ᠲᠣ᠂ ᠳᠡᠯᠭᠡᠷᠰᠠᠩ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ -2 Т ᠂ Дэлгэрсангийн задгай шүлгүүд -2
250ᠲᠣ᠂ ᠳᠡᠯᠭᠡᠷᠰᠠᠩ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ -2
ᠬᠦᠰᠡᠯ
ᠬᠥᠮᠦᠨ ᠭᠡᠳᠡᠭ ᠬᠠᠴᠢᠨ ᠶᠤᠮ ᠂ ᠬᠦᠰᠡᠯ ᠭᠡᠳᠡᠭ ᠰᠣᠨᠢᠬᠠᠨ ᠶᠤᠮ ᠃
ᠲᠠᠵᠢ ᠮᠠᠩᠨᠤᠭ ᠢ᠋ ᠤᠷᠠᠯᠠᠭᠰᠠᠨ ᠮᠡᠲᠦ ᠴᠡᠴᠡᠭ ᠮᠢᠷᠠᠯᠵᠠᠵᠤ ᠲᠠᠨᠠ ᠰᠤᠪᠤᠳ ᠢ᠋ ᠰᠠᠴᠤᠭᠰᠠᠨ ᠮᠡᠲᠦ ᠰᠦᠷᠦᠭ ᠪᠡᠯᠴᠢᠭᠰᠡᠨ ᠲᠠᠭᠠᠲᠠᠢ ᠠᠭᠤᠳᠠᠮ ᠲᠠᠯᠠ ᠳᠡᠭᠡᠷᠡ ᠪᠢ ᠲᠠᠪᠠ ᠬᠠᠨᠲᠠᠯᠠ ᠳᠥᠷᠪᠡᠨ ᠵᠦᠭ ᠢ᠋ ᠰᠢᠷᠲᠡᠨ ᠵᠣᠭᠰᠣᠬᠤ ᠳ᠋ᠤ᠌ ᠲᠡᠷᠲᠡᠭᠡ ᠵᠡᠷᠭᠡᠯᠭᠡᠨ ᠦ᠌ ᠣᠷᠣᠢ ᠳᠡᠭᠡᠭᠦᠷ ᠬᠥᠬᠡᠷᠡᠨ ᠪᠤᠪᠠᠢᠵᠤ ᠂ ᠬᠡᠯᠡᠬᠦ ᠦᠭᠡᠢ ᠰᠠᠢᠬᠠᠨ ᠬᠠᠷᠠᠭᠳᠠᠬᠤ ᠳᠣᠪᠣ ᠶ᠋ᠢᠨ ᠣᠷᠣᠢ ᠥᠭᠡᠳᠡ ᠲᠡᠰᠴᠦ ᠶᠠᠳᠠᠭᠰᠠᠨ ᠬᠦᠰᠡᠯ ᠮᠢᠨᠢ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠪᠢᠯᠬᠢᠯᠡᠨᠡ ᠃
ᠬᠥᠮᠦᠨ ᠭᠡᠳᠡᠭ ᠬᠠᠴᠢᠨ ᠶᠤᠮ ᠂ ᠬᠦᠰᠡᠯ ᠭᠡᠳᠡᠭ ᠰᠣᠨᠢᠬᠠᠨ ᠶᠤᠮ᠃
ᠳᠣᠪᠣ ᠳᠡᠭᠡᠷᠡ ᠭᠠᠷᠴᠤ ᠳᠤᠷᠠ ᠪᠠᠷ ᠪᠠᠷᠠᠯᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠨᠢᠭᠡ ᠯᠡ ᠳᠣᠣᠷᠠ ᠨᠢᠳᠦᠨ ᠬᠠᠷᠠᠭᠠ ᠥᠷᠭᠡᠵᠢᠵᠦ ᠂ ᠨᠡᠯᠦᠭᠡᠷ ᠲᠠᠯᠠ ᠠᠯᠤᠰ ᠬᠦᠷᠲᠡᠯᠡ ᠴᠡᠯᠡᠢᠨ ᠬᠠᠷᠠᠭᠳᠠᠬᠤ ᠶᠤᠮ ᠃ ᠨᠠᠷᠢᠨ ᠭᠣᠷᠣᠬᠠ ᠴᠠᠭᠠᠨᠠ ᠭᠠᠷᠲᠠᠯᠠ ᠴᠠᠢᠯᠵᠠᠨ ᠦᠵᠡᠭᠳᠡᠬᠦ ᠶᠦ᠍ᠮ ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠂ ᠨᠣᠮᠢᠨ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠ ᠪᠠᠷ ᠡᠭᠦᠯᠡ ᠣᠷᠢᠶᠠᠨ ᠬᠥᠨᠳᠡᠯᠢᠰᠦᠨ ᠵᠣᠭᠰᠣᠬᠤ ᠦᠵᠦᠭᠦᠷ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠥᠨᠳᠥᠷ ᠠᠭᠤᠯᠠᠨ ᠤ᠋ ᠣᠷᠭᠢᠯ ᠥᠭᠡᠳᠡ ᠥᠪᠡᠷᠦᠨ ᠡᠷᠬᠡ ᠦᠭᠡᠢ ᠬᠦᠰᠡᠯ ᠮᠢᠨᠢ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠪᠢᠯᠬᠢᠯᠡᠨᠡ ᠃
ᠬᠥᠮᠦᠨ ᠭᠡᠳᠡᠭ ᠬᠠᠴᠢᠨ ᠶᠤᠮ ᠂ ᠬᠦᠰᠡᠯ ᠭᠡᠳᠡᠭ ᠰᠣᠨᠢᠬᠠᠨ ᠶᠤᠮ ᠃
ᠣᠷᠭᠢᠯ ᠳᠡᠭᠡᠷᠡ ᠭᠠᠷᠴᠤ ᠵᠣᠭᠰᠣᠮᠠᠭᠴᠠ ᠨᠢᠳᠦᠨ ᠬᠠᠷᠠᠭᠠ ᠨᠢᠭᠡ ᠶᠢᠷᠲᠢᠨᠴᠦ ᠳᠦᠭᠦᠷᠴᠦ ᠂ ᠡᠨᠡ ᠨᠢ ᠴᠦ᠍ ᠬᠠᠷᠠᠭᠳᠠᠨᠠ ᠃ ᠲᠡᠷᠡ ᠨᠢ ᠴᠦ᠍ ᠬᠠᠷᠠᠭᠳᠠᠨᠠ ᠃ ᠥᠨᠳᠥᠷ ᠭᠡᠳᠡᠭ ᠰᠠᠢᠬᠠᠨ ᠯᠠ ᠪᠠᠢᠨᠠ ᠂ ᠦᠵᠡᠬᠦ ᠬᠠᠷᠠᠴᠠ ᠶ᠋ᠢ ᠳᠠᠯᠠᠯᠵᠤ ᠯᠠ ᠪᠠᠢᠨᠠ ᠂ ᠥᠨᠳᠥᠷ ᠦ᠋ᠨ ᠠᠮᠲᠠ ᠳ᠋ᠤᠨᠢ ᠣᠷᠣᠭᠰᠠᠨ ᠬᠦᠰᠡᠯ ᠮᠢᠨᠢ ᠭᠡᠨᠡᠳᠲᠡ ᠰᠤᠪᠤᠷᠭᠠᠯᠠᠬᠤ ᠡᠭᠦᠯᠡᠰ ᠦ᠋ᠨ ᠣᠷᠣᠢ ᠳᠡᠭᠡᠷᠡᠬᠢ ᠭᠦᠨ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠶ᠋ᠢᠨ ᠲᠠᠩᠨᠠᠢ ᠥᠭᠡᠳᠡ ᠰᠣᠷᠢᠨᠵᠢᠨ ᠳ᠋ᠤ᠌ ᠲᠠᠲᠠᠭᠳᠠᠭᠰᠠᠨ ᠮᠡᠲᠦ ᠰᠤᠮᠤᠳᠠᠨ ᠨᠢᠰᠦᠯᠡ !
ᠬᠥᠮᠦᠨ ᠭᠡᠳᠡᠭ ᠬᠠᠴᠢᠨ ᠶᠤᠮ ᠂ ᠬᠦᠰᠡᠯ ᠭᠡᠳᠡᠭ ᠰᠣᠨᠢᠬᠠᠨ ᠶᠤᠮ᠃
ᠴᠡᠭᠡᠵᠢᠨ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠲᠠᠯᠠ
ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠊ᠢ ᠵᠡᠭᠦᠵᠦ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠯᠠ ᠶ᠋ᠢᠨ ᠮᠢᠨᠢ ᠵᠢᠰᠦ ᠭᠣᠶᠣᠬᠠᠨ ᠶᠤᠮ᠃ ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠠᠮᠢᠲᠠᠨ ᠤᠷᠭᠤᠮᠠᠯ ᠊ᠢ ᠪᠠᠭᠲᠠᠭᠠᠵᠤ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠯᠠ ᠶ᠋ᠢᠨ ᠮᠢᠨᠢ ᠡᠪᠦᠷ ᠶᠡᠬᠡ ᠶᠦ᠍ᠮ ᠃ ᠲᠦᠮᠡᠨ ᠡᠷᠡ ᠴᠦ᠍ ᠳᠠᠭᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠠᠭᠤᠯᠠ ᠨᠢᠷᠤᠭᠤᠳ ᠢ᠋ ᠡᠷᠭᠦᠵᠦ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠯᠠ ᠶ᠋ᠢᠨ ᠮᠢᠨᠢ ᠮᠥᠷᠥ ᠬᠦᠴᠦ ᠲᠠᠷ ᠶᠤᠮ ᠃
ᠲᠠᠯᠠ ᠮᠢᠨᠢ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠶᠤᠮ ᠂ ᠲᠡᠭᠡᠭᠡᠳ ᠮᠢᠨᠦ ᠥᠯᠥᠭᠡᠢ ᠶᠦ᠍ᠮ᠃
ᠪᠢ ᠂ ᠬᠥᠳᠡᠭᠡ ᠲᠠᠯᠠ ᠶ᠋ᠢᠨ ᠨᠣᠭᠣᠭᠠᠨ ᠬᠥᠷᠥᠰᠥ ᠶ᠋ᠢ ᠬᠥᠨᠳᠡᠨ ᠪᠠᠢᠵᠤ᠂ ᠬᠥᠯ ᠳ᠋ᠦ᠍ ᠣᠷᠣᠭᠠᠳ ᠬᠥᠮᠦᠨ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠡᠨᠡ ᠪᠡᠶᠡ ᠮᠢᠨᠢ ᠥᠪᠡᠷᠦᠨ ᠡᠷᠬᠡ ᠦᠭᠡᠢ ᠲᠠᠯᠠ ᠶ᠋ᠢᠨ ᠰᠢᠷᠬᠡᠭ ᠡᠪᠡᠰᠦ ᠂ ᠲᠠᠯᠠ ᠶ᠋ᠢᠨ ᠮᠥᠬᠥᠯᠢᠭ ᠰᠢᠷᠣᠢ᠂ ᠲᠠᠯᠠ ᠶ᠋ᠢᠨ ᠰᠠᠭᠤᠷᠢ ᠮᠣᠳᠣ ᠂ ᠲᠠᠯᠠ ᠶ᠋ᠢᠨ ᠨᠢᠭᠡ ᠨᠢ ᠡᠷᠡᠭᠡᠯᠵᠡᠰᠢ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ᠂ ᠡᠭᠦᠨ ᠳ᠋ᠡᠭᠡᠨ ᠴᠦ᠍ ᠪᠢ ᠣᠮᠣᠭᠰᠢᠳᠠᠭ ᠶᠤᠮ ᠃ ᠭᠡᠯᠡ ᠴᠦ᠍ ᠪᠢ ᠲᠠᠯᠠ ᠶ᠋ᠢᠨ ᠰᠢᠷᠬᠡᠭ ᠡᠪᠡᠰᠦ ᠪᠣᠯᠤᠭᠰᠠᠨ ᠴᠤ᠌ ᠂ ᠲᠠᠯᠠ ᠮᠢᠨᠢ ᠠᠭᠤᠯᠠ ᠲᠠᠢ ᠪᠠᠨ᠂ ᠤᠰᠤ ᠲᠠᠢ ᠪᠠᠨ᠂ ᠤᠷᠭᠤᠮᠠᠯ ᠲᠠᠢ ᠪᠠᠨ᠂ ᠬᠥᠷᠥᠰᠥ ᠲᠡᠢ ᠪᠡᠨ ᠦᠯᠡᠳᠡᠯ ᠦᠭᠡᠢ ᠪᠦᠷ ᠮᠢᠨᠦ ᠡᠪᠴᠢᠭᠦᠦ ᠴᠡᠭᠡᠵᠢᠨ ᠳᠣᠲᠣᠷᠠ ᠡᠭᠦᠷᠢᠳᠡ ᠭᠠᠷᠤᠯ ᠦᠭᠡᠢ ᠮᠥᠩᠬᠡ ᠡᠷᠭᠢᠯᠳᠦᠵᠦ ᠡᠩᠬᠡ ᠲᠣᠭᠲᠠᠨᠢᠵᠤ ᠪᠠᠢᠳᠠᠭ ᠶᠤᠮ ᠃
ᠲᠠᠯᠠ ᠮᠢᠨᠢ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠢᠨᠠ᠂ ᠲᠡᠭᠡᠭᠡᠳ ᠨᠠᠳᠠᠳᠤ ᠬᠦᠴᠦ ᠥᠭᠴᠦ ᠪᠠᠢᠨᠠ !
ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠢᠨᠢ
–– ᠰᠤᠷᠭᠠᠭᠤᠯᠢ ᠶ᠋ᠢᠨ ᠠᠰᠠᠷ ᠤ᠋ᠨ ᠡᠮᠦᠨᠡᠬᠢ 《 ᠪᠢᠯᠢᠭ ᠦ᠋ᠨ
ᠵᠢᠯᠣᠭᠣ 》ᠭᠡᠳᠡᠭ ᠰᠠᠷᠠᠯ ᠮᠣᠷᠢᠲᠠᠢ ᠬᠥᠮᠦᠨ ᠦ᠌ ᠱᠤᠭᠤᠮᠠᠯ ᠳ᠋ᠤ᠌
ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠢᠨᠢ ᠬᠥᠨᠲᠡᠷ ᠠ᠋ ᠂ ᠬᠥᠨᠲᠡᠷ !
ᠪᠢᠳᠡᠷᠢᠶᠠᠨ ᠣᠭᠲᠠᠷᠭᠤᠢ ᠥᠭᠡᠳᠡ ᠳᠡᠭᠦᠯᠢ ᠠ᠋ ᠂ ᠳᠡᠭᠦᠯᠢ !
ᠮᠠᠩᠨᠤᠭ ᠲᠠᠯᠠ ᠳ᠋ᠤ᠌ ᠪᠡᠯᠴᠢᠭᠡᠷ ᠲᠡᠢ ᠮᠣᠩᠭᠣᠯ ᠮᠣᠷᠢᠨ ᠤ᠋ ᠰᠢᠨᠵᠢ ᠶ᠋ᠢ ᠲᠡᠭᠦᠰ ᠬᠠᠳᠠᠭᠠᠯᠠᠭᠰᠠᠨ ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠣᠷᠢ ᠮᠢᠨᠢ ᠂ ᠬᠥᠭᠵᠢᠬᠦ ᠭᠠᠯ ᠤ᠋ᠨ ᠰᠤᠷ ᠢ᠋ ᠳᠡᠯ ᠳᠡᠭᠡᠷᠡ ᠪᠡᠨ ᠳᠦᠷᠡᠯᠵᠡᠭᠦᠯᠵᠦ ᠂ ᠬᠤᠢ ᠰᠠᠯᠬᠢᠨ ᠤ᠋ ᠬᠤᠷᠳᠤᠨ ᠢ᠋ ᠬᠣᠮᠪᠤᠨ ᠲᠤᠭᠤᠷᠠᠢ ᠳ᠋ᠠᠭᠠᠨ ᠱᠤᠤᠭᠢᠭᠤᠯᠤᠭᠠᠳ ᠲᠠᠯᠠ ᠶ᠋ᠢᠨ ᠬᠡᠦᠬᠡᠳ ᠦ᠋ᠨ ᠨᠣᠮ ᠤ᠋ᠨ ᠥᠷᠥᠭᠡ –– ᠲᠠᠨᠠᠨ ᠴᠠᠭᠠᠨ ᠥᠨᠳᠥᠷ ᠠᠰᠠᠷ ᠤ᠋ᠨ ᠡᠭᠦᠳᠡᠨ ᠡᠴᠡ ᠲᠠᠨᠢᠬᠤ ᠦᠭᠡᠢ ᠬᠣᠯᠠ ᠪᠡᠯᠴᠢᠭᠡᠷ –– ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠠᠭᠤᠳᠠᠮ ᠲᠠᠩᠨᠠᠢ ᠵᠦᠭ ᠬᠦᠢ ᠬᠠᠢ ᠦᠭᠡᠢ ᠬᠦᠨᠲᠡᠷᠬᠦ ᠪᠡᠷ ᠴᠤᠪᠬᠤᠴᠠᠵᠤ ᠪᠠᠢᠭᠠ ᠶ᠋ᠢ ᠦᠵᠡᠬᠦ ᠦᠭᠡᠢ ᠦᠦ ? ᠬᠥᠷᠥᠰᠥᠲᠦ ᠭᠠᠵᠠᠷ ᠳᠡᠭᠡᠷᠡ ᠡᠪᠦᠳᠦᠭ ᠰᠢᠷᠣᠢᠳᠠᠵᠤ ᠦᠵᠡᠭᠡ ᠦᠭᠡᠢ ᠬᠦᠴᠦᠲᠦ ᠪᠥᠬᠡ ᠰᠢᠭ ᠲᠠᠰᠢᠶᠠᠯᠳᠤᠵᠤ ᠰᠠᠭᠤᠭᠰᠠᠨ ᠡᠵᠡᠨ ᠦ᠌ ᠬᠢᠨᠢ ᠬᠦᠳᠡᠷ ᠰᠦᠷᠯᠢᠭ ᠳᠦᠷᠢ ᠶ᠋ᠢ ᠬᠠᠷᠠᠬᠤ ᠦᠭᠡᠢ ᠦᠦ? ᠠᠭᠠᠷ ᠥᠭᠡᠳᠡ ᠳᠡᠭᠦᠯᠢᠭᠰᠡᠨ ᠮᠣᠷᠢ ᠨᠢ ᠴᠠᠭ ᠦᠶᠡ ᠶ᠋ᠢᠨ ᠴᠣᠭ ᠵᠢᠪᠬᠤᠭᠠ ᠃ ᠠᠮᠠᠭᠠᠢ ᠳᠠᠷᠤᠵᠤ ᠰᠠᠭᠤᠭᠰᠠᠨ ᠡᠵᠡᠨ ᠨᠢ ᠵᠠᠯᠠᠭᠤᠴᠤᠳ ᠪᠢᠳᠡᠨ ᠦ᠌ ᠴᠣᠭ ᠵᠢᠪᠬᠤᠭᠠ ᠃
ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠴᠢᠨᠰᠠᠭᠠ ᠲᠠᠢ ᠮᠣᠷᠢ ᠭᠡᠭᠴᠢ ᠲᠡᠷᠡ ᠪᠣᠢ !
ᠶᠠᠮᠠᠷ ᠮᠤᠨᠳᠠᠭ ᠵᠣᠷᠢᠭ ᠲᠠᠢ ᠵᠠᠯᠠᠭᠤ ᠭᠡᠭᠴᠢ ᠡᠨᠡ ᠪᠣᠢ !
ᠮᠣᠷᠢ ᠨᠢ ᠦᠦᠷᠰᠡᠬᠦ ᠳᠠᠭᠤ ᠪᠠᠨ ᠣᠳᠣᠨ ᠳᠡᠭᠡᠷᠡ ᠴᠤᠤᠷᠢᠶᠠᠲᠤᠭᠤᠯᠬᠤ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌᠂ ᠡᠵᠡᠨ ᠨᠢ ᠡᠷᠭᠦᠭᠰᠡᠨ ᠨᠡᠷᠡ ᠪᠡᠨ ᠰᠠᠷᠠᠨ ᠳᠡᠭᠡᠷᠡ ᠲᠡᠮᠳᠡᠭᠯᠡᠶᠡ ᠭᠡᠵᠦ ᠰᠠᠨᠠᠬᠤ ᠦᠭᠡᠢ ᠭᠡᠵᠢ ᠦᠦ︖
ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠢᠨᠢ ᠬᠥᠨᠲᠡᠷ ᠠ᠋ ᠂ ᠬᠥᠨᠲᠡᠷ !
ᠪᠢᠨᠲᠠᠷᠢᠶᠠᠨ ᠣᠭᠲᠠᠷᠭᠤᠢ ᠥᠭᠡᠳᠡ ᠳᠡᠭᠦᠯᠢ ᠠ᠋ ᠂ ᠳᠡᠭᠦᠯᠢ !
ᠲᠥᠷᠥᠭᠰᠡᠨ ᠴᠠᠭ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳ᠋ᠤ᠌ ᠰᠠᠭᠤᠵᠤ ᠲᠠᠯᠠ ᠶ᠋ᠢᠨ ᠠᠭᠤᠳᠠᠮ ᠢ᠋ ᠬᠡᠮᠵᠢᠵᠦ ᠶᠠᠪᠤᠭᠰᠠᠨ ᠮᠣᠩᠭᠣᠯᠴᠤᠳ᠂ ᠠᠭᠲᠠ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠠᠲᠠᠷ ᠢ᠋ ᠲᠠᠢᠪᠠᠯᠵᠠᠭᠤᠯᠵᠤ ᠳᠠᠪᠬᠢᠭᠰᠠᠨ ᠮᠥᠷ ᠳᠠᠭᠠᠤ ᠂ ᠠᠪᠤ ᠶ᠋ᠢᠨ ᠬᠦᠦ ᠶ᠋ᠢᠨ ᠠᠯᠳᠠᠷ ᠨᠡᠷᠡ ᠪᠡᠨ ᠠᠯᠢ ᠣᠯᠠᠨ ᠲᠠᠨᠢᠬᠤ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠦ᠌ ᠵᠢᠷᠦᠬᠡᠨ ᠳ᠋ᠦ᠍ ᠰᠡᠢᠯᠵᠦ ᠶᠠᠪᠤᠭᠰᠠᠨ ᠲᠡᠦᠬᠡ ᠲᠠᠢ ᠶᠤᠮ ᠃ ᠭᠡᠪᠡᠴᠦ ᠲᠡᠷᠡ ᠪᠣᠯ ᠬᠥᠷᠥᠰᠥᠨ ᠳᠣᠣᠷᠠ ᠨᠣᠢᠷᠰᠤᠭᠰᠠᠨ ᠬᠥᠭᠰᠢᠨ ᠪᠤᠭᠤᠷᠤᠯ ᠡᠪᠦᠭᠡᠳ ᠦ᠋ᠨ ᠮᠢᠨᠢ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠳᠤᠷᠠᠰᠬᠠᠯ ᠪᠣᠯᠭᠠᠭᠰᠠᠨ ᠦᠯᠢᠭᠡᠷ ᠳ᠋ᠩ ᠁
ᠪᠢᠳᠡᠨ ᠦ᠌ ᠨᠠᠷᠠ ᠮᠠᠨᠳᠤᠵᠤ ᠪᠠᠢᠨᠠ ᠂ ᠪᠢᠳᠡᠨ ᠦ᠌ ᠴᠠᠭ ᠦᠶᠡ ᠡᠬᠢᠯᠡᠵᠦ ᠪᠠᠢᠨᠠ ᠃ ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠢᠨᠢ ᠂ ᠪᠢᠳᠡᠨ ᠦ᠌ ᠬᠦᠯᠦᠭ ᠮᠢᠨᠢ ! ᠡᠪᠡᠰᠦᠲᠦ ᠲᠠᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠡᠴᠡ ᠪᠡᠨ ᠣᠳᠣᠲᠤ ᠲᠡᠭᠷᠢ ᠶ᠋ᠢᠨ ᠪᠡᠯᠴᠢᠭᠡᠷ ᠥᠭᠡᠳᠡ ᠳᠡᠭᠦᠯᠢᠵᠦ᠂ ᠠᠲᠠᠷ ᠤ᠋ᠨ ᠠᠯᠠᠭ ᠪᠤᠯᠠᠭ ᠠᠳᠤᠭᠤᠨ ᠰᠦᠷᠦᠭ ᠡᠴᠡ ᠪᠡᠨ ᠠᠭᠠᠷ ᠤ᠋ᠨ ᠠᠨᠳᠠᠭᠤᠷᠠᠮᠠ ᠨᠢᠭᠡ ᠯᠡ ᠵᠢᠰᠦᠮ ᠦ᠋ᠨ《ᠰᠠᠷᠠᠯ ᠮᠣᠷᠢᠳ 》 ᠲᠠᠢ ᠰᠦᠷᠦᠭ ᠨᠡᠢᠯᠡᠬᠦ ᠪᠡᠷ ᠦᠦᠷᠰᠡᠵᠦ ᠪᠠᠶ᠋ᠢᠨᠠ᠂ ᠬᠦᠨᠲᠡᠷᠴᠦ ᠪᠠᠢᠨᠠ ᠃ ᠳᠡᠭᠡᠷᠡ ᠨᠢ ᠴᠢᠪ ᠪᠠᠭᠤᠲᠠᠯᠠ ᠰᠠᠭᠤᠭᠰᠠᠨ ᠮᠣᠩᠭᠣᠯ ᠵᠠᠯᠠᠭᠤ ᠂ ᠳᠡᠪᠲᠡᠷ ᠢ᠋ᠶ᠋ᠡᠷ ᠳᠤᠷᠠᠨ ᠪᠣᠯᠭᠠᠵᠤ ᠳᠡᠭᠡᠭᠰᠢᠯᠡᠬᠦ ᠪᠡᠷ ᠬᠠᠷᠠᠯᠲᠠ ᠪᠣᠯᠭᠠᠭᠠᠳ᠂ ᠬᠥᠪᠡᠭᠡ ᠬᠢᠵᠠᠭᠠᠷ ᠦᠭᠡᠢ ᠠᠭᠤᠳᠠᠮ ᠶᠡᠬᠡ ᠪᠡᠷ ᠢ᠋ᠶ᠋ᠡᠨ ᠠᠳᠠᠯᠢ᠂ ᠬᠥᠪ ᠬᠥᠬᠡ ᠰᠠᠢᠬᠠᠨ ᠥᠩᠭᠡ ᠪᠡᠷ ᠢ᠋ᠶ᠋ᠡᠨ ᠢᠵᠢᠯ ᠂ ᠪᠠᠰᠠ ᠨᠢᠭᠡ ᠲᠠᠯᠠ ᠨᠤᠲᠤᠭ –– ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠲᠣᠷᠯᠠᠵᠤ ᠣᠴᠢᠬᠤ ᠪᠠᠷ ᠵᠣᠷᠢᠵᠤ ᠪᠠᠶ᠋ᠢᠨᠠ᠂ ᠥᠨᠳᠡᠢᠵᠦ ᠪᠠᠶ᠋ᠢᠨᠠ ᠃
ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠴᠢᠨᠰᠠᠭᠠ ᠲᠠᠢ ᠮᠣᠷᠢ ᠭᠡᠭᠴᠢ ᠡᠨᠡ ᠪᠣᠢ !
ᠶᠠᠮᠠᠷ ᠮᠤᠨᠳᠠᠭ ᠵᠣᠷᠢᠭ ᠲᠠᠢ ᠵᠠᠯᠠᠭᠤ ᠭᠡᠭᠴᠢ ᠲᠡᠷᠡ ᠪᠣᠢ !
ᠠᠲᠠᠷ ᠲᠠᠯᠠ ᠶ᠋ᠢᠨ ᠰᠠᠷᠠᠯ ᠮᠣᠷᠢᠳ ᠤ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠢᠴᠢᠭᠳᠡᠭᠰᠡᠨ ᠠᠩᠬᠠᠨ ᠤ᠋ ᠭᠠᠶ᠋ᠢᠬᠠᠯᠲᠠᠢ ᠦᠯᠢᠭᠡᠷ ᠂ ᠠᠭᠠᠷ ᠲᠡᠭᠷᠢ ᠶ᠋ᠢᠨ 《ᠰᠠᠷᠠᠯ ᠮᠣᠷᠢᠳ 》 ᠤ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠯᠠᠪᠲᠠᠢ ᠵᠠᠯᠭᠠᠵᠤ ᠪᠢᠴᠢᠭᠳᠡᠨᠡ ! ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠮᠢᠨᠢ ᠠᠯᠳᠠᠷ ᠬᠥᠷᠥᠰᠥᠲᠦ ᠭᠠᠵᠠᠷ ᠢ᠋ ᠳᠣᠷᠭᠢᠭᠤᠯᠵᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠪᠣᠯ ᠂ ᠦᠷᠡᠰ ᠨᠢ ᠪᠢᠳᠡᠨ ᠦ᠌ ᠠᠯᠳᠠᠷ ᠬᠥᠬᠡ ᠲᠡᠭᠷᠢ ᠶ᠋ᠢ ᠳᠣᠷᠭᠢᠭᠤᠯᠵᠤ ᠂ ᠡᠦᠲᠦᠮ ᠨᠢᠭᠡᠲᠡᠨ ᠦ᠌ ᠢᠷᠠᠭᠤ ᠰᠠᠢᠬᠠᠨ ᠨᠡᠷᠡ ᠮᠠᠨᠢ ᠂ ᠭᠠᠵᠠᠷ ᠲᠡᠭᠷᠢ ᠶ᠋ᠢ ᠬᠣᠯᠪᠣᠨ ᠬᠠᠷᠢᠯᠴᠠᠨ ᠴᠤᠤᠷᠢᠶᠠ ᠠᠪᠤᠯᠴᠠᠬᠤ ᠡᠳᠦᠷ ᠬᠣᠯᠠ ᠦᠭᠡᠢ ᠪᠣᠯᠵᠠᠢ ! ᠬᠤᠷᠤᠭᠤ ᠳᠠᠷᠤᠭᠠᠳ ᠲᠣᠭᠠᠯᠠᠬᠤ ᠯᠠ ᠲᠡᠳᠦᠢ ᠪᠣᠯᠵᠠᠢ ! ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠢᠨᠢ ᠂ ᠪᠢᠳᠡᠨ ᠦ᠌ ᠬᠦᠯᠦᠭ ᠮᠠᠨᠢ ! ᠰᠤᠷ ᠵᠢᠯᠣᠭᠣ ᠶ᠋ᠢ ᠴᠢᠨᠢ ᠨᠣᠮ ᠢ᠋ᠶ᠋ᠠᠷ ᠪᠢᠳᠡ ᠰᠣᠯᠢᠵᠤ ᠪᠠᠶ᠋ᠢᠨᠠ ᠂ ᠰᠤᠮᠤᠳᠠᠬᠤ ᠲᠤᠭᠤᠷᠠᠢ ᠶ᠋ᠢ ᠴᠢᠨᠢ ᠮᠣᠲ᠋ᠣᠷ ᠢ᠋ᠶ᠋ᠠᠷ ᠪᠢᠳᠡ ᠣᠷᠣᠯᠠᠵᠤ ᠪᠠᠶ᠋ᠢᠨᠠ ᠂ ᠰᠤᠯᠠᠷᠠᠰᠢ ᠦᠭᠡᠢ ᠳᠠᠭᠠᠭᠠᠮᠠᠭᠠᠢ ᠴᠢᠳᠠᠯ ᠢ᠋ ᠴᠢᠨᠢ ᠮᠠᠰᠢᠨ ᠢ᠋ᠶ᠋ᠠᠷ ᠪᠢᠳᠡ ᠬᠥᠪᠴᠢᠯᠡᠵᠦ ᠪᠠᠢᠨᠠ ᠃
ᠪᠢᠯᠢᠭ ᠦ᠋ᠨ ᠰᠠᠷᠠᠯ ᠮᠢᠨᠢ ᠬᠥᠨᠲᠡᠷ ᠠ᠋ ᠂ ᠬᠥᠨᠲᠡᠷ !
ᠪᠢᠲᠠᠷᠢᠶᠠᠨ ᠣᠭᠲᠠᠷᠭᠤᠢ ᠥᠭᠡᠳᠡ ᠳᠡᠭᠦᠯᠢ ᠠ᠋ ᠂ ᠳᠡᠭᠦᠯᠢ !