ᠲᠡᠷᠭᠡᠯ ᠰᠠᠷᠠ - ᠴᠡᠩᠬᠡᠯᠲᠦ Тэргэл сар - Цэнхэлт
260ᠲᠡᠷᠭᠡᠯ ᠰᠠᠷᠠ
1
ᠲᠡᠷᠭᠡᠯ ᠰᠠᠷᠠ ᠂ ᠲᠡᠨᠢᠭᠡᠷ ᠣᠷᠴᠢᠯᠠᠩ ᠤ᠋ᠨ ᠡᠩ ᠦ᠋ᠨ ᠵᠢᠮᠡ ᠬᠠᠤᠯᠢ ᠪᠠᠷ ᠢ᠋ᠶ᠋ᠠᠨ ᠲᠡᠨᠦᠭᠰᠡᠭᠡᠷ ᠯᠡ ᠪᠠᠢᠭᠠᠳ ᠲᠡᠷᠭᠡᠯᠡᠬᠦ ᠶᠦ᠍ᠮ ᠃
ᠮᠥᠭᠡᠷᠡᠬᠦ ᠲᠤᠭᠤᠯ ᠤ᠋ᠨ ᠳᠠᠭᠤ ᠨᠠᠮᠳᠠᠵᠤ ᠂ ᠮᠦᠰᠢᠶᠡᠬᠦ ᠴᠡᠴᠡᠭ ᠦ᠋ᠨ ᠳᠡᠯᠪᠢ ᠪᠠᠯᠠᠷᠳᠠᠵᠤ ᠂ ᠮᠥᠷᠥᠭᠡᠳᠦᠯ ᠦ᠋ᠨ ᠵᠠᠯᠠᠭᠤᠰ ᠤ᠋ᠨ ᠰᠡᠳᠬᠢᠯ ᠣᠪᠣᠯᠵᠠᠵᠤ ᠂ ᠮᠥᠴᠢᠷᠯᠡᠬᠦ ᠤᠳᠠ ᠶ᠋ᠢᠨ ᠴᠢᠮᠡᠭᠡ ᠠᠨᠢᠷᠲᠤᠨᠠ ᠃
ᠲᠡᠨᠢᠭᠦᠨ ᠠᠮᠢᠰᠬᠤᠬᠠᠭᠰᠠᠭᠠᠷ ᠪᠢ ᠂ ᠲᠡᠷᠢᠭᠦᠨ ᠡᠷᠭᠦᠵᠦ ᠬᠠᠷᠠᠪᠠᠯ ᠄
ᠲᠡᠭᠦᠰ ᠰᠠᠢᠬᠠᠨ ᠰᠢᠩᠬᠤᠨ ᠤᠯᠠᠭᠠᠨ ᠲᠤᠶᠠᠭᠠ ᠲᠡᠭᠷᠢ ᠶ᠋ᠢᠨ ᠲᠡᠷᠲᠡᠭᠡ ᠬᠠᠶᠠᠭᠠ ᠶ᠋ᠢ ᠪᠢᠯᠳᠠᠵᠤ ᠂ ᠰᠢᠷᠭᠠᠯ ᠨᠠᠷᠠ ᠮᠠᠨᠳᠤᠭᠰᠠᠨ ᠣᠷᠣᠨ ᠠᠴᠠ ᠲᠡᠷᠭᠡᠯ ᠰᠠᠷᠠ ᠳᠡᠭᠳᠡᠯᠡ ᠃
ᠲᠡᠭᠦᠨ ᠢ᠋ ᠪᠢ ᠪᠠᠬᠠᠷᠬᠠᠨ ᠬᠠᠷᠠᠭᠰᠠᠭᠠᠷ ᠂ ᠲᠡᠰᠬᠡᠯ ᠦᠭᠡᠢ ᠢᠩᠭᠢᠵᠦ ᠳᠦᠳᠦᠨᠡᠯᠡ ᠁
ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠶ᠋ᠢᠨ ᠦᠨᠡᠨᠴᠢ ᠱᠠᠷ ᠤ᠋ᠨ ᠬᠡᠪᠢᠬᠦ ᠴᠢᠮᠡᠭᠡ ᠶ᠋ᠢ ᠦᠷ ᠦ᠋ᠨ ᠡᠮᠦᠨᠡᠬᠢ ᠲᠠᠬᠢᠶᠠᠨ ᠳᠠᠭᠤ ᠲᠠᠷ ᠵᠦᠢᠷᠯᠡᠪᠡᠯ ᠶᠠᠭᠠᠬᠢᠳᠠᠭ ᠪᠢᠯᠡ?
2
ᠲᠡᠷᠭᠡᠯ ᠰᠠᠷᠠ ᠂ ᠲᠡᠨᠢᠭᠡᠷ ᠣᠷᠴᠢᠯᠠᠩ ᠤ᠋ᠨ ᠡᠩ ᠦ᠋ᠨ ᠵᠢᠮᠡ ᠬᠠᠤᠯᠢ ᠪᠠᠷ ᠢ᠋ᠶ᠋ᠠᠨ ᠲᠡᠨᠦᠭᠰᠡᠭᠡᠷ ᠯᠡ ᠪᠠᠢᠭᠠᠳ ᠲᠡᠷᠭᠡᠯᠡᠬᠦ ᠶᠦ᠍ᠮ᠃
ᠴᠣᠮᠣᠷᠯᠢᠭ ᠢ᠋ᠶ᠋ᠠᠨ ᠵᠠᠳᠠᠯᠤᠭᠠ ᠨᠢ ᠴᠡᠴᠡᠭ ᠦ᠋ᠨ ᠰᠠᠢᠬᠠᠨ ᠠᠩᠬᠢᠯᠤᠭᠠ ᠶᠤᠮ᠃ ᠬᠣᠩᠭᠣᠷ ᠢ᠋ᠶ᠋ᠠᠨ ᠲᠠᠯᠠᠯᠤᠭᠠ ᠨᠢ ᠢᠨᠠᠭ ᠤ᠋ᠨ ᠬᠠᠯᠠᠭᠤᠨ ᠰᠢᠪᠡᠨᠡᠭᠡ ᠶᠦ᠍ᠮ ᠃ ᠰᠠᠷᠠ ᠲᠠᠢ ᠰᠥᠨᠢ ᠮᠢᠨᠢ ᠡᠢᠮᠦ ᠯᠡ ᠠᠶᠠᠲᠠᠢ ᠂ ᠰᠠᠯᠤᠭᠠᠳ ᠠᠭᠤᠯᠵᠠᠬᠤ ᠮᠢᠨᠢ ᠡᠢᠮᠦ ᠯᠡ ᠵᠢᠷᠭᠠᠯᠲᠠᠢ ᠃
ᠭᠡᠪᠡᠴᠦ ᠂ ᠭᠡᠷᠡᠯ ᠲᠤᠰᠬᠠᠭᠰᠠᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠶ᠋ᠢ ᠤᠶᠠᠩᠭᠠᠯᠠᠭᠰᠠᠨ ᠨᠢ ᠣᠯᠠᠨ ᠭᠡᠬᠦ ᠳ᠋ᠦ᠍ ᠭᠡᠰᠡᠷ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠰᠠᠷᠠᠨ ᠤ᠋ ᠠᠴᠢ ᠶ᠋ᠢ ᠤᠮᠠᠷᠲᠠᠭᠰᠠᠨ ᠨᠢ ᠨᠢ ᠴᠦ᠍ ᠴᠥᠭᠡᠨ ᠪᠤᠰᠤ ᠶᠤᠮ ᠃
ᠬᠡᠩᠭᠡᠷᠭᠡ ᠬᠡᠳᠡᠷᠭᠡ ᠬᠣᠶᠠᠷ ᠠ᠋ ! ᠠᠮᠠᠷᠠᠭᠯᠠᠨ ᠰᠠᠨᠠᠯᠴᠠᠵᠤ ᠬᠡᠴᠢᠨᠡᠨ ᠬᠦᠯᠢᠭᠡᠯᠵᠡᠭᠰᠡᠨ ᠢ᠋ ᠴᠢᠨᠢ ᠲᠣᠳᠣᠷᠬᠠᠢ ᠦᠵᠡᠭᠰᠡᠳ ᠦᠭᠡᠢ ᠪᠣᠯᠪᠠᠴᠤ ᠂ ᠠᠨᠢᠪᠠᠯᠵᠠᠨ ᠭᠤᠨᠢᠭᠯᠠᠯᠴᠠᠭᠠᠳ ᠬᠡᠵᠢᠶᠡᠳᠡ ᠬᠥᠳᠡᠯᠦᠭᠰᠡᠨ ᠦᠭᠡᠢ ᠶ᠋ᠢ ᠴᠢᠨᠢ ᠬᠡᠨ ᠴᠦ᠍ ᠪᠦᠷ ᠮᠡᠳᠡᠬᠦ ᠶᠦ᠍ᠮ ᠃
ᠬᠡᠰᠢᠩᠭᠡ ᠭᠠᠷᠮᠠ ᠬᠣᠶᠠᠷ ᠠ᠋ ! ᠠᠮᠢᠳᠤᠷᠠᠯ ᠤ᠋ᠨ ᠪᠡᠷᠬᠡ ᠶ᠋ᠢ ᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠵᠠᠭᠤᠭᠠᠳ ᠲᠤᠭᠤᠯᠤᠭᠰᠠᠨ ᠢ᠋ ᠴᠢᠨᠢ ᠬᠡᠯᠡ ᠲᠡᠢ ᠪᠦᠭᠦᠳᠡ ᠮᠠᠭᠲᠠᠬᠤ ᠪᠥᠭᠡᠳ ᠠᠮᠢᠵᠢᠷᠠᠯ ᠤ᠋ᠨ ᠡᠷᠡᠨ ᠳ᠋ᠦ᠍ ᠮᠥᠷᠥ ᠪᠡᠨ ᠵᠡᠷᠭᠡᠴᠡᠭᠦᠯᠦᠭᠡᠳ ᠭᠢᠯᠠᠯᠵᠠᠬᠤ ᠶ᠋ᠢ ᠴᠢᠨᠢ ᠂ ᠬᠠᠷᠠᠴᠠ ᠲᠠᠢ ᠪᠦᠬᠦᠨ ᠠᠲᠠᠭᠠᠷᠬᠠᠬᠤ ᠶᠤᠮ ᠃
ᠲᠡᠷᠢᠭᠦᠨ ᠦ᠌ ᠡᠷᠭᠦᠵᠦ ᠂ ᠲᠡᠷᠭᠡᠯ ᠰᠠᠷᠠ ᠶ᠋ᠢ ᠪᠠᠷᠠᠯᠠᠪᠠᠯ ᠂ ᠲᠡᠭᠡᠵᠦ ᠬᠠᠷᠢᠨ ᠥᠭᠦᠯᠡᠬᠦ ᠶᠦ᠍ᠮ ––
ᠨᠣᠮᠢᠨ ᠣᠭᠲᠠᠷᠭᠤᠢ ᠳ᠋ᠠᠬᠢ ᠥᠨᠥᠴᠢᠨ ᠭᠠᠰᠢᠭᠤᠨ ᠳ᠋ᠤ᠌ ᠤᠢᠳᠬᠠᠷᠯᠠᠳᠠᠭ ᠪᠣᠯᠪᠠᠴᠤ ᠂ ᠨᠣᠭᠣᠭᠠᠨ ᠲᠠᠯᠠ ᠳ᠋ᠠᠬᠢ ᠲᠡᠭᠰᠢ ᠵᠢᠷᠭᠠᠯ ᠳ᠋ᠤ᠌ ᠰᠣᠭᠲᠣᠭᠤᠷᠠᠬᠤ ᠶᠤᠮ ᠃
3
ᠲᠡᠷᠭᠡᠯ ᠰᠠᠷᠠ ᠂ ᠲᠡᠨᠢᠭᠡᠷ ᠣᠷᠴᠢᠯᠠᠩ ᠤ᠋ᠨ ᠡᠩ ᠦ᠋ᠨ ᠵᠢᠮᠡ ᠬᠠᠤᠯᠢ ᠪᠠᠷ ᠢ᠋ᠶ᠋ᠠᠨ ᠲᠡᠨᠦᠭᠰᠡᠭᠡᠷ ᠯᠡ ᠪᠠᠢᠭᠠᠳ ᠲᠡᠷᠡ ᠨᠢᠭᠡᠨ ᠰᠥᠨᠢ ᠳ᠋ᠡᠭᠡᠨ ᠯᠡ ᠲᠡᠷᠭᠡᠯᠡᠬᠦ ᠶᠦ᠍ᠮ ᠃
ᠠᠭᠤᠯᠠᠨ ᠭᠣᠷᠣᠬᠠ ᠤᠶᠠᠬᠠᠨ ᠬᠣᠭᠣᠯᠠᠢ ᠪᠠᠷ 《ᠡᠷᠬᠡ ᠴᠢᠯᠥᠭᠡ ᠡᠨᠳᠡ ᠪᠣᠢ 》 ᠭᠡᠵᠦ ᠳᠠᠭᠤᠯᠠᠬᠤ ᠳ᠋ᠤ᠌ ᠡᠪᠡᠰᠦᠨ ᠦ᠌ ᠵᠢᠷᠭᠢᠭᠡ ᠠᠶᠠᠲᠠᠢ ᠬᠥᠭᠵᠢᠮ ᠢ᠋ᠶ᠋ᠡᠷ ( ᠡᠭᠡᠰᠢᠭ ᠬᠥᠷ ᠠᠳᠠ ᠪᠣᠢ 》 ᠭᠡᠵᠦ ᠬᠠᠪᠰᠤᠷᠤᠨᠠ ᠃
ᠦᠯᠦ ᠲᠠᠨᠢᠭᠳᠠᠭᠴᠢ ᠨᠤᠲᠤᠭ᠂ ᠥᠪᠴᠢ ᠨᠠᠮᠵᠢᠭᠤᠨ ᠰᠥᠨᠢ᠃
ᠪᠠᠭᠠ ᠨᠠᠰᠤᠨ ᠤ᠋ ᠨᠢᠭᠤᠯᠴᠠᠭᠠ ᠶ᠋ᠢᠨ ᠪᠠᠷᠠ ᠬᠠᠮᠢᠭᠠ ᠳᠠᠯᠳᠠᠯᠠᠭᠳᠠᠪᠠ ? ᠪᠠᠽᠠᠷ ᠡᠪᠦᠭᠡ ᠶ᠋ᠢᠨ ᠪᠠᠷᠬᠢᠷᠠᠭᠠ ᠳᠠᠭᠤ ᠬᠠᠮᠢᠭᠠ ᠰᠢᠷᠭᠤᠴᠢᠪᠠ ? ᠭᠠᠢᠬᠠᠰᠢ ᠠᠯᠲᠠᠨ ᠭᠠᠭᠴᠠᠭᠠᠷ ᠭᠡᠶᠦᠷᠡᠭᠰᠡᠭᠡᠷ ᠭᠡᠳᠡᠷᠭᠦ ᠬᠠᠷᠠᠪᠠᠯ ᠄
ᠬᠣᠯᠠ ᠲᠢᠪ ᠦ᠋ᠨ ᠰᠣᠨᠢᠨ ᠰᠠᠢᠬᠠᠨ ᠢ᠋ ᠳᠠᠮᠵᠢᠭᠤᠯᠳᠠᠭ 《 ᠬᠣᠭᠣᠯᠠᠢ 》 ᠨᠤᠭᠤᠳ ᠬᠤᠯᠠᠩ ᠤ᠋ᠨ ᠣᠷᠣᠢ ᠳ᠋ᠤ᠌ ᠬᠡ ᠤᠭᠠᠯᠵᠠ ᠰᠢᠭ᠋ ᠣᠷᠢᠶᠠᠯᠳᠤᠨ ᠰᠦᠯᠵᠢᠯᠳᠦᠭᠡᠳ ᠂ ᠲᠢᠶᠠᠲ᠋ᠷ ᠭᠠᠵᠠᠷ ᠯᠠ ᠴᠤᠤᠷᠢᠶᠠᠲᠤᠳᠠᠭ ᠲᠠᠨᠼ ᠤ᠋ᠨ ᠨᠤᠭᠤᠯᠠᠭᠠᠳᠤ ᠠᠶᠠᠯᠭᠤ ᠶ᠋ᠢ ᠴᠦ᠍ ᠲᠠᠷᠢᠶᠠᠨ ᠵᠠᠬᠠ ᠶ᠋ᠢᠨ ᠴᠠᠭᠠᠨᠠ ᠠᠴᠠ ᠮᠡᠷ ᠰᠡᠷ ᠰᠣᠨᠣᠰᠳᠠᠭᠣᠯᠣᠨᠠ ᠃
ᠭᠤᠲᠤᠯ ᠯᠠ ᠰᠢᠷᠢᠬᠦ ᠡᠵᠢ ᠶ᠋ᠢᠨ ᠭᠠᠷ 《ᠮᠠᠰᠢᠨ 》 ᠤ᠋ ᠲᠣᠪᠣᠷᠤᠤ ᠶ᠋ᠢ ᠲᠣᠪᠬᠢᠵᠤ ᠪᠣᠢ ᠂ ᠭᠤᠷᠮᠤᠰᠤᠨ ᠯᠠ ᠡᠯᠳᠡᠬᠦ ᠠᠪᠤ ᠶ᠋ᠢᠨ ᠠᠯᠠᠭᠠ ᠰᠢᠩᠭᠡᠭᠡᠯᠲᠡ ᠶ᠋ᠢᠨ ᠲᠣᠪᠴᠢ ᠶ᠋ᠢ ᠳᠠᠷᠤᠵᠤ ᠪᠣᠢ ᠃ ᠁
ᠲᠡᠭᠡᠭᠡᠳ ᠯᠡ ᠲᠡᠷᠭᠡᠯ ᠰᠠᠷᠠ ᠮᠢᠨᠢ ᠲᠡᠷᠡ ᠨᠢᠭᠡᠨ ᠠᠢᠯ ᠤ᠋ᠨ ᠲᠣᠭᠣᠨᠣᠨ ᠠ᠋ᠴᠠ ᠭᠠᠷᠴᠤ ᠂ ᠲᠡᠭᠷᠢ ᠶ᠋ᠢᠨ ᠣᠶᠣᠳᠠᠯ ᠰᠢᠭ᠋ ᠴᠠᠢᠷᠠᠭᠰᠠᠨ ᠭᠡᠷᠡᠯ ᠳ᠋ᠦ᠍ ᠢᠴᠢᠭᠰᠡᠨ ᠰᠢᠭ ᠪᠣᠯᠬᠤ ᠳ᠋ᠠᠭᠠᠨ ᠲᠡᠭᠡᠵᠦ ᠯᠡ ᠪᠠᠰᠠ ᠶᠠᠷᠢᠬᠤ ᠶᠤᠮ ––
ᠲᠡᠷᠭᠡᠯ ᠭᠡᠭᠴᠢ ᠪᠢ ᠭᠠᠭᠴᠠᠭᠠᠷ ᠪᠢᠰᠢ ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠶᠤᠮ ᠂ ᠳᠡᠭᠳᠡᠵᠦ ᠪᠠᠢᠭᠠ ᠨᠢ ᠪᠢ ᠲᠡᠷᠭᠡᠯ ᠴᠦ᠍ ᠂ ᠳᠡᠯᠭᠡᠷᠡᠵᠦ ᠪᠠᠢᠭᠠ ᠨᠢ ᠠᠮᠢᠳᠤᠷᠠᠵᠤ ᠦᠨᠡᠳᠡ ᠲᠥᠭᠥᠷᠢᠭ ᠶᠦ᠍ᠮ ᠃