ᠠᠶᠠᠭᠠᠨ ᠳᠣᠲᠣᠷᠠᠬᠢ ᠰᠡᠳᠬᠢᠯ - ᠲ ᠂ ᠪᠤᠶᠠᠨ Аяган доторх сэтгэл - Т ᠂ Буян
232ᠠᠶᠠᠭᠠᠨ ᠳᠣᠲᠣᠷᠠᠬᠢ ᠰᠡᠳᠬᠢᠯ
ᠠᠶᠠᠭᠠᠨ ᠳᠣᠲᠣᠷᠠ ᠠᠷᠢᠬᠢ ᠲᠠᠢ ᠂ ᠠᠷᠢᠬᠢᠨ ᠳᠣᠲᠣᠷᠠ ᠠᠮᠢᠳᠤᠷᠠᠯ ᠲᠠᠢ ᠂ ᠠᠮᠢᠳᠤᠷᠠᠯ ᠳᠣᠲᠣᠷᠠ ᠠᠶᠠᠯᠭᠤ ᠲᠠᠢ ᠂ ᠠᠶᠠᠯᠭᠤᠨ ᠳᠣᠲᠣᠷᠠ ᠰᠡᠳᠬᠢᠯ ᠲᠡᠢ ᠃
ᠰᠡᠳᠬᠢᠯ ᠭᠡᠳᠡᠭ ᠰᠠᠨᠵᠢ ᠦᠭᠡᠢ ᠂ ᠰᠡᠲᠡᠷᠡᠭᠡᠳ ᠶᠠᠪᠤᠪᠠᠯ ᠢᠷᠮᠡᠭ ᠦᠭᠡᠢ ᠃ ᠠ ᠂ ᠥᠨᠥ ᠪᠢ ᠠᠬᠢᠯᠲᠠ ᠶ᠋ᠢᠨ ᠬᠠᠪᠤᠷ ᠢ᠋ᠶ᠋ᠠᠨ ᠤᠭᠲᠤᠬᠤ ᠭᠡᠳ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠡᠷᠭᠦᠶᠡ ––
ᠠᠶᠠᠭᠠᠨ ᠳ᠋ᠤ᠌ ᠲᠤᠶᠠᠭᠠ ᠪᠠᠭᠤᠵᠠᠢ
ᠤᠭᠲᠤᠮᠠᠯ ᠴᠡᠴᠡᠭ ᠦ᠋ᠨ ᠪᠤᠯᠪᠠᠷᠠᠢ ᠬᠡᠯᠲᠡᠰ ᠬᠡᠢᠰᠦᠨ ᠤᠨᠠᠪᠠᠤ ᠂ ᠤᠯᠠᠪᠢᠷ ᠡᠭᠦᠯᠡᠰ ᠦ᠋ᠨ ᠲᠣᠷᠭᠠᠨ ᠥᠭᠡᠳᠡᠰᠦ ᠬᠥᠪᠦᠨ ᠪᠠᠭᠤᠪᠠᠤ ᠂ ᠠᠶᠠᠭᠠ ᠳᠦᠭᠦᠷᠡᠩ ᠲᠤᠶᠠᠭᠠ ᠠ᠋!
ᠠᠶᠠᠭᠠᠨ ᠤ᠋ ᠲᠤᠶᠠᠭᠠ ᠭᠡᠷᠡᠯ ᠢ᠋ᠶ᠋ᠡᠨ ᠰᠠᠴᠤᠯᠠᠵᠤ ᠂ ᠠᠷᠠᠨᠵᠠᠨ ᠤ᠋ ᠦᠨᠦᠷ ᠠᠩᠬᠢᠯᠤᠮᠠᠯ ᠢ᠋ᠶ᠋ᠠᠨ ᠰᠦᠷᠴᠢᠨᠡ ᠃ ᠤᠤᠭᠤᠬᠤ ᠠ᠋ᠴᠠ ᠤᠷᠢᠳ ᠴᠢᠷᠠᠢ ᠨᠢᠯᠴᠢᠭᠢᠨᠡᠵᠦ ᠂ ᠤᠮᠳᠠᠯᠠᠬᠤ ᠠ᠋ᠴᠠ ᠡᠮᠦᠨᠡ ᠪᠡᠶᠡ ᠬᠠᠯᠠᠭᠤᠷᠠᠨᠠ ᠃
ᠠ ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠷᠢᠬᠢ ᠠ᠋ ᠂ ᠶᠠᠭᠠᠬᠢᠭᠰᠠᠨ ᠢᠳᠡ ᠲᠡᠢ ᠪᠣᠢ !
ᠬᠡᠵᠢᠶᠡ ᠪᠢᠯᠡ ᠄ ᠥᠷᠥᠮᠳᠡᠭᠰᠡᠨ ᠬᠢᠷᠠᠭᠤ ᠠᠶᠠᠭᠠᠨ ᠠ᠋ᠴᠠ ᠠᠷᠢᠯᠵᠤ ᠂ ᠦᠵᠡᠰᠬᠦᠯᠡᠩ ᠲᠤᠶᠠᠭᠠ ᠠᠷᠢᠬᠢᠨ ᠳ᠋ᠤ᠌ ᠲᠤᠨᠤᠷᠠᠭᠰᠠᠨ ᠴᠢᠨᠢ ?
ᠮᠢᠨᠦ ᠵᠢᠷᠦᠬᠡ ᠠᠶᠠᠭᠠᠨ ᠳᠣᠲᠣᠷᠠ ᠯᠤᠭᠰᠢᠵᠤ ᠪᠠᠢᠨᠠ ᠂ ᠮᠢᠨᠦ ᠵᠢᠷᠦᠬᠡ ᠭᠡᠷᠡᠯ ᠳ᠋ᠦ᠍ ᠤᠬᠢᠶᠠᠭᠳᠠᠭᠠᠳ ᠭᠢᠯᠠᠯᠵᠠᠵᠤ ᠪᠠᠢᠨᠠ !
ᠠ ᠂ ᠭᠤᠷᠪᠠᠳᠤᠭᠠᠷ ᠬᠤᠷᠠᠯ ᠤ᠋ᠨ ᠥᠭᠭᠢᠶᠡᠮᠦᠷ ᠬᠤᠷᠠ ᠂ ᠭᠤᠪᠠᠢ ᠳᠡᠭᠵᠢᠨ ᠬᠠᠪᠤᠷ ᠤ᠋ᠨ ᠥᠩᠭᠡ ᠠ᠋ !
ᠯᠠᠪᠯᠠᠬᠤᠶᠠ ᠄ ᠰᠠᠴᠤᠷᠠᠭᠰᠠᠨ ᠭᠡᠷᠡᠯ ᠲᠣᠭᠣᠨᠣ ᠪᠠᠷ ᠳᠣᠲᠣᠭᠰᠢ ᠬᠠᠷᠪᠤᠵᠤ ᠂ ᠰᠠᠳᠠᠷᠠᠭᠰᠠᠨ ᠲᠤᠶᠠᠭᠠ ᠴᠣᠩᠬᠣ ᠪᠠᠷ ᠨᠠᠰᠢ ᠪᠠᠨ ᠪᠤᠲᠠᠷᠠᠨᠠ ᠃
ᠭᠡᠷᠡᠯ ᠠ᠋᠂ ᠥᠨᠢ ᠬᠣᠨᠣᠭᠰᠢᠭᠠᠰᠠᠢ !
ᠲᠤᠶᠠᠭᠠ ᠠ᠋ ᠂ ᠮᠥᠩᠬᠡ ᠰᠠᠭᠠᠳᠠᠭᠠᠰᠠᠢ !
ᠭᠡᠲᠡᠯᠡ ᠪᠢ ᠮᠡᠳᠡᠨᠡ ᠄ ᠣᠯᠤᠭᠰᠠᠨ ᠭᠡᠷᠡᠯ ᠢ᠋ᠶ᠋ᠡᠨ ᠬᠡᠷᠬᠢᠨ ᠬᠠᠮᠠᠭᠠᠯᠠᠵᠤ ᠶᠠᠭᠠᠬᠢᠵᠤ ᠰᠠᠴᠤᠷᠠᠭᠤᠯᠳᠠᠭ ᠢ᠋ ᠃
ᠲᠤᠶᠠᠭᠠ ᠪᠢᠯᠬᠠᠭᠰᠠᠨ ᠠᠶᠠᠭᠠ ᠪᠠᠨ ᠪᠢ ᠲᠡᠰᠬᠡᠯ ᠦᠭᠡᠢ ᠲᠡᠪᠡᠷᠢᠨ ᠠᠪᠤᠯᠠ !
ᠭᠡᠷᠡᠯ ᠠ᠋ –– ᠮᠢᠨᠦᠬᠢ !
ᠲᠤᠶᠠᠭᠠ ᠠ᠋ –– ᠮᠢᠨᠦᠬᠢ !
ᠢᠩᠭᠢᠭᠡᠳ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠬᠦᠨᠳᠦᠷᠡᠯᠡ ᠁ ᠨᠢᠳᠦ ᠭᠡᠳᠡᠭ ᠨᠣᠭᠲᠣ ᠦᠭᠡᠢ ᠂ ᠨᠢᠰᠦᠭᠡᠳ ᠭᠠᠷᠪᠠᠯ ᠬᠠᠵᠠᠭᠠᠷ ᠦᠭᠡᠢ ᠃ ᠠᠬᠢᠯᠲᠠ ᠶ᠋ᠢᠨ ᠬᠠᠪᠤᠷ ᠢ᠋ᠶ᠋ᠠᠨ ᠪᠡᠯᠭᠡᠯᠡᠬᠦ ᠭᠡᠳ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠡᠷᠭᠦᠶᠡ —
ᠠᠶᠠᠭᠠᠨ ᠠ᠋ᠴᠠ ᠰᠣᠯᠣᠩᠭᠠ ᠲᠠᠲᠠᠵᠠᠢ
ᠨᠢᠳᠦ ᠡᠷᠭᠦᠪᠡᠯ ᠄ ᠳᠠᠯᠪᠠᠭᠠ ᠲᠤᠭ ᠡᠭᠦᠯᠡ ᠶ᠋ᠢ ᠲᠡᠮᠡᠴᠡᠨ ᠴᠡᠷᠢᠭᠯᠡᠬᠦ ᠵᠠᠮ ᠢ᠋ ᠰᠤᠩᠭᠠᠵᠤ ᠂ ᠳᠡᠯᠪᠢ ᠪᠡᠨ ᠵᠠᠳᠠᠷᠠᠭᠤᠯᠤᠭᠰᠠᠨ ᠮᠢᠩᠭᠠᠨ ᠴᠡᠴᠡᠭ ᠠᠶᠠᠯᠠᠯ ᠢ᠋ ᠳ᠋ᠡᠭᠡᠨ ᠮᠢᠷᠠᠯᠵᠠᠨᠠ ᠃
ᠭᠡᠨᠡᠳᠲᠡ ᠠᠶᠠᠭᠠ ᠲᠠᠢ ᠠᠷᠢᠬᠢᠨ ᠠ᠋ᠴᠠ ᠰᠣᠯᠣᠩᠭᠠ ᠲᠠᠲᠠᠵᠠᠢ !
ᠡᠷᠢᠶᠡᠨ ᠰᠣᠯᠣᠩᠭᠠ ᠶᠢᠰᠦᠨ ᠥᠩᠭᠡ ᠪᠡᠷ ᠳᠤᠸᠠᠯᠠᠭᠰᠠᠭᠠᠷ ᠡᠷᠬᠢᠮ ᠬᠦᠰᠡᠯ ᠢ᠋ ᠮᠢᠨᠢ ᠲᠠᠢᠭᠠᠳ ᠨᠢᠰᠦᠯᠡ ᠃ ᠤᠤᠭᠤᠬᠤ ᠠ᠋ᠴᠠ ᠤᠷᠢᠳ ᠡᠯᠢᠭᠡ ᠰᠣᠭᠲᠣᠭᠤᠷᠠᠵᠤ ᠂ ᠤᠮᠳᠠᠯᠠᠬᠤ ᠠ᠋ᠴᠠ ᠡᠮᠦᠨᠡ ᠵᠢᠷᠦᠬᠡ ᠬᠥᠯᠴᠥᠭᠦᠷᠡᠨᠡ ᠃
ᠠ ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠷᠢᠬᠢ ᠠ᠋ ᠂ ᠬᠡᠴᠢᠨᠡᠨ ᠰᠢᠳᠢ ᠲᠡᠢ ᠪᠣᠢ!
ᠮᠢᠷᠠᠯᠵᠠᠭᠰᠠᠨ ᠰᠣᠯᠣᠩᠭᠠ ᠬᠠᠮᠢᠭᠠᠰᠢ ᠨᠢᠰᠴᠦ ᠂ ᠮᠢᠨᠳᠠᠰᠤᠨ ᠦᠵᠦᠭᠦᠷ ᠨᠢ ᠬᠠᠮᠢᠭᠠ ᠲᠤᠯᠤᠨᠠ ?
ᠮᠢᠨᠦ ᠵᠢᠷᠦᠬᠡ ᠠᠶᠠᠭᠠᠨ ᠳᠣᠲᠣᠷᠠ ᠳᠣᠭᠳᠣᠯᠵᠤ ᠪᠠᠢᠨᠠ ᠂ ᠮᠢᠨᠦ ᠵᠢᠷᠦᠬᠡ ᠰᠣᠯᠣᠩᠭᠠ ᠤᠨᠤᠭᠠᠳ ᠳᠣᠪᠲᠣᠯᠵᠤ ᠪᠠᠢᠨᠠ !
ᠠ ᠂ ᠶᠡᠷᠡᠨ ᠣᠨ ᠢ᠋ ᠰᠢᠪᠲᠤᠯᠤᠨ ᠨᠢᠰᠦᠨᠡ ᠂ ᠢᠷᠡᠬᠦ ᠵᠠᠭᠤᠨ ᠤ᠋ ᠪᠣᠱᠣᠭᠠ ᠶ᠋ᠢ ᠰᠤᠨᠳᠠᠯᠠᠨᠠ ᠃ ᠰᠣᠯᠣᠩᠭᠠ ᠬᠥᠯᠭᠡᠯᠡᠭᠡᠳ ᠨᠢᠰᠦᠯᠡ ᠰᠢᠦ ᠄ ᠭᠢᠯᠪᠠᠬᠤ ᠴᠠᠬᠢᠯᠭᠠᠨ ᠢ᠋ ᠰᠢᠭᠦᠷᠦᠨ ᠠᠪᠴᠤ ᠭᠠᠷᠠᠬᠠ ᠶ᠋ᠢᠨ ᠬᠤᠶᠠᠭ ᠲᠠᠭᠠᠨ ᠣᠭᠣᠰᠣᠷ ᠬᠢᠨᠡ ᠂ ᠭᠢᠯᠠᠯᠵᠠᠬᠤ ᠡᠦᠲᠦᠨ ᠢ᠋ ᠴᠢᠮᠬᠢᠨ ᠠᠪᠴᠤ ᠭᠠᠩ ᠤ᠋ᠨ ᠲᠤᠭᠤᠯᠭᠠ ᠳ᠋ᠠᠭᠠᠨ ᠰᠣᠨᠣᠪᠲᠤᠷ ᠪᠣᠯᠭᠠᠨᠠ !
ᠰᠣᠯᠣᠩᠭᠠ ᠠ᠋ —ᠥᠩᠭᠡ ᠨᠢ ᠪᠤᠤ ᠯᠠ ᠪᠠᠯᠠᠷᠠ !
ᠬᠦᠰᠡᠯᠡᠩ ᠠ᠋ —ᠦᠵᠡᠭᠦᠷ ᠨᠢ ᠪᠤᠤ ᠯᠠ ᠮᠢᠯᠠᠷᠠ!
ᠭᠡᠲᠡᠯᠡ ᠪᠢ ᠮᠡᠳᠡᠨᠡ ᠄ ᠬᠦᠴᠦ ᠣᠶᠤᠨ ᠢ᠋ᠶ᠋ᠠᠨ ᠰᠢᠪᠬᠠᠬᠤ ᠦᠭᠡᠢ ᠪᠣᠯ ᠬᠦᠰᠡᠯᠡᠩ ᠦ᠋ᠨ ᠴᠡᠴᠡᠭ ᠳᠡᠯᠭᠡᠷᠡᠬᠦ ᠦᠭᠡᠢ ᠶ᠋ᠢ ᠃
ᠣᠷᠴᠢᠯᠠᠩ ᠤ᠋ᠨ ᠪᠣᠯᠪᠠᠰᠤᠨ ᠳ᠋ᠤ᠌ ᠣᠶᠤᠨ ᠢ᠋ᠶ᠋ᠠᠨ ᠳᠠᠪᠲᠠᠶᠠ ᠂ ᠣᠳᠣᠬᠢᠴᠢᠯᠠᠬᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠲᠠᠮᠢᠷ ᠢ᠋ᠶ᠋ᠠᠨ ᠰᠢᠯᠭᠠᠶᠠ !
ᠰᠣᠯᠣᠩᠭᠠ ᠠ᠋ — ᠥᠨᠥᠳᠥᠷ ᠦ᠋ᠨ ᠬᠦᠰᠡᠯᠡᠩ ᠃
ᠬᠦᠰᠡᠯᠡᠩ ᠠ᠋ — ᠮᠠᠷᠭᠠᠰᠢ ᠶ᠋ᠢᠨ ᠦᠨᠡᠨ ᠃
ᠢᠩᠭᠢᠭᠡᠳ ᠪᠢ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠪᠠᠰᠠ ᠨᠢᠭᠡ ᠬᠦᠨᠳᠦᠷᠡᠯᠡ!
ᠠ ᠂ ᠠᠶᠠᠭᠠᠨ ᠳᠣᠲᠣᠷᠠ ᠠᠷᠢᠬᠢ ᠲᠠᠢ ᠂ ᠠᠷᠢᠬᠢᠨ ᠳᠣᠲᠣᠷᠠ ᠠᠮᠢᠳᠤᠷᠠᠯ ᠲᠠᠢ ᠂ ᠠᠮᠢᠳᠤᠷᠠᠯ ᠳᠣᠲᠣᠷᠠ ᠠᠶᠠᠯᠭᠤ ᠲᠠᠢ ᠠᠶᠠᠯᠭᠤᠨ ᠳᠣᠲᠣᠷᠠ ᠰᠡᠳᠬᠢᠯ ᠲᠡᠢ ᠁