ᠭᠤᠷᠪᠠᠨ ᠰᠠᠬᠢᠭᠤᠰᠤ - ᠬᠡᠦᠬᠡᠳ ᠦᠨ ᠠᠮᠠᠨ ᠦᠯᠢᠭᠡᠷ Гурван сахиус -хүүхдийн аман үлгэр
493ᠭᠤᠷᠪᠠᠨ ᠰᠠᠬᠢᠭᠤᠰᠤ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠨᠢᠭᠡᠨ ᠵᠢᠭᠠᠯ ᠬᠦᠦ ᠬᠥᠭᠰᠢᠨ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠠᠭᠤᠯᠠ ᠶ᠋ᠢᠨ ᠨᠢᠭᠡᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠳᠠᠭ ᠪᠠᠶ᠋ᠢᠵᠠᠢ ᠯᠠ ᠳᠠ! ᠰᠦᠮᠡ ᠶ᠋ᠢᠨ ᠣᠶ᠋ᠢᠷᠠᠯᠴᠠᠭᠠᠬᠢ ᠣᠢ ᠬᠣᠰᠢ ᠮᠣᠳᠣ ᠶᠡᠬᠡᠲᠡᠢ ᠰᠠᠮᠤᠷ ᠨᠢ ᠪᠣᠯᠴᠢᠬᠠᠭᠠᠳ ᠮᠥᠴᠢᠷ ᠨᠢ ᠪᠣᠷᠭᠣᠴᠠᠢ ᠪᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠪᠠᠶ᠋ᠢᠯᠠ ᠭᠡᠨᠡ ᠰᠢᠦ! ᠲᠡᠷᠡ ᠡᠳᠦᠷ ᠵᠢᠭᠠᠯ ᠬᠥᠪᠡᠭᠦᠨ ᠪᠠᠭᠰᠢ ᠯᠠᠮᠠ ᠳ᠋ᠤ᠌ ᠪᠠᠨ ᠬᠠᠨᠳᠤᠵᠤ᠄ 《 ᠪᠠᠭᠰᠢ ᠠ᠋᠂ ᠪᠢ ᠣᠢ ᠤᠷᠤᠭᠤ ᠣᠷᠣᠵᠤ ᠰᠠᠮᠤᠷ ᠲᠡᠭᠦᠮᠡᠷ ᠪᠠᠶ᠋ᠢᠨᠠ 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠭᠰᠢ ᠨᠢ᠄ 《 ᠪᠣᠯᠬᠤ ᠦᠭᠡᠢ᠂ ᠪᠣᠯᠬᠤ ᠦᠭᠡᠢ᠂ ᠣᠢ ᠳ᠋ᠤ᠌ ᠮᠠᠩᠭᠤᠰ ᠪᠠᠶ᠋ᠢᠪᠠᠯ ᠶᠠᠭᠠᠬᠢᠬᠤ ᠶᠤᠮ ᠪᠣᠢ! 》 ᠭᠡᠳ ᠬᠣᠷᠢᠭᠯᠠᠵᠤ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ ᠭᠡᠨᠡ᠃ 《 ᠪᠠᠭᠰᠢ ᠠ᠋᠂ ᠰᠠᠮᠤᠷ ᠶᠣᠰᠣᠲᠠᠢ ᠰᠠᠢᠬᠠᠨ ᠪᠣᠯᠴᠢᠬᠠᠭᠰᠠᠨ ᠪᠠᠶ᠋ᠢᠨᠠ ᠭᠡᠨᠡ᠃ ᠲᠡᠭᠡᠭᠡᠳ ᠴᠦ᠍ ᠮᠠᠨ ᠤ᠋ ᠡᠨᠳᠡ ᠶᠠᠮᠠᠷ ᠮᠠᠩᠭᠤᠰ ᠪᠠᠶ᠋ᠢᠲᠠᠭ ᠦᠭᠡᠢ ᠯᠡ ᠭᠡᠳᠡᠭ ᠪᠢᠵᠡ ᠳᠡ! ᠨᠠᠮᠠ ᠶ᠋ᠢ ᠶᠠᠪᠤᠭᠤᠯᠴᠢᠬᠠ ᠯᠠ ᠳᠠ᠂ ᠪᠠᠭᠰᠢ ᠠ᠋ ! 》 ᠭᠡᠳ ᠱᠠᠪᠢ ᠨᠢ ᠪᠦᠷ ᠰᠠᠯᠬᠤ ᠶᠠᠩᠵᠤ ᠦᠭᠡᠢ ᠪᠣᠯᠬᠣᠷ ᠨᠢ ᠡᠪᠦᠭᠡᠨ ᠯᠠᠮᠠ ᠠᠷᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠵᠥᠪᠰᠢᠶᠡᠷᠡᠵᠦ᠄ 《 ᠵᠠ ᠵᠠ᠂ ᠶᠠᠭᠠᠬᠢᠶᠠ ᠭᠡᠬᠦᠪ᠂ ᠴᠢ ᠴᠦ᠍ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠳᠬᠦᠭᠡᠳ ᠰᠠᠯᠬᠤ ᠦᠭᠡᠢ ᠨᠢ ᠳᠡ᠂ ᠶᠠᠪᠤ ᠳᠠ᠂ ᠬᠠᠷᠢᠨ ᠴᠢ ᠣᠢ ᠶ᠋ᠢᠨ ᠭᠦᠨ ᠤᠷᠤᠭᠤ ᠪᠢᠲᠡᠭᠡᠢ ᠣᠷᠣᠭᠠᠷᠠᠢ! ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦᠪ ᠂ ᠱᠠᠪᠢ ᠮᠢᠨᠢ ᠡᠨᠡ ᠭᠤᠷᠪᠠᠨ ᠰᠠᠬᠢᠭᠤᠰᠤ ᠶ᠋ᠢ ᠠᠪᠤᠭᠠᠳ ᠶᠠᠪᠤ᠂ ᠴᠢᠮᠠ ᠳ᠋ᠤ᠌ ᠲᠤᠰᠠ ᠪᠣᠯᠵᠤ ᠮᠠᠭᠠᠳ ᠦᠭᠡᠢ 》 ᠭᠡᠵᠦ ᠪᠠᠭᠰᠢ ᠨᠢ ᠬᠡᠯᠡᠭᠡᠳ ᠲᠠᠷᠨᠢ ᠰᠢᠪᠰᠢᠵᠦ ᠰᠢᠩᠭᠡᠭᠡᠭᠰᠡᠨ ᠭᠤᠷᠪᠠᠨ ᠰᠠᠬᠢᠭᠤᠰᠤ ᠥᠭᠴᠦ ᠵᠢᠭᠠᠯᠬᠠᠨ ᠱᠠᠪᠢ ᠶ᠋ᠢ ᠪᠡᠨ ᠰᠠᠮᠤᠷ ᠲᠤ᠌ ᠶᠠᠪᠤᠭᠤᠯᠵᠠᠢ᠃
ᠨᠠᠯᠠᠭᠠᠷ ᠨᠠᠮᠤᠷ ᠤ᠋ᠨ ᠰᠢᠷᠭᠠᠯ ᠣᠢ ᠳ᠋ᠤ᠌ ᠮᠥᠩᠬᠡ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠶ᠋ᠢᠲᠠᠭ ᠬᠣᠰᠢ ᠮᠣᠳᠣᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠯᠦᠭᠯᠦᠶ᠋ᠢᠵᠦ ᠮᠥᠴᠢᠷ ᠭᠡᠰᠢᠭᠦᠳ ᠨᠢ ᠵᠥᠭᠡᠯᠡᠨ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠬᠤᠬᠤ ᠲᠡᠳᠦᠢ ᠳ᠋ᠦ᠍ ᠨᠢ ᠲᠣᠮᠣ ᠲᠣᠮᠣ ᠪᠣᠷᠭᠣᠴᠠᠢ ᠨᠤᠭᠤᠳ ᠫᠣᠳ ᠫᠣᠳ ᠬᠢᠭᠰᠡᠨ ᠴᠢᠮᠡᠭᠡ ᠭᠠᠷᠭᠠᠨ ᠤᠨᠠᠭᠠᠳ ᠯᠠ ᠬᠥᠯ ᠢ᠋ᠶ᠋ᠡᠷ ᠨᠢᠭᠡ ᠬᠥᠭᠯᠡᠷᠡᠵᠦ ᠪᠠᠶ᠋ᠢᠬᠤ ᠶᠤᠮ ᠭᠡᠨᠡ᠃ ᠪᠠᠶᠠᠷᠯᠠᠵᠤ ᠬᠥᠭᠡᠷᠦᠭᠰᠡᠨ ᠬᠥᠪᠡᠭᠦᠨ ᠰᠠᠮᠤᠷ ᠲᠡᠭᠦᠵᠦ ᠡᠬᠢᠯᠡᠯᠡ᠃ ᠰᠠᠮᠤᠷ ᠢ᠋ᠶ᠋ᠠᠨ ᠲᠡᠭᠦᠭᠰᠡᠭᠡᠷ ᠰᠡᠭᠦᠯ ᠳ᠋ᠦ᠍ ᠪᠡᠨ ᠪᠦᠷ ᠬᠠᠮᠤᠭ ᠤ᠋ᠨ ᠲᠣᠮᠣ ᠪᠣᠷᠭᠣᠴᠠᠢ ᠶ᠋ᠢ ᠨᠢ ᠰᠢᠯᠢᠵᠦ ᠬᠣᠷᠮᠣᠶ᠋ᠢᠯᠠᠭᠰᠠᠭᠠᠷ ᠨᠢᠭᠡ ᠮᠠᠲᠠᠭᠰᠠᠨ ᠴᠢᠨᠢ ᠡᠪᠦᠭᠡᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠬᠢᠭᠰᠠᠨ ᠊ᠢ ᠮᠠᠷᠲᠠᠴᠢᠬᠠᠭᠠᠳ ᠣᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠬᠦᠷᠴᠢᠬᠡᠭᠰᠡᠨ ᠪᠠᠶ᠋ᠢᠯᠠ ᠃ ᠲᠡᠭᠡᠲᠡᠯᠡ ᠶᠠᠭ ᠬᠠᠵᠠᠭᠤ ᠳ᠋ᠤ᠌ ᠨᠢ᠄ 《 ᠯᠠᠮᠠ ᠭᠤᠸᠠᠢ! 》 ᠭᠡᠬᠦ ᠳᠠᠭᠤ ᠭᠠᠷᠬᠤ ᠳ᠋ᠤ᠌ ᠨᠢ ᠬᠥᠪᠡᠭᠦᠨ ᠰᠣᠴᠢᠨ ᠠᠩᠬᠠᠷᠪᠠᠯ ᠰᠠᠢᠬᠠᠨ ᠬᠤᠪᠴᠠᠰᠤᠯᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠬᠠᠨ ᠨᠢᠭᠡᠨ ᠡᠮᠡᠭᠡᠨ ᠵᠣᠭᠰᠣᠵᠤ ᠪᠠᠶ᠋ᠢᠬᠤ ᠶᠤᠮ ᠭᠡᠨᠡ᠃ 《 ᠵᠢᠭᠠᠯᠬᠠᠨ ᠯᠠᠮᠠ ᠭᠤᠸᠠᠢ᠂ ᠦᠭᠡᠢ ᠲᠠ ᠴᠢᠨᠢ ᠠᠭᠤᠯᠠ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠡᠪᠦᠭᠡᠨ ᠯᠠᠮᠠ ᠶ᠋ᠢᠨ ᠱᠠᠪᠢ ᠰᠢᠪ ᠳᠡ ! 》 《 ᠲᠡᠶ᠋ᠢᠮᠦ ᠠ᠋᠂ ᠲᠡᠶ᠋ᠢᠮᠦ ᠂ ᠪᠢ ᠰᠠᠮᠤᠷ ᠲᠡᠭᠦᠵᠦ ᠶᠠᠪᠤᠭᠠᠳ ᠨᠢᠭᠡ ᠮᠠᠲᠠᠭᠰᠠᠨ ᠡᠨᠳᠡ ᠢᠷᠡᠴᠢᠬᠡᠵᠡᠢ᠃ 》 《 ᠡᠪᠡᠢ! ᠡᠪᠡᠢ᠂ ᠵᠢᠭᠠᠯᠬᠠᠨ ᠯᠠᠮᠠ ᠮᠢᠨᠢ ᠲᠠ ᠴᠤ᠌ ᠶᠡᠬᠡ ᠬᠣᠯᠠ ᠶᠠᠪᠤᠴᠢᠬᠠᠭᠰᠠᠨ ᠶᠠᠳᠠᠷᠠᠭᠰᠠᠨ ᠪᠠᠶ᠋ᠢᠨᠠ ᠳᠠ ! ᠮᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠴᠠᠢ ᠤᠤᠭᠤᠵᠤ ᠠᠩᠭᠠᠭᠠ ᠪᠠᠨ ᠭᠠᠷᠭᠠ ᠳᠠ ! ᠡᠨᠡ ᠬᠠᠪᠢ ᠶ᠋ᠢᠨ ᠲᠣᠮᠣ ᠪᠣᠷᠭᠣᠴᠠᠢ ᠨᠤᠭᠤᠳ ᠊ᠢ ᠪᠢ ᠴᠤᠭᠯᠠᠭᠤᠯᠤᠭᠠᠳ ᠭᠡᠷ ᠲᠦ᠍ ᠪᠡᠨ ᠬᠤᠷᠢᠶᠠᠴᠢᠬᠠᠭᠰᠠᠨ ᠶᠤᠮ ᠯᠠ ᠳᠠ ! ᠪᠢ ᠴᠢᠮᠠ ᠳ᠋ᠤ᠌ ᠣᠴᠢᠬᠤ ᠶᠤᠮ ᠪᠣᠯ ᠰᠠᠮᠤᠷ ᠬᠠᠭᠤᠷᠴᠤ ᠥᠭᠭᠦᠨᠡ᠃ ᠬᠠᠭᠤᠷᠤᠭᠰᠠᠨ ᠰᠠᠮᠤᠷ ᠮᠥᠨ ᠴᠦ᠍ ᠠᠮᠲᠠᠲᠠᠢ ᠳᠠ! 》 ᠭᠡᠵᠦ ᠬᠡᠯᠡᠯᠡ ᠭᠡᠨᠡ ᠰᠢᠦ! ᠬᠣᠷᠣᠬᠠᠢ ᠨᠢ ᠬᠦᠷᠦᠭᠰᠡᠨ ᠵᠢᠭᠠᠯ ᠬᠦᠦ ᠰᠠᠢᠬᠠᠨ ᠠᠭᠠᠰᠢᠲᠠᠢ ᠡᠮᠡᠭᠡᠨ ᠊ᠢ ᠳᠠᠭᠠᠭᠠᠳ ᠭᠡᠷ ᠲᠦ᠍ ᠨᠢ ᠣᠴᠢᠯᠠ᠃ ᠡᠮᠡᠭᠡᠨ ᠴᠦ᠍ ᠬᠡᠯᠡᠭᠰᠡᠨ ᠳ᠋ᠦ᠍ ᠪᠡᠨ ᠬᠦᠷᠴᠦ᠂ ᠲᠣᠮᠣ ᠲᠣᠮᠣ ᠰᠠᠮᠤᠷ ᠬᠠᠭᠤᠷᠴᠤ ᠥᠭᠭᠦᠯᠡ ᠭᠡᠨᠡ᠃ ᠵᠢᠭᠠᠯ ᠬᠦᠦ ᠴᠦ᠍ ᠴᠣᠬᠣᠮ ᠯᠠ ᠳᠡᠭᠡᠳᠦ ᠤᠷᠤᠭᠤᠯ ᠳ᠋ᠤ᠌ ᠪᠠᠨ ᠬᠦᠷᠭᠡᠯ ᠦᠭᠡᠢ᠂ ᠳᠡᠷᠭᠡᠳᠡᠬᠢ ᠬᠥᠮᠦᠨ ᠳ᠋ᠦ᠍ ᠪᠡᠨ ᠠᠮᠰᠠᠭᠤᠯᠤᠯ ᠦᠭᠡᠢ᠂ ᠬᠠᠴᠢᠨ ᠰᠠᠢᠬᠠᠨ ᠠᠮᠲᠠᠲᠠᠢ ᠰᠠᠮᠤᠷ ᠊ᠢ ᠬᠠᠨᠲᠠᠯᠠ ᠪᠠᠨ ᠴᠠᠳᠲᠠᠯᠠ ᠪᠠᠨ ᠢᠳᠡᠵᠡᠢ ᠭᠡᠨᠡ᠃ ᠲᠡᠭᠡᠲᠡᠯᠡ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠨᠢᠯᠳᠤᠭᠠᠳ ᠢᠷᠡᠯᠡ᠃ 《 ᠵᠠ ᠬᠦᠦ ᠮᠢᠨᠢ᠂ ᠰᠠᠢᠬᠠᠨ ᠤᠨᠲᠠ ᠳᠠ ! 》 ᠭᠡᠬᠦ ᠡᠮᠡᠭᠡᠨ ᠦ᠌ ᠳᠠᠭᠤ ᠶ᠋ᠢ ᠳᠠᠮ ᠲᠣᠮ ᠰᠣᠨᠣᠰᠤᠭᠠᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠨᠲᠠᠴᠢᠬᠠᠵᠠᠢ᠃ ᠵᠢᠭᠠᠯ ᠬᠦᠦ ᠬᠡᠴᠢᠨᠡᠭᠡᠨ ᠤᠨᠲᠠᠭᠰᠠᠨ ᠢ᠋ᠶ᠋ᠠᠨ ᠴᠤ᠌ ᠮᠠᠲᠠᠭᠰᠠᠨ ᠦᠭᠡᠢ ᠨᠣᠶ᠋ᠢᠷ ᠤ᠋ᠨ ᠳᠤᠮᠳᠠ ᠨᠢ ᠪᠣᠷᠣᠭᠠ ᠣᠷᠣᠭᠠᠳ ᠴᠤ᠌ ᠪᠠᠶ᠋ᠢᠬᠤ ᠰᠢᠬ᠃ ᠠᠷᠠᠢ ᠭᠡᠵᠦ ᠰᠡᠷᠡᠭᠡᠳ ᠴᠢᠩᠨᠠᠪᠠᠯ ᠪᠣᠷᠣᠭᠠ ᠨᠠᠮᠳᠠᠴᠢᠬᠠᠭᠰᠠᠨ᠂ ᠪᠠᠷᠤᠭ ᠣᠶ᠋ᠢᠷᠠᠯᠴᠠᠭᠠ ᠨᠢ ᠳᠤᠰᠤᠭᠠᠯ ᠳᠤᠰᠤᠬᠤ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠵᠤ ᠪᠠᠶ᠋ᠢᠯᠠ᠃ 《 ᠲᠣᠷᠮᠣᠭᠣᠷ ᠨᠢᠳᠦ ᠪᠡᠨ ᠬᠤᠷᠳᠤᠬᠠᠨ ᠨᠡᠭᠡᠭᠡᠭᠡᠳ ᠨᠥᠭᠥᠭᠡ ᠡᠮᠡᠭᠡᠨ ᠢ᠋ᠶ᠋ᠡᠨ ᠰᠡᠮᠬᠡᠨ ᠬᠠᠷᠠ ᠳᠠ ! 》 ᠭᠡᠳ ᠪᠣᠷᠣᠭᠠᠨ ᠤ᠋ ᠳᠤᠰᠤᠯ ᠰᠢᠪᠡᠨᠡᠵᠦ ᠪᠠᠶ᠋ᠢᠨᠠ ᠭᠡᠨᠡ᠃ ᠡᠭᠦᠨ ᠊ᠢ ᠰᠣᠨᠣᠰᠤᠭᠠᠳ ᠬᠥᠪᠡᠭᠦᠨ ᠦ᠌ ᠨᠣᠶ᠋ᠢᠷ ᠨᠢ ᠪᠦᠷ ᠰᠡᠷᠭᠦᠵᠦ ᠡᠮᠡᠭᠡᠨ ᠦ᠌ ᠵᠦᠭ ᠰᠡᠮᠬᠡᠨ ᠬᠠᠷᠠᠪᠠᠯ ᠨᠥᠭᠥᠭᠡ ᠡᠮᠡᠭᠡᠨ ᠴᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠬᠣᠶᠠᠷ ᠲᠣᠮᠣ ᠡᠪᠡᠷ ᠰᠡᠷᠡᠶ᠋ᠢᠵᠦ ᠂ ᠴᠢᠬᠢ ᠪᠡᠨ ᠬᠦᠷᠦᠭᠰᠡᠨ ᠳᠠᠷᠪᠠᠭᠠᠷ ᠲᠣᠮᠣ ᠠᠮᠠᠨ ᠳ᠋ᠤ᠌ ᠨᠢ ᠠᠷᠠᠭᠠ ᠰᠢᠳᠦ ᠨᠢ ᠢᠷᠵᠠᠶ᠋ᠢᠵᠤ ᠬᠠᠪᠢᠷᠤᠯᠳᠤᠭᠠᠳ ᠯᠠ 《 ᠰᠠᠮᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠲᠠ ᠣᠷᠣᠭᠤᠯᠤᠭᠰᠠᠨ ᠵᠢᠭᠠᠬᠠᠨ ᠯᠠᠮᠠ ᠪᠠᠨ ᠣᠳᠣᠬᠠᠨ ᠢᠳᠡᠨᠡ ᠳᠡ 》 ᠭᠡᠳ ᠯᠡ ᠲᠥᠭᠡ ᠬᠢᠷᠢ ᠲᠡᠢ ᠤᠷᠲᠤ ᠤᠯᠠᠭᠠᠨ ᠬᠡᠯᠡ ᠪᠡᠨ ᠤᠨᠵᠢᠭᠤᠯᠤᠨ ᠰᠢᠯᠦᠰᠦ ᠪᠡᠨ ᠰᠠᠪᠢᠷᠠᠭᠤᠯᠵᠤ ᠰᠠᠭᠤᠨᠠ ᠭᠡᠨᠡ ᠰᠢᠦ! ᠵᠢᠭᠠᠯ ᠬᠦᠦ ᠦᠩᠬᠦᠯᠴᠡᠭ ᠢ᠋ᠶ᠋ᠡᠨ ᠬᠠᠭᠠᠷᠠᠲᠠᠯᠠ ᠠᠶᠤᠭᠰᠠᠨ ᠪᠣᠯᠪᠠᠴᠤ ᠶᠠᠭᠠᠬᠢᠵᠤ ᠡᠶ᠋ᠢᠭᠡᠳ ᠯᠡ ᠡᠨᠳᠡ ᠡᠴᠡ ᠳᠠᠷᠤᠶ᠋ᠢᠬᠠᠨ ᠵᠢᠭᠤᠲᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠪᠣᠳᠣᠯᠠ ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠡᠨ ᠠᠷᠭᠠ ᠣᠯᠵᠤ ᠶᠡᠬᠡ ᠯᠡ ᠲᠠᠶ᠋ᠢᠪᠤᠭᠤᠨ ᠢ᠋ᠶ᠋ᠠᠷ ᠄ 《 ᠡᠮᠡᠭᠡ ᠠ᠋ ! ᠪᠢ ᠬᠠᠯᠠᠭᠤᠴᠠᠭᠠᠳ ᠠᠭᠤᠷᠰᠢᠴᠢᠬᠠᠬᠤ ᠭᠡᠳ ᠪᠠᠶ᠋ᠢᠨᠠ 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢ ᠮᠠᠩᠭᠤᠰ ᠶᠡᠬᠡ ᠯᠡ ᠭᠠᠶ᠋ᠢᠬᠠᠭᠠᠳ 《 ᠶᠠᠭᠤ ᠭᠡᠨᠡ? ᠠᠭᠤᠷᠰᠢᠬᠤ ᠭᠡᠳᠡᠭ ᠴᠢᠨᠢ ᠠᠯᠠᠭᠠ ᠪᠣᠯᠤᠨᠠ ᠭᠡᠰᠡᠨ ᠦᠭᠡ ᠦᠦ ? ᠵᠠ ᠲᠡᠭᠡᠬᠦᠯᠡᠷ᠂ ᠬᠦᠦ ᠮᠢᠨᠢ ᠣᠳᠣ ᠶᠠᠭᠠᠬᠢᠳᠠᠭ ᠶᠤᠮ ᠪᠢᠯᠡ? 》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠢ ᠬᠦᠦ᠄ 《 ᠪᠢ ᠲᠦᠷᠭᠡᠬᠡᠨ ᠰᠡᠷᠢᠭᠦᠴᠡᠭᠡᠳ ᠢᠷᠡᠪᠡᠯ ᠵᠦᠭᠡᠷ ᠪᠣᠯᠤᠨᠠ ᠳᠠ 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠮᠠᠩᠭᠤᠰ᠄ 《 ᠵᠠ ᠲᠡᠭᠡᠪᠡᠯ ᠡᠨᠡ ᠡᠭᠦᠳᠡᠨ ᠳ᠋ᠦ᠍ ᠬᠤᠳᠳᠤᠭ ᠪᠠᠶ᠋ᠢᠭᠠ᠂ ᠬᠤᠳᠳᠤᠭ ᠤ᠋ᠨ ᠫᠦᠨᠵᠡᠨ ᠳᠣᠲᠣᠷᠠ ᠶᠡᠬᠡ ᠰᠡᠷᠢᠭᠦᠬᠡᠨ᠂ ᠴᠢ ᠲᠦᠷᠭᠡᠬᠡᠨ ᠲᠡᠨᠳᠡ ᠣᠷᠣᠭᠠᠳ ᠰᠡᠷᠢᠭᠦᠴᠡᠭᠡᠳ ᠭᠠᠷᠤᠭᠠᠳ ᠢᠷᠡ! ᠠ ᠬᠠᠷᠢᠨ ᠴᠢ ᠵᠢᠭᠤᠲᠠᠴᠢᠬᠠᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠶ᠋ᠢᠭᠠ ᠪᠣᠯ ᠰᠠᠨᠠᠭᠰᠠᠨ ᠤ᠋ ᠴᠢᠨᠢ ᠭᠠᠷᠤᠵᠠ ᠰᠢᠦ ᠳᠡ ! 》 ᠭᠡᠵᠦ ᠬᠡᠯᠡᠭᠡᠳ ᠬᠦᠦ ᠶ᠋ᠢᠨ ᠪᠡᠯᠬᠡᠭᠦᠰᠦ ᠪᠡᠷ ᠣᠯᠣᠰᠣ ᠪᠠᠷ ᠤᠶᠠᠭᠠᠳ ᠬᠦᠦ ᠶ᠋ᠢ ᠬᠤᠳᠳᠤᠭ ᠤ᠋ᠨ ᠢ᠋ᠶ᠋ᠠᠨ ᠫᠦᠨᠵᠡ ᠤᠷᠤᠭᠤ ᠣᠷᠣᠭᠤᠯᠤᠯᠠ᠃ ᠬᠦᠦ ᠬᠤᠳᠳᠤᠭ ᠲᠤ᠌ ᠣᠷᠣᠩᠭᠤᠲᠠ ᠤᠶᠠᠭᠠ ᠪᠠᠨ ᠲᠠᠶ᠋ᠢᠯᠵᠤ ᠣᠯᠣᠰᠣᠨ ᠤ᠋ ᠦᠵᠦᠭᠦᠷ ᠲᠦ᠍ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠭᠦᠭᠰᠡᠨ ᠰᠠᠬᠢᠭᠤᠰᠤ ᠶ᠋ᠢ ᠤᠶᠠᠵᠤ 《 ᠵᠠ ᠴᠢ ᠮᠢᠨᠦ ᠡᠮᠦᠨᠡ ᠡᠴᠡ ᠮᠠᠩᠭᠤᠰ ᠲᠤ᠌ ᠬᠠᠷᠢᠭᠤᠯᠤᠭᠠᠳ ᠪᠠᠶ᠋ᠢᠭᠠᠷᠠᠢ ! 》 ᠭᠡᠵᠦ ᠭᠤᠶᠤᠭᠠᠳ ᠰᠠᠬᠢᠭᠤᠰᠤ ᠪᠠᠨ ᠫᠦᠨᠵᠡᠨ ᠦ᠌ ᠮᠣᠳᠣᠨ ᠳ᠋ᠤ᠌ ᠬᠠᠪᠴᠢᠭᠤᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠰᠡᠮᠬᠡᠨ ᠭᠠᠷᠴᠤ ᠲᠡᠨᠳᠡ ᠡᠴᠡ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠵᠢᠭᠤᠲᠠᠯᠠ᠃ ᠮᠠᠩᠭᠤᠰ ᠬᠦᠦ ᠶ᠋ᠢ ᠨᠡᠯᠢᠶᠡᠳ ᠬᠦᠯᠢᠶᠡᠯᠡ᠃ ᠫᠦᠨᠵᠡᠨ ᠡᠴᠡ ᠶᠡᠷᠦ ᠴᠢᠮᠡᠭᠡ ᠭᠠᠷᠬᠤ ᠦᠭᠡᠢ ᠪᠠᠶ᠋ᠢᠬᠤ ᠪᠠᠷ ᠨᠢ ᠮᠠᠩᠭᠤᠰ ᠣᠯᠣᠰᠣᠨ ᠤ᠋ ᠪᠠᠨ ᠦᠵᠦᠭᠦᠷ ᠡᠴᠡ ᠲᠡᠳᠡᠨ ᠤᠭᠵᠠᠷᠠᠵᠤ 《 ᠬᠠᠢ! ᠮᠠᠭᠤ ᠵᠤᠯᠪᠤᠰᠬᠠ ᠴᠢ ᠶᠠᠭᠠᠬᠢᠭᠠᠳ ᠤᠳᠠᠭᠠᠳ ᠪᠠᠶ᠋ᠢᠨᠠ? 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠦᠦ ᠶ᠋ᠢᠨ ᠡᠮᠦᠨᠡ ᠡᠴᠡ ᠰᠠᠬᠢᠭᠤᠰᠤ ᠨᠢ 《 ᠬᠠᠲᠤᠭᠲᠠᠢ ᠲᠠ ᠲᠠᠶ᠋ᠢᠪᠤᠰᠢᠷᠠ! ᠪᠢ ᠣᠳᠣᠬᠠᠨ ᠰᠡᠷᠢᠭᠦᠴᠡᠴᠢᠬᠡᠭᠡᠳ ᠭᠠᠷᠤᠭᠠᠳ ᠣᠴᠢᠶᠠ! 》 ᠭᠡᠵᠦ ᠬᠠᠷᠢᠭᠤᠯᠤᠯᠠ᠃ ᠮᠠᠩᠭᠤᠰ ᠤᠴᠢᠷ ᠠᠯᠳᠠᠭᠠᠳ ᠤᠬᠤᠰᠬᠢᠨ ᠬᠠᠷᠠᠶ᠋ᠢᠵᠤ
ᠬᠤᠳᠳᠤᠭ ᠤᠷᠤᠭᠤ ᠣᠷᠣᠪᠠᠯ ᠬᠦᠦ ᠠᠯᠠᠭᠠ! ᠬᠠᠷᠢᠨ ᠣᠯᠣᠰᠣᠨ ᠤ᠋ ᠬᠢᠨᠢ ᠦᠵᠦᠭᠦᠷ ᠲᠦ᠍ ᠤᠶᠠᠭᠠᠲᠠᠢ ᠰᠠᠬᠢᠭᠤᠰᠤ᠄ 《 ᠬᠠᠲᠤᠭᠲᠠᠢ ᠲᠠ ᠲᠠᠶ᠋ᠢᠪᠤᠰᠢᠷᠠ! ᠪᠢ ᠪᠠᠶ᠋ᠢᠵᠤ ᠯᠠ ᠪᠠᠶ᠋ᠢᠨᠠ 》 ᠭᠡᠵᠦ ᠥᠭᠦᠯᠡᠭᠰᠡᠭᠡᠷ ᠪᠠᠶ᠋ᠢᠨᠠ ᠭᠡᠨᠡ᠃ 《 ᠠ᠂ ᠮᠠᠭᠤ ᠵᠤᠯᠪᠤᠰᠬᠠ ᠴᠢ ᠨᠠᠮᠠ ᠶ᠋ᠢ ᠢᠩᠭᠢᠵᠦ ᠮᠡᠬᠡᠯᠡᠳᠡᠭ ᠪᠠᠶ᠋ᠢᠨᠠ ᠰᠢᠦ! 》 ᠭᠡᠵᠦ ᠮᠠᠩᠭᠤᠰ ᠬᠠᠰᠬᠢᠷᠤᠭᠠᠳ ᠬᠦᠦ ᠶ᠋ᠢᠨ ᠬᠣᠶ᠋ᠢᠨᠠ ᠠ᠋ᠴᠠ ᠡᠯᠳᠡᠯᠡ᠃ ᠬᠥᠭᠡᠭᠡᠭᠰᠡᠭᠡᠷ ᠬᠥᠭᠡᠭᠡᠭᠰᠡᠭᠡᠷ ᠭᠦᠢᠴᠡᠵᠦ ᠣᠴᠢᠭᠠᠳ ᠤᠷᠲᠤ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠵᠢᠭᠠᠯ ᠬᠦᠦ ᠶ᠋ᠢᠨ ᠬᠦᠵᠦᠭᠦᠨ ᠳᠡᠭᠡᠷᠡ ᠡᠴᠡ ᠬᠠᠷᠢᠭᠤ ᠦᠭᠡᠢ ᠪᠠᠷᠢᠭᠠᠳ ᠠᠪᠳᠠᠭ ᠤ᠋ᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠦᠦ᠄ 《 ᠰᠠᠬᠢᠭᠤᠰᠤ ᠮᠢᠨᠢ! ᠮᠠᠩᠭᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠡᠯᠡᠰᠦᠨ ᠮᠠᠩᠬᠠᠨ ᠪᠣᠯᠤᠭᠠᠷᠠᠢ! 》 ᠭᠡᠵᠦ ᠬᠡᠯᠡᠭᠡᠳ ᠰᠠᠬᠢᠭᠤᠰᠤ ᠪᠠᠨ ᠰᠢᠳᠡᠬᠦ ᠳ᠋ᠦ᠍ ᠥᠨᠳᠥᠷ ᠡᠯᠡᠰᠦᠨ ᠮᠠᠩᠬᠠᠨ ᠪᠣᠯᠵᠤ ᠮᠠᠩᠭᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠨᠢ ᠰᠠᠳᠠᠭᠠ ᠪᠣᠯᠤᠯᠠ᠃ ᠮᠠᠩᠭᠤᠰ ᠡᠯᠡᠰᠦᠨ ᠮᠠᠩᠬᠠᠨ ᠤᠷᠤᠭᠤ ᠠᠪᠠᠷᠢᠵᠤ ᠪᠤᠴᠠᠵᠤ ᠡᠯᠡᠰᠦ ᠲᠡᠢ ᠪᠡᠨ ᠨᠤᠷᠠᠵᠤ ᠤᠨᠠᠭᠰᠠᠭᠠᠷ ᠪᠠᠶ᠋ᠢᠬᠤ ᠵᠠᠭᠤᠷᠠ ᠬᠦᠦ ᠨᠡᠯᠢᠶᠡᠳ ᠬᠣᠯᠠᠳᠠᠵᠤ ᠠᠮᠵᠢᠯᠠ᠃ ᠮᠠᠩᠭᠤᠰ ᠡᠯᠡᠰᠦᠨ ᠮᠠᠩᠬᠠᠨ ᠊ᠢ ᠭᠠᠷᠤᠭᠠᠳ ᠢᠷᠡᠬᠦ ᠶ᠋ᠢᠨ ᠲᠡᠪᠴᠢ ᠬᠦᠦ ᠶ᠋ᠢᠨ ᠬᠣᠶ᠋ᠢᠨᠠ ᠠ᠋ᠴᠠ ᠤᠯᠠᠮ ᠬᠤᠷᠳᠤᠯᠠᠨ ᠬᠥᠭᠡᠭᠡᠯᠡ᠃ ᠬᠥᠭᠡᠭᠡᠭᠰᠡᠭᠡᠷ ᠮᠥᠨ ᠳᠥᠭᠥᠭᠡᠳ ᠢᠷᠡᠬᠦ ᠳ᠋ᠦ᠍ ᠨᠢ ᠬᠦᠦ ᠦᠯᠡᠲᠡᠭᠰᠡᠨ ᠭᠠᠭᠴᠠ ᠰᠠᠬᠢᠭᠤᠰᠤ ᠪᠠᠨ ᠠᠪᠤᠭᠠᠳ᠄ 《 ᠰᠠᠬᠢᠭᠤᠰᠤ ᠮᠢᠨᠢ! ᠮᠠᠩᠭᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠶᠡᠬᠡ ᠤᠰᠤ ᠪᠣᠯᠵᠤ ᠰᠠᠭᠠᠳ ᠪᠣᠯᠤᠭᠠᠷᠠᠢ! 》 ᠭᠡᠵᠦ ᠬᠡᠯᠡᠭᠡᠳ ᠴᠢᠯᠠᠭᠤᠳᠠᠴᠢᠬᠠᠯᠠ ᠃ ᠲᠡᠷᠡ ᠨᠢ ᠬᠥᠯ ᠠᠯᠳᠠᠬᠤ ᠪᠠᠷ ᠶᠡᠬᠡ ᠤᠰᠤ ᠪᠣᠯᠵᠤ ᠮᠠᠩᠭᠤᠰ ᠲᠡᠷᠡ ᠶᠡᠬᠡ ᠤᠰᠤ ᠶ᠋ᠢ ᠭᠠᠲᠤᠯᠬᠤ ᠭᠡᠵᠦ ᠨᠡᠯᠢᠶᠡᠳ ᠶᠠᠳᠠᠵᠤ ᠪᠠᠶ᠋ᠢᠬᠤ ᠵᠠᠭᠤᠷᠠ ᠬᠦᠦ ᠰᠦᠮᠡ ᠳ᠋ᠦ᠍ ᠪᠡᠨ ᠢᠷᠡᠭᠡᠳ ᠪᠠᠭᠰᠢ ᠳ᠋ᠤ᠌ ᠪᠠᠨ ᠢᠩᠭᠢᠵᠦ ᠬᠡᠯᠡᠯᠡ᠃ 《 ᠪᠠᠭᠰᠢ ᠠ᠋! ᠪᠠᠭᠰᠢ ᠠ᠋! ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠷᠠᠭᠠᠷᠠᠢ! ᠮᠠᠩᠭᠤᠰ ᠠᠷᠤ ᠠ᠋ᠴᠠ ᠬᠥᠭᠡᠭᠡᠵᠦ ᠶᠠᠪᠤᠨᠠ! 》 ᠭᠡᠵᠦ ᠠᠮᠢᠰᠬᠤᠭᠠᠳᠠᠨ ᠬᠡᠯᠡᠯᠡ᠃ ᠪᠠᠭᠰᠢ ᠱᠠᠪᠢ ᠶ᠋ᠢ ᠪᠡᠨ ᠨᠢᠭᠤᠭᠠᠳ ᠪᠢᠩ ᠬᠠᠭᠠᠷᠢᠵᠤ ᠪᠠᠶ᠋ᠢᠬᠰᠠᠨ ᠵᠤᠤᠬᠠᠨ ᠳ᠋ᠤ᠌ ᠪᠠᠨ ᠭᠠᠯ ᠨᠡᠮᠡᠨ ᠰᠠᠭᠤᠲᠠᠯᠠ ᠠᠭᠠᠬᠢᠯᠠᠵᠤ ᠠᠮᠢᠰᠬᠤᠭᠠᠳᠠᠭᠰᠠᠨ ᠮᠠᠩᠭᠤᠰ ᠣᠷᠣᠵᠤ ᠢᠷᠡᠭᠡᠳ᠄ 《 ᠠ ᠬᠠ ᠱᠠᠪᠢ ᠴᠢᠨᠢ ᠬᠠᠮᠢᠭᠠ ᠪᠠᠶ᠋ᠢᠨᠠ? ᠨᠠᠮᠠ ᠶ᠋ᠢ ᠴᠢᠳᠠᠴᠢᠬᠠᠭᠠᠳ ᠵᠢᠭᠤᠲᠠᠴᠢᠬᠠᠳᠠᠭ ᠪᠠᠶ᠋ᠢᠨᠠ ᠰᠢᠦ! 》 ᠭᠡᠵᠦ ᠬᠠᠰᠬᠢᠷᠤᠯᠠ᠃ ᠯᠠᠮᠠᠳᠠᠨ ᠬᠠᠷᠢᠭᠤ ᠳ᠋ᠤ᠌ ᠨᠢ ᠰᠠᠢᠳᠠᠨ ᠣᠢ ᠳ᠋ᠤ᠌ ᠶᠠᠪᠤᠵᠤ ᠰᠠᠮᠤᠷ ᠲᠡᠭᠦᠶᠡ ᠭᠡᠳ ᠯᠡ ᠶᠠᠪᠤᠭᠰᠠᠨ ᠰᠢᠦ ᠳᠡ᠂ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠯᠡ ᠪᠠᠶ᠋ᠢᠨᠠ ᠃ 》 ᠭᠡᠳ ᠵᠢᠱ᠌ᠢᠮᠡ ᠴᠦ᠍ ᠦᠭᠡᠢ ᠪᠢᠩ ᠢ᠋ᠶ᠋ᠡᠨ ᠬᠠᠭᠠᠷᠢᠵᠤ ᠭᠠᠯ ᠢ᠋ᠶ᠋ᠠᠨ ᠨᠡᠮᠡᠭᠰᠡᠭᠡᠷ ᠰᠠᠭᠤᠯᠠ᠃ 《 ᠴᠢ ᠮᠠᠭᠤ ᠪᠢᠲᠡᠭᠡᠢ ᠬᠤᠳᠠᠯ ᠬᠡᠯᠡ᠂ ᠱᠠᠪᠢ ᠴᠢᠨᠢ ᠮᠢᠨᠦ ᠬᠠᠮᠤᠭ ᠰᠠᠮᠤᠷ ᠊ᠢ ᠢᠳᠡᠴᠢᠬᠡᠭᠡᠳ ᠨᠠᠮᠠ ᠶ᠋ᠢ ᠬᠠᠭᠤᠷᠤᠭᠠᠳ ᠵᠢᠭᠤᠲᠠᠴᠢᠬᠠᠭᠰᠠᠨ᠃ ᠭᠠᠶ᠋ᠢᠭᠤᠢ ᠴᠢᠮᠠ ᠶ᠋ᠢ ᠳᠡ! 》 ᠭᠡᠵᠦ ᠮᠠᠩᠭᠤᠰ ᠰᠠᠨᠠᠯ ᠲᠠᠢ ᠬᠠᠰᠬᠢᠷᠤᠭᠰᠠᠨ ᠢ᠋ᠶ᠋ᠠᠨ ᠡᠪᠦᠭᠡᠨ ᠯᠠᠮᠠ ᠶ᠋ᠢᠨ ᠬᠠᠭᠠᠷᠢᠵᠤ ᠪᠠᠶ᠋ᠢᠬᠰᠠᠨ ᠬᠠᠯᠠᠭᠤᠨ ᠪᠢᠩ ᠊ᠢ ᠬᠠᠷᠠᠭᠠᠳ ᠬᠣᠷᠣᠬᠠᠢ ᠨᠢ ᠬᠦᠷᠴᠦ ᠠᠷᠠᠭᠠᠨ ᠤ᠋ ᠬᠢᠨᠢ ᠰᠢᠯᠦᠰᠦ ᠠᠰᠬᠠᠷᠠᠯᠠ᠃ ᠲᠡᠭᠡᠭᠡᠳ ᠯᠠᠮᠠ ᠳ᠋ᠤ᠌ ᠬᠠᠨᠳᠤᠵᠤ᠄ 《 ᠵᠠ ᠴᠢ ᠨᠠᠭᠠᠳᠤ ᠪᠢᠩ ᠡᠴᠡ ᠪᠡᠨ ᠨᠠᠳᠠ ᠳ᠋ᠤ᠌ ᠥᠭ! 》 ᠭᠡᠵᠦ ᠱᠠᠭᠠᠷᠳᠠᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠯᠠᠮᠠ ᠬᠡᠰᠡᠭ ᠪᠢᠩ ᠠᠪᠤᠭᠠᠳ ᠦᠭᠲᠡᠯᠡ ᠮᠠᠩᠭᠤᠰ ᠠᠮᠲᠠ ᠶ᠋ᠢ ᠨᠢ ᠴᠦ᠍ ᠠᠪᠤᠯ ᠦᠭᠡᠢ ᠰᠢᠭᠤᠳ ᠵᠠᠯᠭᠢᠯᠠᠴᠢᠬᠠᠭᠠᠳ ᠪᠠᠰᠠ ᠳᠠᠬᠢᠭᠠᠳ ᠨᠡᠬᠡᠯᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠯᠠᠮᠠ ᠶᠡᠬᠡ ᠯᠡ ᠳᠠᠭᠠᠵᠢᠩ ᠲᠠᠢ ᠵᠤᠤᠮᠠᠯᠵᠠᠭᠰᠠᠨ ᠢ᠋ᠶ᠋ᠠᠨ᠄ 《 ᠲᠡᠭᠡ! ᠥᠭᠴᠦ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ! ᠬᠠᠷᠢᠨ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠠᠷᠢᠭᠤ ᠳ᠋ᠤ᠌ ᠨᠢ ᠨᠢᠭᠡ ᠵᠢᠭᠠᠬᠠᠨ ᠶᠠᠭᠤᠮᠠ ᠭᠤᠶᠤᠪᠠᠯ ᠪᠣᠯᠭᠠᠭᠰᠠᠨ ᠪᠣᠯᠪᠠ ᠤᠤ? 》 《 ᠵᠠ ᠶᠠᠭᠤ ᠭᠤᠶᠤᠬᠤ ᠭᠡᠵᠦ ᠪᠠᠶ᠋ᠢᠭᠠ ᠪᠣᠢ? ᠲᠦᠷᠭᠡᠨ ᠬᠡᠯᠡ ᠯᠠᠮᠠᠳᠠᠨ ᠮᠢᠨᠢ! 》 《 ᠬᠡ᠂ ᠶᠠᠯᠢᠬᠤ ᠦᠭᠡᠢ ᠶᠠᠭᠤᠮᠠ ᠯᠠ ᠳᠠ! ᠲᠠᠨ ᠊ᠢ ᠪᠡᠶᠡ ᠪᠡᠨ ᠶᠡᠬᠡ ᠲᠣᠮᠣ ᠪᠣᠯᠭᠠᠵᠤ ᠴᠢᠳᠠᠳᠠᠭ ᠂ ᠠ ᠪᠠᠰᠠ ᠥᠴᠦᠬᠡᠨ ᠵᠢᠭᠠᠬᠠᠨ ᠴᠤ᠌ ᠪᠣᠯᠵᠤ ᠴᠢᠳᠠᠳᠠᠭ ᠭᠡᠯᠴᠡᠬᠦ ᠶᠦ᠍ᠮ ᠪᠢᠯᠡ᠃ ᠲᠠ ᠲᠡᠷᠡ ᠷᠢᠳᠢ ᠰᠢᠳᠢ ᠪᠡᠨ ᠨᠠᠳᠠ ᠳ᠋ᠤ᠌ ᠦᠵᠡᠭᠦᠯᠬᠦ ᠶᠦ᠍ᠮ ᠪᠣᠯ ᠪᠢ ᠪᠦᠬᠦ ᠪᠢᠩ ᠢ᠋ᠶ᠋ᠡᠨ ᠲᠠᠨ ᠳ᠋ᠤ᠌ ᠥᠭᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠶ᠋ᠢᠨᠠ ᠯᠠ ᠳᠠ! 》 ᠭᠡᠵᠦ ᠯᠠᠮᠠ ᠶ᠋ᠢ ᠳᠥᠩᠭᠡᠵᠢ ᠬᠡᠯᠡᠲᠡᠯᠡ ᠪᠢᠩ ᠳ᠋ᠦ᠍ ᠬᠣᠷᠣᠬᠠᠶ᠋ᠢᠲᠤᠭᠰᠠᠨ ᠮᠠᠩᠭᠤᠰ ᠶᠡᠬᠡ ᠯᠡ ᠶᠠᠭᠠᠷᠠᠨ 《 ᠵᠠ᠂ ᠲᠡᠷᠡ ᠪᠣᠯᠣᠯᠭᠦᠢ ᠳᠡ! ᠴᠢᠨᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠢ ᠬᠤᠪᠢᠷᠠᠵᠤ ᠴᠢᠳᠠᠨᠠ ᠠ᠋᠂ ᠴᠢᠳᠠᠨᠠ! 》 ᠭᠡᠵᠦ ᠠᠮᠠ ᠠᠯᠳᠠᠵᠠᠢ ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠡᠪᠦᠭᠡᠨ ᠯᠠᠮᠠ᠄ 《 ᠵᠠ ᠬᠦ᠌ ᠂ ᠲᠡᠭᠡᠪᠡᠯ ᠲᠠᠨ ᠊ᠢ ᠬᠢᠷᠢ ᠲᠣᠮᠣ ᠪᠣᠯᠳᠠᠭ ᠊ᠢ ᠣᠳᠣ ᠦᠵᠡᠶᠡ ᠯᠡ ᠳᠡ! 》 ᠭᠡᠵᠦ ᠬᠡᠯᠡᠭᠡᠳ 《 ᠥᠨᠳᠥᠷ ᠪᠣᠯᠤᠭᠠᠷᠠᠢ! ᠥᠨᠳᠥᠷ ᠪᠣᠯᠤᠭᠠᠷᠠᠢ! ᠠ᠋ ᠬᠡ᠂ ᠥᠰᠢ! ᠤᠯᠠᠮ ᠥᠨᠳᠥᠷ ᠪᠣᠯᠤᠭᠠᠷᠠᠢ! 》 ᠭᠡᠳ ᠯᠡ ᠳᠠᠭᠤᠯᠠᠵᠤ ᠠᠯᠠᠭᠠ ᠪᠠᠨ ᠲᠠᠰᠢᠭᠠᠳ ᠪᠠᠶ᠋ᠢᠵᠠᠢ ᠭᠡᠨᠡ᠃ ᠮᠠᠩᠭᠤᠰ ᠲᠡᠷᠡ ᠳᠣᠣᠷᠠ ᠪᠠᠨ ᠲᠣᠮᠣᠷᠠᠨ ᠲᠣᠮᠣᠷᠠᠭᠰᠠᠭᠠᠷ ᠲᠣᠯᠣᠭᠠᠢ ᠨᠢ ᠲᠠᠭᠠᠵᠠᠨ ᠳ᠋ᠤ᠌ ᠲᠤᠯᠵᠤ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠬᠦᠵᠦᠭᠦᠦ ᠴᠡᠭᠡᠵᠢ ᠨᠢ ᠡᠪᠬᠡᠷᠡᠨ ᠨᠤᠭᠤᠷᠠᠵᠤ ᠳᠣᠭᠣᠭᠰᠢᠯᠠᠭᠰᠠᠭᠠᠷ ᠡᠷᠡᠦ ᠪᠡᠷ ᠢ᠋ᠶ᠋ᠡᠨ ᠱᠠᠯᠠᠨ ᠳ᠋ᠤ᠌ ᠬᠦᠷᠴᠦ ᠰᠤᠨᠤᠭᠠᠳ ᠯᠠ ᠤᠯᠠᠮ ᠲᠣᠮᠣᠷᠠᠭᠠᠳ ᠪᠠᠶ᠋ᠢᠵᠠᠢ ᠭᠡᠨᠡ᠃ ᠲᠡᠭᠡᠬᠦᠯᠡᠷ ᠡᠪᠦᠭᠡᠨ ᠯᠠᠮᠠ᠄ 《 ᠵᠠ ᠣᠳᠣ ᠪᠠᠭᠠᠰᠤᠭᠠᠷᠠᠢ! ᠮᠠᠩᠭᠤᠰ ᠮᠢᠨᠢ ᠪᠠᠭᠠᠰᠤᠭᠠᠷᠠᠢ! ᠤᠬᠠᠶ᠋ᠢᠰ ᠳᠠ ! ᠣᠳᠣ ᠵᠢᠵᠢᠭᠬᠡᠨ ᠪᠡᠶᠡ ᠲᠡᠢ ᠪᠣᠯᠤᠭᠠᠷᠠᠢ! ᠠ᠋ ᠬᠡᠩ — 》 ᠭᠡᠳ ᠯᠡ ᠠᠯᠠᠭᠠ ᠪᠠᠨ ᠲᠡᠰᠢᠵᠦ ᠭᠠᠷᠴᠠᠢ᠃ ᠮᠠᠩᠭᠤᠰ ᠤ᠋ᠨ ᠠᠪᠤᠷᠭᠤ ᠲᠣᠮᠣ ᠪᠡᠶᠡ ᠲᠡᠷᠡ ᠳᠣᠣᠷᠠ ᠪᠠᠨ ᠵᠢᠵᠢᠭᠷᠡᠵᠦ ᠤᠯᠠᠮ ᠪᠦᠷ ᠪᠠᠭᠠᠰᠤᠭᠰᠠᠭᠠᠷ ᠱᠣᠰᠢ ᠶ᠋ᠢᠨ ᠬᠠᠲᠠᠭᠰᠠᠨ ᠦᠷᠡ ᠰᠢᠭ ᠥᠴᠦᠬᠡᠨ ᠵᠢᠭᠠᠬᠠᠨ ᠪᠣᠯᠵᠠᠢ ᠭᠡᠨᠡ᠃ ᠲᠡᠭᠡᠬᠦᠯᠡᠷ ᠨᠢ ᠡᠪᠦᠭᠡᠨ ᠯᠠᠮᠠ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠵᠠᠭᠤᠷᠠ ᠰᠢᠭᠦᠷᠡᠵᠦ ᠠᠪᠤᠭᠠᠳ ᠵᠤᠤᠬᠠᠨ ᠳ᠋ᠠᠬᠢ ᠭᠠᠯ ᠳᠣᠲᠣᠷᠠ ᠪᠠᠨ ᠬᠠᠶᠠᠲᠠᠯᠠ ᠮᠠᠩᠭᠤᠰ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠵᠣᠷᠭᠣᠳᠠᠰᠤ ᠰᠢᠬ ᠰᠢᠲᠠᠵᠤ ᠦᠭᠡᠢ ᠪᠣᠯᠵᠠᠢ ᠭᠡᠨᠡ᠃ ᠠᠶᠤᠯᠲᠤ ᠮᠠᠩᠭᠤᠰ ᠊ᠢ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ ᠤᠰᠠᠳᠬᠠᠭᠰᠠᠨ ᠡᠪᠦᠭᠡᠨ ᠯᠠᠮᠠ ᠱᠠᠪᠢ ᠪᠠᠨ ᠨᠢᠭᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠭᠠᠷᠭᠠᠵᠤ ᠢᠷᠡᠯᠡ᠃ ᠵᠢᠭᠠᠯᠬᠠᠨ ᠱᠠᠪᠢ ᠨᠢ ᠪᠠᠭᠰᠢ ᠳ᠋ᠤ᠌ ᠪᠠᠨ ᠲᠠᠯᠠᠷᠬᠠᠵᠤ ᠦᠭᠡᠨ ᠳ᠋ᠦ᠍ ᠨᠢ ᠣᠷᠤᠯ ᠦᠭᠡᠢ ᠲᠥᠬᠥᠭᠡ ᠦᠭᠡᠶ᠋ᠢᠲᠡᠭᠰᠡᠨ ᠳ᠋ᠦ᠍ ᠪᠡᠨ ᠭᠡᠮᠰᠢᠵᠦ 《 ᠳᠠᠬᠢᠵᠤ ᠡᠶ᠋ᠢᠮᠦ ᠶᠠᠪᠤᠳᠠᠯ ᠬᠡᠵᠢᠶᠡ ᠴᠦ᠍ ᠭᠠᠷᠭᠠᠬᠤ ᠦᠭᠡᠢ 》 ᠭᠡᠵᠦ ᠠᠮᠠᠯᠠᠵᠠᠢ ᠭᠡᠨᠡ᠃
ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠶ᠋ᠢᠰᠢ ᠵᠢᠭᠠᠯ ᠬᠦᠦ ᠡᠪᠦᠭᠡᠨ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠡᠷᠳᠡᠮ ᠨᠣᠮ ᠳ᠋ᠤ᠌ ᠪᠠᠨ ᠰᠢᠮᠳᠠᠵᠤ ᠠᠮᠤᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠵᠢᠷᠭᠠᠵᠠᠢ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ᠮᠥᠴᠢᠷ᠂ ᠰᠡᠷᠭᠦᠯᠡᠩ᠂ ᠭᠠᠷᠮᠠ