《ᠮᠣᠩᠭᠣᠯ ᠬᠥᠮᠦᠨ ᠪᠣᠯ ᠠᠷᠢᠬᠢ ᠤᠤᠭᠤ !》 - ᠠᠷᠲᠠᠢ "Монгол хүн бол архи уу !" - Артай
290《ᠮᠣᠩᠭᠣᠯ ᠬᠥᠮᠦᠨ ᠪᠣᠯ ᠠᠷᠢᠬᠢ ᠤᠤᠭᠤ !》
ᠭᠠᠷᠤᠯ ᠨᠢ ᠲᠣᠳᠣ ᠦᠭᠡᠢ ᠡᠨᠡ ᠦᠭᠡ
ᠰᠠᠬᠠᠯ ᠲᠠᠢ ᠰᠠᠬᠠᠯ ᠦᠭᠡᠢ ᠤᠷᠤᠭᠤᠯ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ
ᠰᠠᠪᠬᠠ ᠳᠠᠭᠠᠵᠤ ᠪᠥᠮᠪᠥᠷᠢᠵᠦ ᠪᠠᠭᠤᠭᠠᠳ
ᠲᠣᠰᠣ ᠲᠠᠢ ᠬᠠᠭᠤᠷᠤᠯᠭᠠ ᠳ᠋ᠤ᠌ ᠪᠦᠳᠦᠷᠢᠵᠦ ᠠᠪᠤᠭᠠᠳ
ᠲᠣᠭᠣᠭᠠ ᠲᠠᠢ ᠱᠥᠯᠦᠨ ᠳ᠋ᠦ᠍ ᠭᠤᠳᠤᠷᠴᠤ ᠠᠪᠤᠭᠠᠳ
ᠭᠤᠢᠪᠢᠩ ᠲᠣᠢᠪᠢᠩ ᠭᠡᠰᠡᠨ ᠬᠥᠮᠦᠨ ᠦ᠌
ᠭᠤᠲᠤᠯ ᠳᠡᠭᠡᠷᠡ ᠰᠠᠭᠤᠵᠤ ᠭᠠᠷᠤᠯᠠ –
ᠬᠠᠰᠢᠶᠠᠨ ᠤ᠋ ᠡᠩᠭᠡᠷ ᠦ᠋ᠨ ᠪᠥᠭᠡᠯᠵᠢᠰᠦᠨ ᠳᠡᠭᠡᠷᠡ ᠬᠣᠶᠠᠷ ᠬᠥᠷᠪᠡᠭᠡᠵᠦ ᠠᠪᠤᠭᠠᠳ
ᠬᠠᠩᠭᠠᠯᠭᠠ ᠶ᠋ᠢᠨ ᠬᠣᠷᠰᠢᠶᠠᠨ ᠤ᠋ ᠬᠡᠷᠡᠮ ᠢ᠋ ᠬᠡᠳᠦ ᠮᠥᠷᠭᠥᠵᠦ ᠦᠵᠡᠭᠡᠳ
ᠡᠮᠡᠭᠡᠯ ᠢ᠋ᠶ᠋ᠡᠨ ᠬᠥᠭᠯᠡᠭᠰᠡᠨ ᠮᠣᠷᠢ ᠶ᠋ᠢ ᠳᠠᠭᠠᠵᠤ ᠱᠠᠯᠪᠠᠭ ᠳᠡᠭᠡᠷᠡ ᠥᠩᠭᠥᠷᠢᠳᠡᠵᠦ
ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠠᠳᠠᠭᠰᠠᠨ ᠭᠠᠷ ᠢ᠋ ᠳᠠᠭᠠᠵᠤ ᠬᠡᠢ ᠳᠡᠭᠡᠷᠡ ᠡᠷᠭᠢᠯᠳᠦᠵᠦ
ᠬᠠᠭᠤᠷᠠᠢ ᠬᠤᠳᠳᠤᠭ ᠲᠤ᠌ ᠲᠥᠭᠡᠷᠢᠵᠦ ᠤᠨᠠᠭᠠᠳ
ᠬᠥᠯᠳᠡᠭᠰᠡᠨ ᠬᠥᠯ ᠦ᠋ᠨ ᠬᠠᠵᠠᠭᠤᠳᠠ ᠨᠢᠭᠡ ᠰᠥᠨᠢ ᠳᠠᠭᠵᠢᠵᠤ
ᠬᠠᠭᠤᠷᠮᠠᠭ 《ᠨᠥᠬᠥᠷᠯᠡᠯ 》 ᠳ᠋ᠦ᠍ ᠲᠠᠲᠠᠭᠳᠠᠵᠤ ᠣᠷᠣᠭᠠᠳ
ᠳᠣᠬᠢᠭᠰᠠᠨ ᠲᠣᠯᠣᠭᠠᠢ ᠳᠡᠷᠭᠡᠳᠡ ᠳ᠋ᠦ᠍ᠷ ᠴᠠᠭ ᠣᠭᠰᠣᠢᠵᠤ
ᠠᠪᠳᠠᠷᠠ ᠶ᠋ᠢᠨ ᠥᠨᠴᠥᠭ ᠢ᠋ ᠮᠥᠷᠭᠥᠵᠦ ᠤᠨᠠᠭᠠᠳ ᠴᠥᠮᠥᠷᠡᠭᠰᠡᠨ ᠦᠭᠡᠢ ᠂
ᠠᠰᠠᠷ ᠤ᠋ᠨ ᠱᠠᠲᠤ ᠪᠠᠷ ᠲᠣᠩᠭᠣᠷᠴᠤ ᠪᠠᠭᠤᠭᠠᠳ ᠬᠡᠮᠬᠡᠷᠡᠭᠰᠡᠨ ᠦᠭᠡᠢ ᠂
ᠠᠩᠬᠠᠨ ᠳ᠋ᠠᠭᠠᠨ ᠬᠣᠨᠣᠭ ᠪᠤᠳᠠᠭᠠᠨ ᠤ᠋ ᠮᠥᠬᠥᠯᠢᠭ ᠡᠴᠡ ᠵᠢᠭᠠᠬᠠᠨ ᠡᠨᠡ ᠦᠭᠡ
ᠠᠶᠠᠯᠠᠭᠰᠠᠭᠠᠷ ᠪᠠᠢᠭᠠᠳ ᠠᠶᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠪᠣᠯᠵᠤ
ᠠᠢᠯ ᠤ᠋ᠨ ᠦᠨᠡᠰᠦ ᠂ ᠬᠣᠲᠠ ᠶ᠋ᠢᠨ ᠨᠣᠪᠰᠢ
ᠠᠯᠢ ᠲᠠᠭᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠠᠭᠠᠯᠳᠤᠭᠤᠯᠵᠤ ᠠᠪᠤᠭᠠᠳ
ᠠᠷᠤᠭ ᠤ᠋ᠨ ᠴᠢᠨᠡᠭᠡᠨ ᠪᠤᠯᠴᠢᠬᠰᠠᠨ ᠵᠠᠯᠠᠷᠠᠨᠠ ᠃
ᠠᠷᠤ ᠶ᠋ᠢᠨ ᠭᠤᠳᠤᠮᠵᠢ ᠪᠠᠷ ᠲᠦᠷᠴᠢᠭᠢᠨᠡᠲᠡᠯᠡ ᠪᠥᠮᠪᠥᠷᠢᠵᠦ
ᠠᠢᠯ ᠤ᠋ᠨ ᠰᠢᠷᠡᠭᠡ ᠶᠢ ᠲᠠᠴᠢᠭᠢᠨᠠᠲᠠᠯᠠ ᠳᠡᠯᠡᠳᠴᠦ
《ᠠᠬᠠ ᠳᠡᠭᠦᠦ ᠨᠠᠷ ᠠ᠋ ᠂ ᠴᠢᠳᠠᠯ ᠢ᠋ᠶ᠋ᠠᠨ ᠰᠢᠯᠭᠠᠶᠠ !》 ᠭᠡᠵᠦ
ᠠᠮᠠ ᠶ᠋ᠢ ᠨᠢ ᠵᠢᠭᠡᠯᠡᠭᠡᠳ ᠡᠨᠡ ᠦᠭᠡ ᠬᠠᠰᠬᠢᠷᠤᠨᠠ ᠃
ᠠᠯᠤᠰ ᠤ᠋ᠨ ᠣᠲᠣᠷ ᠢ᠋ᠶ᠋ᠠᠷ ᠰᠦᠷᠴᠢᠭᠢᠨᠡᠲᠡᠯᠡ ᠥᠩᠭᠥᠷᠢᠳᠡᠵᠦ
ᠠᠶᠠᠭᠠᠨ ᠤ᠋ ᠢᠷᠮᠡᠭ ᠢ᠋ ᠬᠠᠭᠠᠷᠠᠲᠠᠯᠠ ᠮᠥᠷᠭᠥᠭᠦᠯᠵᠦ
ᠠᠷᠢᠬᠢᠨ ᠳ᠋ᠤ᠌ ᠠᠨᠠᠢ ᠰᠢᠨᠡ 《 ᠬᠦᠴᠦᠨ 》 ᠢ᠋ᠶ᠋ᠡᠨ
ᠠᠯᠪᠠᠳᠠᠵᠤ ᠴᠢᠬᠢᠳᠡᠭᠡᠳ ᠡᠨᠡ ᠦᠭᠡ 《 ᠬᠥᠮᠦᠵᠢᠭᠦᠯᠦᠨᠡ 》 ᠃
ᠲᠡᠨᠢᠭᠡᠷ ᠠᠭᠤᠳᠠᠮ ᠨᠤᠲᠤᠭ ᠤ᠋ᠨ
ᠲᠡᠷᠭᠡᠨ ᠳᠡᠭᠡᠷᠡ ᠂ ᠲᠡᠮᠡᠭᠡᠨ ᠳᠡᠭᠡᠷᠡ
ᠡᠩᠭᠡᠷ ᠳᠡᠭᠡᠷᠡ ᠂ ᠨᠠᠢᠷ ᠳᠡᠭᠡᠷᠡ
ᠡᠵᠡᠨ ᠦ᠌ ᠵᠠᠷᠯᠢᠭ ᠰᠢᠭ᠋ ᠬᠦᠨᠳᠦᠯᠡᠭᠳᠡᠵᠦ
ᠡᠷᠡᠬᠡᠢ ᠬᠤᠷᠤᠭᠤ ᠪᠠᠷ ᠮᠢᠯᠢᠶᠠᠭᠳᠠᠵᠤ
ᠡᠨᠡ ᠦᠭᠡ ᠪᠥᠮᠪᠥᠭᠡᠨᠡᠨᠡ ᠁
ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠨᠡᠷᠡ ᠲᠡᠢ
ᠰᠢᠨᠡ ᠴᠠᠭ ᠤ᠋ᠨ ᠵᠠᠯᠠᠭᠤ
ᠰᠠᠷᠠᠭᠤᠯ ᠨᠤᠲᠤᠭ ᠢ᠋ ᠵᠣᠷᠢᠵᠤ
ᠰᠡᠩᠳᠡ ᠮᠡᠩᠳᠡ ᠶᠠᠪᠤᠵᠤ ᠪᠠᠢᠲᠠᠯᠠ
ᠥᠭᠡᠳᠡ ᠡᠴᠡ ᠨᠢ
ᠥᠷᠥᠭᠡᠰᠦᠨ ᠭᠤᠲᠤᠯ ᠲᠠᠢ ᠬᠥᠯ ᠦ᠋ᠨ ᠬᠠᠵᠠᠭᠤᠳᠠ
ᠥᠨᠥ ᠪᠥᠮᠪᠥᠭᠡ ᠡᠨᠡ ᠦᠭᠡ
ᠥᠩᠬᠦᠷᠢᠳᠦᠭᠰᠡᠭᠡᠷ
ᠡᠮᠦᠨᠡᠰᠢ ᠪᠡᠨ ᠰᠢᠷᠭᠤᠴᠢᠭᠰᠠᠨ ᠬᠥᠮᠦᠨ ᠦ᠌ ᠠᠮᠠ ᠪᠠᠷ
ᠥᠨᠳᠥᠷ ᠳᠠᠭᠤ ᠲᠠᠢ
ᠵᠠᠩᠳᠦᠴᠢᠭᠰᠠᠭᠠᠷ ᠠᠢᠰᠤᠢ ᠃
ᠵᠠᠯᠠᠭᠤ ᠶᠡᠬᠡᠯᠡ ᠰᠣᠨᠢᠷᠬᠠᠵᠤ
ᠵᠠᠬᠠ ᠳ᠋ᠤᠨᠢ ᠣᠴᠢᠵᠤ ᠪᠠᠷᠢᠭᠠᠳ
ᠠᠯᠠᠭ ᠡᠷᠢᠶᠡᠨ ᠪᠥᠮᠪᠥᠭᠡ ᠶ᠋ᠢᠨ
ᠠᠷᠠᠰᠤ ᠵᠢ ᠱᠠᠭᠠᠯᠵᠤ ᠡᠬᠢᠯᠡᠵᠡᠢ ᠃
ᠳᠠᠩᠴᠢ ᠣᠯᠠᠨ ᠪᠥᠮᠪᠥᠷᠢᠳᠦᠭᠰᠡᠨ ᠡᠴᠡ ᠵᠤᠵᠠᠭᠠᠨ ᠭᠡᠳᠡᠭ ᠨᠢ ᠬᠡᠷᠡᠭ ᠃
ᠳᠠᠯᠠᠨ ᠳᠠᠪᠬᠤᠷ ᠠᠷᠠᠰᠤ ᠶ᠋ᠢᠨ ᠬᠢᠨᠢ ᠤᠷᠠᠨ ᠭᠡᠳᠡᠭ ᠨᠢ ᠴᠦ᠍ ᠪᠡᠷᠬᠡ
ᠵᠠᠯᠠᠭᠤ ᠡᠷᠡ ᠶᠠᠳᠠᠷᠠᠵᠤ ᠬᠥᠯᠥᠰᠥ ᠪᠠᠬᠠᠨ ᠭᠠᠷᠴᠠᠢ ᠃
ᠵᠠᠷᠤᠭᠠ ᠦᠭᠡᠢ ᠰᠢᠨᠡ ᠬᠢᠲᠤᠭᠠ ᠪᠠᠨ ᠬᠡᠳᠦ ᠤᠳᠠᠭᠠ ᠪᠢᠯᠡᠭᠦᠳᠡᠵᠡᠢ ᠃
ᠨᠠᠷᠠ ᠤᠨᠠᠲᠠᠯᠠ ᠨᠣᠴᠣᠯᠳᠤᠭᠠᠳ ᠳᠥᠩᠭᠡᠵᠦ ᠪᠦᠭᠦᠳᠡ ᠶ᠋ᠢ ᠱᠠᠭᠠᠯᠵᠠᠢ ᠃
ᠨᠠᠨᠳᠢᠩᠨᠠᠵᠤ ᠳᠣᠲᠣᠷᠠ ᠨᠢ ᠪᠠᠭᠯᠠᠭᠰᠠᠨ ᠨᠢ ᠡᠢᠮᠦ ᠨᠢᠭᠡ ᠦᠭᠡ ᠯᠡ ᠪᠠᠢᠵᠠᠢ ᠃
《 ᠮᠤᠩᠬᠠᠭ ᠬᠥᠮᠦᠨ ᠪᠣᠯ ᠬᠣᠣᠷᠠᠳᠠᠭᠳᠠ !》
ᠡᠨᠡ ᠦᠭᠡ ᠨᠢ ᠬᠠᠷᠢᠨ ᠦᠰᠦ ᠣᠷᠭᠣᠴᠢᠬᠠᠭᠰᠠᠨ ᠪᠠᠢᠵᠠᠢ ᠭᠡᠨᠡ ᠰᠢᠦ !