ᠰᠢᠭᠦᠰᠦ ᠲᠠᠯᠪᠢᠬᠤ ᠶᠣᠰᠣ- ᠤᠯᠠᠭᠠᠨ ᠢᠳᠡᠭᠡШүүс тавих ёс-улаан идээ
389ᠰᠢᠭᠦᠰᠦ ᠲᠠᠯᠪᠢᠬᠤ ᠶᠣᠰᠣ
ᠰᠢᠭᠦᠰᠦ-ᠤᠯᠠᠭᠠᠨ ᠢᠳᠡᠭᠡᠨ
ᠡᠵᠡᠨᠡ ᠲᠤᠷᠭᠤᠳ ᠤᠨ ᠰᠢᠭᠦᠰᠦ ᠲᠠᠯᠪᠢᠬᠤ ᠶᠤᠰᠤᠨ ᠳᠤ ᠵᠤᠮᠠ ᠪᠦᠬᠦᠯᠢ ᠰᠢᠭᠦᠰᠦ᠂ ᠵᠠᠳᠠᠭᠠᠢ ᠰᠢᠭᠦᠰᠦ ᠲᠠᠯᠪᠢᠬᠤ ᠵᠡᠷᠭᠡ ᠶᠤᠰᠤᠨ ᠪᠠᠢᠵᠤ᠂ ᠰᠢᠭᠦᠰᠦ ᠲᠠᠯᠪᠢᠭᠴᠢ ᠦᠪᠡᠷᠰᠡᠳ ᠤᠨ ᠬᠦᠰᠡᠯ ᠬᠡᠷᠡᠭᠴᠡᠭᠡ ᠪᠠᠨ ᠦᠨᠳᠦᠰᠦᠯᠡᠨ ᠠᠳᠠᠯᠢ ᠪᠤᠰᠤ ᠪᠠᠷ ᠲᠠᠯᠪᠢᠵᠤ᠂ ᠰᠢᠳᠦᠭᠡᠨ ᠢ ᠬᠦᠨᠳᠦᠯᠡᠵᠦ ᠭᠡᠢᠴᠢ ᠪᠠᠨ ᠲᠤᠭᠤᠵᠤ ᠶᠤᠰᠤ ᠶᠠᠪᠤᠳᠠᠯ ᠢᠶᠠᠨ ᠭᠦᠢᠴᠡᠳᠬᠡᠳᠡᠭ ᠪᠠᠢᠵᠠᠢ᠃
ᠵᠤᠮᠠ ᠵᠤᠭᠤᠬᠤ᠄
ᠵᠤᠮᠠ ᠪᠤᠯ ᠮᠤᠩᠭᠤᠯ ᠶᠤᠰᠤᠨ ᠤ ᠶᠡᠭᠡ ᠲᠠᠢᠯᠠᠯᠭᠠ ᠳᠤ ᠬᠠᠮᠤᠭ ᠤᠨ ᠬᠦᠨᠳᠦᠳᠡᠢ ᠲᠠᠢᠯᠠᠯᠭᠠ ᠳᠤ ᠲᠤᠭᠠᠴᠠᠭᠳᠠᠬᠤ ᠢᠳᠡᠭᠡᠨ ᠪᠤᠯᠬᠤ ᠪᠦᠭᠡᠳ ᠡᠵᠡᠨᠡ ᠳᠤ ᠭᠤᠤᠯᠳᠠᠭᠤ ᠪᠤᠷᠬᠠᠨ ᠰᠢᠳᠦᠭᠡᠨ ᠳᠤ ᠲᠠᠯᠪᠢᠨ᠂ ᠬᠤᠯᠠ ᠭᠠᠵᠠᠷ ᠤᠨ ᠸᠠᠩ ᠨᠤᠶᠠᠳ ᠤᠨ ᠵᠢᠯ ᠴᠠᠭᠠ ᠶᠢᠨ ᠠᠮᠤᠷ ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠬᠤ ᠳᠤ ᠬᠦᠨᠳᠦ ᠶᠢᠨ ᠪᠡᠯᠡᠭ ᠪᠤᠯᠭᠠᠨ ᠬᠦᠷᠭᠡᠳᠡᠭ ᠪᠠᠢᠵᠠᠢ᠃ ᠵᠤᠮᠠ ᠭᠡᠵᠦ ᠢᠷᠭᠡ (ᠬᠤᠨᠢ) ᠶᠢ ᠦᠷᠦᠴᠡᠯᠡᠨ ᠨᠢᠳᠦᠯᠵᠦ ᠭᠡᠳᠡᠰᠦ ᠲᠤᠳᠤᠷ ᠢ ᠨᠢ ᠠᠭᠤᠳᠠᠯᠯᠠᠨ ᠭᠠᠷᠭᠠᠵᠤ᠂ ᠤᠰᠤ ᠪᠠᠷ ᠴᠢᠰᠤ ᠰᠢᠭᠦᠰᠦ ᠶᠢ ᠨᠢ ᠤᠭᠢᠶᠠᠨ ᠴᠡᠪᠡᠷᠯᠡᠭᠡᠳ ᠭᠡᠳᠡᠰᠦ ᠶᠢ ᠪᠤᠴᠠᠭᠠᠨ ᠤᠶᠤᠵᠤ ᠪᠤᠴᠠᠯᠤᠭᠰᠠᠨ ᠤᠰᠤ ᠲᠠᠢ ᠲᠤᠮᠤ ᠲᠤᠭᠤᠭᠠᠨ ᠳᠤ ᠬᠢᠵᠦ ᠵᠤᠮᠠᠯᠠᠨ᠂ ᠦᠰᠦ ᠨᠤᠤᠰᠤ ᠶᠢ ᠨᠢ ᠲᠤᠰᠬᠠᠢ ᠪᠡᠯᠡᠳᠦᠭᠰᠡᠨ ᠮᠤᠳᠤᠨ ᠰᠢᠨᠠᠭᠠ ᠪᠠᠷ ᠬᠤᠰᠤᠵᠤ ᠠᠪᠤᠨ ᠲᠤᠭᠤᠭᠠᠨ ᠠᠴᠠ ᠭᠠᠷᠭᠠᠨ ᠵᠤᠭᠰᠤᠭᠠ ᠬᠤᠨᠢ ᠶᠢᠨ ᠶᠠᠩᠵᠤ ᠪᠠᠷ ᠡᠪᠯᠡᠨ ᠲᠠᠯᠪᠢᠬᠤ ᠪᠤᠶᠤ ᠲᠤᠮᠤ ᠴᠠᠷᠠ ᠳᠤ ᠬᠡᠪᠳᠡᠭᠦᠯᠦᠨ ᠲᠠᠯᠪᠢᠬᠤ ᠶᠢ ᠬᠡᠯᠡᠨᠡ᠃ ᠬᠠᠯᠠᠭᠤᠨ ᠤᠰᠤ ᠪᠠᠷ ᠵᠤᠮᠠᠯᠠᠵᠤ ᠨᠤᠤᠰᠤ ᠶᠢ ᠨᠢ ᠠᠪᠳᠠᠭ ᠪᠤᠯᠬᠤᠷ ᠵᠤᠮᠠ ᠬᠤᠨᠢ ᠪᠤᠶᠤ ᠵᠤᠮᠠ ᠭᠡᠮᠡᠨ ᠨᠡᠷᠡᠯᠡᠭᠰᠡᠨ ᠪᠤᠯᠤᠯᠳᠠᠢ᠃ ᠰᠦᠮᠡ ᠭᠡᠢᠳ ᠤᠨ ᠴᠠᠭᠠᠨ ᠰᠠᠷᠠ ᠶᠢᠨ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠶᠢᠨ ᠴᠤᠩᠭᠢᠷ ᠲᠤ ᠲᠡᠭᠡᠳᠦ ᠶᠢᠨ ᠢᠳᠡᠭᠡᠨ ᠪᠤᠯᠭᠠᠨ᠂ ᠵᠤᠮᠠᠯᠠᠭᠰᠠᠨ ᠬᠤᠨᠢᠨ ᠲᠤᠯᠤᠭᠠᠢ ᠶᠢᠨ ᠭᠠᠳᠠᠷ ᠡᠪᠡᠷ ᠢ ᠠᠪᠴᠤ᠂ ᠴᠢᠬᠢ ᠬᠠᠮᠠᠷ ᠡᠪᠡᠷ ᠮᠠᠩᠨᠠᠢ ᠶᠢ ᠰᠢᠷᠠ ᠲᠤᠰᠤ ᠪᠤᠶᠤ ᠴᠠᠭᠠᠨ ᠲᠤᠰᠤ ᠪᠠᠷ ᠴᠢᠮᠡᠨ᠂ ᠲᠠᠪᠤᠨ ᠦᠩᠭᠡ ᠶᠢᠨ ᠭᠭᠢᠪ ᠢ ᠬᠦᠵᠦᠭᠦᠨ ᠳᠤᠨᠢ ᠤᠶᠠᠵᠤ᠂ ᠡᠪᠡᠷ ᠲᠡᠭᠡᠷᠡ ᠨᠢ ᠪᠠᠰᠠ ᠨᠢᠬᠡ ᠬᠠᠳᠠᠭ ᠲᠤᠬᠤᠭᠠᠳ᠂ ᠶᠡᠭᠡ (ᠴᠤᠭᠴᠢᠨ) ᠲᠤᠭᠠᠩ ᠤᠨ ᠲᠤᠮᠤ ᠪᠤᠷᠬᠠᠳ ᠤᠨ ᠡᠮᠦᠨᠡ ᠤᠯᠠᠭᠠᠨ ᠢᠰᠡᠭᠡᠢ ᠲᠡᠪᠢᠰᠦᠨ ᠲᠡᠭᠡᠷᠡ ᠨᠢ ᠵᠤᠮᠠ ᠬᠤᠨᠢ ᠪᠠᠨ ᠡᠪᠯᠡᠨ ᠵᠤᠭᠰᠤᠭᠠᠬᠤ ᠪᠦᠭᠡᠳ ᠬᠤᠷᠠᠯ ᠤᠨ ᠤᠩᠰᠢᠯᠭᠠ ᠪᠠᠷᠠᠭᠰᠠᠨ ᠤ ᠲᠠᠷᠠᠭᠠ ᠦᠶᠡ ᠮᠦᠴᠢ ᠪᠠᠷ ᠨᠢ ᠰᠠᠯᠭᠠᠨ ᠴᠢᠨᠠᠵᠤ ᠪᠦᠬᠦ ᠯᠠᠮᠠ ᠳᠠᠭᠠᠨ ᠬᠤᠪᠢᠶᠠᠨ ᠦᠭᠴᠦ ᠠᠮᠰᠠᠭᠤᠯᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠢᠵᠠᠢ᠃
ᠪᠦᠬᠦᠯᠢ ᠰᠢᠭᠦᠰᠦ ᠲᠠᠯᠪᠢᠬᠤ᠄
ᠪᠦᠬᠦᠯᠢ ᠰᠢᠭᠦᠰᠦ ᠭᠡᠳᠡᠭ ᠪᠤᠯ ᠤᠭᠤᠴᠠᠨ ᠤ ᠢᠪᠡᠯᠭᠡ ᠳᠤ ᠬᠠ ᠭᠤᠶᠠ (ᠭᠤᠶᠠ ᠶᠢᠨ ᠮᠢᠬᠠᠨ ᠤ ᠶᠡᠬᠡᠩᠬᠢ ᠨᠢ ᠤᠭᠤᠴᠠ ᠳᠤ ᠶᠠᠪᠤᠳᠠᠭ) ᠶᠢ ᠮᠥᠴᠢᠯᠡᠬᠦ ᠦᠭᠡᠢ ᠪᠦᠳᠦᠨ ᠶᠤᠰᠤ ᠪᠠᠷ ᠨᠢ ᠲᠠᠯᠪᠢᠭᠠᠳ ᠲᠡᠭᠡᠷᠡ ᠨᠢ ᠤᠭᠤᠴᠠ ᠪᠠᠨ ᠬᠦᠮᠦᠷᠢᠵᠦ ᠲᠠᠯᠪᠢᠬᠤ ᠶᠢ ᠬᠡᠯᠡᠨᠡ᠃ ᠲᠡᠭᠦᠨ ᠢ ᠭᠤᠤᠯᠳᠠᠭᠤ ᠰᠦᠮᠡ ᠬᠡᠢᠳ ᠤᠨ ᠠᠯᠳᠠᠨ ᠲᠠᠯᠠᠯᠭᠠ᠂ ᠵᠢᠯ ᠴᠠᠭᠠ ᠶᠢᠨ ᠴᠤᠩᠭᠢᠷ ᠲᠤ ᠵᠤᠷᠢᠭᠤᠯᠵᠤ ᠡᠷᠭᠦᠬᠦ ᠶᠢᠨ ᠬᠠᠮᠳᠤ ᠬᠤᠪᠢ ᠠᠢᠯ ᠤᠨ ᠨᠠᠮᠤᠷ ᠤᠨ ᠲᠠᠯᠠᠯᠭᠠ ᠳᠤ ᠪᠤᠷᠬᠠᠨ ᠰᠢᠳᠦᠭᠡᠨ᠂ ᠯᠠᠮᠠ ᠭᠡᠭᠡᠨ ᠳᠤ ᠵᠤᠷᠢᠭᠤᠯᠤᠨ ᠪᠠᠰᠠ ᠲᠠᠯᠪᠢᠳᠠᠭ ᠪᠠᠢᠭᠰᠠᠨ ᠪᠦᠭᠡᠳ ᠵᠤᠮᠠᠯᠠᠵᠤ ᠴᠢᠨᠠᠭᠰᠠᠨ ᠪᠤᠶᠤ ᠬᠤᠢᠬᠠᠯᠠᠵᠤ ᠴᠢᠨᠠᠭᠰᠠᠨ ᠲᠤᠯᠤᠭᠠᠢ (ᠪᠦᠬᠦᠯᠢ ᠲᠤᠯᠤᠭᠠᠢ) ᠲᠠᠢ ᠨᠢ ᠲᠠᠯᠪᠢᠨᠠ᠃ ᠲᠡᠭᠡᠬᠦ ᠳᠡᠭᠡᠨ ᠲᠦᠷᠦ ᠶᠢᠨ ᠲᠦᠭᠡᠯ ᠲᠥᠬᠦᠷᠢᠭ᠂ ᠪᠤᠷᠬᠠᠨ ᠤ ᠲᠦᠭᠡᠯ ᠭᠤᠷᠪᠠᠯᠵᠢᠨ ᠭᠡᠳᠡᠭ ᠢᠶᠠᠷ ᠲᠦᠷᠦ ᠵᠠᠰᠠᠭ ᠤᠨ ᠨᠤᠶᠠᠳ ᠲᠦᠰᠢᠮᠡᠳ ᠲᠤ ᠵᠤᠷᠢᠭᠤᠯᠵᠤ ᠲᠠᠯᠪᠢᠭᠰᠠᠨ ᠲᠤᠯᠤᠭᠠᠢ ᠶᠢᠨ ᠮᠠᠩᠨᠠᠢ ᠳᠤ ᠲᠤᠭᠤᠢ ᠲᠡᠮᠳᠡᠭ ᠭᠠᠷᠭᠠᠵᠤ᠂ ᠪᠤᠷᠬᠠᠨ ᠱᠠᠵᠢᠨ ᠳᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠲᠤᠯᠤᠭᠠᠢ ᠶᠢᠨ ᠮᠠᠩᠨᠠᠢ ᠳᠤ ᠭᠤᠷᠪᠠᠯᠵᠢᠨ ᠲᠡᠮᠳᠡᠭ ᠭᠠᠷᠭᠠᠨ ᠦᠬᠡᠬᠦ ᠲᠤᠰᠤ ᠪᠠᠷ ᠴᠢᠮᠡᠭᠯᠡᠨ ᠮᠢᠯᠢᠶᠠᠵᠤ ᠲᠠᠯᠪᠢᠳᠠᠭ ᠶᠤᠰᠤ ᠲᠠᠢ᠂ ᠡᠭᠦᠨ ᠢᠶᠠᠨ ᠲᠤᠯᠤᠭᠠᠢ ᠴᠢᠮᠡᠬᠦ ᠪᠠ ᠮᠢᠯᠢᠶᠠᠬᠤ ᠭᠡᠨᠡ᠃ ᠬᠠᠷᠢᠨ ᠪᠦᠳᠦᠨ ᠰᠢᠭᠦᠰᠦ ᠶᠢ ᠭᠦᠢᠴᠡᠳ ᠪᠤᠯᠭᠤᠬᠤ ᠪᠤᠰᠤ ᠦᠩᠭᠡ ᠶᠢ ᠨᠢ ᠲᠦᠩᠭᠡᠵᠢ ᠬᠤᠪᠢᠷᠠᠭᠠᠭᠠᠳ ᠲᠠᠯᠪᠢᠬᠤ (ᠪᠤᠷᠬᠠᠨ ᠰᠢᠳᠦᠭᠡᠨ᠂ ᠯᠠᠮᠠ ᠭᠡᠭᠡᠨ ᠳᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠵᠠᠳᠠᠭᠠᠢ ᠰᠢᠭᠦᠰᠦ ᠴᠤ᠌ ᠭᠡᠰᠡᠨ ᠠᠳᠠᠯᠢ) ᠪᠦᠭᠡᠳ ᠬᠤᠷᠠᠯ ᠨᠤᠮ ᠲᠠᠭᠤᠰᠤᠭᠰᠠᠨ ᠤ ᠲᠠᠷᠠᠭᠠ ᠮᠦᠴᠢᠯᠡᠨ ᠰᠠᠯᠭᠠᠵᠤ ᠴᠢᠨᠠᠨ ᠲᠠᠬᠢᠨᠳᠠ ᠲᠠᠪᠠᠭᠯᠠᠵᠤ (ᠲᠠᠷᠤᠢ ᠵᠠᠳᠠᠭᠠᠢ ᠰᠢᠭᠦᠰᠦ ᠪᠤᠯᠭᠠᠨ) ᠯᠠᠮᠠ ᠭᠡᠭᠡᠨ ᠳᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠵᠤ᠂ ᠰᠢᠭᠦᠰᠦ ᠬᠦᠨᠳᠡᠬᠦ ᠬᠦᠮᠦᠨ ᠠᠴᠠ ᠤᠭᠤᠴᠠ ᠵᠦᠰᠦᠬᠦ ᠶᠤᠰᠤ (ᠵᠠᠳᠠᠭᠠᠢ ᠰᠢᠭᠦᠰᠦᠨ ᠤ ᠵᠦᠰᠦᠯᠳᠡ ᠲᠠᠢ ᠠᠳᠠᠯᠢ) ᠭᠦᠢᠴᠡᠳᠬᠡᠨ᠂ ᠰᠡᠭᠦᠯ ᠢ ᠨᠢ ᠪᠦᠬᠦᠨ ᠢ ᠪᠤᠶᠤ ᠬᠠᠭᠠᠰ ᠢ ᠤᠭᠳᠤᠯᠤᠨ ᠠᠪᠴᠤ ᠬᠤᠶᠠᠷ ᠦᠨᠳᠦᠷ ᠬᠠᠪᠢᠰᠥ (ᠬᠠᠪᠢᠷᠭᠠ) ᠲᠠᠢ ᠬᠠᠮᠳᠤ ᠰᠠᠬᠢᠭᠤᠰᠤ ᠰᠢᠳᠦᠭᠡᠨ ᠳᠤ ᠲᠠᠪᠠᠭᠯᠠᠨ ᠲᠠᠯᠪᠢᠵᠤ᠂ ᠪᠤᠰᠤᠳ ᠮᠢᠬᠠ ᠶᠢ ᠴᠤᠩᠭᠢᠷ ᠤᠨ ᠤᠨᠳᠤᠤ ᠢᠳᠡᠭᠡᠨ ᠲᠠᠢ ᠬᠠᠮᠳᠤ ᠬᠤᠪᠢᠶᠠᠯᠴᠠᠨ ᠢᠳᠡᠵᠡᠭᠡᠨᠡ᠃
ᠪᠦᠬᠦᠯᠢ ᠪᠠ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠳᠤ ᠲᠠᠯᠪᠢᠬᠤ
ᠤᠭᠤᠴᠠ ᠶᠢᠨ ᠬᠡᠰᠡᠭ ᠲᠤ ᠰᠦᠪᠡᠭᠡ ᠶᠢᠨ ᠵᠢᠷᠭᠤᠭᠠᠨ ᠬᠠᠪᠢᠰᠤ (ᠨᠢᠭᠡ ᠲᠠᠯᠠ ᠳᠤᠨᠢ ᠭᠤᠷᠪᠠ) ᠶᠢᠨ ᠬᠡᠰᠡᠭ᠂ ᠦᠭᠡᠷᠡ ᠪᠠᠷ ᠬᠡᠯᠡᠪᠡᠯ ᠬᠠᠷᠠ ᠨᠢᠷᠤᠭᠤᠨ ᠠᠴᠠ ᠰᠡᠭᠦᠯ ᠬᠦᠷᠳᠡᠯᠡᠬᠢ ᠬᠡᠰᠡᠭ (ᠰᠡᠭᠦᠯ ᠪᠠᠭᠳᠠᠨᠠ) ᠪᠦᠷ ᠪᠠᠭᠳᠠᠬᠤ ᠪᠦᠭᠡᠳ ᠪᠦᠬᠦᠯᠢ ᠵᠠᠳᠠᠭᠠᠢ ᠰᠢᠭᠦᠰᠦ ᠶᠢ ᠠᠩᠬᠠᠨ ᠳᠠᠭᠠᠨ ᠵᠤᠭᠤᠴᠠ ᠵᠤᠭᠤᠨᠠ ᠭᠡᠵᠦ ᠪᠠᠢᠭᠠᠳ ᠤᠳᠤ ᠤᠯᠠᠩᠬᠢ ᠨᠢ ᠤᠭᠤᠴᠠ ᠵᠤᠭᠤᠨᠠ ᠭᠡᠳᠡᠭ ᠪᠤᠯᠵᠠᠢ᠃
ᠵᠠᠳᠠᠭᠠᠢ ᠰᠢᠭᠦᠰᠦ ᠲᠠᠯᠪᠢᠬᠤ᠄ ᠵᠠᠳᠠᠭᠠᠢ ᠰᠢᠭᠦᠰᠦ ᠭᠡᠵᠦ ᠤᠭᠤᠴᠠᠨ ᠤ ᠢᠪᠡᠯᠭᠡ ᠳᠤ ᠬᠠ ᠭᠤᠶᠠ ᠶᠢ ᠦᠶᠡ ᠮᠦᠴᠢ ᠪᠠᠷ ᠨᠢ ᠰᠠᠯᠭᠠᠵᠤ ᠲᠠᠯᠪᠢᠭᠠᠳ ᠲᠡᠭᠡᠷᠡ ᠠᠴᠠ ᠨᠢ ᠤᠭᠤᠴᠠ ᠪᠠᠨ ᠬᠦᠮᠦᠷᠢᠵᠦ ᠲᠠᠯᠪᠢᠬᠤ ᠶᠢ ᠬᠡᠯᠡᠨᠡ᠃ ᠪᠠᠰᠠ ᠡᠩ ᠤᠨ ᠤᠭᠤᠴᠠ᠂ ᠶᠡᠷᠦ ᠶᠢᠨ ᠤᠭᠤᠴᠠ ᠭᠡᠳᠡᠭ᠃ ᠡᠭᠦᠨ ᠢ ᠭᠤᠤᠯᠳᠠᠭᠤ ᠬᠤᠷᠢᠮ ᠬᠤᠢ᠂ ᠵᠢᠰᠢᠶᠡ ᠲᠠᠯᠠᠯᠭᠠ᠂ ᠤᠪᠤᠭᠠᠨ ᠲᠠᠬᠢᠯᠭᠠ᠂ ᠦᠷᠡᠰ ᠨᠠᠢᠷ᠂ ᠵᠢᠯ ᠴᠠᠭᠠ᠂ ᠨᠤᠶᠠᠳ ᠬᠡᠬᠡᠳ ᠤᠨ ᠪᠠᠶᠠᠷ᠂ ᠬᠤᠳᠠ ᠤᠷᠤᠭ ᠤᠨ ᠵᠤᠯᠭᠠᠯᠳᠠ ᠵᠡᠷᠭᠡ ᠪᠠᠶᠠᠷ ᠨᠠᠢᠷ ᠶᠤᠰᠤ ᠶᠠᠪᠤᠳᠠᠯ ᠳᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠬᠤ ᠪᠦᠭᠡᠳ ᠪᠦᠬᠦᠯᠢ ᠰᠢᠭᠦᠰᠦ ᠶᠢ ᠪᠤᠳᠤᠪᠠᠯ ᠬᠡᠷᠡᠭᠯᠡᠭᠳᠡᠬᠦ ᠬᠡᠪᠴᠢᠶᠡ ᠪᠠᠷ ᠦᠷᠭᠡᠨ ᠪᠠᠢᠳᠠᠭ ᠪᠠᠢᠵᠠᠢ᠃ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠳᠤ ᠬᠤᠨᠢᠨ ᠲᠤᠯᠤᠭᠠᠢ ᠲᠠᠭᠠᠭᠤᠯᠵᠤ ᠲᠠᠯᠪᠢᠬᠤ ᠪᠠ ᠦᠯᠦ ᠲᠠᠯᠪᠢᠬᠤ ᠬᠤᠶᠠᠷ ᠶᠠᠩᠵᠤ ᠪᠠᠢᠭᠰᠠᠨ ᠪᠠᠢᠨᠠ᠃ ᠵᠠᠳᠠᠭᠠᠢ ᠰᠢᠭᠦᠰᠦ ᠲᠠᠪᠠᠭᠯᠠᠬᠤ ᠳᠠᠭᠠᠨ ᠬᠦᠵᠦᠭᠦᠦ ᠠᠴᠠ ᠪᠤᠰᠤ ᠮᠢᠬᠠ (ᠵᠠᠷᠢᠮ ᠨᠢ ᠰᠡᠭᠦᠵᠢ ᠲᠠᠯᠪᠢᠳᠠᠭ ᠦᠭᠡᠢ ᠭᠡᠵᠦ ᠪᠤᠢ᠂ ᠭᠡᠶᠡ ᠴᠦᠬᠡᠨ) ᠶᠢ ᠪᠦᠷ ᠲᠠᠯᠪᠢᠬᠤ ᠮᠦᠷᠳᠡᠭᠡᠨ ᠪᠦᠳᠦᠨ ᠰᠡᠭᠡᠷ ᠢ ᠤᠭᠤᠴᠠᠨ ᠤ ᠲᠤᠯᠤᠭᠠᠢ ᠲᠠᠯᠠ ᠳᠤ ᠲᠡᠪᠢᠰᠭᠡᠷ ᠪᠤᠯᠭᠠᠨ ᠬᠦᠨᠳᠡᠯᠡᠨ ᠲᠠᠯᠪᠢᠵᠤ (ᠰᠡᠭᠡᠷ ᠤᠨ ᠰᠢᠯᠢ ᠶᠢ ᠲᠤᠳᠤᠭᠰᠢ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠨᠠ)᠂ ᠪᠤᠰᠤᠳ ᠮᠢᠬᠠ ᠶᠢ ᠮᠠᠯ ᠤᠨ ᠠᠮᠢᠳᠤ ᠪᠠᠢᠬᠤ ᠶᠠᠩᠵᠤ ᠪᠠᠷ ᠪᠠᠢᠷᠢᠰᠢᠭᠤᠯᠤᠨ ᠲᠠᠯᠪᠢᠨᠠ᠃ ᠶᠡᠷᠦᠩᠭᠡᠢ ᠳᠡᠭᠡᠨ ᠮᠦᠴᠢ ᠪᠤᠯᠭᠠᠨ ᠤ ᠨᠠᠷᠢᠨ ᠲᠠᠯᠠ ᠶᠢ ᠨᠢᠭᠡ ᠵᠦᠭ ᠲᠤ ᠬᠠᠨᠳᠤᠭᠤᠯᠤᠨ ᠲᠡᠰ ᠲᠠᠷᠠᠭᠠ ᠲᠠᠢ ᠲᠠᠯᠪᠢᠳᠠᠭ ᠪᠥᠬᠡᠳ ᠲᠡᠷᠡ ᠲᠠᠯᠠ ᠶᠢ ᠭᠡᠢᠴᠢ ᠲᠠᠯᠠ ᠬᠠᠨᠳᠤᠭᠤᠯᠬᠤ ᠶᠤᠰᠤ ᠲᠠᠢ᠃ ᠡᠢᠮᠦᠷᠬᠦ ᠤᠭᠤᠴᠠᠨ ᠤ ᠲᠡᠪᠢᠰᠭᠡᠷ ᠮᠢᠬᠠ ᠶᠢ ᠤᠭᠤᠴᠠᠨ ᠤ ᠢᠪᠡᠯᠭᠡ ᠶᠢᠨ ᠮᠢᠬᠠ ᠭᠡᠳᠡᠭ᠃ ᠢᠪᠡᠯᠭᠡ ᠶᠢᠨ ᠮᠢᠬᠠ ᠶᠢ ᠲᠠᠪᠠᠭ ᠲᠦᠭᠦᠷᠭᠡᠵᠦ ᠲᠠᠯᠪᠢᠬᠤ ᠶᠤᠰᠤ ᠲᠠᠢ᠂ ᠦᠭᠡᠢ ᠪᠤᠯ ᠤᠭᠤᠴᠠ ᠬᠦᠨᠳᠡᠢᠷᠡᠵᠦ ᠬᠦᠨᠳᠦ ᠪᠠᠨ ᠠᠯᠳᠠᠨᠠ ᠭᠡᠳᠡᠭ᠃ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠤ ᠢᠪᠡᠯᠭᠡ ᠶᠢᠨ ᠮᠢᠬᠠ ᠳᠤ ᠵᠠᠪᠠᠯ ᠬᠤᠶᠠᠷ ᠬᠠ ᠬᠤᠶᠠᠷ ᠭᠤᠶᠠ ᠲᠠᠯᠪᠢᠬᠤ ᠠᠯᠪᠠ ᠦᠭᠡᠢ᠂ ᠭᠡᠢᠴᠢ ᠶᠢᠨ ᠤᠯᠠᠨ ᠴᠦᠬᠡᠨ ᠢ ᠦᠨᠳᠦᠰᠦᠯᠡᠵᠦ ᠬᠤᠶᠠᠷ ᠬᠠ ᠨᠢᠭᠡ ᠭᠤᠶᠠ᠂ ᠨᠢᠭᠡ ᠬᠠ ᠨᠢᠭᠡ ᠭᠤᠶᠠ ᠭᠡᠬᠦ ᠮᠡᠳᠦ ᠪᠠᠷ ᠵᠤᠬᠢᠴᠠᠭᠤᠯᠤᠨ ᠲᠠᠯᠪᠢᠳᠠᠭ ᠪᠠᠢᠵᠠᠢ᠃ ᠢᠪᠡᠯᠭᠡ ᠶᠢᠨ ᠮᠢᠬᠠ ᠳᠤ ᠪᠤᠭᠤᠨᠢ ᠬᠠᠪᠢᠰᠤ ᠲᠠᠯᠪᠢᠬᠤ ᠦᠭᠡᠢ᠂ ᠡᠪᠴᠢᠭᠦᠨ ᠤ ᠪᠦᠳᠦᠷᠬᠡᠢ᠂ ᠲᠠᠯᠤ ᠶᠢᠨ ᠮᠦᠭᠡᠷᠰᠦ᠂ ᠲᠤᠮᠳᠠ ᠴᠢᠮᠦᠭᠡᠨ ᠤ ᠬᠤᠯᠠᠭᠠᠢ ᠪᠤᠯᠴᠢᠩ᠂ ᠱᠠᠭᠠ ᠴᠢᠮᠦᠭᠡᠨ (ᠲᠤᠰ ᠴᠢᠮᠦᠭᠡᠨ ᠤ ᠭᠠᠳᠠᠷ ᠬᠠᠯᠢᠰᠤ ᠶᠢ ᠱᠠᠭᠠᠯᠵᠤ ᠲᠠᠯᠪᠢᠬᠤ ᠶᠤᠰᠤ ᠲᠠᠢ ᠪᠠᠢᠵᠠᠢ) ᠤ ᠬᠠᠷᠠ ᠪᠤᠷᠪᠢ ᠵᠡᠷᠭᠡ ᠶᠢ ᠠᠪᠴᠤ ᠲᠠᠯᠪᠢᠬᠤ ᠶᠤᠰᠤ ᠲᠠᠢ ᠪᠦᠭᠡᠳ ᠵᠠᠯᠠᠭᠠ ᠴᠢᠮᠦᠭᠡ (ᠤᠯᠠᠩᠬᠢ ᠪᠠᠢᠳᠠᠯ ᠲᠤᠤᠷᠠ ᠲᠠᠯᠪᠢᠳᠠᠭ ᠦᠭᠡᠢ ᠪᠠᠢᠭᠰᠠᠨ ᠭᠡᠳᠡᠭ) ᠶᠢᠨ ᠦᠪᠦᠷ ᠲᠠᠯᠠ ᠶᠢᠨ ᠪᠤᠯᠴᠢᠩ ᠢ ᠵᠠᠪᠠᠯ ᠭᠤᠷᠪᠠ ᠤᠭᠳᠤᠯᠵᠤ᠂ ᠠᠷᠤ ᠲᠠᠯᠠ ᠶᠢᠨ ᠭᠡᠵᠢᠭᠡ ᠮᠢᠬᠠ ᠶᠢ ᠠᠪᠴᠤ ᠲᠠᠯᠪᠢᠬᠤ ᠴᠡᠭᠡᠷ ᠶᠤᠰᠤ ᠲᠠᠢ ᠪᠠᠢᠭᠰᠠᠨ᠂ ᠡᠢᠮᠦ ᠶᠤᠰᠤ ᠶᠢ ᠲᠠᠯᠤ ᠪᠠ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠲᠠᠪᠠᠭ ᠮᠢᠬᠠ ᠳᠤ ᠴᠤ᠌ ᠭᠡᠰᠡᠨ ᠠᠳᠠᠯᠢ ᠵᠢᠷᠤᠮᠯᠠᠨᠠ᠃ ᠤᠭᠤᠴᠠ ᠲᠠᠯᠪᠢᠬᠤ ᠲᠤᠭᠳᠠᠭᠰᠠᠨ ᠶᠤᠰᠤ ᠵᠢᠷᠤᠮ ᠢ ᠵᠦᠷᠢᠴᠡᠵᠦ ᠪᠤᠷᠤᠭᠤ ᠲᠠᠯᠪᠢᠭᠰᠠᠨ ᠪᠤᠯ ᠦᠩᠭᠡᠷᠡᠭᠰᠡᠨ ᠳᠤ ᠬᠤᠷᠢᠮ ᠨᠠᠢᠷ᠂ ᠲᠠᠭᠠᠬᠢ᠂ ᠵᠢᠰᠢᠶᠡ ᠲᠠᠬᠢᠬᠤ ᠵᠡᠷᠭᠡ ᠳᠤ ᠠᠭᠰᠤᠮ ᠲᠠᠯᠪᠢᠬᠤ᠂ ᠬᠡᠷᠡᠭᠦᠯ ᠴᠤᠤᠭᠢᠶᠠᠨ ᠪᠤᠯᠬᠤ᠂ ᠤᠭᠤᠴᠠ ᠰᠢᠭᠦᠰᠦᠨ ᠤ ᠲᠠᠪᠠᠭ ᠢᠳᠡᠭᠡ ᠬᠦᠮᠦᠷᠢᠬᠦ ᠶᠠᠷᠰᠢᠭ ᠲᠦᠪᠡᠭ ᠲᠠᠢ ᠤᠴᠢᠷ ᠭᠠᠷᠳᠠᠭ ᠪᠠᠢᠵᠠᠢ᠃
ᠢᠪᠡᠯᠭᠡ ᠶᠢᠨ ᠮᠢᠬᠠ ᠶᠢ ᠰᠠᠢᠳᠤᠷ ᠪᠠᠢᠷᠢᠰᠢᠭᠤᠯᠤᠭᠰᠠᠨ ᠤ ᠲᠠᠷᠠᠭᠠ ᠤᠭᠤᠴᠠ ᠶᠢ ᠲᠡᠭᠡᠷᠡ ᠠᠴᠠ ᠨᠢ ᠪᠦᠷᠬᠦᠵᠦ ᠦᠭᠭᠦᠨᠡ᠂ ᠲᠡᠭᠡᠬᠦ ᠳᠡᠭᠡᠨ ᠤᠭᠤᠴᠠ ᠶᠢ ᠰᠡᠭᠦᠯ ᠲᠠᠢ ᠨᠢ ᠪᠦᠭᠦᠳᠡ ᠶᠢ ᠬᠠᠯᠢᠮᠯᠠᠵᠤ ᠲᠠᠯᠪᠢᠨᠠ᠃ ᠤᠭᠤᠴᠠ ᠰᠡᠭᠦᠯ ᠬᠠᠯᠢᠮᠯᠠᠨᠠ ᠭᠡᠵᠦ ᠤᠭᠤᠴᠠ ᠭᠢᠭᠡᠳ ᠰᠡᠭᠦᠯ ᠤᠨ ᠬᠡᠰᠡᠭ ᠤᠨ ᠭᠠᠳᠠᠷ ᠬᠦᠷᠦᠰᠦ ᠶᠢ ᠪᠦᠬᠦᠨ ᠢ ᠱᠠᠭᠠᠯᠵᠤ ᠠᠪᠬᠤ ᠶᠢ ᠬᠡᠯᠡᠨᠡ᠃ ᠬᠠᠯᠢᠮᠯᠠᠬᠤ ᠳᠠᠭᠠᠨ ᠤᠭᠤᠴᠠ ᠰᠡᠭᠦᠯ ᠤᠨ ᠪᠤᠰᠤᠳ ᠮᠢᠬᠠ ᠦᠬᠡᠭᠦ ᠶᠢ ᠤᠭᠳᠤᠯᠵᠤ ᠬᠡᠮᠳᠦᠭᠡᠬᠦ ᠠᠴᠠ ᠶᠡᠬᠡᠳᠡ ᠬᠢᠴᠢᠶᠡᠨᠡ᠃ ᠲᠤᠰ ᠦᠢᠯᠡ ᠶᠢ ᠪᠦᠬᠦᠯᠢ ᠰᠢᠭᠦᠰᠦᠨ ᠳᠤ ᠴᠤ᠌ ᠮᠦᠨ ᠭᠦᠢᠴᠡᠳᠬᠡᠨᠡ᠃ ᠶᠠᠭᠤᠨ ᠳᠤ ᠤᠭᠤᠴᠠ ᠰᠡᠭᠦᠯ ᠬᠠᠯᠢᠮᠯᠠᠬᠤ ᠪᠤᠯᠤᠭᠰᠠᠨ ᠲᠤᠬᠠᠢ ᠨᠠᠰᠤᠳᠠᠢ ᠪᠤᠭᠤᠷᠤᠯ ᠤᠳ ᠤᠨ ᠤᠯᠠᠩᠬᠢ ᠨᠢ ᠰᠠᠬᠢᠭᠤᠰᠤ ᠪᠤᠶᠤ ᠭᠡᠢᠴᠢ ᠪᠠᠨ ᠤᠯᠠᠮ ᠬᠦᠨᠳᠦᠯᠡᠵᠦ ᠪᠠᠢᠬᠤ ᠤᠬᠠᠭᠠ ᠲᠠᠢ ᠬᠡᠮᠡᠨ ᠬᠠᠭᠤᠴᠢᠯᠠᠵᠤ ᠪᠠᠢᠭᠰᠠᠨ᠃ ᠬᠠᠯᠢᠮᠯᠠᠭᠰᠠᠨ ᠤᠭᠤᠴᠠ ᠶᠢᠨ ᠲᠡᠭᠡᠷᠡ ᠪᠦᠬᠦᠯᠢ ᠲᠤᠯᠤᠭᠠᠢ ᠪᠤᠶᠤ ᠵᠠᠷᠢᠮ ᠨᠢ ᠳᠠᠯᠤ ᠲᠦᠷᠪᠡᠨ ᠦᠨᠳᠦᠷ ᠲᠠᠯᠪᠢᠨ ᠭᠡᠢᠴᠢ ᠶᠢᠨ ᠭᠡᠷ ᠪᠤᠶᠤ ᠪᠤᠷᠬᠠᠨ ᠰᠠᠬᠢᠭᠤᠰᠤᠨ ᠤ ᠲᠤᠭᠠᠩ ᠳᠤ ᠤᠷᠤᠭᠤᠯᠤᠨ᠂ ᠲᠤᠮᠤ ᠰᠢᠷᠡᠭᠡᠨ ᠳᠤ ᠰᠢᠭᠦᠰᠦᠨ ᠤ ᠲᠤᠯᠤᠭᠠᠢ ᠲᠠᠯᠠ ᠶᠢ ᠭᠤᠤᠯ ᠭᠡᠢᠴᠢ ᠡᠰᠡᠭᠦᠯᠡ ᠰᠢᠳᠦᠭᠡᠨ ᠳᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠨᠠ᠂ ᠸᠠᠩ ᠨᠤᠶᠠᠨ᠂ ᠭᠡᠭᠡᠨ ᠬᠤᠪᠢᠯᠭᠠᠳ᠂ ᠰᠦᠮᠡ ᠬᠡᠢᠳ ᠤᠨ ᠴᠤᠩᠬᠢᠷ ᠲᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠪᠤᠯ ᠤᠭᠤᠴᠠ ᠤᠷᠤᠯᠳᠤᠬᠤ ᠬᠦᠮᠦᠨ ᠵᠠᠪᠠᠯ ᠠᠮᠠ ᠪᠠᠨ ᠶᠠᠭᠤᠮᠠ ᠪᠠᠷ ᠲᠠᠷᠤᠵᠤ ᠤᠷᠤᠭᠤᠯᠬᠤ ᠶᠤᠰᠤ ᠲᠠᠢ ᠪᠠᠢᠭᠰᠠᠨ ᠭᠡᠳᠡᠭ᠃ ᠪᠤᠷᠬᠠᠨ ᠰᠢᠳᠦᠭᠡᠨ᠂ ᠭᠡᠭᠡᠨ ᠬᠤᠪᠢᠯᠭᠠᠳ᠂ ᠤᠪᠤᠭᠠᠨ ᠲᠠᠬᠢᠯᠭᠠ ᠠᠴᠠ ᠪᠤᠰᠤᠳ ᠨᠠᠢᠷ ᠨᠠᠭᠠᠳᠤᠮ ᠳᠤ ᠪᠤᠯ ᠤᠭᠤᠴᠠ ᠪᠠᠨ ᠭᠤᠤᠯ ᠭᠡᠢᠴᠢ ᠳᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠭᠠᠳ ᠭᠡᠷ ᠤᠨ ᠡᠵᠡᠨ ᠭᠡᠢᠴᠢ ᠤᠯᠠᠨ ᠳᠠᠭᠠᠨ ᠲᠠᠷᠠᠭ᠂ ᠠᠷᠢᠬᠢ ᠪᠠᠨ ᠴᠠᠴᠤᠵᠤ ᠡᠬᠢᠯᠡᠨᠡ᠃ ᠭᠤᠤᠯ ᠭᠡᠢᠴᠢ ᠬᠦᠮᠦᠨ ᠲᠠᠪᠠᠭ ᠲᠤ ᠭᠠᠷ ᠢᠶᠠᠨ ᠬᠦᠷᠭᠡᠬᠦ᠂ ᠰᠦᠪᠡᠭᠡ ᠶᠢᠨ ᠬᠠᠪᠢᠰᠤᠨ ᠤ ᠬᠡᠰᠡᠭ ᠠᠴᠠ ᠵᠠᠭᠠᠯ ᠮᠢᠬᠠ ᠠᠪᠴᠤ ᠲᠠᠪᠠᠭ ᠲᠤ ᠲᠠᠯᠪᠢᠬᠤ (ᠲᠠᠪᠠᠭ ᠤᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ)᠂ ᠰᠡᠭᠦᠯ ᠤᠨ ᠭᠤᠤᠯ ᠠᠴᠠ ᠵᠢᠭᠠᠬᠠᠨ ᠲᠤᠭᠤᠢᠯᠠᠨ ᠠᠪᠴᠤ ᠤᠭᠤᠴᠠ ᠪᠤᠶᠤ ᠲᠤᠯᠤᠭᠠᠢ ᠲᠡᠭᠡᠷᠡ ᠲᠠᠯᠪᠢᠬᠤ ᠵᠡᠷᠭᠡ ᠠᠴᠠ ᠠᠯᠢ ᠨᠢᠭᠡ ᠶᠢ ᠰᠤᠩᠭᠤᠨ ᠤᠭᠤᠴᠠᠨ ᠳᠤ ᠭᠠᠷ ᠬᠦᠷᠬᠦ ᠶᠤᠰᠤ ᠭᠦᠢᠴᠡᠳᠬᠡᠨᠡ᠃ ᠲᠡᠭᠡᠬᠦ ᠳᠤ ᠤᠭᠤᠴᠠ ᠵᠥᠰᠥᠭᠴᠢ ᠶᠠᠭᠤᠨ ᠤ ᠡᠮᠦᠨᠡ ᠰᠢᠭᠦᠰᠦᠨ ᠤ ᠪᠠᠷᠠᠭᠤᠨ ᠲᠠᠯᠠ (ᠵᠦᠪ ᠲᠠᠯᠠ) ᠠᠴᠠ ᠡᠬᠢᠯᠡᠨ ᠵᠦᠰᠦᠬᠦ ᠪᠦᠭᠡᠳ ᠰᠦᠪᠡᠭᠡ ᠶᠢᠨ ᠭᠤᠷᠪᠠᠨ ᠬᠠᠪᠢᠰᠤ ᠲᠠᠢ ᠨᠢ ᠬᠠᠮᠳᠤ ᠳᠤᠨᠢ ᠨᠡᠪᠳᠡ ᠵᠦᠰᠦᠵᠦ ᠰᠡᠭᠦᠯ ᠤᠨ ᠲᠡᠭᠡᠭᠡᠨ ᠬᠡᠰᠡᠭ ᠢᠶᠠᠷ ᠭᠤᠶᠠ ᠲᠠᠭᠠᠭᠤᠯᠤᠨ ᠵᠦᠰᠦᠵᠦ ᠠᠪᠤᠭᠠᠳ ᠮᠦᠨ ᠪᠠᠷᠠᠭᠤᠨ ᠲᠠᠯᠠ ᠳᠤ ᠲᠦᠷ ᠲᠠᠯᠪᠢᠵᠤ ᠦᠭᠭᠦᠨᠡ᠂ ᠵᠡᠭᠦᠨ ᠲᠠᠯᠠ ᠶᠢ ᠮᠦᠨ ᠪᠠᠷᠠᠭᠤᠨ ᠲᠠᠯᠠ ᠶᠢ ᠵᠦᠰᠦᠭᠰᠡᠨ ᠲᠠᠢ ᠠᠳᠠᠯᠢ ᠰᠦᠪᠡᠭᠡ ᠶᠢᠨ ᠭᠤᠷᠪᠠᠨ ᠬᠠᠪᠢᠰᠤ ᠠᠴᠠ ᠡᠬᠢᠯᠡᠨ ᠵᠦᠰᠦᠭᠡᠳ᠂ ᠤᠭᠤᠴᠠᠨ ᠲᠡᠭᠡᠭᠦᠷ ᠵᠡᠭᠦᠨ ᠲᠠᠯᠠ ᠠᠴᠠ ᠵᠦᠰᠦᠭᠰᠡᠨ ᠮᠢᠬᠠ ᠶᠢ ᠲᠤᠤᠭᠤᠷ ᠨᠢ᠂ ᠪᠠᠷᠠᠭᠤᠨ ᠲᠠᠯᠠ ᠠᠴᠠ ᠵᠦᠰᠦᠭᠰᠡᠨ ᠮᠢᠬᠠ ᠶᠢ ᠲᠡᠭᠡᠭᠦᠷ ᠨᠢ ᠵᠦᠷᠢᠭᠦᠯᠦᠨ ᠲᠠᠯᠪᠢᠵᠤ ᠦᠭᠭᠦᠨᠡ᠃ ᠰᠦᠪᠡᠭᠡ ᠶᠢᠨ ᠵᠢᠷᠭᠤᠭᠠᠨ ᠬᠠᠪᠢᠷᠭᠠ ᠶᠢ ᠲᠠᠪᠠᠭᠯᠠᠬᠤ ᠠᠴᠠ ᠡᠮᠦᠨᠡᠬᠡᠨ ᠬᠡᠨ ᠳᠤ ᠴᠤ᠌ ᠮᠡᠳᠡᠭᠳᠡᠯ ᠦᠭᠡᠢ ᠪᠠᠷ ᠨᠢᠷᠤᠭᠤᠨ ᠤ ᠶᠠᠰᠤᠨ ᠠᠴᠠ ᠡᠪᠳᠡᠢᠬᠡᠨ ᠮᠤᠯᠳᠤᠯᠵᠤ ᠪᠡᠯᠡᠳᠦᠭᠰᠡᠨ ᠪᠠᠢᠳᠠᠭ᠃ ᠲᠠᠷᠠᠭᠠ ᠨᠢ ᠤᠭᠤᠴᠠᠨ ᠤ ᠤᠭᠤᠷᠠᠭ ᠰᠡᠭᠦᠯ ᠢ ᠤᠭᠳᠤᠯᠤᠨ ᠠᠪᠴᠤ ᠲᠤᠯᠤᠭᠠᠢ ᠲᠠᠢ ᠬᠠᠮᠳᠤ ᠭᠡᠷ ᠤᠨ ᠡᠵᠡᠨ ᠳᠤ 《ᠪᠤᠷᠬᠠᠨ ᠳᠠᠭᠠᠨ ᠲᠡᠭᠡᠵᠢ ᠪᠠᠷᠢᠭᠳᠤᠨ!》 ᠭᠡᠪᠡᠯ ᠭᠡᠷ ᠤᠨ ᠡᠵᠡᠨ ᠲᠤᠰᠴᠤ ᠠᠪᠤᠭᠠᠳ ᠪᠤᠷᠬᠠᠨ ᠤ ᠪᠠᠨ ᠡᠮᠦᠨᠡ ᠲᠠᠯᠪᠢᠳᠠᠭ᠃ ᠭᠤᠤᠯ ᠭᠡᠢᠴᠢ ᠰᠡᠭᠦᠯ ᠳᠤ ᠭᠠᠷ ᠬᠦᠷᠦᠭᠡ ᠦᠭᠡᠢ ᠦᠶᠡ ᠳᠤ ᠤᠭᠤᠴᠠ ᠵᠦᠰᠦᠭᠴᠢ ᠰᠡᠭᠦᠯ ᠤᠨ ᠭᠤᠤᠯ ᠲᠤᠮᠳᠠ ᠠᠴᠠ ᠵᠢᠭᠠᠬᠠᠨ ᠲᠤᠭᠤᠢᠯᠠᠨ ᠠᠪᠴᠤ ᠤᠭᠤᠴᠠᠨ ᠤ ᠡᠬᠢᠨ ᠳᠤ ᠪᠤᠶᠤ ᠭᠤᠤᠯ ᠲᠤᠮᠳᠠ ᠲᠠᠯᠪᠢᠵᠤ ᠦᠭᠭᠦᠨᠡ᠃ ᠠᠳᠡ ᠬᠦᠷᠬᠦ ᠳᠤ ᠤᠭᠤᠴᠠ ᠵᠦᠰᠦᠬᠦ ᠶᠤᠰᠤ ᠲᠠᠭᠤᠰᠴᠤ ᠤᠭᠤᠴᠠ ᠬᠦᠨᠳᠡᠭᠴᠢ ᠠᠴᠠ ᠰᠢᠭᠦᠰᠦᠨ ᠲᠡᠭᠡᠷᠡ ᠰᠦ ᠲᠠᠢ ᠴᠠᠢ ᠪᠤᠶᠤ ᠬᠠᠷᠠ ᠴᠠᠢ ᠲᠤᠰᠤᠭᠠᠭᠠᠳ᠄ 《ᠵᠠ! ᠲᠠᠶᠠᠭᠠᠷ ᠰᠢᠭᠦᠰᠦᠨ ᠠᠴᠠ ᠵᠤᠭᠤᠭᠯᠠᠵᠤ ᠬᠠᠢᠷᠠᠯᠠ!》 ᠭᠡᠮᠡᠨ ᠶᠠᠩ ᠤᠨ ᠦᠭᠡ ᠬᠡᠯᠡᠭᠡᠳ ᠭᠠᠷᠴᠤ ᠶᠠᠪᠤᠨᠠ᠃ ᠭᠡᠷ ᠲᠠᠬᠢ ᠶᠤᠰᠤ ᠮᠡᠳᠡᠬᠦ ᠬᠦᠮᠦᠨ ᠠᠴᠠ ᠵᠦᠰᠦᠭᠰᠡᠨ ᠰᠦᠪᠡᠭᠡ ᠶᠢᠨ ᠮᠢᠬᠠ ᠶᠢ ᠪᠠᠰᠠ ᠭᠤᠷᠪᠠ ᠭᠤᠷᠪᠠ ᠵᠦᠰᠦᠭᠡᠳ ᠵᠢᠵᠢᠭᠯᠡᠨ ᠤᠭᠳᠤᠯᠵᠤ ᠲᠠᠪᠠᠭ ᠲᠤ ᠲᠠᠯᠪᠢᠬᠤ ᠳᠤ ᠭᠤᠤᠯ ᠭᠡᠢᠴᠢ᠂ ᠨᠠᠰᠤᠳᠠᠢ ᠬᠦᠮᠦᠨ ᠠᠴᠠ ᠵᠤᠭᠤᠭᠯᠠᠵᠤ ᠡᠬᠢᠯᠡᠨᠡ᠂ ᠲᠡᠭᠡᠬᠦ ᠲᠠᠢ ᠵᠡᠷᠭᠡ ᠪᠤᠰᠤᠳ ᠭᠡᠢᠴᠢ ᠴᠤ᠌ ᠡᠷᠡᠭᠡ ᠵᠢᠷᠤᠭᠠ ᠦᠭᠡᠢ ᠰᠦᠪᠡᠭᠡ ᠶᠢᠨ ᠮᠢᠬᠠ ᠪᠤᠶᠤ ᠪᠤᠰᠤᠳ ᠢᠪᠡᠯᠭᠡ ᠶᠢᠨ ᠮᠢᠬᠠ ᠠᠴᠠ ᠠᠪᠴᠤ ᠢᠳᠡᠵᠡᠭᠡᠨᠡ᠃ ᠶᠡᠷᠦ ᠳᠡᠭᠡᠨ ᠤᠭᠤᠴᠠ ᠶᠢ ᠬᠤᠢᠮᠤᠷ ᠲᠠᠬᠢ ᠭᠤᠤᠯ ᠭᠤᠤᠯ ᠭᠡᠢᠴᠢ ᠳᠤ ᠲᠠᠯᠪᠢᠨ᠂ ᠪᠤᠰᠤᠳ ᠵᠤᠴᠢᠳ ᠲᠤ ᠳᠠᠯᠤ ᠲᠦᠷᠪᠡᠨ ᠦᠨᠳᠦᠷ ᠪᠤᠶᠤ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠲᠠᠪᠠᠭ ᠮᠢᠬᠠ ᠬᠡᠳᠦ ᠬᠡᠳᠦ ᠶᠢ ᠲᠠᠯᠪᠢᠵᠤ᠂ ᠬᠦᠨᠳᠦᠳᠦ ᠤᠯᠠᠨ ᠢᠶᠠᠨ ᠵᠤᠴᠢᠯᠠᠳᠠᠭ᠃ ᠬᠠᠷᠢᠨ ᠰᠡᠭᠦᠯ ᠵᠦᠰᠦᠵᠦ ᠭᠡᠢᠴᠢ ᠳᠡᠭᠡᠨ ᠰᠤᠷᠤᠭᠤᠯᠬᠤ ᠵᠠᠩᠰᠢᠯ ᠦᠭᠡᠢ ᠪᠠᠢᠭᠰᠠᠨ᠃ ᠬᠢᠳᠤᠭᠠ ᠲᠤᠩᠭᠤᠷᠠᠭ ᠢᠶᠠᠷ ᠮᠢᠬᠠ ᠢᠳᠡᠬᠦ ᠶᠢ ᠡᠷᠬᠢᠮᠯᠡᠬᠦ ᠪᠦᠭᠡᠳ ᠠᠪᠤᠭᠰᠠᠨ ᠮᠢᠬᠠ ᠪᠠᠨ ᠭᠦᠢᠴᠡᠳ ᠢᠳᠡᠵᠦ ᠶᠠᠰᠤ ᠶᠢ ᠨᠢ ᠰᠠᠢᠬᠠᠨ ᠮᠦᠯᠵᠢᠵᠦ ᠲᠠᠯᠪᠢᠬᠤ ᠶᠤᠰᠤ ᠲᠠᠢ᠂ ᠠᠳᠡ ᠲᠡᠨᠳᠡ ᠠᠴᠠ ᠰᠡᠭᠯᠡᠵᠦ ᠲᠤᠳᠠᠭᠤ ᠲᠤᠷᠭᠤᠨ ᠢᠳᠡᠬᠦ ᠶᠢ ᠴᠡᠭᠡᠷᠯᠡᠨᠡ᠂ ᠲᠠᠪᠠᠭ ᠲᠠᠢ ᠮᠢᠬᠠ ᠶᠢ ᠪᠠᠷᠠᠳᠠᠯᠠ ᠢᠳᠡᠬᠦ ᠶᠢ ᠴᠡᠭᠡᠷᠯᠡᠨᠡ᠂ ᠬᠡᠷᠪᠡ ᠲᠠᠭᠤᠰᠳᠠᠯᠠ ᠢᠳᠡᠪᠡᠯ ᠦᠯᠦᠩ ᠬᠤᠪᠳᠤᠭ ᠲᠤ ᠲᠤᠭᠠᠴᠠᠭᠳᠠᠵᠤ ᠬᠤᠴᠢᠯᠠᠭᠳᠠᠬᠤ ᠶᠤᠮ᠃
ᠳᠠᠯᠤ ᠨᠢ ᠮᠢᠬᠠᠨ ᠲᠤᠳᠤᠷᠠ ᠬᠠᠮᠤᠭ ᠤᠨ ᠬᠦᠨᠳᠦᠳᠡᠢ ᠮᠢᠬᠠ ᠪᠤᠯᠬᠤᠷ ᠲᠦᠷᠦᠯ ᠤᠨ ᠲᠤᠳᠤᠷᠠ ᠠᠴᠠ ᠨᠠᠭᠠᠴᠤ᠂ ᠤᠯᠠᠨ ᠤ ᠲᠤᠳᠤᠷᠠᠬᠢ ᠬᠠᠮᠤᠭ ᠤᠨ ᠠᠬᠠᠮᠠᠳ ᠬᠦᠮᠦᠨ ᠳᠠᠯᠤ ᠳᠤ ᠭᠠᠷ ᠬᠦᠷᠳᠡᠭ ᠪᠢᠯᠡ᠂ ᠵᠢᠭᠡ ᠬᠦᠮᠦᠨ ᠨᠠᠭᠠᠴᠤ ᠶᠢᠨ ᠢᠶᠠᠨ ᠬᠠᠵᠠᠭᠤ ᠳᠤ ᠳᠠᠯᠤ ᠪᠠᠷᠢᠵᠤ ᠪᠤᠯᠬᠤ ᠦᠭᠡᠢ᠃ ᠳᠠᠯᠤ ᠶᠢ ᠠᠪᠤᠭᠰᠠᠨ ᠬᠦᠮᠦᠨ ᠡᠷᠬᠡᠪᠰᠢ ᠰᠠᠢᠬᠠᠨ ᠵᠦᠰᠦᠵᠦ ᠬᠦᠮᠦᠨ ᠪᠤᠯᠭᠠᠨ ᠳᠤ ᠳᠠᠯᠤ ᠶᠢᠨ ᠬᠠᠭᠤᠳᠠᠰᠤ ᠮᠢᠬᠠ ᠭᠡᠵᠦ ᠬᠤᠪᠢᠶᠠᠨ ᠦᠭᠳᠡᠭ᠂ ᠳᠠᠯᠤ ᠶᠢᠨ ᠬᠠᠭᠤᠳᠠᠰᠤ ᠶᠢ ᠲᠤᠰᠴᠥ ᠠᠪᠤᠭᠰᠠᠨ ᠬᠦᠮᠦᠨ ᠨᠢ᠄ 《ᠲᠠᠭᠠ ᠨᠢ ᠲᠠᠯᠠ ᠬᠦᠷᠴᠦ ᠲᠡᠩᠳᠡ ᠪᠠᠨ ᠵᠢᠷᠤᠭᠠ ᠪᠤᠯᠳᠤᠭᠠᠢ! ᠨᠠᠰᠤ ᠨᠢ ᠨᠠᠶᠠ ᠭᠠᠷᠤᠭᠠᠳ ᠨᠠᠰᠤ ᠪᠠᠷ ᠢᠶᠠᠨ ᠵᠢᠷᠭᠠᠬᠤ ᠪᠤᠯᠳᠤᠭᠠᠢ!》᠂ 《ᠤᠷᠳᠤ ᠨᠠᠰᠤᠳᠠᠢ ᠤᠳᠠᠭᠠᠨ ᠵᠢᠷᠭᠠᠵᠤ᠂ ᠮᠦᠩᠭᠡ ᠨᠠᠰᠤᠳᠠᠢ ᠮᠦᠩᠭᠦᠨ ᠲᠦᠷᠦᠭᠡ ᠲᠠᠢ ᠶᠠᠪᠤᠭᠠᠷᠠᠢ!》 ᠭᠡᠮᠡᠨ ᠠᠮᠠᠨ ᠢᠷᠦᠭᠡᠯ ᠲᠠᠯᠪᠢᠳᠠᠭ᠃ ᠳᠠᠯᠤ ᠬᠤᠪᠢᠶᠠᠭᠰᠠᠨ ᠬᠦᠮᠦᠨ ᠳᠠᠯᠤ ᠶᠢ ᠰᠠᠢᠬᠠᠨ ᠭᠡᠭᠴᠢ ᠴᠠᠢᠯᠭᠠᠨ ᠮᠦᠯᠵᠢᠭᠰᠡᠨ ᠤ ᠲᠠᠷᠠᠭᠠ ᠨᠢᠭᠡ ᠬᠠᠳᠠᠭ ᠨᠢᠭᠡ ᠬᠤᠨᠳᠠᠭᠠ ᠠᠷᠢᠬᠢ ᠲᠠᠢ ᠳᠠᠯᠤ ᠶᠢ ᠬᠠᠮᠳᠤ ᠳᠤᠨᠢ ᠪᠠᠷᠢᠵᠤ (ᠠᠷᠢᠬᠢ ᠶᠢ ᠳᠠᠯᠤ ᠲᠡᠭᠡᠷᠡ ᠲᠠᠯᠪᠢᠭᠠᠳ) ᠤᠯᠠᠨ ᠤ ᠲᠤᠳᠤᠷᠠ ᠠᠴᠠ ᠨᠢᠭᠡ ᠢᠷᠦᠭᠡᠯᠴᠢ ᠬᠦᠮᠦᠨ ᠢ 《ᠳᠠᠯᠤ ᠢᠷᠦᠭᠡᠵᠦ ᠬᠠᠢᠷᠠᠯᠠ!》 ᠭᠡᠵᠦ ᠬᠦᠰᠡᠨ ᠭᠤᠶᠤᠳᠠᠭ᠃ ᠢᠩᠬᠢᠬᠦ ᠳᠤ ᠲᠡᠷᠡ ᠬᠦᠮᠦᠨ ᠬᠠᠳᠠᠭ ᠲᠠᠢ ᠠᠷᠢᠬᠢ ᠪᠠ ᠳᠠᠯᠤ ᠶᠢ ᠲᠤᠰᠴᠤ ᠠᠪᠤᠭᠠᠳ ᠠᠷᠢᠬᠢ ᠶᠢ ᠤᠤᠭᠤᠬᠤ ᠪᠤᠶᠤ ᠠᠮᠰᠠᠭᠠᠳ᠄
《ᠤᠸ᠋ᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠤᠯᠳᠤᠭᠠᠢ!
ᠡᠰᠢᠳᠥ ᠲᠡᠭᠷᠢ ᠠᠴᠠ ᠡᠵᠡᠨ ᠲᠠᠢ
ᠡᠵᠡᠨ ᠪᠤᠭᠳᠠ ᠠᠴᠠ ᠵᠠᠷᠯᠢᠭ ᠲᠠᠢ
ᠬᠠᠪᠤᠳᠤ ᠬᠠᠰᠠᠷ ᠰᠥᠪᠡᠬᠡᠳᠡᠢ
ᠬᠤᠶᠠᠷ ᠮᠡᠷᠬᠡᠨ ᠲᠥᠰᠢᠮᠡᠯ ᠤᠨ ᠵᠤᠬᠢᠶᠠᠯ᠄
ᠬᠠᠭᠤᠳᠠᠮ ᠤᠨ ᠮᠢᠬᠠ ᠶᠢ ᠲᠠᠨᠢ
ᠬᠤᠷᠠᠭᠰᠨ ᠪᠥᠬᠦᠨ ᠠᠮᠰᠠᠵᠤ
ᠬᠤᠪᠠᠨ ᠴᠠᠭᠠᠨ ᠶᠠᠰᠤ ᠶᠢ ᠲᠠᠨᠢ
ᠬᠤᠶᠠᠷ ᠭᠠᠷ ᠲᠠᠭᠠᠨ ᠰᠢᠨᠵᠢᠨ ᠢᠷᠥᠬᠡᠪᠡᠰᠥ᠄
ᠲᠠᠯᠤᠨ ᠳᠠᠭᠠᠨ ᠪᠠᠢᠬᠤ ᠳᠤ
ᠬᠠᠭᠤᠳᠠᠮ ᠲᠥᠬᠦᠷᠡᠩ ᠮᠢᠬᠠ ᠲᠠᠢ
ᠲᠠᠨ ᠳᠠᠭᠠᠨ ᠪᠠᠷᠢᠬᠤ ᠳᠤ
ᠬᠤᠷᠤᠭᠤ ᠵᠤᠵᠠᠭᠠᠨ ᠥᠬᠡᠬᠦ ᠲᠠᠢ
ᠬᠠ ᠳᠠᠭᠠᠨ ᠪᠠᠢᠬᠤ ᠳᠤ
ᠬᠠᠪᠳᠠᠭᠠᠢ ᠵᠥᠬᠡᠯᠡᠨ ᠮᠢᠬᠠ ᠲᠠᠢ
ᠲᠠᠨ ᠳᠠᠭᠠᠨ ᠪᠠᠷᠢᠬᠤ ᠳᠤ
ᠠᠯᠠᠭᠠ ᠲᠥᠬᠦᠷᠡᠩ ᠥᠬᠡᠬᠦ ᠲᠠᠢ
ᠲᠤᠭᠤᠭᠠ ᠲᠠᠯᠠ ᠠᠴᠠ ᠨᠢ ᠰᠢᠨᠵᠢᠬᠦ ᠳᠤ
ᠲᠤᠷᠭᠠ ᠲᠤᠷᠳᠤᠮ ᠢᠶᠠᠷ ᠪᠠᠶᠠᠨ ᠰᠢᠨᠵᠢ ᠲᠠᠢ
ᠲᠤᠭᠤᠷᠢᠭᠤᠯᠵᠤ ᠡᠷᠬᠢᠬᠦᠯᠵᠤ ᠰᠢᠨᠵᠢᠬᠦ ᠳᠤ
ᠲᠥᠷᠥᠯ ᠰᠠᠳᠤᠨ ᠢᠶᠠᠷ ᠢᠶᠠᠨ ᠵᠢᠷᠭᠠᠵᠤ ᠶᠠᠪᠤᠬᠤ ᠰᠢᠨᠵᠢ ᠲᠠᠢ᠃
ᠬᠠᠮᠠᠷ ᠤᠨ ᠶᠠᠰᠤ ᠶᠢ ᠨᠢ ᠰᠢᠨᠵᠢᠪᠠᠯ
ᠬᠠᠨ ᠠᠭᠤᠯᠠ ᠰᠢᠭ᠋ ᠰᠥᠷᠯᠢᠭ
ᠬᠠᠵᠠᠭᠤ ᠲᠠᠯᠠ ᠠᠴᠠ ᠨᠢ ᠰᠢᠨᠵᠢᠪᠠᠯ
ᠬᠠᠳᠤᠨ ᠭᠤᠤᠯ ᠤᠷᠤᠰᠴᠥ ᠪᠠᠢᠬᠤ ᠰᠢᠭ᠋
ᠬᠤᠷᠮᠤᠢ ᠲᠠᠯᠠ ᠠᠴᠠ ᠨᠢ ᠰᠢᠨᠵᠢᠬᠦ ᠳᠤ
ᠬᠤᠳᠠ ᠲᠠᠢ ᠮᠠᠯ ᠨᠢ ᠲᠥᠮᠡ ᠬᠥᠷᠥᠮᠤᠢ᠃
ᠬᠠᠪᠳᠠᠭᠠᠢ ᠲᠠᠯᠠ ᠠᠴᠠ ᠨᠢ ᠰᠢᠨᠵᠢᠬᠦ ᠳᠤ
ᠬᠠᠭᠠᠨᠳᠤ ᠲᠥᠷᠥ ᠮᠠᠨᠳᠤᠨ ᠬᠥᠭᠵᠢᠮᠤᠢ᠃
ᠡᠯᠡ ᠲᠠᠯᠠ ᠠᠴᠠ ᠨᠢ ᠥᠵᠡᠬᠦ ᠳᠤ
ᠡᠳ᠋ ᠬᠥᠷᠥᠩᠬᠡ ᠪᠠᠷ ᠪᠠᠶᠠᠵᠢᠮᠤᠢ᠃
ᠢᠷᠮᠡᠭ ᠲᠠᠯᠠ ᠠᠴᠠ ᠨᠢ ᠥᠵᠡᠬᠦ ᠳᠤ
ᠡᠵᠡᠨ ᠬᠥᠮᠤᠨ ᠨᠢ ᠵᠠᠭᠤᠨ ᠨᠠᠰᠤᠯᠠᠮᠤᠢ᠃
ᠲᠠᠯᠤ ᠶᠢ ᠲᠠᠭᠠᠳᠬᠠᠭᠰᠠᠨ ᠬᠥᠮᠤᠨ
ᠲᠠᠯᠠ ᠠᠴᠠ ᠵᠠᠭᠤᠨ ᠨᠠᠰᠤᠯᠠᠵᠤ
ᠲᠠᠭᠠᠳᠬᠠᠭᠰᠠᠨ ᠬᠥᠰᠡᠯ ᠪᠥᠬᠦᠨ
ᠲᠠᠪᠳᠠᠯ ᠦᠭᠡᠢ ᠪᠡᠶᠡᠯᠡᠭᠳᠡᠮᠤᠢ᠃》
ᠬᠡᠮᠡᠨ ᠢᠷᠥᠬᠡᠵᠤ ᠪᠠᠷᠠᠭᠠᠳ ᠬᠠᠳᠠᠭ ᠢ ᠠᠪᠴᠤ ᠡᠪᠦᠷᠳᠦᠯᠡᠬᠦ ᠪᠤᠶᠤ ᠬᠠᠳᠠᠭ ᠢᠶᠠᠷ ᠳᠠᠯᠤ ᠶᠢ ᠪᠤᠭᠤᠭᠠᠳ ᠤᠨᠢᠨ ᠳᠤ ᠬᠠᠪᠴᠢᠭᠤᠯᠵᠤ ᠲᠠᠯᠪᠢᠳᠠᠭ ᠪᠠᠢᠵᠠᠢ᠃
ᠭᠡᠢᠴᠢᠳ ᠰᠢᠭᠦᠰᠦ ᠶᠢ ᠵᠤᠭᠤᠭᠯᠠᠵᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭᠠ᠂ ᠲᠠᠷᠤᠢ ᠱᠦᠯᠦ ᠲᠠᠢ ᠬᠤᠭᠤᠯᠠ ᠤᠷᠤᠭᠤᠯᠬᠤ ᠠᠴᠠ ᠡᠮᠦᠨᠡᠬᠡᠨ ᠭᠡᠢᠴᠢ ᠶᠢᠨ ᠠᠬᠠ ᠪᠤᠯᠬᠤ ᠬᠦᠮᠦᠨ ᠠᠴᠠ ᠨᠢᠭᠡ ᠨᠢ ᠪᠤᠰᠴᠤ ᠰᠢᠭᠦᠰᠦ ᠶᠢ ᠵᠠᠰᠠᠵᠤ ᠡᠪᠯᠡᠭᠦᠯᠦᠨ ᠲᠠᠯᠪᠢᠭᠠᠳ ᠲᠠᠪᠠᠭ ᠲᠠᠢ ᠰᠢᠭᠦᠰᠦ ᠶᠢ ᠠᠪᠴᠤ ᠵᠦᠪ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠭᠡᠷ ᠤᠨ ᠡᠵᠡᠨ ᠳᠤ ᠭᠠᠷᠳᠠᠭᠤᠯᠤᠨᠠ᠃ ᠨᠤᠶᠠᠨ ᠭᠡᠭᠡᠨ ᠰᠠᠭᠠᠳᠠᠭᠰᠠᠨ ᠦᠶᠡ ᠳᠤ ᠰᠢᠭᠦᠰᠦ ᠲᠤᠰᠤᠭᠴᠢ ᠲᠠᠪᠠᠭ ᠲᠠᠢ ᠤᠭᠤᠴᠠ ᠠᠪᠤᠭᠠᠳ ᠭᠡᠷ ᠠᠴᠠ ᠤᠬᠤᠷᠢᠨ ᠭᠠᠷᠴᠤ ᠶᠠᠪᠤᠬᠤ ᠶᠤᠰᠤ ᠲᠠᠢ ᠪᠠᠢᠭᠰᠠᠨ᠃ ᠵᠠᠷᠢᠮ ᠭᠡᠷ ᠤᠨ ᠡᠵᠡᠨ ᠪᠤᠶᠤ ᠭᠡᠷ ᠤᠨ ᠪᠤᠰᠤᠳ ᠬᠦᠮᠦᠨ ᠤᠭᠤᠴᠠ ᠶᠢ ᠲᠤᠰᠤᠨ ᠠᠪᠴᠤ ᠭᠠᠯ ᠤᠨ ᠲᠡᠭᠡᠭᠦᠷ ᠪᠠᠰᠠ ᠵᠦᠪ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠲᠠᠭ ᠲᠡᠭᠡᠷᠡ ᠪᠠᠨ ᠲᠠᠯᠪᠢᠵᠤ ᠴᠤ᠌ ᠪᠠᠢᠳᠠᠭ᠂ ᠡᠭᠦᠨ ᠢ ᠰᠢᠭᠦᠰᠦ ᠲᠡᠪᠰᠢᠭᠦᠯᠬᠦ ᠶᠤᠰᠤ ᠭᠡᠳᠡᠭ᠃
ᠵᠤᠮᠠ᠂ ᠪᠦᠬᠦᠯᠢ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠠᠴᠠ ᠭᠠᠳᠠᠨᠠ ᠳᠠᠯᠤ ᠲᠦᠷᠪᠡᠨ ᠦᠨᠳᠦᠷ ᠪᠠ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠰᠢᠭᠦᠰᠦ ᠮᠢᠬᠠ ᠶᠢ ᠴᠤ᠌ ᠬᠤᠷᠢᠮ ᠨᠠᠢᠷ᠂ ᠵᠢᠯ ᠴᠠᠭᠠ᠂ ᠵᠢᠰᠢᠶᠡ ᠲᠠᠯᠠᠯᠭᠠ᠂ ᠲᠦᠷᠦᠯ ᠰᠠᠳᠤᠨ ᠤ ᠵᠤᠯᠭᠠᠯᠳᠠ ᠵᠡᠷᠭᠡ ᠳᠤ ᠨᠡᠢᠳᠡᠮ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠮᠦᠷᠳᠡᠭᠡᠨ ᠨᠡᠯᠢᠶᠡᠳ ᠬᠦᠨᠳᠦᠳᠡᠢ ᠬᠤᠭᠤᠯᠠᠨ ᠳᠤ ᠲᠤᠭᠠᠴᠠᠭᠳᠠᠳᠠᠭ᠃ 《ᠲᠠᠯᠤ》 ᠶᠢ ᠦᠪᠡᠷ ᠤᠨ ᠡᠪᠦᠭᠡ ᠡᠯᠦᠨᠴᠡ᠂ ᠨᠠᠰᠤᠳᠠᠢ ᠡᠪᠦᠭᠡᠳ ᠵᠡᠷᠭᠡ ᠬᠦᠮᠦᠰ ᠢ ᠬᠦᠨᠳᠦᠳᠬᠡᠨ ᠲᠠᠪᠠᠭ ᠮᠢᠬᠠ ᠶᠢ ᠨᠢ ᠠᠬᠠᠯᠠᠭᠤᠯᠤᠨ ᠲᠠᠯᠪᠢᠳᠠᠭ᠂ 《ᠡᠪᠴᠢᠭᠦᠦ》 ᠶᠢ ᠭᠤᠤᠯᠳᠠᠭᠤ ᠠᠬᠠᠮᠠᠳ ᠨᠠᠰᠤᠨ ᠤ ᠡᠮᠡᠭᠳᠡᠢ᠂ ᠦᠪᠡᠷ ᠤᠨ ᠰᠠᠳᠤᠨ ᠲᠦᠷᠦᠯ ᠤᠨ ᠬᠡᠦᠬᠡᠨ ᠪᠠᠷᠢᠶᠠᠳ ᠲᠤ ᠮᠦᠨ ᠲᠠᠪᠠᠭ ᠮᠢᠬᠠ ᠠᠬᠠᠯᠠᠭᠤᠯᠤᠨ ᠲᠠᠯᠪᠢᠳᠠᠭ᠃ ᠲᠡᠷᠡ ᠨᠢ ᠤᠭᠤᠴᠠ ᠲᠠᠢ ᠮᠦᠷᠦ ᠵᠡᠷᠭᠡᠴᠡᠬᠦ ᠬᠦᠨᠳᠦ ᠶᠢᠨ ᠬᠤᠭᠤᠯᠠ ᠪᠤᠯᠬᠤ ᠶᠤᠮ᠃ ᠵᠢᠱᠢᠶᠡᠯᠡᠵᠦ ᠬᠡᠯᠡᠬᠦ ᠳᠤ ᠨᠢᠭᠡ ᠤᠳᠠᠭᠠᠨ ᠤ ᠨᠠᠢᠷ ᠲᠤ ᠸᠠᠩ ᠨᠤᠶᠠᠨ ᠬᠠᠳᠤᠨ ᠲᠠᠢ ᠪᠠᠨ ᠵᠠᠯᠠᠷᠠᠵᠤ ᠰᠠᠭᠠᠳᠠᠭᠰᠠᠨ ᠪᠤᠯ ᠨᠤᠶᠠᠨ ᠳᠤ ᠤᠭᠤᠴᠠ ᠵᠤᠭᠤᠵᠤ᠂ ᠬᠠᠳᠤᠨ ᠳᠤ ᠲᠤᠰᠬᠠᠢ ᠲᠠᠪᠠᠭ ᠲᠤ ᠡᠪᠴᠢᠭᠦᠦ ᠠᠬᠠ ᠲᠠᠢ ᠰᠢᠭᠦᠰᠦ ᠭᠠᠷᠭᠠᠨ ᠬᠦᠨᠳᠦᠯᠡᠨ ᠲᠠᠢᠯᠠᠳᠠᠭ ᠪᠠᠢᠭᠰᠠᠨ ᠪᠦᠭᠡᠳ ᠨᠤᠶᠠᠨ ᠬᠠᠳᠤᠨ ᠰᠠᠭᠠᠳᠠᠭᠰᠠᠨ ᠦᠭᠡᠢ ᠡᠩ ᠤᠨ ᠠᠢᠯ ᠤᠨ ᠬᠤᠷᠢᠮ ᠲᠠᠯᠠᠯᠭᠠ ᠳᠤ ᠴᠤ᠌ ᠡᠮᠡᠭᠳᠡᠢᠴᠦᠳ ᠢ ᠭᠡᠷ ᠤᠨ ᠵᠡᠭᠦᠨ ᠲᠠᠯᠠ ᠪᠠᠷ ᠭᠤᠤᠯᠴᠠᠭᠤ ᠰᠠᠭᠤᠯᠭᠠᠨ᠂ ᠡᠮᠦᠨᠡ ᠨᠢ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠲᠠᠪᠠᠭ ᠮᠢᠬᠠ ᠲᠠᠯᠪᠢᠨ ᠬᠦᠨᠳᠦᠳᠡᠢ ᠪᠠᠷ ᠵᠤᠴᠢᠯᠠᠨ ᠲᠠᠢᠯᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠡᠪᠴᠢᠭᠦᠦ ᠶᠢ ᠪᠤᠰᠤᠳ ᠮᠢᠬᠠ ᠲᠠᠢ ᠬᠠᠮᠳᠤ ᠪᠦᠳᠦᠨ ᠢᠶᠠᠷ ᠨᠢ ᠴᠢᠨᠠᠵᠤ ᠡᠪᠴᠢᠭᠦᠨ ᠤ ᠬᠤᠩᠬᠤᠷ ᠲᠠᠯᠠ ᠶᠢ ᠲᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠲᠠᠪᠠᠭᠯᠠᠭᠠᠳ ᠭᠡᠷ ᠲᠤ ᠤᠷᠤᠭᠤᠯᠤᠨ ᠭᠤᠤᠯ ᠭᠡᠢᠴᠢ ᠳᠡᠭᠡᠨ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠬᠤ ᠳᠤ ᠲᠡᠷᠡᠬᠦ ᠭᠤᠤᠯ ᠬᠦᠮᠦᠨ ᠨᠢᠭᠡ ᠪᠤᠯ ᠦᠪᠡᠷ ᠢᠶᠠᠨ ᠡᠪᠴᠢᠭᠦᠦ ᠵᠦᠰᠦᠬᠦ ᠶᠤᠰᠤ ᠭᠦᠢᠴᠡᠳᠬᠡᠨ᠂ ᠨᠢᠭᠡ ᠪᠤᠯ ᠦᠪᠡᠷ ᠢᠶᠠᠨ ᠲᠠᠪᠠᠭ ᠲᠤ ᠭᠠᠷ ᠢᠶᠠᠨ ᠬᠦᠷᠭᠡᠭᠡᠳ ᠤᠨᠳᠤᠤ ᠡᠮᠡᠭᠳᠡᠢ ᠳᠤ ᠨᠠᠢᠳᠠᠨ ᠲᠤᠰ ᠦᠢᠯᠡ ᠶᠢ ᠭᠦᠢᠴᠡᠳᠬᠡᠯᠭᠡᠳᠡᠭ᠃ ᠡᠪᠴᠢᠭᠦᠦ ᠵᠦᠰᠦᠬᠦ ᠬᠦᠮᠦᠨ ᠡᠪᠴᠢᠭᠦᠨ ᠤ ᠬᠦᠳᠦᠭᠦᠷ ᠲᠠᠯᠠ ᠶᠢ ᠲᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠪᠠᠷᠢᠵᠤ ᠤᠷᠢᠤᠨ ᠢᠶᠠᠷ ᠡᠪᠴᠢᠭᠦᠨ ᠤ ᠬᠠᠨᠴᠢᠷ ᠮᠢᠬᠠ ᠶᠢ ᠤᠭᠳᠤᠯᠤᠨ ᠠᠪᠴᠤ ᠲᠠᠪᠠᠭ ᠲᠤ ᠲᠠᠯᠪᠢᠭᠠᠳ᠂ ᠲᠠᠷᠠᠭᠠ ᠨᠢ ᠡᠪᠴᠢᠭᠦᠨ ᠤ ᠬᠡᠷᠰᠡᠩ ᠤᠨ ᠬᠡᠰᠡᠭ ᠢ ᠭᠤᠷᠪᠠ ᠬᠤᠪᠢᠶᠠᠨ ᠵᠥᠰᠥᠬᠡᠳ ᠡᠪᠴᠢᠭᠦᠨ ᠤ ᠬᠤᠩᠬᠤᠷ ᠲᠠᠯᠠ ᠳᠤ ᠤᠷᠳᠤ ᠪᠠᠷ ᠨᠢ ᠲᠠᠯᠪᠢᠵᠤ ᠲᠡᠭᠡᠷᠡ ᠠᠴᠠ ᠨᠢ ᠬᠠᠨᠴᠢᠷ ᠤᠨ ᠮᠢᠬᠠ ᠶᠢ ᠵᠦᠷᠢᠭᠦᠯᠦᠨ ᠲᠠᠯᠪᠢᠭᠠᠳ ᠡᠪᠴᠢᠭᠦᠦ ᠵᠦᠰᠦᠬᠦ ᠠᠵᠢᠯ ᠢ ᠲᠠᠭᠤᠰᠬᠠᠨᠠ᠃ ᠡᠨᠡ ᠦᠶᠡ ᠳᠤ ᠭᠤᠤᠯ ᠭᠡᠢᠴᠢ ᠡᠪᠴᠢᠭᠦᠨ ᠤ ᠮᠢᠬᠠ ᠠᠴᠠ ᠠᠪᠴᠤ ᠠᠮᠰᠠᠬᠤ ᠪᠤᠶᠤ ᠢᠳᠡᠬᠦ ᠶᠢᠨ ᠲᠠᠭᠠᠤ ᠪᠤᠰᠤᠳ ᠡᠵᠡᠭᠳᠡᠢ ᠳᠤ ᠴᠤ᠌ ᠬᠤᠪᠢᠶᠠᠨ ᠦᠭᠴᠦ ᠬᠠᠮᠳᠤ ᠪᠠᠷ ᠬᠤᠭᠤᠯᠠᠯᠠᠨᠠ᠃ ᠤᠭ ᠲᠠᠭᠠᠨ ᠮᠠᠯ ᠠᠯᠠᠵᠤ ᠲᠦᠭᠦᠭᠡᠷᠡᠬᠦ ᠳᠡᠭᠡᠨ ᠡᠪᠴᠢᠭᠦᠨ ᠤ ᠭᠡᠷᠰᠡᠩ ᠤᠨ ᠭᠡᠰᠡᠭ ᠢ ᠠᠷᠠᠰᠤ ᠲᠠᠢ ᠨᠢ ᠦᠯᠡᠳᠡᠭᠡᠨ ᠠᠪᠴᠤ ᠠᠷᠤ ᠳᠤᠨᠢ ᠨᠤᠤᠰᠤ ᠶᠢ ᠨᠢ ᠬᠠᠢᠴᠢᠯᠠᠨ ᠬᠤᠢᠬᠠᠯᠠᠨ ᠴᠢᠨᠠᠳᠠᠭ ᠲᠠᠳᠬᠠᠯ ᠲᠠᠢ ᠪᠠᠢᠭᠠᠳ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠨᠠᠶᠠᠭᠠᠳ ᠤᠨ ᠠᠴᠠ ᠬᠤᠢᠰᠢ ᠤᠯᠠᠩᠬᠢ ᠨᠢ ᠠᠷᠠᠰᠤ ᠶᠢ ᠨᠢ ᠬᠠᠭᠤᠯᠵᠤ ᠢᠳᠡᠬᠦ ᠪᠤᠯᠤᠭᠰᠠᠨ᠃
ᠡᠵᠡᠨᠡ ᠲᠤᠷᠭᠤᠳ ᠠᠩᠬᠠᠨ ᠳᠠᠭᠠᠨ ᠲᠡᠪᠭᠡᠨ ᠤᠭᠤᠴᠠ ᠭᠡᠭᠴᠢ ᠶᠢ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠭᠰᠠᠨ᠂ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠬᠤᠷᠢ ᠭᠤᠴᠢᠭᠠᠳ ᠤᠨ ᠳᠤ ᠮᠤᠩᠭᠤᠯ ᠤᠯᠤᠰ ᠤᠨ ᠭᠤᠪᠢ ᠨᠤᠳᠤᠭ ᠠᠴᠠ ᠨᠡᠭᠦᠳᠡᠯᠯᠡᠨ ᠢᠷᠡᠭᠰᠡᠨ ᠬᠠᠯᠬᠠ ᠨᠠᠷ ᠲᠡᠪᠬᠡᠨ ᠤᠭᠤᠴᠠ ᠲᠠᠯᠪᠢᠳᠠᠭ ᠪᠠᠢᠭᠰᠠᠨ ᠭᠡᠮᠡᠨ ᠨᠤᠳᠤᠭ ᠤᠨ ᠪᠤᠭᠤᠷᠤᠯ ᠤᠳ ᠮᠢᠨᠢ ᠬᠦᠦᠨᠢᠳᠡᠵᠦ ᠪᠠᠢᠭᠠ᠃ ᠲᠡᠪᠬᠡᠨ ᠤᠭᠤᠴᠠ ᠭᠡᠵᠦ ᠤᠭᠤᠴᠠᠨ ᠤ ᠰᠦᠪᠡᠭᠡ ᠶᠢᠨ ᠭᠤᠷᠪᠠᠨ ᠬᠠᠪᠢᠰᠤ ᠶᠢᠨ ᠬᠡᠰᠡᠭ ᠢ ᠡᠪᠳᠡᠨ ᠰᠠᠯᠭᠠᠵᠤ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠢ ᠰᠡᠭᠦᠯ ᠲᠠᠢ ᠨᠢ ᠲᠠᠯᠪᠢᠬᠤ ᠶᠢ ᠬᠡᠯᠡᠳᠡᠭ ᠪᠠᠢᠵᠠᠢ᠃ ᠡᠭᠦᠨ ᠢᠶᠠᠨ ᠪᠠᠰᠠ ᠬᠠᠭᠠᠰ ᠤᠭᠤᠴᠠ᠂ ᠲᠠᠯᠠ ᠤᠭᠤᠴᠠ᠂ ᠰᠦᠭᠡᠮ ᠤᠭᠤᠴᠠ ᠭᠡᠳᠡᠭ ᠪᠠᠢᠵᠠᠢ᠃ ᠡᠢᠮᠦᠷᠬᠦ ᠤᠭᠤᠴᠠ ᠶᠢ 1958 ᠤᠨ ᠪᠤᠯᠳᠠᠯᠠ ᠨᠠᠢᠷ ᠨᠠᠭᠠᠳᠤᠮ ᠳᠤ ᠲᠡᠮᠡᠢ ᠬᠡᠷᠡᠭᠯᠡᠵᠦ ᠦᠭᠡᠢ ᠪᠠᠢᠭᠠᠳ ᠲᠡᠭᠡᠳᠦ ᠵᠠᠭᠤᠨ ᠤ ᠨᠠᠶᠠᠭᠠᠳ ᠤᠨ ᠠᠴᠠ ᠬᠠᠶᠠ ᠵᠠᠷᠢᠮ ᠠᠢᠯ ᠨᠠᠮᠤᠷ ᠤᠨ ᠲᠠᠯᠠᠯᠭᠠ (ᠵᠢᠰᠢᠶᠡ)᠂ ᠬᠡᠦᠬᠡᠳ ᠤᠨ ᠲᠠᠭᠠᠬᠢ ᠵᠡᠷᠭᠡ ᠳᠤ ᠲᠠᠯᠪᠢᠳᠠᠭ ᠪᠤᠯᠤᠭᠰᠠᠨ ᠭᠡᠰᠡᠨ ᠮᠡᠳᠡᠭᠡ ᠪᠤᠢ᠃
ᠰᠢᠷᠠᠭᠰᠠᠨ ᠪᠦᠬᠦᠯᠢ ᠬᠤᠨᠢ᠄ ᠪᠦᠬᠦᠯᠢ ᠰᠢᠷᠠᠭᠰᠠᠨ ᠬᠤᠨᠢ ᠶᠢ ᠴᠢᠯᠦᠭᠡᠯᠡᠬᠦ ᠠᠴᠠ ᠡᠮᠦᠨᠡ ᠡᠵᠡᠨᠡ ᠳᠤ ᠶᠡᠷᠦ ᠲᠠᠯᠪᠢᠵᠤ ᠦᠭᠡᠢ ᠪᠠᠢᠭᠰᠠᠨ ᠭᠡᠳᠡᠭ ᠪᠦᠭᠡᠳ ᠯᠾᠠᠸᠠᠩᠵᠠᠪ ᠨᠤᠶᠠᠨ ᠲᠡᠭᠡᠳᠦ ᠵᠠᠭᠤᠨ ᠤ ᠲᠠᠪᠢᠭᠠᠳ ᠤᠨ ᠳᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠲᠡᠭᠦᠨ ᠤ ᠲᠤᠭᠤᠭᠠᠴᠢ ᠪᠤᠯᠵᠤ ᠪᠠᠢᠭᠰᠠᠨ ᠵᠤᠳᠪᠠ ᠭᠡᠳᠡᠭ ᠬᠦᠮᠦᠨ ᠢ ᠠᠯᠠᠱᠠ ᠬᠤᠱᠤᠳ ᠲᠤ ᠲᠤᠮᠢᠯᠠᠨ ᠲᠠᠯᠠᠵᠠᠶᠠᠭᠠ ᠨᠤᠶᠠᠨ ᠤ ᠭᠠᠯᠴᠢ ᠳᠤ ᠱᠠᠪᠢ ᠤᠷᠤᠭᠤᠯᠤᠨ ᠰᠢᠷᠠᠭᠰᠠᠨ ᠬᠤᠨᠢ ᠲᠠᠯᠪᠢᠬᠤ ᠮᠡᠷᠭᠡᠵᠢᠯ ᠰᠤᠷᠭᠠᠭᠰᠠᠨ ᠭᠡᠳᠡᠭ᠃ ᠵᠢᠷᠠ ᠲᠠᠯᠠᠭᠠᠳᠤᠨ ᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠤᠳᠤᠷᠢᠳᠤᠯᠭᠠ ᠠᠵᠢᠯ ᠪᠠᠢᠴᠠᠭᠠᠨ ᠡᠵᠡᠨᠡ ᠬᠤᠰᠢᠭᠤᠨ ᠳᠤ ᠢᠷᠡᠭᠰᠡᠨ ᠳᠤ ᠡᠪᠦᠭᠡᠨ ᠵᠤᠳᠪᠠ ᠶᠢ ᠵᠠᠯᠠᠵᠤ ᠪᠦᠬᠦᠯᠢ ᠬᠤᠨᠢ ᠰᠢᠷᠠᠭᠤᠯᠵᠤ ᠲᠠᠯᠪᠢᠭᠰᠠᠨ ᠭᠡᠵᠦ ᠪᠠᠢᠭᠠ᠃ ᠰᠢᠷᠠᠭᠰᠠᠨ ᠬᠤᠨᠢ ᠳᠤ ᠭᠤᠤᠯ ᠭᠡᠢᠴᠢ ᠭᠠᠷ ᠬᠦᠷᠴᠦ ᠶᠤᠰᠤ ᠬᠢᠬᠦ ᠳᠡᠭᠡᠨ ᠤᠷᠢᠳ ᠢᠶᠠᠷ ᠮᠠᠩᠨᠠᠢ ᠲᠡᠭᠡᠷᠡ ᠨᠢ ᠬᠢᠳᠤᠭᠠ ᠪᠠᠷ ᠰᠠᠷᠠᠭᠠᠯᠵᠢᠨ ᠲᠡᠮᠳᠡᠭ ᠭᠠᠷᠭᠠᠨ᠂ ᠲᠠᠷᠠᠭᠠ ᠨᠢ ᠤᠭᠤᠴᠠᠨ ᠤ ᠬᠤᠶᠠᠷ ᠲᠠᠯᠠ ᠪᠠᠷ ᠲᠤᠰ ᠪᠦᠷᠢ ᠨᠢᠭᠡ ᠲᠦᠭᠡ ᠭᠠᠷᠤᠢ ᠵᠢᠷᠤᠵᠤ ᠦᠭᠬᠦ ᠶᠤᠰᠤ ᠲᠠᠢ᠃
ᠡᠳᠦᠭᠡ ᠪᠤᠯᠬᠤ ᠳᠤ ᠵᠤᠮᠠ ᠬᠤᠨᠢ ᠶᠢ ᠰᠦᠮᠡ ᠬᠡᠢᠳ ᠲᠤ ᠴᠤ᠌ ᠭᠡᠰᠡᠨ ᠲᠠᠯᠪᠢᠬᠤ ᠪᠠᠨ ᠪᠤᠯᠢᠭᠰᠠᠨ᠂ ᠪᠦᠬᠦᠯᠢ ᠰᠢᠷᠠᠭᠰᠠᠨ ᠬᠤᠨᠢ ᠶᠢ ᠨᠠᠮ ᠵᠠᠰᠠᠭ ᠤᠨ ᠲᠠᠢᠯᠠᠯᠭᠠ ᠳᠤ ᠶᠡᠬᠡᠳᠡ ᠬᠡᠷᠡᠭᠯᠡᠵᠦ᠂ ᠵᠠᠳᠠᠭᠠᠢ ᠰᠢᠭᠦᠰᠦ — ᠤᠭᠤᠴᠠ ᠬᠢᠭᠡᠳ 《ᠳᠠᠯᠤ》᠂ 《ᠡᠪᠴᠢᠭᠦᠦ》 ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠰᠢᠭᠦᠰᠦ ᠶᠢ ᠬᠤᠰᠢᠭᠤ ᠲᠡᠰ ᠤᠨ ᠵᠤᠴᠢᠯᠠᠭᠠ ᠠᠴᠠ ᠭᠠᠳᠠᠨᠠ ᠰᠦᠮᠡ ᠬᠡᠢᠳ᠂ ᠠᠯᠪᠠᠨ ᠪᠠᠢᠭᠤᠯᠭᠠ᠂ ᠬᠤᠪᠢ ᠠᠢᠯ ᠤᠨ ᠴᠠᠢ ᠲᠠᠢᠯᠠᠯᠭᠠ ᠳᠤ ᠴᠤ᠌ ᠦᠷᠭᠡᠨ ᠢᠶᠠᠷ ᠬᠡᠷᠡᠭᠯᠡᠵᠦ ᠪᠠᠢᠭᠠ᠃ ᠬᠡᠭᠦ ᠳᠡᠭᠡᠨ ᠰᠢᠷᠠᠭᠰᠠᠨ ᠬᠤᠨᠢ ᠪᠠ ᠰᠢᠭᠦᠰᠦ ᠵᠦᠰᠦᠬᠦ ᠤᠯᠠᠮᠵᠢᠯᠠᠯᠳᠤ ᠰᠠᠢᠬᠠᠨ ᠶᠤᠰᠤ ᠶᠢ ᠬᠦᠨᠳᠦᠳᠦ ᠤᠳᠤᠷᠢᠳᠤᠯᠭᠠ᠂ ᠭᠡᠢᠴᠢ ᠳᠡᠭᠡᠨ ᠵᠦᠪ ᠲᠠᠭᠠᠭᠤᠯᠤᠨ ᠶᠤᠰᠤ ᠭᠦᠢᠴᠡᠳᠬᠡᠬᠦ ᠲᠠᠯᠠ ᠪᠠᠷ ᠲᠤᠩ ᠬᠥᠷᠥᠯᠴᠡᠬᠦ ᠦᠭᠡᠢ᠂ ᠬᠢᠳᠤᠭᠠ ᠪᠠᠷᠢᠭᠤᠯᠤᠨ ᠬᠠᠮᠢᠭᠠ ᠠᠴᠠ ᠴᠤ᠌ ᠬᠠᠮᠢᠶᠠ ᠦᠭᠡᠢ ᠬᠦᠳᠡᠯᠭᠡᠵᠦ ᠬᠦᠨᠳᠡᠭᠦᠯᠵᠦ ᠪᠤᠢ᠃ ᠡᠭᠦᠨ ᠤ ᠤᠯᠠᠮ ᠠᠴᠠ ᠨᠢᠭᠡ ᠲᠠᠯᠠ ᠪᠠᠷ ᠮᠤᠷᠢᠯᠠᠵᠤ ᠰᠠᠭᠠᠳᠠᠭᠰᠠᠨ ᠭᠡᠢᠴᠢᠳᠵᠤᠴᠢᠳ ᠲᠠᠭᠠᠨ ᠥᠨᠳᠥᠰᠥᠳᠡᠨ ᠤᠭᠰᠠᠭᠠᠳᠠᠨ ᠤ ᠪᠠᠨ ᠶᠡᠭᠡ ᠲᠠᠢᠯᠠᠯᠭᠠ ᠶᠢᠨ ᠵᠢᠩᠬᠢᠨᠢ ᠶᠤᠰᠤ ᠶᠠᠪᠤᠳᠠᠯ ᠢ ᠮᠡᠳᠡᠬᠦᠯᠬᠦ ᠵᠤᠷᠢᠯᠭᠠ ᠳᠠᠭᠠᠨ ᠬᠦᠷᠴᠦ ᠡᠰᠡ ᠴᠢᠳᠠᠨ᠂ ᠨᠦᠭᠦᠭᠡ ᠲᠠᠯᠠ ᠪᠠᠷ ᠬᠦᠨᠳᠦᠳᠦ ᠲᠠᠢᠯᠠᠯᠭᠠ ᠶᠢᠨ ᠡᠷᠬᠢᠮ ᠶᠤᠰᠤ ᠶᠢ ᠴᠢᠨᠠᠭᠰᠢᠳᠠ ᠦᠪᠯᠡᠨ ᠵᠠᠯᠭᠠᠮᠵᠢᠯᠠᠵᠤ ᠰᠤᠳᠤᠯᠤᠨ ᠰᠢᠨᠵᠢᠯᠡᠬᠦ ᠳᠤ ᠪᠤᠳᠤᠯᠢᠶᠠᠨ ᠲᠠᠢ ᠵᠦᠢᠯᠡᠰ ᠢ ᠠᠪᠴᠢᠷᠠᠵᠤ ᠪᠤᠢ᠃ ᠮᠤᠩᠭᠤᠯᠴᠤᠳ ᠪᠤᠯ ᠮᠠᠯ ᠤᠨ ᠪᠦᠬᠦᠯᠢ ᠶᠠᠰᠤ ᠶᠢ ᠦᠶᠡᠴᠢᠯᠡᠨ ᠰᠠᠯᠭᠠᠳᠠᠭ ᠤᠨᠴᠨᠭᠠᠢ ᠵᠠᠩᠰᠢᠯ ᠤᠨ ᠤᠯᠠᠮᠵᠢᠯᠠᠯ ᠲᠠᠢ ᠪᠢᠯᠡ᠃ ᠭᠡᠳᠡᠯᠡ ᠤᠳᠤ ᠪᠤᠯᠬᠤ ᠳᠤ ᠵᠠᠯᠠᠭᠤᠴᠤᠳ ᠨᠢ ᠦᠶᠡᠴᠢᠯᠡᠬᠦ ᠶᠢ ᠴᠢᠳᠠᠬᠤ ᠦᠭᠡᠢ ᠪᠤᠶᠤ ᠰᠤᠷᠬᠤ ᠴᠤ᠌ ᠦᠭᠡᠢ ᠪᠤᠯᠵᠤ ᠬᠦᠮᠦᠨ ᠬᠦᠯᠦᠰᠦᠯᠡᠵᠦ ᠮᠠᠯ ᠭᠠᠷᠭᠠᠭᠤᠯᠳᠠᠭ ᠴᠤ᠌ ᠪᠤᠯᠤᠯᠠ᠂ ᠴᠢᠨᠠᠭᠰᠢᠯᠠᠨ ᠮᠢᠬᠠᠨ ᠤ ᠮᠠᠢᠮᠠᠢᠴᠤᠳ ᠮᠠᠯ ᠠᠯᠠᠬᠤ᠂ ᠮᠦᠴᠢᠯᠡᠬᠦ ᠲᠠᠯᠠ ᠪᠠᠷ ᠤᠯᠠᠮᠵᠢᠯᠠᠯᠳᠤ ᠵᠠᠩᠰᠢᠯ ᠢ ᠦᠯᠦ ᠬᠠᠢᠬᠤᠷᠤᠨ᠂ ᠬᠤᠭᠤᠯᠠᠢ ᠶᠢ ᠨᠢ ᠭᠡᠷᠴᠢᠨ᠂ ᠠᠮᠢᠨ ᠴᠢᠰᠤ ᠶᠢ ᠨᠢ ᠲᠠᠯᠪᠢᠨ᠂ ᠶᠠᠰᠤ ᠶᠢ ᠨᠢ ᠴᠠᠪᠴᠢᠨ᠂ ᠮᠢᠬᠠᠨ ᠳᠤᠨᠢ ᠭᠡᠢ ᠴᠤᠬᠢᠨ ᠬᠤᠳᠠᠯᠳᠤᠵᠤ ᠪᠤᠢ᠃ ᠵᠤᠴᠢᠯᠠᠭᠠ ᠲᠠᠢᠯᠠᠯᠭᠠ ᠳᠤ ᠭᠠᠷᠭᠠᠵᠤ ᠪᠤᠯᠬᠤ᠂ ᠦᠯᠦ ᠪᠤᠯᠬᠤ ᠮᠢᠬᠠ ᠶᠢ ᠡᠰᠡ ᠬᠠᠮᠢᠶᠠᠷᠤᠨ ᠲᠠᠪᠠᠭᠯᠠᠨ ᠲᠠᠯᠪᠢᠬᠤ᠂ ᠮᠢᠬᠠ ᠰᠡᠭᠯᠡᠵᠦ ᠢᠳᠡᠬᠦ᠂ ᠲᠤᠳᠠᠭᠤ ᠮᠦᠯᠵᠢᠬᠦ ᠵᠡᠷᠭᠡ ᠡᠮᠬᠢ ᠵᠠᠮᠪᠠᠷᠠᠭᠠ ᠪᠠᠨ ᠠᠯᠳᠠᠭᠰᠠᠨ ᠦᠵᠡᠭᠳᠡᠯ ᠤᠳ ᠵᠦᠩᠳᠡᠭᠡᠨ ᠬᠠᠷᠠᠭᠳᠠᠵᠤ ᠪᠠᠢᠭᠠ᠃ ᠡᠳᠡᠭᠡᠷ ᠢ ᠲᠠᠷᠤᠢ ᠲᠦᠷᠭᠡᠨ ᠵᠠᠰᠠᠨ ᠵᠠᠯᠠᠷᠠᠭᠤᠯᠵᠤ ᠲᠦᠷᠢᠮᠵᠢᠭᠦᠯᠦᠨ ᠵᠢᠷᠤᠮᠵᠢᠭᠤᠯᠬᠤ ᠠᠵᠢᠯ ᠤᠳᠤᠬᠠᠨ ᠳᠤ ᠲᠤᠯᠭᠠᠮᠠ ᠱᠠᠭᠠᠷᠳᠠᠭᠳᠠᠵᠤ ᠪᠠᠢᠭᠠ ᠶᠤᠮ᠃ ᠲᠤᠬᠠᠢᠯᠠᠪᠠᠯ᠂ ᠮᠤᠩᠭᠤᠯ ᠶᠤᠰᠤ ᠵᠠᠩᠰᠢᠯ ᠤᠨ ᠮᠡᠳᠡᠯᠭᠡ ᠤᠬᠠᠭᠠᠨ ᠤ ᠬᠦᠮᠦᠵᠢᠯ ᠬᠢᠵᠦ᠂ ᠥᠵᠡᠬᠦᠯᠥᠯᠬᠡ ᠤᠷᠤᠯᠳᠤᠭᠠᠨ ᠬᠢᠬᠦ᠂ ᠱᠠᠩᠨᠠᠬᠤ ᠵᠡᠷᠭᠡ ᠠᠷᠭᠠ ᠬᠡᠮᠵᠢᠶᠡ ᠠᠪᠴᠤ ᠪᠤᠯᠤᠨᠠ᠃
ᠡᠬᠢ ᠰᠤᠷᠪᠤᠯᠵᠢ᠄ ᠣᠷᠳᠣᠰ ᠬᠣᠲᠠ ᠶᠢᠨ ᠡᠵᠡᠨᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ