ᠮᠠᠷᠭᠠᠰᠢ - ᠯᠢᠭᠳᠡᠨ Маргааш - Лигдэн
277ᠮᠠᠷᠭᠠᠰᠢ
ᠥᠨᠥᠳᠥᠷ ᠦ᠋ᠨ ᠦᠨᠳᠦᠰᠦ ᠮᠥᠴᠢᠷ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠦᠷᠡ ᠵᠢᠮᠢᠰ ᠃
ᠬᠥᠳᠡᠯᠮᠦᠷᠢᠴᠢ ᠬᠥᠮᠦᠨ ᠦ᠌ ᠬᠤᠷᠢᠶᠠᠯᠲᠠ ᠶ᠋ᠢᠨ ᠲᠠᠷᠭᠤᠨ ᠨᠠᠮᠤᠷ ᠃
ᠬᠦᠯᠦᠭ ᠪᠦᠬᠦᠨ ᠦ᠌ ᠭᠦᠶᠦᠯᠲᠡ ᠨᠢ ᠲᠡᠢᠮᠦ ᠬᠤᠷᠳᠤᠨ ᠪᠢᠰᠢ ᠂ ᠬᠥᠮᠦᠨ ᠪᠦᠬᠦᠨ ᠦ᠌ ᠮᠠᠷᠭᠠᠰᠢ ᠨᠢ ᠲᠡᠢᠮᠦ ᠰᠠᠢᠬᠠᠨ ᠪᠢᠰᠢ ᠃
ᠮᠠᠷᠭᠠᠰᠢ ᠢᠨᠢᠶᠡᠬᠦ ᠬᠥᠮᠦᠨ ᠪᠣᠢ ᠂ ᠤᠬᠢᠯᠠᠬᠤ ᠬᠥᠮᠦᠨ ᠴᠦ᠍ ᠪᠣᠢ ᠃
ᠮᠠᠷᠭᠠᠰᠢ ᠶ᠋ᠢ ᠮᠢᠨᠦᠬᠢ ᠭᠡᠵᠦ ᠥᠮᠴᠢᠯᠡᠬᠦ ᠰᠠᠢᠬᠠᠨ ᠃ ᠮᠠᠭᠤᠯᠠᠵᠤ ᠰᠠᠭᠤᠭᠰᠠᠭᠠᠷ ᠠᠯᠳᠠᠭᠠᠳ ᠶᠠᠪᠤᠭᠤᠯᠬᠤ ᠮᠠᠭᠤᠬᠠᠢ ᠃
ᠮᠠᠷᠭᠠᠰᠢ ᠪᠣᠯ ᠤᠷᠤᠯᠳᠤᠭᠠᠨ ᠤ᠋ ᠡᠷᠬᠡ ᠲᠡᠭᠰᠢ ᠤᠲᠠᠰᠤ ᠂ ᠲᠦᠭᠡᠮᠡᠯ ᠬᠠᠢᠷᠠ ᠶ᠋ᠢᠨ ᠳ᠋ᠠᠷᠠ ᠡᠬᠡ ᠂ ᠢᠨᠢᠶᠡᠭᠡᠳ ᠪᠠᠢᠳᠠᠭ ᠡᠨᠡᠷᠢᠯ ᠤᠨ ᠳᠠᠭᠢᠨᠢ ᠂ ᠢᠨᠢᠶᠡᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠲᠡᠮᠦᠷ ᠴᠢᠷᠠᠢ ᠃
ᠤᠨᠲᠠᠩᠬᠠᠢ ᠬᠥᠮᠦᠨ ᠳ᠋ᠦ᠍ ᠂ ᠵᠠᠯᠬᠠᠭᠤ ᠬᠥᠮᠦᠨ ᠳ᠋ᠦ᠍ ᠂ ᠵᠣᠷᠢᠭ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠮᠠᠷᠭᠠᠰᠢ ᠪᠣᠯ ᠥᠨᠥᠳᠥᠷ ᠦ᠋ᠨ ᠤᠷᠤᠭᠤᠳᠠᠯ᠃ ᠤᠨᠲᠠᠩᠬᠠᠢ ᠬᠥᠮᠦᠨ ᠳ᠋ᠦ᠍ ᠨᠢᠭᠡ ᠨᠣᠢᠷ ᠤ᠋ᠨ ᠵᠡᠭᠦᠳᠦ ᠂ ᠵᠠᠯᠬᠠᠭᠤ ᠬᠥᠮᠦᠨ ᠳ᠋ᠦ᠍ ᠨᠢᠭᠡ ᠡᠪᠰᠢᠶᠡᠯᠭᠡ ᠶ᠋ᠢᠨ ᠵᠠᠢ ᠂ ᠵᠣᠷᠢᠭ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠪᠠᠰᠠ ᠨᠢᠭᠡ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠲᠣᠬᠢᠶᠠᠯ ᠃
ᠮᠠᠷᠭᠠᠰᠢ ᠭᠡᠵᠦ ᠮᠡᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠮᠡᠷᠭᠡᠨ ᠬᠢᠨᠠᠭᠴᠢ ᠲᠠᠢ ᠂ ᠮᠡᠳᠡᠭᠳᠡᠬᠦ ᠦᠭᠡᠢ ᠵᠠᠪᠰᠢᠨᠠ ᠭᠡᠳᠡᠭ ᠭᠤᠨᠵᠢ ᠶ᠋ᠢᠨ ᠵᠣᠭᠣᠭ ᠃
ᠥᠨᠥᠳᠥᠷ ᠦ᠋ᠨ ᠨᠠᠢᠳᠠᠯᠭᠠ ᠪᠠᠷ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠬᠥᠳᠡᠯᠮᠦᠷᠢ ᠶ᠋ᠢᠨ ᠬᠢᠨᠢ ᠬᠠᠷᠢᠭᠤ ᠲᠠᠯᠠᠷᠬᠠᠯ ᠂ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠲᠡᠳᠬᠦᠮᠵᠢ᠂ ᠬᠥᠯᠥᠰᠥ ᠬᠦᠴᠦᠨ ᠦ᠌ ᠬᠢᠨᠢ ᠠᠴᠤᠭ ᠬᠠᠷᠠᠮᠵᠢ ᠶ᠋ᠢ ᠬᠤᠪᠢᠶᠠᠷᠢᠯᠠᠬᠤ ᠳ᠋ᠠᠭᠠᠨ ᠥᠨᠥᠳᠥᠷ ᠡᠴᠡ ᠵᠥᠪ ᠵᠦᠭ ᠲᠦ᠍ ᠰᠠᠢᠨ ᠵᠢᠳᠬᠦᠭᠰᠡᠳ ᠲᠦ᠍ ᠪᠥᠵᠢᠭᠯᠡᠬᠦ ᠂ ᠳᠠᠭᠤᠯᠠᠬᠤ ᠂ ᠢᠨᠢᠶᠡᠬᠦ ᠳᠠᠷᠬᠠᠨ ᠡᠷᠬᠡ ᠣᠯᠭᠣᠨᠠ ᠂ ᠤᠨᠲᠠᠩᠬᠠᠢ ᠂ ᠵᠠᠯᠬᠠᠭᠤ ᠵᠣᠷᠢᠭ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠤᠢᠳᠬᠠᠷ ᠭᠤᠨᠢᠭ ᠂ ᠨᠢᠯᠪᠤᠰᠤ ᠰᠡᠭᠦᠷᠡᠰᠦ ᠂ ᠬᠣᠭᠣᠰᠣᠷᠠᠯ ᠶᠤᠮ ᠤᠤ ᠡᠰᠡᠬᠦᠯᠡ ᠨᠡᠩ ᠬᠦᠨᠳᠦ ᠵᠠᠯᠬᠠᠭᠠᠯ ᠨᠣᠭᠳᠠᠭᠤᠯᠤᠨᠠ ᠃
ᠮᠠᠷᠭᠠᠰᠢ ᠳ᠋ᠤ᠌ ᠬᠡᠯᠡᠯᠭᠡᠨ ᠦᠭᠡᠢ ᠬᠡᠨ ᠴᠦ᠍ ᠳᠤᠷᠠᠲᠠᠢ ᠃ ᠭᠡᠲᠡᠯᠡ ᠲᠡᠭᠦᠨ ᠢ᠋ ᠵᠠᠪᠠᠯ ᠥᠨᠥᠳᠥᠷ ᠦ᠋ᠨ ᠬᠥᠳᠡᠯᠮᠦᠷᠢ ᠪᠡᠷ ᠯᠠ ᠵᠠᠬᠢᠶᠠᠯᠠᠬᠤ ᠬᠡᠷᠡᠭᠲᠡᠢ ᠃
1983 12