ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠬᠣᠷᠢᠳᠤᠭᠠᠷ ᠪᠦᠯᠦᠭ > Хөх судар - Инжинаш < Хорьдугаар бүлэг >
351ᠣᠯᠠᠨ ᠤ᠋ ᠡᠮᠦᠨᠡ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠᠵᠤ ᠤᠬᠠᠮᠵᠢᠯᠠᠯᠳᠤ ᠮᠤᠬᠤᠯᠢ ᠭᠠᠷ ᠢ᠋ᠶ᠋ᠠᠨ ᠬᠦᠯᠢᠭᠦᠯᠪᠡ
ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠪᠡᠶᠡ ᠪᠡᠨ ᠴᠦᠯᠡᠵᠦ ᠤᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ ᠮᠥᠷᠥ ᠶᠦ᠍ᠭᠡᠨ ᠴᠠᠪᠴᠢᠪᠠ
ᠬᠣᠷᠢᠳᠤᠭᠠᠷ ᠪᠦᠯᠦᠭ
ᠰᠥᠩ ᠨᠢᠩᠽᠦ᠋ᠩ ᠦ᠋ᠨ ᠴᠢᠩ ᠶᠤᠸᠠᠨ ᠤ᠋ ᠲᠡᠷᠢᠭᠦᠨ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋ ᠮᠢᠩ ᠴᠠᠩ ᠤ᠋ᠨ
ᠵᠢᠷᠭᠤᠳᠤᠭᠠᠷ ᠣᠨ ᠂ ᠲᠠᠢᠽᠦ ᠭᠤᠴᠢᠨ ᠳᠥᠷᠪᠡᠨ ᠨᠠᠰᠤᠨ ᠰᠡᠭᠦᠳᠡᠷ ᠲᠡᠢ ᠂ ᠬᠥᠬᠡᠭᠴᠢᠨ ᠲᠠᠤᠯᠠᠢ ᠵᠢᠯ ᠪᠠᠢᠭᠰᠠᠭᠠᠷ ᠪᠣᠢ
ᠣᠯᠠᠨ ᠤ᠋ ᠡᠮᠦᠨᠡ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠᠵᠤ ᠤᠬᠠᠮᠵᠢᠯᠠᠯᠳᠤ ᠮᠤᠬᠤᠯᠢ ᠭᠠᠷ ᠢ᠋ᠶ᠋ᠠᠨ ᠬᠦᠯᠢᠭᠦᠯᠪᠡ
ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠪᠡᠶᠡ ᠪᠡᠨ ᠴᠦᠯᠡᠵᠦ ᠤᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ ᠮᠥᠷᠥ ᠶᠦ᠍ᠭᠡᠨ ᠴᠠᠪᠴᠢᠪᠠ
ᠤᠭᠰᠠᠭᠠ ᠲᠥᠷᠥᠯ ᠢ᠋ ᠦᠯᠦ ᠬᠠᠷᠠᠳᠠᠬᠤ ᠣᠶᠤᠨᠲᠤ ᠪᠣᠭᠳᠠ ᠶ᠋ᠢ ᠭᠠᠢᠬᠠᠬᠤᠶᠠ
ᠣᠯᠠᠨ ᠤ᠋ ᠡᠮᠦᠨᠡ ᠪᠡᠶᠡ ᠪᠡᠨ ᠬᠦᠯᠢᠬᠦ ᠤᠬᠠᠭᠠᠨᠲᠤ ᠵᠢᠨᠦᠩ ᠢ᠋ ᠶᠠᠭᠠᠬᠢᠶᠠ ᠂
ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠮᠥᠷᠥ ᠪᠡᠨ ᠴᠠᠪᠴᠢᠬᠤ ᠤᠷᠢᠶᠠᠩᠬᠠᠨ ᠤ᠋ ᠵᠡᠯᠮᠡ ᠶ᠋ᠢ ᠦᠵᠡᠬᠦᠯᠡ ᠂
ᠤᠳᠬᠠᠲᠤ ᠲᠡᠭᠷᠢ ᠣᠷᠴᠢᠯᠠᠩ ᠳ᠋ᠤᠷ ᠲᠥᠷᠥᠵᠦ ᠤᠯᠠᠷᠢᠬᠤ ᠲᠥᠷᠥ ᠶ᠋ᠢ ᠲᠡᠳᠬᠦᠵᠦᠬᠦᠢ ᠃
ᠲᠡᠨᠳᠡᠴᠡ ᠵᠢᠨᠦᠩ ᠮᠤᠬᠤᠯᠢ ᠰᠤᠯᠠ ᠴᠡᠷᠢᠭ ᠦ᠋ᠨ ᠰᠦᠷᠦᠭ ᠡᠴᠡ ᠮᠠᠩᠭᠤᠳ ᠤ᠋ᠨ ᠬᠣᠢᠯᠳᠠᠷ ᠬᠣᠰᠢᠭᠤᠴᠢ ᠶ᠋ᠢ ᠣᠯᠤᠭᠠᠳ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠂ ᠶᠠᠭᠠᠷᠠᠨ ᠪᠡᠶᠡ ᠪᠡᠷ ᠠᠴᠢᠷᠠᠵᠤ ᠱᠠᠩ ᠬᠡᠰᠢᠭ ᠡᠷᠭᠦᠮᠵᠢᠯᠡᠯ ᠵᠡᠷᠭᠡ ᠶ᠋ᠢ ᠢᠨᠦ ᠣᠯᠭᠠᠭᠤᠯᠤᠭᠠᠳ ᠳᠠᠷᠤᠢ ᠲᠠᠢᠽᠦ ᠳ᠋ᠦ᠍ᠷ ᠰᠥᠭᠥᠳᠴᠦ ᠮᠥᠷᠭᠥᠨ ᠮᠡᠳᠡᠭᠦᠯᠦᠷᠦᠨ: 《ᠪᠣᠭᠣᠯ ᠪᠢ ᠡᠵᠡᠨ ᠦ᠌ ᠬᠦᠨᠳᠦ ᠬᠡᠰᠢᠭ ᠲᠣᠷ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠦ᠋ᠨ ᠲᠤᠰᠢᠶᠠᠯ ᠳ᠋ᠤᠷ ᠪᠠᠢᠬᠤ ᠪᠥᠭᠡᠳ ᠳᠣᠣᠷᠠ ᠮᠢᠨᠦ ᠡᠨᠡ ᠮᠡᠲᠦ ᠬᠥᠮᠦᠨ ᠪᠠᠢᠲᠠᠯᠠ ᠦᠵᠡᠵᠦ ᠦᠯᠦ ᠭᠠᠷᠤᠨ᠂ ᠤᠳᠠᠭᠠᠨ ᠡᠳᠦᠷ ᠰᠤᠯᠠ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠳᠠᠷᠤᠭᠳᠠᠭᠤᠯᠵᠤ ᠶᠠᠪᠤᠭᠤᠯᠤᠭᠰᠠᠨ ᠠᠨᠤ ᠴᠣᠬᠣᠮ ᠪᠣᠭᠣᠯ ᠮᠢᠨᠦ ᠬᠢᠨᠠᠮᠠᠭᠠᠢ ᠦᠭᠡᠢ ᠣᠰᠣᠯ ᠮᠥᠨ ᠂ ᠡᠵᠡᠨ ᠥᠷᠥᠰᠢᠶᠡᠬᠦᠯᠡ ᠬᠦᠨᠳᠦᠳᠡ ᠶᠠᠯᠠᠯᠠᠪᠠᠰᠤ ᠵᠣᠬᠢᠮᠤᠢ ᠂ ᠡᠢᠮᠦ ᠪᠣᠯᠪᠠᠰᠤ ᠬᠣᠢᠴᠢ ᠡᠳᠦᠷ ᠦ᠋ᠨ ᠶᠡᠬᠡ ᠲᠦᠰᠢᠮᠡᠳ ᠡᠷᠳᠡᠮᠲᠡᠨ ᠴᠢᠳᠠᠯᠲᠠᠨ ᠢ᠋ ᠳᠠᠷᠤᠨ ᠦᠯᠦ ᠳᠠᠯᠳᠠᠯᠠᠬᠤᠢ ᠳ᠋ᠤᠷ ᠰᠠᠢᠨ ᠃ 》 ᠭᠡᠮᠡᠨ ᠶᠠᠯᠠ ᠭᠤᠶᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠪᠡᠶᠡᠰᠦᠨ ᠮᠦᠰᠢᠶᠡᠵᠦ ᠥᠭᠦᠯᠡᠷᠦᠨ: 《ᠵᠢᠨᠦᠩ ᠡᠢᠨ ᠬᠦ᠌ ᠳᠠᠷᠤᠭᠳᠠᠨ ᠠᠬᠤ ᠠ᠋ᠴᠠ ᠠᠶᠤᠵᠤ ᠰᠠᠶᠢ ᠰᠢᠯᠭᠠᠵᠤ ᠮᠥᠷᠥᠢᠴᠡᠭᠦᠯᠦᠭᠰᠡᠨ ᠪᠤᠰᠤ ᠤᠤ ? ᠲᠡᠢᠨ ᠠᠲᠠᠯᠠ ᠶᠠᠭᠤᠨ ᠤ᠋ ᠶᠠᠯᠠ ᠪᠣᠢ ! 》 ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ: 《ᠴᠣᠬᠣᠮ ᠵᠢᠨᠦᠩ ᠦ᠋ᠨ ᠬᠠᠤᠯᠢ ᠡᠳᠦᠷ ᠰᠥᠨᠢ ᠦᠭᠡᠢ ᠴᠡᠷᠢᠭ ᠬᠤᠶᠠᠭ ᠢ᠋ᠶ᠋ᠠᠨ ᠬᠡᠦᠬᠡᠳ ᠠᠴᠢᠷ ᠢ᠋ᠶ᠋ᠠᠨ ᠰᠢᠨᠵᠢᠬᠦ ᠮᠡᠲᠦ ᠰᠢᠨᠵᠢᠪᠡᠰᠦ ᠵᠣᠬᠢᠬᠤ ᠠᠲᠠᠯᠠ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠡᠨᠡ ᠮᠡᠲᠦ ᠴᠣᠯᠭᠣᠷᠠᠭᠰᠠᠨ ᠪᠠᠭᠠᠲᠤᠳ ᠪᠣᠢ ᠪᠥᠭᠡᠲᠡᠯᠡ ᠦᠵᠡᠵᠦ ᠡᠰᠡ ᠭᠠᠷᠭᠠᠨ ᠡᠷᠭᠦᠵᠦ ᠡᠰᠡ ᠬᠡᠷᠡᠭᠯᠡᠭᠰᠡᠨ ᠢᠨᠦ ᠬᠢᠨᠠᠮᠠᠭᠠᠢ ᠦᠭᠡᠢ ᠴᠠᠯᠠᠭᠠᠢ ᠣᠰᠣᠯ ᠪᠣᠯᠠᠢ ᠃ ᠪᠣᠭᠣᠯ ᠪᠢ ᠰᠡᠳᠬᠢᠯ ᠡᠴᠡ ᠳᠤᠷᠠᠲᠠᠶᠠ ᠡᠨᠡ ᠣᠰᠣᠯ ᠴᠠᠯᠠᠭᠠᠢ ᠶ᠋ᠢᠨ ᠶᠠᠯᠠ ᠶ᠋ᠢ ᠬᠦᠯᠢᠶᠡᠨ᠂ ᠡᠨᠡ ᠰᠡᠭᠦᠯ ᠦ᠋ᠨ ᠡᠳᠦᠷ ᠦ᠋ᠨ ᠰᠢᠯᠭᠠᠯᠭᠠᠨ ᠤ᠋ ᠶᠡᠬᠡ ᠬᠤᠷᠢᠮ ᠢ᠋ ᠪᠠᠷᠢᠵᠤ ᠶᠠᠯᠠ ᠲᠣᠷᠭᠠᠭᠤᠯᠢ ᠪᠣᠯᠭᠠᠵᠤ᠂ ᠣᠯᠠᠨ ᠳ᠋ᠤᠷ ᠳᠦᠷᠢᠮ ᠪᠣᠯᠭᠠᠰᠤᠭᠠᠢ ᠬᠡᠮᠡᠮᠦᠢ᠂ ᠡᠵᠡᠨ ᠮᠢᠨᠦ ᠵᠥᠪᠰᠢᠶᠡᠨ ᠰᠣᠶᠣᠷᠬᠠ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠰᠣᠨᠢᠷᠬᠠᠨ ᠪᠡᠶᠡᠰᠴᠦ ᠵᠠᠬᠢᠷᠤᠨ :
ᠪᠤᠰᠤᠳ ᠢ᠋ ᠪᠤᠷᠤᠭᠤᠰᠢᠶᠠᠬᠤ ᠶ᠋ᠢᠨ ᠤᠷᠢᠳ ᠪᠡᠶᠡ ᠪᠡᠨ ᠲᠣᠷᠭᠠᠭᠠᠮᠤᠢ
ᠪᠣᠱᠣᠭ ᠢ᠋ ᠵᠠᠷᠯᠠᠬᠤ ᠶ᠋ᠢᠨ ᠤᠷᠢᠳ ᠪᠡᠷᠬᠡ ᠶ᠋ᠢ ᠰᠠᠨᠠᠬᠤ ᠠᠨᠤ ᠂
ᠪᠣᠳᠣᠯᠭᠠ ᠤᠬᠠᠭᠠᠨᠲᠠᠨ ᠤ᠋ ᠪᠤᠯᠲᠤ ᠡᠵᠡᠯᠡᠬᠦ ᠠᠷᠭᠠ ᠮᠥᠨ
ᠪᠤᠶᠠᠨᠲᠤ ᠵᠢᠨᠦᠩ ᠦ᠋ᠨ ᠰᠠᠨᠠᠭᠠ ᠪᠠᠷ ᠪᠣᠯᠲᠤᠭᠠᠢ ᠃
ᠬᠡᠮᠡᠵᠦ ᠮᠤᠬᠤᠯᠢ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠂ ᠪᠣᠯᠣᠳ ᠬᠦᠴᠦᠲᠦ ᠵᠠᠩᠵᠤᠨ ᠴᠡᠷᠢᠭ ᠰᠢᠯᠭᠠᠭᠰᠠᠨ ᠰᠡᠭᠦᠯ ᠦ᠋ᠨ ᠡᠳᠦᠷ ᠦ᠋ᠨ ᠶᠡᠬᠡ ᠬᠤᠷᠢᠮ ᠢ᠋ ᠪᠦᠷᠢᠨᠡ ᠳᠠᠭᠠᠭᠠᠨ ᠠᠪᠴᠤ ᠳᠡᠭᠡᠷᠡ ᠳᠣᠣᠷᠠ ᠨᠠᠭᠤᠷ ᠳᠠᠯᠠᠢ ᠳ᠋ᠤᠷ ᠠᠳᠠᠯᠢ ᠶᠡᠬᠡᠯᠡ ᠬᠤᠷᠢᠮᠯᠠᠪᠠ ᠃ ᠡᠨᠡ ᠭᠤᠷᠪᠠᠨ ᠡᠳᠦᠷ ᠲᠣᠷ ᠲᠡᠷᠢᠭᠦᠨ ᠦ᠌ ᠲᠡᠷᠢᠭᠦᠨ ᠳ᠋ᠦ᠍ᠷ ᠭᠠᠷᠤᠭᠰᠠᠨ ᠲᠠᠪᠤᠨ ᠪᠠᠭᠠᠲᠤᠳ ᠂ ᠲᠡᠷᠢᠭᠦᠨ ᠳ᠋ᠦ᠍ᠷ ᠭᠠᠷᠤᠭᠰᠠᠨ ᠵᠢᠷᠭᠤᠭᠠᠨ ᠵᠠᠭᠤᠨ ᠢᠯᠡᠭᠦᠦ ᠳᠡᠳ᠋ ᠲᠣᠷ ᠭᠠᠷᠤᠭᠰᠠᠨ ᠨᠢᠭᠡᠨ ᠮᠢᠩᠭᠠᠨ ᠳᠥᠷᠪᠡᠨ ᠵᠠᠭᠤᠨ ᠢᠯᠡᠭᠦᠦ ᠂ ᠡᠳᠡᠭᠡᠷ ᠢ᠋ ᠳᠡᠰ ᠵᠡᠷᠭᠡ ᠪᠡᠷ ᠱᠠᠩᠨᠠᠨ ᠬᠥᠬᠢᠭᠦᠯᠵᠦ ᠭᠤᠷᠪᠠᠨ ᠪᠠᠭ ᠵᠣᠬᠢᠶᠠᠨ ᠂ ᠲᠠᠪᠤᠨ ᠪᠠᠭᠠᠲᠤᠳ ᠢ᠋ ᠲᠠᠪᠤᠨ ᠪᠠᠷᠰ ᠤ᠋ᠨ ᠪᠠᠭᠠᠲᠤᠷ ᠵᠠᠩᠵᠤᠨ ᠭᠡᠮᠡᠨ ᠡᠷᠭᠦᠵᠦ ᠭᠤᠷᠪᠠᠨ ᠵᠡᠷᠭᠡ ᠶ᠋ᠢᠨ ᠴᠡᠷᠢᠭ ᠢ᠋ ᠨᠡᠢᠯᠡᠭᠦᠯᠵᠦ ᠂ ᠨᠠᠢ᠍ᠮᠠᠨ ᠮᠢᠩᠭᠠᠨ ᠪᠣᠯᠣᠳ ① ᠬᠦᠴᠦᠲᠦ ᠴᠡᠷᠢᠭ ᠭᠡᠮᠡᠨ ᠨᠡᠷᠡᠢᠳᠪᠡᠢ ᠃
– – – –
① ᠪᠣᠯᠣᠳ ᠬᠡᠮᠡᠭᠴᠢ ᠭᠠᠩ ᠲᠡᠮᠦᠷ ᠦ᠋ᠨ ᠮᠣᠩᠭᠣᠯ ᠨᠡᠷᠡ ᠪᠤᠶᠤ ᠃
ᠲᠡᠭᠦᠨᠴᠡ ᠰᠤᠯᠠ ᠴᠡᠷᠢᠭ ᠲᠦ᠍ᠷ ᠪᠠᠰᠠ ᠨᠢᠭᠡᠨ ᠵᠡᠷᠭᠡ ᠱᠠᠩ ᠲᠠᠯᠪᠢᠵᠤ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠪᠠᠢᠭᠤᠯᠤᠭᠰᠠᠨ ᠪᠠᠶᠠᠷ ᠲᠤ᠌ ᠨᠡᠢᠯᠡᠭᠦᠯᠪᠡ ᠃ ᠲᠡᠭᠦᠨᠴᠡ ᠲᠤᠭ ᠰᠦᠯᠳᠡ ᠪᠡᠨ ᠶᠡᠬᠡᠳᠡ ᠳᠠᠬᠢᠭᠠᠳ ᠤᠯᠤᠰ ᠢᠷᠭᠡᠨ ᠢ᠋ᠶ᠋ᠡᠨ ᠬᠦᠨᠳᠦᠳᠡ ᠱᠠᠩᠨᠠᠨ ᠂ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠭᠤᠴᠢᠨᠠ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠦᠭ ᠡᠶᠡᠳᠡᠷᠡ ᠮᠣᠷᠳᠠᠮᠤᠢ ᠭᠡᠮᠡᠨ ᠲᠣᠭᠲᠠᠭᠠᠨ ᠵᠠᠷᠯᠠᠪᠠᠢ ᠃ ᠠᠶᠠᠨ ᠳ᠋ᠤᠷ ᠭᠠᠷᠬᠤ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠰᠢᠯᠭᠠᠪᠠᠢ ᠃ ᠡᠨᠡ ᠵᠠᠪᠰᠠᠷ ᠲᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠠᠩᠭᠤᠳ ᠲᠤᠷ ᠡᠴᠢᠭᠰᠡᠨ ᠡᠯᠴᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠶᠠᠪᠤᠭᠠ ᠬᠣᠶᠠᠭᠤᠯᠠ ᠴᠠᠭᠠᠨ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠲᠦᠷᠢᠮᠡᠬᠡᠢ ᠪᠠᠯᠭᠠᠰᠤᠨᠠ ᠣᠷᠣᠵᠤ ᠬᠡᠷᠡᠭ ᠤᠯᠠᠮᠵᠢᠯᠠᠬᠤ ᠶᠠᠮᠤᠨ ᠳ᠋ᠤᠷ ᠣᠷᠣᠵᠤ ᠢᠷᠡᠭᠰᠡᠨ ᠤᠴᠢᠷ ᠢ᠋ᠶ᠋ᠠᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠡᠨᠡ ᠦᠶᠡ ᠳ᠋ᠦ᠍ᠷ ᠰᠢᠳᠤᠷᠭᠤ ᠬᠠᠭᠠᠨ ᠬᠠᠷᠠᠬᠠᠨ ᠰᠢᠨᠡ ᠬᠠᠪᠤᠷ ᠤ᠋ᠨ ᠦᠵᠡᠮᠵᠢ ᠳ᠋ᠦ᠍ᠷ ᠴᠡᠩᠭᠡᠯᠳᠦᠷᠡ ᠬᠣᠲᠠᠨ ᠤ᠋ ᠭᠠᠳᠠᠨᠠ ᠬᠤᠯᠤᠰᠤᠲᠤ ᠨᠠᠭᠤᠷ ᠬᠡᠮᠡᠬᠦ ᠶᠡᠬᠡ ᠬᠦᠷᠢᠶᠡᠯᠡᠩ ᠴᠡᠴᠡᠭᠯᠢᠭ ᠲᠦ᠍ᠷ ᠡᠴᠢᠵᠦ ᠂ ᠭᠦᠷᠪᠡᠯᠵᠢᠨ ᠭᠤᠸᠠ ᠬᠠᠲᠤᠨ ᠯᠤᠭᠠ ᠪᠠᠨ ᠮᠠᠯ ᠪᠣᠯᠲᠠᠯᠠ ᠰᠣᠭᠲᠣᠵᠤ ᠂ ᠨᠢᠭᠡᠨ ᠲᠡᠷᠭᠡᠨ ᠳ᠋ᠦ᠍ᠷ ᠰᠠᠭᠤᠵᠤ ᠡᠭᠡᠵᠦ ᠶᠠᠪᠤᠬᠤᠶᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠢᠷᠡᠪᠡ ᠭᠡᠮᠡᠨ ᠤᠴᠢᠷ ᠢ᠋ ᠰᠣᠨᠣᠰᠤᠭᠠᠳ ᠠᠬᠠᠰᠬᠢᠵᠦ ᠠᠮᠤᠷ ᠦᠭᠡᠢ ᠪᠣᠯᠤᠨ ᠡᠴᠢᠭᠰᠡᠨᠡ ᠂ ᠭᠦᠷᠪᠡᠯᠵᠢᠨ ᠭᠤᠸᠠ ᠬᠠᠲᠤᠨ ᠠᠨᠤ ᠬᠠᠵᠠᠭᠤ ᠠ᠋ᠴᠠ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ : 《ᠶᠠᠮᠪᠠᠷ ᠪᠠᠢᠨᠠ ? ᠠᠮᠠᠷᠠᠭ ᠪᠣᠯᠤᠮᠤᠢ ᠬᠡᠮᠡᠭᠰᠡᠭᠡᠷ ᠠᠯᠪᠠᠳᠠᠭᠳᠠᠬᠤᠢ ᠳ᠋ᠤᠷ ᠬᠦᠷᠪᠡ ᠂ ᠡᠶᠡᠲᠡᠢ ᠪᠣᠯᠤᠮᠤᠢ ᠬᠡᠮᠡᠭᠰᠡᠭᠡᠷ ᠡᠵᠡᠯᠡᠭᠳᠡᠬᠦᠢ ᠳ᠋ᠦ᠍ᠷ ᠬᠦᠷᠪᠡ ᠂ ᠠᠷᠢᠶᠠᠲᠠᠨ ᠤ᠋ ᠡᠵᠡᠨ ᠠᠷᠰᠯᠠᠨ ᠬᠡᠮᠡᠭᠴᠢ ᠬᠢᠭᠡᠳ ᠠᠷᠤ ᠶ᠋ᠢᠨ ᠡᠵᠡᠨ ᠲᠡᠮᠦᠵᠢᠨ ᠬᠣᠶᠠᠭᠤᠯᠠ ᠳ᠋ᠤᠷ ᠬᠡᠨ ᠬᠥᠮᠦᠨ ᠣᠢᠷᠠᠲᠤᠨ ᠶᠠᠪᠤᠪᠠᠰᠤ ᠲᠡᠷᠡ ᠬᠥᠮᠦᠨ ᠢᠳᠡᠭᠳᠡᠬᠦ ᠪᠣᠯᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠰᠢᠳᠤᠷᠭᠤ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ᠷ ᠨᠡᠢᠴᠡᠭᠡᠳ ᠪᠠᠰᠠ ᠠᠷᠢᠬᠢᠨ ᠤ᠋ ᠬᠠᠯᠠᠭᠤᠨ ᠳ᠋ᠤᠷ ᠳᠠᠷᠤᠢ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠲᠣᠢᠪᠠᠯᠵᠢᠨ ᠳᠠᠢᠪᠠᠯᠵᠠᠭᠰᠠᠭᠠᠷ ᠰᠢᠷᠡᠭᠡᠨ ᠳ᠋ᠦ᠍ᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠂ ᠨᠢᠭᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠳᠠᠭᠤᠳᠠ ᠭᠡᠮᠡᠨ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠶᠠᠪᠤᠭᠠ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠪᠢᠴᠢᠭ ᠢ᠋ ᠦᠵᠡᠮᠡᠭᠴᠡ ᠨᠡᠩ ᠰᠩᠬᠢᠵᠦ ᠡᠢᠨ ᠥᠭᠦᠯᠡᠷᠦᠨ :
ᠬᠥᠶᠢ ᠲᠠᠨ ᠤ᠋ ᠡᠵᠡᠨ ᠲᠡᠮᠦᠵᠢᠨ ᠬᠡᠮᠡᠭᠴᠢ
ᠬᠥᠷ ᠶᠡᠬᠡ ᠤᠯᠤᠰ ᠤ᠋ᠨ ᠨᠡᠢᠲᠡ ᠶ᠋ᠢ ᠡᠵᠡᠯᠡᠭᠰᠡᠨ ᠪᠤᠰᠤ ᠪᠥᠭᠡᠳ
ᠬᠥᠮᠦᠨ ᠦ᠌ ᠡᠷᠬᠡᠲᠦ ᠮᠢᠨᠦ ᠪᠡᠶᠡ ᠶ᠋ᠢ
ᠬᠥᠯ ᠭᠠᠷ ᠲᠠᠭᠠᠨ ᠦᠯᠢᠳᠬᠡᠬᠦ ᠢᠨᠦ ᠶᠠᠭᠤᠨ ᠠᠵᠢ ?
ᠠᠷᠢᠶᠠᠲᠠᠨ ᠤ᠋ ᠡᠵᠡᠨ ᠠᠷᠰᠯᠠᠨ ᠬᠢᠭᠡᠳ
ᠠᠷᠤ ᠶ᠋ᠢᠨ ᠡᠵᠡᠨ ᠲᠡᠮᠦᠵᠢᠨ ᠲᠡᠭᠦᠨ ᠳ᠋ᠦ᠍ᠷ
ᠠᠪᠠᠢ ᠶᠠᠭᠤᠨ ᠨᠥᠬᠥᠷ ᠪᠠᠢᠬᠤ ᠠᠵᠢ
ᠠᠩᠭᠠᠢᠭᠰᠠᠨ ᠠᠮᠠ ᠪᠠᠨ ᠬᠠᠮᠬᠢ ᠬᠡᠮᠡᠲᠦᠭᠡᠢ ᠬᠡ !
ᠬᠡᠮᠡᠭᠡᠳ ᠠᠭᠰᠤᠷᠬᠢᠯᠠᠨ ᠡᠭᠡᠵᠦ ᠣᠷᠣᠰᠤᠭᠠᠢ ᠬᠡᠮᠡᠲᠡᠯᠡ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠴᠢᠰᠤ ᠴᠠᠯᠭᠢᠲᠠᠯᠠ ᠠᠭᠤᠷᠯᠠᠵᠤ ᠂ ᠴᠢᠬᠤᠯᠳᠠᠨ ᠪᠠᠷᠬᠢᠷᠠᠵᠤ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠨ ᠥᠭᠦᠯᠡᠷᠦᠨ :
ᠬᠥᠮᠦᠨ ᠪᠤᠰᠤ ᠲᠠᠩᠭᠤᠳ ᠤ᠋ᠨ ᠡᠵᠡᠨ ᠴᠢ
ᠬᠥᠷᠪᠡᠬᠦ ᠤᠷᠪᠠᠬᠤ ᠡᠬᠡᠨᠡᠷ ᠮᠡᠲᠦ ᠵᠢᠭᠰᠢᠮᠡᠷᠲᠡᠢ ᠂
ᠬᠥᠯ ᠦ᠋ᠨ ᠰᠢᠪᠡᠷ ᠪᠣᠯᠤᠶᠠ ᠭᠡᠮᠡᠨ ᠬᠡᠯᠡᠭᠡᠳ
ᠬᠥᠯᠴᠥᠭᠦᠷᠡᠲᠡᠯᠡ ᠰᠣᠭᠲᠣᠭᠠᠳ ᠦᠭᠡ ᠶᠦ᠍ᠭᠡᠨ ᠢᠳᠡᠪᠡᠦ ᠴᠢ ?
ᠠᠪᠤ ᠶᠤᠭᠠᠨ ᠠᠴᠢ ᠲᠠᠢ ᠬᠥᠪᠡᠭᠦᠨ ᠪᠣᠯᠪᠠᠰᠤ
ᠠᠬᠤ ᠴᠠᠭ ᠲᠤᠷ ᠨᠠᠮᠠᠢ ᠳᠠᠷᠤᠢ ᠠᠯᠠᠲᠤᠭᠠᠢ ᠴᠢ !
ᠠᠮᠢᠨ ᠪᠡᠶᠡ ᠴᠢᠨᠦ ᠦᠯᠡᠳᠡᠮᠦᠢ ᠦᠦ ᠦᠭᠡᠢ ᠦᠦ
ᠠᠭᠠᠵᠢᠮ ᠪᠠᠢᠵᠤ ᠦᠵᠡᠭᠳᠡᠬᠦᠢ ᠰᠢᠳᠤᠷᠭᠤ ᠴᠢ !
ᠬᠡᠮᠡᠭᠡᠳ ᠬᠣᠶᠠᠷ ᠡᠲᠡᠭᠡᠳ ᠡᠪᠳᠡᠷᠡᠯᠴᠡᠭᠰᠡᠨ ᠳ᠋ᠦ᠍ᠷ ᠲᠥᠷᠥ ᠶ᠋ᠢᠨ ᠲᠦᠰᠢᠮᠡᠯ ᠡᠵᠡᠨ ᠢ᠋ᠶ᠋ᠡᠨ ᠬᠣᠷᠢᠭ᠍ᠯᠠᠵᠤ ᠲᠦᠭᠦᠬᠡᠢ ᠶᠠᠪᠤᠭᠠ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠢ᠋ ᠴᠢᠷᠴᠦ ᠭᠠᠷᠴᠤ ᠢᠷᠡᠭᠡᠳ ᠬᠠᠷᠢᠵᠤ ᠢᠷᠡᠨ ᠡᠳᠡᠭᠡᠷ ᠤᠴᠢᠷ ᠢ᠋ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠴᠠᠭ ᠵᠠᠭᠤᠷᠠ ᠬᠢᠯᠢᠩᠨᠡᠵᠦ ᠂ ᠨᠡᠩ ᠲᠡᠭᠦᠨ ᠦ᠌ ᠰᠠᠷᠯᠠᠭ ᠤᠯᠤᠰ ᠲᠤᠷ ᠴᠡᠷᠢᠭ ᠲᠤᠰᠠᠯᠠᠭᠰᠠᠨ ᠬᠡᠷᠡᠭ ᠢ᠋ ᠰᠣᠨᠣᠰᠴᠤ ᠭᠠᠯ ᠤ᠋ᠨ ᠳᠡᠭᠡᠷᠡ ᠲᠣᠰᠣ ᠨᠡᠮᠡᠭᠰᠡᠨ ᠮᠡᠲᠦ ᠪᠣᠯᠵᠤ ᠂ ᠰᠢᠲᠦ ᠵᠠᠭᠤᠨ ᠲᠠᠩᠭᠠᠷᠢᠭ᠍ᠯᠠᠨ ᠥᠭᠦᠯᠡᠷᠦᠨ :
ᠬᠡᠵᠢᠶᠡᠳᠡ ᠡᠨᠡ ᠠᠮᠢᠨ ᠢ᠋ ᠶᠡᠭᠦᠳᠬᠡᠨ ᠶᠡᠭᠦᠳᠬᠡᠲᠡᠯᠡ
ᠬᠡᠷᠴᠡᠭᠡᠢ ᠲᠠᠩᠭᠤᠳ ᠢ᠋ ᠬᠡᠷᠪᠢᠨ ᠡᠰᠡ ᠬᠡᠷᠴᠢᠪᠡᠰᠦ ᠂
ᠬᠡᠦᠬᠡᠳ ᠠᠴᠢᠷ ᠮᠢᠨᠦ ᠪᠣᠭᠣᠯ ᠴᠢᠮᠠᠢ ᠴᠠᠪᠴᠢᠲᠤᠭᠠᠢ
ᠬᠡᠵᠢᠶᠡᠳᠡ ᠪᠢ ᠴᠢᠮᠠᠢ ᠦᠯᠦ ᠲᠠᠯᠪᠢᠮᠤᠢ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠡᠨᠡ ᠲᠤᠬᠠᠢ ᠲᠠᠢᠽᠦ ᠶ᠋ᠢᠨ ᠬᠠᠳᠠᠮ ᠲᠠᠢ ᠰᠡᠴᠡᠨ ᠦ᠌ ᠳᠡᠭᠦᠦ ᠸᠴᠢᠷ ᠰᠡᠴᠡᠨ ᠲᠠᠢᠽᠦ ᠶ᠋ᠢᠨ ᠬᠠᠵᠠᠭᠤᠳᠠ ᠪᠠᠢᠵᠤ ᠶᠠᠭᠠᠷᠠᠨ ᠰᠥᠭᠥᠳᠴᠦ ᠬᠣᠷᠢᠭ᠍ᠯᠠᠨ ᠮᠡᠳᠡᠭᠦᠯᠦᠷᠦᠨ :《ᠳᠡᠭᠷᠢᠯᠢᠭ ᠡᠵᠡᠨ ᠴᠢ ᠲᠡᠷᠡ ᠮᠡᠲᠦ ᠥᠴᠦᠬᠡᠨ ᠬᠥᠮᠦᠨ ᠦ᠌ ᠲᠥᠬᠥᠭᠡ ᠦᠭᠡᠢ ᠦᠭᠡᠰ ᠦ᠋ᠨ ᠲᠤᠯᠠ ᠡᠨᠡ ᠠᠯᠲᠠᠨ ᠠᠮᠠᠨ ᠢ᠋ᠶ᠋ᠡᠨ ᠠᠯᠳᠠᠮᠤᠢ ᠂ ᠲᠥᠷᠥᠭᠳᠡᠬᠦ ᠬᠢᠯᠢᠩ ᠢ᠋ ᠳ᠋ᠦ᠍ᠷ ᠵᠠᠭᠤᠷᠠ ᠡᠭᠡᠭᠦᠯᠵᠦ ᠂ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠥᠷᠥ ᠶ᠋ᠢ ᠡᠵᠡᠯᠡᠲᠡᠯᠡ ᠲᠥᠭᠥᠷᠢᠭ ᠳᠥᠷᠥᠭᠡ ᠶ᠋ᠢᠨ ᠰᠠᠨᠵᠢ ᠢᠨᠦ ᠰᠠᠳᠠᠷᠠᠲᠠᠯᠠ ᠲᠦᠮᠡᠨ ᠢᠷᠭᠡᠨ ᠢ᠋ ᠲᠦᠪᠰᠢᠳᠬᠡᠨ ᠠᠮᠤᠵᠢᠲᠠᠯᠠ ᠲᠦᠭᠡᠮᠡᠯ ᠨᠠᠰᠤᠨ ᠬᠥᠭᠰᠢᠷᠡᠨ ᠬᠥᠭᠰᠢᠷᠡᠲᠡᠯᠡ ᠭᠡᠮᠡᠨ ᠠᠯᠲᠠᠨ ᠠᠮᠠᠨ ᠢ᠋ᠶ᠋ᠠᠨ ᠨᠡᠭᠡᠭᠡᠭᠳᠡᠬᠦᠢ ᠂ ᠠᠭᠤᠷ ᠬᠢᠯᠢᠩ ᠪᠡᠶᠡ ᠶ᠋ᠢ ᠵᠣᠪᠠᠭᠠᠮᠤᠢ ᠂ ᠠᠭᠤᠯᠠ ᠳᠠᠪᠠᠭᠠ ᠮᠣᠷᠢ ᠶ᠋ᠢ ᠵᠣᠪᠠᠭᠠᠮᠤᠢ ᠃ 》
ᠠᠯᠲᠠᠨ ᠶᠠᠰᠤᠲᠤ ᠴᠢᠨᠦ ᠤᠷᠲᠤ ᠪᠠᠲᠤ ᠪᠣᠯᠲᠤᠭᠠᠢ
ᠠᠳ᠌ᠠᠬᠠᠭ ᠳᠠᠢᠰᠤᠨ ᠴᠢᠨᠦ ᠤᠨᠠᠨ ᠲᠣᠰᠣᠨ ᠶᠡᠭᠦᠷᠡᠲᠦᠭᠡᠢ ᠂
ᠠᠯᠪᠠᠲᠤ ᠤᠯᠤᠰ ᠴᠢᠨᠦ ᠤᠯᠠᠮ ᠤᠯᠠᠮ ᠠᠷᠪᠢᠳᠲᠤᠭᠠᠢ
ᠠᠯᠳᠠᠷ ᠨᠡᠷᠡ ᠴᠢᠨᠦ ᠠᠭᠤᠯᠠ ᠳᠠᠯᠠᠢ ᠶ᠋ᠢ ᠳᠠᠪᠠᠲᠤᠭᠠᠢ ᠃
ᠭᠡᠮᠡᠨ ᠪᠡᠯᠭᠡᠯᠡᠨ ᠮᠡᠳᠡᠭᠦᠯᠪᠡ ᠃ ᠡᠨᠡ ᠬᠡᠷᠡᠭ ᠢ᠋ ᠵᠢᠨᠦᠩ ᠮᠤᠬᠤᠯᠢ ᠰᠣᠨᠣᠰᠴᠤ ᠂
ᠴᠢᠨᠳᠠᠭᠠᠨᠠ ᠰᠡᠴᠡᠨ ᠢ᠋ ᠴᠢᠬᠤᠯᠠ ᠬᠡᠷᠡᠭ ᠢ᠋ ᠡᠰᠡ ᠴᠢᠳᠠᠨ
ᠴᠢᠬᠤᠯ ᠬᠢᠯᠢᠩ ᠢ᠋ ᠲᠥᠷᠥᠭᠦᠯᠪᠡ ᠃
ᠴᠢᠳᠠᠯᠲᠤ ᠲᠦᠰᠢᠮᠡᠯ ᠢ᠋ ᠢᠴᠢᠭᠡᠬᠦ ᠦᠭᠡᠢ ᠦᠦ ?
ᠴᠢᠰᠤ ᠠᠮᠢᠰᠬᠤᠯ ᠳᠣᠭ᠍ᠰᠢᠨ ᠪᠣᠯᠪᠠᠰᠤ ᠪᠠᠷ
ᠴᠢᠷᠦᠭᠳᠡᠯ ᠡᠭᠦᠷᠦᠯ ᠣᠯᠠᠨ ᠪᠣᠯᠤᠮᠤᠢ ᠶᠠᠭᠤᠨ ᠲᠤᠰᠠ
ᠬᠡᠮᠡᠵᠦ ᠂ ᠡᠯᠴᠢ ᠶᠠᠪᠤᠭᠤᠯᠬᠤ ᠶ᠋ᠢ ᠵᠣᠭᠰᠣᠭᠠᠵᠤ ᠵᠢᠴᠢ ᠶᠠᠪᠤᠭᠠ ᠶ᠋ᠢ ᠵᠢᠭᠠᠵᠤ ᠥᠭᠦᠯᠡᠷᠦᠨ :
ᠶᠠᠩᠰᠢᠶᠠ ᠳ᠋ᠤᠷ ᠢ᠋ᠶ᠋ᠠᠨ ᠵᠢᠭᠰᠢᠭᠳᠡᠭᠰᠡᠨ ᠶᠠᠪᠤᠭᠠ ᠴᠢ
ᠶᠠᠭᠤᠨ ᠤ᠋ ᠲᠤᠯᠠ ᠳᠠᠭᠠᠵᠤ ᠡᠴᠢᠭᠰᠡᠨ ᠪᠥᠯᠥᠭᠡ ᠴᠢ ?
ᠶᠠᠮᠪᠠᠷᠪᠠ ᠬᠡᠷᠡᠭ ᠲᠦ᠍ᠷ ᠲᠤᠰᠠᠯᠠᠪᠠᠰᠤ ᠵᠣᠬᠢᠬᠤ ᠠᠲᠠᠯᠠ
ᠶᠠᠷᠰᠢᠭ᠋ ᠳᠡᠭᠳᠡᠭᠡᠵᠦ ᠢᠷᠡᠪᠡᠦ ᠴᠢ ᠃
ᠶᠠᠭᠠᠬᠢᠶᠠ ᠪᠢ ᠂ ᠶᠠᠭᠠᠬᠢᠨ ᠠᠪᠤᠷᠠᠪᠠᠴᠤ
ᠶᠠᠷᠠᠭᠳᠠᠭᠠᠨ ᠤᠨᠠᠬᠤ ᠲᠤᠯᠠ
ᠶᠠᠮᠪᠠᠷ ᠵᠠᠮ ᠴᠦ᠍ ᠦᠭᠡᠢ ᠲᠤᠯᠠᠳᠠ ᠴᠢ ᠪᠡᠷ
ᠶᠠᠭᠠᠷᠠᠨ ᠮᠡᠩᠳᠡᠨ ᠪᠠᠷᠠᠭᠤᠨ ᠬᠠᠷᠠᠭᠤᠯ ᠳ᠋ᠤᠷ ᠡᠴᠢᠲᠦᠭᠡᠢ ᠂
ᠶᠠᠷᠠᠭᠳᠠᠭᠠᠨ ᠪᠠᠢᠵᠤ ᠪᠢ ᠴᠢᠮᠠᠢ ᠭᠠᠷᠭᠠᠰᠤᠭᠠᠢ
ᠬᠡᠮᠡᠭᠡᠳ ᠪᠠᠷᠠᠭᠤᠨ ᠡᠮᠦᠨᠡ ᠬᠠᠷᠠᠭᠤᠯ ᠴᠠᠭᠳᠠᠭᠤᠯ ᠳ᠋ᠤᠷ ᠶᠠᠪᠤᠭᠤᠯᠪᠠ ᠃ ᠳᠡᠭᠡᠳᠦ ᠳ᠋ᠦ᠍ᠷ ᠵᠢᠭᠰᠢᠭᠳᠡᠭᠰᠡᠨ ᠢ᠋ ᠳᠣᠣᠷᠠᠲᠤ ᠳ᠋ᠤᠷ ᠦᠯᠦ ᠭᠥᠷᠦᠭᠦᠯᠬᠦ ᠢᠨᠦ ᠳᠡᠯᠭᠡᠷᠡᠬᠦ ᠲᠥᠷᠥ ᠶ᠋ᠢᠨ ᠡᠵᠡᠨ ᠲᠦᠰᠢᠮᠡᠯ ᠦᠨᠡᠬᠡᠷ ᠶᠠᠭᠤᠲᠠᠢ ᠡᠨᠡ ᠮᠡᠲᠦ ᠲᠡᠩᠴᠡᠨ ᠲᠥᠷᠥᠬᠦ ᠠᠵᠢ ᠭᠠᠢᠬᠠᠯ ᠪᠣᠯᠠᠢ ᠃
ᠲᠡᠭᠦᠨᠴᠡ ᠲᠠᠢᠽᠦ ᠮᠤᠬᠤᠯᠢ ᠶ᠋ᠢᠨ ᠰᠢᠯᠭᠠᠭᠰᠠᠨ ᠲᠠᠪᠤᠨ ᠪᠠᠷᠰ ᠤ᠋ᠨ ᠪᠠᠭᠠᠲᠤᠳ ᠪᠠ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠬᠠᠰᠠᠷ ᠪᠡᠯᠭᠦᠳᠡᠢ ᠬᠣᠶᠠᠷ ᠳᠡᠭᠦᠦ ᠂ ᠵᠢᠴᠢ ᠠᠯᠤᠬᠠ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠠ ᠣᠶᠤᠲᠤ ᠰᠡᠴᠡᠨ ᠂ ᠣᠶᠤᠨ ᠭᠤᠸᠠ ᠂ ᠲᠡᠭᠦᠰᠴᠦᠭ᠍ᠲᠦ ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠂ ᠪᠤᠯᠤ ᠂ ᠡᠭᠦᠯᠡᠨ ᠴᠡᠷᠪᠢ ᠨᠠᠷ ᠢ᠋ ᠠᠪᠴᠤ ᠳᠤᠮᠳᠠᠳᠤ ᠴᠡᠷᠢᠭ ᠲᠦ᠍ᠷ ᠵᠠᠯᠠᠷᠠᠪᠠᠢ ᠃ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠶᠢᠰᠦᠨ ᠡᠩ ᠂ ᠲᠠᠪᠤᠨ ᠪᠠᠭᠠᠲᠤᠳ ᠂ ᠵᠠᠩᠵᠤᠨ ᠨᠠᠷ ᠬᠢᠭᠡᠳ ᠨᠠᠢ᠍ᠮᠠᠨ ᠮᠢᠩᠭᠠᠨ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠪᠠ ᠲᠠᠪᠤᠨ ᠲᠦᠮᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠢ᠋ ᠵᠠᠬᠢᠷᠤᠨ ᠪᠠᠭᠴᠠᠯᠠᠪᠠ ᠃ ᠪᠤᠭᠤᠷᠵᠢ ᠂ ᠪᠤᠭᠤᠷᠤᠯ ᠬᠣᠶᠠᠷ ᠬᠦᠯᠦᠭ ᠦᠯᠡᠭᠰᠡᠨ ᠴᠡᠷᠢᠭ ᠢ᠋ ᠬᠦᠯᠢᠶᠡᠨ ᠠᠪᠴᠤ ᠤᠯᠤᠰ ᠤ᠋ᠨ ᠳᠥᠷᠪᠡᠨ ᠡᠲᠡᠭᠡᠳ ᠢ᠋ ᠰᠡᠷᠭᠡᠢᠯᠡᠨ ᠰᠠᠬᠢᠪᠠ ᠃ ᠲᠣᠷᠭᠠᠨ ᠰᠢᠷᠠ ᠬᠣᠶᠠᠷ ᠳᠡᠭᠦᠦ ᠳᠥᠷᠪᠡᠨ ᠪᠠᠭᠠ ᠡᠵᠡᠳ ᠢ᠋ ᠠᠪᠴᠤ ᠬᠣᠷᠣᠭᠠ ᠬᠦᠷᠢᠶᠡ ᠶ᠋ᠢ ᠰᠠᠬᠢᠪᠠ᠃ ᠬᠦᠯᠦᠭ ᠴᠢᠯᠠᠭᠤᠨ ᠬᠣᠶᠠᠷ ᠡᠲᠡᠭᠡᠳ ᠲᠣᠷ ᠲᠤᠰᠠᠯᠠᠬᠤ ᠲᠦᠮᠡᠨ ᠴᠡᠷᠢᠭ ᠵᠠᠬᠢᠷᠴᠤ ᠬᠣᠶᠠᠷ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠰᠠᠭᠤᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠲᠡᠳᠦᠢ ᠮᠤᠬᠤᠯᠢ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠬᠤᠢᠯᠠᠳᠠᠷ ᠢ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠬᠣᠰᠢᠭᠤᠴᠢ ᠪᠣᠯᠭᠠᠨ ᠂ ᠰᠡᠭᠦᠯ ᠳ᠋ᠦ᠍ᠷ ᠰᠥᠨᠢᠳ ᠦ᠋ᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠭᠢᠯᠦᠭᠡᠨ ᠪᠠᠭᠠᠲᠤᠷ ᠢ᠋ ᠬᠠᠮᠠᠭᠠᠯᠠᠨ ᠶᠠᠪᠤᠬᠤ ᠬᠠᠢᠭᠤᠯ ᠪᠣᠯᠭᠠᠭᠠᠳ ᠨᠠᠢ᠍ᠮᠠᠨ ᠮᠢᠩᠭᠠᠨ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠢ᠋ ᠲᠠᠪᠤᠨ ᠪᠠᠷᠰ ᠤ᠋ᠨ ᠪᠠᠭᠠᠲᠤᠳ ᠲᠤᠷ ᠬᠤᠪᠢᠶᠠᠨ ᠵᠠᠬᠢᠷᠤᠭᠤᠯᠵᠤ ᠂ ᠪᠠᠰᠠ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠪᠠ ᠭᠢᠯᠦᠭᠡᠨ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠶ᠋ᠢ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠲᠠ ᠬᠣᠶᠠᠭᠤᠯᠠ ᠰᠢᠨᠡᠬᠡᠨ ᠬᠡᠰᠢᠭ ᠲᠣᠷ ᠬᠦᠷᠲᠡᠵᠦ ᠰᠢᠭᠤᠳ ᠳᠡᠪᠰᠢᠭᠰᠡᠨ ᠲᠤᠯᠠ ᠡᠨᠡ ᠤᠳᠠᠭᠠ ᠳ᠋ᠤᠷ ᠡᠷᠬᠡᠪᠰᠢ ᠬᠦᠴᠦᠯᠡᠨ ᠴᠢᠷᠮᠠᠢᠵᠤ ᠂ ᠠᠮᠢᠨ ᠪᠡᠶᠡ ᠪᠡᠨ ᠲᠠᠯᠪᠢᠵᠤ ᠪᠠᠢᠯᠳᠤᠨ ᠴᠢᠬᠤᠯᠠ ᠭᠠᠵᠠᠷ ᠲᠤᠷ ᠴᠣᠬᠢᠨ ᠣᠷᠣᠵᠤ ᠂ ᠲᠣᠪᠴᠢ ᠣᠨᠢᠰᠣᠨ ᠢ᠋ ᠡᠷᠢᠨ ᠡᠪᠳᠡᠯᠡᠬᠦᠢ ᠳ᠋ᠦ᠍ᠷ ᠪᠣᠢ᠃ ᠡᠨᠡ ᠤᠳᠠᠭᠠ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠬᠡᠮᠡᠭᠴᠢ ᠲᠡᠳᠡᠨ ᠦ᠌ ᠣᠮᠣᠭ ᠢ᠋ ᠲᠥᠷᠥᠭᠦᠯᠦᠨ ᠰᠡᠷᠡᠮᠵᠢ ᠶ᠋ᠢ ᠰᠤᠯᠠᠳᠬᠠᠬᠤ ᠴᠡᠷᠢᠭ ᠂ ᠴᠣᠬᠣᠮ ᠬᠡᠷᠡᠭ ᠬᠢᠬᠦᠢ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠮᠢᠩᠭᠠᠨ ᠴᠡᠷᠢᠭ ᠡᠴᠡ ᠪᠤᠰᠤᠳ ᠢ᠋ ᠬᠡᠷᠡᠭᠯᠡᠬᠦ ᠦᠭᠡᠢ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠴᠢᠬᠤᠯᠠ ᠢᠲᠡᠭᠡᠭᠰᠡᠨ ᠢᠨᠦ ᠲᠠᠨ ᠤ᠋ ᠬᠣᠶᠠᠭᠤᠯᠠ ᠪᠣᠯᠠᠢ᠃ ᠲᠠ ᠬᠣᠶᠠᠭᠤᠯᠠ ᠶ᠋ᠢᠨ ᠲᠠᠪᠤᠨ ᠪᠠᠷᠰ ᠤ᠋ᠨ ᠪᠠᠭᠠᠲᠤᠳ ᠲᠤᠷ ᠣᠷᠣᠭᠰᠠᠨ ᠠᠨᠤ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠂ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠨᠠᠷ ᠤ᠋ᠨ ᠮᠡᠲᠦ ᠤᠭ ᠠ᠋ᠴᠠ ᠵᠠᠩᠵᠤᠨ ᠤ᠋ ᠦᠨᠳᠦᠰᠦᠲᠦ ᠪᠤᠰᠤ ᠪᠣᠯᠠᠢ᠃ ᠡᠵᠡᠨ ᠦ᠌ ᠬᠦᠨᠳᠦ ᠬᠡᠰᠢᠭ ᠲᠣᠷ ᠦᠨᠡᠨ ᠬᠦᠴᠦᠨ ᠢ᠋ᠶ᠋ᠡᠷ ᠦᠬᠦᠨ ᠵᠢᠳᠬᠦᠵᠦ ᠴᠢᠷᠮᠠᠢᠪᠠᠰᠤ ᠵᠣᠬᠢᠮᠤᠢ᠃ ᠪᠢ ᠪᠣᠳᠣᠪᠠᠰᠤ ᠡᠨᠡ ᠤᠳᠠᠬᠠ ᠳ᠋ᠤᠷ ᠲᠠ ᠬᠣᠶᠠᠭᠤᠯᠠ ᠬᠢᠴᠢᠶᠡᠪᠡᠰᠦ ᠶᠡᠬᠡ ᠭᠠᠪᠢᠶᠠ ᠮᠠᠭᠠᠳ ᠪᠦᠲᠦᠮᠦᠢ ᠂ ᠬᠡᠷᠬᠢᠪᠡᠴᠦ ᠮᠢᠨᠦ ᠠᠷᠭᠠ ᠠ᠋ᠴᠠ ᠪᠢᠲᠡᠭᠡᠢ ᠵᠥᠷᠢᠴᠡ ᠂ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠶ᠋ᠢᠨ ᠴᠢᠩᠭᠠ ᠬᠠᠲᠠᠭᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠦᠦ ? ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠮᠠᠨᠳᠤᠬᠤ ᠪᠠᠭᠤᠷᠠᠬᠤ ᠴᠥᠮ ᠡᠨᠡ ᠤᠳᠠᠬᠠ ᠳ᠋ᠤᠷ ᠪᠣᠢ ᠃ ᠡᠨᠡ ᠤᠳᠠᠭᠠ ᠬᠡᠷᠪᠡ ᠳᠠᠷᠤᠭᠳᠠᠪᠠᠰᠤ ᠡᠭᠦᠨᠴᠡ ᠣᠳᠣ ᠣᠯᠠᠨ ᠤᠯᠤᠰ ᠤ᠋ᠨ ᠡᠵᠡᠳ ᠦ᠋ᠳ ᠪᠡᠶᠡ ᠪᠡᠶᠡ ᠪᠡᠷ ᠨᠡᠢᠯᠡᠬᠦ ᠬᠡᠷᠡᠭ ᠡᠭᠦᠨ ᠡᠴᠡ ᠡᠬᠢᠯᠡᠬᠦ ᠪᠣᠯᠠᠢ ᠃ ᠬᠡᠷᠪᠡ ᠳᠠᠷᠤᠪᠠᠰᠤ ᠡᠭᠦᠨᠴᠡ ᠶᠡᠬᠡ ᠰᠠᠨᠠᠭᠠ ᠲᠠᠨ ᠥᠪᠡᠷ ᠢ᠋ᠶ᠋ᠡᠨ ᠰᠢᠷᠪᠡᠭᠡᠲᠦᠨ ᠠᠶᠤᠵᠤ ᠡᠰᠡᠷᠭᠦᠴᠡᠯ ᠳᠠᠢᠰᠤᠨ ᠥᠪᠡᠷ ᠢ᠋ᠶ᠋ᠡᠨ ᠨᠣᠮᠣᠬᠠᠷᠠᠨ ᠳᠠᠭᠠᠬᠤ ᠪᠣᠯᠠᠢ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠂ ᠭᠢᠯᠥᠭᠡᠨ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠬᠠᠮᠲᠤ ᠪᠠᠷ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ : 《ᠥᠷᠥᠰᠢᠶᠡᠯᠳᠦ ᠵᠢᠨᠦᠩ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠤᠯᠠ ᠳᠡᠯᠪᠢ ᠂ ᠪᠢᠳᠡ ᠬᠣᠶᠠᠭᠤᠯᠠ ᠭᠠᠯ ᠤᠰᠤ ᠂ ᠵᠠᠷ ᠵᠡᠪᠰᠡᠭ ᠦ᠋ᠨ ᠠᠯᠢᠨ ᠳ᠋ᠤᠷ ᠪᠣᠯᠪᠠᠴᠤ ᠦᠬᠦᠨ ᠱᠤᠩᠭᠤᠯᠠᠵᠤ ᠣᠷᠣᠮᠤᠢ ᠃ ᠲᠡᠭᠦᠨ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠴᠠᠭ ᠲᠤᠷ ᠵᠢᠨᠦᠩ ᠦᠵᠡᠵᠦ ᠪᠠᠢᠭᠲᠤᠨ ! 》ᠭᠡᠮᠡᠨ ᠳᠤᠷᠠᠲᠠᠶᠠ ᠬᠦᠯᠢᠶᠡᠨ ᠠᠪᠤᠪᠠ ᠃
ᠲᠡᠨᠳᠡᠴᠡ ᠡᠨᠡ ᠬᠥᠬᠡᠭᠴᠢᠨ ᠲᠠᠤᠯᠠᠢ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠭᠤᠴᠢᠨ ᠤ᠋ ᠪᠠᠷᠰ ᠴᠠᠭ ᠲᠤᠷ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠤ᠋ᠨ ᠡᠮᠦᠨᠡ ᠶᠡᠬᠡ ᠦᠬᠡᠷ ᠫᠤᠤ ᠳᠠᠭᠤᠷᠢᠰᠴᠤ ᠵᠢᠨᠦᠩ ᠦ᠋ᠨ ᠶᠡᠬᠡ ᠲᠤᠭ ᠭᠤᠷᠪᠠᠨ ᠵᠡᠷᠭᠡ ᠳᠠᠯᠠᠯᠲᠠᠯᠠ ᠲᠠᠢᠽᠦ ᠶ᠋ᠢᠨ ᠲᠤᠭ ᠬᠥᠳᠡᠯᠦᠭᠰᠡᠨ ᠦᠭᠡᠢ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠶᠡᠬᠡᠯᠡ ᠰᠣᠴᠢᠵᠤ ᠶᠠᠭᠠᠷᠠᠨ ᠲᠡᠷᠢᠭᠦᠨ ᠫᠤᠤ ᠶ᠋ᠢ ᠲᠠᠯᠪᠢᠭᠤᠯᠪᠠᠰᠤ ᠂ ᠲᠠᠢᠽᠦ ᠶ᠋ᠢᠨ ᠳᠤᠮᠳᠠᠳᠤ ᠬᠦᠷᠢᠶᠡᠨ ᠦ᠌ ᠲᠡᠷᠢᠭᠦᠨ ᠪᠦᠷᠢᠶᠡ ᠪᠠᠰᠠ ᠰᠦᠳᠦᠭ ᠦᠭᠡᠢ ᠳ᠋ᠦ᠍ᠷ ᠮᠤᠬᠤᠯᠢ ᠴᠢᠷᠠᠢ ᠠᠯᠳᠠᠵᠤ ᠶᠠᠭᠠᠷᠠᠨ ᠴᠠᠭᠠᠵᠠᠨ ᠤ᠋ ᠵᠡᠪᠡ ᠢᠯᠡᠭᠡᠵᠦ ᠳᠥᠷᠪᠡᠨ ᠪᠠᠭᠠ ᠡᠵᠡᠨ ᠢ᠋ ᠵᠠᠷᠯᠠᠨ ᠠᠪᠴᠢᠷᠠᠵᠤ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠣᠷ ᠵᠡᠷᠭᠡᠴᠡᠭᠦᠯᠦᠨ ᠵᠣᠭᠰᠣᠭᠠᠵᠤ ᠂ ᠵᠢᠨᠦᠩ ᠦ᠋ᠨ ᠲᠡᠮᠳᠡᠭ ᠂ ᠳᠠᠯᠪᠠᠭᠠ ᠵᠡᠪᠡ ᠂ ᠢᠯᠳᠦ ᠭᠤᠷᠪᠠᠨ ᠵᠦᠢᠯ ᠢ᠋ ᠲᠤᠰᠢᠶᠠᠭᠠᠳ ᠪᠠᠰᠠ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠣᠷᠭᠠᠨ ᠰᠢᠷᠠ ᠳ᠋ᠤᠷ ᠵᠢᠨᠦᠩ ᠦ᠋ᠨ ᠲᠤᠭ ᠢ᠋ ᠲᠤᠰᠢᠶᠠᠮᠠᠭᠴᠠ ᠪᠡᠶᠡ ᠪᠣᠰᠴᠤ ᠵᠢᠨᠦᠩ ᠦ᠋ᠨ ᠱ᠌ᠢᠷᠦ ᠶ᠋ᠢᠨ ᠣᠷᠣᠢ ᠲᠣᠭᠲᠠᠭᠠᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠳᠤᠭᠤᠯᠠᠭᠠ ᠪᠠᠨ ᠠᠪᠴᠤ ᠲᠠᠢᠽᠦ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠬᠥᠪᠡᠭᠦᠨ ᠲᠣᠯᠢ ᠳ᠋ᠤᠷ ᠥᠭᠴᠦ ᠪᠠᠷᠢᠭᠤᠯᠤᠭᠠᠳ ᠳᠠᠷᠤᠢ ᠬᠤᠶᠠᠭ ᠢ᠋ᠶ᠋ᠠᠨ ᠲᠠᠢᠯᠵᠤ ᠰᠢᠳᠠᠷ ᠠᠷᠠᠳ ᠢ᠋ᠶ᠋ᠠᠨ ᠵᠠᠩᠳᠠᠵᠤ ᠪᠡᠶᠡ ᠪᠡᠨ ᠬᠦᠯᠢᠭᠦᠯᠵᠦ ᠬᠣᠢᠰᠢ ᠬᠠᠨᠳᠤᠨ ᠰᠥᠭᠥᠳᠪᠡᠢ ᠂ ᠡᠭᠦᠨ ᠳ᠋ᠦ᠍ᠷ ᠣᠯᠠᠨ ᠵᠠᠩᠵᠤᠨ ᠨᠠᠷ ᠶᠡᠬᠡᠯᠡ ᠠᠶᠤᠯᠳᠤᠵᠤ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠴᠥᠮ ᠰᠢᠷᠣᠢ ᠮᠡᠲᠦ ᠪᠣᠯᠪᠠ ᠃ ᠡᠨᠡ ᠮᠡᠳᠡᠭᠡ ᠶ᠋ᠢ ᠬᠡᠳᠦᠢᠨᠡᠢ ᠲᠠᠢᠽᠦ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠰᠣᠨᠣᠰᠴᠤ ᠣᠶᠤᠲᠤ ᠰᠡᠴᠡᠨ ᠶᠠᠭᠠᠷᠠᠨ ᠣᠷᠣᠵᠤ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠰᠣᠴᠢᠵᠤ ᠵᠠᠬᠢᠷᠤᠨ : 《ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠬᠡᠮᠡᠭᠴᠢ ᠶ᠋ᠢ ᠴᠢᠰᠤᠨ ᠰᠤᠳᠠᠯ ᠮᠡᠲᠦ ᠰᠠᠬᠢ ᠬᠡᠮᠡᠵᠦᠬᠦᠢ ᠂ ᠡᠨᠡ ᠢᠨᠦ ᠡᠵᠡᠨ ᠪᠣᠯᠤᠭᠰᠠᠨ ᠮᠢᠨᠦ ᠶᠠᠯᠠ ᠪᠣᠯᠠᠢ !》 ᠭᠡᠮᠡᠨ ᠶᠠᠭᠠᠷᠠᠨ ᠳᠡᠭᠡᠭᠰᠢᠯᠡᠵᠦ ᠂ ᠪᠢᠲᠡᠭᠦᠨ ᠬᠤᠪᠴᠠᠰᠤᠨ ᠡᠮᠦᠰᠦᠨ ᠲᠤᠭ ᠤ᠋ᠨ ᠡᠮᠦᠨᠡ ᠪᠡᠨ ᠬᠣᠢᠰᠢ ᠬᠠᠨᠳᠤᠨ ᠰᠥᠭᠥᠳᠴᠦ ᠲᠡᠭᠷᠢ ᠭᠠᠵᠠᠷ ᠲᠤᠷ ᠬᠦᠵᠢ ᠵᠤᠯᠠ ᠪᠠᠷᠢᠵᠤ ᠂ ᠪᠤᠭᠤᠷᠵᠢ ᠲᠠᠨ ᠢ᠋ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠠ᠋ᠴᠠ ᠮᠢᠨᠦ ᠶᠠᠯᠠ ᠶ᠋ᠢ ᠲᠣᠭᠲᠠᠭᠠᠵᠤ ᠢᠷᠡ ᠭᠡᠮᠡᠨ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠮᠥᠷᠭᠥᠯᠭᠢᠯᠡᠨ ᠥᠭᠦᠯᠡᠷᠦᠨ :《ᠡᠵᠡᠨ ᠦ᠌ ᠰᠡᠳᠬᠢᠯ ᠡᠪᠬᠡᠷᠡᠨ ᠵᠣᠪᠠᠬᠤᠢ ᠳ᠋ᠤᠷ ᠬᠦᠷᠪᠡᠰᠦ ᠲᠦᠰᠢᠮᠡᠯ ᠦ᠋ᠨ ᠪᠡᠶᠡ ᠬᠡᠮᠬᠡᠷᠡᠨ ᠦᠬᠦᠪᠡᠰᠦ ᠵᠣᠬᠢᠬᠤ ᠠᠲᠠᠯᠠ ᠬᠡᠨ ᠠᠶᠤᠮᠰᠢᠭ᠋ ᠦᠭᠡᠢ ᠡᠵᠡᠨ ᠢ᠋ ᠶᠠᠯᠠᠯᠠᠮᠤᠢ ! ᠡᠵᠡᠨ ᠥᠪᠡᠷ ᠢ᠋ᠶ᠋ᠡᠨ ᠠᠢᠯᠠᠳᠤᠨ ᠲᠣᠭᠲᠠᠭᠠᠪᠠᠰᠤ ᠲᠤᠰᠢᠮᠡᠳ ᠪᠢᠳᠡ ᠮᠥᠨ ᠠᠮᠢᠳᠤᠷᠠᠨ ᠴᠢᠷᠮᠠᠢᠬᠤ ᠵᠠᠪᠰᠠᠷ ᠭᠠᠷᠬᠤ ᠪᠣᠢ ᠢ᠋ᠡ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠵᠠᠬᠢᠷᠤᠨ :
ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠦ᠋ᠨ ᠴᠢᠬᠤᠯᠠ ᠴᠠᠭᠠᠵᠠ ᠴᠢᠩᠭᠠ
ᠴᠡᠷᠢᠭ ᠦ᠋ᠨ ᠡᠵᠡᠨ ᠪᠢ ᠥᠪᠡᠷ ᠲᠡᠭᠡᠨ ᠣᠰᠣᠯᠳᠠᠪᠠ ᠂
ᠴᠡᠷᠢᠭ ᠬᠤᠶᠠᠭ ᠤ᠋ᠨ ᠮᠢᠩᠭᠠᠨ ᠶᠠᠯᠠ ᠶ᠋ᠢ ᠳᠠᠪᠬᠤᠷᠯᠠᠵᠤ
ᠴᠡᠷᠢᠭ ᠲᠦ᠍ᠷ ᠱᠠᠩᠨᠠᠬᠤ ᠮᠢᠩᠭᠠᠨ ᠠᠭᠲᠠ ᠶ᠋ᠢ ᠭᠠᠷᠭᠠᠰᠤᠭᠠᠢ ᠪᠢ !
ᠬᠡᠮᠡᠵᠦ ᠥᠪᠡᠷ ᠦ᠋ᠨ ᠭᠡᠷ ᠦ᠋ᠨ ᠬᠥᠷᠥᠩᠭᠡ ᠡᠴᠡ ᠪᠡᠨ ᠮᠢᠩᠭᠠᠨ ᠠᠭᠲᠠ ᠮᠣᠷᠢ ᠭᠠᠷᠭᠠᠵᠤ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠲᠤᠰᠢᠶᠠᠨ ᠭᠠᠪᠢᠶᠠ ᠪᠠᠢᠭᠤᠯᠬᠤᠢ ᠳ᠋ᠤᠷ ᠥᠭᠭᠦᠭᠡᠳ ᠰᠠᠶᠢ ᠪᠡᠶᠡ ᠪᠡᠷ ᠢᠷᠡᠵᠦ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠬᠦᠯᠢᠶᠡᠰᠦᠨ ᠢ᠋ ᠮᠣᠳᠣᠷ ᠢ᠋ᠶ᠋ᠠᠷ ᠲᠠᠢᠯᠵᠤ ᠂ ᠤᠭ ᠬᠡᠪ ᠢ᠋ᠶ᠋ᠡᠷ ᠡᠯᠡ ᠵᠦᠢᠯ ᠢ᠋ ᠡᠭᠡᠭᠦᠯᠵᠦ ᠡᠷᠭᠦᠭᠰᠡᠨᠡ ᠮᠤᠬᠤᠯᠢ ᠡᠭᠰᠢᠨ ᠪᠥᠭᠰᠢᠲᠡᠯᠡ ᠤᠬᠢᠯᠠᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠨ ᠪᠣᠰᠴᠤ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠵᠤ ᠣᠯᠠᠨ ᠵᠠᠩᠵᠤᠨ ᠢ᠋ ᠴᠤᠭᠯᠠᠭᠤᠯᠵᠤ ᠵᠠᠷᠯᠠᠷᠤᠨ᠄
ᠴᠢᠳᠠᠯ ᠦᠭᠡᠢ ᠵᠢᠨᠦᠩ ᠣᠰᠣᠯᠳᠠᠵᠤ ᠡᠵᠡᠨ ᠢ᠋ᠶ᠋ᠡᠨ ᠴᠢᠬᠤᠯᠳᠠᠭᠤᠯᠪᠠᠢ
ᠴᠢᠬᠤᠯᠠ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠ ᠪᠣᠯᠭᠠᠨ ᠡᠵᠡᠨ ᠮᠢᠨᠦ ᠳᠤᠷᠭᠠᠨᠳᠠᠪᠠᠢ ᠂
ᠴᠡᠷᠢᠭ ᠦ᠋ᠨ ᠬᠤᠶᠠᠭ ᠪᠦᠭᠦᠳᠡᠭᠡᠷ ᠴᠢᠰᠤᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠴᠢᠷᠮᠠᠢᠭᠲᠤᠨ
ᠴᠢᠬᠤᠯ ᠮᠤᠬᠤᠯᠢ ᠵᠠᠭᠤᠨ ᠠᠭᠲᠠ ᠪᠠᠷ ᠪᠡᠶᠡ ᠶᠦ᠍ᠭᠡᠨ ᠶᠠᠯᠠᠯᠠᠪᠠᠢ !
ᠬᠡᠮᠡᠭᠡᠳ ᠥᠪᠡᠷ ᠦ᠋ᠨ ᠠᠮᠢᠨ ᠠ᠋ᠴᠠ ᠪᠠᠨ ᠵᠠᠭᠤᠨ ᠠᠭᠲᠠ ᠭᠠᠷᠭᠠᠵᠤ ᠪᠡᠶᠡ ᠪᠡᠨ ᠲᠣᠷᠭᠠᠭᠠᠳ ᠮᠥᠨ ᠡᠳᠦᠷ ᠦ᠋ᠨ ᠯᠤᠤ ᠴᠠᠭ ᠲᠤᠷ ᠰᠠᠢ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠵᠦ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠦᠭ ᠮᠣᠷᠳᠠᠪᠠᠢ᠃ ᠡᠨᠡ ᠢᠨᠦ ᠲᠠᠢᠽᠦ ᠮᠤᠬᠤᠯᠢ᠂ ᠡᠵᠡᠨ ᠲᠦᠰᠢᠮᠡᠯ ᠬᠡᠳᠦᠢᠨᠡᠢ ᠵᠥᠪᠳᠡᠨ ᠲᠣᠭᠲᠠᠵᠤ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠ ᠪᠣᠯᠭᠠᠨ ᠰᠦᠷ ᠬᠡᠰᠢᠭ ᠢ᠋ ᠲᠡᠭᠰᠢᠳᠬᠡᠬᠦ ᠠᠷᠭᠠ ᠠᠵᠤᠭᠤ ᠃
ᠰᠤᠳᠤᠷᠴᠢ ᠲᠦᠰᠢᠮᠡᠯ ᠴᠥᠯᠪᠡᠨ ᠪᠢᠴᠢᠭᠰᠡᠭᠡᠷ ᠡᠨᠳᠡ ᠬᠦᠷᠴᠦ ᠳᠣᠲᠣᠷᠠ ᠭᠠᠢᠬᠠᠵᠤ
ᠰᠣᠯᠢᠭᠤ ᠮᠥᠯᠢᠭᠣ ᠬᠡᠳᠦᠨ ᠦᠰᠦᠭ ᠦ᠋ᠨ ᠰᠢᠯᠦᠭ ᠪᠢᠴᠢᠵᠦ ᠲᠡᠮᠳᠡᠭᠯᠡᠭᠰᠡᠨ ᠠᠨᠤ᠄
ᠠᠷᠭᠠ ᠪᠣᠳᠣᠯᠭᠠ ᠬᠣᠣᠰ ᠪᠦᠷᠢᠳᠦᠭᠰᠡᠨ ᠵᠢᠨᠦᠩ ᠮᠤᠬᠤᠯᠢ ᠭᠠᠢᠬᠠᠯᠲᠠᠢ ᠤᠤ ?
ᠠᠯᠲᠠᠨ ᠶᠠᠰᠤᠲᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠣᠭᠳᠠ ᠴᠢᠩᠭᠢᠰ ᠮᠡᠷᠭᠡᠨ ᠢ᠋ ᠦᠦ ?
ᠠᠴᠢ ᠵᠢᠷᠤᠮ ᠢ᠋ ᠬᠦᠨᠳᠦ ᠪᠣᠯᠭᠠᠭᠴᠢ ᠴᠢᠳᠠᠯᠲᠤ ᠲᠦᠰᠢᠮᠡᠯ ᠪᠡᠷᠬᠡ ᠬᠡᠮᠡᠬᠦᠢ ᠳ᠋ᠦ᠍ ᠂
ᠠᠢᠯᠠᠳᠴᠤ ᠮᠡᠳᠡᠬᠦ ᠲᠠᠢᠽᠦ ᠶ᠋ᠢᠨ ᠮᠡᠲᠦ ᠡᠵᠡᠨ ᠢ᠋ ᠤᠯᠬᠤᠢ ᠳ᠋ᠤᠷ ᠨᠡᠩ ᠪᠡᠷᠬᠡ ᠪᠤᠰᠤ ᠤᠤ ?
ᠲᠡᠨᠳᠡᠴᠡ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠦᠭ ᠡᠴᠢᠬᠦ ᠶ᠋ᠢ ᠳ᠋ᠦ᠍ᠷ ᠬᠡᠯᠡᠬᠦ ᠦᠭᠡᠢ ᠃
ᠵᠢᠴᠢ ᠥᠭᠦᠯᠡᠬᠦ ᠢᠨᠦ ᠰᠠᠷᠯᠠᠭ ᠤᠯᠤᠰ ᠲᠤᠷ ᠤᠷᠢᠳᠠ ᠡᠶᠡᠳᠡᠷᠡ ᠡᠴᠢᠭᠰᠡᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠵᠡᠯᠮᠡ ᠪᠠ ᠬᠤᠳᠠᠭᠠᠨᠠ ᠪᠡᠬᠢ ᠬᠣᠶᠠᠭᠤᠯᠠ ᠶ᠋ᠢ ᠬᠡᠯᠡᠬᠦ ᠢᠨᠦ : ᠲᠡᠭᠦᠨᠴᠡ ᠵᠠᠯᠮᠠ ᠂ ᠬᠤᠳᠠᠭᠠᠨᠠ ᠪᠡᠬᠢ ᠬᠣᠶᠠᠭᠤᠯᠠ ᠵᠠᠭᠤᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠢ᠋ᠶ᠋ᠡᠷ ᠮᠢᠩᠭᠠᠨ ᠲᠡᠮᠡᠭᠡᠨ ᠠᠴᠢᠶᠠ ᠬᠥᠲᠥᠯᠦᠭᠦᠯᠵᠦ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠠᠬᠠ ᠶ᠋ᠢᠨ ᠬᠠᠷᠠᠭᠤᠯ ᠳ᠋ᠤᠷ ᠬᠦᠷᠴᠦ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠵᠤ ᠪᠤᠷᠤᠭᠤ ᠬᠦᠯᠢᠶᠡᠨ ᠡᠶᠡᠳᠡᠬᠦ ᠤᠴᠢᠷ ᠢ᠋ ᠬᠡᠯᠡᠵᠦ ᠂ ᠬᠠᠮᠲᠤ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠰᠣᠷᠤᠨᠴᠤᠭ ᠨᠡᠷᠡᠲᠦ ᠬᠣᠲᠠᠨ ᠳ᠋ᠤᠷ ᠬᠦᠷᠴᠦ ᠴᠡᠷᠢᠭ ᠪᠠ ᠠᠴᠢᠶᠠ ᠶ᠋ᠢ ᠬᠣᠲᠠᠨ ᠤ᠋ ᠭᠠᠳᠠᠨᠠ ᠪᠠᠭᠤᠯᠭᠠᠵᠤ ᠂ ᠪᠡᠯᠡᠭ ᠦ᠋ᠨ ᠶᠠᠭᠤᠮᠠ ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡᠨ ᠣᠪᠣᠭᠠᠯᠠᠭᠰᠠᠨ ᠢ᠋ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠶᠢᠰᠦᠨ ᠠᠢᠮᠠᠭ ᠤ᠋ᠨ ᠠᠷᠪᠠᠨ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠶᠡᠬᠡᠯᠡ ᠣᠮᠣᠭ᠍ᠰᠢᠨ ᠦᠭᠦᠯᠡᠯᠳᠦᠷᠦᠨ : 《ᠪᠢᠳᠡᠨ ᠬᠥᠳᠡᠯᠦᠯ ᠦᠭᠡᠢ ᠪᠡᠷ ᠪᠧᠲ᠋ᠠ᠋ ᠤᠯᠤᠰ ᠳᠠᠭᠠᠭᠰᠠᠨ ᠪᠤᠰᠤ ᠤᠤ ? 》ᠬᠡᠮᠡᠯᠳᠦᠵᠦ ᠠᠰᠠᠭᠤᠪᠠᠰᠤ ᠡᠳᠡᠭᠡᠷ ᠠᠴᠢᠶᠠ ᠬᠥᠲᠥᠯᠦᠭᠰᠡᠨ ᠠᠷᠠᠳ ᠥᠭᠦᠯᠡᠷᠦᠨ : 《ᠡᠳᠡᠭᠡᠷ ᠮᠢᠩᠭᠠᠨ ᠠᠴᠢᠶᠠ ᠴᠥᠮ ᠢ᠋ᠶ᠋ᠠᠷ ᠲᠠᠨ ᠤ᠋ ᠶᠢᠰᠦᠨ ᠤᠯᠤᠰ ᠲᠤᠷ ᠱᠠᠩᠨᠠᠬᠤ ᠡᠳ᠋ ᠲᠠᠸᠠᠷ ᠂ ᠮᠥᠩᠭᠥ ᠪᠥᠰ ᠂ ᠠᠷᠠᠰᠤ ᠬᠥᠷᠥᠰᠥ ᠶ᠋ᠢᠨ ᠵᠦᠢᠯ ᠂ ᠳᠠᠭᠠᠯᠳᠤᠭᠠ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠤᠨ ᠢᠷᠡᠵᠦ ᠲᠠᠨ ᠤ᠋ ᠬᠠᠭᠠᠨ ᠤ᠋ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠮᠤᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠨᠢᠭᠡᠨ ᠡᠴᠡ ᠠᠷᠪᠠᠨ ᠳ᠋ᠤᠷ ᠠᠯᠳᠠᠷᠰᠢᠵᠤ ᠮᠢᠩᠭᠠᠨ ᠠ᠋ᠴᠠ ᠲᠦᠮᠡᠨ ᠳ᠋ᠦ᠍ᠷ ᠳᠠᠭᠤᠷᠢᠰᠤᠭᠠᠳ ᠤᠳᠠᠭᠰᠠᠨ ᠦᠭᠡᠢ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠬᠣᠷᠢᠨ ᠵᠢᠷᠭᠤᠭᠠᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠲᠦᠷᠬᠢᠯᠡᠨ ᠬᠡᠯᠡᠯᠴᠡᠨ ᠡᠭᠦᠰᠬᠡᠯᠴᠡᠪᠡ ᠃ ᠡᠨᠡ ᠦᠶᠡ ᠳ᠋ᠦ᠍ ᠵᠠᠯᠮᠠ ᠨᠠᠷ ᠬᠡᠳᠦᠢᠨᠡᠢ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠵᠠᠯᠢᠲᠤ ᠬᠠᠭᠠᠨ ᠳ᠋ᠤᠷ ᠮᠥᠷᠭᠥᠵᠦ ᠪᠠᠷᠠᠯᠠᠭᠠᠳ ᠭᠤᠶᠤᠨ ᠮᠡᠳᠡᠭᠦᠯᠦᠷᠦᠨ : 《ᠮᠠᠨ ᠤ᠋ ᠡᠵᠡᠨ ᠪᠤᠷᠤᠭᠤ ᠪᠠᠨ ᠮᠡᠳᠡᠵᠦ ᠶᠡᠬᠡᠯᠡ ᠭᠡᠮᠰᠢᠨ ᠮᠢᠩᠭᠠᠨ ᠠᠴᠢᠶᠠ ᠮᠥᠩᠭᠥ ᠂ ᠪᠥᠰ ᠂ ᠨᠡᠬᠡᠢ ᠂ ᠠᠷᠠᠰᠤ ᠶ᠋ᠢᠨ ᠵᠦᠢᠯ ᠦ᠋ᠨ ᠡᠳ᠋ ᠲᠠᠸᠠᠷ ᠤ᠋ᠨ ᠪᠡᠯᠡᠭ ᠪᠠᠷᠢᠭᠤᠯᠵᠤ ᠂ ᠶᠠᠯᠠ ᠪᠠᠨ ᠲᠠᠢᠯᠬᠤ ᠶ᠋ᠢ ᠭᠤᠶᠤᠵᠤ ᠂ ᠬᠠᠷᠢᠯᠴᠠᠨ ᠨᠢᠭᠤᠷ ᠤ᠋ᠨ ᠡᠮᠦᠨᠡ ᠲᠠᠢᠯᠤᠨ ᠬᠡᠯᠡᠯᠴᠡᠰᠦᠭᠡᠢ ᠭᠡᠮᠡᠨ ᠤᠷᠢᠳᠠ ᠡᠶᠡᠳᠡᠬᠦ ᠪᠢᠴᠢᠭ ᠢ᠋ ᠡᠷᠭᠦᠭᠦᠯᠪᠡ 》ᠬᠡᠮᠡᠵᠦ ᠪᠢᠴᠢᠭ ᠢ᠋ᠶ᠋ᠡᠨ ᠡᠷᠭᠦᠭᠰᠡᠨ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠪᠢᠴᠢᠭ ᠢ᠋ ᠲᠠᠢᠯᠤᠨ ᠰᠣᠨᠣᠰᠪᠠᠰᠤ ᠮᠥᠨ ᠬᠦ᠌ ᠡᠶᠡᠳᠡᠬᠦ ᠦᠭᠡᠰ ᠲᠤᠯᠠ ᠵᠠᠷᠯᠢᠭ ᠪᠠᠭᠤᠯᠭᠠᠷᠤᠨ :《ᠲᠠᠨ ᠤ᠋ ᠡᠵᠡᠨ ᠨᠢᠭᠡᠨᠲᠡ ᠥᠪᠡᠷ ᠢ᠋ᠶ᠋ᠡᠨ ᠶᠠᠯᠠ ᠪᠠᠨ ᠮᠡᠳᠡᠵᠦ ᠮᠥᠷᠭᠥᠷᠡ ᠢᠷᠡᠬᠦ ᠲᠤᠯᠠ ᠳ᠋ᠤᠷ ᠮᠢᠨᠦ ᠪᠣᠳᠣᠨ ᠲᠣᠭᠲᠠᠭᠠᠬᠤ ᠶ᠋ᠢ ᠬᠦᠯᠢᠶᠡ ! 》ᠭᠡᠮᠡᠨ ᠵᠠᠯᠮᠠ ᠲᠠᠨ ᠢ᠋ ᠪᠠᠭᠤᠳᠠᠯ ᠳ᠋ᠤᠷ ᠠᠨᠤ ᠡᠭᠡᠭᠦᠯᠪᠡ ᠃
ᠲᠡᠭᠦᠨᠴᠡ ᠶᠢᠰᠦᠨ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠢᠨᠦ ᠴᠢᠮᠡᠭᠡ ᠠᠪᠤᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠡᠯᠡᠬᠦ ᠢᠨᠦ : ᠵᠠᠯᠢᠲᠤ ᠬᠠᠭᠠᠨ ᠪᠡᠯᠡᠭ ᠦ᠋ᠨ ᠡᠳ᠋ ᠢ᠋ ᠠᠪᠬᠤ ᠦᠭᠡᠢ ᠣᠨᠴᠠ ᠦᠬᠦᠨ ᠪᠠᠢᠯᠳᠤᠮᠤᠢ ᠭᠡᠮᠡᠨ ᠮᠠᠨ ᠤ᠋ ᠤᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢ ᠦᠯᠳᠡᠵᠦ ᠭᠠᠷᠭᠠᠪᠠ ᠬᠡᠮᠡᠬᠦᠢ ᠳ᠋ᠦ᠍ᠷ ᠂ ᠶᠢᠰᠦᠨ ᠤᠯᠤᠰ ᠤ᠋ᠨ ᠭᠠᠳᠠᠭᠠᠳᠤ ᠴᠡᠷᠢᠭ ᠮᠠᠰᠢ ᠤᠷᠮᠠ ᠬᠠᠷᠢᠵᠤ ᠠᠮᠲᠠ ᠠᠯᠳᠠᠷᠠᠭᠠᠳ ᠥᠪᠡᠷ ᠵᠠᠭᠤᠷᠠ ᠪᠠᠨ ᠵᠥᠪᠯᠡᠯᠳᠦᠨ ᠥᠭᠦᠯᠡᠷᠦᠨ : 《ᠵᠠᠯᠢᠲᠤ ᠬᠠᠭᠠᠨ ᠶᠣᠰᠣ ᠦᠭᠡᠢ ᠂ ᠡᠳᠦᠭᠡ ᠮᠠᠨ ᠤ᠋ ᠵᠡᠷᠭᠡ ᠶ᠋ᠢᠨ ᠭᠠᠳᠠᠭᠠᠳᠤ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠨᠡᠢᠯᠡᠭᠦᠯᠵᠦ ᠰᠦᠷ ᠶᠡᠬᠡᠳᠦᠭᠰᠡᠨ ᠢ᠋ᠶ᠋ᠡᠷ ᠰᠠᠶᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠠᠶᠤᠵᠤ ᠡᠵᠡᠨ ᠢᠨᠦ ᠪᠢᠰᠢᠷᠡᠭᠡᠳ ᠰᠠᠶᠢ ᠡᠨᠡ ᠮᠡᠲᠦ ᠮᠢᠩᠭᠠᠨ ᠠᠴᠢᠶᠠ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠭᠤᠯᠵᠤ ᠂ ᠪᠠᠰᠠ ᠪᠡᠶᠡ ᠪᠡᠷ ᠡᠶᠡᠳᠡᠨ ᠳᠠᠭᠠᠷᠠ ᠢᠷᠡᠬᠦ ᠡᠢᠮᠦ ᠰᠠᠢᠬᠠᠨ ᠬᠡᠷᠡᠭ ᠢ᠋ ᠪᠠᠰᠠ ᠬᠦᠯᠢᠶᠡᠬᠦ ᠦᠭᠡᠢ ᠂ ᠣᠨᠴᠠ ᠮᠠᠨ ᠢ᠋ᠶ᠋ᠠᠷ ᠦᠬᠦᠨ ᠪᠠᠢᠯᠳᠤᠭᠤᠯᠬᠤᠢ ᠳ᠋ᠤᠷ ᠬᠡᠨ ᠲᠡᠭᠦᠨ ᠳ᠋ᠦ᠍ᠷ ᠠᠮᠢ ᠪᠠᠨ ᠭᠡᠭᠡᠵᠦ ᠵᠢᠳᠬᠦᠬᠦ ᠠᠵᠢ ! 》ᠭᠡᠮᠡᠨ ᠣᠯᠠᠨ ᠢ᠋ᠶ᠋ᠠᠷ ᠵᠠᠯᠢᠲᠤ ᠬᠠᠭᠠᠨ ᠳ᠋ᠤᠷ ᠬᠣᠷᠣᠰᠤᠨ ᠭᠠᠰᠠᠯᠤᠯᠴᠠᠪᠠᠢ ᠃
ᠲᠡᠭᠦᠨᠴᠡ ᠵᠠᠯᠢᠲᠤ ᠬᠠᠭᠠᠨ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠵᠡᠯᠮᠡ ᠂ ᠬᠤᠳᠠᠭᠠᠨᠠ ᠪᠡᠬᠢ ᠬᠣᠶᠠᠭᠤᠯᠠ ᠶ᠋ᠢ ᠭᠠᠷᠭᠠᠮᠠᠭᠴᠠ ᠥᠪᠡᠷ ᠦ᠋ᠨ ᠳᠣᠣᠷᠠᠬᠢ ᠳᠥᠷᠪᠡᠨ ᠶᠡᠬᠡ ᠵᠥᠪᠯᠡᠯ ᠦ᠋ᠨ ᠰᠠᠢᠳ – ᠨᠢᠭᠡᠨ ᠦ᠌ ᠨᠡᠷᠡ ᠰᠠᠭᠠᠷ ᠂ ᠨᠢᠭᠡᠨ ᠦ᠌ ᠨᠡᠷᠡ ᠲᠠᠷᠪᠡ ᠂ ᠨᠢᠭᠡᠨ ᠦ᠌ ᠨᠡᠷᠡ ᠬᠠᠨᠳᠠᠭᠠᠢ ᠂ ᠨᠢᠭᠡᠨ ᠦ᠌ ᠨᠡᠷᠡ ᠤᠬᠠᠭᠠᠨᠲᠤ ᠃ ᠡᠨᠡ ᠳᠥᠷᠪᠡᠨ ᠲᠦᠰᠢᠮᠡᠯ ᠯᠦ᠍ᠭᠡ ᠪᠡᠨ ᠵᠥᠪᠳᠡᠨ ᠥᠭᠦᠯᠡᠷᠦᠨ : 《ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠢ᠋ᠶ᠋ᠡᠷ ᠮᠠᠨ ᠤ᠋ ᠶᠢᠰᠦᠨ ᠶᠡᠬᠡ ᠤᠯᠤᠰ ᠢ᠋ ᠴᠤᠭᠯᠠᠭᠤᠯᠵᠤ ᠂ ᠮᠠᠨ ᠤ᠋ ᠥᠪᠡᠷ ᠦ᠋ᠨ ᠶᠡᠬᠡ ᠴᠡᠷᠢᠭ ᠲᠡᠢ ᠨᠡᠢᠯᠡᠭᠰᠡᠨ ᠢ᠋ ᠰᠣᠨᠣᠰᠴᠤ ᠨᠢᠭᠡᠨᠲᠡ ᠠᠶᠤᠭᠰᠠᠨ ᠲᠤᠯᠠ ᠡᠳᠦᠭᠡ ᠮᠢᠩᠭᠠᠨ ᠠᠴᠢᠶᠠ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠭᠤᠯᠵᠤ ᠂ ᠪᠠᠰᠠ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠨᠢᠭᠤᠷ ᠵᠣᠯᠭᠠᠨ ᠡᠶᠡᠳᠡᠷᠡ ᠢᠷᠡᠭᠰᠡᠨ ᠢᠨᠦ ᠰᠡᠵᠢᠭᠯᠡᠯ ᠦᠭᠡᠢ ᠪᠣᠯᠪᠠ ᠃ ᠲᠡᠢᠨ ᠪᠣᠯᠪᠠᠴᠤ ᠪᠢᠳᠡ ᠳᠠᠷᠤᠢ ᠡᠨᠡ ᠶᠣᠰᠣᠭᠠᠷ ᠦᠨᠡᠬᠡᠷ ᠡᠶᠡᠳᠡᠮᠦᠢ ᠦᠦ ? ᠡᠰᠡᠬᠦᠯᠡ ᠡᠶᠡᠳᠡᠮᠦᠢ ᠭᠡᠮᠡᠨ ᠡᠳ᠋ ᠢ᠋ ᠢᠨᠦ ᠮᠡᠬᠡᠯᠡᠵᠦ ᠠᠪᠤᠭᠠᠳ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠢ᠋ ᠢᠷᠡᠭᠰᠡᠨ ᠦ᠌ ᠬᠣᠢᠨᠠ ᠭᠡᠨᠡᠳᠡᠭᠦᠯᠦᠨ ᠪᠠᠢᠯᠳᠤᠵᠤ ᠠᠷᠢᠯᠭᠠᠨ ᠲᠠᠰᠤᠯᠪᠠᠰᠤ ᠰᠠᠢᠨ ᠦᠭᠡᠢ ᠦᠦ ? 》 ᠭᠡᠮᠡᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠰᠠᠭᠠᠷ ᠂ ᠳᠠᠷᠪᠡ ᠂ ᠤᠬᠠᠭᠠᠨᠲᠤ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠬᠠᠮᠲᠤ ᠪᠠᠷ ᠠᠢᠯᠠᠳᠬᠠᠷᠤᠨ : 《ᠬᠠᠭᠠᠨ ᠡᠵᠡᠨ ᠦ᠌ ᠡᠨᠡ ᠠᠷᠭᠠ ᠮᠠᠰᠢ ᠮᠡᠷᠭᠡᠨ ᠂ ᠡᠳ᠋ ᠣᠯᠵᠤ ᠪᠠᠰᠠ ᠡᠷᠬᠡ ᠶ᠋ᠢ ᠡᠵᠡᠯᠡᠮᠦᠢ ᠂ ᠡᠮᠦᠨᠡ ᠤᠮᠠᠷᠠ ᠴᠥᠮ ᠮᠠᠨ ᠳ᠋ᠤᠷ ᠪᠣᠯᠤᠮᠤᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠵᠠᠭᠤ ᠠ᠋ᠴᠠ ᠬᠠᠨᠳᠠᠭᠠᠢ ᠨᠡᠷᠡᠲᠦ ᠲᠤᠷᠰᠢᠮᠡᠯ ᠲᠡᠷᠢᠭᠦᠨ ᠰᠠᠵᠢᠵᠤ ᠥᠭᠦᠯᠡᠷᠦᠨ : 《ᠡᠨᠡ ᠬᠡᠷᠡᠭ ᠮᠠᠰᠢ ᠰᠡᠵᠢᠭᠯᠡᠯ ᠲᠡᠢ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠨᠢᠭᠡᠨᠲᠡ ᠮᠢᠩᠭᠠᠨ ᠠᠴᠢᠶᠠ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠭᠤᠯᠵᠤ ᠂ ᠮᠠᠨ ᠤ᠋ ᠵᠠᠩᠵᠤᠨ ᠴᠡᠷᠢᠭ ᠲᠦ᠍ᠷ ᠱᠠᠩᠨᠠᠭᠤᠯᠵᠤ ᠂ ᠡᠶᠡᠳᠡᠵᠦ ᠳᠠᠭᠠᠬᠤ ᠲᠤᠢᠯ ᠤ᠋ᠨ ᠬᠡᠷᠡᠭ ᠪᠥᠭᠡᠲᠡᠯᠡ ᠣᠨᠴᠠ ᠪᠡᠶᠡ ᠪᠡᠷ ᠢᠷᠡᠵᠦ ᠲᠠᠩᠭᠠᠷᠢᠭ᠋ ᠨᠡᠢᠯᠡᠮᠦᠢ ᠬᠡᠮᠡᠭᠴᠢ ᠢᠨᠦ ᠶᠠᠮᠪᠠᠷ ᠰᠠᠨᠠᠭᠠᠨ ᠠᠵᠢ ? ᠲᠡᠷᠡ ᠨᠢᠭᠡᠨᠲᠡ ᠪᠤᠰᠤᠳ ᠤ᠋ᠨ ᠵᠠᠬᠠ ᠳ᠋ᠤᠷ ᠭᠦᠨᠡ ᠣᠷᠣᠬᠤ ᠲᠤᠯᠠ ᠬᠡᠷᠬᠢᠪᠡᠴᠦ ᠴᠡᠷᠢᠭ ᠦᠭᠡᠢ ᠪᠡᠷ ᠦᠯᠦ ᠢᠷᠡᠮᠦᠢ᠂ ᠲᠡᠷᠡ ᠮᠠᠨ ᠤ᠋ ᠬᠤᠷᠢᠶᠠᠭᠰᠠᠨ ᠴᠡᠷᠢᠭ ᠲᠦ᠍ᠷ ᠱᠠᠩ ᠥᠭᠴᠦ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠢ᠋ ᠬᠤᠪᠢᠰᠬᠠᠭᠠᠳ ᠪᠠᠰᠠ ᠲᠡᠭᠦᠨ ᠦ᠌ ᠪᠡᠶᠡ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠢᠷᠡᠬᠦᠢ ᠳ᠋ᠦ᠍ᠷ ᠡᠭᠦᠨ ᠢ᠋ ᠡᠰᠡ ᠰᠡᠵᠢᠭᠯᠡᠪᠡᠰᠦ ᠪᠣᠯᠤᠮᠤᠢ ᠤᠤ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠰᠠᠭᠠᠷ ᠂ ᠳᠠᠷᠪᠡ ᠂ ᠤᠬᠠᠭᠠᠨᠲᠤ ᠭᠤᠷᠪᠠᠭᠤᠯᠠ ᠵᠡᠷᠭᠡ ᠪᠡᠷ ᠥᠭᠦᠯᠡᠷᠦᠨ : 《ᠡᠭᠦᠨ ᠳ᠋ᠦ᠍ᠷ ᠶᠠᠮᠪᠠᠷ ᠰᠡᠵᠢᠭᠯᠡᠬᠦ ᠭᠠᠵᠠᠷ ᠪᠣᠢ ? ᠲᠡᠷᠡ ᠦᠨᠡᠬᠡᠷ ᠮᠠᠨ ᠯᠤᠭᠠ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠪᠡᠰᠦ ᠰᠢᠭᠤᠳ ᠢᠷᠡᠵᠦ ᠪᠠᠢᠯᠳᠤᠪᠠᠰᠤ ᠪᠠᠷᠠᠪᠠ ᠂ ᠪᠠᠰᠠ ᠡᠨᠡ ᠮᠡᠲᠦ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠭᠤᠯᠵᠤ ᠶᠠᠭᠣᠬᠢᠮᠣᠢ ᠃ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢᠷᠡᠬᠦ ᠢᠨᠦ ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠡᠷᠡ ᠬᠦᠨᠳᠦ ᠪᠡᠯᠡᠭ ᠢᠯᠡᠭᠡᠭᠰᠡᠨ ᠳ᠋ᠡᠭᠡᠨ ᠡᠷᠡᠮᠰᠢᠵᠦ ᠨᠢᠭᠤᠷ ᠵᠣᠯᠭᠠᠨ ᠂ ᠪᠠᠲᠤ ᠯᠤᠲᠤ ᠪᠠᠷ ᠡᠶᠡᠳᠡᠵᠦ ᠨᠠᠢᠷᠠᠯᠳᠤᠰᠤᠭᠠᠢ ᠬᠡᠮᠡᠭᠰᠡᠨ ᠪᠣᠯᠠᠢ ᠂ ᠳᠠᠷᠤᠢ ᠲᠡᠭᠦᠨ ᠦ᠌ ᠡᠰᠡ ᠰᠡᠷᠡᠮᠵᠢᠯᠡᠭᠰᠡᠨ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠪᠠᠷᠢᠵᠤ ᠠᠯᠠᠬᠤᠢ ᠳ᠋ᠤᠷ ᠶᠠᠭᠤᠨ ᠳ᠋ᠤᠷ ᠦᠯᠦ ᠪᠣᠯᠤᠮᠤᠢ ᠃ ᠵᠢᠴᠢ ᠪᠢᠳᠡ ᠪᠠᠰᠠ ᠲᠡᠳᠡᠨ ᠦ᠌ ᠢᠷᠡᠭᠰᠡᠨ ᠡᠯᠴᠢ ᠡᠴᠡ ᠠᠰᠠᠭᠤᠪᠠᠰᠤ ᠲᠡᠭᠦᠨ ᠦ᠌ ᠡᠵᠡᠨ ᠢ᠋ ᠳᠠᠭᠠᠵᠤ ᠢᠷᠡᠬᠦ ᠴᠡᠷᠢᠭ ᠨᠢᠭᠡᠨ ᠬᠣᠶᠠᠷ ᠲᠦᠮᠡ ᠡᠴᠡ ᠬᠡᠲᠦᠷᠡᠬᠦ ᠦᠭᠡᠢ ᠬᠡᠮᠡᠮᠦᠢ ᠃ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠬᠤᠪᠢ ᠳ᠋ᠤᠷ ᠲᠡᠳᠡᠨ ᠦ᠌ ᠴᠡᠷᠢᠭ ᠨᠢᠭᠡᠨ ᠬᠤᠪᠢ ᠴᠤ᠌ ᠦᠭᠡᠢ ᠂ ᠮᠠᠨ ᠤ᠋ ᠴᠡᠷᠢᠭ ᠪᠠᠢᠯᠳᠤᠬᠤ ᠶ᠋ᠢ ᠪᠠᠢᠲᠤᠭᠠᠢ ᠂ ᠬᠡᠳᠦᠢ ᠢᠳᠡᠪᠡᠴᠦ ᠮᠥᠨ ᠢᠳᠡᠵᠦ ᠭᠦᠢᠴᠡᠬᠦ ᠦᠭᠡᠢ ᠪᠣᠯᠠᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠨᠳᠠᠭᠠᠢ ᠲᠦᠰᠢᠮᠡᠯ ᠥᠭᠦᠯᠡᠷᠦᠨ : 《ᠡᠳᠦᠭᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠮᠢᠩᠭᠠᠨ ᠠᠴᠢᠶᠠ ᠪᠡᠯᠡᠭ ᠢᠨᠦ ᠡᠭᠡᠨᠡᠭᠲᠡ ᠶᠠᠮᠪᠠᠷ ᠶᠠᠮᠪᠠᠷ ᠶᠠᠭᠤᠮᠠ ᠪᠣᠢ ? 》ᠭᠤᠷᠪᠠᠭᠤᠯᠠ ᠥᠴᠢᠷᠦᠨ᠄ 《ᠠᠯᠲᠠ ᠮᠥᠩᠭᠥ ᠂ ᠲᠣᠷᠭᠠ ᠲᠥᠷᠭᠡ ᠂ ᠴᠠᠯᠮᠠ ᠲᠠᠷᠠᠮᠠ ᠂ ᠪᠥᠰ ᠠᠷᠠᠰᠤ ᠂ ᠴᠠᠢ ᠲᠣᠰᠣ ᠂ ᠳᠠᠪᠤᠰᠤ ᠳᠠᠷᠠᠰᠤ ᠂ ᠲᠤᠲᠤᠷᠭᠠ ᠪᠤᠭᠤᠳᠠᠢ ᠂ ᠬᠤᠷᠤᠳ ᠪᠠᠰᠢᠯᠠᠭ ᠁ ᠬᠦᠷᠲᠡᠯᠡ ᠡᠮᠦᠨᠡ ᠤᠮᠠᠷᠠ ᠶ᠋ᠢᠨ ᠬᠤᠪᠴᠠᠳ ᠢᠳᠡᠭᠡᠨ ᠪᠦᠷᠢᠨ ᠬᠡᠮᠡᠵᠦᠬᠦᠢ᠃ ᠡᠨᠡ ᠡᠳᠦᠷ ᠪᠠᠬᠠᠨ ᠣᠷᠣᠢ ᠪᠣᠯᠤᠭᠰᠠᠨ ᠲᠤᠯᠠ ᠮᠠᠷᠭᠠᠲᠠ ᠦᠵᠡᠰᠦᠭᠡᠢ ᠬᠡᠮᠡᠪᠡ ᠃ ᠡᠭᠦᠨ ᠢ᠋ ᠨᠡᠩ ᠰᠡᠵᠢᠭᠯᠡᠬᠦ ᠬᠡᠷᠡᠭ ᠦᠭᠡᠢ ᠪᠣᠯᠠᠢ ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠨᠳᠠᠭᠠᠢ ᠲᠦᠰᠢᠮᠡᠯ ᠦ᠋ᠨ ᠨᠢᠭᠡᠬᠡᠨ ᠠᠮᠠ ᠲᠡᠳᠡᠨ ᠭᠤᠷᠪᠠᠭᠤᠯᠠ ᠶ᠋ᠢᠨ ᠵᠢᠷᠭᠤᠭᠠᠨ ᠤᠷᠤᠭᠤᠯ ᠳ᠋ᠤᠷ ᠦᠯᠦ ᠲᠡᠩᠴᠡᠬᠦ ᠪᠥᠭᠡᠳ ᠵᠠᠯᠢᠲᠤ ᠬᠠᠭᠠᠨ ᠴᠤ᠌ ᠣᠯᠠᠨ ᠤ᠋ ᠦᠭᠡ ᠶ᠋ᠢ ᠠᠪᠬᠤ ᠪᠣᠢ ᠶᠠ ᠂ ᠭᠠᠭᠴᠠᠭᠠᠷ ᠤ᠋ᠨ ᠰᠠᠨᠠᠭᠠᠨ ᠢ᠋ ᠦᠯᠦ ᠰᠣᠨᠣᠰᠤᠨ ᠂ ᠬᠠᠨᠳᠠᠭᠠᠢ ᠲᠦᠰᠢᠮᠡᠯ ᠳ᠋ᠦ᠍ᠷ ᠳᠡᠮᠡᠢ ᠨᠢᠭᠤᠷ ᠥᠭᠭᠦᠭᠰᠡᠨ ᠦᠭᠡᠢ ᠳ᠋ᠦ᠍ᠷ ᠬᠠᠨᠳᠠᠭᠠᠢ ᠠᠷᠭᠠ ᠦᠭᠡᠢ ᠳᠣᠲᠣᠷᠠ ᠪᠠᠨ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠭᠠᠷᠪᠠᠢ᠃ ᠡᠨᠡ ᠮᠡᠳᠡᠭᠡ ᠶ᠋ᠢ ᠬᠡᠷᠡᠢᠳ ᠦ᠋ᠨ ᠵᠠᠮᠤᠬᠠ ᠬᠡᠳᠦᠢᠨᠡᠢ ᠰᠣᠨᠣᠰᠪᠠᠴᠤ ᠬᠢᠷᠲ᠌ᠬᠢᠵᠦ ᠶᠡᠬᠡᠯᠡ ᠰᠡᠵᠢᠭᠯᠡᠨ ᠂ ᠶᠠᠭᠠᠷᠠᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠪᠡᠨ ᠳᠣᠪᠲᠣᠯᠤᠨ ᠰᠤᠷᠤᠨᠴᠤᠭ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠲᠥᠷᠥ ᠳ᠋ᠦ᠍ ᠭᠠᠷᠴᠤ ᠵᠠᠯᠢᠲᠤ ᠬᠠᠭᠠᠨ ᠳ᠋ᠤᠷ ᠪᠠᠷᠠᠯᠬᠠᠨ ᠮᠥᠷᠭᠥᠵᠦ ᠠᠢᠯᠠᠳᠬᠠᠷᠤᠨ : 《ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢᠨ ᠢᠷᠡᠵᠦ ᠳᠠᠭᠠᠵᠤ ᠡᠶᠡᠳᠡᠶᠡ ᠬᠡᠮᠡᠭᠰᠡᠨ ᠢ᠋ ᠬᠡᠷᠬᠢᠪᠡᠴᠦ ᠦᠨᠡᠮᠰᠢᠶᠡᠨ ᠢᠲᠡᠭᠡᠵᠦ ᠦᠯᠦ ᠪᠣᠯᠤᠮᠤᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠨ ᠠᠰᠠᠭᠤᠷᠤᠨ : 《ᠴᠢ ᠬᠡᠷᠬᠢᠨ ᠣᠯᠵᠤ ᠮᠡᠳᠡᠪᠡ ? ᠴᠢ ᠬᠡᠷᠪᠡᠷ ᠮᠠᠭᠠᠳ ᠰᠡᠵᠢᠭᠲᠦ ᠭᠠᠵᠠᠷ ᠢ᠋ ᠲᠣᠲᠣᠷᠬᠠᠶᠠ ᠵᠢᠭᠠᠨ ᠭᠠᠷᠭᠠᠪᠠᠰᠤ ᠂ ᠪᠢ ᠡᠳᠦᠭᠡ ᠳᠠᠷᠤᠢ ᠪᠡᠯᠡᠭ ᠢ᠋ ᠡᠭᠡᠭᠦᠯᠦᠭᠡᠳ ᠪᠠᠢᠯᠳᠤᠬᠤ ᠪᠠᠷ ᠲᠣᠭᠲᠠᠶᠠ ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠪᠢ ᠡᠳᠦᠭᠡ ᠲᠡᠳᠡᠨ ᠢ᠋ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠪᠠᠭᠤᠳᠠᠯᠯᠠᠭᠤᠯᠵᠤ ᠬᠦᠯᠢᠶᠡᠯᠭᠡᠪᠡᠢ ᠃ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠮᠤᠬᠠ ᠶᠠᠭᠠᠷᠠᠨ ᠥᠭᠦᠯᠡᠷᠦᠨ : 《ᠲᠡᠭᠦᠨ ᠦ ᠪᠡᠯᠡᠭ ᠢ᠋ ᠮᠥᠨ ᠡᠭᠡᠭᠦᠯᠬᠦ ᠦᠭᠡᠢ ᠪᠡᠷ ᠰᠢᠭᠤᠳ ᠬᠦᠯᠢᠶᠡᠨ ᠠᠪᠤᠭᠠᠳ ᠲᠡᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠨᠢᠭᠡᠮᠦᠰᠦᠨ ᠠᠮᠤᠷ ᠰᠤᠯᠠ ᠠᠭᠤᠳᠠᠮ ᠲᠠᠯᠪᠢᠭᠤᠯᠤᠭᠠᠳ ᠲᠡᠳᠡᠨ ᠦ᠌ ᠵᠥᠭᠡᠯᠡᠨ ᠠᠷᠭᠠ ᠳ᠋ᠤᠷ ᠪᠢᠳᠡ ᠬᠠᠷᠢᠭᠤ ᠮᠡᠬᠡ ᠬᠡᠷᠡᠭᠯᠡᠨ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠢ᠋ ᠢᠨᠦ ᠢᠷᠡᠭᠦᠯᠦᠭᠡᠳ ᠲᠠᠩᠭᠠᠷᠢᠭ᠋ ᠨᠡᠢᠯᠡᠬᠦ ᠬᠤᠷᠢᠮ ᠳ᠋ᠤᠷ ᠪᠠᠷᠢᠵᠤ ᠠᠯᠠᠪᠠᠰᠤ ᠡᠨᠡ ᠬᠣᠶᠠᠷ ᠲᠤᠷ ᠪᠦᠷᠢᠳᠬᠦ ᠠᠷᠭᠠ ᠪᠤᠰᠤ ᠤᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠵᠠᠭᠤ ᠠ᠋ᠴᠠ ᠰᠠᠭᠠᠷ ᠂ ᠳᠠᠷᠪᠡ ᠂ ᠤᠬᠠᠭᠠᠨᠲᠤ ᠭᠤᠷᠪᠠᠭᠤᠯᠠ ᠥᠭᠦᠯᠡᠷᠦᠨ : 《ᠶᠠᠮᠪᠠᠷ ᠪᠣᠢ ! ᠮᠠᠨ ᠤ᠋ ᠪᠣᠳᠣᠭᠰᠠᠨ ᠠ᠋ᠴᠠ ᠭᠠᠷᠪᠠᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠮᠥᠨ ᠰᠡᠳᠬᠢᠯ ᠳ᠋ᠦ᠍ᠷ ᠨᠡᠢᠴᠡᠵᠦ ᠲᠡᠷᠢᠭᠦᠨ ᠳᠣᠬᠢᠯᠬᠢᠯᠠᠨ ᠢᠨᠢᠶᠡᠨ ᠵᠥᠪᠰᠢᠶᠡᠵᠦ ᠂ ᠭᠤᠷᠪᠠᠨ ᠰᠠᠢᠳ ᠢ᠋ᠶ᠋ᠠᠷ ᠵᠠᠮᠤᠬᠠ ᠳ᠋ᠤᠷ ᠬᠤᠷᠢᠮ ᠬᠠᠢᠷᠠᠯᠠᠵᠤ ᠳᠠᠢᠯᠠᠭᠤᠯᠤᠨ ᠬᠤᠷᠢᠮ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠳᠠᠢᠯᠠᠨ ᠠᠷᠢᠯᠭᠠᠬᠤ ᠬᠠᠲᠠᠭᠤ ᠵᠥᠭᠡᠯᠡᠨ ᠨᠠᠷᠢᠨ ᠪᠢᠲᠡᠭᠦᠨ ᠠᠷᠭᠠ ᠶ᠋ᠢ ᠵᠥᠪᠳᠡᠨ ᠲᠣᠭᠲᠠᠭᠠᠵᠤ ᠠᠢᠯᠠᠳᠬᠠᠭᠰᠠᠨ ᠬᠣᠢᠨᠠ ᠵᠢᠴᠢ ᠪᠡᠯᠡᠭ ᠢ᠋ ᠬᠦᠯᠢᠶᠡᠨ ᠠᠪᠰᠤᠭᠠᠢ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠠᠳ ᠰᠠᠢ ᠬᠥᠭᠵᠢᠮ ᠡᠭᠦᠰᠬᠡᠨ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠠᠭᠠᠨ ᠡᠭᠡᠵᠦ ᠣᠷᠣᠰᠤᠭᠠᠢ ᠬᠡᠮᠡᠲᠡᠯᠡ ᠬᠠᠨᠳᠠᠭᠠᠢ ᠲᠦᠰᠢᠮᠡᠯ ᠵᠠᠮᠤᠬᠠ ᠶ᠋ᠢ ᠲᠥᠷᠥ ᠳ᠋ᠦ᠍ᠷ ᠭᠠᠷᠪᠠ ᠭᠡᠮᠡᠨ ᠰᠣᠨᠣᠰᠴᠤ ᠵᠠᠮᠤᠬᠠ ᠶ᠋ᠢᠨ ᠮᠠᠰᠢ ᠬᠣᠯᠴᠢᠷᠭᠠᠨ ᠬᠤᠢᠬᠤᠷ ᠢ᠋ ᠦᠵᠡᠵᠦ ᠭᠠᠷᠤᠭᠰᠠᠨ ᠲᠤᠯᠠ ᠶᠡᠬᠡ ᠬᠡᠷᠡᠭ ᠢ᠋ ᠡᠪᠳᠡᠭᠦᠵᠡᠢ ᠭᠡᠮᠡᠨ ᠶᠠᠭᠠᠷᠠᠨ ᠲᠥᠷᠥ ᠳ᠋ᠦ᠍ᠷ ᠭᠠᠷᠲᠠᠯᠠ ᠵᠠᠯᠢᠲᠤ ᠬᠠᠭᠠᠨ ᠡᠭᠡᠵᠦ ᠣᠷᠣᠬᠤᠶᠠ ᠪᠢᠴᠢᠬᠠᠨ ᠲᠦᠰᠢᠮᠡᠯ ᠪᠠᠶᠠᠨ ᠬᠡᠮᠡᠭᠴᠢ ᠯᠦ᠍ᠭᠡ ᠪᠡᠨ ᠬᠥᠭᠡᠭᠡᠨ ᠣᠷᠣᠵᠤ ᠂ ᠳᠣᠲᠣᠭᠠᠳᠤ ᠣᠷᠳᠣᠨ ᠤ᠋ ᠬᠠᠭᠠᠯᠭᠠᠨ ᠳ᠋ᠤᠷ ᠭᠦᠢᠴᠡᠨ ᠬᠦᠷᠴᠦ ᠶᠠᠭᠠᠷᠠᠨ ᠬᠣᠢᠨᠠ ᠠ᠋ᠴᠠ ᠬᠣᠷᠮᠣᠢ ᠶ᠋ᠢ ᠠᠨᠤ ᠲᠠᠲᠠᠵᠤ ᠰᠥᠭᠥᠳᠦᠭᠡᠳ : 《ᠵᠠᠮᠤᠬᠠ ᠬᠡᠮᠡᠭᠴᠢ ᠶ᠋ᠢᠨ ᠦᠭᠡ ᠶ᠋ᠢ ᠪᠢᠲᠡᠭᠡᠢ ᠠᠪ ! 》 ᠭᠡᠮᠡᠨ ᠢᠳᠬᠠᠨ ᠬᠡᠯᠡᠬᠦᠢ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠯᠠᠪ ᠵᠠᠮᠤᠬᠠ ᠯᠤᠭᠠ ᠨᠢᠭᠤᠷ ᠲᠡᠮᠡᠴᠡᠨ ᠠᠲᠠᠭᠠᠷᠬᠠᠵᠤ ᠡᠢᠨ ᠬᠦ᠌ ᠬᠡᠯᠡᠪᠡ ᠭᠡᠮᠡᠨ ᠠᠬᠠᠰᠬᠢᠵᠦ ᠵᠠᠩᠳᠠᠨ ᠥᠭᠦᠯᠡᠷᠦᠨ : 《ᠠᠳᠬᠠᠭ ᠰᠡᠳᠬᠢᠯᠲᠦ ᠠᠪᠤᠰᠢ ᠦᠭᠡᠢ ᠬᠣᠬᠣᠢ ᠂ ᠠᠶᠤᠮᠰᠢᠭ᠋ ᠦᠭᠡᠢ ᠮᠢᠨᠦ ᠪᠡᠶᠡ ᠳ᠋ᠦ᠍ᠷ ᠭᠠᠷ ᠬᠦᠷᠬᠦᠢ ᠳ᠋ᠦ᠍ᠷ ᠬᠦᠷᠪᠡᠦ ? ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠰᠡᠵᠢᠭ ᠢ᠋ ᠲᠣᠳᠣᠷᠬᠠᠢ ᠵᠢᠭᠠᠨ ᠭᠠᠷᠭᠠᠵᠤ ᠡᠰᠡ ᠴᠢᠳᠠᠭᠠᠳ ᠪᠡᠶᠡᠴᠢᠯᠡᠨ ᠵᠢᠳᠬᠦᠬᠦ ᠵᠠᠮᠤᠬᠠ ᠳ᠋ᠤᠷ ᠪᠠᠰᠠ ᠠᠲᠠᠭᠠᠷᠬᠠᠮᠤᠢ ᠂ ᠪᠢᠴᠢᠬᠠᠨ ᠵᠤᠯᠵᠠᠭᠠ ᠪᠠᠶᠠᠨ ᠲᠡᠷᠡ ᠶᠠᠭᠤᠨ ᠢ᠋ ᠮᠡᠳᠡᠮᠦᠢ ᠭᠡᠮᠡᠨ ᠪᠠᠢᠨ ᠪᠠᠢᠨ ᠨᠠᠮᠠᠢ ᠡᠷᠢᠵᠦ ᠪᠡᠯᠴᠢᠮᠦᠢ ? ᠡᠳᠡ ᠬᠣᠶᠠᠭᠤᠯᠠ ᠶ᠋ᠢ ᠦᠳᠲᠡᠷ ᠭᠠᠷᠭᠠᠵᠤ ᠲᠦᠰᠢᠮᠡᠯ ᠢ᠋ ᠢᠨᠦ ᠬᠠᠰᠤᠭᠠᠳ ᠣᠷᠳᠣᠨ ᠤ᠋ ᠬᠠᠭᠠᠯᠭᠠ ᠶ᠋ᠢ ᠰᠠᠬᠢᠭᠤᠯ ! 》 ᠭᠡᠮᠡᠨ ᠦᠯᠳᠡᠨ ᠭᠠᠷᠭᠠᠭᠰᠠᠨ ᠳ᠋ᠤᠷ ᠬᠠᠨᠳᠠᠭᠠᠢ ᠪᠠ ᠪᠠᠶᠠᠨ ᠬᠥᠭᠰᠢᠨ ᠵᠠᠯᠠᠭᠤ ᠬᠣᠶᠠᠭᠤᠯᠠ ᠬᠦᠷᠬᠢᠷᠡᠨ ᠬᠠᠷᠬᠢᠷᠠᠨ ᠤᠬᠢᠯᠠᠨ ᠭᠠᠷᠴᠤ ᠢᠷᠡᠭᠡᠳ : 《ᠬᠠᠢᠷᠠᠬᠠᠨ ᠪᠢᠳᠡᠨ ᠦ᠌ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠶᠡᠬᠡ ᠲᠥᠷᠥ ᠬᠠᠮᠤᠭ ᠤᠯᠤᠰ ᠢ᠋ ᠬᠡᠰᠦᠵᠦ ᠪᠦᠷᠢᠯᠭᠡᠭᠰᠡᠨ ᠵᠠᠮᠤᠬᠠ ᠪᠣᠭᠣᠯ ᠤ᠋ᠨ ᠭᠠᠷ ᠲᠤᠷ ᠡᠪᠳᠡᠷᠡᠬᠦ ᠪᠣᠯᠪᠠᠢ ! 》ᠭᠡᠮᠡᠨ ᠡᠴᠢᠪᠡᠢ ᠃ ᠲᠡᠭᠦᠨᠴᠡ ᠵᠠᠮᠤᠬᠠ ᠭᠤᠷᠪᠠᠨ ᠰᠠᠢᠳ ᠯᠤᠭᠠ ᠬᠤᠷᠢᠮᠯᠠᠨ ᠪᠠᠢᠵᠤ ᠵᠥᠪᠯᠡᠨ ᠥᠭᠦᠯᠡᠷᠦᠨ : 《ᠨᠠᠳᠠ ᠳ᠋ᠤᠷ ᠨᠢᠭᠡᠨ ᠠᠷᠭᠠ ᠪᠣᠢ – ᠲᠡᠷᠡ ᠵᠢᠯ ᠡᠮᠦᠨᠡ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠳᠠᠢᠶᠠᠩ ᠬᠠᠭᠠᠨ ᠤ᠋ ᠴᠢᠦᠢ ᠰᠢᠦᠸᠠᠢ ᠡᠦ ᠬᠡᠮᠡᠭᠴᠢ ᠶᠤᠸᠠᠨᠱᠤᠸᠠᠢ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠴᠠᠴᠠᠷ ᠠᠭᠤᠯᠠᠨ ᠤ᠋ ᠠᠯᠠᠭᠲᠠᠢ ᠶ᠋ᠢᠨ ᠬᠠᠷᠠ ᠬᠡᠮᠡᠬᠦ ᠭᠠᠵᠠᠷ ᠲᠤᠷ ᠭᠠᠯ ᠢ᠋ᠶ᠋ᠠᠷ ᠪᠠᠢᠯᠳᠤᠵᠤ ᠨᠢᠭᠡᠨ ᠵᠡᠷᠭᠡ ᠰᠠᠢᠲᠤᠷ ᠳᠠᠷᠤᠭᠰᠠᠨ ᠪᠥᠯᠥᠭᠡ ᠂ ᠬᠣᠢᠨᠠ ᠪᠧᠲ᠋ᠠ᠋ ᠤᠯᠤᠰ ᠬᠡᠷᠬᠢᠪᠡᠴᠦ ᠲᠦᠯᠡᠭᠡ ᠡᠪᠡᠰᠦᠲᠦ ᠭᠠᠵᠠᠷᠠ ᠴᠡᠷᠢᠭ ᠪᠠᠭᠤᠳᠠᠯᠯᠠᠬᠤ ᠦᠭᠡᠢ ᠪᠣᠯᠪᠠ ᠃ ᠲᠡᠢᠨ ᠬᠦ᠌ ᠡᠨᠡ ᠤᠳᠠᠭᠠ ᠣᠳᠣ ᠲᠡᠳᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠪᠡᠷ ᠣᠷᠣᠵᠤ ᠰᠡᠷᠭᠡᠢᠯᠡᠭᠰᠡᠨ ᠦᠭᠡᠢ ᠪᠡᠷ ᠪᠠᠢᠯᠳᠤᠰᠤᠭᠠᠢ ᠂ ᠡᠳᠦᠭᠡ ᠪᠢᠳᠡ ᠲᠡᠭᠦᠨ ᠦ᠌ ᠬᠦᠨᠳᠦ ᠪᠡᠯᠡᠭ ᠢ᠋ ᠪᠦᠷᠢᠨᠡ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠨᠢᠭᠡᠮᠦᠰᠦᠨ ᠢᠲᠡᠭᠡᠮᠵᠢᠯᠡᠭᠦᠯᠦᠭᠡᠳ ᠲᠠᠩᠭᠠᠷᠢᠭ᠋ ᠨᠡᠢᠯᠡᠬᠦ ᠬᠤᠷᠢᠮ ᠳ᠋ᠤᠷ ᠲᠡᠮᠦᠵᠢᠨ ᠢ᠋ ᠪᠠᠷᠢᠵᠤ ᠠᠯᠠᠰᠤᠭᠠᠢ ᠂ ᠲᠡᠷᠡ ᠬᠡᠷᠪᠡ ᠰᠡᠷᠡᠮᠵᠢᠯᠡᠵᠦ ᠠᠷᠭᠠ ᠳ᠋ᠤᠷ ᠡᠰᠡ ᠣᠷᠣᠪᠠᠰᠤ ᠂ ᠡᠳᠦᠭᠡ ᠪᠢᠳᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠨᠡᠭᠦᠯᠭᠡᠵᠦ ᠂ ᠰᠠᠷᠯᠠᠭ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠳ᠋ᠦ᠍ᠷ ᠪᠠᠭᠤᠳᠠᠯᠯᠠᠭᠤᠯᠪᠠᠰᠤ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢᠷᠠᠪᠠᠰᠤ ᠯᠠᠪ ᠮᠥᠷᠡᠨ ᠦ᠌ ᠴᠢᠨᠠᠳᠤ ᠬᠥᠪᠡᠭᠡᠨ ᠳ᠋ᠦ᠍ᠷ ᠪᠠᠭᠤᠳᠠᠯᠯᠠᠮᠤᠢ᠃ ᠲᠡᠨᠳᠡᠬᠢ ᠶ᠋ᠢᠨ ᠡᠪᠡᠰᠦ ᠰᠢᠷᠠᠯᠵᠢ ᠭᠦᠨ ᠵᠤᠵᠠᠭᠠᠨ ᠂ ᠲᠡᠳᠡ ᠬᠡᠷᠪᠡ ᠭᠠᠯ ᠤ᠋ᠨ ᠠᠶᠤᠯ ᠠ᠋ᠴᠠ ᠠᠶᠤᠪᠠᠰᠤ ᠮᠠᠭᠠᠳ ᠤᠰᠤᠨ ᠤ᠋ ᠳᠠᠩ ᠳ᠋ᠤᠷ ᠪᠠᠭᠤᠳᠠᠯᠯᠠᠮᠤᠢ ᠃ ᠲᠡᠢᠮᠦ ᠪᠣᠯᠪᠠᠰᠤ ᠪᠢᠳᠡ ᠤᠷᠤᠭᠰᠢᠯᠠᠨ ᠰᠠᠷᠯᠠᠭ ᠮᠥᠷᠡᠨ ᠦ᠌ ᠳᠡᠭᠡᠷᠡ ᠤᠷᠤᠰᠬᠠᠯ ᠤ᠋ᠨ ᠬᠣᠶᠠᠷ ᠠᠭᠤᠯᠠᠨ ᠤ᠋ ᠬᠣᠰᠢᠭᠤᠲᠤ ᠠᠮᠠᠨ ᠢ᠋ ᠤᠭᠤᠲᠠ ᠲᠤᠯᠤᠮ ᠳ᠋ᠤᠷ ᠡᠯᠡᠰᠦ ᠮᠠᠩᠬᠠ ᠪᠠᠷ ᠳᠦᠭᠦᠷᠭᠡᠵᠦ ᠪᠥᠭᠯᠡᠭᠡᠳ ᠲᠡᠳᠡᠨ ᠦ ᠪᠠᠭᠤᠳᠠᠯ ᠪᠠᠭᠤᠵᠤ ᠨᠢᠭᠡᠨᠲᠡ ᠲᠣᠭᠲᠠᠵᠤ ᠰᠠᠭᠤᠷᠢᠰᠢᠭ᠍ᠰᠠᠨ ᠬᠣᠢᠨᠠ ᠦᠬᠡᠷ ᠫᠤᠤ ᠥᠷᠳᠡᠵᠦ ᠵᠢᠭ᠍ᠰᠠᠭᠠᠨ ᠲᠡᠮᠳᠡᠭ ᠪᠣᠯᠭᠠᠵᠤ ᠂ ᠰᠥᠨᠢ ᠪᠡᠷ ᠭᠡᠨᠡᠳᠲᠡ ᠠᠪᠴᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠬᠠᠮᠲᠤ ᠪᠠᠷ ᠢ᠋ ᠤᠷᠤᠰᠬᠠᠵᠤ ᠬᠣᠶᠠᠷ ᠬᠥᠪᠡᠭᠡ ᠪᠡᠷ ᠳᠠᠷᠤᠨ ᠠᠯᠠᠪᠠᠰᠤ ᠨᠢᠭᠡᠨ ᠤᠳᠠᠭᠠ ᠳᠠᠷᠤᠢ ᠳᠠᠷᠤᠪᠠᠰᠤ ᠪᠣᠯᠤᠮᠤᠢ᠃ ᠲᠡᠷᠡ ᠬᠡᠷᠪᠡ ᠤᠰᠤᠨ ᠳᠠᠩ ᠳ᠋ᠤᠷ ᠪᠠᠭᠤᠳᠠᠯᠯᠠᠬᠤ ᠦᠭᠡᠢ ᠂ ᠲᠠᠯᠠ ᠶ᠋ᠢᠨ ᠡᠪᠡᠰᠦᠨᠡ ᠪᠠᠭᠤᠪᠠᠰᠤ ᠪᠢᠳᠡᠨ ᠦ᠌ ᠮᠥᠷᠡᠨ ᠦ᠌ ᠴᠠᠭᠠᠨᠠ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠰᠥᠨᠢ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠡᠮᠦᠨᠡ ᠰᠠᠯᠬᠢᠨ ᠤ᠋ ᠠᠶᠠ ᠪᠠᠷ ᠭᠠᠯ ᠢ᠋ᠶ᠋ᠠᠷ ᠬᠤᠢᠬᠠᠯᠠᠨ ᠪᠠᠢᠯᠳᠤᠰᠤᠭᠠᠢ ᠂ ᠡᠨᠡ ᠭᠤᠷᠪᠠᠨ ᠠᠷᠭᠠ ᠳ᠋ᠤᠷ ᠲᠡᠮᠦᠵᠢᠨ ᠢ᠋ ᠪᠦᠷᠢᠯᠭᠡᠬᠦ ᠢᠨᠦ ᠤᠭᠤᠲᠠᠨ ᠤ᠋ ᠳᠣᠲᠣᠷᠠᠬᠢ ᠢᠳᠡᠭᠡᠨ ᠂ ᠲᠤᠯᠤᠮ ᠤ᠋ᠨ ᠳᠣᠲᠣᠷᠠᠬᠢ ᠲᠣᠰᠣ ᠶ᠋ᠢ ᠠᠪᠬᠤ ᠠᠳᠠᠯᠢ ᠬᠢᠯᠪᠠᠷ ᠪᠣᠯᠠᠢ ! 》 ᠬᠡᠮᠡᠭᠰᠡᠨ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠦᠭᠡᠰ ᠲᠣᠷ ᠰᠠᠷᠯᠠᠭ ᠤ᠋ᠨ ᠰᠠᠭᠠᠷ ᠨᠠᠷ ᠭᠠᠷ ᠰᠡᠷᠪᠡᠯᠵᠡᠨ ᠬᠥᠯ ᠳᠡᠪᠰᠡᠯᠬᠢᠯᠡᠨ ᠶᠡᠬᠡᠯᠡ ᠪᠠᠶᠠᠷᠯᠠᠯᠴᠠᠨ ᠵᠡᠷᠭᠡ ᠪᠡᠷ ᠵᠠᠮᠤᠬᠠ ᠶ᠋ᠢ ᠮᠠᠭᠲᠠᠯᠴᠠᠨ ᠥᠭᠦᠯᠡᠷᠦᠨ : 《ᠦᠨᠡᠬᠡᠷ ᠡᠮᠦᠨᠡ ᠬᠢᠵᠠᠭᠠᠷ ᠲᠤᠷ ᠰᠠᠭᠤᠵᠤ ᠂ ᠥᠷᠭᠡᠨ ᠮᠦᠷᠡᠨᠡ ᠶ᠋ᠢᠨ ᠵᠠᠬᠠ ᠳ᠋ᠤᠷ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠦᠯᠢᠭᠡᠷᠯᠡᠰᠢ ᠦᠭᠡᠢ ᠥᠨᠳᠥᠷ ᠠᠷᠭᠠ ᠲᠠᠢ ! 》ᠭᠡᠮᠡᠨ ᠳᠠᠷᠤᠢ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠵᠦᠩ ᠬᠡᠩᠭᠡᠷᠭᠡ ᠴᠣᠬᠢᠭᠤᠯᠵᠤ ᠂ ᠵᠠᠯᠢᠲᠤ ᠬᠠᠭᠠᠨ ᠢ᠋ ᠵᠠᠯᠠᠨ ᠭᠠᠷᠭᠠᠵᠤ ᠂ ᠡᠳᠡᠭᠡᠷ ᠠᠷᠭᠠ ᠪᠠᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠵᠠᠯᠢᠲᠤ ᠬᠠᠭᠠᠨ ᠪᠡᠶᠡᠰᠦᠨ ᠥᠭᠦᠯᠡᠷᠦᠨ : 《ᠡᠨᠡ ᠭᠤᠷᠪᠠᠨ ᠳᠠᠪᠬᠤᠷ ᠠᠷᠭᠠ ᠶ᠋ᠢᠨ ᠨᠢᠭᠡᠨ ᠡᠴᠡ ᠢᠨᠦ ᠬᠡᠷᠬᠢᠪᠡᠴᠦ ᠬᠡᠯᠲᠦᠷᠢᠨ ᠴᠢᠳᠠᠬᠤ ᠦᠭᠡᠢ ᠂ ᠳᠠᠷᠤᠢ ᠡᠨᠡ ᠶᠣᠰᠣᠭᠠᠷ ᠰᠢᠳᠬᠡᠨ ᠲᠣᠭᠲᠠᠭᠠᠰᠤᠭᠠᠢ ᠃ ᠡᠨᠡ ᠵᠠᠮᠤᠬᠠ ᠦᠨᠡᠬᠡᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠢᠷᠠ ᠥᠩᠭᠡ ᠢᠨᠦ ᠬᠠᠯᠳᠠᠵᠤ ᠂ ᠠᠯᠢᠪᠠ ᠠᠷᠭᠠ ᠴᠥᠮ ᠪᠦᠷᠢᠳᠴᠦᠬᠦᠢ 》 ᠭᠡᠮᠡᠨ ᠰᠠᠢᠰᠢᠶᠠᠭᠠᠳ ᠠᠮᠲᠠᠲᠤ ᠢᠳᠡᠭᠡᠨ ᠦ ᠬᠤᠷᠢᠮ ᠢ᠋ ᠳᠠᠪᠬᠤᠷᠯᠠᠨ ᠱᠠᠩᠨᠠᠵᠤ ᠂ ᠭᠤᠷᠪᠠᠨ ᠲᠦᠰᠢᠮᠡᠯ ᠢ᠋ ᠲᠡᠢᠴᠢᠯᠡ ! 》ᠬᠡᠮᠡᠭᠡᠳ ᠤᠷᠳᠣᠨᠠ ᠡᠭᠡᠪᠡ ᠃ ᠵᠠᠮᠤᠬᠠ ᠨᠠᠷ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠬᠤᠷᠢᠮᠯᠠᠷᠠ ᠪᠠᠭᠤᠪᠠ ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠨᠠᠷᠠᠨ ᠰᠢᠩᠭᠡᠵᠦ ᠪᠠᠷᠤᠭ ᠪᠦᠷᠦᠢ ᠪᠣᠯᠤᠭᠰᠠᠨ ᠳ᠋ᠤᠷ ᠵᠡᠯᠮᠡ ᠲᠠᠨ ᠬᠦᠷᠢᠶᠡ ᠳ᠋ᠦ᠍ ᠡᠭᠡᠵᠦ ᠴᠡᠷᠢᠭ ᠢ᠋ᠶ᠋ᠡᠨ ᠪᠤᠳᠠᠭᠠᠯᠠᠵᠤ ᠠᠷᠢᠬᠢᠳᠠᠨ ᠪᠥᠬᠥᠶᠡ ᠂ ᠤᠷᠢᠳᠤ ᠤᠳᠠᠭᠠ ᠶ᠋ᠢᠨ ᠴᠢᠯᠭᠡᠷ ᠪᠥᠬᠡ ᠶ᠋ᠢᠨ ᠰᠠᠮᠠᠭᠤᠨ ᠳ᠋ᠤᠷ ᠪᠠᠷᠢᠭ᠍ᠳᠠᠵᠤ ᠂ ᠭᠡᠳᠡᠷᠭᠦ ᠲᠠᠯᠪᠢᠵᠤ ᠬᠠᠷᠢᠭᠤᠯᠤᠭᠰᠠᠨ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠠᠭᠤᠨ ᠢᠯᠡᠭᠦᠦ ᠴᠡᠷᠢᠭ ᠦ᠋ᠨ ᠠᠷᠠᠳ ᠤᠷᠢᠳᠤ ᠶ᠋ᠢᠨ ᠠᠴᠢ ᠶ᠋ᠢ ᠰᠠᠨᠠᠵᠤ ᠂ ᠵᠠᠯᠮᠠ ᠳ᠋ᠤᠷ ᠨᠢᠭᠤᠵᠤ ᠵᠣᠯᠭᠠᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠵᠡᠯᠮᠡ ᠲᠡᠳᠡᠨ ᠢ᠋ ᠰᠠᠢᠰᠢᠶᠠᠨ ᠪᠠᠶᠠᠰᠬᠠᠵᠤ ᠂ ᠠᠷᠢᠬᠢ ᠮᠢᠬᠠ ᠴᠠᠳᠲᠠᠯᠠ ᠢᠳᠡᠭᠦᠯᠵᠦ ᠶᠠᠪᠤᠭᠤᠯᠬᠤᠶᠠ ᠲᠡᠳᠡᠨ ᠦ᠌ ᠵᠦᠭ ᠥᠭᠦᠯᠡᠷᠦᠨ : 《ᠮᠠᠨ ᠤ᠋ ᠡᠵᠡᠨ ᠲᠠᠨ ᠤ᠋ ᠡᠵᠡᠨ ᠯᠦ᠍ᠭᠡ ᠡᠶᠡᠳᠡᠷᠡ ᠢᠷᠡᠮᠦᠢ ᠃ ᠲᠠᠨ ᠤ᠋ ᠡᠵᠡᠨ ᠬᠡᠷᠪᠡ ᠨᠢᠭᠤᠴᠠ ᠬᠣᠣᠷ ᠪᠡᠯᠡᠳᠬᠡᠨ ᠮᠠᠨ ᠤ᠋ ᠡᠵᠡᠨ ᠢ᠋ ᠭᠡᠨᠡᠳᠡᠭᠦᠯᠬᠦ ᠵᠦᠢᠯ ᠪᠣᠢ ᠪᠥᠭᠡᠰᠦ ᠂ ᠲᠠᠨ ᠤ᠋ ᠣᠯᠠᠨ ᠮᠠᠨ ᠤ᠋ ᠠᠴᠢ ᠶ᠋ᠢ ᠰᠠᠨᠠᠵᠤ ᠮᠠᠨ ᠳ᠋ᠤᠷ ᠢᠷᠡᠵᠦ ᠬᠡᠯᠡᠪᠡᠰᠦ ᠡᠨᠡ ᠳᠠᠷᠤᠢ ᠠᠴᠢ ᠶ᠋ᠢ ᠬᠠᠷᠢᠭᠤᠯᠠᠭᠰᠠᠨ ᠪᠣᠯᠠᠢ ᠃ ᠮᠠᠨ ᠳ᠋ᠤᠷ ᠣᠭᠲᠣ ᠪᠤᠰᠤ ᠰᠡᠳᠬᠢᠯ ᠦᠭᠡᠢ ᠃ ᠭᠠᠭᠴᠠ ᠲᠠᠨ ᠤ᠋ ᠡᠵᠡᠨ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠬᠦᠨᠳᠦ ᠪᠡᠯᠡᠭ ᠮᠢᠩᠭᠠᠨ ᠠᠴᠢᠶᠠ ᠶ᠋ᠢ ᠭᠠᠭᠴᠠᠭᠠᠷ ᠠᠪᠬᠤ ᠰᠠᠨᠠᠭᠠᠨ ᠪᠣᠢ ᠃ ᠮᠠᠨ ᠤ᠋ ᠤᠭ ᠠᠴᠢᠷᠠᠭᠰᠠᠨ ᠠᠨᠤ ᠲᠠᠨ ᠤ᠋ ᠣᠯᠠᠨ ᠴᠡᠷᠢᠭ ᠨᠡᠢᠲᠡ ᠪᠡᠷ ᠲᠣᠷ ᠱᠠᠩᠨᠠᠷᠠ ᠢᠯᠡᠭᠡᠭᠰᠡᠨ ᠪᠥᠯᠥᠭᠡ ᠃ ᠲᠠᠨ ᠤ᠋ ᠣᠯᠠᠨ ᠮᠠᠨ ᠤ᠋ ᠡᠨᠡ ᠰᠠᠨᠠᠭᠠᠨ ᠢ᠋ ᠣᠯᠠᠨ ᠬᠦᠷᠢᠶᠡᠨ ᠦ᠌ ᠴᠡᠷᠢᠭ ᠪᠦᠷᠢ ᠳ᠋ᠦ᠍ᠷ ᠰᠠᠢᠬᠠᠨ ᠲᠠᠷᠬᠠᠭᠠᠨ ᠬᠡᠯᠡᠭᠲᠦᠨ ᠂ ᠪᠢᠲᠡᠭᠡᠢ ᠠᠯᠵᠠᠭᠤᠷᠠ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠳᠡ ᠣᠯᠠᠨ ᠳᠤᠷᠠᠲᠠᠶᠠ ᠪᠠᠶᠠᠷᠯᠠᠯᠴᠠᠨ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠦᠨᠡᠬᠡᠷ ᠲᠠᠷᠬᠠᠭᠠᠨ ᠬᠦᠷᠢᠶᠡ ᠪᠦᠷᠢ ᠳ᠋ᠦ᠍ ᠡᠴᠢᠵᠦ ᠬᠡᠯᠡᠭᠰᠡᠨ ᠲᠤᠯᠠ ᠣᠯᠠᠨ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠨᠡᠩ ᠬᠣᠷᠣᠰᠪᠠᠢ ᠃
ᠲᠡᠨᠳᠡᠴᠡ ᠵᠡᠯᠮᠡ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠶᠡᠬᠡᠯᠡ ᠠᠷᠢᠬᠢᠳᠠᠨ ᠬᠠᠯᠠᠮᠰᠠᠭᠤᠯᠤᠭᠠᠳ ᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠠᠷᠪᠠᠭᠠᠳ ᠰᠡᠭᠦᠳᠡᠩ ᠵᠠᠩ ᠂ ᠲᠣᠭᠰᠠᠷ ᠠᠭᠠᠰᠢᠲᠤ ᠴᠡᠷᠢᠭ ᠢ᠋ ᠰᠣᠩᠭᠣᠨ ᠠᠪᠴᠤ ᠰᠣᠭᠲᠣᠲᠠᠯᠠ ᠤᠤᠭᠤᠯᠭᠠᠵᠤ ᠂ ᠳᠠᠯᠳᠠ ᠭᠠᠵᠠᠷ ᠠᠪᠠᠴᠢᠵᠤ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠪᠢᠳᠡ ᠡᠨᠡ ᠰᠥᠨᠢ ᠡᠵᠡᠨ ᠵᠢᠨᠦᠩ ᠦ᠋ᠨ ᠠᠷᠭᠠ ᠶ᠋ᠢ ᠳᠠᠭᠠᠵᠤ ᠂ ᠡᠨᠡ ᠮᠢᠩᠭᠠᠨ ᠠᠴᠢᠶᠠ ᠡᠪᠡᠰᠦ ᠰᠢᠷᠠᠯᠵᠢ ᠯᠠᠢ ᠬᠣᠭ ᠢ᠋ ᠴᠥᠮ ᠮᠠᠢᠬᠠᠨ ᠳ᠋ᠤᠷ ᠣᠪᠣᠭᠠᠯᠠᠨ ᠬᠦᠷᠢᠶᠡ ᠪᠠ ᠬᠦᠨᠡᠰᠦ ᠬᠥᠰᠬᠡ ᠶ᠋ᠢ ᠴᠥᠮ ᠰᠢᠲᠠᠭᠠᠵᠤ ᠂ ᠲᠡᠳᠡᠨ ᠦ᠌ ᠭᠠᠳᠠᠭᠠᠳᠤ ᠴᠡᠷᠢᠭ ᠰᠥᠨᠢ ᠭᠠᠯ ᠲᠠᠯᠪᠢᠨ ᠪᠤᠯᠢᠶᠠᠪᠠ ᠭᠡᠮᠡᠨ ᠲᠡᠳᠡᠨ ᠦ᠌ ᠬᠣᠲᠠᠨ ᠳ᠋ᠤᠷ ᠣᠷᠣᠮᠤᠢ ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠴᠡᠷᠢᠭ ᠦ᠋ᠨ ᠠᠷᠠᠳ ᠣᠭᠲᠣ ᠰᠢᠷᠬᠠ ᠦᠭᠡᠢ ᠪᠣᠯᠪᠠᠰᠤ ᠲᠡᠳᠡ ᠬᠡᠷᠬᠢᠪᠡᠴᠦ ᠢᠲᠡᠭᠡᠬᠦ ᠦᠭᠡᠢ ᠲᠤᠯᠠ ᠪᠢ ᠪᠡᠶᠡ ᠪᠡᠷ ᠲᠡᠷᠢᠭᠦᠯᠡᠨ ᠪᠡᠶᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠰᠢᠷᠬᠠ ᠭᠠᠷᠭᠠᠮᠤᠢ ᠃ ᠠᠶᠤᠮᠠᠲᠠᠭᠠᠢ ᠠᠷᠠᠳ ᠥᠪᠡᠷ ᠢ᠋ᠶ᠋ᠡᠨ ᠰᠢᠷᠬᠠ ᠭᠠᠷᠭᠠᠵᠤ ᠦᠯᠦ ᠴᠢᠳᠠᠬᠤ ᠶ᠋ᠢ ᠲᠠᠨ ᠤ᠋ ᠬᠡᠳᠦᠨ ᠬᠥᠮᠦᠨ ᠨᠢᠭᠤᠵᠤ ᠬᠠᠨᠤᠨ ᠭᠡᠨᠡᠳᠲᠡ ᠴᠥᠮ ᠪᠠᠬᠠᠨ ᠰᠢᠷᠬᠠ ᠭᠠᠷᠭᠠ ᠃ ᠭᠠᠭᠴᠠ ᠦᠬᠦᠬᠦᠢ ᠳ᠋ᠦ᠍ᠷ ᠡᠰᠡ ᠭᠥᠷᠦᠭᠦᠯᠪᠡᠰᠦ ᠪᠠᠷᠠᠪᠠ ᠃ ᠪᠢ ᠰᠠᠢᠨ ᠡᠮ ᠠᠪᠴᠤ ᠢᠷᠡᠪᠡ ᠂ ᠴᠠᠭ ᠵᠠᠭᠤᠷᠠ ᠶ᠋ᠢᠨ ᠥᠴᠦᠬᠡᠨ ᠡᠪᠡᠷᠰᠢᠶᠡᠯ ᠪᠣᠯᠠᠢ ᠃ ᠬᠣᠢᠴᠢ ᠡᠳᠦᠷ ᠡᠭᠦᠷᠢᠳᠡ ᠶ᠋ᠢᠨ ᠭᠠᠪᠢᠶᠠ ᠪᠣᠢ ! 》 ᠭᠡᠮᠡᠨ ᠰᠤᠷᠭᠠᠭᠠᠳ ᠰᠥᠨᠢ ᠳᠦᠯᠢ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠵᠦ ᠂ ᠵᠠᠭᠤᠨ ᠴᠡᠷᠢᠭ ᠢ᠋ ᠪᠠᠰᠠ ᠠᠷᠢᠬᠢᠳᠠᠵᠤ ᠬᠦᠷᠢᠶᠡᠨ ᠦ᠌ ᠡᠭᠦᠳᠡ ᠶ᠋ᠢ ᠶᠠᠭ ᠳᠠᠷᠤᠵᠤ ᠂ ᠮᠢᠩᠭᠠᠨ ᠠᠴᠢᠶᠠ ᠶ᠋ᠢᠨ ᠱᠠᠷ ᠪᠠ ᠪᠠᠭᠤᠳᠠᠯ ᠢ᠋ ᠴᠥᠮ ᠡᠪᠳᠡᠵᠦ ᠂ ᠳᠣᠲᠣᠷᠠᠬᠢ ᠡᠪᠡᠰᠦ ᠰᠢᠷᠠᠯᠵᠢ ᠬᠣᠭ ᠯᠠᠢ ᠶ᠋ᠢ ᠴᠥᠮ ᠭᠠᠷᠭᠠᠵᠤ ᠂ ᠮᠠᠢᠬᠠᠨ ᠪᠦᠷᠢ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠣᠪᠣᠭᠠᠯᠠᠵᠤ ᠂ ᠠᠷᠪᠠᠭᠠᠳ ᠰᠡᠷᠭᠦᠯᠡᠩ ᠰᠢᠭ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠳᠡᠭᠡᠷ ᠲᠡᠮᠳᠡᠭ ᠲᠢᠰᠡᠲᠦ ᠪᠣᠭᠣᠳᠠᠯ ᠪᠠᠭᠯᠠᠭᠠ ᠪᠠ ᠰᠢᠷᠡᠯᠡᠭᠰᠡᠨ ᠱᠠᠷ ᠠᠯᠳᠠᠯᠤᠭᠰᠠᠨ ᠠᠷᠠᠰᠤ ᠶ᠋ᠢᠨ ᠵᠦᠢᠯ ᠢ᠋ ᠲᠤᠰᠢᠶᠠᠨ ᠥᠭᠴᠦ ᠨᠢᠭᠡᠨ ᠬᠠᠭᠠᠰ ᠢ᠋ ᠰᠤᠷᠤᠨᠴᠤᠭ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠪᠠ ᠬᠣᠢᠲᠤ ᠬᠠᠭᠠᠯᠭᠠ ᠶ᠋ᠢᠨ ᠭᠠᠳᠠᠨᠠ ᠡᠨᠳᠡ ᠲᠡᠨᠳᠡ ᠴᠣᠬᠢᠭᠤᠯᠵᠤ ᠂ ᠶᠡᠬᠡ ᠬᠠᠭᠠᠰ ᠢ᠋ ᠠᠨᠤ ᠲᠡᠳᠡᠨ ᠦ᠌ ᠣᠯᠠᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠭᠠᠳᠠᠨᠠ ᠠᠪᠠᠴᠢᠵᠤ ᠴᠣᠬᠢᠭᠤᠯᠤᠭᠠᠳ ᠂ ᠴᠡᠷᠢᠭ ᠦ᠋ᠨ ᠠᠷᠠᠳ ᠤ᠋ᠨ ᠠᠷᠤᠤᠬᠠᠨ ᠵᠡᠪᠰᠡᠭ ᠪᠠ ᠡᠮᠡᠭᠡᠯ ᠬᠤᠪᠴᠠᠳ ᠢ᠋ ᠭᠦᠨ ᠡᠪᠡᠰᠦᠨ ᠦ᠌ ᠡᠯᠡᠰᠦᠨᠡ ᠪᠤᠯᠠᠭᠤᠯᠵᠤ ᠂ ᠮᠠᠭᠤ ᠰᠠᠢᠨ ᠢ᠋ ᠠᠨᠤ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠡᠨᠳᠡ ᠲᠡᠨᠳᠡ ᠢᠨᠦ ᠴᠣᠬᠢᠭᠤᠯᠵᠤ ᠂ ᠥᠪᠡᠷ ᠦ᠋ᠨ ᠪᠡᠶᠡ ᠡᠴᠡ ᠲᠡᠷᠢᠭᠦᠯᠡᠨ ᠰᠣᠴᠢᠮᠠᠲᠠᠭᠠᠢ ᠳᠤᠲᠠᠭᠠᠭᠰᠠᠨ ᠶᠣᠰᠣ ᠪᠠᠷ ᠳᠠᠩ ᠳᠡᠪᠡᠯ ᠥᠮᠥᠳᠥ ᠡᠴᠡ ᠥᠪᠡᠷᠡ ᠶᠠᠭᠤᠮᠠ ᠦᠭᠡᠢ ᠵᠠᠷᠢᠮ ᠴᠢᠷᠮᠡᠨ ᠨᠢᠴᠦᠭᠦᠨ ᠢᠨᠦ ᠮᠥᠨ ᠪᠣᠢ ᠂ ᠴᠥᠮ ᠭᠤᠲᠤᠯ ᠮᠠᠯᠠᠭᠠ ᠦᠭᠡᠢ ᠪᠡᠷ ᠪᠡᠯᠡᠳᠬᠡᠵᠦ ᠪᠡᠯᠡᠨ ᠵᠠᠯᠠᠨ ᠪᠣᠯᠭᠠᠭᠠᠳ ᠰᠠᠶᠢ ᠵᠠᠭᠤᠨ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠵᠤ ᠂ ᠰᠠᠢᠨ ᠦᠭᠡ ᠰᠠᠢᠬᠠᠨ ᠡᠭᠡᠰᠢᠭ ᠢ᠋ᠶ᠋ᠡᠷ ᠵᠠᠷᠯᠠᠨ ᠥᠭᠦᠯᠡᠷᠦᠨ : 《ᠡᠨᠡ ᠬᠡᠷᠡᠭ ᠬᠡᠮᠡᠭᠴᠢ ᠮᠠᠨ ᠤ᠋ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠳᠠᠭ᠌ᠷᠢᠯᠢᠭ᠌ ᠡᠵᠡᠨ ᠦ᠌ ᠲᠡᠮᠳᠡᠭᠲᠦ ᠲᠥᠷᠥ ᠪᠠᠢᠭᠤᠯᠬᠤᠢ ᠶ᠋ᠢᠨ ᠶᠡᠬᠡ ᠭᠠᠪᠢᠶᠠ ᠦᠨᠳᠦᠰᠦᠲᠦ ᠦᠢᠯᠡ ᠂ ᠲᠠᠨ ᠢ᠋ ᠣᠯᠠᠨ ᠬᠡᠷᠬᠢᠪᠡᠴᠦ ᠪᠢᠲᠡᠭᠡᠢ ᠦᠭᠡ ᠠᠯᠳᠠᠭᠲᠤᠨ ᠂ ᠲᠠᠨ ᠤ᠋ ᠴᠥᠮ ᠰᠣᠩᠭᠣᠨ ᠰᠢᠯᠭᠠᠵᠤ ᠂ ᠡᠴᠢᠭᠡ ᠡᠬᠡ ᠡᠮᠡ ᠦᠷᠡ ᠲᠡᠢ ᠬᠥᠮᠦᠨ ᠢ᠋ ᠰᠣᠩᠭᠣᠨ ᠠᠴᠢᠷᠠᠭᠰᠠᠨ ᠠᠨᠤ ᠮᠥᠨ ᠬᠦ᠌ ᠦᠭᠡ ᠭᠠᠷᠬᠤ ᠠ᠋ᠴᠠ ᠠᠶᠤᠵᠤᠬᠤᠢ ᠃ ᠲᠠ ᠬᠡᠷᠪᠡ ᠦᠭᠡ ᠠᠯᠳᠠᠪᠠᠰᠤ ᠭᠠᠭᠴᠠ ᠬᠤᠳᠠᠭᠠᠨᠠ ᠠᠬᠠᠢ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠲᠡᠳᠦᠢ ᠦᠬᠦᠬᠦ ᠪᠤᠰᠤ ᠂ ᠲᠠᠨ ᠲᠠᠨ ᠤ᠋ ᠪᠡᠶᠡ ᠴᠥᠮ ᠠᠮᠢᠳᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ ᠂ ᠦᠭᠡ ᠠᠯᠳᠠᠭᠰᠠᠨ ᠬᠥᠮᠦᠨ ᠦ᠌ ᠭᠡᠷ ᠦ᠋ᠨ ᠬᠣᠲᠠᠯᠠᠭᠠᠷ ᠪᠠᠰᠠ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠴᠠᠭᠠᠵᠠ ᠳ᠋ᠤᠷ ᠦᠬᠦᠬᠦ ᠪᠣᠯᠠᠢ ! 》ᠬᠡᠮᠡᠭᠡᠳ ᠡᠮᠦᠨᠡ ᠪᠡᠨ ᠠᠷᠪᠠ ᠠᠷᠪᠠᠨ ᠯᠠᠩ ᠤ᠋ᠨ ᠴᠠᠭᠠᠨ ᠮᠥᠩᠭᠥᠨ ᠦ᠌ ᠥᠯᠥᠭᠡᠢ ᠶ᠋ᠢ ᠣᠪᠣᠭᠠᠯᠠᠵᠤ ᠂ ᠵᠠᠯᠮᠠ ᠤᠷᠢᠳᠠ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠮᠥᠷᠥ ᠪᠡᠨ ᠬᠣᠶᠠᠷ ᠵᠤᠷᠪᠤᠰ ᠳᠡᠷᠪᠡᠢᠲᠡᠯᠡ ᠴᠠᠪᠴᠢᠵᠤ ᠂ ᠴᠢᠰᠤ ᠴᠤᠪᠤᠷᠢᠭᠤᠯᠤᠨ ᠪᠠᠢᠵᠤ ᠵᠠᠷᠯᠠᠨ ᠥᠭᠦᠯᠡᠷᠦᠨ: 《ᠲᠠᠨ ᠤ᠋ ᠳᠣᠲᠣᠷᠠ ᠨᠠᠳᠠ ᠳ᠋ᠤᠷ ᠠᠳᠠᠯᠢ ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠰᠢᠷᠬᠠ ᠭᠠᠷᠭᠠᠨ ᠴᠢᠳᠠᠭᠴᠢᠳ ᠲᠤᠷ ᠡᠳᠦᠭᠡ ᠳᠠᠷᠤᠢ ᠠᠷᠪᠠᠨ ᠱᠠᠩ ᠮᠥᠩᠭᠥ ᠱᠠᠩᠨᠠᠵᠤ ᠂ ᠡᠭᠡᠭᠰᠡᠨ ᠦ᠌ ᠬᠣᠢᠨᠠ ᠬᠣᠶᠠᠷ ᠵᠡᠷᠭᠡ ᠳᠡᠪᠰᠢᠭᠦᠯᠵᠦ ᠂ ᠭᠡᠷ ᠡᠷᠦᠬᠡ ᠶ᠋ᠢ ᠳᠡᠭᠵᠢᠭᠦᠯᠦᠮᠦᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠰᠣᠭᠲᠣᠭᠤ ᠬᠥᠯᠴᠦᠭᠦᠴᠦᠳ ᠬᠥᠭᠡᠷᠦᠯᠴᠡᠨ ᠡᠭᠦᠰᠬᠡᠯᠴᠡᠵᠦ ᠂ ᠥᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠰᠢᠷᠬᠠ ᠭᠠᠷᠭᠠᠭᠰᠠᠨ ᠠᠨᠤ ᠨᠡᠢᠲᠡ ᠠᠷᠪᠠᠨ ᠨᠠᠢ᠍ᠮᠠᠨ ᠬᠥᠮᠦᠨ ᠭᠠᠷᠤᠭᠰᠠᠨ ᠳ᠋ᠤᠷ ᠴᠥᠮ ᠳᠠᠪᠬᠤᠷ ᠱᠠᠩ ᠥᠭᠭᠦᠭᠦᠶᠡ ᠂ ᠡᠭᠦᠨ ᠢ᠋ ᠦᠵᠡᠭᠡᠳ ᠬᠣᠪᠳᠣᠭ ᠬᠥᠳᠡᠯᠵᠦ ᠪᠠᠰᠠ ᠵᠢᠷᠭᠤᠭᠠᠨ ᠬᠥᠮᠦᠨ ᠰᠢᠷᠬᠠ ᠭᠠᠷᠭᠠᠵᠤ ᠂ ᠵᠠᠷᠢᠮ ᠠᠨᠤ ᠪᠦᠳᠦᠭᠦᠨ ᠭᠤᠶᠠ ᠂ ᠵᠠᠷᠢᠮ ᠠᠨᠤ ᠭᠠᠷ ᠤ᠋ᠨ ᠱᠣ ᠂ ᠵᠠᠷᠢᠮ ᠠᠨᠤ ᠴᠢᠷᠠᠢ ᠪᠠᠨ ᠡᠰᠬᠡᠨ ᠂ ᠵᠠᠷᠢᠮ ᠠᠨᠤ ᠲᠣᠯᠣᠭᠠᠢ ᠪᠠᠨ ᠴᠣᠭᠣᠯᠵᠤ ᠮᠠᠰᠢ ᠰᠦᠷᠡᠬᠡᠢ ᠃ ᠲᠡᠳᠦᠢ ᠬᠣᠶᠠᠷ ᠳᠠᠰᠢ ᠰᠢᠷᠠ ᠪᠠᠭᠤᠳᠠᠯ ᠢ᠋ ᠴᠣᠬᠢᠵᠤ ᠮᠥᠷ ᠭᠠᠷᠭᠠᠷᠠ ᠡᠴᠢᠭᠰᠡᠨ ᠠᠷᠠᠳ ᠴᠥᠮ ᠡᠭᠡᠵᠦ ᠢᠷᠡᠭᠰᠡᠨ ᠲᠤᠯᠠ ᠵᠡᠯᠮᠡ ᠰᠢᠷᠬᠠ ᠶ᠋ᠢ ᠬᠦᠯᠢᠴᠡᠨ ᠂ ᠪᠠᠰᠠ ᠬᠡᠳᠦᠨ ᠬᠤᠷᠴᠠ ᠬᠡᠯᠡᠲᠡᠨ ᠢ᠋ ᠰᠣᠩᠭᠣᠨ ᠭᠠᠷᠭᠠᠵᠤ ᠂ ᠲᠠᠨ ᠤ᠋ ᠡᠨᠡ ᠬᠡᠳᠦᠨ ᠬᠥᠮᠦᠨ ᠲᠥᠭᠡᠷᠢᠭᠰᠡᠨ ᠮᠡᠲᠦ ᠪᠡᠷ ᠳᠤᠲᠠᠭᠠᠵᠤ ᠂ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠰᠢᠷᠭᠤᠨ ᠣᠷᠣᠵᠤ ᠂ ᠬᠣᠲᠠ ᠠ᠋ᠴᠠ ᠬᠤᠯᠠᠭᠠᠢ ᠴᠡᠷᠢᠭ ᠭᠠᠷᠴᠤ ᠮᠠᠨ ᠤ᠋ ᠪᠡᠯᠡᠭ ᠦ᠋ᠨ ᠡᠳ᠋ ᠢ᠋ ᠳᠡᠭᠡᠷᠡᠮᠳᠡᠨ ᠪᠤᠯᠢᠶᠠᠪᠠ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠤᠭᠠᠳ ᠵᠢᠴᠢ ᠡᠳᠦᠷ ᠰᠢᠭᠤᠳ ᠵᠠᠢ ᠶ᠋ᠢ ᠦᠵᠡᠨ ᠪᠤᠯᠳᠤᠷᠠᠨ ᠭᠠᠷᠴᠤ ᠤᠯᠤᠰ ᠤ᠋ᠨ ᠵᠦᠭ ᠡᠴᠢᠵᠦ ᠵᠢᠨᠦᠩ ᠳ᠋ᠦ᠍ᠷ ᠤᠴᠢᠷ ᠢ᠋ ᠬᠡᠯᠡᠭᠡᠳ ᠬᠠᠷᠢᠲᠤᠭᠠᠢ ᠂ ᠬᠡᠷᠬᠢᠪᠡᠴᠦ ᠴᠡᠷᠢᠭ ᠲᠦ᠍ᠷ ᠪᠠᠷᠢᠭ᠍ᠳᠠᠨ ᠠᠮᠠᠨ ᠠᠭᠤᠯᠵᠠᠭᠤᠯᠬᠤᠢ ᠳ᠋ᠤᠷ ᠪᠢᠲᠡᠭᠡᠢ ᠬᠦᠷᠭᠦᠯ ! 》ᠭᠡᠮᠡᠨ ᠡᠯᠡ ᠵᠦᠢᠯ ᠢ᠋ ᠴᠥᠮ ᠵᠥᠪᠳᠡᠨ ᠲᠣᠭᠲᠠᠭᠠᠭᠠᠳ ᠶᠡᠬᠡᠯᠡ ᠬᠠᠰᠬᠢᠷᠤᠭᠤᠯᠤᠨ ᠭᠠᠯ ᠰᠢᠲᠠᠭᠠᠵᠤ ᠴᠥᠮ ᠨᠣᠴᠣᠭᠰᠠᠨᠠ ᠂ ᠣᠯᠠᠨ ᠢ᠋ ᠠᠪᠴᠤ ᠪᠠᠷᠠᠭᠤᠨ ᠬᠣᠢᠲᠤ ᠰᠤᠷᠳᠨᠴᠤᠭ ᠬᠣᠲᠠ ᠶ᠋ᠢᠨ ᠵᠦᠭ ᠭᠦᠶᠦᠨ ᠡᠴᠢᠬᠦ ᠪᠥᠭᠡᠳ ᠣᠯᠠᠨ ᠤ᠋ ᠵᠦᠭ ᠥᠭᠦᠯᠡᠷᠦᠨ : 《ᠲᠠ ᠲᠦᠷᠭᠡᠨᠡ ᠨᠠᠮᠠᠢ ᠳᠠᠭᠠᠵᠤ ᠪᠠᠷᠬᠢᠷᠠᠨ ᠶᠠᠪᠤᠭᠲᠤᠨ ᠃ ᠲᠠᠨ ᠤ᠋ ᠳᠣᠲᠣᠷᠠ ᠰᠢᠷᠬᠠ ᠭᠠᠷᠭᠠᠴᠢ ᠬᠥᠮᠦᠨ ᠪᠣᠢ ᠂ ᠰᠢᠷᠬᠠᠳᠤᠭᠰᠠᠨ ᠪᠦᠬᠦᠨᠡ ᠪᠠᠰᠠ ᠬᠦ᠌ ᠠᠷᠪᠠᠨ ᠯᠠᠩ ᠤ᠋ᠨ ᠱᠠᠩ ᠪᠣᠢ ᠂ ᠪᠢᠲᠡᠭᠡᠢ ᠬᠢᠯᠢᠰᠳᠡ ! 》ᠬᠡᠮᠡᠭᠡᠳ ᠵᠠᠯᠮᠠ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠪᠠᠰᠠ ᠵᠡᠭᠦᠨ ᠮᠥᠷᠥ ᠪᠡᠨ ᠭᠤᠷᠪᠠᠨᠲᠠ ᠴᠠᠪᠴᠢᠵᠤ ᠢᠯᠳᠦ ᠪᠡᠨ ᠭᠠᠯ ᠳ᠋ᠤᠷ ᠴᠣᠬᠢᠭ᠍ᠰᠠᠨᠠ ᠂ ᠬᠤᠳᠠᠭᠠᠨᠠ ᠪᠡᠬᠢ ᠢᠴᠢᠭᠦᠷᠢ ᠳ᠋ᠦ᠍ᠷ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠭᠤᠶᠠ ᠪᠠᠨ ᠨᠢᠭᠡᠨᠲᠡ ᠡᠰᠬᠡᠵᠦ ᠨᠢᠭᠤᠷ ᠲᠤᠷ ᠢ᠋ᠶ᠋ᠠᠨ ᠨᠢᠭᠡᠨ ᠶ᠋ᠢᠳᠡ ᠶ᠋ᠢᠨ ᠰᠢᠷᠬᠠ ᠭᠠᠷᠭᠠᠵᠤ ᠂ ᠪᠦᠭᠦᠳᠡᠭᠡᠷ ᠬᠠᠰᠬᠢᠷᠤᠨ ᠪᠠᠷᠬᠢᠷᠠᠯᠴᠠᠭᠰᠠᠭᠠᠷ ᠭᠦᠶᠦᠯᠳᠦᠵᠦ ᠂ ᠬᠣᠲᠠ ᠶ᠋ᠢᠨ ᠡᠮᠦᠨᠡ ᠬᠠᠭᠠᠯᠭᠠ ᠪᠠ ᠵᠡᠭᠦᠨ ᠬᠠᠭᠠᠯᠭᠠᠨᠠ ᠢᠷᠡᠵᠦ ᠪᠠᠷᠬᠢᠷᠠᠯᠴᠠᠨ ᠬᠠᠰᠬᠢᠷᠴᠤ : 《ᠲᠠᠨ ᠤ᠋ ᠣᠯᠠᠨ ᠬᠦᠷᠢᠶᠡᠨ ᠦ᠌ ᠴᠡᠷᠢᠭ ᠡᠴᠡ ᠬᠤᠯᠠᠭᠠᠢ ᠴᠡᠷᠢᠭ ᠭᠠᠷᠴᠤ ᠮᠠᠨ ᠤ᠋ ᠬᠦᠷᠢᠶᠡ ᠳ᠋ᠦ᠍ᠷ ᠭᠠᠯ ᠲᠠᠯᠪᠢᠨ ᠣᠷᠣᠵᠤ ᠂ ᠡᠳ᠋ ᠠᠭᠤᠷᠠᠰᠤᠨ ᠢ᠋ ᠪᠤᠯᠢᠶᠠᠪᠠ ᠃ ᠲᠦᠷᠭᠡᠨᠡ ᠴᠡᠷᠢᠭ ᠭᠠᠷᠭᠠᠨ ᠪᠤᠯᠢᠶᠠᠨ ᠠᠪ ! 》 ᠭᠡᠮᠡᠨ ᠦᠢᠮᠡᠯᠳᠦᠵᠦ ᠪᠠᠷᠬᠢᠷᠠᠬᠤᠶᠠ ᠂ ᠡᠨᠡ ᠦᠶᠡ ᠳ᠋ᠦ᠍ᠷ ᠵᠠᠮᠤᠬᠠ ᠲᠠᠨ ᠬᠠᠷᠠᠬᠠᠨ ᠪᠠᠶᠠᠷᠲᠠᠶᠠ ᠬᠤᠷᠢᠮᠯᠠᠬᠤᠢ ᠳ᠋ᠤᠷ ᠭᠡᠨᠡᠳᠲᠡ ᠬᠣᠲᠠ ᠶ᠋ᠢᠨ ᠡᠮᠦᠨᠡ ᠵᠣᠪᠬᠢᠰ ᠲᠤᠷ ᠭᠠᠯ ᠤ᠋ᠨ ᠭᠡᠷᠡᠯ ᠭᠠᠷᠴᠤ ᠬᠥᠮᠦᠨ ᠬᠠᠰᠬᠢᠷᠤᠯᠳᠤᠨ ᠶᠡᠬᠡᠯᠡ ᠦᠢᠮᠡᠯᠳᠦᠨ ᠡᠮᠦᠨᠡ ᠬᠠᠭᠠᠯᠭᠠᠨ ᠳ᠋ᠤᠷ ᠬᠠᠰᠬᠢᠷᠤᠯᠴᠠᠬᠤᠶᠠ ᠂ ᠭᠤᠷᠪᠠᠨ ᠲᠦᠰᠢᠮᠡᠯ ᠵᠠᠮᠤᠬᠠ ᠯᠤᠭᠠ ᠡᠮᠦᠨᠡ ᠬᠠᠭᠠᠯᠭᠠᠨ ᠤ᠋ ᠠᠰᠠᠷ ᠲᠤᠷ ᠠᠪᠠᠷᠢᠵᠤ ᠦᠵᠡᠬᠦᠯᠡ ᠂ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠡᠮᠦᠨᠡ ᠬᠣᠶᠠᠷ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠡᠯᠡᠭ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢᠨ ᠬᠦᠷᠢᠶᠡ ᠭᠠᠯ ᠳ᠋ᠤᠷ ᠰᠢᠲᠠᠭᠳᠠᠨ ᠂ ᠬᠠᠪᠤᠷ ᠤ᠋ᠨ ᠬᠠᠭᠤᠷᠠᠢ ᠨᠠᠪᠴᠢ ᠡᠪᠡᠰᠦ ᠵᠠᠯᠭᠠᠯᠳᠤᠨ ᠰᠢᠳᠡᠵᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠪᠠ ᠴᠡᠷᠢᠭ ᠦ᠋ᠨ ᠠᠷᠠᠳ ᠣᠯᠠᠩᠬᠢ ᠨᠢ ᠠᠨᠤ ᠴᠢᠷᠠᠮᠠᠨ ᠨᠢᠴᠦᠭᠦᠨ ᠪᠥᠭᠡᠳ ᠴᠥᠮ ᠰᠢᠷᠬᠠᠲᠤᠵᠤ ᠲᠦᠷᠭᠡᠨᠡ ᠬᠠᠭᠠᠯᠭᠠ ᠨᠡᠭᠡᠭᠡᠵᠦ ᠂ ᠴᠡᠷᠢᠭ ᠭᠠᠷᠭᠠᠨ ᠬᠤᠯᠠᠭᠠᠢ ᠴᠡᠷᠢᠭ ᠢ᠋ ᠪᠡᠷᠢ ᠭᠡᠮᠡᠨ ᠪᠠᠬᠢᠷᠤᠯᠴᠠᠮᠤᠢ ᠃
ᠡᠨᠡ ᠦᠶᠡ ᠳ᠋ᠦ᠍ᠷ ᠵᠠᠯᠮᠠ ᠶ᠋ᠢᠨ ᠰᠢᠷᠬᠠ ᠭᠠᠷᠭᠠᠭᠴᠢ ᠬᠡᠳᠦᠨ ᠬᠥᠮᠦᠨ ᠲᠡᠨᠡᠭᠰᠢᠭᠡᠷ ᠦ᠋ᠨ ᠳᠡᠭᠡᠷᠡ ᠪᠠᠰᠠ ᠰᠣᠭᠲᠣᠭᠰᠠᠨ ᠳ᠋ᠤᠷ ᠡᠨᠡ ᠲᠡᠷᠡ ᠶ᠋ᠢ ᠴᠢᠴᠢᠵᠦ ᠴᠠᠪᠴᠢᠨ ᠬᠥᠭᠡᠷᠦᠭᠡᠳ ᠬᠣᠷᠢᠭᠠᠳ ᠬᠥᠮᠦᠨ ᠢ᠋ ᠰᠢᠷᠬᠠ ᠭᠠᠷᠭᠠᠵᠤ ᠂ ᠤᠯᠠᠮ ᠤᠯᠠᠮ ᠥᠪᠡᠷ ᠢ᠋ᠶ᠋ᠡᠨ ᠰᠢᠷᠬᠠ ᠭᠠᠷᠭᠠᠭᠰᠠᠨ ᠴᠡᠷᠢᠭ ᠢ᠋ ᠪᠠᠰᠠ ᠲᠠᠰᠢᠶᠠᠷᠠᠨ ᠳᠠᠪᠬᠤᠷ ᠰᠢᠷᠬᠠ ᠭᠠᠷᠭᠠᠭᠰᠠᠨ ᠳ᠋ᠤᠷ ᠪᠦᠭᠦᠳᠡᠭᠡᠷ ᠣᠳᠣ ᠬᠡᠷᠡᠭ ᠦᠭᠡᠢ ᠂ ᠡᠨᠡ ᠰᠢᠷᠬᠠ ᠠᠨᠤ ᠪᠠᠷᠲᠠᠭᠠᠪᠠᠷ ᠭᠦᠢᠴᠡᠮᠦᠢ ᠭᠡᠮᠡᠨ ᠬᠡᠷᠬᠢᠨ ᠬᠡᠯᠡᠪᠡᠴᠦ ᠰᠢᠷᠬᠠ ᠭᠠᠷᠭᠠᠭᠴᠢ ᠬᠡᠳᠦᠨ ᠬᠥᠮᠦᠨ ᠨᠢᠭᠡᠮᠦᠰᠦᠨ ᠬᠥᠭᠡᠷᠴᠦ ᠵᠦᠭ ᠲᠣᠮᠣᠭᠠ ᠦᠭᠡᠢ ᠰᠠᠮᠠᠭᠤᠷᠠᠨ ᠴᠠᠪᠴᠢᠬᠤᠢ ᠳ᠋ᠤᠷ ᠪᠦᠭᠦᠳᠡᠭᠡᠷ ᠣᠷᠣᠵᠤ ᠂ ᠡᠨᠡ ᠬᠡᠳᠦᠭᠦᠯᠡ ᠶ᠋ᠢ ᠪᠠᠷᠢᠭᠠᠳ ᠳᠠᠷᠤᠨ ᠤᠨᠠᠭᠠᠵᠤ ᠂ ᠬᠠᠭᠠᠰ ᠢᠨᠢᠶᠡᠳᠦᠮ ᠬᠠᠭᠠᠰ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠲᠡᠳᠡᠨ ᠦ᠌ ᠪᠡᠶᠡ ᠳ᠋ᠦ᠍ᠷ ᠬᠡᠳᠦ ᠬᠡᠳᠦᠨ ᠰᠢᠷᠬᠠ ᠭᠠᠷᠭᠠᠵᠤ ᠂ ᠢᠯᠳᠦ ᠵᠢᠳᠠ ᠶ᠋ᠢ ᠠᠨᠤ ᠪᠤᠯᠢᠶᠠᠨ ᠠᠪᠴᠤ ᠡᠪᠡᠰᠦᠨ ᠳ᠋ᠦ᠍ᠷ ᠴᠣᠬᠢᠭᠠᠳ ᠴᠢᠷᠦᠯᠴᠡᠨ ᠡᠭᠦᠷᠦᠯᠴᠡᠨ ᠂ ᠬᠣᠲᠠ ᠶ᠋ᠢᠨ ᠳᠣᠣᠷᠠ ᠢᠷᠡᠭᠰᠡᠨ ᠲᠤᠯᠠ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠨ ᠮᠠᠰᠢ ᠣᠯᠠᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠰᠠᠭᠠᠷ ᠨᠠᠷ ᠵᠤᠯᠠ ᠪᠠᠭᠤᠯᠭᠠᠨ ᠦᠵᠡᠭᠡᠳ ᠮᠠᠰᠢ ᠦᠨᠡᠮᠰᠢᠵᠦ ᠂ ᠶᠠᠭᠠᠷᠠᠨ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠬᠠᠭᠠᠯᠭᠠ ᠨᠡᠭᠡᠭᠡᠯᠭᠡᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠣᠷᠣᠭᠤᠯᠵᠤ ᠪᠠᠰᠠ ᠬᠣᠲᠠ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠢ᠋ ᠰᠡᠷᠭᠦᠭᠡᠵᠦ ᠂ ᠮᠣᠷᠢ ᠡᠮᠡᠭᠡᠯᠯᠡᠭᠦᠯᠦᠨ ᠡᠴᠢᠲᠡᠯᠡ ᠰᠥᠨᠢ ᠳᠦᠯᠢ ᠥᠩᠭᠡᠷᠡᠵᠦ ᠠᠭᠤᠯᠠ ᠵᠠᠪᠰᠠᠷᠯᠠᠵᠤᠬᠤᠢ ᠃ ᠭᠠᠯ ᠮᠥᠨ ᠰᠥᠨᠥᠭᠡᠳ ᠬᠤᠯᠠᠭᠠᠢ ᠬᠡᠳᠦᠢᠨᠡᠢ ᠡᠴᠢᠵᠦᠬᠦᠢ ᠃ ᠮᠢᠩᠭᠠᠨ ᠠᠴᠢᠶᠠ ᠠᠭᠤᠯᠠ ᠶ᠋ᠢᠨ ᠲᠡᠳᠦᠢ ᠣᠪᠣᠭᠠ ᠶ᠋ᠢᠨ ᠨᠢᠭᠡᠨ ᠠᠴᠢᠶᠠ ᠴᠤ᠌ ᠦᠯᠡᠭᠰᠡᠨ ᠦᠭᠡᠢ ᠂ ᠭᠠᠭᠴᠠ ᠬᠣᠢᠭᠯᠠᠭᠳᠠᠭᠰᠠᠨ ᠬᠦᠷᠢᠶᠡᠨ ᠦ᠌ ᠦᠯᠡᠳᠡᠵᠦ ᠲᠤᠰᠤᠭᠰᠠᠨ ᠮᠢᠬᠠᠨ ᠤ᠋ ᠨᠢᠷᠤᠭᠤ ᠪᠠᠭᠠᠨᠠ ᠥᠷᠭᠥᠭᠡ ᠶ᠋ᠢᠨ ᠣᠨᠢ ᠬᠠᠨᠠ ᠬᠢᠭᠡᠳ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠂ ᠠᠴᠢᠶᠠ ᠶ᠋ᠢᠨ ᠬᠠᠪᠴᠢᠶᠠᠷᠢ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠮᠣᠳᠣᠨ ᠤ᠋ ᠵᠦᠢᠯ ᠦ᠋ᠨ ᠰᠢᠳᠡᠵᠦ ᠪᠦᠬᠦᠢ ᠪᠠᠭᠠ ᠰᠠᠭᠠ ᠭᠠᠯ ᠢ᠋ ᠤᠮᠳᠠᠷᠠᠭᠠᠵᠤ ᠂ ᠡᠳᠦᠢ ᠲᠡᠳᠦᠢ ᠬᠠᠵᠠᠭᠠᠷ ᠳᠥᠷᠥᠭᠡ ᠶ᠋ᠢᠨ ᠵᠦᠢᠯ ᠦ᠋ᠨ ᠲᠡᠮᠦᠷ ᠢ᠋ ᠢᠨᠦ ᠬᠤᠷᠢᠶᠠᠯᠭᠠᠨ ᠡᠭᠡᠪᠡ ᠃ ᠲᠡᠳᠦᠢ ᠵᠡᠯᠮᠡ ᠂ ᠬᠤᠳᠠᠭᠠᠨᠠ ᠪᠡᠬᠢ ᠬᠣᠶᠠᠭᠤᠯᠠ ᠴᠢᠰᠤ ᠴᠤᠪᠤᠷᠢᠭᠤᠯᠤᠨ ᠰᠢᠷᠬᠠᠲᠤᠭᠰᠠᠨ ᠪᠦᠬᠦᠢ ᠴᠡᠷᠢᠭ ᠢ᠋ᠶ᠋ᠡᠨ ᠴᠥᠮ ᠨᠢᠴᠦᠭᠦᠯᠡᠭᠦᠯᠵᠦ ᠂ ᠪᠦᠭᠦᠳᠡᠭᠡᠷ ᠢ᠋ ᠠᠪᠴᠤ ᠵᠠᠯᠢᠲᠤ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠡᠭᠦᠳᠡᠨᠡ ᠢᠷᠡᠵᠦ ᠤᠬᠢᠯᠠᠨ ᠤᠨᠵᠢᠵᠤ ᠶᠣᠢᠯᠠᠵᠤ ᠶᠣᠪᠰᠢᠨ ᠪᠠᠷᠬᠢᠷᠠᠯᠴᠠᠨ ᠴᠠᠷᠬᠢᠷᠠᠯᠴᠠᠨ ᠂ ᠪᠠᠰᠠ ᠥᠩᠬᠥᠷᠢᠨ ᠳᠤᠭᠤᠢᠷᠠᠬᠤᠢ ᠳ᠋ᠤᠷ ᠵᠠᠯᠢᠲᠤ ᠬᠠᠭᠠᠨ ᠰᠢᠳᠠᠷ ᠰᠠᠢᠳ ᠤ᠋ᠳ ᠢ᠋ ᠭᠠᠷᠭᠠᠵᠤ ᠠᠰᠠᠭᠤᠯᠭᠠᠪᠠᠰᠤ ᠂ ᠵᠠᠯᠮᠠ ᠶᠡᠬᠡᠯᠡ ᠬᠠᠰᠬᠢᠷᠤᠨ ᠥᠭᠦᠯᠡᠷᠦᠨ : 《ᠨᠢᠭᠡᠨ ᠤᠯᠤᠰ ᠤ᠋ᠨ ᠡᠵᠡᠨ ᠪᠥᠭᠡᠳ ᠶᠠᠭᠤᠨ ᠳ᠋ᠤᠷ ᠡᠨᠡ ᠮᠡᠲᠦ ᠭᠡᠭᠡᠬᠡᠨ ᠦᠭᠡᠢ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠶᠠᠪᠤᠵᠤ ᠂ ᠮᠠᠨ ᠤ᠋ ᠡᠳ᠋ ᠢ᠋ ᠠᠪᠴᠤ ᠪᠠᠰᠠ ᠬᠥᠮᠦᠨ ᠢ᠋ ᠠᠯᠠᠬᠤᠷ ᠲᠤᠷ ᠭᠥᠷᠥᠭᠦᠯᠦᠮᠦᠢ ? 》ᠭᠡᠮᠡᠨ ᠪᠠᠷᠬᠢᠷᠠᠬᠤᠢ ᠳ᠋ᠤᠷ ᠵᠠᠯᠢᠲᠤ ᠬᠠᠭᠠᠨ ᠶᠡᠬᠡ ᠰᠣᠴᠢᠵᠤ ᠂ ᠶᠠᠭᠠᠷᠠᠨ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠵᠡᠯᠮᠡ ᠂ ᠬᠤᠳᠠᠭᠠᠨᠠ ᠪᠡᠬᠢ ᠲᠠᠨᠠ ᠵᠣᠯᠭᠠᠪᠠᠰᠤ ᠵᠠᠯᠮᠠ ᠶ᠋ᠢᠨ ᠬᠣᠶᠠᠷ ᠮᠥᠷᠥ ᠠᠨᠠᠭ ᠵᠠᠨᠠᠭ ᠦᠭᠡᠢ ᠴᠠᠪᠴᠢᠭ᠍ᠳᠠᠵᠤ ᠂ ᠬᠤᠳᠠᠭᠠᠨᠠ ᠪᠡᠬᠢ ᠴᠢᠷᠠᠢ ᠡᠰᠡᠷᠭᠦ ᠰᠢᠷᠬᠠ ᠣᠯᠵᠤ ᠂ ᠭᠤᠶᠠ ᠪᠠᠨ ᠴᠠᠪᠴᠢᠭ᠍ᠳᠠᠵᠤ ᠴᠥᠮ ᠬᠠᠷᠠᠩᠭᠤᠳᠤᠨ ᠪᠣᠷᠣᠩᠭᠣᠲᠠᠨ ᠮᠠᠰᠢ ᠰᠦᠷᠡᠬᠡᠢ ᠳ᠋ᠦ᠍ᠷ ᠶᠠᠭᠠᠷᠠᠨ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠂ ᠵᠡᠯᠮᠡ ᠶ᠋ᠢᠨ ᠰᠢᠷᠬᠠ ᠬᠦᠨᠳᠦ ᠲᠤᠯᠠ ᠡᠳᠦᠭᠡ ᠪᠠᠰᠠ ᠠᠭᠤᠷᠯᠠᠬᠤᠢ ᠳ᠋ᠤᠷ ᠳᠣᠲᠣᠷᠠ ᠬᠠᠷᠠᠯᠠᠵᠤ ᠂ ᠲᠥᠷᠥ ᠳ᠋ᠦ᠍ᠷ ᠤᠨᠠᠨ ᠬᠡᠪᠲᠡᠵᠦ ᠥᠴᠢᠨ ᠴᠢᠳᠠᠬᠤ ᠦᠭᠡᠢ ᠃ ᠭᠠᠭᠴᠠ ᠵᠠᠯᠢᠲᠤ ᠬᠠᠭᠠᠨ ᠢ᠋ ᠬᠤᠷᠤᠭᠤ ᠪᠠᠷ ᠵᠢᠭᠠᠵᠤ ᠰᠢᠲᠦ ᠪᠡᠨ ᠬᠠᠪᠢᠷᠤᠨ ᠵᠠᠨᠤᠮᠤᠢ ᠃ ᠬᠤᠳᠠᠭᠠᠨᠠ ᠪᠡᠬᠢ ᠶ᠋ᠢᠨ ᠰᠢᠷᠬᠠ ᠪᠠᠬᠠᠨ ᠬᠥᠩᠭᠡᠨ ᠲᠤᠯᠠ ᠳᠠᠷᠤᠢ ᠰᠢᠷᠬᠠ ᠡᠪᠡᠷᠰᠢᠶᠡᠬᠦᠢ ᠳ᠋ᠦ᠍ᠷ ᠤᠬᠢᠯᠠᠬᠤ ᠨᠢᠯᠪᠤᠰᠤᠨ ᠪᠡᠯᠡᠬᠡᠨ ᠲᠤᠯᠠ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ ᠤᠬᠢᠯᠠᠵᠤ ᠬᠠᠰᠬᠢᠷᠤᠨ ᠥᠭᠦᠯᠡᠷᠦᠨ : 《ᠬᠠᠭᠠᠨ ᠴᠢ ᠨᠢᠭᠡᠨ ᠶᠡᠬᠡ ᠤᠯᠤᠰ ᠤ᠋ᠨ ᠡᠵᠡᠨ ᠪᠥᠭᠡᠳ ᠶᠠᠭᠤᠨ ᠳ᠋ᠤᠷ ᠡᠨᠡ ᠮᠡᠲᠦ ᠮᠠᠭᠤᠬᠠᠢ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠶᠠᠪᠤᠵᠤ ᠂ ᠣᠯᠠᠨ ᠴᠡᠷᠢᠭ ᠡᠴᠡ ᠪᠡᠨ ᠮᠠᠨ ᠤ᠋ ᠢᠯᠡᠭᠡᠭᠰᠡᠨ ᠲᠦᠮᠡᠨ ᠯᠠᠩ ᠮᠥᠩᠭᠥ ᠂ ᠮᠢᠩᠭᠠᠨ ᠯᠠᠩ ᠠᠯᠲᠠ ᠂ ᠵᠠᠭᠤᠨ ᠲᠦᠮᠡᠨ ᠦ᠌ ᠡᠳ᠋ ᠠᠭᠤᠷᠰᠤᠨ ᠢ᠋ ᠬᠠᠷᠠᠮᠯᠠᠵᠤ ᠂ ᠡᠢᠮᠦ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠦ᠋ᠨ ᠨᠢᠭᠤᠴᠠ ᠬᠠᠷᠠᠩᠭᠤᠢ ᠢᠴᠢᠩᠭᠦᠷᠢᠲᠦ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠶᠠᠪᠤᠮᠤᠢ ? 》 ᠭᠡᠮᠡᠨ 《ᠶᠣ ᠶᠣᠬᠤ ᠂ ᠠ᠋ ᠠ᠋ 》 ᠭᠡᠮᠡᠨ ᠲᠦᠢᠪᠡᠭᠡᠬᠦᠢ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠴᠢᠬᠤᠯᠳᠠᠨ ᠭᠠᠰᠢᠭᠤᠳᠠᠵᠤ ᠂ ᠠᠷᠭᠠ ᠦᠭᠡᠢ ᠵᠠᠯᠮᠠ ᠶ᠋ᠢ ᠲᠦᠰᠢᠭᠦᠯᠦᠨ ᠭᠠᠷᠭᠠᠯᠭᠠᠵᠤ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠪᠠᠭᠤᠳᠠᠯᠯᠠᠭᠤᠯᠵᠤ ᠂ ᠳ᠋ᠤᠷ ᠤᠷᠢᠳᠠ ᠰᠠᠢᠨ ᠡᠮ ᠢ᠋ᠶ᠋ᠠᠷ ᠡᠮᠨᠡᠭᠦᠯᠵᠦ ᠂ ᠰᠢᠷᠬᠠᠲᠤᠭᠰᠠᠨ ᠴᠡᠷᠢᠭ ᠦ᠋ᠳ ᠲᠣᠷ ᠮᠥᠨ ᠡᠮ ᠲᠦᠭᠡᠭᠡᠯᠭᠡᠨ ᠥᠭᠭᠦᠭᠦᠯᠵᠦ ᠂ ᠪᠠᠬᠠᠨ ᠲᠡᠩᠬᠡᠷᠡᠵᠦ ᠰᠡᠷᠭᠦᠬᠦ ᠶ᠋ᠢ ᠬᠦᠯᠢᠶᠡᠭᠡᠳ ᠨᠢᠭᠡᠨᠲᠡᠭᠡᠭᠦᠷ ᠭᠤᠷᠪᠠᠨ ᠲᠦᠰᠢᠮᠡᠳ ᠲᠣᠷ ᠵᠠᠷᠯᠢᠭ ᠪᠠᠭᠤᠯᠭᠠᠷᠤᠨ : 《ᠡᠨᠡ ᠬᠡᠷᠡᠭ ᠯᠠᠪ ᠭᠠᠳᠠᠭᠠᠳᠤ ᠤᠯᠤᠰ ᠠ᠋ᠴᠠ ᠲᠠᠲᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠳ᠋ ᠲᠣᠷ ᠬᠣᠪᠳᠣᠭᠯᠠᠵᠤ ᠡᠳᠦᠭᠰᠡᠨ ᠬᠡᠷᠡᠭ ᠂ ᠲᠠ ᠡᠴᠢᠵᠦ ᠬᠦᠷᠢᠶᠡ ᠪᠦᠷᠢ ᠶ᠋ᠢ ᠨᠡᠩᠵᠢᠨ ᠦᠵᠡᠵᠦ ᠂ ᠡᠳ᠋ ᠢ᠋ ᠠᠭᠤᠳᠠᠯᠵᠤ ᠭᠠᠷᠭᠠ !》ᠭᠡᠮᠡᠨ ᠳᠠᠷᠤᠢ ᠴᠡᠷᠢᠭ ᠥᠭᠴᠦ ᠨᠡᠩᠵᠢᠭᠦᠯᠦᠷᠡ ᠢᠯᠡᠭᠡᠪᠡ ᠃ ᠲᠡᠷᠡ ᠰᠥᠨᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠡᠳᠦ ᠬᠡᠳᠦᠨ ᠴᠡᠷᠢᠭ ᠰᠢᠷᠬᠠᠲᠤᠵᠤ ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠬᠣᠨᠣᠵᠤ ᠭᠠᠷᠬᠤᠶᠠ ᠵᠠᠯᠢᠲᠤ ᠬᠠᠭᠠᠨ ᠤ᠋ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠂ ᠬᠣᠢᠲᠤ ᠬᠠᠭᠠᠯᠭᠠ ᠪᠠᠷ ᠬᠤᠯᠠᠭᠠᠢ ᠴᠡᠷᠢᠭ ᠭᠠᠷᠴᠤ ᠲᠠᠨ ᠳ᠋ᠤᠷ ᠱᠠᠩᠨᠠᠬᠤ ᠬᠡᠳᠦᠨ ᠲᠦᠮᠡᠨ ᠯᠠᠩ ᠴᠠᠭᠠᠨ ᠮᠥᠩᠭᠥ ᠲᠣᠷᠭᠠ ᠲᠦᠷᠭᠡ ᠂ ᠲᠠᠷᠮᠠ ᠴᠠᠯᠮᠠ ᠮᠢᠩᠭᠠᠨ ᠠᠴᠢᠶᠠ ᠬᠦᠨᠳᠦ ᠡᠳ᠋ ᠢ᠋ ᠲᠠᠯᠠ ᠦᠭᠡᠢ ᠪᠡᠷ ᠪᠤᠯᠢᠶᠠᠨ ᠠᠪᠠᠴᠢᠪᠠ ᠭᠡᠮᠡᠨ ᠬᠡᠯᠡᠵᠦ ᠭᠠᠷᠤᠭᠰᠠᠨ ᠲᠤᠯᠠ ᠤᠯᠤᠰ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠨᠡᠩ ᠬᠣᠷᠣᠰᠴᠤ ᠨᠢᠭᠡᠨᠲᠡ ᠪᠠᠢᠯᠳᠤᠬᠤ ᠰᠡᠳᠬᠢᠯ ᠦᠭᠡᠢ ᠪᠣᠯᠪᠠ ᠃ ᠳᠠᠭᠠᠯᠳᠤᠭᠠ ᠰᠥᠨᠢ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠡᠴᠢᠭᠰᠡᠨ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠦ᠋ᠳ ᠵᠠᠯᠮᠠ ᠪᠠ ᠬᠤᠳᠠᠭᠠᠨᠠ ᠪᠡᠬᠢ ᠶ᠋ᠢ ᠰᠢᠷᠬᠠᠲᠤᠪᠠ ᠭᠡᠮᠡᠨ ᠰᠡᠮᠡᠬᠡᠷ ᠦᠵᠡᠷᠡ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠠᠰᠠ ᠳᠣᠣᠷᠠᠲᠤ ᠴᠡᠷᠢᠭ ᠦ᠋ᠳ ᠲᠣᠷ ᠢ᠋ᠶ᠋ᠠᠨ ᠰᠤᠷᠭᠠᠵᠤ ᠂ ᠲᠡᠳᠡᠨ ᠳ᠋ᠦ᠍ᠷ ᠪᠠᠰᠠ ᠮᠥᠨ ᠶᠣᠰᠣᠭᠠᠷ ᠬᠡᠯᠡᠭᠦᠯᠦᠭᠰᠡᠨ ᠲᠤᠯᠠ ᠡᠳᠡᠭᠡᠷ ᠴᠡᠷᠢᠭ ᠤ᠋ᠳ ᠣᠯᠠᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠠᠯᠳᠠᠷᠰᠢᠭᠤᠯᠤᠭᠰᠠᠨᠠ ᠰᠠᠷᠯᠠᠭ ᠤ᠋ᠨ ᠥᠪᠡᠷ ᠪᠤᠰᠤᠳ ᠤ᠋ᠨ ᠴᠡᠷᠢᠭ ᠴᠥᠮ ᠤᠷᠪᠠᠬᠤ ᠰᠡᠳᠬᠢᠯ ᠪᠠᠷᠢᠬᠤᠶᠠ ᠪᠠᠰᠠ ᠡᠨᠡ ᠪᠠᠢᠴᠠᠭᠠᠨ ᠨᠡᠩᠵᠢᠬᠦᠢ ᠳ᠋ᠦ᠍ᠷ ᠥᠪᠡᠷ ᠪᠤᠰᠤᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠡᠮᠳᠡᠭ ᠲᠢᠰᠡ ᠯᠡᠴᠡᠲᠦ ᠪᠠᠭᠯᠠᠭᠠ ᠪᠣᠭᠣᠳᠠᠯ ᠂ ᠠᠷᠠᠰᠤ ᠰᠢᠷᠢ ᠶ᠋ᠢ ᠣᠯᠤᠭᠠᠳ ᠣᠯᠠᠨ ᠴᠡᠷᠢᠭ ᠦ᠋ᠳ ᠨᠡᠩᠳᠡ ᠬᠢᠯᠢᠰᠳᠡᠨ ᠴᠢᠬᠤᠯᠳᠠᠵᠤ ᠪᠤᠷᠬᠢᠷᠠᠯᠳᠤᠨ ᠪᠥᠬᠥᠶᠡ ᠂ ᠲᠡᠷᠡ ᠵᠠᠭᠤᠨ ᠢᠯᠡᠭᠦᠦ ᠴᠡᠷᠢᠭ ᠡᠴᠡ ᠬᠣᠲᠠ ᠶ᠋ᠢᠨ ᠴᠡᠷᠢᠭ ᠰᠡᠮᠡᠬᠡᠷ ᠬᠣᠢᠲᠤ ᠬᠠᠭᠠᠯᠭᠠ ᠪᠠᠷ ᠬᠤᠯᠠᠭᠠᠢ ᠴᠡᠷᠢᠭ ᠭᠠᠷᠪᠠ ᠬᠡᠮᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠡᠨᠡ ᠯᠠᠪ ᠵᠠᠯᠢᠲᠤ ᠬᠠᠭᠠᠨ ᠵᠠᠯᠢᠬᠠᠢ ᠠᠷᠭᠠ ᠪᠠᠨ ᠬᠡᠷᠡᠭᠯᠡᠵᠦ ᠂ ᠡᠳ᠋ ᠢ᠋ ᠢᠨᠦ ᠥᠪᠡᠷ ᠢ᠋ᠶ᠋ᠡᠨ ᠠᠪᠤᠭᠠᠳ ᠨᠡᠷᠡ ᠶ᠋ᠢ ᠢᠨᠦ ᠮᠠᠨ ᠳ᠋ᠤ᠌ ᠨᠥᠮᠥᠷᠭᠡᠪᠡ ᠭᠡᠮᠡᠨ ᠪᠦᠭᠦᠳᠡᠭᠡᠷ ᠥᠷᠨᠢᠨ ᠦᠷᠭᠦᠭᠡᠳ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠂ ᠬᠣᠢᠲᠤ ᠬᠠᠭᠠᠯᠭᠠ ᠶ᠋ᠢᠨ ᠳᠣᠲᠣᠷᠠ ᠭᠠᠳᠠᠨᠠ ᠨᠢᠭᠡᠨᠲᠡ ᠰᠠᠮᠠᠭᠤᠷᠠᠨ ᠨᠡᠩᠵᠢᠭᠰᠡᠨᠡ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠡᠮᠳᠡᠭ ᠲᠢᠰᠡᠲᠦ ᠪᠣᠭᠣᠳᠠᠯ ᠪᠠᠭᠯᠠᠭᠠ ᠂ ᠠᠷᠠᠰᠤ ᠰᠢᠷᠢ ᠶ᠋ᠢ ᠢᠷᠡᠭᠰᠡᠨ ᠴᠡᠷᠢᠭ ᠪᠠ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠶ᠋ᠢᠨ ᠭᠡᠷ ᠡᠴᠡ ᠬᠡᠳᠦᠨ ᠠᠷᠪᠠ ᠡᠷᠢᠨ ᠭᠠᠷᠭᠠᠭᠠᠳ ᠰᠠᠭᠠᠷ ᠂ ᠳᠠᠷᠪᠡ ᠂ ᠤᠬᠠᠭᠠᠨᠲᠤ ᠭᠤᠷᠪᠠᠭᠤᠯᠠ ᠶ᠋ᠢᠨ ᠡᠭᠦᠳᠡᠨ ᠦ᠌ ᠡᠮᠦᠨᠡ ᠣᠪᠣᠭᠠᠯᠠᠵᠤ ᠬᠠᠰᠬᠢᠷᠤᠯᠳᠤᠨ ᠮᠠᠨ ᠤ᠋ ᠱᠠᠩ ᠤ᠋ᠨ ᠡᠳ᠋ ᠢ᠋ ᠲᠠ ᠪᠦᠷᠢᠨ ᠪᠤᠯᠢᠶᠠᠨ ᠠᠪᠬᠤ ᠪᠠᠷ ᠦᠯᠦ ᠪᠠᠷᠠᠨ ᠂ ᠬᠠᠷᠢᠨ ᠭᠡᠳᠡᠷᠭᠦ ᠮᠠᠨ ᠢ᠋ ᠭᠦᠵᠢᠷᠯᠡᠨ ᠭᠦᠳᠬᠡᠵᠦ ᠮᠥᠷ ᠢ᠋ ᠮᠠᠨ ᠤ᠋ ᠵᠦᠭ ᠬᠠᠢᠮᠤᠢ ᠃ ᠡᠨᠡ ᠮᠡᠲᠦ ᠥᠴᠦᠬᠡᠨ ᠢ᠋ᠶ᠋ᠡᠷ ᠶᠠᠭᠠᠬᠢᠨ ᠪᠢᠳᠡᠨ ᠦ᠌ ᠣᠯᠠᠨ ᠢ᠋ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠦᠭ ᠪᠠᠢᠯᠳᠤ ᠬᠡᠮᠡᠮᠦᠢ ? ᠬᠡᠮᠡᠯᠳᠦᠨ ᠶᠡᠬᠡᠯᠡ ᠪᠤᠷᠬᠢᠷᠠᠯᠳᠤᠨ ᠦᠢᠮᠡᠯᠳᠦᠵᠦ ᠂ ᠣᠯᠠᠨ ᠴᠡᠷᠢᠭ ᠲᠠᠷᠬᠠᠬᠤᠶᠠ ᠰᠢᠬᠠᠭᠰᠠᠨ ᠳ᠋ᠤᠷ ᠵᠠᠮᠤᠬᠠ ᠭᠡᠨᠡᠳᠲᠡ ᠡᠨᠡ ᠠᠷᠭᠠ ᠶ᠋ᠢ ᠮᠡᠳᠡᠵᠦ ᠶᠡᠬᠡᠯᠡ ᠰᠣᠴᠢᠵᠤ ᠂ ᠶᠠᠭᠠᠷᠠᠨ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠵᠠᠯᠢᠲᠤ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠷᠤᠨ : 《ᠡᠨᠡ ᠯᠠᠪ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠢᠳᠡᠨ ᠦ᠌ ᠣᠯᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠢ᠋ ᠵᠠᠪᠰᠠᠷᠳᠠᠭᠤᠯᠬᠤ ᠠᠷᠭᠠ ᠪᠣᠢ ᠶᠠ ᠃ ᠡᠭᠦᠨ ᠢ᠋ ᠯᠠᠪ ᠦᠨᠡᠮᠰᠢᠵᠦ ᠦᠯᠦ ᠪᠣᠯᠤᠮᠤᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠥᠭᠦᠯᠡᠷᠦᠨ :《ᠲᠡᠢᠮᠦ ᠪᠣᠯᠪᠠᠰᠤ ᠲᠡᠳᠡᠭᠡᠷ ᠡᠯᠴᠢ ᠪᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠲᠡᠷᠡ ᠮᠡᠲᠦ ᠬᠦᠨᠳᠦ ᠰᠢᠷᠬᠠᠲᠤᠭᠰᠠᠨ ᠢ᠋ ᠶᠠᠭᠤᠨ ᠬᠡᠮᠡᠮᠦᠢ ? 》ᠵᠠᠮᠤᠬᠠ ᠶᠠᠭᠠᠷᠠᠨ ᠠᠢᠯᠠᠳᠬᠠᠷᠤᠨ : 《ᠬᠡᠷᠡᠭ ᠦ᠋ᠨ ᠴᠢᠬᠤᠯᠠ ᠪᠠ ᠶᠡᠷᠦᠩᠬᠡᠢ ᠶ᠋ᠢ ᠦᠵᠡᠮᠦᠢ ᠂ ᠡᠢᠮᠦ ᠶᠡᠬᠡ ᠬᠡᠷᠡᠭ ᠲᠦ᠍ᠷ ᠨᠢᠭᠡᠨ ᠬᠡᠳᠦᠨ ᠴᠡᠷᠢᠭ ᠡᠪᠡᠷᠰᠢᠶᠡᠯ ᠢ᠋ ᠬᠦᠯᠢᠶᠡᠬᠦᠢ ᠳ᠋ᠦ᠍ᠷ ᠶᠠᠮᠪᠠᠷ ᠪᠡᠷᠬᠡ ᠠᠵᠢ ? ᠦᠨᠡᠨ ᠴᠦ᠍ ᠪᠣᠯᠪᠠ ᠂ ᠬᠤᠳᠠᠯ ᠴᠤ᠌ ᠪᠣᠯᠪᠠ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠪᠠᠷᠢᠵᠤ ᠭᠢᠨᠳᠠᠨ ᠳ᠋ᠤᠷ ᠬᠣᠷᠢᠭᠠᠳ ᠦᠯᠡᠭᠰᠡᠨ ᠵᠠᠭᠤᠭᠠᠳ ᠴᠡᠷᠢᠭ ᠢ᠋ ᠵᠠᠭᠤᠨ ᠲᠡᠰᠢ ᠰᠠᠯᠭᠠᠵᠤ ᠬᠦᠨᠳᠦ ᠡᠷᠡᠭᠦᠳᠡᠨ ᠦᠨᠡᠨ ᠢ᠋ ᠣᠯᠤᠭᠠᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠠᠪᠠᠴᠢᠵᠤ ᠂ ᠲᠡᠳᠡᠨ ᠦ᠌ ᠠᠮᠠᠨ ᠢ᠋ᠶ᠋ᠡᠷ ᠠᠨᠤ ᠲᠣᠭᠠᠴᠢᠭᠤᠯᠵᠤ ᠂ ᠪᠢᠳᠡᠨ ᠦ᠌ ᠣᠯᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠢ᠋ ᠲᠦᠷᠭᠡᠨᠡ ᠲᠣᠬᠣᠷᠤᠭᠤᠯᠤᠨ ᠲᠣᠭᠲᠠᠨᠢᠭᠤᠯᠬᠤ ᠠᠨᠤ ᠴᠢᠬᠤᠯᠠ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠰᠠᠶᠢ ᠰᠡᠬᠡᠰᠬᠢᠵᠦ ᠳᠠᠷᠤᠢ ᠡᠨᠡ ᠶᠣᠰᠣᠭᠠᠷ ᠠᠪᠠᠴᠢᠰᠤᠭᠠᠢ ᠭᠡᠮᠡᠨ ᠵᠠᠮᠤᠬᠠ ᠶ᠋ᠢ ᠭᠠᠷᠭᠠᠵᠤ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠪᠠ ᠴᠡᠷᠢᠭ ᠦ᠋ᠳ ᠢ᠋ ᠴᠥᠮ ᠪᠡᠷᠢ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠲᠠᠯᠠ ᠵᠠᠮᠤᠬᠠ ᠪᠠᠰᠠ ᠶᠠᠭᠠᠷᠠᠨ ᠰᠠᠨᠳᠤᠷᠤᠨ ᠡᠭᠡᠵᠦ ᠣᠷᠣᠵᠤ ᠢᠷᠡᠬᠦᠶᠡ ᠂ ᠵᠠᠷᠯᠢᠭ ᠤᠯᠠᠮᠵᠢᠯᠠᠬᠤ ᠬᠥᠮᠦᠨ ᠦ᠌ ᠬᠡᠬᠦᠳᠡᠩ ᠢ᠋ ᠮᠥᠷᠭᠥᠵᠦ ᠂ ᠬᠣᠶᠠᠭᠤᠯᠠ ᠬᠣᠶᠠᠷ ᠳᠠᠰᠢ ᠤᠨᠠᠵᠤ ᠵᠠᠮᠤᠬᠠ ᠪᠠᠰᠠ ᠶᠠᠭᠠᠷᠠᠨ ᠭᠦᠶᠦᠨ ᠪᠣᠰᠴᠤ ᠵᠠᠷᠯᠢᠭ ᠤᠯᠠᠮᠵᠢᠯᠠᠬᠤ ᠶ᠋ᠢ ᠮᠡᠳᠡᠵᠦ ᠂ ᠪᠠᠰᠠ ᠲᠡᠷᠡ ᠲᠦᠰᠢᠮᠡᠯ ᠦ᠋ᠨ ᠭᠠᠷ ᠠ᠋ᠴᠠ ᠲᠠᠲᠠᠭᠰᠠᠭᠠᠷ ᠲᠥᠷᠥ ᠳ᠋ᠦ᠍ᠷ ᠣᠷᠣᠵᠤ ᠶᠠᠭᠠᠷᠠᠨ ᠮᠥᠷᠭᠥᠵᠦ ᠠᠢᠯᠠᠳᠬᠠᠬᠤᠶᠠ ᠂ ᠬᠡᠲᠦᠷᠬᠡᠶᠡ ᠶᠠᠭᠠᠷᠠᠭᠰᠠᠨ ᠲᠤᠯᠠ ᠬᠡᠯᠡᠨ ᠢᠨᠦ ᠲᠠᠲᠠᠵᠤ ᠭᠠᠭᠴᠠ 《ᠪᠠᠢ ᠪᠠᠢ ᠂ ᠪᠠᠢᠵᠠ ᠪᠠᠢᠵᠠ 》ᠭᠡᠮᠡᠨ ᠪᠠᠰᠠ 《ᠣ ᠣ ᠣ ᠂ ᠤᠷᠢᠳᠠ ᠂ ᠲᠡ ᠲᠡ ᠲᠡ ᠲᠡ ᠲᠡᠮᠦᠵᠢᠨ ᠢ᠋ ᠠᠯᠠᠶᠠ ᠂ ᠬᠡᠷ ᠬᠡᠷ ᠂ ᠬᠡᠷᠪᠡ ᠲᠡᠭᠦᠨ ᠦ᠌ ᠡᠯᠴᠢ ᠶ᠋ᠢ ᠪᠠ ᠪᠠ ᠂ ᠪᠠᠷᠢᠪᠠᠰᠤ ᠂ ᠲᠡ ᠲᠡ ᠲᠡᠮᠦᠵᠢᠨ ᠰᠡᠵᠢᠭᠯᠡᠮᠦᠢ ! 》ᠬᠡᠮᠡᠵᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠪᠠᠷᠢᠭᠤᠯᠬᠤ ᠶ᠋ᠢ ᠪᠠᠢᠯᠭᠠᠪᠠ ᠃ ᠡᠭᠦᠨ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠪᠠᠰᠠ ᠵᠠᠪᠰᠠᠷ ᠭᠠᠷᠴᠤ ᠰᠢᠳᠠᠷ ᠬᠥᠮᠦᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠵᠤ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠪᠣᠯᠭᠣᠭᠠᠭᠴᠢ ᠪᠣᠯᠭᠠᠨ ᠢᠯᠡᠭᠡᠵᠦ ᠪᠠᠢᠳᠠᠯ ᠢ᠋ ᠠᠨᠤ ᠲᠡᠩᠰᠡᠭᠦᠯᠦᠨ ᠲᠤᠷᠰᠢᠭᠤᠯᠪᠠᠰᠤ ᠂ ᠬᠠᠷᠢᠭᠤ ᠢᠷᠡᠵᠦ ᠮᠡᠳᠡᠭᠦᠯᠬᠦ ᠢᠨᠦ :《ᠲᠡᠷᠢᠭᠦᠨ ᠡᠯᠴᠢ ᠵᠡᠯᠮᠡ ᠬᠡᠮᠡᠭᠴᠢ ᠨᠢᠭᠡᠨᠲᠡ ᠬᠦᠨᠳᠦᠳᠡᠵᠦ ᠦᠬᠦᠬᠦ ᠣᠢᠷᠠᠲᠤᠪᠠ ᠃ ᠮᠡᠳᠡᠭᠡ ᠰᠡᠭᠡᠭᠡ ᠦᠭᠡᠢ ᠪᠣᠯᠵᠤᠬᠤᠢ ᠃ ᠳᠣᠣᠷᠠᠲᠤ ᠴᠡᠷᠢᠭ ᠦ᠋ᠨ ᠠᠷᠠᠳ ᠤ᠋ᠨ ᠰᠢᠷᠬᠠᠳᠤᠭᠰᠠᠨ ᠠᠨᠤ ᠮᠠᠰᠢ ᠦᠨᠡᠨ ᠂ ᠶᠣᠢᠯᠠᠵᠤ ᠬᠡᠪᠲᠡᠵᠦ ᠪᠣᠢ ᠂ ᠵᠠᠷᠢᠮ ᠦᠬᠦᠭᠰᠡᠨ ᠴᠦ᠍ ᠮᠥᠨ ᠪᠣᠢ ᠂ ᠣᠢᠷᠠᠯᠴᠠᠭᠠ ᠪᠦᠬᠦᠢ ᠮᠠᠨ ᠤ᠋ ᠢᠷᠭᠡᠨ ᠡᠴᠡ ᠠᠰᠠᠭᠤᠪᠠᠰᠤ ᠂ ᠥᠷᠯᠥᠭᠡ ᠦᠳᠡᠰᠢ ᠦᠬᠦᠭᠰᠡᠨ ᠠᠷᠠᠳ ᠢ᠋ᠶ᠋ᠠᠨ ᠠᠷᠠᠰᠤ ᠬᠥᠷᠥᠰᠥ ᠂ ᠪᠥᠰ ᠪᠠ ᠳᠡᠪᠡᠯ ᠬᠥᠨᠵᠢᠯᠡ ᠪᠡᠷ ᠣᠷᠢᠶᠠᠨ ᠭᠠᠷᠭᠠᠭᠰᠠᠨ ᠢ᠋ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠦᠵᠡᠪᠡ ᠂ ᠯᠠᠪ ᠠᠷᠪᠠᠭᠠᠳ ᠰᠢᠬᠠᠮ ᠪᠣᠯᠪᠠ ᠬᠡᠮᠡᠮᠦᠢ ᠃ ᠬᠠᠭᠠᠯᠭᠠᠨ ᠤ᠋ ᠲᠦᠰᠢᠮᠡᠯ ᠡᠴᠡ ᠪᠠᠢᠴᠠᠭᠠᠪᠠᠰᠤ ᠮᠥᠨ ᠨᠢᠭᠡᠨ ᠠᠳᠠᠯᠢ ᠪᠠᠢᠳᠠᠯ ᠢ᠋ ᠦᠵᠡᠪᠡᠰᠦ ᠳᠡᠮᠡᠢ ᠥᠪᠡᠷ ᠵᠠᠭᠤᠷᠠ ᠪᠠᠨ ᠰᠢᠷᠬᠠ ᠭᠠᠷᠭᠠᠭᠰᠠᠨ ᠳᠦᠷᠢᠮ ᠦᠭᠡᠢ ᠂ ᠪᠠᠰᠠ ᠪᠦᠭᠦᠳᠡᠭᠡᠷ ᠦ᠋ᠨ ᠬᠡᠯᠡᠬᠦ ᠢᠨᠦ ᠰᠠᠷᠯᠠᠭ ᠤᠯᠤᠰ ᠲᠤᠷ ᠦᠬᠦᠰᠦᠭᠡᠢ ᠂ ᠬᠡᠷᠬᠢᠨ ᠡᠵᠡᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠤᠴᠠᠷᠠᠮᠤᠢ ᠬᠡᠮᠡᠯᠳᠦᠮᠦᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠯᠢᠲᠤ ᠬᠠᠭᠠᠨ ᠤ᠋ ᠰᠡᠵᠢᠭᠯᠡᠬᠦ ᠰᠡᠳᠬᠢᠯ ᠨᠠᠢ᠍ᠮᠠᠨ ᠶᠢᠰᠦᠨ ᠬᠤᠪᠢ ᠬᠤᠭᠤᠷᠠᠭᠠᠳ ᠵᠠᠮᠤᠬᠠ ᠶ᠋ᠢ ᠪᠠᠬᠠᠨ ᠵᠢᠪᠡᠭᠦᠷᠡᠬᠦ ᠰᠡᠳᠬᠢᠯ ᠲᠥᠷᠥᠪᠡ ᠃ ᠡᠨᠡ ᠦᠵᠡᠰᠡ ᠵᠠᠯᠮᠠ ᠨᠢᠭᠡᠨᠲᠡ ᠮᠡᠳᠡᠭᠡ ᠰᠡᠭᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠵᠥᠪᠯᠡᠵᠦ ᠠᠷᠭᠠᠯᠠᠭᠠᠳ ᠥᠷᠯᠥᠭᠡ ᠦᠳᠡᠰᠢ ᠠᠮᠢᠳᠤ ᠴᠡᠷᠢᠭ ᠢ᠋ᠶ᠋ᠡᠨ ᠦᠬᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠵᠤ ᠂ ᠪᠥᠰ ᠠᠷᠠᠰᠤ ᠪᠠᠷ ᠣᠷᠢᠶᠠᠨ ᠬᠣᠲᠠ ᠶ᠋ᠢᠨ ᠬᠠᠭᠠᠯᠭᠠ ᠪᠠᠷ ᠳᠠᠮᠨᠠᠨ ᠭᠠᠷᠭᠠᠵᠤ ᠤᠯᠤᠰ ᠤ᠋ᠨ ᠵᠦᠭ ᠢ᠋ᠶ᠋ᠡᠨ ᠶᠠᠪᠤᠭᠤᠯᠵᠤ ᠮᠡᠳᠡᠭᠡ ᠬᠦᠷᠭᠡᠭᠦᠯᠬᠦ ᠠᠵᠤᠭᠤ ᠃ ᠡᠭᠦᠨ ᠳ᠋ᠦ᠍ᠷ ᠰᠠᠷᠯᠠᠭ ᠤ᠋ᠨ ᠠᠷᠠᠳ ᠮᠠᠰᠢ ᠦᠨᠡᠮᠰᠢᠵᠦ ᠂ ᠡᠵᠡᠨ ᠢᠨᠦ ᠴᠡᠷᠢᠭ ᠢ᠋ᠶ᠋ᠡᠨ ᠰᠡᠵᠢᠭᠯᠡᠵᠦ ᠂ ᠴᠡᠷᠢᠭ ᠢᠨᠦ ᠡᠵᠡᠨ ᠢ᠋ᠶ᠋ᠡᠨ ᠰᠡᠵᠢᠭᠯᠡᠨ ᠡᠭᠦᠰᠬᠡᠵᠦᠬᠦᠢ ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠭᠠᠳᠠᠨᠠ ᠠ᠋ᠴᠠ ᠵᠠᠮᠤᠬᠠ ᠰᠡᠵᠢᠭᠯᠡᠵᠦ ᠰᠠᠨᠠᠪᠠᠴᠤ ᠵᠠᠯᠢᠲᠤ ᠬᠠᠭᠠᠨ ᠳᠡᠮᠡᠢ ᠰᠡᠵᠢᠭᠯᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠮᠥᠨ ᠳᠡᠮᠡᠢ ᠬᠦᠴᠦᠨ ᠦᠭᠡᠢ ᠂ ᠳᠣᠲᠣᠭᠠᠳᠤ ᠠ᠋ᠴᠠ ᠬᠠᠨᠳᠠᠭᠠᠢ ᠲᠦᠰᠢᠮᠡᠯ ᠨᠡᠪᠲᠡ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠬᠠᠭᠠᠨ ᠳ᠋ᠤᠷ ᠢ᠋ᠶ᠋ᠠᠨ ᠪᠠᠷᠠᠯᠬᠠᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠵᠦᠭ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠪᠣᠳᠣᠷᠤᠨ : ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠮᠥᠬᠥᠬᠦ ᠢᠨᠦ ᠨᠢᠳᠦᠨ ᠦ᠌ ᠡᠮᠦᠨᠡ ᠪᠣᠯᠪᠠ ᠂ ᠤᠯᠤᠰ ᠢ᠋ ᠬᠡᠳᠦᠢ ᠠᠪᠤᠷᠠᠬᠤ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠭᠡᠷ ᠢ᠋ᠶ᠋ᠡᠨ ᠮᠥᠨ ᠬᠠᠮᠠᠭᠠᠯᠠᠪᠠᠰᠤ ᠪᠣᠯᠤᠮᠤᠢ ᠬᠡᠮᠡᠭᠡᠳ ᠡᠵᠡᠨ ᠢ᠋ᠶ᠋ᠡᠨ ᠵᠦᠭ ᠬᠠᠨᠳᠤᠵᠤ ᠶᠢᠰᠦᠨ ᠵᠡᠷᠭᠡ ᠤᠬᠢᠯᠠᠨ ᠮᠥᠷᠭᠥᠭᠡᠳ ᠰᠥᠨᠢ ᠳᠠᠷᠤᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ ᠬᠤᠳᠠᠭᠠᠨᠠ ᠪᠡᠬᠢ ᠳ᠋ᠦ᠍ᠷ ᠰᠡᠮᠡᠬᠡᠷ ᠳᠣᠬᠢᠶᠠ ᠥᠭᠴᠦ ᠰᠤᠯᠠ ᠠᠷᠠᠳ ᠢ᠋ ᠬᠣᠯᠠ ᠵᠠᠢᠯᠠᠭᠤᠯᠤᠭᠠᠳ ᠬᠤᠳᠠᠭᠠᠨᠠ ᠪᠡᠬᠢ ᠵᠠᠯᠮᠠ ᠬᠣᠶᠠᠭᠤᠯᠠ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ : 《ᠲᠠ ᠬᠣᠶᠠᠭᠤᠯᠠ ᠡᠷᠭᠢᠨ ᠡᠯᠴᠢ ᠪᠡᠷ ᠨᠢᠳᠦ ᠢᠨᠦ ᠶᠠᠭᠤᠲᠠᠢ ᠶᠡᠬᠡ ᠪᠣᠢ ᠂ ᠦᠨᠡᠬᠡᠷ ᠮᠠᠨ ᠤ᠋ ᠰᠠᠷᠯᠠᠭ ᠤᠯᠤᠰ ᠲᠤᠷ ᠨᠢᠭᠡᠬᠡᠨ ᠴᠦ᠍ ᠬᠥᠮᠦᠨ ᠦᠭᠡᠢ ᠪᠡᠷ ᠦᠵᠡᠵᠦᠬᠦᠢ ᠃ ᠮᠢᠩᠭᠠᠨ ᠠᠴᠢᠶᠠ ᠡᠪᠡᠰᠦ ᠪᠡᠷ ᠮᠠᠨ ᠤ᠋ ᠤᠯᠤᠰ ᠢ᠋ ᠬᠤᠢᠬᠠᠯᠠᠪᠠ ᠬᠡᠮᠡᠮᠦᠢ ᠦᠦ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠂ ᠬᠤᠳᠠᠭᠠᠨᠠ ᠪᠡᠬᠢ ᠂ ᠵᠠᠯᠮᠠ ᠂ ᠬᠣᠶᠠᠭᠤᠯᠠ ᠶᠡᠬᠡᠯᠡ ᠠᠶᠤᠪᠠᠢ ᠃ ᠬᠡᠷᠬᠢᠬᠦ ᠪᠣᠯᠪᠠ ᠂ ᠳᠠᠷᠠᠭᠠ ᠪᠦᠯᠦᠭ ᠲᠣᠷ ᠦᠵᠡᠭᠳᠡᠬᠦᠢ ᠃
ᠠᠭᠤᠯᠠᠨ ᠤ᠋ ᠭᠠᠳᠠᠨᠠᠬᠢ ᠬᠥᠬᠡ ᠠᠭᠤᠯᠠ
ᠠᠰᠠᠷ ᠤ᠋ᠨ ᠴᠠᠭᠠᠨᠠᠬᠢ ᠠᠰᠠᠷ ᠂
ᠠᠷᠭᠠ ᠶ᠋ᠢᠨ ᠳᠣᠲᠣᠷᠠᠬᠢ ᠤᠷᠠᠨ ᠠᠷᠭᠠ
ᠠᠰᠢᠭ ᠳᠡᠭᠡᠷᠡ ᠠᠰᠢᠭ᠋ ᠃
ᠠᠭᠤᠷ ᠤ᠋ᠨ ᠬᠣᠢᠨᠠᠬᠢ ᠬᠠᠯᠠᠭᠤᠨ ᠠᠭᠤᠷ
ᠠᠳᠬᠠᠭ ᠤ᠋ᠨ ᠲᠤᠢᠯ ᠤ᠋ᠨ ᠠᠳᠬᠠᠭ ᠂
ᠠᠮᠠᠷᠠᠭ ᠤ᠋ᠨ ᠡᠮᠦᠨᠡᠬᠢ ᠬᠡᠢᠳᠡᠮ ᠠᠮᠠᠷᠠᠭ
ᠠᠶᠤᠯᠲᠠᠢ ᠪᠥᠭᠡᠳ ᠠᠶᠤᠯᠲᠠᠢ !
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠳ᠋ᠦᠷ ᠨᠢᠭᠡᠨ ᠨᠠᠷᠠᠨ ᠂ ᠨᠢᠭᠡᠨ ᠰᠠᠷᠠᠨ ᠬᠣᠶᠠᠷ ᠭᠡᠷᠡᠯ ᠬᠣᠶᠠᠷ ᠰᠡᠭᠦᠳᠡᠷ ᠲᠡᠢ ᠂ ᠵᠢᠷᠭᠤᠭᠠᠨ ᠳᠦᠷᠰᠦ ᠪᠤᠶᠤ ᠃ ᠨᠠᠷᠠᠨ ᠠᠪᠠᠰᠤ ᠭᠡᠷᠡᠯ ᠠᠮᠤᠢ ᠂ ᠭᠡᠷᠡᠯ ᠠᠪᠠᠰᠤ ᠰᠡᠭᠦᠳᠡᠷ ᠠᠮᠤᠢ ᠂ ᠰᠠᠷᠠᠨ ᠠᠪᠠᠰᠤ ᠲᠤᠶᠠᠭᠠ ᠠᠮᠤᠢ ᠂ ᠲᠤᠶᠠᠭᠠ ᠠᠪᠠᠰᠤ ᠪᠠᠰᠠ ᠰᠡᠭᠦᠳᠡᠷ ᠠᠮᠤᠢ ᠂ ᠭᠠᠭᠴᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠢᠨᠦ ᠮᠠᠰᠢ ᠬᠤᠷᠴᠠ ᠶ᠋ᠢᠨ ᠲᠤᠯᠠ ᠰᠡᠭᠦᠳᠡᠷ ᠮᠥᠨ ᠲᠣᠳᠣᠷᠬᠠᠢ ᠂ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠠᠨᠤ ᠡᠭᠡᠨᠡᠭᠲᠡ ᠪᠦᠳᠡᠭᠢ ᠲᠤᠯᠠᠳᠠ ᠰᠡᠭᠦᠳᠡᠷ ᠮᠥᠨ ᠪᠠᠯᠠᠷᠬᠠᠢ ᠃ ᠦᠯᠢᠭᠡᠷᠯᠡᠪᠡᠰᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠠᠢᠽᠦ ᠨᠠᠷᠠᠨ ᠪᠣᠯᠤᠭᠠᠳ ᠵᠢᠨᠦᠩ ᠮᠤᠬᠤᠯᠢ ᠠᠨᠤ ᠭᠡᠷᠡᠯ ᠪᠣᠯᠤᠭᠰᠠᠨ ᠲᠤᠯᠠ ᠰᠠᠢᠳ ᠵᠠᠯᠮᠠ ᠢᠨᠦ ᠰᠡᠭᠦᠳᠡᠷ ᠪᠣᠯᠵᠤᠬᠤᠢ ᠃ ᠡᠨᠡ ᠭᠤᠷᠪᠠᠭᠤᠯᠠ ᠬᠡᠷᠬᠢᠪᠡᠴᠦ ᠬᠠᠭᠠᠴᠠᠰᠢ ᠦᠭᠡᠢ ᠮᠡᠲᠦ ᠳ᠋ᠦ᠍ᠷ ᠴᠢᠨᠠᠳᠤ ᠳ᠋ᠤᠷ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠠᠯᠢᠲᠤ ᠬᠠᠭᠠᠨ ᠰᠠᠷᠠᠨ ᠪᠣᠯᠤᠭᠠᠳ ᠵᠠᠮᠤᠬᠠ ᠵᠤᠯᠪᠢᠨ ᠲᠤᠶᠠᠭᠠ ᠪᠣᠯᠤᠭᠰᠠᠨ ᠲᠤᠯᠠ ᠲᠦᠰᠢᠮᠡᠯ ᠬᠠᠨᠳᠠᠭᠠᠢ ᠠᠨᠤ ᠰᠡᠭᠦᠳᠡᠷ ᠪᠣᠯᠵᠤᠬᠤᠢ ᠃ ᠵᠢᠴᠢ ᠰᠠᠷᠠᠨ ᠬᠡᠮᠡᠭᠴᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ᠷ ᠰᠠᠶᠢ ᠭᠢᠯᠲᠦᠭᠡᠨᠡᠵᠦ ᠲᠤᠶᠠᠭᠠ ᠰᠠᠴᠤᠷᠠᠬᠤ ᠲᠤᠯᠠ ᠡᠭᠡᠨᠡᠭᠲᠡ ᠪᠠᠰᠠ ᠬᠦ᠌ ᠨᠠᠷᠠᠨ ᠤ᠋ ᠰᠢᠯᠲᠠᠭᠠᠨ ᠮᠡᠲᠦ ᠂ ᠵᠠᠯᠢᠲᠤ ᠬᠠᠭᠠᠨ ᠲᠠᠢᠽᠦ ᠶ᠋ᠢᠨ ᠣᠴᠢᠷᠠ ᠰᠠᠶᠢ ᠢᠯᠡᠷᠡᠵᠦ ᠲᠣᠭᠠᠴᠢᠨ ᠬᠡᠯᠡᠬᠦ ᠲᠤᠯᠠ ᠡᠴᠦᠰ ᠲᠦ᠍ᠷ ᠮᠥᠨ ᠬᠦ᠌ ᠲᠠᠢᠽᠦ ᠶ᠋ᠢᠨ ᠤᠴᠢᠷ ᠲᠤᠷ ᠪᠤᠰᠤ ᠤᠤ ? ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠲᠠᠢᠽᠦ ᠨᠠᠷᠠᠨ ᠪᠣᠯᠤᠭᠠᠳ ᠵᠠᠯᠢᠲᠤ ᠰᠠᠷᠠᠨ ᠪᠣᠯᠵᠤᠬᠤᠢ ᠃ ᠭᠠᠭᠴᠠ ᠬᠦ᠌ ᠨᠠᠷᠠᠨ ᠤ᠋ ᠶᠠᠪᠤᠬᠤ ᠶ᠋ᠢ ᠲᠣᠭᠲᠠᠭᠠᠨ ᠬᠡᠮᠵᠢᠵᠦ ᠴᠠᠭ ᠮᠥᠴᠡ ᠰᠡᠭᠦᠳᠡᠷ ᠬᠡᠮᠵᠢᠶᠡ ᠲᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠬᠡᠳᠦᠢᠪᠡᠷ ᠪᠣᠳᠠᠰ ᠤ᠋ᠨ ᠰᠡᠭᠦᠳᠡᠷ ᠢ᠋ᠶ᠋ᠡᠷ ᠪᠣᠯᠪᠠᠴᠤ ᠴᠠᠭ ᠢ᠋ ᠮᠡᠳᠡᠵᠦ ᠪᠣᠯᠤᠮᠤᠢ ᠃ ᠰᠠᠷᠠᠨ ᠤ᠋ ᠶᠠᠪᠤᠬᠤ ᠤᠳᠠᠭᠠᠨ ᠤ᠋ ᠣᠴᠢᠷᠠ ᠡᠳᠦᠷ ᠲᠣᠭᠲᠠᠮ ᠬᠣᠵᠢᠳᠠᠨ ᠬᠣᠴᠣᠷᠬᠤᠶᠠ ᠣᠷᠬᠢᠭ᠍ᠰᠠᠨ ᠲᠤᠯᠠᠳᠠ ᠬᠡᠳᠦᠢᠪᠡᠷ ᠭᠠᠷᠬᠤ ᠤᠨᠠᠬᠤ ᠳ᠋ᠤᠷ ᠬᠡᠮᠵᠢᠶᠡ ᠲᠡᠢ ᠪᠥᠭᠡᠲᠡᠯᠡ ᠴᠠᠭ ᠢ᠋ ᠮᠡᠳᠡᠬᠦᠶᠡ ᠪᠡᠷᠬᠡ ᠂ ᠲᠡᠢᠨ ᠬᠦ᠌ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠰᠡᠭᠦᠳᠡᠷ ᠪᠣᠯᠤᠭᠰᠠᠨ ᠵᠠᠯᠮᠠ ᠪᠠᠷ ᠬᠡᠪᠴᠢᠶᠡᠨ ᠢ᠋ ᠣᠯᠤᠨ ᠬᠡᠷᠡᠭ ᠪᠦᠲᠦᠭᠡᠨ ᠴᠢᠳᠠᠭᠠᠳ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠰᠡᠭᠦᠳᠡᠷ ᠪᠣᠯᠤᠭᠰᠠᠨ ᠂ ᠬᠠᠨᠳᠠᠭᠠᠢ ᠪᠠᠷ ᠲᠡᠮᠳᠡᠭᠯᠡᠬᠦᠶᠡ ᠬᠢᠯᠪᠠᠷ ᠂ ᠰᠠᠷᠠᠨ ᠤ᠋ ᠰᠡᠭᠦᠳᠡᠷ ᠢ᠋ ᠲᠣᠭᠲᠠᠭᠠᠬᠤᠶᠠ ᠪᠡᠷᠬᠡ ᠡᠴᠡ ᠶᠠᠭᠤᠨ ᠥᠭᠡᠷᠡ ? ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠭᠡᠷᠡᠯ ᠪᠣᠯᠤᠭᠰᠠᠨ ᠮᠤᠬᠤᠯᠢ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠪᠣᠳᠣᠯᠭᠠ ᠥᠴᠦᠬᠡᠨ ᠴᠦ᠍ ᠡᠰᠡ ᠰᠢᠯᠵᠢᠭᠦᠯᠦᠨ ᠬᠠᠷᠢᠨ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠭᠡᠷᠡᠯ ᠪᠣᠯᠤᠭᠰᠠᠨ ᠵᠠᠮᠤᠬᠠ ᠶ᠋ᠢᠨ ᠤᠨᠤᠭᠰᠠᠨ ᠪᠣᠳᠣᠯᠭᠠ ᠭᠡᠨᠡᠳᠲᠡ ᠬᠠᠷᠢᠨ ᠠᠯᠳᠠᠭᠰᠠᠨ ᠠᠨᠤ ᠨᠠᠷᠠᠨ ᠤ᠋ ᠭᠡᠷᠡᠯ ᠦ᠋ᠨ ᠲᠣᠭᠲᠠᠭᠰᠠᠨ ᠬᠡᠮᠵᠢᠶᠡ ᠪᠠ ᠰᠠᠷᠠᠨ ᠤ᠋ ᠭᠡᠷᠡᠯ ᠦ᠋ᠨ ᠪᠣᠯᠵᠣᠭᠠ ᠦᠭᠡᠢ ᠡᠴᠡ ᠶᠠᠮᠪᠠᠷ ᠥᠭᠡᠷᠡ ᠪᠣᠢ ! ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠨᠠᠷᠠᠨ ᠪᠣᠯᠤᠭᠰᠠᠨ ᠲᠠᠢᠽᠦ ᠡᠭᠦᠷᠢᠳᠡ ᠲᠥᠪ ᠭᠡᠭᠡᠬᠡᠨ ᠦ᠌ ᠲᠤᠯᠠ ᠨᠠᠷᠠᠨ ᠳ᠋ᠤᠷ ᠦᠯᠢᠳᠬᠡᠪᠡ ᠃ ᠲᠡᠷᠡ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠰᠠᠷᠠᠨ ᠪᠣᠯᠤᠭᠰᠠᠨ ᠵᠠᠯᠢᠲᠤ ᠡᠭᠡᠨᠡᠭᠲᠡ ᠲᠣᠳᠣᠷᠬᠠᠢ ᠦᠭᠡᠢ ᠶ᠋ᠢᠨ ᠣᠴᠢᠷᠠ ᠰᠠᠷᠠᠨ ᠳ᠋ᠤᠷ ᠦᠯᠢᠳᠬᠡᠪᠡ ᠂ ᠡᠨᠡ ᠵᠢᠷᠭᠤᠭᠤᠯᠠ ᠦᠵᠡᠬᠦᠢ ᠳ᠋ᠦ᠍ᠷ ᠬᠡᠳᠦᠢ ᠵᠢᠷᠭᠤᠭᠠᠨ ᠥᠭᠡᠷᠡ ᠪᠣᠯᠪᠠᠴᠤ ᠦᠨᠳᠦᠰᠦᠨ ᠢᠨᠦ ᠡᠭᠡᠨᠡᠭᠲᠡ ᠨᠢᠭᠡᠬᠡᠨ ᠨᠠᠷᠠᠨ ᠳ᠋ᠤᠷ ᠢᠲᠡᠭᠡᠭᠰᠡᠨ ᠮᠡᠲᠦ ᠃ ᠡᠳᠡᠭᠡᠷ ᠬᠥᠮᠦᠨ ᠦᠵᠡᠬᠦᠢ ᠳ᠋ᠦ᠍ᠷ ᠥᠪᠡᠷᠡ ᠥᠪᠡᠷᠡ ᠪᠣᠯᠪᠠᠴᠤ ᠡᠴᠦᠰ ᠲᠦ᠍ᠷ ᠪᠠᠰᠠ ᠬᠦ᠌ ᠭᠠᠭᠴᠠ ᠲᠠᠢᠽᠦ ᠶ᠋ᠢᠨ ᠣᠴᠢᠷᠠ ᠲᠡᠮᠳᠡᠭᠯᠡᠵᠦᠬᠦᠢ ᠃ ᠬᠡᠷᠪᠡ ᠲᠠᠢᠽᠦ ᠨᠢᠭᠡᠨ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠡᠰᠡ ᠨᠡᠭᠡᠭᠡᠭᠰᠡᠨ ᠪᠥᠭᠡᠰᠦ ᠂ ᠬᠡᠨ ᠡᠳᠡᠭᠡᠷ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠠᠯᠢᠲᠤ ᠮᠠᠯᠢᠲᠤ ᠶ᠋ᠢ ᠲᠡᠮᠳᠡᠭᠯᠡᠬᠦ ᠠᠵᠢ ! ᠡᠨᠡ ᠳᠠᠷᠤᠢ ᠨᠢᠭᠡᠬᠡᠨ ᠨᠠᠷᠠᠨ ᠣᠭᠲᠠᠷᠭᠤᠢ ᠳ᠋ᠤᠷ ᠮᠠᠨᠳᠤᠨ ᠭᠠᠷᠪᠠᠰᠤ ᠂ ᠲᠦᠮᠡᠨ ᠪᠣᠳᠠᠰ ᠰᠡᠭᠦᠳᠡᠷ ᠲᠡᠢ ᠪᠣᠯᠬᠤ ᠮᠡᠲᠦ ᠪᠤᠰᠤ ᠤᠤ ? ᠠᠯᠢᠨ ᠤ᠋ ᠰᠡᠭᠦᠳᠡᠷ ᠪᠣᠯᠪᠠᠴᠤ ᠡᠴᠦᠰ ᠲᠦ᠍ᠷ ᠨᠢᠭᠡᠬᠡᠨ ᠨᠠᠷᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠲᠤᠯᠠ ᠡᠳᠡᠭᠡᠷ ᠢ᠋ ᠲᠣᠭᠠᠴᠢᠬᠤ ᠲᠦᠭ ᠲᠦᠮᠡᠨ ᠬᠥᠮᠦᠨ ᠨᠡᠢᠲᠡ ᠪᠡᠷ ᠴᠥᠮ ᠲᠠᠢᠽᠦ ᠶ᠋ᠢᠨ ᠨᠢᠭᠡᠬᠡᠨ ᠬᠥᠮᠦᠨ ᠦ᠌ ᠭᠡᠷᠡᠯ ᠳ᠋ᠦ᠍ᠷ ᠰᠢᠲᠦᠭᠳᠡᠵᠦ ᠂ ᠡᠨᠡ ᠣᠷᠴᠢᠯᠠᠩ ᠳ᠋ᠤᠷ ᠬᠣᠴᠣᠷᠤᠭᠰᠠᠨ ᠲᠤᠯᠠ ᠦᠨᠡᠬᠡᠷ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠨᠡᠢᠭᠡᠮ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠭᠰᠡᠨ ᠨᠢᠭᠡᠨ ᠵᠠᠭᠤᠨ ᠵᠢᠷᠠᠨ ᠬᠣᠶᠠᠷ ᠵᠢᠯ ᠪᠠ ᠡᠳᠦᠭᠡ ᠳᠣᠯᠣᠭᠠᠨ ᠵᠠᠭᠤᠨ ᠠᠷᠪᠠᠨ ᠣᠨ ᠪᠣᠯᠤᠭᠰᠠᠨ ᠮᠣᠩᠭᠣᠯ ᠲᠣᠭᠠᠲᠠᠨ ᠨᠡᠢᠲᠡ ᠪᠡᠷ ᠦ᠋ᠨ ᠨᠠᠷᠠᠨ ᠪᠣᠯᠠᠢ ᠃ ᠠᠶᠠ ᠬᠡᠳᠦᠢᠪᠡᠷ ᠤᠯᠤᠰ ᠪᠦᠷᠢ ᠶ᠋ᠢᠨ ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠨ ᠲᠠᠢᠽᠦ ᠪᠦᠬᠦᠨ ᠴᠥᠮ ᠬᠢᠯᠪᠠᠷ ᠦᠭᠡᠢ ᠬᠡᠮᠡᠪᠡᠴᠦ ᠡᠨᠡ ᠶᠤᠸᠠᠨ ᠲᠠᠢᠽᠦ ᠮᠡᠲᠦ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠳ᠋ᠤᠷ ᠠᠳᠠᠯᠢ ᠭᠡᠭᠡᠬᠡᠨ ᠲᠣᠳᠣᠷᠬᠠᠢ ᠠᠶᠤᠮᠰᠢᠭ᠍ᠲᠠᠢ ᠰᠦᠷᠡᠬᠡᠢ ᠢᠨᠦ ᠮᠠᠰᠢ ᠴᠥᠭᠡᠨ ᠪᠣᠯᠠᠢ ᠃ ᠡᠷᠲᠡᠨ ᠦ᠌ ᠲᠠᠪᠤᠨ ᠤᠭᠰᠠᠭᠠ ᠡᠦ ᠳᠢ ᠶ᠋ᠢᠨ ᠠᠯᠢᠨ ᠠᠨᠤ ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠨ ᠬᠠᠳ ᠪᠤᠰᠤ ᠠᠵᠢ ! ᠮᠥᠨ ᠰᠥᠩ ᠤᠯᠤᠰ ᠤ᠋ᠨ ᠡᠬᠢᠨ ᠦ᠌ ᠵᠣᠣ ᠺᠤᠸᠠᠩ ᠶᠢᠨ ᠲᠡᠷᠡ ᠪᠠᠰᠠ ᠴᠤ᠌ ᠰᠥᠩ ᠤᠯᠤᠰ ᠤ᠋ᠨ ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠨ ᠬᠠᠭᠠᠨ ᠪᠤᠰᠤ ᠤᠤ ? ᠲᠡᠭᠦᠨ ᠢ᠋ ᠡᠨᠡ ᠶᠤᠸᠠᠨ ᠲᠠᠢᠽᠦ ᠯᠤᠭᠠ ᠦᠯᠢᠳᠬᠡᠪᠡᠰᠦ ᠶᠠᠮᠪᠠᠷ ᠬᠢᠷᠢᠲᠡᠢ ᠪᠣᠢ ᠠᠵᠢ ! ᠬᠢᠨᠠᠵᠤ ᠦᠵᠡᠭᠳᠡᠬᠦᠢ ᠃ ᠵᠢᠴᠢ ᠡᠨᠡ ᠤᠳᠠᠭᠠ ᠶ᠋ᠢᠨ ᠮᠥᠷᠥ ᠪᠡᠨ ᠴᠠᠪᠴᠢᠵᠤ ᠦᠬᠦᠯ ᠦ᠋ᠨ ᠭᠠᠵᠠᠷ ᠢ᠋ ᠡᠷᠢᠵᠦ ᠣᠷᠣᠭᠰᠠᠨ ᠵᠡᠯᠮᠡ ᠶ᠋ᠢᠨ ᠦᠨᠡᠨᠴᠢ ᠵᠢᠷᠤᠮ ᠦᠨᠡᠬᠡᠷ ᠲᠡᠭᠷᠢ ᠭᠠᠵᠠᠷᠠ ᠰᠠᠴᠠᠭᠤ ᠨᠠᠷᠠᠨ ᠰᠠᠷᠠᠨᠠ ᠲᠡᠩᠴᠡᠮᠦᠢ ᠃ ᠲᠡᠷᠡ ᠬᠦ᠌ ᠦᠨᠡᠨ ᠵᠢᠷᠤᠮ ᠢ᠋ᠶ᠋ᠡᠷ ᠦᠷᠡ ᠠᠴᠢ ᠠᠨᠤ ᠳᠣᠯᠣᠭᠠᠨ ᠵᠠᠭᠤᠨ ᠢᠯᠡᠭᠦᠦ ᠣᠨ ᠪᠣᠯᠲᠠᠯᠠ ᠮᠢᠩ ᠂ ᠴᠢᠩ ᠬᠣᠶᠠᠷ ᠤᠯᠤᠰ ᠤ᠋ᠨ ᠡᠷᠭᠢᠨ ᠵᠣᠴᠢᠳ ᠪᠣᠯᠤᠨ ᠶᠠᠪᠤᠬᠤ ᠪᠤᠰᠤ ᠤᠤ ?