ᠬᠠᠷᠢᠶᠠᠴᠠᠢ ᠢᠷᠡᠯᠡ - ᠴᠡᠩᠬᠡᠯᠲᠦ Хараацай ирлээ - Цэнхэлт
278ᠬᠠᠷᠢᠶᠠᠴᠠᠢ ᠢᠷᠡᠯᠡ
1
ᠬᠠᠪᠤᠷ ᠤ᠋ᠨ ᠰᠠᠯᠬᠢ ᠰᠡᠷ ᠰᠡᠷ ᠦᠯᠢᠶᠡᠵᠦ ᠂ ᠬᠠᠭᠳᠠᠨ ᠤ᠋ ᠥᠪᠡᠷ ᠮᠡᠷ ᠮᠡᠷ ᠠᠩᠬᠢᠯᠵᠤ ᠂ ᠬᠠᠢᠯ ᠤ᠋ᠨ ᠤᠰᠤ ᠭᠣᠷ ᠭᠣᠷ ᠤᠷᠤᠰᠴᠤ ᠂ ᠬᠠᠰᠢᠶᠠᠨ ᠤ᠋ ᠨᠣᠮᠣᠨ ᠣᠪᠣᠰ ᠣᠪᠣᠰ ᠬᠥᠳᠡᠯᠦᠯᠡ ᠃ ᠰᠠᠨᠰᠠᠷ ᠣᠭᠲᠠᠷᠭᠤᠢ ᠶ᠋ᠢᠨ ᠡᠮᠦᠨᠡ ᠡᠲᠡᠭᠡᠳ ᠡᠴᠡ ᠰᠠᠷᠭᠠᠢ ᠯᠠᠪᠰᠠ ᠬᠠᠶᠠᠯᠠᠨ ᠪᠥᠵᠢᠭᠯᠡᠭᠰᠡᠭᠡᠷ ᠂ ᠰᠠᠷᠠᠪᠴᠢᠨ ᠤ᠋ ᠡᠮᠦᠨᠡᠭᠦᠷ ᠬᠠᠯᠢᠨ ᠳᠠᠪᠠᠵᠤ ᠭᠠᠷᠬᠤ ᠳ᠋ᠤ᠌ ᠂ ᠰᠠᠵᠢᠯᠠᠰᠬᠢᠭᠰᠠᠨ ᠰᠡᠭᠦᠳᠡᠷ ᠨᠢ ᠵᠢᠷᠪᠢᠰ ᠪᠠᠭᠤᠯᠠ ᠃
–– ᠬᠠᠷᠢᠶᠠᠴᠠᠢ ᠢᠷᠡᠯᠡ ᠂ ᠬᠠᠷᠢᠶᠠᠵᠠᠢ ᠢᠷᠡᠯᠡ ᠂ ᠭᠡᠰᠡᠨ ᠲᠤᠭᠤᠯ ᠬᠠᠰᠢᠭᠠ ᠬᠡᠦᠬᠡᠳ ᠦ᠋ᠨ ᠳᠠᠭᠤ ᠴᠠᠩᠭᠢᠨᠠᠵᠤ ᠂ ᠲᠤᠯᠤᠮ ᠲᠣᠪᠬᠢᠭᠠ ᠡᠵᠢ ᠶ᠋ᠢᠨ ᠮᠠᠩᠨᠠᠢ ᠴᠤ᠌ ᠳᠠᠨᠠᠢᠰᠬᠢᠯᠡ ᠃
2
ᠬᠠᠳᠠᠨ ᠠ᠋ᠴᠠ ᠪᠠᠭᠤᠭᠰᠠᠨ ᠭᠣᠷᠣᠬᠠ ᠶ᠋ᠢᠨ ᠳᠡᠭᠡᠭᠦᠷ ᠂ ᠬᠣᠯᠠ ᠶ᠋ᠢ ᠵᠣᠷᠢᠭᠰᠠᠨ ᠭᠣᠣᠯ ᠤ᠋ᠨ ᠳᠡᠨᠵᠢᠨ ᠳ᠋ᠦ᠍ ᠂ ᠵᠢᠷᠪᠢᠯᠵᠡᠨ ᠦᠶᠡᠲᠦᠭᠰᠡᠨ ᠵᠡᠷᠭᠡᠯᠭᠡᠨ ᠦ᠌ ᠳᠤᠮᠳᠠᠭᠤᠷ ᠂ ᠵᠡᠭᠡᠷᠭᠡᠨᠡ ᠨᠠᠢᠭᠤᠭᠰᠠᠨ ᠲᠠᠯᠠ ᠶ᠋ᠢᠨ ᠥᠷᠥᠴᠡᠨ ᠳ᠋ᠦ᠍ ᠂ ᠬᠠᠢᠷᠠᠲᠤ ᠨᠤᠲᠤᠭ ᠤ᠋ᠨ ᠮᠢᠨᠢ ᠬᠠᠮᠢᠭᠠ ᠨᠢ ᠴᠦ᠍ ᠭᠡᠰᠡᠨ ᠬᠠ ᠶᠠ ᠦᠭᠡᠢ ᠬᠠᠷᠢᠶᠠᠴᠠᠢ ᠶ᠋ᠢᠨ ᠬᠠᠯᠢᠯᠲᠠ ᠠ᠋ ! ᠬᠠᠷᠢᠶᠠᠴᠠᠢ ᠂ ᠬᠠᠷᠢᠶᠠᠴᠠᠢ ! ᠲᠣᠯᠢᠨ ᠨᠠᠭᠤᠷ ᠲᠤ᠌ ᠵᠢᠰᠦ ᠪᠡᠨ ᠦᠵᠡᠬᠦ ᠦᠭᠡᠢ᠂ ᠲᠣᠷᠭᠠᠨ ᠲᠠᠯᠠ ᠳ᠋ᠤ᠌ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠳᠤᠰᠬᠠᠬᠤ ᠦᠭᠡᠢ ᠂ ᠬᠠᠯᠠᠭᠤᠨ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠵᠠᠢᠭᠰᠠᠨ ᠭᠡᠷ ᠢ᠋ᠶ᠋ᠡᠨ ᠰᠡᠯᠭᠦᠵᠦ ᠂ ᠬᠠᠲᠠᠭᠤᠵᠢᠯᠳᠤ ᠬᠥᠳᠡᠯᠮᠦᠷᠢ ᠪᠡᠷ ᠢ᠋ᠶ᠋ᠡᠨ ᠬᠠᠭᠵᠠᠷᠬᠠᠢ ᠭᠡᠷ ᠢ᠋ᠶ᠋ᠡᠨ ᠨᠥᠬᠥᠨᠡ ᠃
ᠬᠠᠷᠢᠶᠠᠴᠠᠢ ᠂ ᠬᠠᠷᠢᠶᠠᠴᠠᠢ ! ᠬᠠᠯᠢᠭᠰᠠᠨ ᠵᠢᠭᠦᠷ ᠴᠢᠨᠢ ᠪᠣᠷᠣᠭᠠᠨ ᠳ᠋ᠤ᠌ ᠨᠣᠷᠤᠭᠰᠠᠨ ᠰᠢᠭ᠋ ᠨᠡᠪᠴᠢᠵᠦ ᠴᠤᠪᠤᠭᠤᠯᠤᠭᠰᠠᠨ ᠰᠢᠪᠡᠷ ᠴᠢᠨᠢ ᠴᠣᠬᠣ ᠶᠠᠪᠤᠭᠰᠠᠨ ᠰᠢᠭ᠋ ᠴᠣᠬᠣᠷᠳᠠᠬᠤ ᠦᠶᠡ ᠳ᠋ᠦ᠍ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠶ᠋ᠢᠨ ᠴᠢᠨᠢ ᠦᠷᠡ ᠵᠢᠮᠢᠰ ᠨᠢ ᠪᠣᠯᠪᠠᠰᠤᠷᠠᠬᠤ ᠶᠤᠮ ᠂ ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠴᠢᠨᠢ ᠵᠦᠩ ᠰᠤᠪᠢᠩ ᠨᠢ ᠲᠡᠮᠲᠡᠷᠢᠭᠳᠡᠬᠦ ᠶᠦ᠍ᠮ ᠃
3
ᠠᠳᠤᠭᠤᠴᠢᠨ ᠡᠷᠡ ᠠᠷᠤᠨᠰᠢ ᠲᠠᠩᠭᠠᠢᠵᠤ ᠰᠡᠷᠢᠭᠦᠨ ᠵᠢᠪᠠᠷ ᠤᠷᠢᠭᠰᠠᠭᠠᠷ ᠂ ᠠᠲᠠᠷ ᠤ᠋ᠨ ᠵᠠᠪᠰᠠᠷ ᠲᠠᠬᠢ ᠠᠩᠭᠠᠯᠵᠠᠨ ᠵᠢᠷᠵᠢᠭᠢᠨᠡᠬᠦ ᠨᠢᠴᠦᠭᠦᠨ ᠠᠩᠭᠠᠬᠠᠢ ᠶ᠋ᠢ ᠪᠠᠷᠠᠯᠠᠨᠠ ᠃ ᠡᠠᠢᠯ ᠤ᠋ᠨ ᠪᠦᠰᠡᠭᠦᠢ ᠠᠯᠴᠢᠭᠤᠷ ᠪᠠᠷᠢᠨ ᠦᠰᠦ ᠪᠡᠨ ᠢᠯᠢᠭᠰᠡᠭᠡᠷ ᠂ ᠠᠵᠢᠯᠰᠠᠭ ᠬᠠᠷᠢᠶᠠᠴᠠᠢ ᠶ᠋ᠢᠨ ᠠᠮᠠᠨ ᠳ᠋ᠠᠬᠢ ᠬᠣᠷᠣᠬᠠᠢ ᠶ᠋ᠢ ᠠᠵᠢᠶᠠᠷᠠᠨᠠ᠃
ᠥᠯᠥᠭᠡᠢ ᠲᠡᠢ ᠨᠢᠯᠬᠠ ᠥᠰᠥᠭᠡᠢ ᠪᠡᠨ ᠳᠡᠪᠬᠡᠴᠡ ᠬᠥᠬᠥᠷᠡᠬᠦ ᠳ᠋ᠦ᠍ ᠂ ᠥᠷᠪᠥᠭᠡᠷ ᠮᠤᠤᠷ ᠨᠢᠳᠦ ᠪᠡᠨ ᠰᠡᠢᠮᠡᠢᠯᠭᠡᠨ ᠬᠠᠷᠠᠨᠠ ᠃ ᠠᠩᠭᠠ ᠪᠠᠨ ᠦᠨᠦᠰᠦᠭᠡᠳ ᠠᠳᠤᠭᠤᠴᠢᠨ ᠡᠷᠡ ᠤᠷᠭᠠ ᠪᠠᠨ ᠰᠢᠭᠦᠷᠡᠬᠦ ᠳ᠋ᠦ᠍ ᠂ ᠠᠯᠢᠶᠠᠷᠬᠠᠨ ᠢᠨᠢᠶᠡᠭᠡᠳ ᠠᠮᠠᠷᠠᠭ ᠪᠦᠰᠡᠭᠦᠢ ᠨᠢ ᠴᠠᠢ ᠪᠠᠨ ᠰᠠᠮᠤᠷᠤᠨᠠ ᠃ ᠁
ᠠ ᠂ ᠬᠠᠷᠢᠶᠠᠴᠠᠢ ! ᠥᠳᠥ ᠪᠡᠨ ᠰᠤᠭᠤᠷᠠᠲᠠᠯᠠ ᠡᠭᠦᠷ ᠢ᠋ᠶ᠋ᠡᠨ ᠪᠠᠷᠢᠬᠤ ᠭᠠᠩ ᠵᠣᠷᠢᠭ ᠴᠢᠨᠢ ᠂ ᠦᠰᠦ ᠪᠡᠨ ᠴᠠᠢᠲᠠᠯᠠ ᠦᠨᠡᠨᠴᠢ ᠪᠡᠷ ᠵᠢᠳᠬᠦᠬᠦ ᠶ᠋ᠢ ᠮᠢᠨᠢ ᠰᠠᠨᠠᠭᠤᠯᠬᠤ ᠨᠢ ᠦᠦ ⁈ ᠥᠯ ᠢ᠋ᠶ᠋ᠡᠨ ᠣᠭᠣᠷᠴᠤ ᠦᠷᠡ ᠪᠡᠨ ᠲᠡᠵᠢᠭᠡᠬᠦ ᠨᠢᠩᠵᠢᠨ ᠰᠡᠳᠬᠢᠯ ᠴᠢᠨᠢ ᠥᠯᠮᠡᠢ ᠪᠡᠨ ᠡᠪᠡᠷᠰᠢᠲᠡᠯᠡ ᠨᠤᠲᠤᠭ ᠢ᠋ᠶ᠋ᠠᠨ ᠪᠠᠢᠭᠤᠯᠬᠤ ᠶ᠋ᠢ ᠮᠢᠨᠢ ᠵᠢᠭᠠᠬᠤ ᠨᠢ ᠦᠦ ⁈
4
ᠬᠠᠨᠠ ᠲᠣᠭᠣᠷᠢᠭᠠᠳ ᠵᠢᠵᠢᠭ ᠬᠠᠷᠢᠶᠠᠴᠢ ᠵᠢᠩᠭᠢᠨᠡᠮᠡ ᠤᠶᠠᠬᠠᠨ ᠢ᠋ᠶ᠋ᠠᠷ ᠱᠤᠯᠤᠭᠠᠨᠠᠬᠤ ᠳ᠋ᠤ᠌ ᠂ ᠬᠠᠢᠰᠠᠩ ᠲᠦᠰᠢᠭᠡᠳ ᠵᠢᠭᠠᠯ ᠬᠦᠦ ᠭᠠᠷ ᠢ᠋ᠶ᠋ᠠᠨ ᠰᠡᠷᠪᠡᠢᠨ ᠲᠡᠮᠡᠦᠯᠦᠨᠡ᠃
ᠬᠥᠯᠥᠰᠥ ᠲᠡᠢ ᠭᠠᠷ ᠬᠦᠷᠴᠦ ᠪᠣᠯᠬᠤ ᠦᠭᠡᠢ ᠰᠢᠦ᠂ ᠬᠥᠨᠳᠡᠯᠡᠨ ᠭᠡᠲᠦᠯᠬᠦ ᠳᠠᠯᠠᠢ ᠳ᠋ᠠᠭᠠᠨ ᠤᠨᠠᠨᠠ ᠭᠡᠳ ᠡᠨᠡᠷᠢᠭᠰᠡᠨ ᠡᠵᠢ ᠨᠢ ᠶᠠᠷᠢᠶᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠳ᠋ᠦ᠍ ᠂ ᠱᠣᠬᠣᠭᠣᠷᠠᠭᠰᠠᠨ ᠵᠢᠭᠠᠯ ᠨᠢ ᠨᠢᠳᠦ ᠪᠡᠨ ᠲᠣᠷᠮᠣᠯᠵᠠᠭᠤᠯᠤᠨᠠ ᠁
ᠡᠬᠡ ᠬᠠᠷᠢᠶᠠᠴᠠᠢ ᠨᠢ ᠠᠩᠭᠠᠬᠠᠢ ᠪᠠᠨ ᠳᠠᠭᠠᠭᠤᠯᠤᠭᠠᠳ ᠵᠢᠷᠭᠢᠨ ᠤᠶᠠᠩᠭᠠᠯᠠᠬᠤ ᠶ᠋ᠢ ᠨᠢ ᠦᠵᠡᠬᠦ ᠦᠦ ᠂ ᠡᠮᠡᠭᠡ ᠡᠵᠢ ᠨᠢ ᠣᠮᠪᠣᠯᠣ ᠬᠠᠷᠠᠭᠠᠳ ᠪᠠᠶᠠᠷᠯᠠᠨ ᠬᠡᠩᠰᠢᠬᠦ ᠶ᠋ᠢ ᠨᠢ ᠰᠣᠨᠣᠰᠬᠤ ᠤᠤ ᠂ ᠡᠵᠡᠨ ᠨᠢ ᠬᠠᠷᠢᠶᠠᠴᠠᠢ ᠪᠠᠨ ᠦᠵᠡᠭᠡᠳ ᠤᠷᠮᠠᠰᠢᠬᠤ ᠳ᠋ᠤ᠌ ᠂ ᠬᠠᠷᠢᠶᠠᠴᠠᠢ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠡᠷᠭᠢᠯᠳᠦᠭᠡᠳ ᠳᠠᠭᠤᠯᠠᠨᠠ ᠃
ᠠ ! ᠬᠠᠷᠢᠶᠠᠴᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠳ᠋ᠦ᠍ ᠡᠭᠡᠯᠢᠲᠡᠢ ᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠬᠠᠷᠢᠶᠠᠴᠠᠢ ᠳ᠋ᠤ᠌ ᠬᠠᠢᠷᠠᠲᠠᠢ ᠃
5
ᠰᠠᠷᠠᠪᠴᠢ ᠶ᠋ᠢ ᠨᠡᠪᠲᠡᠯᠦᠭᠡᠳ ᠪᠣᠷᠣᠭᠠᠨ ᠨᠢᠭᠡᠨᠲᠡ ᠰᠢᠪᠡᠷᠡᠵᠦ ᠂ ᠰᠠᠯᠬᠢᠨ ᠤᠷᠢᠭᠠᠳ ᠬᠢᠷᠠᠭᠤ ᠭᠡᠨᠡᠳᠲᠡ ᠪᠠᠭᠤᠪᠠ ᠃ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠠᠷᠠ ᠰᠢᠭᠤᠷᠭᠠ ᠤᠷᠢᠯᠠᠨᠠ ᠂ ᠤᠯᠢᠶᠠᠷᠬᠠᠨ ᠪᠥᠵᠢᠭᠯᠡᠵᠦ ᠨᠡᠩ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠠᠬᠢᠷ ᠬᠦᠢᠲᠡᠨ ᠬᠥᠭᠡᠭᠡᠨᠡ ᠃
ᠬᠠᠷᠢᠶᠠᠴᠠᠢ ᠂ ᠬᠠᠷᠢᠶᠠᠴᠠᠢ ! ᠬᠠᠢᠷᠠᠯᠠᠭᠰᠠᠨ ᠡᠵᠡᠨ ᠦ᠌ ᠪᠡᠨ ᠰᠦᠷ ᠲᠦ᠍ ᠰᠢᠲᠦᠵᠦ ᠂ ᠬᠠᠯᠢᠭᠰᠠᠨ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠭᠡᠯᠢ ᠳ᠋ᠦ᠍ ᠬᠣᠷᠭᠣᠳᠠᠭᠰᠠᠭᠠᠷ ᠬᠠᠷᠠᠮᠰᠠᠨ ᠤᠢᠳᠬᠠᠷᠯᠠᠵᠤ ᠬᠣᠯᠠ ᠶ᠋ᠢ ᠵᠣᠷᠢᠪᠠ᠃ ᠁
ᠭᠡᠰᠡᠨ ᠴᠢ ᠶᠠᠭᠠᠮᠠᠢ !ᠰᠢᠭᠤᠷᠭᠠᠨᠲᠤ ᠡᠪᠦᠯ ᠨᠢᠭᠡᠨᠲᠡ ᠲᠣᠨᠢᠯᠤᠭᠰᠠᠨ ᠢ᠋ ᠰᠠᠷᠠᠪᠴᠢᠨ ᠳ᠋ᠤ᠌ ᠲᠤᠰᠤᠭᠰᠠᠨ ᠭᠡᠷᠡᠯ ᠲᠤᠩᠬᠠᠯᠠᠵᠦ ᠪᠠᠢᠨᠠ ᠃ ᠬᠢᠮᠦᠷᠡᠭᠰᠡᠨ ᠤᠳᠠ ᠴᠤ᠌ ᠭᠡᠳᠡᠢᠵᠦ ᠡᠬᠢᠯᠡᠯᠡ ᠃ ᠭᠡᠶᠦᠷᠡᠭᠰᠡᠨ ᠡᠪᠡᠰᠦ ᠴᠦ᠍ ᠨᠣᠭᠣᠭᠠᠷᠠᠵᠤ ᠡᠬᠢᠯᠡᠯᠡ ᠃ ᠡᠷᠬᠡ ᠵᠢᠷᠭᠠᠯ ᠤ᠋ᠨ ᠡᠭᠡᠰᠢᠭ ᠢ᠋ᠶ᠋ᠡᠨ ᠨᠡᠩ ᠲᠣᠳᠣᠷᠠᠭᠤᠨ ᠬᠠᠩᠭᠢᠨᠠᠭᠤᠯᠤᠭᠰᠠᠭᠠᠷ ᠂ ᠡᠷᠡᠯᠬᠡᠭ ᠲᠡᠮᠡᠴᠡᠯ ᠦ᠋ᠨ ᠤᠶᠠᠩᠭᠠ ᠪᠠᠨ ᠨᠡᠩ ᠰᠠᠢᠬᠠᠨ ᠨᠠᠢᠷᠠᠯᠠᠭᠰᠠᠭᠠᠷ ᠡᠭᠡᠭᠡᠳ ᠢᠷᠡᠯᠡ ᠂ ᠬᠠᠷᠢᠶᠠᠴᠠᠢ ᠮᠢᠨᠢ !
ᠠ ᠬᠦ᠌ ᠂ ᠰᠣᠨᠣᠰᠤᠭᠠᠴᠢ ᠳ᠋ᠠ ! ᠳᠡᠭᠵᠢᠭᠦᠨ ᠬᠡᠦᠬᠡᠳ ᠦ᠋ᠨ ᠠᠯᠠᠭᠠ ᠪᠠᠨ ᠲᠡᠰᠢᠨ ᠣᠷᠢᠯᠠᠬᠤ ᠳᠠᠭᠤ ᠲᠡᠨᠢᠭᠡᠷ ᠲᠠᠯᠠ ᠳ᠋ᠤ᠌ ᠮᠢᠨᠢ ᠳᠠᠬᠢᠭᠠᠳ ᠯᠠ ᠳᠠᠭᠤᠷᠢᠰᠤᠯᠠ ᠰᠢᠦ ᠃
–– ᠬᠠᠷᠢᠶᠠᠴᠠᠢ ᠢᠷᠡᠯᠡ ᠂ ᠬᠠᠷᠢᠶᠠᠴᠠᠢ ᠢᠷᠡᠯᠡ !