ᠡᠬᠡ ᠨᠤᠲᠤᠭ ᠤ᠋ᠨ ᠨᠠᠢᠷᠠᠯ - ᠣ ᠂ ᠪᠤᠶᠠᠨ᠌ᠥ᠌ᠯᠵᠡᠢ Эх нутгийн найрал - О᠂ Буянөлзэй
253ᠡᠬᠡ ᠨᠤᠲᠤᠭ ᠤ᠋ᠨ ᠨᠠᠢᠷᠠᠯ
— ᠦᠭᠡ ᠪᠡᠷ ᠨᠤᠲ᠋ᠯᠠᠵᠤ ᠦᠰᠦᠭ ᠢ᠋ᠶ᠋ᠡᠷ ᠬᠥᠭᠵᠢᠮᠳᠡᠨᠡ ᠪᠢ ᠃
1
ᠨᠢᠳᠦ ᠦᠭᠡᠢ ᠬᠥᠪᠦᠷᠡᠯ ᠢ᠋ᠶ᠋ᠡᠷ ᠬᠡᠪᠡᠯᠢ ᠳ᠋ᠦ᠍ ᠪᠠᠢᠬᠤ ᠳ᠋ᠤ᠌ 《ᠨᠤᠲᠤᠭ ᠤ᠋ᠨ ᠦᠨᠳᠦᠰᠦ 》 ᠭᠡᠵᠦ ᠬᠠᠢᠷᠠᠯᠠᠳᠠᠭ ᠡᠵᠢ ᠶ᠋ᠢᠨ ᠮᠢᠨᠢ᠃ ᠰᠢᠲᠦ ᠦᠭᠡᠢ ᠨᠢᠯᠬᠠ ᠪᠠᠷ ᠮᠠᠨᠴᠤᠢ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ 《 ᠭᠣᠯᠣᠮᠲᠠ ᠶ᠋ᠢᠨ ᠬᠣᠢᠴᠢ 》 ᠭᠡᠵᠦ ᠪᠦᠪᠡᠢᠯᠡᠳᠡᠭ ᠠᠪᠤ ᠶ᠋ᠢᠨ ᠮᠢᠨᠢ ᠬᠠᠢᠷᠠ ᠡᠨᠡᠷᠢᠯ ᠬᠦᠰᠡᠯ ᠨᠠᠢᠳᠠᠯᠭᠠ ᠪᠦᠷ ᠡᠬᠡ ᠨᠤᠲᠤᠭ ᠴᠢᠮᠠᠲᠠᠢᠭᠠᠨ ᠬᠣᠯᠪᠣᠯᠳᠤᠵᠤ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
— ᠡᠵᠢ ᠶ᠋ᠢᠨ ᠡᠵᠢ ᠨᠤᠲᠤᠭ ᠃
— ᠠᠪᠤ ᠶ᠋ᠢᠨ ᠠᠪᠤ ᠨᠤᠲᠤᠭ ᠃
2
ᠬᠠᠨᠠ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠮᠥᠯᠬᠥᠭᠰᠡᠨ ᠮᠥᠷ ᠢ᠋
ᠬᠠᠲᠠᠪᠴᠢ ᠳᠠᠪᠠᠭᠠᠳ ᠭᠢᠰᠬᠢᠭᠰᠡᠨ ᠮᠥᠷ ᠢ᠋
ᠬᠠᠨᠠᠭᠠᠷ ᠲᠠᠯᠠ ᠪᠠᠷ ᠲᠣᠭᠯᠠᠭᠰᠠᠨ ᠮᠥᠷ ᠢ᠋
ᠬᠠᠩᠭᠠᠯ ᠡᠮᠨᠢᠭ ᠴᠢᠬᠢᠳᠡᠭᠰᠡᠨ ᠮᠥᠷ ᠢ᠋ ᠬᠥᠷᠥᠰᠥᠨ ᠳ᠋ᠡᠭᠡᠨ ᠦᠯᠡᠳᠡᠭᠡᠭᠰᠡᠨ ᠨᠤᠲᠤᠭ ᠮᠢᠨᠢ
— ᠪᠣᠷᠣ ᠮᠥᠷ ᠮᠢᠨᠢ ᠲᠡᠨᠳᠡ ᠂ ᠪᠣᠰᠤᠭᠠ ᠪᠡᠶᠡ ᠮᠢᠨᠢ ᠠᠳᠠ ᠃
— ᠪᠣᠷᠣ ᠮᠥᠷ ᠮᠢᠨᠦ ᠥᠮᠴᠢ ᠂ ᠪᠣᠰᠤᠭᠠ ᠪᠡᠶᠡ ᠴᠢᠨᠦ ᠥᠮᠴᠢ ᠃
3
ᠠᠯᠪᠠᠳᠠᠵᠤ ᠪᠣᠯᠳᠠᠭ ᠦᠭᠡᠢ ᠰᠡᠳᠬᠢᠯ ᠡᠴᠡ ᠤᠷᠭᠤᠭᠰᠠᠨ ᠂ ᠠᠶᠤᠯᠭᠠᠵᠤ ᠣᠯᠳᠠᠭ ᠦᠭᠡᠢ ᠬᠠᠢᠷᠠ ᠠ᠋ᠴᠠ ᠨᠠᠬᠢᠶᠠᠯᠠᠭᠰᠠᠨ ᠬᠣᠩᠭᠣᠷ ᠬᠥᠮᠦᠨ ᠦ᠌ ᠵᠢᠷᠦᠬᠡᠨ ᠢᠨᠢᠶᠡᠳᠦ ᠂ ᠬᠣᠣᠰ ᠭᠠᠷ ᠤ᠋ᠨ ᠰᠡᠳᠬᠢᠯ ᠦ᠋ᠨ ᠳᠠᠯᠠᠯᠤᠯᠲᠠ ᠶ᠋ᠢ ᠨᠤᠲᠤᠭ ᠮᠢᠨᠢ ᠨᠠᠳᠠᠳᠤ ᠪᠠᠨ ᠦᠭᠭᠦᠭᠰᠡᠨ ᠡᠴᠡ ᠭᠡᠷ ᠪᠦᠯᠢ ᠰᠡᠳᠬᠢᠯ ᠬᠠᠯᠠᠰᠬᠠᠵᠤ ᠂ᠭᠠᠯ ᠭᠣᠯᠣᠮᠲᠠ ᠬᠠᠢᠷᠠ ᠶ᠋ᠢ ᠬᠥᠭᠵᠢᠭᠡᠨᠡ ᠃
4
ᠤᠬᠠᠭᠠᠨ ᠪᠣᠳᠣᠯ ᠳ᠋ᠤᠨᠢ ᠬᠦᠯᠦᠭ ᠦ᠋ᠨ ᠭᠦᠶᠦᠳᠦ ᠶ᠋ᠢ
ᠤᠷᠤᠯᠳᠤᠵᠤ ᠰᠢᠯᠭᠠᠮᠠᠷ ᠪᠣᠳᠣᠯᠭᠠᠲᠤ ᠬᠦᠦ ᠲᠡᠢ
ᠤᠶᠠᠬᠠᠨ ᠵᠠᠩ ᠳ᠋ᠤᠨᠢ ᠠᠭᠲᠠ ᠶ᠋ᠢᠨ ᠡᠮᠨᠢᠭ ᠢ᠋
ᠤᠶᠠᠵᠤ ᠰᠣᠢᠮᠠᠷ ᠤᠬᠠᠭᠠᠨᠲᠤ ᠬᠡᠦᠬᠡᠨ ᠲᠡᠢ ᠡᠬᠡ ᠨᠤᠲᠤᠭ ᠮᠢᠨᠢ ᠲᠡᠢᠮᠦ ᠨᠠᠢᠵᠢ ᠲᠠᠢ ᠳ᠋ᠠᠭᠠᠨ ᠪᠢ ᠣᠮᠣᠭᠰᠢᠵᠤ ᠂ ᠡᠢᠮᠦ ᠦᠷᠡ ᠲᠡᠢ ᠳ᠋ᠡᠭᠡᠨ ᠴᠢ ᠠᠭᠤᠵᠢᠷᠠᠨᠠ᠃
5
ᠴᠡᠩᠬᠡᠷ ᠲᠡᠭᠷᠢ ᠨᠢ ᠴᠠᠭᠠᠨ ᠴᠢᠮᠡᠭ ᠲᠡᠢ — ᠲᠩᠷᠢ ᠶ᠋ᠢᠨ ᠠᠭᠤᠳᠠᠮ ᠵᠠᠢ ᠪᠠᠷ ᠨᠢ ᠬᠤᠨ ᠨᠢᠰᠦᠭᠡᠳ ᠴᠢᠮᠡᠭᠡᠯᠡᠨᠡ ᠃
ᠴᠡᠯᠡᠭᠡᠷ ᠲᠠᠯᠠ ᠨᠢ ᠴᠠᠭᠠᠨ ᠴᠢᠮᠡᠭ ᠲᠡᠢ — ᠲᠠᠯᠠ ᠶ᠋ᠢᠨ ᠠᠭᠤᠳᠠᠮ ᠵᠠᠢ ᠶ᠋ᠢ ᠨᠢ ᠬᠣᠨᠢ ᠪᠡᠯᠴᠢᠭᠡᠳ ᠴᠢᠮᠡᠭᠡᠯᠡᠨᠡ ᠃
ᠴᠡᠩᠬᠡᠷ ᠲᠩᠷᠢ ᠴᠡᠩᠬᠡᠷ ᠨᠠᠭᠤᠷ ᠬᠤᠨ ᠤ᠋ ᠳᠠᠯᠠᠪᠴᠢ ᠪᠠᠷ ᠬᠣᠯᠪᠣᠵᠤ ᠨᠣᠭᠣᠭᠠᠨ ᠲᠠᠯᠠ ᠨᠣᠭᠣᠭᠠᠨ ᠬᠣᠲᠠ ᠬᠣᠨᠢ ᠶ᠋ᠢᠨ ᠮᠥᠷ ᠢ᠋ᠶ᠋ᠡᠷ ᠬᠣᠯᠪᠣᠨᠠ ᠃
— ᠬᠤᠨ ᠤ᠋ ᠵᠡᠯᠡ ᠲᠡᠷᠪᠡᠯᠲᠡ ᠦᠭᠡᠢ ᠪᠠᠢᠭᠠᠰᠠᠢ
— ᠬᠣᠨᠢ ᠶ᠋ᠢᠨ ᠰᠦᠷᠦᠭ ᠦᠷᠭᠦᠯᠲᠡ ᠦᠭᠡᠢ ᠪᠠᠢᠭᠠᠰᠠᠢ ᠁
6
ᠠᠯᠳᠠᠭᠤᠯ ᠡᠷᠢᠭᠡᠳ ᠬᠡᠭᠡᠷᠡ ᠬᠣᠨᠣᠭᠯᠠᠭᠰᠠᠨ ᠳᠡᠭᠡᠳᠦᠰ ᠮᠢᠨᠢ 《ᠳᠣᠯᠣᠭᠠᠨ ᠣᠳᠣ 》 ᠪᠠᠷ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠬᠠᠷᠠᠭᠰᠠᠨ ᠂
ᠠᠶᠠᠨ ᠢ᠋ᠶ᠋ᠠᠷ ᠪᠠᠭᠤᠭᠠᠳ ᠮᠥᠴᠡ ᠪᠡᠨ ᠡᠨᠳᠡᠭᠦᠷᠡᠭᠰᠡᠨ ᠭᠠᠯ ᠤ᠋ᠨ ᠬᠢᠨ 《 ᠭᠤᠷᠪᠠᠨ ᠮᠠᠷᠠᠯ 》 ᠢ᠋ᠶ᠋ᠠᠷ ᠴᠠᠭ ᠬᠡᠴᠡ ᠪᠡᠨ ᠬᠡᠮᠵᠢᠭᠰᠡᠨ !
ᠠᠩᠭᠢᠷ ᠪᠣᠲᠣᠭᠣ ᠶ᠋ᠢᠨ ᠪᠣᠢᠯᠠᠭᠠ ᠰᠢᠷᠠ ᠪᠦᠷᠦᠢ ᠪᠡᠷ ᠰᠣᠨᠣᠰᠳᠠᠨᠠ ᠂ ᠶᠠᠩᠭᠢᠷ ᠲᠡᠭᠡ ᠵᠠ ᠵᠣᠭᠰᠠᠭᠠᠯ ᠴᠠᠭᠠᠨ ᠦᠷ ᠢ᠋ᠶ᠋ᠡᠷ ᠬᠠᠷᠠᠭᠳᠠᠨᠠ ᠂ ᠨᠠᠮᠤᠷ ᠤ᠋ᠨ ᠰᠢᠪᠠᠭᠤᠳ ᠤ᠋ᠨ ᠦᠢᠮᠡᠭᠡᠨ ᠬᠠᠰᠠᠭ ᠤ᠋ᠨ ᠬᠢᠬᠤᠨᠠᠭᠠᠨ ᠳ᠋ᠤ᠌ ᠬᠣᠣᠰᠯᠠᠨ ᠲᠣᠭᠣᠯᠳᠤᠨᠠ ᠂ ᠬᠠᠪᠤᠷ ᠤ᠋ᠨ ᠰᠠᠯᠬᠢ ᠶ᠋ᠢᠨ ᠱᠤᠤᠭᠢᠶᠠᠨ ᠭᠥᠯᠢᠮ ᠦ᠋ᠨ ᠲᠡᠷᠪᠡᠯᠳᠡ ᠲᠡᠢ ᠳᠡᠭᠳᠡᠨ ᠨᠢᠰᠦᠨᠡ ᠃
ᠡᠦᠷᠡᠭᠳᠡᠵᠦ ᠬᠢᠯᠢᠰᠳᠡᠬᠦ ᠳ᠋ᠦ᠍ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠬᠤᠪᠢᠶᠠᠯᠴᠠᠳᠠᠭ ᠨᠢ ᠨᠠᠢᠵᠢ ᠲᠡᠷᠡ ᠂ ᠥᠨᠳᠡᠢᠵᠦ ᠲᠡᠩᠵᠢᠬᠦ ᠳ᠋ᠦ᠍ ᠵᠢᠷᠭᠠᠯ ᠳ᠋ᠠᠭᠠᠨ ᠪᠠᠶᠠᠰᠳᠠᠭ ᠨᠢ ᠨᠥᠬᠥᠷ ᠲᠡᠷᠡ ᠂ ᠦᠬᠦᠵᠦ ᠰᠡᠬᠡᠬᠦ ᠳ᠋ᠦ᠍ ᠭᠤᠨᠢᠭ ᠢ᠋ᠶ᠋ᠠᠨ ᠬᠤᠪᠢᠶᠠᠳᠠᠭ ᠨᠢ ᠬᠠᠨᠢ ᠲᠡᠷᠡ ᠂ ᠦᠳᠡᠯᠡᠵᠦ ᠮᠤᠨᠤᠬᠤ ᠳ᠋ᠤ᠌ ᠡᠷᠭᠦᠵᠦ ᠬᠦᠨᠳᠦᠯᠡᠳᠡᠭ ᠨᠢ ᠦᠷᠡ ᠲᠡᠷᠡ ᠃
《 ᠡᠨᠡ ᠪᠣᠯ ᠮᠢᠨᠦ ᠴᠡᠳᠡᠭ 》 ᠭᠡᠵᠦ ᠨᠤᠲᠤᠭ ᠨᠠᠳᠠᠳᠤ ᠤᠯᠠᠮᠵᠢᠯᠠᠭᠰᠠᠨ ᠃
《 ᠡᠨᠡ ᠪᠣᠯ ᠠᠮᠢᠳᠤᠷᠠᠯ ᠤ᠋ᠨ ᠬᠥᠭᠵᠢᠮ 》 ᠭᠡᠵᠦ ᠪᠢ ᠬᠥᠮᠦᠨ ᠡᠴᠡ ᠰᠣᠨᠣᠰᠤᠭᠰᠠᠨ ᠃
ᠡᠨᠡ ᠮᠠᠨᠢ ᠬᠦᠩᠭᠢᠨᠡᠮᠡ ᠴᠠᠩᠭᠢᠨᠠᠮᠠ ᠣᠯᠠᠨ ᠴᠤᠤᠷᠢᠶᠠ ᠨᠡᠢᠯᠡᠯᠳᠦᠭᠰᠡᠨ ᠶᠡᠬᠡ ᠨᠠᠢᠷᠠᠯ ᠃ ᠨᠡᠷᠡ ᠦᠭᠡᠢ ᠣᠯᠠᠨ ᠬᠥᠭᠵᠢᠮᠴᠢ ᠲᠡᠭᠦᠨ ᠢ᠋ ᠳᠠᠭᠤᠷᠢᠰᠤᠭᠤᠯᠵᠤ ᠪᠠᠢᠨᠠ ᠃ ᠤᠷᠲᠤ ᠣᠭᠵᠣᠮ ᠤ᠋ᠨ ᠡᠬᠡᠰᠢᠭ ᠢ᠋ᠶ᠋ᠡᠷ ᠵᠠᠪᠰᠠᠷᠯᠠᠭᠰᠠᠨ ᠪᠠᠭᠠ ᠳᠠᠭᠤᠯᠠᠯ ᠃ ᠶᠠᠯᠢ ᠦᠭᠡᠢ ᠵᠢᠭᠠᠬᠠᠨ ᠤᠶᠠᠩᠭᠠᠴᠢ ᠲᠡᠭᠦᠨ ᠢ᠋ ᠨᠤᠤᠢᠬᠠᠯᠠᠵᠤ ᠪᠠᠢᠨᠠ ᠃
《ᠡᠪᠦᠯ ᠦ᠋ᠨ ᠰᠢᠭᠤᠷᠭᠠ 》 ᠮᠡᠲᠦ ᠲᠣᠭᠰᠢᠨ ᠠᠢᠵᠢᠮ ᠃
《ᠨᠠᠮᠤᠷ ᠰᠠᠯᠬᠢ 》 ᠰᠢᠭ᠋ ᠬᠠᠩᠭᠢᠨᠠᠭᠰᠠᠨ ᠠᠶᠠᠰ ᠃
《 ᠬᠠᠪᠤᠷ ᠤ᠋ᠨ ᠵᠢᠪᠠᠷ 》 ᠮᠡᠲᠦ ᠤᠶᠠᠷᠠᠭᠤᠨ ᠴᠤᠤᠷᠢᠶᠠ ᠃
《 ᠵᠤᠨ ᠤ᠋ ᠬᠤᠷᠠ 》 ᠰᠢᠭ᠋ ᠠᠳᠠᠷᠬᠠᠨ ᠴᠣᠬᠢᠯᠭᠠ ᠃
7
ᠡᠵᠢ ᠮᠢᠨᠢ ᠨᠠᠶᠠᠨ ᠨᠠᠰᠤᠲᠠᠢ ᠃
ᠨᠤᠲᠤᠭ ᠮᠢᠨᠢ ᠮᠢᠩᠭᠠᠨ ᠨᠠᠰᠤᠲᠠᠢ ᠃ ᠡᠬᠡ ᠨᠤᠲᠤᠭ ᠮᠢᠨᠢ ᠮᠢᠩᠭᠠᠨ ᠨᠠᠰᠤᠯᠠᠪᠠᠴᠤ ᠬᠡᠵᠢᠶᠡᠳᠡ ᠮᠠᠨ ᠤ᠋ ᠡᠬᠡ ᠃ ᠦᠶᠡ ᠰᠤᠨᠵᠤ ( ᠳᠡᠭᠡᠭᠰᠢᠯᠡᠵᠦ ) ᠡᠯᠦᠨᠴᠡ ᠪᠣᠯᠤᠭᠠ ᠦᠭᠡᠢ ᠂ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠢᠨᠢ ᠬᠡᠵᠢᠶᠡᠳᠡ ᠲᠥᠷᠥᠭᠰᠡᠨ ᠡᠵᠢ ᠃ ᠦᠰᠦ ᠴᠠᠢᠵᠤ ᠡᠮᠡᠭᠡᠨ ᠪᠣᠯᠤᠭᠠ ᠦᠭᠡᠢ ᠂ ᠣᠨ ᠤ᠋ ᠣᠨ ᠥᠨᠢᠳᠡ ᠨᠠᠷᠭᠢᠮᠠ ᠵᠠᠯᠠᠭᠤ ᠃ ᠨᠠᠷᠭᠢᠮᠠ ᠵᠠᠯᠠᠭᠤ ᠶ᠋ᠢᠨ ᠬᠠᠴᠠᠷ ᠳᠠᠭᠠᠨ ᠨᠣᠭᠣᠭᠠᠨ ᠲᠦᠷᠬᠢᠵᠦ ᠨᠠᠮᠤᠷ ᠤ᠋ᠨ ᠬᠢᠷᠠᠭᠤ ᠳ᠋ᠤ᠌ ᠰᠠᠨᠴᠢᠭ ᠪᠤᠭᠤᠷᠤᠯᠳᠠᠪᠠᠴᠤ ᠬᠠᠪᠤᠷ ᠲᠠᠭᠠᠨ ᠵᠠᠯᠠᠭᠤᠵᠢᠨᠠ ᠃ᠲᠠᠯᠠ ᠶ᠋ᠢᠨ ᠰᠣᠷᠭᠣᠭ ᠪᠡᠯᠴᠢᠭᠡᠷ ᠡᠴᠡ ᠲᠠᠨ ᠤ᠋ ᠵᠢᠰᠦ ᠶ᠋ᠢ ᠪᠢᠳᠡ ᠬᠠᠷᠠᠯᠠ᠃ ᠰᠡᠷᠭᠦᠵᠦ ᠠᠮᠢᠵᠢᠬᠤ ᠶ᠋ᠢ ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠂ ᠰᠡᠷᠡᠢᠵᠦ ᠤᠷᠭᠤᠬᠤ ᠶ᠋ᠢ ᠦᠵᠦᠭᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠷᠠᠢᠯᠠᠵᠤ ᠂ ᠰᠤᠷ ᠰᠣᠶᠣᠭᠠ ᠲᠡᠰᠦᠷᠡᠰᠢ ᠦᠭᠡᠢ ᠲᠠᠯᠠᠠᠴᠠ ᠡᠬᠡ ᠨᠤᠲᠤᠭ ᠤ᠋ᠨ ᠡᠬᠡ ᠵᠢᠰᠦ ᠶ᠋ᠢ ᠵᠢᠯ ᠪᠦᠷᠢ ᠣᠯᠵᠤ ᠬᠠᠷᠠᠨᠠ᠃ ᠨᠠᠰᠤ ᠴᠢᠨᠢ ᠮᠢᠩᠭᠠ ᠂ ᠵᠢᠰᠦ ᠴᠢᠨᠢ ᠨᠣᠭᠣᠭᠠᠨ ᠃
8
ᠴᠢᠳᠥᠷ ᠢ᠋ ᠨᠢ ᠲᠠᠢᠯᠤᠭᠰᠠᠨ ᠬᠦᠯᠦᠭ ᠦ᠋ᠨ ᠲᠤᠭᠤᠷᠠᠢ ᠰᠢᠭ᠋ ᠵᠢᠷᠪᠢᠯᠵᠡᠭᠰᠡᠨ ᠨᠤᠲᠤᠭ ᠮᠢᠨᠢ ᠂ ᠬᠥᠰᠬᠡ ᠶ᠋ᠢ ᠨᠢ ᠶᠡᠭᠦᠯᠡᠭᠰᠡᠨ ᠲᠡᠮᠡᠭᠡ ᠶ᠋ᠢᠨ ᠠᠯᠬᠤᠭᠠ ᠰᠢᠭ᠋ ᠲᠡᠨᠢᠭᠦᠬᠡᠨ ᠨᠤᠲᠤᠭ ᠮᠢᠨᠢ ᠂ 《 ᠠᠶᠠ ᠬᠥᠭᠡᠷᠦᠬᠦᠢ ᠂ ᠡᠨᠡ ᠳᠡᠯᠡᠬᠡᠢ ᠪᠦᠷ ᠬᠥᠭᠡᠷᠦᠬᠦᠢ 》 ᠭᠡᠵᠦ ᠴᠢ ᠬᠡᠯᠡᠬᠦ ᠰᠢᠭ ᠃ ᠢᠩᠭᠢᠬᠦ ᠳ᠋ᠡᠭᠡᠨ ᠯᠡ ᠴᠢᠨᠦ ᠡᠯᠢᠭᠡᠨ ᠳ᠋ᠦ᠍ ᠵᠦᠢᠯ ᠵᠦᠢᠯ ᠦ᠋ᠨ ᠡᠪᠡᠰᠦ ᠤᠷᠭᠤᠵᠤ ᠂ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠠᠮᠢᠲᠠᠨ ᠠᠷᠢᠶᠠᠲᠠᠨ ᠣᠷᠣᠰᠢᠨᠠ ᠃
ᠠᠶᠠᠭᠠ ᠴᠡᠭᠡ ᠤᠤᠭᠤᠴᠢᠭᠰᠠᠨ ᠴᠡᠭᠡᠵᠢ ᠰᠢᠭ ᠠᠭᠤᠵᠢᠮ ᠨᠤᠲᠤᠭ ᠮᠢᠨᠢ 《 ᠠᠢ ᠬᠥᠭᠡᠷᠦᠬᠦᠢ ᠂ ᠡᠨᠡ ᠳᠡᠯᠡᠬᠡᠢ ᠪᠦᠷ ᠬᠥᠭᠡᠷᠦᠬᠦᠢ ︾ᠭᠡᠵᠦ ᠳᠠᠪᠲᠠᠨ ᠬᠡᠯᠡᠨᠡ ᠃ ᠳᠠᠬᠢᠨ ᠬᠡᠯᠡᠨᠡ ᠃
《ᠲᠠᠯᠠ ᠶ᠋ᠢᠨ ᠪᠠᠷᠠᠭᠤᠨ ᠳ᠋ᠤ᠌ ᠲᠤᠶᠠᠭᠠ ᠲᠣᠰᠤᠯᠠ ᠂ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠡᠴᠡ ᠨᠠᠷᠠ ᠤᠳᠠᠯ ᠦᠭᠡᠢ ᠤᠷᠭᠤᠨᠠ ᠃ 》 ᠠᠭᠲᠠ ᠶ᠋ᠢᠨ ᠳᠦᠪᠦᠷᠭᠡ ᠰᠣᠨᠣᠰᠳᠠᠵᠤ ᠂ ᠠᠪᠠ ᠶ᠋ᠢᠨ ᠨᠣᠬᠠᠢ ᠬᠤᠴᠠᠯᠳᠤᠵᠤ ᠮᠠᠯᠴᠢᠳ ᠤ᠋ᠨ ᠬᠥᠭᠵᠢᠯᠲᠦ ᠬᠥᠳᠡᠯᠮᠦᠷᠢ 《 ᠴᠢᠨᠣᠠ ᠶ᠋ᠢᠨ ᠠᠪᠠ 》 ᠶ᠋ᠢᠨ ᠬᠢᠨᠢ ᠠᠢᠰᠤᠢ ᠃
ᠨᠤᠲᠤᠭ ᠮᠢᠨᠢ ᠂ ᠦᠷᠡ ᠴᠢᠨᠠᠷ ᠨᠢᠭᠡ ᠦᠭᠡ ᠨᠡᠮᠡᠰᠦᠭᠡᠢ !
《ᠠᠢ ᠵᠠᠨᠤᠯᠲᠠᠢ ᠂ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠴᠢᠨᠣᠠ ᠪᠣᠷ ᠵᠠᠨᠤᠯᠲᠠᠢ ᠃ 》