ᠬᠡᠭᠡᠷᠡ ᠶᠢᠨ ᠡᠪᠡᠰᠦ - ᠰ · ᠥᠯᠵᠡᠢᠪᠠᠲᠤ Хээрийн өвс - С · Өлзийбат
277ᠬᠡᠭᠡᠷᠡ ᠶᠢᠨ ᠡᠪᠡᠰᠦ
1
ᠡᠵᠢ ᠮᠢᠨᠢ ᠂ ᠡᠬᠡ ᠪᠣᠯᠤᠭᠰᠠᠨ ᠳᠡᠯᠡᠬᠡᠢ ᠮᠢᠨᠢ! ᠬᠥᠬᠥᠨ ᠡᠴᠡ ᠪᠡᠨ ᠰᠢᠪᠬᠠᠭᠰᠠᠨ ᠳᠤᠰᠤᠯ ᠤᠰᠤ ᠪᠠᠷ ᠢ᠋ᠶ᠋ᠠᠨ ᠨᠠᠮᠠᠶ᠋ᠢ ᠤᠮᠳᠠᠯᠠᠵᠤ᠂ ᠬᠥᠷᠥᠰᠥᠨ ᠳ᠋ᠡᠭᠡᠨ ᠬᠢᠮᠠᠭᠠᠳᠠᠭᠰᠠᠨ ᠮᠥᠬᠥᠯᠢᠭ ᠰᠢᠮᠡ ᠪᠡᠷ ᠢ᠋ᠶ᠋ᠡᠨ ᠨᠠᠮᠠᠶ᠋ᠢ ᠲᠡᠵᠢᠭᠡᠭᠰᠡᠭᠡᠷ ᠂ ᠬᠥᠯ ᠮᠢᠨᠢ ᠬᠥᠷᠥᠰᠥᠨ ᠵᠢᠭᠢᠵᠦ ᠂ ᠭᠠᠷ ᠮᠢᠨᠢ ᠭᠠᠵᠠᠷ ᠢ᠋ ᠨᠡᠪᠲᠡᠯᠬᠦ ᠦᠶᠡ ᠳ᠋ᠦ᠍ ᠠᠯᠢ ᠣᠯᠠᠨ ᠠᠴᠢᠨᠠᠷ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠨᠢᠭᠡ ᠪᠣᠯᠭᠠᠵᠤ ᠂ ᠠᠮᠢᠳᠤᠷᠠᠯ ᠤ᠋ᠨ ᠰᠢᠷᠦᠭᠦᠨ ᠤᠷᠤᠰᠬᠠᠯ ᠳ᠋ᠤ᠌ ᠠᠪᠠᠴᠢᠵᠤ ᠲᠠᠯᠪᠢᠨᠠ ᠃
ᠡᠵᠢ ᠮᠢᠨᠢ ᠂ ᠡᠬᠡ ᠪᠣᠯᠤᠭᠰᠠᠨ ᠳᠡᠯᠡᠬᠡᠢ ᠮᠢᠨᠢ ! ᠰᠦ ᠪᠡᠨ ᠰᠢᠪᠬᠠᠭᠰᠠᠨ ᠬᠥᠬᠥ ᠴᠢᠨᠢ ᠬᠠᠮᠰᠢᠢᠵᠤ ᠰᠢᠮᠡ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᠪᠡᠶᠡ ᠴᠢᠨᠢ ᠬᠠᠲᠠᠩᠭᠢᠷᠠᠭᠰᠠᠨ ᠴᠤ᠌ ᠦᠭᠡ ᠴᠦ᠍ ᠦᠭᠡᠢ ᠳᠠᠭᠤᠨ ᠴᠤ᠌ ᠦᠭᠡᠢ ᠥᠪᠡᠷ ᠢ᠋ ᠪᠡᠨ ᠦᠷᠡᠭᠳᠡᠭᠦᠯᠳᠡᠭ ᠨᠢ ᠠ᠋ ᠁
ᠡᠵᠢ ᠮᠢᠨᠢ ᠂ ᠡᠬᠡ ᠪᠣᠯᠤᠭᠰᠠᠨ ᠳᠡᠯᠡᠬᠡᠢ ᠮᠢᠨᠢ!
2
ᠡᠷᠬᠡ ᠶ᠋ᠢᠨ ᠬᠦᠷᠳᠦ ᠪᠢ ᠪᠢᠰᠢ ᠂ ᠡᠨᠡ ᠬᠦᠷᠳᠦᠨ ᠦ᠌ ᠳᠣᠣᠷᠠᠬᠢ ᠡᠭᠡᠯ ᠨᠢᠭᠡ ᠬᠥᠮᠦᠨ ᠭᠡᠵᠦ ᠡᠨᠡᠳᠬᠡᠭ ᠦ᠋ᠨ ᠨᠢᠭᠡᠨ ᠡᠪᠦᠭᠡᠨ ᠰᠢᠯᠦᠭᠴᠢ ᠪᠢᠴᠢᠵᠡᠢ ᠭᠡᠨᠡ ᠃
ᠲᠡᠷᠡ ᠲᠡᠢᠮᠦ ᠪᠣᠯ ᠨᠠᠮᠠᠶ᠋ᠢ ᠂ ᠨᠡᠩ ᠶᠠᠭᠤᠨ ᠥᠭᠦᠯᠡᠬᠦ ᠃
ᠲᠦᠮᠡ ᠮᠢᠩᠭᠠᠨ ᠬᠦᠷᠳᠦᠨ ᠦ᠌ ᠳᠣᠣᠷᠠᠬᠢ ᠲᠥᠭᠡ ᠴᠢᠨᠡᠭᠡᠨ ᠡᠪᠡᠰᠦ ᠰᠢᠦ ᠳᠡ᠃
ᠲᠥᠭᠡ ᠴᠢᠨᠡᠭᠡᠨ ᠪᠣᠯᠪᠠᠴᠤ ᠠᠮᠢ ᠰᠢᠦ ᠃ ᠥᠨᠳᠥᠷᠬᠡᠨ ᠤᠯᠢᠶᠠᠰᠤ ᠥᠴᠦᠬᠡᠨ ᠡᠪᠡᠰᠦ ᠪᠢᠳᠡ ᠬᠣᠶᠠᠷ ᠡᠭᠡᠭᠡ ᠠᠳᠠᠯᠢ ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠦᠷᠡ ᠬᠦᠦ᠂ ᠡᠰ ᠢ᠋ᠶ᠋ᠡᠷ ᠪᠦᠲᠦᠭᠰᠡᠨ ᠠᠬᠠ ᠳᠡᠭᠦᠦ ᠃ ᠥᠴᠦᠬᠡᠨ ᠪᠣᠯᠪᠠᠴᠤ ᠥᠰᠴᠦ ᠦᠷᠡᠵᠢᠬᠦ ᠶᠣᠰᠣᠲᠠᠢ – ᠡᠨᠡ ᠪᠣᠯ ᠮᠢᠨᠦ ᠡᠷᠬᠡ ᠮᠠᠲᠠᠯ!
3
ᠨᠠᠪᠴᠢ ᠮᠢᠨᠢ ᠨᠠᠷᠠᠨ ᠢ᠋ᠶ᠋ᠠᠨ ᠥᠭᠡᠳᠡ ᠬᠠᠨᠳᠤᠭᠰᠠᠨ ᠦᠨᠳᠦᠰᠦ᠃ ᠦᠨᠳᠦᠰᠦ ᠮᠢᠨᠢ ᠬᠥᠷᠥᠰᠥᠨ ᠳᠣᠲᠣᠷᠠ ᠳᠡᠯᠭᠡᠭᠰᠡᠨ ᠨᠠᠪᠴᠢ ᠃
ᠨᠠᠪᠴᠢ ᠪᠠᠷ ᠢ᠋ᠶ᠋ᠠᠨ ᠪᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠢ᠋ ᠲᠣᠰᠴᠤ ᠂ ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠪᠢ ᠭᠠᠵᠠᠷ ᠤ᠋ᠨ ᠰᠢᠮᠡ ᠶ᠋ᠢ ᠰᠤᠷᠤᠨᠠ ᠃ ᠨᠠᠪᠴᠢ ᠦᠨᠳᠦᠰᠦ ᠬᠣᠶᠠᠷ ᠪᠣᠯ ᠮᠢᠨᠦ ᠳᠡᠭᠡᠷᠡ ᠳᠣᠣᠷᠠ ᠬᠣᠶᠠᠷ ᠮᠥᠴᠢ ᠨᠢᠭᠡ ᠮᠢᠨᠦ᠋ᠲ ᠴᠦ᠍ ᠠᠵᠢᠯ ᠢ᠋ᠶ᠋ᠠᠨ ᠵᠣᠭᠰᠣᠬᠤ ᠦᠭᠡᠢ ᠬᠥᠳᠡᠯᠮᠦᠷᠢᠴᠢ ᠬᠣᠶᠠᠷ ᠡᠷᠬᠡᠲᠡᠨ ᠰᠢᠦ ᠃
ᠲᠡᠭᠦᠨ ᠳ᠋ᠡᠭᠡᠨ ᠲᠦᠰᠢᠵᠦ ᠪᠢ ᠥᠪᠡᠷ ᠢ᠋ ᠪᠡᠨ ᠲᠡᠵᠢᠭᠡᠵᠦ ᠂ ᠦᠷᠡ ᠪᠡᠨ ᠪᠣᠢᠵᠢᠭᠤᠯᠵᠤ ᠂ ᠡᠦᠲᠦᠮ ᠢ᠋ᠶ᠋ᠡᠨ ᠵᠠᠯᠭᠠᠵᠤ ᠂ ᠤᠭᠰᠠᠭᠠ ᠪᠠᠨ ᠤᠯᠠᠮᠵᠢᠯᠠᠳᠠᠭ ᠠ᠋ ᠃
4
ᠶᠢᠷᠲᠢᠨᠴᠦ ᠶ᠋ᠢᠨ ᠲᠦᠮᠡᠨ ᠪᠣᠳᠠᠰ ᠶᠡᠬᠡ ᠴᠦ᠍ ᠪᠠᠭᠠ ᠴᠤ᠌ ᠥᠪᠡᠷ ᠦ᠋ᠨ ᠡᠷᠳᠡᠮ ᠴᠢᠳᠠᠯ ᠲᠠᠢ ᠃ ᠡᠷᠳᠡᠮ ᠴᠢᠳᠠᠯ ᠦᠭᠡᠢ ᠪᠣᠯ ᠡᠨᠡ ᠶᠢᠷᠲᠢᠨᠴᠦ ᠡᠴᠡ ᠡᠷᠲᠡ ᠠᠷᠢᠯᠴᠢᠭᠰᠨᠨ᠃
ᠰᠠᠪᠠᠨ ᠤ᠋ ᠴᠡᠴᠡᠭ ᠰᠠᠢᠬᠠᠨ ᠥᠩᠭᠡ ᠲᠡᠢ ᠪᠣᠯᠬᠣᠷ ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠠᠰᠠᠷᠠᠭᠳᠠᠬᠤ ᠠᠵᠠ ᠲᠠᠢ ᠃ ᠴᠡᠴᠡᠭ ᠬᠤᠸᠠᠷ ᠭᠡᠵᠦ ᠨᠠᠳᠠᠳᠤ ᠠᠯᠠᠭᠠ ᠪᠣᠯᠬᠣᠷ ᠴᠡᠴᠡᠷᠯᠢᠭ ᠲᠦ᠍ ᠣᠷᠣᠬᠤ ᠬᠤᠪᠢ ᠦᠭᠡᠢ ᠃ ᠲᠡᠭᠡᠪᠡᠴᠦ ᠪᠢ ᠲᠡᠭᠦᠨ ᠲᠡᠢ ᠠᠲᠠᠭᠠᠷᠬᠠᠬᠤ ᠦᠭᠡᠢ ᠃ ᠤᠴᠢᠷ ᠨᠢ ᠤᠷᠭᠤᠮᠠᠯ ᠪᠦᠬᠦᠨ ᠴᠡᠴᠡᠷᠯᠢᠭ ᠲᠦ᠍ ᠣᠷᠣᠴᠢᠬᠠᠪᠠᠯ ᠠᠭᠤᠳᠠᠮ ᠲᠠᠯᠠ ᠂ ᠤᠷᠲᠤ ᠶ᠋ᠢᠨ ᠰᠢᠯᠢ ᠂ ᠠᠭᠤᠯᠠ ᠬᠠᠢᠷᠬᠠᠨ ᠴᠥᠮ ᠤᠯᠠᠭᠠᠨ ᠬᠠᠯᠴᠠᠭᠠᠢ ᠪᠣᠯᠴᠢᠬᠤ ᠪᠢᠰᠢᠦ ᠃
5
ᠰᠠᠯᠬᠢᠨ ᠥᠬᠥᠢ ᠨᠡᠭᠡᠷᠡᠨ ᠠᠭᠠᠰᠢ ᠮᠠᠭᠤᠲᠠᠢ ᠃ ᠵᠠᠷᠢᠮ ᠳ᠋ᠠᠭᠠᠨ ᠨᠠᠮᠠᠶ᠋ᠢ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠢᠯᠪᠢᠳᠡᠭ ; ᠵᠠᠷᠢᠮ ᠳ᠋ᠠᠭᠠᠨ ᠨᠠᠮᠠᠶ᠋ᠢ ᠲᠣᠮᠣ ᠰᠢᠳᠠᠮ ᠢ᠋ᠶ᠋ᠠᠷ ᠪᠠᠯᠪᠠᠳᠠᠭ ᠃
ᠪᠠᠷᠠᠭᠤᠨ ᠠ᠋ᠴᠠ ᠰᠠᠯᠬᠢᠯᠠᠵᠤ ᠪᠠᠬᠠᠨ ᠴᠣᠬᠢᠯᠳᠠᠭ ᠢ᠋ᠶ᠋ᠠᠨ ᠵᠡᠭᠦᠨ ᠡᠴᠡ ᠵᠢᠪᠠᠷᠯᠠᠵᠤ ᠵᠦᠭ ᠴᠢᠭ ᠦᠭᠡᠢ ᠭᠤᠶᠠᠳᠠᠳᠠᠭ ᠃
ᠰᠠᠯᠬᠢᠨ ᠬᠠᠮᠢᠭᠠ ᠠ᠋ᠴᠠ ᠡᠭᠦᠰᠬᠦ ᠶ᠋ᠢ ᠰᠠᠨᠰᠠᠷ ᠲᠡᠭᠷᠢ ᠮᠡᠳᠡᠨᠡ ᠃ ᠬᠠᠷᠢᠨ ᠪᠢ ᠪᠣᠯ ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠡᠬᠡ ᠳᠡᠯᠡᠬᠡᠢ ᠲᠡᠢ ᠬᠣᠯᠪᠣᠭᠳᠠᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠣᠢᠴᠢᠬᠤ ᠪᠠᠷ ᠣᠢᠴᠢᠪᠠᠴᠤ ᠂ ᠪᠣᠰᠬᠤ ᠪᠠᠷ ᠢ᠋ᠶ᠋ᠠᠨ ᠪᠣᠰᠴᠤ ᠂ ᠤᠷᠭᠤᠬᠤ ᠪᠠᠷ ᠢ᠋ᠶ᠋ᠠᠨ ᠤᠷᠭᠤᠨᠠ ᠃
6
ᠡᠪᠦᠯ ᠦᠭᠡᠢ ᠬᠠᠪᠤᠷ᠂ ᠨᠠᠮᠤᠷ ᠦᠭᠡᠢ ᠵᠤᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ ᠥᠲᠡᠯᠦᠰᠢ ᠦᠭᠡᠢ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠰᠠᠨ ᠃ ᠭᠡᠪᠡᠴᠦ ᠦᠷᠭᠦᠯᠵᠢ ᠵᠤᠨ ᠪᠣᠯ ᠦᠷᠡ ᠮᠢᠨᠢ ᠶᠠᠭᠠᠬᠢᠵᠤ ᠪᠣᠯᠪᠠᠰᠤᠷᠠᠬᠤ ᠪᠣᠢ ⁈ ᠦᠨᠳᠦᠰᠦ ᠮᠢᠨᠢ ᠶᠠᠭᠠᠬᠢᠵᠤ ᠵᠠᠯᠭᠠᠬᠤ ᠪᠣᠢ ⁈
ᠬᠣᠩᠭᠣᠷ ᠰᠠᠯᠬᠢ ᠪᠣᠯ ᠮᠢᠨᠦ ᠶᠠᠰᠤ ᠶ᠋ᠢ ᠪᠠᠷᠢᠭᠴᠢ ᠪᠥᠭᠡᠳ ᠦᠷᠡ ᠶ᠋ᠢᠨ ᠮᠢᠨᠢ ᠡᠬᠡ ᠪᠠᠷᠢᠭᠴᠢ ᠶᠤᠮ ᠃ ᠰᠠᠯᠬᠢᠨ ᠥᠬᠥᠢ ᠰᠢᠷᠦᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠢᠨᠦ ᠡᠪᠦᠷ ᠡᠴᠡ ᠦᠷᠡ ᠶ᠋ᠢ ᠮᠢᠨᠢ ᠠᠪᠠᠴᠢᠵᠤ ᠂ ᠡᠬᠡ ᠳᠡᠯᠬᠡᠢ ᠶ᠋ᠢᠨ ᠡᠪᠦᠷ ᠲᠦ᠍ ᠭᠡᠬᠦ ᠦᠶᠡ ᠡᠴᠡ ᠠᠪᠤᠭᠠᠳ ᠬᠥᠷᠥᠰᠥᠨ ᠳᠣᠣᠷᠠ ᠰᠢᠨᠡ ᠠᠮᠢᠳᠤᠷᠠᠯ ᠡᠭᠡᠯᠡᠵᠦ ᠰᠢᠨᠡ ᠠᠮᠢ ᠪᠣᠢᠵᠢᠨᠠ ᠃
ᠦᠷᠡ ᠪᠤᠯᠠᠭᠳᠠᠭᠰᠠᠨ ᠪᠣᠯᠬᠣᠷ ᠦᠨᠳᠦᠰᠦᠯᠡᠵᠦ ᠰᠣᠶᠣᠭᠠᠯᠠᠬᠤ ᠨᠢ ᠯᠠᠪᠲᠠᠢ ᠃ ᠡᠬᠡ ᠳᠡᠯᠡᠬᠡᠢ ᠬᠥᠬᠥᠨᠡᠴᠡ ᠪᠡᠨ ᠰᠢᠪᠬᠠᠭᠰᠠᠨ ᠳᠤᠰᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠳᠡᠨ ᠢ᠋ ᠤᠮᠳᠠᠯᠠᠵᠤ ᠂ ᠬᠥᠷᠥᠰᠥᠨ ᠳ᠋ᠡᠭᠡᠨ ᠬᠢᠮᠠᠭᠠᠳᠠᠭᠰᠠᠨ ᠮᠥᠬᠥᠯᠢᠭ ᠰᠢᠮᠡ ᠪᠡᠷ ᠢ᠋ᠶ᠋ᠡᠨ ᠲᠡᠳᠡᠨ ᠢ᠋ ᠲᠡᠵᠢᠭᠡᠭᠰᠡᠭᠡᠷ ᠬᠥᠯ ᠨᠢ ᠬᠥᠷᠥᠰᠥᠨᠡ ᠵᠢᠭᠢᠵᠦ ᠂ ᠭᠠᠷ ᠨᠢ ᠭᠠᠵᠠᠷ ᠢ᠋ ᠨᠡᠪᠲᠡᠯᠬᠦ ᠦᠶᠡ ᠳ᠋ᠦ᠍ ᠠᠯᠢ ᠣᠯᠠᠨ ᠠᠴᠢᠨᠠᠷ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠨᠢᠭᠡ ᠪᠦᠯᠦᠭ ᠨᠢ ᠪᠣᠯᠭᠠᠵᠤ ᠂ ᠠᠮᠢᠳᠤᠷᠠᠯ ᠤ᠋ᠨ ᠰᠢᠷᠦᠭᠦᠨ ᠤᠷᠤᠰᠬᠠᠯ ᠳ᠋ᠤ᠌ ᠠᠪᠠᠴᠢᠵᠤ ᠲᠠᠯᠪᠢᠨᠠ ᠃
ᠡᠭᠦᠨ ᠢ᠋ ᠪᠢ ᠯᠠᠪᠲᠠᠢ ᠮᠡᠳᠡᠪᠡᠴᠦ ᠦᠷᠡᠵᠢᠭᠡᠳ ᠴᠣᠬᠣᠮ ᠬᠡᠳᠦ ᠪᠣᠯᠬᠤ ᠶ᠋ᠢ ᠦᠯᠦ ᠮᠡᠳᠡᠨᠡ ᠃