ᠬᠠᠷᠠ ᠨᠠᠷᠠᠨ - ᠷ ᠂ ᠴᠣᠢᠨᠣᠮ Хар наран – Р ᠂ Чойном
296ᠬᠠᠷᠠ ᠨᠠᠷᠠᠨ
ᠣᠷᠴᠢᠯᠠᠩ ᠤ᠋ᠨ ᠶᠠᠮᠠᠷ ᠴᠤ᠌ ᠥᠩᠭᠡ ᠪᠡᠷ
ᠤᠨᠤᠭᠠᠨ ᠪᠦᠲᠦᠭᠡᠬᠦ ᠦᠭᠡᠢ ᠡᠷᠬᠢᠮ ᠨᠢᠭᠡᠨ ᠶᠢᠷᠲᠢᠨᠴᠦ
ᠣᠭᠲᠠᠷᠭᠤᠢ ᠶ᠋ᠢᠨ ᠳᠤᠷᠠᠨ ᠠᠪᠠᠢ ᠳ᠋ᠤ᠌ ᠥᠷᠲᠥᠭᠳᠡᠭᠡ ᠦᠭᠡᠢ
ᠣᠳᠣ ᠪᠣᠯᠲᠠᠯᠠ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠳ᠋ᠤ᠌ ᠳᠠᠯᠳᠠ ᠦᠯᠡᠳᠡᠵᠡᠢ᠃
ᠲᠡᠨᠳᠡ ᠠᠭᠤᠯᠠ ᠴᠤ᠌ ᠪᠠᠢᠬᠤ ᠦᠭᠡᠢ᠂ ᠤᠰᠤ ᠴᠤ᠌ ᠪᠠᠢᠬᠤ ᠦᠭᠡᠢ
ᠲᠩᠷᠢ ᠴᠦ᠍ ᠪᠠᠢᠬᠤ ᠦᠭᠡᠢ᠂ ᠭᠠᠵᠠᠷ ᠴᠤ᠌ ᠪᠠᠢᠬᠤ ᠦᠭᠡᠢ
ᠲᠡᠭᠡᠭᠰᠡᠨ ᠠᠲᠠᠯᠠ ᠦᠬᠦᠳᠡᠭ ᠦᠭᠡᠢ ᠬᠥᠮᠦᠰ ᠪᠣᠢ
ᠲᠡᠮᠡᠴᠡᠯ ᠬᠠᠤᠯᠢ ᠵᠠᠷᠴᠢᠮ ᠪᠣᠢ᠃
ᠡᠨᠡ ᠶᠢᠷᠲᠢᠨᠴᠦ ᠶ᠋ᠢ ᠦᠶᠡ ᠦᠶᠡᠬᠡᠨ
ᠡᠩᠬᠦᠷᠡᠢ ᠵᠥᠭᠡᠯᠡᠨ ᠬᠠᠷᠠ ᠨᠠᠷᠠᠨ ᠭᠡᠷᠡᠯᠲᠦᠭᠦᠯᠳᠡᠭ ᠶᠦ᠍ᠮ
ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠠᠯᠲᠠᠨ ᠨᠠᠷᠠᠨ ᠠ᠋ᠴᠠ ᠢᠯᠡᠭᠦᠦ
ᠳᠡᠯᠦᠮᠡᠨ ᠬᠠᠷᠠ ᠨᠠᠷᠠᠨ ᠳ᠋ᠠᠭᠠᠨ ᠲᠡᠷᠡ ᠶᠢᠷᠲᠢᠨᠴᠦ ᠬᠠᠢᠷᠠᠲᠠᠢ᠃
ᠨᠠᠮᠤᠭᠤᠬᠠᠨ ᠭᠢᠯᠲᠠᠭᠠᠨᠠᠭᠰᠠᠨ ᠬᠠᠷᠠ ᠨᠠᠷᠠᠨ ᠤ᠋ ᠬᠢᠨᠢ
ᠨᠠᠷᠢᠬᠠᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠲᠤᠰᠬᠠᠯ ᠳᠣᠣᠷᠠ
ᠪᠤᠳᠠᠭᠠ ᠲᠠᠷᠢᠶᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍
ᠪᠤᠰᠤᠳ ᠬᠥᠮᠦᠰ ᠦ᠋ᠨ ᠠᠮᠰᠠᠭᠠ ᠨᠢ ᠦᠭᠡᠢ ᠴᠡᠩᠭᠡᠯ ᠵᠢᠷᠭᠠᠯ ᠤᠷᠭᠤᠨᠠ
ᠢᠨᠠᠭ ᠲᠠᠴᠢᠶᠠᠩᠭᠤᠢ ᠶ᠋ᠢᠨ ᠠᠮᠲᠠᠲᠠᠢᠬᠠᠨ ᠭᠤᠨᠢᠭ ᠤᠷᠭᠤᠨᠠ
ᠶᠠᠭᠠᠬᠢᠪᠠᠴᠤ ᠪᠡᠶᠡᠯᠡᠵᠦ ᠦᠯᠦ ᠪᠣᠯᠬᠤ ᠠᠮᠢᠳᠤᠷᠠᠯ ᠤᠷᠭᠤᠨᠠ
ᠲᠡᠭᠡᠲᠡᠯᠡ ᠤᠷᠭᠤᠴᠠ ᠶ᠋ᠢ ᠨᠢ ᠬᠤᠷᠢᠶᠠᠬᠤ ᠡᠵᠡᠨ ᠦᠭᠡᠢ
ᠲᠡᠩᠭᠡᠯᠢᠭ ᠢ᠋ᠶ᠋ᠡᠷ ᠭᠤᠴᠢᠨ ᠨᠠᠢ᠍ᠮᠠ ᠡᠷᠭᠢᠭᠰᠡᠨ
ᠲᠡᠷᠡ ᠬᠦ᠌ ᠶᠢᠷᠲᠢᠨᠴᠦ ᠰᠢᠯᠦᠭᠴᠢ ᠶ᠋ᠢᠨ ᠰᠡᠳᠬᠢᠯ ᠪᠤᠶᠤ᠃
※ ᠢᠷᠡᠯᠲᠡ᠄
《 ᠷ · ᠴᠣᠶ᠋ᠢᠨᠣᠮ ᠦ᠋ᠨ ᠰᠢᠯᠦᠭ ᠵᠣᠬᠢᠶᠠᠯ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠬ᠋ᠠ ᠶ᠋ᠢᠨ ᠰᠢᠯᠦᠭ ᠡᠴᠡ ᠬᠠᠭᠤᠯᠪᠠ ᠃
ᠪᠢ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠤᠠᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠤᠨᠤᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠡᠷᠭᠦᠯᠡᠩ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ