ᠪᠢ ᠶᠠᠭᠤ ᠪᠣᠯᠬᠤ ᠪᠤᠢ - ᠠᠷᠲᠠᠢ Би юу болох вэ - Артай
245ᠪᠢ ᠶᠠᠭᠤ ᠪᠣᠯᠬᠤ ᠪᠣᠢ ?
ᠨᠠᠮᠠᠶ᠋ᠢ ᠶᠠᠭᠤ ᠪᠠᠨ ᠴᠤ᠌ ᠪᠣᠯᠭᠠᠵᠤ ᠵᠠᠷᠤᠬᠤ ᠡᠷᠬᠡ ᠲᠡᠢ ᠡᠬᠡ ᠣᠷᠣᠨ ᠮᠢᠨᠢ!
ᠪᠢ ᠶᠠᠭᠤ ᠪᠣᠯᠬᠤ ᠪᠣᠢ ?
ᠦᠷ ᠢ᠋ᠶ᠋ᠡᠷ ᠥᠷᠭᠡᠨ ᠵᠡᠭᠡᠯᠢ ᠶ᠋ᠢ ᠴᠡᠪᠡᠷᠯᠡᠭᠴᠢᠳ ᠱᠦᠭᠦᠷᠳᠡᠵᠦ ᠪᠠᠢᠨᠠ ᠃
ᠪᠢ ᠲᠡᠷᠡ ᠱᠦᠭᠦᠷ ᠦ᠋ᠨ ᠬᠢᠨᠢ ᠬᠤᠯᠤᠰᠤᠨ ᠨᠠᠮᠠᠭᠠ ᠪᠣᠯᠬᠤ ᠦᠦ ? ᠡᠬᠡ ᠣᠷᠣᠨ ᠮᠢᠨᠢ !
ᠦᠳᠡᠰᠢ ᠴᠡᠴᠡᠷᠯᠢᠭ ᠡᠴᠡ ᠠᠵᠢᠯᠴᠢᠳ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠣᠰᠴᠠᠭᠠᠵᠤ ᠪᠠᠢᠨᠠ ᠃
ᠪᠢ ᠲᠡᠷᠡ ᠳᠤᠭᠤᠢ ᠲᠡᠷᠭᠡᠨ ᠦ᠌ ᠬᠢᠨᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠰᠠᠭᠤᠯᠭᠠᠳᠠᠭ ᠵᠢᠵᠢᠭᠬᠡᠨ ᠰᠠᠭᠤᠳᠠᠯ ᠤ᠋ᠨ ᠬᠢᠨᠢ ᠵᠢᠨᠲᠡ ᠨᠢ ᠪᠣᠯᠬᠤ ᠤᠤ ? ᠡᠬᠡ ᠣᠷᠣᠨ ᠮᠢᠨᠢ !
ᠨᠠᠮᠠᠶ᠋ᠢ ᠶᠠᠭᠤ ᠪᠠᠨ ᠴᠤ᠌ ᠪᠣᠯᠭᠠᠵᠤ ᠬᠤᠪᠢᠯᠭᠠᠬᠤ ᠰᠢᠳᠢ ᠲᠡᠢ ᠡᠬᠡ ᠣᠷᠣᠨ ᠮᠢᠨᠢ !
ᠪᠢ ᠶᠠᠭᠤ ᠪᠣᠯᠬᠤ ᠪᠣᠢ ?
ᠡᠨᠡ ᠵᠠᠯᠠᠭᠤ ᠰᠤᠳᠤᠯᠤᠭᠴᠢ ᠥᠭᠦᠯᠡᠯ ᠢ᠋ᠶ᠋ᠡᠨ ᠪᠢᠴᠢᠭᠡᠳ ᠲᠤᠩ ᠶᠠᠳᠠᠷᠠᠵᠠᠢ ᠃
ᠣᠳᠣ ᠥᠷᠯᠥᠭᠡᠨ ᠦ᠌ ᠲᠠᠪᠤᠨ ᠴᠠᠭ ᠬᠠᠭᠠᠰ ᠪᠣᠯᠵᠤ ᠪᠠᠢᠨᠠ ᠃ ᠣᠯᠠᠨ ᠡᠷᠳᠡᠮᠲᠡᠨ ᠦ᠌ ᠬᠤᠷᠠᠯ ᠳᠣᠯᠣᠭᠠᠨ ᠴᠠᠭ ᠲᠤ᠌ ᠡᠬᠢᠯᠡᠬᠦ ᠪᠡᠷ ᠪᠠᠢᠨᠠ᠃
ᠪᠢ ᠲᠡᠭᠦᠨ ᠢ᠋ ᠳᠠᠭᠤᠳᠠᠨ ᠰᠡᠷᠢᠭᠡᠬᠦ ᠰᠡᠷᠢᠭᠦᠯᠭᠡᠲᠦ ᠴᠠᠭ ᠤ᠋ᠨ ᠬᠢᠨᠢ ᠬᠣᠩᠬᠣ ᠨᠢ ᠪᠣᠯᠬᠤ ᠤᠤ ? ᠡᠬᠡ ᠣᠷᠣᠨ ᠮᠢᠨᠢ !
ᠰᠢᠭᠤᠷᠭᠠ ᠠᠶᠠᠳᠠᠯᠠ ᠃ ᠰᠦᠷᠦᠭ ᠲᠣᠭᠲᠠᠯᠠ ᠃ ᠬᠦᠢᠲᠡᠨ ᠬᠠᠷᠢᠨ ᠤᠯᠠᠮ ᠳᠣᠭᠰᠢᠷᠠᠯᠠ ᠂ ᠬᠥᠳᠥᠰᠥᠨ ᠳᠡᠪᠡᠯ ᠦ᠋ᠨ ᠰᠤᠭᠤ ᠪᠠᠷ ᠬᠠᠤᠭᠢᠯᠠ ᠃
ᠪᠢ ᠲᠡᠷᠡ ᠬᠥᠳᠡᠭᠡ ᠶ᠋ᠢᠨ ᠡᠪᠦᠭᠡᠨ ᠬᠣᠨᠢᠴᠢᠨ ᠤ᠋ ᠬᠠᠭᠵᠠᠷᠬᠠᠢ ᠰᠤᠭᠤᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠨᠥᠬᠥᠭᠡᠰᠦ ᠨᠢ ᠪᠣᠯᠬᠤ ᠤᠤ ? ᠡᠬᠡ ᠣᠷᠣᠨ ᠮᠢᠨᠢ !
ᠨᠠᠮᠠᠶ᠋ᠢ ᠶᠠᠭᠤ ᠴᠤ᠌᠂ ᠪᠣᠯᠵᠤ ᠴᠢᠳᠠᠬᠤ ᠪᠠᠷ ᠲᠦᠷᠦᠭᠦᠯᠡᠭᠰᠡᠨ ᠡᠬᠡ ᠣᠷᠣᠨ ᠮᠢᠨᠢ !
ᠪᠢ ᠶᠠᠭᠤ ᠪᠣᠯᠬᠤ ᠪᠣᠢ?
ᠪᠢ ᠡᠨᠡ ᠬᠤᠵᠢᠷ ᠲᠠᠢ ᠴᠠᠢᠳᠠᠮ ᠳ᠋ᠤ᠌ ᠳᠠᠷᠠᠰᠤ ᠪᠣᠯᠴᠤ ᠤᠷᠭᠤᠶᠠ ᠃
ᠪᠢ ᠡᠨᠡ ᠬᠤᠭᠤᠷᠬᠠᠢ ᠮᠣᠳᠣᠨ ᠤ᠋ ᠮᠥᠴᠢᠷ ᠲᠦ᠍ ᠪᠣᠭᠣᠯᠲᠠ ᠪᠣᠯᠵᠤ ᠣᠷᠢᠶᠠᠶᠠ ᠃
ᠳᠠᠬᠢᠭᠠᠳ ᠪᠢ ᠴᠢᠨᠦᠬᠢ ᠪᠡᠨ ᠪᠢᠴᠢᠭ ᠦ᠋ᠨ ᠵᠢᠶᠠᠼᠠᠨ ᠤ᠋ ᠴᠢᠨᠢ ᠲᠠᠯᠪᠢᠭᠤᠷ ᠪᠣᠯᠤᠶᠠ ᠃
ᠲᠠᠩᠳᠠ ᠬᠠᠷᠢᠯᠴᠠᠳᠠᠭ ᠳ᠋ᠢᠶᠠᠩᠬᠤᠸᠠ ᠨᠣᠮᠧᠷ ᠦ᠋ᠨ ᠴᠢᠨᠢ ᠨᠢᠭᠡ ᠲᠣᠭᠠ ᠪᠣᠯᠤᠶᠠ ᠃ ᠡᠬᠡ ᠣᠷᠣᠨ ᠮᠢᠨᠢ!
ᠪᠢ ᠶᠠᠭᠤ ᠪᠣᠯᠬᠤ ᠪᠣᠢ ?
ᠵᠠᠯᠢᠷᠬᠠᠭ ᠮᠠᠷᠰᠠᠭᠠᠨᠠᠯ ᠂ ᠪᠤᠵᠠᠷ ᠰᠦᠨᠡᠰᠦ ᠶ᠋ᠢ ᠴᠣᠭᠣ ᠴᠢᠴᠢᠭᠰᠡᠨ ᠬᠠᠷᠠᠴᠠ ᠪᠣᠯᠬᠤ ᠤᠤ ? ᠪᠢ ᠃
ᠵᠢᠷᠭᠠᠯ ᠢ᠋ᠶ᠋ᠠᠨ ᠬᠦᠯᠢᠶᠡᠭᠰᠡᠨ ᠂ ᠬᠤᠷᠳᠤᠨ ᠢᠷᠡᠬᠦ ᠳ᠋ᠦ᠍ᠨᠢ ᠴᠣᠴᠢᠭᠰᠠᠨ ᠬᠡᠦᠬᠡᠨ ᠦ᠌ ᠤᠯᠠᠭᠠᠨ ᠬᠠᠴᠠᠷ ᠪᠣᠯᠬᠤ ᠤᠤ ? ᠪᠢ ᠃
ᠰᠢᠨᠡ ᠲᠣᠮᠢᠯᠠᠭᠳᠠᠭᠰᠠᠨ ᠵᠠᠯᠠᠭᠤ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠶ᠋ᠢᠨ ᠭᠦᠨ ᠪᠣᠳᠣᠯ ᠪᠣᠯᠤᠶᠠ ᠪᠢ ᠃
ᠰᠢᠯᠦᠨ ᠪᠣᠯᠣᠷ ᠪᠥᠮᠪᠥᠯᠵᠡᠭᠰᠡᠨ ᠰᠠᠷᠠᠭᠤᠯ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠭᠦᠨᠵᠡᠭᠡᠢ ᠠᠮᠢᠰᠬᠤᠭᠠ ᠪᠣᠯᠤᠶᠠ ᠪᠢ᠃
ᠡᠬᠡ ᠣᠷᠣᠨ ᠮᠢᠨᠢ !
ᠪᠢ ᠲᠠᠩᠳᠠ ᠳᠠᠭᠤ ᠪᠣᠯᠵᠤ ᠴᠢᠨᠦ ᠳᠡᠭᠡᠭᠦᠷ ᠬᠦᠪᠦᠶᠡ!
ᠪᠢ ᠲᠡᠨᠳᠡ ᠳᠤᠷᠠᠯᠠᠯ ᠪᠣᠯ ᠴᠢᠨᠦ ᠵᠠᠯᠠᠭᠤ ᠨᠠᠰᠤᠨ ᠳ᠋ᠤ᠌ ᠵᠢᠷᠭᠠᠶᠠ!
ᠲᠡᠭᠡᠪᠡᠴᠦ ᠡᠬᠡ ᠣᠷᠣᠨ ᠮᠢᠨᠢ ᠂ ᠴᠢᠬᠤᠯᠠ ᠲᠠᠢ ᠪᠣᠯ ᠲᠠ ᠬᠡᠯᠡ ᠂ ᠬᠠᠮᠢᠶᠠ ᠦᠭᠡᠢ
ᠪᠢ ᠭᠠᠪᠠ ᠪᠣᠯᠤᠶᠠ !
ᠲᠡᠳᠡᠭᠡᠷ ᠮᠤᠤᠰᠠᠢᠨ ᠬᠣᠣᠷᠠᠳᠠᠨ ᠤ᠋ ᠴᠢᠰᠤᠲᠤ ᠰᠠᠪᠠᠷ ᠢ᠋ ᠲᠠᠰᠤᠳᠠᠶᠠ !
ᠪᠢ ᠶᠠᠭᠤ ᠪᠣᠯᠬᠤ ᠪᠣᠢ ?
ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠪᠢ ᠳᠤᠷᠠᠲᠠᠢ ᠂ ᠡᠬᠡ ᠣᠷᠣᠨ ᠮᠢᠨᠢ !
ᠶᠠᠭᠤ ᠪᠣᠯᠭᠠᠭᠰᠠᠨ ᠴᠤ᠌ ᠴᠢᠨᠦ ᠳᠤᠷᠠ ᠂ ᠡᠬᠡ ᠣᠷᠣᠨ ᠮᠢᠨᠢ !
ᠪᠢ ᠬᠥᠮᠦᠨ ᠃
ᠪᠢ ᠲᠦᠮᠡᠨ ᠪᠣᠳᠠᠰ ᠤ᠋ᠨ ᠬᠠᠮᠤᠭ ᠤ᠋ᠨ ᠡᠷᠬᠢᠮ ᠳᠡᠭᠡᠳᠦ ᠬᠥᠮᠦᠨ ᠃
ᠪᠢ ᠬᠥᠮᠦᠨ ᠦᠦ ?
ᠪᠢ ᠬᠥᠮᠦᠨ ᠪᠣᠯᠵᠤ ᠴᠢᠳᠠᠵᠤ ᠪᠠᠢᠨᠠ ᠤᠤ ? ᠡᠬᠡ ᠣᠷᠣᠨ ᠮᠢᠨᠢ !
ᠰᠤᠭᠤᠨ ᠤ᠋ ᠨᠥᠬᠥᠭᠡᠰᠦ ᠂ ᠱᠦᠭᠦᠷ ᠦ᠋ᠨ ᠨᠠᠮᠠᠭᠠ ᠂ ᠲᠠᠯᠪᠢᠭᠤᠷ ᠂ ᠳᠠᠷᠠᠰᠤ ᠂ ᠳ᠋ᠢᠶᠠᠩᠬᠤᠸᠠ ᠨᠣᠮᠧᠷ ᠴᠢᠮᠠᠲᠤ ᠥᠷᠢ ᠦᠭᠡᠢ ᠂ ᠡᠬᠡ ᠣᠷᠣᠨ ᠮᠢᠨᠢ !
ᠪᠢ ᠴᠢᠮᠠ ᠳ᠋ᠤ᠌ ᠥᠷᠢ ᠲᠡᠢ ᠃
ᠬᠥᠮᠦᠨ ᠴᠢᠮᠠᠲᠤ ᠥᠷᠢ ᠲᠡᠢ ᠃
ᠬᠥᠮᠦᠨ ᠪᠣᠯᠬᠤ ᠠᠮᠠᠷ ᠦᠭᠡᠢ ᠠ᠋ ᠂ ᠡᠬᠡ ᠣᠷᠣᠨ ᠮᠢᠨᠢ !