ᠳᠤᠷᠠᠯᠠᠯ - ᠠᠷᠲᠠᠢ Дурлал - Артай
346ᠳᠤᠷᠠᠯᠠᠯ
1
ᠭᠣᠣᠯ ᠤ᠋ᠨ ᠬᠠᠵᠠᠭᠤᠳᠠ ᠪᠢᠳᠡ ᠬᠣᠶᠠᠭᠤᠯᠠ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠠ᠋ ᠂
ᠭᠣᠣᠯ ᠣᠷᠣᠭᠰᠢ ᠪᠠᠨ ᠶᠠᠪᠤᠬᠤ ᠪᠠᠨ ᠪᠠᠢᠴᠢᠬᠠᠭᠠᠳ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠠᠵᠠᠭᠤᠳᠠ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠠ᠋ ᠃
ᠲᠡᠷᠡ ᠡᠳᠦᠷ ᠪᠣᠷᠣᠭᠠᠯᠠᠮᠠᠷ ᠪᠠᠢᠭᠰᠠᠨ ᠂ ᠴᠤᠪᠠ ᠪᠠᠨ ᠠᠪᠤᠭᠠᠴᠢᠭᠰᠠᠨ᠃
ᠲᠡᠭᠡᠬᠦ ᠳ᠋ᠦ᠍ ᠪᠣᠷᠣᠭᠠ ᠣᠷᠣᠭᠠ ᠦᠭᠡᠢ ᠰᠢᠦ ᠂ ᠴᠡᠯᠮᠡᠭᠡᠳ ᠯᠡ ᠥᠭᠴᠢᠬᠡᠭᠰᠡᠨ ᠠ᠋ ᠃
ᠲᠡᠭᠷᠢ ᠪᠢᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠮᠡᠳᠡᠵᠦ ᠪᠠᠢᠭᠰᠠᠨ ᠠ᠋ ᠁
2
《ᠬᠠᠢᠷᠠᠲᠠᠢ ᠤᠤ ?》 ᠭᠡᠵᠦ ᠪᠢ ᠴᠢᠮᠠ ᠠ᠋ᠴᠠ ᠭᠠᠭᠴᠠ ᠪᠢᠰᠢ ᠤᠳᠠᠭᠠ ᠠᠰᠠᠭᠤᠭᠰᠠᠨ ᠃
《 ᠬᠠᠢᠷᠠᠲᠠᠢ !》ᠭᠡᠵᠦ ᠴᠢ ᠨᠠᠳᠠ ᠭᠠᠭᠴᠠ ᠤᠳᠠᠭᠠ ᠴᠤ᠌ ᠬᠡᠯᠡᠭᠡ ᠦᠭᠡᠢ ᠠ᠋ ᠃
ᠪᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠶᠠ ᠭᠡᠵᠦ ᠰᠣᠨᠢᠨ ᠤᠩᠰᠢᠵᠤ ᠴᠢᠳᠠᠬᠤ ᠪᠣᠯᠤᠭᠰᠠᠨ ᠃ ᠰᠤᠸᠠᠮᠫᠠᠨ ᠪᠣᠳᠣᠵᠤ ᠴᠢᠳᠠᠬᠤ ᠪᠣᠯᠤᠭᠰᠠᠨ ᠃ ᠪᠠᠷᠢᠭᠠᠳᠠ ᠶ᠋ᠢᠨ ᠥᠨᠥ 《55 》 ᠶ᠋ᠢ ᠴᠦ᠍ ᠪᠠᠷᠢᠪᠠᠯ ᠬᠥᠳᠡᠯᠭᠡᠴᠢᠬᠦ ᠪᠣᠯᠤᠭᠰᠠᠨ ᠠ᠋ ᠃
ᠪᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠶᠠ ᠭᠡᠵᠦ ᠠᠷᠢᠬᠢᠨ ᠳ᠋ᠤ᠌ ᠳᠡᠪᠲᠦᠵᠦ ᠠᠭᠰᠤᠮ ᠲᠠᠯᠪᠢᠳᠠᠭ ᠶᠠᠨ ᠪᠦᠷ ᠪᠠᠢᠭᠠᠳ ᠠᠳᠤᠭᠤᠨ ᠤ᠋ ᠡᠷᠯᠢᠭ ᠂ᠠᠵᠢᠯ ᠤ᠋ᠨ ᠳᠠᠷᠤᠯᠭᠠ ᠶᠠᠪᠤᠭᠰᠠᠨ ᠃ᠬᠥᠳᠡᠭᠡ ᠲᠤᠭᠤᠯᠯᠠᠭᠰᠠᠨ ᠬᠦᠷᠦᠭᠴᠢ ᠦᠨᠢᠶᠡᠨ ᠦ᠌ ᠴᠢᠨᠢ ᠲᠤᠭᠤᠯ ᠢ᠋ ᠬᠥᠪᠥᠩᠲᠡᠢ ᠳᠡᠪᠡᠯ ᠳ᠋ᠡᠭᠡᠨ ᠪᠣᠭᠣᠭᠠᠳ ᠭᠡᠷ ᠲᠦ᠍ ᠴᠢᠨᠢ ᠠᠪᠴᠢᠷᠠᠵᠤ ᠦᠭᠭᠦᠭᠰᠡᠨ ᠠ᠋ ᠁
ᠲᠡᠭᠡᠬᠦ ᠳ᠋ᠦ᠍ ᠴᠢ ᠨᠠᠳᠠ
ᠲᠡᠷᠡ ᠦᠭᠡ ᠶ᠋ᠢ ᠱᠠᠩᠨᠠᠭᠠ ᠦᠭᠡᠢ ᠃
ᠲᠡᠷᠡ ᠦᠭᠡ ᠶ᠋ᠢ ᠲᠩᠷᠢ ᠪᠤᠯᠢᠶᠠᠴᠢᠬᠠᠪᠠ ᠤᠤ ?
ᠲᠡᠩᠴᠡᠬᠦ ᠬᠢᠷᠢ ᠦᠭᠡᠢ ᠲᠡᠨᠡᠭ ᠪᠣᠳᠣᠯ ᠮᠢᠨᠢ ᠦᠷᠭᠦᠭᠡᠴᠢᠬᠡᠪᠡ ᠦᠦ ?
ᠠᠯᠢ ᠦᠭᠡᠢᠪᠡᠯ ᠬᠣᠩᠭᠣᠷ ᠮᠢᠨᠢ ᠂ ᠨᠠᠮᠠᠶ᠋ᠢ
ᠭᠡᠨᠡᠳᠲᠡᠬᠡᠨ ᠣᠯᠤᠭᠠᠳ ᠰᠣᠨᠣᠰᠴᠢᠬᠠᠪᠠᠯ ᠨᠣᠴᠣᠴᠢᠬᠠᠬᠤ ᠠ᠋ᠴᠠ ᠠᠶᠤᠵᠤ ᠪᠠᠢᠨᠠ ᠤᠤ ?
ᠭᠡᠳᠡᠷᠭᠦ ᠪᠡᠨ ᠰᠠᠨᠠᠭᠠ ᠠᠮᠤᠷᠴᠢᠬᠠᠭᠠᠳ ᠨᠣᠷᠴᠢᠬᠠᠬᠤ ᠠ᠋ᠴᠠ ᠵᠣᠪᠠᠵᠤ ᠪᠠᠢᠨᠠ ᠤᠤ ?
ᠡᠰᠡᠬᠦᠯᠡ ᠴᠢ ᠮᠢᠨᠢ ᠂ ᠬᠠᠷᠢᠨ
ᠡᠨᠡ ᠦᠭᠡ ᠪᠡᠨ ᠨᠥᠭᠡᠵᠦ ᠲᠠᠯᠪᠢᠭᠠᠳ
ᠡᠷᠡ ᠵᠣᠷᠢᠭ ᠮᠢᠨᠢ ᠰᠤᠯᠠᠷᠠᠬᠤ ᠦᠶᠡ ᠳ᠋ᠦ᠍
ᠡᠯᠢᠭᠡ ᠵᠢᠷᠦᠬᠡ ᠮᠢᠨᠢ ᠰᠡᠪᠲᠦᠬᠦ ᠴᠠᠭ ᠲᠤ᠌
ᠡᠷᠴᠢᠯᠡᠵᠦ ᠭᠠᠩᠨᠠᠵᠤ ᠴᠢᠳᠠᠬᠤ ᠡᠮ ᠪᠣᠯᠭᠠᠨ ᠨᠠᠢᠷᠠᠵᠤ ᠪᠠᠢᠨᠠ ᠤᠤ ⁈
3
ᠴᠢᠮᠠ ᠳ᠋ᠤ᠌ ᠯᠠ ᠳᠤᠷᠠᠯᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠣᠷᠸ᠋ᠠ ᠶ᠋ᠢᠨ ᠬᠡᠦᠬᠡᠨ ᠨᠦ᠍ᠭᠦᠳ ᠴᠥᠮ ᠠᠯᠠᠭᠠ ᠪᠣᠯᠤᠭᠠᠳ ᠦᠭᠴᠢᠬᠡᠯᠡ ᠃
ᠨᠠᠮᠤᠷ ᠤ᠋ᠨ ᠭᠠᠯᠠᠭᠤ ᠰᠢᠭ᠋ ᠪᠤᠴᠠᠭᠠᠳ
ᠪᠤᠴᠠᠭᠠᠳ ᠠᠯᠠᠭᠠ ᠪᠣᠯᠤᠭᠠ ᠦᠭᠡᠢ ᠠ᠋ ᠂
ᠨᠠᠷᠠ ᠰᠢᠭ᠋ ᠰᠠᠢᠬᠠᠨ ᠵᠢᠰᠦᠨ ᠳ᠋ᠦ᠍ ᠴᠢᠨᠢ
ᠵᠢᠪᠦᠭᠡᠳ ᠵᠢᠪᠦᠭᠡᠳ ᠯᠡ ᠠᠯᠠᠭᠠ ᠪᠣᠯᠴᠢᠬᠠᠯᠠ ᠃
ᠴᠢᠮᠠᠲᠤ ᠳᠤᠷᠠᠯᠠᠭᠰᠠᠨ ᠮᠢᠨᠦ ᠵᠥᠪ ᠃
ᠴᠢᠮᠠᠲᠤ ᠯᠠ ᠳᠤᠷᠠᠯᠠᠭᠤᠯᠬᠤ ᠪᠠᠷ ᠮᠢᠨᠦ ᠵᠠᠯᠠᠭᠤ ᠢᠷᠡᠵᠡᠢ ᠃ ᠴᠢᠨᠦ ᠵᠠᠯᠠᠭᠤ ᠨᠠᠰᠤ ᠢᠷᠡᠭᠦᠯᠵᠡᠢ ᠃
ᠨᠠᠮᠠᠶ᠋ᠢ ᠯᠠ ᠳᠤᠷᠠᠯᠠᠭᠤᠯᠬᠤ ᠪᠠᠷ ᠴᠢ ᠬᠣᠷᠸ᠋ᠠ ᠳ᠋ᠤ᠌ ᠵᠠᠶᠠᠭᠠᠵᠠᠢ ᠃ ᠬᠣᠷᠸ᠋ᠠ ᠨᠠᠳᠠ ᠵᠠᠶᠠᠭᠠᠵᠠᠢ ᠃
ᠴᠢᠮᠠᠲᠤ ᠳᠤᠷᠠᠯᠠᠭᠰᠠᠨ ᠮᠢᠨᠦ ᠵᠥᠪ ᠃
ᠴᠢᠮᠠᠲᠤ ᠳᠤᠷᠠᠯᠠᠭᠰᠠᠨ ᠮᠢᠨᠦ ᠪᠤᠷᠤᠭᠤ ᠃
ᠲᠡᠷᠡ ᠡᠳᠦᠷ ᠡᠴᠡ ᠯᠡ ᠪᠢ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠭᠰᠠᠨ ᠃
ᠵᠣᠪᠠᠬᠤ ᠳᠤᠷᠠᠲᠠᠢ ᠴᠤ᠌ ᠪᠣᠯᠤᠭᠰᠠᠨ ᠃
ᠮᠢᠨᠦ ᠰᠡᠳᠬᠢᠯ ᠶᠡᠷᠦᠨᠢ ᠡᠢᠮᠦ ᠬᠡᠪᠡᠷᠡᠭ ᠪᠠᠢᠭᠠ ᠦᠭᠡᠢ ᠃
ᠮᠢᠨᠦ ᠰᠠᠷᠠᠯ ᠶᠡᠷᠦᠨᠢ ᠲᠡᠢᠮᠦ ᠰᠣᠷᠭᠣᠭ ᠦᠭᠡᠢ ᠃
ᠡᠷᠡ ᠬᠥᠮᠦᠨ ᠪᠢ
ᠡᠨᠡ ᠵᠣᠪᠠᠯᠠᠩ ᠳ᠋ᠤ᠌ ᠯᠠ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠠᠯᠳᠠᠭᠰᠠᠨ ᠃
ᠴᠢᠮᠠᠲᠤ ᠳᠤᠷᠠᠯᠠᠭᠰᠠᠨ ᠮᠢᠨᠦ ᠪᠤᠷᠤᠭᠤ ᠃
4
ᠪᠣᠯᠵᠣᠭᠠ ᠰᠠᠢᠬᠠᠨ᠃
ᠪᠤᠷᠠᠮ ᠰᠢᠭ᠋ ᠰᠠᠢᠬᠠᠨ ᠠ᠋ ᠃
ᠴᠢᠮᠠᠶ᠋ᠢ ᠬᠦᠯᠢᠶᠡᠭᠡᠳ ᠵᠢᠷᠦᠬᠡ ᠲᠦᠭᠰᠢᠬᠦ ᠰᠠᠢᠬᠠᠨ ᠃
ᠴᠠᠭᠠᠨ ᠤᠯᠢᠶᠠᠰᠤᠨ ᠳ᠋ᠤ᠌ ᠢᠴᠢᠭᠡᠳ ᠨᠢᠭᠤᠷ ᠢ᠋ᠶ᠋ᠠᠨ ᠨᠠᠭᠠᠬᠤ ᠰᠠᠢᠬᠠᠨ ᠠ᠋ ᠃
ᠴᠢ ᠵᠢᠷᠭᠠᠯ ᠲᠠᠢ ᠴᠣᠭ ᠢᠷᠡᠳᠡᠭ ᠪᠠᠢᠭᠰᠠᠨ ᠃
ᠪᠢ ᠰᠣᠭᠲᠣᠳᠠᠭ ᠪᠠᠢᠭᠰᠠᠨ ᠃
ᠴᠢ ᠳᠠᠯᠠᠢ ᠲᠠᠢ ᠴᠣᠭ ᠢᠷᠡᠳᠡᠭ ᠪᠠᠢᠭᠰᠠᠨ ᠃
ᠪᠢ ᠵᠢᠪᠪᠦᠳᠡᠭ ᠪᠠᠢᠭᠰᠠᠨ ᠃
ᠴᠢ ᠴᠡᠩᠬᠡᠷ ᠳᠤᠷᠳᠤᠩ ᠠᠯᠴᠢᠭᠤᠷ ᠵᠠᠩᠭᠢᠳᠴᠢᠬᠠᠭᠠᠳ ᠢᠷᠡᠳᠡᠭ ᠪᠠᠢᠭᠰᠠᠨ ᠃
ᠴᠢᠨᠦ ᠡᠪᠦᠳᠦᠭ ᠢ᠋ ᠳᠡᠷᠡᠯᠡᠭᠡᠳ ᠪᠢ
ᠴᠡᠩᠬᠡᠷ ᠲᠡᠭᠷᠢ ᠶ᠋ᠢ ᠪᠠᠷᠠᠯᠠᠳᠠᠭ ᠪᠠᠢᠭᠰᠠᠨ ᠃
ᠲᠡᠭᠷᠢ ᠨᠢ ᠴᠢ ᠪᠠᠢᠭᠰᠠᠨ ᠃
ᠲᠡᠷᠡ ᠨᠠᠷᠠ ᠴᠢᠨᠦ ᠢᠨᠢᠶᠡᠳᠦ ᠪᠠᠢᠭᠰᠠᠨ ᠃
ᠲᠡᠢᠮᠦ ᠠ᠋ ! ᠮᠢᠨᠦ ᠨᠠᠷᠠ ᠪᠠᠢᠭᠰᠠᠨ --
ᠭᠠᠵᠠᠷ ᠪᠦᠬᠦᠨ ᠳ᠋ᠦ᠍ ᠲᠦᠭᠡᠭᠡᠳᠡᠭ ᠦᠭᠡᠢ
ᠭᠠᠯ ᠰᠢᠯ ᠰᠢᠭ ᠨᠠᠳᠠ ᠳᠡᠭᠡᠷᠡ ᠯᠡ ᠲᠥᠪᠯᠡᠷᠡᠳᠡᠭ ᠨᠠᠷᠠ ᠪᠠᠢᠭᠰᠠᠨ ᠃
ᠪᠤᠷᠭᠠᠰᠤ ᠰᠢᠭ᠋ ᠨᠠᠮᠠᠶ᠋ᠢ ᠰᠢᠲᠠᠭᠠᠭᠠ ᠦᠭᠡᠢ
ᠪᠣᠯᠣᠳ ᠰᠢᠭ᠋ ᠨᠠᠮᠠᠶ᠋ᠢ ᠬᠠᠲᠠᠭᠠᠳᠠᠭ᠃
ᠨᠠᠷᠠ -- ᠴᠢ ᠪᠠᠢᠭᠰᠠᠨ ᠠ᠋ ᠃
5
ᠬᠣᠶᠠᠭᠤᠯᠠ ᠪᠠᠨ ᠬᠤᠷᠢᠮᠯᠠᠶᠠ ᠭᠡᠵᠦ ᠴᠢ ᠬᠡᠯᠡᠭᠰᠡᠨ ᠃
ᠬᠣᠷᠭᠣ ᠲᠠᠢ ᠬᠤᠷᠢᠮᠯᠠᠶᠠ ᠭᠡᠵᠦ ᠴᠢ ᠬᠡᠯᠡᠭᠡ ᠦᠭᠡᠢ ᠃
ᠬᠣᠷᠢᠨ ᠼᠦᠨ ᠦ᠌ ᠪᠤᠳᠤᠭᠲᠤ ᠵᠢᠷᠤᠭᠲᠤ ᠷᠠᠳᠢᠣ᠋ ᠲᠠᠢ ᠃
ᠬᠣᠶᠠᠷ ᠮᠢᠩᠭᠠᠨ ᠲᠥᠭᠥᠷᠢᠭ ᠦ᠋ᠨ ᠳᠠᠭᠤᠨ ᠰᠢᠩᠭᠡᠭᠡᠬᠦ ᠮᠠᠰᠢᠨ ᠲᠠᠢ ᠃
ᠳᠥᠴᠢ ᠲᠠᠪᠢᠨ ᠮᠣᠳᠣ ᠲᠡᠮᠦᠷ ᠬᠥᠯ ᠲᠡᠢ ᠃
ᠳᠥᠷᠪᠡᠨ ᠴᠠᠭ ᠤ᠋ᠨ ᠭᠣᠶᠣ ᠳᠡᠭᠵᠢᠨ ᠵᠠᠰᠠᠯ ᠲᠠᠢ
ᠳᠡᠭᠡᠷᠡ ᠨᠢ ᠪᠠᠰᠠ ᠴᠠᠬᠢᠯᠭᠠᠨ ᠬᠥᠷᠥᠭᠡᠭᠴᠢ ᠲᠡᠢ
ᠳᠡᠷᠡ ᠨᠢᠭᠡᠳᠦᠶᠡ ᠭᠡᠵᠦ ᠴᠢ ᠰᠠᠨᠠᠭᠠ ᠦᠭᠡᠢ ᠃
ᠴᠢᠮᠠ ᠲᠠᠢ ᠪᠠᠨ ᠰᠠᠭᠤᠨᠠ ᠭᠡᠵᠦ ᠴᠢ ᠢᠨᠢᠶᠡᠭᠰᠡᠨ ᠃
ᠴᠠᠯᠢᠩ ᠲᠠᠢ ᠰᠠᠭᠤᠨᠠ ᠭᠡᠵᠦ ᠴᠢ ᠬᠠᠨᠢᠶᠠᠭᠠ ᠦᠭᠡᠢ ᠃
ᠺᠢᠨᠣ᠋ ᠲᠣᠭᠯᠠᠳᠠᠭ ᠭᠣᠣᠯ ᠪᠠᠭᠠᠲᠤᠷ ᠪᠢᠰᠢ ᠪᠡᠨ ᠪᠢ ᠮᠡᠳᠡᠨᠡ ᠃
ᠺᠢᠨᠣ᠋ ᠣᠷᠳᠣᠨ ᠴᠡᠪᠡᠷᠯᠡᠳᠡᠭ ᠭᠣᠣᠯ ᠪᠠᠭᠠᠲᠤᠷ ᠢ᠋ ᠮᠢᠨᠢ ᠴᠢ ᠴᠦ᠍ ᠮᠡᠳᠡᠨᠡ ᠃
ᠬᠠᠭᠠᠰ ᠵᠠᠩ ᠭᠡᠷ ᠲᠦ᠍ ᠡᠵᠢ ᠲᠡᠢ ᠪᠡᠨ ᠰᠠᠭᠤᠳᠠᠭ ᠢ᠋ᠶ᠋ᠠᠨ ᠪᠢ ᠮᠡᠳᠡᠨᠡ᠃
ᠬᠠᠳᠠᠭᠠᠯᠠᠮᠵᠢ ᠳᠡᠭᠡᠷᠡ ᠲᠠᠪᠢᠨ ᠭᠤᠷᠪᠠᠨ ᠲᠥᠭᠥᠷᠢᠭ ᠲᠡᠢ ᠶ᠋ᠢ ᠴᠢ ᠴᠦ᠍ ᠮᠡᠳᠡᠨᠡ ᠃
ᠬᠠᠳᠠᠮ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠵᠡᠷᠭᠡ ᠲᠡᠢ
ᠬᠠᠷᠠ ᠰᠢᠷ ᠭᠢᠯᠲᠠᠭᠠᠨᠠᠭᠰᠠᠨ ᠰᠠᠭᠤᠳᠠᠯ ᠤ᠋ᠨ ᠪᠠᠭᠠ ᠮᠠᠰᠢᠨ ᠲᠠᠢ
ᠬᠠᠨᠢᠯᠠᠵᠤ ᠰᠠᠭᠤᠨᠠ ᠭᠡᠵᠦ ᠴᠢ ᠬᠦᠰᠡᠭᠡ ᠦᠭᠡᠢ
ᠬᠠᠮᠢᠭᠠ ᠪᠠᠢᠳᠠᠭ ᠪᠣᠯ ᠭᠡᠵᠦ ᠴᠢ ᠡᠷᠢᠭᠡ ᠦᠭᠡᠢ
ᠬᠠᠢᠷᠠᠲᠠᠢ ᠴᠢᠮᠠ ᠲᠠᠢ ᠪᠠᠨ ᠯᠠ ᠭᠡᠵᠦ ᠴᠢ ᠢᠨᠢᠶᠡᠭᠰᠡᠨ ᠠ᠋ ᠃
ᠴᠢ ᠨᠠᠳᠠ ᠦᠨᠡᠨ ᠳᠤᠷᠠᠯᠠᠵᠠᠢ ᠃
ᠴᠢ ᠬᠥᠮᠦᠨ ᠪᠣᠯᠬᠣᠷ ᠬᠥᠮᠦᠨ ᠳ᠋ᠦ᠍ ᠳᠤᠷᠠᠯᠠᠵᠠᠢ ᠃
6
ᠪᠢ ᠴᠢᠮᠠ ᠳ᠋ᠤ᠌ ᠬᠠᠢᠷᠠᠲᠠᠢ ᠶ᠋ᠢ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠃
ᠮᠥᠰᠥ ᠲᠡᠢ ᠣᠷᠭᠢᠯ ᠳᠡᠭᠡᠷᠡ ᠬᠠᠷᠠᠭᠤᠯ ᠤ᠋ᠨ ᠪᠠᠢᠷᠢᠨ ᠳ᠋ᠤ᠌ ᠡᠨᠡ ᠨᠢᠭᠤᠴᠠ ᠶ᠋ᠢ ᠮᠢᠨᠢ ᠲᠠᠭᠠᠷᠠᠴᠢᠬᠠᠬᠤ ᠪᠣᠢ ᠭᠡᠵᠦ ᠳᠤᠯᠠᠭᠠᠯᠠᠵᠤ ᠶᠠᠪᠤᠭᠰᠠᠨ ᠡᠯᠢᠭᠡᠪᠴᠢ ᠮᠢᠨᠢ ᠮᠡᠳᠡᠨᠡ ᠃ ᠡᠩᠭᠡᠷ ᠢ᠋ ᠨᠢ ᠵᠥᠷᠢᠭᠦᠯᠵᠦ ᠲᠣᠪᠴᠢᠯᠠᠭᠰᠠᠨ ᠴᠡᠷᠢᠭ ᠦ᠋ᠨ ᠨᠣᠭᠣᠭᠠᠨ ᠳ᠋ᠠᠴᠠᠩ ᠮᠢᠨᠢ ᠮᠡᠳᠡᠨᠡ ᠃
ᠪᠢ ᠴᠢᠮᠠ ᠳ᠋ᠤ᠌ ᠬᠠᠢᠷᠠᠲᠠᠢ ᠶ᠋ᠢ ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠡᠬᠡ ᠣᠷᠣᠨ ᠮᠢᠨᠢ ᠮᠡᠳᠡᠨᠡ ᠃ ᠡᠩᠬᠦᠷᠡᠢ ᠴᠢ ᠮᠢᠨᠢ ᠳᠣᠲᠣᠷᠠ ᠨᠢ ᠪᠠᠭᠲᠠᠭᠰᠠᠨ ᠡᠬᠡ ᠣᠷᠣᠨ ᠮᠢᠨᠢ ᠮᠡᠳᠡᠨᠡ ᠃
ᠬᠠᠢᠷᠠᠲᠠᠢ ᠡᠬᠡ ᠣᠷᠣᠨ ᠤ᠋ ᠪᠠᠨ ᠲᠥᠯᠥᠭᠡ
ᠬᠠᠢᠷᠠᠲᠤ ᠴᠢᠨᠦᠬᠢ ᠪᠡᠨ ᠲᠥᠯᠥᠭᠡ
ᠬᠠᠷᠠᠭᠤᠯ ᠳ᠋ᠤ᠌ ᠪᠢ ᠵᠣᠭᠰᠣᠵᠤ ᠪᠠᠢᠨᠠ ᠃
ᠬᠠᠢᠷᠠ ᠪᠢ ᠮᠠᠨᠠᠵᠤ ᠪᠠᠢᠨᠠ ᠃
7
ᠥᠨᠥᠳᠥᠷ ᠴᠢᠨᠦ ᠵᠠᠬᠢᠳᠠᠯ ᠢ᠋ ᠭᠠᠷᠲᠠᠯᠠ ᠃
ᠦᠰᠦᠭ ᠨᠢ ᠴᠢᠨᠦ ᠨᠢᠳᠦ ᠰᠢᠭ ᠲᠣᠷᠮᠣᠯᠵᠠᠵᠤ ᠪᠠᠢᠯᠠ ᠃
ᠡᠨᠡ ᠵᠠᠬᠢᠳᠠᠯ ᠢ ᠪᠢᠴᠢᠬᠦ ᠳ᠋ᠦ᠍ ᠢᠴᠢᠵᠦ ᠳᠣᠭᠳᠣᠯᠤᠭᠰᠠᠨ ᠵᠢᠷᠦᠬᠡ ᠴᠢᠨᠢ ᠡᠪᠬᠡᠭᠡᠲᠡᠢ ᠴᠠᠭᠠᠰᠤᠨ ᠳ᠋ᠤ᠌ ᠪᠠᠭᠯᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠯᠠ ᠳᠠ᠃
ᠶᠠᠮᠠᠷ ᠨᠢᠭᠡᠨ ᠪᠣᠳᠣᠯ ᠳ᠋ᠤ᠌ ᠮᠢᠨᠦ ᠨᠢᠭᠤᠷ ᠤᠯᠠᠢᠯᠠ ᠃
ᠪᠢ ᠵᠠᠬᠢᠳᠠᠯ ᠢ᠋ᠶ᠋ᠠᠷ ᠴᠢᠨᠢ ᠰᠡᠩᠳᠡ ᠮᠡᠩᠳᠡ ᠨᠢᠭᠤᠷ ᠢ᠋ᠶ᠋ᠠᠨ ᠲᠠᠭᠯᠠᠪᠠ ᠃
ᠪᠢ ᠴᠢᠨᠦ ᠡᠦᠲᠦ ᠰᠢᠭ ᠴᠣᠭᠲᠠᠢ ᠬᠣᠶᠠᠷ ᠨᠢᠳᠦ ᠶ᠋ᠢ ᠣᠨᠴᠣᠭᠣᠢᠯᠠᠨ ᠳᠤᠭᠤᠢ ᠡᠭᠴᠡᠯᠡᠨ ᠰᠢᠷᠲᠡᠬᠦ ᠳᠤᠷᠠᠲᠠᠢ ᠪᠠᠢᠳᠠᠭ ᠠ᠋ ᠃
ᠲᠡᠭᠡᠬᠦ ᠳ᠋ᠦ᠍ ᠴᠢ ᠂ ᠨᠠᠷᠠᠨ ᠳ᠋ᠤ᠌ ᠪᠤᠳᠤᠭᠰᠢᠭᠰᠠᠨ ᠡᠭᠦᠯᠡ ᠰᠢᠭ ᠬᠠᠰ ᠤ᠋ᠨ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠨ ᠰᠠᠷᠭᠠᠢ ᠶᠠᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠩᠳᠡ ᠮᠡᠩᠳᠡ ᠮᠢᠨᠦ ᠨᠢᠭᠤᠷ ᠢ᠋ ᠲᠠᠭᠯᠠᠴᠢᠬᠠᠳᠠᠭ ᠠ᠋ ᠁
ᠢᠰᠢ! ᠴᠢᠨᠦ ᠮᠢᠨᠢ ᠠᠯᠴᠢᠭᠤᠷ ᠬᠦᠷᠦᠭᠡᠳ ᠢᠷᠡᠴᠢᠬᠡᠵᠦ ᠰᠢᠪᠳᠡ?
ᠮᠢᠨᠦ ᠨᠢᠭᠤᠷ ᠢ᠋ ᠲᠠᠭᠯᠠᠵᠤ ᠥᠩᠭᠡᠷᠡᠭᠰᠡᠨ ᠰᠠᠷᠭᠠᠢ ᠶᠠᠭᠠᠨ ᠠᠯᠴᠢᠭᠤᠷ ᠴᠢᠨᠢ ᠮᠥᠨ! ᠶᠠᠭ ᠮᠥᠨ ᠪᠠᠢᠨᠠ ᠡᠨᠡ ᠵᠠᠬᠢᠳᠠᠯ ᠃
8
ᠬᠣᠩᠭᠣᠷ ᠮᠢᠨᠢ ᠢᠷᠡᠭᠡᠷᠡᠢ!
ᠠᠵᠢᠯ ᠳ᠋ᠠᠭᠠᠨ ᠳᠠᠷᠤᠭᠳᠠᠭᠰᠠᠨ ᠠᠯᠵᠢᠶᠠᠯ ᠳᠣᠲᠣᠷᠠ ᠮᠢᠨᠢ
ᠠᠷᠠᠳ ᠲᠦᠮᠡᠨ ᠳ᠋ᠡᠭᠡᠨ ᠲᠥᠯᠥᠬᠦ ᠥᠷᠢ ᠳᠣᠲᠣᠷᠠ ᠮᠢᠨᠢ
ᠵᠠᠯᠠᠭᠤ ᠨᠠᠰᠤᠨ ᠳ᠋ᠠᠭᠠᠨ ᠠᠮᠵᠢᠵᠤ ᠰᠤᠷᠤᠭᠰᠠᠨ ᠦᠬᠡᠷ ᠭᠡᠮᠰᠢᠯ ᠳᠣᠲᠣᠷᠠ ᠮᠢᠨᠢ
ᠵᠠᠯᠭᠠᠬᠤ ᠨᠠᠰᠤᠨ ᠳ᠋ᠠᠭᠠᠨ ᠵᠠᠪᠳᠤᠵᠤ ᠪᠦᠲᠦᠭᠡᠬᠦ ᠪᠠᠶᠠᠰᠤᠯ ᠳᠣᠲᠣᠷᠠ ᠮᠢᠨᠢ
ᠬᠣᠩᠭᠣᠷ ᠮᠢᠨᠢ ᠬᠤᠷᠳᠤᠨ ᠣᠷᠣᠴᠤ ᠢᠷᠡᠭᠡᠷᠡᠢ !
9
ᠰᠠᠶᠢᠬᠠᠨ ᠨᠠᠳᠠ ᠨᠢᠭᠡ ᠬᠥᠮᠦᠨ ᠬᠤᠷᠢᠮ ᠢ᠋ᠶ᠋ᠠᠨ ᠬᠡᠯᠡᠭᠡᠳ ᠶᠠᠪᠤᠯᠠ ᠃
ᠰᠠᠶᠢ ᠶ᠋ᠢᠨ ᠬᠡᠯᠡᠳᠡᠭ 《 ᠬᠤᠷᠢᠮ 》 ᠭᠡᠳᠡᠭ ᠴᠢᠨᠢ ᠶᠠᠭᠤ ᠪᠣᠢ ᠭᠡᠵᠦ ᠬᠦᠦ ᠮᠢᠨᠢ ᠠᠰᠠᠭᠤᠯᠠ ᠃
ᠶᠠᠭᠤ ᠭᠡᠬᠦᠪ ᠳᠧ ᠪᠢ ᠂ ᠬᠦᠦ ᠮᠢᠨᠢ ᠴᠢ ᠰᠠᠶᠢ ᠭᠤᠷᠪᠠᠬᠠᠨ ᠨᠠᠰᠤ ᠲᠠᠢ ᠃
ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠴᠦ᠍ ᠴᠢ ᠣᠢᠯᠠᠭᠠᠬᠤ ᠪᠠᠷ ᠦᠭᠡᠢ ᠰᠢᠦ ᠳᠡ ᠃
ᠦᠨᠡᠨ ᠳ᠋ᠡᠭᠡᠨ ᠬᠤᠷᠢᠮ ᠪᠣᠯ ᠬᠥᠭᠥᠷᠭᠡ ᠶᠦ᠍ᠮ ᠃
ᠥᠩᠭᠡᠷᠡᠮᠡᠭᠴᠡ ᠨᠤᠷᠠᠴᠢᠬᠠᠳᠠᠭ ᠯᠠ ᠬᠥᠭᠥᠷᠭᠡ ᠶᠦ᠍ᠮ ᠠ᠋ ᠃
ᠨᠥᠭᠥᠭᠡ ᠦᠵᠦᠭᠦᠷ ᠲᠤᠨᠢ ᠵᠢᠷᠭᠠᠯ ᠤ᠋ᠨ ᠳ᠋ᠧᠪᠠᠵᠠᠨ ᠲᠤᠶᠠᠭᠠᠯᠠᠵᠤ ᠪᠠᠢᠬᠤ ᠴᠤ᠌ ᠮᠠᠭᠠᠳ ᠦᠭᠡᠢ ᠃
ᠨᠦᠬᠡ ᠰᠢᠭ ᠬᠠᠷᠠᠩᠭᠤᠢ ᠰᠠᠨᠠᠭᠠᠨ ᠤ᠋ ᠭᠢᠨᠳᠠᠨ ᠪᠥᠬᠥᠢᠵᠦ ᠪᠠᠢᠬᠤ ᠴᠤ᠌ ᠶᠠᠳᠠᠬᠤ ᠦᠭᠡᠢ ᠃
10
《 ᠮᠠᠩᠨᠠᠢ ᠳ᠋ᠤ᠌ ᠭᠤᠷᠪᠠᠨ ᠦᠷᠴᠢᠯᠡᠭᠡ ᠁ 》
《ᠶᠠᠭᠠᠬᠢᠬᠤᠪ ᠂ ᠬᠣᠩᠭᠣᠷ ᠮᠢᠨᠢ !
ᠶᠠᠪᠤᠭᠰᠠᠨ ᠵᠠᠮ ᠳ᠋ᠠᠭᠠᠨ ᠂ ᠪᠦᠳᠦᠴᠢᠭᠦᠯᠦᠭᠰᠡᠨ ᠬᠣᠩᠭᠢᠯ ᠳ᠋ᠠᠭᠠᠨ
ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠢᠯᠠᠭᠠ ᠰᠣᠵᠢᠭ ᠲᠤ᠌
ᠡᠷᠡ ᠬᠥᠮᠦᠨ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠶᠤᠮ ᠂ ᠬᠣᠩᠭᠣᠷ ᠮᠢᠨᠢ ! 》
《 ᠰᠠᠨᠴᠢᠭ ᠲᠤ᠌ ᠮᠢᠨᠢ ᠭᠤᠷᠪᠠᠨ ᠪᠤᠭᠤᠷᠤᠯ ᠦᠰᠦ ᠁ 》
《 ᠰᠠᠢᠬᠠᠨ ᠯᠠ ᠪᠠᠢᠨᠠ᠂ ᠬᠣᠩᠭᠣᠷ ᠮᠢᠨᠢ !
ᠰᠠᠨᠠᠭᠠᠨ ᠤ᠋ ᠰᠦ ᠪᠡᠷ ᠢ᠋ᠶ᠋ᠡᠨ ᠤᠭᠵᠢᠭᠰᠠᠨ ᠬᠣᠢᠴᠢ ᠶ᠋ᠢᠨ ᠴᠢᠨᠢ
ᠰᠠᠷᠠᠭᠤᠯᠬᠠᠨ ᠦᠷ ᠭᠡᠢᠵᠦ ᠯᠡ ᠪᠠᠢᠨᠠ ᠳᠠ ᠂ ᠬᠣᠩᠭᠣᠷ ᠮᠢᠨᠢ ! 》