ᠮᠣᠩᠭᠣᠯ ᠲᠤᠮ ᠲᠣᠬᠢᠶᠠ ᠨᠤᠭᠤᠳ - ᠰᠡᠴᠡᠨᠪᠢᠯᠢᠭ ᠦ᠋ᠨ ᠡᠷᠲᠡᠨᠢ Монгол дом дохионууд - Цэцэнбилигийн Эрдэнэ
630 ᠮᠣᠩᠭᠣᠯᠴᠤᠳ ᠡᠮ ᠳᠠᠩ ᠬᠡᠷᠡᠭᠯᠡᠬᠦ ᠦᠭᠡᠢ ᠪᠡᠷ ᠡᠪᠡᠳᠴᠢᠨ ᠲᠠᠬᠤᠯ ᠢ᠋ ᠵᠠᠰᠠᠵᠤ ᠭᠠᠢ ᠪᠠᠷᠴᠢᠳ ᠢ᠋ ᠵᠠᠢᠯᠠᠭᠤᠯᠬᠤ ᠨᠢᠭᠡᠨ ᠵᠦᠢᠯ ᠦ᠋ᠨ ᠣᠨᠴᠠᠭᠠᠢ ᠭᠠᠢᠬᠠᠮᠰᠢᠭᠲᠤ ᠠᠷᠭᠠ ᠪᠠᠷᠢᠯ ᠢ᠋ ᠲᠣᠮ ᠳᠣᠬᠢᠶᠠ ᠭᠡᠳᠡᠭ᠃ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠪᠡᠨ ᠠᠪᠤᠭᠠᠳ ᠲᠣᠮ ᠰᠢᠪᠰᠢᠯᠭᠡ ᠶ᠋ᠢᠨ ᠷᠢᠳᠢ ᠰᠢᠳᠢ ᠶ᠋ᠢᠨ ᠬᠦᠴᠦᠨ ᠢ᠋ ᠠᠰᠢᠭᠯᠠᠵᠤ ᠬᠥᠮᠦᠨ ᠮᠠᠯ ᠤ᠋ᠨ ᠡᠪᠡᠳᠴᠢᠨ ᠲᠠᠬᠤᠯ ᠭᠠᠢ ᠪᠠᠷᠴᠢᠳ ᠢ᠋ ᠠᠷᠢᠯᠭᠠᠵᠤ ᠴᠢᠳᠠᠳᠠᠭ ᠪᠠᠢᠵᠠᠢ᠃ ᠡᠢᠮᠦ ᠡᠴᠡ ᠡᠨᠡ ᠨᠢ ᠮᠠᠨ ᠤ᠋ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠮᠢᠨᠢ ᠨᠢᠭᠡᠨ ᠥᠪ ᠪᠢᠯᠡ᠃ ᠡᠢᠮᠦ ᠡᠴᠡ ᠤᠯᠠᠮᠵᠢᠯᠠᠯᠲᠤ ᠲᠣᠮ ᠳᠣᠬᠢᠶᠠᠨ ᠤ᠋ ᠷᠢᠳᠢ ᠰᠢᠳᠢ ᠶ᠋ᠢ ᠰᠢᠲᠦᠵᠦ᠂ ᠲᠠᠢᠯᠪᠤᠷᠢᠯᠠᠵᠤ ᠳᠡᠢᠯᠬᠦ ᠦᠭᠡᠢ ᠭᠠᠢᠬᠠᠮᠰᠢᠭᠲᠤ ᠳᠠᠯᠳᠠ ᠬᠦᠴᠦᠨ ᠢ᠋ ᠨᠢ ᠠᠰᠢᠭᠯᠠᠵᠤ ᠤᠯᠠᠮᠵᠢᠯᠠᠵᠤ ᠶᠠᠪᠤᠬᠤ ᠨᠢ ᠴᠢ ᠪᠢᠳᠡᠨ ᠦ᠌ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠪᠤᠶᠤ᠃ ᠡᠢᠨᠬᠦ ᠳᠣᠣᠷᠠᠬᠢ ᠲᠣᠮ ᠳᠣᠬᠢᠶᠠ ᠶ᠋ᠢ ᠲᠠ ᠪᠦᠬᠦᠨ ᠲᠡᠢ ᠬᠤᠪᠢᠶᠠᠯᠴᠠᠰᠤᠭᠠᠢ᠃
ᠲᠠ ᠪᠦᠬᠦᠨ ᠳ᠋ᠦ᠍ ᠲᠤᠰᠠ ᠪᠣᠯᠬᠤ ᠪᠣᠯᠲᠤᠭᠠᠢ!
ᠲᠣᠮ ᠪᠣᠯᠬᠤ ᠪᠣᠯᠲᠤᠭᠠᠢ!
ᠳᠠᠮ ᠪᠣᠯᠬᠤ ᠪᠣᠯᠲᠤᠭᠠᠢ!
ᠬᠠᠮᠠᠷ ᠠ᠋ᠴᠠ ᠴᠢᠰᠤ ᠭᠠᠷᠪᠠᠯ ᠣᠬᠢ ᠡᠪᠡᠰᠦ ᠪᠡᠷ ᠬᠠᠮᠠᠷ ᠤ᠋ᠨ ᠨᠦᠬᠡ ᠪᠡᠨ ᠪᠥᠭᠯᠡᠳᠡᠭ᠃
ᠬᠠᠯᠠᠭᠠᠭᠰᠠᠨ ᠰᠢᠷᠬᠠᠨ ᠳ᠋ᠤ᠌ ᠴᠠᠬᠢᠯᠳᠠᠭ ᠤ᠋ᠨ ᠪᠢᠲᠡᠭᠦᠦ ᠦᠨᠡᠰᠦ ᠶ᠋ᠢ ᠲᠦᠷᠬᠢᠪᠡᠯ ᠬᠤᠷᠳᠤᠨ ᠡᠳᠡᠭᠡᠷᠡᠳᠡᠭ ᠃
ᠦᠰᠦ ᠴᠠᠢᠬᠤ ᠳ᠋ᠤ᠌ ᠰᠢᠨᠠᠭᠠᠨ ᠬᠣᠷᠣᠬᠠᠢ ᠲᠠᠯᠠᠭᠳᠠᠵᠤ ᠤᠬᠢᠶᠠᠨᠠ᠃
ᠤᠷᠤᠭᠤᠯ ᠬᠠᠭᠠᠷᠠᠭᠠᠳ ᠪᠠᠢᠪᠠᠯ ᠵᠡᠭᠦᠦ ᠪᠣᠭᠣᠳᠠᠭ ᠬᠠᠷᠠ ᠥᠩᠭᠡ ᠲᠡᠢ ᠴᠠᠭᠠᠰᠤ ᠶ᠋ᠢ ᠨᠠᠭᠠᠪᠠᠯ ᠰᠠᠢᠨ ᠪᠣᠯᠤᠨᠠ᠃
ᠬᠣᠭᠣᠯᠠᠢ ᠭᠡᠨᠡᠳᠲᠡ ᠪᠢᠲᠡᠭᠦᠷᠡᠪᠡᠯ ᠬᠣᠭᠣᠯᠠᠢ ᠳ᠋ᠤ᠌ ᠨᠢ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠲᠤᠰᠬᠠᠳᠠᠭ᠃
ᠬᠠᠯᠠᠭᠤᠷᠠᠵᠤ ᠪᠠᠢᠭᠠ ᠬᠥᠮᠦᠨ ᠳ᠋ᠦ᠍ ᠣᠳᠣ ᠲᠦᠭᠡᠭᠡᠭᠰᠡᠨ ᠬᠣᠢᠨᠠ ᠤᠰᠤ ᠠᠪᠴᠤ ᠭᠠᠷᠤᠭᠠᠳ《 ᠳᠣᠯᠣᠭᠠᠨ ᠪᠤᠷᠬᠠᠨ ᠣᠳᠣ》 ᠳ᠋ᠤ᠌ ᠦᠵᠡᠭᠦᠯᠦᠭᠰᠡᠨ ᠬᠣᠢᠨᠠ ᠤᠰᠤ ᠶ᠋ᠢ ᠨᠢ ᠤᠤᠭᠤᠯᠭᠠᠪᠠᠯ ᠬᠠᠯᠠᠭᠤᠨ ᠢ᠋ ᠨᠢ ᠳᠠᠷᠤᠳᠠᠭ᠃
ᠨᠢᠯᠬᠠ ᠬᠡᠦᠬᠡᠳ ᠪᠠᠭᠠᠰᠤ ᠠᠯᠳᠠᠬᠤ ᠶ᠋ᠢ《 ᠮᠠᠭᠤ ᠰᠠᠢᠨᠳᠠᠬᠣ 》 ᠭᠡᠵᠦ ᠬᠡᠯᠡᠳᠡᠭ᠂ ᠬᠡᠦᠬᠡᠳ ᠮᠠᠭᠤ ᠰᠠᠢᠨᠳᠠᠬᠣ ᠶ᠋ᠢ ᠡᠴᠢᠭᠡ ᠡᠬᠡ ᠶ᠋ᠢᠨ ᠬᠢᠨᠢ ᠪᠢᠲᠡᠭᠦᠦ ᠭᠣᠭᠴᠣᠭᠠ ᠲᠠᠢ ᠮᠥᠩᠭᠥᠨ ᠡᠳ᠋ᠯᠡᠯ《 ᠰᠡᠳᠬᠡᠭᠦᠷ᠂ ᠲᠡᠭᠡ᠂ ᠪᠢᠲᠡᠭᠦᠦ ᠪᠥᠯᠵᠢᠭ》 ᠢ᠋ᠶ᠋ᠡᠷ ᠰᠢᠨᠡ ᠶ᠋ᠢᠨ ᠭᠣᠣᠯ᠂ ᠵᠡᠭᠦᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠪᠠᠭᠤᠨ ᠰᠤᠳᠠᠯ᠂ ᠬᠥᠯ ᠦ᠋ᠨ ᠱᠠᠭᠠᠢ ᠶ᠋ᠢᠨ ᠰᠤᠳᠠᠯ ᠳᠡᠭᠡᠷᠡ ᠨᠢ ᠲᠣᠨᠣᠯᠵᠢᠨ ᠲᠡᠮᠳᠡᠭ ᠢ᠋ ᠪᠠᠯ ᠢ᠋ ᠨᠢ ᠭᠠᠷᠲᠠᠯᠠ ᠥᠷᠥᠵᠦ ᠵᠢᠷᠤᠭᠠᠳ ᠬᠥᠯ ᠭᠠᠷ ᠢ᠋ ᠨᠢ ᠥᠷᠥᠭᠡᠯᠳᠡᠨ ᠪᠠᠭᠠ ᠪᠠᠭᠠ ᠪᠠᠷ ᠲᠡᠳᠡᠨ ᠳᠣᠮᠨᠣᠳᠠᠭ ᠃
ᠮᠣᠭᠠᠢ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠪᠡᠯ ᠰᠦ᠍ ᠳᠤᠰᠤᠭᠠᠭᠠᠳ ᠬᠥᠮᠦᠨ ᠦ᠌ ᠬᠥᠯ ᠭᠠᠷ ᠠ᠋ᠴᠠ ᠵᠠᠢ ᠲᠠᠢ ᠭᠠᠵᠠᠷ ᠠᠪᠠᠴᠢᠵᠤ ᠬᠠᠶᠠᠨᠠ᠂ ᠲᠠᠰᠤᠷᠠᠭᠰᠠᠨ ᠮᠣᠭᠠᠢ ᠶ᠋ᠢ ᠵᠠᠯᠭᠠᠵᠤ ᠲᠠᠯᠪᠢᠪᠠᠯ ᠶᠡᠬᠡ ᠪᠤᠶᠠᠨ ᠪᠣᠯᠤᠨᠠ᠂ ᠶᠠᠰᠤ ᠪᠠᠷᠢᠶᠠᠴᠢ ᠪᠣᠯᠤᠨᠠ ᠭᠡᠳᠡᠭ᠃
ᠬᠦᠵᠦᠭᠦᠦ ᠬᠥᠰᠢᠵᠦ ᠭᠠᠵᠢᠭᠰᠠᠨ ᠬᠥᠮᠦᠨ᠂ ᠭᠠᠩᠭᠠᠩ ᠬᠥᠮᠦᠨ ᠦ᠌ ᠠᠷᠤ ᠠ᠋ᠴᠠ ᠮᠥᠷᠭᠥᠪᠡᠯ ᠵᠦᠭᠡᠷ ᠪᠣᠯᠳᠠᠭ᠃
ᠴᠢᠳᠥᠷ ᠪᠦᠰᠡᠯᠡᠬᠦ ᠪᠤᠶᠤ ᠡᠰᠡᠬᠦᠯᠡ ᠪᠡᠶᠡ ᠳ᠋ᠦ᠍ ᠪᠡᠨ ᠳᠥᠷᠦᠭᠡᠨ ᠵᠣᠭᠣᠰ ᠠᠪᠴᠤ ᠶᠠᠪᠤᠪᠠᠯ ᠮᠣᠷᠢᠨ ᠠ᠋ᠴᠠ ᠣᠢᠴᠢᠭᠰᠠᠨ ᠴᠤ᠌ ᠪᠡᠷᠲᠡᠯ ᠠᠪᠬᠤ ᠦᠭᠡᠢ᠂ ᠰᠥᠨᠢ ᠣᠷᠣᠢ ᠭᠠᠳᠠᠨᠠ ᠶᠠᠪᠤᠬᠤ ᠳ᠋ᠤ᠌ ᠮᠠᠭᠤ ᠶᠠᠭᠤᠮᠠ ᠨᠠᠭᠠᠯᠳᠤᠬᠤ ᠦᠭᠡᠢ ᠭᠡᠳᠡᠭ᠃
ᠬᠣᠭᠣᠯᠠᠢ ᠪᠠᠭᠠᠯᠵᠤᠤᠷ ᠳᠡᠭᠡᠷᠡ ᠨᠢ ᠬᠤᠯᠤᠭᠠᠨᠠ ᠶ᠋ᠢᠨ ᠶᠠᠷᠠ ᠭᠠᠷᠪᠠᠯ ᠮᠤᠤᠷ ᠤ᠋ᠨ ᠮᠢᠬᠠ ᠲᠠᠢ ᠡᠮ ᠤᠤᠭᠤᠯᠭᠠᠨᠠ᠃
ᠤᠰᠤᠨ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠨ ᠢ᠋ ᠳᠡᠭᠡᠰᠦᠨ ᠦ᠌ ᠨᠢᠭᠡ ᠦᠵᠦᠭᠦᠷ ᠲᠦ᠍ ᠲᠤᠯᠭᠠ ᠶ᠋ᠢ ᠤᠶᠠᠭᠠᠳ ᠱᠦᠭᠦᠪᠡᠯ ᠠᠮᠢ ᠲᠠᠢ ᠰᠢᠭ᠋ ᠣᠯᠳᠠᠨᠠ᠂ ᠡᠰᠡᠬᠦᠯᠡ ᠠᠮᠢᠳᠤ ᠲᠠᠬᠢᠶᠠ ᠶ᠋ᠢ ᠴᠢᠯᠠᠭᠤ ᠲᠠᠢ ᠤᠶᠠᠭᠠᠳ ᠤᠰᠤᠨ ᠳ᠋ᠤ᠌ ᠬᠢᠬᠦ ᠲᠡᠢ ᠵᠡᠷᠭᠡ ᠵᠥᠷᠢᠭᠡᠳ ᠬᠥᠪᠴᠦ ᠭᠠᠷᠴᠤ ᠢᠷᠡᠳᠡᠭ᠃
ᠠᠢᠷᠠᠭ ᠢᠰᠬᠡᠵᠦ ᠲᠣᠭᠣᠭᠠ ᠨᠡᠷᠡᠬᠦ ᠳ᠋ᠦ᠍ ᠬᠥᠭᠡᠷᠦᠦ ᠵᠠᠩ ᠲᠠᠢ ᠬᠥᠮᠦᠨ ᠢ᠋ᠶ᠋ᠡᠷ ᠲᠦᠷᠭᠡᠨ ᠳᠠᠪᠬᠢᠭᠤᠯᠵᠤ ᠠᠪᠴᠢᠷᠠᠭᠤᠯᠪᠠᠯ ᠠᠢᠷᠠᠭ ᠤ᠋ᠨ ᠢᠰᠦᠯᠲᠡ ᠰᠠᠢᠨ ᠪᠣᠯᠳᠠᠭ᠃
ᠲᠣᠭᠣᠰ ᠰᠢᠪᠠᠭᠤᠨ ᠤ᠋ ᠥᠳᠥ ᠪᠤᠶᠤ ᠰᠤᠬᠠᠢ ᠪᠤᠷᠭᠠᠰᠤ ᠶ᠋ᠢ ᠲᠣᠲᠣᠭᠣᠨ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠬᠥᠨᠳᠡᠯᠡᠨ ᠲᠠᠯᠪᠢᠪᠠᠯ ᠬᠡᠯᠡ ᠠᠮᠠ ᠶ᠋ᠢᠨ ᠪᠤᠵᠠᠷ ᠠ᠋ᠴᠠ ᠵᠠᠢᠯᠠᠵᠤ ᠴᠢᠳᠠᠳᠠᠭ᠃
ᠱᠠᠮᠪᠠᠷᠠᠮ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠨᠣᠬᠠᠢ ᠶ᠋ᠢᠨ ᠭᠥᠯᠥᠭᠡ ᠲᠡᠵᠢᠭᠡᠵᠦ ᠬᠣᠰᠬᠢᠨᠠᠭ ᠢ᠋ᠶ᠋ᠠᠨ ᠡᠳᠦᠷ ᠪᠣᠯᠭᠠᠨ ᠳᠣᠯᠢᠶᠠᠯᠭᠠᠵᠤ100 ᠡᠳᠦᠷ ᠪᠣᠯᠪᠠᠯ ᠱᠠᠮᠪᠠᠷᠠᠮ ᠡᠪᠡᠳᠴᠢᠨ ᠡᠳᠡᠭᠡᠳᠡᠭ᠃
ᠮᠣᠭᠠᠢ ᠢᠯᠳᠦ ᠭᠠᠷᠪᠠᠯ ᠬᠣᠶᠠᠷ ᠦᠵᠦᠭᠦᠷ ᠲᠦ᠍ ᠨᠢ ᠪᠣᠬᠢ ᠲᠦᠷᠬᠢᠪᠡᠯ ᠢᠯᠳᠦ ᠥᠰᠬᠦ ᠦᠭᠡᠢ ᠭᠡᠳᠡᠭ᠃
ᠵᠣᠭᠣᠰᠤᠨ ᠢᠯᠳᠦ ᠭᠠᠷᠪᠠᠯ ᠬᠣᠨᠣᠭ ᠪᠤᠳᠠᠭᠠ ᠨᠡᠷᠡᠵᠦ ᠲᠦᠷᠬᠢᠳᠡᠭ᠂ ᠡᠰᠡᠪᠡᠯ ᠬᠠᠷᠠ ᠵᠣᠭᠣᠰ ᠢ᠋ ᠬᠠᠯᠠᠭᠠᠵᠤ ᠪᠠᠢᠭᠠᠳ ᠳᠠᠷᠤᠨᠠ᠃
ᠨᠣᠬᠠᠢ ᠳ᠋ᠤ᠌ ᠬᠠᠵᠠᠭᠳᠠᠪᠠᠯ ᠬᠠᠵᠠᠭᠰᠠᠨ ᠨᠣᠬᠠᠢ ᠶ᠋ᠢᠨ ᠮᠠᠩᠨᠠᠢ ᠶ᠋ᠢᠨ ᠦᠰᠦ ᠶ᠋ᠢ ᠰᠢᠲᠠᠭᠠᠵᠤ ᠰᠢᠷᠬᠠᠨ ᠳᠡᠭᠡᠷᠡ ᠨᠢ ᠳᠠᠷᠤᠪᠠᠯ ᠢᠯᠡᠷᠡᠰᠢᠨᠡ ᠭᠡᠳᠡᠭ᠃
ᠭᠠᠭᠴᠠ ᠬᠤᠷᠤᠭᠤᠨ ᠤ᠋ ᠡᠪᠡᠳᠴᠢᠨ ᠬᠦᠷᠪᠡᠯ ᠬᠤᠷᠤᠭᠤ ᠪᠠᠨ ᠥᠷᠯᠥᠭᠡ ᠡᠷᠲᠡ ᠪᠤᠴᠠᠯᠵᠤ ᠪᠠᠢᠭᠠ ᠪᠠᠷᠠᠭᠠᠨ ᠴᠠᠢ ᠳ᠋ᠤ᠌ ᠵᠠᠭᠤ ᠤᠳᠠᠭᠠ ᠲᠥᠷᠥᠵᠦ ᠳᠣᠮᠨᠣᠪᠠᠯ ᠡᠳᠡᠭᠡᠨᠡ᠃
ᠠᠢᠬᠤᠪᠲᠤᠷ ᠬᠠᠲᠠᠵᠤ ᠠᠩᠭᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠤᠰᠤ ᠤᠤᠭᠤᠯᠭᠠᠬᠤ ᠳ᠋ᠠᠭᠠᠨ ᠨᠢᠭᠡ ᠣᠭᠣᠴᠢᠪᠠᠯ ᠨᠢᠭᠡ ᠮᠠᠨᠢ ᠶ᠋ᠢᠨ ᠵᠢᠷᠭᠤᠭᠠᠨ ᠦᠰᠦᠭ ᠤᠩᠰᠢᠭᠤᠯᠵᠤ ᠠᠭᠠᠵᠢᠮ ᠤᠤᠭᠤᠯᠭᠠᠳᠠᠭ᠃
ᠵᠠᠪᠠᠵᠢᠨ ᠳ᠋ᠤ᠌ ᠶᠠᠷᠠ ᠭᠠᠷᠪᠠᠯ ᠰᠠᠮ ᠤ᠋ᠨ ᠮᠥᠷᠥ ᠪᠤᠶᠤ ᠠᠮᠠᠭᠠᠢ ᠬᠠᠯᠠᠭᠠᠨ ᠳᠠᠷᠤᠵᠤ《 ᠡᠮ ᠪᠣᠯ ᠂ ᠲᠣᠮ ᠪᠣᠯ》 ᠭᠡᠵᠦ ᠰᠢᠪᠰᠢᠨ ᠳᠣᠮᠨᠣᠳᠠᠭ᠃
ᠬᠡᠦᠬᠡᠳ ᠠᠮᠠᠨ ᠤ᠋ ᠠᠯᠪᠠ ᠳ᠋ᠤ᠌ ᠪᠠᠷᠢᠭᠳᠠᠪᠠᠯ ᠴᠢᠨᠣᠠ ᠶ᠋ᠢᠨ ᠬᠡᠯᠡ ᠳᠣᠯᠢᠶᠠᠯᠭᠠᠨᠠ᠂ ᠨᠠᠭᠠᠴᠤ ᠶ᠋ᠢᠨ ᠬᠢᠨᠢ ᠮᠣᠷᠢᠨ ᠤ᠋ ᠠᠮᠠᠭᠠᠢ ᠶ᠋ᠢ ᠨᠢᠭᠤᠵᠤ ᠳᠣᠯᠢᠶᠠᠯᠭᠠᠳᠠᠭ᠂ ᠡᠰᠡᠬᠦᠯᠡ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠦ᠌ ᠬᠥᠮᠦᠨ ᠦ᠌ ᠦᠰᠦ ᠶ᠋ᠢ ᠳᠣᠯᠢᠶᠠᠯᠭᠠᠨᠠ ᠃
ᠴᠢᠬᠢ ᠪᠤᠯᠠᠭᠳᠠᠪᠠᠯ ᠪᠢᠯᠵᠤᠤᠬᠠᠢ ᠶ᠋ᠢᠨ ᠬᠠᠯᠠᠭᠤᠨ ᠴᠢᠰᠤ ᠶ᠋ᠢ ᠳᠤᠰᠤᠭᠠᠨᠠ᠂ ᠡᠰᠡᠪᠡᠯ ᠭᠤᠯᠢᠷ ᠢ᠋ᠶ᠋ᠠᠷ 3 ᠠ᠋ᠴᠠ4 ᠰᠢᠪᠠᠭᠤ ᠬᠢᠵᠦ ᠴᠢᠬᠢᠨ ᠳ᠋ᠦ᠍ᠨᠢ ᠲᠤᠯᠭᠠᠵᠤ《 ᠡᠮ ᠪᠣᠯ᠂ ᠲᠣᠮ ᠪᠣᠯ》 ᠭᠡᠵᠦ ᠰᠢᠪᠰᠢᠭᠡᠳ ᠭᠤᠯᠢᠷ ᠰᠢᠪᠠᠭᠤ ᠪᠠᠨ ᠥᠨᠳᠥᠷ ᠭᠠᠵᠠᠷ ᠲᠠᠯᠪᠢᠵᠤ ᠵᠢᠭᠦᠷᠲᠡᠨ ᠰᠢᠪᠠᠭᠤᠨ ᠳ᠋ᠤ᠌ ᠢᠳᠡᠭᠦᠯᠳᠡᠭ᠃
ᠬᠡᠦᠬᠡᠳ ᠬᠡᠯᠡ ᠣᠷᠣᠬᠤ ᠨᠢ ᠤᠳᠠᠭᠠᠨ ᠪᠠᠢᠪᠠᠯ《 ᠪᠢᠯᠡᠭᠦᠦ ᠴᠢᠯᠠᠭᠤ》 ᠭᠡᠰᠡᠨ ᠦᠭᠡ ᠶ᠋ᠢ ᠪᠠᠢᠨ ᠳᠠᠬᠢᠨ ᠬᠡᠯᠡᠭᠦᠯᠦᠨᠡ᠂ ᠪᠠᠰᠠ ᠭᠣᠷᠢ ᠦᠭᠡᠢ ᠪᠣᠯ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠦ᠌ ᠣᠨᠢᠰᠣ ᠶ᠋ᠢ ᠨᠡᠭᠡᠭᠡᠯᠭᠡᠵᠦ ᠳᠣᠮᠨᠣᠳᠠᠭ᠃
ᠬᠡᠦᠬᠡᠳ ᠡᠴᠢᠭᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ ᠶᠠᠷᠳᠠᠭᠯᠠᠭᠠᠳ ᠪᠠᠢᠪᠠᠯ ᠲᠡᠮᠦᠷ ᠢ᠋ᠶ᠋ᠡᠷ ᠳᠣᠮᠨᠣᠨ ᠲᠤᠶᠠᠳᠠᠭ᠃
ᠬᠡᠦᠬᠡᠳ ᠬᠥᠯ ᠳ᠋ᠦ᠍ ᠣᠷᠣᠬᠤ ᠦᠭᠡᠢ ᠤᠳᠠᠭᠠᠨ ᠪᠠᠢᠪᠠᠯ ᠬᠥᠯ ᠢ᠋ ᠨᠢ ᠴᠠᠭᠠᠨ ᠤᠲᠠᠰᠤ ᠪᠠᠷ ᠲᠤᠱᠠᠵᠤ ᠠᠯᠬᠤᠭᠤᠯᠵᠤ ᠪᠠᠢᠭᠠᠳ ᠴᠠᠭᠠᠨ ᠤᠲᠠᠰᠤ ᠶ᠋ᠢ ᠨᠢ ᠬᠠᠢᠴᠢᠯᠠᠵᠤ ᠬᠠᠶᠠᠨᠠ᠂ ᠲᠡᠭᠡᠭᠡᠳ ᠪᠦᠳᠦᠷᠢᠵᠦ ᠣᠢᠴᠢᠬᠤ ᠳ᠋ᠤ᠌ ᠲᠣᠰᠴᠤ ᠠᠪᠤᠭᠠᠳ ᠳᠠᠬᠢᠨ ᠠᠯᠬᠤᠭᠤᠯᠤᠨᠠ᠂ ᠡᠨᠡ ᠲᠣᠮ ᠢ᠋ ᠬᠢᠪᠡᠯ ᠠᠮᠠᠷᠬᠠᠨ ᠬᠥᠯ ᠳ᠋ᠦ᠍ ᠣᠷᠣᠳᠠᠭ᠃
ᠨᠢᠯᠬᠠ ᠬᠡᠦᠬᠡᠳ ᠦ᠋ᠨ ᠬᠦᠢ《 ᠬᠣᠢᠲᠤᠬᠢ ᠭᠡᠳᠡᠭ》 ᠢ᠋ ᠬᠠᠮᠢᠶᠠ ᠦᠭᠡᠢ ᠬᠠᠶᠠᠳᠠᠭ ᠦᠭᠡᠢ᠂ ᠭᠦᠨ ᠨᠦᠬᠡ ᠮᠠᠯᠲᠠᠵᠤ ᠪᠤᠯᠠᠳᠠᠭ᠂ ᠨᠤᠲᠤᠭ ᠲᠠᠭᠠᠨ ᠬᠠᠢᠷᠠᠲᠠᠢ ᠬᠥᠮᠦᠨ ᠪᠤᠯᠠᠳᠠᠭ ᠭᠡᠨᠡ᠂ ᠬᠦᠢ ᠪᠡᠷ ᠬᠣᠯᠪᠣᠭᠠᠰᠤᠲᠠᠢ ᠨᠤᠲᠤᠭ ᠭᠡᠳᠡᠭ ᠲᠡᠷᠡ᠃
ᠤᠷᠤᠭᠤᠯ ᠠᠮᠠ ᠳᠡᠭᠡᠷᠡ ᠨᠠᠮᠤᠰᠤ ᠭᠠᠷᠬᠤ ᠶ᠋ᠢ《 ᠶᠠᠭᠤᠮᠠ ᠢᠳᠡᠭᠡᠳ ᠠᠮᠠ ᠪᠠᠨ ᠵᠦᠯᠭᠦᠭᠰᠡᠨ ᠦᠭᠡᠢ ᠡᠴᠡ ᠴᠢᠳᠬᠥᠷ ᠳᠣᠯᠢᠶᠠᠪᠠ》 ᠭᠡᠮᠡᠨ ᠥᠯᠥᠨ ᠰᠢᠯᠦᠰᠦ ᠪᠡᠨ ᠳᠣᠯᠣᠭᠠᠨ ᠥᠷᠯᠥᠭᠡ ᠳᠦᠷᠭᠢᠨ ᠳᠣᠮᠨᠣᠨᠠ᠂ ᠡᠰᠡᠬᠦᠯᠡ ᠬᠠᠲᠠᠭᠰᠠᠨ ᠦᠯᠡᠢ ᠶ᠋ᠢᠨ ᠬᠠᠯᠢᠰᠤ ᠶ᠋ᠢ ᠨᠠᠭᠠᠵᠤ ᠲᠠᠯᠪᠢᠪᠠᠯ ᠡᠳᠡᠭᠡᠷᠡᠳᠡᠭ᠃
ᠰᠠᠷᠠ ᠳ᠋ᠤ᠌ ᠰᠠᠭᠤᠭᠠᠳ ᠰᠦ᠋ ᠨᠢ ᠲᠠᠲᠠᠭᠤᠷᠠᠭᠰᠠᠨ ᠡᠮᠡᠭᠲᠡᠢ ᠳ᠋ᠦ᠍ ᠱᠠᠭᠠᠵᠠᠭᠠᠢ ᠶ᠋ᠢᠨ ᠮᠢᠬᠠ ᠢᠳᠡᠭᠦᠯᠪᠡᠯ ᠰᠦ᠋ ᠪᠠᠭᠤᠳᠠᠭ ᠂ ᠡᠰᠡᠬᠦᠯᠡ ᠠᠳᠤᠭᠤᠨ ᠬᠣᠮᠣᠯ ᠢ᠋ ᠴᠠᠭᠠᠰᠤᠨ ᠳ᠋ᠤ᠌ ᠪᠣᠭᠣᠵᠤ ᠪᠡᠯᠡᠭ ᠪᠣᠯᠭᠠᠵᠤ ᠥᠭᠬᠦ ᠳ᠋ᠦ᠍ ᠨᠡᠭᠡᠭᠡᠵᠦ ᠦᠵᠡᠭᠡᠳ ᠢᠨᠢᠶᠡᠯᠴᠡᠨ ᠪᠤᠳᠠᠭᠠ ᠲᠠᠢ ᠴᠠᠢ ᠤᠤᠭᠤᠪᠠᠯ ᠰᠦ᠋ ᠪᠠᠭᠤᠳᠠᠭ᠂ ᠲᠡᠭᠡᠬᠦ ᠳ᠋ᠦ᠍ ᠬᠣᠮᠣᠯ ᠬᠦᠷᠭᠡᠭᠰᠡᠨ ᠬᠥᠮᠦᠨ ᠳᠠᠷᠠᠭᠠ ᠨᠢ ᠦᠨᠡᠨ ᠪᠣᠣᠪᠣ ᠬᠦᠷᠭᠡᠵᠦ ᠢᠷᠡᠨᠡ᠂ ᠬᠥᠩᠭᠡᠵᠢᠭᠰᠡᠨ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠶᠠᠭᠤᠮᠠᠨ ᠳ᠋ᠤ᠌ ᠳᠤᠷᠠᠯᠠᠪᠠᠯ ᠰᠦ᠋ ᠪᠠᠭᠤᠬᠤ ᠪᠠᠨ ᠪᠣᠯᠢᠳᠠᠭ ᠭᠡᠨᠡ᠃
ᠲᠡᠮᠡᠭᠡ ᠭᠣᠪᠤᠷᠤᠲᠡᠪᠡᠯ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠬᠡᠭᠦᠷ ᠢ᠋ ᠭᠣᠳᠣᠯᠠᠭᠰᠠᠨ ᠶᠣᠳᠤᠷ ᠮᠣᠳᠣ ᠪᠠᠷ ᠴᠣᠬᠢᠨ ᠳᠣᠮᠨᠣᠳᠠᠭ᠃
ᠲᠥᠯ ᠢᠮᠨᠡᠬᠦ ᠳ᠋ᠡᠭᠡᠨ ᠬᠠᠢᠴᠢᠯᠠᠵᠤ ᠠᠪᠤᠭᠰᠠᠨ ᠬᠡᠰᠡᠭ ᠢ᠋ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠬᠠᠶᠠᠬᠤ ᠦᠭᠡᠢ᠂ ᠰᠢᠷᠭᠤᠯᠵᠢ ᠶ᠋ᠢᠨ ᠡᠭᠦᠷ ᠲᠦ᠍ ᠬᠢᠨᠡ ᠰᠢᠷᠭᠤᠯᠵᠢ ᠰᠢᠭ᠋ ᠣᠯᠠᠨ ᠦᠷᠡᠵᠢᠨᠡ ᠭᠡᠳᠡᠭ᠃
ᠨᠣᠬᠠᠢ ᠪᠠᠢᠨ ᠳᠠᠬᠢᠨ ᠤᠯᠢᠭᠠᠳ ᠵᠣᠭᠰᠣᠬᠤ ᠦᠭᠡᠢ ᠪᠣᠯ ᠢᠳᠡᠬᠦ ᠶᠠᠭᠤᠮᠠ ᠥᠭᠴᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠢᠯᠢᠵᠦ《 ᠵᠦᠭᠡᠷ ᠵᠦᠭᠡᠷ ᠪᠤᠤ ᠣᠯᠢᠭᠠᠳ ᠪᠠᠢ》 ᠭᠡᠵᠦ ᠲᠠᠢᠳᠬᠤᠷᠠᠭᠤᠯᠵᠤ᠂ ᠶᠠᠭ ᠵᠣᠭᠰᠣᠬᠤ ᠦᠭᠡᠢ ᠪᠣᠯ ᠪᠤᠵᠠᠷ ᠤ᠋ᠨ ᠵᠠᠰᠠᠯ ᠬᠢᠯᠭᠡᠳᠡᠭ᠃
ᠲᠠᠬᠢᠶᠠ ᠡᠳᠦᠷ ᠢ᠋ᠶ᠋ᠡᠷ ᠳᠤᠤᠭᠠᠷᠤᠭᠠᠳ ᠪᠠᠢᠪᠠᠯ ᠬᠢᠲᠠᠳ ᠬᠥᠮᠦᠨ ᠳ᠋ᠦ᠍ ᠥᠭᠴᠦ ᠠᠯᠠᠭᠤᠯᠳᠠᠭ᠂ ᠭᠠᠵᠠᠷ ᠬᠥᠳᠡᠯᠦᠨᠡ ᠭᠡᠳᠡᠭ᠃
ᠨᠣᠬᠠᠢ ᠦᠬᠦᠪᠡᠯ ᠭᠦᠨ ᠨᠦᠬᠡ ᠮᠠᠯᠲᠠᠵᠤ ᠰᠡᠭᠦᠯ ᠢ᠋ ᠨᠢ ᠣᠭᠲᠣᠯᠵᠤ ᠳᠡᠷᠡᠯᠡᠭᠦᠯᠦᠨ ᠠᠮᠠᠨ ᠳ᠋ᠤ᠌ ᠨᠢ ᠰᠢᠷᠠ ᠲᠣᠰᠣ ᠡᠮᠬᠦᠭᠦᠯᠵᠦ ᠪᠤᠯᠠᠳᠠᠭ᠂ ᠳᠠᠷᠠᠭᠠ ᠲᠥᠷᠥᠯ ᠳ᠋ᠡᠭᠡᠨ ᠬᠥᠮᠦᠨ ᠪᠣᠯᠵᠤ ᠲᠥᠷᠥᠲᠦᠭᠡᠢ ᠭᠡᠰᠡᠨ ᠤᠬᠠᠭᠠᠨ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠣᠷᠵᠢᠭᠢᠨ᠂ ᠴᠠᠶ᠋ᠢᠯᠭᠠᠨ
ᠦᠰᠦᠭ ᠬᠢᠨᠠᠭᠴᠢ᠄ ᠨᠠᠷᠠᠨᠠᠭᠠᠰᠢ