ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠭᠰᠠᠨ ᠨᠢДогшин хар лусын хааныг Дарсан нь
406ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠭᠰᠠᠨ ᠨᠢ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌᠂ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠤᠰᠤᠨ ᠳᠤ ᠪᠢᠱᠢ ᠠᠭᠤᠵᠢᠮ ᠬᠠᠭᠤᠷᠠᠢ ᠳᠡᠭᠡᠷᠡ ᠠᠮᠢᠳᠤᠷᠠᠨ ᠠᠷᠠᠳ ᠲᠦᠮᠡᠨ ᠢ᠋ ᠬᠥᠨᠥᠭᠡᠬᠦ ᠪᠠᠯᠠᠮᠠᠳ ᠬᠡᠷᠡᠭ ᠬᠢᠭᠰᠡᠨ ᠢ᠋ᠶ᠋ᠡᠷ ᠠᠷᠠᠳ ᠲᠦᠮᠡᠨ ᠦ᠌ ᠳᠠᠢᠰᠤᠨ ᠪᠣᠯᠵᠠᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠳ᠋ᠤ᠌ ᠲᠥᠭᠡ ᠬᠢᠷᠢ ᠶ᠋ᠢᠨ ᠪᠡᠶᠡ ᠲᠡᠢ᠂ ᠬᠣᠶᠠᠷ ᠲᠥᠭᠡ ᠰᠠᠬᠠᠯ ᠲᠠᠢ ᠣᠳᠤᠢ ᠡᠪᠦᠭᠡᠨ ᠪᠠᠢᠵᠠᠢ᠃ ᠡᠪᠦᠭᠡᠨ ᠳ᠋ᠦ᠍ ᠲᠡᠮᠡᠭᠡᠨ ᠬᠦᠵᠦᠭᠦᠨ ᠤᠭᠤᠲᠠ ᠲᠠᠢ᠂ ᠲᠡᠭᠡ ᠶ᠋ᠢᠨ ᠡᠪᠡᠷ ᠤᠨ ᠬᠠᠯᠪᠠᠭᠠ ᠲᠠᠢ ᠪᠥᠭᠡᠳ ᠨᠢᠭᠡᠨ ᠤᠬᠤᠨᠠ ᠲᠠᠢ ᠪᠠᠢᠵᠠᠢ᠃ ᠨᠢᠭᠡ ᠡᠳᠦᠷ ᠣᠳᠤᠢ ᠡᠪᠦᠭᠡᠨ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠮᠣᠷᠳᠠᠵᠠᠢ᠃
ᠵᠠᠮ ᠳ᠋ᠤ᠌ ᠪᠠᠨ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠡᠬᠡ ᠲᠠᠩᠭᠢᠰ ᠲᠠᠢ ᠠᠭᠤᠯᠵᠠᠪᠠ᠃
《ᠴᠢ ᠬᠠᠮᠢᠭᠠ ᠣᠴᠢᠬᠤ ᠪᠣᠢ?》ᠭᠡᠵᠦ ᠶᠡᠬᠡ ᠲᠠᠩᠭᠢᠰ ᠠᠰᠠᠭᠤᠭᠰᠠᠨ ᠳ᠋ᠤ᠌᠄ 《ᠪᠢ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠶᠠᠪᠤᠵᠤ ᠪᠣᠢ》 ᠭᠡᠵᠦ ᠡᠪᠦᠭᠡᠨ ᠬᠠᠷᠢᠭᠤᠯᠪᠠ᠃
《ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠴᠢ ᠶᠠᠭᠠᠬᠢᠵᠤ ᠳᠠᠷᠤᠬᠤ ᠪᠣᠢ?》 ᠭᠡᠵᠦ ᠶᠡᠬᠡ ᠲᠠᠩᠭᠢᠰ ᠡᠪᠦᠭᠡᠨ ᠢ᠋ ᠶᠥᠭᠡᠳᠡᠵᠡᠢ᠃ ᠡᠪᠦᠭᠡᠨ ᠰᠣᠨᠣᠰᠤᠭᠠᠳ ᠶᠡᠬᠡᠳᠡ ᠬᠢᠯᠢᠩᠨᠡᠵᠦ ᠲᠡᠭᠡ ᠶ᠋ᠢᠨ ᠡᠪᠡᠷ ᠦ᠋ᠨ ᠬᠠᠯᠪᠠᠭᠠ ᠪᠠᠷ ᠢ᠋ᠶ᠋ᠠᠨ ᠨᠢᠭᠡ ᠤᠳᠬᠤᠭᠰᠠᠨ ᠳ᠋ᠤ᠌ ᠶᠡᠬᠡ ᠲᠠᠩᠭᠢᠰ ᠢ᠋ ᠬᠠᠲᠠᠭᠠᠴᠢᠬᠠᠪᠠ᠃ ᠲᠡᠭᠦᠨ ᠢ᠋ ᠲᠡᠮᠡᠭᠡᠨ ᠬᠦᠵᠦᠭᠦᠨ ᠤᠭᠤᠲᠠᠨ ᠳ᠋ᠤ᠌ ᠪᠠᠨ ᠬᠢᠵᠦ ᠵᠠᠮ ᠢᠶᠠᠨ ᠬᠥᠭᠡᠭᠡᠪᠡ᠃ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠦᠨᠡᠭᠡ ᠲᠡᠢ ᠲᠠᠭᠠᠷᠠᠯᠳᠤᠪᠠ᠃
《ᠴᠢ ᠬᠠᠮᠢᠭᠠ ᠣᠴᠢᠬᠤ ᠪᠣᠢ?》ᠭᠡᠵᠦ ᠦᠨᠡᠭᠡ ᠲᠡᠭᠦᠨ ᠡᠴᠡ ᠠᠰᠠᠭᠤᠭᠰᠠᠨ ᠳ᠋ᠤ᠌᠄ 《ᠪᠢ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ》ᠭᠡᠵᠦ ᠡᠪᠦᠭᠡᠨ ᠬᠠᠷᠢᠭᠤᠯᠪᠠ᠃
《ᠴᠢ ᠲᠡᠭᠦᠨ ᠢ᠋ ᠬᠡᠷᠬᠢᠨ ᠡᠷᠬᠡᠰᠢᠶᠡᠯ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠬᠤ ᠪᠣᠢ!》 ᠭᠡᠵᠦ ᠦᠨᠡᠭᠡ ᠳᠣᠭᠤᠭᠢ ᠬᠢᠵᠦ ᠬᠡᠯᠡᠪᠡ᠃
ᠡᠪᠦᠭᠡᠨ ᠠᠭᠤᠷᠯᠠᠵᠤ ᠦᠨᠡᠭᠡ ᠶ᠋ᠢ ᠲᠡᠭᠡ ᠶᠢᠨ ᠡᠪᠡᠷ ᠦ᠋ᠨ ᠬᠠᠯᠪᠠᠭᠠ ᠪᠠᠷ ᠢᠶᠠᠨ ᠤᠳᠭᠤᠵᠤ ᠲᠡᠮᠡᠭᠡᠨ ᠬᠦᠵᠦᠭᠦᠨ ᠤᠭᠤᠲᠠᠨ ᠳ᠋ᠤ᠌ ᠪᠠᠨ ᠬᠢᠵᠦ ᠴᠠᠭᠠᠱᠢ ᠶᠠᠪᠤᠭᠠᠳ ᠴᠢᠨᠣᠠ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃
《ᠴᠢ ᠬᠠᠮᠢᠭᠠ ᠣᠴᠢᠬᠤ ᠪᠣᠢ?》ᠭᠡᠵᠦ ᠴᠢᠨᠤᠠᠠᠰᠠᠭᠤᠭᠰᠠᠨ ᠳ᠋ᠤ᠌᠄ 《ᠪᠢ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ》 ᠭᠡᠵᠦ ᠡᠪᠦᠭᠡᠨ ᠬᠠᠷᠢᠭᠤᠯᠪᠠ᠃
《ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠴᠢ ᠬᠡᠷᠬᠢᠨ ᠳᠠᠷᠤᠵᠤ ᠴᠢᠳᠠᠬᠤ ᠪᠣᠢ?》 ᠭᠡᠵᠦ ᠴᠢᠨᠣᠠ ᠡᠪᠦᠭᠡᠨ ᠢ᠋ ᠱᠣᠭᠯᠠᠭᠰᠠᠨ ᠳ᠋ᠤ᠌ ᠡᠪᠦᠭᠡᠨ ᠶᠡᠬᠡ ᠠᠭᠤᠷᠯᠠᠵᠤ ᠲᠡᠭᠦᠨ ᠲᠡᠭᠡ ᠶ᠋ᠢᠨ ᠡᠪᠡᠷ ᠦ᠋ᠨ ᠬᠠᠯᠪᠠᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠯᠪᠠᠭᠠᠳᠠᠵᠤ᠂ ᠲᠡᠮᠡᠭᠡᠨ ᠬᠦᠵᠦᠭᠦᠨ ᠤᠭᠤᠲᠠᠨ ᠳ᠋ᠤ᠌ ᠪᠠᠨ ᠬᠢᠭᠡᠳ ᠳᠠᠬᠢᠨ ᠴᠠᠭᠠᠱᠢ ᠪᠠᠨ ᠶᠠᠪᠤᠪᠠ᠃ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠤ ᠠᠷᠤ ᠳ᠋ᠤ᠌ ᠬᠦᠷᠪᠡ᠃ ᠡᠪᠦᠭᠡᠨ ᠳᠠᠯᠠᠨ ᠬᠤᠸᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ᠄
《ᠪᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠵᠠᠨᠤᠯᠲᠤ ᠳᠠᠢᠰᠤᠨ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠢᠷᠡᠵᠡᠢ!》ᠭᠡᠵᠦ ᠲᠩᠷᠢ ᠭᠠᠵᠠᠷ ᠢ᠋ ᠳᠣᠷᠭᠢᠲᠠᠯᠠ ᠯᠤᠤᠰ ᠤᠨ ᠵᠢᠷᠦᠬᠡ ᠶ᠋ᠢ ᠴᠡᠴᠡᠷᠡᠲᠡᠯᠡ ᠬᠠᠰᠬᠢᠷᠪᠠ᠃ ᠶᠡᠬᠡᠮᠰᠦᠭ ᠵᠠᠩ ᠲᠠᠢ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠡᠪᠦᠭᠡᠨ ᠦ᠌ ᠬᠠᠰᠬᠢᠷᠤᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ᠄
《ᠥᠴᠦᠬᠡᠨ ᠠᠮᠢᠲᠠᠨ ᠴᠢ ᠢᠩᠭᠢᠵᠦ ᠠᠶᠤᠮᠱᠢᠭ ᠦᠭᠡᠢ ᠠᠭᠠᠱᠢᠯᠠᠪᠠᠯ ᠪᠢ ᠲᠦᠮᠡᠨ ᠬᠣᠨᠢ ᠲᠠᠯᠪᠢᠵᠤ ᠪᠤᠵᠢᠭᠢᠨᠠᠭᠰᠠᠨ ᠲᠣᠭᠣᠰᠣ ᠪᠠᠷ ᠨᠢ ᠴᠢᠮᠠ ᠶ᠋ᠢ ᠳᠠᠷᠤᠵᠤ ᠠᠯᠠᠨᠠ!》ᠭᠡᠳ ᠲᠦᠮᠡᠨ ᠬᠣᠨᠢ ᠪᠠᠨ ᠲᠠᠯᠪᠢᠵᠠᠢ᠃
ᠡᠪᠦᠭᠡᠨ ᠬᠠᠷᠠᠵᠤ ᠪᠠᠢᠲᠠᠯᠠ ᠬᠣᠨᠢᠨ ᠰᠦᠷᠦᠭ ᠢᠷᠡᠪᠡ᠃ ᠲᠡᠮᠡᠭᠡᠨ ᠬᠦᠵᠦᠭᠦᠨ ᠤᠭᠤᠲᠠᠨ ᠠᠴᠠ ᠪᠡᠨ ᠴᠢᠨᠣᠠ ᠪᠠᠨ ᠭᠠᠷᠭᠠᠪᠠ᠃ ᠴᠢᠨᠣᠠ ᠶ᠋ᠢ ᠦᠵᠡᠭᠰᠡᠨ ᠬᠣᠨᠢ ᠳᠥᠷᠪᠡᠨ ᠵᠦᠭ ᠲᠦ᠍ ᠰᠠᠷᠨᠢᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠪᠠ᠃
ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠡᠭᠦᠨ ᠢ᠋ ᠦᠵᠡᠭᠡᠳ ᠰᠠᠨᠳᠤᠷᠤᠨ᠄ 《ᠬᠠᠰᠠᠷ ᠬᠤᠰᠠᠷ ᠬᠣᠶᠠᠷ ᠨᠣᠬᠠᠢ ᠪᠠᠨ ᠲᠠᠯᠪᠢᠵᠤ ᠮᠠᠭᠤ ᠡᠪᠦᠭᠡᠨ ᠴᠢᠮᠠ ᠶ᠋ᠢ ᠲᠠᠰᠤᠳᠠᠵᠤ ᠬᠠᠶᠠᠶᠠ》ᠭᠡᠳ ᠬᠣᠶᠠᠷ ᠨᠣᠬᠠᠢ ᠪᠠᠨ ᠥᠭᠡᠳᠡ ᠡᠴᠡ ᠪᠡᠨ ᠲᠠᠯᠪᠢᠭᠠᠳ ᠬᠠᠭᠠᠨ ᠰᠡᠳᠬᠢᠯ ᠠᠭᠤᠵᠢᠷᠠᠨ ᠰᠠᠭᠤᠪᠠ᠃
ᠬᠠᠷᠠᠵᠤ ᠪᠠᠢᠲᠠᠯᠠ ᠬᠣᠶᠠᠷ ᠨᠣᠬᠠᠢ ᠭᠦᠶᠦᠨ ᠢᠷᠡᠪᠡ᠃ ᠡᠪᠦᠭᠡᠨ ᠤᠭᠤᠲᠠᠨ ᠡᠴᠡ ᠪᠡᠨ ᠦᠨᠡᠭᠡ ᠶ᠋ᠢ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠬᠠᠰᠠᠷ ᠬᠤᠰᠠᠷ ᠬᠣᠶᠠᠷ ᠨᠣᠬᠠᠢ ᠲᠡᠭᠦᠨ ᠢ᠋ ᠬᠥᠭᠡᠭᠡᠵᠦ ᠪᠠᠷᠠ ᠨᠢ ᠴᠦ᠍ ᠦᠵᠡᠭᠳᠡᠬᠦ ᠪᠡᠨ ᠪᠣᠯᠢᠪᠠ᠃
ᠡᠭᠦᠨ ᠳ᠋ᠦ᠍ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠠᠷᠵᠠᠰᠬᠢᠵᠦ ᠡᠬᠢᠯᠡᠪᠡ᠃ ᠲᠡᠷᠡ ᠲᠦᠮᠡᠨ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠡᠪᠦᠭᠡᠨ ᠢ᠋ ᠪᠦᠰᠡᠯᠡᠨ ᠳᠠᠭᠠᠷᠢᠵᠠᠢ᠃
ᠣᠳᠣᠢ ᠡᠪᠦᠭᠡᠨ ᠰᠠᠨᠳᠤᠷᠴᠤ ᠪᠠᠴᠢᠮᠳᠠᠭᠰᠠᠨ ᠴᠤ᠌ ᠦᠭᠡᠢ ᠪᠡᠷ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠥᠭᠥᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃ ᠴᠡᠷᠢᠭ ᠦ᠋ᠳ ᠳᠥᠭᠥᠨ ᠢᠷᠡᠬᠦ ᠳ᠋ᠦ᠍ ᠲᠡᠮᠡᠭᠡᠨ ᠬᠦᠵᠦᠭᠦᠨ ᠤᠭᠤᠲᠠᠨ ᠳ᠋ᠠᠬᠢ ᠤᠰᠤ ᠪᠠᠨ ᠴᠢᠳᠬᠤᠭᠰᠠᠨ ᠳ᠋ᠤ᠌ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠪᠣᠯᠤᠨ ᠲᠡᠭᠦᠨ ᠦ᠌ ᠣᠷᠳᠣᠨ ᠬᠠᠷᠰᠢ ᠨᠢ ᠲᠩᠷᠢ ᠲᠤᠯᠤᠭᠰᠠᠨ ᠶᠡᠬᠡ ᠤᠰᠤᠨ ᠳᠠᠪᠠᠯᠭᠠᠨ ᠳ᠋ᠤ᠌ ᠤᠷᠤᠰᠤᠨ ᠠᠯᠠᠭᠠ ᠪᠣᠯᠵᠠᠢ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠳᠣᠭᠰᠢᠨ ᠬᠠᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠡᠬᠡ ᠭᠠᠵᠠᠷ ᠳᠡᠭᠡᠷᠡ ᠭᠠᠷᠴᠤ ᠳᠤᠷᠠ ᠪᠠᠷ ᠢᠶᠠᠨ ᠠᠭᠠᠱᠢᠯᠠᠬᠤ ᠪᠠᠨ ᠪᠣᠯᠢᠭᠠᠳ ᠤᠰᠤᠨ ᠳᠤ ᠠᠮᠢᠳᠤᠷᠠᠬᠤ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ᠃