ᠳᠠᠷᠬᠠᠨ ᠨᠣᠶᠠᠨ ᠲᠠᠢ ᠴᠡᠴᠡ ᠪᠤᠯᠢᠶᠠᠯᠳᠤᠭᠰᠠᠨ ᠨᠢ ᠦᠯᠢᠭᠡᠷДархан ноёнтой цэц булаалдсан нь үлгэр
438ᠳᠠᠷᠬᠠᠨ ᠨᠣᠶᠠᠨ ᠲᠠᠢ ᠴᠡᠴᠡ ᠪᠤᠯᠢᠶᠠᠯᠳᠤᠭᠰᠠᠨ ᠨᠢ ᠦᠯᠢᠭᠡᠷ
ᠪᠠᠳᠠᠢ ᠶᠡᠬᠡ ᠵᠠᠮ ᠳ᠋ᠤ᠌ ᠣᠷᠣᠵᠤ ᠶᠠᠪᠤᠭᠰᠠᠭᠠᠷ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠪᠣᠯᠬᠤ ᠳ᠋ᠤ᠌ ᠶᠡᠬᠡᠳᠡ ᠶᠠᠳᠠᠷᠠᠭᠰᠠᠨ ᠲᠤᠯᠠ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠲᠦᠳᠡᠭ ᠭᠠᠯ ᠨᠣᠴᠣᠭᠠᠭᠠᠳ᠂ ᠬᠤᠪᠠ ᠬᠠᠷᠠ ᠲᠣᠭᠣᠭᠠᠨ ᠳ᠋ᠠᠭᠠᠨ ᠤᠰᠤ ᠳᠦᠭᠦᠷᠭᠡᠨ ᠴᠠᠢ ᠪᠤᠴᠠᠯᠭᠠᠵᠤ ᠰᠠᠭᠤᠲᠠᠯᠠ ᠨᠣᠶᠠᠨ ᠤ᠋ ᠲᠤᠷᠰᠢᠭᠤᠯ ᠪᠣᠯᠤᠯᠲᠠᠢ ᠨᠢᠭᠡᠨ ᠬᠢᠶᠡ ᠬᠦᠷᠴᠦ ᠢᠷᠡᠭᠡᠳ᠄《ᠠᠢ ᠮᠠᠭᠤ ᠴᠢ ᠪᠠᠳᠢᠷᠴᠢᠨ᠂ ᠡᠨᠡ ᠵᠠᠮ ᠢ᠋ᠶ᠋ᠠᠷ ᠮᠢᠨᠦ ᠳᠠᠷᠬᠠᠨ ᠨᠣᠶᠠᠨ ᠮᠣᠷᠢᠯᠠᠵᠤ ᠶᠠᠪᠤᠭᠠ ᠲᠤᠯᠠ ᠪᠤᠰᠢᠭᠤᠬᠠᠨ ᠵᠠᠮ ᠵᠠᠢᠯᠠ!》ᠭᠡᠰᠡᠨ ᠳ᠋ᠦ᠍ ᠪᠠᠳᠠᠢ᠄《ᠲᠠᠨ ᠤ᠋ ᠨᠣᠶᠠᠨ ᠬᠢᠷᠢ ᠵᠡᠷᠭᠡ ᠶ᠋ᠢᠨ ᠳᠠᠷᠬᠠᠨ ᠶᠤᠮ ᠳᠠ》ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠨᠥᠬᠥᠭᠡ ᠬᠢᠶᠡ ᠠᠭᠤᠷ ᠨᠢ ᠬᠦᠷᠦᠭᠰᠡᠨ ᠪᠣᠯᠤᠯᠲᠠᠢ᠄《ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠳᠠᠷᠬᠠᠨ ᠴᠣᠯᠠ ᠱᠠᠩᠨᠠᠭᠳᠠᠭᠰᠠᠨ ᠶᠤᠮ ᠲᠠ ᠬᠦ᠌᠂ ᠴᠢ ᠶᠠᠭᠠᠬᠢᠬᠤ ᠨᠢ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠪᠠᠳᠠᠢ᠄《ᠲᠠᠨ ᠤ᠋ ᠨᠣᠶᠠᠨ ᠲᠡᠢᠮᠦ ᠳᠣᠷᠢᠭᠤᠨ ᠳᠠᠷᠬᠠᠨ ᠶᠤᠮ ᠪᠣᠯ ᠲᠡᠭᠦᠨ ᠢ᠋ᠶ᠋ᠡᠷ ᠴᠢᠨᠢ ᠮᠠᠭᠤ ᠲᠣᠭᠣᠭᠠ ᠪᠠᠨ ᠬᠠᠳᠠᠭᠤᠯᠤᠶᠠ ᠳᠠ》ᠭᠡᠰᠡᠨ ᠳ᠋ᠦ᠍ ᠬᠢᠶᠡ ᠠᠭᠤᠷᠯᠠᠨ᠄《ᠮᠠᠭᠤ ᠲᠡᠨᠡᠭ ᠣᠯᠠᠨ ᠦᠭᠡ ᠳᠣᠩᠭᠣᠰᠤᠯ ᠦᠭᠡᠢ ᠵᠠᠮ ᠠ᠋ᠴᠠ ᠬᠣᠯᠠᠳ!》 ᠭᠡᠰᠡᠨ ᠳ᠋ᠦ᠍ ᠪᠠᠳᠠᠢ᠄《ᠬᠦᠢ ᠲᠡᠨᠡᠭ ᠠ᠋᠂ ᠴᠢᠮᠠ ᠶ᠋ᠢ ᠵᠠᠢᠯᠠ ᠭᠡᠵᠦ ᠪᠠᠢᠨᠠ》ᠭᠡᠳ ᠲᠠᠶᠠᠭ ᠢ᠋ᠶ᠋ᠠᠨ ᠵᠠᠮ ᠳᠡᠭᠡᠷᠡ ᠨᠦᠳᠦᠭᠰᠡᠨ ᠳ᠋ᠦ᠍ ᠬᠢᠶᠡ ᠳᠠᠰᠤᠯ ᠦᠭᠡᠢ ᠠᠭᠤᠷᠯᠠᠨ᠄《ᠵᠠ ᠴᠢ ᠭᠠᠢᠭᠤᠢ᠂ ᠢᠩᠭᠢᠭᠡᠳ ᠨᠣᠪᠰᠢᠷᠠᠵᠤ ᠪᠠᠢ ᠨᠣᠶᠠᠨ ᠳ᠋ᠤ᠌ ᠠᠢᠯᠠᠳᠬᠠᠭᠠᠳ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠬᠠᠭᠤᠯᠤᠨᠠ ᠳᠠ》 ᠭᠡᠳ ᠪᠤᠴᠠᠭᠠᠳ ᠬᠠᠷᠠᠢᠯᠭᠠᠭᠰᠠᠨ ᠳ᠋ᠤ᠌ ᠪᠠᠳᠠᠢ᠄《ᠬᠦᠢ ᠲᠠᠨ ᠤ᠋ ᠲᠡᠷᠡ ᠨᠣᠶᠠᠨ ᠴᠢᠨᠢ ᠲᠣᠯᠣᠭᠠᠢ ᠦᠭᠡᠢ ᠶᠦᠮ ᠦᠦ? ᠮᠢᠨᠦ ᠮᠠᠭᠤ ᠵᠠᠨᠲᠠᠭᠠᠷ ᠲᠣᠯᠣᠭᠠᠢ ᠲᠠᠭᠠᠷᠠᠬᠤ ᠦᠭᠡᠢ ᠪᠢᠵᠡ ᠳᠠ᠂ ᠭᠡᠵᠦ ᠠᠢᠯᠠᠳᠬᠠᠭᠠᠷᠠᠢ !》 ᠭᠡᠮᠡᠨ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠰᠬᠢᠷᠴᠠᠢ᠃
ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠨᠣᠶᠠᠨᠲᠠᠨ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠠᠭᠤᠯᠤᠨ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠪᠠᠳᠠᠢ ᠵᠠᠮ ᠳᠡᠭᠡᠷᠡ ᠨᠢ ᠬᠥᠨᠳᠡᠯᠡᠨ ᠭᠤᠯᠳᠤ ᠰᠠᠭᠤᠭᠠᠳ ᠲᠣᠮᠣ ᠬᠠᠷᠠ ᠠᠶᠠᠭᠠᠨ ᠳ᠋ᠠᠭᠠᠨ ᠴᠠᠢ ᠳᠦᠭᠦᠷᠭᠡᠨ ᠤᠤᠭᠤᠵᠤ ᠰᠠᠭᠤᠭᠰᠠᠨ ᠳ᠋ᠤ᠌ ᠨᠣᠶᠠᠨᠲᠠᠨ ᠭᠠᠢᠬᠠᠨ ᠬᠠᠷᠠᠭᠠᠳ᠄《ᠡᠭᠦᠨ ᠦ᠌ ᠠᠶᠠᠭᠠ ᠶ᠋ᠢ ᠨᠢ ᠬᠠᠷᠠᠭᠠᠴᠢ ᠳᠠ ᠨᠠᠷ᠂ ᠬᠤᠳᠳᠤᠭ ᠰᠢᠭ᠋ ᠯᠡ》 ᠭᠡᠵᠦ ᠳᠣᠷᠣᠮᠵᠢᠯᠠᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠠᠢ᠄《ᠡᠨᠡ ᠨᠣᠶᠠᠨ ᠤ᠋ ᠬᠤᠳᠳᠤᠭ ᠨᠢ ᠮᠢᠨᠦ ᠠᠶᠠᠭᠠ ᠰᠢᠭ᠋ ᠪᠠᠢᠭᠠ ᠶᠤᠮ ᠴᠢᠨᠢ᠂ ᠠᠳᠤᠭᠤ ᠨᠢ ᠭᠡᠵᠦ ᠵᠤᠷᠠᠮᠠ ᠰᠢᠭ᠋ ᠯᠡ ᠶᠠᠭᠤᠮᠠ ᠪᠠᠢᠭᠠ ᠪᠠᠢᠬᠤ ᠳᠠ》 ᠭᠡᠪᠡᠯ ᠨᠣᠶᠠᠨ᠄《ᠡᠨᠡ ᠵᠣᠯᠢᠭ ᠤ᠋ᠨ ᠮᠠᠯᠠᠭᠠᠢ ᠶ᠋ᠢ ᠬᠠᠷᠠᠪᠠ ᠤᠤ ? ᠳᠡᠭᠡᠪᠦᠷ ᠰᠢᠭ ᠯᠡ》 ᠭᠡᠬᠦ ᠳ᠋ᠦ᠍ ᠪᠠᠳᠠᠢ᠄《ᠳᠡᠭᠡᠪᠦᠷ ᠨᠢ ᠮᠢᠨᠦ ᠮᠠᠯᠠᠭᠠᠢ ᠰᠢᠭ᠋ ᠶᠦᠮ ᠪᠣᠯ᠂ ᠨᠣᠶᠠᠨ ᠤ᠋ ᠥᠷᠭᠥᠭᠡ ᠨᠢ ᠡᠪᠡᠰᠦᠨ ᠣᠷᠣᠮᠵᠢ ᠯᠠ ᠪᠠᠢᠬᠤ ᠳᠠ》 ᠭᠡᠵᠦ ᠬᠡᠨᠡᠭ ᠦᠭᠡᠢ ᠬᠡᠯᠡᠭᠰᠡᠨ ᠳ᠋ᠦ᠍ ᠨᠣᠶᠠᠨᠲᠠᠨ ᠤ᠋ ᠠᠭᠤᠷ ᠪᠤᠴᠠᠯᠤᠨ᠄《ᠴᠢ ᠶᠡᠷᠦ ᠨᠢ ᠨᠠᠮᠠ ᠶ᠋ᠢ ᠬᠡᠨ ᠭᠡᠵᠦ ᠪᠣᠳᠣᠭᠠᠳ ᠪᠠᠢᠨᠠ ᠬᠦ᠌?》 ᠭᠡᠵᠦ ᠣᠮᠣᠭ ᠲᠠᠢ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠪᠠᠳᠠᠢ᠄《ᠲᠡᠭᠡᠪᠡᠯ ᠲᠠ ᠨᠠᠮᠠ ᠶ᠋ᠢ ᠪᠠᠰᠠ ᠬᠡᠨ ᠭᠡᠵᠦ ᠪᠣᠳᠣᠭᠠᠳ ᠪᠠᠢᠨᠠ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠨᠣᠶᠠᠨᠲᠠᠨ᠄《ᠨᠠᠮᠠ ᠶ᠋ᠢ ᠨᠣᠶᠠᠨ ᠭᠡᠳᠡᠭ ᠶᠦᠮ᠂ ᠴᠢᠮᠠ ᠶ᠋ᠢ ᠨᠢᠰᠦ ᠭᠡᠳᠡᠭ ᠶᠦᠮ》 ᠭᠡᠰᠡᠨ ᠳ᠋ᠦ᠍ ᠪᠠᠳᠠᠢ᠄《 ᠬᠥᠥᠭ ᠲᠠᠨ ᠤ᠋ ᠬᠦᠦ ᠶ᠋ᠢᠨ ᠬᠠᠮᠠᠷ ᠠ᠋ᠴᠠ ᠨᠠᠳᠠ ᠰᠢᠭ᠋ ᠡᠢᠮᠦ ᠲᠣᠮᠣ ᠨᠢᠰᠦ ᠭᠠᠷᠳᠠᠭ ᠪᠠᠢᠬᠤ ᠨᠢ ᠠ᠋ ᠂ ᠲᠡᠭᠡᠬᠦ ᠪᠡᠷ ᠮᠥᠨ ᠴᠦ᠍ ᠲᠣᠮᠣ ᠬᠠᠮᠠᠷᠳᠠᠢ ᠬᠦᠦ ᠲᠡᠢ ᠶᠦᠮ ᠳ᠋ᠠ᠂ ᠳᠠ》ᠭᠡᠰᠡᠨ ᠳ᠋ᠦ᠍ ᠠᠯᠪᠠᠲᠤ ᠨᠠᠷ ᠨᠢ ᠢᠨᠢᠶᠡᠳᠦ ᠠᠯᠳᠠᠵᠠᠢ ᠭᠡᠨᠡ᠃
ᠳᠠᠷᠬᠠᠨ ᠨᠣᠶᠠᠨ ᠡᠭᠦᠨ ᠲᠡᠢ ᠶᠠᠭᠤᠮᠠ ᠶᠠᠷᠢᠪᠠᠯ ᠢᠴᠢᠭᠦᠷᠢ ᠪᠣᠯᠵᠤ ᠮᠡᠳᠡᠨᠡ ᠭᠡᠵᠦ ᠪᠣᠯᠭᠣᠮᠵᠢᠯᠠᠭᠠᠳ ᠶᠠᠭᠤ ᠴᠤ᠌ ᠬᠡᠯᠡᠯ ᠦᠭᠡᠢ ᠲᠣᠭᠣᠷᠢᠨ ᠶᠠᠪᠤᠵᠠᠢ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠦᠮᠡᠳ ᠤᠨᠳᠤᠷᠮᠠ
ᠬᠣᠩ ᠮᠧᠢ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠬᠣᠩ ᠮᠧᠢ
ᠬᠢᠨᠠᠭᠴᠢ ᠄ ᠢᠷᠡᠭᠡᠳᠦᠢ