ᠭᠡᠮᠰᠢᠯ - ᠯᠢᠭᠳᠡᠨ Гэмшил - Лигдэн
266ᠭᠡᠮᠰᠢᠯ
ᠪᠢ ᠪᠣᠳᠣᠬᠤ ᠲᠤᠲᠤᠮ ᠰᠣᠨᠢᠷᠬᠠᠨ ᠭᠠᠢᠬᠠᠬᠤ ᠪᠥᠭᠡᠳ ᠰᠣᠴᠢᠨ ᠭᠡᠯᠮᠡᠭᠳᠡᠨᠡ ᠄ ᠲᠢᠪ ᠠᠯᠤᠰ ᠤ᠋ᠨ ᠹᠷᠠᠨᠺᠯᠢᠨ ᠶᠠᠭᠠᠬᠢᠭᠠᠳ ᠮᠢᠨᠦ ᠪᠠᠶ᠋ᠢᠲᠠᠯ ᠢ᠋ ᠲᠡᠢᠮᠦ ᠡᠷᠲᠡᠨ ᠡᠴᠡ ᠵᠥᠩᠨᠡᠨ ᠮᠡᠳᠡᠴᠢᠭᠡᠳ ᠨᠣᠶ᠋ᠢᠷ ᠠ᠋ᠴᠠ ᠰᠡᠷᠢᠭᠡᠳᠡᠭ ᠵᠦᠢ ᠶᠣᠰᠣᠨ ᠤ᠋ ᠵᠠᠯᠬᠠᠭᠠᠯ ᠤ᠋ᠨ ᠠᠶᠤᠩᠭᠠ ᠪᠠᠨ ᠲᠤᠰᠬᠠᠶ᠋ᠢᠯᠠᠨ ᠴᠡᠨᠡᠭᠯᠡᠭᠡᠳ ᠪᠠᠢᠵᠤ ᠪᠣᠢ ᠳᠠ ⁈
《ᠴᠢ ᠠᠮᠢ ᠨᠠᠰᠤ ᠪᠠᠨ ᠬᠠᠢᠷᠠᠯᠠᠨᠠ ᠤᠤ ? ᠲᠡᠭᠡᠪᠡᠯ ᠴᠢ ᠴᠠᠭ ᠢ᠋ ᠲᠠᠯᠠᠭᠠᠷ ᠥᠩᠭᠡᠷᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠂ ᠤᠴᠢᠷ ᠨᠢ ᠴᠠᠭ ᠪᠣᠯ ᠠᠮᠢ ᠨᠠᠰᠤ ᠶ᠋ᠢ ᠪᠦᠷᠢᠯᠳᠦᠭᠦᠯᠬᠦ ᠡᠯᠧᠮᠧᠨ᠋ᠲ ᠮᠥᠨ ! 》
ᠡᠨᠡ ᠪᠣᠯ ᠶᠣᠰᠣᠲᠠᠢ ᠲᠡᠷᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠣᠨᠳᠠᠩᠬᠠᠢᠴᠣᠳ ᠢ᠋ ᠵᠡᠭᠦᠳᠦᠨ ᠡᠴᠡ ᠨᠢ ᠰᠡᠷᠢᠭᠡᠭᠴᠢ᠂ ᠤᠷᠮᠠᠰᠢᠯ ᠨᠢ ᠲᠣᠩᠭᠣᠷᠤᠭᠰᠠᠳ ᠊ᠢ ᠬᠥᠯ ᠢ᠋ᠶ᠋ᠡᠷ ᠨᠢ ᠠᠯᠬᠤᠭᠤᠯᠤᠭᠴᠢ ᠨᠢᠭᠡ ᠶᠣᠰᠣᠨ ᠤ᠋ ᠠᠶᠤᠩᠭᠠ ᠪᠠᠶ᠋ᠢᠨᠠ ᠳᠠ !
ᠠᠶᠤᠩᠭᠠᠨ ᠳ᠋ᠤ᠌ ᠨᠢᠷᠭᠡᠭᠳᠡᠵᠦ ᠦᠵᠡᠭᠡᠳᠦᠢ ᠡᠴᠡ ᠪᠣᠯᠪᠠᠤ ? ᠠᠩᠬᠠ ᠤᠳᠠᠭᠠ ᠠᠪᠤᠷᠭᠤ ᠶᠡᠬᠡ ᠳᠣᠩᠰᠤᠯᠠᠯᠳᠠ ᠶ᠋ᠢ ᠬᠦᠯᠢᠶᠡᠮᠡᠭᠴᠡ ᠪᠢ ᠰᠣᠴᠢᠰᠬᠢᠨ ᠰᠡᠷᠢᠯᠡ ! ᠰᠡᠷᠢᠴᠢᠬᠡᠯᠡ !ᠮᠢᠨᠴᠦᠭᠦᠷᠡᠭᠰᠡᠨ ᠪᠡᠶᠡ ᠮᠢᠨᠢ ᠮᠡᠳᠡᠷᠡᠯ ᠲᠡᠢ ᠪᠣᠯᠪᠠ᠃ ᠳᠡᠯᠡᠳᠦᠭᠳᠡᠭᠰᠡᠨ ᠬᠡᠩᠭᠡᠷᠭᠡ ᠰᠢᠭ ᠪᠦᠬᠦ ᠪᠡᠶᠡ ᠮᠢᠨᠢ ᠳᠣᠷᠭᠢᠨ ᠳᠣᠩᠰᠣᠯᠵᠤ ᠲᠠᠷᠢᠬᠢ ᠲᠣᠯᠣᠭᠠᠢ ᠲᠦᠨᠡᠷᠡᠨ ᠲᠠᠪᠤᠨ ᠴᠤᠯᠤ ᠰᠢᠮᠰᠢᠷᠡᠨ ᠶᠠᠰᠤ ᠰᠢᠷᠪᠥᠰᠥ ᠮᠢᠨᠢ ᠰᠦᠢᠷᠡᠭᠰᠡᠭᠡᠷ ᠪᠠᠶ᠋ᠢᠨᠠ ᠁
ᠴᠠᠭ᠂ ᠴᠠᠭ ᠂ ᠴᠠᠭ ᠠ᠋ ᠃ ᠴᠢᠮᠠᠶ᠋ᠢ ᠪᠢ ᠡᠨᠡ ᠮᠡᠲᠦ ᠬᠠᠢᠷᠠ ᠨᠠᠢᠷ ᠦᠭᠡᠢ ᠭᠡᠳᠡᠭ ᠢ᠋ ᠲᠣᠯᠢᠨ ᠤ᠋ ᠡᠮᠦᠨᠡ ᠰᠠᠶᠢ ᠮᠡᠳᠡᠷᠡᠪᠡ — ᠤᠪᠠᠳᠢᠰᠲᠤ ᠰᠢᠵᠢᠮ ᠢ᠋ᠶ᠋ᠡᠷ ᠨᠢᠭᠤᠷ ᠢ᠋ ᠮᠢᠨᠢ ᠦᠷᠴᠢᠢᠯᠭᠡᠵᠦ ᠂ ᠬᠤᠪᠢᠯᠭᠠᠨ ᠪᠣᠳᠣᠭ ᠢ᠋ᠶ᠋ᠠᠷ ᠦᠰᠦ ᠭᠡᠵᠢᠭᠡ ᠶ᠋ᠢ ᠮᠢᠨᠢ ᠪᠤᠭᠤᠷᠤᠯᠲᠤᠭᠤᠯᠤᠭᠠᠳ᠂ ᠪᠤᠯᠴᠢᠩ ᠤ᠋ᠨ ᠮᠢᠨᠢ ᠡᠷᠴᠢ ᠶ᠋ᠢ ᠰᠤᠯᠠᠷᠠᠭᠤᠯᠵᠤ ᠂ ᠴᠢᠰᠤᠨ ᠤ᠋ ᠮᠢᠨᠢ ᠡᠷᠭᠢᠯᠲᠡ ᠶ᠋ᠢ ᠤᠳᠠᠭᠠᠰᠢᠷᠠᠭᠤᠯᠵᠠᠢ ᠃
ᠠᠯᠢ ᠵᠠᠪ ᠲᠤᠨᠢ ᠴᠢ ᠰᠡᠪ ᠰᠡᠮᠡᠭᠡᠷᠬᠡᠨ ᠂ ᠭᠡᠬᠦ ᠳ᠋ᠡᠭᠡᠨ ᠴᠢᠳᠬᠥᠷ ᠰᠢᠭ ᠰᠡᠪ –– ᠰᠡᠮᠡᠭᠡᠷᠬᠡᠨ ᠁ᠨᠠᠭᠠᠳᠴᠤ ᠪᠠᠢᠬᠤ ᠶ᠋ᠢᠨ ᠴᠢᠯᠥᠭᠡᠨ ᠳ᠋ᠦ᠍ ᠦᠦ ? ᠤᠨᠲᠠᠵᠤ ᠪᠠᠢᠬᠤ ᠶ᠋ᠢᠨ ᠵᠠᠪᠰᠠᠷ ᠤᠤ ? ᠡᠰᠡᠪᠡᠯ ᠢᠳᠡᠵᠦ ᠤᠤᠭᠤᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠤᠤ? ᠠᠯᠢ ᠵᠠᠪ ᠲᠤᠨᠢ ᠰᠡᠪ ᠰᠡᠮᠡᠭᠡᠷᠬᠡᠨ ᠬᠤᠪᠢᠷᠠᠭᠠᠬᠤ ᠨᠢ ᠡᠨᠡ ᠪᠢᠯᠡ ⁈
ᠳᠥᠷᠪᠡ ᠤᠳᠠᠭᠠ ᠵᠢᠯ ᠣᠷᠣᠬᠤ ᠰᠢᠬᠠᠪᠠ ! ᠶᠠᠭᠤ ᠰᠤᠷᠪᠠ ᠳᠠ ? ᠪᠠᠶ᠋ᠢᠭᠠᠯᠢ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤᠤ? ᠨᠡᠢᠭᠡᠮ ᠦ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤᠤ? ᠭᠦᠨ ᠤᠬᠠᠭᠠᠨ ᠤᠤ ? ᠡᠰᠡᠬᠦᠯᠡ ᠠᠵᠢᠯ ᠬᠥᠳᠡᠯᠮᠦᠷᠢ ᠦᠦ? ᠦᠭᠡᠢ ! ᠶᠠᠭᠤ ᠶ᠋ᠢ ᠠᠰᠠᠭᠤᠪᠠᠴᠤ ᠲᠠᠭ! ᠶᠠᠭᠤ ᠶ᠋ᠢ ᠦᠵᠡᠪᠡᠴᠦ ᠫᠠᠳ! ᠶᠠᠭᠤ ᠶ᠋ᠢ ᠰᠣᠨᠣᠰᠪᠠᠴᠤ ᠮᠠᠳ!
ᠭᠠᠳᠠᠨᠠ ᠪᠠᠨ ᠴᠡᠪ ᠴᠡᠪᠡᠷᠬᠡᠨ ᠭᠢᠪ ᠭᠢᠯᠠᠭᠠᠷ᠃
ᠲᠣᠲᠣᠷᠠ ᠪᠠᠨ ᠬᠣᠪ ᠬᠣᠭᠣᠰᠤᠨ ᠬᠥᠪ ᠬᠥᠩᠭᠡᠨ᠃
ᠥᠩᠭᠡᠷᠡᠭᠰᠡᠨ ᠢ᠋ᠶ᠋ᠡᠨ ᠪᠣᠳᠣᠪᠠᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠡᠳᠬᠢᠯ ᠦ᠋ᠨ ᠰᠤᠪᠤᠳ ᠢ᠋ᠶ᠋ᠠᠨ ᠪᠥᠮᠪᠥᠷᠢᠭᠦᠯᠦᠨᠡ — ᠪᠠᠭᠠ ᠵᠠᠯᠠᠭᠤ ᠶ᠋ᠢᠨ ᠴᠠᠭ ᠲᠤ᠌ ᠪᠠᠭᠰᠢ ᠮᠢᠨᠢ ᠬᠡᠯᠡ ᠪᠡᠨ ᠬᠥᠰᠢᠲᠡᠯᠡ ᠬᠢᠴᠢᠶᠡᠯᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠢ ᠶᠠᠭᠤᠨ ᠳ᠋ᠤ᠌ ᠰᠢᠪᠠᠭᠤ ᠲᠠᠤᠯᠠᠢ ᠠᠩᠨᠠᠬᠤ ᠶ᠋ᠢ ᠯᠡ ᠪᠣᠳᠣᠳᠠᠭ ᠪᠠᠢᠪᠠ ?( ᠭᠡᠲᠡᠯᠡ ᠣᠯᠢᠭ ᠲᠠᠢ ᠠᠩᠴᠢᠨ ᠪᠠᠰᠠ ᠪᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ ! ) ᠪᠠᠭᠰᠢ ᠮᠢᠨᠢ ᠶᠠᠳᠠᠷᠠᠵᠤ ᠵᠦᠳᠡᠷᠡᠲᠡᠯᠡ ᠪᠡᠨ ᠰᠤᠷᠭᠠᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠲᠡᠭᠡᠵᠦ ᠳᠤᠷᠠ ᠦᠭᠡᠢᠴᠡᠨ ᠵᠢᠬᠡᠭᠦᠴᠡᠵᠦ ᠪᠠᠢᠯᠠ? ᠪᠠᠭᠰᠢ ᠶ᠋ᠢᠨ ᠵᠢᠮᠡᠯᠡᠯ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠠᠬᠢᠯᠭᠠ ᠳᠦᠷᠢᠮ ᠶᠠᠭᠠᠬᠢᠭᠠᠳ ᠡᠷᠯᠢᠭ ᠦ᠋ᠨ ᠲᠠᠰᠢᠭᠤᠷ ᠰᠢᠭ᠋ ᠡᠭᠳᠡᠭᠦᠦ ᠲᠡᠢ ᠰᠠᠨᠠᠭᠳᠠᠳᠠᠭ ᠪᠠᠢᠬᠤ ᠪᠣᠢ ⁈ᠳ᠋ᠧᠩ ᠦ᠋ᠨ ᠳᠣᠣᠷᠠ ᠬᠥᠮᠦᠰ ᠰᠤᠷᠤᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠳᠡᠷᠡ ᠶ᠋ᠢᠨ ᠳᠡᠭᠡᠷᠡ ᠪᠢ ᠬᠤᠷᠬᠢᠷᠠᠵᠤ ᠪᠠᠢᠳᠠᠭ ᠃ ᠪᠢ ᠶᠠᠭ ᠯᠠ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠰᠤᠷᠴᠤ ᠪᠠᠢᠬᠤ ᠰᠢᠭ᠋ ᠪᠠᠭᠰᠢ ᠪᠠᠨ ᠬᠠᠭᠤᠷᠬᠤ ᠠᠷᠭᠠ ᠶ᠋ᠢ ᠮᠠᠩᠨᠠᠢ ᠪᠠᠨ ᠦᠷᠴᠢᠢᠲᠡᠯᠡ ᠪᠢᠰᠢᠯᠭᠠᠵᠤ ᠪᠠᠢᠳᠠᠭ ᠰᠠᠨ᠃ ᠡᠦᠲᠦ ᠪᠣᠳᠣᠬᠤᠯᠠᠷ — ᠪᠠᠭᠰᠢ ᠪᠠᠨ ᠬᠠᠭᠤᠷᠤᠭᠰᠠᠨ ᠪᠢᠰᠢ ᠪᠡᠶᠡ ᠪᠡᠨ ᠮᠡᠬᠡᠯᠡᠭᠰᠡᠨ ᠠᠵᠢ !
ᠬᠡᠳᠦᠢᠴᠢᠨᠡᠭᠡᠨ ᠬᠠᠭᠤᠷᠮᠠᠭ ᠦᠵᠡᠭᠳᠡᠯ ᠨᠠᠮᠠᠶ᠋ᠢ ᠦᠨᠡᠭᠡᠨ ᠰᠡᠭᠦᠯ ᠢ᠋ᠶ᠋ᠡᠷ ᠳᠠᠯᠠᠯᠤᠨ ᠵᠡᠷᠭᠡᠯᠭᠡᠨ ᠣᠷᠳᠣᠨ ᠳ᠋ᠤ᠌ ᠤᠷᠢᠪᠠ ᠳᠠ! ᠰᠠᠭᠰᠠᠭᠤ ᠵᠠᠯᠠᠭᠤᠴᠤᠳ ᠤ᠋ᠨ ᠰᠠᠢᠬᠠᠨ ᠦᠭᠡ ᠶ᠋ᠢ ᠢᠲᠡᠭᠡᠭᠡᠳ ᠠᠳᠠ ᠨᠢᠭᠡ ᠴᠠᠭ᠂ ᠲᠡᠨᠳᠡ ᠬᠣᠶᠠᠷ ᠴᠠᠭ᠃ ᠡᠭᠦᠨ ᠲᠡᠢ ᠨᠢᠭᠡ ᠡᠳᠦᠷ᠂ ᠲᠡᠭᠦᠨ ᠲᠡᠢ ᠬᠣᠶᠠᠷ ᠡᠳᠦᠷ ᠨᠥᠬᠥᠷᠯᠡᠭᠡᠳ ᠁ ᠠᠷᠢᠬᠢᠨ ᠤ᠋ ᠠᠮᠲᠠ ᠶ᠋ᠢ ᠪᠠᠭᠠᠲᠤᠷ ᠤ᠋ᠨ ᠳᠦᠷᠢ ᠪᠡᠷ ᠰᠣᠨᠢᠷᠬᠠᠨ ᠂ ᠤᠲᠤᠭᠠᠨ ᠤ᠋ ᠤᠭᠠᠯᠵᠠ ᠶ᠋ᠢ ᠬᠡᠯᠡᠨ ᠦ᠌ ᠡᠷᠳᠡᠮ ᠢ᠋ᠶ᠋ᠡᠷ ᠴᠠᠭᠠᠷᠢᠭᠯᠠᠭᠤᠯᠵᠤ ᠪᠠᠢᠪᠠ ᠁
ᠪᠦᠬᠦᠯᠢ ᠪᠦᠬᠦᠯᠢ ᠡᠳᠦᠷ ᠢ᠋ᠶ᠋ᠡᠷ ᠤ᠌ᠤ ᠶ᠋ᠢᠨ ᠴᠢᠷᠠᠢ ᠨᠢᠳᠦ ᠶ᠋ᠢ ᠮᠢᠨᠢ ᠴᠢᠯᠡᠲᠡᠯᠡ ᠬᠥᠲᠥᠯᠵᠦ ᠪᠦᠲᠦᠨ ᠪᠦᠲᠦᠨ ᠰᠥᠨᠢ ᠪᠡᠷ ᠰᠠᠯᠠᠭᠠ ᠭᠡᠵᠢᠭᠡ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠮᠢᠨᠢ — ᠡᠵᠡᠯᠡᠨ ᠴᠠᠭ ᠤ᠋ᠨ ᠣᠷᠬᠣᠳᠠᠢ ᠶ᠋ᠢ ᠮᠢᠨᠢ ᠬᠤᠯᠤᠭᠠᠨᠠ ᠰᠢᠭ᠋ ᠬᠤᠯᠠᠭᠠᠢᠯᠠᠨ ᠵᠥᠭᠡᠭᠡᠭᠰᠡᠨ ᠢ᠋ ᠡᠳᠦᠭᠡ ᠡᠯᠧᠺᠲ᠋ᠷᠣᠨ ᠪᠣᠳᠣᠯᠭᠠ ᠶ᠋ᠢᠨ ᠮᠠᠰᠢᠨ ᠢ᠋ᠶ᠋ᠠᠷ ᠴᠤ᠌ ᠪᠤᠳᠤᠬᠤᠶᠠ ᠪᠡᠷᠬᠡ ! ᠨᠢᠳᠦᠨ ᠦ᠌ ᠮᠢᠨᠢ ᠬᠠᠮᠤᠭ ᠤ᠋ᠨ ᠬᠤᠷᠴᠠ ᠬᠠᠷᠠᠭᠠ ᠶ᠋ᠢ ᠂ ᠴᠢᠬᠢᠨ ᠦ᠌ ᠮᠢᠨᠢ ᠬᠠᠮᠤᠭ ᠤ᠋ᠨ ᠰᠣᠷᠭᠣᠭ ᠰᠣᠨᠣᠷ ᠢ᠋ ᠂ ᠪᠡᠶᠡ ᠶ᠋ᠢᠨ ᠮᠢᠨᠢ ᠬᠠᠮᠤᠭ ᠤ᠋ᠨ ᠠᠮᠢᠳᠤ ᠰᠠᠷᠠᠯ ᠢ᠋ ᠂ ᠬᠥᠯ ᠦ᠋ᠨ ᠮᠢᠨᠢ ᠬᠠᠮᠤᠭ ᠤ᠋ᠨ ᠤᠷᠠᠨ ᠬᠥᠳᠡᠯᠦᠯ ᠢ᠋ ᠲᠡᠷᠡ ᠵᠦᠭ ᠂ ᠲᠡᠳᠡ ᠮᠣᠭᠠᠢ ᠰᠢᠭ᠋ ᠰᠤᠷᠤᠭᠠᠳ ᠵᠠᠯᠭᠢᠵᠠᠢ ᠃ ᠬᠤᠪᠴᠠᠰᠤᠨ ᠤ᠋ ᠬᠡᠯᠪᠡᠷᠢ ᠮᠠᠶᠢᠭ ᠂ ᠢᠳᠡᠭᠡᠨ ᠦ᠌ ᠠᠮᠲᠠ ᠦᠨᠦᠷ ᠂ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠴᠡᠩᠭᠡᠯ ᠮᠢᠨᠦ ᠰᠦᠨᠡᠰᠦ ᠶ᠋ᠢ ᠣᠭᠲᠠᠷᠭᠤᠢ ᠶ᠋ᠢᠨ ᠴᠢᠨᠠᠳᠤᠬᠢ ᠤᠪᠠᠳᠢᠰᠲᠤ ᠰᠣᠯᠣᠩᠭᠠ ᠶ᠋ᠢᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠥᠭᠡᠷᠢᠭᠦᠯᠳᠡᠭ ᠃
ᠪᠥᠮᠪᠦᠭᠡᠨ ᠲᠠᠯᠠᠪᠠᠢ ᠂ ᠪᠥᠵᠢᠭ ᠦ᠋ᠨ ᠲᠠᠩᠬᠢᠮ᠂ ᠤᠨᠲᠠᠯᠭᠠ ᠶ᠋ᠢᠨ ᠣᠷᠣ ᠂ ᠪᠤᠳᠠᠭᠠᠨ ᠤ᠋ ᠰᠢᠷᠡᠭᠡ ᠂ ᠰᠢᠳᠠᠷ ᠤ᠋ᠨ ᠬᠥᠯᠭᠡ ᠂ ᠴᠠᠭ ᠢ᠋ ᠮᠢᠨᠢ ᠂ ᠠᠮᠢ ᠶ᠋ᠢ ᠮᠢᠨᠢ — ᠠᠯᠲᠠ ᠶ᠋ᠢ ᠮᠢᠨᠢ ᠠᠪᠳᠠᠷᠠ ᠠᠪᠳᠠᠷᠠ ᠪᠠᠷ ᠠᠪᠠᠴᠢᠵᠠᠢ᠃ ᠥᠨᠢᠳᠡ ᠠᠪᠠᠴᠢᠵᠠᠢ !ᠪᠢ ᠡᠦᠲᠦ ᠰᠠᠶᠢ ᠯᠠ ᠮᠡᠳᠡᠯᠡ ! ᠳᠡᠯᠡᠬᠡᠢ ᠳᠡᠭᠡᠷᠡ ᠬᠥᠮᠦᠨ ᠶᠠᠮᠠᠷ ᠡᠷᠳᠡᠨᠢ ᠪᠡᠨ ᠠᠯᠳᠠᠭᠰᠠᠨ ᠴᠤ᠌ ᠪᠦᠷ ᠳᠠᠬᠢᠭᠠᠳ ᠣᠯᠵᠤ ᠪᠣᠯᠤᠨᠠ ᠂ ᠭᠡᠪᠡᠴᠦ ᠴᠠᠭ ᠤ᠋ᠨ ᠠᠯᠲᠠ ᠪᠠᠨ ᠠᠯᠳᠠᠪᠠᠯ ᠳᠠᠬᠢᠨ ᠣᠯᠵᠤ ᠴᠢᠳᠠᠬᠤ ᠦᠭᠡᠢ !
ᠲᠡᠦᠬᠡ ᠨᠠᠮᠲᠠᠷ ᠤ᠋ᠨ ᠬᠡᠮᠵᠢᠭᠦᠷ ᠳᠡᠭᠡᠷᠡ ᠪᠡᠶᠡ ᠪᠡᠨ ᠵᠠᠳᠠᠯᠤᠭᠤᠯᠪᠠᠯ᠄ ᠤᠨᠲᠠᠭᠠᠳ ᠠᠷᠪᠠᠨ ᠲᠠᠪᠤᠨ ᠵᠢᠯ᠂ ᠢᠳᠡᠭᠡᠳ ᠠᠷᠪᠠᠨ ᠲᠠᠪᠤᠨ ᠵᠢᠯ ᠂ ᠨᠠᠭᠠᠳᠤᠭᠠᠳ ᠠᠷᠪᠠᠨ ᠲᠠᠪᠤᠨ ᠵᠢᠯ ᠁
ᠪᠢ ᠭᠡᠮᠰᠢᠨᠡ ! ᠪᠡᠶᠡ ᠳ᠋ᠡᠭᠡᠨ ᠭᠣᠮᠣᠳᠠᠨᠠ ! ᠬᠤᠳᠠᠯ ᠳ᠋ᠤ᠌ ᠪᠠᠴᠢᠯᠠᠭᠳᠠᠭᠰᠠᠨ ᠳ᠋ᠠᠭᠠᠨ ᠂ ᠬᠠᠭᠤᠷᠮᠠᠭ ᠲᠤ᠌ ᠮᠡᠬᠡᠯᠡᠭᠳᠡᠭᠰᠡᠨ ᠳ᠋ᠡᠭᠡᠨ ᠂ ᠬᠣᠭᠣᠰᠣᠨ ᠬᠣᠴᠣᠷᠤᠭᠰᠠᠨ ᠳ᠋ᠠᠭᠠᠨ ᠁
ᠪᠢ ᠬᠣᠷᠣᠰᠤᠨᠠ ! ᠥᠨᠢᠳᠡ ᠬᠣᠷᠣᠰᠤᠨᠠ — ᠨᠠᠮᠠᠶ᠋ᠢ ᠬᠣᠣᠷᠯᠠᠭᠰᠠᠨ ᠂ ᠬᠣᠷᠸᠠ ᠶ᠋ᠢ ᠮᠡᠬᠡᠯᠡᠭᠰᠡᠨ ᠨᠡᠢᠭᠡᠮ ᠦ᠋ᠨ ᠬᠣᠭ ᠨᠣᠪᠰᠢᠨ ᠳ᠋ᠤ᠌ !
ᠴᠠᠭ᠂ ᠴᠠᠭ᠂ ᠴᠠᠭ ᠠ᠋ ! ᠴᠢᠮᠠᠶ᠋ᠢ ᠪᠢ ᠤᠷᠭᠠᠯᠠᠨ ᠪᠤᠴᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠦᠯᠡᠳᠡᠭᠰᠡᠨ ᠬᠠᠭᠠᠰ ᠨᠠᠰᠤᠨ ᠤ᠋ ᠪᠠᠨ ᠮᠢᠨᠦ᠋ᠲ ᠪᠦᠷᠢ ᠶ᠋ᠢ᠂ ᠰᠧᠺᠦ᠋ᠨ᠋ᠳ᠋ ᠪᠦᠷᠢ ᠶ᠋ᠢ ᠰᠢᠵᠢᠷ ᠠᠯᠲᠠᠨ ᠵᠣᠭᠣᠰ ᠢ᠋ᠶ᠋ᠠᠷ ᠦᠨᠡᠯᠡᠨ ᠵᠠᠷᠤᠨᠠ!
ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠭᠡᠷᠡᠴᠢᠯᠡᠬᠦ ᠶ᠋ᠢᠨ ᠲᠥᠯᠥᠭᠡ ᠬᠡᠨ ᠦ᠌ ᠤᠷᠤᠯᠳᠤᠭᠠᠨ ᠢ᠋ ᠴᠦ᠍ ᠬᠦᠯᠢᠶᠡᠨ ᠠᠪᠤᠨᠠ!
ᠵᠠ ᠶᠡᠷᠦᠨᠢ ᠣᠳᠣ ᠠ᠋ᠴᠠ ᠠᠵᠢᠯ ᠰᠤᠷᠤᠯᠭᠠ ᠶ᠋ᠢᠨ ᠠᠰᠠᠷ ᠤ᠋ᠨ ᠱᠠᠲᠤ ᠪᠠᠷ ᠲᠦᠷᠭᠡᠨ ᠮᠥᠷᠲᠡᠭᠡᠨ ᠳᠠᠭᠠᠭᠠᠮᠠᠭᠠᠢ ᠠᠪᠠᠷᠢᠯᠲᠠ ᠶ᠋ᠢᠨ ᠤᠷᠤᠯᠳᠤᠭᠠᠨ ᠵᠠᠷᠯᠠᠵᠠᠭᠠᠶᠠ !
ᠥᠩᠭᠡᠷᠡᠭᠰᠡᠨ ᠬᠠᠭᠠᠰ ᠨᠠᠰᠤᠨ ᠤ᠋ ᠪᠠᠨ ᠰᠢᠵᠢᠷ ᠠᠯᠲᠠ ᠪᠠᠷ ᠬᠤᠳᠠᠯᠳᠤᠨ ᠠᠪᠴᠢᠷᠠᠭᠰᠠᠨ ᠨᠢᠭᠡ ᠳᠡᠪᠲᠡᠷ《 ᠵᠠᠯᠠᠭᠤ ᠨᠠᠰᠤᠨ ᠤ᠋ ᠴᠡᠭᠡᠷ》 ᠢ᠋ ᠤᠩᠰᠢᠬᠤ ᠬᠥᠮᠦᠨ ᠪᠠᠢᠪᠠᠯ ᠳᠤᠷᠠᠲᠠᠶᠠ ᠬᠦᠷᠭᠡᠵᠦ ᠦᠭᠬᠦᠶᠡ !
1978 ᠣᠨ