ᠬᠠᠤᠯᠢ ᠨᠢ ᠭᠠᠤᠯᠢ ᠪᠣᠯᠪᠠ（ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ）Хуули нь гууль болов（ Хэл бичиг – Есдүгээр дэвтэр）
377ᠬᠠᠤᠯᠢ ᠨᠢ ᠭᠠᠤᠯᠢ ᠪᠣᠯᠪᠠ
ᠤᠷᠢᠳᠤ ᠴᠠᠭ ᠲᠤ᠌ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠲᠤ᠌ ᠨᠢᠭᠡᠨ ᠰᠣᠬᠣᠷ ᠬᠤᠭᠤᠷᠴᠢ ᠪᠠᠢᠭᠰᠠᠨ ᠭᠡᠨᠡ᠃ ᠲᠡᠷᠡ ᠬᠤᠭᠤᠷᠴᠢ ᠪᠣᠯ ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠᠨ ᠬᠣᠨᠣᠭ ᠲᠤ᠌ ᠬᠤᠭᠤᠷ ᠢ᠋ᠶ᠋ᠠᠨ ᠬᠤᠭᠤᠷᠳᠠᠵᠤ ᠬᠣᠲᠠ ᠵᠡᠭᠡᠯᠢ ᠶ᠋ᠢ ᠬᠡᠰᠦᠨ᠂ ᠠᠢᠯ ᠬᠥᠳᠡᠭᠡ ᠶ᠋ᠢ ᠲᠣᠭᠣᠷᠢᠵᠤ ᠦᠯᠢᠭᠡᠷ ᠬᠡᠯᠡᠵᠦ ᠳᠠᠭᠤᠤ ᠳᠠᠭᠤᠯᠠᠵᠤ ᠶᠠᠪᠤᠳᠠᠭ ᠭᠡᠨᠡ᠃
ᠬᠡᠴᠢᠨᠡᠨ ᠵᠢᠯ ᠪᠣᠯᠵᠤ᠂ ᠤᠳᠠᠭᠠᠨ ᠡᠳᠦᠷ ᠵᠤᠵᠠᠭᠠᠨ ᠬᠣᠨᠣᠭ ᠢ᠋ ᠥᠩᠭᠡᠷᠡᠭᠰᠡᠭᠡᠷ ᠦᠯᠢᠭᠡᠷ ᠬᠡᠯᠡᠨ ᠳᠠᠭᠤᠤ ᠳᠠᠭᠤᠯᠠᠨ ᠶᠠᠪᠤᠵᠤ ᠢᠳᠡᠵᠦ ᠡᠮᠦᠰᠬᠦ ᠪᠡᠨ ᠭᠠᠮᠨᠠᠨ ᠠᠷᠪᠢᠯᠠᠵᠤ᠂ ᠨᠡᠯᠢᠶᠡᠳ ᠲᠣᠭᠠᠨ ᠤ᠋ ᠮᠥᠩᠭᠥ ᠴᠤᠭᠯᠠᠭᠤᠯᠤᠭᠠᠳ ᠲᠡᠭᠦᠨ ᠢ᠋ᠶ᠋ᠡᠷ ᠨᠠᠰᠤ ᠠᠬᠢᠵᠦ ᠬᠦᠴᠦ ᠮᠡᠬᠦᠰᠳᠡᠬᠦ ᠦᠶᠡ ᠳ᠋ᠡᠭᠡᠨ ᠠᠮᠢᠨ ᠲᠡᠵᠢᠭᠡᠯ ᠪᠣᠯᠭᠠᠶᠠ ᠭᠡᠵᠦ ᠤᠭᠤᠲᠠᠨ ᠳ᠋ᠤ᠌ ᠬᠢᠵᠦ ᠨᠠᠨᠳᠢᠩᠨᠠᠨ ᠬᠠᠳᠠᠭᠠᠯᠠᠵᠤ ᠪᠠᠢᠵᠠᠢ᠃
ᠨᠢᠭᠡᠨ ᠡᠳᠦᠷ ᠲᠡᠷᠡ ᠪᠠᠰᠠ ᠣᠯᠠᠨ ᠤ᠋ ᠴᠤᠭᠯᠠᠭᠠᠨ ᠳ᠋ᠤ᠌ ᠣᠴᠢᠵᠤ ᠬᠤᠭᠤᠷ ᠢ᠋ᠶ᠋ᠠᠨ ᠬᠤᠭᠤᠷᠳᠠᠨ ᠳᠠᠭᠤᠤ ᠳᠠᠭᠤᠯᠠᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠭᠣᠶᠣ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠪᠤᠯᠢᠭᠠᠷᠢ ᠭᠤᠲᠤᠯ ᠲᠠᠢ᠂ ᠬᠥᠬᠡ ᠬᠢᠯᠢᠩ ᠬᠦᠷᠮᠡ ᠲᠡᠢ ᠨᠢᠭᠡ ᠬᠥᠮᠦᠨ ᠮᠠᠯᠠᠭᠠᠢ ᠪᠠᠨ ᠬᠠᠵᠠᠭᠠᠢ ᠲᠠᠯᠪᠢᠵᠤ᠂ ᠬᠠᠢᠪᠠᠯᠵᠠᠨ ᠠᠯᠬᠤᠯᠠᠵᠤ ᠣᠯᠠᠨ ᠤ᠋ ᠳᠤᠮᠳᠠ ᠣᠷᠣᠵᠤ ᠢᠷᠡᠭᠡᠳ ᠴᠣᠮᠴᠣᠢᠨ ᠰᠠᠭᠤᠵᠤ ᠳᠠᠭᠤᠤ ᠰᠣᠨᠣᠰᠬᠤ ᠰᠢᠭ᠋ ᠴᠢᠬᠢ ᠲᠠᠯᠪᠢᠬᠤ ᠪᠣᠯᠪᠠᠴᠤ ᠬᠤᠭᠤᠷᠴᠢ ᠶ᠋ᠢᠨ ᠡᠪᠦᠷ ᠢ᠋ ᠰᠢᠯᠵᠢᠯ ᠦᠭᠡᠢ ᠬᠠᠷᠠᠵᠤ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠬᠤᠭᠤᠷᠴᠢ ᠶ᠋ᠢᠨ ᠳᠠᠭᠤᠤ ᠲᠡᠭᠦᠰᠴᠦ ᠣᠯᠠᠨ ᠬᠥᠮᠦᠨ ᠲᠠᠷᠬᠠᠵᠤ ᠶᠠᠪᠤᠭᠰᠠᠨ ᠤ᠋ ᠬᠣᠢᠨᠠ ᠡᠨᠡ ᠭᠣᠶᠣ ᠬᠣᠪᠴᠠᠰᠤᠲᠠᠢ ᠬᠥᠮᠦᠨ ᠭᠡᠨᠡᠳᠲᠡ ᠳᠠᠪ ᠬᠢᠵᠦ ᠬᠤᠭᠤᠷᠴᠢ ᠶ᠋ᠢᠨ ᠡᠪᠦᠷ ᠲᠦ᠍ ᠭᠠᠷ ᠢ᠋ᠶ᠋ᠠᠨ ᠣᠷᠣᠭᠤᠯᠵᠤ ᠤᠭᠤᠲᠠ ᠲᠠᠢ ᠮᠥᠩᠭᠥ ᠶ᠋ᠢ ᠨᠢ ᠪᠤᠯᠢᠶᠠᠬᠤ ᠳ᠋ᠤ᠌ ᠰᠣᠬᠣᠷ ᠬᠤᠭᠤᠷᠴᠢ ᠶᠡᠬᠡᠯᠡ ᠮᠡᠩᠳᠡᠭᠦᠷᠡᠨ ᠰᠣᠴᠢᠵᠤ᠂ ᠡᠨᠡ ᠪᠠᠶᠠᠨ ᠤ᠋ ᠬᠦᠦ ᠶ᠋ᠢᠨ ᠬᠠᠨᠴᠤᠢ ᠠ᠋ᠴᠠ ᠨᠢ ᠵᠢᠭᠤᠷᠠᠨ ᠲᠠᠯᠪᠢᠬᠤ ᠦᠭᠡᠢ ᠪᠥᠭᠡᠳ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ᠄
《 ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ ᠬᠥᠮᠦᠨ ᠢ᠋ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠵᠦ ᠪᠠᠢᠨᠠ ! 》ᠭᠡᠵᠦ ᠬᠠᠰᠬᠢᠷᠪᠠ᠃ ᠣᠯᠠᠨ ᠬᠥᠮᠦᠨ ᠭᠦᠶᠦᠯᠳᠦᠨ ᠢᠷᠡᠵᠦ᠂ ᠬᠤᠭᠤᠷᠴᠢ ᠶ᠋ᠢᠨ ᠡᠪᠦᠷ ᠡᠴᠡ ᠭᠠᠷ ᠢ᠋ᠶ᠋ᠠᠨ ᠰᠤᠭᠤᠯᠵᠤ ᠠᠮᠵᠢᠭᠠᠳᠤᠢ ᠬᠤᠯᠠᠭᠠᠢᠴᠢ ᠶ᠋ᠢ ᠪᠠᠷᠢᠨ ᠠᠪᠴᠤ᠄
《 ᠴᠢ ᠬᠠᠷᠢᠨ ᠡᠢᠮᠦ ᠭᠣᠶᠣ ᠰᠠᠢᠬᠠᠨ ᠬᠤᠪᠴᠠᠰᠤ ᠲᠠᠢ ᠪᠠᠢᠭᠠᠳ ᠬᠥᠭᠡᠷᠦᠬᠦᠢ ᠶᠠᠳᠠᠭᠤ ᠰᠣᠬᠣᠷ ᠢ᠋ ᠳᠠᠷᠤᠯᠠᠵᠤ᠂ ᠬᠥᠮᠦᠨ ᠢ᠋ ᠳᠡᠭᠡᠷᠡᠮᠳᠡᠬᠦ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠵᠢᠭᠰᠢᠭᠦᠷᠢᠲᠡᠢ ᠮᠠᠭᠤ ᠴᠢᠰᠤ ᠪᠣᠢ? 》ᠭᠡᠵᠦ ᠵᠢᠮᠡᠯᠡᠪᠡ᠃ ᠬᠤᠯᠠᠭᠠᠢᠴᠢ ᠭᠠᠷ ᠲᠠᠭᠠᠨ ᠬᠤᠭᠤᠷᠴᠢ ᠶ᠋ᠢᠨ ᠤᠭᠤᠲᠠ ᠲᠠᠢ ᠮᠥᠩᠭᠥ ᠶ᠋ᠢ ᠪᠠᠷᠢᠵᠤ᠂ ᠲᠠᠯᠪᠢᠬᠤ ᠦᠭᠡᠢ ᠪᠥᠭᠡᠳ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ᠄
《 ᠡᠨᠡ ᠮᠠᠭᠤ ᠬᠤᠭᠤᠷᠴᠢ ᠬᠠᠮᠢᠭᠠ ᠠ᠋ᠴᠠ ᠡᠢᠮᠦ ᠣᠯᠠᠨ ᠵᠣᠭᠣᠰ ᠣᠯᠪᠠ ? ᠲᠠ ᠪᠣᠳᠣᠵᠤ ᠦᠵᠡ ! ᠡᠨᠡ ᠮᠠᠭᠤ ᠰᠣᠬᠣᠷ ᠠᠮᠢᠲᠠᠨ ᠬᠠᠷᠢᠨ ᠯᠤᠢᠪᠠᠷᠳᠠᠵᠤ ᠪᠠᠢᠨᠠ ! 》 ᠭᠡᠪᠡ᠃ ᠣᠯᠠᠨ ᠬᠥᠮᠦᠨ ᠮᠠᠰᠢ ᠠᠭᠤᠷᠯᠠᠵᠤ᠄
《 ᠮᠠᠭᠤ ᠶᠠᠭᠤᠮᠠ ᠬᠠᠷᠢᠨ ᠪᠠᠰᠠ ᠬᠤᠭᠤᠷᠴᠢ ᠶ᠋ᠢ ᠯᠤᠢᠪᠠᠷᠳᠠᠬᠤ ᠰᠠᠨᠠᠭᠠ ᠲᠠᠢ 》ᠭᠡᠳ ᠲᠡᠭᠦᠨ ᠢ᠋ ᠲᠠᠲᠠᠵᠤ ᠴᠢᠩᠭᠠᠭᠠᠭᠰᠠᠭᠠᠷ ᠨᠣᠶᠠᠨ ᠤ᠋ ᠳᠡᠷᠭᠡᠳᠡ ᠠᠪᠴᠤ ᠢᠷᠡᠵᠡᠢ᠃
ᠨᠣᠶᠠᠨ ᠡᠨᠡ ᠶᠠᠪᠤᠳᠠᠯ ᠢ᠋ ᠰᠣᠨᠣᠰᠤᠭᠠᠳ᠂ ᠬᠤᠭᠤᠷᠴᠢ ᠶ᠋ᠢ ᠰᠠᠭᠤᠯᠭᠠᠵᠤ᠂ ᠬᠤᠯᠠᠭᠠᠢᠴᠢ ᠶ᠋ᠢ ᠵᠠᠩᠳᠤᠷᠤᠨ᠄
《 ᠦᠳᠲᠡᠷ ᠰᠥᠭᠥᠳ᠂ ᠥᠴᠢᠭ ᠢᠶᠠᠨ ᠮᠡᠳᠡᠭᠦᠯ ! ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ ᠴᠢ ᠬᠠᠷᠢᠨ ᠡᠨᠡ ᠮᠠᠭᠤ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠤᠭᠤᠷᠴᠢ ᠶ᠋ᠢ ᠳᠠᠷᠤᠯᠠᠨ ᠳᠣᠷᠣᠮᠵᠢᠯᠠᠵᠤ ᠶᠠᠪᠤᠬᠤ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠰᠠᠮᠠᠭᠤᠨ ᠬᠤᠯᠠᠭᠠᠢᠴᠢ ᠪᠣᠢ ? ᠥᠷᠥᠰᠢᠶᠡᠯᠲᠦ ᠬᠠᠭᠠᠨ ᠦᠨᠡᠨ ᠡᠵᠡᠨ ᠦ᠌ ᠤᠯᠤᠰ ᠲᠤ᠌ ᠠᠮᠢᠳᠤᠷᠠᠵᠤ ᠪᠠᠢᠭᠠᠳ ᠡᠢᠮᠦ ᠳᠣᠣᠷᠠᠲᠤ ᠪᠠᠷ ᠶᠠᠪᠤᠬᠤ ᠴᠢᠨᠢ ᠶᠠᠭᠤ ᠪᠣᠢ ? 》 ᠭᠡᠵᠦ ᠠᠰᠠᠭᠤᠪᠠ᠃ ᠬᠤᠯᠠᠭᠠᠢᠴᠢ ᠬᠡᠯᠡᠭᠰᠡᠨ ᠨᠢ᠄
《 ᠨᠣᠶᠠᠨ ᠠᠪᠤ ᠮᠢᠨᠢ! ᠪᠢ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠷ ᠪᠤᠶᠠᠨ ᠳ᠋ᠤ᠌ ᠨᠡᠷᠡ ᠲᠥᠷᠥ ᠲᠡᠢ ᠬᠥᠮᠦᠨ ᠪᠢᠯᠡ᠃ ᠶᠠᠭᠠᠬᠢᠯᠠ ᠭᠡᠵᠦ ᠡᠢᠮᠦ ᠮᠠᠭᠤ ᠬᠡᠷᠡᠭ ᠭᠠᠷᠭᠠᠬᠤ ᠪᠣᠢ ! ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠷᠥᠩᠭᠡ ᠶ᠋ᠢ ᠢᠳᠡᠵᠦ ᠪᠠᠷᠠᠳᠠᠭ ᠦᠭᠡᠢ ᠬᠥᠮᠦᠨ ᠪᠢᠯᠡ᠂ ᠠᠳᠠᠭ ᠲᠤᠯᠵᠤ ᠠᠷᠭᠠ ᠪᠠᠨ ᠪᠠᠷᠠᠯᠠ ᠭᠡᠵᠦ ᠡᠨᠡ ᠮᠠᠭᠤ ᠭᠤᠢᠷᠠᠨᠴᠢ ᠶ᠋ᠢ ᠳᠡᠭᠡᠷᠡᠮᠳᠡᠬᠦ ᠦᠦ ? 》ᠭᠡᠪᠡ᠃ ᠨᠣᠶᠠᠨ᠄
《 ᠤᠳᠤᠮ ᠮᠠᠭᠤᠲᠤ ᠶ᠋ᠢᠨ ᠦᠷᠡ᠂ ᠦᠬᠦᠯ ᠢᠶᠠᠨ ᠡᠷᠢᠭᠰᠡᠨ※ᠬᠤᠯᠠᠭᠠᠢᠴᠢ ᠴᠢ ᠬᠠᠷᠢᠨ ᠠᠪᠤ ᠳᠡᠭᠡᠳᠦᠰ ᠦ᠋ᠨ ᠢᠶᠠᠨ ᠪᠤᠶᠠᠨ ᠳ᠋ᠤ᠌ ᠨᠡᠷᠡ ᠲᠡᠢ ᠬᠥᠮᠦᠨ ᠭᠡᠨᠡ ? ᠴᠢᠩᠭᠢᠵᠦ ᠪᠠᠢᠭᠠᠳ ᠶᠠᠭᠤᠨ ᠳ᠋ᠤ᠌ ᠳᠣᠷᠣᠢ ᠪᠠᠭᠤᠷᠠᠢ ᠬᠥᠮᠦᠨ ᠢ᠋ ᠳᠠᠷᠤᠯᠠᠬᠤ ᠪᠣᠢ ? ᠪᠠᠰᠠ ᠨᠢᠭᠤᠷ ᠦᠭᠡᠢ ᠰᠠᠢᠨ ᠤ᠋ ᠪᠠᠨ ᠪᠤᠶᠠᠨ ᠳ᠋ᠤ᠌ ᠭᠡᠵᠦ ᠴᠠᠯᠴᠢᠬᠤ ᠴᠢᠨᠢ ᠶᠠᠭᠤ ᠪᠣᠢ ? ᠲᠡᠷᠡ ᠤᠳᠤᠮ ᠮᠠᠭᠤ ᠡᠴᠢᠭᠡ ᠡᠬᠡ ᠴᠢᠨᠢ ᠶᠠᠭᠠᠬᠢᠵᠤ ᠪᠠᠢᠭᠠᠳ ᠪᠠᠰᠠ ᠴᠢᠮᠠ ᠰᠢᠭ᠋ ᠡᠢᠮᠦ ᠠᠮᠢᠲᠠᠨ ᠢ᠋ ᠲᠥᠷᠥᠭᠰᠡᠨ ᠪᠣᠢ ? 》ᠭᠡᠵᠦ ᠵᠠᠩᠨᠠᠪᠠ᠃ ᠬᠤᠯᠠᠭᠠᠢᠴᠢ ᠄
《ᠨᠣᠶᠠᠨ ᠠᠪᠤ ᠮᠢᠨᠢ! ᠮᠢᠨᠦ ᠡᠴᠢᠭᠡ ᠡᠬᠡ ᠤᠳᠤᠮ ᠢ᠋ᠶ᠋ᠠᠷ ᠮᠠᠭᠤ ᠬᠥᠮᠦᠰ ᠪᠢᠰᠢ᠃ ᠦᠨᠡᠨ ᠳ᠋ᠡᠭᠡᠨ ᠠᠯᠳᠠᠷ ᠴᠣᠯᠠ ᠲᠠᠢ ᠪᠥᠭᠡᠳ ᠳᠥᠷᠪᠡᠨ ᠳᠠᠯᠠᠢ ᠶ᠋ᠢᠨ ᠳᠣᠲᠣᠷᠠ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠭᠡᠵᠦ ᠦᠭᠡᠢ᠃ ᠥᠷᠥᠰᠢᠶᠡᠯᠳᠦ ᠬᠠᠭᠠᠨ ᠠ᠋ᠴᠠ ᠲᠡᠷᠢᠭᠦᠯᠡᠨ᠂ ᠥᠩᠭᠡᠲᠡᠢ ᠭᠡᠷᠡᠯᠲᠡᠢ ᠶᠠᠪᠤᠵᠤ ᠪᠠᠢᠬᠤ ᠨᠣᠶᠠᠳ ᠲᠦᠰᠢᠮᠡᠳ ᠪᠠ ᠡᠷᠦᠬᠡ ᠭᠡᠷ ᠨᠢ ᠤᠳᠤᠮ ᠲᠠᠢ ᠤᠯᠤᠰ ᠪᠦᠷ ᠲᠠᠨᠢᠨᠠ 》 ᠭᠡᠰᠡᠨ ᠳ᠋ᠦ᠍ ᠨᠣᠶᠠᠨ ᠶᠡᠬᠡ ᠪᠡᠷ ᠠᠭᠤᠷᠯᠠᠵᠤ ᠄
《 ᠬᠡᠨ ᠴᠢᠨᠦ ᠲᠡᠷᠡ ᠬᠥᠪᠡᠭᠦᠨ ᠢ᠋ᠶ᠋ᠡᠷ ᠴᠦ᠍ ᠰᠤᠷᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠮᠤᠩᠬᠠᠭ ᠡᠴᠢᠭᠡ ᠶ᠋ᠢ ᠴᠢᠨᠢ ᠲᠠᠨᠢᠬᠤ ᠪᠣᠢ?》ᠭᠡᠪᠡ᠃ ᠬᠤᠯᠠᠭᠠᠢᠴᠢ ᠄
《 ᠨᠣᠶᠠᠨ ᠠᠪᠤ ᠮᠢᠨᠢ ! ᠪᠢ ᠬᠡᠷᠪᠡ ᠠᠪᠤ ᠶ᠋ᠢᠨ ᠨᠡᠷᠡ ᠶ᠋ᠢ ᠬᠡᠯᠡᠪᠡᠯ ᠡᠷᠬᠢᠮ ᠲᠠ ᠪᠠᠰᠠ ᠯᠠᠪ ᠲᠠᠨᠢᠨᠠ 》 ᠭᠡᠪᠡ᠃ ᠨᠣᠶᠠᠨ ᠄
《 ᠴᠢᠨᠦ ᠲᠡᠷᠡ ᠴᠢᠰᠤ ᠪᠠᠷ ᠤᠷᠤᠰᠤᠭᠰᠠᠨ ᠡᠴᠢᠭᠡ ᠶ᠋ᠢ ᠴᠢᠨᠢ ᠪᠠᠰᠠ ᠶᠠᠯᠠᠯᠠᠵᠤ ᠪᠣᠯᠤᠨᠠ᠃ ᠬᠡᠨ ᠭᠡᠭᠴᠢ ᠨᠡᠷᠡ ᠲᠡᠢ ᠠᠮᠢᠲᠠᠨ ᠪᠣᠢ ? 》ᠭᠡᠰᠡᠨ ᠳ᠋ᠦ᠍ ᠬᠤᠯᠠᠭᠠᠢᠴᠢ᠂ ᠨᠣᠶᠠᠨ ᠤ᠋ ᠵᠦᠭ ᠨᠢᠳᠦ ᠢᠷᠮᠡᠨ ᠄
《 ᠮᠢᠨᠦ ᠠᠪᠤ ᠨᠢᠭᠤᠷ ᠨᠢ ᠴᠣᠬᠣᠷ᠂ ᠨᠢᠷᠤᠭᠤ ᠨᠢ ᠪᠥᠭᠲᠥᠷ ᠂ ᠨᠡᠷᠡ ᠲᠠᠪᠢᠨᠲᠠᠢ ᠭᠡᠳᠡᠭ 》ᠭᠡᠵᠦ ᠬᠡᠯᠡᠪᠡ᠃ ᠨᠣᠶᠠᠨ ᠬᠡᠷᠡᠭ ᠰᠢᠭᠦᠬᠦ ᠪᠡᠨ ᠪᠠᠢᠵᠤ ᠨᠡᠯᠢᠶᠡᠳ ᠤᠳᠠᠲᠠᠯᠠ ᠪᠣᠳᠣᠭᠠᠳ᠂ ᠪᠠᠬᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠄
《 ᠵᠠ ! ᠲᠠᠨᠤᠰᠠ ᠶ᠋ᠢᠨ ᠡᠨᠡ ᠶᠠᠷᠰᠢᠭᠲᠠᠢ ᠬᠡᠷᠡᠭ ᠢ᠋ ᠴᠢᠨᠢ ᠮᠠᠷᠭᠠᠰᠢ ᠰᠢᠭᠦᠶᠡ 》ᠭᠡᠵᠦ ᠬᠡᠯᠡᠭᠡᠳ ᠬᠤᠭᠤᠷᠴᠢ ᠪᠣᠯᠤᠨ ᠬᠤᠯᠠᠭᠠᠢᠴᠢ ᠶ᠋ᠢ ᠬᠣᠶᠠᠷ ᠳᠠᠰᠢ ᠰᠠᠯᠭᠠᠵᠤ ᠬᠣᠨᠣᠭᠰᠠᠨ ᠳ᠋ᠤ᠌ ᠣᠷᠣᠢ ᠨᠢ ᠬᠤᠯᠠᠭᠠᠢᠴᠢ ᠂ ᠨᠣᠶᠠᠨ ᠳ᠋ᠤ᠌ ᠲᠠᠪᠢᠨ ᠯᠠᠩ ᠤ᠋ᠨ ᠨᠢᠭᠤᠷ ᠨᠢ ᠴᠣᠬᠣᠷ᠂ ᠨᠢᠷᠤᠭᠤ ᠨᠢ ᠪᠥᠭᠲᠥᠷ ᠮᠥᠩᠭᠥᠨ ᠶᠤᠸᠠᠮᠪᠤᠤ ※ ᠭᠠᠷᠭᠠᠵᠤ ᠬᠠᠬᠤᠤᠯᠢ ᠲᠦᠯᠬᠢᠪᠡ ᠭᠡᠨᠡ᠃
ᠮᠠᠷᠭᠠᠰᠢ ᠨᠢ ᠨᠣᠶᠠᠨ ᠡᠨᠡ ᠬᠣᠶᠠᠷ ᠢ᠋ ᠠᠪᠴᠢᠷᠠᠨ ᠬᠡᠷᠡᠭ ᠤᠴᠢᠷ ᠢ᠋ ᠨᠢ ᠰᠢᠳᠬᠡᠬᠦ ᠳ᠋ᠦ᠍ ᠬᠠᠷᠢᠨ ᠥᠴᠥᠭᠡᠳᠦᠷ ᠦ᠋ᠨ ᠠᠳᠠᠯᠢ ᠬᠤᠯᠠᠭᠠᠢᠴᠢ ᠶ᠋ᠢ ᠰᠢᠭᠦᠨ ᠵᠠᠩᠳᠤᠷᠬᠤ ᠦᠭᠡᠢ ᠪᠥᠭᠡᠳ ᠰᠣᠬᠣᠷ ᠬᠤᠭᠤᠷᠴᠢ ᠳ᠋ᠤ᠌ ᠶᠡᠬᠡ ᠠᠭᠤᠷᠯᠠᠨ ᠄
《 ᠮᠠᠭᠤ ᠬᠠᠷᠠ ᠰᠣᠬᠣᠷ ᠭᠤᠢᠷᠠᠨᠴᠢ ᠴᠢ ᠠᠮᠤᠷ ᠠᠮᠢᠳᠤᠷᠠᠨ᠂ ᠬᠡᠪ ᠢ᠋ᠶ᠋ᠡᠷ ᠰᠠᠬᠢᠵᠤ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠢᠨ ᠠᠯᠳᠠᠷᠲᠤ ᠬᠥᠮᠦᠰ ᠲᠡᠢ ᠠᠲᠠᠭᠠᠷᠬᠠᠵᠤ᠂ ᠡᠷᠬᠢᠮ ᠬᠥᠮᠦᠰ ᠲᠡᠢ ᠮᠥᠴᠡᠭᠡᠷᠬᠡᠵᠦ᠂ ᠠᠮᠠᠨ ᠤ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠭᠤᠲᠤᠭᠠᠨ ᠮᠠᠭᠤᠰᠢᠶᠠᠵᠤ᠂ ᠭᠡᠭᠡᠨ ᠬᠠᠭᠠᠨ ᠤ᠋ ᠲᠥᠷᠥ᠂ ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ ᠰᠠᠢᠨ ᠬᠥᠮᠦᠨ ᠢ᠋ ᠯᠤᠢᠪᠠᠷᠳᠠᠨ ᠶᠠᠪᠤᠬᠤ ᠴᠢᠨᠢ ᠶᠠᠮᠠᠷ ᠪᠣᠳᠣᠯ ᠲᠠᠢ ᠪᠣᠢ ? 》 ᠭᠡᠪᠡ ᠃
ᠥᠨᠥ ᠰᠣᠬᠣᠷ ᠬᠤᠭᠤᠷᠴᠢ ᠶᠠᠭᠤ ᠴᠤ᠌ ᠬᠡᠯᠡᠬᠦ ᠦᠭᠡᠢ ᠲᠣᠪ ᠳᠤᠭᠤᠢ ᠪᠠᠢᠵᠤ᠂ ᠰᠠᠭᠤᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠢ᠋ ᠮᠠᠭᠠᠵᠢᠨ ᠮᠠᠯᠲᠠᠵᠤ ᠪᠠᠢᠨ ᠪᠠᠢᠨ ᠴᠢᠬᠢ ᠪᠡᠨ ᠭᠠᠵᠠᠷ ᠲᠤ᠌ ᠨᠠᠭᠠᠯᠳᠤᠭᠤᠯᠤᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠶᠤᠮ ᠰᠢᠭ᠋ ᠴᠢᠩᠨᠠᠨᠠ᠃ ᠨᠣᠶᠠᠨ ᠡᠭᠦᠨ ᠢ᠋ ᠦᠵᠡᠭᠡᠳ ᠄
《 ᠬᠥᠶᠢ ! ᠴᠢᠰᠤ ᠪᠠᠷ ᠤᠷᠤᠰᠤᠭᠰᠠᠨ ᠮᠠᠭᠤ ᠬᠠᠷᠠ ᠭᠤᠢᠷᠠᠨᠴᠢ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠤᠮ ? 》 ᠭᠡᠰᠡᠨ ᠳ᠋ᠦ᠍ ᠰᠣᠬᠣᠷ ᠬᠤᠭᠤᠷᠴᠢ ᠄
《 ᠨᠣᠶᠠᠨ ᠮᠢᠨᠢ ! ᠥᠴᠥᠭᠡᠳᠦᠷ ᠡᠨᠳᠡ ᠬᠠᠤᠯᠢ ᠳᠤᠤᠭᠠᠷᠴᠤ ᠪᠠᠢᠭᠰᠠᠨ ᠶᠤᠮᠰᠠᠨ᠃ ᠭᠡᠪᠡᠴᠦ ᠥᠨᠥᠳᠥᠷ ᠡᠨᠳᠡ ᠭᠠᠤᠯᠢ ᠳᠤᠤᠭᠠᠷᠴᠤ ᠪᠠᠢᠨᠠ᠃ ᠮᠥᠩᠭᠥ ᠪᠠᠢᠬᠤ ᠂ ᠮᠠᠯᠲᠠᠨ ᠭᠠᠷᠭᠠᠵᠤ ᠨᠣᠶᠠᠨ ᠳ᠋ᠤ᠌ ᠪᠠᠷᠢᠶᠠ ᠭᠡᠰᠡᠨ ᠶᠦᠮ 》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌ ᠨᠣᠶᠠᠨ ᠮᠠᠰᠢ ᠮᠡᠩᠳᠡᠵᠦ ᠴᠢᠷᠠᠢ ᠨᠢ ᠬᠤᠪᠢᠷᠠᠨ ᠰᠣᠬᠣᠷ ᠬᠤᠭᠤᠷᠴᠢ ᠶ᠋ᠢ ᠬᠥᠭᠡᠭᠡᠵᠦ ᠭᠠᠷᠭᠠᠪᠠ ᠭᠡᠨᠡ ᠃
– – – –
※ᠦᠬᠦᠭᠰᠡᠨ ᠢ᠋ᠶ᠋ᠡᠷ ᠲᠦᠷᠦᠭᠦᠦ— ᠦᠬᠦᠯ ᠢ᠋ᠶ᠋ᠡᠷ ᠡᠷᠢᠭᠰᠡᠨ
※ᠶᠤᠸᠠᠮᠪᠤᠤ — ᠥᠯᠥᠭᠡᠢ ᠮᠥᠩᠭᠥ
ᠢᠷᠡᠯᠲᠡ –
ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠶᠢᠰᠦᠳᠦᠭᠡᠷ ᠳᠡᠪᠲᠡᠷ ※
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠪᠢᠴᠢᠭ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠣᠨ ᠤ᠋ 5 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1984 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠳᠥᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠳ᠂ ᠣᠶᠤᠨᠴᠡᠴᠡᠭ
ᠬᠢᠨᠠᠭᠴᠢ ᠄ ᠣᠳᠬᠠᠨᠰᠣᠠ ᠂ ᠳ᠂ ᠣᠶᠤᠨᠴᠡᠴᠡᠭ ᠂ ᠲᠣ᠋·ᠨᠠᠨᠲᠢᠨ
2023.3.22