ᠬᠡᠦᠬᠡᠨ ᠦ ᠢᠨᠢᠶᠡᠳᠦ - ᠴᠡᠩᠬᠡᠯᠲᠦ Хүүхний инээд - Цэнхэлт
260ᠬᠡᠦᠬᠡᠨ ᠦ ᠢᠨᠢᠶᠡᠳᠦ
ᠬᠠᠪᠤᠷ ᠤ᠋ᠨ ᠬᠤᠷᠠ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠥᠷᠥᠴᠡᠨ ᠡᠴᠡ ᠰᠢᠩᠭᠡᠨ ᠮᠠᠨᠠᠨ ᠳᠡᠭᠳᠡᠵᠦ ᠂ ᠠᠭᠰᠢᠭᠤᠨ ᠤᠨᠢᠶᠠᠷ ᠲᠤᠨᠤᠷᠠᠭᠠᠳ ᠂ ᠴᠢᠭᠢᠭ ᠦ᠋ᠨ ᠦᠨᠦᠷ ᠬᠠᠮᠠᠷ ᠴᠣᠷᠭᠢᠵᠤ ᠂ ᠴᠡᠪᠡᠷ ᠠᠭᠠᠷ ᠴᠡᠭᠡᠵᠢ ᠰᠡᠷᠪᠡᠯᠵᠡᠭᠦᠯᠦᠨᠡ ᠃
ᠠ ᠂ ᠠᠩᠬᠠᠨ ᠬᠠᠪᠤᠷ ᠤ᠋ᠨ ᠨᠠᠮᠢᠷᠠᠭᠠ ᠬᠤᠷᠠ ᠥᠩᠭᠡᠷᠡᠭᠰᠡᠨ ᠰᠥᠨᠢ ᠰᠢᠪᠡᠷᠡᠵᠦ ᠂ ᠬᠠᠢᠷᠠ ᠳᠤᠷᠠᠯᠠᠯ ᠣᠨ ᠬᠠᠯᠠᠭᠤᠨ ᠦᠷᠡ ᠪᠡᠨ ᠬᠠᠨᠠᠭᠠᠷ ᠲᠠᠯᠠ ᠳ᠋ᠤ᠌ ᠮᠢᠨᠢ ᠰᠠᠴᠤᠭᠰᠠᠨ ᠠᠵᠢ ! ᠭᠡᠳ ᠭᠡᠭᠡᠪᠴᠢ ᠪᠡᠷ ᠱᠠᠭᠠᠢᠪᠠᠯ ᠄
ᠪᠦᠷᠳᠦᠯᠵᠢᠬᠦ ᠠᠭᠤᠯᠠ ᠂ ᠪᠥᠵᠢᠭᠯᠡᠬᠦ ᠪᠣᠯᠵᠣᠮᠣᠷ ᠂ ᠬᠥᠬᠥᠭᠡ ᠶ᠋ᠢᠨ ᠳᠠᠭᠤᠨ ᠂ ᠬᠥᠳᠡᠭᠡ ᠶ᠋ᠢᠨ ᠥᠷᠯᠥᠭᠡ ᠃
ᠨᠠᠷᠠᠨ ᠠᠪᠠᠬᠠᠢ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠵᠤ ᠂ ᠠᠭᠤᠯᠠᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠶ᠋ᠢ ᠬᠣᠯᠭᠣᠨ ᠬᠠᠷᠠᠵᠤ ᠪᠠᠢᠨᠠ ᠂ ᠡᠨᠡ ᠴᠦ᠍ ᠶᠣᠰᠣᠲᠠᠢ ᠯᠠ ᠤᠷᠤᠭᠯᠠᠬᠤ ᠭᠡᠵᠦ ᠪᠠᠢᠭᠠ ᠤᠬᠠᠭᠠᠨᠲᠤ ᠬᠡᠦᠬᠡᠨ ᠤᠯᠠᠭᠠᠨ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠪᠦᠷᠬᠦᠴᠢᠭᠡᠳ᠂ ᠤᠷᠭᠠᠴᠢᠨ ᠵᠠᠯᠠᠭᠤ ᠪᠠᠨ ᠰᠡᠮᠡᠭᠡᠷᠬᠡᠨ ᠬᠠᠷᠠᠵᠤ ᠪᠠᠢᠬᠤ ᠰᠢᠭ᠋ ᠯᠡ ᠲᠠ ᠂ ᠨᠠᠮᠢᠷᠠᠭᠰᠠᠨ ᠬᠤᠷᠠ ᠶ᠋ᠢᠨ ᠳᠠᠷᠠᠭᠠᠬᠢ ᠲᠤᠩᠭᠠᠯᠠᠭ ᠥᠷᠯᠥᠭᠡ ᠪᠣᠯ ᠨᠠᠷᠠᠨ ᠠᠪᠠᠬᠠᠢ ᠪᠣᠯᠤᠨ ᠨᠡᠷᠡᠲᠦ ᠣᠷᠴᠢᠯᠠᠩ ᠬᠣᠶᠠᠷ ᠤ᠋ᠨ ᠤᠷᠤᠭ ᠤ᠋ᠨ ᠶᠣᠰᠣᠯᠠᠯ ᠢ᠋ᠶ᠋ᠠᠨ ᠡᠬᠢᠯᠡᠬᠦ ᠡᠴᠡ ᠯᠡ ᠡᠮᠦᠨᠡᠬᠢ ᠣᠬᠣᠷᠬᠠᠨ ᠰᠠᠢᠬᠠᠨ ᠴᠠᠭ ᠡᠷᠡᠨ ᠨᠢ ᠮᠥᠨ ᠰᠢᠦ ! ᠭᠡᠳ ᠪᠢ ᠳᠠᠬᠢᠨ ᠬᠠᠷᠠᠭᠠ ᠪᠠᠨ ᠰᠤᠩᠭᠠᠪᠠᠯ ᠄
ᠲᠤᠯᠤᠮ ᠢ᠋ᠶ᠋ᠠᠨ ᠡᠭᠦᠷᠦᠭᠡᠳ ᠬᠡᠦᠬᠡᠨ ᠶᠠᠭᠠᠷᠠᠨᠠ ᠂ ᠤᠷᠭᠠ ᠪᠠᠨ ᠴᠢᠷᠦᠭᠡᠳ ᠠᠳᠤᠭᠤᠴᠢᠨ ᠡᠷᠲᠡᠯᠡᠨᠡ ᠃ ᠲᠣᠭᠣᠭᠠ ᠲᠠᠢ ᠴᠠᠢ ᠲᠤᠯᠭᠠᠨ ᠳᠡᠭᠡᠷᠡ ᠣᠷᠭᠢᠯᠤᠨᠠ ᠂ᠲᠣᠭᠣᠰᠣ ᠦᠭᠡᠢ ᠭᠡᠷᠡᠯ ᠲᠣᠭᠣᠨᠣᠨ ᠳᠡᠭᠡᠷᠡ ᠲᠤᠶᠠᠭᠠᠷᠠᠨᠠ ᠃ ᠰᠦᠮᠡᠰ ᠰᠦᠮᠡᠰ ᠵᠡᠷᠭᠡᠯᠭᠡᠨ ᠨᠠᠢᠭᠤᠯᠵᠠᠭᠤᠯᠬᠤ ᠵᠤᠨ ᠤ᠋ ᠰᠠᠢᠬᠠᠨ ᠲᠠᠯᠠ ᠨᠢ ᠨᠣᠭᠣᠭᠠᠨ ᠲᠣᠷᠭᠠᠨ ᠲᠤᠤᠵᠠ ᠪᠠᠨ ᠪᠠᠷᠢᠴᠠᠭᠠᠳ ᠬᠡᠦᠬᠡᠨ ᠢ᠋ ᠳᠠᠯᠠᠯᠬᠤ ᠳ᠋ᠤ᠌ ᠂ ᠰᠦᠷᠦᠭ ᠰᠦᠷᠦᠭ ᠬᠣᠨᠢ ᠪᠥᠮᠪᠦᠯᠵᠡᠭᠦᠯᠬᠦ ᠨᠠᠮᠤᠷ ᠤ᠋ᠨ ᠪᠠᠶᠠᠨ ᠨᠤᠲᠤᠭ ᠨᠢ ᠠᠯᠲᠠᠨ ᠳᠣᠯᠭᠢᠶᠠᠨ ᠢ᠋ᠶ᠋ᠠᠨ ᠬᠠᠶᠠᠯᠠᠴᠢᠭᠠᠳ ᠠᠳᠤᠭᠤᠴᠢᠨ ᠢ᠋ ᠤᠭᠲᠤᠨᠠ ᠃
ᠠ ! ᠬᠠᠪᠤᠷ ᠤ᠋ᠨ ᠬᠤᠷᠠ ᠮᠢᠨᠢ ᠠᠭᠠᠷ ᠠ᠋ᠴᠠ ᠪᠠᠭᠤᠬᠤ ᠳ᠋ᠠᠭᠠᠨ ᠂ ᠠᠶᠠᠯᠠᠵᠤ ᠬᠠᠮᠢᠭᠠᠭᠤᠷ ᠢᠷᠡᠪᠡ ⁈
ᠴᠠᠭᠠᠨ ᠤᠲᠤᠭᠠ
ᠨᠣᠭᠣᠭᠠᠨ ᠲᠠᠯᠠ ᠶ᠋ᠢᠨ ᠰᠣᠷᠭᠣᠭ ᠪᠡᠯᠴᠢᠭᠡᠷ ᠳᠡᠭᠡᠷᠡ ᠂ ᠨᠣᠭᠲᠣ ᠪᠠᠨ ᠴᠢᠷᠦᠭᠰᠡᠨ ᠰᠠᠷᠠᠯ ᠡᠵᠡᠨ ᠢ᠋ᠶ᠋ᠡᠨ ᠡᠷᠭᠢᠴᠡᠭᠡᠳ ᠴᠣᠪᠬᠣᠴᠢᠵᠤ ᠪᠣᠢ ᠂ ᠬᠥᠯ ᠢ᠋ᠶ᠋ᠡᠨ ᠭᠡᠮᠲᠦᠭᠡᠭᠰᠡᠨ ᠬᠦᠦ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠭᠠᠳ ᠬᠦᠯᠦᠭ ᠦ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠮᠠᠴᠤᠵᠤ ᠪᠣᠢ᠃ ᠳᠡᠭᠡᠷᠡ ᠨᠢ ᠵᠠᠶ᠋ᠢᠲᠠᠯᠠᠮᠠᠭᠴᠠ ᠳᠡᠷᠡᠶ᠋ᠢᠲᠡᠯᠡ ᠰᠠᠪᠠᠭᠳᠠᠨᠠ ᠃ ᠳᠡᠪᠬᠡᠷᠴᠦ ᠪᠣᠰᠤᠭᠠᠳ ᠳᠠᠬᠢᠭᠠᠳ ᠯᠠ ᠮᠠᠴᠤᠵᠤ ᠪᠣᠢ᠃ ᠁
ᠪᠤᠴᠠᠰᠢ ᠦᠭᠡᠢ ᠪᠣᠳᠣᠯᠭᠠᠨ ᠤ᠋ ᠬᠢᠨᠢ ᠴᠠᠭᠠᠨᠠ ᠂ ᠪᠤᠯᠠᠭ ᠣᠷᠭᠢᠯᠤᠭᠰᠠᠨ ᠪᠤᠳᠠᠯᠠᠩ ᠤ᠋ᠨ ᠨᠤᠲᠤᠭ ᠨᠢ ᠰᠠᠨᠠᠭᠳᠠᠵᠤ ᠪᠣᠢ ᠂ ᠬᠠᠷᠢᠯᠲᠠ ᠦᠭᠡᠢ ᠬᠠᠷᠠᠴᠠᠨ ᠤ᠋ ᠬᠢᠨᠢ ᠳᠣᠲᠣᠷᠠ ᠂ ᠬᠠᠪᠤᠷ ᠰᠠᠭᠠᠲᠠᠭᠰᠠᠨ ᠬᠠᠢᠷᠠᠲᠤ ᠨᠤᠲᠤᠭ ᠨᠢ ᠲᠣᠳᠣᠷᠠᠵᠤ ᠪᠣᠢ ᠃
ᠬᠥᠪᠦᠰ ᠬᠥᠪᠦᠰ ᠡᠭᠦᠯᠡ ᠴᠠᠭᠠᠨ ᠂ ᠲᠣᠨᠣᠰ ᠲᠣᠨᠣᠰ ᠤᠲᠤᠭᠠ ᠴᠠᠭᠠᠨ ᠂ ᠲᠡᠭᠦᠨ ᠦ᠌ ᠳᠣᠣᠷᠠ ᠲᠦᠨᠲᠦᠭᠡ ᠳᠠᠨᠳᠠᠭᠠ ᠭᠡᠷ ᠴᠠᠭᠠᠨ ᠂ ᠲᠦᠮᠡᠨ ᠮᠢᠩᠭᠠᠨ ᠬᠣᠨᠢ ᠴᠠᠭᠠᠨ ᠃
ᠴᠠᠭᠠᠨ ! ᠴᠠᠭᠠᠨ ᠃ ᠨᠤᠲᠤᠭ ᠤ᠋ᠨ ᠮᠢᠨᠢ ᠵᠢᠰᠦ ᠵᠢᠷᠦᠬᠡ ᠬᠬᠢᠷ ᠦᠭᠡᠢ ᠴᠠᠭᠠᠨ ᠃
ᠠ ᠂ ᠪᠢ ᠣᠢᠯᠠᠭᠠᠯᠠ ᠃ ᠠᠮᠢᠳᠤᠷᠠᠯ ᠮᠠᠨᠢ ᠠᠭᠲᠠ ᠶ᠋ᠢᠨ ᠨᠢᠷᠤᠭᠤᠨ ᠳ᠋ᠤ᠌ ᠣᠭᠢᠭᠠᠳ ᠣᠭᠢᠭᠠᠳ ᠮᠠᠴᠤᠬᠤ ᠰᠢᠭ᠋ ᠠᠯᠬᠤᠮ ᠪᠦᠷᠢ ᠳ᠋ᠡᠭᠡᠨ ᠦᠷᠡᠭᠳᠡᠯ ᠭᠠᠷᠭᠠᠵᠤ ᠪᠠᠶ᠋ᠢᠪᠠᠴᠤ ᠂ ᠴᠠᠶ᠋ᠢᠷᠠᠨ ᠰᠤᠪᠤᠷᠠᠬᠤ ᠴᠠᠭᠠᠨ ᠤᠲᠤᠭᠠ ᠰᠢᠭ᠋ ᠠᠷᠢᠭᠤᠨ ᠴᠠᠭᠠᠨ ᠢ᠋ᠶ᠋ᠠᠷ ᠠᠮᠢᠰᠬᠤᠯᠠᠵᠤ ᠪᠠᠶ᠋ᠢᠬᠤ ᠠᠵᠢ ᠃
ᠨᠣᠭᠣᠭᠠᠨ ᠨᠠᠪᠴᠢ
ᠨᠠᠶ᠋ᠢᠷᠰᠠᠭ ᠬᠠᠪᠤᠷ ᠤ᠋ᠨ ᠡᠶᠡᠪᠡᠷᠭᠦᠦ ᠰᠠᠯᠬᠢ ᠂ ᠨᠠᠶ᠋ᠢᠵᠠ ᠶ᠋ᠢᠨ ᠮᠢᠨᠢ ᠦᠨᠦᠰᠦᠯᠲᠡ ᠰᠢᠭ ᠨᠠᠮᠠᠶ᠋ᠢ ᠰᠣᠭᠲᠣᠷᠠᠭᠤᠯᠬᠤ ᠳ᠋ᠤ᠌᠂ ᠨᠠᠮᠤᠭᠤᠨ ᠠᠶᠠᠲᠠᠢ ᠲᠠᠨᠼ ᠤ᠋ᠨ ᠢᠷᠠᠭᠤ ᠬᠥᠭᠵᠢᠮ ᠴᠦ᠍ ᠪᠦᠦᠷ ᠲᠦᠦᠷ ᠠᠨᠢᠷᠲᠤᠵᠤ ᠂ ᠡᠵᠢ ᠪᠡᠨ ᠮᠥᠷᠥᠭᠡᠳᠦᠭᠰᠡᠨ ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠲᠦᠮᠡᠨ ᠪᠣᠳᠠᠰ ᠪᠠᠷᠤᠭ ᠪᠦᠷᠦᠭ ᠪᠥᠷᠲᠥᠯᠵᠡᠨᠡ ᠃ ᠁
ᠨᠠᠷᠠᠨ ᠤ᠋ ᠳᠣᠣᠷᠠ ᠨᠠᠷᠠᠰᠤ ᠨᠣᠭᠣᠭᠠᠨ ᠂ ᠨᠠᠷᠠᠰᠤᠨ ᠴᠠᠭᠠᠨᠠ ᠤᠳᠠ ᠨᠣᠭᠣᠭᠠᠨ ᠂ ᠤᠳᠠᠨ ᠤ᠋ ᠳᠣᠣᠷᠠ ᠤᠰᠤ ᠨᠣᠭᠣᠭᠠᠨ ᠂ ᠤᠰᠤᠨ ᠤ᠋ ᠲᠡᠷᠲᠡᠭᠡ ᠲᠠᠯᠠ ᠨᠣᠭᠣᠭᠠᠨ ᠃
ᠨᠣᠭᠣᠭᠠᠨ ᠠ᠋ ᠂ ᠨᠣᠭᠣᠭᠠᠨ !ᠨᠤᠲᠤᠭ ᠤᠰᠤ ᠮᠢᠨᠢ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠠᠮᠢᠰᠬᠤᠯᠠᠵᠤ ᠪᠣᠢ ᠃
ᠭᠡᠨᠡᠳᠲᠡ ᠬᠠᠢᠷᠠᠲᠤ ᠡᠵᠢ ᠶ᠋ᠢᠨ ᠮᠢᠨᠢ ᠪᠦᠯᠢᠶᠡᠨ ᠭᠠᠷ ᠬᠠᠴᠠᠷ ᠢ᠋ ᠢᠯᠪᠢᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ ᠂ ᠬᠠᠷᠢᠲᠤ ᠪᠠᠨ ᠳᠤᠭᠤᠢᠯᠠᠵᠤ ᠬᠠᠴᠠᠷ ᠶ᠋ᠢᠠᠨ ᠳᠠᠭᠠᠭᠤᠯᠤᠨ ᠲᠡᠮᠲᠡᠷᠢᠵᠦ ᠦᠵᠡᠭᠰᠡᠨ ᠴᠢᠨᠢ ᠴᠡᠭᠡᠯ ᠡᠴᠡ ᠤᠨᠠᠭᠰᠠᠨ ᠨᠠᠪᠴᠢ ᠴᠡᠯ ᠨᠣᠭᠣᠭᠠᠨ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠠᠯᠠᠭᠠᠨ ᠳᠡᠭᠡᠷᠡ ᠮᠢᠨᠢ ᠰᠡᠷᠪᠡᠯᠵᠡᠵᠦ ᠪᠠᠶ᠋ᠢᠯᠠ ᠃
ᠠ ᠂ ᠪᠢ ᠮᠡᠳᠡᠯᠡ ᠃ ᠡᠬᠡ ᠨᠤᠲᠤᠭ ᠲᠠᠭᠠᠨ ᠠᠪᠴᠤ ᠬᠡᠯᠡᠪᠡᠯ ᠂ ᠪᠢ ᠪᠣᠯ ᠵᠥᠪᠬᠡᠨ ᠨᠢᠭᠡᠨ ᠨᠣᠭᠣᠭᠠᠨ ᠨᠠᠪᠴᠢ ᠶ᠋ᠢᠨ ᠲᠡᠳᠦᠢ ᠯᠡ ᠃ ᠡᠨᠡᠬᠦ ᠨᠣᠭᠣᠭᠠᠨ ᠨᠠᠪᠴᠢ ᠪᠣᠯ ᠳᠠᠷᠤᠢ ᠡᠵᠢ ᠶ᠋ᠢᠨ ᠨᠤᠲᠤᠭ ᠠ᠋ᠴᠠ ᠮᠢᠨᠢ ᠡᠩᠬᠦᠷᠡᠢ ᠨᠠᠳᠠ ᠳ᠋ᠠᠭᠠᠨ ᠬᠠᠢᠷᠠᠯᠠᠭᠰᠠᠨ ᠬᠠᠯᠠᠭᠤᠨ ᠦᠨᠦᠰᠦᠯᠲᠡ ᠃
ᠬᠡᠦᠬᠡᠨ ᠦ᠌ ᠢᠨᠢᠶᠡᠳᠦ
ᠤᠯᠠᠯᠵᠠᠬᠤ ᠨᠠᠷᠠᠨ ᠤᠯᠠᠪᠠᠷ ᠲᠤᠶᠠᠭᠠᠨ ᠳᠣᠣᠷᠠ ᠂ ᠤᠴᠢᠷᠲᠠᠢᠬᠠᠨ ᠢᠨᠢᠶᠡᠮᠰᠦᠭᠯᠡᠭᠡᠳ ᠨᠢᠭᠡᠨ ᠬᠡᠦᠬᠡᠨ ᠭᠡᠵᠢᠭᠡ ᠪᠡᠨ ᠢᠯᠠᠵᠤ ᠪᠠᠢᠨᠠ ᠂ ᠣᠷᠢᠶᠠᠭᠰᠠᠨ ᠠᠯᠴᠢᠭᠤᠷ ᠨᠢ ᠴᠦ᠍ ᠤᠯᠠᠯᠵᠠᠨ ᠳᠡᠷᠪᠡᠯᠵᠡᠭᠡᠳ ᠂ ᠤᠯᠢᠶᠠᠷᠬᠠᠭ ᠴᠢᠷᠠᠢ ᠨᠢ ᠴᠦ᠍ ᠣᠴᠢ ᠪᠠᠳᠠᠷᠠᠨᠠ ᠃ ᠁
ᠲᠩᠷᠢ ᠶ᠋ᠢᠨ ᠬᠣᠷᠮᠣᠢ ᠳ᠋ᠤ᠌ ᠨᠠᠷᠠ ᠤᠯᠠᠯᠵᠠᠵᠤ ᠂ ᠨᠠᠷᠠᠨ ᠤ᠋ ᠳᠣᠣᠷᠠ ᠠᠭᠤᠯᠠ ᠰᠦᠨᠳᠡᠷᠯᠡᠨᠡ ᠃ ᠠᠭᠤᠯᠠ ᠶ᠋ᠢ ᠲᠣᠭᠣᠷᠢᠭᠠᠳ ᠵᠠᠮ ᠰᠤᠨᠤᠯᠵᠠᠵᠤ ᠂ ᠵᠠᠮ ᠢ᠋ ᠡᠪᠬᠡᠭᠡᠳ ᠮᠠᠰᠢᠨ ᠣᠢᠷᠠᠳᠠᠨᠠ᠃
ᠰᠠᠭᠠᠯᠢ ᠶ᠋ᠢᠨ ᠦᠨᠢᠶᠡᠳ ᠵᠡᠯᠡ ᠵᠦᠭ ᠢ᠋ᠶ᠋ᠡᠨ ᠭᠦᠶᠦᠯᠳᠦᠬᠦ ᠳ᠋ᠦ᠍ ᠂ ᠰᠠᠨᠠᠭᠰᠠᠨ ᠲᠤᠭᠤᠯ ᠤ᠋ᠳ ᠨᠢ ᠵᠡᠯᠡ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠲᠡᠮᠡᠦᠯᠦᠨᠡ ᠃ ᠁ ᠱᠤᠭᠤᠮ ᠲᠠᠲᠠᠭᠰᠠᠨ ᠮᠡᠲᠦ ᠵᠢᠭᠰᠠᠭᠰᠠᠨ ᠨᠢ ᠰᠤᠷᠭᠠᠭᠤᠯᠢ ᠠ᠋ᠴᠠ ᠪᠠᠨ ᠪᠤᠴᠠᠭᠠ ᠰᠤᠷᠤᠭᠴᠢ ᠤᠤ ? ᠰᠤᠷᠭᠠᠭᠤᠯᠢᠯᠠᠯ ᠳ᠋ᠠᠭᠠᠨ ᠰᠢᠮᠳᠠᠭᠠ ᠴᠡᠷᠢᠭ ᠦᠦ ? ᠪᠢᠰᠢ ᠂ ᠪᠢᠰᠢ ! ᠪᠦᠷ ᠪᠢᠰᠢ ᠃ ᠭᠠᠷᠠᠬᠠ ᠮᠡᠲᠦ ᠬᠣᠶᠠᠷ ᠡᠪᠡᠷ ᠨᠢ ᠭᠣᠷᠣᠢᠵᠤ ᠪᠠᠢᠨᠠ ᠰᠢᠦ ᠂ ᠭᠠᠳᠠᠰᠤ ᠮᠡᠲᠦ ᠳᠥᠷᠪᠡᠨ ᠬᠥᠯ ᠨᠢ ᠲᠤᠯᠵᠤ ᠪᠠᠢᠨᠠ ᠰᠢᠦ ᠃ ᠁
ᠬᠥᠷ ! ᠬᠥᠷ –– ᠬᠦᠷᠬᠢᠷᠡ ᠰᠢᠭ ᠱᠤᠤᠭᠢᠵᠤ ᠂ ᠬᠥᠨᠳᠡᠢ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠠᠢᠵᠠᠮᠳᠠᠨᠡ ᠃ ᠬᠥᠨᠥᠭ ᠲᠦᠭᠦᠷᠡᠭ ᠰᠦ᠍ ᠪᠡᠨ ᠬᠠᠷᠠᠭᠠᠳ ᠬᠡᠦᠬᠡᠨ ᠦ᠌ ᠰᠡᠳᠬᠢᠯ ᠪᠠᠯ ᠳ᠋ᠤ᠌ ᠠᠭᠤᠰᠤᠭᠰᠠᠨ ᠮᠡᠲᠦ ᠪᠡᠶᠡᠰᠦᠨᠡ ᠃
《 ᠰᠢᠩᠭᠡᠬᠦ ᠨᠠᠷᠠᠨ ᠬᠢᠵᠠᠭᠠᠷ ᠦᠭᠡᠢ ᠰᠠᠢᠬᠠᠨ ᠴᠤ᠌ ᠂ ᠰᠢᠷᠠ ᠪᠦᠷᠦᠢ ᠳᠥᠭᠥᠭᠰᠡᠨ ᠦᠨᠡᠬᠡᠷ ᠬᠠᠷᠠᠮᠰᠠᠯ 》 ᠭᠡᠵᠦ ᠬᠡᠨ ᠭᠠᠰᠢᠭᠤᠳᠠᠪᠠ ⁈
ᠵᠢᠷᠭᠠᠬᠤ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠰᠠᠢᠬᠠᠨ ᠂ ᠵᠠᠯᠠᠭᠤ ᠬᠡᠦᠬᠡᠨ ᠦ᠌ ᠢᠨᠢᠶᠡᠳᠦ ᠰᠠᠢᠬᠠᠨ ᠃
ᠣᠭᠲᠠᠷᠭᠤᠢ ᠶ᠋ᠢᠨ ᠳᠣᠣᠷᠠ ᠠᠭᠤᠯᠠ ᠰᠦᠨᠳᠡᠷᠯᠡᠵᠦ ᠂ ᠠᠭᠤᠯᠠᠨ ᠤ᠋ ᠳᠡᠭᠡᠷᠡ ᠡᠦᠲᠦ ᠭᠢᠯᠠᠯᠵᠠᠨᠠ ᠃ ᠮᠠᠷᠭᠠᠰᠢ ᠪᠠᠨ ᠲᠥᠰᠥᠪᠯᠡᠭᠡᠳ ᠬᠡᠦᠬᠡᠨ ᠢᠨᠢᠶᠡᠵᠦ ᠪᠣᠢ ᠂ ᠮᠠᠰᠢᠨ ᠢ᠋ᠶ᠋ᠠᠨ ᠳᠠᠯᠠᠯᠤᠭᠠᠳ ᠬᠡᠦᠬᠡᠨ ᠶᠠᠭᠠᠷᠠᠵᠤ ᠪᠣᠢ ᠃