ᠠᠳᠤᠭᠤᠨ ᠤ ᠮᠢᠨᠢ ᠲᠠᠯᠠ- ᠲ᠊· ᠬᠦᠮᠦᠵᠢᠯᠲᠦАдууны минь тал-т· гөмүжилд
316ᠠᠳᠤᠭᠤᠨ ᠤ ᠮᠢᠨᠢ ᠲᠠᠯᠠ
ᠰᠢᠯᠦᠭ᠄ ᠲ᠊· ᠬᠦᠮᠦᠵᠢᠯᠲᠦ
ᠤᠶᠠᠩᠭᠠᠯᠠᠭᠴᠢ᠄ ᠠᠮᠢᠨᠵᠶᠠᠭᠠ
ᠰᠠᠯᠬᠢ ᠨᠢ ᠵᠡᠷᠭᠡᠯᠭᠡᠨ ᠲᠠᠲᠠᠵᠤ ᠰᠠᠢᠬᠠᠨ ᠪᠥᠵᠢᠭᠯᠡᠳᠡᠭ
ᠰᠠᠮᠠᠭᠠᠨ ᠪᠤᠭᠤᠷᠤᠯ ᠡᠵᠢ ᠮᠢᠨᠢ ᠰᠠᠷᠠᠨ ᠲᠠᠯᠠ ᠳ᠋ᠤ᠌ ᠨᠢ ᠪᠥᠭᠴᠥᠭᠡᠨᠡᠳᠡᠭ
ᠲᠡᠭᠷᠢᠯᠢᠭ ᠠᠳᠤᠭᠤᠨ ᠤ᠋ ᠮᠢᠨᠢ ᠲᠡᠪᠳᠡᠷᠯᠢᠭ ᠲᠡᠦᠬᠡ
ᠲᠡᠩᠴᠡᠰᠢ ᠦᠭᠡᠢ ᠪᠠᠶᠠᠨ ᠳᠡᠯᠭᠡᠷ ᠮᠣᠩᠭᠣᠯ ᠵᠤᠰᠠᠭᠠᠯ
ᠠᠳᠤᠭᠤᠨ ᠤ᠋ ᠮᠢᠨᠢ ᠲᠠᠯᠠ ᠠ᠋
ᠪᠣᠷᠣᠭᠠᠯᠠᠬᠤ ᠳ᠋ᠤ᠌ ᠲᠤᠯᠤᠭᠠᠳ ᠨᠢ ᠬᠥᠬᠡᠷᠡᠵᠦ ᠬᠠᠷᠠᠭᠳᠠᠳᠠᠭ
ᠪᠤᠲᠠᠷᠠᠭᠰᠠᠨ ᠮᠣᠩᠭᠣᠯ ᠢ᠋ᠶ᠋ᠠᠨ ᠬᠡᠪᠡᠯᠢ ᠳ᠋ᠦ᠍ ᠪᠡᠨ ᠦᠷᠦᠪᠴᠢᠯᠡᠨ ᠡᠨᠡᠷᠢᠳᠡᠭ
ᠡᠷᠲᠡ ᠶ᠋ᠢᠨ ᠰᠢᠭᠦᠳᠡᠷᠢ ᠪᠡᠷ ᠳᠡᠯᠡᠬᠡᠢ ᠶ᠋ᠢ ᠴᠢᠮᠡᠳᠡᠭ
ᠡᠷᠡ ᠶ᠋ᠢᠨ ᠵᠣᠷᠢᠭ ᠢ᠋ᠶ᠋ᠠᠷ ᠬᠥᠪᠡᠭᠦᠳ ᠢ᠋ᠶ᠋ᠡᠷ ᠵᠣᠳᠣᠭᠯᠠᠳᠠᠭ
ᠵᠢᠷᠣᠭᠠ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠷ ᠤᠶᠠᠩᠭᠠᠨ ᠬᠠᠲᠠᠷᠢᠭᠠ ᠪᠠᠷ
ᠴᠢᠬᠢᠨ ᠦ᠌ ᠨᠠᠮᠠᠭᠠ ᠶ᠋ᠢ ᠪᠠᠶᠠᠰᠬᠠᠳᠠᠭ
ᠵᠣᠳᠣᠭᠲᠤ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠷ ᠣᠮᠣᠭᠯᠠᠩ ᠳᠠᠪᠢᠯᠲᠠ ᠪᠠᠷ
ᠵᠣᠷᠢᠭ ᠤ᠋ᠨ ᠰᠣᠷᠢᠭᠠ ᠲᠠᠢ ᠵᠡᠷᠭᠡᠯᠭᠡᠨ ᠲᠠᠲᠠᠳᠠᠭ
ᠣᠢᠴᠢᠬᠤ ᠳ᠋ᠤ᠌ ᠡᠨᠡᠷᠢᠨ ᠬᠠᠢᠯᠠᠵᠤ ᠣᠭ᠌ᠶᠤ ᠬᠡᠪᠢᠰ ᠢ᠋ᠶ᠋ᠡᠷ ᠳᠡᠯᠭᠡᠳᠡᠭ
ᠤᠢᠰᠬᠤ ᠳ᠋ᠤ᠌ ᠬᠠᠢᠷᠠ ᠪᠠᠨ ᠥᠭᠴᠦ ᠣᠷᠴᠢᠯᠠᠩ ᠳ᠋ᠤ᠌ ᠦᠭᠡᠢ ᠤᠶᠠᠷᠠᠨ ᠭᠡᠭᠡᠯᠵᠡᠳᠡᠭ
ᠠᠳᠤᠭᠤᠨ ᠤ᠋ ᠮᠢᠨᠢ ᠴᠡᠩᠬᠡᠷ ᠲᠠᠯᠠ
ᠰᠣᠳᠣᠨ ᠬᠥᠪᠡᠭᠦᠳ ᠨᠢ ᠰᠢᠷᠣᠢ ᠡᠮᠬᠦᠨ ᠪᠠᠢᠵᠤ ᠬᠥᠯ ᠳ᠋ᠦ᠍ ᠣᠷᠣᠳᠠᠭ
ᠰᠤᠮᠤᠨ ᠬᠦᠯᠦᠭ ᠦ᠋ᠳ ᠨᠢ ᠲᠠᠰᠢᠭᠤᠷ ᠠᠮᠰᠠᠨ ᠪᠠᠢᠵᠤ ᠬᠢᠯᠢ ᠳᠠᠪᠠᠳᠠᠭ
ᠡᠭᠦᠯᠡᠰ ᠣᠨᠢ ᠰᠠᠷᠢᠳᠠᠭ ᠢ᠋ᠶ᠋ᠠᠨ ᠢᠯᠪᠢᠨ ᠰᠠᠯᠵᠤ ᠶᠠᠳᠠᠨ ᠬᠣᠷᠭᠣᠳᠠᠳᠠᠭ
ᠥᠨᠳᠥᠷ ᠲᠡᠭᠷᠢ ᠨᠢ ᠪᠦᠷᠭᠦᠳ ᠢ᠋ᠶ᠋ᠡᠷ ᠡᠩᠬᠦᠷᠡᠢᠯᠡᠵᠦ ᠡᠩᠭᠡᠷ ᠲᠦ᠍ ᠪᠡᠨ ᠮᠥᠩᠬᠡᠯᠡᠳᠡᠭ
ᠰᠠᠷᠠ ᠨᠢ ᠠᠮᠢᠳᠤᠷᠠᠯ ᠪᠠᠶᠠᠰᠬᠠᠨ ᠰᠥᠨᠢ ᠶ᠋ᠢᠨ ᠲᠡᠭᠷᠢ ᠪᠡᠨ ᠰᠦᠯᠡᠳᠡᠭ
ᠰᠠᠢᠬᠠᠨ ᠪᠦᠰᠡᠭᠦᠢᠴᠦᠳ ᠨᠢ ᠨᠥᠬᠥᠷ ᠢ᠋ᠶ᠋ᠡᠷ ᠭᠤᠶᠤᠵᠤ ᠲᠡᠷᠯᠢᠭ ᠦ᠋ᠨ ᠢ᠋ᠶ᠋ᠡᠷ ᠲᠣᠪᠴᠢ ᠶ᠋ᠢ ᠮᠥᠩᠭᠥᠯᠡᠳᠡᠭ
ᠣᠳᠣᠳ ᠨᠢ ᠬᠦᠷᠲᠡᠯᠡ ᠠᠨᠢᠪᠴᠢᠨ ᠪᠠᠢᠵᠤ ᠵᠢᠩᠴᠢᠨ ᠬᠦᠦ ᠪᠡᠨ ᠵᠠᠮᠴᠢᠯᠠᠳᠠᠭ
ᠣᠪᠣᠭᠠ ᠬᠠᠢᠷᠬᠠᠳ ᠨᠢ ᠰᠦᠮᠪᠦᠷᠯᠡᠨ ᠴᠡᠩᠬᠡᠷᠯᠡᠵᠦ ᠣᠩᠭᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠳᠠᠭ
ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠨᠢ ᠠᠮᠢᠳᠤᠷᠠᠯ ᠪᠡᠯᠭᠡᠳᠡᠨ ᠲᠡᠭᠷᠢ ᠪᠠᠭᠠᠨᠠᠳᠠᠨ ᠬᠠᠷᠠᠭᠳᠠᠳᠠᠭ
ᠠᠲᠠᠷ ᠤ᠋ᠨ ᠤᠨᠢᠶᠠᠷ ᠨᠢ ᠮᠣᠩᠭᠣᠯ ᠳᠠᠷᠬᠠᠯᠠᠵᠤ ᠳᠡᠯᠡᠬᠡᠢ ᠴᠢᠮᠡᠨ ᠰᠤᠷᠵᠢᠳᠠᠭ
ᠷᠠᠰᠢᠶᠠᠨ ᠤᠰᠤ ᠨᠢ ᠷᠢᠳᠢ ᠰᠢᠳᠢᠯᠡᠵᠤ ᠰᠠᠷᠠᠯ ᠣᠶᠤᠨ ᠢ᠋ ᠰᠡᠯᠪᠢᠳᠡᠭ
ᠠᠷᠭᠤᠮᠠᠭ ᠤ᠋ᠨ ᠲᠣᠭᠣᠰᠣ ᠨᠢ ᠥᠯᠵᠡᠢ ᠵᠠᠩᠭᠢᠳᠴᠤ ᠠᠯᠲᠠᠨ ᠨᠤᠲᠤᠭ ᠢ᠋ᠶ᠋ᠠᠨ ᠭᠣᠶᠣᠳᠠᠭ
ᠪᠡᠷᠬᠡ ᠶ᠋ᠢ ᠦᠵᠡ ᠭᠡᠵᠦ ᠴᠢᠯᠠᠭᠤᠳ ᠨᠢ ᠥᠯᠮᠡᠢ ᠳᠣᠣᠷᠠ ᠬᠠᠲᠠᠭᠤᠷᠠᠵᠤ ᠲᠠᠨᠢᠭᠳᠠᠳᠠᠭ
ᠡᠷᠬᠡ ᠶ᠋ᠢ ᠰᠤᠷ ᠭᠡᠵᠦ ᠪᠠᠭᠠᠲᠤᠷ ᠤ᠋ᠳ ᠨᠢ ᠢᠯᠳᠦ ᠪᠥᠵᠢᠭᠯᠡᠨ ᠵᠣᠭᠰᠣᠭᠠ ᠪᠠᠷ ᠨᠥᠭᠴᠢᠳᠡᠭ
ᠳᠤᠷᠠᠰᠤᠯ ᠳ᠋ᠤ᠌ ᠬᠦᠪᠦᠷᠡᠬᠦ ᠠᠳᠤᠭᠤᠨ ᠤ᠋ ᠮᠢᠨᠢ ᠴᠡᠩᠬᠡᠷ ᠲᠠᠯᠠ
ᠳᠣᠮᠣᠭ ᠲᠤ᠌ ᠮᠥᠩᠬᠡᠷᠡᠬᠦ ᠠᠯᠲᠠᠨ ᠰᠢᠷᠣᠢᠲᠤ ᠡᠬᠡ ᠣᠷᠣᠨ ᠮᠢᠨᠢ ᠠ᠋
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠡᠷᠭᠦᠯᠡᠩ
ᠦᠰᠦᠭ ᠬᠠᠲᠠᠭᠴᠢ᠄ ᠰᠡᠷᠭᠦᠯᠡᠩ
ᠬᠢᠨᠠᠭᠴᠢ ᠪᠠᠭᠰᠢ᠄ ᠢᠷᠡᠭᠡᠳᠦᠢ