮᠥᠷᠭᠥᠭᠡᠳ ᠬᠤᠩᠬᠠ ᠨᠤᠭᠤᠳ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠤᠤᠭᠠᠷᠴᠤ ᠪᠠᠢᠯᠠ᠃ ᠡᠨᠡ ᠲᠤᠷᠰᠢᠯᠲᠠ ᠠ᠋ᠴᠠ ᠦᠵᠡᠪᠡᠯ ᠪᠠᠭᠪᠠᠬᠠᠢ ᠰᠥᠨᠢ ᠪᠡᠷ ᠨᠢᠰᠴᠦ ᠴᠢᠳᠠᠳᠠᠭ ᠤ᠋ᠨ ᠡᠷᠳᠡᠮ ᠨᠢ ᠨᠢᠳᠦᠨ ᠳ᠋ᠡᠭᠡᠨ ᠪᠠᠢᠭᠠ ᠪᠢᠰᠢ᠂ ᠬᠠᠷᠢᠨ ᠠᠮᠠ ᠪᠣᠯᠤᠨ ᠴᠢᠬᠢᠨ ᠳ᠋ᠦ᠍ᠨᠢ ᠪᠠᠢᠵᠠᠢ᠃
ᠡᠷᠳᠡᠮᠲᠡᠳ ᠳᠠᠬᠢᠨ ᠳᠠᠪᠲᠠᠨ ᠰᠤᠳᠤᠯᠤᠭᠰᠠᠭᠠᠷ ᠪᠠᠢᠭᠠᠳ ᠡᠨᠡ ᠨᠢᠭᠤᠴᠠ ᠶ᠋ᠢ ᠣᠯᠵᠤ ᠮᠡᠳᠡᠵᠡᠢ᠃ ᠪᠠᠭᠪᠠᠬᠠᠢ ᠨᠢᠰᠬᠦ ᠳ᠋ᠡᠭᠡᠨ ᠠᠮᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠵᠦᠢᠯ ᠦ᠋ᠨ ᠳᠠᠭᠤᠨ ᠭᠠᠷᠭᠠᠳᠠᠭ ᠪᠠᠢᠵᠠᠢ᠃ ᠡᠨᠡ ᠳᠠᠭᠤᠨ ᠢ᠋ ᠬᠡᠳᠦ ᠳᠠᠭᠤᠨ ᠭᠡᠨᠡ᠃ ᠡᠭᠦᠨ ᠢ᠋ ᠬᠥᠮᠦᠨ ᠣᠯᠵᠤ ᠰᠣᠨᠣᠰᠳᠠᠭ ᠦᠭᠡᠢ᠂ ᠬᠠᠷᠢᠨ ᠪᠠᠭᠪᠠᠬᠠᠢ ᠥᠪᠡᠷ ᠢ᠋ᠶ᠋ᠡᠷ ᠣᠯᠵᠤ ᠰᠣᠨᠣᠰᠳᠠᠭ ᠶᠤᠮ᠃ ᠬᠡᠳᠦ ᠳᠠᠭᠤᠨ ᠨᠢ ᠤᠷᠤᠭᠰᠢ ᠳᠣᠯᠭᠢᠶᠠᠯᠠᠨ ᠶᠠᠪᠤᠵᠤ᠂ ᠬᠠᠷᠰᠢ ᠰᠠᠭᠠᠳ ᠲᠤ᠌ ᠤᠴᠠᠷᠠᠪᠠᠯ ᠪᠤᠴᠠᠭᠠᠳ ᠴᠤᠤᠷᠢᠶᠠᠲᠤᠨᠠ᠃ ᠡᠨᠡ ᠥᠴᠦᠬᠡᠨ ᠴᠤᠤᠷᠢᠶᠠ ᠶ᠋ᠢ ᠪᠠᠭᠪᠠᠬᠠᠢ ᠶ᠋ᠢᠨ ᠴᠢᠬᠢ ᠣᠯᠵᠤ ᠰᠣᠨᠣᠰᠳᠠᠭ ᠪᠠᠢᠨᠠ᠃ ᠪᠠᠭᠪᠠᠬᠠᠢ ᠢᠩᠭᠢᠵᠦ ᠠᠮᠠ ᠪᠣᠯᠤᠨ ᠴᠢᠬᠢ ᠪᠡᠷ ᠢ᠋ᠶ᠋ᠡᠷ ᠵᠠᠮ ᠢ᠋ᠶ᠋ᠠᠨ ᠬᠠᠢᠵᠤ ᠨᠢᠰᠳᠡᠭ ᠪᠠᠢᠵᠠᠢ᠃
ᠰᠥᠨᠢ ᠶ᠋ᠢᠨ ᠠᠶᠠᠨ ᠤ᠋ ᠨᠢᠰᠬᠡᠯ ᠳ᠋ᠦ᠍ ᠷᠠᠳᠠᠷ ᠭᠡᠳᠡᠭ ᠲᠥᠬᠥᠭᠡᠷᠦᠮᠵᠢ ᠲᠣᠬᠢᠷᠠᠭᠤᠯᠤᠭᠰᠠᠨ ᠪᠠᠢᠳᠠᠭ᠃ ᠡᠨᠡ ᠨᠢ ᠪᠠᠭᠪᠠᠬᠠᠢ ᠶ᠋ᠢᠨ ᠴᠢᠬᠢ ᠪᠠ ᠠᠮᠠ ᠶ᠋ᠢᠨ ᠦᠢᠯᠡᠳᠦᠯ ᠲᠡᠢ ᠪᠠᠷᠤᠭ ᠣᠴᠢᠨᠠ᠃ ᠷᠠᠳᠠᠷ ᠨᠢ ᠠᠭᠠᠷ ᠤᠲᠠᠰᠤ ᠪᠠᠷ ᠢ᠋ᠶ᠋ᠠᠨ ᠷᠠᠳᠢᠣ᠋ ᠳᠣᠯᠭᠢᠶᠠᠨ ᠰᠠᠴᠤᠷᠠᠭᠤᠯᠤᠨᠠ᠃ ᠷᠠᠳᠢᠣ᠋ ᠳᠣᠯᠭᠢᠶᠠᠨ ᠨᠢ ᠬᠠᠷᠰᠢ ᠰᠠᠭᠠᠳ ᠲᠤ᠌ ᠤᠴᠠᠷᠠᠪᠠᠯ ᠣᠢᠨ ᠪᠤᠴᠠᠭᠠᠳ ᠴᠡᠭᠡᠨ ᠳᠡᠯᠭᠡᠴᠡ ᠳᠡᠭᠡᠷᠡ ᠢᠯᠡᠷᠡᠨᠡ᠃ ᠡᠢᠮᠦ ᠷᠠᠳᠠᠷ ᠭᠡᠳᠡᠭ ᠲᠥᠬᠥᠭᠡᠷᠦᠮᠵᠢ ᠲᠡᠢ ᠤᠴᠢᠷ ᠠ᠋ᠴᠠ ᠨᠢᠰᠬᠡᠯ ᠰᠥᠨᠢ ᠪᠡᠷ ᠠᠶᠤᠯ ᠦᠭᠡᠢ ᠨᠢᠰᠳᠡᠭ ᠶᠦ᠍ᠮ᠃
※ᠢᠷᠡᠯᠲᠡ ᠄
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠳᠣᠯᠣᠳᠤᠭᠠᠷ ᠳᠡᠪᠲᠡᠷ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1991 ᠣᠨ ᠤ᠋ 3 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1993 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ᠃
ᠦᠨᠡ᠄1.40 ᠲᠥᠭᠥᠷᠢᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ· ᠣᠶᠤᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠠ· ᠰᠠᠷᠠᠨᠭᠡᠷᠡᠯ᠂ ᠪᠦᠷᠢᠨᠴᠡᠴᠡᠭ
2023.7.25