ᠲᠣ᠂ ᠳᠡᠯᠭᠡᠷᠰᠠᠩ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ -3 Т ᠂ Дэлгэрсангийн задгай шүлгүүд -3
222ᠲᠣ᠂ ᠳᠡᠯᠭᠡᠷᠰᠠᠩ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ -3
ᠤᠰᠤᠨ ᠳ᠋ᠠᠬᠢ ᠰᠠᠷᠠ
1
ᠤᠰᠤᠨ ᠳ᠋ᠤ᠌ ᠰᠠᠷᠠ ᠤᠷᠭᠤᠵᠤ ᠪᠠᠶ᠋ᠢᠨᠠ
ᠤᠴᠢᠷ ᠦᠭᠡᠢ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠨᠠ ᠃
ᠭᠡᠪᠡᠴᠦ᠂ ᠠᠳᠬᠤᠭᠠᠳ ᠠᠪᠬᠤ ᠳ᠋ᠤ᠌ ᠠᠯᠠᠭᠠ ᠶ᠋ᠢ ᠳᠠᠭᠠᠭᠠᠭᠰᠠᠨ ᠦᠭᠡᠢ᠃ ᠠᠮᠠ ᠪᠠᠷᠢᠵᠤ ᠭᠠᠰᠢᠭᠤᠳᠠᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠠᠷᠪᠠᠨ ᠲᠠᠰᠢ᠂ ᠵᠠᠭᠤᠨ ᠳᠠᠰᠢ ᠬᠡᠮᠬᠡᠷᠡᠵᠦ ᠪᠤᠲᠠᠷᠠᠭᠠᠳ ᠦᠯᠡᠳᠡᠭᠰᠡᠨ ᠶᠠᠭᠤᠮᠠ ᠶᠠᠭᠤ ᠴᠤ᠌ ᠦᠭᠡᠢ ᠰᠦᠢᠷᠡᠪᠡ᠃
ᠶᠠᠭᠤ ⁈ ᠤᠰᠤᠨ ᠳ᠋ᠠᠬᠢ ᠰᠠᠷᠠ ᠡᠢᠮᠦ ᠯᠡ ᠬᠡᠪᠡᠷᠡᠭ ᠵᠥᠭᠡᠯᠡᠨ ᠶᠦ᠍ᠮ ᠦᠦ ?
2
ᠤᠰᠤᠨ ᠳ᠋ᠤ᠌ ᠰᠠᠷᠠ ᠤᠷᠭᠤᠵᠤ ᠪᠠᠢᠨᠠ
ᠤᠴᠢᠷ ᠦᠭᠡᠢ ᠰᠠᠢᠬᠠᠨ ᠬᠡᠷᠡᠯᠳᠦᠵᠦ ᠪᠠᠢᠨᠠ ᠃
ᠭᠡᠪᠡᠴᠦ ᠲᠡᠷᠡ ᠬᠠᠯᠠᠭᠤᠨ ᠴᠤ᠌ ᠪᠢᠰᠢ ᠂ ᠰᠡᠷᠢᠭᠦᠨ ᠴᠦ᠍ ᠪᠢᠰᠢ ᠃ ᠬᠠᠷᠢᠨ ᠲᠡᠭᠡᠭᠡᠳ ᠪᠠᠰᠠ ᠤᠰᠤᠨ ᠳᠤᠮᠳᠠ ᠲᠤᠨᠤᠯᠵᠠᠳᠠᠭ ᠲᠡᠳᠦᠢ ᠡᠴᠡ ᠪᠢᠰᠢ᠂ ᠤᠰᠤᠨ ᠤ᠋ ᠠᠭᠤᠳᠠᠮ ᠬᠡᠪᠡᠯᠢ ᠶ᠋ᠢ ᠣᠩᠭᠣᠢᠲᠠᠯᠠ ᠭᠡᠷᠡᠯᠲᠦᠭᠦᠯᠵᠦ ᠴᠢᠳᠠᠳᠠᠭ ᠦᠭᠡᠢ᠃
ᠶᠠᠭᠤ ⁈ ᠤᠰᠤᠨ ᠳ᠋ᠠᠬᠢ ᠰᠠᠷᠠ ᠂ ᠲᠡᠢᠮᠦ ᠯᠠ ᠦᠬᠡᠨᠴᠡ ᠳᠣᠷᠣᠢ ᠦᠦ ?
3
ᠤᠰᠤᠨ ᠳ᠋ᠤ᠌ ᠰᠠᠷᠠ ᠤᠷᠭᠤᠵᠤ ᠪᠠᠢᠨᠠ
ᠤᠴᠢᠷ ᠦᠭᠡᠢ ᠰᠠᠢᠬᠠᠨ ᠲᠤᠶᠠᠭᠠᠷᠠᠵᠤ ᠪᠠᠢᠨᠠ ᠃
ᠭᠡᠪᠡᠴᠦ ᠲᠡᠷᠡ᠂ ᠰᠠᠯᠬᠢᠨ ᠤ᠋ ᠦᠯᠢᠶᠡᠯᠲᠡ ᠳ᠋ᠦ᠍ ᠤᠯᠠᠮ ᠢᠯᠡᠭᠦᠦ ᠭᠡᠷᠡᠯᠲᠦᠳᠡᠭ ᠰᠠᠨᠰᠠᠷ ᠤ᠋ᠨ ᠰᠠᠷᠠ ᠲᠠᠢ ᠠᠳᠠᠯᠢ ᠦᠭᠡᠢ ᠂ ᠬᠠᠷᠢᠨ ᠰᠠᠯᠬᠢᠨ ᠤ᠋ ᠪᠠᠷᠠ ᠶ᠋ᠢ ᠦᠵᠡᠵᠦ ᠴᠢᠳᠠᠬᠤ ᠦᠭᠡᠢ ᠰᠡᠪ ᠭᠠᠷᠴᠤ ᠬᠡᠮᠬᠡᠷᠡᠴᠢᠬᠡᠳ᠋ᠩ ᠡᠩᠬᠦᠷᠡᠢ ᠣᠷᠣᠭᠠ ᠃
ᠤᠰᠤᠨ ᠳ᠋ᠠᠬᠢ ᠰᠠᠷᠠᠨ ᠳ᠋ᠤ᠌ ᠰᠣᠨᠢᠷᠬᠠᠯ ᠢ᠋ᠶ᠋ᠠᠨ ᠥᠭᠴᠦ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠂ ᠰᠢᠲᠦᠯᠭᠡ ᠪᠡᠨ ᠶᠠᠭᠠᠬᠢᠭᠰᠠᠨ ᠴᠤ᠌ ᠥᠭᠴᠦ ᠪᠣᠯᠬᠤ ᠦᠭᠡᠢ᠃
ᠮᠢᠨᠦ ᠭᠤᠷᠪᠠᠨ ᠬᠠᠨᠢ
ᠯᠠ
ᠥᠭᠡᠬᠦᠨ ᠯᠡ ᠦᠵᠡᠬᠦ ᠨᠢᠳᠦ ᠪᠡᠨ ᠲᠣᠷᠮᠣᠯᠵᠠᠭᠤᠯᠵᠤ ᠦᠳᠡᠰᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠨᠠᠳᠠ ᠲᠠᠢ ᠬᠠᠮᠲᠤ ᠨᠣᠢᠷ ᠬᠤᠯᠵᠢᠨ᠂ ᠲᠡᠷᠡ ᠨᠠᠳᠠ ᠶ᠋ᠢ ᠠᠵᠢᠭᠯᠠᠵᠤ ᠯᠠ ᠰᠠᠭᠤᠨᠠ ᠃
ᠦᠷ ᠦ᠋ᠨ ᠭᠡᠭᠡ ᠶ᠋ᠢ ᠤᠭᠲᠤᠨ᠂ ᠡᠪᠯᠡᠭᠦᠯᠵᠦ ᠠᠮᠢᠯᠠᠭᠤᠯᠤᠭᠰᠠᠨ ᠮᠢᠨᠦ ᠨᠠᠢᠷᠠᠭ ᠤᠷᠠᠨ ᠪᠣᠯᠵᠣᠮᠣᠷ ᠰᠢᠭ᠋ ᠵᠢᠷᠭᠢᠵᠦ ᠨᠢᠰᠬᠦ ᠦᠶᠡ ᠳ᠋ᠦ᠍ ᠥᠷᠭᠡᠯᠡᠯ ᠦᠭᠡᠢ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠯᠠ ᠮᠢᠨᠢ ᠬᠠᠷᠢᠨ ᠦᠯᠡᠳᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ ᠬᠠᠢᠯᠵᠤ ᠠᠷᠢᠯᠤᠭᠠᠳ ᠂ ᠦᠵᠡᠬᠦ ᠨᠢᠳᠦ ᠪᠡᠨ ᠬᠠᠮᠬᠢᠪᠠ ᠃ ᠡᠭᠦᠷᠢᠳᠡ ᠬᠠᠮᠬᠢᠪᠠ ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠨᠢᠭᠡ ᠨᠠᠰᠤ ᠨᠢ ᠂ ᠮᠢᠨᠦ ᠨᠠᠢᠷᠠᠭ ᠤ᠋ᠨ ᠦᠰᠦᠭ ᠪᠦᠷᠢ ᠳ᠋ᠦ᠍ ᠰᠢᠩᠭᠡᠵᠦ ᠣᠷᠣᠭᠠᠳ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠭᠰᠡᠨ ᠢᠷᠠᠭᠤ ᠨᠠᠢᠷᠠᠭ ᠲᠠᠢ ᠮᠢᠨᠢ ᠬᠠᠮᠲᠤ ᠂ ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠬᠠᠩᠭᠢᠨᠠᠭᠰᠠᠭᠠᠷ ᠨᠢᠰᠴᠦ ᠪᠠᠢᠨᠠ ᠃
ᠭᠡᠷᠡᠯ ᠰᠢᠯᠦᠭ ᠬᠣᠶᠠᠷ ᠪᠣᠯ ᠬᠡᠵᠢᠶᠡᠳᠡ ᠠᠮᠢ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠦ᠍ᠮ !
ᠪᠢᠷ
ᠴᠠᠰᠤᠨ ᠳᠡᠭᠡᠷᠡ ᠮᠣᠷᠢ ᠳᠣᠪᠲᠣᠯᠬᠤ ᠶᠤᠮᠰᠢᠭ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠷ ᠳᠣᠪᠲᠣᠯᠵᠤ ᠶᠠᠪᠤᠨᠠ᠃ ᠪᠢᠷ ᠦ᠋ᠨ ᠮᠥᠷ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠣᠳᠣᠭ ᠢ᠋ᠶ᠋ᠠᠷ ᠤᠭᠠᠯᠵᠠ ᠲᠡᠳᠡᠨ ᠦᠯᠡᠳᠡᠵᠦ ᠂ ᠦᠵᠡᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠦ᠌ ᠦᠷᠦ ᠵᠢᠷᠦᠬᠡ ᠶ᠋ᠢ ᠲᠣᠭᠳᠣᠯᠵᠠᠭᠤᠯᠤᠨ ᠂ ᠬᠠᠷᠠᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠦ᠌ ᠬᠠᠪᠲᠠᠭᠠᠢ ᠴᠡᠭᠡᠵᠢ ᠶ᠋ᠢ ᠭᠦᠪᠦᠯᠵᠡᠭᠦᠯᠦᠨᠡ ᠃ ᠬᠤᠷᠤᠭᠤᠨ ᠤ᠋ ᠠᠶᠠ ᠪᠠᠷ ᠬᠠᠲᠠᠷᠢᠵᠤ ᠂ ᠬᠣᠯᠪᠣᠴᠠ ᠲᠠᠭᠠᠷᠠᠭᠰᠠᠨ ᠦᠭᠡ ᠶ᠋ᠢ ᠤᠷᠤᠰᠬᠠᠵᠤ ᠶᠠᠪᠤᠬᠤ ᠪᠢᠷ ᠦ᠋ᠨ ᠮᠥᠷ ᠂ ᠰᠣᠯᠢᠷ ᠮᠡᠲᠦ ᠥᠩᠭᠡᠷᠡᠬᠦ ᠢᠷᠠᠭᠤ ᠨᠠᠢᠷᠠᠭᠴᠢ ᠶ᠋ᠢᠨ ᠨᠢᠭᠡ ᠨᠠᠰᠤ ᠶ᠋ᠢ ᠰᠣᠩᠭᠢᠨᠠ ᠶ᠋ᠢᠨ ᠤᠭ ᠠ᠋ᠴᠠ ᠴᠠᠭᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠰᠤᠮᠤᠨ ᠦᠵᠦᠭᠦᠷ ᠲᠡᠢ ᠥᠨᠳᠥᠷ ᠠᠭᠤᠯᠠ ᠰᠢᠭ᠋ ᠪᠠᠲᠤ ᠰᠦᠨᠳᠡᠷᠯᠡᠭᠦᠯᠵᠦ ᠦᠯᠡᠳᠡᠭᠡᠳᠡᠭ ᠪᠢᠯᠡ!
ᠰᠠᠨᠳᠠᠯᠢ
ᠳᠠᠭᠤ ᠦᠭᠡᠢ ᠨᠣᠮᠣᠬᠠᠨ ᠰᠠᠨᠳᠠᠯᠢ ᠮᠢᠨᠢ ᠂ ᠳᠤᠷᠠᠰᠢᠯ ᠠ᠋ᠴᠠ ᠳ᠋ᠤ᠌ ᠪᠠᠨ ᠨᠠᠮᠠᠶ᠋ᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠭᠡᠳ ᠨᠠᠷᠠ ᠶ᠋ᠢ ᠦᠳᠡᠵᠦ ᠰᠠᠷᠠ ᠶ᠋ᠢ ᠤᠭᠲᠤᠵᠤ ᠂ ᠰᠠᠷᠠ ᠶ᠋ᠢ ᠦᠳᠡᠵᠦ ᠨᠠᠷᠠ ᠶ᠋ᠢ ᠤᠭᠲᠤᠭᠰᠠᠭᠠᠷ ᠢᠷᠡᠪᠡ ᠃ ᠡᠳᠦᠷ ᠦ᠋ᠨ ᠤᠳᠠᠭᠠᠨ ᠬᠣᠨᠣᠭ ᠤ᠋ᠨ ᠵᠤᠵᠠᠭᠠᠨ ᠳ᠋ᠤ᠌ ᠪᠣᠳᠣᠭ ᠨᠢ ᠤᠨᠠᠵᠤ ᠂ ᠥᠩᠭᠡ ᠨᠢ ᠪᠠᠭᠤᠷᠠᠭᠰᠠᠨ ᠪᠣᠯᠪᠠᠴᠤ᠂ ᠡᠵᠡᠨ ᠨᠠᠮᠠᠶ᠋ᠢ ᠪᠠᠨ ᠴᠥᠬᠥᠷᠡᠯ ᠦᠭᠡᠢ ᠡᠷᠭᠦᠨ ᠡᠷᠭᠦᠭᠰᠡᠭᠡᠷ ᠪᠠᠢᠭᠠᠳ ᠬᠥᠷᠥᠰᠥᠲᠦ ᠭᠠᠵᠠᠷ ᠳᠡᠭᠡᠷᠡ ᠡᠴᠡ ᠣᠯᠤᠭᠰᠠᠨ ᠨᠡᠷᠡ ᠶ᠋ᠢ ᠮᠢᠨᠢ ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠲᠠᠩᠨᠠᠢ ᠪᠠᠷ ᠴᠤᠤᠷᠢᠶᠠᠲᠤᠭᠤᠯᠵᠤ ᠂ ᠰᠠᠨᠳᠠᠯᠢ ᠴᠢ ᠮᠢᠨᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠲᠤᠯᠪᠠ ᠃ ᠰᠠᠢᠬᠠᠨ ᠪᠣᠳᠣᠪᠠᠯ ᠂ ᠪᠢ ᠴᠦ᠍ ᠰᠠᠨᠠᠭᠠᠨ ᠳ᠋ᠠᠭᠠᠨ ᠲᠤᠯᠪᠠ ᠃ ᠤᠴᠢᠷ ᠨᠢ ᠪᠢ ᠪᠣᠯ ᠬᠥᠮᠦᠨ ᠶᠦ᠍ᠮ ᠂ ᠤᠳᠬᠠ ᠲᠠᠢ ᠠᠮᠢᠳᠤᠷᠠᠬᠤ ᠨᠢ ᠵᠦᠢᠲᠡᠢ ᠶᠦ᠍ᠮ ᠃
ᠨᠤᠲᠤᠭ ᠤ᠋ᠨ ᠮᠢᠨᠢ ᠠᠭᠤᠯᠠ ᠤᠰᠤ
ᠬᠦᠬᠡᠷᠡᠴᠢᠭ᠍ᠰᠡᠨ ᠥᠨᠳᠥᠷ ᠠᠭᠤᠯᠠᠰ ᠂ ᠬᠦᠷᠴᠢᠭᠢᠨᠡᠴᠢᠭ᠍ᠰᠡᠨ ᠭᠣᠣᠯ ᠮᠥᠷᠡᠨ ᠪᠣᠯ ᠮᠢᠨᠦ ᠨᠤᠲᠤᠭ ᠤ᠋ᠨ ᠠᠭᠤᠯᠠ ᠤᠰᠤ ᠠ᠋ ᠃ ᠨᠠᠮᠠᠶ᠋ᠢ ᠪᠦᠪᠡᠢᠯᠡᠭᠰᠡᠨ ᠥᠯᠥᠭᠡᠢ ! ᠠᠭᠤᠯᠠ ᠮᠢᠨᠢ ᠬᠠᠳᠠᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠨᠠᠢᠵᠤ ᠮᠣᠳᠣᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠬᠡᠷᠡᠭᠡᠳ ᠂ ᠤᠰᠤ ᠮᠢᠨᠢ ᠱᠤᠤᠭᠢᠶᠠ ᠪᠠᠷ ᠢ᠋ᠶ᠋ᠠᠨ ᠬᠥᠭᠵᠢᠮᠳᠡᠵᠦ ᠂ ᠳᠣᠯᠭᠢᠶᠠ ᠪᠠᠷ ᠢ᠋ᠶ᠋ᠠᠨ ᠮᠢᠷᠠᠯᠵᠠᠭᠠᠳ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠬᠠᠨ ᠰᠡᠳᠬᠢᠯ ᠳ᠋ᠦ᠍ ᠬᠠᠯᠠᠭᠤᠬᠠᠨ ᠰᠠᠨᠠᠭᠳᠠᠳᠠᠭ ᠢ᠋ ᠶᠠᠭᠤᠨ ᠬᠡᠯᠡᠬᠦ ᠠᠵᠢ !
ᠥᠨᠳᠥᠷ ᠰᠠᠢᠬᠠᠨ ᠠᠭᠤᠯᠠᠨ ᠤ᠋ ᠮᠢᠨᠢ ᠮᠣᠳᠣ ᠪᠤᠷᠢ ᠨᠢ ᠨᠠᠮᠠᠶ᠋ᠢ ᠳᠠᠯᠠᠯᠵᠤ ᠵᠣᠭᠰᠣᠳᠠᠭ ᠠ᠋ ᠃ ᠥᠷᠭᠡᠨ ᠰᠠᠢᠬᠠᠨ ᠮᠥᠷᠡᠨ ᠦ᠌ ᠮᠢᠨᠢ ᠳᠣᠯᠭᠢᠶᠠᠨ ᠪᠦᠷᠢ ᠨᠢ ᠨᠠᠮᠠᠶ᠋ᠢ ᠰᠠᠷᠠᠪᠴᠢᠯᠠᠵᠤ ᠥᠨᠳᠡᠢᠳᠡᠭ ᠠ᠋ ᠃ ᠤᠤᠭᠤᠭᠰᠠᠨ ᠤᠰᠤ ᠤᠨᠠᠭᠰᠠᠨ ᠨᠤᠲᠤᠭ ᠭᠡᠵᠢ ᠂ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠡᠢᠮᠦ ᠯᠡ ᠬᠠᠢᠷᠠᠲᠠᠢ ᠲᠡᠢᠮᠦ ᠯᠠ ᠮᠥᠷᠥᠭᠡᠳᠦᠯᠲᠡᠢ ᠪᠠᠢᠳᠠᠭ ᠪᠣᠯᠬᠣᠷ ᠮᠣᠳᠣ ᠪᠦᠷᠢ ᠳ᠋ᠦ᠍ᠨᠢ ᠮᠢᠨᠦ ᠵᠢᠷᠦᠬᠡ ᠠᠷᠭᠠᠮᠵᠢᠭᠳᠠᠵᠤ ᠂ ᠳᠣᠯᠭᠢᠶᠠᠨ ᠪᠦᠷᠢ ᠳ᠋ᠦ᠍ᠨᠢ ᠮᠢᠨᠦ ᠰᠡᠳᠬᠢᠯ ᠰᠢᠵᠢᠮᠯᠡᠭᠳᠡᠭᠰᠡᠨ ᠪᠢᠯᠡ᠃
ᠡᠷᠦᠬᠡ ᠭᠡᠷ ᠦ᠋ᠨ ᠮᠢᠨᠢ ᠲᠦᠰᠢᠭ ᠪᠣᠯᠤᠭᠰᠠᠨ ᠥᠨᠳᠥᠷ ᠰᠠᠢᠬᠠᠨ ᠠᠭᠤᠯᠠᠰ ᠮᠢᠨᠢ ᠠ᠋ ! ᠪᠢ ᠴᠢᠨᠦ ᠨᠢᠷᠤᠭᠤ ᠭᠡᠳᠡᠢᠨ ᠬᠥᠬᠡᠷᠡᠩᠬᠡᠨ ᠪᠠᠢᠭᠠ ᠮᠣᠳᠣᠳ ᠤ᠋ᠨ ᠴᠢᠨᠢ ᠨᠢᠭᠡ ᠨᠢ ᠪᠣᠯᠵᠤ ᠵᠣᠭᠰᠣᠭᠠᠳ ᠨᠠᠮᠠᠶ᠋ᠢ ᠳᠠᠯᠠᠯᠳᠠᠭ ᠣᠢ ᠲᠠᠢᠭᠠ ᠶ᠋ᠢ ᠴᠢᠨᠢ ᠳᠠᠭᠠᠭᠤᠯᠵᠤ ᠴᠢᠨᠦ ᠰᠠᠢᠨ ᠰᠠᠢᠬᠠᠨ ᠢᠷᠡᠭᠡᠳᠦᠢ ᠶ᠋ᠢ ᠴᠤᠴᠠᠯᠲᠠ ᠦᠭᠡᠢ ᠳᠠᠯᠠᠯᠤᠶᠠ ᠂ ᠴᠢᠷᠮᠠᠢᠯᠭᠠ ᠨᠢᠭᠡᠲᠡᠢ ᠬᠤᠷᠤᠢᠯᠠᠶᠠ !
ᠥᠲᠡᠯᠦᠭᠰᠡᠨ ᠵᠠᠯᠠᠭᠤᠰ ᠤ᠋ᠨ ᠮᠢᠨᠢ ᠤᠮᠳᠠ ᠪᠣᠯᠤᠭᠰᠠᠨ ᠥᠷᠭᠡᠨ ᠰᠠᠢᠬᠠᠨ ᠮᠥᠷᠡᠨ ᠮᠢᠨᠢ ᠠ᠋ ︕ ᠪᠢ ᠴᠢᠨᠦ ᠬᠣᠯᠠ ᠶ᠋ᠢ ᠵᠣᠷᠢᠨ ᠦᠶᠡᠯᠵᠡᠩᠭᠡᠨ ᠪᠠᠢᠭᠠ ᠤᠷᠤᠰᠬᠠᠯ ᠤ᠋ᠨ ᠴᠢᠨᠢ ᠳᠤᠰᠤᠯ ᠤᠰᠤ ᠨᠢ ᠪᠣᠯᠵᠤ ᠵᠢᠭᠰᠠᠭᠠᠳ ᠂ ᠮᠢᠨᠦ ᠬᠣᠢᠨᠠ ᠡᠴᠡ ᠭᠦᠶᠦᠳᠡᠭ ᠳᠠᠪᠠᠯᠭᠠᠨ ᠳᠣᠯᠭᠢᠶᠠᠨ ᠢ᠋ ᠴᠢᠨᠢ ᠳᠠᠭᠠᠭᠤᠯᠵᠤ ᠴᠢᠨᠦ ᠵᠣᠯ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠵᠣᠭᠰᠣᠰᠢ ᠦᠭᠡᠢ ᠲᠡᠮᠡᠦᠯᠦᠶᠡ ᠂ ᠵᠢᠪᠬᠤᠭᠠ ᠲᠡᠭᠦᠯᠳᠡᠷ ᠤᠷᠤᠭᠰᠢᠯᠠᠶᠠ !
ᠠᠭᠤᠯᠠ ᠮᠢᠨᠢ ᠤᠯᠠᠮ ᠬᠥᠬᠡᠷᠡᠬᠦ ᠨᠢ ᠯᠠᠪᠲᠠᠢ ᠂ ᠤᠰᠤ ᠮᠢᠨᠢ ᠤᠯᠠᠮ ᠬᠦᠷᠴᠢᠭᠢᠨᠡᠬᠦ ᠨᠢ ᠪᠠᠲᠤᠲᠠᠢ !
ᠪᠤᠯᠠᠭ ᠤ᠋ᠨ ᠤᠰᠤ
ᠪᠤᠯᠠᠭ ᠤ᠋ᠨ ᠤᠰᠤ ᠶ᠋ᠢ ᠪᠢ ᠬᠠᠢᠷᠠᠯᠠᠨᠠ ᠃ ᠪᠣᠳᠣᠬᠤ ᠲᠤᠲᠤᠮ ᠪᠢ ᠪᠢᠰᠢᠷᠡᠨᠡ ᠃
ᠪᠤᠯᠠᠭ ᠤ᠋ᠨ ᠤᠰᠤ ᠪᠠᠯᠭᠤ ᠲᠡᠳᠦᠢ ᠪᠣᠯᠪᠠᠴᠤ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠶᠠᠭᠤ ᠴᠤ᠌ ᠦᠭᠡᠢ ᠴᠠᠢᠯᠭᠠᠨ ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠶᠤᠮᠰᠢᠭ᠌ ᠬᠡᠵᠢᠶᠡᠳᠡ ᠲᠤᠩᠭᠠᠯᠠᠭ ᠢᠷᠣᠭᠠᠯ ᠢ᠋ᠶ᠋ᠠᠨ ᠪᠤᠰᠤᠳ ᠲᠤ᠌ ᠨᠢᠭᠤᠯ ᠦᠭᠡᠢ ᠪᠦᠬᠦᠨ ᠢ᠋ ᠦᠵᠡᠭᠦᠯᠵᠦ ᠪᠠᠢᠳᠠᠭ ᠃ ᠪᠤᠯᠠᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠪᠤᠯᠠᠩᠭᠢᠷ ᠦᠭᠡᠢ᠂ ᠪᠤᠵᠠᠷ ᠰᠠᠨᠠᠭᠠ ᠨᠡᠩ ᠪᠠᠢᠳᠠᠭ ᠦᠭᠡᠢ !
ᠪᠤᠯᠠᠭ ᠤ᠋ᠨ ᠤᠰᠤ ᠣᠭᠣᠴᠢ ᠲᠡᠳᠦᠢ ᠪᠣᠯᠪᠠᠴᠤ ᠂ ᠪᠣᠳᠣᠯ ᠴᠡᠭᠡᠵᠢᠨ ᠳ᠋ᠡᠭᠡᠨ ᠲᠠᠮᠢᠷ ᠲᠠᠢ ᠡᠷᠡ ᠬᠥᠮᠦᠨ ᠶᠤᠮᠰᠢᠭ᠌ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠬᠠᠳᠠᠳᠠᠭ ᠦᠭᠡᠢ᠂ ᠬᠠᠬᠢᠷ ᠬᠦᠢᠲᠡᠨ ᠳ᠋ᠦ᠍ ᠬᠥᠯᠳᠡᠳᠡᠭ ᠦᠭᠡᠢ ᠪᠤᠷᠭᠢᠯᠤᠨ ᠪᠤᠷᠭᠢᠯᠤᠨ ᠳᠡᠭᠡᠭᠰᠢ ᠣᠷᠭᠢᠯᠵᠤ ᠂ ᠪᠣᠭᠣᠭᠳᠠᠰᠢ ᠦᠭᠡᠢ ᠬᠠᠭᠠᠭᠳᠠᠰᠢ ᠦᠭᠡᠢ ᠥᠨᠳᠡᠢᠵᠦ ᠪᠠᠢᠳᠠᠭ ᠃ ᠪᠤᠯᠠᠭ ᠤ᠋ᠨ ᠤᠰᠤ ᠪᠣᠭᠣᠭᠳᠠᠰᠢ ᠦᠭᠡᠢ ᠂ ᠬᠠᠭᠠᠭᠳᠠᠰᠢ ᠦᠭᠡᠢ ᠪᠣᠳᠣᠭᠰᠠᠨ ᠳ᠋ᠠᠭᠠᠨ ᠬᠦᠷᠬᠦ ᠡᠴᠡ ᠨᠡᠰᠢ ᠵᠣᠭᠰᠣᠳᠠᠭ ᠦᠭᠡᠢ !
ᠪᠤᠯᠠᠭ ᠤ᠋ᠨ ᠤᠰᠤ ᠪᠢᠲᠡᠭᠦᠦ ᠲᠡᠳᠦᠢ ᠪᠣᠯᠪᠠᠴᠤ ᠂ ᠬᠠᠷᠠᠮᠴᠢ ᠦᠭᠡᠢ ᠥᠭᠯᠢᠭᠡᠴᠢ ᠬᠥᠮᠦᠨ ᠶᠤᠮᠰᠢᠭ᠌ ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠵᠢᠭᠳᠡ ᠳ᠋ᠡᠭᠡᠨ ᠥᠪᠡᠷᠦᠨ ᠤᠰᠤ ᠪᠠᠨ ᠵᠦᠭ ᠪᠦᠷᠢ ᠳ᠋ᠦ᠍ ᠲᠦᠭᠡᠭᠡᠨ ᠥᠭᠴᠦ ᠂ ᠭᠣᠷᠣᠬᠠ ᠶ᠋ᠢ ᠭᠤᠷᠴᠢᠭᠢᠨᠠᠭᠤᠯᠵᠤ ᠭᠣᠣᠯ ᠢ᠋ ᠬᠦᠷᠴᠢᠭᠢᠨᠡᠭᠦᠯᠵᠦ ᠪᠠᠢᠳᠠᠭ ᠃
ᠪᠤᠯᠠᠭ ᠤ᠋ᠨ ᠤᠰᠤ᠂ ᠪᠤᠰᠤᠳ ᠲᠤ᠌ ᠥᠭᠬᠦ ᠳ᠋ᠦ᠍ ᠬᠡᠵᠢᠶᠡᠳᠡ ᠲᠠᠲᠠᠭᠠᠯᠵᠠᠳᠠᠭ ᠦᠭᠡᠢ ᠂ ᠭᠡᠪᠡᠴᠦ ᠪᠤᠰᠤᠳ ᠠ᠋ᠴᠠ ᠭᠡᠳᠡᠷᠭᠦ ᠪᠡᠨ ᠠᠪᠬᠤ ᠶ᠋ᠢ ᠶᠠᠭ ᠮᠡᠳᠡᠳᠡᠭ ᠦᠭᠡᠢ ᠶᠦ᠍ᠮ !
ᠪᠤᠯᠠᠭ ᠤ᠋ᠨ ᠤᠰᠤ ᠶ᠋ᠢ ᠪᠢ ᠬᠠᠢᠷᠠᠯᠠᠨᠠ ᠃ ᠪᠣᠳᠣᠬᠤ ᠲᠤᠲᠤᠮ ᠪᠢ ᠪᠢᠰᠢᠷᠡᠨᠡ ᠃