ᠬᠡᠦᠬᠡᠨ ᠮᠢᠨᠢ - ᠠᠷᠲᠠᠢ Хүүхэн минь - Артай
235ᠬᠡᠦᠬᠡᠨ ᠮᠢᠨᠢ
ᠬᠡᠦᠬᠡᠨ ᠮᠢᠨᠢ! ᠪᠢ ᠴᠢᠮᠠᠶ᠋ᠢ ᠬᠥᠲᠥᠯᠦᠭᠡᠳ ᠶᠠᠪᠤᠵᠤ ᠪᠠᠢᠨᠠ ᠃
ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠶ᠋ᠢ ᠬᠥᠲᠥᠯᠴᠢᠬᠡᠭᠰᠡᠨ ᠰᠢᠭ ᠰᠠᠨᠠᠭᠳᠠᠨᠠ ᠰᠢᠦ ᠠᠪᠤ ᠳ᠋ᠤᠨᠢ ᠃
《 ᠠᠪᠤ ᠨᠠᠮᠠᠶ᠋ᠢ ᠬᠥᠲᠥᠯᠦᠭᠡᠳ ᠬᠥᠯ ᠳ᠋ᠦ᠍ ᠣᠷᠣᠭᠤᠯᠤᠭᠰᠠᠨ 》 ᠭᠡᠵᠦ ᠬᠣᠵᠢᠮ ᠪᠦᠦ ᠲᠡᠭᠡᠵᠦ ᠬᠡᠯᠡᠭᠡᠷᠡᠢ ᠬᠡᠦᠬᠡᠨ ᠮᠢᠨᠢ ᠃
ᠠᠯᠬᠤᠭᠠᠨ ᠳ᠋ᠤ᠌ ᠴᠢᠨᠢ ᠪᠦᠳᠦᠴᠢᠭᠦᠯᠵᠦ ᠪᠠᠢᠭᠰᠠᠨ ᠠᠩ ᠵᠠᠪᠰᠠᠷ ᠂ ᠠᠷᠵᠠᠭᠠᠷ ᠴᠢᠯᠠᠭᠤ ᠭᠣᠮᠣᠳᠠᠴᠢᠬᠠᠬᠤ ᠶᠤᠮ ᠰᠢᠦ ᠂ ᠬᠡᠦᠬᠡᠨ ᠮᠢᠨᠢ ᠃
ᠮᠢᠨᠦ ᠬᠡᠦᠬᠡᠨ ᠳ᠋ᠦ᠍ ᠨᠢᠭᠡ ᠡᠷᠢᠶᠡᠨ ᠪᠥᠮᠪᠥᠭᠡ ᠲᠡᠢ ᠂
ᠡᠷᠢᠶᠡᠨ ᠪᠥᠮᠪᠦᠭᠡᠨ ᠳ᠋ᠡᠭᠡᠨ ᠲᠤᠩ ᠬᠠᠢᠷᠠᠲᠠᠢ ᠃
ᠡᠬᠢᠯᠡᠭᠡᠳ ᠥᠩᠭᠡ ᠲᠠᠨᠢᠵᠤ ᠪᠠᠢ ᠭᠡᠵᠦ
ᠡᠨᠡ ᠪᠥᠮᠪᠥᠭᠡ ᠴᠢᠨᠢ ᠵᠢᠭᠠᠵᠤ ᠪᠠᠢᠨᠠ ᠤᠤ ⁈
ᠠ᠋ ᠬᠥᠭᠡᠷᠦᠬᠦᠢ ᠬᠡᠦᠬᠡᠨ ᠮᠢᠨᠢ ᠂ ᠬᠣᠷᠸ᠋ᠠ ᠪᠠᠰᠠ ᠡᠷᠢᠶᠡᠨ ᠰᠢᠦ !
ᠡᠷᠢᠶᠡᠨ ᠬᠣᠷᠸᠠ ᠭᠠᠳᠠᠨᠠ ᠪᠠᠨ ᠡᠷᠢᠶᠡᠨ ᠂ ᠳᠣᠲᠣᠷᠠ ᠪᠠᠨ ᠪᠠᠰᠠ ᠡᠷᠢᠶᠡᠨ ᠰᠢᠦ !
ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠪᠠᠯ ᠰᠢᠲᠠᠭᠠᠨᠠ ᠭᠡᠵᠦ
ᠭᠠᠯ ᠴᠢᠮᠠ ᠳ᠋ᠤ᠌ ᠵᠢᠭᠠᠬᠤ ᠪᠣᠢ ᠳᠠ ᠂ ᠬᠡᠦᠬᠡᠨ ᠮᠢᠨᠢ !
ᠦᠨᠡᠨ ᠭᠡᠵᠦ ᠡᠪᠦᠭᠡᠷᠡᠳᠡᠭ ᠦᠭᠡᠢ ᠪᠠᠭᠰᠢ ᠪᠣᠢ ᠶᠤᠮ ᠰᠢᠦ ᠂
ᠦᠭᠡ ᠶ᠋ᠢ ᠨᠢ ᠰᠠᠢᠬᠠᠨ ᠰᠣᠨᠣᠰᠴᠤ ᠶᠠᠪᠤᠭᠠᠷᠠᠢ ᠂ ᠬᠡᠦᠬᠡᠨ ᠮᠢᠨᠢ !
ᠠᠪᠤ ᠨᠢ ᠳᠤᠷᠠᠲᠠᠢ ᠠᠳᠠᠰᠬᠠ ᠰᠢᠭ᠋ ᠲᠤᠷᠠᠵᠤ ᠠᠷᠤᠭ ᠰᠢᠭ᠋ ᠪᠥᠭᠲᠥᠢᠵᠦ
ᠠᠯᠢ ᠪᠣᠯᠬᠤ ᠪᠠᠷ ᠴᠢᠮᠠᠶ᠋ᠢ ᠬᠥᠮᠦᠨ ᠪᠣᠯᠭᠠᠵᠤ ᠲᠠᠯᠪᠢᠨᠠ ᠃
ᠲᠡᠭᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠮᠢᠨᠢ ᠬᠣᠵᠢᠮ ᠲᠣᠮᠣ ᠪᠣᠯᠴᠢᠬᠠᠭᠠᠳ ᠪᠤᠤ ᠯᠠ
《 ᠲᠡᠩᠬᠡᠭᠡ ᠮᠠᠭᠤᠳᠠᠬᠤ ᠳ᠋ᠠᠭᠠᠨ ᠠᠮᠤᠷ ᠬᠥᠨᠵᠢᠯᠡ ᠪᠡᠨ ᠬᠤᠴᠢᠭᠤᠯᠬᠤ ᠪᠠᠷ ᠯᠠ ᠮᠠᠨ ᠤ᠋ ᠠᠪᠤ
ᠲᠡᠭᠡᠭᠰᠡᠨ ᠪᠠᠢᠵᠤ ᠳᠠ 》 ᠭᠡᠴᠦ ᠪᠤᠷᠤᠭᠤ ᠣᠢᠯᠠᠭᠠᠭᠠᠷᠠᠢ !
《ᠲᠡᠷᠡ ᠶᠠᠭᠤ ᠪᠣᠢ ?》 ᠭᠡᠵᠦ ᠬᠡᠦᠬᠡᠨ ᠮᠢᠨᠢ ᠳᠡᠭᠡᠭᠰᠢ ᠵᠢᠭᠠᠯᠠ ᠃
《 ᠲᠡᠷᠡ ᠤᠤ ? ᠡᠬᠡ ᠣᠷᠣᠨ ᠤ᠋ ᠴᠢᠨᠢ ᠴᠡᠯᠮᠡᠭ ᠬᠥᠬᠡ ᠲᠡᠭᠷᠢ ᠪᠠᠢᠨᠠ ᠠ᠋ ᠂ ᠬᠡᠦᠬᠡᠨ ᠮᠢᠨᠢ ! 》
《 ᠳᠡᠭᠡᠷᠡ ᠨᠢ ᠶᠠᠭᠤ ᠪᠠᠢᠨᠠ ᠪᠣᠢ ? 》
《 ᠳᠡᠭᠡᠷᠡ ᠨᠢ ᠡᠦᠲᠦ ᠪᠠᠢᠨᠠ ᠂ ᠬᠡᠦᠬᠡᠨ ᠮᠢᠨᠢ ! 》
《 ᠡᠦᠲᠦᠨ ᠳᠡᠭᠡᠷᠡ ᠶᠠᠭᠤ ᠪᠠᠢᠨᠠ ᠪᠣᠢ ? 》
《 ᠁ᠣᠴᠢᠭᠰᠠᠨ ᠬᠣᠢᠨᠠ ᠴᠢᠨᠢ ᠠᠪᠤ ᠨᠢ ᠴᠢᠮᠠ ᠠ᠋ᠴᠠ ᠠᠰᠠᠭᠤᠶᠠ ᠲᠠ ᠂ ᠬᠡᠦᠬᠡᠨ ᠮᠢᠨᠢ ! 》
ᠬᠡᠦᠬᠡᠨ ᠮᠢᠨᠢ ᠂ ᠪᠢ ᠴᠢᠨᠦ ᠲᠥᠯᠥᠭᠡ ᠰᠢᠯᠦᠭ ᠪᠢᠴᠢᠵᠦ ᠪᠠᠢᠨᠠ ᠃
ᠴᠢᠮᠠ ᠰᠢᠭ ᠬᠡᠦᠬᠡᠳ ᠦ᠋ᠨ ᠲᠥᠯᠥᠭᠡ ᠠᠪᠤ ᠨᠢ ᠰᠢᠯᠦᠭ ᠪᠢᠴᠢᠳᠡᠭ ᠶᠦ᠍ᠮ ᠠ᠋ ᠃
ᠮᠢᠩᠭᠠ ᠲᠦᠮᠡᠨ ᠰᠢᠯᠦᠭ ᠦ᠋ᠨ ᠦᠭᠡᠰ ᠪᠠᠶᠠᠷᠲᠤ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠴᠢᠳᠬᠤᠯᠠᠵᠤ ᠪᠠᠢᠳᠠᠭ ᠶᠤᠮ ᠠ᠋ ᠃
ᠮᠠᠷᠭᠠᠰᠢ ᠶ᠋ᠢᠨ ᠲᠥᠯᠥᠭᠡ ᠂ ᠮᠠᠨ ᠤ᠋ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠲᠥᠯᠥᠭᠡ ᠪᠢᠴᠢᠭᠡᠳ ᠪᠠᠷᠠᠬᠤ ᠦᠭᠡᠢ ᠰᠢᠯᠦᠭ ᠨᠠᠳᠠ ᠪᠠᠢᠳᠠᠭ ᠶᠤᠮ ᠠ᠋ ᠃
ᠬᠠᠪᠤᠷ ᠤ᠋ᠨ ᠨᠣᠭᠣᠭᠠ ᠰᠢᠭ᠋ ᠨᠠᠢᠷᠠᠭ ᠤ᠋ᠨ ᠮᠢᠨᠢ ᠳᠤᠮᠳᠠᠭᠤᠷ ᠳᠡᠷᠪᠡᠵᠦ ᠦᠰᠦᠭᠡᠷᠡᠢ ᠂ ᠬᠡᠦᠬᠡᠨ ᠮᠢᠨᠢ !
ᠬᠠᠮᠤᠭ ᠡᠷᠡᠮᠡᠯᠵᠡᠯ ᠦ᠋ᠨ ᠮᠢᠨᠢ ᠬᠠᠯᠠᠭᠤᠨ ᠰᠡᠳᠬᠢᠯ ᠊ᠢ ᠰᠢᠮᠡᠵᠦ ᠦᠰᠦᠭᠡᠷᠡᠢ ᠂ ᠬᠡᠦᠬᠡᠳ ᠦ᠋ᠳ ᠮᠢᠨᠢ !