ᠢᠰᠡᠭᠡᠢ ᠭᠡᠷ ᠤᠨ ᠮᠢᠨᠢ ᠣᠨᠢ - ᠯᠢᠭᠳᠡᠨ Эсгий гэрийн минь онь - Лигдэн
272ᠢᠰᠡᠭᠡᠢ ᠭᠡᠷ ᠤᠨ ᠮᠢᠨᠢ ᠣᠨᠢ
ᠤᠷᠭᠠᠴᠢᠨ ᠪᠥᠬᠡᠴᠢᠨ ᠨᠠᠮᠨᠠᠭᠠᠴᠢᠨ ᠮᠣᠬᠣᠰᠢ ᠦᠭᠡᠢ ᠮᠣᠩᠭᠣᠯ ᠦᠷᠡᠰ ᠃
ᠬᠤᠪᠢ ᠵᠠᠶᠠᠭᠠ ᠪᠠᠨ ᠬᠣᠢᠪᠢᠳᠤ ᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠵᠠᠢᠳᠠᠯᠠᠭᠠᠳ ᠂ ᠵᠣᠷᠢᠭ ᠤᠬᠠᠭᠠᠨ ᠬᠣᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠩᠭᠢᠳᠤᠭᠰᠠᠨ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠠᠳᠬᠤᠭᠠᠳ ᠵᠣᠯᠪᠣᠭᠠᠲᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠵᠣᠷᠢᠨᠠᠮ ᠃
ᠵᠠᠮ ᠮᠤᠷᠤᠢ ᠂ ᠪᠠᠷᠲᠠᠭᠠ ᠶᠡᠬᠡ ᠂ ᠬᠦᠯᠦᠭ ᠲᠤᠢᠯᠠᠩᠬᠠᠢ ᠂ ᠮᠠᠨᠠᠨ ᠵᠤᠵᠠᠭᠠᠨ ᠂ ᠵᠡᠷᠭᠡᠯᠭᠡᠨ ᠵᠢᠭᠲᠡᠢ ᠂ ᠬᠡᠰᠡᠭ ᠰᠢᠭᠤᠷᠭᠠ ᠲᠠᠢ ᠂ ᠬᠡᠰᠡᠭ ᠪᠣᠷᠣᠭᠠ ᠲᠠᠢ ᠂ ᠲᠣᠷᠰᠬᠢᠪᠡᠯ ᠵᠤᠨ ᠂ ᠳᠤᠨᠳᠤᠰᠬᠢᠪᠡᠯ ᠬᠠᠪᠤᠷ ᠂ ᠲᠥᠭᠡ ᠵᠠᠢ ᠳ᠋ᠤ᠌ ᠲᠥᠭᠡᠷᠢᠬᠦ ᠠᠶᠤᠯ ᠲᠠᠢ ᠂ ᠢᠷᠮᠡᠬᠦ ᠵᠠᠭᠤᠷᠠ ᠳ᠋ᠤ᠌ ᠡᠨᠳᠡᠬᠦ ᠡᠮᠢᠶᠡᠯ ᠲᠡᠢ ᠠᠶᠠᠯᠠᠯ ᠳ᠋ᠤ᠌ ᠮᠣᠬᠣᠰᠢ ᠦᠭᠡᠢ ᠮᠣᠩᠭᠣᠯ ᠵᠠᠯᠠᠭᠤ ᠮᠢᠨᠢ ᠬᠣᠷᠮᠣᠢᠳᠠᠪᠠᠴᠤ ᠬᠣᠢᠰᠢᠯᠠᠬᠤ ᠦᠭᠡᠢ ᠲᠣᠷᠤᠯ ᠦᠭᠡᠢ ᠳᠣᠪᠲᠣᠯᠤᠨ ᠶᠠᠳᠠᠷᠠᠯ ᠦᠭᠡᠢ ᠶᠠᠪᠤᠨᠠᠮ ᠃
ᠵᠣᠯ ᠵᠢᠷᠭᠠᠯ ᠤ᠋ᠨ ᠳᠠᠭᠢᠨᠢ ᠶ᠋ᠢ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠠᠯᠲᠠ ᠮᠥᠩᠭᠥᠨ ᠲᠡᠪᠡᠨᠡ ᠶ᠋ᠢᠨ ᠰᠦᠪᠡᠭᠴᠢ ᠶ᠋ᠢ ᠠᠯᠳᠠᠯ ᠦᠭᠡᠢ ᠬᠠᠷᠪᠤᠵᠤ ᠲᠡᠷᠢᠭᠦᠯᠡᠳᠡᠭ ᠮᠡᠷᠭᠡᠨ ᠨᠠᠮᠨᠠᠭᠠᠴᠢᠨ ᠮᠢᠨᠢ ᠠᠮᠢᠳᠤᠷᠠᠯ ᠣᠷᠣᠰᠢᠯ ᠤ᠋ᠨ ᠪᠡᠷᠬᠡ ᠪᠠᠷᠲᠠᠭᠠ ᠶ᠋ᠢ ᠨᠤᠮᠤ ᠰᠤᠮᠤ ᠪᠠᠷ ᠢ᠋ᠶ᠋ᠠᠨ ᠬᠥᠲᠥᠯ ᠣᠨᠢ ᠭᠠᠷᠲᠠᠯᠠ ᠬᠠᠷᠪᠤᠵᠤ ᠂ ᠬᠣᠣᠷᠲᠠᠢ ᠵᠢᠷᠦᠬᠡ ᠶ᠋ᠢ ᠨᠡᠪᠲᠡ ᠂ ᠬᠣᠪᠴᠢ ᠬᠣᠩᠰᠢᠶᠠᠷ ᠢ᠋ ᠰᠢᠪᠲᠤ ᠂ ᠬᠣᠮᠣᠬᠠᠢ ᠰᠠᠨᠠᠭᠠ ᠶ᠋ᠢ ᠰᠡᠳᠡ ᠰᠦᠪᠡᠯᠡᠨᠡᠮ ᠃
ᠵᠠᠮ ᠳᠡᠭᠡᠷᠡ ᠵᠠᠭᠠᠨ ᠰᠢᠭ᠋ ᠬᠥᠨᠳᠡᠯᠢᠳᠦᠨ ᠬᠡᠷᠦᠭᠰᠡᠨ ᠬᠦᠴᠢᠷ ᠪᠡᠷᠬᠡᠰᠢᠶᠡᠯ ᠦ᠋ᠨ ᠵᠤᠯᠵᠠᠭᠠ ᠨᠤᠭᠤᠳ ᠬᠥᠳᠡᠯᠮᠦᠷᠢ ᠠᠮᠢᠳᠤᠷᠠᠯ ᠤ᠋ᠨ ᠳᠤᠮᠳᠠ ᠰᠢᠷᠭᠤᠵᠤ ᠣᠷᠣᠭᠠᠳ ᠮᠣᠬᠣᠰᠢ ᠦᠭᠡᠢ ᠮᠣᠩᠭᠣᠯ ᠵᠠᠯᠠᠭᠤ ᠶ᠋ᠢ ᠬᠦᠵᠦᠭᠦᠳᠡᠨ ᠳᠠᠷᠤᠵᠤ ᠬᠥᠯᠥᠰᠥ ᠶ᠋ᠢ ᠨᠢ ᠳᠤᠰᠤᠯᠠᠭᠤᠯᠤᠨ ᠬᠥᠯ ᠢ᠋ ᠨᠢ ᠭᠣᠬᠠᠳᠠᠵᠤ ᠣᠷᠣᠯᠳᠣᠨᠠ ᠃ ᠰᠢᠷᠣᠢᠳᠠᠳᠠᠭ ᠦᠭᠡᠢ ᠪᠣᠰᠤᠭᠠ ᠮᠣᠩᠭᠣᠯ ᠪᠥᠬᠡ ᠢᠮᠠᠭᠲᠠ ᠢᠯᠠᠭᠴᠢ ᠬᠥᠯ ᠳᠡᠭᠡᠷᠡ ᠪᠡᠨ ᠬᠥᠮᠦᠨ ᠰᠢᠭᠤᠢ ᠳᠣᠲᠣᠷᠠ ᠬᠥᠬᠡ ᠨᠠᠷᠠᠰᠤ ᠰᠢᠭ᠋ ᠵᠣᠭᠰᠣᠨᠠ ᠃
ᠢᠰᠡᠭᠡᠢ ᠭᠡᠷ ᠦ᠋ᠨ ᠮᠢᠨᠢ ᠣᠨᠢ ᠲᠤᠯᠭᠠᠭᠤᠷᠢ ᠪᠤᠯᠵᠠᠭᠠᠭᠰᠠᠨ ᠮᠣᠬᠣᠰᠢ ᠦᠭᠡᠢ ᠮᠣᠩᠭᠣᠯ ᠵᠠᠯᠠᠭᠤᠰ ᠦᠨᠳᠦᠰᠦ ᠲᠡᠢ ᠮᠣᠳᠣ ᠂ ᠪᠠᠷᠠ ᠲᠠᠢ ᠲᠣᠳᠣ ᠂ ᠰᠠᠮᠪᠠᠭᠠ ᠲᠠᠢ ᠰᠣᠳᠣ ᠂ ᠭᠡᠷᠡᠯ ᠲᠡᠢ ᠡᠦᠲᠦ ᠃ ᠲᠣᠭᠣᠨᠣ ᠪᠠᠨ ᠮᠥᠩᠬᠡ ᠲᠤᠯᠵᠤ ᠂ ᠲᠣᠲᠣᠭᠣ ᠪᠠᠨ ᠥᠨᠢ ᠡᠷᠭᠦᠵᠦ ᠂ ᠡᠨᠡ ᠭᠡᠷ ᠢ᠋ᠶ᠋ᠡᠨ ᠡᠩᠬᠡ ᠮᠠᠨᠳᠤᠭᠤᠯᠤᠨᠠ ᠃
ᠲᠡᠳᠡᠨ ᠦ᠌ ᠵᠠᠩ ᠴᠢᠨᠠᠷ ᠬᠥᠳᠡᠯᠦᠯ ᠪᠠᠢᠳᠠᠯ –– ᠨᠣᠴᠣᠬᠤ ᠭᠠᠯ ᠂ ᠦᠶᠡᠷᠯᠡᠬᠦ ᠤᠰᠤ ᠂ ᠱᠤᠤᠭᠢᠬᠤ ᠰᠠᠯᠬᠢᠨ ᠂ ᠨᠢᠷᠭᠡᠬᠦ ᠠᠶᠤᠩᠭᠠ ᠃
ᠵᠣᠷᠢᠭ ᠰᠥᠰᠥ ᠪᠣᠯ ᠲᠡᠳᠡᠨ ᠦ᠌ ᠮᠥᠩᠬᠡ ᠤᠯᠠᠮᠵᠢᠯᠠᠭᠴᠢ ᠥᠪ ᠬᠥᠷᠥᠩᠭᠡ ᠂ ᠵᠠᠮ ᠤ᠋ᠨ ᠵᠠᠷᠤᠳᠠᠯ ᠶᠤᠮ ᠃
ᠢᠲᠡᠭᠡᠯ ᠵᠣᠷᠢᠯᠲᠠ ᠪᠣᠯ ᠲᠡᠳᠡᠨ ᠦ᠌ ᠢᠷᠡᠭᠡᠳᠦᠢ ᠳ᠋ᠦ᠍ ᠬᠦᠷᠬᠦ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠢᠳᠡᠭᠡᠨ ᠤᠮᠳᠠᠭᠠᠨ ᠢᠯᠴᠢ ᠭᠡᠷᠡᠯ ᠦ᠋ᠨ ᠬᠥᠮᠥᠷᠭᠡ ᠶᠦ᠍ᠮ ᠃
ᠢᠯᠠᠪᠠᠯ ᠳᠠᠬᠢᠨ ᠢᠯᠠᠬᠤ ᠶ᠋ᠢᠨ ᠪᠠᠷᠳᠠᠮ ᠢᠲᠡᠭᠡᠯ ᠲᠡᠢ ᠂ ᠢᠯᠠᠭᠳᠠᠭᠰᠠᠨ ᠴᠤ᠌ ᠵᠠᠪᠠᠯ ᠢᠯᠠᠬᠤ ᠶ᠋ᠢᠨ ᠪᠠᠲᠤ ᠢᠲᠡᠭᠡᠯ ᠲᠡᠢ ᠂ ᠢᠷᠡᠭᠡᠳᠦᠢ ᠶ᠋ᠢ ᠢᠯᠡ ᠪᠡᠷ ᠤᠭᠲᠤᠬᠤ ᠪᠠᠶᠠᠨ ᠢᠲᠡᠭᠡᠯ ᠲᠡᠢ ᠃
ᠡᠨᠡ ᠦᠨᠳᠦᠰᠦ ᠡᠷᠡᠮᠡᠯᠵᠡᠯᠡᠯ ᠦ᠋ᠨ ᠴᠣᠮᠣᠷᠯᠢᠭ ᠃
1983. 12