ᠮᠣᠩᠭᠣᠯ ᠨᠤᠲᠤᠭ ᠤᠨ ᠰᠠᠢᠬᠠᠨ - ᠴᠡᠩᠬᠡᠯᠲᠦ Монгол нутгийн сайхан - Цэнхэлт
357ᠮᠣᠩᠭᠣᠯ ᠨᠤᠲᠤᠭ ᠤᠨ ᠰᠠᠢᠬᠠᠨ
ᠰᠦᠨ ᠴᠠᠭᠠᠨ ᠶᠢᠷᠲᠢᠨᠴᠦ
ᠬᠠᠪᠤᠷ –– ᠬᠥᠭᠰᠢᠨ ᠵᠠᠯᠠᠭᠤᠰ ᠲᠥᠯ ᠲᠣᠰᠤᠭᠠᠳ ᠂ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠡᠪᠦᠷ ᠴᠠᠭᠠᠨ ᠂ ᠡᠭᠦᠷᠦᠪᠴᠢ ᠨᠢ ᠴᠦ᠍ ᠴᠠᠭᠠᠨ ᠂ ᠬᠠᠢᠴᠢᠯᠠᠭᠰᠠᠨ ᠨᠣᠣᠰᠣ ᠨᠢ ᠬᠠᠢᠷᠠ ᠶ᠋ᠢ ᠠᠷᠭᠠᠮᠵᠢᠵᠤ ᠂ ᠬᠠᠵᠠᠭᠤᠯᠤᠨ ᠪᠤᠰᠬᠠᠭᠰᠠᠨ ᠣᠪᠣᠭᠠ ᠨᠢ ᠴᠠᠭᠠᠨ ᠂ ᠠᠭᠤᠯᠠ ᠨᠢ ᠴᠠᠭᠠᠨ ᠃
ᠵᠤᠨ –– ᠳᠡᠯᠭᠡᠷᠡᠵᠦ ᠪᠠᠢᠭᠠ ᠴᠡᠴᠡᠭ ᠦ᠋ᠨ ᠬᠢᠨᠢ ᠳᠡᠭᠡᠷᠡ ᠂ ᠬᠦᠪᠦᠵᠦ ᠪᠠᠢᠭᠠ ᠡᠭᠦᠯᠡ ᠨᠢ ᠴᠠᠭᠠᠨ ᠃ ᠮᠡᠯᠮᠡᠢᠵᠦ ᠪᠠᠢᠭᠠ ᠨᠠᠭᠤᠷ ᠤ᠋ᠨ ᠬᠢᠨᠢ ᠳᠤᠮᠳᠠ ᠂ ᠴᠡᠩᠭᠡᠵᠦ ᠪᠠᠢᠭᠠ ᠬᠤᠨ ᠨᠢ ᠴᠠᠭᠠᠨ ᠃ ᠪᠣᠯᠵᠣᠮᠣᠷ ᠤ᠋ᠨ ᠵᠢᠷᠭᠢᠭᠡᠨ ᠲᠡᠢ ᠵᠡᠯᠡ ᠶ᠋ᠢᠨ ᠬᠢᠨᠢ ᠳᠡᠭᠡᠷᠡ ᠂ ᠪᠠᠭᠤᠵᠤ ᠪᠠᠢᠭᠠ ᠬᠦᠷᠬᠢᠷᠡ ᠨᠢ ᠴᠠᠭᠠᠨ ᠂ ᠪᠤᠷᠭᠢᠯᠵᠤ ᠪᠠᠢᠭᠠ ᠤᠲᠤᠭᠠ ᠨᠢ ᠴᠦ᠍ ᠴᠠᠭᠠᠨ ᠃
ᠨᠠᠮᠤᠷ –– ᠲᠡᠭᠷᠢ ᠭᠠᠵᠠᠷ ᠤ᠋ᠨ ᠠᠭᠤᠷ ᠰᠢᠮᠡ ᠪᠣᠯᠤᠭᠠᠳ ᠂ ᠳᠡᠭᠳᠡᠵᠦ ᠪᠠᠢᠭᠠ ᠮᠠᠨᠠᠨ ᠨᠢ ᠴᠠᠭᠠᠨ ᠃ ᠳᠡᠯᠭᠡᠷ ᠨᠠᠭᠠᠳᠤᠮ ᠤ᠋ᠨ ᠳᠡᠭᠡᠵᠢ ᠪᠣᠯᠤᠭᠠᠳ ᠂ ᠳᠡᠪᠰᠢᠭᠦᠯᠦᠭᠳᠡᠵᠦ ᠪᠠᠢᠭᠠ ᠬᠠᠳᠠᠭ ᠨᠢ ᠴᠠᠭᠠᠨ ᠂ ᠳᠡᠯᠭᠡᠵᠦ ᠪᠠᠢᠭᠠ ᠢᠳᠡᠭᠡᠨ ᠨᠢ ᠴᠦ᠍ ᠴᠠᠭᠠᠨ ᠃
ᠡᠪᠦᠯ –– ᠮᠥᠰᠥᠳᠡᠵᠦ ᠪᠠᠢᠭᠠ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠶ᠋ᠢᠨ ᠵᠢᠰᠦ ᠴᠠᠭᠠᠨ ᠂ ᠮᠦᠰᠢᠶᠡᠵᠦ ᠪᠠᠢᠭᠠ ᠮᠠᠯᠴᠢᠨ ᠠᠳᠤᠭᠤᠴᠢᠨ ᠰᠠᠬᠠᠯ ᠴᠠᠭᠠᠨ ᠂ ᠳᠡᠪᠡᠯ ᠴᠠᠭᠠᠨ ᠃
ᠡᠪᠦᠯ ᠵᠤᠨ ᠬᠠᠪᠤᠷ ᠨᠠᠮᠤᠷ –– ᠡᠭᠡᠯᠵᠢᠯᠡᠬᠦ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠂ ᠡᠵᠡᠨ ᠳ᠋ᠡᠭᠡᠨ ᠡᠷᠳᠡᠨᠢ ᠪᠣᠯᠤᠭᠠᠳ ᠥᠰᠴᠦ ᠪᠠᠢᠭᠠ ᠮᠡᠨᠳᠦ ᠰᠦᠷᠦᠭ ᠦ᠋ᠨ ᠪᠠᠷᠠ ᠴᠠᠭᠠᠨ ᠃ ᠡᠬᠡ ᠳ᠋ᠡᠭᠡᠨ ᠵᠢᠷᠦᠬᠡ ᠪᠣᠯᠤᠭᠠᠳ ᠢᠨᠢᠶᠡᠵᠦ ᠪᠠᠢᠭᠠ ᠴᠢᠮᠪᠠᠢ ᠬᠦᠦ ᠶ᠋ᠢᠨ ᠰᠢᠲᠦ ᠨᠢ ᠴᠦ᠍ ᠴᠠᠭᠠᠨ ᠃ ᠲᠠᠯᠠ ᠳ᠋ᠠᠭᠠᠨ ᠴᠢᠮᠡᠭᠲᠡᠢ ᠭᠡᠷ ᠮᠠᠢᠬᠠᠨ ᠴᠡᠪᠡᠷ ᠴᠠᠭᠠᠨ ᠂ ᠨᠤᠲᠤᠭ ᠲᠠᠭᠠᠨ ᠬᠠᠢᠷᠠᠲᠠᠢ ᠮᠠᠯᠴᠢᠳ ᠤ᠋ᠨ ᠰᠡᠳᠬᠢᠯ ᠶᠠᠭᠤᠨ ᠠ᠋ᠴᠠ ᠴᠠᠭᠠᠨ ᠃
ᠴᠠᠭᠠᠨ !ᠴᠠᠭᠠᠨ –– ᠰᠦ ᠭᠣᠭᠣᠵᠢᠮᠠ ᠠᠷᠢᠭᠤᠨ ᠴᠠᠭᠠᠨ ᠂ ᠴᠠᠰᠤ ᠪᠤᠲᠠᠷᠠᠮᠠ ᠴᠢᠨᠳᠠᠭᠠᠨ ᠴᠠᠭᠠᠨ ᠃ ᠮᠥᠨ ᠯᠡ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠪᠢ ᠂ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠰᠦ ᠶ᠋ᠢ ᠨᠢ ᠤᠤᠭᠤᠵᠤ ᠪᠣᠶ᠋ᠢᠵᠢᠬᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠂ ᠮᠣᠩᠭᠣᠯ ᠨᠤᠲᠤᠭ ᠢ᠋ᠶ᠋ᠠᠨ ᠰᠦᠨ ᠴᠠᠭᠠᠨ ᠶᠢᠷᠲᠢᠨᠴᠦ ᠭᠡᠵᠦ ᠮᠠᠭᠲᠠᠳᠠᠭ ! ᠬᠡᠲᠦᠷᠬᠡᠢ ᠴᠠᠭᠠᠨ ᠪᠣᠯ ᠬᠬᠢᠷᠲᠦᠬᠦ ᠳ᠋ᠦ᠍ ᠬᠢᠯᠪᠠᠷ –– ᠭᠬᠢᠷᠲᠦᠭᠰᠡᠨ ᠤᠴᠢᠷ ᠦᠭᠡᠢ ᠶᠤᠮᠰᠠᠨ ᠪᠣᠯ ᠬᠡᠨ ᠢᠩᠭᠢᠵᠦ ᠬᠡᠯᠡᠬᠦ ᠪᠣᠢ ⁈ ᠲᠡᠭᠡᠬᠦ ᠳ᠋ᠡᠭᠡᠨ ᠪᠢ ᠬᠥᠨᠥᠭ ᠲᠡᠢ ᠰᠦᠨ ᠳ᠋ᠡᠭᠡᠨ ᠬᠦ᠌ ᠣᠷᠣᠭᠤᠯᠬᠤ ᠶ᠋ᠢ ᠬᠢᠴᠢᠶᠡ ᠭᠡᠵᠦ ᠨᠥᠬᠥᠳ ᠲᠠᠨ ᠳ᠋ᠠᠭᠠᠨ ᠰᠠᠨᠠᠭᠤᠯᠵᠤ ᠪᠠᠢᠬᠤ ᠨᠢ ᠠ᠋ !
ᠬᠡᠦᠬᠡᠳ ᠦ᠋ᠨ ᠶᠢᠷᠲᠢᠨᠴᠦ
ᠣᠭᠲᠠᠷᠭᠤᠢ –– ᠬᠠᠷᠠᠭᠠᠳ ᠬᠠᠷᠠᠭᠠᠳ ᠲᠠᠰᠤᠷᠠᠰᠢ ᠦᠭᠡᠢ ᠨᠡᠭᠦᠳᠡᠯᠯᠡᠬᠦ ᠲᠡᠷᠡ ᠴᠠᠭᠠᠨ ᠡᠭᠦᠯᠡ ᠃
ᠲᠠᠯᠠ –– ᠬᠠᠢᠭᠠᠳ ᠬᠠᠢᠭᠠᠳ ᠦᠵᠦᠭᠦᠷ ᠦᠭᠡᠢ ᠰᠤᠨᠤᠯᠵᠠᠬᠤ ᠲᠡᠷᠡ ᠵᠠᠮ ᠃
《ᠶᠠᠭᠠᠬᠢᠭᠠᠳ ? 》–– ᠰᠣᠨᠢᠷᠬᠠᠯᠲᠠᠢ ᠭᠠᠢᠬᠠᠯᠲᠠᠢ ᠤᠭᠰᠠᠷᠠᠭᠰᠠᠨ ᠣᠯᠠᠨ ᠠᠰᠠᠭᠤᠯᠲᠠ ᠃
ᠠᠮᠢᠳᠤᠷᠠᠯ –– ᠢᠨᠢᠶᠡᠳᠦ ᠲᠡᠢ ᠨᠢᠯᠪᠤᠰᠤ ᠲᠠᠢ ᠴᠠᠭᠠᠪᠤᠷ ᠣᠯᠠᠨ ᠰᠢᠯᠭᠠᠯᠲᠠ ᠃
ᠪᠠᠢᠭᠠᠯᠢ ᠳᠡᠯᠡᠬᠡᠢ –– ᠪᠠᠢᠵᠤ ᠪᠠᠢᠲᠠᠯᠠ ᠬᠡᠳᠦ ᠬᠤᠪᠢᠷᠠᠬᠤ ᠨᠢ ᠬᠡᠦᠬᠡᠳ ᠦ᠋ᠨ ᠵᠠᠩ ᠪᠠᠰᠠ ᠲᠡᠭᠡᠭᠡᠳ ᠤᠯᠠᠷᠢᠯ ᠪᠣᠯᠭᠠᠨ ᠨᠢ ᠣᠭᠵᠣᠮ ᠣᠬᠣᠷ ᠲᠤᠯᠠ ᠬᠡᠦᠬᠡᠳ ᠦ᠋ᠨ ᠨᠠᠰᠤ ᠲᠠᠢ᠃
ᠬᠠᠢᠷᠠᠯᠠᠭᠰᠠᠨ ᠳ᠋ᠠᠭᠠᠨ ᠬᠠᠯᠠᠭᠤᠨ ᠠᠮᠢ ᠪᠠᠨ ᠬᠠᠷᠠᠮᠨᠠᠬᠤ ᠦᠭᠡᠢ ᠂ ᠬᠣᠷᠣᠰᠤᠭᠰᠠᠨ ᠳ᠋ᠠᠭᠠᠨ ᠰᠢᠷᠠᠰᠤ ᠪᠠᠨ ᠴᠤ᠌ ᠭᠢᠯᠠᠶ᠋ᠢᠯᠭᠠᠬᠤ ᠦᠭᠡᠢ ᠃ ᠠ ! ᠠᠮᠢᠳᠤᠷᠠᠯ –– ᠬᠡᠦᠬᠡᠳ ᠦ᠋ᠨ ᠳᠣᠮᠣᠭ ᠂ ᠴᠣᠬᠣᠮ ᠠᠯᠢ ᠨᠢ ᠣᠶ᠋ᠢᠷᠠ ᠪᠣᠢ ⁈
ᠰᠠᠷᠠᠭᠤᠯ ᠠᠭᠤᠳᠠᠮ ᠲᠠᠯᠠ ᠪᠣᠯ ᠡᠵᠢ ᠨᠢ ᠮᠥᠨ ᠂ ᠰᠠᠨᠠᠭᠠ ᠰᠠᠢᠲᠠᠢ ᠠᠷᠠᠳ ᠨᠢ ᠪᠣᠯ ᠲᠡᠭᠦᠨ ᠦ᠌ ᠪᠡᠨ ᠥᠷᠥᠴᠡᠨ ᠳ᠋ᠦ᠍ ᠪᠦᠪᠡᠢᠯᠡᠭᠳᠡᠵᠦ ᠪᠠᠶ᠋ᠢᠬ᠋ᠠ ᠦᠷᠡ ᠨᠢ ᠮᠥᠨ ᠃ ᠪᠠᠶ᠋ᠢᠭᠠᠯᠢ ᠡᠬᠡ ᠨᠢ ᠦᠷᠡ ᠪᠡᠨ ᠠᠷᠭᠠᠴᠠᠬᠤ ᠶ᠋ᠢᠨ ᠲᠥᠯᠥᠭᠡ ᠬᠠᠭᠤᠷᠴᠤ ᠦᠵᠡᠨᠡ ᠂ ᠰᠦᠷᠳᠡᠭᠦᠯᠵᠦ ᠦᠵᠡᠨᠡ ᠃ ᠭᠡᠲᠡᠯᠡ ᠠᠯᠠᠭ ᠦᠷᠡ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠨᠠᠭᠠ ᠶ᠋ᠢ ᠬᠡᠲᠦᠶ᠋ᠢᠨ ᠮᠡᠲᠡᠴᠢᠴᠢᠭᠡᠳ ᠠᠯᠠᠭᠠ ᠪᠠᠨ ᠲᠡᠰᠢᠨ ᠢᠨᠢᠶᠡᠵᠦ ᠪᠠᠶ᠋ᠢᠲᠠᠭ ᠰᠠᠨ ᠃
ᠮᠢᠷᠠᠯᠵᠠᠵᠤ ᠪᠠᠶ᠋ᠢᠬ᠋ᠠ ᠴᠡᠴᠡᠭ ᠨᠢ ᠬᠡᠦᠬᠡᠳ ᠂ ᠮᠢᠷᠠᠯᠵᠠᠭᠤᠯᠵᠤ ᠪᠠᠶ᠋ᠢᠬ᠋ᠠ ᠪᠠᠷ ᠢ᠋ᠶ᠋ᠠᠨ ᠲᠠᠯᠠ ᠨᠢ ᠴᠦ᠍ ᠬᠡᠦᠬᠡᠳ ᠃ ᠢᠨᠢᠶᠡᠬᠦ ᠮᠥᠷᠲᠡᠭᠡᠨ ᠤᠬᠢᠯᠠᠵᠤ ᠪᠠᠶ᠋ᠢᠲᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠭᠰᠠᠳ ᠨᠢ ᠴᠦ᠍ ᠬᠡᠦᠬᠡᠳ ᠂ ᠢᠨᠢᠶᠡᠯᠭᠡᠬᠦ ᠮᠥᠷᠲᠡᠭᠡᠨ ᠤᠬᠢᠯᠠᠭᠤᠯᠵᠤ ᠪᠠᠶ᠋ᠢᠲᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠯ ᠨᠢ ᠴᠦ᠍ ᠬᠡᠦᠬᠡᠳ ᠃
ᠬᠡᠦᠬᠡᠳ ᠠ᠋ ᠂ ᠬᠡᠦᠬᠡᠳ –– ᠬᠥᠮᠦᠨ ᠪᠠᠢᠭᠠᠯᠢ ᠶ᠋ᠢᠨ ᠨᠢᠭᠡᠳᠦᠯ ᠂ ᠪᠠᠢᠭᠠᠯᠢ ᠬᠥᠮᠦᠨ ᠦ᠌ ᠮᠥᠨ ᠴᠢᠨᠠᠷ ᠃
ᠬᠡᠦᠬᠡᠳ ᠦ᠋ᠨ ᠶᠢᠷᠲᠢᠨᠴᠦ ᠠ᠋ ᠂ ᠬᠡᠦᠬᠡᠳ ᠦ᠋ᠨ ᠶᠢᠷᠲᠢᠨᠴᠦ –– ᠠᠰᠪᠤᠷ ᠰᠢᠯᠤᠭᠤᠨ ᠬᠡᠦᠬᠡᠳ ᠦ᠋ᠨ ᠳᠣᠮᠣᠭ ᠂ ᠠᠯᠢᠶᠠ ᠳᠡᠭᠵᠢᠨ ᠬᠡᠦᠬᠡᠳ ᠦ᠋ᠨ ᠲᠣᠭᠯᠠᠮ ᠃ ᠮᠥᠨ ᠯᠡ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠪᠢ ᠂ ᠮᠣᠩᠭᠣᠯ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠢᠭᠤᠨ ᠰᠦ᠍ ᠶ᠋ᠢ ᠬᠥᠬᠥᠵᠦ ᠪᠠᠢᠭᠠ ᠬᠡᠦᠬᠡᠳ ᠦ᠋ᠨ ᠬᠤᠪᠢ ᠪᠠᠷ ᠂ ᠠᠯᠬᠤᠬᠤ ᠶ᠋ᠢ ᠰᠤᠷᠴᠤ ᠪᠠᠢᠭᠠ ᠨᠤᠭᠤᠳ ᠲᠠᠭᠠᠨ ᠪᠦᠳᠦᠷᠢᠬᠦ ᠶ᠋ᠢ ᠬᠡᠴᠢᠶᠠ ᠭᠡᠵᠦ ᠰᠠᠨᠠᠭᠤᠯᠬᠤ ᠨᠢ ᠠ᠋ ᠃