ᠲᠡᠭᠦᠰᠪᠠᠶᠠᠷ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 2 Төгсбаярын задгай шүлгүүд -2
266ᠲᠡᠭᠦᠰᠪᠠᠶᠠᠷ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 2
ᠬᠠᠪᠤᠷ
1
ᠬᠠᠪᠤᠷ ᠤᠤᠯ ᠨᠢ ᠣᠯᠳᠣᠢ ᠲᠠᠷᠢᠶᠠᠴᠢᠨ ᠪᠠᠢᠵᠠᠢ ᠃ ᠲᠡᠷᠡ ᠲᠠᠪᠤᠨ ᠲᠠᠷᠢᠶᠠ ᠪᠠᠨ ᠦᠷᠡᠯᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠭᠠᠤ ᠲᠠᠯᠠ ᠳᠦᠭᠦᠷᠡᠩ ᠥᠯᠥᠩ ᠲᠠᠷᠢᠴᠢᠵᠠᠢ ᠃
ᠦᠷᠡᠯᠡᠭᠰᠡᠨ ᠲᠠᠷᠢᠶᠠᠨ ᠠᠴᠠ ᠨᠢ ᠠᠮᠤ ᠵᠢᠮᠢᠰ ᠃
ᠥᠯᠥᠩᠲᠦᠭᠰᠡᠨ ᠲᠠᠯᠠ ᠠ᠋ᠴᠠ ᠨᠢ ᠠᠢᠷᠠᠭ ᠤᠭᠤᠷᠠᠭ ᠃
《 ᠰᠠᠢᠨ ᠰᠠᠨᠠᠭᠠᠨ ᠤ᠋ ᠦᠵᠡᠭᠦᠷ ᠰᠦ 》 ᠭᠡᠳᠡᠭ ᠨᠢ ᠡᠨᠡ ᠪᠢᠵᠡ ᠃
2
ᠬᠠᠪᠤᠷ ᠤᠤᠯ ᠨᠢ ᠤᠢᠲᠠᠢ ᠲᠠᠷᠢᠶᠠᠴᠢᠨ ᠪᠠᠢᠵᠠᠢ ᠃ ᠲᠡᠷᠡ ᠬᠠᠭᠠᠯᠪᠤᠷᠢᠯᠠᠭᠰᠠᠨ ᠵᠣᠷᠬᠠᠨ ᠳ᠋ᠠᠭᠠᠨ ᠰᠢᠯᠦᠬᠡᠢ ᠲᠠᠷᠢᠭᠠᠳ ᠬᠠᠭᠠᠷᠠᠭᠠᠳᠤᠢ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠰᠢᠯᠦᠭ ᠲᠠᠷᠢᠴᠢᠵᠠᠢ᠃
ᠪᠣᠯᠪᠠᠰᠤᠷᠠᠭᠰᠠᠨ ᠰᠢᠯᠦᠬᠡᠢ ᠨᠠᠮᠤᠷ ᠤ᠋ᠨ ᠬᠤᠷᠢᠶᠠᠯᠲᠠ ᠃
ᠪᠤᠯᠪᠠᠷᠠᠢᠬᠠᠨ ᠰᠢᠯᠦᠭ ᠨᠢ ᠨᠠᠢᠷᠠᠭ ᠤ᠋ᠨ ᠬᠤᠷᠢᠶᠠᠯᠲᠠ ᠃
《 ᠰᠠᠢᠨ ᠰᠠᠨᠠᠭᠠᠨ ᠤ᠋ ᠦᠵᠦᠭᠦᠷ ᠰᠦ 》 ᠪᠣᠯ 《ᠢᠷᠠᠭᠤ ᠰᠠᠨᠠᠭᠠᠨ ᠤ᠋ ᠦᠵᠦᠭᠦᠷ 》 ᠶᠠᠭᠤ ᠪᠣᠯ ?
ᠬᠠᠯᠠᠭᠠᠢ
ᠮᠣᠩᠭᠣᠯ ᠨᠤᠲᠤᠭ ᠲᠤ᠌ ᠬᠠᠯᠠᠭᠠᠢ ᠭᠡᠳᠡᠭ ᠬᠠᠴᠢᠨ ᠨᠣᠭᠣᠭᠠ ᠤᠷᠭᠤᠳᠠᠭ ᠃
ᠬᠠᠪᠤᠷ ᠤ᠋ᠨ ᠬᠠᠷᠠᠰᠤ ᠴᠠᠭ ᠲᠤ᠌ ᠬᠠᠩᠰᠢ ᠭᠡᠭᠰᠡᠭᠡᠷ ᠰᠣᠶᠣᠭᠠᠯᠠᠭᠠᠳ ᠥᠯᠳᠡᠭᠰᠡᠨ ᠬᠥᠮᠦᠨ ᠦ᠌ ᠲᠠᠩᠨᠠᠢ ᠶ᠋ᠢ ᠬᠤᠵᠢᠷᠯᠠᠵᠤ ᠣᠯᠳᠠᠭᠰᠠᠨ ᠲᠡᠮᠡᠭᠡᠨ ᠦ᠌ ᠲᠠᠪᠠᠭ ᠢ᠋ ᠵᠤᠵᠠᠭᠠᠯᠠᠨᠠ᠃
ᠬᠠᠯᠠᠭᠠᠢ ᠥᠷᠭᠡᠰᠦ ᠲᠡᠢ ᠃
ᠥᠷᠭᠡᠰᠦ ᠲᠡᠢ ᠪᠣᠯᠪᠠᠴᠤ ᠥᠭᠭᠢᠶᠡᠮᠦᠷ ᠯᠡ ᠃
ᠲᠡᠭᠦᠬᠦ ᠦᠶᠡ ᠳ᠋ᠦ᠍ ᠬᠤᠷᠤᠭᠤ ᠶ᠋ᠢ ᠴᠢᠨᠢ ᠬᠠᠯᠠᠭᠠᠵᠤ ᠲᠣᠭᠣᠭᠠᠨ ᠳ᠋ᠤ᠌ ᠣᠷᠣᠪᠠᠯ ᠬᠣᠳᠣᠭᠣᠳᠣ ᠶ᠋ᠢ ᠴᠢᠨᠢᠮᠢᠯᠢᠶᠠᠨᠠ ᠃
ᠨᠣᠭᠣᠭᠠᠴᠢᠨ ᠤ᠋ ᠳᠠᠷᠢᠰᠢ ᠶ᠋ᠢ ᠴᠢᠨ ᠯᠠᠩ ᠢ᠋ᠶ᠋ᠠᠷ ᠲᠤᠰᠬᠤ ᠪᠠᠷ ᠨᠤᠲᠤᠭ ᠤ᠋ᠨ ᠬᠠᠯᠠᠭᠠᠢ ᠳ᠋ᠤ᠌ ᠬᠠᠯᠠᠭᠠᠲᠠᠪᠠᠴᠤ ᠬᠠᠯᠠᠭᠤᠬᠠᠨ !
ᠡᠬᠡ ᠬᠦᠦ
ᠡᠵᠢ ᠨᠢ ᠬᠦᠦ ᠶ᠋ᠢᠨ ᠵᠠᠨ ᠬᠠᠴᠠᠷ ᠢ᠋ ᠦᠨᠦᠰᠪᠡ ᠃
ᠬᠦᠦ ᠨᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠠᠷ ᠢ᠋ ᠡᠮᠬᠦᠪᠡ ᠃
ᠠᠮᠠ ᠳᠦᠭᠦᠷᠡᠩ ᠫᠣᠭᠰᠢᠵᠤ ᠪᠠᠢᠳᠠᠭ ᠡᠬᠡ ᠶ᠋ᠢᠨ ᠬᠠᠢᠷᠠ ᠃
ᠠᠮᠠᠨ ᠳ᠋ᠠᠭᠠᠨ ᠲᠠᠭᠠᠷᠠᠬᠤ ᠪᠠᠷ ᠬᠦᠯᠬᠦᠬᠦ ᠭᠡᠳᠡᠭ ᠬᠡᠦᠬᠡᠳ ᠵᠠᠩ ᠃
ᠡᠬᠡ ᠨᠢ ᠵᠢᠷᠠᠨ ᠨᠠᠰᠤᠨ ᠤ᠋ ᠬᠠᠭᠠᠰ᠃
ᠡᠩᠬᠦᠷᠡᠢ ᠨᠢ ᠵᠢᠷᠭᠤᠭᠠᠨ ᠰᠠᠷᠠ ᠲᠡᠭᠦᠰ ᠃
ᠣᠷᠣᠢ ᠵᠠᠶᠠᠭᠠᠭᠰᠠᠨ ᠦᠷᠡ ᠳ᠋ᠦ᠍ ᠡᠵᠢ ᠶ᠋ᠢᠨ ᠰᠡᠳᠬᠢᠯ ᠲᠠᠷᠭᠤᠨ ᠃
ᠡᠷᠲᠡ ᠪᠣᠢᠵᠢᠭᠰᠠᠨ ᠬᠦᠦ ᠳ᠋ᠦ᠍ ᠡᠬᠡ ᠶ᠋ᠢᠨ ᠰᠦ ᠢᠪᠢᠯᠡᠭᠦᠨ ᠃
ᠭᠤᠴᠢᠨ ᠵᠢᠯ ᠦ᠋ᠨ ᠬᠠᠢᠷᠠ ᠭᠤᠷᠪᠠᠬᠠᠨ ᠲᠥᠭᠡ ᠨᠢᠯᠬᠠ ᠳ᠋ᠤ᠌ ᠲᠤᠰᠤᠨᠠ ᠃
ᠬᠡᠯᠡ
1
ᠬᠡᠯᠡ ᠭᠡᠳᠡᠭ ᠬᠡᠰᠡᠭ ᠮᠢᠬᠠ ᠂ ᠬᠡᠷᠴᠢᠵᠦ ᠪᠣᠯᠣᠰᠢ ᠦᠭᠡᠢ ᠬᠡᠯᠲᠡᠭᠡᠷ ᠮᠢᠬᠠ ᠃
ᠬᠡᠯᠪᠡᠷᠢ ᠨᠢ ᠶᠠᠷᠢᠳᠠᠭ ᠪᠦᠬᠦᠨ ᠦ᠌ ᠬᠢ ᠠᠳᠠᠯᠢ ᠂ ᠬᠡᠷᠡᠭᠰᠡᠯ ᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠵᠥᠷᠢᠶᠡ ᠲᠡᠢ ᠃
ᠵᠠᠪᠠᠵᠢᠨ ᠠ᠋ᠴᠠ ᠴᠠᠰᠢ ᠪᠠᠨ ᠰᠤᠨᠤᠬᠤ ᠦᠭᠡᠢ ᠪᠠᠢᠲᠠᠯᠠ ᠵᠢᠳᠠᠨ ᠦᠵᠦᠭᠦᠷ ᠡᠴᠡ ᠬᠤᠷᠴᠠ ᠂ ᠵᠠᠷᠢᠮ ᠨᠢ᠃
2
ᠲᠣᠰᠣ ᠳᠣᠯᠢᠶᠠᠭᠰᠠᠨ ᠬᠡᠯᠡᠨ ᠡᠴᠡ ᠲᠣᠨᠲᠣᠭ ᠳᠣᠯᠢᠶᠠᠭᠰᠠᠨ ᠬᠡᠯᠡ ᠭᠤᠯᠭᠤᠷ᠃
ᠲᠣᠨᠲᠣᠭ ᠳᠣᠯᠢᠶᠠᠭᠰᠠᠨ ᠭᠤᠯᠭᠤᠷ ᠢ᠋ ᠪᠣᠳᠣᠪᠠᠯ ᠲᠣᠭᠣᠭᠠ ᠳᠣᠯᠢᠶᠠᠭᠰᠠᠨ ᠭᠥᠯᠦᠭᠡᠨ ᠦ᠌ ᠬᠢ ᠴᠡᠪᠡᠷ ᠃
ᠴᠤᠤᠷᠢᠶᠠᠨ
ᠠᠶᠠᠯᠭᠤ ᠳᠠᠭᠤᠷᠢᠶᠠᠵᠤ ᠯᠠ ᠴᠢᠳᠠᠬᠤ ᠠ᠋ᠴᠠ ᠪᠢᠰᠢ ᠠᠰ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠬᠡᠷ ᠃
ᠪᠠᠷᠬᠢᠷᠠᠭᠠ ᠬᠠᠳᠠᠨ ᠤ᠋ ᠴᠤᠤᠷᠢᠶᠠᠨ ᠭᠡᠳᠡᠭ ᠪᠠᠢᠭᠠᠯᠢ ᠶ᠋ᠢᠨ ᠲᠣᠳᠢ ᠪᠠᠢᠨᠠ ᠳᠠ ᠃
ᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠵᠠᠮ ᠲᠥᠭᠡᠷᠢᠪᠡᠴᠦ ᠬᠥᠮᠦᠨ 《 ᠲᠣᠳᠢ 》 ᠠ᠋ᠴᠠ ᠵᠦᠭ ᠠᠰᠠᠭᠤᠬᠤ ᠦᠭᠡᠢ ᠃
ᠠᠮᠠᠨ ᠠ᠋ᠴᠠ ᠵᠢᠭᠡᠯᠡᠭᠰᠡᠨ ᠦᠭᠡ ᠪᠡᠨ ᠲᠡᠷᠡ ᠠᠪᠤᠨ ᠨᠠᠰᠢ ᠪᠠᠨ ᠪᠤᠴᠠᠭᠠᠴᠢᠯᠠ ᠃
ᠴᠤᠤᠷᠢᠶᠠᠨ ᠨᠠᠳᠠ ᠥᠷᠢ ᠦᠭᠡᠢ ᠃
ᠴᠤᠤᠷᠢᠶᠠᠨ ᠳ᠋ᠤ᠌ ᠪᠢ ᠳᠤᠷᠠ ᠦᠭᠡᠢ ᠃
ᠵᠠᠳᠠᠭᠠᠢ ᠰᠢᠯᠦᠭ
ᠰᠢᠯᠦᠭ ᠮᠢᠨᠢ ᠵᠠᠳᠠᠷᠠᠵᠤ ᠡᠬᠢᠯᠡᠯᠡ !
ᠲᠣᠯᠣᠭᠠᠢ ᠪᠠᠷ ᠨᠢ ᠬᠣᠯᠪᠣᠵᠤ ᠬᠡᠯᠬᠢᠶᠡ ᠭᠡᠳ ᠲᠠᠷᠢᠬᠢ ᠶ᠋ᠢ ᠨᠢ ᠭᠡᠮᠲᠦᠭᠡᠬᠦ ᠪᠡᠨ ᠬᠢᠴᠢᠶᠡᠯᠡ᠃ ᠲᠣᠭᠠ ᠬᠥᠯ ᠢ᠋ ᠨᠢ ᠲᠡᠩᠴᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠳᠣᠭᠣᠯᠠᠩ ᠰᠢᠯᠦᠭ ᠳᠤᠪᠬᠢᠴᠢᠯᠠ ᠃
ᠰᠣᠯᠢᠭᠠᠢ ᠭᠠᠷ ᠰᠢᠭ᠋ ᠤᠨᠤᠴᠢ ᠦᠭᠡᠢ ᠰᠢᠯᠦᠭ ᠮᠢᠨᠢ ᠰᠣᠨᠢᠷᠬᠠᠭᠴᠢ ᠶ᠋ᠢᠨ ᠵᠢᠷᠦᠬᠡᠨ ᠳ᠋ᠦ᠍ ᠲᠣᠰᠳᠠᠭ ᠪᠣᠯ ᠤᠤ?
ᠡᠷᠬᠢᠮ ᠤᠩᠰᠢᠭᠴᠢ ᠶ᠋ᠢᠨ ᠭᠡᠭᠡᠨ ᠨᠢᠳᠦ ᠯᠡ ᠳᠣᠭᠣᠯᠠᠩ ᠰᠢᠯᠦᠭ ᠲᠦ᠍ ᠮᠢᠨᠢ ᠲᠠᠶᠠᠭ ᠪᠣᠯᠤᠨᠠ ᠳᠠ ᠃
ᠵᠠᠳᠠᠷᠠᠵᠤ ᠡᠬᠢᠯᠡᠯᠡ ᠂ ᠰᠢᠯᠦᠭ ᠮᠢᠨᠢ ᠃
ᠵᠠᠳᠠᠷᠠᠭᠰᠠᠨ ᠴᠡᠴᠡᠭ ᠦᠷᠡᠯᠡᠬᠦ ᠵᠠᠶᠠᠭᠠ ᠲᠠᠢ᠃
ᠵᠠᠳᠠᠷᠠᠭᠰᠠᠨ ᠰᠢᠯᠦᠭ ᠮᠢᠨᠢ ᠦᠷᠡᠯᠡᠬᠦ ᠶ᠋ᠢ ᠳᠤᠷᠠᠯᠠᠭᠠ ᠦᠭᠡᠢ ᠂ ᠦᠬᠦᠰᠢᠷᠡᠬᠦ ᠦᠭᠡᠢ ᠯᠡ ᠪᠣᠯ ᠬᠡᠰᠢᠭ ᠮᠢᠨᠢ ᠲᠡᠷᠡ ᠃
ᠶᠠᠳᠠᠷᠠᠭᠰᠠᠨ ᠪᠢᠯᠢᠭ ᠵᠦᠳᠡᠷᠡᠭᠰᠡᠨ ᠣᠶᠤᠨ ᠠ᠋ᠴᠠ ᠮᠢᠨᠢ ᠰᠠᠶᠢ ᠵᠠᠳᠠᠷᠠᠭᠰᠠᠨ ᠡᠨᠡ ᠰᠢᠯᠦᠭ ᠰᠢᠦ !
ᠰᠢᠯᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠳᠠᠭ ᠨᠢ ᠵᠠᠳᠠᠷᠠᠵᠤ ᠪᠠᠢᠭ ᠂ ᠪᠦᠯᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠳᠡ ᠨᠠᠷ ᠪᠥᠭᠡᠮᠨᠡᠷᠡᠵᠦ ᠪᠠᠢᠯᠴᠠᠶᠠ!
ᠨᠠᠪᠴᠢ –– ᠲᠤᠭ
1
ᠨᠠᠪᠴᠢ ᠪᠣᠯ ᠪᠢᠴᠢᠬᠠᠨ ᠲᠤᠭ ᠃
ᠬᠥᠮᠦᠰ ᠲᠡᠭᠦᠨ ᠢ᠋ ᠡᠷᠭᠦᠵᠦ ᠮᠠᠨᠳᠤᠭᠤᠯᠳᠠᠭ ᠦᠭᠡᠢ ᠂ ᠬᠦᠰᠡᠯ ᠦ᠋ᠨ ᠬᠥᠪᠦᠷᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠪᠴᠢ ᠥᠪᠡᠷ ᠢ᠋ᠶ᠋ᠡᠨ ᠮᠠᠨᠳᠤᠨᠠ ᠃
ᠨᠠᠪᠴᠢ ᠨᠡᠬᠡᠶᠡ ᠱᠣᠪᠣᠢᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠨᠠᠮᠢᠷᠠᠬᠤ ᠬᠦᠰᠡᠯ ᠢ᠋ᠶ᠋ᠡᠨ ᠬᠥᠪᠦᠷᠡᠯ ᠳ᠋ᠡᠭᠡᠨ ᠦᠬᠡᠭᠯᠡᠵᠦ ᠪᠠᠢᠭᠰᠠᠨ ᠢ᠋ ᠨᠠᠷᠠ ᠬᠠᠪᠤᠷ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠬᠡᠨ ᠴᠦ᠍ ᠦᠯᠦ ᠮᠡᠳᠡᠨᠡ ᠃
2
ᠨᠠᠪᠴᠢ ᠪᠣᠯ ᠪᠠᠢᠭᠠᠯᠢ ᠶ᠋ᠢᠨ ᠲᠤᠭ ᠃
ᠨᠠᠷᠮᠠᠢ ᠬᠣᠷᠸ᠋ᠠ ᠶ᠋ᠢᠨ ᠪᠠᠢᠭᠠᠯᠢ ᠨᠠᠪᠴᠢᠨ ᠲᠤᠭ ᠢ᠋ᠶ᠋ᠠᠨ ᠮᠥᠷᠥᠯᠡᠭᠡᠳ ᠠᠮᠢ ᠤᠷᠭᠤᠮᠠᠯ ᠤ᠋ᠨ ᠠᠷᠮᠢ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠠᠯᠭᠢᠨᠴᠢᠯᠠᠨ ᠮᠣᠷᠳᠠᠨᠠ᠃
ᠦᠬᠦᠮᠡᠯ ᠬᠤᠪᠠᠬᠠᠢ ᠪᠦᠬᠦᠨ ᠪᠠᠢᠭᠠᠯᠢ ᠶ᠋ᠢᠨ ᠡᠨᠡ ᠲᠤᠭ ᠤ᠋ᠨ ᠳᠣᠣᠷᠠ ᠰᠥᠭᠥᠳᠦᠨ ᠳᠠᠭᠠᠯᠠ ᠃
3
ᠨᠠᠪᠴᠢ ᠪᠣᠯ ᠬᠠᠪᠤᠷ ᠤ᠋ᠨ ᠲᠤᠭ ᠃
ᠪᠦᠳᠦᠭᠦᠨ ᠮᠣᠳᠣᠨ ᠳ᠋ᠤ᠌ ᠂ ᠨᠠᠷᠢᠨ ᠡᠪᠡᠰᠦᠨ ᠳ᠋ᠦ᠍ ᠨᠠᠪᠴᠢ ᠨᠡᠢᠳᠡᠮ ᠳᠡᠯᠭᠡᠭᠰᠡᠨ ᠨᠢ 《ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠬᠠᠪᠤᠷ ᠤᠯᠤᠰ 》 ᠪᠥᠮᠪᠥᠷᠴᠡᠭ ᠦ᠋ᠨ ᠡᠯᠢᠭᠡᠨ ᠳ᠋ᠦ᠍ ᠮᠡᠨᠳᠦᠯᠡᠭᠡᠳ ᠲᠤᠭ ᠢ᠋ᠶ᠋ᠠᠨ ᠰᠦᠯᠳᠡᠯᠡᠵᠦ ᠲᠤᠩᠬᠠᠭ ᠵᠠᠷᠯᠠᠵᠤ ᠪᠠᠢᠭᠠ ᠶᠤᠮ ᠃
ᠲᠡᠭᠦᠨ ᠦ᠌ ᠲᠤᠩᠬᠠᠭ ᠬᠠᠮᠢᠭᠠ ᠴᠤ᠌ ᠲᠥᠭᠡᠨᠡ ᠃
4
ᠨᠠᠪᠴᠢ ᠪᠣᠯ ᠣᠢ ᠶ᠋ᠢᠨ ᠲᠤᠭ ᠃
ᠤᠯᠤᠰ ᠤ᠋ᠨ ᠲᠤᠭ ᠤᠯᠠᠭᠠᠨ ᠣᠢ ᠶ᠋ᠢᠨ ᠨᠣᠭᠣᠭᠠᠨ ᠃
ᠤᠯᠠᠭᠠᠨ ᠲᠤᠭ ᠤ᠋ᠨ ᠥᠩᠭᠡᠨ ᠳ᠋ᠦ᠍ ᠦᠷᠡᠭᠳᠡᠭᠰᠡᠳ ᠦ᠋ᠨ ᠴᠢᠰᠤ ᠪᠤᠳᠤᠭᠰᠢᠪᠠ᠃
ᠨᠣᠭᠣᠭᠠᠨ ᠲᠤᠭ ᠤ᠋ᠨ ᠦᠨᠳᠦᠰᠦᠨ ᠳ᠋ᠦ᠍ ᠡᠷᠡᠰᠳᠡᠭᠰᠡᠳ ᠦ᠋ᠨ ᠶᠠᠰᠤ ᠪᠤᠯᠠᠭᠳᠠᠪᠠ ᠃
ᠤᠯᠠᠭᠠᠨ ᠨᠢ ᠦᠷᠡᠭᠳᠡᠭᠴᠢ ᠶ᠋ᠢᠨ ᠰᠦᠨᠡᠰᠦ ᠪᠤᠶᠤ ᠃
ᠨᠣᠭᠣᠭᠠᠨ ᠨᠢ ᠦᠨᠳᠦᠰᠦᠯᠡᠭᠴᠢ ᠶ᠋ᠢᠨ ᠰᠢᠮᠡᠰ ᠪᠤᠶᠤ ᠃
5
ᠨᠠᠪᠴᠢ ᠪᠣᠯ ᠨᠠᠷᠠᠨ ᠤ᠋ ᠲᠤᠭ ᠃
ᠨᠠᠷᠠ ᠭᠡᠷᠡᠯ ᠦ᠋ᠨ ᠠᠤᠭᠠ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠣᠭᠣᠭᠠᠨ ᠨᠣᠭᠣᠭᠠᠨ ᠨᠠᠪᠴᠢᠨ ᠲᠤᠭ ᠤ᠋ᠳ ᠢ᠋ᠶ᠋ᠠᠨ ᠳᠡᠯᠡᠬᠡᠢ ᠶ᠋ᠢᠨ ᠴᠢᠭ ᠪᠦᠬᠦᠨ ᠳ᠋ᠦ᠍ ᠬᠠᠳᠬᠤᠨ ᠲᠠᠯᠪᠢᠵᠠᠢ ᠃
ᠲᠤᠭ ᠤ᠋ᠨ ᠬᠢᠨᠢ ᠰᠡᠭᠦᠳᠡᠷ ᠲᠦ᠍ ᠲᠣᠯᠣᠭᠠᠢᠰ ᠰᠡᠷᠢᠭᠦᠴᠡᠵᠡᠭᠡᠨᠡ ᠃
ᠲᠤᠭ ᠤ᠋ᠨ ᠬᠢᠨᠢ ᠰᠡᠵᠢᠭᠦᠷ ᠲᠦ᠍ ᠲᠣᠭᠣᠰ ᠳᠡᠪᠳᠡᠷᠢᠰᠬᠢᠨᠡ ᠃
ᠲᠤᠭ ᠤ᠋ᠨ ᠬᠢᠨᠢ ᠥᠨᠴᠥᠭ ᠢ᠋ ᠲᠤᠭᠤᠳ ᠳᠣᠯᠢᠶᠠᠯᠴᠠᠨᠠ ᠃
ᠲᠤᠭ ᠤ᠋ᠨ ᠬᠢᠨᠢ ᠮᠠᠨᠵᠢᠯᠭᠠ ᠨᠢ ᠲᠤᠶᠠᠭᠠᠨ ᠰᠠᠴᠤᠭ ᠲᠠᠢ ᠃
ᠠᠶᠠ! ᠨᠠᠷᠠᠨ ᠤ᠋ ᠲᠤᠭ ᠤ᠋ᠨ ᠳᠡᠯᠭᠡᠯᠲᠡ ᠳ᠋ᠦ᠍ ᠪᠠᠢᠭᠠᠯᠢ ᠶ᠋ᠢᠨ ᠨᠠᠢᠵᠠ ᠨᠡᠢᠯᠡᠮᠵᠢ ᠣᠷᠣᠰᠢᠨᠠᠮ ᠠᠵᠤᠭᠤ ᠃
ᠲᠡᠢᠮᠦ ᠤᠯᠠᠭᠠᠨ ᠨᠠᠷᠠ ᠡᠢᠮᠦ ᠨᠣᠭᠣᠭᠠᠨ ᠲᠤᠭ ᠲᠠᠢ ᠃
ᠲᠡᠢᠮᠦ ᠠᠤᠭᠠ ᠨᠠᠷᠠ ᠡᠢᠮᠦ ᠵᠢᠵᠢᠭ ᠲᠤᠭ ᠲᠠᠢ ᠃
ᠲᠡᠢᠮᠦ ᠠᠯᠤᠰ ᠤ᠋ᠨ ᠨᠠᠷᠠ ᠡᠢᠮᠦ ᠬᠣᠯᠠᠬᠠᠨ ᠲᠤᠭ ᠲᠠᠢ ᠃
ᠲᠡᠢᠮᠦ ᠭᠠᠭᠴᠠᠬᠠᠨ ᠨᠠᠷᠠ ᠡᠢᠮᠦ ᠤᠯᠠᠭᠠᠨ ᠲᠤᠭ ᠲᠠᠢ ᠃
ᠰᠡᠭᠦᠳᠡᠷ ᠲᠤᠨᠢ ᠰᠡᠷᠢᠭᠦᠴᠡᠭᠴᠢ ᠲᠣᠯᠣᠭᠠᠢᠰ ᠰᠡᠳᠬᠢᠭᠰᠡᠨ ᠪᠢᠵᠡ? ᠡᠭᠦᠨ ᠢ᠋ ᠃
6
ᠨᠠᠪᠴᠢ ᠪᠣᠯ ᠨᠠᠢᠷᠠᠭ ᠤ᠋ᠨ ᠲᠤᠭ᠃
ᠡᠷᠲᠡᠨ ᠦ᠌ ᠢᠯᠠᠭᠤᠭᠴᠢ ᠪᠠᠭᠠᠲᠤᠷ ᠳᠠᠢᠰᠤᠨ ᠤ᠋ ᠪᠠᠨ ᠵᠢᠷᠦᠬᠡ ᠪᠡᠷ ᠲᠤᠭ ᠳᠠᠬᠢᠳᠠᠭ ᠰᠢᠭ᠋ ᠂ ᠠᠳᠠ ᠨᠠᠢᠷᠠᠭ ᠨᠢ ᠨᠠᠢᠷᠠᠭᠴᠢ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠪᠡᠷ ᠨᠠᠪᠴᠢᠨ ᠲᠣᠨᠨ ᠢ᠋ᠶ᠋ᠠᠨ ᠳᠠᠢᠵᠤ ᠪᠠᠢᠨᠠ ᠃
ᠨᠠᠢᠷᠠᠭ ᠮᠠᠨᠢ ᠨᠠᠪᠴᠢᠨ ᠲᠤᠭ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠰᠠᠵᠢᠮᠠᠭᠴᠠ ᠰᠣᠨᠢᠨ ᠰᠣᠳᠣᠨ ᠳᠠᠯᠳᠠ ᠶ᠋ᠢᠨ ᠲᠠᠲᠠᠭᠠᠰᠤ ᠪᠠᠷ ᠨᠠᠢᠷᠠᠭᠴᠢ ᠶ᠋ᠢᠨ ᠰᠦᠨᠡᠰᠦ ᠶ᠋ᠢ ᠳᠠᠯᠠᠯᠤᠨ ᠳᠠᠭᠠᠭᠤᠯᠤᠭᠰᠠᠨ ᠶᠤᠮ ᠴᠢᠨᠢ ᠲᠤᠭ ᠤ᠋ᠨ ᠬᠢᠨᠢ ᠪᠠᠭᠠᠨᠠ ᠠ᠋ᠴᠠ ᠨᠢᠭᠡᠨ ᠵᠢᠷᠦᠬᠡ ᠡᠯᠭᠦᠭᠳᠡᠬᠦ ᠦᠭᠡᠢ ᠶᠠᠭᠠᠬᠢᠨᠠ !
7
ᠨᠠᠪᠴᠢ ᠪᠣᠯ ᠳᠡᠯᠡᠬᠡᠢ ᠶ᠋ᠢᠨ ᠲᠤᠭ ᠃
ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠪᠣᠯᠬᠤ ᠳ᠋ᠤ᠌ ᠡᠨᠡ ᠲᠤᠭ ᠢ᠋ ᠤᠨᠠᠴᠢᠯᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ ?
ᠦᠭᠡᠢ ᠰᠢᠦ ᠂ ᠥᠷᠯᠥᠭ ᠭᠠᠪᠢᠶᠠᠲᠤ ᠪᠣᠯᠪᠠᠰᠤᠷᠠᠬᠤ ᠨᠠᠮᠤᠷ ᠤ᠋ᠨ ᠨᠠᠰᠤᠨ ᠬᠤᠲᠤᠭ ᠲᠡᠭᠦᠰᠦᠭᠰᠡᠨ ᠪᠡᠯᠪᠡᠰᠦᠷᠡᠯ ᠳ᠋ᠦ᠍ ᠳᠡᠯᠡᠬᠡᠢ ᠲᠣᠨᠨ ᠢ᠋ᠶ᠋ᠠᠨ ᠪᠠᠭᠤᠯᠭᠠᠵᠤ ᠳᠠᠯᠠᠢᠭᠴᠢ ᠤᠯᠠᠷᠢᠯ ᠢ᠋ ᠭᠠᠰᠢᠭᠤᠳᠠᠵᠤ ᠪᠠᠢᠭᠠ ᠨᠢ ᠡᠨᠡ ᠶᠦ᠍ᠮ᠃
ᠬᠦᠨᠳᠦ ᠪᠡᠯᠪᠡᠷᠡᠰᠦᠭᠰᠡᠨ ᠳᠡᠯᠡᠬᠡᠢ ᠬᠥᠯᠳᠡᠭᠦᠦ ᠡᠪᠦᠯ ᠢ᠋ ᠭᠡᠰᠬᠦ ᠪᠣᠯᠲᠠᠯᠠ ᠲᠤᠭ ᠢ᠋ᠶ᠋ᠠᠨ ᠡᠯᠭᠦᠬᠦ ᠦᠭᠡᠢ ᠃
ᠬᠠᠪᠤᠷ ᠨᠣᠭᠣᠭᠠᠷᠠᠬᠤ ᠦᠶᠡ ᠳ᠋ᠦ᠍ ᠬᠠᠷᠠ ᠭᠠᠰᠢᠭᠤᠳᠠᠯ ᠲᠡᠭᠦᠰᠴᠦ ᠳᠡᠯᠡᠬᠡᠢ ᠲᠤᠭ ᠢ᠋ᠶ᠋ᠠᠨ ᠳᠠᠬᠢᠨ ᠡᠷᠭᠦᠨᠡ ᠃
ᠨᠠᠪᠴᠢ –– ᠤᠨᠠᠰᠢ ᠦᠭᠡᠢ ᠤᠷᠭᠤᠮᠠᠯ ᠲᠤᠭ᠂ ᠠᠭᠤᠳᠠᠮ ᠳᠡᠯᠡᠬᠡᠢ ᠶ᠋ᠢᠨ ᠰᠦᠯᠳᠡ ᠲᠤᠭ ᠃