ᠬᠠᠯᠢᠮᠦ（ ᠬᠡᠯᠡ ᠪᠢᠴᠢᠭ – ᠳᠣᠯᠣᠳᠤᠭᠠᠷ ᠳᠡᠪᠲᠡᠷ） Халим （ Хэл бичиг – Долдугар дэвтэр）
307ᠬᠠᠯᠢᠮᠦ
ᠵᠠᠭᠠᠨ ᠢ᠋ ᠦᠵᠡᠭᠰᠡᠨ ᠬᠥᠮᠦᠰ ᠴᠥᠮ ᠲᠡᠭᠦᠨ ᠢ᠋ ᠮᠤᠨᠳᠠᠭ ᠪᠦᠳᠦᠭᠦᠨ ᠠᠮᠢᠲᠠᠨ ᠪᠠᠢᠨᠠ ᠭᠡᠵᠡᠭᠡᠳᠡᠭ᠃ ᠭᠡᠬᠦ ᠳ᠋ᠦ᠍ ᠵᠠᠭᠠᠨ ᠠ᠋ᠴᠠ ᠬᠠᠪᠢ ᠦᠭᠡᠢ ᠪᠦᠳᠦᠭᠦᠨ ᠠᠮᠢᠲᠠᠨ ᠪᠠᠰᠠ ᠪᠠᠢᠨᠠ ᠰᠢᠦ᠃ ᠬᠠᠯᠢᠮᠤ ᠪᠣᠯ ᠶᠣᠰᠣᠲᠠᠢ ᠮᠤᠨᠳᠠᠭ ᠪᠦᠳᠦᠭᠦᠨ ᠠᠮᠢᠲᠠᠨ ᠶᠤᠮ᠃ ᠬᠠᠮᠤᠭ ᠤ᠋ᠨ ᠪᠦᠳᠦᠭᠦᠨ ᠬᠠᠯᠢᠮᠤ ᠠᠷᠪᠠᠨ ᠵᠢᠷᠭᠤᠭᠠᠨ ᠲᠦᠮᠡ ᠢᠯᠡᠭᠦᠦ ᠺᠢᠯᠣᠭ᠌ᠷᠠᠮ ᠪᠠᠢᠬᠤ ᠪᠠ ᠬᠠᠮᠤᠭ ᠪᠠᠭᠠ ᠨᠢ ᠴᠦ᠍ ᠬᠣᠶᠠᠷ ᠭᠤᠷᠪᠠᠨ ᠮᠢᠩᠭᠠᠨ ᠺᠢᠯᠣᠭ᠌ᠷᠠᠮ ᠪᠠᠢᠳᠠᠭ ᠪᠢᠯᠡ᠃ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠠᠩᠨᠠᠭᠰᠠᠨ ᠳᠥᠷᠪᠡᠨ ᠲᠦᠮᠡ ᠢᠯᠡᠭᠦᠦ ᠺᠢᠯᠣᠭ᠌ᠷᠠᠮ ᠬᠦᠨᠳᠦ ᠨᠢᠭᠡ ᠬᠠᠯᠢᠮᠤ ᠨᠢ ᠤᠷᠲᠤ ᠪᠠᠷ ᠢ᠋ᠶ᠋ᠠᠨ ᠠᠷᠪᠠᠨ ᠳᠣᠯᠣᠭᠠᠨ ᠮᠧᠲ᠋ᠷ ᠪᠠᠢᠭᠰᠠᠨ ᠶᠤᠮ᠃ ᠬᠡᠯᠡ ᠨᠢ ᠬᠦᠷᠲᠡᠯᠡ ᠠᠷᠪᠠᠨ ᠬᠡᠳᠦᠨ ᠪᠣᠷᠳᠣᠭᠠᠨ ᠭᠠᠬᠠᠢ ᠶ᠋ᠢᠨ ᠬᠢᠷᠢ ᠬᠦᠨᠳᠦ ᠪᠠᠢᠭᠰᠠᠨ ᠪᠢᠯᠡ᠃ ᠡᠨᠡ ᠬᠠᠯᠢᠮᠤ ᠶ᠋ᠢᠨ ᠠᠮᠠᠨ ᠳᠣᠲᠣᠷᠠ ᠨᠢ ᠬᠥᠮᠦᠨ ᠵᠣᠭᠰᠣᠭᠠᠳ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠰᠤᠩᠭᠠᠭᠰᠠᠨ ᠴᠤ᠌ ᠲᠠᠩᠨᠠᠢ ᠳ᠋ᠤᠨᠢ ᠲᠤᠯᠬᠤ ᠦᠭᠡᠢ ᠶᠦ᠍ᠮ᠃ ᠠᠮᠠᠨ ᠤ᠋ ᠬᠥᠨᠳᠡᠢ ᠳ᠋ᠦ᠍ᠨᠢ ᠳᠥᠷᠪᠡᠨ ᠬᠥᠮᠦᠨ ᠰᠢᠷᠡᠭᠡ ᠲᠣᠭᠣᠷᠢᠵᠤ ᠰᠠᠭᠤᠭᠠᠳ ᠨᠣᠮ ᠦᠵᠡᠭᠰᠡᠨ ᠴᠦ᠍ ᠠᠭᠤᠵᠢᠮ ᠪᠠᠭᠲᠠᠨᠠ᠃
ᠬᠠᠯᠢᠮᠤ ᠪᠣᠯ ᠳᠠᠯᠠᠢ ᠳ᠋ᠤ᠌ ᠠᠮᠢᠳᠤᠷᠠᠳᠠᠭ ᠪᠥᠭᠡᠳ ᠪᠠᠢᠳᠠᠯ ᠳᠦᠷᠰᠦ ᠨᠢ ᠵᠢᠭᠠᠰᠤ ᠲᠠᠢ ᠲᠥᠰᠲᠡᠢ ᠲᠤᠯᠠ ᠬᠥᠮᠦᠰ ᠲᠡᠭᠦᠨ ᠢ᠋ ᠬᠠᠯᠢᠮᠤ ᠵᠢᠭᠠᠰᠤ ᠭᠡᠵᠦ ᠳᠠᠭᠤᠳᠠᠵᠤ ᠵᠠᠩᠰᠢᠭᠰᠠᠨ ᠪᠠᠢᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠬᠠᠯᠢᠮᠤ ᠪᠣᠯ ᠬᠥᠬᠥᠲᠡᠨ ᠠᠮᠢᠲᠠᠨ ᠶᠤᠮ᠂ ᠵᠢᠭᠠᠰᠤᠨ ᠤ᠋ ᠲᠥᠷᠥᠯ ᠳ᠋ᠦ᠍ ᠣᠷᠣᠬᠤ ᠦᠭᠡᠢ᠃ ᠪᠠᠯᠠᠷ ᠡᠷᠲᠡᠨ ᠦ᠌ ᠦᠶᠡ ᠳ᠋ᠦ᠍ ᠬᠠᠯᠢᠮᠤ ᠶ᠋ᠢᠨ ᠳᠡᠭᠡᠳᠦᠰ ᠨᠢ ᠮᠥᠨ ᠦᠬᠡᠷ ᠬᠣᠨᠢ ᠶ᠋ᠢᠨ ᠳᠡᠭᠡᠳᠦᠰ ᠲᠡᠢ ᠠᠳᠠᠯᠢ ᠴᠥᠮ ᠬᠠᠭᠤᠷᠠᠢ ᠭᠠᠵᠠᠷ ᠠᠮᠢᠳᠤᠷᠠᠵᠤ ᠪᠠᠢᠵᠠᠢ᠃ ᠬᠣᠵᠢᠮ ᠨᠢ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠬᠤᠪᠢᠰᠤᠯᠲᠠ ᠡᠴᠡ ᠪᠣᠯᠵᠤ ᠬᠠᠯᠢᠮᠤ ᠶ᠋ᠢᠨ ᠳᠡᠭᠡᠳᠦᠰ ᠨᠢ ᠬᠠᠭᠤᠷᠠᠢ ᠭᠠᠵᠠᠷ ᠲᠠᠢ ᠵᠠᠯᠭᠠᠯᠳᠤᠵᠤ ᠪᠠᠢᠭᠠ ᠭᠦᠢᠬᠡᠨ ᠲᠠᠩᠭᠢᠰ ᠲᠤ᠌ ᠠᠮᠢᠳᠤᠷᠠᠬᠤ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠪᠠᠰᠠ ᠦᠢ ᠲᠦᠮᠡᠨ ᠣᠨ ᠢ᠋ ᠥᠩᠭᠡᠷᠡᠭᠡᠭᠡᠳ ᠬᠠᠯᠢᠮᠤ ᠶ᠋ᠢᠨ ᠡᠮᠦᠨᠡ ᠬᠣᠶᠠᠷ ᠮᠥᠴᠢ ᠨᠢ ᠰᠡᠯᠢᠭᠦᠷ ᠬᠤᠪᠢᠯᠵᠤ᠂ ᠬᠣᠢᠲᠤ ᠬᠣᠶᠠᠷ ᠬᠥᠯ ᠨᠢ ᠣᠷᠣ ᠦᠭᠡᠢ ᠠᠷᠢᠯᠤᠭᠠᠳ ᠵᠢᠭᠠᠰᠤᠨ ᠤ᠋ ᠬᠡᠯᠪᠡᠷᠢ ᠲᠡᠢ ᠪᠣᠯᠵᠤ ᠳᠠᠯᠠᠢ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠵᠣᠬᠢᠴᠠᠭᠰᠠᠨ ᠪᠠᠢᠨᠠ᠃
ᠬᠠᠯᠢᠮᠤ ᠶ᠋ᠢᠨ ᠲᠥᠷᠥᠯ ᠵᠦᠢᠯ ᠣᠯᠠᠨ ᠪᠠᠢᠳᠠᠭ᠂ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠬᠣᠶᠠᠷ ᠶᠡᠬᠡ ᠲᠥᠷᠥᠯ ᠢ᠋ᠶ᠋ᠡᠷ ᠠᠩᠭᠢᠯᠠᠵᠤ ᠪᠣᠯᠤᠨᠠ᠂ ᠲᠤᠬᠠᠢᠯᠠᠪᠠᠯ᠄ ᠨᠢᠭᠡ ᠲᠥᠷᠥᠯ ᠨᠢ ᠡᠯᠵᠢᠩ ᠲᠡᠢ᠂ ᠲᠡᠭᠦᠨ ᠢ᠋ ᠡᠯᠵᠢᠩᠲᠦ ᠬᠠᠯᠢᠮᠤ ᠭᠡᠨᠡ᠂ ᠰᠢᠳᠦ ᠠᠷᠠᠭᠠ ᠪᠠᠢᠳᠠᠭ ᠦᠭᠡᠢ᠃ ᠨᠥᠬᠥᠭᠡ ᠨᠢᠭᠡ ᠲᠥᠷᠥᠯ ᠨᠢ ᠬᠤᠷᠴᠠ ᠮᠡᠰᠡ ᠰᠢᠭ ᠠᠷᠠᠭᠠ ᠰᠢᠲᠦ ᠲᠡᠢ᠂ ᠲᠡᠭᠦᠨ ᠢ᠋ ᠠᠷᠠᠭᠠᠲᠤ ᠬᠠᠯᠢᠮᠤ ᠭᠡᠨᠡ᠃
ᠡᠢᠮᠦ ᠠᠪᠤᠷᠭᠤ ᠪᠦᠳᠦᠭᠦᠨ ᠠᠮᠢᠲᠠᠨ ᠴᠣᠬᠣᠮ ᠶᠠᠭᠤ ᠢᠳᠡᠵᠦ ᠠᠮᠢᠳᠤᠷᠠᠳᠠᠭ ᠪᠣᠢ? ᠭᠡᠪᠡᠯ᠂ ᠡᠯᠵᠢᠩᠲᠦ ᠬᠠᠯᠢᠮᠤ ᠭᠣᠣᠯᠳᠠᠭᠤ ᠰᠠᠮ ᠬᠣᠷᠣᠬᠠᠢ ᠪᠣᠯᠤᠨ ᠵᠢᠷᠠᠭᠠᠬᠠᠢ ᠶ᠋ᠢ ᠢᠳᠡᠨᠡ᠃ ᠡᠯᠵᠢᠩᠲᠦ ᠬᠠᠯᠢᠮᠤ ᠳᠠᠯᠠᠢ ᠳ᠋ᠤ᠌ ᠤᠮᠪᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠠᠮᠠ ᠪᠠᠨ ᠠᠩᠭᠠᠢᠵᠤ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠵᠢᠷᠠᠭᠠᠬᠠᠢ᠂ ᠰᠠᠮ ᠬᠣᠷᠣᠬᠠᠢ ᠶ᠋ᠢ ᠤᠰᠤ ᠲᠠᠢ ᠬᠠᠮᠲᠤ ᠣᠭᠣᠴᠢᠵᠤ᠂ ᠠᠮᠠ ᠪᠠᠨ ᠬᠠᠮᠬᠢᠬᠤ ᠳ᠋ᠠᠭᠠᠨ ᠤᠰᠤ ᠶ᠋ᠢ ᠡᠯᠵᠢᠩ ᠦ᠋ᠨ ᠢ᠋ᠶ᠋ᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠰᠢᠬᠠᠨ ᠭᠠᠷᠭᠠᠵᠤ᠂ ᠵᠢᠷᠠᠭᠠᠬᠠᠢ᠂ ᠰᠠᠮ ᠬᠣᠷᠣᠬᠠᠢ ᠨᠤᠭᠤᠳ ᠢ᠋ ᠵᠠᠯᠭᠢᠳᠠᠭ᠃ ᠢᠩᠭᠢᠵᠦ ᠨᠢᠭᠡ ᠡᠷᠡᠨ ᠳ᠋ᠦ᠍᠂ ᠬᠣᠶᠠᠷ ᠭᠤᠷᠪᠠᠨ ᠮᠢᠩᠭᠠᠨ ᠺᠢᠯᠣᠭ᠌ᠷᠠᠮ ᠢᠳᠡᠳᠡᠭ᠃ ᠠᠷᠠᠭᠠᠲᠤ ᠬᠠᠯᠢᠮᠤ ᠶ᠋ᠢᠨ ᠭᠣᠣᠯ ᠢᠳᠡᠰᠢ ᠨᠢ ᠲᠣᠮᠣ ᠵᠢᠭᠠᠰᠤ ᠪᠤᠶᠤ ᠳᠠᠯᠠᠢ ᠶ᠋ᠢᠨ ᠠᠷᠢᠶᠠᠲᠠᠨ ᠪᠣᠯᠤᠨᠠ᠃ ᠲᠡᠳᠡ ᠲᠣᠮᠣ ᠵᠢᠭᠠᠰᠤ ᠪᠣᠯᠤᠨ ᠳᠠᠯᠠᠢ ᠶ᠋ᠢᠨ ᠠᠷᠢᠶᠠᠲᠠᠨ ᠢ᠋ ᠦᠵᠡᠪᠡᠯ ᠲᠣᠭᠰᠢᠨ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠳᠠᠭᠠᠷᠢᠨ ᠪᠠᠷᠢᠵᠤ ᠬᠤᠷᠴᠠ ᠰᠢᠲᠦ ᠪᠡᠷ ᠢ᠋ᠶ᠋ᠡᠨ ᠬᠠᠵᠠᠵᠤ ᠵᠠᠵᠢᠯᠤᠨ ᠳᠠᠷᠤᠢ ᠳ᠋ᠤᠨᠢ ᠢᠳᠡᠴᠢᠬᠡᠨᠡ᠃ ᠠᠷᠠᠭᠠᠲᠤ ᠬᠠᠯᠢᠮᠤ ᠳ᠋ᠤ᠌《 ᠳᠠᠯᠠᠢ ᠶ᠋ᠢᠨ ᠪᠠᠷᠰ》 ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠨᠢᠭᠡ ᠵᠦᠢᠯ ᠦ᠋ᠨ ᠪᠠᠷᠰ ᠬᠠᠯᠢᠮᠤ ᠪᠠᠢᠳᠠᠭ᠃ ᠵᠠᠷᠢᠮ ᠳ᠋ᠠᠭᠠᠨ ᠬᠡᠳᠦᠨ ᠠᠷᠪᠠᠨ ᠪᠠᠷᠰ ᠬᠠᠯᠢᠮᠤ ᠨᠡᠢᠯᠡᠭᠡᠳ᠂ ᠭᠤᠴᠢ ᠭᠠᠷᠤᠢ ᠲᠤᠨ ᠤ᠋ ᠪᠦᠳᠦᠭᠦᠨ ᠡᠯᠵᠢᠩᠲᠦ ᠬᠠᠯᠢᠮᠤ ᠶ᠋ᠢ ᠪᠦᠰᠡᠯᠡᠨ ᠠᠪᠴᠤ ᠬᠡᠳᠦᠬᠡᠨ ᠴᠠᠭ ᠤ᠋ᠨ ᠳᠣᠲᠣᠷᠠ ᠢᠳᠡᠴᠢᠬᠡᠳᠡᠭ᠃
ᠬᠠᠯᠢᠮᠤ ᠪᠣᠯ ᠠᠭᠤᠰᠬᠢ ᠪᠡᠷ ᠠᠮᠢᠰᠬᠤᠯᠯᠠᠳᠠᠭ᠂ ᠡᠨᠡ ᠨᠢ ᠬᠠᠯᠢᠮᠤ ᠪᠣᠯ ᠵᠢᠭᠠᠰᠤᠨ ᠤ᠋ ᠲᠥᠷᠥᠯ ᠪᠢᠰᠢ ᠭᠡᠳᠡᠭ ᠢ᠋ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ ᠬᠠᠯᠢᠮᠤ ᠶ᠋ᠢᠨ ᠬᠠᠮᠠᠷ ᠤ᠋ᠨ ᠨᠦᠬᠡ ᠨᠢ ᠭᠠᠪᠠᠯᠠ ᠳᠡᠭᠡᠷᠡ ᠪᠡᠨ ᠪᠠᠢᠳᠠᠭ᠃ ᠠᠮᠢᠰᠬᠤᠬᠤ ᠳ᠋ᠠᠭᠠᠨ ᠤᠰᠤᠨ ᠳᠡᠭᠡᠷᠡ ᠬᠥᠪᠦᠨ ᠭᠠᠷᠴᠤ ᠬᠠᠭᠤᠴᠢᠨ ᠬᠡᠢ ᠪᠡᠨ ᠦᠯᠢᠶᠡᠬᠦ ᠳ᠋ᠦ᠍᠂ ᠬᠠᠮᠠᠷ ᠡᠴᠡ ᠨᠢ ᠰᠦᠷᠴᠢᠭᠳᠡᠨ ᠭᠠᠷᠤᠭᠰᠠᠨ ᠤᠰᠤ ᠴᠡᠴᠡᠷᠯᠢᠭ ᠦ᠋ᠨ ᠣᠷᠬᠢᠭᠠ ᠪᠤᠯᠠᠭ ᠰᠢᠭ᠋ ᠠᠰ ᠳᠡᠭᠡᠭᠰᠢ ᠤᠰᠤᠨ ᠪᠠᠭᠠᠨᠠ ᠪᠣᠰᠳᠠᠭ ᠪᠠᠢᠨᠠ᠃ ᠬᠠᠯᠢᠮᠤ ᠤᠰᠤᠨ ᠳᠡᠭᠡᠷᠡ ᠬᠥᠪᠴᠦ ᠭᠦᠢᠴᠡᠳ ᠠᠮᠢᠰᠬᠤᠭᠠᠳ ᠱᠤᠩᠪᠠᠨ ᠣᠷᠣᠨᠠ᠂ ᠵᠣᠬᠢᠬᠤ ᠴᠠᠭ ᠢ᠋ ᠥᠩᠭᠡᠷᠡᠬᠦ ᠪᠦᠷᠢ ᠨᠢᠭᠡ ᠤᠳᠠᠭᠠ ᠢᠩᠭᠢᠵᠦ ᠤᠰᠤ ᠰᠦᠷᠴᠢᠵᠦ ᠠᠮᠢᠰᠬᠤᠳᠠᠭ᠃ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠬᠠᠯᠢᠮᠤ ᠨᠤᠭᠤᠳ ᠤ᠋ᠨ ᠰᠦᠷᠴᠢᠵᠦ ᠭᠠᠷᠭᠠᠭᠰᠠᠨ ᠤᠰᠤᠨ ᠪᠠᠭᠠᠨᠠ ᠨᠢ ᠮᠥᠨ ᠠᠳᠠᠯᠢ ᠦᠭᠡᠢ ᠪᠠᠢᠳᠠᠭ᠃ ᠡᠯᠵᠢᠩᠲᠦ ᠬᠠᠯᠢᠮᠤ ᠶ᠋ᠢᠨ ᠰᠦᠷᠴᠢᠭᠰᠡᠨ ᠤᠰᠤᠨ ᠪᠠᠭᠠᠨᠠ ᠨᠢ ᠨᠠᠪ ᠨᠠᠷᠢᠬᠠᠨ ᠢ᠋ᠶ᠋ᠠᠷ ᠡᠭᠴᠡ ᠥᠨᠳᠥᠷ ᠪᠣᠰᠳᠠᠭ᠃ ᠠᠷᠠᠭᠠᠲᠤ ᠬᠠᠯᠢᠮᠤ ᠶ᠋ᠢᠨ ᠤᠰᠤᠨ ᠪᠠᠭᠠᠨᠠ ᠨᠢ ᠵᠢᠰᠢᠭᠦᠦ ᠪᠥᠭᠡᠳ ᠪᠦᠳᠦᠭᠦᠨ ᠪᠣᠭᠣᠨᠢ ᠪᠠᠢᠳᠠᠭ᠃ ᠲᠤᠷᠰᠢᠯᠭᠠ ᠲᠠᠢ ᠵᠢᠭᠠᠰᠤᠴᠢᠳ ᠶᠡᠷᠦ ᠤᠰᠤᠨ ᠪᠠᠭᠠᠨᠠ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠠᠯᠢᠮᠤ ᠶ᠋ᠢᠨ ᠲᠥᠷᠥᠯ ᠵᠦᠢᠯ ᠪᠣᠯᠤᠨ ᠶᠡᠬᠡ ᠪᠠᠭᠠ ᠶ᠋ᠢ ᠠᠵᠢᠵᠤ ᠮᠡᠳᠡᠳᠡᠭ ᠶᠦ᠍ᠮ᠃
ᠬᠠᠯᠢᠮᠤ ᠡᠳᠦᠷ ᠪᠦᠷᠢ ᠤᠨᠲᠠᠳᠠᠭ᠃ ᠤᠨᠲᠠᠬᠤ ᠳ᠋ᠠᠭᠠᠨ ᠠᠮᠤᠷ ᠲᠦᠪᠰᠢᠨ ᠭᠠᠵᠠᠷ ᠢ᠋ ᠡᠷᠢᠵᠦ᠂ ᠬᠡᠳᠦᠭᠦᠯᠡ ᠨᠡᠢᠯᠡᠵᠦ ᠲᠣᠯᠣᠭᠠᠢ ᠪᠠᠨ ᠳᠣᠲᠣᠭᠰᠢ ᠰᠡᠭᠦᠯ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠴᠠᠭᠠᠷᠢᠭᠯᠠᠵᠤ ᠳᠠᠯᠠᠢ ᠶ᠋ᠢᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠨᠠᠮ ᠵᠢᠮᠬᠡᠨ ᠬᠥᠪᠴᠦ ᠤᠨᠲᠠᠨᠠ᠃ ᠬᠡᠷᠪᠡ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠴᠢᠮᠡᠭᠡ ᠰᠣᠨᠣᠰᠪᠠᠯ ᠳᠣᠣᠷᠠ ᠪᠠᠨ ᠵᠦᠭ ᠵᠦᠭ ᠲᠡᠭᠡᠨ ᠰᠠᠷᠨᠢᠨ ᠵᠢᠭᠤᠲᠠᠳᠠᠭ᠃
ᠬᠠᠯᠢᠮᠤ ᠪᠣᠯ ᠵᠤᠯᠵᠠᠭᠠᠯᠠᠨ ᠦᠷᠡᠵᠢᠳᠡᠭ᠃ ᠡᠯᠵᠢᠩᠲᠦ ᠬᠠᠯᠢᠮᠤ ᠶ᠋ᠢᠨ ᠵᠤᠯᠵᠠᠭᠠ ᠡᠬᠡ ᠡᠴᠡ ᠲᠥᠷᠥᠬᠦ ᠳ᠋ᠡᠭᠡᠨ ᠠᠷᠪᠠ ᠭᠠᠷᠤᠢ ᠮᠧᠲ᠋ᠷ ᠤᠷᠲᠤ᠂ ᠳᠣᠯᠣᠭᠠᠨ ᠮᠢᠩᠭᠠ ᠬᠣᠶᠠᠷ ᠵᠠᠭᠤ ᠭᠠᠷᠤᠢ ᠺᠢᠯᠣᠭ᠌ᠷᠠᠮ ᠬᠦᠨᠳᠦ ᠪᠠᠢᠨᠠ᠃ ᠵᠤᠯᠵᠠᠭᠠ ᠬᠠᠯᠢᠮᠤ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠦ ᠶ᠋ᠢ ᠬᠥᠬᠥᠵᠦ᠂ ᠡᠳᠦᠷ ᠪᠦᠷᠢ ᠭᠤᠴᠢ ᠡᠴᠡ ᠲᠠᠪᠢᠨ ᠺᠢᠯᠣᠭ᠌ᠷᠠᠮ ᠥᠰᠦᠭᠰᠡᠭᠡᠷ᠂ ᠬᠣᠶᠠᠷ ᠭᠤᠷᠪᠠᠬᠠᠨ ᠵᠢᠯ ᠳ᠋ᠦ᠍ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠲᠣᠮᠣ ᠬᠠᠯᠢᠮᠤ ᠪᠣᠯᠤᠨᠠ᠃ ᠬᠠᠯᠢᠮᠤ ᠪᠣᠯ ᠤᠷᠲᠤ ᠨᠠᠰᠤ ᠲᠠᠢ ᠠᠮᠢᠲᠠᠨ ᠶᠤᠮ᠂ ᠶᠡᠷᠦ ᠳ᠋ᠡᠭᠡᠨ ᠬᠡᠳᠦᠨ ᠠᠷᠪᠠ ᠨᠠᠰᠤᠯᠠᠬᠤ ᠪᠤᠶᠤ ᠵᠠᠭᠤᠨ ᠨᠠᠰᠤᠯᠠᠬᠤ ᠴᠤ᠌ ᠪᠣᠢ᠃
※ ᠢᠷᠡᠯᠲᠡ᠄
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠳᠣᠯᠣᠳᠤᠭᠠᠷ ᠳᠡᠪᠲᠡᠷ ※
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1991 ᠣᠨ ᠤ᠋3 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1993 ᠣᠨ ᠤ᠋4 ᠰᠠᠷᠠ ᠳ᠋ᠤ᠌ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ
ᠦᠨᠡ᠄1.40 ᠲᠥᠭᠥᠷᠢᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ· ᠣᠶᠤᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ ᠂ ᠣᠳᠣᠨᠬᠤᠸᠠᠷ ᠂ ᠪᠥᠷᠢᠨᠴᠡᠴᠡᠭ
2023.7.15