ᠬᠣᠶᠠᠷ ᠮᠣᠷᠢХоёр морь _ Hoyor mori _ Монгол үлгэр _Mongol ulger
513ᠬᠣᠶᠠᠷ ᠮᠣᠷᠢ
ᠦᠯᠢᠭᠡᠷ ᠳᠣᠮᠣᠭ
ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ᠌ ᠬᠣᠯᠠ ᠭᠠᠵᠠᠷ ᠬᠤᠳᠠᠯᠳᠤᠭᠳᠠᠭᠰᠠᠨ ᠬᠣᠶᠠᠷ ᠮᠣᠷᠢ ᠡᠬᠡ ᠨᠤᠲᠤᠭ ᠢᠶᠠᠨ ᠰᠠᠨᠠᠵᠤ ᠬᠠᠷᠢᠬᠤ ᠪᠠᠷ ᠭᠦᠶᠦᠵᠦ ᠶᠠᠪᠤᠲᠠᠯᠠ᠂ ᠬᠥᠭᠰᠢᠨ ᠨᠢᠭᠡ ᠨᠢ ᠬᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ᠂ ᠵᠠᠮ ᠳ᠋ᠠᠭᠠᠨ ᠬᠣᠴᠣᠷᠬᠤ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠵᠠᠯᠠᠭᠤ ᠮᠣᠷᠢᠨ ᠳ᠋ᠠᠭᠠᠨ᠄《ᠵᠠ᠂ ᠵᠠᠯᠠᠭᠤ ᠳᠡᠭᠦᠦ ᠮᠢᠨᠢ᠂ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠭᠠᠳ ᠬᠠᠷᠢᠭᠠᠷᠠᠢ᠃ ᠬᠥᠭᠰᠢᠨ ᠠᠬᠠ ᠴᠢᠨᠢ ᠣᠳᠣ ᠦᠬᠦᠬᠦ ᠪᠣᠯᠤᠯᠠ᠃ ᠳᠡᠭᠦᠦ ᠮᠢᠨᠢ᠃ ᠪᠣᠯᠵᠣᠭᠠ ᠦᠭᠡᠢ ᠵᠠᠮ ᠢᠶᠠᠷ ᠪᠤᠤ ᠶᠠᠪᠤᠭᠠᠷᠠᠢ᠃ ᠪᠥᠷᠲᠥᠯᠵᠡᠭᠰᠡᠨ ᠶᠠᠭᠤᠮᠠᠨ ᠳᠡᠭᠡᠷᠡ ᠪᠢᠲᠡᠭᠡᠢ ᠣᠴᠢᠭᠠᠷᠠᠢ᠃ ᠪᠣᠭᠣᠯᠲᠠ ᠲᠠᠢ ᠶᠠᠭᠤᠮᠠ ᠶ᠋ᠢ ᠪᠤᠤ ᠵᠠᠳᠠᠯᠤᠭᠠᠷᠠᠢ》ᠭᠡᠵᠦ ᠵᠠᠬᠢᠭᠠᠳ ᠬᠣᠴᠣᠷᠴᠠᠢ ᠭᠡᠨᠡ᠃ ᠵᠠᠯᠠᠭᠤ ᠮᠣᠷᠢ ᠨᠢ ᠵᠠᠮ ᠢᠶᠠᠷ ᠣᠷᠣᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠨᠢᠭᠡ ᠪᠥᠷᠲᠥᠯᠵᠡᠭᠰᠡᠨ ᠪᠣᠷᠣ ᠶᠠᠭᠤᠮᠠᠨ ᠤ᠋ ᠪᠠᠷᠠᠭᠠ ᠬᠠᠷᠠᠭᠳᠠᠵᠠᠢ ᠭᠡᠨᠡ᠃ ᠲᠡᠭᠦᠨ ᠢ᠋ ᠣᠴᠢᠵᠤ ᠦᠵᠡᠬᠦ ᠶᠦᠮ ᠰᠠᠨ ᠭᠡᠵᠦ ᠪᠣᠳᠣᠭᠠᠳ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠦᠶᠦᠵᠦ ᠣᠴᠢᠲᠠᠯᠠ ᠤᠭᠤᠲᠠᠨ ᠳ᠋ᠤ᠌ ᠬᠢᠭᠰᠡᠨ ᠶᠠᠭᠤᠮᠠᠨ ᠤ᠋ ᠠᠮᠠ ᠨᠢ ᠪᠣᠭᠣᠯᠲᠠ ᠲᠠᠢ ᠪᠥᠭᠡᠳ ᠳᠣᠲᠣᠷᠠ ᠨᠢ ᠠᠮᠢᠲᠠᠨ ᠪᠠᠢᠭᠠ ᠪᠣᠯᠤᠯᠲᠠᠢ ᠬᠥᠳᠡᠯᠵᠦ ᠪᠠᠢᠵᠠᠢ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠶᠠᠭᠤ ᠭᠠᠷᠬᠤ ᠪᠣᠯ? ᠦᠵᠡᠬᠦ ᠰᠠᠨ ᠭᠡᠵᠦ ᠲᠡᠰᠴᠦ ᠶᠠᠳᠠᠭᠠᠳ ᠰᠣᠨᠢᠷᠬᠠᠨ ᠠᠮᠠ ᠶ᠋ᠢ ᠵᠠᠳᠠᠯᠲᠠᠯᠠ ᠳᠣᠲᠣᠷᠠ ᠠ᠋ᠴᠠ ᠨᠢ ᠨᠢᠭᠡ ᠲᠣᠮᠣ ᠥᠯᠥᠰᠦᠭᠰᠡᠨ ᠴᠢᠨ᠋ᠸᠠ ᠭᠠᠷᠴᠤ ᠢᠷᠡᠭᠡᠳ᠄ 《ᠴᠢ ᠶᠠᠭᠤ ᠪᠠᠷ ᠮᠢᠨᠦ ᠪᠣᠭᠣᠳᠠᠯ ᠢ᠋ ᠵᠠᠳᠠᠯᠪᠠ? ᠪᠢ ᠨᠢᠭᠡ ᠪᠠᠶᠠᠨ ᠠᠢᠯ ᠤ᠋ᠨ ᠮᠠᠯ ᠠ᠋ᠴᠠ ᠪᠠᠷᠢᠵᠤ ᠢᠳᠡᠭᠰᠡᠭᠡᠷ ᠪᠠᠢᠲᠠᠯᠠ ᠲᠡᠷᠡ ᠠᠢᠯ ᠤ᠋ᠨ ᠡᠵᠡᠨ ᠨᠠᠮᠠᠶ᠋ᠢ ᠴᠢᠨᠦ ᠠᠳᠠᠯᠢ ᠬᠤᠷᠳᠤᠨ ᠮᠣᠷᠢ ᠪᠠᠷ ᠢᠶᠠᠨ ᠬᠥᠭᠡᠭᠡᠨ ᠭᠦᠢᠴᠡᠵᠦ ᠪᠠᠷᠢᠵᠤ ᠠᠪᠤᠭᠠᠳ ᠡᠨᠡᠬᠦ ᠤᠭᠤᠲᠠᠨ ᠳ᠋ᠤ᠌ ᠬᠢᠵᠦ ᠣᠷᠬᠢᠭᠰᠠᠨ ᠪᠢᠯᠡ᠃ ᠡᠢᠮᠦ ᠳ᠋ᠦ᠍ ᠣᠳᠣ ᠪᠢ ᠴᠢᠮᠠᠶ᠋ᠢ ᠢᠳᠡᠨᠡ》ᠭᠡᠳ ᠪᠠᠷᠢᠬᠤ ᠪᠠᠷ ᠵᠠᠪᠳᠤᠲᠠᠯᠠ᠂ ᠨᠢᠭᠡ ᠲᠠᠤᠯᠠᠢ ᠶᠠᠪᠤᠵᠤ ᠪᠠᠢᠭᠠᠳ ᠲᠡᠷᠡ ᠬᠣᠶᠠᠷ ᠢ᠋ ᠦᠵᠡᠮᠡᠭᠴᠡ᠄ 《ᠲᠠ ᠬᠣᠶᠠᠷ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠤᠮ ᠪᠣᠢ? 》ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠳᠡ ᠦᠨᠡᠨ ᠪᠠᠢᠳᠠᠯ ᠤᠴᠢᠷ ᠢᠶᠠᠨ ᠲᠣᠭᠠᠴᠠᠭᠰᠠᠨ ᠳ᠋ᠤ᠌ ᠲᠠᠤᠯᠠᠢ ᠮᠣᠷᠢᠨ ᠤ᠋ ᠠᠮᠢᠨ ᠳ᠋ᠤ᠌ ᠣᠷᠣᠬᠤ ᠠᠷᠭᠠ ᠪᠣᠳᠣᠵᠤ ᠡᠢᠨ ᠥᠭᠦᠯᠡᠷᠦᠨ᠄ 《ᠦᠭᠡᠢ ᠃ ᠴᠢᠨ᠋ᠸᠠ ᠭᠤᠸᠠᠢ᠂ ᠲᠠ ᠡᠢᠮᠦ ᠰᠠᠢᠬᠠᠨ ᠲᠣᠮᠣ ᠠᠮᠢᠲᠠᠨ ᠪᠠᠢᠲᠠᠯᠠ ᠤᠭᠤᠲᠠᠨ ᠳ᠋ᠤ᠌ ᠬᠢᠯᠭᠡᠵᠦ ᠠᠮᠠ ᠨᠢ ᠪᠣᠭᠣᠯᠲᠠ ᠲᠠᠢ ᠬᠡᠪᠲᠡᠵᠦ ᠪᠠᠢᠨᠠ ᠭᠡᠳᠡᠭ ᠴᠢᠨᠢ ᠬᠤᠳᠠᠯ ᠪᠢᠵᠡ᠃ ᠬᠡᠷᠪᠡ ᠦᠨᠡᠨ ᠪᠣᠯ ᠪᠢ ᠬᠠᠷᠢᠨ ᠡᠨᠡ ᠮᠣᠷᠢᠨ ᠳᠡᠭᠡᠷᠡ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠱᠠᠩᠨᠠᠯ ᠳ᠋ᠤᠨᠢ ᠥᠭᠴᠦ ᠢᠳᠡᠭᠦᠯᠦᠶᠡ》ᠭᠡᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠴᠢᠨ᠋ᠸᠠ᠄ 《ᠦᠨᠡᠨ᠂ ᠪᠢ ᠡᠨᠡ ᠤᠭᠤᠲᠠᠨ ᠳ᠋ᠤ᠌ ᠪᠠᠢᠭᠰᠠᠨ》ᠭᠡᠵᠦ ᠬᠡᠯᠡᠵᠡᠢ᠃
ᠲᠠᠤᠯᠠᠢ᠄ 《ᠡᠷᠬᠢᠮ ᠴᠢᠨ᠋ᠸᠠ ᠭᠤᠸᠠᠢ᠂ ᠲᠠ ᠡᠨᠡ ᠤᠭᠤᠲᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠪᠠᠭᠲᠠᠬᠤ ᠪᠢᠯᠡ? ᠪᠢ ᠨᠢᠳᠦ ᠪᠡᠷ ᠦᠵᠡᠭᠡ ᠦᠭᠡᠢ ᠳ᠋ᠡᠭᠡᠨ ᠦᠨᠡᠮᠰᠢᠬᠦ ᠦᠭᠡᠢ》ᠭᠡᠬᠦ ᠳ᠋ᠦ᠍ ᠴᠢᠨ᠋ᠸᠠ ᠮᠣᠷᠢ ᠲᠠᠤᠯᠠᠢ ᠬᠣᠶᠠᠷ ᠢ᠋ ᠬᠣᠶᠠᠭᠤᠯᠠ ᠶ᠋ᠢ ᠨᠢ ᠢᠳᠡᠬᠦ ᠪᠡᠷ ᠪᠣᠳᠣᠵᠤ ᠨᠥᠬᠥᠭᠡ ᠤᠭᠤᠲᠠᠨ ᠳ᠋ᠠᠭᠠᠨ ᠳᠠᠬᠢᠨ ᠣᠷᠣᠭᠠᠳ ᠲᠣᠯᠣᠭᠠᠢ ᠪᠠᠨ ᠬᠠᠷᠠᠬᠠᠨ ᠳᠠᠯᠳᠠ ᠣᠷᠣᠭᠤᠯᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠠᠤᠯᠠᠢ᠄ 《ᠵᠠ᠂ ᠲᠡᠷᠡ᠂ ᠲᠣᠯᠣᠭᠠᠢ ᠴᠢᠨᠢ ᠪᠠᠭᠲᠠᠬᠤ ᠦᠭᠡᠢ ᠪᠠᠢᠨᠠ》ᠭᠡᠵᠦ ᠬᠠᠰᠭᠢᠷᠠᠮᠠᠭᠴᠠ ᠴᠢᠨ᠋ᠸᠠ ᠲᠣᠯᠣᠭᠠᠢ ᠪᠠᠨ ᠳᠠᠯᠳᠠ ᠣᠷᠣᠭᠤᠯᠤᠯᠠ᠃ ᠲᠠᠤᠯᠠᠢ ᠲᠡᠷᠡ ᠳᠠᠷᠤᠢ ᠤᠭᠤᠲᠠᠨ ᠤ᠋ ᠠᠮᠠ ᠶ᠋ᠢ ᠬᠠᠭᠤᠴᠢᠨ ᠬᠡᠪ ᠢᠶᠠᠷ ᠨᠢ ᠪᠣᠭᠣᠵᠤ ᠣᠷᠬᠢᠯᠠ᠃ ᠢᠩᠭᠢᠭᠡᠳ ᠥᠴᠦᠬᠡᠨ ᠪᠡᠶᠡ ᠲᠡᠢ ᠪᠣᠯᠪᠠᠴᠤ ᠠᠷᠭᠠ ᠤᠬᠠᠭᠠᠨ ᠲᠠᠢ ᠲᠠᠤᠯᠠᠢ ᠶ᠋ᠢᠨ ᠭᠠᠪᠢᠶᠠ ᠪᠠᠷ ᠠᠮᠢ ᠭᠠᠷᠤᠭᠰᠠᠨ ᠵᠠᠯᠠᠭᠤ ᠮᠣᠷᠢ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠᠳ ᠰᠠᠢᠨ ᠡᠷᠡ ᠶ᠋ᠢᠨ ᠢᠲᠡᠭᠡᠯᠲᠦ ᠬᠦᠯᠦᠭ ᠪᠣᠯᠤᠭᠠᠳ ᠠᠮᠤᠷ ᠰᠠᠢᠬᠠᠨ ᠳ᠋ᠠᠭᠠᠨ ᠵᠢᠷᠭᠠᠭᠰᠠᠨ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠢᠷᠠᠭᠤᠬᠠᠨ
ᠦᠰᠦᠭ ᠬᠠᠲᠠᠭᠰᠠᠨ᠄ ᠢᠷᠠᠭᠤᠬᠠᠨ