ᠲᠡᠭᠦᠰᠪᠠᠶᠠᠷ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 1 Төгсбаярын задгай шүлгүүд -1
257ᠲᠡᠭᠦᠰᠪᠠᠶᠠᠷ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ᠦᠳ - 1
ᠡᠭᠦᠯᠡᠰ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠭᠲᠠᠷᠭᠤᠢ ᠰᠡᠢᠮᠡᠯᠵᠡᠨᠡ ᠃
ᠣᠭᠲᠠᠷᠭᠤᠢ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠳᠣᠳ ᠰᠦᠮᠡᠯᠵᠡᠨᠡ ᠃
ᠡᠭᠦᠯᠡᠰ ᠤᠷᠠᠩᠬᠠᠢ ᠤᠤ ᠂ ᠣᠭᠲᠠᠷᠭᠤᠢ ᠴᠣᠭᠣᠷᠣᠩᠬᠠᠢ ᠤᠤ ᠂ ᠣᠳᠣᠳ ᠰᠡᠢᠷᠡᠩᠬᠡᠢ ᠦᠦ ?
ᠰᠠᠨᠠᠭᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠰᠢᠯᠦᠭ ᠰᠢᠷᠭᠤᠯᠴᠠᠨᠠ ᠃
ᠰᠢᠯᠦᠭ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠠᠮᠢᠳᠤᠷᠠᠯ ᠡᠷᠭᠢᠯᠴᠡᠨᠡ
ᠰᠠᠨᠠᠭᠠ ᠲᠠᠯᠪᠢᠭᠤ ᠤᠤ ᠂ ᠰᠢᠯᠦᠭ ᠳᠡᠯᠭᠡᠭᠦᠦ ᠦᠦ ᠂ ᠠᠮᠢᠳᠤᠷᠠᠯ ᠠᠭᠤᠤ ᠤᠤ?
ᠲᠤᠭᠤᠷᠠᠢ ᠶ᠋ᠢᠨ ᠣᠷᠣᠮ ᠲᠩᠷᠢ ᠶ᠋ᠢᠨ ᠬᠡᠯᠲᠡᠷᠬᠡᠢ
1
ᠠᠳᠤᠭᠤᠨ ᠤ᠋ ᠲᠠᠰᠢᠶᠠᠨ ᠳ᠋ᠤ᠌ ᠲᠣᠭᠣᠷ ᠤ᠋ᠨ ᠲᠠᠮᠠᠭᠠ ᠂ ᠠᠲᠠᠷ ᠤ᠋ᠨ ᠲᠠᠰᠢᠶᠠᠨ ᠳ᠋ᠤ᠌ ᠲᠤᠭᠤᠷᠠᠢ ᠶ᠋ᠢᠨ ᠲᠠᠮᠠᠭᠠ ᠃
ᠲᠤᠭᠤᠷᠠᠢ ᠶ᠋ᠢᠨ ᠲᠠᠮᠠᠭᠠ ᠲᠠᠢ ᠭᠠᠵᠠᠷ ᠯᠠ ᠪᠠᠢᠪᠠᠯ ᠲᠤᠭᠤᠯᠴᠢᠨ ᠬᠦᠦ ᠶ᠋ᠢᠨ ᠨᠤᠲᠤᠭ ᠲᠡᠷᠡ ᠃
ᠮᠣᠩᠭᠣᠯ ᠤ᠋ᠨ ᠬᠡᠭᠡᠷᠡ ᠶ᠋ᠢᠨ ᠮᠠᠯ ᠤ᠋ᠨ ᠮᠥᠷ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠲᠤᠯᠭᠠ ᠶ᠋ᠢᠨ ᠰᠠᠭᠤᠷᠢ᠃
2
ᠲᠤᠭᠤᠷᠠᠢ ᠶ᠋ᠢᠨ ᠣᠷᠣᠮ ᠳ᠋ᠤ᠌ ᠲᠣᠨᠣᠭᠰᠠᠨ ᠤᠰᠤᠨ ᠳ᠋ᠤ᠌ ᠲᠤᠩᠭᠠᠯᠠᠭ ᠲᠡᠭᠷᠢ ᠶ᠋ᠢᠨ ᠬᠡᠯᠲᠡᠷᠬᠡᠢ ᠲᠡᠢ᠃
ᠲᠠᠬᠠ ᠲᠠᠢ ᠠᠭᠲᠠ ᠶ᠋ᠢᠨ ᠬᠠᠳᠠᠨ ᠴᠥᠮᠥᠴᠢᠭᠡᠳ ᠲᠠᠯᠠ ᠶ᠋ᠢᠨ ᠮᠠᠩᠨᠠᠢ ᠶ᠋ᠢ ᠰᠣᠷᠪᠢᠰᠢᠭᠤᠯᠴᠢᠪᠠ ᠤᠤ᠂ ᠲᠠᠴᠢᠭᠢᠨᠠᠭᠰᠠᠨ ᠲᠤᠭᠤᠷᠠᠢ ᠶ᠋ᠢᠨ ᠬᠠᠲᠠᠭᠤ ᠴᠠᠪᠴᠢᠭᠠᠨ ᠲᠡᠭᠷᠢ ᠶ᠋ᠢᠨ ᠲᠠᠩᠨᠠᠢ ᠶ᠋ᠢ ᠬᠡᠭᠵᠡᠯᠡᠴᠢᠪᠡ ᠦᠦ?
ᠴᠥᠮ ᠪᠢᠰᠢ ᠃
ᠠᠨᠳᠠ ᠶ᠋ᠢᠨ ᠲᠤᠭᠤᠷᠠᠢ ᠳᠡᠯᠡᠬᠡᠢ ᠶ᠋ᠢᠨ ᠴᠡᠭᠡᠵᠢᠨ ᠳ᠋ᠦ᠍ ᠪᠣᠩᠬᠣᠭᠣᠷᠬᠠᠨ ᠠᠶᠠᠭᠠ ᠰᠡᠢᠯᠦᠭᠰᠡᠨ ᠪᠠᠢᠨᠠ ᠃ ᠠᠭᠠᠳᠠᠷ ᠬᠤᠷᠠ ᠠᠶᠠᠭᠠᠨ ᠳᠡᠭᠡᠵᠢᠨ ᠳ᠋ᠦ᠍ ᠬᠣᠩᠭᠣᠷᠬᠠᠨ ᠰᠢᠯᠦᠭ ᠰᠦᠷᠴᠢᠭᠰᠡᠨ ᠪᠠᠢᠨᠠ ᠃
ᠰᠣᠳᠣᠨ ᠰᠢᠯᠦᠭ ᠲᠦ᠍ ᠨᠢ ᠰᠣᠭᠲᠣᠭᠰᠠᠨ ᠲᠡᠭᠷᠢ ᠨᠢᠳᠦᠨ ᠰᠢᠯ ᠢ᠋ᠶ᠋ᠡᠨ ᠭᠣᠬᠠᠳᠠᠵᠤ ᠬᠠᠭᠠᠯᠤᠭᠰᠠᠨᠠ ᠂ ᠰᠢᠯᠦᠭ ᠲᠣᠨᠣᠭᠰᠠᠨ ᠪᠣᠩᠬᠣᠭᠣᠷᠬᠠᠨ ᠠᠶᠠᠭᠠᠨ ᠳ᠋ᠤ᠌ ᠰᠢᠯ ᠦ᠋ᠨ ᠬᠢᠨᠢ ᠬᠡᠯᠲᠡᠷᠬᠡᠢ ᠪᠤᠲᠠᠷᠠᠵᠤ ᠲᠤᠰᠴᠠᠢ ᠃
ᠪᠣᠩᠬᠣᠭᠣᠷᠬᠠᠨ ᠠᠶᠠᠭᠠᠲᠠᠢ ᠰᠢᠯᠦᠭ ᠳᠣᠲᠣᠷᠠᠬᠢ ᠪᠤᠲᠠᠷᠠᠭᠰᠠᠨ ᠬᠡᠯᠲᠡᠷᠬᠡᠢ ᠡᠴᠡ ᠪᠢ ᠮᠡᠳᠡᠯᠡ ᠄ ᠲᠡᠭᠷᠢ ᠶ᠋ᠢᠨ ᠵᠡᠭᠦᠳᠡᠭ ᠨᠢᠳᠦᠨ ᠰᠢᠯ ᠨᠢ ᠴᠡᠩᠬᠡᠷᠬᠡᠨ ᠥᠩᠭᠡᠲᠡᠢ ᠪᠠᠢᠳᠠᠭ ᠶᠤᠮ ᠪᠠᠢᠨᠠ ᠃
ᠰᠣᠯᠣᠩᠭᠠ ᠲᠠᠯᠠ
1
ᠬᠥᠮᠦᠰ ᠰᠣᠯᠣᠩᠭᠠ ᠶ᠋ᠢ ᠬᠥᠭᠥᠷᠭᠡ ᠭᠡᠳᠡᠭ ᠃
ᠬᠥᠭᠦᠷᠭᠡᠨ ᠳᠣᠭᠤᠤᠷ ᠮᠥᠷᠡᠨ ᠦ᠌ ᠳᠠᠪᠠᠯᠭᠠᠨ ᠃
ᠰᠣᠯᠣᠩᠭᠠᠨ ᠳᠣᠭᠤᠤᠷ ᠮᠣᠷᠢᠨ ᠤ᠋ ᠳᠠᠪᠬᠢᠭᠠᠨ ᠃
ᠠᠢ ! ᠮᠢᠨᠦ ᠨᠤᠲᠤᠭ ᠤ᠋ᠨ ᠰᠣᠯᠣᠩᠭᠠ ᠠ᠋ ᠂ ᠴᠢ ᠬᠥᠭᠥᠷᠭᠡ ᠪᠢᠰᠢ ᠬᠠᠷᠢᠨ ᠮᠣᠷᠢᠨ ᠳᠡᠭᠡᠷᠡ ᠥᠨᠳᠡᠢᠭᠰᠡᠨ ᠬᠦᠦ ᠶ᠋ᠢᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠡᠭᠦᠷᠦᠭᠰᠡᠨ ᠨᠤᠮᠤ ᠃
2
ᠬᠥᠭᠦᠷᠭᠡᠨ ᠰᠣᠯᠣᠩᠭᠠ ᠨᠤᠮᠤ ᠶᠤᠮ ᠪᠣᠯ ᠬᠥᠪᠴᠢ ᠨᠢ ᠲᠡᠷᠡ ᠲᠠᠯᠠ ᠪᠠᠢᠨᠠ ᠰᠢᠦ !
ᠰᠣᠩᠭᠢᠨᠠ ᠶ᠋ᠢᠨ ᠨᠣᠭᠣᠭᠠᠨ ᠲᠠᠯᠠ ᠳᠡᠭᠡᠭᠦᠷ ᠰᠣᠯᠣᠩᠭᠠᠨ ᠳᠣᠯᠣᠭᠠᠨ ᠥᠩᠭᠡ –– ᠭᠤᠸᠠ ᠰᠠᠢᠬᠠᠨ ᠤ᠋ ᠪᠦ᠋ᠷᠢᠯᠣᠠ ᠃
ᠨᠣᠮᠣᠨ ᠰᠣᠯᠣᠩᠭᠠ ᠠ᠋ ᠂ ᠬᠥᠪᠴᠢ ᠳᠡᠭᠡᠷᠡ ᠪᠡᠨ ᠣᠨᠢᠯᠠᠬᠤ ᠰᠤᠮᠤ ᠴᠢᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠨᠢ ᠬᠠᠮᠢᠭᠠᠬᠠᠨᠠᠡ ᠪᠠᠢᠨᠠ ᠪᠣᠢ ?
–– ᠵᠢᠷᠦᠬᠡ ᠶ᠋ᠢ ᠴᠢᠨᠢ ᠬᠡᠳᠦᠢᠨᠡᠢ ᠣᠨᠣᠴᠢᠬᠠᠭᠠᠳ ᠵᠢᠪᠡ ᠲᠡᠢ ᠪᠡᠨ ᠵᠢᠷᠦᠬᠡᠨ ᠳ᠋ᠦ᠍ ᠴᠢᠨᠢ ᠪᠠᠢᠨᠠ ᠰᠢᠦ᠂ ᠰᠤᠮᠤ ᠮᠢᠨᠢ ᠃
ᠵᠢᠭᠠᠯ ᠠ᠋ᠴᠠ ᠪᠠᠨ ᠵᠢᠷᠦᠬᠡ ᠮᠢᠨᠢ ᠰᠣᠯᠣᠩᠭᠠᠨ ᠳ᠋ᠤ᠌ ᠳᠤᠷᠠᠲᠠᠢ ᠰᠠᠨ ᠂ ᠵᠡᠪᠡ ᠳ᠋ᠦ᠍ ᠰᠦᠪᠡᠯᠡᠭᠳᠡᠴᠢᠬᠡᠭᠡᠳ ᠯᠡ ᠳᠡᠭᠡᠭᠡ ᠪᠢᠵᠡ ᠃
3
ᠰᠣᠩᠭᠢᠨᠠ ᠶ᠋ᠢᠨ ᠨᠣᠭᠣᠭᠠᠨ 《ᠬᠥᠪᠴᠢ 》 ᠰᠤᠨᠤᠯᠵᠠᠵᠤ ᠰᠣᠯᠣᠩᠭᠠᠨ ᠳᠣᠯᠣᠭᠠᠨ ᠥᠩᠭᠡ ᠨᠣᠮᠤᠯᠵᠠᠨᠡ ᠃
ᠥᠷᠭᠡᠨ ᠯᠡ ᠭᠡᠵᠦ ᠰᠠᠨᠠᠳᠠᠭ ᠶᠤᠮ ᠳᠠ ᠲᠠᠯᠠ ᠪᠠᠨ ᠂ ᠥᠨᠥ ᠶᠠᠭᠠᠬᠢᠭᠠᠳ ᠨᠣᠮᠣᠨ ᠤ᠋ ᠬᠥᠪᠴᠢ ᠪᠣᠯᠵᠤ ᠨᠠᠷᠢᠰᠤᠨ ᠰᠤᠨᠤᠴᠢᠪᠠ ?
–– ᠦᠬᠡᠷ ᠦ᠋ᠨ ᠠᠷᠠᠰᠤ ᠶ᠋ᠢ ᠲᠠᠲᠠᠪᠠᠯ ᠬᠤᠢᠪᠢ ᠶ᠋ᠢᠨ ᠰᠤᠷ ᠭᠠᠷᠳᠠᠭ ᠰᠢᠭ᠋ ᠥᠷᠭᠡᠨ ᠲᠠᠯᠠ ᠶ᠋ᠢ ᠲᠠᠲᠠᠪᠠᠯ ᠬᠥᠪᠴᠢ ᠶ᠋ᠢᠨ ᠰᠢᠷᠪᠥᠰᠥ ᠭᠠᠷᠬᠤ ᠦᠭᠡᠢ ᠦᠦ ?
ᠵᠠ᠂ ᠲᠡᠷᠡ ᠲᠠᠯᠠ ᠮᠢᠨᠢ ᠂ ᠨᠣᠮᠢᠨ ᠰᠣᠯᠣᠩᠭᠠ ᠶ᠋ᠢ ᠯᠡ ᠬᠥᠪᠴᠢᠯᠡᠨ ᠮᠠᠲᠠᠭᠠᠳ ᠲᠡᠳᠦᠢ ᠦᠭᠡᠢ ᠂ ᠨᠣᠮᠢᠨ ᠲᠩᠷᠢ ᠶ᠋ᠢ ᠴᠦ᠍ ᠬᠥᠮᠥᠢᠲᠡᠯᠡ ᠲᠠᠲᠠᠵᠤ ᠪᠠᠢᠨᠠ ᠰᠢᠦ !
ᠲᠠᠯᠠ ᠳ᠋ᠤ᠌ ᠬᠥᠪᠴᠢ ᠶ᠋ᠢᠨ ᠰᠢᠷᠪᠥᠰᠥ ᠲᠡᠢ᠃
ᠲᠡᠰᠦᠷᠡᠰᠢ ᠦᠭᠡᠢ ᠡᠷᠴᠢᠰ ᠲᠡᠢ ᠃
ᠲᠡᠮᠡᠭᠡ
1
ᠲᠡᠮᠡᠭᠡ ᠲᠣᠮᠣ ᠪᠡᠶᠡ ᠲᠡᠢ ᠃
ᠲᠡᠮᠡᠭᠡ ᠲᠣᠰᠣᠨ ᠪᠦᠬᠦ ᠲᠡᠢ ᠃
ᠪᠦᠬᠦ ᠨᠢ ᠮᠢᠬᠠᠨ ᠪᠦᠭᠦᠷᠭᠡ
ᠪᠡᠶᠡ ᠨᠢ ᠮᠠᠩᠬᠠᠨ ᠬᠥᠭᠥᠷᠭᠡ ᠃
ᠮᠢᠬᠠᠨ ᠪᠥᠭᠥᠷᠭᠡᠨ ᠳᠤᠮᠳᠠ ᠪᠠᠨ
ᠮᠢᠩᠭᠠᠨ ᠵᠢᠩ ᠢ᠋ ᠬᠣᠮᠯᠠᠭᠠᠳ ᠮᠠᠩᠬᠠᠨ ᠨᠡᠯᠦᠭᠡᠷ ᠳᠠᠯᠠᠢ ᠶ᠋ᠢ ᠮᠠᠭᠤᠬᠠᠨ ᠭᠡᠲᠦᠯᠦᠭᠦᠯᠳᠡᠭ ᠠᠮᠢᠳᠤ ᠬᠥᠭᠥᠷᠭᠡ ᠶᠦ᠍ᠮ ᠳᠠ᠂ ᠬᠥᠭᠡᠷᠦᠬᠦᠢ !
2
ᠲᠣᠮᠣ ᠪᠡᠶᠡ ᠲᠡᠢ ᠲᠡᠮᠡᠭᠡ ᠃
ᠲᠣᠰᠣᠨ ᠪᠦᠬᠦ ᠲᠡᠢ ᠲᠡᠮᠡᠭᠡ ᠃
ᠲᠣᠮᠣ ᠭᠡᠭᠴᠢ ᠪᠡᠶᠡ ᠨᠢ ᠲᠣᠯᠣᠭᠠᠢ ᠲᠠᠢ ᠪᠠᠨ ᠰᠥᠭᠥᠳᠦᠭᠡᠳ ᠨᠦᠰᠡᠷ ᠬᠦᠨᠳᠦ ᠠᠴᠢᠶᠠ ᠶ᠋ᠢ ᠬᠥᠰᠡᠷ ᠬᠡᠪᠲᠡᠵᠦ ᠲᠤᠰᠤᠨᠠ ᠃
ᠦᠶᠡᠲᠦ ᠳᠥᠷᠪᠡᠨ ᠮᠥᠴᠢ ᠨᠢ ᠡᠪᠦᠳᠦᠭ ᠨᠤᠭᠤᠷᠠᠵᠤ ᠪᠠᠢᠪᠠᠴᠤ ᠥᠨᠳᠡᠢᠨ ᠪᠣᠰᠴᠤ ᠵᠣᠭᠰᠣᠮᠠᠭᠴᠠ ᠥᠯᠮᠡᠢ ᠳᠡᠭᠡᠷᠡ ᠪᠡᠨ ᠪᠠᠭᠠᠨᠠ ᠪᠠᠢᠨᠠ ᠳᠠ ᠂ ᠬᠦᠴᠦᠲᠡᠨ !
ᠲᠡᠮᠡᠭᠡᠨ ᠦ᠌ ᠪᠡᠶᠡ ᠲᠣᠮᠣ ᠃
ᠲᠡᠩᠬᠡᠭᠡ ᠨᠢ ᠪᠡᠶᠡᠡᠴᠡ ᠪᠡᠨ ᠲᠣᠮᠣ ᠃
ᠲᠤᠭᠤᠯ ᠪᠤᠬᠠ
ᠲᠤᠭᠤᠯ ᠲᠤᠭᠤᠷᠭᠠᠨ ᠳᠡᠭᠡᠷᠡ ᠳᠤᠬᠤ ᠪᠠᠨ ᠱᠦᠷᠭᠦᠭᠡᠨᠡ ᠃
–– ᠤᠷᠭᠤᠬᠤ ᠶ᠋ᠢᠨ ᠲᠥᠯᠥᠭᠡ ᠮᠥᠷᠭᠥᠳᠡᠭ ᠰᠠᠨ ᠭᠡᠵᠦ ᠡᠪᠡᠷᠯᠡᠭᠡᠳᠦᠢ ᠲᠤᠭᠤᠯ ᠡᠪᠡᠷ ᠢ᠋ᠶ᠋ᠡᠨ ᠬᠡᠯᠡᠨᠡ ᠃
–– ᠮᠥᠷᠭᠥᠬᠦ ᠶ᠋ᠢᠨ ᠲᠥᠯᠥᠭᠡ ᠤᠷᠭᠤᠳᠠᠭ ᠶᠤᠮ ᠭᠡᠵᠦ ᠮᠥᠭᠡᠷᠡᠩᠬᠡᠨ ᠪᠤᠬᠠ ᠲᠤᠭᠤᠯ ᠳ᠋ᠤ᠌ ᠮᠡᠷᠭᠡᠯᠡᠨᠡ ᠃
ᠡᠪᠡᠷᠳᠡᠢ ᠪᠤᠬᠠ ᠲᠤᠯᠬᠤ ᠳᠤᠷᠠᠲᠠᠢ᠃
ᠡᠪᠡᠷᠯᠡᠭᠡᠳᠦᠢ ᠲᠤᠭᠤᠯ ᠲᠣᠭᠯᠠᠬᠤ ᠳᠤᠷᠠᠲᠠᠢ ᠃
ᠠᠭᠤᠯᠠ ᠡᠭᠦᠯᠡ
1
ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠡᠭᠦᠯᠡ ᠃
ᠡᠭᠦᠯᠡᠨ ᠦ᠌ ᠬᠣᠷᠮᠣᠢ ᠳ᠋ᠤ᠌ ᠠᠭᠤᠯᠠ ᠃
ᠠᠭᠤᠯᠠ ᠨᠢ ᠪᠠᠲᠤ ᠰᠦᠮᠪᠦᠷ –– ᠵᠣᠷᠢᠭ ᠃
ᠰᠢᠨᠲᠠᠷᠠᠰᠢ ᠦᠭᠡᠢ ᠃
ᠡᠭᠦᠯᠡ ᠨᠢ ᠪᠠᠬᠠᠨ ᠬᠥᠪᠰᠥᠭᠡᠷ –– ᠬᠦᠰᠡᠯ ᠃
ᠰᠢᠷᠣᠢᠳᠠᠰᠢ ᠦᠭᠡᠢ ᠃
2
ᠠᠭᠤᠯᠠᠨ ᠲᠣᠯᠣᠭᠠᠢ ᠡᠭᠦᠯᠡᠨ ᠮᠠᠯᠠᠭᠠᠢ ᠲᠠᠢ᠃
ᠡᠭᠦᠯᠡᠨ ᠲᠣᠯᠣᠭᠠᠢ ᠠᠭᠤᠯᠠᠨ ᠮᠠᠩᠨᠠᠢ ᠲᠠᠢ ᠃
ᠮᠠᠯᠠᠭᠠᠢ ᠨᠢ ᠰᠠᠯᠬᠢᠨ ᠳ᠋ᠤ᠌ ᠡᠯᠡᠭᠳᠡᠨᠡ ᠃
ᠮᠠᠩᠨᠠᠢ ᠨᠢ ᠰᠠᠯᠬᠢᠨ ᠳ᠋ᠤ᠌ ᠢᠯᠢᠭᠳᠡᠨᠡ ᠃
ᠡᠯᠡᠭᠳᠡᠬᠦ ᠮᠠᠯᠠᠭᠠᠢ ᠶ᠋ᠢ ᠨᠢ ᠤᠰᠤ ᠪᠠᠷ ᠡᠮᠵᠢᠵᠦ ᠢᠯᠢᠭᠳᠡᠬᠦ ᠮᠠᠩᠨᠠᠢ ᠶ᠋ᠢ ᠨᠢ ᠤᠷᠭᠤᠮᠠᠯ ᠢ᠋ᠶ᠋ᠠᠷ ᠮᠢᠯᠢᠶᠠᠶᠤ !
ᠪᠠᠢᠭᠠᠯᠢ ᠶ᠋ᠢᠨ ᠵᠢᠰᠦᠨ ᠳ᠋ᠦ᠍ ᠵᠠᠰᠠᠯ ᠵᠣᠬᠢᠴᠠᠭᠤᠨ ᠪᠣᠯ ᠪᠢᠴᠢᠬᠠᠨ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠬᠦᠰᠡᠯ ᠵᠤᠵᠠᠭᠠᠨ ᠰᠢᠦ ᠃
3
ᠡᠭᠦᠯᠡᠨ ᠦ᠌ ᠰᠡᠭᠦᠳᠡᠷ ᠠᠭᠤᠯᠠᠨ ᠲᠣᠯᠣᠭᠠᠢ ᠳ᠋ᠤ᠌ ᠃
ᠭᠤᠯᠠᠨ ᠰᠡᠭᠦᠳᠡᠷ ᠤᠰᠤᠨ ᠤ᠋ ᠡᠯᠢᠭᠡᠨ ᠳ᠋ᠦ᠍ ᠃
ᠠᠭᠤᠯᠠᠨ ᠲᠣᠯᠣᠭᠠᠢ ᠤᠰᠤᠨ ᠳ᠋ᠤ᠌ ᠲᠣᠩᠭᠣᠷᠤᠭᠠᠳ ᠡᠭᠦᠯᠡᠨ ᠮᠠᠯᠠᠭᠠᠢ ᠤᠰᠤᠨ ᠳ᠋ᠤ᠌ ᠲᠣᠨᠣᠯᠠ᠃
ᠲᠣᠩᠭᠣᠷᠤᠭᠰᠠᠨ ᠰᠡᠭᠦᠳᠡᠷ ᠢ᠋ ᠳᠥᠰᠢᠨ ᠪᠤᠰᠬᠠᠵᠤ ᠲᠣᠨᠣᠭᠰᠠᠨ ᠰᠡᠭᠦᠳᠡᠷ ᠢ᠋ ᠱᠦᠭᠦᠨ ᠪᠤᠴᠠᠭᠠᠵᠤ ᠴᠤᠬᠠᠮ ᠳᠦᠷᠢ ᠥᠭᠡᠳᠡ ᠨᠢ ᠭᠡᠲᠦᠯᠭᠡᠭᠴᠢ ᠪᠣᠯ ᠴᠤᠴᠠᠷᠠᠰᠢ ᠦᠭᠡᠢ《 ᠦᠨᠡᠨ ᠠᠬᠤᠢ 》 ᠯᠠ ᠴᠣᠷ ᠤ᠋ᠨ ᠭᠠᠭᠴᠠᠭᠠᠷ ᠮᠥᠨ ᠪᠥᠯᠥᠭᠡ ᠃