ᠨᠡᠢᠰᠯᠡᠯ ᠳᠤ - ᠷ ᠂ ᠴᠣᠢᠨᠣᠮ Нийслэлд – Р ᠂ Чойном
254ᠨᠡᠢᠰᠯᠡᠯ ᠳᠤ
ᠠᠮᠢᠨ ᠪᠡᠶᠡ ᠶ᠋ᠢᠨ ᠰᠤᠳᠠᠰᠤ ᠰᠢᠭ᠋ ᠦᠢ ᠣᠯᠠᠨ ᠰᠤᠳᠠᠰᠤᠨ ᠤ᠋ ᠵᠠᠩᠭᠢᠯᠠᠭᠠ ᠪᠣᠯᠤᠭᠰᠠᠨ
ᠦᠢᠯᠡᠳᠪᠦᠷᠢ ᠰᠤᠷᠭᠠᠭᠤᠯᠢ ᠠᠯᠠᠭᠯᠠᠭᠰᠠᠨ ᠵᠠᠯᠠᠭᠤ ᠬᠣᠲᠠ ᠳ᠋ᠤ᠌
ᠡᠭᠦᠯᠡ ᠪᠦᠷᠬᠦᠭᠡᠳ ᠥᠨᠥᠳᠥᠷ ᠦ᠋ᠨ ᠰᠢᠮᠠᠷᠭᠠ ᠬᠠᠶᠠᠯᠠᠭᠰᠠᠨ ᠣᠷᠣᠢ
ᠦᠵᠡᠪᠦᠷᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠵᠠᠯᠠᠭᠤᠰ ᠳᠡᠪᠬᠡᠴᠡᠵᠦ ᠪᠠᠢᠭᠠ
ᠰᠠᠪᠬᠠ ᠰᠢᠭ᠋ ᠨᠢᠷᠤᠭᠤ ᠲᠠᠢ ᠨᠢ ᠬᠦᠢᠲᠡᠨ ᠳ᠋ᠦ᠍ ᠵᠢᠬᠡᠭᠦᠴᠡᠨ ᠮᠡᠬᠦᠢᠵᠦ
ᠰᠠᠯᠪᠠᠭᠠᠷ ᠥᠮᠥᠳᠦᠨ ᠦ᠌ ᠲᠦᠷᠡᠢ ᠳ᠋ᠦ᠍ ᠨᠣᠢᠲᠠᠨ ᠰᠢᠪᠬᠠᠢ ᠦᠰᠦᠷᠦᠭᠡᠳ
ᠰᠠᠷᠯᠤᠭ ᠤ᠋ᠨ ᠰᠡᠪᠡᠭ ᠰᠢᠭ᠋ ᠦᠰᠦ ᠨᠢ ᠤᠰᠤ ᠱᠦᠭᠦᠷᠡᠨ ᠤᠨᠵᠢᠢᠭᠠᠳ
ᠰᠠᠢᠬᠠᠨ ᠴᠠᠭᠠᠨ ᠴᠢᠷᠠᠢ ᠳ᠋ᠤᠨᠢ ᠬᠥᠮᠦᠰᠬᠡᠨ ᠦ᠌ ᠪᠣᠳᠣᠭ ᠬᠠᠯᠲᠠᠷᠲᠤᠭᠰᠠᠨ
ᠡᠷᠡ ᠡᠮᠡ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠵᠠᠯᠠᠭᠤᠰ ᠲᠡᠨᠳᠡ ᠬᠣᠯᠬᠢᠰᠬᠢᠵᠦ
ᠡᠬᠡᠰᠢᠭ ᠮᠠᠭᠤᠲᠠᠢ ᠳᠠᠭᠤᠤ ᠨᠤᠭᠤᠳ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠭᠣᠩᠭᠢᠨᠠᠭᠠᠳ
ᠲᠠᠬᠠ ᠲᠠᠢ ᠭᠤᠲᠤᠯ ᠤ᠋ᠨ ᠥᠰᠥᠭᠡᠢ ᠪᠡᠷ ᠴᠢᠯᠠᠭᠤᠨ ᠱᠠᠯᠠ ᠶ᠋ᠢ ᠪᠠᠯᠪᠠᠵᠤ
ᠲᠠᠩᠨᠠᠭᠤᠯ ᠲᠠᠢ ᠺᠢᠨᠣ᠋ ᠬᠠᠷᠠᠬᠤ ᠶ᠋ᠢᠨ ᠬᠦᠰᠡᠯᠡᠩ ᠪᠣᠯᠵᠤ ᠪᠠᠢᠭᠠ
ᠮᠣᠩᠭᠣᠯ ᠮᠠᠶᠢᠭ ᠤ᠋ᠨ ᠭᠡᠷ ᠦ᠋ᠳ ᠰᠢᠨᠡ ᠬᠣᠷᠣᠭᠠᠯᠠᠯ ᠳ᠋ᠤ᠌ ᠲᠦᠷᠢᠭᠳᠡᠭᠡᠳ
ᠮᠣᠷᠢᠨ ᠲᠡᠷᠭᠡᠴᠢᠨ ᠡᠪᠦᠭᠡᠨ ᠵᠠᠰᠠᠮᠠᠯ ᠳ᠋ᠤ᠌ ᠢᠯᠡᠭᠦᠳᠡᠨ ᠰᠢᠬᠠᠭᠳᠠᠭᠠᠳ
ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠨᠠᠭᠠᠯᠳᠤᠭᠰᠠᠨ ᠵᠥᠭᠡᠢ ᠨᠦ᠍ᠭᠦᠳ ᠰᠢᠭ ᠬᠠᠰᠢᠶᠠ ᠨᠤᠭᠤᠳ
ᠤᠰᠤ ᠴᠠᠰᠤᠨ ᠳ᠋ᠤ᠌ ᠵᠤᠲᠠᠷᠠᠪᠠᠴᠤ ᠭᠡᠷ ᠲᠡᠭᠡᠨ ᠳᠤᠯᠠᠭᠠᠨ ᠪᠠᠢᠭᠠ
ᠦᠢᠯᠡᠳᠪᠦᠷᠢ ᠶ᠋ᠢᠨ ᠨᠦᠰᠡᠷ ᠴᠧᠺ ᠲᠦ᠍ ᠠᠵᠢᠯᠴᠢᠨ ᠡᠳᠦᠢ ᠳ᠋ᠦ᠍ ᠴᠡᠩᠭᠡᠯ ᠲᠡᠢ
ᠦᠨᠡᠲᠦ ᠮᠧᠪᠧᠯ ᠲᠡᠢ ᠥᠷᠥᠭᠡᠨ ᠳ᠋ᠦ᠍ ᠪᠠᠶᠠᠴᠤᠳ ᠡᠳᠦᠢ ᠳ᠋ᠦ᠍ ᠵᠢᠷᠭᠠᠯ ᠲᠠᠢ
ᠡᠮᠬᠦ ᠮᠢᠬᠠᠨ ᠤ᠋ ᠤᠴᠢᠷ ᠲᠤ᠌ ᠬᠡᠦᠬᠡᠨ ᠨᠦ᠍ᠭᠦᠳ ᠡᠳᠦᠢ ᠳ᠋ᠦ᠍ ᠬᠡᠷᠡᠭᠦᠯ ᠲᠡᠢ
ᠦᠢᠮᠡᠭᠡᠨ ᠶᠡᠬᠡᠲᠡᠢ ᠷᠠᠰᠲ᠋ᠤᠷᠠᠨ ᠳ᠋ᠤ᠌ ᠠᠷᠢᠭᠢᠴᠢᠳ ᠡᠳᠦᠢ ᠳ᠋ᠦ᠍ ᠬᠥᠭᠵᠢᠯ ᠲᠡᠢ
ᠣᠶᠤᠲᠠᠨ ᠤ᠋ ᠪᠢᠴᠢᠬᠠᠨ ᠥᠷᠥᠭᠡᠨ ᠳ᠋ᠦ᠍ ᠮᠢᠨᠦ ᠮᠠᠭᠤᠬᠠᠢ ᠰᠢᠳᠦᠲᠦ
ᠣᠷᠣᠨ ᠳᠡᠭᠡᠷᠡ ᠪᠡᠨ ᠡᠳᠦᠢ ᠳ᠋ᠦ᠍ ᠪᠠᠷᠠᠭᠤᠨ ᠬᠠᠵᠠᠭᠤ ᠪᠠᠷ ᠢ᠋ᠶ᠋ᠠᠨ ᠬᠡᠪᠲᠡᠭᠡᠳ
ᠣᠷᠣᠰ ᠬᠡᠯᠡ ᠪᠣᠳᠣᠬᠤ ᠠ᠋ᠴᠠ ᠪᠠᠨ ᠢᠷᠡᠭᠰᠡᠨ ᠵᠠᠬᠢᠳᠠᠯ ᠢ᠋ᠶ᠋ᠠᠨ ᠪᠣᠳᠣᠵᠤ
ᠣᠢᠷᠠ ᠪᠠᠢᠭᠠ ᠰᠠᠨ ᠪᠣᠯ ᠨᠠᠳᠠ ᠲᠠᠢ ᠬᠡᠷᠡᠯᠳᠦᠬᠦ ᠰᠠᠨ ᠭᠡᠵᠦ ᠪᠠᠢᠭᠠ
ᠬᠥᠮᠦᠨ ᠦ᠌ ᠮᠠᠭᠤ ᠠᠷᠢᠯᠳᠠᠭ ᠦᠭᠡᠢ ᠂ ᠲᠡᠭᠷᠢ ᠶ᠋ᠢᠨ ᠮᠠᠭᠤ ᠠᠷᠢᠯᠳᠠᠭ
ᠬᠦᠢᠲᠡᠨ ᠪᠦᠷᠬᠦᠭ ᠥᠨᠥᠳᠥᠷ ᠮᠠᠷᠭᠠᠰᠢ ᠭᠡᠬᠦ ᠳ᠋ᠦ᠍ ᠴᠡᠯᠮᠡᠨᠡ ᠠᠮᠢᠰᠬᠤᠭᠠ
ᠭᠦᠨᠵᠡᠭᠡᠢ ᠠᠪᠬᠤ ᠮᠡᠲᠦ ᠬᠥᠳᠡᠭᠡ ᠨᠤᠲᠤᠭ ᠲᠡᠨᠢᠢᠵᠦ
ᠠᠷᠠᠳ ᠮᠠᠯᠴᠢᠨ ᠤᠷᠮᠠᠲᠠᠢ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠳᠠᠪᠬᠢᠨᠠ ᠃
※ ᠢᠷᠡᠯᠲᠡ᠄
《 ᠷ · ᠴᠣᠶ᠋ᠢᠨᠣᠮ ᠦ᠋ᠨ ᠰᠢᠯᠦᠭ ᠵᠣᠬᠢᠶᠠᠯ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠬ᠋ᠠ ᠶ᠋ᠢᠨ ᠰᠢᠯᠦᠭ ᠡᠴᠡ ᠬᠠᠭᠤᠯᠪᠠ ᠃
ᠪᠢ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠤᠠᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠤᠨᠤᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠥᠮᠡᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ