ᠥᠷᠢᠰᠦᠯᠳᠦᠭᠰᠡᠨ ᠬᠣᠷᠸᠠ ᠳᠡᠭᠡᠷᠡ - ᠷ ᠂ ᠴᠣᠢᠨᠣᠮ Өрсөлдсөн хорвоо дээр – Р ᠂ Чойном
322 ᠤᠯᠠᠭᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠢᠰᠤᠨ ᠲᠠᠢ ᠪᠠᠨ
ᠲᠤᠯᠵᠤ ᠥᠰᠦᠭᠰᠡᠨ ᠦ᠌ ᠤᠴᠢᠷ
ᠤᠢᠳᠬᠠᠷ ᠭᠤᠨᠢᠭ ᠤ᠋ᠨ ᠵᠢᠪᠡ
ᠰᠡᠳᠬᠢᠯ ᠢ᠋ ᠮᠢᠨᠢ ᠡᠪᠳᠡᠵᠦ
ᠲᠣᠭᠣᠷᠢᠨ ᠳᠠᠰᠢᠭᠰᠠᠨ ᠨᠥᠬᠥᠳ
ᠲᠤᠭᠤᠷᠭᠠ ᠲᠤᠰᠠᠭᠠᠷᠯᠠᠨ ᠣᠳᠴᠤ
ᠲᠣᠭᠣᠨᠣ ᠪᠠᠷ ᠦᠵᠡᠭᠳᠡᠬᠦ ᠣᠳᠣᠨ ᠮᠡᠲᠦ
ᠠᠯᠤᠰ ᠪᠥᠭᠯᠡᠭᠦᠦ ᠣᠷᠣᠰᠢᠭᠠᠳ
ᠲᠣᠯᠣᠭᠠᠢ ᠮᠠᠭᠤᠲᠠᠢ ᠴᠦᠲᠡᠨᠵᠡ ᠮᠡᠲᠦ
ᠪᠢᠴᠢᠬᠠᠨ ᠪᠠᠶᠠᠰᠤᠯ ᠬᠡᠢᠰᠦᠭᠡᠳ
ᠲᠣᠷᠬᠠ ᠳᠦᠭᠦᠷᠡᠩ ᠳᠠᠷᠢ ᠰᠢᠭ᠋
ᠬᠦᠴᠦᠲᠦ ᠭᠤᠨᠢᠭ ᠦᠯᠡᠳᠡᠪᠡ᠃
ᠠᠪᠬᠤ ᠢᠳᠡᠬᠦ ᠳᠤᠷᠠᠲᠠᠢ
ᠬᠤᠳᠠᠯ ᠢᠨᠢᠶᠡᠭᠴᠢ ᠪᠦᠬᠦᠨ
ᠠᠮᠠᠨ ᠠ᠋ᠴᠠ ᠭᠠᠷᠬᠤ ᠦᠭᠡ ᠶ᠋ᠢ ᠴᠦ᠍
ᠬᠤᠯᠠᠭᠠᠢ ᠬᠢᠬᠦ ᠰᠠᠨᠠᠭᠠᠲᠠᠢ
ᠠᠪᠢᠶᠠᠰ ᠪᠢᠯᠢᠭ ᠡᠴᠡ ᠠᠶᠤᠭᠴᠢ
ᠬᠤᠪᠢ ᠪᠠᠨ ᠬᠢᠴᠢᠶᠡᠭᠴᠢ ᠪᠦᠬᠦᠨ
ᠠᠭᠠᠷ ᠢ᠋ ᠬᠦᠷᠲᠡᠯᠡ ᠨᠠᠳᠠ
ᠬᠤᠳᠠᠯᠳᠤᠵᠤ ᠥᠭᠬᠦ ᠰᠠᠨᠠᠭᠠᠲᠠᠢ᠃
ᠲᠡᠮᠡᠴᠡᠯᠳᠦ ᠬᠣᠷᠸᠠ ᠳ᠋ᠤ᠌
ᠲᠡᠮᠡᠴᠡᠵᠦ ᠶᠠᠪᠤᠬᠤ ᠨᠢ ᠶᠣᠰᠣᠨ ᠪᠣᠯᠪᠠᠴᠤ
ᠲᠡᠨᠡᠭ ᠦ᠋ᠳ ᠦ᠋ᠨ ᠳᠤᠮᠳᠠ
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠣᠢᠭᠠᠳ ᠠᠮᠠᠨ ᠤ᠋ ᠭᠠᠷᠤᠵᠠ
ᠲᠡᠳᠡᠨ ᠳ᠋ᠦ᠍ ᠬᠡᠷᠡᠭᠲᠡᠢ᠂
ᠨᠠᠳᠠ ᠳ᠋ᠤ᠌ ᠬᠠᠩᠭᠠᠯᠲᠠᠲᠠᠢ ᠤᠬᠠᠭᠠᠨ ᠰᠦᠢᠬᠡ ᠪᠡᠨ
ᠲᠡᠩᠴᠡᠭᠦᠯᠵᠦ ᠂ ᠲᠦᠭᠡᠭᠡᠬᠦ ᠭᠡᠵᠦ
ᠰᠠᠨᠠᠭᠠᠳ ᠰᠠᠨᠠᠭᠠᠳ ᠰᠠᠨᠠᠭᠠᠨ ᠤ᠋ ᠭᠠᠷᠤᠵᠠ
ᠢᠷᠠᠭᠤ ᠰᠢᠯᠦᠭ ᠲᠦ᠍ ᠮᠢᠨᠢ
ᠪᠠᠷᠠᠭᠠᠨ ᠥᠩᠭᠡ ᠰᠡᠭᠦᠳᠡᠷ ᠮᠡᠲᠦ ᠲᠤᠰᠤᠭᠰᠠᠨ ᠨᠢ
ᠢᠪᠴᠤᠷᠠᠯ ᠪᠢᠰᠢ
ᠰᠡᠳᠬᠢᠯ ᠵᠣᠪᠠᠭᠰᠠᠨ ᠠᠶᠠᠰ ᠪᠣᠯᠪᠠ ᠤᠤ?
ᠶᠠᠷᠢᠶᠠ ᠬᠡᠯᠡᠨ ᠦ᠌ ᠮᠢᠨᠢ
ᠭᠠᠰᠢᠭᠤᠨ ᠦᠭᠡ ᠳᠠᠪᠤᠰᠤ ᠮᠡᠲᠦ ᠰᠢᠩᠭᠡᠭᠰᠡᠨ ᠨᠢ
ᠶᠠᠳᠠᠭᠤᠷᠠᠯ ᠪᠢᠰᠢ
ᠬᠠᠲᠠᠭᠤᠷᠠᠯ ᠪᠠᠰᠠ ᠪᠠᠢᠭᠠ ᠴᠤ᠌ ᠪᠣᠯᠪᠠ ᠤᠤ?
ᠪᠠᠢᠭᠠᠯᠢ ᠨᠡᠢᠭᠡᠮ ᠢ᠋ ᠣᠢᠯᠠᠭᠠᠬᠤ ᠰᠦᠪᠡ ᠦᠭᠡᠢ
ᠴᠢᠯᠠᠭᠤᠨ ᠲᠠᠷᠢᠬᠢ ᠶ᠋ᠢ
ᠪᠠᠳᠠᠭ ᠰᠢᠯᠦᠭ ᠢ᠋ᠶ᠋ᠡᠷ ᠥᠷᠥᠮᠳᠡᠬᠦ ᠭᠡᠬᠦ ᠳ᠋ᠦ᠍
ᠨᠠᠰᠤ ᠮᠢᠨᠢ ᠬᠦᠷᠬᠦ ᠦᠭᠡᠢ
ᠪᠠᠢᠶᠠ ᠭᠡᠬᠦ ᠳ᠋ᠦ᠍
ᠰᠡᠳᠬᠢᠯ ᠲᠡᠪᠴᠢᠬᠦ ᠦᠭᠡᠢ ᠮᠢᠨᠦ ᠬᠤᠪᠢ ᠳ᠋ᠤ᠌
ᠪᠠᠢᠭᠠ ᠵᠣᠪᠠᠯᠠᠩ
ᠭᠠᠭᠴᠠᠬᠠᠨ ᠡᠨᠡ ᠂ ᠭᠤᠨᠢᠭ ᠴᠤ᠌ ᠡᠨᠡ ᠃
※ ᠢᠷᠡᠯᠲᠡ᠄
《 ᠷ · ᠴᠣᠶ᠋ᠢᠨᠣᠮ ᠦ᠋ᠨ ᠰᠢᠯᠦᠭ ᠵᠣᠬᠢᠶᠠᠯ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠬ᠋ᠠ ᠶ᠋ᠢᠨ ᠰᠢᠯᠦᠭ ᠡᠴᠡ ᠬᠠᠭᠤᠯᠪᠠ ᠃
ᠪᠢ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠤᠠᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠤᠨᠤᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠠᠴᠢ᠄ ᠰᠡᠷᠭᠦᠯᠡᠩ
ᠬᠢᠨᠠᠭᠴᠢ᠄ ᠭᠠᠷᠮᠠ