ᠴᠠᠯᠢᠩ ᠲᠠᠢ ᠮᠠᠯᠠᠭᠠᠢ – ᠯ᠂ ᠪᠠᠳᠠᠷᠴᠢ Цалинтай малгай – Л ᠂ Бадарч
361ᠴᠠᠯᠢᠩ ᠲᠠᠢ ᠮᠠᠯᠠᠭᠠᠢ
( ᠱᠣᠭ ᠥᠭᠦᠯᠡᠯᠭᠡ )
ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠣᠷᠣᠰᠢᠳᠠᠭ ᠨᠢᠭᠡ ᠠᠷᠲ᠋ᠧᠯᠢ (ᠳᠡᠯᠭᠡᠭᠦᠷ ᠂ ᠬᠣᠷᠰᠢᠶᠠ) ᠶ᠋ᠢᠨ ᠰᠠᠩᠬᠦᠦ ( ᠡᠳ᠋ ᠦ᠋ᠨ ᠶᠠᠪᠤᠳᠠᠯ ) ᠤ᠋ᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠡᠨᠡ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠮᠥᠩᠭᠥᠨ ᠦ᠌ ᠨᠢᠷᠪᠠ ᠬᠠᠨᠳᠠ ᠬᠡᠦᠬᠡᠨ ᠥᠷᠯᠥᠭᠡ ᠨᠠᠢ᠍ᠮᠠᠨ ᠴᠠᠭ ᠲᠤ᠌ ᠠᠵᠢᠯ ᠳ᠋ᠠᠭᠠᠨ ᠢᠷᠡᠪᠡ᠃
ᠭᠡᠲᠡᠯᠡ ᠲᠠᠰᠤᠯᠭᠠᠨ ᠳ᠋ᠤᠨᠢ ᠨᠢᠭᠡ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠲᠡᠭᠦᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠪᠠᠢᠷᠢᠲᠠᠢ ᠮᠡᠨᠳᠦᠯᠡᠭᠡᠳ᠄
– ᠲᠠ ᠮᠥᠩᠭᠥᠨ ᠦ᠌ ᠨᠢᠷᠪᠠ ᠤᠤ ? ᠭᠡᠪᠡ ᠃
– ᠲᠡᠢᠮᠦ ᠠ᠋ !
– ᠲᠠᠨ ᠲᠠᠢ ᠴᠢᠨᠢ ᠠᠮᠢᠳᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠠᠭᠤᠯᠵᠠᠳᠠᠭ ᠯᠠ ᠶᠤᠮ ᠪᠠᠢᠨᠠ ᠳᠠ᠃ ᠪᠢ ᠲᠠᠨ ᠤ᠋ ᠠᠷᠲ᠋ᠧᠯᠢ ᠳ᠋ᠦ᠍ ᠬᠢᠯᠭᠡᠭᠰᠡᠨ ᠵᠦᠢᠯ ᠢ᠋ᠶ᠋ᠡᠨ ᠠᠪᠬᠤ ᠮᠥᠩᠭᠥ ᠬᠤᠷᠢᠶᠠᠯᠭᠠᠬᠤ ᠭᠡᠳ ᠥᠩᠭᠡᠷᠡᠭᠴᠢ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ 6 ᠡᠳᠦᠷ ᠳᠠᠷᠠᠭᠠᠯᠠᠨ ᠢᠷᠡᠯᠡ ᠃ ᠭᠡᠪᠡᠴᠦ ᠡᠷᠬᠢᠮᠰᠦᠭ ᠨᠢᠷᠪᠠ ᠶ᠋ᠢᠨ ᠭᠡᠭᠡᠨ ᠳᠦᠷᠢ ᠶ᠋ᠢ ᠰᠠᠢ ᠯᠠ ᠬᠠᠷᠠᠵᠤ ᠪᠠᠢᠨᠠ ᠃ ᠡᠨᠡ ᠪᠣᠯ ᠳᠣᠯᠣᠭᠠᠲᠠᠬᠢ ᠤᠳᠠᠭᠠ ᠶ᠋ᠢᠨ ᠢᠷᠡᠯᠲᠡ ᠂ ᠡᠢᠮᠦ ᠤᠴᠢᠷ ᠠ᠋ᠴᠠ ᠲᠠ ᠪᠢᠳᠡ ᠬᠣᠶᠠᠷ ᠲᠤ᠌ ᠶᠠᠷᠢᠬᠤ ᠶᠠᠭᠤᠮᠠ ᠮᠠᠰᠢ ᠶᠡᠬᠡ ᠪᠠᠢᠨᠠ ᠭᠡᠳ ᠲᠡᠷᠡ ᠬᠥᠮᠦᠨ ᠢᠰᠡᠭᠡᠢ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠲᠠᠮᠠᠬᠢ ᠠᠰᠠᠭᠠᠵᠤ ᠄
– ᠨᠠᠮ ᠤ᠋ᠨ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠪᠦᠭᠦᠳᠡ ᠬᠤᠷᠠᠯ ᠤ᠋ᠳ ᠬᠥᠳᠡᠯᠮᠦᠷᠢ ᠶ᠋ᠢᠨ ᠰᠠᠬᠢᠯᠭᠠ ᠪᠠᠲᠤ ᠰᠤᠯᠠ ᠪᠠᠢᠨᠠ ᠭᠡᠴᠦ ᠵᠢᠭᠠᠭᠰᠠᠨ ᠪᠠᠢᠭᠠ ᠶᠤᠮ ᠃ ᠡᠨᠡ ᠪᠣᠯ ᠮᠠᠰᠢ ᠵᠦᠢᠲᠡᠢ ᠪᠠᠢᠭᠠ ᠶᠤᠮ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄ ᠲᠠᠨ ᠤ᠋ ᠦᠵᠡᠭᠦᠯᠵᠦ ᠪᠠᠢᠭᠠ ᠡᠨᠡ ᠶᠠᠪᠤᠳᠠᠯ ᠲᠡᠭᠦᠨ ᠢ᠋ ᠨᠤᠲᠠᠯᠠᠵᠢ ᠪᠠᠢᠨᠠ ᠃ ᠲᠠ ᠤᠯᠤᠰ ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ ᠰᠠᠬᠢᠯᠭᠠ ᠪᠠᠲᠤ ᠶ᠋ᠢ ᠬᠣᠣᠷᠲᠠᠢ ᠂ ᠪᠦᠳᠦᠭᠦᠯᠢᠭ ᠢ᠋ᠶ᠋ᠡᠷ ᠵᠥᠷᠢᠴᠡᠵᠦ ᠭᠦᠨᠵᠡᠭᠡᠢ ᠳᠤᠲᠠᠭᠳᠠᠯ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ ᠤᠬᠠᠭᠠᠷᠠᠬᠤ ᠶᠣᠰᠣᠲᠠᠢ ᠪᠠᠢᠨᠠ ᠃ ᠲᠠᠨ ᠤ᠋ ᠭᠠᠷᠭᠠᠭᠰᠠᠨ ᠳᠤᠲᠠᠭᠳᠠᠯ ᠤ᠋ᠨ ᠬᠣᠣᠷ ᠬᠣᠯᠪᠣᠭᠳᠠᠯ ᠢ᠋ ᠠᠪᠤᠭᠠᠳ ᠦᠵᠡᠶᠡ ᠂ ᠮᠢᠨᠦ ᠪᠡᠶᠡ ᠨᠢᠭᠡ ᠪᠠᠢᠭᠤᠯᠭᠠ ᠳ᠋ᠤ᠌ ᠨᠡᠯᠢᠶᠡᠳ ᠦᠭᠡᠢ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠠᠵᠢᠯ ᠬᠢᠳᠡᠭ ᠬᠥᠮᠦᠨ ᠂ ᠲᠡᠭᠡᠬᠦ ᠳ᠋ᠦ᠍ ᠲᠠᠨ ᠢ᠋ ᠣᠯᠵᠤ ᠬᠡᠳᠦᠨ ᠲᠥᠭᠥᠷᠢᠭ ᠬᠤᠷᠢᠶᠠᠯᠭᠠᠬᠤ ᠭᠡᠵᠦ 6 – 7 ᠤᠳᠠᠭᠠ ᠦᠷᠡ ᠠᠰᠢᠭ ᠦᠭᠡᠢ ᠡᠳᠦᠢ ᠲᠡᠳᠦᠢ ᠬᠣᠯᠠ ᠭᠠᠵᠠᠷ ᠶᠠᠪᠤᠵᠤ ᠪᠠᠢᠨᠠ ᠃ ᠡᠨᠡ ᠶᠠᠪᠤᠳᠠᠯ ᠢ᠋ ᠡᠳ᠋ ᠦ᠋ᠨ ᠵᠠᠰᠠᠭ ᠤ᠋ᠨ ᠲᠠᠯᠠ ᠪᠠᠷ ᠠᠪᠤᠭᠠᠳ ᠦᠵᠡᠶᠡ ᠂ ᠮᠠᠨ ᠤ᠋ ᠭᠠᠵᠠᠷ ᠠ᠋ᠴᠠ ᠲᠠᠨ ᠤ᠋ ᠠᠷᠲ᠋ᠧᠯᠢ ᠶ᠋ᠢ ᠬᠦᠷᠲᠡᠯᠡ ᠠᠦ᠋ᠲ᠋ᠣᠪᠦ᠋ᠰ① 9 ᠪᠠᠭᠤᠳᠠᠯ ᠶᠤᠮ ᠃ ᠡᠨᠡ ᠬᠣᠭᠣᠷᠣᠨᠳᠣ 7 ᠤᠳᠠᠭᠠ ᠢᠷᠡᠬᠦ ᠣᠴᠢᠬᠤ ᠶ᠋ᠢᠨ ᠪᠦᠭᠦᠳᠡ ᠬᠣᠷᠢ ᠣᠷᠴᠢᠮ ᠲᠥᠭᠥᠷᠢᠭ ᠣᠷᠣᠵᠤ ᠪᠠᠢᠨᠠ ᠂ 20 ᠣᠷᠴᠢᠮ ᠲᠥᠭᠥᠷᠢᠭ ᠂ ᠵᠠ ᠪᠠᠰᠠ ᠨᠡᠢᠲᠡ 6 – 7 ᠤᠳᠠᠭᠠ ᠶᠠᠪᠤᠬᠤ ᠳ᠋ᠤ᠌ ᠳᠣᠣᠷᠠ ᠬᠠᠶᠠᠭᠠᠳ ( ᠨᠢᠭᠡ ᠤᠳᠠᠭᠠ ᠭᠤᠷᠪᠠᠨ ᠴᠠᠭ ᠣᠷᠣᠨᠠ ᠭᠡᠬᠦ ᠳ᠋ᠦ᠍ 〉 ᠬᠣᠷᠢᠭᠠᠳ ᠠᠯᠪᠠᠨ ᠴᠠᠭ ᠰᠦᠢᠳᠬᠡᠭᠰᠡᠨ ᠪᠠᠢᠨᠠ ᠃ ᠡᠨᠡ ᠶᠡᠬᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠪᠠᠰᠠ ᠠᠭᠤᠯᠠ ᠰᠢᠬ ᠶᠡᠬᠡ ᠨᠢ ᠡᠰᠡ ᠪᠣᠯᠪᠠᠴᠤ ᠳᠣᠪᠣᠢᠭᠰᠠᠨ ᠪᠦᠲᠦᠭᠡᠯ ᠭᠠᠷᠭᠠᠬᠤ ᠯᠠ ᠪᠠᠢᠭᠰᠠᠨ ᠶᠤᠮ ᠳᠠ ᠭᠡᠳ ᠲᠡᠷᠡ ᠬᠥᠮᠦᠨ ᠪᠠᠰᠠ ᠲᠠᠮᠠᠬᠢ ᠪᠠᠨ ᠠᠰᠠᠭᠠᠪᠠ ᠃ ᠡᠨᠡ ᠰᠣᠨᠢᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠬᠤ ᠭᠡᠵᠦ ᠨᠡᠯᠢᠶᠡᠳ ᠬᠡᠳᠦᠨ ᠬᠥᠮᠦᠨ ᠰᠠᠩᠬᠦᠦ ᠶ᠋ᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠪᠠᠢᠯᠠ ᠃ ᠬᠥᠮᠦᠨ ᠣᠯᠠᠨ ᠪᠠᠢᠭᠠ ᠳ᠋ᠤ᠌ ᠲᠡᠷᠡ ᠬᠥᠮᠦᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠦᠭᠡᠢ ᠃ ᠬᠠᠷᠢᠨ ᠳᠤᠷᠠ ᠲᠠᠢ ᠪᠠᠢᠭᠠ ᠪᠣᠯᠤᠯᠲᠠᠢ ᠤᠯᠠᠮ ᠬᠥᠬᠢᠭᠦᠨ ᠪᠣᠯᠵᠤ ᠄
– ᠪᠢ ᠠᠯᠪᠠᠨ ᠴᠠᠭ ᠢ᠋ ᠨᠠᠷᠢᠨ ᠲᠣᠭᠠᠴᠠᠵᠤ ᠰᠤᠷᠤᠭᠰᠠᠨ ᠬᠥᠮᠦᠨ ᠶᠦᠮ ᠃ ᠠᠯᠪᠠᠨ ᠴᠠᠭ ᠬᠥᠳᠡᠯᠮᠦᠷᠢ ᠶ᠋ᠢᠨ ᠮᠢᠨᠦ᠋ᠲ ᠢ᠋ ᠶᠠᠮᠠᠷ ᠨᠢᠭᠡ ᠬᠡᠯᠪᠡᠷᠢ ᠪᠡᠷ ᠦᠷᠡᠭᠳᠡᠭᠦᠯᠬᠦ ᠂ ᠬᠡᠢᠲᠦᠭᠦᠯᠬᠦ ᠶᠠᠪᠤᠳᠠᠯ ᠢ᠋ ᠪᠢ ᠦᠵᠡᠵᠦ ᠴᠦ᠍ ᠴᠢᠳᠠᠳᠠᠭ ᠦᠭᠡᠢ ᠬᠥᠮᠦᠨ ᠂ ᠡᠢᠮᠦ ᠤᠴᠢᠷ ᠠ᠋ᠴᠠ ᠪᠢ ᠲᠠᠨ ᠤ᠋ ᠡᠨᠡ ᠳᠤᠲᠠᠭᠳᠠᠯ ᠲᠠᠢ ᠡᠪᠯᠡᠷᠡᠨ ᠥᠩᠭᠡᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠶᠦᠮ ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠪᠢ ᠲᠠᠨ ᠤ᠋ ᠡᠨᠡ ᠪᠠᠢᠭᠤᠯᠭᠠ ᠶ᠋ᠢᠨ ᠡᠷᠬᠡ ᠪᠠᠷᠢᠭᠴᠢᠳ ᠲᠤ᠌ ᠡᠦᠲᠦ ᠡᠨᠡ ᠶᠠᠪᠤᠳᠠᠯ ᠢ᠋ ᠬᠡᠯᠡᠨᠡ ᠃ ᠮᠥᠨ ᠲᠠᠨ ᠤ᠋ ᠬᠠᠷᠢᠶᠠᠯᠠᠭᠳᠠᠳᠠᠭ ᠨᠠᠮ ᠂ ᠣᠯᠠᠨ ᠨᠡᠢᠲᠡ ᠶ᠋ᠢᠨ ᠪᠠᠢᠭᠤᠯᠭᠠ ᠳ᠋ᠤ᠌ ᠮᠡᠳᠡᠭᠳᠡᠵᠦ ᠳᠠᠪᠬᠤᠷ ᠠᠷᠭᠠ ᠬᠡᠮᠵᠢᠶᠡ ᠠᠪᠤᠭᠤᠯᠤᠨᠠ ᠃
ᠲᠡᠭᠦᠨᠴᠢᠯᠡᠨ ᠪᠢ ᠰᠢᠳᠤᠷᠭᠤ ᠪᠤᠰᠤ ᠶᠠᠪᠤᠳᠠᠯ ᠲᠠᠢ ᠡᠪᠯᠡᠷᠡᠵᠦ ᠴᠢᠳᠠᠳᠠᠭ ᠦᠭᠡᠢ ᠬᠥᠮᠦᠨ ᠶᠦ᠍ᠮ ᠂ ᠨᠥᠬᠥᠷ ᠨᠢᠷᠪᠠ ᠲᠠᠨ ᠲᠠᠢ ᠤᠲᠠᠰᠤ ᠪᠠᠷ ᠶᠠᠷᠢᠬᠤ ᠭᠡᠬᠦ ᠳ᠋ᠦ᠍ 《 ᠬᠠᠨᠳᠠ ᠪᠠᠢᠨᠠ ᠂ ᠪᠠᠢᠨᠠ ᠡᠦᠲᠦ ᠢᠷᠡᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠢᠬᠤ ᠪᠣᠯᠤᠨᠠ 》 ᠭᠡᠵᠦ ᠲᠠᠨ ᠤ᠋ ᠨᠥᠬᠥᠳ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠂ ᠮᠥᠨ ᠬᠦᠷᠦᠭᠡᠳ ᠢᠷᠡᠬᠦ ᠳ᠋ᠦ᠍ 《 ᠪᠣᠢ ᠪᠣᠷ ᠬᠣᠯᠠᠳᠠᠭᠠ ᠦᠭᠡᠢ ᠣᠳᠣᠬᠠᠨ ᠣᠷᠣᠭᠠᠳ ᠢᠷᠡᠨᠡ 》 ᠭᠡᠬᠦ ᠵᠡᠷᠭᠡ ᠪᠡᠷ ᠲᠠᠨ ᠤ᠋ ᠨᠥᠬᠥᠳ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠠ᠋ᠴᠠ ᠦᠵᠡᠪᠡᠯ ᠲᠠ 9 ᠪᠠᠭᠤᠳᠠᠯ ᠬᠣᠯᠠ ᠶᠠᠪᠤᠬᠤ ᠳ᠋ᠠᠭᠠᠨ ᠨᠥᠬᠥᠳ ᠢ᠋ᠶ᠋ᠡᠨ ᠬᠠᠭᠤᠷᠴᠤ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠶᠠᠪᠤᠭᠠ ᠦᠭᠡᠢ ᠮᠡᠲᠦ ᠠᠷᠭᠠᠯᠠᠳᠠᠭ ᠵᠠᠯᠢᠲᠤ ᠡᠲᠡᠭᠡᠳ ᠮᠥᠨ ᠶᠦᠮ ᠃ ᠡᠨᠡ ᠦᠵᠡᠰᠢ ᠦᠭᠡᠢ ᠵᠠᠯᠢᠲᠤ ᠪᠠᠢᠳᠠᠯ ᠢ᠋ ᠪᠢ ᠲᠤᠢᠯ ᠠ᠋ᠴᠠ ᠵᠢᠭᠰᠢᠵᠦ ᠂ ᠶᠣᠰᠣᠲᠠᠢ ᠯᠠ ᠬᠠᠭᠤᠷᠮᠠᠴᠢ ᠳᠦᠷᠢ ᠪᠡᠷ ᠠᠯᠪᠠᠨ ᠴᠠᠭ ᠢ᠋ ᠬᠢᠮᠤᠰᠤᠯᠠᠳᠠᠭ ᠬᠤᠯᠠᠭᠠᠢᠴᠢ ᠭᠡᠵᠦ ᠦᠵᠡᠨ ᠂ ᠥᠪᠡᠷ ᠦ᠋ᠨ ᠢᠷᠭᠡᠨ ᠦ᠌ ᠬᠡᠪᠯᠡᠯ ᠨᠡᠢᠲᠡᠯᠡᠬᠦ ᠡᠷᠬᠡ ᠶ᠋ᠢ ᠡᠳ᠋ᠯᠡᠨ ᠱᠣᠭ ᠵᠢᠷᠤᠭ ᠲᠠᠢ ᠪᠠᠷ ᠰᠣᠨᠢᠨ ᠬᠡᠪᠯᠡᠯ ᠳ᠋ᠦ᠍ ᠨᠡᠢᠲᠡᠯᠡᠭᠦᠯᠬᠦ ᠪᠣᠯᠤᠨᠠ ᠭᠡᠳ ᠳᠠᠬᠢᠨ ᠲᠠᠮᠠᠬᠢ ᠪᠠᠨ ᠠᠰᠠᠭᠠᠵᠤ ᠄
– ᠵᠠ ᠢᠩᠭᠢᠭᠡᠳ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠡᠨᠡ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠂ ᠲᠠᠨ ᠤ᠋ ᠰᠡᠳᠬᠢᠭᠳᠡᠯ ᠢ᠋ ᠪᠢ ᠰᠣᠨᠣᠰᠬᠤ ᠶᠣᠰᠣᠲᠠᠢ ᠪᠠᠢᠨᠠ ᠭᠡᠵᠡᠢ ᠃ ᠨᠢᠷᠪᠠ ᠬᠠᠨᠳᠠ ᠂ ᠲᠡᠷᠡ ᠬᠥᠮᠦᠨ ᠦ᠌ ᠮᠠᠯᠠᠭᠠᠢ ᠶ᠋ᠢ ᠰᠢᠷᠳᠡᠵᠦ ᠦᠯᠦ ᠮᠡᠳᠡᠭ ᠢᠨᠢᠶᠡᠮᠰᠦᠭᠯᠡᠨ ᠰᠠᠭᠤᠪᠠ ᠃
– ᠵᠠ ᠳᠠ ᠪᠤᠰᠢᠭᠤᠯ ᠂ ᠨᠢᠭᠡᠳᠦᠭᠡᠷ ᠲᠦ᠍ ᠮᠢᠨᠦ ᠠᠰᠠᠭᠤᠯᠲᠠ ᠶ᠋ᠢ ᠬᠠᠷᠢᠭᠤᠯ ᠂ ᠬᠣᠶᠠᠳᠤᠭᠠᠷ ᠲᠤ᠌ ᠮᠥᠩᠭᠥ ᠬᠤᠷᠢᠶᠠᠵᠤ ᠠᠪᠬᠤ ᠠᠵᠢᠯ ᠳ᠋ᠠᠭᠠᠨ ᠣᠷᠣᠭᠠᠷᠠᠢ᠃ ᠴᠠᠭ ᠶᠠᠪᠤᠴᠢᠬᠠᠯᠠ ᠂ ᠴᠠᠭ ᠠᠯᠲᠠ ᠭᠡᠵᠦ ᠥᠨᠥᠬᠢ ᠬᠥᠮᠦᠨ ᠬᠡᠯᠡᠪᠡ ᠃
– ᠲᠠᠨ ᠢ᠋ ᠪᠠᠲᠤᠳᠤᠷᠵᠢ ᠶ᠋ᠢᠨ ᠳᠠᠨᠳᠠᠪ ᠭᠡᠳᠡᠭ ᠪᠢᠵᠡ ᠳᠡ ᠭᠡᠵᠦ ᠬᠠᠨᠳᠠ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠬᠥᠮᠦᠨ᠄
– ᠲᠡᠢᠮᠦ ᠠ᠋ ! ᠭᠡᠰᠡᠨ ᠢ᠋ᠶ᠋ᠡᠨ ᠭᠠᠢᠬᠠᠰᠬᠢᠵᠦ ᠲᠠ ᠨᠠᠮᠠ ᠶ᠋ᠢ ᠲᠠᠨᠢᠳᠠᠭ ᠶᠤᠮ ᠤᠤ ? ᠭᠡᠪᠡ᠃
– ᠲᠠᠨ ᠢ᠋ ᠪᠢ ᠲᠠᠨᠢᠬᠤ ᠦᠭᠡᠢ ᠪᠣᠯᠪᠠᠴᠤ ᠲᠠᠨ ᠤ᠋ ᠮᠠᠯᠠᠭᠠᠢ ᠶ᠋ᠢ ᠪᠢ ᠰᠠᠢᠨ ᠲᠠᠨᠢᠳᠠᠭ ᠪᠣᠯᠤᠭᠰᠠᠨ ᠶᠤᠮ ᠭᠡᠵᠦ ᠬᠠᠨᠳᠠ ᠲᠡᠷᠡ ᠬᠥᠮᠦᠨ ᠦ᠌ ᠮᠠᠯᠠᠭᠠᠢ ᠶ᠋ᠢ ᠵᠢᠭᠠᠵᠤ ᠬᠡᠯᠡᠬᠦ ᠳ᠋ᠦ᠍ ᠲᠠᠰᠤᠯᠭᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠥᠮᠦᠰ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠪᠠ ᠃
– ᠨᠠᠮᠠ ᠶ᠋ᠢ ᠲᠠᠨᠢᠳᠠᠭ ᠦᠭᠡᠢ ᠂ ᠮᠠᠯᠠᠭᠠᠢ ᠶ᠋ᠢ ᠮᠢᠨᠢ ᠲᠠᠨᠢᠳᠠᠭ ᠭᠡᠨᠡ ᠤᠤ ? ᠲᠠ ᠵᠡᠭᠦᠳᠦᠯᠡᠵᠦ ᠰᠣᠯᠢᠶᠠᠷᠠᠵᠤ ᠪᠠᠢᠨᠠ ᠤᠤ ? ᠪᠢᠳᠡ ᠲᠣᠭᠯᠠᠬᠤ ᠬᠡᠷᠡᠭ ᠠᠯᠠᠭᠠ ᠂ ᠠᠯᠢᠪ ᠮᠢᠨᠦ ᠠᠰᠠᠭᠤᠯᠲᠠ ᠶ᠋ᠢ ᠬᠠᠷᠢᠭᠤᠯᠤᠭᠠᠳ ᠠᠯᠢ ᠨᠥᠬᠥᠷ ᠠ᠋! ᠭᠡᠵᠦ ᠲᠠᠲᠠᠪ ᠰᠢᠷᠦᠭᠦᠰᠪᠡᠯ ᠬᠠᠨᠳᠠ ᠄
– ᠵᠠ ᠪᠢ ᠲᠠᠨ ᠤ᠋ ᠨᠢᠭᠡᠳᠦᠭᠡᠷ ᠠᠰᠠᠭᠤᠯᠲᠠ ᠶ᠋ᠢ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠬᠤ ᠶᠤᠮ ᠪᠢᠯᠡ ᠳᠠ ᠃ ᠬᠣᠶᠠᠷ ᠬᠡᠷᠢᠶᠡ ᠪᠡᠶᠡ ᠪᠠᠶᠠᠨ ᠤ᠋ ᠪᠠᠨ ᠬᠠᠷᠠ ᠶ᠋ᠢ ᠭᠠᠢᠬᠠᠪᠠ ᠭᠡᠭᠴᠢ ᠪᠣᠯᠵᠤ ᠪᠠᠢᠬᠤ ᠰᠢᠪ ᠳᠡ ᠃ ᠲᠠᠨ ᠢ᠋ ᠪᠢ 6 ᠬᠣᠨᠣᠭ ᠴᠢᠷᠦᠭᠳᠡᠭᠦᠯᠦᠭᠰᠡᠨ ᠨᠢ ᠦᠨᠡᠨ ᠂ ᠭᠡᠪᠡᠴᠦ ᠲᠠ ᠪᠠᠰᠠ ᠨᠠᠮᠠ ᠶ᠋ᠢ 6 ᠬᠣᠨᠣᠭ ᠴᠢᠷᠦᠭᠳᠡᠭᠦᠯᠦᠭᠰᠡᠨ ᠰᠢᠦ ᠳᠡ ᠃ ᠪᠢ ᠥᠩᠭᠡᠷᠡᠭᠰᠡᠨ ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ 6 ᠡᠳᠦᠷ ᠲᠠᠨ ᠲᠠᠢ ᠠᠭᠤᠯᠵᠠᠬᠤ ᠭᠡᠵᠦ ᠲᠠᠨ ᠤ᠋ ᠠᠯᠪᠠᠨ ᠲᠠᠰᠤᠯᠭᠠᠨ ᠳ᠋ᠤ᠌ 6 ᠤᠳᠠᠭᠠ ᠣᠴᠢᠬᠤ ᠳ᠋ᠠᠭᠠᠨ ᠲᠠᠨ ᠤ᠋ ᠮᠠᠯᠠᠭᠠᠢ ᠲᠠᠢ ᠰᠠᠢᠨ ᠲᠠᠨᠢᠯᠴᠠᠭᠰᠠᠨ ᠃ ᠪᠢ ᠳᠡᠭᠦᠦ ᠪᠡᠨ ᠠᠵᠢᠯ ᠳ᠋ᠤ᠌ ᠣᠷᠣᠭᠤᠯᠬᠤ ᠭᠡᠵᠦ ᠲᠠᠨ ᠤ᠋ ᠪᠠᠢᠭᠤᠯᠭᠠ ᠳ᠋ᠤ᠌ ᠣᠷᠣᠨ ᠲᠣᠭᠠ ᠪᠠᠢᠨᠠ ᠭᠡᠬᠦ ᠪᠡᠷ ᠨᠢ ᠲᠡᠭᠡᠵᠦ ᠣᠴᠢᠵᠤ ᠪᠠᠢᠭᠰᠠᠨ ᠶᠤᠮ ᠃ ᠲᠠᠨ ᠤ᠋ ᠪᠠᠢᠭᠤᠯᠭᠠ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠰᠢᠨᠡ ᠬᠦᠴᠦᠨ ᠦ᠌ ᠠᠰᠠᠭᠤᠳᠠᠯ ᠡᠷᠬᠢᠯᠡᠭᠰᠡᠨ ᠳᠠᠨᠳᠠᠪ ᠭᠡᠳᠡᠭ ᠬᠥᠮᠦᠨ ᠡᠨᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠪᠠᠢᠳᠠᠭ ᠶᠤᠮ ᠂ ᠰᠢᠷᠡᠭᠡ ᠨᠢ ᠡᠨᠡ ᠪᠠᠢᠨᠠ ᠭᠡᠵᠦ ᠬᠥᠮᠦᠨ ᠵᠢᠭᠠᠵᠤ ᠦᠭᠭᠦᠭᠰᠡᠨ ᠶᠦᠮ ᠂ ᠲᠡᠷᠡ ᠬᠥᠮᠦᠨ ᠪᠣᠢ ᠤᠤ ? ᠭᠡᠬᠦ ᠪᠡᠷ ᠪᠣᠢ ᠂ ᠪᠣᠢ ᠭᠡᠳᠡᠭ ᠪᠠᠢᠯᠠ ᠂ ᠮᠥᠳ ᠢᠷᠡᠬᠦ ᠪᠣᠯ ᠤᠤ ? ᠭᠡᠬᠦ ᠪᠡᠷ ᠣᠳᠣᠬᠠᠨ ᠣᠷᠣᠭᠠᠳ ᠢᠷᠡᠨᠡ ᠭᠡᠵᠦ ᠲᠠᠨ ᠲᠠᠢ ᠨᠢᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠠᠵᠢᠯᠯᠠᠳᠠᠭ ᠬᠥᠮᠦᠨ ᠬᠡᠯᠡᠳᠡᠭ ᠪᠠᠢᠯᠠ ᠃ ᠳᠠᠷᠠᠭᠠ ᠳᠠᠷᠠᠭᠠ ᠶ᠋ᠢᠨ ᠣᠴᠢᠯᠲᠠ ᠳ᠋ᠤ᠌ ᠲᠠ ᠮᠥᠨ ᠡᠵᠡᠭᠦᠢ ᠪᠠᠢᠭᠰᠠᠨ ᠲᠤᠯᠠ ᠲᠠᠨ ᠤ᠋ ᠨᠢᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠠᠵᠢᠯᠯᠠᠳᠠᠭ ᠬᠥᠮᠦᠨ ᠲᠠᠨᠲᠠᠪ ᠬᠣᠯᠠᠳᠠᠭᠠ ᠦᠭᠡᠢ ᠂ ᠮᠠᠯᠠᠭᠠᠢ ᠨᠢ ᠲᠡᠷᠡ ᠪᠠᠢᠨᠠ ᠭᠡᠵᠦ ᠡᠯᠭᠦᠭᠦᠷ ᠲᠦ᠍ ᠪᠠᠢᠭᠰᠠᠨ ᠲᠠᠨ ᠤ᠋ ᠮᠠᠯᠠᠭᠠᠢ ᠶ᠋ᠢ ᠵᠢᠭᠠᠵᠤ ᠦᠭᠭᠦᠭᠰᠡᠨ ᠶᠦᠮ᠃ ᠲᠡᠭᠡᠭᠡᠳ ᠪᠢ ᠲᠠᠨ ᠤ᠋ ᠮᠠᠯᠠᠭᠠᠢ ᠲᠠᠢ ᠲᠠᠨᠢᠯ ᠪᠣᠯᠤᠭᠰᠠᠨ ᠶᠤᠮ ᠳᠠ ᠭᠡᠬᠦ ᠳ᠋ᠦ᠍ ᠂ ᠲᠠᠰᠤᠯᠭᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠥᠮᠦᠰ ᠬᠥᠭᠡᠷᠦᠯᠳᠦᠯᠡ ᠃ ᠲᠠᠨᠲᠠᠪ ᠤ᠋ᠨ ᠴᠢᠷᠠᠢ ᠬᠥᠬᠡᠷᠡᠨ ᠬᠠᠷᠠᠯᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠠᠰᠠ ᠬᠢ ᠬᠢ ᠬᠢ ᠭᠡᠵᠦ ᠬᠤᠳᠠᠯ ᠢᠨᠢᠶᠡᠭᠡᠳ ᠄
– ᠦᠭᠡᠢ ᠮᠥᠨ ᠬᠠᠴᠢᠨ ᠶᠤᠮ ᠳᠠ ᠂ ᠵᠠ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤᠪ ᠂ ᠬᠠᠨᠳᠠ ᠮᠢᠨᠢ ᠬᠣᠶᠠᠳᠤᠭᠠᠷ ᠠᠰᠠᠭᠤᠯᠲᠠ ᠳ᠋ᠠᠭᠠᠨ ᠣᠷᠣᠶᠠ ᠂ ᠪᠢ ᠮᠥᠩᠭᠥ ᠪᠡᠨ ᠬᠤᠷᠢᠶᠠᠯᠭᠠᠶᠠ ᠭᠡᠪᠡ ᠃
ᠦᠭᠡᠢ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤᠪ ᠪᠢᠰᠢ ᠰᠢᠦ ᠂ ᠪᠢ ᠲᠠᠨ ᠲᠠᠢ ᠤᠲᠠᠰᠤ ᠪᠠᠷ ᠶᠠᠷᠢᠬᠤ ᠭᠡᠵᠦ ᠣᠷᠣᠯᠳᠣᠳᠠᠭ ᠯᠠ ᠪᠠᠢᠭᠰᠠᠨ ᠃ ᠭᠡᠪᠡᠴᠦ ᠲᠠᠨ ᠢ᠋ ᠣᠳᠣᠬᠠᠨ ᠳ᠋ᠠᠭᠠᠨ ᠥᠷᠥᠭᠡᠨ ᠳ᠋ᠡᠭᠡᠨ ᠠᠯᠠᠭᠠ ᠂ ᠭᠠᠳᠠᠭᠰᠢ ᠪᠠᠨ ᠶᠠᠪᠤᠭᠠ ᠦᠭᠡᠢ ᠁ ᠬᠣᠯᠠᠳᠠᠭᠠ ᠦᠭᠡᠢ ᠂ ᠡᠦᠲᠦ ᠯᠡ ᠶᠠᠪᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠠᠭᠤᠯᠵᠠᠨᠠ ᠭᠡᠵᠦ ᠬᠥᠮᠦᠨ ᠬᠡᠯᠡᠳᠡᠭ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠯᠡ ᠠᠦ᠋ᠲ᠋ᠣᠪᠦ᠋ᠰ ᠢ᠋ᠶ᠋ᠡᠷ ᠮᠥᠨ ᠯᠡ 9 ᠪᠠᠭᠤᠳᠠᠯ ᠠᠶᠠᠯᠠᠳᠠᠭ᠃ 6 ᠬᠣᠨᠣᠭ ᠠᠦ᠋ᠲ᠋ᠣᠪᠦ᠋ᠰᠳᠠᠬᠤ ᠳ᠋ᠤ᠌ 20 ᠰᠢᠬᠠᠮ ᠲᠥᠭᠥᠷᠢᠭ ᠣᠷᠣᠯᠠ ᠂ ᠵᠠ ᠮᠥᠨ ᠨᠢᠭᠡ ᠤᠳᠠᠭᠠ ᠶᠠᠪᠤᠬᠤ ᠳ᠋ᠤ᠌ ᠪᠠᠷᠤᠭ ᠯᠠ ᠭᠤᠷᠪᠠᠨ ᠴᠠᠭ ᠣᠷᠣᠳᠠᠭ ᠪᠠᠢᠬᠠ ᠠ᠋᠂ ᠠᠯᠪᠠᠨ ᠴᠠᠭ ᠠ᠋ᠴᠠ ᠵᠢᠷᠭᠤᠭᠠ ᠳᠠᠬᠢᠨ 3 ᠴᠠᠭ ᠱᠣᠭᠯᠠᠬᠤ ᠪᠠᠷ 18 ᠴᠠᠭ ᠪᠣᠯᠤᠨᠠ ᠪᠢᠵᠡ ᠳᠡ ᠭᠡᠵᠦ ᠬᠠᠨᠳᠠ ᠬᠡᠯᠡᠪᠡ᠃
– ᠶᠠᠷᠢᠬᠤ ᠦᠭᠡᠢ ᠂ ᠲᠠ ᠪᠢᠳᠡ ᠬᠣᠶᠠᠷ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠠᠳᠠᠯᠢᠬᠠᠨ ᠴᠢᠷᠦᠭᠳᠡᠭᠦᠯᠦᠭᠰᠡᠨ ᠪᠠᠢᠨᠠ ᠂ ᠪᠢ ᠲᠠᠨ ᠢ᠋ ᠰᠤᠷᠠᠭᠯᠠᠭᠠᠳ ᠠᠳᠠ ᠢᠷᠡᠬᠦ ᠳ᠋ᠦ᠍ ᠲᠠ ᠨᠠᠮᠠ ᠶ᠋ᠢ ᠰᠤᠷᠠᠭᠯᠠᠭᠠᠳ ᠮᠠᠨ ᠤ᠋ ᠠᠵᠢᠯ ᠳᠡᠭᠡᠷᠡ ᠣᠴᠢᠵᠤ ᠪᠠᠢᠵᠠᠢ ᠃ ᠬᠡᠭ ᠲᠡᠭᠡᠨ ᠴᠦ᠍ ᠪᠣᠢ ᠭᠣᠩ ᠳ᠋ᠠᠭᠠᠨ ᠴᠤ᠌ ᠪᠣᠢ ᠭᠡᠳᠡᠭ ᠪᠣᠯᠴᠢᠬᠠᠵᠤ ᠰᠢᠦ ᠳᠡ ᠃ ᠲᠡᠭᠡᠭᠡᠳ ᠶᠡᠷᠦ ᠨᠢ ᠬᠡᠨ ᠬᠡᠨ ᠳ᠋ᠡᠭᠡᠨ ᠭᠣᠮᠣᠳᠠᠬᠤ ᠶᠠᠪᠤᠳᠠᠯ ᠦᠭᠡᠢ ᠂ ᠥᠷᠢ ᠰᠢᠷᠢ ᠦᠭᠡᠢ ᠪᠣᠯᠤᠭᠠ ᠰᠢᠪ ᠳᠡ ᠭᠡᠵᠦ ᠳᠠᠨᠳᠠᠪ ᠪᠢᠯᠳᠠᠤᠴᠢᠯᠠᠭᠰᠠᠨ ᠪᠠᠢᠳᠠᠯ ᠢᠯᠡ ᠮᠠᠭᠠᠰᠠᠭᠠᠨᠠᠨ ᠬᠡᠯᠡᠵᠡᠢ ᠃ ᠡᠭᠦᠨ ᠢ᠋ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠨᠢᠭᠡ ᠠᠵᠢᠯᠴᠢᠨ ᠄
– ᠲᠠ ᠬᠣᠶᠠᠷ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ ᠃ ᠥᠷᠢ ᠰᠢᠷᠢ ᠦᠭᠡᠢ ᠪᠣᠯᠵᠤ ᠂ ᠣᠯᠠᠨ ᠲᠦᠮᠡᠨ ᠦ᠌ ᠡᠷᠬᠡ ᠠᠰᠢᠭ ᠲᠠ ᠬᠣᠶᠠᠷ ᠠ᠋ᠴᠠ ᠠᠪᠯᠢᠭᠠ ᠲᠠᠢ ᠦᠯᠡᠳᠡᠬᠦ ᠨᠢ ᠬᠠᠮᠢᠶᠠ ᠦᠭᠡᠢ ᠶᠦᠮ ᠤᠤ ? ᠥᠨᠥᠳᠥᠷ ᠴᠢᠨᠢ 10 ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ 30 ᠭᠡᠬᠦ ᠳ᠋ᠦ᠍ ᠠᠯᠢ ᠴᠤ᠌ ᠭᠠᠵᠠᠷ ᠤ᠋ᠨ ᠴᠠᠯᠢᠩ ᠪᠠᠭᠤᠭᠰᠠᠨ ᠪᠠᠢᠬᠠ ᠭᠡᠪᠡ᠃
ᠲᠠᠨᠳᠠᠪ ᠨᠡᠯᠢᠶᠡᠳ ᠢᠷᠪᠠᠭᠠᠷ ᠪᠠᠢᠳᠠᠯ ᠲᠠᠢ ᠲᠡᠷᠡ ᠠᠵᠢᠯᠴᠢᠨ ᠢ᠋ ᠬᠠᠷᠠᠭᠠᠳ ᠄
– ᠬᠥᠨᠳᠡᠯᠡᠨ ᠡᠴᠡ ᠬᠥᠯ ᠢ᠋ᠶ᠋ᠡᠨ ᠭᠡᠭᠴᠢ ᠪᠡᠷ ᠲᠠ ᠲᠡᠭᠡᠭᠡᠳ ᠶᠠᠭᠤ ᠬᠢᠬᠦ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ ? ᠭᠡᠵᠦ ᠬᠥᠮᠥᠰᠬᠡ ᠵᠠᠩᠭᠢᠳᠪᠠ᠃ ᠵᠠᠯᠠᠭᠤ ᠠᠵᠢᠯᠴᠢᠨ ᠲᠣᠯᠣᠭᠠᠢ ᠪᠠᠨ ᠨᠢᠭᠡ ᠮᠠᠭᠠᠵᠢᠵᠤ ᠵᠠᠯᠢᠲᠠᠢ ᠢᠨᠢᠶᠡᠪᠬᠢᠯᠡᠭᠡᠳ ᠄
– ᠦᠭᠡᠢ ᠳᠠᠷᠤᠭᠠ ᠠ᠋ ᠂ ᠮᠠᠨ ᠤ᠋ ᠬᠢᠨ ᠤᠷᠵᠢᠳᠤᠷ ᠴᠠᠯᠢᠩ ᠢ᠋ᠶ᠋ᠠᠨ ᠠᠪᠤᠭᠰᠠᠨ ᠃ ᠮᠠᠨ ᠤ᠋ ᠬᠠᠨᠳᠠ ᠴᠤ᠌ ᠪᠠᠰᠠ ᠯᠠ ᠠᠪᠤᠭᠰᠠᠨ᠂ ᠲᠠ ᠴᠦ᠍ ᠪᠠᠰᠠ ᠠᠪᠤᠭᠠ ᠯᠠ ᠪᠢᠵᠡ ᠳᠡ ᠃ ᠪᠠᠰᠠ ᠲᠠᠨ ᠤ᠋ ᠮᠠᠯᠠᠭᠠᠢ ᠴᠤ᠌ ᠭᠡᠰᠡᠨ ᠴᠠᠯᠢᠩ ᠢ᠋ᠶ᠋ᠠᠨ ᠠᠪᠤᠭᠰᠠᠨ ᠪᠠᠢᠬᠠ ᠳᠠ ᠭᠡᠬᠦ ᠳ᠋ᠦ᠍ ᠬᠥᠮᠦᠰ ᠬᠥᠬᠥᠷᠡᠯᠳᠦᠪᠡ ᠃
– – – –
① ᠬᠥᠮᠦᠨ ᠵᠥᠭᠡᠭᠡᠬᠦ ᠨᠡᠢᠲᠡ ᠶ᠋ᠢᠨ ᠮᠠᠰᠢᠨ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃