ᠭᠥᠬᠦᠭᠡ ᠶᠢᠨ ᠳᠠᠭᠤᠨ - ᠯᠢᠭᠳᠡᠨ Гөхөөгийн дуун - Лигдэн
240ᠭᠥᠬᠦᠭᠡ ᠶᠢᠨ ᠳᠠᠭᠤᠨ
1
ᠲᠠᠷᠠᠭ ᠠᠢᠷᠠᠭ ᠤ᠋ᠨ ᠠᠩᠬᠢᠯᠤᠮᠠᠯ ᠦᠨᠦᠷ ᠢ᠋ᠶ᠋ᠡᠷ ᠪᠦᠲᠦᠭᠰᠡᠨ ᠲᠠᠯᠠ ᠨᠤᠲᠤᠭ ᠤ᠋ᠨ ᠥᠷᠯᠥᠭᠡᠨ ᠦ᠌ ᠠᠭᠠᠷ ᠲᠤ᠌ ᠰᠣᠭᠲᠣᠭᠠᠳ ᠲᠠᠭᠠᠷᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠰᠠᠨᠠᠭᠠᠨ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠡᠭᠡᠰᠢᠭᠯᠡᠭᠰᠡᠨ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠬᠥᠬᠥᠭᠡ ᠶ᠋ᠢᠨ ᠳᠠᠭᠤᠨ ᠤᠶᠠᠩᠭᠠᠲᠠᠢᠬᠠᠨ ᠠ᠋ ; ᠲᠠᠰᠤᠳᠠᠵᠤ ᠲᠠᠮᠤᠯᠠᠭᠠᠳ ᠬᠡᠯᠪᠡᠷᠢ ᠶ᠋ᠢᠨ ᠬᠠᠢᠷᠴᠠᠭ ᠲᠤ᠌ ᠬᠡᠪᠰᠢᠭᠦᠯᠦᠭᠰᠡᠨ ᠲᠠᠮᠠᠭᠠ ᠲᠣᠳᠣᠷᠬᠠᠢ ᠰᠢᠬᠠᠮᠠᠯ ᠰᠢᠯᠦᠭ ᠡᠴᠡ ᠴᠢᠯᠥᠭᠡᠲᠡᠢᠬᠡᠨ ᠠ᠋ ᠃
2
ᠬᠡᠬᠦᠳᠡᠭ ᠴᠡᠭᠡᠵᠢᠨ ᠦ᠌ ᠪᠠᠶᠠᠷ ᠵᠢᠷᠭᠠᠯ ᠤ᠋ᠨ ᠳᠠᠭᠤᠯᠠᠯ ᠰᠢᠭ᠋ ᠬᠡᠵᠢᠶᠡ ᠯᠡ ᠲᠡᠭᠡᠵᠦ ᠡᠢᠮᠦ ᠰᠠᠢᠬᠠᠨ ᠰᠣᠨᠣᠰᠳᠠᠵᠤ ᠭᠡᠮ ⁈ ᠬᠡᠭᠡᠷᠡ ᠶ᠋ᠢᠨ ᠰᠢᠪᠠᠭᠤᠨ ᠤ᠋ ᠳᠣᠩᠭᠣᠳᠤᠯ ᠱᠣᠯᠣᠭᠣᠨᠠᠯ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠬᠡᠨ ᠯᠡ ᠲᠡᠭᠡᠵᠦ ᠨᠠᠷᠢᠨ ᠣᠢᠯᠠᠭᠠᠭᠠᠳ ᠮᠡᠳᠡᠵᠦ ᠭᠡᠮ ⁈ ᠬᠡᠯᠡ ᠶ᠋ᠢ ᠨᠢ ᠮᠡᠳᠡᠭᠡᠳ ᠬᠥᠮᠦᠨ ᠦ᠌ ᠦᠭᠡ ᠪᠡᠷ ᠣᠷᠴᠢᠭᠤᠯᠤᠭᠰᠠᠨ ᠪᠣᠯ ᠬᠡᠮᠡᠷᠯᠢᠭ ᠲᠣᠷᠭᠠᠨ ᠡᠢᠮᠦ ᠰᠠᠨᠠᠭᠠ ᠯᠠ ᠭᠡᠮᠡᠷᠬᠡᠨ ᠠ᠋ !
3
ᠡᠨᠡᠬᠦ ᠮᠢᠷᠠᠯᠵᠠᠭᠰᠠᠨ ᠴᠡᠴᠡᠭ ᠦ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠥᠷᠯᠥᠭᠡ ᠶ᠋ᠢᠨ ᠴᠡᠪᠡᠷ ᠲᠤᠩᠭᠠᠯᠠᠭ ᠠᠭᠤᠷ ᠠᠮᠢᠰᠬᠤᠯ ᠤ᠋ᠨ ᠰᠠᠷᠬᠤᠳ ᠲᠤ᠌ ᠰᠣᠭᠲᠣᠭᠰᠠᠨ ᠪᠢ ᠂ ᠪᠤᠴᠠᠯᠤᠮᠠ ᠬᠠᠢᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠯ ᠴᠡᠴᠡᠭ ᠢ᠋ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠰᠠᠴᠤᠬᠤ ᠶ᠋ᠢ ᠬᠦᠰᠡᠨᠡᠮ !
ᠲᠣᠭᠣᠰᠣ ᠨᠢ ᠳᠠᠷᠤᠭᠳᠠᠭᠰᠠᠨ ᠲᠣᠷᠭᠠᠨ ᠨᠣᠭᠣᠭᠠᠨ ᠲᠠᠯᠠ ᠳ᠋ᠠᠭᠠᠨ ᠲᠣᠭᠣᠭᠳᠠᠬᠤ ᠦᠭᠡᠢ ᠴᠦ᠍ ᠪᠣᠯᠤᠭ ᠂ ᠪᠢᠯᠢᠭ ᠦ᠋ᠨ ᠬᠡᠭᠡᠷ ᠢ᠋ᠶ᠋ᠡᠨ ᠰᠣᠷᠢᠶᠠ ᠂ ᠲᠣᠳᠣᠷᠠᠵᠤ ᠭᠠᠷᠬᠤ ᠣᠩᠭᠣᠨ ᠰᠠᠷᠠᠯ ᠢ᠋ ᠪᠠᠷᠠᠯᠠᠶᠠ !
4
ᠠᠪᠤᠷᠭᠤ ᠲᠣᠮᠣ ᠴᠡᠩᠬᠡᠷ ᠫᠠᠩᠰᠠᠨ ᠬᠥᠰᠢᠭᠡ ᠶ᠋ᠢᠨ ᠨᠠᠭᠠᠨᠠ ᠂ ᠠᠪᠤᠷᠭᠤ ᠲᠣᠮᠣ ᠨᠣᠭᠣᠭᠠᠨ ᠬᠡᠪᠢᠰ ᠦ᠋ᠨ ᠵᠡᠭᠦᠨ ᠵᠠᠬᠠ ᠳ᠋ᠤ᠌ ᠠᠰᠠᠨ ᠳᠤᠯᠠᠯᠵᠠᠭᠰᠠᠨ ᠠᠪᠤᠷᠭᠤ ᠲᠣᠮᠣ ᠠᠯᠲᠠᠨ ᠪᠥᠮᠪᠥᠭᠡ ᠳᠡᠭᠳᠡᠨ ᠳᠦᠷᠡᠯᠵᠡᠨᠡ ᠃
5
ᠳᠡᠪᠢᠰᠬᠡᠷᠯᠡᠭᠰᠡᠨ ᠰᠣᠯᠣᠩᠭᠠ ᠶ᠋ᠢᠨ ᠳᠡᠭᠡᠷᠡᠬᠢ ᠂ ᠳᠡᠭᠡᠪᠦᠷᠯᠡᠭᠰᠡᠨ ᠪᠢᠳᠤᠷᠶᠠᠨ ᠤ᠋ ᠳᠣᠣᠷᠠᠬᠢ ᠂ ᠡᠨᠡ ᠴᠢᠨᠢ ᠬᠠᠮᠢᠭᠠᠬᠢ ᠪᠣᠢ ? ᠡᠨᠡ ᠴᠢᠨᠢ ᠴᠣᠬᠣᠮ ᠬᠡᠨ ᠪᠢᠯᠡ ⁈
6
《 ᠮᠢᠨᠦ ᠨᠤᠲᠤᠭ ! 》
ᠰᠣᠨᠣᠰᠤᠭᠠᠴᠢ ᠳ᠋ᠠ ! ᠣᠮᠣᠭ ᠵᠢᠪᠬᠤᠯᠠᠩ ᠲᠠᠢ ᠬᠠᠷᠢᠭᠤᠯᠵᠤ ᠪᠠᠢᠭᠠ ᠡᠨᠡᠬᠦ ᠠᠪᠤᠷᠭᠤ ᠶᠡᠬᠡᠮᠰᠦᠭ ᠬᠥᠮᠦᠨ ᠪᠣᠯ ᠡᠨᠳᠡᠬᠢ ᠶ᠋ᠢᠨ ᠡᠵᠡᠨ ᠶᠦ᠍ᠮ ᠪᠠᠢᠨᠠ ᠃
ᠣᠨᠴᠠ ᠭᠠᠢᠬᠠᠮᠰᠢᠭᠲᠤ ᠡᠨᠡ ᠬᠥᠮᠦᠨ ᠢ᠋ ᠦᠵᠡᠪᠡᠯ ᠂ ᠣᠯᠠᠨ ᠲᠣᠭᠠᠨ ᠤ᠋ ᠨᠡᠢᠯᠡᠪᠦᠷᠢ ᠪᠢᠰᠢ ᠣᠬᠢ ᠰᠣᠳᠣ ᠶ᠋ᠢᠨ ᠰᠣᠩᠭᠣᠪᠣᠷᠢ ᠠᠵᠢ !
7
ᠨᠠᠷᠠ ᠤᠯᠠᠭᠠᠨ ᠂ ᠰᠠᠷᠠ ᠲᠡᠷᠭᠡᠯ ᠂ ᠡᠦᠲᠦ ᠣᠯᠠᠨ᠃ ᠲᠠᠯᠠ ᠨᠢ ᠨᠣᠭᠣᠭᠠᠷᠠᠭᠠᠳ᠂ ᠠᠭᠤᠯᠠ ᠨᠢ ᠬᠥᠬᠡᠷᠡᠭᠡᠳ᠂ ᠤᠰᠤ ᠨᠢ ᠴᠡᠩᠬᠡᠷᠯᠡᠭᠡᠳ ᠁
ᠰᠦᠨ ᠮᠥᠷᠡᠨ᠂ ᠰᠤᠪᠤᠳ ᠳᠠᠯᠠᠢ᠂ ᠮᠢᠬᠠᠨ ᠠᠭᠤᠯᠠ ᠂ ᠮᠠᠩᠨᠤᠭ ᠬᠠᠩᠭᠠᠢ ᠃
8
ᠪᠥᠵᠢᠭᠴᠢᠨ ᠨᠢ ᠬᠠᠷᠢᠶᠠᠴᠠᠢ ᠂ ᠳᠠᠭᠤᠴᠢᠨ ᠨᠢ ᠭᠤᠷᠭᠤᠤᠯᠳᠠᠢ ᠂ ᠠᠵᠢᠯᠴᠢᠨ ᠨᠢ ᠵᠥᠭᠡᠢ ᠂ ᠬᠠᠢᠭᠤᠯᠴᠢᠨ ᠨᠢ ᠪᠦᠷᠭᠦᠳ ᠃
ᠬᠥᠭᠵᠢᠮ ᠨᠢ ᠳᠠᠯᠠᠩᠬᠠᠷᠠ ᠪᠠᠷ ᠰᠡᠢᠯᠦᠭᠰᠡᠨ ᠮᠣᠷᠢᠨ ᠬᠤᠭᠤᠷ ᠲᠤ᠌ ᠬᠠᠲᠤᠨ ᠭᠣᠣᠯ ᠢ᠋ᠶ᠋ᠠᠷ ᠨᠤᠮᠤ ᠪᠣᠯᠭᠠᠭᠰᠠᠨ ᠨᠢ ᠶᠣᠰᠣᠲᠠᠢ ᠲᠡᠩᠴᠡᠵᠡᠢ — ᠳᠠᠭᠤᠨ ᠤ᠋ ᠬᠢᠨᠢ ᠬᠦᠩᠭᠢᠨᠡᠮᠡ ᠭᠡᠵᠢ ᠠ᠋ !
9
ᠭᠠᠩ ᠲᠠᠢ ᠠᠢᠷᠠᠭ ᠱᠤᠤᠭᠢᠨ ᠬᠥᠭᠡᠰᠦᠷᠡᠵᠦ ᠂ ᠬᠥᠭᠡᠷᠦᠨ ᠪᠠᠶᠠᠰᠤᠭᠠᠳ ᠰᠠᠪᠠᠨ ᠠ᠋ᠴᠠ ᠪᠠᠨ ᠣᠷᠬᠢᠵᠤ ᠭᠠᠷᠤᠨ ᠵᠠᠪᠳᠤᠭᠠᠳ ᠬᠦᠷᠬᠢᠷᠡᠨ ᠱᠤᠤᠭᠢᠨᠠ ᠃
10
ᠢᠰᠡᠭᠡᠢ ᠭᠡᠷ ᠂ ᠸᠠᠭᠠᠷ ᠤ᠋ᠨ ᠭᠡᠷ ᠬᠣᠣᠰᠯᠠᠨ ᠢᠨᠠᠭᠰᠢᠨᠠ ᠃ ᠢᠰᠡᠭᠡᠢ ᠭᠡᠷ ᠠᠬᠠᠮᠠᠳ ᠪᠣᠯᠪᠠᠴᠤ ᠪᠠᠢᠷᠢ ᠰᠠᠭᠤᠷᠢ ᠪᠠᠨ ᠨᠠᠢᠳᠠᠪᠤᠷᠢᠲᠤ ᠵᠠᠯᠭᠠᠮᠵᠢᠯᠠᠭᠴᠢ ᠪᠣᠯᠤᠭᠰᠠᠨ ᠠᠰᠠᠷ ᠲᠠᠭᠲᠤ ᠳ᠋ᠠᠭᠠᠨ ᠨᠠᠢᠷ ᠲᠠᠯᠪᠢᠵᠠᠢ ᠃
ᠴᠠᠭ ᠦᠶᠡ ᠶ᠋ᠢᠨ ᠬᠠᠨᠳᠤᠰᠢ ᠂ ᠴᠤᠤ ᠰᠢᠨᠡ ᠳᠠᠭᠤᠯᠠᠯ ᠃
11
ᠤᠶᠠᠭᠠᠨ ᠳᠡᠭᠡᠷᠡ ᠤᠶᠠᠭᠳᠠᠭᠰᠠᠨ ᠪᠢᠰᠢ ᠠᠲᠠᠯᠠ ᠪᠠᠨ ᠱᠠᠭᠠᠵᠠᠭᠠᠢ ᠴᠢ ᠶᠠᠭᠤᠨ ᠳ᠋ᠤ᠌ ᠰᠠᠯᠬᠤ ᠪᠠᠨ ᠪᠣᠯᠢᠪᠠ ? ᠴᠢᠨᠦ ᠮᠡᠳᠡᠭᠦᠯᠵᠦ ᠪᠠᠢᠭᠠ ᠶ᠋ᠢ ᠴᠢᠨᠢ ᠴᠠᠬᠢᠯᠭᠠᠨ ᠱᠠᠭᠠᠵᠠᠭᠠᠢ ᠠᠯᠢ ᠤᠵᠢᠭᠤᠷ ᠳᠠᠮᠵᠢᠭᠤᠯᠤᠭᠰᠠᠨ ᠃
12
ᠡᠷᠲᠡ ᠴᠠᠭ ᠡᠨᠡ ᠭᠠᠵᠠᠷ ᠬᠡᠷᠢᠶᠡ ᠴᠢᠨᠣᠠ ᠬᠣᠶᠠᠷ ᠤ᠋ᠨ ᠬᠡᠷᠡᠭᠦᠯ ᠴᠤᠭᠯᠠᠭᠠᠨ ᠤ᠋ ᠣᠷᠣᠨ ᠪᠠᠢᠯᠠ ᠃ ᠬᠠᠷᠠ ᠡᠭᠦᠯᠡ ᠶ᠋ᠢ ᠴᠦ᠍ ᠰᠠᠷᠨᠢᠭᠤᠯᠵᠤ ᠳᠡᠢᠯᠬᠦ ᠰᠠᠯᠬᠢᠨ ᠦᠭᠡᠢ ᠭᠡᠮᠡᠨ ᠰᠠᠭᠰᠠᠭᠤᠷᠠᠵᠤ ᠠᠪᠠᠢ ᠃ ᠬᠡᠷᠢᠶᠡ ᠪᠠᠰᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠤᠸᠠᠭᠯᠠᠯᠲᠠ ᠶ᠋ᠢ ᠬᠡᠳᠦᠢ ᠰᠦᠷᠡᠬᠡᠢ ᠳᠠᠭᠤᠯᠠᠯ ᠢ᠋ᠶ᠋ᠠᠷ ᠦᠵᠡᠳᠡᠭ ᠪᠠᠢᠪᠠ ᠃
13
ᠪᠣᠷᠵᠢᠨ ᠴᠢᠯᠠᠭᠤᠨ ᠵᠢᠷᠦᠬᠡ ᠲᠡᠢ ᠳ᠋ᠡᠭᠡᠨ ᠡᠷᠡᠮᠰᠢᠭᠰᠡᠨ ᠪᠤᠷᠤᠩᠬᠤᠢ ᠪᠠᠢᠭᠠᠯᠢ ᠴᠤ᠌ ᠣᠳᠣ ᠦᠭᠡ ᠰᠣᠨᠣᠰᠬᠤ ᠪᠣᠯᠪᠠ ᠃ ᠲᠡᠷᠡ ᠬᠡᠷᠪᠡ ᠡᠰᠡ ᠠᠶᠤᠭᠰᠠᠨ ᠪᠣᠯ ᠠᠯᠢᠪᠠ ᠡᠷᠳᠡᠨᠢ ᠶ᠋ᠢᠨ ᠳᠡᠭᠡᠵᠢ ᠪᠡᠨ ᠡᠢᠮᠦ ᠨᠣᠮᠣᠬᠠᠨ ᠢ᠋ᠶ᠋ᠠᠷ ᠡᠷᠭᠦᠬᠦ ᠦᠦ ⁈
14
ᠠᠭᠤᠯᠠᠨ ᠤ᠋ ᠪᠥᠵᠢᠭ ᠂ ᠤᠰᠤᠨ ᠤ᠋ ᠤᠶᠠᠩᠭᠠᠯᠠᠯ ᠂ ᠵᠢᠮᠢᠰ ᠦ᠋ᠨ ᠵᠤᠤᠮᠠᠯᠵᠠᠯ ᠵᠡᠷᠭᠡᠴᠡᠬᠦ ᠳ᠋ᠦ᠍ ᠠᠭᠤᠳᠠᠮ ᠲᠠᠯᠠ ᠵᠠᠰᠠᠯ ᠵᠢᠮᠰᠡᠭ ᠢ᠋ᠶ᠋ᠡᠨ ᠵᠡᠭᠦᠭᠰᠡᠨ ᠮᠡᠲᠦ ᠃
15
ᠭᠡᠷᠡᠯᠲᠦ ᠰᠤᠪᠤᠳ ᠢ᠋ ᠭᠡᠷ ᠦ᠋ᠨ ᠣᠨᠢᠨ ᠠ᠋ᠴᠠ ᠤᠨᠵᠢᠭᠤᠯᠤᠭᠰᠠᠨ ᠳ᠋ᠤ᠌ ᠬᠡᠭᠡᠨᠴᠢᠷ ᠭᠤᠪᠠᠢ ᠨᠢᠳᠦ ᠭᠢᠯᠠᠰᠤᠮᠠ ᠬᠠᠷᠠᠭᠳᠠᠨᠠ ᠃ ᠬᠠᠷᠠᠩᠭᠤᠢ ᠶ᠋ᠢᠨ ᠬᠥᠰᠢᠭᠡ ᠠ᠋ ᠂ ᠴᠢ ᠬᠠᠮᠢᠭᠠᠰᠢ ᠪᠠᠨ ᠢᠷᠠᠭᠳᠠᠪᠠ ? ᠴᠢ ᠴᠢᠨᠢ ᠠᠩᠬᠠᠨ ᠳ᠋ᠠᠭᠠᠨ ᠶᠡᠬᠡᠯᠡ ᠄
《 ᠪᠢ ᠪᠣᠯ ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ 》 ᠭᠡᠳᠡᠭ ᠰᠢᠲᠠ !
ᠠᠢ ᠳ᠋ᠠ ᠬᠥᠭᠡᠷᠦᠬᠦᠢ ᠂ ᠥᠨᠥᠬᠢ ᠣᠮᠣᠭ ᠴᠢᠨᠢ ⁈
16
ᠭᠠᠵᠠᠷ ᠲᠩᠷᠢ ᠶ᠋ᠢ ᠵᠠᠬᠢᠷᠬᠤ ᠨᠢ ᠴᠦ᠍ ᠭᠠᠢᠭᠤᠢ ᠬᠡᠷᠡᠭ ᠳ᠋ᠠ ᠃
ᠣᠯᠠᠩᠬᠢ ᠬᠡᠦᠬᠡᠳ ᠡᠦᠲᠦ ᠪᠦᠷ ᠡᠦᠲᠦ ᠶ᠋ᠢ ᠵᠡᠭᠦᠳᠦᠯᠡᠨ ᠂ ᠰᠠᠷᠠ ᠶ᠋ᠢ ᠰᠠᠨᠠᠵᠤ ᠂ ᠨᠠᠷᠠ ᠶ᠋ᠢ ᠮᠥᠷᠥᠭᠡᠳᠦᠨᠡ ᠃
《 ᠲᠡᠨᠳᠡ ᠶᠠᠭᠤ ᠶᠠᠭᠤ ᠪᠠᠢᠳᠠᠭ ᠪᠣᠯ ? ᠶᠠᠭᠠᠬᠢᠵᠤ ᠶᠠᠭᠠᠬᠢᠵᠤ ᠬᠦᠷᠬᠦ ᠪᠣᠢ ? 》 ᠭᠡᠳᠡᠭ ᠨᠢ ᠲᠡᠳᠡᠨ ᠦ᠌ ᠣᠶᠤᠨ ᠰᠠᠨᠠᠭᠠᠨ ᠳ᠋ᠤᠨᠢ ᠣᠨᠢᠰᠣᠭᠠ ᠪᠣᠯᠤᠨ ᠡᠷᠭᠢᠯᠳᠦᠨᠡ ᠃
17
ᠨᠢᠷᠠᠢ ᠴᠢᠬᠢ ᠨᠠᠳᠠ ᠶ᠋ᠢ ᠬᠠᠷᠠᠭᠠᠳ ᠮᠦᠰᠢᠶᠡᠵᠦ ᠪᠠᠢᠨᠠ᠃ ᠨᠢᠯᠬᠠ ᠰᠣᠶᠣᠭᠠ ᠂ ᠨᠢᠯᠵᠠᠷᠠᠢ ᠴᠢᠬᠢ ᠂ ᠤᠷᠠᠨ ᠴᠣᠮᠣᠷᠯᠢᠭ ᠂ ᠰᠢᠷᠠ ᠳᠡᠭᠳᠡᠭᠡᠬᠡᠢ ᠂ ᠠᠯᠢᠶᠠ ᠤᠨᠠᠭᠠ ᠴᠢᠯᠥᠭᠡᠲᠡᠢ ᠰᠤᠨᠢᠶᠠᠨᠠ ᠃
18
ᠲᠦᠨᠲᠦᠭᠦᠷ ᠪᠣᠨᠲᠣᠭᠣᠷ ᠬᠠᠳᠠ ᠴᠢᠯᠠᠭᠤ ᠨᠤᠭᠤᠳ ᠲᠦᠮᠡᠨ ᠵᠢᠯ ᠦ᠋ᠨ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠢᠭᠡᠳ ᠲᠦᠨᠲᠦᠯᠵᠡᠨ ᠪᠥᠮᠪᠥᠷᠢᠯᠡ ᠃ ᠡᠪᠡᠰᠦᠲᠦ ᠲᠠᠯᠠ ᠵᠦᠭ ᠂ ᠡᠪᠦᠯᠵᠢᠶᠡ ᠵᠤᠰᠠᠯᠠᠩ ᠵᠦᠭ ᠂ ᠬᠥᠮᠦᠰ ᠦ᠋ᠨ ᠬᠡᠷᠡᠭᠴᠡᠭᠡ ᠵᠦᠭ ᠂ ᠬᠦᠰᠡᠯᠡᠩ ᠦ᠋ᠨ ᠰᠠᠭᠤᠷᠢ ᠵᠦᠭ ᠪᠥᠨᠲᠥᠯᠵᠡᠨ ᠪᠥᠮᠪᠥᠷᠢᠯᠡ ᠃
19
ᠴᠢᠳᠬᠥᠷ ᠦ᠋ᠨ ᠨᠢᠳᠦ ᠨᠢ ᠪᠥᠯᠳᠥᠷᠢᠭᠡᠳ ᠴᠢᠰᠤ ᠭᠠᠷᠴᠤ ᠪᠠᠢᠨᠠ ᠠ ᠂
ᠠᠲᠠᠭᠠ ᠵᠢᠲᠥᠭᠡ ᠭᠡᠳᠡᠭ ᠮᠥᠨ ᠴᠦ᠍ ᠬᠡᠴᠡᠭᠦᠦ ᠶᠧ !
20
ᠣᠯᠠᠨ ᠮᠢᠩᠭᠠᠨ ᠣᠪᠣᠭᠠ ᠬᠠᠢᠷᠬᠠᠨ ᠤ᠋ ᠳᠠᠪᠠᠯᠭᠠᠨᠲᠤ ᠤᠷᠤᠰᠬᠠᠯ ᠰᠢᠵᠢᠷ ᠳᠣᠯᠭᠢᠶᠠ ᠬᠠᠶᠠᠯᠠᠩᠬᠠᠨ ᠤᠷᠤᠰᠤᠨᠠ ᠃
21
ᠡᠩ ᠦ᠋ᠨ ᠬᠠᠷᠠ ᠰᠢᠷᠣᠢ ᠠ᠋ᠴᠠ ᠭᠠᠷᠤᠭᠰᠠᠨ ᠨᠣᠭᠣᠭᠠᠨ ᠤ᠋ ᠴᠢᠬᠢ ᠬᠡᠴᠢᠨᠡᠨ ᠰᠠᠢᠬᠠᠨ᠂ ᠬᠡᠴᠢᠨᠡᠨ ᠢᠳᠡᠷᠡᠭᠦᠨ ᠪᠣᠢ ! ᠲᠡᠭᠦᠨ ᠳ᠋ᠦ᠍ ᠵᠣᠬᠢᠶᠠᠮᠠᠯ ᠶᠠᠩᠵᠤ ᠂ ᠬᠢᠮᠡᠯ ᠬᠡᠯᠪᠡᠷᠢ ᠂ ᠭᠠᠳᠠᠷ ᠪᠦᠷᠬᠦᠪᠴᠢ ᠦᠭᠡᠢ ᠃
ᠡᠩᠭᠡᠰᠬᠡ ᠶ᠋ᠢᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠤᠮᠪᠢᠨ ᠪᠠᠢᠵᠤ ᠢᠨᠢᠶᠡᠬᠦᠢᠴᠡ ᠪᠣᠯᠤᠭᠰᠠᠨ ᠬᠥᠯᠡᠮᠵᠢ ᠶ᠋ᠢᠨ ᠴᠡᠴᠡᠭ ᠲᠠᠩᠬᠢᠯᠵᠠᠬᠤ ᠳ᠋ᠠᠭᠠᠨ ᠯᠠ ᠰᠠᠢᠨ ; ᠲᠡᠳᠡᠨ ᠳ᠋ᠦ᠍ ᠰᠠᠯᠬᠢ ᠪᠣᠷᠣᠭᠠᠨ ᠦᠵᠡᠬᠦ ᠵᠠᠪᠰᠢᠶᠠᠨ ᠣᠯᠭᠣᠭᠠᠰᠠᠢ !
22
ᠤᠷᠲᠤ ᠳᠡᠪᠡᠯ ᠪᠤᠯᠢᠭᠠᠷᠢ ᠭᠤᠲᠤᠯ ᠲᠠᠢ ᠨᠢᠭᠡ ᠦᠶᠡ ᠶ᠋ᠢᠨ ᠵᠠᠯᠠᠭᠤᠴᠤᠳ ᠭᠠᠯᠲᠤ ᠠᠭᠤᠯᠠᠨ ᠤ᠋ ᠲᠦᠯᠬᠢᠭᠦᠷ ᠢ᠋ ᠠᠳᠬᠤᠨ ᠰᠢᠯᠬᠡᠬᠦᠶᠡ ᠭᠠᠯ ᠯᠤᠤ ᠠᠪᠤᠷᠭᠤ ᠰᠠᠭᠤᠯᠠᠭᠠᠨ ᠳ᠋ᠤ᠌ ᠮᠡᠳᠡᠷᠡᠨ ᠲᠣᠭᠯᠠᠮᠤᠢ ᠃
23
ᠭᠠᠪᠠᠯᠠ ᠠᠶᠠᠭᠠ ᠶᠠᠰᠤᠨ ᠡᠷᠢᠭᠡ ᠶ᠋ᠢ ᠦᠵᠡᠬᠦᠯᠡᠷ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠰᠢᠨᠡ ᠭᠠᠯᠪᠠ ᠶ᠋ᠢ ᠢᠲᠡᠭᠡᠮᠦᠢ ᠃
24
ᠭᠠᠷ ᠲᠠᠢ ᠲᠥᠷᠥᠭᠰᠡᠨ ᠢ᠋ᠶ᠋ᠡᠨ ᠬᠥᠮᠦᠰ ᠶᠡᠷᠦ ᠭᠠᠢᠬᠠᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠵᠠᠷᠢᠮ ᠬᠥᠮᠦᠨ ᠲᠡᠭᠦᠨ ᠦ᠌ ᠪᠡᠨ ᠶᠠᠮᠠᠷ ᠦᠢᠯᠡᠳᠦᠯ ᠲᠡᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠳᠠᠭ ᠲᠤ᠌ ᠡᠨᠳᠡᠬᠢ ᠬᠥᠮᠦᠰ ᠬᠠᠷᠢᠭᠤᠯᠲᠠ ᠥᠭᠴᠦ ᠪᠠᠢᠨᠠ ᠄
《ᠴᠢ ᠲᠡᠭᠦᠨ ᠢ᠋ᠶ᠋ᠡᠨ ᠬᠥᠳᠡᠯᠭᠡᠵᠦ ᠦᠵᠡ ᠂ ᠬᠠᠷᠠ ᠰᠢᠷᠣᠢ ᠶ᠋ᠢ ᠠᠯᠲᠠ ᠪᠣᠯᠭᠠᠵᠤ ᠂ ᠬᠠᠳᠠ ᠠᠭᠤᠯᠠ ᠶ᠋ᠢ ᠮᠥᠩᠭᠥ ᠪᠣᠯᠭᠠᠵᠤ ᠪᠣᠯᠤᠨᠠ ᠰᠢᠦ᠂ ᠭᠠᠷ ᠢ᠋ᠶ᠋ᠠᠨ ᠢᠯᠡᠭᠦᠬᠡᠨ ᠂ ᠴᠥᠬᠥᠷᠡᠯ ᠦᠭᠡᠢ ᠬᠥᠳᠡᠯᠭᠡᠵᠡᠭᠡ ! 》
25
ᠬᠥᠯ ᠢ᠋ᠶ᠋ᠡᠷ ᠵᠠᠮ ᠶᠠᠪᠤᠬᠤ ᠶ᠋ᠢ ᠮᠡᠳᠡᠨᠡ — ᠭᠡᠲᠡᠯᠡ ᠨᠠᠷᠠ ᠰᠠᠴᠤᠷᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠨᠠ ᠤᠤ ? ᠨᠠᠮᠤᠭ ᠡᠷᠦᠬᠡ ᠲᠡᠢ ① ᠭᠡᠨᠡᠨ ᠵᠠᠮ ᠢ᠋ᠶ᠋ᠠᠷ ᠬᠡᠯᠲᠦᠷᠢᠨᠡ ᠦᠦ ? — ᠭᠡᠳᠡᠭ ᠪᠣᠯ ᠲᠡᠷᠢᠭᠦᠨ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠠᠵᠢ ᠃
ᠲᠤᠷᠰᠢᠯᠭᠠ ᠰᠤᠷᠭᠠᠮᠵᠢ ᠡᠭᠦᠨ ᠦ᠌ ᠲᠤᠰ ᠲᠤᠰ ᠲᠤᠨᠢ ᠲᠣᠯᠢ ᠪᠣᠯᠪᠠ !
26
ᠰᠣᠭᠲᠣᠭᠤ ᠡᠪᠡᠰᠦᠨ ᠦ᠌ ᠦᠨᠳᠦᠰᠦ ᠶ᠋ᠢ ᠮᠠᠯᠲᠠᠭᠰᠠᠨ ᠭᠠᠵᠠᠷ ᠳᠡᠭᠡᠷᠡ ᠰᠣᠷᠭᠣᠭ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠤᠯᠠᠮ ᠢᠯᠡᠭᠦᠬᠡᠨ ᠤᠷᠭᠤᠭᠤᠯᠵᠠᠭᠠᠶᠠ !
27
ᠭᠠᠯ ᠵᠢᠭᠰᠠᠭᠠᠯ ᠂ ᠲᠤᠭ ᠤ᠋ᠨ ᠤᠷᠤᠰᠬᠠᠯ᠂ ᠨᠡᠢᠭᠡᠮ ᠦ᠋ᠨ ᠬᠤᠪᠢᠰᠬᠠᠯ ᠃ ᠰᠣᠯᠣᠩᠭᠠ ᠶ᠋ᠢᠨ ᠰᠦᠯᠵᠢᠶᠡ ᠶ᠋ᠢ ᠤᠷᠲᠤᠬᠠᠨ ᠰᠢᠭ᠋ ᠂ ᠬᠬᠢᠪ ᠦ᠋ᠨ ᠵᠠᠩᠭᠢᠶᠠ ᠶᠢ ᠭᠣᠶᠣᠬᠠᠨ ᠰᠢᠭ᠋ ᠂ ᠬᠠᠰ ᠤ᠋ᠨ ᠠᠰᠠᠷ ᠢ᠋ ᠥᠨᠳᠥᠷᠬᠡᠨ ᠰᠢᠭ ᠁
ᠲᠦᠮᠡᠨ ᠠᠭᠲᠠ ᠮᠢᠨᠢ ᠳᠣᠪᠲᠣᠯᠤᠭᠠᠷᠠᠢ !
ᠲᠡᠭᠦᠰ ᠢᠯᠠᠯᠲᠠ ᠶ᠋ᠢᠨ ᠨᠡᠩ ᠠᠯᠤᠰ ᠲᠤ᠌ ᠨᠢᠰᠦᠭᠡᠷᠡᠢ !
28
ᠭᠠᠯ ᠤ᠋ᠨ ᠭᠡᠷᠡᠯ ᠬᠡᠳᠦᠢ ᠳᠦᠷᠡᠯᠵᠡᠪᠡᠯ ᠂ ᠬᠠᠷᠠᠩᠭᠤᠢ ᠬᠦᠢᠲᠡᠨ ᠲᠡᠳᠦᠢ ᠲᠤᠤᠱᠲᠠᠢ ᠠᠷᠢᠯᠤᠨᠠ ᠃
ᠶᠢᠷᠲᠢᠨᠴᠦ ᠶ᠋ᠢᠨ ᠦᠯᠡᠳᠡᠭᠳᠡᠯ ᠬᠠᠷᠠᠩᠭᠤᠢ ᠃ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠪᠠᠯᠠᠷ ᠵᠦᠭ ᠦᠷᠭᠦᠯᠵᠢᠯᠡᠨ ᠲᠠᠭᠠᠷᠢᠰᠤᠭᠠᠢ !
29
ᠮᠠᠨ ᠤ᠋ ᠠᠪᠤᠷᠭᠤ ᠡᠷᠡ ᠠᠵᠢᠨᠠᠢ ᠮᠥᠩᠭᠥᠨ ᠬᠦᠯᠦᠭ ᠲᠡᠭᠡᠨ ᠮᠣᠷᠳᠠᠭᠠᠳ ᠂ ᠲᠦᠮᠡᠨ ᠭᠠᠵᠠᠷ ᠤ᠋ᠨ ᠤᠷᠲᠤ ᠠᠶᠠᠯᠠᠯ ᠢ᠋ᠶ᠋ᠠᠨ ᠡᠬᠢᠯᠡᠭᠰᠡᠨ ᠢ᠋ ᠲᠤᠩᠬᠠᠭᠯᠠᠬᠤ ᠬᠡᠯᠪᠡᠷᠢ ᠪᠡᠷ ᠨᠢᠰᠬᠡᠨᠡ !
ᠠᠭᠤᠯᠠᠨ ᠳᠡᠭᠡᠭᠦᠷ ᠂ ᠤᠰᠤᠨ ᠳᠡᠭᠡᠭᠦᠷ ᠂ ᠡᠭᠦᠯᠡᠨ ᠳᠡᠭᠡᠭᠦᠷ !
ᠠᠯᠤᠰ ᠤ᠋ᠨ ᠠᠯᠤᠰ ᠲᠤ᠌ !
77 ᠣᠨ ᠳ᠋ᠤ᠌ ᠨᠣᠣᠷᠠᠭᠯᠠᠭᠠᠳ 83 ᠣᠨ ᠳ᠋ᠤ᠌ ᠵᠠᠰᠠᠪᠠ ᠃
※ ᠡᠷᠦᠬᠡ – ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠦ ᠠᠮᠠᠷᠬᠠᠨ ᠴᠥᠮᠥᠷᠳᠡᠭ ᠠᠶᠤᠯᠲᠦ ᠭᠠᠵᠠᠷ᠃