ᠭᠢᠯᠪᠡᠭᠡᠨ - ᠯᠢᠭᠳᠡᠨ Гилбээн - Лигдэн
286ᠭᠢᠯᠪᠡᠭᠡᠨ
ᠠᠭᠤᠯᠠ ᠲᠠᠯᠠ ᠶ᠋ᠢᠨ ᠴᠠᠰᠤ ᠬᠠᠭᠵᠠᠷᠠᠵᠤ ᠤᠰᠤ ᠨᠠᠮᠤᠭ ᠤ᠋ᠨ ᠮᠥᠰᠥ ᠬᠠᠢᠯᠤᠭᠠᠳ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠠᠯᠲᠠᠨ ᠰᠢᠷᠭᠠᠯ ᠬᠡᠪᠢᠰ ᠠᠭᠠᠵᠢᠮ ᠢ᠋ᠶ᠋ᠠᠷ ᠰᠡᠷᠭᠦᠯᠡᠩ ᠨᠣᠭᠣᠭᠠᠨ ᠥᠭᠡᠳᠡᠩ ᠢ᠋ᠶ᠋ᠡᠷ ᠰᠣᠯᠢᠭᠳᠠᠬᠤ ᠦᠶᠡ ᠳ᠋ᠦ᠍ ᠬᠠᠩᠰᠢ ᠪᠣᠯᠤᠭᠰᠠᠨ ᠢ᠋ ᠲᠡᠭᠷᠢ ᠮᠡᠳᠡᠭᠳᠡᠪᠡ ᠃
ᠬᠠᠩᠰᠢᠨ ᠤ᠋ ᠪᠣᠷᠣᠭᠠᠨ ᠬᠠᠮᠤᠭ ᠤ᠋ᠨ ᠰᠠᠢᠨ ᠭᠡᠵᠦ ᠮᠠᠯᠴᠢᠳ ᠬᠡᠯᠡᠳᠡᠭ ᠃
ᠡᠨᠡ ᠡᠳᠦᠷ ᠬᠠᠩᠰᠢ ᠪᠣᠯᠵᠤ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠣᠨᠴᠣᠭᠣᠢ ᠪᠠᠶᠠᠷᠲᠠᠢ ᠰᠠᠨᠠᠭᠳᠠᠨᠠ ᠃
ᠠᠭᠠᠷ ᠲᠡᠭᠷᠢ ᠳ᠋ᠦ᠍ ᠬᠠᠷᠠ ᠡᠭᠦᠯᠡ ᠪᠦᠷᠬᠦᠵᠦ ᠬᠥᠮᠦᠰ ᠦ᠋ᠨ ᠬᠦᠰᠡᠯ ᠢ᠋ᠶ᠋ᠡᠷ ᠪᠣᠷᠣᠭᠠᠨ ᠣᠷᠣᠬᠤ ᠶᠠᠩᠵᠤ ᠲᠠᠢ᠃ ᠠᠮᠢᠯᠠᠯ ᠤ᠋ᠨ ᠦᠷᠡ ᠬᠥᠷᠥᠰᠥᠨ ᠳᠣᠣᠷᠠ ᠪᠠᠢᠪᠠᠴᠤ ᠠᠮᠢᠯᠠᠯ ᠤ᠋ᠨ ᠬᠤᠷᠠ ᠷᠠᠰᠢᠶᠠᠨ ᠦᠭᠡᠢ ᠪᠣᠯ ᠬᠠᠭᠤᠷᠠᠢ ᠠᠮᠢᠰᠬᠤᠯ ᠳ᠋ᠤ᠌ ᠮᠠᠩᠰᠢᠭᠤᠷᠠᠨ ᠤᠨᠲᠠᠭᠠᠳ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠶᠦ᠍ᠮ !
ᠠᠭᠠᠷ ᠳᠡᠭᠡᠭᠦᠷ ᠪᠣᠷᠣᠭᠠᠨ ᠤ᠋ ᠡᠭᠦᠯᠡ ᠪᠦᠷᠬᠦᠵᠦ ᠨᠠᠷᠠ ᠶ᠋ᠢ ᠬᠠᠯᠠᠭᠯᠠᠭᠰᠠᠨ ᠴᠤ᠌ ᠬᠥᠮᠦᠰ ᠬᠦᠰᠡᠯᠡᠩ ᠦ᠋ᠨ ᠬᠠᠷᠠᠴᠠ ᠪᠠᠨ ᠡᠭᠦᠯᠡᠨ ᠳᠡᠭᠡᠷᠡ ᠮᠡᠯᠡᠷᠡᠲᠡᠯᠡ ᠳᠤᠰᠬᠠᠨᠠ ᠃ ᠬᠠᠷᠠ ᠡᠭᠦᠯᠡ ᠶ᠋ᠢ ᠮᠣᠩᠭᠣᠯᠴᠤᠳ ᠷᠠᠰᠢᠶᠠᠨ ᠪᠣᠳᠣᠩ ᠲᠠᠢ ᠠᠴᠢᠶᠠ ᠬᠥᠰᠬᠡ ᠭᠡᠳᠡᠭ ᠃ ᠲᠡᠭᠡᠪᠡᠯ ᠭᠢᠯᠪᠡᠬᠡᠨ ᠨᠢ ᠴᠣᠬᠣᠮ ᠶᠠᠭᠤ ᠪᠣᠯᠤᠭᠠ ᠪᠣᠢ ? ᠭᠢᠯᠪᠡᠬᠡᠨ ᠶᠠᠭ ᠯᠠ ᠠᠯᠲᠠᠨ ᠰᠠᠮᠳᠠᠰᠦ ᠪᠤᠶᠤ ᠠᠯᠲᠠᠨ ᠵᠢᠷᠤᠭᠠᠰᠤ ᠰᠢᠭ᠋ ᠬᠠᠷᠠᠭᠳᠠᠭᠠᠳ ᠪᠠᠢᠨᠠ ᠰᠢᠳᠡ ᠁
ᠬᠠᠷᠠ ᠡᠭᠦᠯᠡᠨ ᠦ᠌ ᠬᠠᠷᠠᠮᠴᠢ ᠡᠵᠡᠨ ᠨᠢ ᠷᠠᠰᠢᠶᠠᠨ ᠪᠣᠳᠣᠩ ᠲᠠᠢ ᠰᠠᠷᠬᠤᠳ ᠢ᠋ᠶ᠋ᠠᠨ ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠬᠤᠷᠢᠮ ᠤ᠋ᠨ ᠰᠢᠷᠡᠭᠡᠨ ᠳ᠋ᠦ᠍ ᠬᠦᠷᠭᠡᠬᠦ ᠪᠡᠷ ᠨᠣᠭᠲᠣ ᠬᠠᠵᠠᠭᠠᠷ ᠦᠭᠡᠢ ᠨᠣᠬᠠᠢ ᠬᠥᠯᠦᠭᠰᠡᠨ ᠲᠡᠷᠭᠡ ᠭᠡᠯᠢᠨ ᠬᠤᠷᠳᠤᠯᠠᠬᠤ ᠳ᠋ᠤ᠌ ᠠᠯᠲᠠᠨ ᠰᠦᠮᠪᠦᠷ ᠠᠭᠤᠯᠠᠨ ᠳᠡᠭᠡᠷᠡ ᠡᠴᠡ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠥᠨᠥᠴᠢᠨ ᠬᠥᠪᠡᠭᠦᠨ ᠬᠠᠩᠭᠠᠢ ᠨᠤᠲᠤᠭ ᠲᠤ᠌ ᠮᠠᠨᠢ ᠬᠠᠷᠠ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠳᠤᠰᠬᠠᠭᠠᠳ ᠬᠠᠩᠬᠤᠯᠤᠭᠰᠠᠨ ᠴᠢᠭᠢᠭ ᠢ᠋ ᠨᠢ ᠴᠦ᠍ ᠦᠨᠦᠷᠲᠦᠭᠦᠯᠬᠦ ᠦᠭᠡᠢ ᠥᠩᠭᠡᠷᠡᠬᠦ ᠨᠢ ᠪᠠᠢᠨᠠ ᠰᠢᠦ ᠭᠡᠳ ᠬᠢᠯᠢᠩ ᠲᠥᠷᠥᠵᠦ ᠂ ᠬᠠᠷᠠ ᠡᠭᠦᠯᠡᠨ ᠬᠥᠰᠬᠡ ᠳᠡᠭᠡᠷᠡ ᠨᠢ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠦᠰᠦᠷᠦᠨ ᠭᠠᠷᠴᠤ ᠬᠠᠷᠠᠮᠴᠢ ᠡᠵᠡᠨ ᠲᠡᠢ ᠨᠢ ᠮᠠᠷᠭᠤᠯᠳᠤᠨ ᠷᠠᠰᠢᠶᠠᠨ ᠪᠣᠳᠣᠩ ᠢ᠋ ᠨᠢ ᠠᠯᠲᠠᠨ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠬᠠᠭᠠ ᠴᠠᠪᠴᠢᠬᠤ ᠳ᠋ᠤ᠌ ᠠᠯᠲᠠᠨ ᠴᠠᠪᠠ ᠭᠠᠷᠤᠨ –– ᠠᠯᠲᠠᠨ ᠵᠢᠷᠤᠭᠠᠰᠤ ᠲᠡᠳᠡᠨ ᠭᠢᠯᠪᠡᠳᠡᠭ ᠭᠡᠨᠡ ᠃
ᠷᠠᠰᠢᠶᠠᠨ ᠨᠢ ᠴᠦ᠍ ᠮᠡᠳᠡᠭᠡᠵᠢ ᠪᠡᠷ ᠭᠠᠵᠠᠷ ᠤ᠋ᠨ ᠬᠥᠯᠥᠰᠥ ᠪᠡᠷ ᠭᠠᠵᠠᠷ ᠤ᠋ᠨ ᠪᠦᠷᠬᠦᠬᠡᠷ ᠲᠦ᠍ ᠨᠡᠷᠡᠭᠰᠡᠨ ᠭᠠᠢᠬᠠᠮᠰᠢᠭᠲᠤ ᠠᠷᠠᠵᠠ ᠶ᠋ᠢᠨ ᠳᠡᠭᠡᠵᠢ ᠶᠦ᠍ᠮ ᠃
ᠨᠢᠳᠤᠨᠤᠨ ᠨᠠᠮᠤᠷ ᠡᠴᠡ ᠨᠡᠰᠢ ᠠᠩᠬᠠ ᠤᠳᠠᠭᠠ ᠬᠤᠷᠠ ᠶ᠋ᠢᠨ ᠰᠢᠮᠡ ᠶ᠋ᠢ ᠬᠦᠷᠲᠡᠬᠦ ᠭᠡᠵᠦ ᠪᠠᠢᠭᠠ ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠠᠩᠭᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠦᠯᠢᠶᠡᠨᠡ ᠃ ᠮᠠᠯ ᠰᠦᠷᠦᠭ ᠡᠪᠦᠯ ᠢ᠋ ᠮᠡᠨᠳᠦ ᠭᠡᠲᠦᠯᠦᠭᠰᠡᠨ ᠡᠴᠡ ᠣᠨᠳᠣᠷᠣᠯ ᠤ᠋ᠨ ᠡᠷᠡᠮᠡᠯᠵᠡᠯᠡᠯ ᠲᠡᠢ ᠪᠣᠯᠤᠭᠠᠳ ᠬᠠᠭᠤᠴᠢᠨ ᠦᠰᠦ ᠪᠡᠨ ᠭᠤᠤᠵᠢᠵᠤ ᠰᠢᠨᠡ ᠰᠣᠷᠭᠣᠭ ᠰᠤᠷᠯᠢᠭ ᠨᠠᠷᠢᠨ ᠨᠣᠯᠤᠤᠷ ᠲᠠᠢ ᠪᠣᠯᠬᠤ ᠶ᠋ᠢ ᠲᠡᠰᠬᠦ ᠠᠯᠳᠠᠷᠠᠨ ᠬᠦᠯᠢᠶᠡᠨᠡ ᠃
ᠡᠬᠡ ᠳᠡᠯᠡᠬᠡᠢ ᠠᠩᠬᠠᠨ ᠤ᠋ ᠠᠶᠤᠩᠭᠠ ᠶ᠋ᠢ ᠰᠣᠨᠣᠷᠳᠠᠬᠤ ᠪᠣᠯᠵᠠᠢ ᠃ ᠲᠡᠷᠡ ᠪᠣᠯ ᠲᠦᠮᠡᠨ ᠪᠣᠳᠠᠰ ᠤ᠋ᠨ ᠲᠦᠷᠦᠯᠲᠡ ᠶ᠋ᠢᠨ ᠦᠪᠡᠳᠡᠭᠰᠢ ᠶᠡᠬᠡ ᠶᠣᠰᠣᠯᠠᠯ ᠤ᠋ᠨ ᠬᠡᠩᠭᠡᠷᠭᠡ ᠪᠣᠯᠳᠠᠭ ᠪᠥᠭᠡᠳ ᠲᠡᠭᠷᠢ ᠡᠴᠡ ᠲᠦᠮᠡᠨ ᠪᠣᠳᠠᠰ ᠢ᠋ ᠲᠦᠭᠡᠮᠡᠯ ᠰᠡᠷᠭᠦᠯᠲᠡ ᠳ᠋ᠦ᠍ ᠳᠠᠭᠤᠳᠠᠳᠠᠭ ᠬᠠᠷᠠᠩᠭᠠ ᠨᠢ ᠴᠦ᠍ ᠪᠣᠯᠳᠠᠭ ᠠᠵᠢ ᠃
ᠠᠭᠠᠷ ᠳᠡᠭᠡᠷᠡ ᠠᠯᠲᠠᠨ ᠰᠢᠷᠬᠡᠭ ᠬᠡᠢᠰᠦᠭᠰᠡᠨ ᠮᠡᠲᠦ ᠭᠢᠯᠪᠡᠬᠡᠨ ᠭᠢᠯᠪᠠᠯᠠ ᠃
ᠭᠱᠠᠨ ᠵᠠᠭᠤᠷᠠ ᠪᠦᠬᠦ ᠣᠭᠲᠠᠷᠭᠤᠢ ᠶ᠋ᠢ ᠥᠪᠴᠢ ᠭᠡᠢᠭᠦᠯᠵᠦ ᠬᠠᠷᠠᠩᠭᠤᠢ ᠳ᠋ᠤ᠌ ᠨᠢᠭᠤᠭᠳᠠᠭᠰᠠᠨ ᠶᠠᠭᠤᠮᠠ ᠶ᠋ᠢᠨ ᠨᠢᠭᠤᠷ ᠴᠢᠷᠠᠢ ᠶ᠋ᠢ ᠲᠣᠪ ᠲᠣᠳᠣᠷᠬᠠᠢ ᠢᠯᠡᠷᠡᠭᠦᠯᠦᠨ ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠰᠡᠷᠢᠭᠡᠬᠦ ᠬᠠᠷᠠᠩᠭᠠ –– ᠪᠣᠳᠣᠩ ᠴᠠᠪᠴᠢᠬᠤ ᠳᠠᠭᠤᠨ ᠳᠡᠯᠡᠬᠡᠢ ᠶ᠋ᠢ ᠳᠣᠷᠭᠢᠲᠠᠯᠠ ᠨᠢᠵᠢᠭᠢᠨᠡᠨᠡ ᠃ ᠮᠠᠯᠴᠢᠳ ᠴᠤ᠌ ᠵᠡᠭᠦᠷᠮᠡᠭ ᠪᠠᠢᠳᠠᠯ ᠠ᠋ᠴᠠ ᠪᠠᠨ ᠰᠣᠴᠢᠨ ᠰᠡᠷᠢᠬᠦ ᠮᠡᠲᠦ ᠡᠭᠦᠳᠡ ᠪᠡᠷ ᠢ᠋ᠶ᠋ᠡᠨ ᠭᠢᠯᠪᠡᠬᠡᠨᠳᠤ ᠲᠡᠭᠷᠢ ᠶ᠋ᠢ ᠬᠠᠷᠠᠨᠠ ᠃ ᠣᠨᠴᠠ ᠵᠠᠷᠢᠮ ᠰᠦᠵᠢᠭ ᠶᠡᠬᠡᠲᠡᠢ ᠡᠮᠡᠭᠡᠳ ᠦ᠋ᠨ ᠪᠤᠷᠬᠠᠨ ᠳ᠋ᠤ᠌ ᠵᠤᠯᠠ ᠪᠠᠷᠢᠨ 《ᠲᠡᠭᠷᠢ ᠥᠷᠥᠰᠢᠶᠡ 》 ᠭᠡᠮᠡᠨ ᠵᠠᠯᠪᠠᠷᠢᠵᠤ ᠪᠣᠳᠣᠩ ᠴᠠᠪᠴᠢᠵᠤ ᠪᠠᠢᠭᠠ ᠵᠠᠯᠠᠭᠤ ᠶ᠋ᠢᠨ ᠬᠣᠢᠨᠠᠡᠴᠡ ᠮᠠᠨᠢ ᠤᠩᠰᠢᠨ ᠳᠠᠭᠠᠳᠬᠠᠵᠤ ᠪᠠᠢᠬᠤ ᠶ᠋ᠢ ᠭᠠᠷᠭᠠᠪᠠᠯ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠪᠤᠯᠴᠢᠩ ᠰᠢᠷᠪᠥᠰᠥ ᠡᠷᠴᠢᠯᠡᠨ ᠮᠡᠳᠡᠷᠡᠯ ᠦ᠋ᠨ ᠰᠢᠷᠬᠡᠭ ᠪᠦᠷᠢ ᠨᠢ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠢᠵᠦ ᠡᠪᠰᠢᠶᠡᠯᠭᠡᠭᠰᠡᠨ ᠶᠠᠳᠠᠷᠠᠭᠠ ᠨᠢ ᠲᠠᠢᠯᠤᠭᠳᠠᠭᠠᠳ᠂ ᠬᠡᠦᠬᠡᠳ ᠦ᠋ᠳ ᠠᠩᠬᠠᠨ ᠤ᠋ ᠪᠣᠷᠣᠭᠠᠨ ᠢ᠋ ᠰᠣᠨᠢᠷᠬᠠᠨ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠭᠦᠶᠦᠵᠦ ᠭᠠᠷᠤᠭᠠᠳ ᠲᠤᠭᠤᠯ ᠤ᠋ᠨ ᠬᠠᠰᠢᠶᠠ ᠶ᠋ᠢ ᠡᠷᠭᠢᠵᠦ ᠢᠷᠡᠬᠦ ᠳ᠋ᠡᠭᠡᠨ ᠵᠤᠯᠪᠠᠢᠳᠠᠯᠠ ᠨᠣᠷᠤᠭᠰᠠᠨ ᠴᠤ᠌ ᠴᠣᠪᠣᠭᠣ ᠬᠥᠭᠡᠷᠦᠬᠦᠨ ᠬᠠᠷᠠᠭᠳᠠᠨᠠ᠃ ᠠᠳᠤᠭᠤᠴᠢᠨ ᠴᠤᠪᠠ ᠪᠠᠨ ᠡᠮᠦᠰᠦᠨ ᠠᠳᠤᠭᠤ ᠪᠠᠨ ᠡᠷᠭᠢᠬᠦ ᠪᠡᠷ ᠮᠣᠷᠳᠠᠬᠤ ᠨᠢ ᠳᠡᠯᠪᠡᠯᠵᠡᠨ ᠪᠠᠢᠪᠠᠴᠤ ᠰᠦᠷᠯᠢᠭ ᠵᠢᠪᠬᠤᠯᠠᠩ ᠲᠠᠢ ᠬᠠᠷᠠᠭᠳᠠᠨᠠ ᠃ ᠪᠡᠷᠢᠶᠡᠳ ᠰᠢᠷᠬᠤᠨᠠᠭ ᠢ᠋ᠶ᠋ᠠᠨ ᠰᠢᠭᠤᠵᠤ ᠱᠠᠯᠪᠠᠭ ᠳᠤᠮᠳᠠᠭᠤᠷ ᠰᠠᠭᠤᠯᠠᠭᠠ ᠳᠡᠭᠦᠵᠢᠯᠡᠨ ᠦᠨᠢᠶᠡ ᠰᠠᠭᠠᠭᠰᠠᠭᠠᠷ ᠤᠰᠤᠨ ᠬᠤᠯᠤᠭᠠᠨᠠ ᠰᠢᠭ᠋ ᠪᠣᠯᠤᠭᠰᠠᠨ ᠴᠤ᠌ ᠦᠵᠡᠰᠬᠦᠯᠡᠩ ᠲᠡᠢ ᠬᠠᠷᠠᠭᠳᠠᠨᠠ ᠃
ᠭᠢᠯᠪᠡᠬᠡᠨ ᠭᠢᠯᠠᠰ ᠭᠢᠯᠠᠰ ᠴᠠᠬᠢᠯᠤᠨᠠ ᠃ ᠠᠶᠤᠩᠭᠠ ᠠᠷᠤ ᠠᠷᠤ ᠠ᠋ᠴᠠ ᠪᠠᠨ ᠨᠢᠵᠢᠭᠢᠨᠡᠨᠡ᠃ ᠠᠭᠠᠷ ᠳᠡᠭᠡᠷᠡ ᠠᠪᠤᠷᠭᠤ ᠰᠦᠷᠯᠢᠭ ᠬᠦᠴᠦᠨ ᠲᠡᠢ ᠪᠠᠢᠯᠳᠤᠭᠠᠨ ᠪᠣᠯᠵᠤ ᠪᠠᠢᠭᠠ ᠰᠢᠭ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠨᠢᠵᠢᠭᠢᠨᠡᠨ ᠮᠠᠯᠴᠢᠳ ᠤ᠋ᠨ ᠠᠩᠬᠠᠷᠤᠯ ᠢ᠋ ᠲᠠᠲᠠᠨᠠ ᠃ ᠬᠥᠮᠦᠰ ᠬᠡᠳᠦᠢᠪᠡᠷ ᠳᠠᠭᠠᠷᠠᠳᠠᠰᠤ ᠬᠥᠳᠡᠯᠪᠡᠴᠦ ᠠᠶᠤᠩᠭᠠ ᠭᠢᠯᠪᠡᠬᠡᠨ ᠡᠴᠡ ᠠᠶᠠᠭᠠ ᠪᠠᠨ ᠲᠣᠰᠣᠨ ᠷᠠᠰᠢᠶᠠᠨ ᠬᠦᠰᠡᠭᠰᠡᠨ ᠬᠠᠷᠠᠴᠠ ᠪᠠᠷ ᠠᠭᠠᠷ ᠢ᠋ ᠰᠢᠷᠳᠡᠨᠡ ᠃
ᠬᠠᠨᠠᠭᠠᠷ ᠣᠭᠲᠠᠷᠭᠤᠢ ᠳ᠋ᠤ᠌ ᠬᠠᠷᠠᠩᠭᠠ ᠰᠢᠭ᠋ ᠳᠤᠤᠭᠠᠷᠤᠭᠰᠠᠨ ᠠᠶᠤᠩᠭᠠ ᠭᠢᠯᠪᠡᠬᠡᠨ ᠠᠯᠲᠠᠨ ᠴᠠᠪᠠ ᠭᠠᠷᠲᠠᠯᠠ ᠨᠢᠵᠢᠭᠢᠨᠡᠭᠰᠡᠭᠡᠷ ᠪᠠᠢᠭᠠᠳ ᠠᠯᠢᠪᠠ ᠪᠣᠳᠠᠰ ᠢ᠋ ᠤᠮᠳᠠᠯᠠᠨ ᠠᠮᠢᠯᠠᠭᠤᠯᠤᠭᠴᠢ ᠷᠠᠰᠢᠶᠠᠨ ᠬᠤᠷᠠ ᠶ᠋ᠢ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠭᠤᠯᠭᠠᠵᠠᠢ ᠃ ᠤᠷᠭᠤᠮᠠᠯ ᠤ᠋ᠨ ᠰᠣᠶᠣᠭᠠ ᠮᠠᠨᠳᠤᠯᠠᠨ ᠴᠤᠬᠤᠢᠵᠤ ᠠᠮᠢᠲᠠᠨ ᠤ᠋ ᠦᠰᠦ ᠭᠤᠤᠵᠢᠵᠤ ᠠᠯᠢᠪᠠ ᠪᠦᠬᠦᠨ ᠰᠡᠷᠭᠦᠵᠦ ᠵᠢᠰᠦ ᠴᠢᠷᠠᠢ ᠪᠠᠨ ᠤᠬᠢᠶᠠᠭᠠᠳ ᠭᠠᠵᠠᠷ ᠤ᠋ᠨ ᠥᠩᠭᠡ ᠰᠢᠨᠡ ᠪᠣᠳᠣᠭ ᠲᠠᠢ ᠪᠣᠯᠵᠤ ᠠᠭᠤᠷ ᠠᠮᠢᠰᠬᠤᠯ ᠴᠢᠭᠢᠭ ᠦ᠋ᠨ ᠦᠨᠦᠷ ᠢ᠋ᠶ᠋ᠡᠷ ᠪᠢᠯᠬᠠᠯᠠᠨ ᠰᠠᠢᠨ ᠰᠠᠢᠬᠠᠨ ᠤ᠋ ᠡᠷᠡᠮᠡᠯᠵᠡᠯᠡᠯ ᠲᠡᠢ ᠪᠠᠢᠳᠠᠯ ᠢ᠋ ᠰᠠᠨᠠᠭᠳᠠᠭᠤᠯᠤᠨᠠ ᠃ ᠪᠣᠷᠣᠭᠠᠨ ᠤ᠋ ᠪᠣᠳᠣᠩ ᠪᠢᠰᠢ ᠬᠠᠷᠢᠨ ᠪᠣᠳᠣᠭ ᠤ᠋ᠨ ᠪᠣᠳᠣᠩ ᠢ᠋ ᠬᠠᠭᠠ ᠴᠠᠪᠴᠢᠭᠠᠳ ᠨᠣᠭᠣᠭᠠᠨ ᠪᠣᠳᠣᠭ ᠢ᠋ ᠨᠢ ᠠᠰᠬᠠᠴᠢᠬᠠᠬᠤ ᠰᠢᠭ᠋ ᠪᠣᠯᠤᠯᠠ ᠃
ᠠᠷᠤ ᠭᠠᠵᠠᠷ ᠤ᠋ᠨ ᠥᠩᠭᠡ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠨᠣᠪ ᠨᠣᠭᠣᠭᠠᠨ ᠁
ᠤᠤᠯ ᠨᠢ ᠨᠣᠭᠣᠭᠠᠨ ᠪᠣᠳᠣᠭ ᠢ᠋ ᠯᠡ ᠠᠰᠬᠠᠭᠰᠠᠨ ᠪᠢᠰᠢ ᠤᠯᠠᠭᠠᠨ ᠪᠣᠳᠣᠭ ᠢ᠋ ᠴᠦ᠍ ᠰᠦᠷᠴᠢᠭᠰᠡᠨ ᠠᠵᠢ᠄
ᠨᠣᠭᠣᠭᠠᠨ ᠲᠠᠯᠠ ᠪᠠᠷ ᠤᠯᠠᠭᠠᠨ ᠴᠡᠴᠡᠭ ᠳᠡᠯᠭᠡᠷᠡᠵᠡᠢ! ᠶᠠᠭᠤᠲᠠᠢ ᠠᠭᠤᠤ ᠵᠢᠪᠬᠤᠯᠠᠩᠲᠤ ᠂ ᠨᠢᠯᠪᠤᠰᠤ ᠤᠨᠠᠭᠠᠯᠲᠠᠢ ᠦᠵᠡᠮᠵᠢ ᠪᠣᠢ!
1982 ᠣᠨ ᠤ᠋ ᠬᠠᠪᠤᠷ ᠪᠡᠭᠡᠵᠢᠩ ᠳ᠋ᠦ᠍