ᠵᠢᠷᠭᠢᠵᠦ ᠬᠠᠷᠠᠭᠳᠠᠬᠤ ᠬᠠᠪᠤᠷ - ᠲ ᠂ ᠭᠣᠮᠪᠣᠵᠠᠪ Жиргэж харагдах хавар - Т ᠂ Гомбожав
246ᠵᠢᠷᠭᠢᠵᠦ ᠬᠠᠷᠠᠭᠳᠠᠬᠤ ᠬᠠᠪᠤᠷ
ᠠᠩᠬᠠᠨ ᠤ ᠪᠣᠷᠣᠭᠠᠨ
ᠡᠪᠦᠯᠵᠢᠨ ᠴᠢᠩᠨᠠᠭᠰᠠᠨ ᠠᠮᠠᠷᠠᠭ ᠰᠢᠪᠡᠨᠡᠭᠡ
ᠡᠭᠦᠳᠡ ᠳᠤᠭᠰᠢᠬᠤ ᠳᠤ
ᠥᠴᠥᠭᠡᠳᠦᠷ ᠲᠠᠭ ᠮᠠᠷᠲᠠᠭᠳᠠᠨᠠ
ᠥᠪᠡᠷ ᠢ ᠪᠡᠨ ᠠᠷᠭᠠᠳᠠᠵᠤ ᠴᠢᠳᠠᠭᠰᠠᠨ ᠰᠡᠳᠬᠢᠯ
ᠥᠩᠭᠡᠷᠡᠦ ᠬᠠᠷᠢᠮᠠᠬᠠᠢ
ᠥᠷᠯᠥᠭᠡ ᠨᠣᠶ᠋ᠢᠲᠠᠨ ᠰᠡᠷᠢᠬᠦ ᠳᠦ
ᠡᠪᠡᠰᠦᠨ ᠲᠣᠯᠣᠭᠠᠢ ᠪᠥᠱᠥᠭᠥᠷᠬᠡᠭ ᠪᠤᠯᠲᠠᠯᠵᠠᠨ
ᠮᠢᠨᠤ ᠪᠡᠭᠡᠷᠡᠭᠰᠡᠨ ᠪᠣᠳᠣᠯ ᠢ ᠭᠡᠳᠡᠭᠡᠯᠡᠵᠤ ᠪᠠᠶ᠋ᠢᠯᠠ
ᠬᠥᠪᠬᠢᠨ ᠤᠷᠭᠤᠭᠰᠠᠨ ᠥᠩᠭᠡᠲᠦ ᠮᠥᠭᠥ
ᠵᠡᠭᠡᠯᠢ ᠳᠦᠭᠦᠷᠡᠩ ᠮᠠᠷᠭᠠᠰᠢ ᠵᠢᠷᠤᠨ ᠰᠠᠵᠢᠯᠠᠬᠤ ᠳᠤ
ᠬᠦᠢᠰ ᠨᠢ ᠵᠠᠳᠠᠷᠠᠭᠠ ᠦᠭᠡᠢ ᠴᠡᠴᠡᠭ ᠦᠳ ᠭᠠᠳᠠᠭᠠ ᠭᠦᠶᠦᠯᠳᠦᠨ
ᠭᠥᠰᠡᠯ ᠳᠡᠭᠡᠷᠡ ᠤᠯᠠᠷᠢᠯ ᠪᠡᠯᠭᠡᠳᠡᠵᠤ ᠮᠢᠷᠠᠯᠵᠠᠨᠠ ᠠ᠋
ᠡᠪᠦᠭᠡᠳ ᠪᠠ ᠪᠣᠯᠵᠣᠮᠣᠷ
ᠥᠪᠡᠷ ᠨᠢ ᠪᠣᠯ ᠳᠤᠤᠷ ᠤᠨ ᠣᠷᠬᠢᠭᠤᠯ
ᠥᠲᠡᠯᠬᠦ ᠳᠤᠷᠠ ᠦᠭᠡᠢ
ᠵᠢᠷᠦᠬᠡ ᠨᠢ ᠪᠣᠯ ᠤᠶᠠᠩᠭᠠᠲᠤ ᠪᠣᠯᠵᠣᠮᠣᠷ ᠪᠢᠯᠡ
ᠵᠡᠭᠦᠳᠦᠨ ᠡᠴᠡ ᠪᠡᠨ ᠶᠠᠭᠠᠷᠠᠤᠬᠠᠨ ᠪᠣᠰᠴᠤ
ᠵᠢᠰᠦᠷᠬᠡᠭ ᠮᠣᠳᠣᠳ ᠤᠨ ᠨᠠᠮᠠᠭᠠᠨ ᠠᠴᠠ ᠳᠡᠭᠥᠵᠢᠩᠨᠡᠨ ᠵᠢᠷᠭᠢᠬᠦ ᠳᠦ
ᠡᠷᠲᠡ ᠶᠢᠨ ᠲᠡᠭᠷᠢ
ᠡᠩᠭᠡᠰᠬᠡ ᠬᠡᠷᠡᠭᠰᠡᠬᠦ ᠦᠭᠡᠢ ᠭᠡᠤᠭᠡᠨ ᠴᠢᠷᠡᠢ ᠡᠶᠡᠯᠳᠡᠭ ᠤᠯᠠᠪᠠᠯᠵᠠᠨᠠ
ᠳᠤᠭᠳᠤᠯᠤᠩᠬᠠᠨ ᠬᠠᠩᠭᠢᠨᠠᠬᠤ ᠡᠭᠡᠰᠢᠭ ᠢ ᠨᠢ
ᠳᠠᠭᠤᠳᠠᠵᠤ ᠴᠢᠳᠠᠬᠤ ᠵᠢᠰᠦ ᠣᠯᠳᠠᠬᠤ ᠦᠭᠡᠢ
ᠳᠣᠭᠤᠤᠷ ᠨᠢ ᠴᠢᠩᠨᠠᠨ ᠦᠩᠭᠡᠷᠡᠬᠦ ᠳᠡᠬᠡᠨ
ᠲᠣᠣᠷ ᠪᠣᠯᠵᠣᠮᠣᠷ ᠬᠣᠶᠠᠷ ᠲᠤ
ᠲᠥᠢᠯ ᠦᠭᠡᠢ ᠵᠠᠢ ᠥᠭᠭᠦᠶᠡ ᠭᠡᠵᠤ
ᠳᠤᠳᠤᠷᠠ ᠬᠠᠴᠢᠨ ᠤᠶᠠᠩᠭᠠᠷᠠᠯᠠ ᠠ᠋ ᠁
ᠵᠢᠷᠭᠢᠵᠤ ᠬᠠᠷᠠᠭᠳᠠᠬᠤ ᠬᠠᠪᠤᠷ
ᠴᠡᠯ ᠨᠣᠭᠣᠭᠠᠨ ᠰᠢᠯᠦᠭ ᠦᠨ ᠰᠠᠬᠢᠭᠤᠰᠤ
ᠴᠤᠩᠬᠤ ᠪᠠᠷ ᠳᠣᠲᠣᠭᠰᠢ ᠪᠠᠨ ᠵᠢᠷᠭᠢᠬᠦ ᠳᠦ
ᠴᠡᠮᠴᠡᠭᠡᠷ ᠴᠠᠭᠠᠨ ᠮᠤᠩᠭᠤᠯ ᠪᠣᠳᠣᠯ
ᠡᠪᠦᠯᠵᠢᠶᠡ ᠣᠷᠬᠢᠨ᠂ ᠭᠠᠳᠠᠭᠰᠢ ᠪᠠᠨ ᠳᠡᠪᠲᠡᠷᠢᠨᠡ
ᠨᠠᠭᠠᠳᠤᠮ ᠳᠤ ᠲᠡᠮᠡᠦᠯᠬᠦ ᠭᠡᠤᠭᠡᠳ ᠤᠨ ᠰᠡᠳᠬᠢᠯ
ᠨᠠᠮᠠᠭᠠ ᠪᠥᠬᠥᠨ ᠡᠴᠡ ᠬᠦᠬᠡᠷᠡᠵᠤ
ᠨᠠᠳᠠ ᠤᠷᠤᠭᠤ ᠬᠥᠯᠥᠭᠯᠡᠵᠦ ᠢᠷᠡᠬᠦ ᠭᠡᠤᠭᠡᠨ ᠬᠠᠶ᠋ᠢᠷᠠ
ᠰᠠᠷᠠᠪᠴᠢ ᠣᠷᠢᠶᠠᠨ ᠭᠢᠯᠠᠰᠤᠨᠠ
ᠤᠨᠲᠠᠵᠤ ᠪᠣᠰᠣᠭᠰᠠᠨ ᠡᠷᠪᠡᠬᠡᠢ ᠶᠢᠨ ᠳᠠᠯᠠᠪᠴᠢ
ᠣᠷᠣᠭᠰᠢ ᠭᠠᠩᠬᠤᠬᠤ ᠴᠡᠴᠡᠭ ᠦᠨ ᠰᠢᠯᠪᠢᠨ ᠳᠦ ᠮᠢᠷᠠᠯᠵᠠᠵᠤ
ᠤᠨᠲᠠᠷᠠᠳᠠᠭ ᠦᠭᠡᠢ ᠳᠤᠯᠭᠠ ᠶᠢᠨ ᠭᠠᠯ
ᠤᠯᠠᠷᠢᠯ ᠬᠦᠭᠡᠷᠥᠭᠥᠯᠵᠤ ᠳᠦᠷᠡᠯᠵᠡᠬᠦ ᠳᠡᠬᠡᠨ
ᠮᠢᠨᠤ᠂ ᠵᠡᠭᠦᠨ ᠬᠠᠨᠠ ᠶᠢ ᠵᠤᠤᠮᠠᠯᠵᠠᠩᠬᠠᠨ ᠳᠤᠭᠰᠢᠨᠠ ᠠ᠋
1990.3
ᠵᠠᠯᠠᠭᠤ ᠰᠢᠯᠦᠭᠴᠢᠳ ᠦᠨ ᠴᠣᠪᠣᠷᠠᠯ ᠪᠢᠴᠢᠭ᠌
< ᠢᠷᠡᠬᠦ ᠵᠠᠭᠤᠨ ᠤ ᠬᠣᠩᠬᠣᠨ ᠳᠠᠭᠤᠨ > ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠴᠣᠯᠮᠣᠨᠲᠦᠶᠠᠭᠠ
ᠬᠢᠨᠠᠭᠴᠢ ᠄ ᠭᠠᠸᠠ
2023᠂ 5᠂ 27 ᠪ ᠡᠲᠦᠷ