ᠪᠣᠷᠣᠭᠠ - ᠠᠷᠲᠠᠢ Бороо - Артай
247ᠪᠣᠷᠣᠭᠠ
1
ᠲᠡᠭᠷᠢ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ ᠨᠢᠯᠪᠤᠰᠤ ᠤᠨᠠᠭᠠᠳᠠᠭ ᠃
ᠵᠠᠷᠢᠮ ᠳ᠋ᠠᠭᠠᠨ ᠪᠦᠷ ᠠᠰᠬᠠᠷᠲᠠᠯᠠ ᠣᠬᠢᠯᠠᠴᠢᠬᠠᠳᠠᠭ ᠃
ᠠᠭᠤᠷᠯᠠᠪᠠᠯ ᠴᠡᠯᠳᠡᠢᠴᠢᠬᠡᠨᠡ ᠃
ᠬᠠᠶᠠ ᠳ᠋ᠠᠭᠠᠨ ᠵᠠᠩᠳᠤᠷᠴᠤ ᠵᠠᠩᠳᠤᠷᠤᠭᠠᠳ ᠶᠠᠪᠤᠴᠢᠬᠠᠳᠠᠭ ᠃
2
ᠲᠡᠭᠷᠢ ᠶ᠋ᠢᠨ ᠨᠢᠯᠪᠤᠰᠤ ᠨᠠᠷᠠᠨ ᠭᠡᠷᠡᠯ ᠴᠤᠭᠤᠴᠢᠵᠤ ᠂ ᠡᠷᠡᠭᠦᠯ ᠠᠨᠠᠷ ᠢ᠋ ᠴᠣᠭᠣᠴᠢᠵᠤ ᠂ ᠮᠢᠨᠦ ᠤᠢᠳᠬᠠᠷ ᠬᠤᠨᠢᠭ ᠢ᠋ ᠴᠣᠭᠣᠴᠢᠵᠤ ᠂ ᠮᠢᠨᠦ ᠬᠦᠯᠢᠶᠡᠭᠰᠡᠨ ᠰᠡᠳᠬᠢᠯ ᠳᠡᠭᠡᠷᠡ ᠲᠣᠰᠤᠭᠠᠳ ᠨᠢᠭᠡᠨ ᠪᠤᠲᠠ ᠴᠡᠩᠬᠡᠷ ᠰᠢᠯᠦᠭ ᠤᠷᠭᠤᠭᠤᠯᠴᠢᠬᠠᠯᠠ ᠃
3
ᠪᠣᠷᠣᠭᠠᠨ ᠳ᠋ᠤ᠌ ᠨᠣᠷᠬᠤ ᠰᠠᠢᠬᠠᠨ ᠃
ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠪᠣᠷᠣᠭᠠᠨ ᠳ᠋ᠤ᠌ ᠨᠣᠷᠬᠤ ᠰᠠᠢᠬᠠᠨ ᠠ᠋ ᠃
ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠪᠣᠷᠣᠭᠠᠨ ᠳ᠋ᠤ᠌ ᠮᠢᠨᠦ ᠰᠡᠳᠬᠢᠯ ᠨᠣᠷᠳᠠᠭ ᠶᠤᠮ ᠃
ᠪᠣᠷᠣᠭᠠᠨ ᠳ᠋ᠤ᠌ ᠨᠣᠷᠬᠤ ᠰᠠᠢᠬᠠᠨ ᠃
4
ᠮᠢᠨᠦ ᠪᠦᠰᠡᠭᠦᠢ ᠠᠵᠢᠯᠴᠢ ᠴᠡᠪᠡᠷᠬᠡᠨ ᠃ ᠤᠬᠢᠶᠠᠵᠤ ᠠᠷᠴᠢᠭᠠᠳ ᠮᠢᠨᠦ ᠭᠡᠷ ᠢ᠋ -- ᠮᠢᠨᠦ ᠵᠢᠷᠭᠠᠯ ᠤ᠋ᠨ ᠳᠤᠯᠠᠭᠠᠨ ᠤᠷᠲᠤ ᠶ᠋ᠢ ᠬᠢᠯ ᠴᠢᠯ ᠪᠣᠯᠭᠠᠴᠢᠬᠠᠳᠠᠭ᠃ ᠠᠷᠴᠢᠵᠤ ᠴᠡᠪᠡᠷᠯᠡᠵᠦ ᠪᠠᠷᠠᠭᠠᠳ ᠮᠢᠨᠦ ᠠᠪᠴᠤ ᠦᠬᠦᠭᠰᠡᠨ ᠠᠯᠠᠭ ᠡᠷᠢᠶᠡᠨ ᠠᠯᠴᠢᠭᠤᠷ ᠢ᠋ ᠠᠯᠢᠶᠠᠯᠠᠨ ᠨᠠᠮᠢᠷᠠᠭᠤᠯᠤᠭᠰᠠᠭᠠᠷ ᠠᠵᠢᠯ ᠳ᠋ᠠᠭᠠᠨ ᠶᠠᠪᠤᠴᠢᠬᠠᠳᠠᠭ ᠰᠠᠨ᠃
ᠮᠢᠨᠦ ᠪᠣᠷᠣᠭᠠ ᠴᠤ᠌ ᠠᠵᠢᠯᠴᠢ ᠴᠡᠪᠡᠷᠬᠡᠨ ᠃ ᠤᠬᠢᠶᠠᠵᠤ ᠠᠷᠴᠢᠭᠠᠳ ᠮᠢᠨᠦ ᠨᠤᠲᠤᠭ ᠢ᠋ -- ᠮᠢᠨᠦ ᠬᠠᠢᠷᠠ ᠶ᠋ᠢᠨ ᠣᠩᠭᠣᠨ ᠥᠯᠥᠭᠡᠢ ᠶ᠋ᠢ ᠬᠢᠯ ᠴᠢᠯ ᠪᠣᠯᠭᠠᠴᠢᠬᠠᠳᠠᠭ ᠃ ᠠᠷᠴᠢᠵᠤ ᠴᠡᠪᠡᠷᠯᠡᠵᠦ ᠪᠠᠷᠠᠭᠠᠳ ᠂ ᠪᠠᠢᠭᠠᠯᠢ ᠶ᠋ᠢᠨ ᠠᠪᠴᠤ ᠦᠭᠭᠦᠭᠰᠡᠨ ᠠᠯᠠᠭ ᠡᠷᠢᠶᠡᠨ ᠠᠯᠴᠢᠭᠤᠷ ᠢ᠋ ᠠᠯᠳᠠᠯᠠᠨ ᠳᠡᠯᠭᠡᠭᠰᠡᠭᠡᠷ ᠠᠯᠤᠰ ᠲᠤ᠌ ᠶᠠᠪᠤᠴᠢᠬᠠᠳᠠᠭ ᠰᠠᠨ᠃
ᠠᠢ ᠬᠥᠭᠡᠷᠦᠬᠦᠢ ᠪᠣᠷᠣᠭᠠ ᠴᠢ
ᠠᠮᠠᠷᠠᠭ ᠪᠦᠰᠡᠭᠦᠢ ᠶ᠋ᠢᠨ ᠰᠡᠳᠬᠢᠯ ᠪᠠᠢᠵᠠᠢ ᠃
5
ᠪᠣᠷᠣᠭᠠ ᠶᠠᠭᠤ ᠪᠣᠢ ?
ᠪᠣᠷᠣᠭᠠ ᠭᠤᠸᠠ ᠰᠠᠢᠬᠠᠨ ᠤ᠋ ᠪᠡᠬᠡ ᠃
ᠡᠨᠡ ᠪᠡᠬᠡ ᠪᠡᠷ ᠪᠢᠴᠢᠭᠰᠡᠨ ᠰᠢᠯᠦᠭ ᠢ᠋
ᠬᠡᠨ ᠪᠤᠯᠠᠭᠠᠨ ᠦᠵᠡᠵᠦ ᠴᠢᠳᠠᠨᠠ ᠂
ᠬᠡᠨ ᠪᠣᠯᠭᠠᠨ ᠥᠩᠰᠢᠵᠦ ᠴᠢᠳᠠᠬᠤ ᠦᠭᠡᠢ ᠃
6
ᠳᠠᠯᠠᠢ ᠲᠠᠩᠭᠢᠰ ᠠ᠋ᠴᠠ ᠂ ᠡᠬᠡ ᠭᠠᠵᠠᠷ ᠠ᠋ᠴᠠ ᠰᠢᠷᠭᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠂ ᠵᠢᠭᠡᠯᠡᠵᠦ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠠᠷᠠ ᠲᠥᠯᠥᠵᠦ ᠪᠠᠢᠨᠠ ᠃
ᠴᠠᠭᠠᠨ ᠴᠠᠭᠠᠨ ᠪᠥᠭᠡᠮ ᠪᠥᠭᠡᠮ ᠮᠥᠩᠭᠥᠨ ᠦ᠌ ᠥᠷᠢ ᠪᠡᠨ ᠡᠦᠲᠦ ᠮᠥᠬᠥᠯᠢᠭ ᠪᠣᠯᠣᠷ ᠰᠤᠪᠤᠳ ᠢ᠋ᠶ᠋ᠠᠷ ᠲᠥᠯᠥᠵᠦ ᠪᠠᠢᠨᠠ ᠃
ᠥᠷᠢ ᠪᠣᠯ ᠬᠡᠵᠢᠶᠡᠳᠡ ᠪᠡᠨ ᠥᠷᠢ ᠃
ᠥᠷᠢᠳᠡᠪᠡᠯ ᠲᠥᠯᠥᠬᠦ ᠯᠡ ᠬᠡᠷᠡᠭᠲᠡᠢ᠃
7
ᠪᠢ ᠡᠷᠬᠢᠮ ᠶᠡᠬᠡᠰ ᠦ᠋ᠨ ᠠᠯᠲᠠᠨ ᠬᠤᠨᠳᠠᠭᠠᠨ ᠳ᠋ᠠᠬᠢ
ᠠᠮᠲᠠᠲᠤ ᠳᠠᠷᠠᠰᠤ ᠪᠣᠯᠬᠤ ᠦᠭᠡᠢ ᠃
ᠪᠢ ᠪᠣᠷᠣᠭᠠ ᠪᠣᠯᠤᠨᠠ᠃
ᠠᠳᠤᠭᠤᠨ ᠤ᠋ ᠲᠤᠭᠤᠷᠠᠢ ᠶ᠋ᠢᠨ ᠣᠷᠣᠮ ᠳ᠋ᠤ᠌ ᠲᠣᠭᠲᠠᠭᠰᠠᠨ ᠱᠠᠯᠪᠠᠭ ᠪᠣᠯᠤᠨᠠ ᠃
ᠦᠬᠡᠷ ᠬᠣᠨᠢᠨ ᠤ᠋ ᠡᠪᠡᠰᠦ ᠬᠠᠩᠬᠤᠯᠤᠭᠰᠠᠨ ᠬᠠᠯᠠᠭᠤᠨ ᠬᠣᠰᠢᠭᠤ ᠂ ᠥᠩᠭᠡ ᠮᠥᠩᠭᠥᠨ ᠦ᠌ ᠰᠢᠨᠤᠯ ᠣᠮᠣᠭᠣᠯᠲᠤᠭᠰᠠᠨ ᠬᠠᠭᠤᠷᠠᠢ ᠤᠷᠤᠭᠤᠯ ᠠ᠋ᠴᠠ ᠬᠣᠯᠠ ᠴᠡᠪᠡᠷ ᠭᠡᠵᠦ ᠰᠠᠷᠬᠤᠳ ᠪᠣᠷᠣᠭᠠ ᠬᠣᠶᠠᠭᠤᠯᠠ ᠰᠠᠨᠠᠯ ᠨᠢᠭᠡᠲᠡᠢ ᠨᠤᠲᠠᠯᠠᠭᠰᠠᠨ ᠶᠤᠮ ᠭᠡᠨᠡ ᠠ᠋ ᠃
8
ᠠᠮᠢᠳᠤᠷᠠᠯ ᠳ᠋ᠤ᠌ ᠲᠠᠩᠳᠠ ᠪᠣᠷᠣᠭᠠ ᠣᠷᠣᠭᠠᠰᠠᠢ !
ᠪᠣᠷᠣᠭᠠ ᠲᠠᠢ ᠠᠮᠢᠳᠤᠷᠠᠯ ᠲᠠᠩᠳᠠ ᠴᠡᠴᠡᠭᠯᠡᠭᠡᠰᠡᠢ !