ᠰᠠᠭᠤᠳᠠᠭ ᠭᠦᠶᠦᠳᠡᠭ ᠬᠣᠶᠠᠷ – ᠯ᠂ ᠪᠠᠳᠠᠷᠴᠢ Суудаг гүйдэг хоёр – Л ᠂ Бадарч
317ᠰᠠᠭᠤᠳᠠᠭ ᠭᠦᠶᠦᠳᠡᠭ ᠬᠣᠶᠠᠷ
( ᠬᠣᠱᠣᠩ ᠦᠭᠦᠯᠡᠯᠭᠡ )
ᠨᠢᠭᠡ ᠪᠠᠢᠭᠤᠯᠭᠠ ᠶ᠋ᠢᠨ ᠨᠢᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠣᠶᠠᠷ ᠠᠵᠢᠯᠲᠠᠨ ᠰᠠᠭᠤᠵᠤ ᠠᠵᠢᠯᠯᠠᠳᠠᠭ ᠪᠠᠢᠪᠠ᠃ ᠨᠢᠭᠡ ᠨᠢ ᠨᠢᠪᠤ ᠂ ᠨᠥᠭᠥᠭᠡ ᠨᠢ ᠪᠠᠢᠴᠠᠭᠠᠭᠴᠢ ᠶᠤᠮ ᠰᠠᠨᠵᠠᠢ᠃ ᠪᠠᠢᠴᠠᠭᠠᠭᠴᠢ ᠶ᠋ᠢ ᠰᠠᠭᠤᠷᠢ ᠭᠡᠨᠡ᠂ ᠰᠠᠭᠤᠷᠢ ᠲᠠᠢ ᠡᠷᠡ ᠪᠠᠢᠵᠤ ᠳᠠ᠃ ᠨᠢᠪᠤ ᠶ᠋ᠢ ᠰᠢᠭᠤᠷᠬᠠᠢ ᠭᠡᠨᠡ᠂ ᠰᠢᠭᠤᠷᠬᠠᠢ ᠡᠷᠡ ᠪᠠᠢᠵᠤ᠂ ᠡᠨᠡ ᠬᠣᠶᠠᠷ ᠥᠷᠯᠥᠭᠡ ᠠᠵᠢᠯ ᠳ᠋ᠠᠭᠠᠨ ᠵᠡᠷᠭᠡ ᠢᠷᠡᠵᠦ ᠦᠵᠡᠭᠡ ᠦᠭᠡᠢ ᠶᠦᠮ ᠪᠠᠢᠵᠠᠢ᠃ ᠲᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠥᠷᠯᠥᠭᠡ ᠬᠡᠨ ᠰᠡᠭᠦᠯᠳᠡᠵᠦ ᠢᠷᠡᠭᠰᠡᠨ ᠨᠢ ᠲᠡᠷᠢᠭᠦᠯᠡᠵᠦ ᠢᠷᠡᠭᠰᠡᠨ ᠳ᠋ᠡᠭᠡᠨ ᠣᠯᠠᠨ ᠳᠠᠬᠢᠨ ᠪᠥᠬᠥᠢᠨ ᠮᠡᠨᠳᠦᠯᠡᠳᠡᠭ ᠵᠠᠩᠰᠢᠯ ᠲᠠᠢ᠃ ᠲᠡᠷᠡ ᠨᠢᠭᠡ ᠥᠷᠯᠥᠭᠡ ᠰᠠᠭᠤᠷᠢ ᠨᠢ 9 ᠴᠠᠭ ᠲᠠᠢ ᠣᠷᠣᠯᠳᠣᠭᠠᠳ ᠠᠮᠢᠰᠬᠤᠭᠠᠳᠠᠭᠰᠠᠭᠠᠷ ᠠᠵᠢᠯ ᠳ᠋ᠠᠭᠠᠨ ᠢᠷᠡᠭᠡᠳ ᠪᠦᠷᠢᠳᠬᠡᠭᠴᠢ ᠳ᠋ᠦ᠍ ᠣᠴᠢᠵᠤ᠄
ᠰᠠᠭᠤᠷᠢ ᠰᠢᠭᠤᠷᠬᠠᠢ ᠬᠣᠶᠠᠷ ᠶᠠᠭ 9 ᠴᠠᠭ ᠲᠤ᠌ ᠢᠷᠡᠯᠡ ᠭᠡᠬᠦ ᠳ᠋ᠦ᠍ ᠴᠠᠭᠠᠰᠤᠨ ᠠ᠋ᠴᠠ ᠨᠢᠳᠦ ᠪᠡᠨ ᠰᠠᠯᠭᠠᠳᠠᠭ ᠦᠭᠡᠢ ᠪᠦᠷᠢᠳᠬᠡᠭᠴᠢ ᠰᠠᠭᠤᠷᠢ 9᠄00᠂ ᠰᠢᠭᠤᠷᠬᠠᠢ 9᠄00 ᠭᠡᠵᠦ ᠪᠦᠷᠢᠳᠬᠡᠪᠡ᠃ ᠶᠢᠰᠦ ᠭᠤᠴᠢ ᠶ᠋ᠢᠨ ᠦᠶᠡ ᠪᠡᠷ ᠰᠢᠭᠤᠷᠬᠠᠢ ᠭᠤᠸᠠᠢ ᠰᠢᠭᠤᠷᠬᠠᠢᠯᠠᠨ ᠢᠷᠡᠭᠡᠳ ᠣᠯᠠᠨ ᠳᠠᠬᠢᠨ ᠪᠥᠬᠥᠯᠵᠡᠨ《 ᠠᠮᠤᠷ ᠢ᠋ ᠡᠷᠢᠶᠡ》 ᠭᠡᠵᠦ ᠰᠠᠭᠤᠷᠢ ᠲᠠᠢ ᠮᠡᠨᠳᠦᠯᠡᠭᠰᠡᠨ ᠨᠢ 《ᠨᠠᠢᠵᠠ ᠵᠢ ᠪᠡᠨ ᠪᠦᠷᠢᠳᠬᠡᠭᠦᠯᠵᠦ ᠠᠮᠵᠢᠭᠠ ᠪᠢᠵᠡ》 ᠭᠡᠰᠡᠨ ᠶᠣᠭᠲᠠ ᠰᠠᠨᠠᠭᠠ ᠪᠢᠯᠡ᠃ 《 ᠠᠮᠤᠷ ᠢ ᠡᠷᠢᠶᠡ》 ᠭᠡᠵᠦ ᠰᠠᠭᠤᠷᠢ ᠶ᠋ᠢᠨ ᠬᠠᠷᠢᠭᠤᠯᠤᠭᠰᠠᠨ ᠨᠢ《 ᠨᠠᠢᠵᠠ ᠮᠢᠨᠢ ᠰᠠᠨᠠᠭᠠ ᠠᠮᠤᠷ》 ᠭᠡᠰᠡᠨ ᠤᠳᠬᠠ ᠲᠠᠢ ᠪᠠᠢᠵᠠᠢ᠃
ᠰᠢᠭᠤᠷᠬᠠᠢ ᠦᠵᠦᠭ ᠬᠠᠷᠠᠨᠳᠠ ᠪᠠᠯᠠᠯᠤᠭᠤᠷ ᠱᠤᠭᠤᠮ ᠠ᠋ᠴᠠ ᠠᠪᠤᠭᠠᠳ ᠲᠣᠮᠣ ᠰᠤᠸᠠᠮᠫᠠᠨ ᠂ ᠲᠣᠭᠠᠨ ᠤ᠋ ᠮᠠᠰᠢᠨ᠂ ᠬᠠᠪᠲᠠᠰᠤ ᠲᠠᠢ ᠳᠠᠩᠰᠠ ᠪᠢᠴᠢᠭ ᠭᠠᠷᠭᠠᠵᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠡᠨ ᠦᠷᠦᠭᠰᠡᠨ ᠨᠢ ᠪᠠᠢᠳᠠᠯ ᠮᠠᠰᠢ ᠰᠦᠷ ᠲᠡᠢ᠂ ᠰᠠᠭᠤᠷᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠡᠨ ᠣᠯᠠᠨ ᠶᠠᠭᠤᠮᠠ ᠳᠡᠯᠭᠡᠬᠦ ᠳᠤᠷᠠ ᠦᠭᠡᠢ᠂ ᠬᠠᠷᠢᠨ ᠦᠨᠡᠰᠦᠨ ᠤ ᠰᠠᠪᠠ ᠬᠣᠶᠠᠷ ᠭᠤᠷᠪᠠ ᠶ᠋ᠢ ᠵᠡᠷᠬᠡᠴᠠᠭᠦᠯᠵᠦ ᠲᠠᠯᠪᠢᠭᠠᠳ ᠬᠠᠢᠷᠴᠠᠭ ᠫᠠᠫᠢᠷᠤᠰ ( ᠴᠠᠭᠠᠰᠤᠨ ᠲᠠᠮᠠᠬᠢ) ᠨᠡᠭᠡᠭᠡᠵᠦ ᠪᠡᠯᠡᠳᠬᠡᠪᠡ᠃ ᠰᠠᠭᠤᠷᠢ ᠶ᠋ᠢ ᠬᠥᠳᠡᠯᠵᠦ ᠶᠠᠳᠠᠵᠤ ᠪᠠᠢᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠰᠢᠭᠤᠷᠬᠠᠢ ᠨᠠᠢ᠍ᠮᠠᠨ ᠲᠠᠰᠤᠯᠭᠠ ᠶ᠋ᠢ ᠨᠠᠭᠠᠰᠢ ᠴᠠᠭᠠᠱᠢ ᠨᠢ ᠰᠦᠯᠵᠢᠭᠡᠳ ᠠᠷᠪᠢᠨ ᠰᠣᠨᠢᠨ ᠶᠠᠭᠤᠮᠠ ᠰᠣᠨᠣᠰᠴᠤ ᠢᠷᠡᠯᠡ᠃ ᠵᠠ ᠶᠠᠭᠤ ᠶᠠᠭᠤ ᠮᠡᠳᠡᠭᠡ ᠪᠣᠢ ᠭᠡᠲᠡᠯᠡ᠂ ᠨᠠᠢᠳᠠᠨ ᠤ᠋ ᠲᠤᠰᠢᠶᠠᠯ ᠳᠠᠪᠰᠢᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠵᠦ᠂ ᠨᠠᠮᠰᠠᠷᠠᠢ ᠶ᠋ᠢᠨ ᠠᠮᠠᠷᠠᠯᠲᠠ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠵᠦ᠂ ᠳᠠᠮᠪᠢ ᠶ᠋ᠢᠨ ᠨᠠᠢᠷ ᠮᠠᠷᠭᠠᠰᠢ ᠪᠣᠯᠬᠤ ᠶ᠋ᠢ ᠮᠡᠳᠡᠵᠦ᠂ ᠳᠠᠷᠤᠭᠠ ᠶ᠋ᠢᠨ ᠮᠠᠰᠢᠨ ᠬᠡᠭᠡᠷᠡ ᠰᠠᠭᠤᠭᠰᠠᠨ ᠢ᠋ ᠮᠡᠳᠡᠵᠦ᠂ ᠴᠠᠯᠢᠩ ᠤ᠋ᠨ ᠴᠧᠰᠧ( ᠪᠦᠷᠢᠳᠬᠡᠯ) ᠪᠡᠯᠡᠨ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠵᠦ᠂ ᠴᠡᠮᠪᠡ ᠶ᠋ᠢᠨ ᠭᠡᠷᠭᠡᠢ ᠵᠢᠷᠮᠦᠰᠦᠨ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠵᠦ ᠳᠠ᠃
ᠡᠨᠡ ᠮᠡᠳᠡᠭᠡ ᠶ᠋ᠢ ᠰᠠᠭᠤᠷᠢ ᠳ᠋ᠠᠭᠠᠨ ᠬᠡᠯᠡᠭᠡᠳ ᠰᠢᠭᠤᠷᠬᠠᠢ ᠭᠤᠸᠠᠢ《 ᠬᠣᠯᠠᠳᠠᠭᠠ ᠦᠭᠡᠢ》 ᠭᠡᠳᠡᠭ ᠨᠡᠷᠡ ᠲᠡᠢ ᠠᠶᠠᠨ ᠳ᠋ᠠᠭᠠᠨ ᠮᠣᠷᠳᠠᠯᠠ᠂ ᠬᠣᠶᠠᠷ ᠳᠡᠯᠭᠡᠭᠦᠷ ᠳᠠᠮᠵᠢᠨ᠂ ᠨᠢᠭᠡ ᠠᠷᠲ᠋ᠧᠯᠢ( ᠬᠣᠷᠰᠢᠶᠠ) ᠳ᠋ᠤ᠌ ᠣᠴᠢᠵᠤ ᠮᠠᠯᠠᠭᠠᠢ ᠵᠠᠬᠢᠶᠠᠯᠠᠭᠠᠳ ᠴᠠᠭᠴᠢᠨ ᠢ᠋ᠶ᠋ᠠᠷ ᠣᠷᠣᠭᠠᠳ ᠵᠢᠷᠤᠭᠴᠢᠨ ᠢ᠋ᠶ᠋ᠠᠷ ᠳᠠᠮᠵᠢᠭᠠᠳ ᠦᠰᠦᠴᠢᠨ ᠳ᠋ᠦ᠍ ᠬᠦᠷᠬᠦ ᠪᠡᠷ ᠭᠦᠶᠦᠵᠦ ᠭᠠᠷᠴᠠᠢ᠃ ᠡᠨᠡ ᠬᠣᠭᠣᠷᠣᠨᠳᠣ ᠰᠠᠭᠤᠷᠢ ᠭᠤᠸᠠᠢ ᠰᠠᠭᠤᠷᠢᠨ ᠠ᠋ᠴᠠ ᠪᠠᠨ ᠬᠣᠪᠬᠣᠷᠠᠯ ᠦᠭᠡᠢ ᠠᠯᠪᠠᠨ ᠮᠡᠳᠡᠭᠡ ᠱᠠᠭᠠᠷᠳᠠᠨ ᠠᠷᠪᠠᠭᠠᠳ ᠤᠳᠠᠭᠠ ᠤᠲᠠᠰᠤᠳᠠᠭᠠᠳ ᠠᠮᠠ ᠵᠢᠭᠠᠪᠤᠷᠢ ᠥᠭᠬᠦ ᠭᠡᠵᠦ ᠲᠠᠪᠤᠨ ᠳᠠᠬᠢᠨ ᠤᠲᠠᠰᠤᠳᠠᠭᠠᠳ᠂ ᠠᠷᠪᠠᠭᠠᠳ ᠫᠠᠫᠢᠷᠤᠰ ᠪᠠᠭᠠᠭᠢᠭᠤᠯᠵᠤ ᠠᠯᠪᠠᠨ ᠲᠠᠰᠤᠯᠭᠠ ᠪᠠᠨ ᠤᠨᠢᠶᠠᠷᠲᠤᠭᠤᠯᠵᠦ ᠪᠠᠢᠵᠠᠢ᠃
ᠭᠣᠩᠭᠣᠷ ᠭᠡᠳᠡᠭ ᠬᠥᠮᠦᠨ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠡᠳ ᠨᠢᠪᠤ ᠰᠢᠭᠤᠷᠬᠠᠢ ᠶ᠋ᠢ ᠰᠤᠷᠠᠭᠯᠠᠭᠰᠠᠨ ᠳ᠋ᠤ᠌《 ᠣᠳᠣᠬᠠᠨ ᠳ᠋ᠠᠭᠠᠨ ᠠᠯᠠᠭᠠ᠂ ᠣᠷᠣᠭᠠᠳ ᠢᠷᠡᠨᠡ᠂ ᠤᠳᠠᠬᠤ ᠦᠭᠡᠢ》 ᠭᠡᠵᠦ ᠰᠠᠭᠤᠷᠢ ᠬᠠᠷᠢᠭᠤᠯᠤᠯᠠ᠃ ᠭᠣᠩᠭᠣᠷ ᠭᠤᠴᠢᠨ ᠮᠢᠨᠦ᠋ᠲ ᠬᠦᠯᠢᠶᠡᠭᠡᠳ《 ᠵᠠ ᠶᠠᠭᠠᠬᠢᠳᠠᠭ ᠪᠢᠯᠡ᠂ ᠬᠣᠢᠲᠤᠬᠢ ᠠᠵᠢᠯ ᠬᠡᠴᠡᠭᠦᠳᠡᠯᠡ》 ᠭᠡᠬᠦ ᠳ᠋ᠦ᠍᠂《 ᠰᠠᠭᠤᠷᠢ ᠭᠠᠳᠠᠭᠤᠷ ᠠᠵᠢᠯ ᠳ᠋ᠤ᠌ ᠶᠠᠪᠤᠴᠢᠬᠠᠪᠠ ᠪᠣᠯᠤᠯᠲᠠᠢ᠂ ᠭᠠᠢᠭᠤᠢ ᠲᠠ ᠣᠳᠣ ᠪᠤᠴᠠᠭᠰᠠᠨ ᠨᠢ ᠳᠡᠭᠡᠷᠡ᠂12 ᠴᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠢᠷᠡᠭᠰᠡᠨ ᠨᠢ ᠳᠡᠭᠡᠷᠡ》 ᠭᠡᠯᠡ᠃ ᠭᠣᠩᠭᠣᠷ ᠢ᠋ ᠭᠠᠷᠤᠭᠰᠠᠨ ᠳᠣᠣᠷᠠ ᠰᠢᠭᠤᠷᠬᠠᠢ ᠱᠤᠤᠭᠢᠨ ᠣᠷᠣᠵᠤ ᠢᠷᠡᠭᠡᠳ ᠬᠣᠢᠲᠤ ᠠᠷᠲ᠋ᠧᠯᠢ ᠳ᠋ᠦ᠍ ᠺᠣᠰᠲ᠋ᠢᠶᠣᠮ( ᠡᠸᠦ᠋ᠷᠦᠫᠡ ᠬᠤᠪᠴᠠᠰᠤ) ᠵᠠᠬᠢᠶᠠᠯᠠᠪᠠᠯ ᠬᠢᠮᠳᠠ ᠶᠤᠮ᠂ ᠤᠷᠲᠤ ᠳᠡᠯᠭᠡᠭᠦᠷ ᠲᠦ᠍ ᠤᠰᠤᠨ ᠤ᠋ ᠭᠤᠲᠤᠯ ᠡᠯᠪᠡᠭ ᠪᠠᠢᠨᠠ᠃ ᠪᠠᠷᠠᠭᠤᠨ ᠮᠤᠬᠤᠯᠠᠭ ᠲᠤ᠌ ᠪᠠᠷᠠᠭᠠᠨ ᠤ᠋ ᠰᠠᠪᠤᠩ ᠭᠠᠷᠴᠤ ᠪᠠᠢᠨᠠ᠃ ᠵᠡᠭᠦᠨ ᠭᠤᠸᠠᠩᠵᠡᠨ ᠳ᠋ᠤ᠌ ᠵᠦᠭᠡᠷ ᠫᠢᠸᠦ᠌ ᠬᠤᠳᠠᠯᠳᠤᠵᠤ ᠪᠠᠢᠨᠠ ᠭᠡᠵᠦ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠪᠠᠰᠠ ᠳᠠᠬᠢᠨ ᠱᠣᠷᠳ᠋ ᠬᠢᠨ ᠭᠠᠷᠴᠤ ᠶᠠᠪᠤᠪᠠ᠃
ᠭᠣᠩᠭᠣᠷ ᠣᠷᠣᠵᠤ ᠢᠷᠡᠭᠡᠳ ᠪᠠᠰᠠ ᠯᠠ ᠢᠷᠡᠭᠡ ᠦᠭᠡᠢ ᠦᠦ ᠭᠡᠬᠦ ᠳ᠋ᠦ᠍ ᠰᠠᠭᠤᠷᠢ《 ᠢᠷᠡᠭᠰᠡᠨ ᠢᠷᠡᠭᠰᠡᠨ》 ᠭᠡᠵᠦ ᠲᠠᠮᠠᠬᠢᠨ ᠤ᠋ ᠪᠠᠨ ᠤᠲᠤᠭᠠᠨ ᠳ᠋ᠤ᠌ ᠬᠠᠬᠠᠵᠤ ᠴᠡᠴᠡᠨ ᠬᠡᠯᠡᠯᠡ᠃《 ᠲᠡᠭᠡᠭᠡᠳ ᠬᠠᠮᠢᠭᠠ ᠪᠠᠢᠨᠠ》 ᠭᠡᠬᠦ ᠳ᠋ᠦ᠍ᠨᠢ《 ᠬᠣᠯᠠᠳᠠᠭᠠ ᠦᠭᠡᠢ》 ᠭᠡᠯᠡ᠃ ᠭᠣᠩᠭᠣᠷ 20 ᠮᠢᠨᠦ᠋ᠲ ᠬᠦᠯᠢᠶᠡᠭᠡᠳ《 ᠪᠠᠰᠠ ᠢᠷᠡᠬᠦ ᠪᠡᠨ ᠥᠩᠭᠡᠷᠡᠪᠡ ᠰᠢᠪ》 ᠭᠡᠬᠦ ᠳ᠋ᠦ᠍ ᠰᠠᠭᠤᠷᠢ ᠰᠠᠭᠤᠷᠢᠨ ᠠ᠋ᠴᠠ ᠪᠠᠨ ᠬᠣᠪᠬᠣᠷᠠᠵᠤ᠂ ᠪᠢ ᠣᠯᠤᠭᠠᠳ ᠢᠷᠡᠶᠡ ᠭᠡᠯᠡ᠃ ᠭᠣᠩᠭᠣᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠯᠡᠳᠡᠭᠡᠳ ᠬᠦᠯᠢᠶᠡᠵᠦ 30 ᠮᠢᠨᠦ᠋ᠲ ᠪᠣᠯᠤᠯᠠ᠃ ᠰᠢᠭᠤᠷᠬᠠᠢ ᠴᠤ᠌ ᠠᠯᠠᠭᠠ᠂ ᠰᠠᠭᠤᠷᠢ ᠴᠤ᠌ ᠠᠯᠠᠭᠠ᠃ ᠭᠣᠩᠭᠣᠷ ᠭᠣᠩᠰᠣᠢᠭᠠᠳ ᠪᠤᠴᠠᠯᠠ᠃
ᠬᠣᠶᠠᠷ《 ᠠᠪᠤᠷᠭᠤ》2 ᠴᠠᠭ ᠲᠤ᠌ ᠺᠣᠨᠲ᠋ᠣᠷ( ᠠᠵᠢᠯ ᠤ᠋ᠨ ᠥᠷᠥᠭᠡ) ᠲᠠᠭᠠᠨ ᠢᠷᠡᠯᠡ᠃ ᠰᠠᠭᠤᠷᠢ ᠦᠳᠡ ᠡᠴᠡ ᠡᠮᠦᠨᠡ ᠡᠭᠦᠷᠭᠡᠲᠦ ᠠᠯᠪᠠᠨ ᠠᠵᠢᠯ ᠢ᠋ᠶ᠋ᠠᠨ ᠲᠸᠯᠸᠹᠣᠨ( ᠬᠠᠷᠢᠯᠴᠠᠭᠤᠷ ᠤᠲᠠᠰᠤ) ᠢᠶᠠᠷ《 ᠪᠠᠷᠠᠭᠳᠠᠭᠤᠯᠤᠭᠰᠠᠨ》 ᠲᠤᠯᠠ ᠣᠳᠣ ᠬᠤᠪᠢ ᠶ᠋ᠢᠨ ᠠᠵᠢᠯ ᠢ᠋ ᠪᠠᠷᠠᠭᠳᠠᠭᠤᠯᠬᠤ ᠭᠡᠵᠦ ᠶᠠᠷᠢᠵᠤ ᠭᠠᠷᠪᠠ᠃ ᠰᠠᠭᠤᠷᠢ ᠲᠸᠯᠸᠹᠤᠨ ᠢ᠋ᠶ᠋ᠠᠷ ᠶᠠᠷᠢᠭᠰᠠᠨ ᠵᠦᠢᠯ ᠦ᠋ᠨ ᠵᠠᠬᠠ ᠠ᠋ᠴᠠ ᠳᠤᠷᠠᠳᠪᠠᠯ ᠨᠢᠭᠡ ᠬᠥᠮᠦᠨ ᠲᠡᠢ《 ᠴᠢ ᠮᠢᠨᠦ ᠵᠠᠬᠢᠭᠰᠠᠨ ᠢ᠋ ᠠᠮᠵᠢᠭᠤᠯᠵᠤ ᠪᠠᠢᠨᠠ ᠤᠤ》 ᠭᠡᠳᠡᠭ ᠰᠡᠳᠦᠪ ᠢ᠋ᠶ᠋ᠡᠷ 10 ᠮᠢᠨᠦ᠋ᠲ᠂ ᠪᠠᠰᠠ ᠨᠢᠭᠡ ᠬᠥᠮᠦᠨ ᠲᠡᠢ ᠪᠠᠭᠠ ᠨᠠᠰᠤᠨ ᠤ᠋ ᠪᠠᠨ ᠰᠣᠨᠢᠨ ᠦᠯᠢᠭᠡᠷ ᠶᠠᠷᠢᠵᠤ 20 ᠮᠢᠨᠦ᠋ᠲ᠂ ᠨᠢᠭᠡ《 ᠡᠩᠬᠦᠷᠡᠢ ᠬᠣᠩᠭᠣᠷ》 ᠭᠡᠵᠦ ᠨᠡᠷᠡᠯᠡᠭᠳᠡᠳᠡᠭ ᠬᠥᠮᠦᠨ ᠲᠡᠢ ᠳᠣᠷᠵᠢ ᠮᠥᠳᠳᠥ ᠢᠷᠡᠬᠦ ᠡᠰᠡᠬᠦ ᠲᠤᠬᠠᠢ 40 ᠮᠢᠨᠦ᠋ᠲ ᠶᠠᠷᠢᠯᠠ᠃ ᠡᠨᠡ ᠪᠣᠯ ᠶᠡᠬᠡ ᠶᠠᠷᠢᠶᠠᠨ ᠤ᠋ ᠡᠬᠢ ᠵᠠᠬᠠ ᠨᠢ ᠶᠦᠮ᠃ ᠰᠠᠭᠤᠷᠢ ᠶ᠋ᠢ ᠢᠩᠭᠢᠵᠦ ᠰᠠᠭᠤᠲᠠᠯᠠ ᠨᠢ ᠭᠣᠩᠭᠣᠷ ᠣᠷᠣᠵᠤ ᠢᠷᠡᠭᠡᠳ《 ᠵᠠ ᠪᠠᠰᠠ ᠯᠠ ᠪᠠᠢᠬᠤ ᠦᠭᠡᠢ ᠰᠢᠪ》 ᠭᠡᠬᠦ ᠳ᠋ᠦ᠍ ᠰᠠᠭᠤᠷᠢ《 ᠣᠳᠣᠬᠠᠨ ᠳ᠋ᠠᠭᠠᠨ ᠠᠯᠠᠭᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠭᠣᠩᠭᠣᠷ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠮᠰᠦᠭᠯᠡᠵᠦ᠂《 ᠣᠳᠣᠬᠠᠨ ᠳ᠋ᠠᠭᠠᠨ ᠠᠯᠠᠭᠠ ᠭᠡᠰᠡᠨ ᠢ᠋ᠶ᠋ᠡᠷ ᠪᠠᠢᠭᠠᠳ ᠣᠷᠣ ᠦᠭᠡᠢ ᠠᠯᠠᠭᠠ ᠬᠥᠮᠦᠨ ᠶᠦᠮ ᠳᠡ》 ᠭᠡᠳ ᠭᠠᠷᠴᠤ ᠣᠳᠤᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠰᠢᠭᠤᠷᠬᠠᠢ ᠱᠤᠤᠭᠢᠨ ᠬᠠᠷᠠ ᠵᠠᠬᠠ ᠪᠠᠷ ᠰᠢᠪᠲᠤ ᠭᠦᠶᠦᠵᠦ᠂ ᠰᠦᠨ ᠦ᠌ ᠵᠠᠬᠠ ᠪᠠᠷ ᠳᠠᠭᠠᠷᠢᠭᠠᠳ ᠬᠡᠳᠦᠨ ᠳᠡᠯᠭᠡᠭᠦᠷ ᠬᠡᠰᠦᠭᠡᠳ ᠭᠡᠷ ᠲᠡᠭᠡᠨ ᠬᠠᠷᠢᠵᠤ᠂ ᠶᠠᠮᠪᠠ ᠲᠠᠢ ᠭᠡᠷᠭᠡᠢ ᠳ᠋ᠡᠭᠡᠨ ᠶᠠᠨᠲᠤᠩ ᠢ᠋ ᠨᠢ ᠬᠥᠯᠡᠵᠦ᠂ ᠦᠨᠡᠰᠦ ᠶ᠋ᠢ ᠨᠢ ᠭᠠᠷᠭᠠᠵᠤ ᠠᠮᠵᠢᠭᠰᠠᠨ ᠪᠠᠢᠵᠠᠢ᠃ ᠰᠢᠭᠤᠷᠬᠠᠢ ᠢᠩᠭᠢᠵᠦ ᠰᠢᠭᠤᠷᠬᠠᠢᠯᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠠᠷᠤ ᠲᠠᠯᠠ ᠳ᠋ᠤᠨᠢ ᠠᠯᠪᠠᠨ ᠠᠵᠢᠯ ᠨᠢ ᠬᠡᠢᠳᠡᠵᠦ( ᠡᠵᠡᠭᠦᠢᠲᠡᠬᠦ) ᠰᠢᠭᠤᠷᠬᠠᠢ ᠶ᠋ᠢ ᠰᠤᠷᠠᠭᠯᠠᠵᠤ ᠠᠷᠪᠠᠨ ᠬᠥᠮᠦᠨ ᠢᠷᠡᠭᠡᠳ ᠰᠢᠭᠤᠷᠬᠠᠢ ᠶ᠋ᠢ ᠠᠰᠠᠭᠤᠵᠤ᠂ ᠠᠷᠪᠠᠨ ᠬᠥᠮᠦᠨ ᠤᠲᠠᠰᠤᠳᠠᠭᠠᠳ ᠳᠠᠷᠠᠭᠠ ᠨᠢ ᠬᠣᠶᠠᠷ ᠳᠠᠬᠢᠨ ᠳᠠᠭᠤᠳᠠᠭᠰᠠᠨ ᠪᠣᠯᠪᠠᠴᠤ ᠰᠠᠭᠤᠷᠢ ᠨᠠᠢᠵᠠ ᠨᠢ ᠲᠤᠬᠠᠢ ᠪᠦᠷᠢ ᠳ᠋ᠦ᠍ᠨᠢ ᠠᠷᠭᠠᠯᠠᠵᠤ《 ᠣᠢᠷᠠᠬᠠᠨ ᠶᠠᠪᠤᠭᠠ ᠣᠷᠣᠭᠠᠳ ᠢᠷᠡᠨᠡ》 ᠭᠡᠳᠡᠭ ᠡᠴᠡ ᠠᠪᠤᠭᠠᠳ《 ᠲᠣᠯᠣᠭᠠᠢ ᠨᠢ ᠡᠪᠡᠳᠦᠭᠡᠳ ᠡᠮᠴᠢ ᠳ᠋ᠦ᠍ ᠣᠴᠢᠭᠰᠠᠨ》᠂《 ᠬᠣᠯᠠᠳᠠᠭᠠ ᠦᠭᠡᠢ》 ᠭᠡᠬᠦ ᠵᠡᠷᠭᠡ ᠣᠯᠠᠨ ᠰᠢᠯᠲᠠᠭ ᠵᠣᠬᠢᠶᠠᠵᠤ ᠣᠪᠯᠠᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠮᠠᠨ ᠤ᠋ ᠬᠣᠶᠠᠷ ᠨᠠᠢᠵᠠ ᠲᠡᠷᠡ ᠬᠥᠮᠦᠨ ᠢ᠋ ᠲᠡᠭᠡᠵᠦ ᠳᠠᠪᠠᠯᠠ᠂ ᠡᠨᠡ ᠬᠥᠮᠦᠨ ᠢ᠋ ᠢᠩᠭᠢᠵᠦ ᠳᠥᠩᠭᠡᠯᠡ ᠭᠡᠵᠦ ᠣᠯᠢᠭ ᠦᠭᠡᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠨᠢᠭᠤᠵᠤ ᠤᠪ ᠵᠠᠯᠢ ᠪᠠᠨ ᠮᠠᠭᠲᠠᠵᠤ ᠪᠠᠬᠠᠨ ᠴᠠᠭ ᠨᠦᠭᠴᠢᠭᠡᠳᠡᠭ ᠪᠠᠢᠵᠠᠢ᠃
ᠭᠡᠲᠡᠯᠡ ᠬᠣᠶᠠᠷ ᠣᠪᠲᠠᠨ ᠤ᠋ ᠠᠷᠭᠠ ᠪᠠᠭᠠᠰᠢ ᠶ᠋ᠢ ᠲᠡᠷᠡ ᠪᠠᠢᠭᠤᠯᠭᠠ ᠶ᠋ᠢᠨ ᠬᠢᠨ ᠮᠡᠳᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ᠂ ᠭᠦᠶᠦᠳᠡᠭ ᠰᠠᠭᠤᠳᠠᠭ ᠭᠡᠵᠦ ᠨᠡᠷᠡ《 ᠡᠷᠭᠦᠮᠵᠢᠯᠡᠭᠡᠳ》᠂ ᠪᠠᠰᠠ ᠵᠣᠬᠢᠬᠤ ᠠᠷᠭᠠ ᠬᠡᠮᠵᠢᠶᠡ ᠪᠡᠯᠡᠳᠬᠡᠵᠦ ᠪᠠᠢᠪᠠ᠃ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠭᠣᠩᠭᠣᠷ ᠢ᠋ ᠢᠷᠡᠬᠦ ᠳ᠋ᠦ᠍ ᠥᠨᠥᠬᠢ ᠤᠨᠢᠶᠠᠷ ᠲᠠᠢ ᠥᠷᠥᠭᠡ ᠴᠡᠯᠮᠡᠵᠦ᠂ ᠣᠳᠣᠬᠠᠨ ᠳ᠋ᠠᠭᠠᠨ ᠠᠯᠠᠭᠠ ᠪᠠᠢᠳᠠᠭ ᠰᠢᠭᠤᠷᠬᠠᠢ ᠭᠤᠸᠠᠢ ᠠᠯᠠᠭᠠ ᠪᠣᠯᠤᠭᠠᠳ ᠣᠷᠣᠨ ᠳ᠋ᠤᠨᠢ ᠥᠭᠡᠷᠡ ᠬᠥᠮᠦᠨ ᠠᠵᠢᠯᠯᠠᠵᠤ ᠪᠠᠢᠪᠠ᠃ ᠰᠠᠭᠤᠷᠢ ᠭᠤᠸᠠᠢ ᠴᠤ᠌ ᠰᠠᠭᠤᠷᠢᠨ ᠠ᠋ᠴᠠ ᠪᠠᠨ ᠬᠣᠪᠬᠣᠷᠠᠭᠠᠳ ᠠᠯᠠᠭᠠ ᠪᠣᠯᠵᠠᠢ᠃
– ᠢᠩᠭᠢᠬᠦ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠶᠤᠮ᠁ ᠬᠡᠨ ᠢᠩᠭᠢᠵᠦ ᠥᠭᠡᠷᠡᠴᠢᠯᠡᠪᠡ ᠭᠡᠰᠡᠨ ᠭᠣᠩᠭᠣᠷ ᠤ᠋ᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠲᠡᠷᠡ ᠰᠢᠨᠡ ᠬᠥᠮᠦᠨ᠄
– ᠰᠢᠭᠦᠮᠵᠢᠯᠡᠯ ᠢᠩᠭᠢᠵᠦ ᠥᠭᠡᠷᠡᠴᠢᠯᠡᠯᠡ ᠭᠡᠵᠦ ᠬᠠᠷᠢᠭᠤᠯᠪᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠲᠩᠷᠢ ᠡᠵᠢ ᠠᠮᠢᠯᠠᠭᠤᠯᠤᠨ ᠬᠠᠭᠤᠯᠪᠠ᠂
ᠬᠢᠨᠠᠭᠴᠢ ᠄ ᠭᠠᠸᠠ
2023᠂ 7᠂ 8 ᠪ ᠡᠲᠦᠷ