ᠥᠨᠥᠳᠥᠷ ᠨᠠᠳᠠ ᠬᠢᠬᠦ ᠶᠠᠭᠤᠮᠠ ᠠᠯᠠᠭᠠ - ᠷ ᠂ ᠴᠣᠢᠨᠣᠮ Өнөөдөр над хийх юм алга – Р ᠂ Чойном
279ᠥᠨᠥᠳᠥᠷ ᠨᠠᠳᠠ ᠬᠢᠬᠦ ᠶᠠᠭᠤᠮᠠ ᠠᠯᠠᠭᠠ
ᠥᠨᠥᠳᠥᠷ ᠨᠠᠳᠠ ᠬᠢᠬᠦ ᠶᠠᠭᠤᠮᠠ ᠠᠯᠠᠭᠠ
ᠥᠭᠡᠳᠡ ᠤᠷᠤᠭᠤ ᠪᠠᠨ ᠶᠠᠪᠤᠪᠠᠴᠤ ᠭᠠᠵᠠᠷ ᠠᠯᠠᠭᠠ
ᠥᠷᠯᠥᠭᠡᠨ ᠡᠴᠡ ᠬᠣᠢᠰᠢ ᠲᠡᠭᠷᠢ ᠠᠶᠠ ᠦᠭᠡᠢᠴᠡᠭᠡᠳ
ᠥᠯᠥᠨ ᠴᠠᠰᠤ ᠴᠢᠭᠢᠭ ᠲᠡᠳᠡᠨ ᠬᠠᠶᠠᠯᠠᠪᠠ ᠃
ᠤᠰᠤᠯᠢᠭ ᠡᠭᠦᠯᠡᠰ ᠪᠡᠶᠡ ᠬᠦᠨᠳᠦᠷᠡᠨ ᠳᠣᠭᠣᠭᠰᠢᠯᠠᠭᠠᠳ
ᠠᠭᠤᠯᠠ ᠲᠠᠯᠠ ᠬᠠᠷᠠ ᠪᠠᠷᠠᠭᠠᠨ ᠪᠣᠯᠤᠭᠠᠳ
ᠵᠢᠷᠦᠬᠡ ᠬᠦᠷᠦᠮᠡ ᠬᠦᠢᠲᠡᠨ ᠰᠠᠯᠬᠢ
ᠵᠡᠭᠦᠨ ᠠᠭᠤᠯᠠ ᠶ᠋ᠢᠨ ᠳᠡᠭᠡᠭᠦᠷ ᠦᠯᠢᠶᠡᠵᠦ ᠪᠠᠢᠨᠠᠮ᠃
ᠶᠠᠨᠲᠤᠩ ᠤ᠋ᠨ ᠠᠮᠠᠨ ᠠ᠋ᠴᠠ ᠤᠲᠤᠭᠠ ᠲᠠᠰᠤᠷᠠᠨ ᠤᠨᠠᠵᠤ
ᠶᠠᠪᠠᠭᠠᠨ ᠬᠠᠭᠠᠯᠭᠠ ᠤᠬᠢᠯᠠᠨ ᠴᠢᠬᠠᠷᠠᠨ ᠰᠠᠪᠠᠵᠤ
ᠥᠨᠳᠥᠷ ᠱᠣᠩ ᠤ᠋ᠨ ᠭᠡᠷᠡᠯ ᠦ᠋ᠨ ᠭᠤᠷᠪᠠᠨ ᠤᠲᠠᠰᠤ
ᠥᠨᠥᠴᠢᠨ ᠭᠤᠷᠪᠠᠨ ᠬᠡᠦᠬᠡᠳ ᠰᠢᠭ ᠭᠠᠰᠠᠯᠤᠨ ᠭᠢᠩᠰᠢᠵᠦ ᠪᠠᠢᠨᠠ ᠃
ᠨᠤᠲᠤᠭ ᠤ᠋ᠨ ᠬᠢᠨ ᠦ᠌ ᠪᠠᠢᠰᠢᠩ ᠬᠠᠰᠢᠶᠠ ᠫᠧᠩ ᠦ᠋ᠳ
ᠨᠢᠷᠤᠭᠤ ᠦᠭᠡᠢ ᠮᠣᠷᠢ ᠰᠢᠭ᠋ ᠰᠠᠷᠠᠪᠴᠢ ᠣᠨᠢ ᠨᠢ ᠤᠨᠵᠢᠢᠵᠤ ᠴᠡᠴᠡᠷᠡᠭᠡᠳ
ᠨᠠᠭᠤᠷ ᠤ᠋ᠨ ᠲᠡᠨᠳᠡ ᠴᠢᠳᠥᠷ ᠲᠡᠢ ᠴᠠᠭᠠᠨ ᠮᠣᠷᠢ
ᠨᠢᠯᠪᠤᠰᠤ ᠠᠳᠠᠯᠢ ᠪᠥᠩ ᠪᠦᠩ ᠵᠣᠭᠰᠣᠵᠤ ᠬᠠᠷᠠᠭᠳᠠᠨᠠ ᠃
ᠲᠣᠮᠣ ᠵᠢᠵᠢᠭ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠠᠶᠠᠭᠠᠨ ᠳ᠋ᠤ᠌
ᠲᠣᠭᠣᠭᠠ ᠨᠣᠬᠠᠢ ᠬᠣᠶᠠᠷ ᠠᠳᠠᠯᠢᠬᠠᠨ ᠳᠤᠭᠤᠢᠷᠠᠵᠤ ᠬᠠᠷᠠᠯᠠᠭᠠᠳ
ᠲᠣᠮᠣᠭᠠ ᠰᠠᠭᠤᠭᠠ ᠦᠭᠡᠢ ᠬᠡᠦᠬᠡᠳ ᠪᠠᠭᠠᠴᠤᠤᠯ ᠬᠦᠷᠲᠡᠯᠡ
ᠲᠣᠭᠯᠠᠬᠤ ᠬᠥᠯ ᠨᠢ ᠬᠣᠷᠢᠭᠳᠠᠵᠤ ᠭᠡᠷ ᠳᠣᠲᠣᠷᠠ ᠪᠠᠨ ᠬᠣᠯᠬᠢᠨᠠ ᠃
ᠬᠦᠨᠳᠦ ᠬᠥᠯ ᠲᠡᠢ ᠡᠬᠡᠨᠡᠷ ᠦ᠋ᠳ ᠠᠷᠭᠠᠯ ᠤ᠋ᠨ ᠮᠠᠢ ᠲᠠᠯᠪᠢᠵᠤ
ᠬᠡᠦᠬᠡᠳ ᠲᠡᠢ ᠪᠡᠨ ᠬᠡᠷᠡᠯᠳᠦᠵᠦ ᠠᠮᠠ ᠴᠢᠯᠥᠭᠡ ᠦᠭᠡᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌
ᠬᠦᠷᠡᠩ ᠲᠡᠷᠯᠢᠭ ᠳᠠᠪᠬᠤᠷᠯᠠᠭᠰᠠᠨ ᠬᠥᠰᠡᠷ ᠦ᠋ᠨ 《 ᠭᠠᠮᠢᠩ 》 ᠰᠢᠭ᠋ ᠡᠷᠡ ᠨᠢ
ᠬᠦᠢᠲᠡᠨ ᠪᠠᠢᠨᠠ ᠭᠡᠵᠦ ᠲᠡᠭᠷᠢ ᠶ᠋ᠢ ᠬᠠᠷᠢᠶᠠᠵᠤ ᠳᠠᠪᠴᠢᠳᠠᠨᠠ ᠃
ᠵᠠᠷᠢᠮ ᠠᠢᠯ ᠳ᠋ᠤ᠌ ᠡᠳᠦᠢ ᠳ᠋ᠦ᠍ ᠭᠠᠯ ᠬᠦᠦᠰ ᠨᠢ ᠤᠨᠲᠠᠷᠠᠭᠠᠳ
ᠵᠠᠯᠠᠭᠤ ᠲᠠᠩᠬᠢᠯ ᠡᠬᠡᠨᠡᠷ ᠨᠢ ᠬᠥᠨᠵᠢᠯᠡ ᠳ᠋ᠦ᠍ ᠣᠷᠣᠨ ᠳᠤᠭᠵᠢᠷᠠᠵᠤ
ᠬᠠᠷᠠ ᠬᠥᠮᠦᠨ ᠨᠢ 《 ᠺᠣᠨ᠋ᠲ᠋ᠣᠷ》 ᠲᠠᠭᠠᠨ ᠴᠠᠭ ᠨᠥᠭᠴᠢᠭᠡᠵᠦ ᠶᠠᠳᠠᠨ
ᠬᠠᠭᠠᠯᠭᠠᠨ ᠠ᠋ᠴᠠ ᠨᠢᠳᠦ ᠪᠡᠨ ᠰᠠᠯᠭᠠᠯ ᠦᠭᠡᠢ ᠴᠣᠩᠬᠣ ᠪᠠᠷ ᠭᠢᠯᠠᠯᠵᠠᠵᠤ ᠪᠠᠢᠭᠠ ᠃
ᠪᠠᠷᠳᠠᠮ ᠶᠣᠭᠲᠠ ᠨᠠᠭᠠᠳᠤᠮ ᠤ᠋ᠨ ᠪᠡᠯᠡᠨ ᠦᠭᠡᠰ ᠬᠠᠶᠠᠯᠴᠠᠵᠤ
ᠪᠠᠰᠠ ᠵᠠᠷᠢᠮ ᠨᠢ ᠡᠳᠦᠢ ᠳ᠋ᠦ᠍ ᠳᠠᠯᠤᠤ ᠪᠠᠯᠪᠠᠵᠤ ᠪᠠᠢᠭᠠ
ᠪᠠᠲᠤᠯᠠᠵᠤ ᠲᠦᠭᠵᠢᠭᠰᠡᠨ ᠡᠭᠦᠳᠡ ᠪᠡᠨ ᠬᠡᠦᠬᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠷ ᠮᠠᠨᠠᠭᠤᠯᠤᠭᠠᠳ
ᠪᠠᠢᠬᠤ ᠦᠭᠡᠢ ᠭᠡᠵᠦ ᠬᠡᠯᠡ ᠭᠡᠵᠦ ᠮᠥᠩᠭᠥ ᠪᠡᠨ ᠡᠪᠦᠷᠯᠡᠵᠦ ᠰᠠᠭᠤᠭᠠ ᠃
ᠬᠥᠳᠡᠭᠡ ᠪᠠᠷᠢᠭᠠᠳᠠ ᠶ᠋ᠢᠨ ᠨᠤᠲᠤᠭ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ
ᠬᠥᠭᠡᠷᠦᠬᠦᠢ ᠮᠠᠯᠴᠢᠳ ᠡᠳᠦᠢ ᠳ᠋ᠦ᠍ ᠲᠠᠭᠠᠷᠠᠵᠤ ᠬᠦᠷᠦᠵᠦ ᠶᠠᠪᠤᠭᠠ
ᠮᠠᠯ ᠳ᠋ᠠᠭᠠᠨ ᠶᠠᠪᠤᠭᠰᠠᠨ ᠲᠡᠳᠡᠨ ᠦ᠌ ᠡᠵᠡᠭᠦᠢ ᠭᠡᠷ ᠦ᠋ᠨ ᠭᠠᠳᠠᠭᠠ
ᠮᠠᠬᠠᠷᠠᠵᠤ ᠬᠤᠷᠢᠶᠠᠭᠰᠠᠨ ᠠᠷᠭᠠᠯ ᠨᠢ ᠰᠢᠮᠠᠷᠭᠠᠨ ᠳ᠋ᠤ᠌ ᠨᠣᠷᠴᠤ ᠬᠡᠪᠲᠡᠭᠡ᠃
ᠲᠠᠷᠢᠶᠠᠨ ᠲᠠᠯᠠᠪᠠᠢ ᠳ᠋ᠤ᠌ ᠡᠳᠦᠢ ᠳ᠋ᠦ᠍ ᠬᠠᠭᠠᠯᠤᠭᠠ ᠢᠳᠡ ᠳᠤᠮᠳᠠ ᠪᠠᠨ
ᠲᠠᠷᠠᠺᠲ᠋ᠣᠷ ᠤ᠋ᠨ ᠰᠢᠯᠦᠨ ᠺᠠᠪᠢᠨ ᠳ᠋ᠤ᠌ ᠬᠠᠷᠠ ᠴᠢᠷᠠᠢᠲᠤ ᠵᠢᠯᠣᠭᠣᠴᠢ
ᠤᠯᠠᠭᠠᠨ ᠲᠠᠮᠠᠬᠢ ᠶ᠋ᠢ ᠰᠣᠨᠢᠨ ᠳ᠋ᠤ᠌ ᠨᠢᠴᠠᠷᠠᠭᠰᠠᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠣᠷᠢᠶᠠᠵᠤ
ᠤᠲᠤᠭᠠ ᠂ ᠬᠠᠷᠢᠶᠠᠯ ᠬᠣᠶᠠᠷ ᠢ᠋ᠶ᠋ᠠᠨ ᠵᠡᠷᠭᠡ ᠪᠠᠭᠠᠭᠢᠭᠤᠯᠵᠤ ᠶᠠᠪᠤᠭᠠ ᠃
ᠦᠷᠡᠯᠡᠭᠴᠢ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠬᠥᠪᠡᠭᠦᠨ ᠰᠢᠷᠣᠢ ᠪᠤᠯᠠᠬᠤ ᠦᠭᠡᠢ ᠳ᠋ᠦ᠍ ᠪᠠᠶᠠᠷᠯᠠᠪᠠᠴᠤ
ᠦᠰᠦᠲᠡᠢ ᠬᠤᠪᠴᠠᠰᠤ ᠬᠢᠭᠡᠳ ᠢᠯᠡᠭᠡᠯᠲᠡ ᠶ᠋ᠢᠨ ᠡᠵᠡᠨ ᠥᠬᠢᠨ ᠢ᠋
ᠦᠷᠭᠦᠯᠵᠢ ᠪᠣᠳᠣᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠬᠥᠯᠳᠡᠭᠦᠦ ᠶᠦᠮ ᠰᠢᠭ ᠴᠢᠷᠠᠢᠯᠠᠵᠤ
ᠥᠯᠢᠢ ᠰᠠᠬᠢᠨ ᠰᠠᠭᠤᠭᠠ ᠬᠦᠷᠡᠩ ᠰᠢᠪᠠᠭᠤ ᠰᠢᠭ᠋ ᠬᠠᠷᠠᠭᠳᠠᠨᠠ ᠃
ᠲᠡᠷᠭᠡ ᠰᠠᠢᠲᠠᠢ ᠵᠢᠯᠣᠭᠣᠴᠢ ᠳᠤᠯᠠᠭᠠᠨ ᠺᠠᠪᠢᠨ ᠳ᠋ᠠᠭᠠᠨ ᠤᠯᠠᠢᠰᠬᠢᠵᠦ
ᠲᠡᠭᠡᠭᠡᠵᠦ ᠶᠠᠪᠤᠭᠠ ᠦᠷᠡ ᠡᠴᠡ ᠪᠡᠨ ᠴᠤᠪᠤᠭᠤᠯᠤᠰᠬᠢᠨ ᠳᠠᠪᠬᠢᠨᠠ
ᠲᠡᠷᠭᠡ ᠮᠠᠭᠤᠲᠠᠢ ᠨᠢᠭᠡ ᠨᠢ ᠨᠠᠷᠢᠨ ᠭᠣᠣᠯ ᠨᠢ ᠬᠡᠢ ᠡᠷᠭᠢᠵᠦ
ᠲᠡᠭᠷᠢ ᠮᠠᠬᠠᠨᠢᠲ᠋ᠹᠤᠨ ᠬᠣᠶᠠᠷ ᠢ᠋ᠶ᠋ᠠᠨ ᠬᠠᠨᠲᠠᠯᠠ ᠬᠠᠷᠢᠶᠠᠵᠤ ᠶᠠᠪᠤᠨᠠ ᠃
ᠬᠥᠳᠡᠭᠡ ᠨᠤᠲᠤᠭ ᠤ᠋ᠨ ᠲᠡᠭᠷᠢ᠂ ᠬᠤᠷᠴᠠ ᠡᠬᠡᠨᠡᠷ ᠰᠢᠭ
ᠬᠥᠳᠡᠯᠮᠦᠷᠢᠴᠢᠨ ᠬᠥᠮᠦᠨ ᠦ᠌ ᠵᠣᠪᠠᠬᠤ ᠪᠠᠶᠠᠰᠬᠤ ᠵᠡᠷᠭᠡᠴᠡᠭᠰᠡᠨ
ᠬᠥᠳᠡᠭᠡ ᠬᠡᠭᠡᠷᠡ ᠶ᠋ᠢᠨ ᠠᠮᠢᠳᠤᠷᠠᠯ ᠢ᠋
ᠬᠦᠢᠲᠡᠨ ᠬᠠᠷᠠᠴᠠ ᠪᠠᠷ ᠰᠢᠯᠪᠢᠭᠦᠷᠳᠡᠨᠡ ᠃
※ ᠢᠷᠡᠯᠲᠡ᠄
《 ᠷ · ᠴᠣᠶ᠋ᠢᠨᠣᠮ ᠦ᠋ᠨ ᠰᠢᠯᠦᠭ ᠵᠣᠬᠢᠶᠠᠯ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠬ᠋ᠠ ᠶ᠋ᠢᠨ ᠰᠢᠯᠦᠭ ᠡᠴᠡ ᠬᠠᠭᠤᠯᠪᠠ ᠃
ᠪᠢ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠤᠠᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠤᠨᠤᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠡᠷᠭᠦᠯᠡᠩ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ